𑁩𑁪. 𑀤𑀸𑀲𑀯𑀢𑁆𑀣𑀼𑀓𑀣𑀸

𑁯𑁭. 𑀤𑀸𑀲𑀸𑀢𑀺 𑀘𑁂𑀝𑀓𑀸. 𑀢𑁂 𑀳𑀺 𑀲𑀸𑀫𑀺𑀓𑁂𑀳𑀺 𑀤𑀼𑀓𑁆𑀔𑁂 𑀯𑀸 𑀤𑀼𑀝𑁆𑀞𑀓𑀫𑁆𑀫𑁂 𑀯𑀸 𑀅𑀲𑀻𑀬𑀦𑁆𑀢𑀺 𑀔𑀺𑀧𑀻𑀬𑀦𑁆𑀢𑀻𑀢𑀺 𑀤𑀸𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣𑀸𑀢𑀺 𑀘𑀢𑀽𑀲𑀼 𑀤𑀸𑀲𑁂𑀲𑀼. ‘‘𑀖𑀭𑀤𑀸𑀲𑀺𑀬𑀸 𑀧𑀼𑀢𑁆𑀢𑁄’’𑀢𑀺 𑀇𑀫𑀺𑀦𑀸 𑀅𑀦𑁆𑀢𑁄𑀕𑁂𑀳𑁂 𑀖𑀭𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀚𑀸𑀢𑁄 𑀅𑀦𑁆𑀢𑁄𑀚𑀸𑀢𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀥𑀦𑀁 𑀤𑀢𑁆𑀯𑀸 𑀓𑀻𑀢𑁄 𑀥𑀦𑀓𑁆𑀓𑀻𑀢𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀥𑀦𑀓𑁆𑀓𑀻𑀢𑁄 𑀦𑀸𑀫𑀸’’𑀢𑀺𑀆𑀤𑀺. 𑀥𑀦𑁂𑀦 𑀓𑀻𑀢𑁄 𑀥𑀦𑀓𑁆𑀓𑀻𑀢𑁄𑀢𑀺 𑀯𑀘𑀦𑀢𑁆𑀣𑁄𑀧𑀺 𑀬𑀼𑀢𑁆𑀢𑁄𑀬𑁂𑀯. 𑀤𑀸𑀲𑀘𑀸𑀭𑀺𑀢𑁆𑀢𑀦𑁆𑀢𑀺 𑀤𑁂𑀲𑀓𑀸𑀮𑀯𑀲𑁂𑀦 𑀤𑀸𑀲𑀸𑀦𑀁 𑀘𑀸𑀭𑀺𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀤𑁂𑀲𑁂, 𑀓𑀸𑀮𑁂 𑀯𑀸.

𑀓𑀭𑀫𑀭𑀸𑀦𑀻𑀢𑁄 𑀦𑀸𑀫𑀸𑀢𑀺 𑀏𑀢𑁆𑀣 𑀓𑀭𑀫𑀭𑁄𑀢𑀺 𑀯𑀦𑁆𑀤𑀺. 𑀲𑁄 𑀳𑀺 𑀲𑀢𑁆𑀢𑀽𑀦𑀁 𑀓𑀭𑁂𑀦 𑀳𑀢𑁆𑀣𑁂𑀦 𑀫𑀭𑀺𑀢𑀩𑁆𑀩𑀢𑁆𑀢𑀸 𑀓𑀭𑀫𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀭𑀫𑀭𑀪𑀸𑀯𑁂𑀦 𑀆𑀦𑀻𑀢𑁄 𑀓𑀭𑀫𑀭𑀸𑀦𑀻𑀢𑁄. 𑀢𑀺𑀭𑁄𑀭𑀝𑁆𑀞𑀸 𑀆𑀳𑀭𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑀮𑀸𑀧𑁂𑀢𑁆𑀯𑀸 𑀯𑀸𑀢𑀺 𑀧𑀮𑁄𑀪𑁂𑀢𑁆𑀯𑀸 𑀯𑀸. 𑀢𑀢𑁄𑀢𑀺 𑀓𑀲𑁆𑀫𑀸𑀘𑀺 𑀕𑀸𑀫𑀢𑁄. 𑀫𑀦𑀼𑀲𑁆𑀲𑀸 𑀏𑀯 𑀫𑀸𑀦𑀼𑀲𑁆𑀲𑀓𑀸𑀦𑀺. 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀲𑀸𑀥𑀸𑀭𑀡𑀪𑀸𑀯𑁂𑀦 𑀲𑀸𑀫𑀜𑁆𑀜𑀪𑀸𑀯𑀢𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀺𑀲𑀤𑁆𑀤𑁂𑀦 𑀦 𑀓𑁂𑀯𑀮𑀁 𑀥𑀦𑀸𑀦𑀺𑀬𑁂𑀯 𑀆𑀳𑀭𑀦𑁆𑀢𑀺, 𑀅𑀣 𑀔𑁄 𑀫𑀸𑀦𑀼𑀲𑁆𑀲𑀓𑀸𑀦𑀺𑀧𑀻𑀢𑀺 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀢𑀢𑁆𑀣𑀸𑀢𑀺 𑀫𑀸𑀦𑀼𑀲𑁆𑀲𑀓𑁂𑀲𑀼. 𑀏𑀯𑀭𑀽𑀧𑁄 𑀓𑀭𑀫𑀭𑀸𑀦𑀻𑀢𑁄 𑀤𑀸𑀲𑁄 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀲𑀩𑁆𑀩𑀲𑀸𑀥𑀸𑀭𑀡𑁂𑀦𑀸𑀢𑀺 𑀩𑀦𑁆𑀥𑀦𑀸𑀕𑀸𑀭𑀲𑁄𑀥𑀦𑀓𑀸𑀮𑁂 𑀲𑀩𑁆𑀩𑁂𑀲𑀁 𑀲𑀸𑀥𑀸𑀭𑀡𑁂𑀦.

𑀤𑀸𑀲𑀩𑁆𑀬𑀦𑁆𑀢𑀺 𑀤𑀸𑀲𑀲𑁆𑀲 𑀪𑀸𑀯𑁄 𑀤𑀸𑀲𑀩𑁆𑀬𑀁, 𑀢𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀸𑀲𑀪𑀸𑀯’’𑀦𑁆𑀢𑀺. ‘‘𑀲𑀬𑀫𑁂𑀯𑀸’’𑀢𑀺 𑀇𑀫𑀺𑀦𑀸 𑀲𑀸𑀫𑀁𑀲𑀤𑁆𑀤𑁄 𑀲𑀬𑀫𑀢𑁆𑀣𑁂 𑀦𑀺𑀧𑀸𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀪𑀼𑀚𑀺𑀲𑁆𑀲𑀺𑀢𑁆𑀣𑀺𑀬𑁄𑀢𑀺 𑀭𑀜𑁆𑀜𑁄 𑀪𑀼𑀚𑀺𑀲𑁆𑀲𑀺𑀢𑁆𑀣𑀺𑀬𑁄. 𑀯𑀡𑁆𑀡𑀤𑀸𑀲𑀻𑀳𑀻𑀢𑀺 𑀦𑀕𑀭𑀲𑁄𑀪𑀺𑀦𑀻𑀳𑀺. 𑀢𑀸 𑀳𑀺 𑀯𑀡𑁆𑀡𑀲𑀫𑁆𑀧𑀦𑁆𑀦𑀤𑀸𑀲𑀺𑀪𑀸𑀯𑀢𑁄 𑀯𑀡𑁆𑀡𑀤𑀸𑀲𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀸𑀲𑀦𑁆𑀢𑀺 𑀪𑀼𑀚𑀺𑀲𑁆𑀲𑀺𑀢𑁆𑀣𑀻𑀦𑀁. 𑀧𑀡𑁆𑀡𑀦𑁆𑀢𑀺 𑀤𑀸𑀲𑀺𑀧𑀡𑁆𑀡𑀁. 𑀪𑀝𑀺𑀧𑀼𑀢𑁆𑀢𑀓𑀕𑀡𑀸𑀤𑀻𑀦𑀦𑁆𑀢𑀺 𑀆𑀤𑀺𑀲𑀤𑁆𑀤𑁂𑀦 𑀫𑀮𑁆𑀮𑀧𑀼𑀢𑁆𑀢𑀕𑀡𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀇𑀫𑀺𑀦𑀸 𑀩𑀳𑀼𑀲𑀸𑀫𑀺𑀓𑀤𑀸𑀲𑀁 𑀤𑀲𑁆𑀲𑁂𑀢𑀺. 𑀢𑁂𑀳𑀻𑀢𑀺 𑀪𑀝𑀺𑀧𑀼𑀢𑁆𑀢𑀓𑀕𑀡𑀸𑀤𑀻𑀳𑀺. 𑀅𑀤𑀺𑀦𑁆𑀦𑀸 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑀸𑀢𑀺 𑀩𑀳𑀽𑀲𑀼 𑀲𑀸𑀫𑀺𑀓𑁂𑀲𑀼 𑀏𑀓𑁂𑀦𑀧𑀺 𑀅𑀤𑀺𑀦𑁆𑀦𑀸 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑀸. 𑀢𑁂𑀧𑀻𑀢𑀺 𑀆𑀭𑀸𑀫𑀺𑀓𑀤𑀸𑀲𑁂𑀧𑀺. 𑀇𑀫𑀲𑁆𑀫𑀺𑀁 𑀆𑀭𑀸𑀫𑀺𑀓𑀤𑀸𑀲𑀧𑀩𑁆𑀩𑀸𑀚𑀦𑁂 𑀅𑀝𑁆𑀞𑀓𑀣𑀸𑀯𑀸𑀤𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀳𑀸𑀧𑀘𑁆𑀘𑀭𑀺𑀬’’𑀦𑁆𑀢𑀺𑀆𑀤𑀺. ‘‘𑀢𑀓𑁆𑀓’’𑀦𑁆𑀢𑀺 𑀧𑀤𑀁 ‘‘𑀆𑀲𑀺𑀢𑁆𑀢𑀓’’𑀇𑀢𑀺 𑀧𑀤𑁂 𑀓𑀫𑁆𑀫𑀁. ‘‘𑀲𑀻𑀲𑁂’’𑀢𑀺 𑀧𑀤𑀁 ‘‘𑀆𑀲𑀺𑀢𑁆𑀢𑀓’’𑀇𑀢𑀺 𑀧𑀤𑁂 𑀆𑀥𑀸𑀭𑁄. 𑀓𑁂𑀲𑀼𑀘𑀺 𑀚𑀦𑀧𑀤𑁂𑀲𑀼 𑀤𑁂𑀲𑀘𑀸𑀭𑀺𑀢𑁆𑀢𑀯𑀲𑁂𑀦 𑀲𑀻𑀲𑁂 𑀢𑀓𑁆𑀓𑀲𑁆𑀲 𑀆𑀲𑀺𑀜𑁆𑀘𑀦𑀁 𑀤𑀸𑀲𑀸𑀦𑀁 𑀪𑀼𑀚𑀺𑀲𑁆𑀲𑀓𑀭𑀡𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀆𑀭𑀸𑀫𑀺𑀓𑀁 𑀤𑁂𑀫𑀸’’𑀢𑀺 𑀯𑀘𑀦𑀁 𑀤𑀸𑀲𑀸𑀦𑀁 𑀪𑀼𑀚𑀺𑀲𑁆𑀲𑀯𑀘𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁂𑀦 𑀓𑁂𑀦𑀘𑀺 𑀯𑁄𑀳𑀸𑀭𑁂𑀦𑀸𑀢𑀺 ‘‘𑀆𑀭𑀸𑀫𑀺𑀓𑀁 𑀤𑁂𑀫𑀸’’𑀢𑀺 𑀯𑀸 ‘‘𑀆𑀭𑀸𑀫𑀺𑀓𑀤𑀸𑀲𑀁 𑀤𑁂𑀫𑀸’’𑀢𑀺 𑀯𑀸 ‘‘𑀓𑀧𑁆𑀧𑀺𑀬𑀓𑀸𑀭𑀓𑀁 𑀤𑁂𑀫𑀸’’𑀢𑀺 𑀯𑀸 𑀬𑁂𑀦 𑀓𑁂𑀦𑀘𑀺 𑀯𑁄𑀳𑀸𑀭𑁂𑀦. 𑀤𑁆𑀯𑀻𑀲𑀼 𑀅𑀝𑁆𑀞𑀓𑀣𑀸𑀯𑀸𑀤𑁂𑀲𑀼 𑀓𑀼𑀭𑀼𑀦𑁆𑀤𑀺𑀯𑀸𑀤𑀲𑁆𑀲 𑀧𑀘𑁆𑀙𑀸 𑀯𑀼𑀢𑁆𑀢𑀢𑁆𑀢𑀸 𑀲𑁄𑀬𑁂𑀯 𑀧𑀫𑀸𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑀸𑀢𑀺 𑀤𑀼𑀓𑁆𑀔𑀁 𑀕𑀢𑀫𑀦𑀼𑀲𑁆𑀲𑀸. 𑀏𑀢𑁂𑀢𑀺 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑁂. 𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀤𑀸𑀲𑀪𑀸𑀯𑀁 𑀉𑀧𑀕𑀢𑀓𑀸𑀮𑁂 𑀚𑀸𑀢𑀁 𑀧𑀼𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀣 𑀧𑀦 𑀫𑀸𑀢𑀸𑀧𑀺𑀢𑀭𑁄 𑀤𑀸𑀲𑀪𑀸𑀯𑀁 𑀉𑀧𑀕𑀢𑀸, 𑀦 𑀧𑀼𑀢𑁆𑀢𑁄, 𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. ‘‘𑀪𑀺𑀓𑁆𑀔𑀼𑀲𑁆𑀲𑀸’’𑀢𑀺𑀧𑀤𑀁 ‘‘𑀜𑀸𑀢𑀓𑀸 𑀯𑀸 𑀉𑀧𑀝𑁆𑀞𑀸𑀓𑀸 𑀯𑀸’’𑀢𑀺𑀧𑀤𑁂𑀲𑀼 𑀲𑀸𑀫𑀺𑀲𑀫𑁆𑀩𑀦𑁆𑀥𑁄, ‘‘𑀤𑁂𑀦𑁆𑀢𑀻’’𑀢𑀺 𑀧𑀤𑁂 𑀲𑀫𑁆𑀧𑀤𑀸𑀦𑀁. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲. 𑀇𑀫𑀦𑁆𑀢𑀺 𑀤𑀸𑀲𑀁. 𑀅𑀪𑀺𑀭𑀫𑀺𑀲𑁆𑀲𑀢𑀻𑀢𑀺 𑀪𑀺𑀓𑁆𑀔𑀼𑀪𑀸𑀯𑁂 𑀅𑀪𑀺𑀭𑀫𑀺𑀲𑁆𑀲𑀢𑀺. 𑀯𑀺𑀩𑁆𑀪𑀫𑀺𑀲𑁆𑀲𑀢𑀻𑀢𑀺 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀕𑀺𑀳𑀺𑀪𑀸𑀯𑀁 𑀪𑀫𑀺𑀲𑁆𑀲𑀢𑀺. 𑀇𑀢𑀺 𑀯𑀢𑁆𑀯𑀸 𑀤𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀲𑁆𑀲𑀸𑀫𑀺𑀓𑀤𑀸𑀲𑁄𑀢𑀺 𑀧𑀭𑀺𑀕𑁆𑀕𑀸𑀳𑀓𑀲𑀸𑀫𑀺𑀓𑀯𑀺𑀭𑀳𑀺𑀢𑁄 𑀤𑀸𑀲𑁄. 𑀦𑀺𑀲𑁆𑀲𑀸𑀫𑀺𑀓𑀲𑁆𑀲 𑀤𑀸𑀲𑀲𑁆𑀲 𑀭𑀸𑀚𑀸 𑀲𑀸𑀫𑀻, 𑀢𑀲𑁆𑀫𑀸 𑀭𑀜𑁆𑀜𑀸 𑀅𑀧𑀭𑀺𑀕𑁆𑀕𑀳𑀺𑀢𑁂 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀪𑀼𑀚𑀺𑀲𑁆𑀲𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀧𑀭𑀺𑀕𑁆𑀕𑀳𑀺𑀢𑁂 𑀭𑀸𑀚𑀸𑀦𑀁 𑀓𑀸𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀚𑀸𑀦𑀦𑁆𑀢𑁄𑀢𑀺 𑀅𑀢𑁆𑀢𑀦𑁄 𑀤𑀸𑀲𑀪𑀸𑀯𑀫𑀚𑀸𑀦𑀦𑁆𑀢𑁄.

𑀅𑀦𑀼𑀭𑀸𑀥𑀧𑀼𑀭𑀸𑀢𑀺 𑀅𑀦𑀼𑀭𑀸𑀥𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀢𑀺 𑀧𑀼𑀢𑁆𑀢𑁄. 𑀇𑀥𑀸𑀢𑀺 𑀭𑁄𑀳𑀡𑁂. 𑀫𑀸𑀢𑀭𑀁 𑀧𑀼𑀘𑁆𑀙𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀕𑀫𑁆𑀫𑀸𑀢𑀺 𑀆𑀕𑀦𑁆𑀢𑁆𑀯𑀸. 𑀅𑀢𑀺𑀘𑁆𑀙𑀣𑀸𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀇𑀘𑁆𑀙𑀣, 𑀇𑀥 𑀓𑀺𑀜𑁆𑀘𑀺 𑀤𑁂𑀬𑁆𑀬𑀥𑀫𑁆𑀫𑀁 𑀦𑀢𑁆𑀣𑀺, 𑀇𑀤𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀞𑀸𑀢𑀼𑀫𑀺𑀘𑁆𑀙𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀢𑀺 𑀖𑀭𑀲𑀸𑀫𑀺𑀓𑀸. 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀧𑀝𑀺𑀚𑀕𑁆𑀕𑀦𑁆𑀢𑀸 𑀯𑀲𑀸𑀧𑁂𑀲𑀼𑀦𑁆𑀢𑀺 𑀬𑁄𑀚𑀦𑀸.