𑁩𑁩. 𑀇𑀡𑀸𑀬𑀺𑀓𑀯𑀢𑁆𑀣𑀼𑀓𑀣𑀸

𑁯𑁬. 𑀇𑀡𑀸𑀬𑀺𑀓𑁄 𑀦𑀸𑀫𑀸𑀢𑀺 𑀏𑀢𑁆𑀣 𑀇𑀡𑀦𑁆𑀢𑀺 𑀉𑀤𑁆𑀥𑀸𑀭𑁄. 𑀲𑁄 𑀳𑀺 𑀬𑀲𑁆𑀫𑀸 𑀏𑀢𑀺 𑀯𑀼𑀤𑁆𑀥𑀺𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀇𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀕𑀡𑁆𑀳𑀸𑀢𑀺, 𑀥𑀸𑀭𑁂𑀢𑀻𑀢𑀺 𑀯𑀸 𑀇𑀡𑀸𑀬𑀺𑀓𑁄. 𑀬𑀁 𑀯𑀸𑀢𑀺 𑀚𑀦𑀁 𑀯𑀸 𑀆𑀞𑀧𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀞𑀧𑁂𑀢𑁆𑀯𑀸𑀢𑀺 𑀘 𑀧𑁂𑀲𑀦𑀢𑁆𑀣𑀸𑀬 𑀥𑀦𑀲𑀸𑀫𑀺𑀓𑀲𑁆𑀲 𑀲𑀦𑁆𑀢𑀺𑀓𑁂 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀆𑀓𑀸𑀭𑁄 𑀳𑀺 𑀧𑁂𑀲𑀦𑀢𑁆𑀣𑀯𑀸𑀘𑀓𑁄. 𑀲𑁄𑀧𑀻𑀢𑀺 𑀧𑀺𑀲𑀤𑁆𑀤𑁄 𑀧𑀼𑀭𑀺𑀫𑀚𑀦𑁂 𑀅𑀧𑁂𑀓𑁆𑀔𑀢𑀺. ‘‘𑀥𑀸𑀭𑁂𑀢𑀻’’𑀢𑀺 𑀇𑀫𑀺𑀦𑀸 𑀆𑀬𑀺𑀓𑀧𑀘𑁆𑀘𑀬𑁄 𑀥𑀸𑀭𑀡𑀢𑁆𑀣𑁂 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀜𑁆𑀜𑁂𑀢𑀺 𑀫𑀸𑀢𑀸𑀧𑀺𑀢𑀽𑀳𑀺 𑀅𑀜𑁆𑀜𑁂. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀢𑁂𑀢𑀺 𑀅𑀜𑁆𑀜𑁂 𑀜𑀸𑀢𑀓𑀸, 𑀢𑀁 𑀆𑀞𑀧𑁂𑀢𑀼𑀁 𑀬𑀲𑁆𑀫𑀸 𑀦 𑀇𑀲𑁆𑀲𑀭𑀸, 𑀢𑀲𑁆𑀫𑀸 𑀦 𑀇𑀡𑀸𑀬𑀺𑀓𑁄𑀢𑀺 𑀬𑁄𑀚𑀦𑀸. 𑀇𑀢𑀭𑀦𑁆𑀢𑀺 𑀦𑀇𑀡𑀸𑀬𑀺𑀓𑀢𑁄 𑀅𑀜𑁆𑀜𑀁. 𑀅𑀲𑁆𑀲𑀸𑀢𑀺 𑀚𑀦𑀲𑁆𑀲. 𑀦𑀦𑁆𑀢𑀺 𑀢𑀁 𑀚𑀦𑀁. 𑀢𑁂𑀲𑀽𑀢𑀺 𑀜𑀸𑀢𑀺𑀲𑀸𑀮𑁄𑀳𑀺𑀢𑀸𑀤𑀻𑀲𑀼. 𑀢𑀣𑀸𑀭𑀽𑀧𑀲𑁆𑀲𑀸𑀢𑀺 𑀅𑀢𑁆𑀢𑀦𑁄 𑀜𑀸𑀢𑀺𑀲𑀸𑀮𑁄𑀳𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀆𑀭𑁄𑀘𑁂𑀢𑀩𑁆𑀩𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀳𑁂𑀢𑀼𑀓𑁄’’𑀢𑀺𑀆𑀤𑀺. 𑀢𑀢𑁆𑀣 𑀲𑀳𑁂𑀢𑀼𑀓𑁄𑀢𑀺 𑀪𑀩𑁆𑀩𑁄. 𑀲𑁄𑀢𑀺 𑀉𑀧𑀝𑁆𑀞𑀸𑀓𑁄. 𑀧𑀝𑀺𑀧𑀚𑁆𑀚𑀢𑀻𑀢𑀺 𑀧𑀝𑀺𑀤𑀤𑀸𑀢𑀺. 𑀏𑀢𑀦𑁆𑀢𑀺 𑀓𑀧𑁆𑀧𑀺𑀬𑀪𑀡𑁆𑀟𑀁. 𑀅𑀚𑀸𑀦𑀺𑀢𑁆𑀯𑀸𑀢𑀺 𑀇𑀡𑀸𑀬𑀺𑀓𑀪𑀸𑀯𑀫𑀚𑀸𑀦𑀺𑀢𑁆𑀯𑀸. 𑀧𑀲𑁆𑀲𑀦𑁆𑀢𑁂𑀦𑀸𑀢𑀺 𑀇𑀡𑀸𑀬𑀺𑀓𑀁 𑀧𑀲𑁆𑀲𑀦𑁆𑀢𑁂𑀦. ‘‘𑀅𑀧𑀲𑁆𑀲𑀦𑁆𑀢𑀲𑁆𑀲 𑀕𑀻𑀯𑀸 𑀦 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀧𑀲𑁆𑀲𑀺𑀢𑁆𑀯𑀸 𑀅𑀤𑀲𑁆𑀲𑁂𑀦𑁆𑀢𑀲𑁆𑀲 𑀕𑀻𑀯𑀸 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀧𑀼𑀘𑁆𑀙𑀺𑀬𑀫𑀸𑀦𑁄𑀧𑀻𑀢𑀺 ‘‘𑀓𑀺𑀁 𑀢𑁆𑀯𑀁 𑀇𑀡𑀸𑀬𑀺𑀓𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀬𑀫𑀸𑀦𑁄𑀧𑀺. 𑀢𑀦𑁆𑀢𑀺 𑀇𑀡𑀸𑀬𑀺𑀓𑀁. 𑀢𑀢𑁆𑀣𑀸𑀢𑀺 𑀅𑀜𑁆𑀜𑀲𑁆𑀫𑀺𑀁 𑀤𑁂𑀲𑁂. 𑀢𑀦𑁆𑀢𑀺 𑀇𑀡𑀲𑀸𑀫𑀺𑀓𑀁. 𑀲𑁄𑀢𑀺 𑀇𑀡𑀲𑀸𑀫𑀺𑀓𑁄. 𑀅𑀬𑀦𑁆𑀢𑀺 𑀇𑀡𑀸𑀬𑀺𑀓𑁄. 𑀅𑀬𑀦𑁆𑀢𑀺 𑀯𑀘𑀦𑀸. 𑀢𑀢𑁆𑀣𑀸𑀢𑀺 𑀇𑀡𑀸𑀬𑀺𑀓𑀲𑁆𑀲 𑀧𑀩𑁆𑀩𑀸𑀚𑀦𑁂. 𑀲𑀸𑀫𑀻𑀘𑀻𑀢𑀺 𑀅𑀦𑀼𑀥𑀫𑁆𑀫𑀢𑀸.

𑀦𑀦𑁆𑀢𑀺 𑀇𑀡𑀸𑀬𑀺𑀓𑀁. 𑀲𑁄𑀢𑀺 𑀇𑀡𑀲𑀸𑀫𑀺𑀓𑁄. 𑀅𑀲𑁆𑀲𑀸𑀢𑀺 𑀣𑁂𑀭𑀲𑁆𑀲. 𑀕𑀻𑀯𑀸 𑀦 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀘𑁆𑀙𑀢𑀽𑀢𑀺 𑀆𑀲𑀢𑀼 𑀉𑀧𑀯𑁂𑀲𑀢𑀽𑀢𑀺 𑀅𑀢𑁆𑀣𑁄. 𑀲𑁄𑀢𑀺 𑀇𑀡𑀸𑀬𑀺𑀓𑁄. 𑀈𑀤𑀺𑀲𑁄𑀢𑀺 𑀲𑀳𑁂𑀢𑀼𑀓𑁄 𑀯𑀢𑁆𑀢𑀲𑀫𑁆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀅𑀢𑀺𑀆𑀭𑀸𑀥𑀓𑁄𑀢𑀺 𑀯𑀢𑁆𑀢𑀸𑀘𑀸𑀭𑁂𑀦 𑀣𑁂𑀭𑀲𑁆𑀲 𑀅𑀢𑀺𑀢𑁄𑀲𑀓𑁄.