𑁨𑁮. 𑀘𑁄𑀭𑀯𑀢𑁆𑀣𑀼𑀓𑀣𑀸

𑁯𑁧. 𑀤𑀺𑀝𑁆𑀞𑀧𑀼𑀩𑁆𑀩𑁄𑀢𑀺 𑀅𑀗𑁆𑀕𑀼𑀮𑀺𑀫𑀸𑀮𑁄 𑀧𑀼𑀩𑁆𑀩𑁂 𑀤𑀺𑀝𑁆𑀞𑁄. 𑀅𑀬𑀦𑁆𑀢𑀺 𑀘𑁄𑀭𑁄. 𑀲𑁄𑀢𑀺 𑀅𑀗𑁆𑀕𑀼𑀮𑀺𑀫𑀸𑀮𑁄. 𑀅𑀜𑁆𑀜𑁂𑀲𑀁 𑀲𑀦𑁆𑀢𑀺𑀓𑀸 𑀯𑀘𑀦𑀁 𑀲𑀼𑀡𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑁂𑀢𑀺 𑀫𑀦𑀼𑀲𑁆𑀲𑀸. 𑀉𑀩𑁆𑀩𑀺𑀚𑁆𑀚𑀦𑁆𑀢𑀺𑀧𑀻𑀢𑀺 𑀓𑀸𑀬𑁂𑀦 𑀉𑀩𑁆𑀩𑀺𑀚𑁆𑀚𑀦𑁆𑀢𑀺𑀧𑀺. 𑀉𑀢𑁆𑀢𑀲𑀦𑁆𑀢𑀺𑀧𑀻𑀢𑀺 𑀘𑀺𑀢𑁆𑀢𑁂𑀦 𑀉𑀢𑁆𑀢𑀲𑀦𑁆𑀢𑀺𑀧𑀺. 𑀅𑀗𑁆𑀕𑀼𑀮𑀺𑀫𑀸𑀮𑁄 𑀪𑀺𑀓𑁆𑀔𑀽𑀳𑀺 𑀦 𑀧𑀩𑁆𑀩𑀸𑀚𑀺𑀢𑁄, 𑀦𑀦𑀼 𑀪𑀕𑀯𑀢𑀸 𑀧𑀦 𑀲𑀬𑀁 𑀧𑀩𑁆𑀩𑀸𑀚𑀺𑀢𑁄, 𑀅𑀣 𑀓𑀲𑁆𑀫𑀸 ‘‘𑀦 𑀪𑀺𑀓𑁆𑀔𑀯𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀪𑀕𑀯𑀸 𑀲𑀬𑀁 𑀥𑀫𑁆𑀫𑀲𑁆𑀲𑀸𑀫𑀻’’𑀢𑀺. 𑀥𑀫𑁆𑀫𑀲𑁆𑀲𑀸𑀫𑀻𑀢𑀺 𑀘 𑀥𑀫𑁆𑀫𑀲𑁆𑀲 𑀇𑀲𑁆𑀲𑀭𑁄, 𑀥𑀫𑁆𑀫𑁂𑀦 𑀯𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀇𑀲𑁆𑀲𑀭𑁄, 𑀅𑀥𑀺𑀧𑀢𑀻𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀽𑀦𑀁 𑀅𑀓𑀭𑀡𑀢𑁆𑀣𑀸𑀬 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 ‘‘𑀦 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀯𑀘𑀦𑁂. ‘‘𑀥𑀚𑀁 𑀩𑀦𑁆𑀥𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀥𑀚𑀲𑁆𑀲 𑀩𑀦𑁆𑀥𑀦𑀁 𑀥𑀚𑀩𑀦𑁆𑀥𑁄, 𑀥𑀚𑀩𑀦𑁆𑀥𑁄 𑀯𑀺𑀬𑀸𑀢𑀺 𑀥𑀚𑀩𑀦𑁆𑀥𑁄, 𑀥𑀚𑀩𑀦𑁆𑀥𑁄 𑀳𑀼𑀢𑁆𑀯𑀸 𑀘𑀭𑀢𑀻𑀢𑀺 𑀥𑀚𑀩𑀦𑁆𑀥𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀥𑀚𑀩𑀦𑁆𑀥𑁄, 𑀢𑀲𑁆𑀫𑀸. 𑀬𑁄𑀢𑀺 𑀘𑁄𑀭𑁄. 𑀧𑀦𑁆𑀣𑀤𑀼𑀳𑀦𑀁 𑀯𑀸𑀢𑀺 𑀧𑀦𑁆𑀣𑁂 𑀤𑀼𑀳𑀦𑀁 𑀯𑀸. 𑀧𑀜𑁆𑀜𑀸𑀬𑀢𑀺 𑀘𑀸𑀢𑀺 𑀏𑀢𑁆𑀣 𑀘𑀲𑀤𑁆𑀤𑁄 𑀯𑀸𑀓𑁆𑀬𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀦 𑀓𑁂𑀯𑀮𑀜𑁆𑀳𑀺 𑀯𑀺𑀘𑀭𑀢𑀺𑀬𑁂𑀯, 𑀅𑀣 𑀔𑁄 𑀧𑀜𑁆𑀜𑀸𑀬𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀇𑀤𑀦𑁆𑀢𑀺 𑀘𑁄𑀭𑀓𑀫𑁆𑀫𑀁. 𑀭𑀚𑁆𑀚𑀦𑁆𑀢𑀺 𑀭𑀸𑀚𑀪𑀸𑀯𑀁. 𑀲𑁄𑀢𑀺 𑀭𑀸𑀚𑀧𑀼𑀢𑁆𑀢𑁄. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀢𑀲𑁆𑀫𑀺𑀦𑁆𑀢𑀺 𑀭𑀸𑀚𑀧𑀼𑀢𑁆𑀢𑁂. 𑀧𑀼𑀩𑁆𑀩𑁂𑀢𑀺 𑀧𑀼𑀩𑁆𑀩𑀓𑀸𑀮𑁂. 𑀢𑀦𑁆𑀢𑀺 𑀘𑁄𑀭𑀁. 𑀏𑀯𑀦𑁆𑀢𑀺 𑀇𑀫𑀺𑀦𑀸𑀓𑀸𑀭𑁂𑀦, 𑀚𑀸𑀦𑀦𑁆𑀢𑀺 𑀘𑁂𑀢𑀺 𑀬𑁄𑀚𑀦𑀸. 𑀅𑀤𑀺𑀲𑁆𑀲𑀫𑀸𑀦𑀸𑀢𑀺 𑀅𑀢𑁆𑀢𑀸𑀦𑀁 𑀅𑀧𑀜𑁆𑀜𑀸𑀬𑀫𑀸𑀦𑀸. 𑀇𑀤𑀁 𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀺𑀘𑁄𑀭𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀅𑀫𑁆𑀩𑀮𑀩𑀼𑀚𑀸𑀤𑀺𑀘𑁄𑀭𑁂. 𑀧𑀘𑁆𑀙𑀸𑀧𑀻𑀢𑀺 𑀣𑁂𑀬𑁆𑀬𑀓𑀭𑀡𑀢𑁄 𑀧𑀘𑁆𑀙𑀸𑀧𑀺. 𑀢𑁂𑀧𑀻𑀢𑀺 𑀘𑁄𑀭𑁂𑀧𑀺.

𑁯𑁨. 𑀪𑀬𑁂𑀦𑀸𑀢𑀺 𑀪𑀬𑀢𑁄. 𑀏𑀢𑁂 𑀧𑀦𑀸𑀢𑀺 𑀪𑀺𑀓𑁆𑀔𑀽 𑀧𑀦. 𑀮𑀤𑁆𑀥𑀸𑀪𑀬𑀢𑁆𑀢𑀸𑀢𑀺 𑀭𑀸𑀚𑀢𑁄 𑀮𑀤𑁆𑀥𑁄 𑀅𑀪𑀬𑁄 𑀇𑀫𑁂𑀳𑀻𑀢𑀺 𑀮𑀤𑁆𑀥𑀸𑀪𑀬𑀸, 𑀢𑁂𑀲𑀁 𑀪𑀸𑀯𑁄 𑀮𑀤𑁆𑀥𑀸𑀪𑀬𑀢𑁆𑀢𑀁, 𑀢𑀲𑁆𑀫𑀸. 𑀓𑀸𑀭𑀪𑁂𑀤𑀓𑁄𑀢𑀺 𑀏𑀢𑁆𑀣 𑀓𑀸𑀭𑀲𑀤𑁆𑀤𑁄 𑀭𑀼𑀓𑁆𑀔𑀯𑀺𑀲𑁂𑀲𑁂 =𑁦𑁯 𑀘 𑀲𑀓𑁆𑀓𑀸𑀭𑁂 𑀘 𑀩𑀦𑁆𑀥𑀦𑀸𑀮𑀬𑁂 𑀘 𑀧𑀯𑀢𑁆𑀢𑀢𑀺, 𑀇𑀥 𑀧𑀦 𑀩𑀦𑁆𑀥𑀦𑀸𑀮𑀬𑁂𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀸𑀭𑀁 𑀯𑀼𑀘𑁆𑀘𑀢𑀺 𑀩𑀦𑁆𑀥𑀦𑀸𑀕𑀸𑀭’’𑀦𑁆𑀢𑀺. 𑀩𑀦𑁆𑀥𑀦𑀸𑀕𑀸𑀭𑀜𑁆𑀳𑀺 𑀓𑀭𑁄𑀦𑁆𑀢𑀺 𑀢𑀁 𑀧𑀯𑁂𑀲𑀺𑀢𑁂 𑀚𑀦𑁂 𑀳𑀺𑀁𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 ‘‘𑀓𑀸𑀭𑀸’’𑀢𑀺 𑀯𑀼𑀘𑁆𑀘𑀢𑀺. 𑀇𑀥𑀸𑀢𑀺 ‘‘𑀓𑀸𑀭𑀪𑁂𑀤𑀓𑁄’’𑀢𑀺𑀧𑀤𑁂. 𑀤𑀻𑀧𑀩𑀦𑁆𑀥𑀦𑀁 𑀯𑀸 𑀳𑁄𑀢𑀽𑀢𑀺 𑀬𑁄𑀚𑀦𑀸. 𑀇𑀫𑁂𑀳𑀺 𑀧𑀤𑁂𑀳𑀺 𑀦 𑀓𑁂𑀯𑀮𑀁 𑀩𑀦𑁆𑀥𑀦𑀸𑀕𑀸𑀭𑀁𑀬𑁂𑀯 𑀓𑀸𑀭𑀸 𑀦𑀸𑀫 𑀳𑁄𑀢𑀺, 𑀅𑀣 𑀔𑁄 𑀅𑀦𑁆𑀤𑀼𑀩𑀦𑁆𑀥𑀦𑀸𑀤𑀻𑀦𑀺𑀧𑀺 𑀓𑀸𑀭𑀸𑀬𑁂𑀯 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀬𑁄𑀢𑀺 𑀘𑁄𑀭𑁄. 𑀏𑀢𑁂𑀲𑀽𑀢𑀺 𑀩𑀦𑁆𑀥𑀦𑁂𑀲𑀼. 𑀫𑀼𑀜𑁆𑀘𑀺𑀢𑁆𑀯𑀸 𑀯𑀸𑀢𑀺 𑀭𑀚𑁆𑀚𑀼𑀩𑀦𑁆𑀥𑀦𑀁 𑀦𑀺𑀩𑁆𑀩𑁂𑀞𑁂𑀢𑁆𑀯𑀸 𑀯𑀸. 𑀇𑀫𑁂𑀳𑀺 𑀧𑀤𑁂𑀳𑀺 𑀦 𑀓𑁂𑀯𑀮𑀁 𑀓𑀸𑀭𑀸𑀬 𑀪𑀺𑀦𑁆𑀤𑀦𑀢𑁄 𑀏𑀯 𑀓𑀸𑀭𑀪𑁂𑀤𑀓𑁄 𑀦𑀸𑀫 𑀳𑁄𑀢𑀺, 𑀅𑀣 𑀔𑁄 𑀙𑀺𑀦𑁆𑀤𑀦𑀫𑀼𑀜𑁆𑀘𑀦𑀯𑀺𑀯𑀭𑀡𑁂𑀳𑀺𑀧𑀺 𑀓𑀸𑀭𑀪𑁂𑀤𑀓𑁄𑀬𑁂𑀯 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀤𑀻𑀧𑀦𑁆𑀢𑀭𑀦𑁆𑀢𑀺 𑀩𑀦𑁆𑀥𑀦𑀤𑀻𑀧𑀢𑁄 𑀅𑀦𑁆𑀢𑀭𑀁 𑀅𑀜𑁆𑀜𑀁 𑀤𑀻𑀧𑀦𑁆𑀢𑀺 𑀅𑀢𑁆𑀣𑁄. 𑀘𑀓𑁆𑀓𑀯𑀸𑀴𑀩𑀦𑁆𑀥𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀘𑀓𑁆𑀓𑀯𑀸𑀴𑀦𑁆𑀢𑀭𑀁 𑀕𑀢𑁄 𑀅𑀝𑁆𑀞𑀓𑀣𑀸𑀬𑀁 𑀦 𑀯𑀼𑀢𑁆𑀢𑁄. 𑀲𑁄𑀢𑀺 𑀦𑀘𑁄𑀭𑀓𑁄. 𑀕𑀸𑀫𑀦𑀺𑀕𑀫𑀧𑀝𑁆𑀝𑀦𑀸𑀤𑀻𑀦𑀻𑀢𑀺 𑀏𑀢𑁆𑀣 𑀧𑀝𑁆𑀝𑀦𑀦𑁆𑀢𑀺 𑀦𑀸𑀯𑀸𑀧𑀝𑁆𑀝𑀦𑀁, 𑀲𑀓𑀝𑀧𑀝𑁆𑀝𑀦𑀜𑁆𑀘. 𑀓𑁂𑀡𑀺𑀬𑀸𑀢𑀺 𑀭𑀜𑁆𑀜𑁄 𑀤𑀸𑀢𑀩𑁆𑀩𑀆𑀬𑁂𑀦. 𑀢𑀦𑁆𑀢𑀺 𑀓𑁂𑀡𑀺𑀁. 𑀦𑀺𑀥𑀸𑀦𑀦𑁆𑀢𑀺 𑀦𑀺𑀓𑁆𑀔𑀡𑀺𑀢𑁆𑀯𑀸 𑀞𑀧𑀺𑀢𑀁 𑀥𑀦𑀁. 𑀉𑀧𑀲𑀁𑀳𑀭𑀺𑀢𑁆𑀯𑀸𑀢𑀺 𑀭𑀸𑀚𑀸𑀤𑀻𑀦𑀁 𑀲𑀦𑁆𑀢𑀺𑀓𑀁 𑀳𑀭𑀺𑀢𑁆𑀯𑀸. 𑀢𑀦𑁆𑀢𑀺 𑀓𑀲𑀺𑀓𑀫𑁆𑀫𑀸𑀤𑀻𑀳𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀚𑀻𑀯𑀦𑁆𑀢𑀁. 𑀢𑀢𑁆𑀣𑁂𑀯𑀸𑀢𑀺 𑀩𑀦𑁆𑀥𑀸𑀧𑀺𑀢𑀝𑁆𑀞𑀸𑀦𑁂𑀬𑁂𑀯.

𑁯𑁩. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂. 𑀬𑁄 𑀓𑁄𑀘𑀺 𑀧𑀮𑀸𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀚𑀦𑀁, 𑀮𑀺𑀔𑀸𑀧𑁂𑀢𑀻𑀢𑀺 𑀬𑁄𑀚𑀦𑀸. 𑀧𑀡𑁆𑀡𑁂 𑀯𑀸𑀢𑀺 𑀓𑀼𑀲𑁂 𑀯𑀸. 𑀅𑀲𑁆𑀲𑀸𑀢𑀺 𑀚𑀦𑀲𑁆𑀲. 𑀤𑀡𑁆𑀟𑀦𑁆𑀢𑀺 𑀥𑀦𑀤𑀡𑁆𑀟𑀁. 𑀮𑀺𑀔𑀺𑀢𑀓𑁄𑀢𑀺 𑀮𑀺𑀔𑀺𑀢𑀩𑁆𑀩𑁄𑀢𑀺 𑀮𑀺𑀔𑀺𑀢𑁄, 𑀲𑁄𑀬𑁂𑀯 𑀮𑀺𑀔𑀺𑀢𑀓𑁄.

𑁯𑁪. 𑀬𑁄 𑀧𑀦 𑀓𑀲𑀸𑀳𑀺 𑀳𑀜𑁆𑀜𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀺𑀦𑀸 𑀅𑀜𑁆𑀜𑁂𑀳𑀺 𑀓𑀲𑀸𑀳𑀺 𑀳𑀜𑁆𑀜𑀢𑀻𑀢𑀺 𑀓𑀲𑀸𑀳𑀢𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀅𑀬𑀫𑁂𑀯 𑀢𑁂 𑀤𑀡𑁆𑀟𑁄 𑀳𑁄𑀢𑀽’’𑀢𑀺 𑀇𑀫𑀺𑀦𑀸 𑀓𑀢𑀁 𑀤𑀡𑁆𑀟𑀓𑀫𑁆𑀫𑀁 𑀇𑀫𑀲𑁆𑀲𑀸𑀢𑀺 𑀓𑀢𑀤𑀡𑁆𑀟𑀓𑀫𑁆𑀫𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀮𑁆𑀮𑀯𑀡𑁄𑀢𑀺 𑀢𑀺𑀦𑁆𑀢𑀯𑀡𑁄. 𑀖𑀸𑀢𑁂𑀢𑁆𑀯𑀸𑀢𑀺 𑀳𑀦𑀺𑀢𑁆𑀯𑀸 𑀧𑀳𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀕𑀡𑁆𑀟𑀺𑀕𑀡𑁆𑀟𑀺𑀬𑁄𑀢𑀺 𑀨𑁄𑀝𑀨𑁄𑀝𑀸. 𑀲𑀦𑁆𑀦𑀺𑀲𑀺𑀦𑁆𑀦𑀸𑀲𑀽𑀢𑀺 𑀕𑀡𑁆𑀟𑀻𑀲𑀼 𑀧𑀓𑀢𑀺𑀲𑀭𑀻𑀭𑁂𑀦 𑀲𑀫𑀁 𑀦𑀺𑀲𑀺𑀦𑁆𑀦𑀸𑀲𑀼.

𑁯𑁫. 𑀓𑀢𑀤𑀡𑁆𑀟𑀓𑀫𑁆𑀫𑀪𑀸𑀯𑁄 𑀢𑀸𑀯 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄 𑀳𑁄𑀢𑀼, 𑀓𑀣𑀁 𑀧𑀦 𑀮𑀓𑁆𑀔𑀡𑀸𑀳𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀬𑀲𑁆𑀲 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀢𑁆𑀢𑁂𑀦𑀸𑀢𑀺 𑀢𑀸𑀧𑁂𑀦. 𑀮𑀓𑁆𑀔𑀡𑀦𑁆𑀢𑀺 𑀲𑀜𑁆𑀜𑀸𑀡𑀁. 𑀲𑁄𑀢𑀺 𑀚𑀦𑁄. 𑀪𑀼𑀚𑀺𑀲𑁆𑀲𑁄𑀢𑀺 𑀪𑀼𑀚𑁄 𑀏𑀢𑀲𑁆𑀲𑀢𑁆𑀣𑀻𑀢𑀺 𑀪𑀼𑀚𑀺𑀲𑁆𑀲𑁄 (𑀫. 𑀦𑀺. 𑀝𑀻. 𑁨.𑁪𑁨𑁬). 𑀧𑀭𑁂𑀳𑀺 𑀅𑀧𑀸𑀮𑀺𑀢𑁄 𑀘 𑀅𑀦𑀚𑁆𑀛𑁄𑀳𑀭𑀸𑀧𑀺𑀢𑁄 𑀘 𑀳𑀼𑀢𑁆𑀯𑀸 𑀲𑀬𑀫𑁂𑀯 𑀅𑀢𑁆𑀢𑀸𑀦𑀁 𑀧𑀸𑀮𑀦𑁂𑀦 𑀘 𑀪𑁄𑀚𑀦𑀁 𑀅𑀚𑁆𑀛𑁄𑀳𑀭𑀡𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀲𑁆𑀲𑀸𑀢𑀺 𑀮𑀓𑁆𑀔𑀡𑀸𑀳𑀢𑀲𑁆𑀲. 𑀯𑀡𑀸𑀢𑀺 𑀅𑀭𑀽𑀦𑀺. 𑀢𑀸𑀦𑀺 𑀳𑀺 𑀬𑀲𑁆𑀫𑀸 𑀯𑀡𑀦𑁆𑀢𑀺 𑀕𑀢𑁆𑀢𑀸𑀦𑀺 𑀯𑀺𑀘𑀼𑀡𑁆𑀡𑀸𑀦𑀺 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀡𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀭𑀽𑀴𑁆𑀳𑀸𑀢𑀺 𑀢𑀭𑀼𑀡𑀫𑀁𑀲𑁂𑀦 𑀭𑀼𑀳𑀸. 𑀢𑀺𑀫𑀡𑁆𑀟𑀮𑀯𑀢𑁆𑀣𑀲𑁆𑀲 𑀮𑀓𑁆𑀔𑀡𑀸𑀳𑀢𑀲𑁆𑀲 𑀚𑀦𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄.