𑁨𑁫. 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀯𑀢𑁆𑀣𑀼𑀓𑀣𑀸

𑁮𑁬. 𑀬𑁄 𑀧𑀦𑀸𑀢𑀺 𑀬𑁄 𑀧𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄. 𑀅𑀜𑁆𑀜𑁄𑀧𑀻𑀢𑀺 𑀧𑀲𑀽𑀭𑀢𑁄 𑀅𑀧𑀭𑁄𑀧𑀺. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀢𑀲𑁆𑀫𑀺𑀦𑁆𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁂. 𑀢𑀢𑁆𑀣𑀸𑀢𑀺 ‘‘𑀬𑁄 𑀲𑁄 𑀪𑀺𑀓𑁆𑀔𑀯𑁂 𑀅𑀜𑁆𑀜𑁄𑀧𑀻’’𑀢𑀺𑀆𑀤𑀺𑀯𑀘𑀦𑁂. 𑀅𑀬𑀦𑁆𑀢𑀺 𑀧𑀭𑀺𑀯𑀸𑀲𑁄. 𑀦𑀕𑁆𑀕𑀧𑀭𑀺𑀩𑁆𑀩𑀸𑀚𑀓𑀲𑁆𑀲𑁂𑀯𑀸𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀆𑀚𑀻𑀯𑀓𑀲𑁆𑀲 𑀯𑀸 𑀅𑀘𑁂𑀮𑀓𑀲𑁆𑀲 𑀯𑀸’’𑀢𑀺. 𑀢𑀢𑁆𑀣 𑀆𑀚𑀻𑀯𑀓𑁄 𑀉𑀧𑀭𑀺 𑀏𑀓𑀫𑁂𑀯 𑀯𑀢𑁆𑀣𑀁 𑀉𑀧𑀓𑀘𑁆𑀙𑀓𑁂 𑀧𑀯𑁂𑀲𑁂𑀢𑁆𑀯𑀸 𑀧𑀭𑀺𑀤𑀳𑀢𑀺, 𑀳𑁂𑀝𑁆𑀞𑀸 𑀦𑀕𑁆𑀕𑁄. 𑀅𑀘𑁂𑀮𑀓𑁄 𑀧𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦𑀕𑁆𑀕𑁄𑀬𑁂𑀯. 𑀲𑁄𑀧𑀻𑀢𑀺 =𑁦𑁩 𑀦𑀕𑁆𑀕𑀧𑀭𑀺𑀩𑁆𑀩𑀸𑀚𑀓𑁄𑀧𑀺. 𑀯𑀸𑀮𑀓𑀫𑁆𑀩𑀮𑀸𑀤𑀻𑀦𑀦𑁆𑀢𑀺 𑀯𑀸𑀮𑁂𑀦 𑀓𑀢𑀁 𑀓𑀫𑁆𑀩𑀮𑀁, 𑀆𑀤𑀺𑀲𑀤𑁆𑀤𑁂𑀦 𑀓𑁂𑀲𑀓𑀫𑁆𑀩𑀮𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀲𑁆𑀲𑀸𑀢𑀺 𑀧𑀭𑀺𑀩𑁆𑀩𑀸𑀚𑀓𑀲𑁆𑀲. 𑀅𑀜𑁆𑀜𑀲𑁆𑀲𑀸𑀢𑀺 𑀦𑀕𑁆𑀕𑀧𑀭𑀺𑀩𑁆𑀩𑀸𑀚𑀓𑀢𑁄 𑀅𑀧𑀭𑀲𑁆𑀲. 𑀧𑀡𑁆𑀟𑀭𑀗𑁆𑀕𑀸𑀤𑀺𑀓𑀲𑁆𑀲𑀸𑀢𑀺 𑀧𑀡𑁆𑀟𑀭𑀁 𑀲𑁂𑀢𑀯𑀢𑁆𑀣𑀁 𑀅𑀗𑁆𑀕𑁂 𑀲𑀭𑀻𑀭𑁂 𑀏𑀢𑀲𑁆𑀲𑀢𑁆𑀣𑀻𑀢𑀺 𑀧𑀡𑁆𑀟𑀭𑀗𑁆𑀕𑁄, 𑀆𑀤𑀺𑀲𑀤𑁆𑀤𑁂𑀦 𑀦𑀻𑀮𑀗𑁆𑀕𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺.

𑀏𑀯𑀦𑁆𑀢𑀺 𑀇𑀫𑀺𑀦𑀸 𑀓𑁂𑀲𑀫𑀲𑁆𑀲𑀼𑀑𑀭𑁄𑀧𑀦𑀸𑀤𑀺𑀦𑀸. 𑀧𑀩𑁆𑀩𑀸𑀚𑁂𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀺𑀦𑁆𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁂, 𑀦𑀺𑀲𑀺𑀦𑁆𑀦𑁂𑀬𑁂𑀯𑀸𑀢𑀺 𑀬𑁄𑀚𑀦𑀸. 𑀅𑀦𑀸𑀤𑀭𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀢𑀲𑁆𑀲𑀸𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀲𑁆𑀲. 𑀦𑀬𑀺𑀫𑁂𑀢𑀺 𑀦 𑀇𑀫𑁂, 𑀪𑀺𑀓𑁆𑀔𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀁.

𑁮𑁭. ‘‘𑀏𑀯𑀁 𑀔𑁄…𑀧𑁂… 𑀅𑀦𑀸𑀭𑀸𑀥𑀓𑁄’’𑀢𑀺 𑀅𑀬𑀁 𑀓𑀣𑀸 𑀫𑀸𑀢𑀺𑀓𑀸𑀢𑀺 𑀬𑁄𑀚𑀦𑀸. 𑀅𑀲𑁆𑀲𑀸𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀲𑁆𑀲. 𑀢𑀲𑁆𑀲𑁂𑀯𑀸𑀢𑀺 𑀢𑀲𑁆𑀲𑀸𑀬𑁂𑀯 𑀫𑀸𑀢𑀺𑀓𑀸𑀬. 𑀢𑀢𑁆𑀣𑀸𑀢𑀺 𑀯𑀺𑀪𑀗𑁆𑀕𑁂. 𑀅𑀢𑀺𑀓𑀸𑀮𑁂𑀦𑀸𑀢𑀺 𑀏𑀢𑁆𑀣 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀯𑀢𑁆𑀢𑀓𑀭𑀡𑀯𑁂𑀮𑀸𑀬𑁂𑀯 𑀅𑀢𑀺𑀓𑀸𑀮𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀢𑁆𑀢𑀓𑀭𑀡𑀯𑁂𑀮𑀸𑀬𑀫𑁂𑀯𑀸’’𑀢𑀺. 𑀇𑀫𑀺𑀦𑀸 𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀯𑀘𑀦𑀦𑁆𑀢𑀺𑀧𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣𑁂𑀯𑀸𑀢𑀺 𑀓𑀼𑀮𑀖𑀭𑁂𑀲𑀼𑀬𑁂𑀯. 𑀅𑀜𑁆𑀜𑀤𑀢𑁆𑀣𑀽𑀢𑀺 𑀏𑀓𑀁𑀲𑁂𑀦, ‘‘𑀓𑀭𑁄𑀦𑁆𑀢𑁄’’𑀢𑀺 𑀇𑀫𑀺𑀦𑀸 𑀧𑀸𑀞𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀏𑀯𑀫𑁆𑀧𑀺 𑀓𑀭𑁄𑀦𑁆𑀢𑁄 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄𑀢𑀺 𑀬𑁄𑀚𑀦𑀸. ‘‘𑀲𑀫𑁆𑀧𑀸𑀤𑀓𑁄’’𑀢𑀺 𑀇𑀫𑀺𑀦𑀸 𑀅𑀦𑀸𑀭𑀸𑀥𑀓𑁄𑀢𑀺 𑀏𑀢𑁆𑀣 𑀆𑀭𑀸𑀥𑀲𑀤𑁆𑀤𑀲𑁆𑀲 𑀲𑀸𑀥𑀦𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀢𑁄𑀲𑀦𑀢𑁆𑀣𑀸𑀤𑀬𑁄 𑀦𑀺𑀯𑀢𑁆𑀢𑁂𑀢𑀺.

𑀅𑀚𑁆𑀛𑀸𑀘𑀸𑀭𑀢𑁆𑀣𑀺𑀓𑀸 𑀯𑀺𑀲𑀦𑁆𑀢𑀺 𑀧𑀯𑀺𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑁂𑀲𑀺𑀬𑀸, 𑀲𑁄𑀪𑀡𑀭𑀽𑀧𑀲𑀗𑁆𑀔𑀸𑀢𑀁 𑀯𑁂𑀲𑀁 𑀥𑀸𑀭𑁂𑀢𑀻𑀢𑀺 𑀯𑀸 𑀯𑁂𑀲𑀺𑀬𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀼𑀮𑀪𑀚𑁆𑀛𑀸𑀘𑀸𑀭𑀸’’𑀢𑀺𑀆𑀤𑀺. 𑀆𑀫𑀺𑀲𑁄𑀬𑁂𑀯 𑀓𑀺𑀜𑁆𑀚𑀓𑁆𑀔𑁄 𑀅𑀧𑁆𑀧𑀫𑀢𑁆𑀢𑀓𑀝𑁆𑀞𑁂𑀦𑀸𑀢𑀺 𑀆𑀫𑀺𑀲𑀓𑀺𑀜𑁆𑀚𑀓𑁆𑀔𑁄, 𑀯𑀺𑀲𑁂𑀲𑀦𑀧𑀭𑀧𑀤𑁄. 𑀅𑀣 𑀯𑀸 𑀆𑀫𑀺𑀲𑁄 𑀘 𑀢𑀢𑁄 𑀅𑀜𑁆𑀜𑁄 𑀓𑀺𑀜𑁆𑀚𑀓𑁆𑀔𑁄 𑀘 𑀆𑀫𑀺𑀲𑀓𑀺𑀜𑁆𑀚𑀓𑁆𑀔𑀁, 𑀢𑀲𑁆𑀲 𑀲𑀫𑁆𑀧𑀤𑀸𑀦𑀁 𑀆𑀫𑀺𑀲𑀓𑀺𑀜𑁆𑀚𑀓𑁆𑀔𑀲𑀫𑁆𑀧𑀤𑀸𑀦𑀁. 𑀓𑀺𑀜𑁆𑀚𑀓𑁆𑀔𑀲𑀤𑁆𑀤𑁄 𑀓𑁂𑀲𑀭𑀲𑁆𑀲𑁂𑀯 𑀫𑀼𑀔𑁆𑀬𑀢𑁄 𑀯𑀸𑀘𑀓𑁄, 𑀅𑀧𑁆𑀧𑀫𑀢𑁆𑀢𑀓𑀲𑁆𑀲 𑀧𑀦 𑀭𑀽𑀴𑁆𑀳𑀻𑀯𑀲𑁂𑀦. 𑀯𑀺𑀥𑀯𑀸𑀢𑀺 𑀏𑀢𑁆𑀣 𑀥𑀯𑀲𑀤𑁆𑀤𑁄 𑀧𑀢𑀺𑀦𑁄𑀬𑁂𑀯 𑀯𑀸𑀘𑀓𑁄, 𑀦 𑀭𑀼𑀓𑁆𑀔𑀯𑀺𑀲𑁂𑀲𑀲𑁆𑀲𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀢𑀧𑀢𑀺𑀓𑀸 𑀯𑀸’’𑀢𑀺𑀆𑀤𑀺. 𑀇𑀫𑁂𑀳𑀺 𑀧𑀤𑁂𑀳𑀺 𑀫𑀢𑀯𑀲𑁂𑀦 𑀯𑀸 𑀧𑀯𑀼𑀢𑁆𑀣𑀯𑀲𑁂𑀦 𑀯𑀸 𑀯𑀺𑀕𑀢𑁄 𑀥𑀯𑁄 𑀏𑀢𑀸𑀲𑀁, 𑀥𑀯𑁂𑀦 𑀯𑀸 𑀯𑀺𑀕𑀢𑀸𑀢𑀺 𑀯𑀺𑀥𑀯𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀸𑀢𑀺 𑀯𑀺𑀥𑀯𑀸. 𑀬𑁄𑀩𑁆𑀩𑀦𑀧𑀢𑁆𑀢𑀢𑁆𑀢𑀸 𑀯𑀸 𑀬𑁄𑀩𑁆𑀩𑀦𑀸𑀢𑀻𑀢𑀢𑁆𑀢𑀸 𑀯𑀸 𑀣𑀼𑀮𑁆𑀮𑀸 𑀫𑀳𑀦𑁆𑀢𑀸 𑀓𑀼𑀫𑀸𑀭𑀺𑀓𑀸𑀢𑀺 𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁄𑀩𑁆𑀩𑀦𑀧𑀢𑁆𑀢𑀸’’𑀢𑀺𑀆𑀤𑀺. 𑀧𑀡𑁆𑀟𑀓𑀸𑀢𑀺 𑀏𑀢𑁆𑀣 𑀆𑀲𑀺𑀢𑁆𑀢𑀧𑀡𑁆𑀟𑀓𑀸𑀤𑀻𑀲𑀼 𑀧𑀜𑁆𑀘𑀲𑀼 𑀧𑀡𑁆𑀟𑀓𑁂𑀲𑀼 𑀦𑀧𑀼𑀁𑀲𑀓𑀧𑀡𑁆𑀟𑀓𑁄𑀯𑀸𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀦𑀧𑀼𑀁𑀲𑀓𑀸’’𑀢𑀺. 𑀲𑀫𑀸𑀦𑀧𑀩𑁆𑀩𑀚𑁆𑀚𑀸𑀢𑀺 𑀪𑀺𑀓𑁆𑀔𑀽𑀳𑀺 𑀲𑀫𑀸𑀦𑀧𑀩𑁆𑀩𑀚𑁆𑀚𑀸. 𑀢𑀢𑁄𑀢𑀺 𑀯𑀺𑀲𑁆𑀲𑀸𑀲𑀢𑁄.

𑀢𑀢𑁆𑀣𑀸𑀢𑀺 𑀯𑁂𑀲𑀺𑀬𑀸𑀤𑀻𑀲𑀼. 𑀢𑀸𑀲𑀦𑁆𑀢𑀺 𑀯𑁂𑀲𑀺𑀬𑀸𑀦𑀁. 𑀲𑁄𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 =𑁦𑁪 𑀯𑀺𑀥𑀯𑀸𑀤𑀻𑀲𑀼. 𑀕𑀦𑁆𑀢𑀩𑁆𑀩𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺. 𑀢𑀣𑀸𑀢𑀺 𑀬𑀣𑀸 𑀕𑀦𑁆𑀢𑀩𑁆𑀩𑀢𑁆𑀢𑀁 𑀯𑀼𑀢𑁆𑀢𑀁, 𑀢𑀣𑀸.

𑀉𑀘𑁆𑀘𑀸𑀯𑀘𑀸𑀦𑀻𑀢𑀺 𑀏𑀢𑁆𑀣 𑀉𑀤𑁆𑀥𑀁 𑀘𑀬𑀢𑀺 𑀯𑀟𑁆𑀠𑀢𑀻𑀢𑀺 𑀉𑀘𑁆𑀘𑀁, 𑀘𑀬𑀢𑁄 𑀅𑀯𑀕𑀢𑁄 𑀯𑀺𑀬𑁄𑀕𑁄𑀢𑀺 𑀅𑀯𑀘𑀁. 𑀉𑀘𑁆𑀘𑀜𑁆𑀘 𑀅𑀯𑀘𑀜𑁆𑀘 𑀉𑀘𑁆𑀘𑀸𑀯𑀘𑀸𑀦𑀻𑀢𑀺 𑀯𑀘𑀦𑀢𑁆𑀣𑁂𑀦 𑀫𑀳𑀦𑁆𑀢𑀔𑀼𑀤𑁆𑀤𑀓𑀢𑁆𑀣𑁄𑀢𑀺 𑀆𑀳 ‘‘𑀫𑀳𑀦𑁆𑀢𑀔𑀼𑀤𑁆𑀤𑀓𑀸𑀦𑀻’’𑀢𑀺. ‘‘𑀓𑀫𑁆𑀫𑀸𑀦𑀻’’𑀢𑀺 𑀇𑀫𑀺𑀦𑀸 ‘‘𑀓𑀭𑀡𑀻𑀬𑀸𑀦𑀻’’𑀢𑀺𑀧𑀤𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀢𑀁𑀤𑀲𑁆𑀲𑀦𑁂𑀦 𑀘 𑀓𑀢𑁆𑀢𑀩𑁆𑀩𑀸𑀦𑀻𑀢𑀺 𑀓𑀭𑀡𑀻𑀬𑀸𑀦𑀻𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄. 𑀢𑀢𑁆𑀣𑀸𑀢𑀺 𑀫𑀳𑀦𑁆𑀢𑀔𑀼𑀤𑁆𑀤𑀓𑁂𑀲𑀼 𑀓𑀫𑁆𑀫𑁂𑀲𑀼. 𑀢𑀢𑁆𑀣 𑀦 𑀤𑀓𑁆𑀔𑁄𑀢𑀺 𑀏𑀢𑁆𑀣 𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀢𑁂𑀲𑀼 𑀢𑁂𑀲𑀼 𑀦𑀯𑀓𑀫𑁆𑀫𑁂𑀲𑀽’’𑀢𑀺. ‘‘𑀉𑀝𑁆𑀞𑀸𑀦𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑁄’’𑀢𑀺 𑀇𑀫𑀺𑀦𑀸 𑀦𑀢𑁆𑀣𑀺 𑀅𑀮𑀲𑁄 𑀓𑁄𑀲𑀚𑁆𑀚𑀁 𑀏𑀢𑀲𑁆𑀲𑀸𑀢𑀺 𑀅𑀦𑀮𑀲𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀭𑀸𑀢𑀺 𑀏𑀢𑁆𑀣 𑀢𑁆𑀭𑀧𑀘𑁆𑀘𑀬𑁄 𑀲𑀢𑁆𑀢𑀫𑁆𑀬𑀢𑁆𑀣𑁂 𑀯𑀺𑀘𑁆𑀙𑀸𑀚𑁄𑀢𑀓𑁄𑀢𑀺 𑀆𑀳 ‘‘𑀢𑁂𑀲𑀼 𑀢𑁂𑀲𑀽’’𑀢𑀺. ‘‘𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀸𑀬 𑀯𑀻𑀫𑀁𑀲𑀸𑀬𑀸’’𑀢𑀺 𑀯𑀼𑀢𑁆𑀢𑀯𑀘𑀦𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀤𑀫𑁂𑀯’’𑀦𑁆𑀢𑀺𑀆𑀤𑀺. ‘‘𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀉𑀧𑁆𑀧𑀦𑁆𑀦𑀧𑀜𑁆𑀜𑀸𑀬𑀸’’𑀢𑀺 𑀇𑀫𑀺𑀦𑀸 ‘‘𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀸𑀬𑀸’’𑀢𑀺 𑀏𑀢𑁆𑀣 𑀞𑀸𑀦𑀲𑀤𑁆𑀤𑁄 𑀢𑀗𑁆𑀔𑀡𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀮𑀁 𑀓𑀸𑀢𑀼𑀦𑁆𑀢𑀺 𑀏𑀢𑁆𑀣 𑀅𑀮𑀁𑀲𑀤𑁆𑀤𑁄 𑀪𑀽𑀲𑀦𑀯𑀸𑀭𑀡𑀧𑀭𑀺𑀬𑀢𑁆𑀢𑀲𑀗𑁆𑀔𑀸𑀢𑁂𑀲𑀼 𑀢𑀻𑀲𑀼 𑀅𑀢𑁆𑀣𑁂𑀲𑀼 𑀧𑀭𑀺𑀬𑀢𑁆𑀢𑀢𑁆𑀣𑁄𑀢𑀺 𑀆𑀳 ‘‘𑀓𑀸𑀢𑀼𑀁 𑀲𑀫𑀢𑁆𑀣𑁄’’𑀢𑀺.

𑀢𑀺𑀩𑁆𑀩𑀘𑁆𑀙𑀦𑁆𑀤𑁄𑀢𑀺 𑀢𑀺𑀔𑀺𑀡𑀙𑀦𑁆𑀤𑁄. ‘‘𑀩𑀮𑀯𑀘𑁆𑀙𑀦𑁆𑀤𑁄’’𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀮𑁄𑀓𑀺𑀬𑀲𑀫𑀸𑀥𑀺𑀪𑀸𑀯𑀦𑀸𑀬𑀸𑀢𑀺 𑀮𑁄𑀓𑀺𑀬𑀸𑀬 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑀸𑀬 𑀲𑀫𑀸𑀥𑀺𑀪𑀸𑀯𑀦𑀸𑀬.

𑀇𑀥𑀸𑀕𑀢𑁄𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀆𑀕𑀢𑁄. 𑀢𑀺𑀢𑁆𑀣𑀸𑀬𑀢𑀦𑀲𑀸𑀫𑀺𑀓𑀲𑁆𑀲𑀸𑀢𑀺 𑀢𑀭𑀦𑁆𑀢𑀺 𑀉𑀧𑁆𑀮𑀯𑀦𑁆𑀢𑀺 𑀲𑀢𑁆𑀢𑀸 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀦𑁆𑀢𑀺 𑀏𑀢𑁆𑀣𑀸𑀢𑀺 𑀢𑀺𑀢𑁆𑀣𑀁, 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄. 𑀢𑀫𑁂𑀯 𑀆𑀬𑀢𑀦𑀁 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀦𑁆𑀢𑀺 𑀢𑀺𑀢𑁆𑀣𑀸𑀬𑀢𑀦𑀁. 𑀅𑀣 𑀯𑀸 𑀢𑀺𑀢𑁆𑀣𑀫𑁂𑀢𑁂𑀲𑀫𑀢𑁆𑀣𑀻𑀢𑀺 𑀢𑀺𑀢𑁆𑀣𑀺𑀦𑁄, 𑀢𑁂𑀲𑀫𑀸𑀬𑀢𑀦𑀁 𑀢𑀺𑀢𑁆𑀣𑀸𑀬𑀢𑀦𑀁, 𑀢𑀲𑁆𑀲 𑀲𑀸𑀫𑀺𑀓𑁄 𑀢𑀺𑀢𑁆𑀣𑀸𑀬𑀢𑀦𑀲𑀸𑀫𑀺𑀓𑁄, 𑀢𑀲𑁆𑀲. 𑀢𑀲𑁆𑀲 𑀤𑀺𑀝𑁆𑀞𑀺𑀬𑀸𑀢𑀺 𑀏𑀢𑁆𑀣 𑀤𑀺𑀝𑁆𑀞𑀺𑀲𑀤𑁆𑀤𑁄 𑀮𑀤𑁆𑀥𑀺𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀢𑀲𑁆𑀲 𑀲𑀦𑁆𑀢𑀓𑀸𑀬 𑀮𑀤𑁆𑀥𑀺𑀬𑀸’’𑀢𑀺. 𑀓𑀲𑁆𑀫𑀸 𑀲𑀸 𑀮𑀤𑁆𑀥𑀺 ‘‘𑀔𑀦𑁆𑀢𑀻’’𑀢𑀺 𑀘 ‘‘𑀭𑀼𑀘𑀻’’𑀢𑀺 𑀘 ‘‘𑀆𑀤𑀸𑀬𑁄’’𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀇𑀤𑀸𑀦𑀻’’𑀢𑀺𑀆𑀤𑀺. 𑀲𑀸𑀬𑁂𑀯 𑀮𑀤𑁆𑀥𑀺 𑀔𑀫𑀢𑀺 𑀘𑁂𑀯 𑀭𑀼𑀘𑁆𑀘𑀢𑀺 𑀘 𑀕𑀳𑀺𑀢𑀸 𑀘𑀸𑀢𑀺 𑀬𑁄𑀚𑀦𑀸. 𑀢𑀲𑁆𑀲 𑀢𑀺𑀢𑁆𑀣𑀓𑀭𑀲𑁆𑀲𑀸𑀢𑀺 𑀓𑀢𑁆𑀯𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀢𑀲𑁆𑀲𑀸𑀢𑀺 𑀢𑀺𑀢𑁆𑀣𑀸𑀬𑀢𑀦𑀲𑀸𑀫𑀺𑀓𑀲𑁆𑀲. 𑀪𑀜𑁆𑀜𑀫𑀸𑀦𑀸𑀬𑀸𑀢𑀺 𑀪𑀡𑀺𑀬𑀫𑀸𑀦𑀸𑀬. 𑀅𑀦𑀪𑀺𑀭𑀤𑁆𑀥𑁄𑀢𑀺 𑀏𑀢𑁆𑀣 𑀅𑀦𑀪𑀺𑀭𑀸𑀥𑀺𑀢𑁄 𑀅𑀧𑀭𑀺𑀢𑁄𑀲𑀺𑀢𑀘𑀺𑀢𑁆𑀢𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄, 𑀦𑁄 𑀧𑀕𑁆𑀕𑀳𑀺𑀢𑀘𑀺𑀢𑁆𑀢𑁄’’𑀢𑀺. 𑀬𑀤𑀺𑀤𑀦𑁆𑀢𑀺 𑀬𑀁 𑀇𑀤𑀁 ‘‘𑀅𑀦𑀢𑁆𑀢𑀫𑀦𑀢𑁆𑀢’’𑀦𑁆𑀢𑀺 𑀯𑀸 ‘‘𑀅𑀢𑁆𑀢𑀫𑀦𑀢𑁆𑀢’’𑀦𑁆𑀢𑀺 𑀯𑀸 𑀲𑀫𑁆𑀩𑀦𑁆𑀥𑁄. 𑀇𑀫𑀺𑀦𑀸 ‘‘𑀇𑀤’’𑀦𑁆𑀢𑀺𑀧𑀤𑀲𑁆𑀲 𑀅𑀦𑀺𑀬𑀫𑀁 𑀤𑀲𑁆𑀲𑁂𑀢𑀺. 𑀇𑀫𑁂𑀢𑀺 𑀪𑀺𑀓𑁆𑀔𑀽. 𑀬𑀜𑁆𑀘 𑀅𑀦𑀢𑁆𑀢𑀫𑀦𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀢𑀲𑁆𑀲𑁂𑀯𑀸𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀲𑁆𑀲 𑀏𑀯 𑀅𑀦𑀢𑁆𑀢𑀫𑀦𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀦𑁆𑀢𑀺 𑀤𑁆𑀯𑁂 𑀅𑀢𑁆𑀢𑀫𑀦𑀢𑁆𑀢𑀸𑀦𑀺, 𑀤𑁆𑀯𑁂 𑀅𑀦𑀢𑁆𑀢𑀫𑀦𑀢𑁆𑀢𑀸𑀦𑀻𑀢𑀺 𑀘𑀢𑀼𑀩𑁆𑀩𑀺𑀥𑀁 𑀇𑀤𑀁 𑀥𑀫𑁆𑀫𑀚𑀸𑀢𑀁. 𑀲𑀗𑁆𑀖𑀸𑀝𑀦𑀻𑀬𑀦𑁆𑀢𑀺 𑀲𑀗𑁆𑀖𑀝𑀺𑀢𑀩𑁆𑀩𑀁, 𑀲𑀦𑁆𑀦𑀺𑀘𑀬𑀁 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. ‘‘𑀅𑀦𑀸𑀭𑀸𑀥𑀓𑁂’’𑀢𑀺𑀆𑀤𑀺𑀦𑀸 𑀅𑀦𑀸𑀭𑀸𑀥𑀦𑀻𑀬𑀲𑁆𑀫𑀺𑀦𑁆𑀢𑀺 =𑁦𑁫 𑀏𑀢𑁆𑀣 𑀦 𑀆𑀭𑀸𑀥𑁂𑀢𑀺 𑀯𑀢𑁆𑀢𑀁 𑀅𑀦𑁂𑀦 𑀓𑀫𑁆𑀫𑁂𑀦𑀸𑀢𑀺 𑀅𑀦𑀸𑀭𑀸𑀥𑀦𑀻𑀬𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀇𑀤𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁. 𑀮𑀺𑀗𑁆𑀕𑀦𑁆𑀢𑀺 𑀓𑀸𑀭𑀡𑀁. 𑀮𑀓𑁆𑀔𑀡𑀦𑁆𑀢𑀺 𑀘𑀺𑀳𑀦𑀁. 𑀇𑀢𑁄𑀢𑀺 𑀅𑀝𑁆𑀞𑀗𑁆𑀕𑀢𑁄 𑀦𑀻𑀳𑀝𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀼𑀢𑁆𑀢𑀯𑀺𑀧𑀮𑁆𑀮𑀸𑀲𑁂𑀦𑀸𑀢𑀺 𑀓𑀡𑁆𑀳𑀧𑀓𑁆𑀔𑁂 𑀯𑀼𑀢𑁆𑀢𑀯𑀺𑀧𑀭𑀻𑀢𑁂𑀦.

𑀲𑀼𑀓𑁆𑀓𑀧𑀓𑁆𑀔𑁂 𑀅𑀝𑁆𑀞𑀗𑁆𑀕𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑀸𑀢𑀺𑀓𑀸𑀮𑁂𑀦 𑀕𑀸𑀫𑀧𑀯𑁂𑀲𑀦𑀁 𑀦𑀸𑀢𑀺𑀤𑀺𑀯𑀸 𑀧𑀝𑀺𑀓𑁆𑀓𑀫𑀦’’𑀦𑁆𑀢𑀺𑀆𑀤𑀺. 𑀓𑀡𑁆𑀳𑀧𑀓𑁆𑀔𑁂𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀝𑁆𑀞𑀗𑁆𑀕𑀸𑀦𑀺 𑀲𑀫𑁄𑀥𑀸𑀦𑁂𑀢𑀩𑁆𑀩𑀸𑀦𑀺. ‘‘𑀧𑀭𑀺𑀢𑁄𑀲𑀓𑁄’’𑀢𑀺 𑀇𑀫𑀺𑀦𑀸 𑀆𑀭𑀸𑀥𑀓𑀲𑀤𑁆𑀤𑀲𑁆𑀲 𑀢𑁄𑀲𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀳𑁂𑀝𑁆𑀞𑀸 𑀧𑀦 ‘‘𑀲𑀫𑁆𑀧𑀸𑀤𑀓𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀸𑀥𑀦𑀢𑁆𑀣𑀁 𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀉𑀧𑀲𑀫𑁆𑀧𑀤𑀫𑀸𑀴𑀓𑁂𑀧𑀻𑀢𑀺 𑀉𑀧𑀲𑀫𑁆𑀧𑀸𑀤𑀝𑁆𑀞𑀸𑀦𑁂 𑀏𑀓𑀓𑀽𑀝𑀬𑀼𑀢𑁆𑀢𑁂 𑀅𑀦𑁂𑀓𑀓𑁄𑀡𑁂 𑀧𑀢𑀺𑀲𑁆𑀲𑀬𑀯𑀺𑀲𑁂𑀲𑁂𑀧𑀺. 𑀲𑁄 𑀳𑀺 𑀏𑀓𑀓𑀽𑀝𑀁 𑀓𑀢𑁆𑀯𑀸 𑀅𑀦𑁂𑀓𑁂𑀳𑀺 𑀓𑁄𑀡𑁂𑀳𑀺 𑀫𑀮𑀻𑀬𑀢𑀺 𑀯𑀺𑀪𑀽𑀲𑀻𑀬𑀢𑀻𑀢𑀺 𑀫𑀸𑀴𑁄𑀢𑀺 𑀯𑀼𑀘𑁆𑀘𑀢𑀺. ‘‘𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀭𑀺𑀯𑀲𑀺𑀢𑀩𑁆𑀩’’𑀦𑁆𑀢𑀺𑀯𑀘𑀦𑀁 𑀅𑀲𑀤𑀺𑀲𑀽𑀧𑀫𑀸𑀬 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 ‘‘𑀬𑀣𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀳𑀻𑀢𑀺 𑀲𑀘𑁆𑀘𑀁. 𑀅𑀲𑁆𑀲𑀸𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀲𑁆𑀲. 𑀧𑀭𑀺𑀯𑀲𑀦𑁆𑀢𑁄 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑁆𑀢𑀭𑀸𑀢𑀺 𑀘𑀢𑀼𑀫𑀸𑀲𑀲𑁆𑀲 𑀅𑀩𑁆𑀪𑀦𑁆𑀢𑀭𑁂. 𑀓𑀼𑀧𑁆𑀧𑀦𑀲𑀪𑀸𑀯𑁄𑀢𑀺 𑀦𑀲𑁆𑀲𑀦𑀲𑀪𑀸𑀯𑁄. 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑀻𑀢𑀺 ‘‘𑀇𑀤𑀁 𑀦𑀸𑀫𑀁, 𑀇𑀤𑀁 𑀭𑀽𑀧’’𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀮𑀓𑁆𑀔𑀡𑀦𑁆𑀢𑀺 𑀦𑀫𑀦𑀭𑀼𑀧𑁆𑀧𑀦𑀮𑀓𑁆𑀔𑀡𑀁, 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀁 𑀯𑀸. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀧𑀳𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀫𑀽𑀳𑀢𑀸𑀦𑀺…𑀧𑁂… 𑀲𑀮𑁆𑀮’’𑀦𑁆𑀢𑀺. 𑀅𑀩𑁆𑀩𑀼𑀴𑁆𑀳𑀦𑁆𑀢𑀺 𑀆𑀯𑀳𑀺𑀬𑀺𑀢𑁆𑀣𑀸𑀢𑀺 𑀅𑀩𑁆𑀩𑀼𑀴𑁆𑀳𑀁, 𑀉𑀤𑁆𑀥𑀁 𑀯𑀳𑀺𑀬𑀺𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀆𑀢𑁆𑀬𑀽𑀧𑀲𑀕𑁆𑀕𑁄 𑀳𑀺 𑀉𑀤𑁆𑀥𑀗𑁆𑀕𑀫𑀢𑁆𑀣𑁄. 𑀢𑀁𑀤𑀺𑀯𑀲𑀫𑁂𑀯𑀸𑀢𑀺 𑀢𑀲𑁆𑀫𑀺𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀧𑀝𑀺𑀮𑀪𑀦𑀤𑀺𑀯𑀲𑁂𑀬𑁂𑀯. 𑀪𑀼𑀫𑁆𑀫𑀢𑁆𑀣𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀢𑀤𑀳𑁂𑀯𑀸𑀢𑀺 𑀢𑀲𑁆𑀫𑀺𑀁 𑀲𑁄𑀢𑀸𑀧𑀦𑁆𑀦𑀪𑀯𑀦𑀅𑀳𑀦𑀺 𑀏𑀯.

𑀢𑀲𑁆𑀲𑀸𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀲𑁆𑀲. 𑀧𑀸𑀴𑀺𑀬𑀁 𑀧𑀢𑁆𑀢𑀲𑁆𑀲 𑀅𑀦𑀸𑀕𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀧𑀢𑁆𑀢𑀫𑁆𑀧𑀺 𑀢𑀣𑁂𑀯𑀸’’𑀢𑀺. 𑀬𑀣𑀸 𑀉𑀧𑀚𑁆𑀛𑀸𑀬𑀫𑀽𑀮𑀓𑀁 𑀘𑀻𑀯𑀭𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁, 𑀧𑀢𑁆𑀢𑀫𑁆𑀧𑀺 𑀢𑀣𑁂𑀯𑀸𑀢𑀺 𑀅𑀢𑁆𑀣𑁄. 𑀇𑀤𑀦𑁆𑀢𑀺 𑀧𑀢𑁆𑀢𑀘𑀻𑀯𑀭𑀁. 𑀇𑀫𑀲𑁆𑀲𑀸𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀲𑁆𑀲. 𑀅𑀜𑁆𑀜𑁂𑀢𑀺 𑀉𑀧𑀚𑁆𑀛𑀸𑀬𑀢𑁄 𑀅𑀧𑀭𑁂. 𑀢𑁂𑀳𑀺𑀧𑀻𑀢𑀺 𑀅𑀜𑁆𑀜𑁂𑀳𑀺𑀧𑀺. 𑀯𑀺𑀮𑁄𑀫𑀸𑀢𑀺 𑀧𑀝𑀺𑀮𑁄𑀫𑀸. 𑀆𑀬𑀢𑁆𑀢𑀦𑁆𑀢𑀺 𑀅𑀥𑀻𑀦𑀁. 𑀆𑀬𑀢𑁆𑀢𑀚𑀻𑀯𑀺𑀓𑀢𑁆𑀢𑀸𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀲𑁆𑀲 𑀉𑀧𑀚𑁆𑀛𑀸𑀬𑁂𑀦 𑀆𑀬𑀢𑁆𑀢𑀚𑀻𑀯𑀺𑀓𑀢𑁆𑀢𑀸. 𑀢𑀲𑁆𑀲𑀸𑀢𑀺 𑀉𑀧𑀚𑁆𑀛𑀸𑀬𑀲𑁆𑀲. 𑀯𑀘𑀦𑀓𑀭𑁄𑀢𑀺 𑀯𑀘𑀦𑀁 𑀓𑀭𑁄. 𑀯𑀸𑀓𑁆𑀬𑁂𑀧𑀺 𑀲𑀫𑀸𑀲𑁂𑀧𑀺 𑀯𑀘𑀦𑀲𑀤𑁆𑀤𑀲𑁆𑀲 ‘‘𑀢𑀲𑁆𑀲𑀸’’𑀢𑀺 𑀧𑀤𑀫𑁂𑀯 𑀅𑀧𑁂𑀓𑁆𑀔𑀢𑁆𑀢𑀸 ‘‘𑀯𑀘𑀦𑀓𑀭𑁄’’𑀢𑀺 𑀲𑀫𑀸𑀲𑁄 𑀳𑁄𑀢𑀺. 𑀏𑀲𑁂𑀯 𑀦𑀬𑁄 ‘‘𑀉𑀧𑀚𑁆𑀛𑀸𑀬𑁂𑀦 𑀆𑀬𑀢𑁆𑀢𑀚𑀻𑀯𑀓𑀢𑁆𑀢𑀸’’𑀢𑀺 𑀏𑀢𑁆𑀣𑀸𑀧𑀺. 𑀢𑁂𑀦𑀸𑀢𑀺 𑀯𑀘𑀦𑀓𑀭𑀳𑁂𑀢𑀼𑀦𑀸.

𑀅𑀕𑁆𑀕𑀺𑀧𑀭𑀺𑀘𑀭𑀡𑀓𑀸𑀢𑀺 =𑁦𑁬 𑀅𑀕𑁆𑀕𑀺𑀧𑀽𑀚𑀓𑀸. 𑀇𑀫𑀺𑀦𑀸 𑀅𑀕𑁆𑀕𑀺𑀁 𑀧𑀭𑀺𑀘𑀭𑀦𑁆𑀢𑀻𑀢𑀺 𑀅𑀕𑁆𑀕𑀺𑀓𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀸𑀧𑀲𑀸𑀢𑀺 𑀚𑀝𑀸𑀥𑀭𑀸. 𑀢𑁂 𑀳𑀺 𑀬𑀲𑁆𑀫𑀸 𑀚𑀝𑀸 𑀘 𑀢𑀧𑁄 𑀘 𑀏𑀢𑁂𑀲𑀫𑀢𑁆𑀣𑀺, 𑀢𑀲𑁆𑀫𑀸 ‘‘𑀚𑀝𑀺𑀮𑀸’’𑀢𑀺 𑀘 ‘‘𑀢𑀸𑀧𑀲𑀸’’𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺. 𑀏𑀢𑁂𑀢𑀺 𑀚𑀝𑀺𑀮𑀓𑀸. ‘‘𑀓𑀺𑀭𑀺𑀬𑀁 𑀦 𑀧𑀝𑀺𑀩𑀸𑀳𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀯𑀘𑀦𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀢𑁆𑀣𑀺 𑀓𑀫𑁆𑀫𑀁, 𑀅𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺. 𑀏𑀢𑀤𑁂𑀯 𑀧𑀩𑁆𑀩𑀚𑁆𑀚𑀦𑁆𑀢𑀺 𑀏𑀢𑀁 𑀏𑀯 𑀢𑀸𑀧𑀲𑀧𑀩𑁆𑀩𑀚𑁆𑀚𑀁. 𑀏𑀢𑁂𑀲𑀦𑁆𑀢𑀺 𑀚𑀝𑀺𑀮𑀸𑀦𑀁. 𑀲𑀸𑀲𑀦𑁂𑀢𑀺 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂. 𑀢𑁂𑀲𑀦𑁆𑀢𑀺 𑀜𑀸𑀢𑀻𑀦𑀁, 𑀇𑀫𑀁 𑀧𑀭𑀺𑀳𑀸𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀢𑀺 𑀜𑀸𑀢𑀬𑁄. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀜𑀸𑀢𑀺𑀲𑁂𑀝𑁆𑀞𑀲𑁆𑀲𑀸𑀢𑀺 𑀜𑀸𑀢𑀺𑀬𑁂𑀯 𑀲𑁂𑀝𑁆𑀞𑁄, 𑀜𑀸𑀢𑀻𑀦𑀁 𑀯𑀸𑀢𑀺 𑀜𑀸𑀢𑀺𑀲𑁂𑀝𑁆𑀞𑁄, 𑀢𑀲𑁆𑀲, 𑀩𑀼𑀤𑁆𑀥𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄.