𑁧𑁫. 𑀉𑀧𑀚𑁆𑀛𑀸𑀬𑀯𑀢𑁆𑀢𑀓𑀣𑀸

𑁬𑁪. 𑀅𑀦𑀼𑀧𑀚𑁆𑀛𑀸𑀬𑀓𑀸𑀢𑀺 𑀏𑀢𑁆𑀣 𑀯𑀚𑁆𑀚𑀸𑀯𑀚𑁆𑀚𑀁 𑀉𑀧𑀕𑀦𑁆𑀢𑁆𑀯𑀸 𑀛𑀸𑀬𑀢𑀻𑀢𑀺 𑀉𑀧𑀚𑁆𑀛𑀸𑀬𑁄, 𑀲𑁄 𑀦𑀢𑁆𑀣𑀺 𑀏𑀢𑁂𑀲𑀦𑁆𑀢𑀺 𑀅𑀦𑀼𑀧𑀚𑁆𑀛𑀸𑀬𑀓𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀚𑁆𑀚𑀸𑀯𑀚𑁆𑀚’’𑀦𑁆𑀢𑀺𑀆𑀤𑀺. ‘‘𑀧𑀺𑀡𑁆𑀟𑀸𑀬 𑀘𑀭𑀡𑀓𑀧𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀧𑀺𑀡𑁆𑀟𑀸𑀬 𑀉𑀤𑁆𑀤𑀺𑀲𑁆𑀲, 𑀉𑀝𑁆𑀞𑀳𑀺𑀢𑁆𑀯𑀸 𑀯𑀸 𑀢𑀺𑀝𑁆𑀞𑀢𑀺 𑀅𑀦𑁂𑀦𑀸𑀢𑀺 𑀉𑀢𑁆𑀢𑀺𑀝𑁆𑀞𑁄, 𑀲𑁄𑀬𑁂𑀯 𑀧𑀢𑁆𑀢𑁄 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀉𑀢𑁆𑀢𑀺𑀝𑁆𑀞𑁂 𑀦 𑀧𑀫𑀚𑁆𑀚𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁧𑁬𑁮) 𑀧𑀦 𑀧𑀺𑀡𑁆𑀟𑀸𑀬 𑀘𑀭𑀡𑀁 ‘‘𑀉𑀢𑁆𑀢𑀺𑀝𑁆𑀞’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀢𑀢𑁆𑀣 𑀧𑀺𑀡𑁆𑀟𑀸𑀬 𑀉𑀤𑁆𑀤𑀺𑀲𑁆𑀲, 𑀉𑀝𑁆𑀞𑀳𑀺𑀢𑁆𑀯𑀸 𑀯𑀸 𑀢𑀺𑀝𑁆𑀞𑀦𑀁 𑀉𑀢𑁆𑀢𑀺𑀝𑁆𑀞𑀦𑁆𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄. ‘‘𑀧𑀺𑀡𑁆𑀟𑀸𑀬 𑀘𑀭𑀡𑀧𑀢𑁆𑀢’’𑀦𑁆𑀢𑀺 𑀇𑀤𑀁 𑀯𑀘𑀦𑀁 ‘‘𑀢𑀲𑁆𑀫𑀺𑀜𑁆𑀳𑀺 𑀫𑀦𑀼𑀲𑁆𑀲𑀸 𑀉𑀘𑁆𑀙𑀺𑀝𑁆𑀞𑀲𑀜𑁆𑀜𑀺𑀦𑁄’’𑀢𑀺𑀧𑀤𑀁 𑀮𑀗𑁆𑀖𑀺𑀢𑁆𑀯𑀸 ‘‘𑀢𑀲𑁆𑀫𑀸 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑀁, 𑀢𑀲𑁆𑀫𑀸 𑀧𑀺𑀡𑁆𑀟𑀸𑀬 𑀘𑀭𑀡𑀓𑀧𑀢𑁆𑀢𑀢𑁆𑀢𑀸 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀺𑀁 𑀫𑀦𑀼𑀲𑁆𑀲𑀸 𑀓𑀺𑀁𑀲𑀜𑁆𑀜𑀺𑀦𑁄𑀢𑀺 𑀆𑀳 ‘‘𑀢𑀲𑁆𑀫𑀺𑀜𑁆𑀳𑀺 𑀫𑀦𑀼𑀲𑁆𑀲𑀸 𑀉𑀘𑁆𑀙𑀺𑀝𑁆𑀞𑀲𑀜𑁆𑀜𑀺𑀦𑁄’’𑀢𑀺. 𑀢𑀲𑁆𑀫𑀺𑀜𑁆𑀳𑀺 𑀢𑀲𑁆𑀫𑀺𑀁 𑀏𑀯 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑁂 𑀧𑀩𑁆𑀩𑀚𑀺𑀢𑀸𑀦𑀁 𑀧𑀭𑀺𑀪𑁄𑀕𑀪𑀸𑀯𑁂𑀦 𑀫𑀦𑀼𑀲𑁆𑀲𑁂𑀳𑀺 𑀅𑀯𑀲𑀚𑁆𑀚𑀺𑀢𑀩𑁆𑀩𑀢𑁆𑀢𑀸, 𑀅𑀯𑀙𑀟𑁆𑀟𑁂𑀢𑀩𑁆𑀩𑀢𑁆𑀢𑀸 𑀯𑀸 𑀫𑀦𑀼𑀲𑁆𑀲𑀸 𑀉𑀘𑁆𑀙𑀺𑀝𑁆𑀞𑀲𑀜𑁆𑀜𑀺𑀦𑁄 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀧𑀩𑁆𑀩𑀚𑀺𑀢𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀡𑀓𑀧𑀢𑁆𑀢𑀢𑁆𑀢𑀸 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁, 𑀫𑀦𑀼𑀲𑁆𑀲𑀸𑀦𑀁 𑀧𑀦 𑀅𑀯𑀲𑀚𑁆𑀚𑀺𑀢𑀧𑀢𑁆𑀢𑀢𑁆𑀢𑀸 𑀉𑀘𑁆𑀙𑀺𑀝𑁆𑀞𑀧𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀢𑁆𑀢𑀺𑀝𑁆𑀞 𑀧𑀢𑁆𑀢𑀦𑁆𑀢𑀺𑀧𑀤𑀁 𑀯𑀸𑀓𑁆𑀬𑀫𑁂𑀯, 𑀦 𑀲𑀫𑀸𑀲𑁄𑀢𑀺𑀧𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀣 𑀯𑀸’’𑀢𑀺𑀆𑀤𑀺. ‘‘𑀉𑀝𑁆𑀞𑀳𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀉𑀢𑁆𑀢𑀺𑀝𑁆𑀞𑀸𑀢𑀺 𑀏𑀢𑁆𑀣 𑀢𑁆𑀯𑀸𑀮𑁄𑀧𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀕𑀳𑁂𑀢𑀼’’𑀦𑁆𑀢𑀺 𑀇𑀫𑀺𑀦𑀸 𑀧𑀸𑀞𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀕𑁂𑀳𑀲𑀺𑀢𑀧𑁂𑀫𑀯𑀲𑁂𑀦𑀸𑀢𑀺 𑀕𑁂𑀳𑁂 𑀦𑀺𑀲𑁆𑀲𑀺𑀢𑀧𑁂𑀫𑀯𑀲𑁂𑀦, 𑀫𑁂𑀢𑁆𑀢𑀸𑀧𑀼𑀩𑁆𑀩𑀗𑁆𑀕𑀫𑀧𑁂𑀫𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀕𑀸𑀭𑀯𑀸 𑀳𑀼𑀢𑁆𑀯𑀸 𑀲𑀧𑁆𑀧𑀢𑀺𑀲𑁆𑀲𑀸 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺. ‘‘𑀲𑀪𑀸𑀕𑀚𑀻𑀯𑀺𑀓𑀸’’𑀢𑀺 𑀇𑀫𑀺𑀦𑀸 𑀲𑀪𑀸𑀕𑀯𑀼𑀢𑁆𑀢𑀺𑀓𑀸𑀢𑀺 𑀏𑀢𑁆𑀣 𑀯𑀼𑀢𑁆𑀢𑀺𑀲𑀤𑁆𑀤𑁄 𑀚𑀻𑀯𑀺𑀓𑀢𑁆𑀣𑁄𑀬𑁂𑀯, 𑀦 𑀯𑀺𑀯𑀭𑀡𑀸𑀤𑁆𑀬𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀉𑀧𑀚𑁆𑀛𑀸𑀬𑀪𑀸𑀯𑀁 𑀲𑀫𑁆𑀧𑀝𑀺𑀘𑁆𑀙𑀢𑀺 𑀏𑀢𑁂𑀳𑀻𑀢𑀺 𑀉𑀧𑀚𑁆𑀛𑀸𑀬𑀪𑀸𑀯𑀲𑀫𑁆𑀧𑀝𑀺𑀘𑁆𑀙𑀦𑀸𑀦𑀺, 𑀢𑀸𑀦𑀺𑀬𑁂𑀯 𑀯𑁂𑀯𑀘𑀦𑀸𑀦𑀺 𑀉𑀧𑀚𑁆𑀛𑀸𑀬𑀪𑀸𑀯𑀲𑀫𑁆𑀧𑀝𑀺𑀘𑁆𑀙𑀦𑀯𑁂𑀯𑀘𑀦𑀸𑀦𑀺. 𑀢𑀺𑀓𑁆𑀔𑀢𑁆𑀢𑀼𑀦𑁆𑀢𑀺 𑀉𑀓𑁆𑀓𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀁, 𑀲𑀓𑀺𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀧𑀤𑀲𑁆𑀲 𑀯𑀲𑁂𑀦 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀲𑀘𑁆𑀘𑀁. 𑀏𑀢𑁆𑀣𑀸𑀢𑀺 𑀉𑀧𑀚𑁆𑀛𑀸𑀬𑀕𑀳𑀡𑀝𑁆𑀞𑀸𑀦𑁂. 𑀬𑀤𑀺𑀤𑀁 𑀯𑀸𑀘𑀸𑀬 𑀯𑀸 𑀲𑀸𑀯𑀦𑀁, 𑀬𑀤𑀺𑀤𑀁 𑀓𑀸𑀬𑁂𑀦 𑀯𑀸 𑀅𑀢𑁆𑀣𑀯𑀺𑀜𑁆𑀜𑀸𑀧𑀦𑀁 𑀅𑀢𑁆𑀣𑀺, 𑀇𑀤𑀫𑁂𑀯 𑀲𑀸𑀯𑀦𑀅𑀢𑁆𑀣𑀯𑀺𑀜𑁆𑀜𑀸𑀧𑀦𑀫𑁂𑀯 𑀉𑀧𑀚𑁆𑀛𑀸𑀬𑀕𑀳𑀡𑀦𑁆𑀢𑀺 𑀬𑁄𑀚𑀦𑀸. 𑀲𑀸𑀥𑀽𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀦𑁆𑀢𑀺 𑀉𑀧𑀚𑁆𑀛𑀸𑀬𑁂𑀦 𑀧𑀜𑁆𑀘𑀲𑀼 𑀧𑀤𑁂𑀲𑀼 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀁𑀘𑀺 𑀯𑀼𑀢𑁆𑀢𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀁. 𑀢𑀦𑁆𑀢𑀺 𑀓𑁂𑀲𑀜𑁆𑀘𑀺 𑀯𑀘𑀦𑀁. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀏𑀢𑁆𑀣𑀸𑀢𑀺 𑀉𑀧𑀚𑁆𑀛𑀸𑀬𑀕𑀳𑀡𑁂. ‘‘𑀦 𑀲𑀫𑁆𑀧𑀝𑀺𑀘𑁆𑀙𑀦𑀁 𑀅𑀗𑁆𑀕’’𑀦𑁆𑀢𑀺 𑀇𑀫𑀺𑀦𑀸 𑀆𑀬𑀸𑀘𑀦𑀤𑀸𑀦𑀸𑀦𑀺𑀬𑁂𑀯 𑀅𑀗𑁆𑀕𑀸𑀦𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦𑀸𑀧𑀺 𑀜𑀸𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀺𑀦𑀸 𑀧𑀤𑁂𑀦𑀸𑀢𑀺 ‘‘𑀲𑀸𑀥𑀽’’𑀢𑀺 𑀇𑀫𑀺𑀦𑀸 𑀧𑀤𑁂𑀦.

𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸𑀢𑀺 𑀏𑀢𑁆𑀣 𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀬𑀁 𑀯𑀼𑀢𑁆𑀢𑀁 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺. 𑀇𑀫𑀺𑀦𑀸 𑀓𑀺𑀭𑀺𑀬𑀸𑀯𑀺𑀲𑀬𑀪𑀸𑀯𑀫𑁂𑀯 𑀤𑀻𑀧𑁂𑀢𑀺, 𑀦 𑀤𑀩𑁆𑀩𑀯𑀺𑀲𑀬𑀪𑀸𑀯𑀁. 𑀅𑀬𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑀸. 𑀅𑀲𑁆𑀲𑀸𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲. 𑀥𑁄𑀢𑀧𑀸𑀤𑀧𑀭𑀺𑀳𑀭𑀡𑀢𑁆𑀣𑀸𑀬𑀸𑀢𑀺 𑀥𑁄𑀢𑀲𑁆𑀲 𑀧𑀸𑀤𑀲𑁆𑀲 𑀧𑀁𑀲𑀼𑀫𑀓𑁆𑀔𑀦𑀸𑀤𑀻𑀦𑀁 𑀧𑀭𑀺𑀳𑀭𑀡𑀢𑁆𑀣𑀸𑀬. 𑀢𑀸𑀢𑀺 𑀉𑀧𑀸𑀳𑀦𑀸𑀬𑁄. 𑀓𑀸𑀮𑀲𑁆𑀲𑁂𑀯𑀸𑀢𑀺 𑀧𑀘𑁆𑀘𑀽𑀲𑀓𑀸𑀮𑀢𑁄𑀬𑁂𑀯, 𑀦𑀺𑀲𑁆𑀲𑀓𑁆𑀓𑀢𑁆𑀣𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀢𑀢𑁄𑀢𑀺 𑀢𑁂𑀳𑀺 𑀢𑀻𑀳𑀺 𑀤𑀦𑁆𑀢𑀓𑀝𑁆𑀞𑁂𑀳𑀺, 𑀯𑀺𑀪𑀢𑁆𑀢𑀅𑀧𑀸𑀤𑀸𑀦𑀫𑁂𑀢𑀁. 𑀢𑁂𑀲𑀼 𑀯𑀸 𑀢𑀻𑀲𑀼 𑀤𑀦𑁆𑀢𑀓𑀝𑁆𑀞𑁂𑀲𑀼. 𑀬𑀦𑁆𑀢𑀺 𑀬𑀁 𑀤𑀦𑁆𑀢𑀓𑀝𑁆𑀞𑀁. 𑀅𑀣𑀸𑀢𑀺 𑀢𑀲𑁆𑀫𑀺𑀁 𑀕𑀳𑀡𑁂.

𑀢𑀢𑁄𑀢𑀺 𑀲𑀻𑀢𑀼𑀡𑁆𑀳𑁄𑀤𑀓𑁂𑀳𑀺, 𑀲𑀻𑀢𑀼𑀡𑁆𑀳𑁄𑀤𑀓𑁂𑀲𑀼 𑀯𑀸. 𑀯𑀴𑀜𑁆𑀚𑁂𑀢𑀻𑀢𑀺 𑀧𑀭𑀺𑀪𑀼𑀜𑁆𑀚𑀢𑀺. 𑀉𑀤𑀓𑀦𑁆𑀢𑀺 𑀫𑀼𑀔𑀥𑁄𑀯𑀦𑁄𑀤𑀓𑀁. ‘‘𑀯𑀘𑁆𑀘𑀓𑀼𑀝𑀺𑀢𑁄’’𑀢𑀺 𑀇𑀫𑀺𑀦𑀸 𑀧𑀲𑁆𑀲𑀸𑀯𑀓𑀼𑀝𑀻𑀧𑀺 𑀕𑀳𑁂𑀢𑀩𑁆𑀩𑀸. 𑀏𑀯𑀦𑁆𑀢𑀺 𑀲𑀫𑁆𑀫𑀚𑁆𑀚𑀺𑀬𑀫𑀸𑀦𑁂. 𑀅𑀲𑀼𑀜𑁆𑀜𑀦𑁆𑀢𑀺 𑀚𑀦𑀲𑀤𑁆𑀤𑀢𑁄 𑀅𑀢𑀼𑀘𑁆𑀙𑀁. 𑀆𑀲𑀦𑀦𑁆𑀢𑀺 𑀣𑁂𑀭𑀲𑁆𑀲 𑀆𑀲𑀦𑀁. 𑀢𑀲𑁆𑀫𑀺𑀦𑁆𑀢𑀺 𑀆𑀲𑀦𑁂. 𑀦𑀺𑀲𑀺𑀦𑁆𑀦𑀲𑁆𑀲 𑀣𑁂𑀭𑀲𑁆𑀲 𑀯𑀢𑁆𑀢𑀁 𑀓𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀓𑁆𑀮𑀸𑀧𑁄 𑀅𑀲𑁆𑀫𑀺𑀁 𑀤𑁂𑀲𑁂 𑀅𑀢𑁆𑀣𑀻𑀢𑀺 𑀉𑀓𑁆𑀮𑀸𑀧𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑁂𑀦𑀘𑀺 𑀓𑀘𑀯𑀭𑁂𑀦 𑀲𑀁𑀓𑀺𑀡𑁆𑀡𑁄’’𑀢𑀺. 𑀏𑀢𑁆𑀣 𑀘 𑀲𑀗𑁆𑀓𑀸𑀭𑁄 𑀉𑀘𑁆𑀙𑀺𑀝𑁆𑀞𑁄 𑀓𑀮𑀸𑀧𑁄 𑀲𑀫𑀽𑀳𑁄 𑀉𑀓𑁆𑀮𑀸𑀧𑁄𑀢𑀺 𑀯𑀘𑀦𑀢𑁆𑀣𑁂𑀦 𑀉𑀓𑁆𑀮𑀸𑀧𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀘𑀻𑀬𑀢𑀺 𑀩𑀦𑁆𑀥𑀻𑀬𑀢𑀺 𑀅𑀲𑁆𑀫𑀺𑀁 𑀤𑁂𑀲𑁂𑀢𑀺 𑀓𑀘𑁄, 𑀲𑁄 𑀯𑀭𑀻𑀬𑀢𑀺 𑀇𑀘𑁆𑀙𑀻𑀬𑀢𑀺 𑀅𑀦𑁂𑀦𑀸𑀢𑀺 𑀓𑀘𑀯𑀭𑁄𑀢𑀺 𑀯𑀘𑀦𑀢𑁆𑀣𑁂𑀦 𑀓𑀘𑀯𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀳𑀢𑁆𑀣𑁂𑀦𑀧𑀻𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑁄 𑀧𑀺𑀮𑁄𑀢𑀺𑀓𑁂𑀦𑀧𑀻𑀢𑀺𑀆𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀏𑀓𑀢𑁄 𑀓𑀢𑁆𑀯𑀸𑀢𑀺 𑀏𑀓𑀢𑁄 𑀲𑀫𑀸𑀦𑀧𑀝𑀮𑀁 𑀓𑀢𑁆𑀯𑀸. 𑀓𑀲𑁆𑀫𑀸 𑀲𑀗𑁆𑀖𑀸𑀝𑀻𑀢𑀺 𑀆𑀳 ‘‘𑀲𑀩𑁆𑀩𑀁 𑀳𑀻’’𑀢𑀺𑀆𑀤𑀺. ‘‘𑀲𑀗𑁆𑀖𑀝𑀺𑀢𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀲𑀁𑀳𑀭𑀺𑀢𑀩𑁆𑀩𑀸𑀢𑀺 𑀲𑀗𑁆𑀖𑀸𑀝𑀻𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀁 𑀉𑀧𑀚𑁆𑀛𑀸𑀬𑀁 𑀲𑀁𑀧𑀸𑀧𑀼𑀡𑀸𑀢𑀻𑀢𑀺 𑀬𑁄𑀚𑀦𑀸. 𑀏𑀓𑁂𑀦 𑀯𑀸 𑀧𑀤𑀯𑀻𑀢𑀺𑀳𑀸𑀭𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀢𑁆𑀢𑁄𑀬𑁂𑀯 𑀉𑀡𑁆𑀳𑀪𑀸𑀭𑀺𑀓𑁂𑀲𑀼 𑀧𑀭𑀺𑀬𑀸𑀧𑀦𑁆𑀦𑁄𑀢𑀺 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑁄, 𑀧𑀢𑁆𑀢𑁂 𑀧𑀭𑀺𑀬𑀸𑀧𑀦𑁆𑀦𑁄 𑀬𑀸𑀕𑀼𑀆𑀤𑀺𑀓𑁄 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑁄𑀢𑀺𑀧𑀺 𑀬𑀼𑀚𑁆𑀚𑀢𑀺𑀬𑁂𑀯. 𑀪𑀺𑀓𑁆𑀔𑀸𑀘𑀸𑀭𑁂𑀢𑀺 𑀪𑀺𑀓𑁆𑀔𑀸𑀘𑀸𑀭𑀝𑁆𑀞𑀸𑀦𑁂. 𑀬𑀸𑀕𑀼𑀬𑀸 𑀯𑀸 𑀮𑀤𑁆𑀥𑀸𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀉𑀧𑀚𑁆𑀛𑀸𑀬𑀲𑁆𑀲. 𑀲𑁄 𑀧𑀢𑁆𑀢𑁄𑀢𑀺 𑀉𑀡𑁆𑀳𑀸𑀤𑀻𑀲𑀼 𑀧𑀭𑀺𑀬𑀸𑀧𑀦𑁆𑀦𑁄 𑀲𑁄 𑀧𑀢𑁆𑀢𑁄. 𑀅𑀜𑁆𑀜𑀢𑁆𑀭 𑀯𑀸𑀢𑀺 𑀆𑀭𑀸𑀫𑀸𑀤𑀻𑀲𑀼 𑀯𑀸. 𑀢𑀲𑁆𑀲𑀸𑀢𑀺 𑀉𑀧𑀚𑁆𑀛𑀸𑀬𑀲𑁆𑀲. 𑀯𑀘𑀦𑁂 𑀅𑀦𑀺𑀝𑁆𑀞𑀺𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑁄 𑀧𑀝𑁆𑀞𑀸𑀬𑀸𑀢𑀺 ‘‘𑀦 𑀉𑀧𑀚𑁆𑀛𑀸𑀬𑀲𑁆𑀲 𑀪𑀡𑀫𑀸𑀦𑀲𑁆𑀲𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀓𑀸𑀭𑀢𑁄 𑀧𑀝𑁆𑀞𑀸𑀬. 𑀇𑀫𑀺𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀲𑀼 ‘‘𑀦𑀸𑀢𑀺𑀤𑀽𑀭𑁂 𑀕𑀦𑁆𑀢𑀩𑁆𑀩’’𑀦𑁆𑀢𑀺𑀆𑀤𑀻𑀲𑀼 𑀦𑀓𑀸𑀭𑀧𑀝𑀺𑀲𑀺𑀤𑁆𑀥𑁂𑀲𑀼 𑀆𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 ‘‘𑀦 𑀘 𑀉𑀡𑁆𑀳𑁂 𑀘𑀻𑀯𑀭𑀁 𑀦𑀺𑀤𑀳𑀺𑀢𑀩𑁆𑀩’’𑀦𑁆𑀢𑀺𑀆𑀤𑀻𑀲𑀼 𑀬𑁂𑀲𑀼 𑀓𑁂𑀲𑀼𑀘𑀺. 𑀅𑀬𑀦𑁆𑀢𑀺 𑀤𑀼𑀓𑁆𑀓𑀝𑀸𑀧𑀢𑁆𑀢𑀺. 𑀳𑀻𑀢𑀺 𑀲𑀘𑁆𑀘𑀁. 𑀆𑀧𑀢𑁆𑀢𑀺𑀲𑀸𑀫𑀦𑁆𑀢𑀸𑀢𑀺 𑀏𑀢𑁆𑀣 𑀆𑀧𑀢𑁆𑀢𑀺𑀬𑀸 𑀲𑀸𑀫𑀦𑁆𑀢𑀸 𑀆𑀧𑀢𑁆𑀢𑀺𑀲𑀸𑀫𑀦𑁆𑀢𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀧𑀢𑁆𑀢𑀺𑀬𑀸 𑀆𑀲𑀦𑁆𑀦’’𑀦𑁆𑀢𑀺. ‘‘𑀆𑀲𑀦𑁆𑀦’’𑀦𑁆𑀢𑀺 𑀇𑀫𑀺𑀦𑀸 𑀲𑀸𑀫𑀦𑁆𑀢𑀸𑀲𑀤𑁆𑀤𑀲𑁆𑀲 𑀆𑀲𑀦𑁆𑀦𑀯𑁂𑀯𑀘𑀦𑀢𑀜𑁆𑀘 𑀉𑀧𑀬𑁄𑀕𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀈𑀤𑀺𑀲𑀁 𑀯𑀘𑀦𑀁 𑀪𑀦𑁆𑀢𑁂 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺 𑀦𑀸𑀫𑀸𑀢𑀺 𑀬𑁄𑀚𑀦𑀸.

𑀕𑀸𑀫𑀢𑁄 𑀧𑀞𑀫𑀢𑀭𑀦𑁆𑀢𑀺 𑀕𑀸𑀫𑀢𑁄 𑀉𑀧𑀚𑁆𑀛𑀸𑀬𑀲𑁆𑀲 𑀧𑀞𑀫𑀢𑀭𑀁. 𑀢𑁂𑀦𑁂𑀯𑀸𑀢𑀺 𑀉𑀧𑀚𑁆𑀛𑀸𑀬𑁂𑀦𑁂𑀯. 𑀦𑀺𑀯𑀢𑁆𑀢𑀦𑁆𑀢𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀺𑀦𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑁂𑀤𑀕𑁆𑀕𑀳𑀺𑀢’’𑀦𑁆𑀢𑀺. 𑀇𑀫𑀺𑀦𑀸 𑀲𑁂𑀤𑁂𑀦 𑀲𑀻𑀤𑀢𑀻𑀢𑀺 𑀲𑀺𑀦𑁆𑀦𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀅𑀢𑀺𑀭𑁂𑀓𑀁 𑀓𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀉𑀲𑁆𑀲𑀸𑀭𑁂𑀢𑁆𑀯𑀸𑀢𑀺𑀧𑀤𑀲𑁆𑀲 𑀅𑀥𑀺𑀧𑁆𑀧𑀸𑀬𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀉𑀤𑁆𑀥𑀁 𑀉𑀤𑁆𑀥𑀁 𑀲𑀸𑀭𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀘𑁆𑀙𑀺𑀫𑀯𑀸𑀓𑁆𑀬𑀲𑁆𑀲 𑀧𑀼𑀩𑁆𑀩𑀯𑀸𑀓𑁆𑀬𑀓𑀸𑀭𑀡𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀓𑀺𑀁 𑀓𑀸𑀭𑀡𑀸’’𑀢𑀺. 𑀫𑀚𑁆𑀛𑁂 𑀪𑀗𑁆𑀕𑀲𑁆𑀲 𑀤𑁄𑀲𑀁 𑀆𑀯𑀺𑀓𑀭𑁄𑀦𑁆𑀢𑁄 𑀆𑀳 ‘‘𑀲𑀫𑀁 𑀓𑀢𑁆𑀯𑀸’’𑀢𑀺𑀆𑀤𑀺. 𑀢𑀢𑁄𑀢𑀺 𑀲𑀫𑀁 𑀓𑀢𑁆𑀯𑀸 𑀲𑀁𑀳𑀭𑀡𑀢𑁄, 𑀦𑀺𑀘𑁆𑀘𑀁 𑀪𑀺𑀚𑁆𑀚𑀫𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀚𑁆𑀛𑁂 𑀪𑀗𑁆𑀕𑀢𑁄 𑀯𑀸, 𑀤𑀼𑀩𑁆𑀩𑀮𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑀦𑁆𑀢𑀺 ‘‘𑀘𑀢𑀼𑀭𑀗𑁆𑀕𑀼𑀮𑀁 𑀓𑀡𑁆𑀡𑀁 𑀉𑀲𑁆𑀲𑀸𑀭𑁂𑀢𑁆𑀯𑀸’’𑀢𑀺 𑀏𑀢𑀁 𑀯𑀘𑀦𑀁. 𑀬𑀣𑀸𑀢𑀺 𑀬𑁂𑀦𑀸𑀓𑀸𑀭𑁂𑀦 𑀲𑀁𑀳𑀭𑀺𑀬𑀫𑀸𑀦𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀻𑀯𑀭𑀪𑁄𑀕𑀲𑁆𑀲 𑀑𑀭𑁄 𑀅𑀦𑁆𑀢𑁄 𑀑𑀪𑁄𑀕𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀸𑀬𑀩𑀦𑁆𑀥𑀦’’𑀦𑁆𑀢𑀺𑀆𑀤𑀺.

𑀬𑁄𑀢𑀺 𑀉𑀧𑀚𑁆𑀛𑀸𑀬𑁄. ‘‘𑀕𑀸𑀫𑁂𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀅𑀦𑁆𑀢𑀭𑀖𑀭𑁂 𑀯𑀸 𑀧𑀝𑀺𑀓𑁆𑀓𑀫𑀦𑁂 𑀯𑀸’’𑀢𑀺. 𑀧𑀝𑀺𑀓𑁆𑀓𑀫𑀦𑁂 𑀯𑀸𑀢𑀺 𑀪𑁄𑀚𑀦𑀲𑀸𑀮𑀸𑀬𑀁 𑀯𑀸. 𑀢𑀲𑁆𑀲𑀸𑀢𑀺 𑀉𑀧𑀚𑁆𑀛𑀸𑀬𑀲𑁆𑀲. 𑀮𑀤𑁆𑀥𑀸 𑀪𑀺𑀓𑁆𑀔𑀸 𑀬𑁂𑀦𑀸𑀢𑀺 𑀮𑀤𑁆𑀥𑀪𑀺𑀓𑁆𑀔𑁄, 𑀢𑀲𑁆𑀲 𑀯𑀸. 𑀧𑀺𑀡𑁆𑀟𑀧𑀸𑀢𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸𑀢𑀺 𑀉𑀧𑀚𑁆𑀛𑀸𑀬𑀲𑁆𑀲. 𑀧𑀺𑀡𑁆𑀟𑀧𑀸𑀢𑁄 𑀦 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀢𑁆𑀢𑀦𑀸 𑀮𑀤𑁆𑀥𑁄𑀧𑀻𑀢𑀺 𑀧𑀺𑀲𑀤𑁆𑀤𑁄 𑀉𑀧𑀚𑁆𑀛𑀸𑀬𑁂𑀦 𑀮𑀤𑁆𑀥𑁄𑀧𑀻𑀢𑀺 𑀅𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀆𑀳𑀭𑀺𑀬𑀢𑀽𑀢𑀺 𑀏𑀢𑁆𑀣 𑀢𑀼𑀯𑀺𑀪𑀢𑁆𑀢𑀺 𑀧𑀼𑀘𑁆𑀙𑀸𑀬𑀁 𑀳𑁄𑀢𑀺, 𑀆𑀳𑀭𑀺𑀬𑀢𑀼 𑀓𑀺𑀦𑁆𑀢𑀺 𑀅𑀢𑁆𑀣𑁄. 𑀓𑀸𑀮𑁄𑀢𑀺 𑀪𑁄𑀚𑀦𑀓𑀸𑀮𑁄. 𑀪𑀼𑀜𑁆𑀚𑀺𑀢𑁆𑀣𑀸𑀢𑀺 𑀪𑀼𑀢𑁆𑀢𑁄, 𑀢𑀲𑁆𑀫𑀺𑀁 𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑀓𑀝𑁆𑀞𑁄𑀢𑀺 𑀫𑀚𑁆𑀛𑀦𑁆𑀳𑀺𑀓𑀲𑁆𑀲 𑀆𑀲𑀦𑁆𑀦𑁄.

𑀅𑀦𑀦𑁆𑀢𑀭𑀳𑀺𑀢𑀸𑀬𑀸𑀢𑀺 𑀏𑀢𑁆𑀣 𑀅𑀦𑁆𑀢𑀭𑀥𑀸𑀬𑀢𑀻𑀢𑀺 𑀅𑀦𑁆𑀢𑀭𑀳𑀺𑀢𑁄, 𑀢𑀝𑁆𑀝𑀺𑀓𑀘𑀫𑁆𑀫𑀔𑀡𑁆𑀟𑀸𑀤𑀺, 𑀦𑀢𑁆𑀣𑀺 𑀅𑀦𑁆𑀢𑀭𑀳𑀺𑀢𑁄 𑀏𑀢𑀲𑁆𑀫𑀺𑀁 𑀧𑀢𑁆𑀢𑀪𑀽𑀫𑀻𑀦𑀫𑀦𑁆𑀢𑀭𑁂𑀢𑀺 𑀅𑀦𑀦𑁆𑀢𑀭𑀳𑀺𑀢𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑀢𑁆𑀣𑀢𑀸𑀬𑀸’’𑀢𑀺. 𑀓𑀸𑀴𑀯𑀡𑁆𑀡𑀓𑀢𑀸 𑀯𑀸 𑀲𑀼𑀥𑀸𑀩𑀤𑁆𑀥𑀸 𑀯𑀸 𑀦𑀺𑀭𑀚𑀫𑀢𑁆𑀢𑀺𑀓𑀸 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀢𑀦𑁆𑀢𑀺 𑀧𑀢𑁆𑀢𑀁. 𑀥𑁄𑀢𑀯𑀸𑀮𑀺𑀓𑀸𑀬𑀧𑀻𑀢𑀺 𑀲𑀼𑀤𑁆𑀥𑀯𑀸𑀮𑀺𑀓𑀸𑀬𑀧𑀺. 𑀢𑀢𑁆𑀣𑀸𑀢𑀺 𑀧𑀁𑀲𑀼𑀭𑀚𑀲𑀓𑁆𑀔𑀭𑀸𑀤𑀻𑀲𑀼. 𑀧𑀼𑀦 𑀢𑀢𑁆𑀣𑀸𑀢𑀺 𑀧𑀡𑁆𑀡𑀸𑀥𑀸𑀭𑀓𑁂𑀲𑀼. 𑀇𑀤𑀁 𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀪𑀺𑀫𑀼𑀔𑁂𑀦𑀸𑀢𑀺 𑀅𑀢𑁆𑀢𑀦𑁄 𑀅𑀪𑀺𑀫𑀼𑀔𑁂𑀦. 𑀲𑀡𑀺𑀓𑀦𑁆𑀢𑀺 𑀲𑀺𑀦𑁆𑀦𑀁. 𑀅𑀦𑁆𑀢𑁂 𑀧𑀦𑀸𑀢𑀺 𑀘𑀻𑀯𑀭𑀲𑁆𑀲 𑀓𑁄𑀝𑀺𑀬𑀁 𑀧𑀦. 𑀦𑀺𑀓𑁆𑀔𑀺𑀧𑀦𑁆𑀢𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀘𑀻𑀯𑀭𑀲𑁆𑀲 𑀪𑁄𑀕𑁄𑀢𑀺 𑀬𑁄𑀚𑀦𑀸.

𑀘𑀼𑀡𑁆𑀡𑀁 𑀲𑀦𑁆𑀦𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀘𑀼𑀡𑁆𑀡𑀲𑀫𑁄𑀥𑀸𑀦𑁂𑀦 𑀦𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀺𑀡𑁆𑀟𑀺 𑀓𑀸𑀢𑀩𑁆𑀩𑀸’’𑀢𑀺. ‘‘𑀏𑀓𑀲𑁆𑀫𑀺𑀁 𑀦𑀺𑀤𑁆𑀥𑀽𑀫𑁂 𑀞𑀸𑀦𑁂’’𑀢𑀺 𑀇𑀫𑀺𑀦𑀸 𑀏𑀓𑀫𑀦𑁆𑀢𑀦𑁆𑀢𑀺 𑀏𑀢𑁆𑀣 𑀏𑀓𑀲𑁆𑀫𑀺𑀁 𑀅𑀦𑁆𑀢𑁂 𑀞𑀸𑀦𑁂𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀚𑀦𑁆𑀢𑀸𑀖𑀭𑁂𑀢𑀺 𑀅𑀕𑁆𑀕𑀺𑀲𑀸𑀮𑀸𑀬𑀁. 𑀲𑀸 𑀳𑀺 𑀚𑀮𑀢𑀺 𑀤𑀺𑀩𑁆𑀩𑀢𑀺 𑀅𑀕𑁆𑀕𑀺 𑀏𑀢𑁆𑀣𑀸𑀢𑀺 𑀚𑀦𑁆𑀢𑀸, 𑀚𑀦𑁂𑀢𑀺 𑀲𑀭𑀻𑀭𑀲𑁂𑀤𑀫𑁂𑀢𑁆𑀣𑀸𑀢𑀺 𑀯𑀸 𑀚𑀦𑁆𑀢𑀸, 𑀲𑀸 𑀏𑀯 𑀖𑀭𑀁 𑀚𑀦𑁆𑀢𑀸𑀖𑀭𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁. 𑀧𑀭𑀺𑀧𑀽𑀚𑀸𑀯𑀲𑁂𑀦 𑀓𑀭𑀻𑀬𑀢𑀻𑀢𑀺 𑀧𑀭𑀺𑀓𑀫𑁆𑀫𑀦𑁆𑀢𑀺 𑀅𑀢𑁆𑀣𑁂𑀦 𑀅𑀗𑁆𑀕𑀸𑀭𑀤𑀸𑀦𑀸𑀤𑀺𑀓𑀁 𑀧𑀭𑀺𑀓𑀫𑁆𑀫𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀭𑀺𑀓𑀫𑁆𑀫𑀁 𑀦𑀸𑀫𑀸’’𑀢𑀺𑀆𑀤𑀺.

‘‘𑀦 𑀓𑁂𑀦𑀘𑀺 𑀕𑁂𑀮𑀜𑁆𑀜𑁂𑀦𑀸’’𑀢𑀺𑀆𑀤𑀺𑀦𑀸 𑀉𑀲𑁆𑀲𑀳𑀦𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. 𑀳𑀻𑀢𑀺 𑀲𑀘𑁆𑀘𑀁. 𑀅𑀕𑀺𑀮𑀸𑀦𑁂𑀦 𑀲𑀝𑁆𑀞𑀺𑀯𑀲𑁆𑀲𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦𑀸𑀧𑀺 𑀓𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀅𑀦𑀸𑀤𑀭𑁂𑀦𑀸𑀢𑀺 𑀯𑀢𑁆𑀢𑀓𑀭𑀡𑀲𑁆𑀲 𑀅𑀦𑀸𑀤𑀭𑁂𑀦. 𑀦𑀓𑀸𑀭𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀽𑀢𑀺 𑀧𑀝𑀺𑀲𑁂𑀥𑀯𑀸𑀘𑀓𑁂𑀦 𑀦𑀓𑀸𑀭𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼. 𑀧𑀤𑁂𑀲𑀽𑀢𑀺 ‘‘𑀦 𑀉𑀧𑀚𑁆𑀛𑀸𑀬𑀲𑁆𑀲 𑀪𑀡𑀫𑀸𑀦𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀸 𑀑𑀧𑀸𑀢𑁂𑀢𑀩𑁆𑀩𑀸’’𑀢𑀺𑀆𑀤𑀻𑀲𑀼 𑀯𑀸𑀓𑁆𑀬𑁂𑀲𑀼. 𑀪𑀽𑀫𑀺𑀬𑀦𑁆𑀢𑀺 𑀉𑀧𑀮𑀓𑁆𑀔𑀡𑀯𑀲𑁂𑀦 𑀯𑀼𑀢𑁆𑀢𑀁 𑀪𑀺𑀢𑁆𑀢𑀺𑀬𑀫𑁆𑀧𑀺 𑀅𑀧𑀝𑀺𑀖𑀁𑀲𑀺𑀢𑀩𑁆𑀩𑀢𑁆𑀢𑀸. ‘‘𑀧𑀺𑀞𑀲𑀗𑁆𑀖𑀸𑀝𑀜𑁆𑀘𑀸’’𑀢𑀺 𑀇𑀫𑀺𑀦𑀸 𑀓𑀯𑀸𑀝𑀧𑀻𑀴𑀦𑁆𑀢𑀺 𑀏𑀢𑁆𑀣 𑀧𑀻𑀞𑀲𑀤𑁆𑀤𑁂𑀦 𑀧𑀺𑀞𑀲𑀗𑁆𑀖𑀸𑀝𑀁 𑀯𑀼𑀘𑁆𑀘𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑀯𑀲𑁂𑀦 𑀯𑀸 𑀏𑀓𑀤𑁂𑀲𑀯𑁄𑀳𑀸𑀭𑀯𑀲𑁂𑀦 𑀯𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀅𑀘𑁆𑀙𑀼𑀧𑀦𑁆𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦𑀸𑀢𑀺 𑀏𑀢𑁆𑀣 𑀖𑀁𑀲𑀥𑀸𑀢𑀼𑀬𑀸 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀫𑁆𑀫𑀸 𑀢𑀸𑀬𑀢𑀺 𑀅𑀢𑁆𑀢𑀸𑀦𑀜𑁆𑀘 𑀧𑀭𑀜𑁆𑀘 𑀅𑀦𑁂𑀦𑀸𑀢𑀺 𑀲𑀦𑁆𑀢𑀸𑀦𑀁, 𑀢𑀫𑁂𑀯 𑀲𑀦𑁆𑀢𑀸𑀦𑀓𑀦𑁆𑀢𑀺 𑀅𑀢𑁆𑀣𑁂𑀦 𑀓𑀻𑀝𑀓𑀼𑀮𑀸𑀯𑀓𑀫𑀓𑁆𑀓𑀝𑀓𑀲𑀼𑀢𑁆𑀢𑀸𑀤𑀺 𑀲𑀦𑁆𑀢𑀸𑀦𑀓𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀦𑁆𑀢𑀸𑀦𑀓’’𑀦𑁆𑀢𑀺𑀆𑀤𑀺. 𑀉𑀮𑁆𑀮𑁄𑀓𑀢𑁄𑀢𑀺 𑀯𑀺𑀢𑀸𑀦𑀢𑁄. 𑀢𑀜𑁆𑀳𑀺 𑀉𑀤𑁆𑀥𑀁 𑀮𑀼𑀘𑀻𑀬𑀢𑁂 𑀩𑀦𑁆𑀥𑀻𑀬𑀢𑁂𑀢𑀺 𑀉𑀮𑁆𑀮𑁄𑀓𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀘𑀓𑀸𑀭𑀲𑁆𑀲 𑀓𑀓𑀸𑀭𑀫𑀓𑀢𑁆𑀯𑀸 ‘‘𑀉𑀮𑁆𑀮𑁄𑀘’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀢𑁄𑀲𑀤𑁆𑀤𑁂𑀦 𑀆𑀓𑀸𑀭𑀲𑁆𑀲 𑀲𑁆𑀫𑀸𑀯𑀘𑀦𑀲𑁆𑀲 𑀓𑀸𑀭𑀺𑀬𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀧𑀳𑀭𑀺𑀢𑀩𑁆𑀩𑀦𑁆𑀢𑀺 𑀅𑀧𑀦𑁂𑀢𑀩𑁆𑀩𑀁. ‘‘𑀅𑀯𑀳𑀭𑀺𑀢𑀩𑁆𑀩’’𑀦𑁆𑀢𑀺𑀧𑀺 𑀧𑀸𑀞𑁄, 𑀳𑁂𑀝𑁆𑀞𑀸 𑀳𑀭𑀺𑀢𑀩𑁆𑀩𑀁 𑀧𑀸𑀢𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀆𑀮𑁄𑀓𑀲𑀦𑁆𑀥𑀺𑀪𑀸𑀕𑀸𑀢𑀺 𑀏𑀢𑁆𑀣 𑀪𑀸𑀕𑀲𑀤𑁆𑀤𑀲𑁆𑀲 𑀤𑁆𑀯𑀦𑁆𑀤𑀢𑁄 𑀧𑀭𑀢𑁆𑀢𑀸 𑀧𑀼𑀩𑁆𑀩𑀧𑀤𑁂𑀲𑀼𑀧𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀆𑀮𑁄𑀓𑀲𑀦𑁆𑀥𑀺𑀪𑀸𑀕𑀸 𑀘 𑀓𑀡𑁆𑀡𑀪𑀸𑀕𑀸 𑀘𑀸’’𑀢𑀺. 𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑁆𑀢𑀭𑀩𑀸𑀳𑀺𑀭𑀸’’𑀢𑀺𑀆𑀤𑀺. ‘‘𑀯𑀸𑀢𑀧𑀸𑀦𑀓𑀯𑀸𑀝𑀓𑀸𑀦𑀻’’𑀢𑀺 𑀇𑀫𑀺𑀦𑀸 𑀆𑀮𑁄𑀓𑀲𑀦𑁆𑀥𑀺𑀲𑀤𑁆𑀤𑀲𑁆𑀲 𑀯𑀸𑀢𑀧𑀸𑀦𑀓𑀯𑀸𑀝𑀓𑀧𑀭𑀺𑀬𑀸𑀬𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀓𑁄𑀡𑀸’’𑀢𑀺 𑀇𑀫𑀺𑀦𑀸 𑀓𑀡𑁆𑀡𑀲𑀤𑁆𑀤𑀲𑁆𑀲 𑀓𑁄𑀡𑀯𑁂𑀯𑀘𑀦𑀪𑀸𑀯𑀁 𑀤𑀲𑁆𑀲𑁂𑀢𑀺.

‘‘𑀬𑀣𑀸 𑀧𑀞𑀫’’𑀦𑁆𑀢𑀺𑀆𑀤𑀺𑀦𑀸 𑀧𑀞𑀫𑀧𑀜𑁆𑀜𑀢𑁆𑀢𑀫𑁂𑀯 𑀧𑀜𑁆𑀜𑀧𑁂𑀢𑀩𑁆𑀩𑀁, 𑀦 𑀅𑀜𑁆𑀜𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀁 𑀧𑀢𑀺𑀭𑀽𑀧𑀁 𑀧𑀞𑀫𑀧𑀜𑁆𑀜𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀞𑀫𑀧𑀜𑁆𑀜𑀢𑁆𑀢𑁂 𑀅𑀧𑀢𑀺𑀭𑀽𑀧𑁂 𑀅𑀜𑁆𑀜𑀣𑀸𑀧𑀺 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀏𑀢𑀤𑀢𑁆𑀣𑀫𑁂𑀯𑀸𑀢𑀺 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀸𑀬 𑀏𑀯. 𑀲𑀘𑁂 𑀧𑀜𑁆𑀜𑀢𑁆𑀢𑀁 𑀅𑀳𑁄𑀲𑀺, 𑀏𑀯𑀁 𑀲𑀢𑀻𑀢𑀺 𑀬𑁄𑀚𑀦𑀸. 𑀇𑀤𑀦𑁆𑀢𑀺 𑀪𑀺𑀢𑁆𑀢𑀺𑀁 𑀫𑁄𑀘𑁂𑀢𑁆𑀯𑀸 𑀧𑀜𑁆𑀜𑀸𑀧𑀦𑀁. 𑀓𑀝𑁂𑀲𑀼 𑀓𑀺𑀴𑀜𑁆𑀚𑁂𑀲𑀼 𑀲𑀸𑀭𑀢𑁆𑀢𑀸 𑀉𑀢𑁆𑀢𑀫𑀢𑁆𑀢𑀸 𑀓𑀝𑀲𑀸𑀭𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀲𑀁𑀳𑀭𑀺𑀢𑁆𑀯𑀸. 𑀧𑀼𑀭𑀢𑁆𑀣𑀺𑀫𑀸𑀢𑀺 𑀏𑀢𑁆𑀣 𑀬𑀓𑀸𑀭𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀧𑀼𑀭𑀢𑁆𑀣𑀺𑀫𑀸𑀬𑀸’’𑀢𑀺.

𑀯𑀽𑀧𑀓𑀸𑀲𑁂𑀢𑀩𑁆𑀩𑁄𑀢𑀺 𑀏𑀢𑁆𑀣 𑀓𑀲𑀥𑀸𑀢𑀼 𑀕𑀢𑁆𑀬𑀢𑁆𑀣𑁄𑀢𑀺 𑀆𑀳 ‘‘𑀅𑀜𑁆𑀜𑀢𑁆𑀣 𑀦𑁂𑀢𑀩𑁆𑀩𑁄’’𑀢𑀺. 𑀉𑀧𑀚𑁆𑀛𑀸𑀬𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀦𑁆𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀢𑁆𑀣𑀸𑀢𑀺 𑀅𑀜𑁆𑀜𑀁 𑀞𑀸𑀦𑀁. 𑀯𑀺𑀯𑁂𑀘𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀤𑀺𑀝𑁆𑀞𑀺𑀕𑀢𑀢𑁄 𑀉𑀧𑀚𑁆𑀛𑀸𑀬𑀁 𑀯𑀺𑀯𑁂𑀘𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑀩𑁆𑀩’’𑀦𑁆𑀢𑀺. ‘‘𑀅𑀜𑁆𑀜𑁄 𑀯𑀢𑁆𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀆𑀓𑀸𑀭𑀁 𑀤𑀲𑁆𑀲𑁂𑀢𑀺 ‘‘𑀣𑁂𑀭’’𑀦𑁆𑀢𑀺𑀆𑀤𑀺𑀦𑀸. 𑀲𑁄 𑀲𑁄 𑀪𑀺𑀓𑁆𑀔𑀼 𑀬𑀸𑀘𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑁂𑀦 𑀤𑀸𑀧𑁂𑀢𑀩𑁆𑀩𑁄𑀢𑀺 𑀅𑀢𑁆𑀢𑀦𑀸 𑀅𑀜𑁆𑀜𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀚𑁆𑀛𑀸𑀬𑀲𑁆𑀲 𑀧𑀭𑀺𑀯𑀸𑀲𑁄 𑀤𑀸𑀧𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀓𑀺𑀦𑁆𑀢𑀺 𑀦𑀼 𑀔𑁄𑀢𑀺 𑀓𑁂𑀦 𑀏𑀯 𑀉𑀧𑀸𑀬𑁂𑀦 𑀤𑀤𑁂𑀬𑁆𑀬 𑀦𑀼𑀔𑁄𑀢𑀺 𑀅𑀢𑁆𑀣𑁄. 𑀇𑀢𑀺𑀲𑀤𑁆𑀤𑁄 𑀳𑀺 𑀅𑀯𑀥𑀸𑀭𑀡𑀢𑁆𑀣𑁄. 𑀅𑀝𑁆𑀞𑀓𑀣𑀸𑀬𑀧𑀺 𑀇𑀫𑀫𑁂𑀯 𑀦𑀬𑀁 𑀤𑀲𑁆𑀲𑁂𑀢𑀺 ‘‘𑀓𑁂𑀦 𑀦𑀼 𑀔𑁄 𑀉𑀧𑀸𑀬𑁂𑀦𑀸’’𑀢𑀺 𑀇𑀫𑀺𑀦𑀸. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 ‘‘𑀓𑀺𑀦𑁆𑀢𑀺 𑀦𑀼 𑀔𑁄 𑀧𑀝𑀺𑀓𑀲𑁆𑀲𑁂𑀬𑁆𑀬𑀸’’𑀢𑀺𑀆𑀤𑀺𑀯𑀸𑀓𑁆𑀬𑁂𑀲𑀼. 𑀲𑀢𑁆𑀢𑀲𑀼 𑀓𑀫𑁆𑀫𑁂𑀲𑀼 𑀢𑀺𑀯𑀺𑀥𑀲𑁆𑀲 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀲𑁆𑀲 𑀕𑀭𑀼𑀓𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀉𑀓𑁆𑀔𑁂𑀧𑀦𑀻𑀬𑀁 𑀅𑀓𑀢𑁆𑀯𑀸’’𑀢𑀺. 𑀢𑀫𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀢𑁂𑀦 𑀳𑀻’’𑀢𑀺𑀆𑀤𑀺.

𑀢𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀬𑀸𑀘𑀺𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀘𑁂 𑀓𑀭𑁄𑀦𑁆𑀢𑀺𑀬𑁂𑀯𑀸𑀢𑀺 𑀪𑀺𑀓𑁆𑀔𑀽 𑀲𑀘𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺𑀬𑁂𑀯. 𑀧𑀼𑀦 𑀲𑀘𑁂 𑀓𑀭𑁄𑀦𑁆𑀢𑀺𑀬𑁂𑀯𑀸𑀢𑀺 𑀪𑀺𑀓𑁆𑀔𑀽 𑀲𑀘𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺𑀬𑁂𑀯. 𑀅𑀣𑀸𑀢𑀺 𑀢𑀲𑁆𑀫𑀺𑀁 𑀓𑀫𑁆𑀫𑁂 𑀓𑀢𑁂. 𑀇𑀢𑀻𑀢𑀺 𑀏𑀯𑀁 𑀬𑀸𑀘𑀦𑁂𑀦. 𑀦𑀦𑁆𑀢𑀺 𑀢𑀁 𑀉𑀧𑀚𑁆𑀛𑀸𑀬𑀁.

𑀲𑀫𑁆𑀧𑀭𑀺𑀯𑀢𑁆𑀢𑀓𑀦𑁆𑀢𑀺 𑀏𑀢𑁆𑀣 ‘‘𑀧𑀺𑀡𑁆𑀟𑀼𑀓𑁆𑀔𑁂𑀧𑀓’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁬𑁨𑁦) 𑀯𑀺𑀬 𑀲𑀫𑁆𑀧𑀭𑀺𑀯𑀢𑁆𑀢𑀓𑀦𑁆𑀢𑀺𑀧𑀤𑀁 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁, 𑀓𑀧𑀘𑁆𑀘𑀬𑁄 𑀘 𑀯𑀺𑀘𑁆𑀙𑀢𑁆𑀣𑁄𑀢𑀺 𑀆𑀳 ‘‘𑀲𑀫𑁆𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀲𑀫𑁆𑀧𑀭𑀺𑀯𑀢𑁆𑀢𑁂𑀢𑁆𑀯𑀸’’𑀢𑀺. 𑀬𑀤𑀻𑀢𑀺 𑀬𑀸𑀯. 𑀬𑀤𑀺𑀲𑀤𑁆𑀤𑁄 𑀳𑀺 𑀬𑀸𑀯𑀧𑀭𑀺𑀬𑀸𑀬𑁄, 𑀢𑁂𑀦 𑀯𑀼𑀢𑁆𑀢𑀁 ‘‘𑀦 𑀢𑀸𑀯 𑀧𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺. 𑀬𑀸𑀯 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀭𑀚𑀦𑀁 𑀕𑀮𑀢𑀺, 𑀦 𑀢𑀸𑀯 𑀧𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀯𑀺𑀲𑀪𑀸𑀕𑀧𑀼𑀕𑁆𑀕𑀮𑁂𑀦𑀸𑀢𑀺 𑀯𑀺𑀲𑀪𑀸𑀕𑁂𑀦 𑀧𑀼𑀕𑁆𑀕𑀮𑁂𑀦 𑀓𑀭𑀡𑀪𑀽𑀢𑁂𑀦. 𑀦 𑀉𑀧𑀚𑁆𑀛𑀸𑀬𑀁 𑀅𑀦𑀸𑀧𑀼𑀘𑁆𑀙𑀸 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄𑀢𑀺 𑀏𑀢𑁆𑀣 𑀦 𑀅𑀜𑁆𑀜𑁂𑀦𑁂𑀯 𑀓𑀭𑀡𑀻𑀬𑁂𑀦 𑀧𑀯𑀺𑀲𑀺𑀢𑀩𑁆𑀩𑁄. 𑀧𑀺𑀡𑁆𑀟𑀸𑀬 𑀧𑀦 𑀧𑀯𑀺𑀲𑀺𑀢𑀩𑁆𑀩𑁄𑀢𑀺 𑀆𑀲𑀗𑁆𑀓𑀸 𑀪𑀯𑁂𑀬𑁆𑀬𑀸𑀢𑀺 𑀆𑀳 ‘‘𑀧𑀺𑀡𑁆𑀟𑀸𑀬 𑀯𑀸’’𑀢𑀺𑀆𑀤𑀺. ‘‘𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀅𑀦𑀸𑀧𑀼𑀘𑁆𑀙𑀸𑀢𑀺 𑀏𑀢𑁆𑀣 𑀆𑀓𑀸𑀭𑁄 𑀢𑁆𑀯𑀸𑀧𑀘𑁆𑀘𑀬𑀲𑁆𑀲 𑀓𑀸𑀭𑀺𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀪𑀺𑀓𑁆𑀔𑀸𑀘𑀸𑀭𑀦𑁆𑀢𑀺 𑀪𑀺𑀓𑁆𑀔𑀸𑀬 𑀘𑀭𑀡𑀝𑁆𑀞𑀸𑀦𑀁, 𑀉𑀧𑀚𑁆𑀛𑀸𑀬𑁂𑀦 𑀕𑀦𑁆𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀧𑀭𑀺𑀯𑁂𑀡𑀦𑁆𑀢𑀺 𑀉𑀧𑀚𑁆𑀛𑀸𑀬𑀲𑁆𑀲 𑀧𑀭𑀺𑀯𑁂𑀡𑀁. 𑀧𑀲𑁆𑀲𑀢𑀻𑀢𑀺 𑀉𑀧𑀚𑁆𑀛𑀸𑀬𑀁 𑀧𑀲𑁆𑀲𑀢𑀺.

𑀤𑀲𑁆𑀲𑀦𑀢𑁆𑀣𑀸𑀬 𑀯𑀸𑀢𑀺 𑀅𑀲𑀼𑀪𑀤𑀲𑁆𑀲𑀦𑀢𑁆𑀣𑀸𑀬 𑀯𑀸. 𑀇𑀫𑀺𑀦𑀸𑀧𑀺 𑀯𑀸𑀲𑀢𑁆𑀣𑀸𑀬 𑀏𑀯 𑀦 𑀕𑀦𑁆𑀢𑀩𑁆𑀩𑀦𑁆𑀢𑀺 𑀆𑀲𑀗𑁆𑀓𑀁 𑀦𑀺𑀯𑀢𑁆𑀢𑁂𑀢𑀺. 𑀓𑀫𑁆𑀫𑀦𑁆𑀢𑀺 𑀧𑀓𑁆𑀓𑀫𑀦𑀲𑁆𑀲 𑀓𑀸𑀭𑀡𑀁 𑀓𑀫𑁆𑀫𑀁. 𑀅𑀦𑀦𑀼𑀚𑀸𑀦𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀬𑀸𑀯𑀢𑀢𑀺𑀬’’𑀦𑁆𑀢𑀺. 𑀢𑀦𑁆𑀢𑀺 𑀉𑀧𑀚𑁆𑀛𑀸𑀬𑀁. 𑀅𑀲𑁆𑀲𑀸𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲. ‘‘𑀦 𑀲𑀫𑁆𑀧𑀚𑁆𑀚𑀢𑀻’’𑀢𑀺 𑀇𑀫𑀺𑀦𑀸 𑀲𑀘𑁂 𑀲𑀫𑁆𑀧𑀚𑁆𑀚𑀢𑀺, 𑀦 𑀧𑀓𑁆𑀓𑀫𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀓𑁂𑀯𑀮𑀦𑁆𑀢𑀺 𑀯𑀺𑀦𑀸 𑀉𑀤𑁆𑀤𑁂𑀲𑀸𑀤𑀺𑀲𑀫𑁆𑀧𑀚𑁆𑀚𑀦𑁂𑀳𑀺. 𑀏𑀯𑀭𑀽𑀧𑁂 𑀉𑀧𑀚𑁆𑀛𑀸𑀬𑁂 𑀦𑀺𑀯𑀸𑀭𑁂𑀦𑁆𑀢𑁂𑀧𑀻𑀢𑀺 𑀬𑁄𑀚𑀦𑀸. ‘‘𑀕𑁂𑀮𑀜𑁆𑀜𑀢𑁄’’𑀢𑀺 𑀇𑀫𑀺𑀦𑀸 𑀯𑀼𑀝𑁆𑀞𑀸𑀦𑀲𑀤𑁆𑀤𑀲𑁆𑀲 𑀅𑀯𑀥𑀺𑀅𑀧𑁂𑀓𑁆𑀔𑀢𑀁 𑀤𑀲𑁆𑀲𑁂𑀢𑀺. 𑀅𑀲𑁆𑀲𑀸𑀢𑀺 𑀉𑀧𑀚𑁆𑀛𑀸𑀬𑀲𑁆𑀲. 𑀅𑀜𑁆𑀜𑁄𑀢𑀺 𑀅𑀢𑁆𑀢𑀦𑀸 𑀅𑀜𑁆𑀜𑁄. 𑀢𑀲𑁆𑀲𑀸𑀢𑀺 𑀅𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀲𑁆𑀲.