𑁧𑁬. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀯𑀢𑁆𑀢𑀓𑀣𑀸

𑁬𑁭. 𑀲𑀫𑁆𑀫𑀸𑀯𑀢𑁆𑀢𑀦𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀉𑀤𑁆𑀤𑁂𑀲𑀸𑀤𑀻𑀳𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀧𑀭𑀺𑀧𑀼𑀘𑁆𑀙𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀗𑁆𑀕𑀳𑀲𑀤𑁆𑀤𑀲𑁆𑀲 𑀲𑀗𑁆𑀔𑁂𑀧𑀕𑀳𑀡𑁂𑀲𑀼𑀧𑀺 𑀯𑀼𑀢𑁆𑀢𑀺𑀢𑁄 ‘‘𑀅𑀦𑀼𑀕𑁆𑀕𑀳𑁄’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀲𑀫𑁆𑀫𑀼𑀔𑀸 𑀲𑀗𑁆𑀕𑀳𑁄 𑀘 𑀧𑀭𑀫𑁆𑀫𑀼𑀔𑀸 𑀅𑀦𑀼𑀕𑁆𑀕𑀳𑁄 𑀘 𑀓𑀸𑀢𑀩𑁆𑀩𑁄. 𑀆𑀫𑀺𑀲𑁂𑀦 𑀯𑀸 𑀲𑀗𑁆𑀕𑀳𑁄, 𑀥𑀫𑁆𑀫𑁂𑀦 𑀯𑀸 𑀅𑀦𑀼𑀕𑁆𑀕𑀳𑁄. 𑀤𑀺𑀝𑁆𑀞𑀥𑀫𑁆𑀫𑀺𑀓𑀢𑁆𑀣𑀸𑀬 𑀯𑀸 𑀲𑀗𑁆𑀕𑀳𑁄, 𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀸𑀬 𑀯𑀸 𑀅𑀦𑀼𑀕𑁆𑀕𑀳𑁄. 𑀮𑁄𑀓𑀺𑀬𑀢𑁆𑀣𑀸𑀬 𑀯𑀸 𑀲𑀗𑁆𑀕𑀳𑁄, 𑀮𑁄𑀓𑀼𑀢𑁆𑀢𑀭𑀢𑁆𑀣𑀸𑀬 𑀯𑀸 𑀅𑀦𑀼𑀕𑁆𑀕𑀳𑁄 𑀓𑀸𑀢𑀩𑁆𑀩𑁄. 𑀢𑀢𑁆𑀣𑀸𑀢𑀺 𑀬𑀁 𑀯𑀼𑀢𑁆𑀢𑀁 ‘‘𑀉𑀤𑁆𑀤𑁂𑀲𑁂𑀦 𑀧𑀭𑀺𑀧𑀼𑀘𑁆𑀙𑀸𑀬 𑀑𑀯𑀸𑀤𑁂𑀦 𑀅𑀦𑀼𑀲𑀸𑀲𑀦𑀻𑀬𑀸’’𑀢𑀺. 𑀢𑀢𑁆𑀣 𑀉𑀤𑁆𑀤𑀺𑀲𑀦𑀁 𑀉𑀤𑁆𑀤𑁂𑀲𑁄𑀢𑀺 𑀯𑀘𑀦𑀢𑁆𑀣𑁂𑀦 𑀧𑀸𑀴𑀺𑀯𑀸𑀘𑀦𑀸 𑀉𑀤𑁆𑀤𑁂𑀲𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀤𑁆𑀤𑁂𑀲𑁄𑀢𑀺 𑀧𑀸𑀴𑀺𑀯𑀸𑀘𑀦𑀸’’𑀢𑀺. ‘‘𑀧𑀸𑀴𑀺𑀬𑀸 𑀅𑀢𑁆𑀣𑀯𑀡𑁆𑀡𑀦𑀸’’𑀢𑀺 𑀇𑀫𑀺𑀦𑀸 𑀧𑀼𑀦𑀧𑁆𑀧𑀼𑀦𑀁, 𑀲𑀫𑀦𑁆𑀢𑀢𑁄 𑀯𑀸 𑀧𑀸𑀴𑀺𑀬𑀸 𑀅𑀢𑁆𑀣𑀲𑁆𑀲 𑀧𑀼𑀘𑁆𑀙𑀦𑀁 𑀧𑀭𑀺𑀧𑀼𑀘𑁆𑀙𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀯𑀢𑁆𑀣𑀼𑀲𑁆𑀫𑀺𑀁. 𑀇𑀤𑀦𑁆𑀢𑀺 𑀘𑀸𑀭𑀺𑀢𑁆𑀢𑀁. 𑀧𑀼𑀦 𑀇𑀤𑀦𑁆𑀢𑀺 𑀯𑀸𑀭𑀺𑀢𑁆𑀢𑀁. ‘‘𑀯𑀘𑀦’’𑀦𑁆𑀢𑀺 𑀇𑀫𑀺𑀦𑀸 𑀑𑀯𑀤𑀦𑀁 𑀑𑀯𑀸𑀤𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀑𑀢𑀺𑀡𑁆𑀡𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀇𑀤𑀁 𑀓𑀭𑁄𑀳𑀺, 𑀇𑀤𑀁 𑀫𑀸 𑀓𑀭𑀺𑀢𑁆𑀣𑀸’’𑀢𑀺 𑀯𑀘𑀦𑀁 𑀅𑀦𑀼𑀲𑀸𑀲𑀦𑀻 𑀦𑀸𑀫𑀸𑀢𑀺 𑀬𑁄𑀚𑀦𑀸. ‘‘𑀧𑀼𑀦𑀧𑁆𑀧𑀼𑀦𑀁 𑀯𑀘𑀦’’𑀦𑁆𑀢𑀺 𑀇𑀫𑀺𑀦𑀸 𑀅𑀦𑀼𑀲𑀸𑀲𑀦𑀻𑀢𑀺 𑀏𑀢𑁆𑀣 𑀅𑀦𑀼𑀲𑀤𑁆𑀤𑀲𑁆𑀲 𑀦𑀉𑀧𑀘𑁆𑀙𑀺𑀦𑁆𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀧𑀢𑁆𑀢𑁄 𑀳𑁄𑀢𑀻’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑁂𑀧𑀺 𑀦 𑀧𑀓𑀢𑀺𑀧𑀢𑁆𑀢𑁄 𑀳𑁄𑀢𑀺, 𑀅𑀣 𑀔𑁄 𑀅𑀢𑀺𑀭𑀺𑀢𑁆𑀢𑀧𑀢𑁆𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀅𑀢𑀺𑀭𑁂𑀓𑀧𑀢𑁆𑀢𑁄’’𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 ‘‘𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀘𑀻𑀯𑀭𑀁 𑀳𑁄𑀢𑀻’’𑀢𑀺𑀆𑀤𑀻𑀲𑀼 𑀧𑀤𑁂𑀲𑀼. 𑀅𑀜𑁆𑀜𑁄𑀧𑀻𑀢𑀺 𑀧𑀢𑁆𑀢𑀘𑀻𑀯𑀭𑁂𑀳𑀺 𑀅𑀜𑁆𑀜𑁄𑀧𑀺. 𑀲𑀫𑀡𑀧𑀭𑀺𑀓𑁆𑀔𑀸𑀭𑁄𑀢𑀺 𑀙𑀢𑁆𑀢𑀼𑀧𑀸𑀳𑀦𑀸𑀤𑀺 𑀲𑀫𑀡𑀧𑀭𑀺𑀓𑁆𑀔𑀸𑀭𑁄. 𑀇𑀥𑀸𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀯𑀢𑁆𑀢𑁂. 𑀦𑀬𑁂𑀦𑀸𑀢𑀺 𑀜𑀸𑀬𑁂𑀦. 𑀉𑀧𑁆𑀧𑀚𑁆𑀚𑀫𑀸𑀦𑀉𑀧𑀸𑀬𑀧𑀭𑀺𑀬𑁂𑀲𑀦𑀦𑁆𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲, 𑀉𑀧𑁆𑀧𑀚𑁆𑀚𑀫𑀸𑀦𑀢𑁆𑀣𑀸𑀬 𑀯𑀸 𑀉𑀧𑀸𑀬𑀲𑁆𑀲 𑀧𑀭𑀺𑀬𑁂𑀲𑀦𑀁. 𑀇𑀢𑁄𑀢𑀺 ‘‘𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀧𑀭𑀺𑀓𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀺𑀬𑁂𑀣𑀸’’𑀢𑀺 𑀧𑀸𑀴𑀺𑀢𑁄. 𑀘𑀻𑀯𑀭𑀁 𑀭𑀚𑀦𑁆𑀢𑁂𑀦𑀸𑀢𑀺 𑀏𑀢𑁆𑀣 𑀭𑀚𑀦𑁆𑀢𑁂𑀦 𑀉𑀧𑀚𑁆𑀛𑀸𑀬𑁂𑀦𑀸𑀢𑀺 𑀅𑀢𑁆𑀣𑁄 𑀦 𑀤𑀝𑁆𑀞𑀩𑁆𑀩𑁄, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦𑀸𑀢𑀺 𑀅𑀢𑁆𑀣𑁄 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀧𑀚𑁆𑀛𑀸𑀬𑀢𑁄 𑀉𑀧𑀸𑀬𑀁 𑀲𑀼𑀢𑁆𑀯𑀸 𑀭𑀚𑀦𑁆𑀢𑁂𑀦𑀸’’𑀢𑀺. 𑀉𑀧𑀚𑁆𑀛𑀸𑀬𑀢𑁄 𑀉𑀧𑀸𑀬𑀦𑁆𑀢𑀺 𑀉𑀧𑀚𑁆𑀛𑀸𑀬𑀢𑁄 𑀮𑀤𑁆𑀥𑀁 𑀉𑀧𑀸𑀬𑀁.

𑀦𑀲𑀫𑁆𑀫𑀸𑀯𑀢𑁆𑀢𑀦𑀸𑀤𑀺𑀓𑀣𑀸

𑁬𑁮. 𑀉𑀧𑀚𑁆𑀛𑀸𑀬𑀯𑀢𑁆𑀢𑀦𑁆𑀢𑀺 𑀉𑀧𑀚𑁆𑀛𑀸𑀬𑀫𑁆𑀳𑀺 𑀯𑀢𑁆𑀢𑀺𑀢𑀩𑁆𑀩𑀁 𑀯𑀢𑁆𑀢𑀁. 𑀲𑁄𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄. 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀻𑀢𑀺 𑀅𑀲𑁆𑀲, 𑀲𑁄 𑀯𑀸 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀧𑀡𑀸𑀫𑁂𑀢𑀩𑁆𑀩𑁄𑀢𑀺 𑀏𑀢𑁆𑀣 𑀧𑀧𑀼𑀩𑁆𑀩 𑀦𑀫𑀼𑀥𑀸𑀢𑀼 𑀅𑀢𑁆𑀣𑀧𑀓𑀭𑀡𑀸𑀤𑀺𑀯𑀲𑁂𑀦 𑀇𑀥 𑀅𑀧𑀲𑀸𑀤𑀦𑀢𑁆𑀣𑁄𑀢𑀺 𑀆𑀳 ‘‘𑀅𑀧𑀲𑀸𑀤𑁂𑀢𑀩𑁆𑀩𑁄’’𑀢𑀺. 𑀅𑀥𑀺𑀫𑀢𑁆𑀢𑀦𑁆𑀢𑀺 𑀅𑀥𑀺𑀓𑀧𑁆𑀧𑀫𑀸𑀡𑀁. 𑀕𑁂𑀳𑀲𑀺𑀢𑀧𑁂𑀫𑀦𑁆𑀢𑀺 𑀫𑁂𑀢𑁆𑀢𑀸𑀲𑀺𑀦𑁂𑀳𑀁. 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦𑀸𑀢𑀺 𑀓𑀡𑁆𑀳𑀧𑀓𑁆𑀔𑁂 𑀯𑀼𑀢𑁆𑀢𑁂𑀦 𑀧𑀝𑀺𑀧𑀓𑁆𑀔𑁂𑀦 𑀦𑀬𑁂𑀦. 𑀅𑀮𑀁 𑀧𑀡𑀸𑀫𑁂𑀢𑀼𑀦𑁆𑀢𑀺 𑀏𑀢𑁆𑀣 𑀅𑀮𑀁𑀲𑀤𑁆𑀤𑀲𑁆𑀲 𑀅𑀭𑀳𑀢𑁆𑀣𑀧𑀝𑀺𑀓𑁆𑀔𑀺𑀢𑁆𑀢𑁂𑀲𑀼 𑀤𑁆𑀯𑀻𑀲𑀼 𑀅𑀢𑁆𑀣𑁂𑀲𑀼 𑀅𑀭𑀳𑀢𑁆𑀣𑁄𑀢𑀺 𑀆𑀳 ‘‘𑀬𑀼𑀢𑁆𑀢𑁄 𑀧𑀡𑀸𑀫𑁂𑀢𑀼’’𑀦𑁆𑀢𑀺.

𑀲𑀸𑀢𑀺𑀲𑀸𑀭𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀧𑀓𑀢𑀺𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀭𑀡𑀁 𑀧𑀯𑀢𑁆𑀢𑀦𑀁 𑀅𑀢𑀺𑀲𑀸𑀭𑁄, 𑀤𑁄𑀲𑁄. 𑀲𑀁𑀯𑀺𑀚𑁆𑀚𑀢𑀺 𑀲𑁄 𑀏𑀢𑀲𑁆𑀲𑀸𑀢𑀺 𑀲𑀸𑀢𑀺𑀲𑀸𑀭𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀤𑁄𑀲𑁄 𑀳𑁄𑀢𑀻’’𑀢𑀺. 𑀢𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻’’𑀢𑀺. 𑀆𑀧𑀢𑁆𑀢𑀺𑀦𑁆𑀢𑀺 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀁. 𑀢𑀦𑁆𑀢𑀺 𑀯𑀢𑁆𑀢𑀁.

𑀢𑁂𑀲𑀦𑁆𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁. 𑀯𑀢𑁆𑀢𑀦𑁆𑀢𑀺 𑀩𑀳𑀼𑀓𑀸𑀦𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁 𑀯𑀢𑁆𑀢𑀁. 𑀲𑀸𑀤𑀺𑀬𑀦𑀁 𑀯𑀸…𑀧𑁂… 𑀩𑀸𑀮𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀩𑀸𑀮𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀸𑀤𑀺𑀬𑀦𑀁 𑀯𑀸 𑀅𑀲𑀸𑀤𑀺𑀬𑀦𑀁 𑀯𑀸 𑀦 𑀚𑀸𑀦𑀸𑀢𑀻’’𑀢𑀺. 𑀲𑀸𑀤𑀺𑀬𑀦𑀲𑁆𑀲 𑀯𑀸 𑀅𑀲𑀸𑀤𑀺𑀬𑀦𑀲𑁆𑀲 𑀯𑀸 𑀅𑀚𑀸𑀦𑀦𑀢𑁆𑀢𑀸 𑀩𑀸𑀮𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀚𑀸𑀦𑀦𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀩𑀸𑀮𑁄 𑀳𑁄𑀢𑀻’’𑀢𑀺. 𑀩𑀸𑀮𑀢𑁆𑀢𑀸 𑀲𑀸𑀤𑀺𑀬𑀦𑀁 𑀯𑀸 𑀅𑀲𑀸𑀤𑀺𑀬𑀦𑀁 𑀯𑀸 𑀦 𑀚𑀸𑀦𑀸𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀲𑀽𑀢𑀺 𑀩𑀳𑀼𑀓𑁂𑀲𑀼 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀲𑀼. 𑀢𑀲𑁆𑀲𑀸𑀢𑀺 𑀯𑀢𑁆𑀢𑀲𑀫𑁆𑀧𑀦𑁆𑀦𑀪𑀺𑀓𑁆𑀔𑀼𑀲𑁆𑀲. 𑀢𑁂𑀲𑀦𑁆𑀢𑀺 𑀇𑀢𑀭𑁂𑀲𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁.

𑀭𑀸𑀥𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼𑀓𑀣𑀸

𑁬𑁯. 𑀓𑀺𑀜𑁆𑀘𑀸𑀧𑀺 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀚𑀸𑀦𑀸𑀢𑀻𑀢𑀺 𑀬𑁄𑀚𑀦𑀸. 𑀇𑀫𑀺𑀦𑀸 ‘‘𑀓𑀺𑀁 𑀦𑀼 𑀔𑁄 𑀅𑀚𑀸𑀦𑀦𑁆𑀢𑁄 𑀧𑀼𑀘𑁆𑀙𑀻’’𑀢𑀺 𑀆𑀲𑀗𑁆𑀓𑀁 𑀦𑀺𑀯𑀸𑀭𑁂𑀢𑀺. 𑀪𑀕𑀯𑀸 𑀅𑀦𑀼𑀜𑁆𑀜𑀸𑀢𑀼𑀓𑀸𑀫𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀦𑀲𑀤𑁆𑀤𑁄 𑀕𑀭𑀳𑀢𑁆𑀣𑁄, 𑀢𑀣𑀸 𑀚𑀸𑀦𑀦𑁆𑀢𑁄𑀧𑀻𑀢𑀺 𑀅𑀢𑁆𑀣𑁄. 𑀮𑀳𑀼𑀓𑀦𑁆𑀢𑀺 𑀳𑁂𑀢𑀼𑀅𑀦𑁆𑀢𑁄𑀕𑀥𑀯𑀺𑀲𑁂𑀲𑀦𑀁. 𑀮𑀳𑀼𑀓𑀢𑁆𑀢𑀸 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀲𑁆𑀲𑀸𑀢𑀺 𑀪𑀕𑀯𑀢𑁄, 𑀅𑀚𑁆𑀛𑀸𑀲𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸’’𑀢𑀺𑀯𑀘𑀦𑀲𑁆𑀲 𑀬𑀼𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀩𑀼𑀤𑁆𑀥𑀸𑀦𑀁 𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀲𑀘𑁆𑀘𑀁. 𑀅𑀬𑀜𑁆𑀘𑀸𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀘. 𑀅𑀕𑁆𑀕𑁄𑀢𑀺 𑀓𑁄𑀝𑀺𑀉𑀓𑁆𑀓𑀁𑀲𑁄. 𑀲𑁂𑀝𑁆𑀞𑁄𑀢𑀺 𑀧𑀯𑀭𑁄 𑀉𑀢𑁆𑀢𑀫𑁄.

‘‘𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦𑀸’’𑀢𑀺 𑀏𑀢𑁆𑀣 𑀩𑁆𑀬𑀢𑁆𑀢𑀧𑀝𑀺𑀩𑀮𑀸𑀦𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀩𑁆𑀬𑀢𑁆𑀢𑁄 𑀦𑀸𑀫𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀲𑁆𑀲 𑀲𑀸𑀝𑁆𑀞𑀓𑀣𑀁 𑀯𑀺𑀦𑀬𑀧𑀺𑀝𑀓𑀯𑀸𑀘𑀼𑀕𑁆𑀕𑀢𑀁 𑀧𑀯𑀢𑁆𑀢𑀢𑀺, 𑀅𑀬𑀁 𑀩𑁆𑀬𑀢𑁆𑀢𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀢𑀲𑁆𑀫𑀺𑀦𑁆𑀢𑀺 𑀯𑀺𑀦𑀬𑀧𑀺𑀝𑀓𑀁 𑀯𑀸𑀘𑀼𑀕𑁆𑀕𑀢𑀪𑀺𑀓𑁆𑀔𑀼𑀫𑁆𑀳𑀺. 𑀬𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄. 𑀲𑀼𑀕𑁆𑀕𑀳𑀺𑀢𑀦𑁆𑀢𑀺 𑀲𑀸𑀝𑁆𑀞𑀓𑀣𑀸𑀬 𑀲𑀼𑀝𑁆𑀞𑀼 𑀕𑀳𑀺𑀢𑀁. 𑀅𑀬𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁄 𑀧𑀼𑀭𑀺𑀫𑀪𑀺𑀓𑁆𑀔𑀼𑀁 𑀅𑀧𑁂𑀓𑁆𑀔𑀢𑀺. 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂𑀢𑀺 𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀫𑁆𑀳𑀺, 𑀇𑀫𑀲𑁆𑀫𑀺𑀁 𑀯𑀺𑀲𑀬𑁂𑀢𑀺 𑀅𑀢𑁆𑀣𑁄. 𑀩𑁆𑀬𑀢𑀺𑀭𑁂𑀓𑀸𑀦𑁆𑀯𑀬𑀯𑀲𑁂𑀦 𑀧𑀝𑀺𑀩𑀮𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁄 𑀧𑀦𑀸’’𑀢𑀺𑀆𑀤𑀺. 𑀬𑁄 𑀧𑀦 𑀦 𑀲𑀓𑁆𑀓𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀲𑁆𑀫𑀸𑀢𑀺 𑀆𑀳 ‘‘𑀓𑀸𑀲𑀲𑁄𑀲𑀲𑁂𑀫𑁆𑀳𑀸𑀤𑀺𑀦𑀸 𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀓𑀸𑀲𑁄 𑀘 𑀲𑁄𑀲𑁄 𑀘 𑀲𑁂𑀫𑁆𑀳𑁄 𑀘, 𑀢𑁂 𑀆𑀤𑀬𑁄 𑀬𑀲𑁆𑀲 𑀕𑁂𑀮𑀜𑁆𑀜𑀲𑁆𑀲𑀸𑀢𑀺 𑀓𑀸𑀲𑀲𑁄𑀲𑀲𑁂𑀫𑁆𑀳𑀸𑀤𑀺, 𑀆𑀤𑀺𑀲𑀤𑁆𑀤𑁂𑀦 𑀏𑀴𑀫𑀽𑀕𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀑𑀝𑁆𑀞𑁄 𑀘 𑀤𑀦𑁆𑀢𑁄 𑀘 𑀚𑀺𑀯𑁆𑀳𑀸 𑀘, 𑀢𑀸 𑀆𑀤𑀬𑁄 𑀬𑁂𑀲𑀁 𑀢𑀸𑀮𑀼𑀆𑀤𑀻𑀦𑀦𑁆𑀢𑀺 𑀑𑀝𑁆𑀞𑀤𑀦𑁆𑀢𑀚𑀺𑀯𑁆𑀳𑀸𑀤𑀬𑁄, 𑀢𑁂𑀲𑀁. 𑀧𑀤𑀩𑁆𑀬𑀜𑁆𑀚𑀦𑁂𑀳𑀻𑀢𑀺 𑀧𑀤𑀅𑀓𑁆𑀔𑀭𑁂𑀳𑀺. 𑀩𑁆𑀬𑀜𑁆𑀚𑀦𑀲𑀤𑁆𑀤𑁄 𑀳𑁂𑀢𑁆𑀣 𑀅𑀓𑁆𑀔𑀭𑀯𑀸𑀘𑀓𑁄. 𑀳𑀸𑀧𑁂𑀢𑀻𑀢𑀺 𑀕𑀮𑀢𑁆𑀢𑀸 𑀳𑀸𑀧𑁂𑀢𑀺. 𑀅𑀜𑁆𑀜𑀣𑀸 𑀯𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀜𑁆𑀜𑁂𑀦 𑀲𑀺𑀣𑀺𑀮𑀸𑀤𑀺𑀦𑀸 𑀆𑀓𑀸𑀭𑁂𑀦 𑀯𑀸 𑀯𑀢𑁆𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀯𑀤𑀢𑀻𑀢𑀺 𑀅𑀜𑁆𑀜𑁂𑀦 𑀥𑀦𑀺𑀢𑀸𑀤𑀺𑀆𑀓𑀸𑀭𑁂𑀦 𑀯𑀤𑀢𑀺. 𑀢𑀩𑁆𑀩𑀺𑀧𑀭𑀻𑀢𑁄𑀢𑀺 𑀢𑀲𑁆𑀲 𑀅𑀧𑀝𑀺𑀩𑀮𑀲𑁆𑀲 𑀯𑀺𑀧𑀭𑀻𑀢𑁄 𑀪𑀺𑀓𑁆𑀔𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀢𑀺 𑀚𑀸𑀦𑀸𑀧𑁂𑀢𑀩𑁆𑀩𑀢𑁄. 𑀬𑀦𑁆𑀢𑀺 𑀬𑀁 𑀆𑀓𑀸𑀭𑀁 𑀥𑀸𑀢𑀼𑀓𑀫𑁆𑀫𑀫𑁂𑀢𑀁, 𑀲𑀗𑁆𑀖𑁄𑀢𑀺 𑀓𑀸𑀭𑀺𑀢𑀓𑀫𑁆𑀫𑀫𑁂𑀢𑀁. 𑀇𑀥 𑀓𑀸𑀭𑀺𑀢𑀓𑀫𑁆𑀫𑀁 𑀓𑀺𑀢𑁄 𑀯𑀤𑀢𑀺.

𑁭𑁧. 𑀉𑀧𑀲𑀫𑁆𑀧𑀦𑁆𑀦𑀲𑀫𑀦𑀦𑁆𑀢𑀭𑀸𑀢𑀺 𑀏𑀢𑁆𑀣 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀫𑀦𑀦𑁆𑀢𑀭𑀸𑀢𑀺 𑀅𑀢𑁆𑀣𑀁 𑀦𑀺𑀯𑀸𑀭𑁂𑀦𑁆𑀢𑁄 𑀆𑀳 ‘‘𑀉𑀧𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸𑀯 𑀲𑀫𑀦𑀦𑁆𑀢𑀭𑀸’’𑀢𑀺. 𑀏𑀯𑀲𑀤𑁆𑀤𑁂𑀦 𑀘𑀺𑀭𑀓𑀸𑀮𑀁 𑀦𑀺𑀯𑀢𑁆𑀢𑁂𑀢𑀺. 𑀉𑀮𑁆𑀮𑀼𑀫𑁆𑀧𑀢𑀽𑀢𑀺 𑀏𑀢𑁆𑀣 𑀉𑀧𑀼𑀩𑁆𑀩𑀮𑀼𑀧𑀥𑀸𑀢𑀼𑀬𑀸 𑀉𑀧𑀲𑀕𑁆𑀕𑀯𑀲𑁂𑀦 𑀯𑀸 𑀅𑀢𑁆𑀣𑀸𑀢𑀺𑀲𑀬𑀯𑀲𑁂𑀦 𑀯𑀸 𑀥𑀸𑀢𑀽𑀦𑀫𑀦𑁂𑀓𑀢𑁆𑀣𑀢𑁆𑀢𑀸 𑀇𑀥 𑀉𑀧𑀼𑀩𑁆𑀩𑀥𑀭𑀥𑀸𑀢𑀼𑀬𑀸 𑀅𑀢𑁆𑀣𑁂 𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀤𑁆𑀥𑀭𑀢𑀽’’𑀢𑀺. 𑀉𑀝𑁆𑀞𑀸𑀧𑁂𑀢𑁆𑀯𑀸, 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀸 𑀥𑀭𑀢𑀽𑀢𑀺 𑀅𑀢𑁆𑀣𑁄. 𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀓𑀼𑀲𑀮𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀅𑀓𑀼𑀲𑀮𑀸 𑀯𑀼𑀝𑁆𑀞𑀸𑀧𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀲𑀳𑀸𑀯𑀥𑀺𑀦𑀸 𑀉𑀢𑁆𑀬𑀽𑀧𑀲𑀕𑁆𑀕𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀓𑀼𑀲𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑀽’’𑀢𑀺 𑀇𑀫𑀺𑀦𑀸 𑀲𑀳𑀸𑀥𑀸𑀭𑁂𑀦 𑀥𑀭𑀥𑀸𑀢𑀼𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀉𑀢𑁆𑀬𑀽𑀧𑀲𑀕𑁆𑀕𑀲𑁆𑀲 𑀉𑀓𑁆𑀔𑀺𑀧𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀸𑀫𑀡𑁂𑀭𑀪𑀸𑀯𑀸 𑀯𑀸 𑀉𑀤𑁆𑀥𑀭𑀺𑀢𑁆𑀯𑀸’’𑀢𑀺. ‘‘𑀧𑀝𑀺𑀘𑁆𑀘𑀸’’𑀢𑀺 𑀇𑀫𑀺𑀦𑀸 𑀉𑀧𑀸𑀤𑀸𑀬𑀸𑀢𑀺 𑀏𑀢𑁆𑀣 𑀲𑀫𑀻𑀧𑁂 𑀆𑀤𑀺𑀬𑀺𑀢𑁆𑀯𑀸𑀢𑀺 𑀲𑀤𑁆𑀤𑀢𑁆𑀣𑀫𑀕𑀳𑁂𑀢𑁆𑀯𑀸 𑀲𑀗𑁆𑀓𑁂𑀢𑀢𑁆𑀣𑀯𑀲𑁂𑀦 𑀧𑀸𑀓𑀝𑀢𑁆𑀢𑀸 𑀢𑀲𑁆𑀲 𑀲𑀗𑁆𑀓𑁂𑀢𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀅𑀥𑀺𑀧𑁆𑀧𑀸𑀬𑀢𑁆𑀣𑀁 𑀤𑀲𑁆𑀲𑁂𑀢𑀻𑀢𑀺 𑀅𑀢𑁆𑀣𑁄.

𑁭𑁩. 𑀅𑀥𑀺𑀝𑁆𑀞𑀺𑀢𑀸𑀢𑀺 𑀏𑀢𑁆𑀣 𑀅𑀥𑀺 𑀦𑀺𑀘𑁆𑀘𑀯𑀲𑁂𑀦 𑀞𑀸𑀢𑀺 𑀧𑀯𑀢𑁆𑀢𑀢𑀻𑀢𑀺 𑀅𑀥𑀺𑀝𑁆𑀞𑀺𑀢𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑀺𑀘𑁆𑀘𑀧𑁆𑀧𑀯𑀢𑁆𑀢𑀺𑀦𑀻’’𑀢𑀺. 𑀓𑀲𑁆𑀫𑀸 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀦𑀺𑀲𑁆𑀲𑀬𑀸𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀬𑀲𑁆𑀫𑀸’’𑀢𑀺𑀆𑀤𑀺. ‘‘𑀘𑀢𑁆𑀢𑀸𑀭𑁄’’𑀢𑀺𑀆𑀤𑀺𑀦𑀸 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀦𑀺𑀲𑁆𑀲𑀸𑀬 𑀅𑀢𑁆𑀢𑀪𑀸𑀯𑁄 𑀲𑁂𑀢𑀺 𑀧𑀯𑀢𑁆𑀢𑀢𑀻𑀢𑀺 𑀦𑀺𑀲𑁆𑀲𑀸𑀬𑀸𑀢𑀺 𑀅𑀯𑀼𑀢𑁆𑀢𑀓𑀫𑁆𑀫𑀢𑁆𑀣𑀁 𑀤𑀲𑁆𑀲𑁂𑀢𑀺.