𑁧𑁪. 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦 𑀧𑀩𑁆𑀩𑀚𑁆𑀚𑀸𑀓𑀣𑀸

𑁬𑁦. ‘‘𑀢𑁂𑀢𑀺 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸. 𑀅𑀕𑀫𑀁𑀲𑀼 𑀓𑀺𑀭𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀭𑀸𑀢𑀺 𑀕𑀺𑀭𑀕𑁆𑀕𑀲𑀫𑀚𑁆𑀚𑁂. 𑀅𑀣𑀸𑀢𑀺 𑀧𑀭𑀺𑀯𑀺𑀢𑀓𑁆𑀓𑀦𑀸𑀦𑀦𑁆𑀢𑀭𑀁. 𑀢𑀲𑁆𑀲𑀸𑀢𑀺 𑀲𑀜𑁆𑀘𑀬𑀲𑁆𑀲. 𑀧𑀸𑀭𑀦𑁆𑀢𑀺 𑀧𑀭𑀢𑀻𑀭𑀁. 𑀏𑀢𑁆𑀣𑀸𑀢𑀺 𑀢𑀼𑀫𑁆𑀳𑀸𑀓𑀁 𑀯𑀸𑀤𑁂. 𑀇𑀤𑀦𑁆𑀢𑀺 𑀅𑀬𑀁 𑀯𑀸𑀤𑁄 𑀏𑀢𑁆𑀢𑀓𑁄𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀬𑁄𑀢𑀺 𑀬𑁄 𑀓𑁄𑀘𑀺. 𑀢𑁆𑀯𑀜𑁆𑀘 𑀅𑀳𑀜𑁆𑀘 𑀅𑀫𑁆𑀳𑁂, 𑀢𑁂𑀲𑀼. 𑀦𑀸𑀫𑀢𑀼𑀫𑁆𑀳𑀲𑀗𑁆𑀔𑀸𑀢𑁂𑀲𑀼 𑀳𑀺 𑀢𑀻𑀲𑀼 𑀲𑀤𑁆𑀤𑁂𑀲𑀼 𑀏𑀓𑀲𑁂𑀲𑁂𑀦 𑀓𑀢𑁆𑀢𑀩𑁆𑀩𑁂𑀲𑀼 𑀧𑀘𑁆𑀙𑀺𑀫𑀲𑁆𑀲𑁂𑀯 𑀏𑀓𑀲𑁂𑀲𑁄 𑀓𑀸𑀢𑀩𑁆𑀩𑁄. 𑀢𑁂𑀦𑀸𑀢𑀺 𑀓𑀢𑀺𑀓𑀓𑀭𑀡𑀳𑁂𑀢𑀼𑀦𑀸.

𑀲𑀁𑀔𑁂𑀧𑁂𑀦 𑀯𑀼𑀢𑁆𑀢𑀁 𑀯𑀺𑀢𑁆𑀣𑀸𑀭𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀤𑀁 𑀳𑀻’’𑀢𑀺𑀆𑀤𑀺. 𑀅𑀢𑁆𑀣𑀻𑀓𑁂𑀳𑀻𑀢𑀺 𑀅𑀫𑀢𑁂𑀦 𑀅𑀢𑁆𑀣𑀺𑀓𑁂𑀳𑀺. 𑀉𑀧𑀜𑁆𑀜𑀸𑀢𑀁 𑀫𑀕𑁆𑀕𑀦𑁆𑀢𑀺 𑀅𑀫𑀢𑀲𑁆𑀲 𑀫𑀕𑁆𑀕𑁄 𑀉𑀧𑀕𑀦𑁆𑀢𑁆𑀯𑀸 𑀜𑀸𑀢𑁄. 𑀜𑀸𑀢𑁄 𑀘𑁂𑀯 𑀉𑀧𑀕𑀢𑁄 𑀘𑀸𑀢𑀺 𑀲𑀳 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀅𑀢𑁆𑀣𑀁 𑀓𑀣𑁂𑀦𑁆𑀢𑁄 𑀉𑀧𑀲𑀕𑁆𑀕𑀢𑁆𑀣𑁄 𑀘 𑀥𑀸𑀢𑀼𑀢𑁆𑀣𑁄 𑀘 𑀯𑀺𑀲𑀼𑀁𑀬𑁂𑀯 𑀳𑁄𑀢𑀻𑀢𑀺 𑀜𑀸𑀧𑁂𑀢𑀺. 𑀅𑀢𑁆𑀣𑀺𑀓𑁂𑀳𑀺 𑀅𑀫𑁆𑀳𑁂𑀳𑀺 𑀉𑀧𑀜𑁆𑀜𑀸𑀢𑀁 𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑀁 𑀫𑀕𑁆𑀕𑀦𑁆𑀢𑁄 𑀅𑀦𑀼𑀩𑀦𑁆𑀥𑁂𑀬𑁆𑀬𑀦𑁆𑀢𑀺 𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀣 𑀯𑀸’’𑀢𑀺𑀆𑀤𑀺. 𑀫𑀕𑁆𑀕𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀳𑀺 𑀉𑀧𑀕𑀦𑁆𑀢𑁆𑀯𑀸 𑀜𑀸𑀢𑀩𑁆𑀩𑀦𑁆𑀢𑀺 𑀉𑀧𑀜𑁆𑀜𑀸𑀢𑀁 𑀦𑀺𑀩𑁆𑀩𑀸𑀦𑀁. 𑀫𑀕𑁆𑀕𑀥𑀸𑀣𑀼𑀬𑀸 𑀅𑀦𑁆𑀯𑁂𑀲𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀭𑀺𑀬𑁂𑀲𑀦𑁆𑀢𑁄’’𑀢𑀺.

𑀲𑀸𑀭𑀺𑀧𑀼𑀢𑁆𑀢𑁄𑀧𑀺 𑀧𑀜𑁆𑀳𑀁 𑀧𑀼𑀘𑁆𑀙𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀫𑀡𑁆𑀟𑀮𑀼𑀢𑁄𑀢𑀺 𑀓𑀼𑀡𑁆𑀟𑀺𑀓𑀢𑁄. 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀅𑀓𑀣𑀦𑁂𑀦 𑀅𑀦𑁆𑀢𑀭𑁂 𑀯𑀺𑀯𑀭𑀁 𑀧𑀝𑀺𑀲𑀦𑁆𑀤𑀳𑀢𑀻𑀢𑀺 𑀧𑀝𑀺𑀲𑀦𑁆𑀥𑀸𑀭𑁄, 𑀢𑀁. 𑀏𑀢𑁆𑀣𑀸𑀢𑀺 ‘‘𑀦 𑀢𑁆𑀬𑀸𑀳𑀁 𑀲𑀓𑁆𑀓𑁄𑀫𑀻’’𑀢𑀺𑀧𑀤𑁂. 𑀅𑀥𑀺𑀧𑁆𑀧𑀸𑀬𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀏𑀢𑁆𑀢𑀓𑀦𑁆𑀢𑀺 𑀏𑀢𑁆𑀢𑀓𑀁 𑀧𑀜𑁆𑀳𑀁. 𑀇𑀫𑀲𑁆𑀲𑀸𑀢𑀺 𑀧𑀭𑀺𑀩𑁆𑀩𑀸𑀚𑀓𑀲𑁆𑀲. 𑀅𑀯𑀺𑀲𑀬𑀪𑀸𑀯𑀦𑁆𑀢𑀺 𑀅𑀢𑁆𑀢𑀦𑁄 𑀅𑀯𑀺𑀲𑀬𑀪𑀸𑀯𑀁.

𑀳𑁂𑀢𑀼𑀁 𑀧𑀝𑀺𑀘𑁆𑀘 𑀪𑀯𑀦𑁆𑀢𑀻𑀢𑀺 𑀳𑁂𑀢𑀼𑀧𑁆𑀧𑀪𑀯𑀸𑀢𑀺 𑀯𑀘𑀦𑀢𑁆𑀣𑁂𑀦 𑀧𑀜𑁆𑀘𑀓𑁆𑀔𑀦𑁆𑀥𑀸 𑀳𑁂𑀢𑀼𑀧𑁆𑀧𑀪𑀯𑀸 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀳𑁂𑀢𑀼𑀧𑁆𑀧𑀪𑀯𑀸 𑀦𑀸𑀫 𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺. 𑀢𑁂𑀦𑀸𑀢𑀺 ‘‘𑀬𑁂 𑀥𑀫𑁆𑀫𑀸 𑀳𑁂𑀢𑀼𑀧𑁆𑀧𑀪𑀯𑀸’’𑀢𑀺 𑀧𑀤𑁂𑀦. 𑀅𑀲𑁆𑀲𑀸𑀢𑀺 𑀲𑀸𑀭𑀺𑀧𑀼𑀢𑁆𑀢𑀧𑀭𑀺𑀩𑁆𑀩𑀸𑀚𑀓𑀲𑁆𑀲. ‘‘𑀢𑁂𑀲𑀁 𑀳𑁂𑀢𑀼 𑀦𑀸𑀫 𑀲𑀫𑀼𑀤𑀬𑀲𑀘𑁆𑀘’’𑀦𑁆𑀢𑀺 𑀇𑀫𑀺𑀦𑀸 𑀳𑀺𑀦𑁄𑀢𑀺 𑀏𑀢𑀲𑁆𑀫𑀸 𑀨𑀮𑀦𑁆𑀢𑀺 𑀳𑁂𑀢𑀽𑀢𑀺 𑀯𑀘𑀦𑀢𑁆𑀣𑁂𑀦 𑀲𑀫𑀼𑀤𑀬𑀲𑀘𑁆𑀘𑀁 𑀳𑁂𑀢𑀼 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀜𑁆𑀘𑀸𑀢𑀺 𑀲𑀫𑀼𑀤𑀬𑀲𑀘𑁆𑀘𑀜𑁆𑀘. 𑀢𑁂𑀲𑀦𑁆𑀢𑀺 𑀏𑀢𑁆𑀣 𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀉𑀪𑀺𑀦𑁆𑀦𑀫𑁆𑀧𑀺 𑀲𑀘𑁆𑀘𑀸𑀦’’𑀦𑁆𑀢𑀺. 𑀅𑀧𑀯𑀢𑁆𑀢𑀺𑀯𑀲𑁂𑀦 𑀦𑀺𑀭𑀼𑀚𑁆𑀛𑀢𑀺 𑀏𑀢𑁆𑀣𑀸𑀢𑀺 𑀦𑀺𑀭𑁄𑀥𑁄. 𑀢𑀜𑁆𑀘𑀸𑀢𑀺 𑀦𑀺𑀭𑁄𑀥𑀜𑁆𑀘. 𑀢𑁂𑀦𑀸𑀢𑀺 ‘‘𑀢𑁂𑀲𑀜𑁆𑀘 𑀬𑁄 𑀦𑀺𑀭𑁄𑀥𑁄’’𑀢𑀺𑀧𑀤𑁂𑀦. 𑀅𑀲𑁆𑀲𑀸𑀢𑀺 𑀲𑀸𑀭𑀺𑀧𑀼𑀢𑁆𑀢𑀧𑀭𑀺𑀩𑁆𑀩𑀸𑀚𑀓𑀲𑁆𑀲. 𑀏𑀢𑁆𑀣𑀸𑀢𑀺 𑀇𑀫𑀺𑀲𑁆𑀲𑀁 𑀕𑀸𑀣𑀸𑀬𑀁, 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀯𑀸. 𑀦𑀬𑀢𑁄𑀢𑀺 𑀦𑀸𑀦𑀦𑁆𑀢𑀭𑀺𑀓𑀦𑀬𑀢𑁄, 𑀅𑀯𑀺𑀦𑀸𑀪𑀸𑀯𑀦𑀬𑀢𑁄 𑀯𑀸, 𑀦𑁂𑀢𑁆𑀢𑀺𑀤𑁂𑀲𑀦𑀸𑀳𑀸𑀭𑀦𑀬𑀢𑁄 𑀯𑀸. 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀆𑀳 ‘‘𑀦𑀺𑀭𑁄𑀥𑁂 𑀳𑀻’’𑀢𑀺𑀆𑀤𑀺. 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑀦𑀬𑁂𑀦 𑀯𑀸 𑀫𑀕𑁆𑀕𑀲𑀘𑁆𑀘𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀣 𑀯𑀸’’𑀢𑀺𑀆𑀤𑀺. 𑀦𑀺𑀭𑁄𑀥𑁄 𑀘 𑀦𑀺𑀭𑁄𑀥𑀽𑀧𑀸𑀬𑁄 𑀘 𑀦𑀺𑀭𑁄𑀥𑁄𑀢𑀺 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑁄 𑀓𑀸𑀢𑀩𑁆𑀩𑁄. 𑀢𑁂𑀲𑀜𑁆𑀘𑀸𑀢𑀺 𑀏𑀢𑁆𑀣 𑀅𑀯𑀼𑀢𑁆𑀢𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁂𑀦 𑀘𑀲𑀤𑁆𑀤𑁂𑀦 𑀫𑀕𑁆𑀕𑀲𑀘𑁆𑀘𑀁 𑀕𑀳𑁂𑀢𑀩𑁆𑀩𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀬𑀁 𑀦𑀬𑁄 𑀅𑀝𑁆𑀞𑀓𑀣𑀸𑀬𑀁 𑀦 𑀯𑀼𑀢𑁆𑀢𑁄. 𑀢𑀫𑁂𑀯𑀢𑁆𑀣𑀦𑁆𑀢𑀺 𑀘𑀢𑀼𑀲𑀘𑁆𑀘𑀲𑀗𑁆𑀔𑀸𑀢𑀁 𑀢𑀫𑁂𑀯𑀢𑁆𑀣𑀁. 𑀧𑀝𑀺𑀧𑀸𑀤𑁂𑀦𑁆𑀢𑁄𑀢𑀺 𑀦𑀺𑀕𑀫𑁂𑀦𑁆𑀢𑁄.

‘‘𑀲𑀘𑁂𑀧𑀻’’𑀢𑀺 𑀇𑀫𑀺𑀦𑀸 𑀬𑀤𑀻𑀢𑀺 𑀧𑀤𑀲𑁆𑀲𑀢𑁆𑀣𑀁 𑀯𑀡𑁆𑀡𑁂𑀢𑀺. ‘‘𑀏𑀢𑁆𑀢𑀓𑀫𑁂𑀯𑀸’’𑀢𑀺 𑀇𑀫𑀺𑀦𑀸 𑀢𑀸𑀯𑀤𑁂𑀯𑀸𑀢𑀺 𑀧𑀤𑀲𑁆𑀲𑀢𑁆𑀣𑀁 𑀯𑀡𑁆𑀡𑁂𑀢𑀺. ‘‘𑀇𑀢𑁄 𑀉𑀢𑁆𑀢𑀭𑀺 𑀦𑀢𑁆𑀣𑀻’’𑀢𑀺 𑀇𑀫𑀺𑀦𑀸 𑀏𑀯𑀓𑀸𑀭𑀲𑁆𑀲 𑀨𑀮𑀁 𑀤𑀲𑁆𑀲𑁂𑀢𑀺. 𑀇𑀢𑁄𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀢𑁄. ‘‘𑀇𑀤𑀁…𑀧𑁂… 𑀧𑀢𑁆𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 ‘‘𑀏𑀢𑁆𑀢𑀓𑀫𑁂𑀯𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. ‘‘𑀏𑀲𑁄 𑀏𑀯 𑀥𑀫𑁆𑀫𑁄’’𑀢𑀺 𑀇𑀫𑀺𑀦𑀸 ‘‘𑀏𑀲𑁂𑀯 𑀥𑀫𑁆𑀫𑁄’’𑀢𑀺𑀧𑀤𑀲𑁆𑀲 𑀅𑀢𑁆𑀣𑀁 𑀯𑀡𑁆𑀡𑁂𑀢𑀺. 𑀧𑀘𑁆𑀘𑀩𑁆𑀬𑀢𑁆𑀣𑀸𑀢𑀺 𑀧𑀢𑀺𑀅𑀯𑀧𑀼𑀩𑁆𑀩𑁄 𑀇𑀥𑀸𑀢𑀼 𑀧𑀝𑀺𑀯𑀺𑀤𑁆𑀥𑀢𑁆𑀣𑁄𑀢𑀺 𑀆𑀳 ‘‘𑀧𑀝𑀺𑀯𑀺𑀤𑁆𑀥𑀢𑁆𑀣𑀸’’𑀢𑀺. 𑀢𑀼𑀫𑁆𑀳𑁂𑀳𑀻𑀢𑀺 𑀅𑀲𑁆𑀲𑀚𑀺𑀢𑁆𑀣𑁂𑀭𑀁 𑀲𑀦𑁆𑀥𑀸𑀬𑀸𑀳. 𑀇𑀫𑀺𑀦𑀸 ‘‘𑀧𑀘𑁆𑀘𑀩𑁆𑀬𑀢𑁆𑀣𑀸’’𑀢𑀺 𑀏𑀢𑁆𑀣 𑀳𑀺𑀬𑁆𑀬𑀢𑁆𑀢𑀦𑀻𑀧𑀭𑀲𑁆𑀲𑀧𑀤𑀫𑀚𑁆𑀛𑀺𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑀢𑁆𑀣𑀯𑀺𑀪𑀢𑁆𑀢𑀺𑀁 𑀤𑀻𑀧𑁂𑀢𑀺. 𑀓𑀧𑁆𑀧𑀦𑀳𑀼𑀢𑁂𑀳𑀻𑀢𑀺 𑀓𑀧𑁆𑀧𑀸𑀦𑀁 𑀦𑀳𑀼𑀢𑁂𑀳𑀺, 𑀓𑁄𑀝𑀺𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀲𑀢𑁂𑀳𑀺 𑀦𑀳𑀼𑀢𑁂𑀳𑀻𑀢𑀺 𑀅𑀢𑁆𑀣𑁄. 𑀅𑀩𑁆𑀪𑀢𑀻𑀢𑀦𑁆𑀢𑀺 𑀅𑀪𑀺𑀅𑀢𑀻𑀢𑀁. 𑀅𑀫𑁆𑀳𑁂𑀳𑀺 𑀅𑀤𑀺𑀝𑁆𑀞𑀫𑁂𑀯 𑀳𑀼𑀢𑁆𑀯𑀸 𑀅𑀢𑀺𑀓𑁆𑀓𑀫𑀸𑀧𑀺𑀢𑀦𑁆𑀢𑀺 𑀅𑀢𑁆𑀣𑁄.

𑁬𑁨. 𑀆𑀭𑀫𑁆𑀫𑀡𑀪𑀽𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀕𑀫𑁆𑀪𑀻𑀭𑀢𑁆𑀢𑀸 𑀆𑀭𑀫𑁆𑀫𑀡𑀺𑀓𑀪𑀽𑀢𑀁 𑀜𑀸𑀡𑀫𑁆𑀧𑀺 𑀕𑀫𑁆𑀪𑀻𑀭𑀫𑁂𑀯𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀕𑀫𑁆𑀪𑀻𑀭𑀲𑁆𑀲 𑀘 𑀜𑀸𑀡𑀲𑁆𑀲𑀸’’𑀢𑀺. 𑀬𑀣𑀸 𑀳𑀺 𑀲𑀡𑁆𑀳𑀯𑀢𑁆𑀣𑀲𑁆𑀲 𑀲𑀺𑀩𑁆𑀩𑀦𑀢𑁆𑀣𑀸𑀬 𑀲𑀡𑁆𑀳𑀲𑀽𑀘𑀺 𑀅𑀥𑀺𑀧𑁆𑀧𑁂𑀢𑀸𑀢𑀺. 𑀉𑀧𑀥𑀻𑀦𑀁 𑀲𑀫𑁆𑀫𑀸 𑀔𑀬𑀝𑁆𑀞𑁂𑀦 𑀦𑀺𑀩𑁆𑀩𑀸𑀦𑀁 𑀉𑀧𑀥𑀺𑀲𑀗𑁆𑀔𑀬𑀁 𑀦𑀸𑀫𑀸𑀢𑀺 𑀆𑀳 ‘‘𑀉𑀧𑀥𑀺𑀲𑀗𑁆𑀔𑀬𑁂𑀢𑀺 𑀦𑀺𑀩𑁆𑀩𑀸𑀦𑁂’’𑀢𑀺. 𑀢𑀤𑀸𑀭𑀫𑁆𑀫𑀡𑀸𑀬𑀸𑀢𑀺 𑀢𑀁𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀬. 𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀨𑀮𑀯𑀺𑀫𑀼𑀢𑁆𑀢𑀺𑀬𑀸. 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑁂𑀢𑀺 𑀅𑀕𑁆𑀕𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑁂. 𑀢𑁂𑀲𑀽𑀢𑀺 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀲𑀼. 𑀅𑀟𑁆𑀠𑀫𑀸𑀲𑁂𑀦 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀢𑀻𑀢𑁂𑀢𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀫𑀢𑁆𑀣𑀓𑁂. 𑀢𑀲𑁆𑀲𑀸𑀢𑀺 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀅𑀕𑁆𑀕𑀲𑀸𑀯𑀓𑀪𑀸𑀯𑀁 𑀧𑀢𑁆𑀣𑁂𑀲𑀻𑀢𑀺 𑀬𑁄𑀚𑀦𑀸. 𑀅𑀲𑁆𑀲𑀫𑁂𑀢𑀺 𑀫𑀼𑀦𑀻𑀦𑀁 𑀞𑀸𑀦𑁂. 𑀢𑀜𑁆𑀳𑀺 𑀆 𑀓𑁄𑀥𑀁, 𑀆 𑀪𑀼𑀲𑁄 𑀯𑀸 𑀭𑀸𑀕𑀸𑀤𑀬𑁄 𑀲𑀫𑁂𑀦𑁆𑀢𑀺 𑀏𑀢𑁆𑀣𑀸𑀢𑀺 𑀅𑀲𑁆𑀲𑀫𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁. 𑀧𑀢𑁆𑀣𑀬𑀺𑀢𑁆𑀯𑀸 𑀘 𑀧𑁂𑀲𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀦𑀻𑀮𑀼𑀧𑁆𑀧𑀮𑀫𑀡𑁆𑀟𑀧𑁂. 𑀢𑁂𑀲𑀽𑀢𑀺 𑀢𑀸𑀧𑀲𑀲𑁂𑀝𑁆𑀞𑀻𑀲𑀼.

𑁬𑁩. 𑀬𑁂𑀲𑀦𑁆𑀢𑀺 𑀓𑀼𑀮𑀸𑀦𑀁. ‘‘𑀯𑀺𑀥𑀯𑀪𑀸𑀯𑀸𑀬𑀸’’𑀢𑀺 𑀇𑀫𑀺𑀦𑀸 𑀯𑀺𑀥𑀯𑀸𑀬 𑀪𑀸𑀯𑁄 𑀯𑁂𑀥𑀩𑁆𑀬𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀯𑀺𑀥𑀯𑀸𑀢𑀺 𑀘 𑀧𑀢𑀺𑀲𑀼𑀜𑁆𑀜𑀸. 𑀲𑀸 𑀳𑀺 𑀥𑀯𑁂𑀦 𑀯𑀺𑀕𑀢𑀸𑀢𑀺 ‘‘𑀯𑀺𑀥𑀯𑀸’’𑀢𑀺 𑀘, 𑀯𑀺𑀕𑀢𑁄 𑀥𑀯𑁄 𑀇𑀫𑀺𑀲𑁆𑀲𑀸𑀢𑀺 ‘‘𑀯𑀺𑀥𑀯𑀸’’𑀢𑀺 𑀘 𑀯𑀼𑀘𑁆𑀘𑀢𑀺. 𑀉𑀪𑀬𑁂𑀦𑀸𑀧𑀻𑀢𑀺 𑀧𑀼𑀢𑁆𑀢𑀧𑀩𑁆𑀩𑀚𑁆𑀚𑀧𑀢𑀺𑀧𑀩𑁆𑀩𑀚𑁆𑀚𑀲𑀗𑁆𑀔𑀸𑀢𑁂𑀦 𑀤𑀼𑀯𑀺𑀥𑁂𑀦𑀧𑀺.

𑀲𑀜𑁆𑀘𑀬𑀸𑀦𑀻𑀢𑀺 𑀏𑀢𑁆𑀣 𑀦𑀺𑀲𑁆𑀲𑀬𑀽𑀧𑀘𑀸𑀭𑁂𑀦 𑀦𑀺𑀲𑁆𑀲𑀬𑁂 𑀦𑀺𑀲𑁆𑀲𑀺𑀢𑀽𑀧𑀘𑀸𑀭𑁄 𑀳𑁄𑀢𑀻𑀢𑀺 𑀆𑀳 ‘‘𑀲𑀜𑁆𑀘𑀬𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀻’’𑀢𑀺. 𑀅𑀣 𑀯𑀸 𑀡𑀧𑀘𑁆𑀘𑀬𑁄 𑀢𑀲𑁆𑀲𑁂𑀤𑀫𑀢𑁆𑀣𑁂 𑀳𑁄𑀢𑀻𑀢𑀺 𑀆𑀳 ‘‘𑀲𑀜𑁆𑀘𑀬𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀻’’𑀢𑀺. ‘‘𑀫𑀕𑀥𑀸𑀦’’𑀦𑁆𑀢𑀺 𑀩𑀳𑀼𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀚𑀦𑀧𑀤𑀲𑁆𑀲 𑀦𑀸𑀫𑀦𑁆𑀢𑀺 𑀆𑀳 ‘‘𑀫𑀕𑀥𑀸𑀦𑀁 𑀚𑀦𑀧𑀤𑀲𑁆𑀲𑀸’’𑀢𑀺. 𑀕𑀺𑀭𑀺𑀩𑁆𑀩𑀚𑀦𑁆𑀢𑀺 𑀏𑀢𑁆𑀣 𑀯𑀚𑁄 𑀯𑀺𑀬𑀸𑀢𑀺 𑀯𑀚𑁄, 𑀕𑀺𑀭𑀺. 𑀯𑀚𑀲𑀤𑀺𑀲𑁄 𑀕𑀺𑀭𑀺 𑀏𑀢𑁆𑀣𑀸𑀢𑀺 𑀕𑀺𑀭𑀺𑀩𑁆𑀩𑀚𑀁 𑀧𑀤𑀳𑁂𑀝𑁆𑀞𑀼𑀧𑀭𑀺𑀬𑀯𑀲𑁂𑀦, 𑀦𑀕𑀭𑀁. ‘‘𑀫𑀳𑀸𑀯𑀻𑀭𑀺𑀬𑀯𑀦𑁆𑀢𑁄’’𑀢𑀺 𑀇𑀫𑀺𑀦𑀸 𑀫𑀳𑀦𑁆𑀢𑁄 𑀯𑀻𑀭𑁄 𑀏𑀢𑁂𑀲𑀁 𑀢𑀣𑀸𑀕𑀢𑀸𑀦𑀦𑁆𑀢𑀺 𑀫𑀳𑀸𑀯𑀻𑀭𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀥𑀫𑁆𑀫𑁂𑀦 𑀦𑀬𑀫𑀸𑀦𑀸𑀦𑀁 𑀓𑀸 𑀉𑀲𑀽𑀬𑀸 𑀯𑀺𑀚𑀸𑀦𑀢𑀦𑁆𑀢𑀺 𑀏𑀢𑁆𑀣 𑀓𑀘𑁆𑀘𑀸𑀬𑀦𑀦𑀬𑁂𑀦 (𑀓𑀘𑁆𑀘𑀸𑀬𑀦𑁂 𑁨𑁭𑁭 𑀲𑀼𑀢𑁆𑀢𑁂) 𑀉𑀲𑀽𑀬𑀧𑀬𑁄𑀕𑁂 𑀲𑀫𑁆𑀧𑀤𑀸𑀦𑀁 𑀳𑁄𑀢𑀻𑀢𑀺 𑀆𑀲𑀗𑁆𑀓𑀸 𑀪𑀯𑁂𑀬𑁆𑀬𑀸𑀢𑀺 𑀆𑀳 ‘‘𑀪𑀼𑀫𑁆𑀫𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀉𑀧𑀬𑁄𑀕𑀢𑁆𑀣𑁂 𑀯𑀸’’𑀢𑀺. 𑀯𑀺𑀚𑀸𑀦𑀦𑁆𑀢𑀸𑀦𑀦𑁆𑀢𑀺 𑀯𑀺𑀚𑀸𑀦𑀦𑁆𑀢𑁂𑀲𑀼 𑀢𑀣𑀸𑀕𑀢𑁂𑀲𑀼, 𑀯𑀺𑀚𑀸𑀦𑀦𑁆𑀢𑁂 𑀯𑀸.