𑁧𑁩. 𑀩𑀺𑀫𑁆𑀩𑀺𑀲𑀸𑀭𑀲𑀫𑀸𑀕𑀫𑀓𑀣𑀸

𑁫𑁫. 𑀮𑀝𑁆𑀞𑀺𑀲𑀤𑁆𑀤𑁄 𑀢𑀭𑀼𑀡𑀭𑀼𑀓𑁆𑀔𑀯𑀸𑀘𑀓𑁄 ‘‘𑀅𑀫𑁆𑀩𑀮𑀝𑁆𑀞𑀺𑀓𑀸𑀬’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨), 𑀇𑀥𑀸𑀧𑀺 𑀢𑀭𑀼𑀡𑀢𑀸𑀮𑀭𑀼𑀓𑁆𑀔𑁄 𑀮𑀝𑁆𑀞𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀸𑀮𑀼𑀬𑁆𑀬𑀸𑀦𑁂’’𑀢𑀺. 𑀯𑀝𑀭𑀼𑀓𑁆𑀔𑁂𑀢𑀺 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁂. 𑀏𑀢𑁆𑀣 ‘‘𑀯𑀝’’𑀇𑀢𑀺 𑀇𑀫𑀺𑀦𑀸 𑀯𑀝𑀭𑀼𑀓𑁆𑀔𑁄 𑀩𑀳𑀼𑀫𑀽𑀮𑀢𑁆𑀢𑀸 𑀲𑀼𑀝𑁆𑀞𑀼𑀁 𑀧𑀢𑀺𑀝𑁆𑀞𑀸𑀢𑀻𑀢𑀺 𑀅𑀢𑁆𑀣𑁂𑀦 𑀲𑀼𑀧𑁆𑀧𑀢𑀺𑀝𑁆𑀞𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀭𑀼𑀓𑁆𑀔𑁂’’𑀇𑀢𑀺 𑀇𑀫𑀺𑀦𑀸 𑀘𑁂𑀢𑀺𑀬𑀲𑀤𑁆𑀤𑁄 𑀘𑁂𑀢𑀺𑀬𑀭𑀼𑀓𑁆𑀔𑁂 𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀤𑁂𑀯𑀸𑀮𑀬𑀜𑁆𑀘 𑀣𑀽𑀧𑀜𑁆𑀘 𑀦𑀺𑀯𑀢𑁆𑀢𑁂𑀢𑀺. 𑀢𑀲𑁆𑀲𑀸𑀢𑀺 𑀯𑀝𑀭𑀼𑀓𑁆𑀔𑀲𑁆𑀲. 𑀏𑀢𑀦𑁆𑀢𑀺 ‘‘𑀲𑀼𑀧𑁆𑀧𑀢𑀺𑀝𑁆𑀞𑁂 𑀘𑁂𑀢𑀺𑀬𑁂’’𑀢𑀺 𑀏𑀢𑀁 𑀦𑀸𑀫𑀁. 𑀮𑁄𑀓𑀯𑁄𑀳𑀸𑀭𑀯𑀲𑁂𑀦 𑀤𑀲𑀲𑀳𑀲𑁆𑀲𑀲𑀗𑁆𑀔𑀸𑀢𑁂 𑀲𑀗𑁆𑀔𑁆𑀬𑀸𑀯𑀺𑀲𑁂𑀲𑁂 𑀦𑀻𑀳𑀭𑀺𑀢𑁆𑀯𑀸 𑀬𑀼𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀦𑀺𑀬𑀼𑀢𑀦𑁆𑀢𑀺 𑀯𑀘𑀦𑀢𑁆𑀣𑁂𑀦 𑀤𑀲𑀲𑀳𑀲𑁆𑀲𑀁 𑀦𑀺𑀬𑀼𑀢𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀓𑀦𑀺𑀬𑀼𑀢𑀁 𑀤𑀲𑀲𑀳𑀲𑁆𑀲𑀸𑀦𑀻’’𑀢𑀺. ‘‘𑀦𑀳𑀼𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀲𑁄 𑀅𑀬𑀼𑀢𑁆𑀢𑁄 𑀦𑀳𑀼𑀢𑀲𑀗𑁆𑀔𑀸𑀢𑁂𑀦 𑀲𑀗𑁆𑀔𑁆𑀬𑀸𑀯𑀺𑀲𑁂𑀲𑁂𑀦 𑀫𑀺𑀲𑁆𑀲𑀻𑀪𑀸𑀯𑁂𑀦 𑀧𑀲𑀗𑁆𑀕𑀢𑁆𑀢𑀸. 𑀢𑁂𑀲𑀦𑁆𑀢𑀺 𑀤𑁆𑀯𑀸𑀤𑀲𑀦𑀺𑀬𑀼𑀢𑀸𑀦𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁.

‘‘𑀓𑀺𑀲𑀲𑀭𑀻𑀭𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀓𑀺𑀲𑁄 𑀓𑁄 𑀅𑀢𑁆𑀢𑀸 𑀏𑀢𑁂𑀲𑀦𑁆𑀢𑀺 𑀓𑀺𑀲𑀓𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀓𑀓𑀸𑀭𑁄 𑀳𑁂𑀢𑁆𑀣 𑀅𑀢𑁆𑀢𑀯𑀸𑀘𑀓𑁄. ‘‘𑀑𑀯𑀸𑀤𑀓𑁄’’𑀢𑀺 𑀇𑀫𑀺𑀦𑀸 𑀑𑀯𑀤𑀸𑀦𑁄𑀢𑀺 𑀏𑀢𑁆𑀣 𑀬𑀼𑀧𑀘𑁆𑀘𑀬𑁄 𑀓𑀢𑁆𑀢𑀼𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀕𑀸𑀣𑀸𑀩𑀦𑁆𑀥𑀢𑁆𑀢𑀸 𑀅𑀓𑀸𑀭𑀲𑁆𑀲 𑀤𑀻𑀖𑁄. ‘‘𑀅𑀣 𑀯𑀸’’𑀢𑀺𑀆𑀤𑀺𑀦𑀸 𑀓𑀺𑀲𑀓𑁄 𑀳𑀼𑀢𑁆𑀯𑀸 𑀅𑀜𑁆𑀜𑁂 𑀑𑀯𑀤𑀸𑀦𑁄 𑀓𑀺𑀲𑀓𑁄𑀯𑀤𑀸𑀦𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀇𑀤𑀦𑁆𑀢𑀺 𑀇𑀤𑀁 𑀅𑀢𑁆𑀣𑀚𑀸𑀢𑀁, 𑀅𑀬𑀫𑀢𑁆𑀣𑁄 𑀯𑀸. 𑀢𑁆𑀯𑀁 𑀧𑀳𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀢𑀼𑀯𑀁. 𑀇𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑀓𑀸𑀫𑀺𑀢𑁆𑀣𑀺𑀬𑁄𑀢𑀺 𑀏𑀓𑀸𑀭𑀮𑁄𑀧𑀯𑀲𑁂𑀦 𑀲𑀦𑁆𑀥𑀻𑀢𑀺 𑀆𑀳 ‘‘𑀓𑀸𑀫𑁂 𑀇𑀢𑁆𑀣𑀺𑀬𑁄 𑀘𑀸’’𑀢𑀺. 𑀉𑀧𑀘𑀻𑀲𑀽𑀢𑀺 𑀏𑀢𑁆𑀣 𑀓𑀸𑀫𑀔𑀦𑁆𑀥𑀓𑀺𑀮𑁂𑀲𑀅𑀪𑀺𑀲𑀗𑁆𑀔𑀸𑀭𑀲𑀗𑁆𑀔𑀸𑀢𑁂𑀲𑀼 𑀘𑀢𑀽𑀲𑀼 𑀉𑀧𑀥𑀻𑀲𑀼 𑀔𑀦𑁆𑀥𑀼𑀧𑀥𑀺 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀔𑀦𑁆𑀥𑀼𑀧𑀥𑀻𑀲𑀽’’𑀢𑀺.

𑀓𑁄𑀘𑀭𑀳𑀻𑀢𑀺 𑀏𑀢𑁆𑀣 𑀓𑁄𑀲𑀤𑁆𑀤𑁄 ‘‘𑀓𑁄 𑀢𑁂 𑀩𑀮𑀁 𑀫𑀳𑀸𑀭𑀸𑀚𑀸’’𑀢𑀺𑀆𑀤𑀻𑀲𑀼 (𑀚𑀸. 𑁨.𑁨𑁨.𑁧𑁮𑁮𑁦) 𑀯𑀺𑀬 𑀓𑁆𑀯𑀲𑀤𑁆𑀤𑀢𑁆𑀣𑁄𑀢𑀺 𑀆𑀳 ‘‘𑀓𑁆𑀯𑀘𑀭𑀳𑀻’’𑀢𑀺. 𑀦𑀺𑀧𑀸𑀢𑁄𑀬𑁂𑀯𑁂𑀲.

𑀧𑀤𑀲𑀤𑁆𑀤𑀲𑁆𑀲 𑀘𑀭𑀡𑀧𑀤𑀸𑀤𑀬𑁄 𑀦𑀺𑀯𑀢𑁆𑀢𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀦𑀺𑀩𑁆𑀩𑀸𑀦𑀧𑀤’’𑀦𑁆𑀢𑀺. ‘‘𑀲𑀦𑁆𑀢𑀲𑀪𑀸𑀯𑀢𑀸𑀬𑀸’’𑀢𑀺𑀆𑀤𑀺𑀦𑀸 𑀲𑀦𑁆𑀢𑁄 𑀲𑀪𑀸𑀯𑁄 𑀇𑀫𑀲𑁆𑀲 𑀧𑀤𑀲𑁆𑀲𑀸𑀢𑀺 𑀲𑀦𑁆𑀢𑀁. 𑀦𑀢𑁆𑀣𑀺 𑀉𑀧𑀥𑀬𑁄 𑀏𑀢𑁆𑀣𑀸𑀢𑀺 𑀅𑀦𑀼𑀧𑀥𑀺𑀓𑀁. 𑀦𑀢𑁆𑀣𑀺 𑀓𑀺𑀜𑁆𑀘𑀦𑀫𑁂𑀢𑁆𑀣𑀸𑀢𑀺 𑀅𑀓𑀺𑀜𑁆𑀘𑀦𑀁. 𑀢𑀻𑀲𑀼 𑀪𑀯𑁂𑀲𑀼 𑀦 𑀲𑀜𑁆𑀚𑀢𑀻𑀢𑀺 𑀅𑀲𑀢𑁆𑀢𑀁. 𑀅𑀜𑁆𑀜𑀣𑀸 𑀦 𑀪𑀯𑀢𑀻𑀢𑀺 𑀅𑀦𑀜𑁆𑀜𑀣𑀸𑀪𑀸𑀯𑀺. 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀦 𑀦𑁂𑀢𑀩𑁆𑀩𑀦𑁆𑀢𑀺 𑀅𑀦𑀜𑁆𑀜𑀦𑁂𑀬𑁆𑀬𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀢𑀺 ‘‘𑀲𑀦𑁆𑀢’’𑀦𑁆𑀢𑀺𑀆𑀤𑀺𑀧𑀤𑁂𑀦. 𑀫𑁂𑀢𑀺 𑀫𑀫, 𑀫𑀦𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂 𑀫𑁂 𑀫𑀦𑁄 𑀭𑀢𑁄 𑀦𑀸𑀫𑀸𑀢𑀺 𑀓𑀺𑀁 𑀯𑀓𑁆𑀔𑀸𑀫𑀺. 𑀇𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀻𑀢𑀺 𑀬𑁄𑀚𑀦𑀸.

𑁫𑁬. 𑀢𑀜𑁆𑀘𑀸𑀢𑀺 𑀲𑀸𑀯𑀓𑀪𑀸𑀯𑀜𑁆𑀘.

𑁫𑁭. 𑀅𑀲𑁆𑀲𑀸𑀲𑀓𑀸𑀢𑀺 𑀏𑀢𑁆𑀣 𑀆𑀧𑀼𑀩𑁆𑀩𑁄 𑀲𑀸𑀲𑀥𑀸𑀢𑀼 𑀆𑀧𑀼𑀩𑁆𑀩 𑀲𑀺𑀲𑀥𑀸𑀢𑀼𑀦𑀸 𑀲𑀤𑀺𑀲𑁄, ‘‘𑀫𑁂’’𑀢𑀺 𑀙𑀝𑁆𑀞𑀻𑀬𑁄𑀕𑀢𑁆𑀢𑀸 𑀡𑁆𑀯𑀼𑀧𑀘𑁆𑀘𑀬𑁄 𑀘 𑀪𑀸𑀯𑀢𑁆𑀣𑁄𑀢𑀺 𑀆𑀳 ‘‘𑀆𑀲𑀺𑀲𑀦𑀸’’𑀢𑀺. ‘‘𑀧𑀢𑁆𑀣𑀦𑀸’’𑀢𑀺 𑀇𑀫𑀺𑀦𑀸 𑀆𑀧𑀼𑀩𑁆𑀩𑀲𑀺𑀲𑀥𑀸𑀢𑀼𑀬𑀸 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀲𑁆𑀲𑀸𑀢𑀺 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄. 𑀢𑀢𑁆𑀣𑀸𑀢𑀺 𑀭𑀢𑀦𑀢𑁆𑀢𑀬𑁂. 𑀦𑀺𑀘𑁆𑀙𑀬𑀕𑀫𑀦𑀫𑁂𑀯𑀸𑀢𑀺 ‘‘𑀲𑀭𑀡’’𑀇𑀢𑀺𑀦𑀺𑀘𑁆𑀙𑀬𑁂𑀦 𑀚𑀸𑀦𑀦𑀫𑁂𑀯 𑀕𑀢𑁄. 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀦𑁆𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀸𑀦𑀁 𑀭𑀢𑀦𑀢𑁆𑀢𑀬𑁂 𑀲𑀦𑁆𑀦𑀺𑀬𑁆𑀬𑀸𑀢𑀦𑀁. 𑀇𑀫𑀺𑀦𑀸 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦, 𑀧𑀡𑀺𑀧𑀸𑀢, 𑀢𑀧𑁆𑀧𑀭𑀸𑀬𑀦, 𑀲𑀺𑀲𑁆𑀲𑀪𑀸𑀯𑀽𑀧𑀕𑀫𑀦𑀲𑀗𑁆𑀔𑀸𑀢𑁂𑀲𑀼 𑀘𑀢𑀽𑀲𑀼 𑀲𑀭𑀡𑀕𑀫𑀦𑁂𑀲𑀼 (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁫𑁦; 𑀫. 𑀦𑀺. 𑀅𑀝𑁆𑀞. 𑁧.𑁫𑁬; 𑀔𑀼. 𑀧𑀸. 𑀅𑀝𑁆𑀞. 𑁧.𑀲𑀭𑀡𑀕𑀫𑀦𑀕𑀫𑀓𑀯𑀺𑀪𑀸𑀯𑀦𑀸) 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀲𑀭𑀡𑀕𑀫𑀦𑀁 𑀤𑀻𑀧𑁂𑀢𑀺. 𑀅𑀬𑀦𑁆𑀢𑀺 𑀩𑀺𑀫𑁆𑀩𑀺𑀲𑀸𑀭𑁄 𑀭𑀸𑀚𑀸. 𑀢𑀦𑁆𑀢𑀺 𑀦𑀺𑀬𑀢𑀲𑀭𑀡𑀢𑀁. 𑀧𑀡𑀺𑀧𑀸𑀢𑀕𑀫𑀦𑀜𑁆𑀘𑀸𑀢𑀺 𑀏𑀢𑁆𑀣 𑀧𑀡𑀻𑀢𑀺 𑀓𑀭𑁄. 𑀬𑀣𑀸 𑀳𑀺 𑀧𑀸𑀤𑀧𑀤𑀲𑀤𑁆𑀤𑀸 𑀤𑀻𑀖𑀭𑀲𑁆𑀲𑀯𑀲𑁂𑀦 𑀳𑀼𑀢𑁆𑀯𑀸 𑀘𑀭𑀡𑀁 𑀯𑀤𑀦𑁆𑀢𑀺, 𑀏𑀯𑀁 𑀧𑀸𑀡𑀺𑀧𑀡𑀺𑀲𑀤𑁆𑀤𑀸 𑀓𑀭𑀁 𑀯𑀤𑀦𑁆𑀢𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀡𑀻𑀢𑀺 𑀓𑀭𑁄’’𑀢𑀺. 𑀧𑀢𑀦𑀁 𑀧𑀸𑀢𑁄, 𑀧𑀡𑀺𑀦𑁄 𑀧𑀸𑀢𑁄 𑀧𑀡𑀺𑀧𑀸𑀢𑁄. 𑀅𑀢𑁆𑀣𑀢𑁄 𑀅𑀜𑁆𑀚𑀮𑀺𑀧𑀡𑀫𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀲 𑀕𑀫𑀦𑀜𑁆𑀘 𑀕𑀘𑁆𑀙𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀧𑀡𑀺𑀧𑀸𑀢𑀲𑀭𑀡𑀕𑀫𑀦𑀁 𑀤𑀻𑀧𑁂𑀢𑀺. 𑀘𑀲𑀤𑁆𑀤𑁄 ‘‘𑀧𑀸𑀓𑀝’’𑀦𑁆𑀢𑀺 𑀏𑀢𑁆𑀣𑀸𑀧𑀺 𑀬𑁄𑀚𑁂𑀢𑀩𑁆𑀩𑁄. 𑀧𑀸𑀓𑀝𑀜𑁆𑀘 𑀓𑀭𑁄𑀦𑁆𑀢𑁄𑀢𑀺 𑀳𑀺 𑀅𑀢𑁆𑀣𑁄.

𑁫𑁮. 𑀲𑀺𑀗𑁆𑀕𑀻𑀦𑀺𑀓𑁆𑀔𑀲𑀯𑀡𑁆𑀡𑁄𑀢𑀺 𑀏𑀢𑁆𑀣 𑀲𑀺𑀗𑁆𑀕𑀻𑀲𑀗𑁆𑀔𑀸𑀢𑁄 𑀦𑀺𑀓𑁆𑀔𑁄 𑀲𑀺𑀗𑁆𑀕𑀻𑀦𑀺𑀓𑁆𑀔𑁄, 𑀢𑁂𑀦 𑀲𑀫𑀸𑀦𑁄 𑀯𑀡𑁆𑀡𑁄 𑀏𑀢𑀲𑁆𑀲𑀸𑀢𑀺 𑀲𑀺𑀗𑁆𑀕𑀻𑀦𑀺𑀓𑁆𑀔𑀲𑀯𑀡𑁆𑀡𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀺𑀗𑁆𑀕𑀻𑀲𑀼𑀯𑀡𑁆𑀡𑀦𑀺𑀓𑁆𑀔𑁂𑀦 𑀲𑀫𑀸𑀦𑀯𑀡𑁆𑀡𑁄’’𑀢𑀺. 𑀢𑀢𑁆𑀣 ‘‘𑀲𑀼𑀯𑀡𑁆𑀡’’𑀇𑀢𑀺𑀧𑀤𑁂𑀦 𑀦𑀺𑀓𑁆𑀔𑀲𑀤𑁆𑀤𑀲𑁆𑀲 𑀲𑀼𑀯𑀡𑁆𑀡𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀧𑀜𑁆𑀘𑀲𑀼𑀯𑀡𑁆𑀡𑀸𑀤𑀬𑁄 𑀅𑀢𑁆𑀣𑁂 𑀦𑀺𑀯𑀢𑁆𑀢𑁂𑀢𑀺. ‘‘𑀲𑀫𑀸𑀦’’𑀇𑀢𑀺𑀧𑀤𑁂𑀦 𑀲𑀯𑀡𑁆𑀡𑁄𑀢𑀺 𑀏𑀢𑁆𑀣 𑀲𑀓𑀸𑀭𑁄 𑀲𑀫𑀸𑀦𑀲𑀤𑁆𑀤𑀲𑁆𑀲𑁂𑀯 𑀓𑀸𑀭𑀺𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀩𑁆𑀩𑁂𑀲𑀽𑀢𑀺 𑀅𑀔𑀺𑀮𑁂𑀲𑀼 𑀘𑀓𑁆𑀔𑀸𑀤𑀺𑀇𑀦𑁆𑀤𑁆𑀭𑀺𑀬𑁂𑀲𑀼. 𑀤𑀦𑁆𑀢𑁄𑀢𑀺 𑀤𑀫𑀺𑀢𑁄. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀆𑀳 ‘‘𑀪𑀕𑀯𑀢𑁄 𑀳𑀻’’𑀢𑀺𑀆𑀤𑀺.

𑁫𑁯. 𑀑𑀡𑀻𑀢𑁄 𑀧𑀢𑁆𑀢𑀢𑁄 𑀧𑀸𑀡𑀺 𑀬𑁂𑀦𑀸𑀢𑀺 𑀑𑀡𑀻𑀢𑀧𑀢𑁆𑀢𑀧𑀸𑀡𑀻𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀢𑁆𑀢𑀢𑁄 𑀘𑀸’’𑀢𑀺𑀆𑀤𑀺. ‘‘𑀅𑀧𑀦𑀻𑀢𑀧𑀸𑀡𑀺’’𑀦𑁆𑀢𑀺 𑀇𑀫𑀺𑀦𑀸 𑀑𑀡𑀻𑀢𑀲𑀤𑁆𑀤𑁄 𑀅𑀧𑀦𑀻𑀢𑀢𑁆𑀣𑁄, 𑀧𑀸𑀡𑀺𑀲𑀤𑁆𑀤𑁂𑀦 𑀘 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀲𑀮𑁆𑀮𑀓𑁆𑀔𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 ‘‘𑀪𑀕𑀯𑀦𑁆𑀢’’𑀦𑁆𑀢𑀺 𑀇𑀫𑀁 𑀓𑀫𑁆𑀫𑀁 ‘‘𑀲𑀮𑁆𑀮𑀓𑁆𑀔𑁂𑀢𑁆𑀯𑀸’’𑀢𑀺 𑀧𑀸𑀞𑀲𑁂𑀲𑁂𑀦 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀏𑀓𑀫𑀦𑁆𑀢𑀦𑁆𑀢𑀺 𑀏𑀢𑁆𑀣 𑀅𑀦𑁆𑀢𑀲𑀤𑁆𑀤𑁄 𑀲𑀫𑀻𑀧𑀤𑁂𑀲𑀢𑁆𑀣𑁄, 𑀓𑁄𑀝𑀺𑀤𑁂𑀲𑀢𑁆𑀣𑁄 𑀯𑀸 𑀳𑁄𑀢𑀺, 𑀉𑀧𑀬𑁄𑀕𑀯𑀘𑀦𑀜𑁆𑀘 𑀪𑀼𑀫𑁆𑀫𑀢𑁆𑀣𑁂 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀓𑀲𑁆𑀫𑀺𑀁 𑀧𑀤𑁂𑀲𑁂’’𑀢𑀺. 𑀅𑀢𑁆𑀣𑀺𑀓𑀧𑀬𑁄𑀕𑁂 𑀓𑀭𑀡𑀲𑁆𑀲 𑀲𑀫𑁆𑀪𑀯𑀢𑁄 𑀆𑀳 ‘‘𑀩𑀼𑀤𑁆𑀥𑀸𑀪𑀺𑀯𑀸𑀤𑀦𑀕𑀫𑀦𑁂𑀦 𑀯𑀸 𑀥𑀫𑁆𑀫𑀲𑁆𑀲𑀯𑀦𑀕𑀫𑀦𑁂𑀦 𑀯𑀸’’𑀢𑀺. 𑀅𑀧𑁆𑀧𑀸𑀓𑀺𑀡𑁆𑀡𑀦𑁆𑀢𑀺 𑀏𑀢𑁆𑀣 𑀅𑀧𑁆𑀧𑀲𑀤𑁆𑀤𑁄 𑀧𑀝𑀺𑀲𑁂𑀥𑀢𑁆𑀣𑁄𑀢𑀺 𑀆𑀳 ‘‘𑀅𑀦𑀸𑀓𑀺𑀡𑁆𑀡’’𑀦𑁆𑀢𑀺. ‘‘𑀅𑀩𑁆𑀩𑁄𑀓𑀺𑀡𑁆𑀡’’𑀦𑁆𑀢𑀺𑀧𑀺 𑀧𑀸𑀞𑁄. 𑀅𑀧𑁆𑀧𑀦𑀺𑀕𑁆𑀖𑁄𑀲𑀦𑁆𑀢𑀺 𑀏𑀢𑁆𑀣 ‘‘𑀅𑀧𑁆𑀧𑀲𑀤𑁆𑀤’’𑀦𑁆𑀢𑀺𑀧𑀤𑁂𑀦 𑀯𑀘𑀦𑀲𑀤𑁆𑀤𑀲𑁆𑀲 𑀕𑀳𑀺𑀢𑀢𑁆𑀢𑀸 𑀇𑀫𑀺𑀦𑀸 𑀧𑀸𑀭𑀺𑀲𑁂𑀲𑀦𑀬𑁂𑀦 𑀦𑀕𑀭𑀦𑀺𑀕𑁆𑀖𑁄𑀲𑀲𑀤𑁆𑀤𑁄𑀬𑁂𑀯 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀦𑀕𑀭𑀦𑀺𑀕𑁆𑀖𑁄𑀲𑀲𑀤𑁆𑀤𑁂𑀦 𑀅𑀧𑁆𑀧𑀦𑀺𑀕𑁆𑀖𑁄𑀲’’𑀦𑁆𑀢𑀺. 𑀢𑀻𑀲𑀼 𑀧𑀸𑀞𑁂𑀲𑀼 𑀧𑀞𑀫𑁂𑀦 𑀧𑀸𑀞𑁂𑀦 𑀚𑀦𑀲𑁆𑀲 𑀯𑀸𑀢𑁄 𑀚𑀦𑀯𑀸𑀢𑁄, 𑀢𑁂𑀦 𑀯𑀺𑀭𑀳𑀺𑀢𑀁 𑀯𑀺𑀚𑀦𑀯𑀸𑀢𑀦𑁆𑀢𑀺 𑀯𑀺𑀓𑀧𑁆𑀧𑀁 𑀤𑀲𑁆𑀲𑁂𑀢𑀺. 𑀤𑀼𑀢𑀺𑀬𑁂𑀦 𑀚𑀦𑀲𑁆𑀲 𑀯𑀸𑀤𑁄 𑀚𑀦𑀯𑀸𑀤𑁄, 𑀢𑁂𑀦 𑀯𑀺𑀭𑀳𑀺𑀢𑀁 𑀯𑀺𑀚𑀦𑀯𑀸𑀤𑀦𑁆𑀢𑀺 𑀯𑀺𑀓𑀧𑁆𑀧𑀁 𑀤𑀲𑁆𑀲𑁂𑀢𑀺. 𑀢𑀢𑀺𑀬𑁂𑀦 𑀚𑀦𑀲𑁆𑀲 𑀧𑀸𑀢𑁄 𑀲𑀜𑁆𑀘𑀭𑀡𑀁 𑀚𑀦𑀧𑀸𑀢𑁄, 𑀢𑁂𑀦 𑀯𑀺𑀭𑀳𑀺𑀢𑀁 𑀯𑀺𑀚𑀦𑀧𑀸𑀢𑀦𑁆𑀢𑀺 𑀯𑀺𑀓𑀧𑁆𑀧𑀁 𑀤𑀲𑁆𑀲𑁂𑀢𑀺. 𑀭𑀳𑀲𑁆𑀲𑀁 𑀓𑀭𑀻𑀬𑀢𑀺 𑀏𑀢𑁆𑀣𑀸𑀢𑀺 𑀭𑀸𑀳𑀲𑁆𑀲𑁂𑀬𑁆𑀬𑀓𑀁. 𑀫𑀦𑀼𑀲𑁆𑀲𑀸𑀦𑀁 𑀭𑀸𑀳𑀲𑁆𑀲𑁂𑀬𑁆𑀬𑀓𑀁 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺𑀆𑀤𑀺𑀦𑀸.