𑁯. 𑀙𑀢𑁆𑀢𑀼𑀧𑀸𑀳𑀦𑀯𑀕𑁆𑀕𑁄

𑁧. 𑀧𑀞𑀫𑀲𑀺𑀓𑁆𑀔𑀸𑀧𑀤-𑀅𑀢𑁆𑀣𑀬𑁄𑀚𑀦𑀸

𑁧𑁧𑁮𑁧. 𑀙𑀢𑁆𑀢𑀯𑀕𑁆𑀕𑀲𑁆𑀲 𑀧𑀞𑀫𑁂 𑀓𑀤𑁆𑀤𑀫𑀸𑀤𑀻𑀦𑀻𑀢𑀺 𑀘𑀺𑀓𑁆𑀔𑀮𑁆𑀮𑀸𑀤𑀻𑀦𑀺. 𑀆𑀤𑀺𑀲𑀤𑁆𑀤𑁂𑀦 𑀉𑀤𑀓𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀕𑀘𑁆𑀙𑀸𑀤𑀻𑀦𑀻𑀢𑀺 𑀔𑀼𑀤𑁆𑀤𑀧𑀸𑀤𑀧𑀸𑀤𑀻𑀦𑀺. 𑀆𑀤𑀺𑀲𑀤𑁆𑀤𑁂𑀦 𑀅𑀜𑁆𑀜𑀸𑀦𑀺𑀧𑀺 𑀙𑀢𑁆𑀢𑀁 𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸𑀦𑀺 𑀲𑀫𑁆𑀩𑀸𑀥𑀝𑁆𑀞𑀸𑀦𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀻𑀢𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀁

𑁧𑁧𑁮𑁪. 𑀤𑀼𑀢𑀺𑀬𑁂 𑀬𑀸𑀦𑁂𑀦𑀸𑀢𑀺 𑀬𑀦𑁆𑀢𑀺 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀲𑀼𑀔𑁂𑀦 𑀕𑀘𑁆𑀙𑀦𑁆𑀢𑀺 𑀅𑀦𑁂𑀦𑀸𑀢𑀺 𑀬𑀸𑀦𑀦𑁆𑀢𑀺. 𑀤𑀼𑀢𑀺𑀬𑀁.

𑁩. 𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀁

𑁧𑁧𑁯𑁧. 𑀢𑀢𑀺𑀬𑁂 ‘‘𑀯𑀺𑀧𑁆𑀧𑀓𑀺𑀭𑀺𑀬𑀺𑀁𑀲𑀽’’𑀢𑀺 𑀓𑀺𑀭𑀺𑀬𑀸𑀧𑀤𑀲𑁆𑀲 𑀓𑀢𑁆𑀢𑀼𑀦𑀸 𑀅𑀯𑀺𑀦𑀸𑀪𑀸𑀯𑀢𑁄 𑀓𑀢𑁆𑀢𑀸𑀭𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀫𑀡𑀬𑁄’’𑀢𑀺. 𑀫𑀡𑀬𑁄𑀢𑀺 𑀘 𑀭𑀢𑀦𑀸𑀦𑀻𑀢𑀺. 𑀢𑀢𑀺𑀬𑀁.

𑁪. 𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀁

𑁧𑁧𑁯𑁪. 𑀘𑀢𑀼𑀢𑁆𑀣𑁂 𑀲𑀻𑀲𑀽𑀧𑀕𑀸𑀤𑀻𑀲𑀽𑀢𑀺 𑀆𑀤𑀺𑀲𑀤𑁆𑀤𑁂𑀦 𑀕𑀻𑀯𑀽𑀧𑀕𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀁 𑀬𑀦𑁆𑀢𑀺 𑀅𑀮𑀗𑁆𑀓𑀸𑀭𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀁

𑁧𑁧𑁯𑁯. 𑀧𑀜𑁆𑀘𑀫𑁂 𑀕𑀦𑁆𑀥𑁂𑀦 𑀘𑀸𑀢𑀺 𑀕𑀦𑁆𑀥𑁂𑀢𑀺 𑀅𑀢𑁆𑀢𑀦𑁄 𑀯𑀢𑁆𑀣𑀼𑀁 𑀲𑀽𑀘𑁂𑀢𑀺 𑀧𑀓𑀸𑀲𑁂𑀢𑀻𑀢𑀺 𑀕𑀦𑁆𑀥𑁄. 𑀯𑀡𑁆𑀡𑀓𑁂𑀦 𑀘𑀸𑀢𑀺 𑀯𑀺𑀮𑁂𑀧𑀦𑁂𑀦 𑀘. 𑀢𑀜𑁆𑀳𑀺 𑀯𑀡𑁆𑀡𑀬𑀢𑀺 𑀙𑀯𑀺𑀲𑁄𑀪𑀁 𑀧𑀓𑀸𑀲𑁂𑀢𑀻𑀢𑀺 𑀯𑀡𑁆𑀡𑀓𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀘𑀲𑀤𑁆𑀤𑁂𑀦 𑀲𑀫𑀸𑀳𑀸𑀭𑀤𑁆𑀯𑀦𑁆𑀤𑀯𑀸𑀓𑁆𑀬𑀁 𑀤𑀻𑀧𑁂𑀢𑀻𑀢𑀺. 𑀧𑀜𑁆𑀘𑀫𑀁.

𑁬. 𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀁

𑁧𑁨𑁦𑁨. 𑀙𑀝𑁆𑀞𑁂 𑀅𑀦𑀼𑀢𑁆𑀢𑀸𑀦𑀯𑀘𑀦𑀁 𑀦𑀢𑁆𑀣𑀻𑀢𑀺. 𑀙𑀝𑁆𑀞𑀁.

𑁭. 𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀁

𑁧𑁨𑁦𑁮. 𑀲𑀢𑁆𑀢𑀫𑁂 𑀉𑀫𑁆𑀫𑀤𑁆𑀤𑀦𑁂𑀢𑀺 𑀉𑀧𑁆𑀧𑀻𑀴𑀺𑀢𑁆𑀯𑀸 𑀫𑀤𑁆𑀤𑀦𑁂. 𑀲𑀁𑀩𑀸𑀳𑀦𑁂𑀧𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀩𑀸𑀳𑀦𑁂𑀧𑀻𑀢𑀺. 𑀲𑀢𑁆𑀢𑀫𑀁.

𑁮-𑁧𑁦. 𑀅𑀝𑁆𑀞𑀫𑀸𑀤𑀺𑀲𑀺𑀓𑁆𑀔𑀸𑀧𑀤𑀁

𑁧𑁨𑁧𑁦. 𑀅𑀝𑁆𑀞𑀫𑀸𑀤𑀻𑀲𑀼 𑀢𑀻𑀲𑀼 𑀅𑀦𑀼𑀢𑁆𑀢𑀸𑀦𑀯𑀘𑀦𑀁 𑀦𑀢𑁆𑀣𑀻𑀢𑀺. 𑀅𑀝𑁆𑀞𑀫𑀦𑀯𑀫𑀤𑀲𑀫𑀸𑀦𑀺.

𑁧𑁧. 𑀏𑀓𑀸𑀤𑀲𑀫𑀲𑀺𑀓𑁆𑀔𑀸𑀧𑀤𑀁

𑁧𑁨𑁧𑁪. 𑀏𑀓𑀸𑀤𑀲𑀫𑁂 𑀅𑀪𑀺𑀫𑀼𑀔𑀫𑁂𑀯𑀸𑀢𑀺 𑀅𑀪𑀺𑀫𑀼𑀔𑁂 𑀏𑀯. 𑀫𑀼𑀔𑀲𑁆𑀲 𑀳𑀺 𑀅𑀪𑀺 𑀅𑀪𑀺𑀫𑀼𑀔𑀦𑁆𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄, 𑀲𑀢𑁆𑀢𑀫𑀺𑀬𑀸 𑀅𑀁𑀓𑀸𑀭𑁄. 𑀇𑀫𑀺𑀦𑀸 𑀧𑀼𑀭𑀢𑁄𑀢𑀺 𑀏𑀢𑁆𑀣 𑀢𑁄𑀧𑀘𑁆𑀘𑀬𑁄 𑀪𑀼𑀫𑁆𑀫𑀢𑁆𑀣𑁂 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀉𑀧𑀘𑀸𑀭𑀦𑁆𑀢𑀺 𑀤𑁆𑀯𑀸𑀤𑀲𑀳𑀢𑁆𑀣𑀽𑀧𑀘𑀸𑀭𑀦𑁆𑀢𑀺. 𑀏𑀓𑀸𑀤𑀲𑀫𑀁.

𑁧𑁨. 𑀤𑁆𑀯𑀸𑀤𑀲𑀫𑀲𑀺𑀓𑁆𑀔𑀸𑀧𑀤𑀁

𑁧𑁨𑁧𑁯. 𑀤𑁆𑀯𑀸𑀤𑀲𑀫𑁂 ‘‘𑀅𑀦𑁄𑀓𑀸𑀲𑀓𑀢’’𑀦𑁆𑀢𑀺𑀧𑀤𑀲𑁆𑀲 𑀅𑀬𑀼𑀢𑁆𑀢𑀲𑀫𑀸𑀲𑀪𑀸𑀯𑀜𑁆𑀘 𑀯𑀺𑀲𑁂𑀲𑀦𑀧𑀭𑀧𑀤𑀩𑀸𑀳𑀺𑀭𑀲𑀫𑀸𑀲𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀅𑀓𑀢𑀑𑀓𑀸𑀲’’𑀦𑁆𑀢𑀺. 𑀑𑀓𑀸𑀲𑁄 𑀦 𑀓𑀢𑁄 𑀬𑁂𑀦𑀸𑀢𑀺 𑀅𑀦𑁄𑀓𑀸𑀲𑀓𑀢𑁄, 𑀪𑀺𑀓𑁆𑀔𑀼, 𑀢𑀁. ‘‘𑀅𑀦𑀺𑀬𑀫𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 ‘‘𑀅𑀦𑁄𑀤𑀺𑀲𑁆𑀲𑀸’’𑀢𑀺 𑀧𑀤𑀲𑁆𑀲 𑀢𑁆𑀯𑀸𑀧𑀘𑁆𑀘𑀬𑀦𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀻𑀢𑀺. 𑀤𑁆𑀯𑀸𑀤𑀲𑀫𑀁.

𑁧𑁩. 𑀢𑁂𑀭𑀲𑀫𑀲𑀺𑀓𑁆𑀔𑀸𑀧𑀤𑀁

𑁧𑁨𑁨𑁬. 𑀢𑁂𑀭𑀲𑀫𑁂 𑀉𑀧𑀘𑀸𑀭𑁂𑀧𑀻𑀢𑀺 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀲𑀗𑁆𑀔𑀸𑀢𑁂 𑀉𑀧𑀘𑀸𑀭𑁂𑀧𑀺.

𑁧𑁨𑁨𑁭. ‘‘𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀺𑀓𑀸𑀬𑀸’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑁂𑀧𑀺 𑀯𑀺𑀲𑁂𑀲𑁄𑀬𑁂𑀯𑀸𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀲𑀗𑁆𑀓𑀘𑁆𑀘𑀺𑀓𑀘𑀻𑀯𑀭𑀫𑁂𑀯𑀸’’𑀢𑀺. 𑀲𑀫𑀦𑁆𑀢𑀢𑁄 𑀧𑀼𑀭𑀺𑀲𑀸𑀦𑀁 𑀤𑀲𑁆𑀲𑀦𑀁 𑀓𑀦𑁆𑀢𑀻𑀬𑀢𑀺 𑀙𑀺𑀦𑁆𑀤𑀻𑀬𑀢𑀺 𑀏𑀢𑁆𑀣𑀸𑀢𑀺 𑀲𑀗𑁆𑀓𑀘𑁆𑀘𑀺, 𑀅𑀥𑀓𑁆𑀔𑀓𑀉𑀩𑁆𑀪𑀦𑀸𑀪𑀺𑀝𑁆𑀞𑀸𑀦𑀁, 𑀲𑀗𑁆𑀓𑀘𑁆𑀘𑁂 𑀦𑀺𑀯𑀲𑀺𑀢𑀩𑁆𑀩𑀦𑁆𑀢𑀺 𑀲𑀁𑀓𑀘𑁆𑀘𑀺𑀓𑀁, 𑀢𑀫𑁂𑀯 𑀘𑀻𑀯𑀭𑀦𑁆𑀢𑀺 𑀲𑀗𑁆𑀓𑀘𑁆𑀘𑀺𑀓𑀘𑀻𑀯𑀭𑀦𑁆𑀢𑀺. 𑀢𑁂𑀭𑀲𑀫𑀁.

𑀙𑀢𑁆𑀢𑀼𑀧𑀸𑀳𑀦𑀯𑀕𑁆𑀕𑁄 𑀦𑀯𑀫𑁄.

𑀲𑀩𑁆𑀩𑀸𑀦𑁂𑀯 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀢𑀺 𑀢𑁂𑀳𑀺 𑀅𑀝𑁆𑀞𑀸𑀲𑀻𑀢𑀺𑀲𑀢𑀲𑀺𑀓𑁆𑀔𑀸𑀧𑀤𑁂𑀳𑀺, 𑀅𑀧𑀦𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀢𑁆𑀭𑀸𑀢𑀺 𑀢𑁂𑀲𑀼 𑀔𑀼𑀤𑁆𑀤𑀓𑁂𑀲𑀼. 𑀏𑀢𑁆𑀣𑀸𑀢𑀺 𑀤𑀲𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺.

𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂 𑀔𑀼𑀤𑁆𑀤𑀓𑀯𑀡𑁆𑀡𑀦𑀸𑀬

𑀬𑁄𑀚𑀦𑀸 𑀲𑀫𑀢𑁆𑀢𑀸.

𑁫. 𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤-𑀅𑀢𑁆𑀣𑀬𑁄𑀚𑀦𑀸

𑀔𑀼𑀤𑁆𑀤𑀓𑀸𑀦𑀁 𑀅𑀦𑀦𑁆𑀢𑀭𑀸 𑀧𑀸𑀝𑀺𑀤𑁂𑀲𑀦𑀻𑀬𑀸 𑀦𑀸𑀫 𑀅𑀝𑁆𑀞 𑀬𑁂 𑀥𑀫𑁆𑀫𑀸 𑀲𑀗𑁆𑀔𑁂𑀧𑁂𑀦𑁂𑀯 𑀲𑀗𑁆𑀕𑀳𑀁 𑀆𑀭𑀽𑀴𑁆𑀳𑀸 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺, 𑀢𑁂𑀲𑀁 𑀅𑀝𑁆𑀞𑀦𑁆𑀦𑀁 𑀧𑀸𑀝𑀺𑀤𑁂𑀲𑀦𑀻𑀬𑀦𑀸𑀫𑀓𑀸𑀦𑀁 𑀥𑀫𑁆𑀫𑀸𑀦𑀁 𑀲𑀗𑁆𑀔𑁂𑀧𑁂𑀦𑁂𑀯 𑀏𑀲𑀸 𑀯𑀡𑁆𑀡𑀦𑀸 𑀧𑀯𑀢𑁆𑀢𑀢𑁂𑀢𑀺 𑀬𑁄𑀚𑀦𑀸.

𑁧𑁨𑁨𑁮. 𑀬𑀸𑀦𑀺 𑀲𑀩𑁆𑀩𑀺𑀢𑁂𑀮𑀸𑀤𑀻𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀯𑀺𑀢𑁆𑀣𑀸𑀭𑁄. 𑀏𑀢𑁆𑀣𑀸𑀢𑀺 𑀅𑀝𑁆𑀞𑀲𑀼 𑀧𑀸𑀝𑀺𑀤𑁂𑀲𑀦𑀻𑀬𑁂𑀲𑀼. 𑀧𑀸𑀴𑀺𑀯𑀺𑀦𑀺𑀫𑀼𑀢𑁆𑀢𑀓𑁂𑀲𑀽𑀢𑀺 𑀧𑀸𑀴𑀺𑀢𑁄 𑀯𑀺𑀦𑀺𑀫𑀼𑀢𑁆𑀢𑀓𑁂𑀲𑀼. 𑀲𑀩𑁆𑀩𑁂𑀲𑀽𑀢𑀺 𑀅𑀔𑀺𑀮𑁂𑀲𑀼 𑀲𑀩𑁆𑀩𑀺𑀢𑁂𑀮𑀸𑀤𑀻𑀲𑀽𑀢𑀺.

𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂 𑀧𑀸𑀝𑀺𑀤𑁂𑀲𑀦𑀻𑀬𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀧𑀦𑀸𑀢𑀺 𑀧𑀓𑁆𑀔𑀦𑁆𑀢𑀭𑀚𑁄𑀢𑀓𑁄. 𑀬𑁂 𑀥𑀫𑁆𑀫𑀸 𑀉𑀤𑁆𑀤𑀺𑀝𑁆𑀞𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀦𑁆𑀢𑀺 𑀧𑀸𑀝𑀺𑀤𑁂𑀲𑀦𑀻𑀬𑀸𑀦𑀁. 𑀧𑀼𑀦 𑀢𑁂𑀲𑀦𑁆𑀢𑀺 𑀲𑁂𑀔𑀺𑀬𑀅𑀥𑀺𑀓𑀭𑀡𑀲𑀫𑀣𑀥𑀫𑁆𑀫𑀸𑀦𑀁.

𑀢𑀦𑁆𑀢𑀺 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀁, 𑀯𑀺𑀤𑀽 𑀯𑀤𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 𑀢𑁂𑀲𑀁 𑀧𑀸𑀝𑀺𑀤𑁂𑀲𑀦𑀻𑀬𑀸𑀦𑀁 𑀅𑀦𑀦𑁆𑀢𑀭𑀸 𑀬𑁂 𑀘 𑀲𑁂𑀔𑀺𑀬𑀸 𑀧𑀜𑁆𑀘𑀲𑀢𑁆𑀢𑀢𑀺 𑀬𑁂 𑀘 𑀥𑀫𑁆𑀫𑀸, 𑀘𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄, 𑀅𑀥𑀺𑀓𑀭𑀡𑀯𑁆𑀳𑀬𑀸 𑀅𑀥𑀺𑀓𑀭𑀡𑀲𑀫𑀣𑀦𑀸𑀫𑀓𑀸 𑀲𑀢𑁆𑀢 𑀬𑁂 𑀘 𑀥𑀫𑁆𑀫𑀸 𑀪𑀕𑀯𑀢𑀸 𑀉𑀤𑁆𑀤𑀺𑀝𑁆𑀞𑀸, 𑀢𑁂𑀲𑀁 𑀲𑁂𑀔𑀺𑀬𑀅𑀥𑀺𑀓𑀭𑀡𑀲𑀫𑀣𑀥𑀫𑁆𑀫𑀸𑀦𑀁 𑀬𑁄 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀯𑀺𑀪𑀗𑁆𑀕𑁂 𑀫𑀬𑀸 𑀯𑀼𑀢𑁆𑀢𑁄, 𑀢𑀸𑀤𑀺𑀲𑀫𑁂𑀯 𑀢𑀁 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀁 𑀪𑀺𑀓𑁆𑀔𑀼𑀦𑀻𑀦𑀁 𑀯𑀺𑀪𑀗𑁆𑀕𑁂𑀧𑀺 𑀯𑀺𑀤𑀽 𑀯𑀤𑀦𑁆𑀢𑀺 𑀬𑀲𑁆𑀫𑀸, 𑀢𑀲𑁆𑀫𑀸 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑁂𑀔𑀺𑀬𑀅𑀥𑀺𑀓𑀭𑀡𑀲𑀫𑀣𑀥𑀫𑁆𑀫𑀸𑀦𑀁 𑀬𑀸 𑀅𑀢𑁆𑀣𑀯𑀡𑁆𑀡𑀦𑀸 𑀢𑀢𑁆𑀣 𑀫𑀳𑀸𑀯𑀺𑀪𑀗𑁆𑀕𑁂 𑀯𑀺𑀲𑀼𑀁 𑀫𑀬𑀸 𑀦 𑀯𑀼𑀢𑁆𑀢𑀸. 𑀇𑀫𑀸 𑀅𑀢𑁆𑀣𑀯𑀡𑁆𑀡𑀦𑀸 𑀇𑀥𑀸𑀧𑀺 𑀪𑀺𑀓𑁆𑀔𑀼𑀦𑀻𑀦𑀁 𑀯𑀺𑀪𑀗𑁆𑀕𑁂𑀧𑀺, 𑀧𑀺𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄, 𑀫𑀬𑀸 𑀦 𑀯𑀼𑀢𑁆𑀢𑀸𑀬𑁂𑀯𑀸𑀢𑀺. 𑀦𑀓𑀸𑀭𑁄 𑀤𑁆𑀯𑀻𑀲𑀼 𑀓𑀺𑀭𑀺𑀬𑀸𑀲𑀼 𑀬𑁄𑀚𑁂𑀢𑀩𑁆𑀩𑁄.

‘‘𑀲𑀩𑁆𑀩𑀸𑀲𑀯𑀧𑀳𑀁 𑀫𑀕𑁆𑀕𑀁, 𑀧𑀼𑀜𑁆𑀜𑀓𑀫𑁆𑀫𑁂𑀦 𑀘𑀺𑀫𑀺𑀦𑀸;

𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀲𑀦𑁆𑀢𑀸𑀦𑁂, 𑀲𑀢𑁆𑀢𑀸 𑀧𑀲𑁆𑀲𑀦𑁆𑀢𑀼 𑀦𑀺𑀩𑁆𑀩𑀼𑀢𑀺’’𑀦𑁆𑀢𑀺.

𑀅𑀬𑀁 𑀕𑀸𑀣𑀸 𑀏𑀢𑀭𑀳𑀺 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺, 𑀝𑀻𑀓𑀸𑀲𑀼 𑀧𑀦 𑀅𑀢𑁆𑀣𑀺. 𑀢𑀲𑁆𑀫𑀸 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀇𑀫𑀺𑀦𑀸 𑀧𑀼𑀜𑁆𑀜𑀓𑀫𑁆𑀫𑁂𑀦 𑀘 𑀯𑀺𑀪𑀗𑁆𑀕𑀯𑀡𑁆𑀡𑀦𑀸𑀬 𑀓𑀢𑁂𑀦 𑀇𑀫𑀺𑀦𑀸 𑀧𑀼𑀜𑁆𑀜𑀓𑀫𑁆𑀫𑁂𑀦 𑀘 𑀅𑀜𑁆𑀜𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀘. 𑀘𑀲𑀤𑁆𑀤𑁄 𑀳𑀺 𑀅𑀯𑀼𑀢𑁆𑀢𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀲𑀢𑁆𑀢𑀸 𑀲𑀩𑁆𑀩𑁂 𑀲𑀢𑁆𑀢𑀸 𑀲𑀩𑁆𑀩𑀸𑀲𑀯𑀧𑀳𑀁 𑀲𑀩𑁆𑀩𑁂𑀲𑀁 𑀆𑀲𑀯𑀸𑀦𑀁 𑀯𑀺𑀖𑀸𑀢𑀓𑀁 𑀫𑀕𑁆𑀕𑀁 𑀅𑀭𑀳𑀢𑁆𑀢𑀫𑀕𑁆𑀕𑀁 𑀲𑀲𑀦𑁆𑀢𑀸𑀦𑁂 𑀅𑀢𑁆𑀢𑀦𑁄 𑀦𑀺𑀬𑀓𑀚𑁆𑀛𑀢𑁆𑀢𑁂 𑀉𑀧𑁆𑀧𑀸𑀤𑁂𑀢𑁆𑀯𑀸 𑀚𑀦𑁂𑀢𑁆𑀯𑀸 𑀦𑀺𑀩𑁆𑀩𑀼𑀢𑀺𑀁 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀁 𑀜𑀸𑀡𑀸𑀮𑁄𑀘𑀦𑁂𑀦 𑀧𑀲𑁆𑀲𑀦𑁆𑀢𑀽𑀢𑀺.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑀯𑀡𑁆𑀡𑀦𑀸𑀬

𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀚𑀸𑀤𑀺𑀮𑀜𑁆𑀙𑀺𑀢𑀦𑀸𑀫𑁂𑀦, 𑀦𑁂𑀓𑀸𑀦𑀁 𑀯𑀸𑀘𑀺𑀢𑁄 𑀫𑀬𑀸;

𑀪𑀺𑀓𑁆𑀔𑀼𑀦𑀻𑀦𑀁 𑀯𑀺𑀪𑀗𑁆𑀕𑀲𑁆𑀲, 𑀲𑀫𑀢𑁆𑀢𑁄 𑀬𑁄𑀚𑀦𑀸𑀦𑀬𑁄𑀢𑀺.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲