𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑁄

𑁧. 𑀧𑀸𑀭𑀸𑀚𑀺𑀓𑀓𑀡𑁆𑀟𑀅𑀢𑁆𑀣𑀬𑁄𑀚𑀦𑀸

𑀏𑀯𑀁 𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑀲𑁆𑀲, 𑀓𑀢𑁆𑀯𑀸𑀦 𑀬𑁄𑀚𑀦𑀸𑀦𑀬𑀁;

𑀪𑀺𑀓𑁆𑀔𑀼𑀦𑀻𑀦𑀁 𑀯𑀺𑀪𑀗𑁆𑀕𑀲𑁆𑀲, 𑀓𑀭𑀺𑀲𑁆𑀲𑀁 𑀬𑁄𑀚𑀦𑀸𑀦𑀬𑀁.

𑀬𑁄𑀢𑀺 𑀯𑀺𑀪𑀗𑁆𑀕𑁄. 𑀯𑀺𑀪𑀗𑁆𑀕𑀲𑁆𑀲𑀸𑀢𑀺 𑀯𑀺𑀪𑀗𑁆𑀕𑁄 𑀅𑀲𑁆𑀲. 𑀅𑀲𑁆𑀲𑀸𑀢𑀺 𑀳𑁄𑀢𑀺. 𑀢𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀯𑀺𑀪𑀗𑁆𑀕𑀲𑁆𑀲. 𑀬𑀢𑁄𑀢𑀺 𑀬𑀲𑁆𑀫𑀸. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 𑀪𑀺𑀓𑁆𑀔𑀽𑀦𑀁 𑀯𑀺𑀪𑀗𑁆𑀕𑀲𑁆𑀲 𑀅𑀦𑀦𑁆𑀢𑀭𑀁 𑀪𑀺𑀓𑁆𑀔𑀼𑀦𑀻𑀦𑀁 𑀬𑁄 𑀯𑀺𑀪𑀗𑁆𑀕𑁄 𑀲𑀗𑁆𑀕𑀳𑀺𑀢𑁄 𑀅𑀲𑁆𑀲, 𑀢𑀲𑁆𑀲 𑀪𑀺𑀓𑁆𑀔𑀼𑀦𑀻𑀦𑀁 𑀯𑀺𑀪𑀗𑁆𑀕𑀲𑁆𑀲 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄 𑀧𑀢𑁆𑀢𑁄 𑀬𑀢𑁄, 𑀢𑀢𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑀻𑀦𑀁 𑀯𑀺𑀪𑀗𑁆𑀕𑀲𑁆𑀲 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀁 𑀓𑀸𑀢𑀼𑀁 𑀢𑀸𑀯 𑀧𑀸𑀭𑀸𑀚𑀺𑀓𑁂 𑀅𑀬𑀁 𑀲𑀁𑀯𑀡𑁆𑀡𑀦𑀸 𑀳𑁄𑀢𑀻𑀢𑀺. 𑀅𑀧𑀼𑀩𑁆𑀩𑀸𑀦𑀁 𑀧𑀤𑀸𑀦𑀁 𑀯𑀡𑁆𑀡𑀦𑀸 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸, 𑀢𑀁.

𑁧. 𑀧𑀞𑀫𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀁

𑁬𑁫𑁬. ‘‘𑀢𑁂𑀦…𑀧𑁂… 𑀲𑀸𑀴𑁆𑀳𑁄’’𑀢𑀺 𑀏𑀢𑁆𑀣 ‘‘𑀏𑀢𑁆𑀣𑀸’’𑀢𑀺 𑀧𑀸𑀞𑀲𑁂𑀲𑁄 𑀬𑁄𑀚𑁂𑀢𑀩𑁆𑀩𑁄. 𑀤𑀩𑁆𑀩𑀕𑀼𑀡𑀓𑀺𑀭𑀺𑀬𑀸𑀚𑀸𑀢𑀺𑀦𑀸𑀫𑀲𑀗𑁆𑀔𑀸𑀢𑁂𑀲𑀼 𑀧𑀜𑁆𑀘𑀲𑀼 𑀲𑀤𑁆𑀤𑁂𑀲𑀼 𑀲𑀸𑀴𑁆𑀳𑀲𑀤𑁆𑀤𑀲𑁆𑀲 𑀦𑀸𑀫𑀲𑀤𑁆𑀤𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀸𑀴𑁆𑀳𑁄𑀢𑀺 𑀢𑀲𑁆𑀲 𑀦𑀸𑀫’’𑀦𑁆𑀢𑀺. 𑀫𑀺𑀕𑀸𑀭𑀫𑀸𑀢𑀼𑀬𑀸𑀢𑀺 𑀯𑀺𑀲𑀸𑀔𑀸𑀬. 𑀲𑀸 𑀳𑀺 𑀫𑀺𑀕𑀸𑀭𑀲𑁂𑀝𑁆𑀞𑀺𑀦𑀸 𑀫𑀸𑀢𑀼𑀝𑁆𑀞𑀸𑀦𑁂 𑀞𑀧𑀺𑀢𑀢𑁆𑀢𑀸 𑀫𑀺𑀕𑀸𑀭𑀫𑀸𑀢𑀸 𑀦𑀸𑀫. 𑀦𑀯𑀓𑀫𑁆𑀫𑀁 𑀅𑀥𑀺𑀝𑁆𑀞𑀸𑀢𑀻𑀢𑀺 𑀦𑀯𑀓𑀫𑁆𑀫𑀺𑀓𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑀯𑀓𑀫𑁆𑀫𑀸𑀥𑀺𑀝𑁆𑀞𑀸𑀬𑀺𑀓’’𑀦𑁆𑀢𑀺. ‘‘𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑀸’’𑀢𑀺𑀇𑀫𑀺𑀦𑀸 𑀧𑀡𑁆𑀟𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀲𑀸 𑀲𑀜𑁆𑀚𑀸𑀢𑀸 𑀇𑀫𑀺𑀲𑁆𑀲𑀸𑀢𑀺 𑀧𑀡𑁆𑀟𑀺𑀢𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀯𑁂𑀬𑁆𑀬𑀢𑁆𑀢𑀺𑀓𑁂𑀦𑀸𑀢𑀺 𑀯𑀺𑀲𑁂𑀲𑁂𑀦 𑀅𑀜𑁆𑀚𑀢𑀺 𑀧𑀸𑀓𑀝𑀁 𑀕𑀘𑁆𑀙𑀢𑀻𑀢𑀺 𑀯𑀺𑀬𑀢𑁆𑀢𑁄, 𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀇𑀤𑀁 𑀯𑁂𑀬𑁆𑀬𑀢𑁆𑀢𑀺𑀓𑀁, 𑀜𑀸𑀡𑀁, 𑀢𑁂𑀦. ‘‘𑀧𑀡𑁆𑀟𑀸’’𑀢𑀺 𑀯𑀼𑀢𑁆𑀢𑀧𑀜𑁆𑀜𑀸𑀬 ‘‘𑀫𑁂𑀥𑀸’’𑀢𑀺 𑀯𑀼𑀢𑁆𑀢𑀧𑀜𑁆𑀜𑀸𑀬 𑀯𑀺𑀲𑁂𑀲𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀧𑀸𑀴𑀺𑀕𑀳𑀡𑁂’’𑀢𑀺𑀆𑀤𑀺. ‘‘𑀫𑁂𑀥𑀸’’𑀢𑀺 𑀳𑀺 𑀯𑀼𑀢𑁆𑀢𑀧𑀜𑁆𑀜𑀸 ‘‘𑀧𑀡𑁆𑀟𑀸’’𑀢𑀺 𑀯𑀼𑀢𑁆𑀢𑀧𑀜𑁆𑀜𑀸𑀬 𑀯𑀺𑀲𑁂𑀲𑁄 𑀳𑁄𑀢𑀺 𑀲𑀢𑀺𑀲𑀳𑀸𑀬𑀢𑁆𑀢𑀸. 𑀢𑀢𑁆𑀭𑀼𑀧𑀸𑀬𑀸𑀬𑀸𑀢𑀺 𑀅𑀮𑀼𑀢𑁆𑀢𑀲𑀫𑀸𑀲𑁄 ‘‘𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑀅𑀝𑁆𑀞. 𑀬𑁂𑀯𑀸𑀧𑀦𑀓𑀯𑀡𑁆𑀡𑀦𑀸) 𑀯𑀺𑀬. ‘‘𑀓𑀫𑁆𑀫𑁂𑀲𑀽’’𑀢𑀺 𑀇𑀫𑀺𑀦𑀸 𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀺. 𑀓𑀢𑁆𑀢𑀩𑁆𑀩𑀓𑀫𑁆𑀫𑀼𑀧𑀧𑀭𑀺𑀓𑁆𑀔𑀸𑀬𑀸𑀢𑀺 𑀓𑀢𑁆𑀢𑀩𑁆𑀩𑀓𑀫𑁆𑀫𑁂𑀲𑀼 𑀯𑀺𑀘𑀸𑀭𑀡𑀸𑀬. 𑀘𑀲𑀤𑁆𑀤𑁂𑀦 ‘‘𑀓𑀢𑀸𑀓𑀢’’𑀦𑁆𑀢𑀺 𑀧𑀤𑀲𑁆𑀲 𑀤𑁆𑀯𑀦𑁆𑀤𑀯𑀸𑀓𑁆𑀬𑀁 𑀤𑀲𑁆𑀲𑁂𑀢𑀺. 𑀧𑀭𑀺𑀯𑁂𑀲𑀦𑀝𑁆𑀞𑀸𑀦𑁂𑀢𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀺𑀲𑀦𑁆𑀢𑀺 𑀧𑀯𑀺𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀧𑀭𑀺𑀯𑁂𑀲𑀦𑀁, 𑀢𑀫𑁂𑀯 𑀞𑀸𑀦𑀁 𑀧𑀭𑀺𑀯𑁂𑀲𑀦𑀝𑁆𑀞𑀸𑀦𑀁, 𑀢𑀲𑁆𑀫𑀺𑀁. 𑀦𑀺𑀓𑀽𑀝𑁂𑀢𑀺 𑀏𑀢𑁆𑀣 𑀓𑀽𑀝𑀲𑀗𑁆𑀔𑀸𑀢𑀲𑀺𑀔𑀭𑀯𑀺𑀭𑀳𑀺𑀢𑁂 𑀑𑀓𑀸𑀲𑁂𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑁄𑀡𑀲𑀤𑀺𑀲𑀁 𑀓𑀢𑁆𑀯𑀸 𑀤𑀲𑁆𑀲𑀺𑀢𑁂 𑀕𑀫𑁆𑀪𑀻𑀭𑁂’’𑀢𑀺. 𑀯𑀺𑀢𑁆𑀬𑀽𑀧𑀲𑀕𑁆𑀕𑁄 𑀯𑀺𑀓𑀸𑀭𑀯𑀸𑀘𑀓𑁄, 𑀲𑀭𑀲𑀤𑁆𑀤𑁄 𑀲𑀤𑁆𑀤𑀯𑀸𑀘𑀓𑁄𑀢𑀺 𑀆𑀳 ‘‘𑀯𑀺𑀧𑁆𑀧𑀓𑀸𑀭𑀲𑀤𑁆𑀤𑁄’’𑀢𑀺. 𑀘𑀭𑀢𑀺 𑀅𑀦𑁂𑀦𑀸𑀢𑀺 𑀘𑀭𑀡𑀁 𑀧𑀸𑀤𑁄, 𑀢𑀲𑁆𑀫𑀺𑀁 𑀉𑀝𑁆𑀞𑀺𑀢𑁄 𑀕𑀺𑀮𑀸𑀦𑁄 𑀏𑀢𑀺𑀲𑁆𑀲𑀸𑀢𑀺 𑀘𑀭𑀡𑀕𑀺𑀮𑀸𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀸𑀤𑀭𑁄𑀕𑁂𑀦 𑀲𑀫𑀦𑁆𑀦𑀸𑀕𑀢𑀸’’𑀢𑀺.

𑁬𑁫𑁭. ‘‘𑀢𑀺𑀦𑁆𑀢𑀸’’𑀢𑀺 𑀇𑀫𑀺𑀦𑀸 𑀅𑀯𑀲𑁆𑀲𑀼𑀢𑀲𑀤𑁆𑀤𑁄 𑀇𑀥 𑀓𑀺𑀮𑀺𑀦𑁆𑀦𑀢𑁆𑀣𑁂 𑀏𑀯 𑀯𑀢𑁆𑀢𑀢𑀺, 𑀦 𑀅𑀜𑁆𑀜𑀢𑁆𑀣𑁂𑀢𑀺 𑀤𑀲𑁆𑀲𑁂𑀢𑀺. 𑀅𑀲𑁆𑀲𑀸𑀢𑀺 ‘‘𑀅𑀯𑀲𑁆𑀲𑀼𑀢𑀸’’𑀢𑀺𑀧𑀤𑀲𑁆𑀲. 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀧𑀤𑀪𑀸𑀚𑀦𑁂. 𑀯𑀢𑁆𑀣𑀁 𑀭𑀗𑁆𑀕𑀚𑀸𑀢𑁂𑀦 𑀭𑀢𑁆𑀢𑀁 𑀯𑀺𑀬, 𑀢𑀣𑀸 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀲𑀼𑀝𑁆𑀞𑀼 𑀭𑀢𑁆𑀢𑀸𑀢𑀺 𑀬𑁄𑀚𑀦𑀸. ‘‘𑀅𑀧𑁂𑀓𑁆𑀔𑀸𑀬 𑀲𑀫𑀦𑁆𑀦𑀸𑀕𑀢𑀸’’𑀢𑀺 𑀇𑀫𑀺𑀦𑀸 𑀅𑀧𑁂𑀓𑁆𑀔𑀸 𑀏𑀢𑀺𑀲𑁆𑀲𑀫𑀢𑁆𑀣𑀻𑀢𑀺 𑀅𑀧𑁂𑀓𑁆𑀔𑀯𑀢𑀻𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀝𑀺𑀩𑀤𑁆𑀥𑀁 𑀘𑀺𑀢𑁆𑀢𑀁 𑀇𑀫𑀺𑀲𑁆𑀲𑀦𑁆𑀢𑀺 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀝𑀺𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀘𑀺𑀢𑁆𑀢𑀸 𑀯𑀺𑀬𑀸’’𑀢𑀺. 𑀤𑀼𑀢𑀺𑀬𑀧𑀤𑀯𑀺𑀪𑀗𑁆𑀕𑁂𑀧𑀻𑀢𑀺 ‘‘𑀅𑀯𑀲𑁆𑀲𑀼𑀢𑁄’’𑀢𑀺 𑀤𑀼𑀢𑀺𑀬𑀧𑀤𑀪𑀸𑀚𑀦𑁂𑀧𑀺. 𑀧𑀼𑀕𑁆𑀕𑀮𑀲𑀤𑁆𑀤𑀲𑁆𑀲 𑀲𑀢𑁆𑀢𑀲𑀸𑀫𑀜𑁆𑀜𑀯𑀸𑀘𑀓𑀢𑁆𑀢𑀸 𑀧𑀼𑀭𑀺𑀲𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑀺. 𑀅𑀥𑁄𑀉𑀩𑁆𑀪𑀇𑀢𑀺 𑀦𑀺𑀧𑀸𑀢𑀸𑀦𑀁 𑀙𑀝𑁆𑀞𑀺𑀬𑀸 𑀲𑀫𑀲𑀺𑀢𑀩𑁆𑀩𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀅𑀓𑁆𑀔𑀓𑀸𑀦𑀁 𑀅𑀥𑁄’’𑀢𑀺𑀆𑀤𑀺. 𑀦𑀦𑀼 𑀬𑀣𑀸 𑀇𑀥 ‘‘𑀅𑀓𑁆𑀔𑀓𑀸𑀦𑀁 𑀅𑀥𑁄’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀧𑀤𑀪𑀸𑀚𑀦𑁂𑀧𑀺 𑀯𑀢𑁆𑀢𑀩𑁆𑀩𑀁, 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀧𑀤𑀪𑀸𑀚𑀦𑁂’’𑀢𑀺𑀆𑀤𑀺. 𑀧𑀤𑀧𑀝𑀺𑀧𑀸𑀝𑀺𑀬𑀸𑀢𑀺 ‘‘𑀅𑀥𑁄’’𑀢𑀺 𑀘 ‘‘𑀅𑀓𑁆𑀔𑀓’’𑀦𑁆𑀢𑀺 𑀘 𑀧𑀤𑀸𑀦𑀁 𑀅𑀦𑀼𑀓𑁆𑀓𑀫𑁂𑀦. 𑀏𑀢𑁆𑀣𑀸𑀢𑀺 𑀅𑀥𑀓𑁆𑀔𑀓𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑁂𑀲𑀼. 𑀲𑀸𑀥𑀸𑀭𑀡𑀧𑀸𑀭𑀸𑀚𑀺𑀓𑁂𑀳𑀻𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀁 𑀲𑀸𑀥𑀸𑀭𑀡𑁂𑀳𑀺 𑀧𑀸𑀭𑀸𑀚𑀺𑀓𑁂𑀳𑀺. 𑀦𑀸𑀫𑀫𑀢𑁆𑀢𑀦𑁆𑀢𑀺 𑀦𑀸𑀫𑀫𑁂𑀯.

𑁬𑁫𑁯. 𑀏𑀯𑀦𑁆𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 𑀯𑀺𑀪𑀚𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 ‘‘𑀉𑀪𑀢𑁄𑀅𑀯𑀲𑁆𑀲𑀼𑀢𑁂’’𑀢𑀺𑀆𑀤𑀺𑀯𑀘𑀦𑁂. ‘‘𑀉𑀪𑀢𑁄𑀅𑀯𑀲𑁆𑀲𑀼𑀢𑁂’’𑀢𑀺 𑀧𑀸𑀞𑁄 𑀫𑀽𑀮𑀧𑀸𑀞𑁄𑀬𑁂𑀯, 𑀦𑀸𑀜𑁆𑀜𑁄𑀢𑀺 𑀤𑀲𑁆𑀲𑁂𑀦𑁆𑀢𑁂𑀦 𑀯𑀺𑀲𑁂𑀲𑀫𑀓𑀢𑁆𑀯𑀸 ‘‘𑀉𑀪𑀢𑁄𑀅𑀯𑀲𑁆𑀲𑀼𑀢𑁂𑀢𑀺 𑀉𑀪𑀢𑁄 𑀅𑀯𑀲𑁆𑀲𑀼𑀢𑁂’’𑀢𑀺 𑀯𑀼𑀢𑁆𑀢𑀁. 𑀉𑀪𑀢𑁄𑀢𑀺 𑀏𑀢𑁆𑀣 𑀉𑀪𑀲𑀭𑀽𑀧𑀜𑁆𑀘 𑀢𑁄𑀲𑀤𑁆𑀤𑀲𑁆𑀲 𑀙𑀝𑁆𑀞𑁆𑀬𑀢𑁆𑀣𑁂 𑀧𑀯𑀢𑁆𑀢𑀺𑀜𑁆𑀘 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀪𑀺𑀓𑁆𑀔𑀼𑀦𑀺𑀬𑀸 𑀘𑁂𑀯 𑀧𑀼𑀭𑀺𑀲𑀲𑁆𑀲 𑀘𑀸’’𑀢𑀺. 𑀢𑀢𑁆𑀣 𑀪𑀺𑀓𑁆𑀔𑀼𑀦𑀻𑀧𑀼𑀭𑀺𑀲𑀲𑀤𑁆𑀤𑁂𑀳𑀺 𑀉𑀪𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. ‘‘𑀬𑀸’’𑀢𑀺 𑀘 ‘‘𑀲’’𑀇𑀢𑀺 𑀘 𑀤𑁆𑀯𑀻𑀳𑀺 𑀲𑀤𑁆𑀤𑁂𑀳𑀺 𑀢𑁄𑀧𑀘𑁆𑀘𑀬𑀲𑁆𑀲 𑀙𑀝𑁆𑀞𑁆𑀬𑀢𑁆𑀣𑀁, 𑀉𑀪𑀺𑀦𑁆𑀦𑀁 𑀅𑀯𑀲𑁆𑀲𑀼𑀢𑀪𑀸𑀯𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀪𑀸𑀯𑀧𑀘𑁆𑀘𑀬𑁂𑀦 𑀯𑀺𑀦𑀸 𑀪𑀸𑀯𑀢𑁆𑀣𑁄 𑀜𑀸𑀢𑀩𑁆𑀩𑁄𑀢𑀺 𑀆𑀳 ‘‘𑀅𑀯𑀲𑁆𑀲𑀼𑀢𑀪𑀸𑀯𑁂’’𑀢𑀺. 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑁂𑀦𑀸𑀢𑀺 ‘‘𑀅𑀥𑀓𑁆𑀔𑀓𑀁, 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮’’𑀦𑁆𑀢𑀺 𑀬𑁂𑀦 𑀬𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁂𑀦. 𑀅𑀢𑁆𑀢𑀦𑁄𑀢𑀺 𑀪𑀺𑀓𑁆𑀔𑀼𑀦𑀺𑀬𑀸. 𑀢𑀲𑁆𑀲 𑀯𑀸𑀢𑀺 𑀧𑀼𑀭𑀺𑀲𑀲𑁆𑀲 𑀯𑀸. 𑀇𑀥𑀸𑀧𑀻𑀢𑀺 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀓𑀸𑀬𑀸𑀫𑀲𑀦𑁂𑀧𑀺.

𑀢𑀢𑁆𑀭𑀸𑀢𑀺 𑀢𑁂𑀲𑀼 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀲𑀼. 𑀦 𑀓𑀸𑀭𑁂𑀢𑀩𑁆𑀩𑁄 ‘‘𑀓𑀸𑀬𑀲𑀁𑀲𑀕𑁆𑀕𑀁 𑀲𑀸𑀤𑀺𑀬𑁂𑀬𑁆𑀬𑀸’’𑀢𑀺 𑀅𑀯𑀼𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀘𑁄𑀧𑀬𑀫𑀸𑀦𑀸𑀧𑀻𑀢𑀺 𑀅𑀘𑀸𑀮𑀬𑀫𑀸𑀦𑀸𑀧𑀺, 𑀧𑀺𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑀢𑁆𑀣𑁄, 𑀢𑁂𑀦 𑀘𑁄𑀧𑀬𑀫𑀸𑀦𑀸 𑀧𑀕𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀁 𑀧𑀦 𑀲𑀢𑀻𑀢𑀺 𑀘𑀺𑀢𑁆𑀢𑁂𑀦𑁂𑀯 𑀅𑀥𑀺𑀯𑀸𑀲𑀬𑀫𑀸𑀦𑀸𑀬 𑀲𑀢𑀺 𑀧𑀦. 𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀢𑀸𑀢𑀺 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀪𑀸𑀯𑁄. 𑀢𑀩𑁆𑀩𑀳𑀼𑀮𑀦𑀬𑁂𑀦𑀸𑀢𑀺 ‘‘𑀯𑀦𑀘𑀭𑀓𑁄 (𑀫. 𑀦𑀺. 𑀅𑀝𑁆𑀞. 𑁨.𑁨𑁦𑁧; 𑁩.𑁧𑁩𑁩), 𑀲𑀗𑁆𑀕𑀸𑀫𑀸𑀯𑀘𑀭𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁦𑁮) 𑀯𑀺𑀬 𑀢𑀲𑁆𑀲𑀁 𑀓𑀺𑀭𑀺𑀬𑀸𑀬𑀁 𑀩𑀳𑀼𑀮𑀢𑁄 𑀲𑀫𑀼𑀝𑁆𑀞𑀸𑀦𑀦𑀬𑁂𑀦. 𑀲𑀸𑀢𑀺 𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀢𑀸.

𑁬𑁬𑁦. 𑀏𑀢𑁆𑀣𑀸𑀢𑀺 𑀉𑀩𑁆𑀪𑀓𑁆𑀔𑀓𑀅𑀥𑁄𑀚𑀸𑀡𑀼𑀫𑀡𑁆𑀟𑀮𑁂𑀲𑀼.

𑁬𑁬𑁨. ‘‘𑀏𑀓𑀢𑁄 𑀅𑀯𑀲𑁆𑀲𑀼𑀢𑁂’’𑀢𑀺 𑀏𑀢𑁆𑀣𑀸𑀧𑀺 𑀢𑁄𑀧𑀘𑁆𑀘𑀬𑁄 𑀙𑀝𑁆𑀞𑁆𑀬𑀢𑁆𑀣𑁂 𑀳𑁄𑀢𑀺. 𑀲𑀸𑀫𑀜𑁆𑀜𑀯𑀘𑀦𑀲𑁆𑀲𑀸𑀧𑀺 𑀯𑀺𑀲𑁂𑀲𑁂 𑀅𑀯𑀝𑁆𑀞𑀸𑀦𑀢𑁄, 𑀯𑀺𑀲𑁂𑀲𑀢𑁆𑀣𑀺𑀦𑀸 𑀘 𑀯𑀺𑀲𑁂𑀲𑀲𑁆𑀲 𑀅𑀦𑀼𑀧𑀬𑁄𑀚𑀺𑀢𑀩𑁆𑀩𑀢𑁄 𑀆𑀳 ‘‘𑀪𑀺𑀓𑁆𑀔𑀼𑀦𑀺𑀬𑀸 𑀏𑀯𑀸’’𑀢𑀺. 𑀢𑀢𑁆𑀭𑀸𑀢𑀺 ‘‘𑀏𑀓𑀢𑁄 𑀅𑀯𑀲𑁆𑀲𑀼𑀢𑁂’’𑀢𑀺𑀆𑀤𑀺𑀯𑀘𑀦𑁂. ‘‘𑀢𑀣𑁂𑀯𑀸’’𑀢𑀺𑀇𑀫𑀺𑀦𑀸 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀅𑀯𑀲𑁆𑀲𑀼𑀢𑁄𑀢𑀺 𑀅𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀘𑀢𑀽𑀲𑀽𑀢𑀺 𑀫𑁂𑀣𑀼𑀦𑀭𑀸𑀕 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀕𑁂𑀳𑀲𑀺𑀢𑀧𑁂𑀫 𑀲𑀼𑀤𑁆𑀥𑀘𑀺𑀢𑁆𑀢𑀲𑀗𑁆𑀔𑀸𑀢𑁂𑀲𑀼 𑀘𑀢𑀽𑀲𑀼. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂.

𑁬𑁬𑁩. 𑀅𑀬𑀁 𑀧𑀼𑀭𑀺𑀲𑁄 𑀇𑀢𑀺 𑀯𑀸 𑀇𑀢𑁆𑀣𑀻 𑀇𑀢𑀺 𑀯𑀸 𑀅𑀚𑀸𑀦𑀦𑁆𑀢𑀺𑀬𑀸 𑀯𑀸𑀢𑀺 𑀬𑁄𑀚𑀦𑀸𑀢𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀁

𑁬𑁬𑁪. 𑀤𑀼𑀢𑀺𑀬𑁂 𑀓𑀘𑁆𑀘𑀺 𑀦𑁄 𑀲𑀸𑀢𑀺 𑀏𑀢𑁆𑀣 𑀦𑁄𑀲𑀤𑁆𑀤𑁄 𑀦𑀼𑀲𑀤𑁆𑀤𑀢𑁆𑀣𑁄𑀢𑀺 𑀆𑀳 ‘‘𑀓𑀘𑁆𑀘𑀺 𑀦𑀼 𑀲𑀸’’𑀢𑀺. 𑀧𑀭𑀺𑀯𑀸𑀭𑀯𑀺𑀧𑀢𑁆𑀢𑀻𑀢𑀺 𑀧𑀭𑀺𑀚𑀦𑀲𑁆𑀲 𑀯𑀺𑀦𑀸𑀲𑀦𑀁. ‘‘𑀅𑀓𑀺𑀢𑁆𑀢𑀻’’𑀢𑀺 𑀏𑀢𑁆𑀣 𑀲𑀫𑁆𑀫𑀼𑀔𑀸 𑀦𑀺𑀦𑁆𑀤𑀁 𑀕𑀳𑁂𑀢𑁆𑀯𑀸 ‘‘𑀅𑀬𑀲𑁄’’𑀢𑀺𑀇𑀫𑀺𑀦𑀸 𑀧𑀭𑀫𑁆𑀫𑀼𑀔𑀸 𑀦𑀺𑀦𑁆𑀤𑀸 𑀕𑀳𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀧𑀭𑀫𑁆𑀫𑀼𑀔𑀕𑀭𑀳𑀸 𑀯𑀸’’𑀢𑀺.

𑁬𑁬𑁬. ‘‘𑀬𑀸 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑀸’’𑀢𑀺𑀇𑀫𑀺𑀦𑀸 ‘‘𑀲𑀸 𑀯𑀸’’𑀢𑀺 𑀏𑀢𑁆𑀣 𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀺. 𑀘𑀢𑀼𑀦𑁆𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑀢𑁆𑀣𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁, 𑀘𑀢𑀽𑀲𑀽𑀢𑀺 𑀅𑀢𑁆𑀣𑁄. 𑀧𑀘𑁆𑀙𑀸𑀢𑀺 𑀲𑀩𑁆𑀩𑀧𑀸𑀭𑀸𑀚𑀺𑀓𑀸𑀦𑀁 𑀧𑀘𑁆𑀙𑀸. 𑀇𑀫𑀲𑁆𑀫𑀺𑀁 𑀑𑀓𑀸𑀲𑁂𑀢𑀺 𑀧𑀞𑀫𑀢𑀢𑀺𑀬𑀧𑀸𑀭𑀸𑀚𑀺𑀓𑀸𑀦𑀫𑀦𑁆𑀢𑀭𑁂 𑀞𑀸𑀦𑁂. 𑀞𑀧𑀺𑀢𑀦𑁆𑀢𑀺 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀦𑀺𑀓𑁆𑀔𑀺𑀢𑁆𑀢𑀁. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂. 𑀢𑀢𑁆𑀭𑀸𑀢𑀺 𑀤𑀼𑀝𑁆𑀞𑀼𑀮𑁆𑀮𑀲𑀺𑀓𑁆𑀔𑀸𑀧𑀤𑁂𑀢𑀺. 𑀤𑀼𑀢𑀺𑀬𑀁.

𑁩. 𑀢𑀢𑀺𑀬𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀁

𑁬𑁬𑁯. 𑀢𑀢𑀺𑀬𑁂 𑀅𑀲𑁆𑀲𑀸𑀢𑀺 ‘‘𑀥𑀫𑁆𑀫𑁂𑀦 𑀯𑀺𑀦𑀬𑁂𑀦𑀸’’𑀢𑀺 𑀧𑀤𑀲𑁆𑀲. 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀜𑀢𑁆𑀢𑀺𑀲𑀫𑁆𑀧𑀤𑀸 𑀘𑁂𑀯 𑀅𑀦𑀼𑀲𑀸𑀯𑀦𑀲𑀫𑁆𑀧𑀤𑀸 𑀘 𑀲𑀢𑁆𑀣𑀼𑀲𑀸𑀲𑀦𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀜𑀢𑁆𑀢𑀺…𑀧𑁂… 𑀲𑀫𑁆𑀧𑀤𑀸𑀬 𑀘𑀸’’𑀢𑀺. 𑀲𑀢𑁆𑀣𑀼𑀲𑀸𑀲𑀦𑁂𑀦𑀸𑀢𑀺 𑀘 𑀲𑀢𑁆𑀣𑀼 𑀆𑀡𑀸𑀬. 𑀓𑀫𑁆𑀫𑀦𑁆𑀢𑀺 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁. 𑀢𑀢𑁆𑀣𑀸𑀢𑀺 𑀲𑀗𑁆𑀖𑁂. ‘‘𑀯𑀘𑀦𑀁 𑀦𑀸𑀤𑀺𑀬𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀲𑀗𑁆𑀖𑀁 𑀯𑀸 𑀦𑀸𑀤𑀺𑀬𑀢𑀻𑀢𑀺 𑀏𑀢𑁆𑀣 𑀦𑀸𑀤𑀺𑀬𑀦𑀁 𑀦𑀸𑀫 𑀦𑀸𑀦𑀼𑀯𑀢𑁆𑀢𑀦𑀫𑁂𑀯𑀸𑀢𑀺 𑀆𑀳 ‘‘𑀦𑀸𑀦𑀼𑀯𑀢𑁆𑀢𑀢𑀻’’𑀢𑀺. 𑀢𑀢𑁆𑀣𑀸𑀢𑀺 𑀲𑀗𑁆𑀖𑀸𑀤𑀻𑀲𑀼. 𑀅𑀬𑀁 𑀢𑀸𑀯 𑀲𑀁𑀯𑀸𑀲𑁄𑀢𑀺 𑀲𑀳 𑀪𑀺𑀓𑁆𑀔𑀽 𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀁𑀯𑀸𑀲𑁄𑀢𑀺 𑀅𑀢𑁆𑀣𑁂𑀦 𑀅𑀬𑀁 𑀏𑀓𑀓𑀫𑁆𑀫𑀸𑀤𑀺 𑀲𑀁𑀯𑀸𑀲𑁄 𑀦𑀸𑀫. ‘‘𑀲𑀳 𑀅𑀬𑀦𑀪𑀸𑀯𑁂𑀦𑀸’’𑀢𑀺𑀇𑀫𑀺𑀦𑀸 𑀲𑀳 𑀅𑀬𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀲𑀳𑀸𑀬𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑁂𑀢𑀺 𑀪𑀺𑀓𑁆𑀔𑀽. 𑀬𑁂𑀳𑀺 𑀘𑀸𑀢𑀺 𑀪𑀺𑀓𑁆𑀔𑀽𑀳𑀺 𑀘. 𑀢𑀲𑁆𑀲𑀸𑀢𑀺 𑀉𑀓𑁆𑀔𑀺𑀢𑁆𑀢𑀓𑀲𑁆𑀲. 𑀢𑁂𑀦𑀸𑀢𑀺 𑀉𑀓𑁆𑀔𑀺𑀢𑁆𑀢𑀓𑁂𑀦. 𑀅𑀢𑁆𑀢𑀦𑁄𑀢𑀺 𑀉𑀓𑁆𑀔𑀺𑀢𑁆𑀢𑀓𑀲𑁆𑀲𑀸𑀢𑀺. 𑀢𑀢𑀺𑀬𑀁.

𑁪. 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀁

𑁬𑁭𑁫. 𑀘𑀢𑀼𑀢𑁆𑀣𑁂 𑀫𑁂𑀣𑀼𑀦𑀭𑀸𑀕𑁂𑀦 𑀅𑀯𑀲𑁆𑀲𑀼𑀢𑀸 𑀦𑀸𑀥𑀺𑀧𑁆𑀧𑁂𑀢𑀸, 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀅𑀯𑀲𑁆𑀲𑀼𑀢𑀸𑀯𑀸𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀅𑀯𑀲𑁆𑀲𑀼𑀢𑀸’’𑀢𑀺. ‘‘𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲𑀸’’𑀢𑀺𑀧𑀤𑀁 𑀦 𑀳𑀢𑁆𑀣𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, 𑀕𑀳𑀡𑀲𑀤𑁆𑀤𑁂𑀦𑁂𑀯 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁂𑀦𑀸’’𑀢𑀺𑀆𑀤𑀺. 𑀢𑀦𑁆𑀢𑀺 𑀕𑀳𑀡𑀁, ‘‘𑀳𑀢𑁆𑀣𑀕𑁆𑀕𑀳𑀡’’𑀦𑁆𑀢𑀺 𑀯𑀼𑀢𑁆𑀢𑀯𑀘𑀦𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀫𑁂𑀯𑀸𑀢𑀺 𑀆𑀳 ‘‘𑀅𑀜𑁆𑀜𑀫𑁆𑀧𑀻’’𑀢𑀺𑀆𑀤𑀺. 𑀢𑀢𑁆𑀣 ‘‘𑀅𑀜𑁆𑀜𑀫𑁆𑀧𑀻’’𑀢𑀺 𑀳𑀢𑁆𑀣𑀕𑀳𑀡𑀢𑁄 𑀇𑀢𑀭𑀫𑁆𑀧𑀺. 𑀅𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂𑀢𑀺 𑀉𑀩𑁆𑀪𑀓𑁆𑀔𑀓𑁂 𑀅𑀥𑁄𑀚𑀸𑀡𑀼𑀫𑀡𑁆𑀟𑀮𑁂. 𑀅𑀲𑁆𑀲𑀸𑀢𑀺 ‘‘𑀳𑀢𑁆𑀣𑀕𑁆𑀕𑀳𑀡’’𑀦𑁆𑀢𑀺𑀧𑀤𑀲𑁆𑀲. 𑀏𑀢𑁆𑀣𑀸𑀢𑀺 ‘‘𑀅𑀲𑀤𑁆𑀥𑀫𑁆𑀫𑀲𑁆𑀲 𑀧𑀝𑀺𑀲𑁂𑀯𑀦𑀢𑁆𑀣𑀸𑀬𑀸’’𑀢𑀺𑀧𑀤𑁂. 𑀓𑀸𑀬𑀲𑀁𑀲𑀕𑁆𑀕𑁄𑀢𑀺 𑀓𑀸𑀬𑀲𑀁𑀲𑀕𑁆𑀕𑁄 𑀏𑀯. 𑀢𑁂𑀦 𑀯𑀼𑀢𑁆𑀢𑀁 ‘‘𑀦 𑀫𑁂𑀣𑀼𑀦𑀥𑀫𑁆𑀫𑁄’’𑀢𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀏𑀢𑁆𑀣𑀸𑀢𑀺 𑀓𑀸𑀬𑀲𑀁𑀲𑀕𑁆𑀕𑀕𑀳𑀡𑁂. 𑀲𑀸𑀥𑀓𑀦𑁆𑀢𑀺 𑀜𑀸𑀧𑀓𑀁.

𑀢𑀺𑀲𑁆𑀲𑀺𑀢𑁆𑀣𑀺𑀬𑁄𑀢𑀺 𑀪𑀼𑀫𑁆𑀫𑀢𑁆𑀣𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀢𑀻𑀲𑀼 𑀇𑀢𑁆𑀣𑀻𑀲𑀽𑀢𑀺 𑀳𑀺 𑀅𑀢𑁆𑀣𑁄, 𑀢𑀺𑀲𑁆𑀲𑁄 𑀇𑀢𑁆𑀣𑀺𑀬𑁄 𑀉𑀧𑀕𑀦𑁆𑀢𑁆𑀯𑀸𑀢𑀺 𑀯𑀸 𑀬𑁄𑀚𑁂𑀢𑀩𑁆𑀩𑁄. 𑀏𑀲𑁂𑀯 𑀦𑀬𑁄 𑀧𑀭𑀢𑁄𑀧𑀺. 𑀬𑀁 𑀫𑁂𑀣𑀼𑀦𑀁 𑀅𑀢𑁆𑀣𑀺, 𑀢𑀁 𑀦 𑀲𑁂𑀯𑁂𑀢𑀺 𑀬𑁄𑀚𑀦𑀸. 𑀦 𑀲𑁂𑀯𑁂𑀢𑀺 𑀘 𑀦 𑀲𑁂𑀯𑀢𑀺. 𑀢𑀺𑀓𑀸𑀭𑀲𑁆𑀲 𑀳𑀺 𑀏𑀓𑀸𑀭𑁄. 𑀢𑀬𑁄 𑀧𑀼𑀭𑀺𑀲𑁂𑀢𑀺 𑀢𑀻𑀲𑀼 𑀧𑀼𑀭𑀺𑀲𑁂𑀲𑀼, 𑀢𑁂 𑀯𑀸 𑀉𑀧𑀕𑀦𑁆𑀢𑁆𑀯𑀸. 𑀢𑀬𑁄 𑀘 𑀅𑀦𑀭𑀺𑀬𑀧𑀡𑁆𑀟𑀓𑁂𑀢𑀺 𑀢𑀻𑀲𑀼 𑀅𑀦𑀭𑀺𑀬𑀲𑀗𑁆𑀔𑀸𑀢𑁂𑀲𑀼 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁂𑀲𑀼 𑀘 𑀧𑀡𑁆𑀟𑀓𑁂𑀲𑀼 𑀘, 𑀢𑁂 𑀯𑀸 𑀉𑀧𑀕𑀦𑁆𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀦 𑀘𑀸𑀘𑀭𑁂 𑀫𑁂𑀣𑀼𑀦𑀁 𑀩𑁆𑀬𑀜𑁆𑀚𑀦𑀲𑁆𑀫𑀺𑀦𑁆𑀢𑀺 𑀅𑀢𑁆𑀢𑀦𑁄 𑀦𑀺𑀫𑀺𑀢𑁆𑀢𑀲𑁆𑀫𑀺𑀁 𑀫𑁂𑀣𑀼𑀦𑀁 𑀦 𑀘 𑀆𑀘𑀭𑀢𑀺. 𑀇𑀤𑀁 𑀅𑀦𑀼𑀮𑁄𑀫𑀧𑀸𑀭𑀸𑀚𑀺𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀙𑁂𑀚𑁆𑀚𑀁 𑀲𑀺𑀬𑀸 𑀫𑁂𑀣𑀼𑀦𑀥𑀫𑁆𑀫𑀧𑀘𑁆𑀘𑀬𑀸𑀢𑀺 𑀫𑁂𑀣𑀼𑀦𑀥𑀫𑁆𑀫𑀓𑀸𑀭𑀡𑀸 𑀙𑁂𑀚𑁆𑀚𑀁 𑀲𑀺𑀬𑀸, 𑀧𑀸𑀭𑀸𑀚𑀺𑀓𑀁 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀓𑀼𑀲𑀮𑁂𑀳𑀻𑀢𑀺 𑀧𑀜𑁆𑀳𑀸𑀯𑀺𑀲𑀚𑁆𑀚𑀦𑁂 𑀙𑁂𑀓𑁂𑀳𑀺, 𑀙𑁂𑀓𑀓𑀸𑀫𑁂𑀳𑀺 𑀯𑀸. 𑀅𑀬𑀁 𑀧𑀜𑁆𑀳𑁄 𑀅𑀝𑁆𑀞𑀯𑀢𑁆𑀣𑀼𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄.

𑀧𑀜𑁆𑀳𑀸𑀯𑀺𑀲𑀚𑁆𑀚𑀦𑀢𑁆𑀣𑀸𑀬 𑀘𑀺𑀦𑁆𑀢𑁂𑀦𑁆𑀢𑀸𑀦𑀁 𑀲𑁂𑀤𑀫𑁄𑀘𑀦𑀓𑀸𑀭𑀡𑀢𑁆𑀢𑀸 ‘‘𑀲𑁂𑀤𑀫𑁄𑀘𑀦𑀕𑀸𑀣𑀸’’𑀢𑀺 𑀯𑀼𑀢𑁆𑀢𑀸. 𑀯𑀺𑀭𑀼𑀚𑁆𑀛𑀢𑀻𑀢𑀺 ‘‘𑀦 𑀫𑁂𑀣𑀼𑀦𑀥𑀫𑁆𑀫𑁄’’𑀢𑀺 𑀯𑀘𑀦𑁂𑀦 ‘‘𑀙𑁂𑀚𑁆𑀚𑀁 𑀲𑀺𑀬𑀸 𑀫𑁂𑀣𑀼𑀦𑀥𑀫𑁆𑀫𑀧𑀘𑁆𑀘𑀬𑀸’’𑀢𑀺 𑀯𑀘𑀦𑀁 𑀯𑀺𑀭𑀼𑀚𑁆𑀛𑀢𑀺, 𑀦 𑀲𑀫𑁂𑀢𑀻𑀢𑀺 𑀅𑀢𑁆𑀣𑁄. 𑀇𑀢𑀺 𑀘𑁂 𑀯𑀤𑁂𑀬𑁆𑀬, 𑀦 𑀯𑀺𑀭𑀼𑀚𑁆𑀛𑀢𑀺. 𑀓𑀲𑁆𑀫𑀸? 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀧𑀼𑀩𑁆𑀩𑀪𑀸𑀕𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀇𑀫𑀺𑀦𑀸 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀧𑀼𑀩𑁆𑀩𑀪𑀸𑀕𑀪𑀽𑀢𑁄 𑀓𑀸𑀬𑀲𑀁𑀲𑀕𑁆𑀕𑁄𑀯 𑀉𑀧𑀘𑀸𑀭𑁂𑀦 𑀢𑀢𑁆𑀣 𑀫𑁂𑀣𑀼𑀦𑀥𑀫𑁆𑀫𑀲𑀤𑁆𑀤𑁂𑀦 𑀯𑀼𑀢𑁆𑀢𑁄, 𑀦 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀳𑀺𑀲𑀤𑁆𑀤𑁄 𑀯𑀺𑀢𑁆𑀣𑀸𑀭𑀚𑁄𑀢𑀓𑁄. 𑀧𑀭𑀺𑀯𑀸𑀭𑁂𑀬𑁂𑀯 𑀯𑀼𑀢𑁆𑀢𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀡𑁆𑀡𑀸𑀯𑀡𑁆𑀡𑁄𑀢𑀺 𑀲𑀼𑀓𑁆𑀓𑀯𑀺𑀲𑀝𑁆𑀞𑀺. 𑀥𑀦𑀫𑀦𑀼𑀧𑁆𑀧𑀸𑀤𑀸𑀦𑀦𑁆𑀢𑀺 𑀲𑀜𑁆𑀘𑀭𑀺𑀢𑁆𑀢𑀁. ‘‘𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦𑀸’’𑀢𑀺 𑀇𑀫𑀺𑀦𑀸 𑀮𑁂𑀲𑁂𑀦 𑀲𑀫𑀻𑀧𑀽𑀧𑀘𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦𑀼𑀧𑀸𑀬𑁂𑀦𑀸𑀢𑀺 ‘‘𑀳𑀢𑁆𑀣𑀕𑁆𑀕𑀳𑀡𑀁 𑀲𑀸𑀤𑀺𑀬𑁂𑀬𑁆𑀬𑀸’’𑀢𑀺𑀧𑀤𑁂 𑀯𑀼𑀢𑁆𑀢𑀉𑀧𑀸𑀬𑁂𑀦. 𑀲𑀩𑁆𑀩𑀧𑀤𑁂𑀲𑀽𑀢𑀺 𑀲𑀩𑁆𑀩𑁂𑀲𑀼 ‘‘𑀲𑀗𑁆𑀖𑀸𑀝𑀺𑀓𑀡𑁆𑀡𑀕𑁆𑀕𑀳𑀡𑀁 𑀲𑀸𑀤𑀺𑀬𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 𑀧𑀤𑁂𑀲𑀼. 𑀅𑀧𑀺 𑀘𑀸𑀢𑀺 𑀏𑀓𑀁𑀲𑁂𑀦, 𑀯𑀺𑀲𑁂𑀲𑀁 𑀯𑀓𑁆𑀔𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀏𑀯𑀁𑀦𑀸𑀫𑀓𑀁 𑀞𑀸𑀦’’𑀦𑁆𑀢𑀺 𑀇𑀫𑀺𑀦𑀸 ‘‘𑀇𑀢𑁆𑀣𑀁𑀦𑀸𑀫𑀁 𑀇𑀫𑀲𑁆𑀲 𑀞𑀸𑀦𑀲𑁆𑀲𑀸’’𑀢𑀺 𑀯𑀘𑀦𑀢𑁆𑀣𑀁 𑀤𑀻𑀧𑁂𑀢𑀺.

𑁬𑁭𑁬. 𑀏𑀓𑀦𑁆𑀢𑀭𑀺𑀓𑀸𑀬 𑀯𑀸𑀢𑀺 𑀏𑀢𑁆𑀣 𑀯𑀸𑀲𑀤𑁆𑀤𑁂𑀦 𑀤𑁆𑀯𑀦𑁆𑀢𑀭𑀺𑀓𑀸𑀤𑀻𑀦𑀺𑀧𑀺 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀬𑁂𑀦 𑀢𑁂𑀦𑀸𑀢𑀺 𑀬𑁂𑀦 𑀯𑀸 𑀢𑁂𑀦 𑀯𑀸. 𑀤𑁆𑀯𑀺𑀢𑀺𑀘𑀢𑀼𑀧𑁆𑀧𑀜𑁆𑀘𑀙𑀯𑀢𑁆𑀣𑀽𑀦𑀺 𑀧𑁂𑀬𑁆𑀬𑀸𑀮𑀯𑀲𑁂𑀦 𑀯𑀸 𑀯𑀸𑀲𑀤𑁆𑀤𑁂𑀦 𑀯𑀸 𑀕𑀳𑁂𑀢𑀩𑁆𑀩𑀸𑀦𑀺. 𑀅𑀧𑀺 𑀘𑀸𑀢𑀺 𑀓𑀺𑀜𑁆𑀘 𑀪𑀺𑀬𑁆𑀬𑁄, 𑀯𑀢𑁆𑀢𑀩𑁆𑀩𑀯𑀺𑀲𑁂𑀲𑀁 𑀯𑀓𑁆𑀔𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣𑀸𑀢𑀺 ‘‘𑀆𑀧𑀢𑁆𑀢𑀺𑀬𑁄 𑀤𑁂𑀲𑁂𑀢𑁆𑀯𑀸’’𑀢𑀺 𑀯𑀘𑀦𑁂. 𑀳𑀻𑀢𑀺 𑀲𑀘𑁆𑀘𑀁. 𑀯𑀼𑀢𑁆𑀢𑀦𑁆𑀢𑀺 𑀧𑀭𑀺𑀯𑀸𑀭𑁂 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀢𑀺 𑀧𑀼𑀭𑀺𑀫𑀯𑀘𑀦𑀸𑀧𑁂𑀓𑁆𑀔𑀁. 𑀤𑁂𑀲𑀺𑀢𑀸 𑀆𑀧𑀢𑁆𑀢𑀺 𑀕𑀡𑀦𑀽𑀧𑀺𑀓𑀸𑀢𑀺 𑀬𑁄𑀚𑀦𑀸. 𑀏𑀓𑀁 𑀯𑀢𑁆𑀣𑀼𑀁 𑀆𑀧𑀦𑁆𑀦𑀸 𑀬𑀸 𑀪𑀺𑀓𑁆𑀔𑀼𑀦𑀻𑀢𑀺 𑀬𑁄𑀚𑀦𑀸. 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸𑀢𑀺 ‘‘𑀇𑀫𑀜𑁆𑀘 𑀯𑀢𑁆𑀣𑀼𑀁, 𑀅𑀜𑁆𑀜𑀫𑁆𑀧𑀺 𑀘 𑀯𑀢𑁆𑀣𑀼𑀁 𑀦𑀸𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸. 𑀬𑀸 𑀧𑀦 𑀲𑀉𑀲𑁆𑀲𑀸𑀳𑀸𑀯 𑀤𑁂𑀲𑁂𑀢𑀻𑀢𑀺 𑀬𑁄𑀚𑀦𑀸𑀢𑀺. 𑀘𑀢𑀼𑀢𑁆𑀣𑀁.

𑀲𑀸𑀥𑀸𑀭𑀡𑀸𑀢𑀺 𑀪𑀺𑀓𑁆𑀔𑀼𑀦𑀻𑀳𑀺 𑀲𑀸𑀥𑀸𑀭𑀡𑀸. 𑀏𑀢𑁆𑀣𑀸𑀢𑀺 ‘‘𑀉𑀤𑁆𑀤𑀺𑀝𑁆𑀞𑀸 𑀔𑁄 𑀅𑀬𑁆𑀬𑀸𑀬𑁄’’𑀢𑀺𑀆𑀤𑀺𑀯𑀘𑀦𑁂.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂 𑀧𑀸𑀭𑀸𑀚𑀺𑀓𑀓𑀡𑁆𑀟𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑁨. 𑀲𑀗𑁆𑀖𑀸𑀤𑀺𑀲𑁂𑀲𑀓𑀡𑁆𑀟𑀁

𑁧. 𑀧𑀞𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤-𑀅𑀢𑁆𑀣𑀬𑁄𑀚𑀦𑀸

𑀧𑀸𑀭𑀸𑀚𑀺𑀓𑀸𑀦𑀦𑁆𑀢𑀭𑀲𑁆𑀲𑀸𑀢𑀺 𑀧𑀸𑀭𑀸𑀚𑀺𑀓𑀸𑀦𑀁 𑀅𑀦𑀦𑁆𑀢𑀭𑁂 𑀞𑀧𑀺𑀢𑀲𑁆𑀲, 𑀲𑀗𑁆𑀕𑀻𑀢𑀲𑁆𑀲 𑀯𑀸, 𑀲𑀗𑁆𑀖𑀸𑀤𑀺𑀲𑁂𑀲𑀓𑀡𑁆𑀟𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑀁 𑀈𑀤𑀺𑀲𑀸 𑀅𑀦𑀼𑀢𑁆𑀢𑀸𑀦𑀢𑁆𑀣𑀯𑀡𑁆𑀡𑀦𑀸 𑀅𑀦𑀼𑀢𑁆𑀢𑀸𑀦𑀸𑀦𑀁 𑀧𑀤𑀸𑀦𑀁 𑀅𑀢𑁆𑀣𑀲𑁆𑀲 𑀯𑀡𑁆𑀡𑀦𑀸 𑀤𑀸𑀦𑀺 𑀇𑀫𑀲𑁆𑀫𑀺𑀁𑀓𑀸𑀮𑁂 𑀪𑀯𑀺𑀲𑁆𑀲𑀢𑀻𑀢𑀺 𑀬𑁄𑀚𑀦𑀸.

𑁬𑁭𑁮. 𑀧𑀞𑀫𑁂 𑀉𑀤𑀓𑀁 𑀯𑀲𑀺𑀢𑀁 𑀅𑀘𑁆𑀙𑀸𑀤𑀦𑀁 𑀅𑀦𑁂𑀦 𑀓𑀢𑀦𑁆𑀢𑀺 𑀉𑀤𑁄𑀲𑀺𑀢𑁄𑀢𑀺 𑀯𑀘𑀦𑀢𑁆𑀣𑁂𑀦 𑀪𑀡𑁆𑀟𑀲𑀸𑀮𑀸 𑀉𑀤𑁄𑀲𑀺𑀢𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀤𑁄𑀲𑀺𑀢𑀦𑁆𑀢𑀺 𑀪𑀡𑁆𑀟𑀲𑀸𑀮𑀸’’𑀢𑀺. 𑀏𑀢𑁆𑀣 𑀳𑀺 𑀉𑀤𑀲𑀤𑁆𑀤𑁄 𑀉𑀤𑀓𑀧𑀭𑀺𑀬𑀸𑀬𑁄. 𑀲𑀁𑀬𑁄𑀕𑁄 𑀦 𑀬𑀼𑀢𑁆𑀢𑁄𑀬𑁂𑀯. 𑀪𑀡𑁆𑀟𑀲𑀸𑀮𑀸𑀢𑀺 𑀬𑀸𑀦𑀸𑀤𑀻𑀦𑀁 𑀪𑀡𑁆𑀟𑀸𑀦𑀁 𑀞𑀧𑀦𑀲𑀸𑀮𑀸. 𑀅𑀘𑁆𑀘𑀸𑀯𑀤𑀣𑀸𑀢𑀺 𑀏𑀢𑁆𑀣 𑀅𑀢𑀻𑀢𑁆𑀬𑀽𑀧𑀲𑀕𑁆𑀕𑁄 𑀅𑀢𑀺𑀓𑁆𑀓𑀫𑀦𑀢𑁆𑀣𑁄, 𑀆𑀢𑁆𑀬𑀽𑀧𑀲𑀕𑁆𑀕𑁄 𑀥𑀸𑀢𑁆𑀯𑀢𑁆𑀣𑀸𑀦𑀼𑀯𑀢𑁆𑀢𑀓𑁄𑀢𑀺 𑀆𑀳 ‘‘𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀤𑀣𑀸’’𑀢𑀺.

𑁬𑁭𑁯. 𑀉𑀲𑁆𑀲𑀬𑀯𑀲𑁂𑀦 𑀯𑀤𑀦𑀁 𑀉𑀲𑁆𑀲𑀬𑀯𑀸𑀤𑁄, 𑀲𑁄𑀬𑁂𑀯 𑀉𑀲𑁆𑀲𑀬𑀯𑀸𑀤𑀺𑀓𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀲𑁆𑀲𑀬𑀯𑀸𑀤𑀺𑀓𑀸’’𑀢𑀺𑀆𑀤𑀺. ‘‘𑀫𑀸𑀦𑀼𑀲𑁆𑀲𑀬𑀯𑀲𑁂𑀦 𑀓𑁄𑀥𑀼𑀲𑁆𑀲𑀬𑀯𑀲𑁂𑀦𑀸’’𑀢𑀺 𑀇𑀫𑀺𑀦𑀸 𑀉𑀲𑁆𑀲𑀬𑀪𑁂𑀤𑀁 𑀤𑀲𑁆𑀲𑁂𑀢𑀺. 𑀲𑀸𑀢𑀺 𑀉𑀲𑁆𑀲𑀬𑀯𑀸𑀤𑀺𑀓𑀸. 𑀅𑀢𑁆𑀣𑀢𑁄𑀢𑀺 𑀲𑀭𑀽𑀧𑀢𑁄. 𑀏𑀢𑁆𑀣𑀸𑀢𑀺 𑀧𑀤𑀪𑀸𑀚𑀦𑁂. 𑀅𑀟𑁆𑀟𑀦𑀁 𑀅𑀪𑀺𑀬𑀼𑀜𑁆𑀚𑀦𑀁 𑀅𑀟𑁆𑀟𑁄𑀢𑀺 𑀓𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀚𑀦𑀸𑀦𑀁 𑀅𑀟𑁆𑀟𑁄 𑀯𑁄𑀳𑀸𑀭𑀺𑀓𑀸𑀦𑀁 𑀯𑀺𑀦𑀺𑀘𑁆𑀙𑀬𑀓𑀸𑀭𑀡𑀁 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀟𑁆𑀟𑁄𑀢𑀺 𑀯𑁄𑀳𑀸𑀭𑀺𑀓𑀯𑀺𑀦𑀺𑀘𑁆𑀙𑀬𑁄 𑀯𑀼𑀘𑁆𑀘𑀢𑀻’’𑀢𑀺, 𑀫𑀼𑀤𑁆𑀥𑀚𑀢𑀢𑀺𑀬𑀓𑁆𑀔𑀭𑁄𑀬𑁂𑀯. 𑀬𑀦𑁆𑀢𑀺 𑀅𑀟𑁆𑀟𑀁. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀁𑀘𑀺 𑀞𑀸𑀦𑁂. 𑀤𑁆𑀯𑀺𑀦𑁆𑀦𑀁 𑀅𑀟𑁆𑀟𑀓𑀸𑀭𑀓𑀸𑀦𑀁 𑀯𑁄𑀳𑀸𑀭𑀁 𑀚𑀸𑀦𑀦𑁆𑀢𑀻𑀢𑀺 𑀯𑁄𑀳𑀸𑀭𑀺𑀓𑀸, 𑀅𑀓𑁆𑀔𑀤𑀲𑁆𑀲𑀸, 𑀢𑁂𑀲𑀁. 𑀤𑁆𑀯𑀻𑀲𑀼 𑀚𑀦𑁂𑀲𑀽𑀢𑀺 𑀅𑀟𑁆𑀟𑀓𑀸𑀭𑀓𑁂𑀲𑀼 𑀚𑀦𑁂𑀲𑀼 𑀤𑁆𑀯𑀻𑀲𑀼. 𑀬𑁄 𑀓𑁄𑀘𑀻𑀢𑀺 𑀅𑀟𑁆𑀟𑀓𑀸𑀭𑀓𑁄 𑀯𑀸 𑀅𑀜𑁆𑀜𑁄 𑀯𑀸 𑀬𑁄 𑀓𑁄𑀘𑀺.

𑀏𑀢𑁆𑀣𑀸𑀢𑀺 ‘‘𑀏𑀓𑀲𑁆𑀲 𑀆𑀭𑁄𑀘𑁂𑀢𑀻’’𑀢𑀺𑀆𑀤𑀺𑀯𑀘𑀦𑁂. 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 𑀬𑀁𑀓𑀺𑀜𑁆𑀘𑀺 𑀞𑀸𑀦𑀁 𑀆𑀕𑀢𑁂𑀧𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀣𑀸𑀢𑀺 𑀧𑀘𑁆𑀙𑀸. 𑀲𑀸𑀢𑀺 𑀪𑀺𑀓𑁆𑀔𑀼𑀦𑀻. 𑀲𑁄𑀢𑀺 𑀉𑀧𑀸𑀲𑀓𑁄.

‘‘𑀓𑀧𑁆𑀧𑀺𑀬𑀓𑀸𑀭𑀓𑁂𑀦𑀸’’𑀢𑀺𑀧𑀤𑀁 ‘‘𑀓𑀣𑀸𑀧𑁂𑀢𑀻’’𑀢𑀺𑀧𑀤𑁂 𑀓𑀸𑀭𑀺𑀢𑀓𑀫𑁆𑀫𑀁. 𑀢𑀢𑁆𑀣𑀸𑀢𑀺 𑀓𑀧𑁆𑀧𑀺𑀬𑀓𑀸𑀭𑀓𑀇𑀢𑀭𑁂𑀲𑀼. 𑀯𑁄𑀳𑀸𑀭𑀺𑀓𑁂𑀳𑀺 𑀓𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀢𑀺𑀕𑀢𑀦𑁆𑀢𑀺 𑀘𑀺𑀭𑀓𑀸𑀮𑀧𑀢𑁆𑀢𑀁. 𑀲𑀼𑀢𑀧𑀼𑀩𑁆𑀩𑀦𑁆𑀢𑀺 𑀧𑀼𑀩𑁆𑀩𑁂 𑀲𑀼𑀢𑀁. 𑀅𑀣𑀸𑀢𑀺 𑀲𑀼𑀢𑀧𑀼𑀩𑁆𑀩𑀢𑁆𑀢𑀸 𑀏𑀯. 𑀢𑁂𑀢𑀺 𑀯𑁄𑀳𑀸𑀭𑀺𑀓𑀸, 𑀤𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀞𑀫𑀦𑁆𑀢𑀺 𑀲𑀫𑀦𑀼𑀪𑀸𑀲𑀦𑀢𑁄 𑀧𑀼𑀩𑁆𑀩𑀁. 𑀆𑀧𑀢𑁆𑀢𑀻𑀢𑀺 𑀆𑀧𑀚𑁆𑀚𑀦𑀁. 𑀏𑀢𑀲𑁆𑀲𑀸𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀅𑀬𑀁 𑀳𑀻𑀢𑀺 𑀅𑀬𑀁 𑀏𑀯, 𑀯𑀓𑁆𑀔𑀫𑀸𑀦𑁄 𑀏𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀸𑀢𑀺 𑀧𑀤𑀪𑀸𑀚𑀦𑁂. 𑀲𑀳 𑀯𑀢𑁆𑀣𑀼𑀚𑁆𑀛𑀸𑀘𑀸𑀭𑀸𑀢𑀺 𑀯𑀢𑁆𑀣𑀼𑀚𑁆𑀛𑀸𑀘𑀸𑀭𑁂𑀦 𑀲𑀳, 𑀯𑀸𑀓𑁆𑀬𑀫𑁂𑀯, 𑀦 𑀲𑀫𑀸𑀲𑁄. 𑀯𑀢𑁆𑀣𑀼𑀚𑁆𑀛𑀸𑀘𑀸𑀭𑀸𑀢𑀺 𑀓𑀭𑀡𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀳 𑀯𑀢𑁆𑀣𑀼𑀚𑁆𑀛𑀸𑀘𑀸𑀭𑁂𑀦𑀸’’𑀢𑀺. 𑀪𑀺𑀓𑁆𑀔𑀼𑀦𑀺𑀦𑁆𑀢𑀺 𑀆𑀧𑀢𑁆𑀢𑀺𑀫𑀸𑀧𑀦𑁆𑀦𑀁 𑀪𑀺𑀓𑁆𑀔𑀼𑀦𑀺𑀁. 𑀲𑀗𑁆𑀖𑀢𑁄𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀫𑁆𑀳𑀸. 𑀅𑀦𑀻𑀬𑀲𑀤𑁆𑀤𑁄 𑀳𑁂𑀢𑀼𑀓𑀢𑁆𑀢𑀸𑀪𑀺𑀥𑀸𑀬𑀓𑁄𑀢𑀺 𑀆𑀳 ‘‘𑀦𑀺𑀲𑁆𑀲𑀸𑀭𑁂𑀢𑀻𑀢𑀺 𑀦𑀺𑀲𑁆𑀲𑀸𑀭𑀡𑀻𑀬𑁄’’𑀢𑀺. 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀢𑁄 𑀦𑀺𑀲𑁆𑀲𑀭𑀢𑀺, 𑀦𑀺𑀲𑁆𑀲𑀸𑀭𑀺𑀬𑀢𑀺 𑀯𑀸 𑀅𑀦𑁂𑀦𑀸𑀢𑀺 𑀦𑀺𑀲𑁆𑀲𑀸𑀭𑀡𑀻𑀬𑁄𑀢𑀺 𑀓𑀭𑀡𑀢𑁆𑀣𑁄𑀧𑀺 𑀬𑀼𑀢𑁆𑀢𑁄𑀬𑁂𑀯. 𑀢𑀢𑁆𑀣𑀸𑀢𑀺 𑀧𑀤𑀪𑀸𑀚𑀦𑁂. 𑀬𑀦𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀁. 𑀲𑁄𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀧𑀤𑀪𑀸𑀚𑀦𑀲𑁆𑀲 𑀅𑀢𑁆𑀣𑁄 𑀓𑀸𑀭𑀡𑁄𑀧𑀘𑀸𑀭𑁂𑀦 𑀤𑀝𑁆𑀞𑀩𑁆𑀩𑁄. 𑀳𑀻𑀢𑀺 𑀲𑀘𑁆𑀘𑀁. 𑀓𑁂𑀦𑀘𑀻𑀢𑀺 𑀧𑀼𑀕𑁆𑀕𑀮𑁂𑀦, 𑀦 𑀦𑀺𑀲𑁆𑀲𑀸𑀭𑀻𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦 𑀥𑀫𑁆𑀫𑁂𑀦 𑀓𑀭𑀡𑀪𑀽𑀢𑁂𑀦, 𑀳𑁂𑀢𑀼𑀪𑀽𑀢𑁂𑀦 𑀯𑀸. 𑀲𑁄𑀢𑀺 𑀥𑀫𑁆𑀫𑁄.

𑀅𑀟𑁆𑀟𑀓𑀸𑀭𑀓𑀫𑀦𑀼𑀲𑁆𑀲𑁂𑀳𑀺 𑀯𑀼𑀘𑁆𑀘𑀫𑀸𑀦𑀸𑀢𑀺 𑀬𑁄𑀚𑀦𑀸. 𑀲𑀬𑀦𑁆𑀢𑀺 𑀲𑀸𑀫𑀁. 𑀢𑀢𑁄𑀢𑀺 𑀕𑀫𑀦𑀢𑁄, 𑀧𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀓𑀢𑀁 𑀆𑀭𑁄𑀘𑁂𑀢𑀽𑀢𑀺 𑀬𑁄𑀚𑀦𑀸.

𑀥𑀫𑁆𑀫𑀺𑀓𑀦𑁆𑀢𑀺 𑀥𑀫𑁆𑀫𑁂𑀦 𑀲𑀪𑀸𑀯𑁂𑀦 𑀬𑀼𑀢𑁆𑀢𑀁. 𑀬𑀣𑀸𑀢𑀺 𑀬𑁂𑀦𑀸𑀓𑀸𑀭𑁂𑀦. 𑀢𑀦𑁆𑀢𑀺 𑀆𑀓𑀸𑀭𑀁. 𑀢𑀢𑁆𑀣𑀸𑀢𑀺 ‘‘𑀅𑀦𑁄𑀤𑀺𑀲𑁆𑀲 𑀆𑀘𑀺𑀓𑁆𑀔𑀢𑀻’’𑀢𑀺 𑀯𑀘𑀦𑁂.

𑀥𑀼𑀢𑁆𑀢𑀸𑀤𑀬𑁄𑀢𑀺 𑀆𑀤𑀺𑀲𑀤𑁆𑀤𑁂𑀦 𑀘𑁄𑀭𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀸𑀢𑀺 𑀆𑀘𑀺𑀓𑁆𑀔𑀦𑀸. 𑀢𑀦𑁆𑀢𑀺 𑀆𑀘𑀺𑀓𑁆𑀔𑀦𑀁. 𑀢𑁂𑀲𑀦𑁆𑀢𑀺 𑀕𑀸𑀫𑀤𑀸𑀭𑀓𑀸𑀤𑀻𑀦𑀁. 𑀤𑀡𑁆𑀟𑀦𑁆𑀢𑀺 𑀥𑀦𑀤𑀡𑁆𑀟𑀁. 𑀕𑀻𑀯𑀸 𑀳𑁄𑀢𑀻𑀢𑀺 𑀇𑀡𑀁 𑀳𑁄𑀢𑀺. 𑀅𑀥𑀺𑀧𑁆𑀧𑀸𑀬𑁂 𑀲𑀢𑀺𑀧𑀻𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸𑀢𑀺 𑀅𑀦𑀸𑀘𑀸𑀭𑀁 𑀘𑀭𑀦𑁆𑀢𑀲𑁆𑀲.

𑀓𑁂𑀯𑀮𑀁 𑀳𑀻𑀢𑀺 𑀓𑁂𑀯𑀮𑀫𑁂𑀯. 𑀢𑀦𑁆𑀢𑀺 𑀭𑀓𑁆𑀔𑀁. 𑀓𑀸𑀭𑀓𑁂𑀢𑀺 𑀅𑀦𑀸𑀘𑀸𑀭𑀲𑁆𑀲 𑀓𑀸𑀭𑀓𑁂. 𑀢𑁂𑀲+?𑀦𑁆𑀢𑀺 𑀓𑀸𑀭𑀓𑀸𑀦𑀁.

𑀢𑁂𑀲𑀦𑁆𑀢𑀺 𑀳𑀭𑀦𑁆𑀢𑀸𑀦𑀁. ‘‘𑀅𑀦𑀢𑁆𑀣𑀓𑀸𑀫𑀢𑀸𑀬𑀸’’𑀢𑀺 𑀇𑀫𑀺𑀦𑀸 𑀪𑀬𑀸𑀤𑀺𑀦𑀸 𑀯𑀼𑀢𑁆𑀢𑁂 𑀦𑀢𑁆𑀣𑀺 𑀤𑁄𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀳𑀻𑀢𑀺 𑀮𑀤𑁆𑀥𑀤𑁄𑀲𑀚𑁄𑀢𑀓𑁄. 𑀅𑀢𑁆𑀢𑀦𑁄 𑀯𑀘𑀦𑀓𑀭𑀁…𑀧𑁂… 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀢𑀦𑁄 𑀯𑀘𑀦𑀁 𑀆𑀤𑀺𑀬𑀺𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑁂 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀤𑀡𑁆𑀟𑁂 𑀕𑀳𑀺𑀢𑁂𑀧𑀺 𑀦𑀢𑁆𑀣𑀺 𑀤𑁄𑀲𑁄 𑀤𑀡𑁆𑀟𑀕𑀳𑀡𑀲𑁆𑀲 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸. 𑀤𑀸𑀲𑀤𑀸𑀲𑀻𑀯𑀸𑀧𑀺𑀆𑀤𑀻𑀦𑀦𑁆𑀢𑀺 𑀆𑀤𑀺𑀲𑀤𑁆𑀤𑁂𑀦 𑀔𑁂𑀢𑁆𑀢𑀸𑀤𑀬𑁄 𑀲𑀗𑁆𑀕𑀬𑁆𑀳𑀦𑁆𑀢𑀺.

𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀅𑀢𑀻𑀢𑀁 𑀆𑀭𑀩𑁆𑀪 𑀆𑀘𑀺𑀓𑁆𑀔𑀦𑁂 𑀯𑀼𑀢𑁆𑀢𑀦𑀬𑁂𑀦 𑀏𑀯. ‘‘𑀆𑀬𑀢𑀺𑀁 𑀅𑀓𑀭𑀡𑀢𑁆𑀣𑀸𑀬𑀸’’𑀢𑀺 𑀇𑀫𑀺𑀦𑀸 𑀅𑀦𑀸𑀕𑀢𑀁 𑀆𑀭𑀩𑁆𑀪 𑀑𑀤𑀺𑀲𑁆𑀲 𑀆𑀘𑀺𑀓𑁆𑀔𑀦𑀁 𑀤𑀲𑁆𑀲𑁂𑀢𑀺. ‘‘𑀓𑁂𑀦 𑀏𑀯𑀁 𑀓𑀢’’𑀦𑁆𑀢𑀺 𑀧𑀼𑀘𑁆𑀙𑀸𑀬 𑀅𑀢𑀻𑀢𑁂 𑀓𑀢𑀧𑀼𑀩𑁆𑀩𑀁 𑀧𑀼𑀘𑁆𑀙𑀢𑀺. 𑀲𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 𑀯𑀼𑀢𑁆𑀢𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸.

𑀯𑁄𑀳𑀸𑀭𑀺𑀓𑀸 𑀤𑀡𑁆𑀟𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀡𑁆𑀟𑁂𑀦𑁆𑀢𑀻𑀢𑀺 𑀯𑀥𑀤𑀡𑁆𑀟𑁂𑀦 𑀘 𑀥𑀦𑀤𑀡𑁆𑀟𑁂𑀦 𑀘 𑀆𑀡𑀁 𑀓𑀭𑁄𑀦𑁆𑀢𑀺.

𑀬𑁄 𑀘𑀸𑀬𑀦𑁆𑀢𑀺 𑀬𑁄 𑀘 𑀅𑀬𑀁. 𑀪𑀺𑀓𑁆𑀔𑀼𑀦𑀻𑀦𑀁 𑀬𑁄 𑀅𑀬𑀁 𑀦𑀬𑁄 𑀯𑀼𑀢𑁆𑀢𑁄, 𑀏𑀲𑁂𑀯 𑀦𑀬𑁄 𑀪𑀺𑀓𑁆𑀔𑀽𑀦𑀫𑁆𑀧𑀺 𑀦𑀬𑁄𑀢𑀺 𑀬𑁄𑀚𑀦𑀸. ‘‘𑀏𑀲𑁂𑀯 𑀦𑀬𑁄’’𑀢𑀺 𑀯𑀼𑀢𑁆𑀢𑀯𑀘𑀦𑀫𑁂𑀯 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀪𑀺𑀓𑁆𑀔𑀼𑀦𑁄𑀧𑀺 𑀳𑀻’’𑀢𑀺𑀆𑀤𑀺. ‘‘𑀢𑀣𑀸’’𑀢𑀺𑀇𑀫𑀺𑀦𑀸 ‘‘𑀑𑀤𑀺𑀲𑁆𑀲𑀸’’𑀢𑀺𑀧𑀤𑀁 𑀅𑀢𑀺𑀤𑀺𑀲𑀢𑀺. 𑀢𑁂 𑀘𑀸𑀢𑀺 𑀢𑁂 𑀘 𑀯𑁄𑀳𑀸𑀭𑀺𑀓𑀸. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸𑀢𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁

𑁬𑁮𑁨. 𑀤𑀼𑀢𑀺𑀬𑁂 𑀯𑀭𑀺𑀢𑀩𑁆𑀩𑀁 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀯𑀭𑀁, 𑀢𑀫𑁂𑀯 𑀪𑀡𑁆𑀟𑀦𑁆𑀢𑀺 𑀯𑀭𑀪𑀡𑁆𑀟𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀳𑀕𑁆𑀖𑀪𑀡𑁆𑀟’’𑀦𑁆𑀢𑀺. ‘‘𑀫𑀼𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀢𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺.

𑁬𑁮𑁩. 𑀆𑀧𑀼𑀩𑁆𑀩𑁄 𑀮𑁄𑀓𑀲𑀤𑁆𑀤𑁄 𑀅𑀪𑀺𑀫𑀼𑀔𑀁 𑀮𑁄𑀓𑀦𑀢𑁆𑀣𑁄 𑀳𑁄𑀢𑀺, 𑀉𑀧𑀼𑀩𑁆𑀩𑁄 𑀉𑀤𑁆𑀥𑀁 𑀮𑁄𑀓𑀦𑀢𑁆𑀣𑁄, 𑀑𑀧𑀼𑀩𑁆𑀩𑁄 𑀅𑀥𑁄 𑀮𑁄𑀓𑀦𑀢𑁆𑀣𑁄, 𑀯𑀺𑀧𑀼𑀩𑁆𑀩𑁄 𑀇𑀢𑁄 𑀘𑀺𑀢𑁄 𑀘 𑀯𑀻𑀢𑀺𑀳𑀭𑀡𑀮𑁄𑀓𑀦𑀢𑁆𑀣𑁄, 𑀅𑀧𑀧𑀼𑀩𑁆𑀩𑁄 𑀆𑀧𑀼𑀘𑁆𑀙𑀦𑀢𑁆𑀣𑁄. 𑀇𑀥 𑀧𑀦 𑀅𑀧𑀧𑀼𑀩𑁆𑀩𑀢𑁆𑀢𑀸 𑀆𑀧𑀼𑀘𑁆𑀙𑀦𑀢𑁆𑀣𑁄𑀢𑀺 𑀆𑀳 ‘‘𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸’’𑀢𑀺. 𑀫𑀮𑁆𑀮𑀕𑀡 𑀪𑀝𑀺𑀧𑀼𑀢𑁆𑀢 𑀕𑀡𑀸𑀤𑀺𑀓𑀦𑁆𑀢𑀺𑀆𑀤𑀻𑀲𑀼 𑀫𑀮𑁆𑀮𑀕𑀡𑁄 𑀦𑀸𑀫 𑀦𑀸𑀭𑀸𑀬𑀦𑀪𑀢𑁆𑀢𑀺𑀓𑁄 𑀕𑀡𑁄. 𑀪𑀝𑀺𑀧𑀼𑀢𑁆𑀢𑀕𑀡𑁄 𑀦𑀸𑀫 𑀓𑀼𑀫𑀸𑀭𑀪𑀢𑁆𑀢𑀺𑀓𑁄 𑀕𑀡𑁄. 𑀆𑀤𑀺𑀲𑀤𑁆𑀤𑁂𑀦 𑀅𑀜𑁆𑀜𑀫𑁆𑀧𑀺 𑀕𑀸𑀫𑀦𑀺𑀕𑀫𑁂 𑀅𑀦𑀼𑀲𑀸𑀲𑀺𑀢𑀼𑀁 𑀲𑀫𑀢𑁆𑀣𑀁 𑀕𑀡𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀣 𑀯𑀸 𑀫𑀮𑁆𑀮𑀕𑀡𑁄𑀢𑀺 𑀫𑀮𑁆𑀮𑀭𑀸𑀚𑀽𑀦𑀁 𑀕𑀡𑁄. 𑀢𑁂 𑀳𑀺 𑀕𑀡𑀁 𑀓𑀢𑁆𑀯𑀸 𑀓𑀼𑀲𑀺𑀦𑀸𑀭𑀸𑀬𑀁 𑀭𑀚𑁆𑀚𑀁 𑀅𑀦𑀼𑀲𑀸𑀲𑀦𑁆𑀢𑀺, 𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀫𑀮𑁆𑀮𑀕𑀡𑁄’’𑀢𑀺. 𑀪𑀝𑀺𑀧𑀼𑀢𑁆𑀢𑀕𑀡𑁄𑀢𑀺 𑀮𑀺𑀘𑁆𑀙𑀯𑀺𑀕𑀡𑁄 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀯𑀼𑀢𑁆𑀢𑁄. 𑀮𑀺𑀘𑁆𑀙𑀯𑀺𑀭𑀸𑀚𑀽𑀦𑀜𑁆𑀳𑀺 𑀧𑀼𑀩𑁆𑀩𑀭𑀸𑀚𑀸𑀦𑁄 𑀪𑀝𑀺𑀦𑀸𑀫𑀓𑀲𑁆𑀲 𑀚𑀝𑀺𑀮𑀲𑁆𑀲 𑀧𑀼𑀢𑁆𑀢𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀯𑀁𑀲𑁂 𑀧𑀯𑀢𑁆𑀢𑀸 𑀏𑀢𑀭𑀳𑀺 𑀮𑀺𑀘𑁆𑀙𑀯𑀺𑀭𑀸𑀚𑀸𑀦𑁄𑀧𑀺 𑀪𑀝𑀺𑀧𑀼𑀢𑁆𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀚𑀝𑀺𑀮𑁄 𑀧𑀦 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀧𑀼𑀢𑁆𑀢𑁂 𑀦𑀤𑀺𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦𑁂 𑀦𑀤𑀺𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀲𑁆𑀲𑀫𑁂 𑀧𑀼𑀢𑁆𑀢𑀁 𑀓𑀢𑁆𑀯𑀸 𑀪𑀭𑀡𑀢𑁆𑀢𑀸 𑀧𑁄𑀲𑀦𑀢𑁆𑀢𑀸 𑀪𑀝𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀧𑀼𑀢𑁆𑀢𑀢𑁆𑀢𑀸 𑀮𑀺𑀘𑁆𑀙𑀯𑀺𑀕𑀡𑁄 𑀪𑀝𑀺𑀧𑀼𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀧𑀺 𑀕𑀡𑀁 𑀓𑀢𑁆𑀯𑀸 𑀯𑁂𑀲𑀸𑀮𑀺𑀬𑀁 𑀭𑀚𑁆𑀚𑀁 𑀅𑀦𑀼𑀲𑀸𑀲𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀪𑀝𑀺𑀧𑀼𑀢𑁆𑀢𑀕𑀡𑁄’’𑀢𑀺. 𑀥𑀫𑁆𑀫𑀕𑀡𑁄 𑀦𑀸𑀫 𑀲𑀸𑀲𑀦𑀥𑀫𑁆𑀫𑀪𑀢𑁆𑀢𑀺𑀓𑁄 𑀕𑀡𑁄. 𑀕𑀦𑁆𑀥𑀺𑀓𑀲𑁂𑀡𑀻𑀢𑀺 𑀕𑀦𑁆𑀥𑀓𑀸𑀭𑀸𑀦𑀁 𑀲𑀫𑀚𑀸𑀢𑀺𑀓𑀸𑀦𑀁 𑀲𑀺𑀧𑁆𑀧𑀺𑀓𑀸𑀦𑀁 𑀕𑀡𑁄. 𑀤𑀼𑀲𑁆𑀲𑀺𑀓𑀲𑁂𑀡𑀻𑀢𑀺 𑀤𑀼𑀲𑁆𑀲𑀓𑀸𑀭𑀸𑀦𑀁 𑀲𑀫𑀚𑀸𑀢𑀺𑀓𑀸𑀦𑀁 𑀧𑁂𑀲𑀓𑀸𑀭𑀸𑀦𑀁 𑀕𑀡𑁄. 𑀆𑀤𑀺𑀲𑀤𑁆𑀤𑁂𑀦 𑀢𑀘𑁆𑀙𑀓𑀲𑁂𑀡𑀺𑀭𑀚𑀓𑀲𑁂𑀡𑀺𑀆𑀤𑀬𑁄 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀬𑀢𑁆𑀣 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀞𑀸𑀦𑁂. 𑀳𑀻𑀢𑀺 𑀲𑀘𑁆𑀘𑀁. 𑀢𑁂 𑀏𑀯𑀸𑀢𑀺 𑀕𑀡𑀸𑀤𑀬𑁄 𑀏𑀯. 𑀧𑀼𑀦 𑀢𑁂𑀢𑀺 𑀕𑀡𑀸𑀤𑀬𑁄. 𑀇𑀤𑀦𑁆𑀢𑀺 ‘‘𑀕𑀡𑀁 𑀯𑀸’’𑀢𑀺𑀆𑀤𑀺𑀯𑀘𑀦𑀁. 𑀏𑀢𑁆𑀣𑀸𑀢𑀺 𑀭𑀸𑀚𑀸𑀤𑀻𑀲𑀼. 𑀲𑀗𑁆𑀖𑀸𑀧𑀼𑀘𑁆𑀙𑀦𑀫𑁂𑀯 𑀧𑀥𑀸𑀦𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀆𑀧𑀼𑀘𑁆𑀙𑀺𑀢𑀩𑁆𑀩𑁄𑀯𑀸’’𑀢𑀺. 𑀓𑀧𑁆𑀧𑀕𑀢𑀺𑀓𑀦𑁆𑀢𑀺 𑀓𑀧𑁆𑀧𑀁 𑀕𑀘𑁆𑀙𑀢𑀻𑀢𑀺 𑀓𑀧𑁆𑀧𑀕𑀢𑀸, 𑀲𑀸 𑀏𑀯 𑀓𑀧𑁆𑀧𑀕𑀢𑀺𑀓𑀸, 𑀢𑀁.

𑀓𑁂𑀦𑀘𑀺 𑀓𑀭𑀡𑀻𑀬𑁂𑀦 𑀔𑀡𑁆𑀟𑀲𑀻𑀫𑀁 𑀅𑀕𑀦𑁆𑀢𑁆𑀯𑀸 𑀓𑁂𑀦𑀘𑀺 𑀓𑀭𑀡𑀻𑀬𑁂𑀦 𑀪𑀺𑀓𑁆𑀔𑀼𑀦𑀻𑀲𑀼 𑀧𑀓𑁆𑀓𑀦𑁆𑀢𑀸𑀲𑀽𑀢𑀺 𑀬𑁄𑀚𑀦𑀸. 𑀦𑀺𑀲𑁆𑀲𑀺𑀢𑀓𑀧𑀭𑀺𑀲𑀸𑀬𑀸𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑀧𑀭𑀺𑀲𑀸𑀬. 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸𑀢𑀺 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺𑀬𑀸𑀢𑀺. 𑀤𑀼𑀢𑀺𑀬𑀁.

𑁩. 𑀢𑀢𑀺𑀬𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁

𑁬𑁯𑁨. 𑀢𑀢𑀺𑀬𑁂 𑀤𑀼𑀢𑀺𑀬𑁂𑀦 𑀧𑀸𑀤𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀁 𑀦𑀸𑀫 𑀖𑀭𑀽𑀧𑀘𑀸𑀭𑀢𑁄 𑀧𑀞𑀫𑀮𑁂𑀟𑁆𑀟𑀼𑀧𑀸𑀢𑁄. 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑀺 𑀘𑁂𑀢𑁆𑀣𑀸’’𑀢𑀺𑀆𑀤𑀺. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂. 𑀉𑀧𑀘𑀸𑀭𑁂 𑀯𑀸𑀢𑀺 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑁂 𑀯𑀸. 𑀢𑀢𑁄𑀢𑀺 𑀕𑀸𑀫𑀦𑁆𑀢𑀭𑀢𑁄, 𑀔𑀡𑁆𑀟𑀧𑀸𑀓𑀸𑀭𑁂𑀦 𑀯𑀸 𑀯𑀢𑀺𑀙𑀺𑀤𑁆𑀤𑁂𑀦 𑀯𑀸 𑀧𑀯𑀺𑀲𑀺𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀲𑀫𑁆𑀩𑀤𑁆𑀥𑀸 𑀯𑀢𑀺 𑀏𑀢𑁂𑀲𑀦𑁆𑀢𑀺 𑀲𑀫𑁆𑀩𑀤𑁆𑀥𑀯𑀢𑀺𑀓𑀸, 𑀤𑁆𑀯𑁂 𑀕𑀸𑀫𑀸. 𑀯𑀺𑀳𑀸𑀭𑀦𑁆𑀢𑀺 𑀪𑀺𑀓𑁆𑀔𑀼𑀦𑀺𑀯𑀺𑀳𑀸𑀭𑀁. 𑀢𑀢𑁄 𑀧𑀦 𑀕𑀸𑀫𑀢𑁄𑀢𑀺 𑀢𑀢𑁄 𑀇𑀢𑀭𑀕𑀸𑀫𑀢𑁄 𑀧𑀦, 𑀦𑀺𑀓𑁆𑀔𑀦𑁆𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀞𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀲𑁆𑀲𑀸𑀭𑀡𑀸 𑀯𑀸𑀢𑀺 𑀫𑀦𑀼𑀲𑁆𑀲𑀸𑀦𑀁 𑀉𑀲𑁆𑀲𑀸𑀭𑀡𑀸 𑀯𑀸.

𑀚𑀦𑀸𑀢𑀺 𑀕𑀸𑀫𑀪𑁄𑀚𑀓𑀸 𑀚𑀦𑀸. 𑀏𑀓𑀁 𑀕𑀸𑀫𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀇𑀘𑁆𑀙𑀺𑀢𑀁 𑀏𑀓𑀁 𑀕𑀸𑀫𑀁. 𑀢𑀢𑁄𑀢𑀺 𑀕𑀸𑀫𑀢𑁄. ‘‘𑀓𑀲𑁆𑀫𑀸’’𑀢𑀺 𑀇𑀫𑀸𑀬 𑀧𑀼𑀘𑁆𑀙𑀸𑀬 ‘‘𑀯𑀺𑀳𑀭𑀢𑁄 𑀏𑀓𑀁 𑀕𑀸𑀫𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀘𑀦𑀲𑁆𑀲 𑀓𑀸𑀭𑀡𑀁 𑀧𑀼𑀘𑁆𑀙𑀢𑀺. ‘‘𑀯𑀺𑀳𑀸𑀭𑀲𑁆𑀲 𑀘𑀢𑀼𑀕𑀸𑀫𑀲𑀸𑀥𑀸𑀭𑀡𑀢𑁆𑀢𑀸’’𑀢𑀺𑀇𑀫𑀺𑀦𑀸 𑀯𑀺𑀲𑀚𑁆𑀚𑀦𑁂𑀦 𑀢𑀁 𑀧𑀼𑀘𑁆𑀙𑀁 𑀯𑀺𑀲𑀚𑁆𑀚𑁂𑀢𑀺.

𑀬𑀢𑁆𑀣𑀸𑀢𑀺 𑀬𑀲𑁆𑀲𑀁 𑀦𑀤𑀺𑀬𑀁. 𑀉𑀢𑁆𑀢𑀭𑀦𑁆𑀢𑀺𑀬𑀸 𑀏𑀓𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀅𑀦𑁆𑀢𑀭𑀯𑀸𑀲𑀓𑁄 𑀢𑁂𑀫𑀺𑀬𑀢𑀺, 𑀲𑀸 𑀦𑀤𑀻 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀬𑀣𑀸 𑀦𑀺𑀯𑀲𑀺𑀬𑀫𑀸𑀦𑀸𑀬 𑀢𑀺𑀫𑀡𑁆𑀟𑀮𑀧𑀝𑀺𑀘𑁆𑀙𑀸𑀤𑀦𑀁 𑀳𑁄𑀢𑀺, 𑀏𑀯𑀁 𑀦𑀺𑀯𑀢𑁆𑀣𑀸𑀬𑀸𑀢𑀺 𑀬𑁄𑀚𑀦𑀸. 𑀪𑀺𑀓𑁆𑀔𑀼𑀦𑀺𑀬𑀸 𑀉𑀢𑁆𑀢𑀭𑀦𑁆𑀢𑀺𑀬𑀸 𑀅𑀦𑁆𑀢𑀭𑀯𑀸𑀲𑀓𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀁𑀘𑀺 𑀞𑀸𑀦𑁂. ‘‘𑀲𑁂𑀢𑀼𑀦𑀸 𑀕𑀘𑁆𑀙𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺𑀇𑀫𑀺𑀦𑀸 𑀧𑀤𑀲𑀸 𑀉𑀢𑁆𑀢𑀭𑀦𑁆𑀢𑀺𑀬𑀸 𑀏𑀯 𑀆𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀉𑀢𑁆𑀢𑀭𑀡𑀓𑀸𑀮𑁂𑀢𑀺 𑀦𑀤𑀺𑀢𑁄 𑀉𑀢𑁆𑀢𑀭𑀡𑀓𑀸𑀮𑁂. 𑀆𑀓𑀸𑀲𑀕𑀫𑀦𑀦𑁆𑀢𑀺 𑀇𑀤𑁆𑀥𑀺𑀬𑀸 𑀕𑀫𑀦𑀁. 𑀆𑀤𑀺𑀲𑀤𑁆𑀤𑁂𑀦 𑀳𑀢𑁆𑀣𑀺𑀧𑀺𑀝𑁆𑀞𑀺𑀆𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀓𑁆𑀓𑀫𑀦𑁆𑀢𑀺𑀬𑀸𑀢𑀺 𑀅𑀢𑀺𑀓𑁆𑀓𑀫𑀦𑁆𑀢𑀺𑀬𑀸. 𑀏𑀢𑁆𑀣𑀸𑀢𑀺 𑀤𑁆𑀯𑀻𑀲𑀼 𑀢𑀻𑀲𑀼 𑀪𑀺𑀓𑁆𑀔𑀼𑀦𑀻𑀲𑀼. 𑀑𑀭𑀺𑀫𑀢𑀻𑀭𑀫𑁂𑀯𑀸𑀢𑀺 𑀅𑀧𑀸𑀭𑀢𑀻𑀭𑀫𑁂𑀯. 𑀢𑀫𑁂𑀯 𑀢𑀻𑀭𑀦𑁆𑀢𑀺 𑀑𑀭𑀺𑀫𑀢𑀻𑀭𑀫𑁂𑀯. 𑀧𑀘𑁆𑀘𑀼𑀢𑁆𑀢𑀭𑀢𑀻𑀢𑀺 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀉𑀢𑁆𑀢𑀭𑀢𑀺.

𑀓𑀼𑀭𑀼𑀫𑀸𑀦𑀸 𑀪𑀺𑀓𑁆𑀔𑀼𑀦𑀻 𑀓𑀭𑁄𑀢𑀻𑀢𑀺 𑀬𑁄𑀚𑀦𑀸. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀅𑀚𑀸𑀦𑀦𑁆𑀢𑀺𑀬𑀸 𑀏𑀯 𑀘𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀅𑀦𑀸𑀤𑀭𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀅𑀣 𑀧𑀦𑀸𑀢𑀺 𑀅𑀣𑀲𑀤𑁆𑀤𑁄 𑀬𑀤𑀺𑀧𑀭𑀺𑀬𑀸𑀬𑁄, 𑀓𑀺𑀭𑀺𑀬𑀸𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑁄. 𑀅𑀣 𑀅𑀘𑁆𑀙𑀢𑀺, 𑀅𑀣 𑀦 𑀑𑀢𑀭𑀢𑀻𑀢𑀺 𑀅𑀢𑁆𑀣𑁄. 𑀅𑀘𑁆𑀙𑀢𑀻𑀢𑀺 𑀯𑀲𑀢𑀺. 𑀳𑀻𑀢𑀺 𑀲𑀘𑁆𑀘𑀁. 𑀇𑀥𑀸𑀢𑀺 ‘‘𑀏𑀓𑀸 𑀯𑀸 𑀭𑀢𑁆𑀢𑀺𑀁 𑀯𑀺𑀧𑁆𑀧𑀯𑀲𑁂𑀬𑁆𑀬𑀸’’𑀢𑀺𑀧𑀤𑁂.

𑀏𑀯𑀁 𑀯𑀼𑀢𑁆𑀢𑀮𑀓𑁆𑀔𑀡𑀫𑁂𑀯𑀸𑀢𑀺 𑀏𑀯𑀁 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀮𑀓𑁆𑀔𑀡𑀫𑁂𑀯. 𑀢𑀁 𑀧𑀦𑁂𑀢𑀦𑁆𑀢𑀺 𑀢𑀁 𑀧𑀦 𑀅𑀭𑀜𑁆𑀜𑀁. 𑀢𑁂𑀦𑁂𑀯𑀸𑀢𑀺 𑀆𑀧𑀦𑁆𑀦𑀳𑁂𑀢𑀼𑀦𑀸 𑀏𑀯. 𑀅𑀝𑁆𑀞𑀓𑀣𑀸𑀬𑀦𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁. 𑀪𑀺𑀓𑁆𑀔𑀼𑀦𑀻𑀲𑀼 𑀧𑀯𑀺𑀲𑀦𑁆𑀢𑀻𑀲𑀽𑀢𑀺 𑀲𑀫𑁆𑀩𑀦𑁆𑀥𑁄, 𑀦𑀺𑀤𑁆𑀥𑀸𑀭𑀡𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀏𑀢𑁆𑀣𑀸𑀢𑀺 𑀤𑀲𑁆𑀲𑀦𑀽𑀧𑀘𑀸𑀭𑀲𑀯𑀦𑀽𑀧𑀘𑀸𑀭𑁂𑀲𑀼. 𑀬𑀢𑁆𑀣 𑀑𑀓𑀸𑀲𑁂 𑀞𑀺𑀢𑀁 𑀤𑀼𑀢𑀺𑀬𑀺𑀓𑀸 𑀧𑀲𑁆𑀲𑀢𑀺, 𑀲𑁄 𑀑𑀓𑀸𑀲𑁄 𑀤𑀲𑁆𑀲𑀦𑀽𑀧𑀘𑀸𑀭𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀲𑀸𑀡𑀺𑀧𑀸𑀓𑀸𑀭𑀦𑁆𑀢𑀭𑀺𑀓𑀸𑀧𑀻𑀢𑀺 𑀲𑀸𑀡𑀺𑀧𑀸𑀓𑀸𑀭𑁂𑀦 𑀩𑁆𑀬𑀯𑀳𑀺𑀓𑀸𑀧𑀺. 𑀬𑀢𑁆𑀣 𑀑𑀓𑀸𑀲𑁂 𑀞𑀺𑀢𑀸…𑀧𑁂… 𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀲𑁄 𑀑𑀓𑀸𑀲𑁄 𑀲𑀯𑀦𑀽𑀧𑀘𑀸𑀭𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀫𑀕𑁆𑀕𑀫𑀽𑀴𑁆𑀳𑀲𑀤𑁆𑀤𑁂𑀦𑀸𑀢𑀺 𑀫𑀕𑁆𑀕𑁂 𑀫𑀽𑀴𑁆𑀳𑀸𑀦𑀁 𑀲𑀤𑁆𑀤𑁂𑀦. 𑀥𑀫𑁆𑀫𑀲𑁆𑀲𑀯𑀦𑀸𑀭𑁄𑀘𑀦𑀲𑀤𑁆𑀤𑁂𑀦𑀸𑀢𑀺 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀆𑀭𑁄𑀘𑀦𑀸𑀦𑀁 𑀲𑀤𑁆𑀤𑁂𑀦. 𑀫𑀕𑁆𑀕𑀫𑀽𑀴𑁆𑀳𑀲𑀤𑁆𑀤𑁂𑀦 𑀲𑀤𑁆𑀤𑀸𑀬𑀦𑁆𑀢𑀺𑀬𑀸 𑀲𑀤𑁆𑀤𑀁 𑀲𑀼𑀡𑀸𑀢𑀺 𑀯𑀺𑀬 𑀘 𑀥𑀫𑁆𑀫𑀲𑁆𑀲𑀯𑀦𑀸𑀭𑁄𑀘𑀦𑀲𑀤𑁆𑀤𑁂𑀦 𑀲𑀤𑁆𑀤𑀸𑀬𑀦𑁆𑀢𑀺𑀬𑀸 𑀲𑀤𑁆𑀤𑀁 𑀲𑀼𑀡𑀸𑀢𑀺 𑀯𑀺𑀬 𑀘 ‘‘𑀅𑀬𑁆𑀬𑁂’’𑀢𑀺 𑀲𑀤𑁆𑀤𑀸𑀬𑀦𑁆𑀢𑀺𑀬𑀸 𑀲𑀤𑁆𑀤𑀁 𑀲𑀼𑀡𑀸𑀢𑀻𑀢𑀺 𑀬𑁄𑀚𑀦𑀸. 𑀲𑀤𑁆𑀤𑀸𑀬𑀦𑁆𑀢𑀺𑀬𑀸𑀢𑀺 𑀲𑀤𑁆𑀤𑀁 𑀓𑀭𑁄𑀦𑁆𑀢𑀺𑀬𑀸. 𑀦𑀸𑀫𑀥𑀸𑀢𑀼 𑀳𑁂𑀲𑀸. 𑀏𑀯𑀭𑀽𑀧𑁂𑀢𑀺 ‘‘𑀫𑀕𑁆𑀕𑀫𑀽𑀴𑁆𑀳𑀲𑀤𑁆𑀤𑁂𑀦 𑀯𑀺𑀬𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂 𑀏𑀯𑀭𑀽𑀧𑁂.

𑀢𑀺𑀢𑁆𑀣𑀸𑀬𑀢𑀦𑀁 𑀲𑀗𑁆𑀓𑀦𑁆𑀢𑀸 𑀯𑀸𑀢𑀺 𑀢𑀺𑀢𑁆𑀣𑀻𑀦𑀁 𑀯𑀸𑀲𑀝𑁆𑀞𑀸𑀦𑀁 𑀲𑀗𑁆𑀓𑀦𑁆𑀢𑀸 𑀯𑀸. 𑀇𑀫𑀺𑀦𑀸 ‘‘𑀧𑀓𑁆𑀔𑀲𑀗𑁆𑀓𑀦𑁆𑀢𑀸’’𑀢𑀺 𑀏𑀢𑁆𑀣 𑀧𑀓𑁆𑀔𑀲𑀤𑁆𑀤𑀲𑁆𑀲 𑀧𑀝𑀺𑀧𑀓𑁆𑀔𑀯𑀸𑀘𑀓𑀢𑁆𑀢𑀸 𑀢𑁂𑀦 𑀲𑀸𑀲𑀦𑀧𑀝𑀺𑀧𑀓𑁆𑀔𑀸 𑀢𑀺𑀢𑁆𑀣𑀺𑀬𑀸 𑀏𑀯 𑀕𑀳𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀺𑀢𑁆𑀣𑀺𑀬𑀸 𑀳𑀺 𑀲𑀸𑀲𑀦𑀲𑁆𑀲 𑀧𑀝𑀺𑀧𑀓𑁆𑀔𑀸 𑀳𑁄𑀦𑁆𑀢𑀻𑀢𑀺. 𑀢𑀢𑀺𑀬𑀁.

𑁪. 𑀘𑀢𑀼𑀢𑁆𑀣𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁

𑁬𑁯𑁪. 𑀘𑀢𑀼𑀢𑁆𑀣𑁂 𑀧𑀸𑀤𑀲𑁆𑀲 𑀞𑀧𑀦𑀓𑀁 𑀧𑀻𑀞𑀁 𑀧𑀸𑀤𑀧𑀻𑀞𑀁. 𑀧𑀸𑀤𑀲𑁆𑀲 𑀞𑀧𑀦𑀓𑀸 𑀓𑀣𑀮𑀺𑀓𑀸 𑀧𑀸𑀤𑀓𑀣𑀮𑀺𑀓𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀸𑀤𑀧𑀻𑀞𑀁 𑀦𑀸𑀫𑀸’’𑀢𑀺𑀆𑀤𑀺. 𑀅𑀦𑀜𑁆𑀜𑀸𑀬𑀸𑀢𑀺 𑀏𑀢𑁆𑀣 𑀬𑀓𑀸𑀭𑁄 𑀢𑁆𑀯𑀸𑀧𑀘𑁆𑀘𑀬𑀲𑁆𑀲 𑀓𑀸𑀭𑀺𑀬𑁄𑀢𑀺 𑀆𑀳 ‘‘𑀅𑀚𑀸𑀦𑀺𑀢𑁆𑀯𑀸’’𑀢𑀺. 𑀦𑁂𑀢𑁆𑀣𑀸𑀭𑀯𑀢𑁆𑀢𑁂𑀢𑀺 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀢𑁄 𑀦𑀺𑀢𑁆𑀣𑀭𑀡𑀓𑀸𑀭𑀡𑁂 𑀯𑀢𑁆𑀢𑁂. ‘‘𑀯𑀢𑁆𑀢𑀫𑀸𑀦’’𑀦𑁆𑀢𑀺𑀇𑀫𑀺𑀦𑀸 ‘‘𑀯𑀢𑁆𑀢𑀦𑁆𑀢𑀺’’𑀦𑁆𑀢𑀺 𑀏𑀢𑁆𑀣 𑀅𑀦𑁆𑀢𑀧𑀘𑁆𑀘𑀬𑀁 𑀦𑀬𑁂𑀦 𑀤𑀲𑁆𑀲𑁂𑀢𑀻𑀢𑀺. 𑀘𑀢𑀼𑀢𑁆𑀣𑀁.

𑁫. 𑀧𑀜𑁆𑀘𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁

𑁭𑁦𑁧. 𑀧𑀜𑁆𑀘𑀫𑁂 ‘‘𑀏𑀓𑀢𑁄 𑀅𑀯𑀲𑁆𑀲𑀼𑀢𑁂’’𑀢𑀺 𑀏𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 ‘‘𑀏𑀓𑀢𑁄’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑁂𑀧𑀺 𑀪𑀺𑀓𑁆𑀔𑀼𑀦𑀺𑀬𑀸 𑀏𑀯 𑀕𑀳𑁂𑀢𑀩𑁆𑀩𑀪𑀸𑀯𑀜𑁆𑀘 𑀢𑁄𑀧𑀘𑁆𑀘𑀬𑀲𑁆𑀲 𑀙𑀝𑁆𑀞𑀼𑀢𑁆𑀣𑁂 𑀧𑀯𑀢𑁆𑀢𑀪𑀸𑀯𑀜𑁆𑀘 𑀅𑀯𑀲𑁆𑀲𑀼𑀪𑀧𑀤𑁂 𑀪𑀸𑀯𑀢𑁆𑀣𑀜𑁆𑀘 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀪𑀺𑀓𑁆𑀔𑀼𑀦𑀺𑀬𑀸 𑀅𑀯𑀲𑁆𑀲𑀼𑀢𑀪𑀸𑀯𑁄 𑀤𑀝𑁆𑀞𑀩𑁆𑀩𑁄’’𑀢𑀺. 𑀏𑀢𑀦𑁆𑀢𑀺 ‘‘𑀪𑀺𑀓𑁆𑀔𑀼𑀦𑀺𑀬𑀸 𑀅𑀯𑀲𑁆𑀲𑀼𑀢𑀪𑀸𑀯𑁄’’𑀢𑀺 𑀯𑀘𑀦𑀁. 𑀢𑀦𑁆𑀢𑀺 𑀅𑀯𑀘𑀦𑀁. 𑀧𑀸𑀴𑀺𑀬𑀸𑀢𑀺 𑀇𑀫𑀸𑀬 𑀲𑀺𑀓𑁆𑀔𑀸𑀧𑀤𑀧𑀸𑀴𑀺𑀬𑀸𑀢𑀺. 𑀧𑀜𑁆𑀘𑀫𑀁.

𑁬. 𑀙𑀝𑁆𑀞𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁

𑁭𑁦𑁫. 𑀙𑀝𑁆𑀞𑁂 𑀬𑀢𑁄 𑀢𑁆𑀯𑀦𑁆𑀢𑀺 𑀏𑀢𑁆𑀣 𑀓𑀸𑀭𑀡𑀢𑁆𑀣𑁂 𑀢𑁄𑀧𑀘𑁆𑀘𑀬𑁄𑀢𑀺 𑀆𑀳 ‘‘𑀬𑀲𑁆𑀫𑀸’’𑀢𑀺. 𑀓𑀲𑁆𑀲𑀸 𑀳𑁄𑀦𑁆𑀢𑀻𑀢𑀺 𑀉𑀬𑁆𑀬𑁄𑀚𑀺𑀓𑀸𑀉𑀬𑁆𑀬𑁄𑀚𑀺𑀢𑀸𑀲𑀼 𑀓𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀦 𑀤𑁂𑀢𑀻𑀢𑀺 𑀉𑀬𑁆𑀬𑁄𑀚𑀺𑀓𑀸 𑀉𑀬𑁆𑀬𑁄𑀚𑀺𑀢𑀸𑀬 𑀦 𑀤𑁂𑀢𑀺. 𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀉𑀬𑁆𑀬𑁄𑀚𑀺𑀢𑀸 𑀉𑀬𑁆𑀬𑁄𑀚𑀺𑀓𑀸𑀬 𑀳𑀢𑁆𑀣𑀢𑁄 𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀧𑀝𑀺𑀕𑁆𑀕𑀳𑁄 𑀢𑁂𑀦 𑀦 𑀯𑀺𑀚𑁆𑀚𑀢𑀻𑀢𑀺 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀉𑀬𑁆𑀬𑁄𑀚𑀺𑀓𑀸𑀬 𑀳𑀢𑁆𑀣𑀢𑁄 𑀉𑀬𑁆𑀬𑁄𑀚𑀺𑀢𑀸𑀬 𑀧𑀝𑀺𑀕𑁆𑀕𑀳𑁄 𑀦 𑀯𑀺𑀚𑁆𑀚𑀢𑀺. 𑀆𑀧𑀚𑁆𑀚𑀢𑀺 𑀕𑀭𑀼𑀓𑀁, 𑀦 𑀮𑀳𑀼𑀓𑀦𑁆𑀢𑀺 𑀏𑀯𑀁 𑀲𑀦𑁆𑀢𑁂𑀧𑀺 𑀉𑀬𑁆𑀬𑁄𑀚𑀺𑀓𑀸 𑀕𑀭𑀼𑀓𑀫𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀦 𑀮𑀳𑀼𑀓𑀁. 𑀢𑀜𑁆𑀘𑀸𑀢𑀺 𑀢𑀁 𑀆𑀧𑀚𑁆𑀚𑀦𑀜𑁆𑀘. 𑀧𑀭𑀺𑀪𑁄𑀕𑀧𑀘𑁆𑀘𑀬𑀸𑀢𑀺 𑀉𑀬𑁆𑀬𑁄𑀚𑀺𑀓𑀸𑀬 𑀧𑀭𑀺𑀪𑁄𑀕𑀲𑀗𑁆𑀔𑀸𑀢𑀸 𑀓𑀸𑀭𑀡𑀸𑀢𑀺 𑀅𑀬𑀁 𑀕𑀸𑀣𑀸𑀬𑀢𑁆𑀣𑁄.

𑀇𑀢𑀭𑀺𑀲𑁆𑀲𑀸 𑀧𑀦𑀸𑀢𑀺 𑀉𑀬𑁆𑀬𑁄𑀚𑀺𑀢𑀸𑀬 𑀧𑀦 𑀪𑀺𑀓𑁆𑀔𑀼𑀦𑀺𑀬𑀸. 𑀧𑀞𑀫𑀲𑀺𑀓𑁆𑀔𑀸𑀧𑀤𑁂𑀢𑀺 𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑁂. 𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀜𑁆𑀳𑀺 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀬𑀼𑀕𑀴𑀪𑀸𑀯𑁂𑀦 𑀲𑀤𑀺𑀲𑀢𑁆𑀢𑀸 𑀇𑀫𑀁 𑀉𑀧𑀸𑀤𑀸𑀬 𑀧𑀞𑀫𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀙𑀝𑁆𑀞𑀁.

𑁭. 𑀲𑀢𑁆𑀢𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁

𑁭𑁦𑁯. 𑀲𑀢𑁆𑀢𑀫𑁂 𑀬𑀸𑀯𑀢𑀢𑀺𑀬𑀓𑀧𑀤𑀢𑁆𑀣𑁄𑀢𑀺 ‘‘𑀬𑀸𑀯𑀢𑀢𑀺𑀬𑀓’’𑀦𑁆𑀢𑀺 𑀉𑀘𑁆𑀘𑀸𑀭𑀺𑀢𑀲𑁆𑀲 𑀧𑀤𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄𑀢𑀺. 𑀲𑀢𑁆𑀢𑀫𑀁.

𑁮. 𑀅𑀝𑁆𑀞𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁

𑁭𑁧𑁫. 𑀅𑀝𑁆𑀞𑀫𑁂 𑀓𑀺𑀲𑁆𑀫𑀺𑀁𑀘𑀺𑀤𑁂𑀯 𑀅𑀥𑀺𑀓𑀭𑀡𑁂𑀢𑀺 𑀦𑀺𑀤𑁆𑀥𑀸𑀭𑀡𑀻𑀬𑀲𑁆𑀲 𑀦𑀺𑀤𑁆𑀥𑀸𑀭𑀡𑀲𑀫𑀼𑀤𑀸𑀬𑁂𑀦 𑀅𑀯𑀺𑀦𑀸𑀪𑀸𑀯𑀢𑁄 𑀆𑀳 ‘‘𑀘𑀢𑀼𑀦𑁆𑀦’’𑀦𑁆𑀢𑀺. 𑀓𑀲𑁆𑀫𑀸 𑀧𑀦 𑀦𑀺𑀤𑁆𑀥𑀸𑀭𑀡𑀲𑀫𑀼𑀤𑀸𑀬𑀦𑀺𑀤𑁆𑀥𑀸𑀭𑀡𑀻𑀬𑀪𑀸𑀯𑁂𑀦 𑀯𑀼𑀢𑁆𑀢𑀁, 𑀦𑀦𑀼 𑀧𑀤𑀪𑀸𑀚𑀦𑁂 𑀘𑀢𑁆𑀢𑀸𑀭𑀺𑀧𑀺 𑀅𑀥𑀺𑀓𑀭𑀡𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀆𑀳 ‘‘𑀧𑀤𑀪𑀸𑀚𑀦𑁂 𑀧𑀦𑀸’’𑀢𑀺𑀆𑀤𑀻𑀢𑀺. 𑀅𑀝𑁆𑀞𑀫𑀁.

𑁯. 𑀦𑀯𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁

𑁭𑁨𑁩. 𑀦𑀯𑀫𑁂 𑀲𑀁𑀲𑀝𑁆𑀞𑀲𑀤𑁆𑀤𑁄 𑀫𑀺𑀲𑁆𑀲𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀫𑀺𑀲𑁆𑀲𑀻𑀪𑀽𑀢𑀸’’𑀢𑀺. ‘‘𑀅𑀦𑀦𑀼𑀮𑁄𑀫𑁂𑀦𑀸’’𑀢𑀺𑀇𑀫𑀺𑀦𑀸 ‘‘𑀅𑀦𑀦𑀼𑀮𑁄𑀫𑀺𑀓𑁂𑀦𑀸’’𑀢𑀺 𑀏𑀢𑁆𑀣 𑀇𑀓𑀲𑀤𑁆𑀤𑁄 𑀲𑁆𑀯𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀓𑁄𑀝𑁆𑀝𑀦𑀜𑁆𑀘 𑀧𑀘𑀦𑀜𑁆𑀘 𑀕𑀦𑁆𑀥𑀧𑀺𑀲𑀦𑀜𑁆𑀘 𑀫𑀸𑀮𑀸𑀕𑀦𑁆𑀣𑀦𑀜𑁆𑀘. 𑀆𑀤𑀺𑀲𑀤𑁆𑀤𑁂𑀦 𑀅𑀜𑁆𑀜𑁂𑀧𑀺 𑀅𑀦𑀦𑀼𑀮𑁄𑀫𑀺𑀓𑁂 𑀓𑀸𑀬𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀸𑀲𑀦𑀸𑀳𑀭𑀡𑀜𑁆𑀘 𑀧𑀝𑀺𑀲𑀸𑀲𑀦𑀳𑀭𑀡𑀜𑁆𑀘 𑀲𑀜𑁆𑀘𑀭𑀺𑀢𑁆𑀢𑀜𑁆𑀘. 𑀆𑀤𑀺𑀲𑀤𑁆𑀤𑁂𑀦 𑀅𑀜𑁆𑀜𑁂𑀧𑀺 𑀅𑀦𑀦𑀼𑀮𑁄𑀫𑀺𑀓𑁂 𑀯𑀸𑀘𑀲𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀢𑀸𑀲𑀦𑁆𑀢𑀺 𑀪𑀺𑀓𑁆𑀔𑀼𑀦𑀻𑀦𑀁. 𑀲𑀺𑀮𑁄𑀓𑁄𑀢𑀺 𑀬𑀲𑁄𑀢𑀺. 𑀦𑀯𑀫𑀁.

𑁧𑁦. 𑀤𑀲𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁

𑁭𑁨𑁭. 𑀤𑀲𑀫𑁂 𑀏𑀯𑀸𑀘𑀸𑀭𑀸𑀢𑀺 𑀏𑀢𑁆𑀣 𑀦𑀺𑀕𑁆𑀕𑀳𑀺𑀢𑀮𑁄𑀧𑀯𑀲𑁂𑀦 𑀲𑀦𑁆𑀥𑀻𑀢𑀺 𑀆𑀳 ‘‘𑀏𑀯𑀁𑀆𑀘𑀸𑀭𑀸’’𑀢𑀺. ‘‘𑀬𑀸𑀤𑀺𑀲𑁄’’𑀢𑀺𑀆𑀤𑀺𑀦𑀸 𑀏𑀯𑀁𑀲𑀤𑁆𑀤𑀲𑁆𑀲 𑀦𑀺𑀤𑀲𑁆𑀲𑀦𑀸𑀤𑀻𑀲𑀼 (𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀁 𑁧𑁧𑁮𑁬 𑀕𑀸𑀣𑀸𑀬𑀁) 𑀏𑀓𑀸𑀤𑀲𑀲𑀼 𑀅𑀢𑁆𑀣𑁂𑀲𑀼 𑀉𑀧𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 ‘‘𑀏𑀯𑀁𑀲𑀤𑁆𑀤𑀸 𑀏𑀯𑀁𑀲𑀺𑀮𑁄𑀓𑀸’’𑀢𑀺 𑀲𑀩𑁆𑀩𑁂𑀲𑀼 𑀧𑀤𑁂𑀲𑀼. 𑀉𑀜𑁆𑀜𑀸𑀬𑀸𑀢𑀺 𑀏𑀢𑁆𑀣 𑀑𑀓𑀸𑀭𑀯𑀺𑀧𑀭𑀻𑀢𑁄 𑀉𑀓𑀸𑀭𑁄𑀢𑀺 𑀆𑀳 ‘‘𑀅𑀯𑀜𑁆𑀜𑀸𑀬𑀸’’𑀢𑀺. ‘‘𑀦𑀻𑀘𑀁 𑀓𑀢𑁆𑀯𑀸 𑀚𑀸𑀦𑀦𑀸𑀬𑀸’’𑀢𑀺 𑀇𑀫𑀺𑀦𑀸 𑀅𑀯𑀲𑀤𑁆𑀤𑁄 𑀦𑀻𑀘𑀢𑁆𑀣𑁄, 𑀜𑀸𑀥𑀸𑀢𑀼 𑀅𑀯𑀩𑁄𑀥𑀦𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀧𑀭𑀺𑀪𑀯𑀜𑁆𑀜𑀸𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀉𑀢𑁆𑀢𑀭𑀧𑀤𑀮𑁄𑀧𑀯𑀲𑁂𑀦 ‘‘𑀧𑀭𑀺𑀪𑀯𑁂𑀦𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀧𑀭𑀺𑀪𑀯𑀺𑀢𑁆𑀯𑀸 𑀚𑀸𑀦𑀦𑁂𑀦𑀸’’𑀢𑀺. 𑀅𑀓𑁆𑀔𑀦𑁆𑀢𑀺𑀬𑀸𑀢𑀺 𑀏𑀢𑁆𑀣 𑀲𑀳𑀦𑀔𑀦𑁆𑀢𑀺𑀬𑁂𑀯𑀸𑀥𑀺𑀧𑁆𑀧𑁂𑀢𑀸, 𑀦𑁂𑀯 𑀅𑀦𑀼𑀮𑁄𑀫𑀔𑀦𑁆𑀢𑀺, 𑀦 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀲𑀳𑀦𑀢𑀸𑀬𑀸’’𑀢𑀺. 𑀯𑁂𑀪𑀲𑁆𑀲𑀺𑀬𑀸𑀢𑀺 𑀏𑀢𑁆𑀣 𑀯𑀺𑀲𑁂𑀲𑁂𑀦 𑀪𑀸𑀲𑁂𑀢𑀺 𑀑𑀪𑀸𑀲𑁂𑀢𑀻𑀢𑀺 𑀯𑀺𑀪𑀸𑀲𑁄 𑀆𑀦𑀼𑀪𑀸𑀯𑁄, 𑀯𑀺𑀪𑀸𑀲𑁄 𑀇𑀫𑀲𑁆𑀲 𑀲𑀗𑁆𑀖𑀲𑁆𑀲 𑀅𑀢𑁆𑀣𑀻𑀢𑀺 𑀯𑀺𑀪𑀲𑁆𑀲𑁄 𑀲𑀗𑁆𑀖𑁄, 𑀩𑀳𑁆𑀯𑀢𑁆𑀣𑁂 𑀘 𑀅𑀢𑀺𑀲𑀬𑀢𑁆𑀣𑁂 𑀘 𑀲𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀲𑁆𑀫𑀸? 𑀫𑀦𑁆𑀢𑀼𑀧𑀘𑁆𑀘𑀬𑀢𑁆𑀣𑀢𑁆𑀢𑀸 ‘‘𑀮𑁄𑀫𑀲𑁄’’𑀢𑀺𑀆𑀤𑀻𑀲𑀼 (𑀚𑀸. 𑁧.𑁧𑁪.𑁫𑁭) 𑀯𑀺𑀬, 𑀩𑀳𑀼𑀆𑀦𑀼𑀪𑀸𑀯𑁄 𑀅𑀢𑀺𑀲𑀬𑀆𑀦𑀼𑀪𑀸𑀯𑁄 𑀲𑀗𑁆𑀖𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀲𑀁𑀬𑁄𑀕𑀧𑀭𑀢𑁆𑀢𑀸 𑀆𑀓𑀸𑀭𑀲𑁆𑀲 𑀭𑀲𑁆𑀲𑁄. 𑀯𑀺𑀪𑀲𑁆𑀲𑀲𑁆𑀲 𑀪𑀸𑀯𑁄 𑀯𑁂𑀪𑀲𑁆𑀲𑀺𑀬𑀁, 𑀩𑀳𑀼𑀆𑀦𑀼𑀪𑀸𑀯𑁄 𑀅𑀢𑀺𑀲𑀬𑀆𑀦𑀼𑀪𑀸𑀯𑁄𑀬𑁂𑀯. 𑀇𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀩𑀮𑀯𑀪𑀲𑁆𑀲𑀪𑀸𑀯𑁂𑀦𑀸’’𑀢𑀺. 𑀢𑀢𑁆𑀣 𑀩𑀮𑀯𑀇𑀢𑀺 𑀧𑀤𑁂𑀦 𑀫𑀦𑁆𑀢𑀼𑀅𑀢𑁆𑀣𑁂 𑀧𑀯𑀢𑁆𑀢𑀲𑁆𑀲 𑀲𑀧𑁆𑀧𑀘𑁆𑀘𑀬𑀲𑁆𑀲 𑀩𑀳𑁆𑀯𑀢𑁆𑀣𑀜𑁆𑀘 𑀅𑀢𑀺𑀲𑀬𑀢𑁆𑀣𑀜𑁆𑀘 𑀤𑀲𑁆𑀲𑁂𑀢𑀺, 𑀪𑀸𑀯𑀇𑀢𑀺 𑀧𑀤𑁂𑀦 𑀡𑀺𑀬𑀧𑀘𑁆𑀘𑀬𑀲𑁆𑀲 𑀪𑀸𑀯𑀢𑁆𑀣𑀁, 𑀏𑀦𑀇𑀢𑀺 𑀧𑀤𑁂𑀦 𑀦𑀺𑀲𑁆𑀲𑀓𑁆𑀓𑀯𑀘𑀦𑀲𑁆𑀲 𑀓𑀭𑀡𑀢𑁆𑀣𑁂 𑀧𑀯𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀫𑁂𑀯𑀢𑁆𑀣𑀫𑀸𑀯𑀺𑀓𑀭𑁄𑀦𑁆𑀢𑁄 𑀆𑀳 ‘‘𑀅𑀢𑁆𑀢𑀦𑁄 𑀩𑀮𑀯𑀧𑁆𑀧𑀓𑀸𑀲𑀦𑁂𑀦𑀸’’𑀢𑀺. 𑀢𑀢𑁆𑀣 𑀅𑀢𑁆𑀢𑀦𑁄𑀢𑀺 𑀅𑀢𑁆𑀢𑀲𑀗𑁆𑀔𑀸𑀢𑀲𑁆𑀲 𑀲𑀗𑁆𑀖𑀲𑁆𑀲. 𑀩𑀮𑀯𑀧𑁆𑀧𑀓𑀸𑀲𑀦𑁂𑀦𑀸𑀢𑀺 𑀩𑀳𑀼𑀆𑀦𑀼𑀪𑀸𑀯𑀧𑁆𑀧𑀓𑀸𑀲𑀦𑁂𑀦, 𑀅𑀢𑀺𑀲𑀬𑀆𑀦𑀼𑀪𑀸𑀯𑀧𑁆𑀧𑀓𑀸𑀲𑀦𑁂𑀦 𑀯𑀸. 𑀩𑀮𑀯𑀧𑁆𑀧𑀓𑀸𑀲𑀦𑀁 𑀦𑀸𑀫 𑀅𑀢𑁆𑀣𑀢𑁄 𑀧𑀭𑁂𑀲𑀁 𑀲𑀫𑀼𑀢𑁆𑀭𑀸𑀲𑀦𑀫𑁂𑀯𑀸𑀢𑀺 𑀆𑀳 ‘‘𑀲𑀫𑀼𑀢𑁆𑀭𑀸𑀲𑀦𑁂𑀦𑀸𑀢𑀺 𑀅𑀢𑁆𑀣𑁄’’𑀢𑀺. 𑀤𑀼𑀩𑁆𑀩𑀮𑀪𑀸𑀯𑁂𑀦𑀸𑀢𑀺 𑀏𑀢𑁆𑀣 𑀪𑀸𑀯𑀇𑀢𑀺𑀧𑀤𑁂𑀦 𑀡𑁆𑀬𑀧𑀘𑁆𑀘𑀬𑀲𑁆𑀲 𑀪𑀸𑀯𑀢𑁆𑀣𑀁, 𑀏𑀦𑀇𑀢𑀺𑀧𑀤𑁂𑀦 𑀦𑀺𑀲𑁆𑀲𑀓𑁆𑀓𑀯𑀘𑀦𑀲𑁆𑀲 𑀓𑀭𑀡𑀢𑁆𑀣𑀁 𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀩𑁆𑀩𑀢𑁆𑀣𑀸𑀢𑀺 ‘‘𑀉𑀜𑁆𑀜𑀸𑀬𑀸’’𑀢𑀺𑀆𑀤𑀻𑀲𑀼 𑀲𑀩𑁆𑀩𑁂𑀲𑀼 𑀧𑀤𑁂𑀲𑀼. 𑀘𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀆𑀳 ‘‘𑀏𑀯𑀁 𑀲𑀫𑀼𑀘𑁆𑀘𑀬𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺. 𑀯𑀺𑀯𑀺𑀘𑁆𑀘𑀣𑀸𑀢𑀺 𑀏𑀢𑁆𑀣 𑀯𑀻𑀢𑁆𑀬𑀽𑀧𑀲𑀕𑁆𑀕𑁄 𑀯𑀺𑀦𑀸𑀲𑀤𑁆𑀤𑀢𑁆𑀣𑁄, 𑀯𑀺𑀘𑀥𑀸𑀢𑀼 𑀲𑀢𑁆𑀢𑀢𑁆𑀣𑁄𑀢𑀺 𑀆𑀳 ‘‘𑀯𑀺𑀦𑀸 𑀳𑁄𑀣𑀸’’𑀢𑀺. 𑀤𑀲𑀫𑀁.

𑀅𑀦𑀦𑁆𑀢𑀭𑀸 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀳𑀸𑀯𑀺𑀪𑀗𑁆𑀕𑀢𑁄 𑀆𑀳𑀭𑀺𑀢𑀸𑀦𑀺 𑀇𑀫𑀸𑀦𑀺 𑀢𑀻𑀡𑀺 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺 𑀬𑁄𑀚𑀦𑀸. 𑀦𑀯 𑀧𑀞𑀫𑀸𑀧𑀢𑁆𑀢𑀺𑀓𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑁂𑀧𑀺 𑀥𑀫𑁆𑀫𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀸𑀢𑀺 ‘‘𑀉𑀤𑁆𑀤𑀺𑀝𑁆𑀞𑀸 𑀔𑁄’’𑀢𑀺𑀆𑀤𑀺𑀧𑀸𑀞𑁂. 𑀢𑀁 𑀧𑀦𑀸𑀢𑀺 𑀧𑀓𑁆𑀔𑀫𑀸𑀦𑀢𑁆𑀢𑀁 𑀧𑀦𑀸𑀢𑀺.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂

𑀲𑀢𑁆𑀢𑀭𑀲𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑁩. 𑀦𑀺𑀲𑁆𑀲𑀕𑁆𑀕𑀺𑀬𑀓𑀡𑁆𑀟𑀁

𑁧. 𑀧𑀞𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤-𑀅𑀢𑁆𑀣𑀬𑁄𑀚𑀦𑀸

𑀢𑀺𑀁𑀲 𑀦𑀺𑀲𑁆𑀲𑀕𑁆𑀕𑀺𑀬𑀸 𑀬𑁂 𑀥𑀫𑁆𑀫𑀸 𑀪𑀺𑀓𑁆𑀔𑀼𑀦𑀻𑀦𑀁 𑀪𑀕𑀯𑀢𑀸 𑀧𑀓𑀸𑀲𑀺𑀢𑀸, 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀤𑀸𑀦𑀺 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀅𑀬𑀁 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄 𑀪𑀯𑀢𑀻𑀢𑀺 𑀬𑁄𑀚𑀦𑀸.

𑁭𑁩𑁩. 𑀧𑀞𑀫𑁂 𑀆𑀫𑀢𑁆𑀢𑀺𑀓𑀸𑀧𑀡𑀦𑁆𑀢𑀺 𑀏𑀢𑁆𑀣 𑀆𑀫𑀢𑁆𑀢𑀲𑀤𑁆𑀤𑁄 𑀪𑀸𑀚𑀦𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀪𑀸𑀚𑀦𑀸𑀦𑀻’’𑀢𑀺. 𑀪𑀸𑀚𑀦𑀸𑀦𑀺 𑀳𑀺 𑀅𑀫𑀦𑁆𑀢𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀪𑀸𑀯𑀁 𑀕𑀘𑁆𑀙𑀦𑁆𑀢𑀻𑀢𑀺 ‘‘𑀅𑀫𑀢𑁆𑀢𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀫𑀢𑁆𑀢𑀸𑀦𑀺 𑀯𑀺𑀓𑁆𑀓𑀺𑀡𑀦𑁆𑀢𑀻𑀢𑀺 ‘‘𑀆𑀫𑀢𑁆𑀢𑀺𑀓𑀸’’𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀸𑀦𑀻’’𑀢𑀺𑀆𑀤𑀺. 𑀢𑁂𑀲𑀦𑁆𑀢𑀺 𑀆𑀫𑀢𑁆𑀢𑀺𑀓𑀸𑀦𑀁. 𑀢𑀁 𑀯𑀸𑀢𑀺 𑀆𑀫𑀢𑁆𑀢𑀺𑀓𑀸𑀧𑀡𑀁 𑀯𑀸.

𑁭𑁩𑁪. ‘‘𑀲𑀦𑁆𑀦𑀺𑀥𑀺’’𑀦𑁆𑀢𑀺 𑀇𑀫𑀺𑀦𑀸 𑀲𑀁𑀦𑀺𑀧𑀼𑀩𑁆𑀩𑁄 𑀘𑀺𑀲𑀤𑁆𑀤𑁄 𑀉𑀘𑀺𑀦𑀦𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀳𑀺𑀲𑀤𑁆𑀤𑁄 𑀯𑀺𑀲𑁂𑀲𑀚𑁄𑀢𑀓𑁄. 𑀢𑀢𑁆𑀣𑀸𑀢𑀺 𑀫𑀳𑀸𑀯𑀺𑀪𑀗𑁆𑀕𑁂. 𑀇𑀥𑀸𑀢𑀺 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂.

𑀇𑀤𑀫𑁆𑀧𑀻𑀢𑀺 𑀇𑀤𑀁 𑀲𑀺𑀓𑁆𑀔𑀸𑀧𑀤𑀫𑁆𑀧𑀺. 𑀧𑀺𑀲𑀤𑁆𑀤𑁄 𑀫𑀳𑀸𑀯𑀺𑀪𑀗𑁆𑀕𑀲𑀺𑀓𑁆𑀔𑀸𑀧𑀤𑀁 𑀅𑀧𑁂𑀓𑁆𑀔𑀢𑀻𑀢𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀁

𑁭𑁩𑁮. 𑀤𑀼𑀢𑀺𑀬𑁂 𑀅𑀳𑀢𑀘𑁄𑀴𑀸𑀦𑀫𑁆𑀧𑀺 𑀲𑁂𑀤𑀫𑀮𑀸𑀤𑀺𑀓𑀺𑀮𑀺𑀦𑁆𑀦𑁂 𑀯𑀺𑀭𑀽𑀧𑀢𑁆𑀢𑀸 ‘‘𑀚𑀺𑀡𑁆𑀡𑀘𑁄𑀴𑀸’’𑀢𑀺 𑀯𑀼𑀢𑁆𑀢𑀁. ‘‘𑀅𑀧𑀺 𑀅𑀬𑁆𑀬𑀸𑀳𑀻’’𑀢𑀺𑀇𑀫𑀺𑀦𑀸 ‘‘𑀅𑀧 𑀅𑀬𑁆𑀬𑀸𑀳𑀻’’𑀢𑀺𑀧𑀤𑀯𑀺𑀪𑀸𑀕𑀁 𑀦𑀺𑀯𑀢𑁆𑀢𑁂𑀢𑀺.

𑁭𑁪𑁦. 𑀲𑀩𑁆𑀩𑀫𑁆𑀧𑀺 𑀏𑀢𑀁 𑀘𑀻𑀯𑀭𑀦𑁆𑀢𑀺 𑀬𑁄𑀚𑀦𑀸. 𑀏𑀯𑀁 𑀧𑀝𑀺𑀮𑀤𑁆𑀥𑀦𑁆𑀢𑀺 𑀏𑀯𑀁 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀮𑀤𑁆𑀥𑀁. 𑀬𑀣𑀸𑀤𑀸𑀦𑁂𑀬𑁂𑀯𑀸𑀢𑀺 𑀬𑀣𑀸 𑀤𑀸𑀬𑀓𑁂𑀳𑀺 𑀤𑀺𑀦𑁆𑀦𑀁, 𑀢𑀲𑁆𑀫𑀺𑀁 𑀤𑀸𑀦𑁂𑀬𑁂𑀯 𑀉𑀧𑀦𑁂𑀢𑀩𑁆𑀩𑀁, 𑀅𑀓𑀸𑀮𑀘𑀻𑀯𑀭𑁂𑀬𑁂𑀯 𑀧𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄𑀢𑀺. 𑀤𑀼𑀢𑀺𑀬𑀁.

𑁩. 𑀢𑀢𑀺𑀬𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀁

𑁭𑁪𑁩. 𑀢𑀢𑀺𑀬𑁂 𑀳𑀦𑁆𑀤𑀲𑀤𑁆𑀤𑁄 𑀯𑀯𑀲𑁆𑀲𑀕𑁆𑀕𑀢𑁆𑀣𑁂 𑀦𑀺𑀧𑀸𑀢𑁄𑀢𑀺 𑀆𑀳 ‘‘𑀳𑀦𑁆𑀤𑀸𑀢𑀺 𑀕𑀡𑁆𑀳𑀸’’𑀢𑀺. 𑀩𑀳𑀽𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀁𑀳𑀭𑀺𑀢𑁆𑀯𑀸𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀗𑁆𑀖𑀭𑀺𑀢𑁆𑀯𑀸𑀢𑀺. 𑀢𑀢𑀺𑀬𑀁.

𑁪. 𑀘𑀢𑀼𑀢𑁆𑀣𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀁

𑁭𑁪𑁮. 𑀘𑀢𑀼𑀢𑁆𑀣𑁂 𑀓𑀺𑀡𑀸𑀢𑀺 𑀅𑀦𑁂𑀦𑀸𑀢𑀺 𑀓𑀬𑀦𑁆𑀢𑀺 𑀯𑀘𑀦𑀢𑁆𑀣𑁂𑀦 𑀫𑀽𑀮𑀁 𑀓𑀬𑀁 𑀦𑀸𑀫𑀸𑀢𑀺 𑀆𑀳 ‘‘𑀫𑀽𑀮𑁂𑀦𑀸’’𑀢𑀺. 𑀲𑀸𑀢𑀺 𑀣𑀼𑀮𑁆𑀮𑀦𑀦𑁆𑀤𑀸, 𑀆𑀳 𑀓𑀺𑀭𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀜𑀸𑀥𑀸𑀢𑀼𑀬𑀸 𑀅𑀯𑀩𑁄𑀥𑀦𑀢𑁆𑀣𑀢𑁄 𑀅𑀜𑁆𑀜𑀫𑁆𑀧𑀺 𑀜𑀸𑀥𑀸𑀢𑀼𑀬𑀸 𑀬𑀸𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀸𑀘𑀺𑀢𑁆𑀯𑀸 𑀯𑀸’’𑀢𑀺.

𑁭𑁫𑁨. 𑀬𑀦𑁆𑀢𑀺 𑀲𑀩𑁆𑀩𑀺𑀢𑁂𑀮𑀸𑀤𑀺. 𑀢𑀜𑁆𑀜𑁂𑀯𑀸𑀢𑀺 𑀲𑀩𑁆𑀩𑀺𑀢𑁂𑀮𑀸𑀤𑀺𑀫𑁂𑀯. 𑀬𑀫𑀓𑀦𑁆𑀢𑀺 𑀲𑀩𑁆𑀩𑀺𑀁 𑀲𑀳 𑀢𑁂𑀮𑁂𑀦 𑀬𑀼𑀕𑀴𑀁 𑀓𑀢𑁆𑀯𑀸. 𑀯𑁂𑀚𑁆𑀚𑁂𑀦𑀸𑀢𑀺 𑀪𑀺𑀲𑀓𑁆𑀓𑁂𑀦. 𑀲𑁄 𑀳𑀺 𑀆𑀬𑀼𑀩𑁆𑀩𑁂𑀤𑀲𑀗𑁆𑀔𑀸𑀢𑀁 𑀯𑀺𑀚𑁆𑀚𑀁 𑀚𑀸𑀦𑀸𑀢𑀻𑀢𑀺 𑀯𑁂𑀚𑁆𑀚𑁄𑀢𑀺 𑀘 𑀭𑁄𑀕𑀜𑁆𑀘 𑀢𑀲𑁆𑀲 𑀦𑀺𑀤𑀸𑀦𑀜𑁆𑀘 𑀪𑁂𑀲𑀚𑁆𑀚𑀜𑁆𑀘 𑀯𑀺𑀤𑀢𑀺 𑀚𑀸𑀦𑀸𑀢𑀻𑀢𑀺𑀧𑀺 𑀯𑁂𑀚𑁆𑀚𑁄𑀢𑀺 𑀘 𑀯𑀼𑀘𑁆𑀘𑀢𑀺. 𑀢𑀢𑁄𑀢𑀺 𑀯𑁂𑀚𑁆𑀚𑁂𑀦 𑀯𑀼𑀢𑁆𑀢𑀓𑀸𑀭𑀡𑀸. 𑀓𑀳𑀸𑀧𑀡𑀲𑁆𑀲𑀸𑀢𑀺 𑀓𑀳𑀸𑀧𑀡𑁂𑀦, 𑀆𑀪𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄𑀢𑀺. 𑀘𑀢𑀼𑀢𑁆𑀣𑀁.

𑁫. 𑀧𑀜𑁆𑀘𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀁

𑁭𑁫𑁩. 𑀧𑀜𑁆𑀘𑀫𑁂 𑀲𑀸𑀢𑀺 𑀲𑀺𑀓𑁆𑀔𑀫𑀸𑀦𑀸. 𑀅𑀬𑀦𑁆𑀢𑀺 𑀲𑀺𑀓𑁆𑀔𑀫𑀸𑀦𑀸. 𑀅𑀤𑁆𑀥𑀸𑀢𑀺 𑀏𑀓𑀁𑀲𑁂𑀦. ‘‘𑀘𑁂𑀢𑀸𑀧𑁂𑀢𑁆𑀯𑀸’’𑀢𑀺 𑀏𑀢𑁆𑀣 𑀘𑀺𑀢𑀺𑀲𑀤𑁆𑀤𑁄 𑀚𑀸𑀦𑀦𑀢𑁆𑀣𑁄𑀢𑀺 𑀆𑀳 ‘‘𑀚𑀸𑀦𑀸𑀧𑁂𑀢𑁆𑀯𑀸’’𑀢𑀺. 𑀧𑀜𑁆𑀘𑀫𑀁.

𑁬. 𑀙𑀝𑁆𑀞𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀁

𑁭𑁫𑁮. 𑀙𑀝𑁆𑀞𑁂 𑀙𑀦𑁆𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀕𑀳𑀺𑀢𑀁 𑀙𑀦𑁆𑀤𑀓𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀙𑀦𑁆𑀤𑀓’’𑀦𑁆𑀢𑀺𑀆𑀤𑀺. 𑀥𑀫𑁆𑀫𑀓𑀺𑀘𑁆𑀘𑀦𑁆𑀢𑀺 𑀧𑀼𑀜𑁆𑀜𑀓𑀭𑀡𑀻𑀬𑀁. 𑀥𑀫𑁆𑀫𑀲𑀤𑁆𑀤𑁄 𑀳𑁂𑀢𑁆𑀣 𑀧𑀼𑀜𑁆𑀜𑀯𑀸𑀘𑀓𑁄. 𑀬𑀦𑁆𑀢𑀺 𑀯𑀢𑁆𑀣𑀼𑀁. 𑀧𑀭𑁂𑀲𑀦𑁆𑀢𑀺 𑀅𑀢𑁆𑀢𑀦𑀸 𑀅𑀜𑁆𑀜𑁂𑀲𑀁. ‘‘𑀏𑀢’’𑀦𑁆𑀢𑀺 ‘‘𑀙𑀦𑁆𑀤𑀓’’𑀦𑁆𑀢𑀺 𑀏𑀢𑀁 𑀦𑀸𑀫𑀁. ‘‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀤𑀺𑀦𑁆𑀦𑁂𑀦𑀸’’𑀢𑀺𑀇𑀫𑀺𑀦𑀸 𑀅𑀜𑁆𑀜𑀲𑁆𑀲 𑀅𑀢𑁆𑀣𑁄 𑀅𑀜𑁆𑀜𑀤𑀢𑁆𑀣𑁄, 𑀤𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀢𑀤𑀢𑁆𑀣𑀸𑀬 𑀤𑀺𑀦𑁆𑀦𑁄 𑀅𑀜𑁆𑀜𑀤𑀢𑁆𑀣𑀺𑀓𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀅𑀜𑁆𑀜𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑀺𑀦𑁆𑀦𑁂𑀦𑀸’’𑀢𑀺𑀇𑀫𑀺𑀦𑀸 𑀅𑀜𑁆𑀜𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑀺𑀦𑁆𑀦𑀁 𑀅𑀜𑁆𑀜𑀼𑀤𑁆𑀤𑀺𑀲𑀺𑀓𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀲𑀗𑁆𑀖𑀲𑁆𑀲 𑀧𑀭𑀺𑀘𑁆𑀘𑀢𑁆𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀲𑀗𑁆𑀖𑀲𑁆𑀲 𑀧𑀭𑀺𑀘𑁆𑀘𑀢𑁆𑀢𑁄 𑀲𑀗𑁆𑀖𑀺𑀓𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺.

𑁭𑁬𑁨. 𑀬𑀤𑀢𑁆𑀣𑀸𑀬𑀸𑀢𑀺 𑀬𑁂𑀲𑀁 𑀘𑀻𑀯𑀭𑀸𑀤𑀻𑀦𑀁 𑀅𑀢𑁆𑀣𑀸𑀬. 𑀬𑀲𑀤𑁆𑀤𑁂𑀦 𑀲𑀫𑀸𑀲𑀪𑀸𑀯𑀢𑁄 𑀧𑀼𑀩𑁆𑀩𑁂 𑀦𑀺𑀕𑁆𑀕𑀳𑀺𑀢𑀸𑀕𑀫𑁄 𑀳𑁄𑀢𑀺. 𑀢𑀦𑁆𑀢𑀺 𑀘𑀻𑀯𑀭𑀸𑀤𑀺𑀓𑀁. 𑀢𑀼𑀫𑁆𑀳𑁂𑀳𑀻𑀢𑀺 𑀤𑀸𑀬𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀉𑀧𑀤𑁆𑀤𑀯𑁂𑀲𑀽𑀢𑀺 𑀤𑀼𑀩𑁆𑀪𑀺𑀓𑁆𑀔𑀸𑀤𑀺𑀉𑀧𑀲𑀕𑁆𑀕𑁂𑀲𑀼. 𑀬𑀁 𑀯𑀸 𑀢𑀁 𑀯𑀸𑀢𑀺 𑀘𑀻𑀯𑀭𑀁 𑀯𑀸 𑀅𑀜𑁆𑀜𑁂 𑀯𑀸 𑀧𑀺𑀡𑁆𑀟𑀧𑀸𑀢𑀸𑀤𑀺𑀓𑁂𑀢𑀺 𑀬𑀁 𑀯𑀸 𑀢𑀁 𑀯𑀸𑀢𑀺. 𑀙𑀝𑁆𑀞𑀁.

𑁭. 𑀲𑀢𑁆𑀢𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀁

𑁭𑁬𑁪. 𑀲𑀢𑁆𑀢𑀫𑁂 𑀲𑀜𑁆𑀜𑀸𑀘𑀺𑀓𑁂𑀦𑀸𑀢𑀺 𑀏𑀢𑁆𑀣 𑀲𑀁𑀲𑀤𑁆𑀤𑀲𑁆𑀲 𑀲𑀬𑀫𑀢𑁆𑀣𑁂 𑀧𑀯𑀢𑁆𑀢𑀺𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀬𑀁 𑀬𑀸𑀘𑀺𑀢𑀓𑁂𑀦𑀸’’𑀢𑀺. 𑀏𑀢𑀤𑁂𑀯𑀸𑀢𑀺 ‘‘𑀲𑀜𑁆𑀜𑀸𑀘𑀺𑀓𑁂𑀦𑀸’’𑀢𑀺 𑀧𑀤𑀫𑁂𑀯. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂𑀢𑀺. 𑀲𑀢𑁆𑀢𑀫𑀁.

𑁮. 𑀅𑀝𑁆𑀞𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀁

𑁭𑁬𑁯. 𑀅𑀝𑁆𑀞𑀫𑁂 𑀕𑀡𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑀺𑀕𑀡𑀲𑁆𑀲. 𑀇𑀫𑀺𑀦𑀸 ‘‘𑀫𑀳𑀸𑀚𑀦𑀺𑀓𑁂𑀦𑀸’’𑀢𑀺 𑀏𑀢𑁆𑀣 𑀪𑀺𑀓𑁆𑀔𑀼𑀦𑀺𑀕𑀡𑁄𑀯 𑀫𑀳𑀸𑀚𑀦𑁄𑀢𑀺 𑀅𑀥𑀺𑀧𑁆𑀧𑁂𑀢𑁄𑀢𑀺 𑀤𑀻𑀧𑁂𑀢𑀻𑀢𑀺. 𑀅𑀝𑁆𑀞𑀫𑀁.

𑁯. 𑀦𑀯𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀁

𑁭𑁭𑁪. 𑀦𑀯𑀫𑁂 𑀇𑀢𑁄𑀢𑀺 𑀇𑀫𑀲𑁆𑀫𑀸 𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀢𑁄. 𑀅𑀥𑀺𑀓𑀢𑀭𑀦𑁆𑀢𑀺 𑀅𑀢𑀺𑀭𑁂𑀓𑀢𑀭𑀦𑁆𑀢𑀺. 𑀦𑀯𑀫𑀁.

𑁧𑁦. 𑀤𑀲𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀁

𑁭𑁭𑁮. 𑀤𑀲𑀫𑁂 ‘‘𑀯𑀺𑀦𑀲𑁆𑀲𑀢𑀻’’𑀢𑀺𑀇𑀫𑀺𑀦𑀸 ‘‘𑀉𑀦𑁆𑀤𑁆𑀭𑀺𑀬𑀢𑀻’’𑀢𑀺 𑀏𑀢𑁆𑀣 𑀉𑀤𑀺𑀥𑀸𑀢𑀼𑀬𑀸 𑀦𑀲𑁆𑀲𑀦𑀢𑁆𑀣𑀁 𑀤𑀲𑁆𑀲𑁂𑀢𑀺 𑀥𑀸𑀢𑀽𑀦𑀫𑀦𑁂𑀓𑀢𑁆𑀣𑀢𑁆𑀢𑀸. 𑀧𑀭𑀺𑀧𑀢𑀢𑀻𑀢𑀺 𑀧𑀭𑀺𑀕𑀮𑀺𑀢𑁆𑀯𑀸 𑀧𑀢𑀢𑀺. 𑀇𑀫𑀺𑀦𑀸 𑀦𑀲𑁆𑀲𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀏𑀢𑁆𑀢𑀓𑀫𑁂𑀯𑀸𑀢𑀺 𑀏𑀢𑀁 𑀧𑀭𑀺𑀫𑀸𑀡𑀁 𑀤𑁆𑀯𑀺𑀧𑀤𑀫𑁂𑀯𑀸𑀢𑀺. 𑀤𑀲𑀫𑀁.

𑁧𑁧. 𑀏𑀓𑀸𑀤𑀲𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀁

𑁭𑁮𑁪. 𑀏𑀓𑀸𑀤𑀲𑀫𑁂 𑀕𑀭𑀼𑀧𑀸𑀯𑀼𑀭𑀡𑀁 𑀦𑀸𑀫 𑀲𑀻𑀢𑀓𑀸𑀮𑁂 𑀧𑀸𑀯𑀼𑀭𑀡𑀯𑀢𑁆𑀣𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀻𑀢𑀓𑀸𑀮𑁂 𑀧𑀸𑀯𑀼𑀭𑀡’’𑀦𑁆𑀢𑀺. 𑀲𑀻𑀢𑀓𑀸𑀮𑁂 𑀳𑀺 𑀫𑀦𑀼𑀲𑁆𑀲𑀸 𑀣𑀽𑀮𑀧𑀸𑀯𑀼𑀭𑀡𑀁 𑀧𑀸𑀭𑀼𑀧𑀦𑁆𑀢𑀺. ‘‘𑀘𑀢𑀼𑀓𑁆𑀓𑀁𑀲𑀧𑀭𑀫’’𑀦𑁆𑀢𑀺 𑀏𑀢𑁆𑀣 𑀓𑀁𑀲𑀲𑀤𑁆𑀤𑁄 𑀪𑀼𑀜𑁆𑀚𑀦𑀧𑀢𑁆𑀢𑁂 𑀘 𑀲𑀼𑀯𑀡𑁆𑀡𑀸𑀤𑀺𑀮𑁄𑀳𑀯𑀺𑀲𑁂𑀲𑁂 𑀘 𑀘𑀢𑀼𑀓𑀳𑀸𑀧𑀡𑁂 𑀘𑀸𑀢𑀺 𑀢𑀻𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺, 𑀇𑀥 𑀧𑀦 𑀘𑀢𑀼𑀓𑀳𑀸𑀧𑀡𑁂 𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀁𑀲𑁄 𑀦𑀸𑀫 𑀘𑀢𑀼𑀓𑁆𑀓𑀳𑀸𑀧𑀡𑀺𑀓𑁄 𑀳𑁄𑀢𑀻’’𑀢𑀺. 𑀘𑀢𑀼𑀓𑁆𑀓𑀁𑀲𑀲𑀗𑁆𑀔𑀸𑀢𑀁 𑀧𑀭𑀫𑀁 𑀇𑀫𑀲𑁆𑀲𑀸𑀢𑀺 𑀘𑀢𑀼𑀓𑁆𑀓𑀁𑀲𑀧𑀭𑀫𑀁, 𑀲𑁄𑀴𑀲𑀓𑀳𑀸𑀧𑀡𑀕𑁆𑀖𑀦𑀓𑀁 𑀧𑀸𑀯𑀼𑀭𑀡𑀦𑁆𑀢𑀺 𑀅𑀢𑁆𑀣𑁄𑀢𑀺. 𑀏𑀓𑀸𑀤𑀲𑀫𑀁.

𑁧𑁨. 𑀤𑁆𑀯𑀸𑀤𑀲𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀁

𑁭𑁮𑁯. 𑀤𑁆𑀯𑀸𑀤𑀲𑀫𑁂 𑀮𑀳𑀼𑀧𑀸𑀯𑀼𑀭𑀡𑀁 𑀦𑀸𑀫 𑀉𑀡𑁆𑀳𑀓𑀸𑀮𑁂 𑀧𑀸𑀯𑀼𑀭𑀡𑀯𑀢𑁆𑀣𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀡𑁆𑀳𑀓𑀸𑀮𑁂 𑀧𑀸𑀯𑀼𑀭𑀡’’𑀦𑁆𑀢𑀺. 𑀉𑀡𑁆𑀳𑀓𑀸𑀮𑁂 𑀳𑀺 𑀫𑀦𑀼𑀲𑁆𑀲𑀸 𑀲𑀼𑀔𑀼𑀫𑀧𑀸𑀯𑀼𑀭𑀡𑀁 𑀧𑀸𑀭𑀼𑀧𑀦𑁆𑀢𑀻𑀢𑀺. 𑀤𑁆𑀯𑀸𑀤𑀲𑀫𑀁.

𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀁 𑀢𑀺𑀁𑀲𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀳𑀸𑀯𑀺𑀪𑀗𑁆𑀕𑁂’’𑀢𑀺𑀆𑀤𑀺. 𑀘𑀻𑀯𑀭𑀯𑀕𑁆𑀕𑀢𑁄 𑀅𑀧𑀦𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑀤𑀢𑁆𑀣𑀺𑀓𑀸𑀦𑀻𑀢𑀺 𑀅𑀜𑁆𑀜𑀤𑀢𑁆𑀣𑀺𑀓𑀧𑀤𑁂𑀦 𑀯𑀼𑀢𑁆𑀢𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺. 𑀇𑀢𑀻𑀢𑀺 𑀏𑀯𑀁. 𑀏𑀓𑀢𑁄𑀧𑀜𑁆𑀜𑀢𑁆𑀢𑀸𑀦𑀻𑀢𑀺 𑀏𑀓𑀲𑁆𑀲𑁂𑀯 𑀧𑀜𑁆𑀜𑀢𑁆𑀢𑀸𑀦𑀺, 𑀉𑀪𑀢𑁄𑀧𑀜𑁆𑀜𑀢𑁆𑀢𑀸𑀦𑀻𑀢𑀺 𑀉𑀪𑀬𑁂𑀲𑀁 𑀧𑀜𑁆𑀜𑀢𑁆𑀢𑀸𑀦𑀺. 𑀏𑀢𑁆𑀣𑀸𑀢𑀺 ‘‘𑀉𑀤𑁆𑀤𑀺𑀝𑁆𑀞𑀸 𑀔𑁄’’𑀢𑀺𑀆𑀤𑀺𑀯𑀘𑀦𑁂𑀢𑀺.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂

𑀢𑀺𑀁𑀲𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑁪. 𑀧𑀸𑀘𑀺𑀢𑁆𑀢𑀺𑀬𑀓𑀡𑁆𑀟𑀁

𑁧. 𑀮𑀲𑀼𑀡𑀯𑀕𑁆𑀕𑁄

𑁧. 𑀧𑀞𑀫𑀲𑀺𑀓𑁆𑀔𑀸𑀧𑀤-𑀅𑀢𑁆𑀣𑀬𑁄𑀚𑀦𑀸

𑀢𑀺𑀁𑀲𑀓𑀸𑀦𑀦𑁆𑀢𑀭𑀁 𑀢𑀺𑀁𑀲𑀓𑀸𑀦𑀁 𑀅𑀦𑀦𑁆𑀢𑀭𑁂 𑀓𑀸𑀮𑁂 𑀙𑀲𑀝𑁆𑀞𑀺𑀲𑀢𑀲𑀗𑁆𑀕𑀳𑀸 𑀙𑀉𑀢𑁆𑀢𑀭𑀲𑀝𑁆𑀞𑀺𑀅𑀥𑀺𑀓𑀲𑀢𑁂𑀳𑀺 𑀲𑀺𑀓𑁆𑀔𑀸𑀧𑀤𑁂𑀳𑀺 𑀲𑀗𑁆𑀕𑀳𑀺𑀢𑀸 𑀬𑁂 𑀥𑀫𑁆𑀫𑀸 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀲𑀗𑁆𑀕𑀻𑀢𑀸, 𑀤𑀸𑀦𑀺 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀢𑁂𑀲𑀫𑁆𑀧𑀺 𑀥𑀫𑁆𑀫𑀸𑀦𑀁 𑀅𑀬𑀁 𑀯𑀡𑁆𑀡𑀦𑀸 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁭𑁯𑁩. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀙𑀲𑀝𑁆𑀞𑀺𑀲𑀢𑀲𑀗𑁆𑀕𑀳𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼, 𑀧𑀞𑀫𑀲𑀺𑀓𑁆𑀔𑀸𑀧𑀤𑁂𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀤𑁆𑀯𑁂 𑀢𑀬𑁄’’𑀢𑀺 𑀏𑀢𑁆𑀣 𑀯𑀸𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀆𑀳 ‘‘𑀤𑁆𑀯𑁂 𑀯𑀸 𑀢𑀬𑁄 𑀯𑀸’’𑀢𑀺. 𑀨𑁄𑀝𑀮𑀓𑁂𑀢𑀺 𑀓𑀦𑁆𑀤𑁂, 𑀫𑀺𑀜𑁆𑀚𑁂 𑀯𑀸. 𑀏𑀢𑀦𑁆𑀢𑀺 ‘‘𑀕𑀡𑁆𑀟𑀺𑀓𑁂’’𑀢𑀺 𑀏𑀢𑀁 𑀦𑀸𑀫𑀁. ‘‘𑀧𑀫𑀸𑀡’’𑀦𑁆𑀢𑀺𑀇𑀫𑀺𑀦𑀸 𑀫𑀢𑁆𑀢𑀲𑀤𑁆𑀤𑁄 𑀧𑀫𑀸𑀡𑀢𑁆𑀣𑁄𑀯, 𑀦 𑀅𑀧𑁆𑀧𑀢𑁆𑀣𑁄, 𑀦𑀸𑀧𑀺 𑀅𑀯𑀥𑀸𑀭𑀡𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀮𑀲𑀼𑀡𑀦𑁆𑀢𑀺 𑀲𑁂𑀢𑀯𑀡𑁆𑀡𑀫𑀽𑀮𑀁 𑀫𑀳𑀸𑀓𑀦𑁆𑀤𑀁. 𑀫𑀳𑀸𑀓𑀦𑁆𑀤𑁄 𑀳𑀺 𑀩𑁆𑀬𑀜𑁆𑀚𑀦𑀲𑀫𑁆𑀧𑀸𑀓𑀸𑀤𑀻𑀲𑀼 𑀆𑀫𑀕𑀦𑁆𑀥𑀸𑀦𑀁 𑀅𑀪𑀺𑀪𑀯𑀦𑀢𑁆𑀢𑀸 𑀮𑀲𑀻𑀬𑀢𑀺 𑀓𑀦𑁆𑀢𑀻𑀬𑀢𑀻𑀢𑀺 𑀮𑀲𑀼𑀡𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀲𑀼𑀯𑀡𑁆𑀡𑀳𑀁𑀲𑀬𑁄𑀦𑀺𑀦𑁆𑀢𑀺 𑀲𑀼𑀯𑀡𑁆𑀡𑀫𑀬𑁂𑀦 𑀧𑀢𑁆𑀢𑁂𑀦 𑀬𑀼𑀢𑁆𑀢𑀁 𑀳𑀁𑀲𑀬𑁄𑀦𑀺𑀁. 𑀚𑀸𑀢𑀺𑀲𑁆𑀲𑀭𑁄𑀢𑀺 𑀚𑀸𑀢𑀺𑀁 𑀪𑀯𑀁 𑀲𑀭𑀢𑀺 𑀚𑀸𑀦𑀸𑀢𑀻𑀢𑀺 𑀚𑀸𑀢𑀺𑀲𑁆𑀲𑀭𑁄. 𑀅𑀣𑀸𑀢𑀺 𑀚𑀸𑀢𑀺𑀲𑁆𑀲𑀭𑀲𑁆𑀲 𑀦𑀺𑀧𑁆𑀨𑀦𑁆𑀦𑀢𑁆𑀢𑀸. 𑀦𑀺𑀧𑁆𑀨𑀦𑁆𑀦𑀢𑁆𑀣𑁄 𑀳𑀺 𑀅𑀣𑀲𑀤𑁆𑀤𑁄. 𑀧𑀼𑀩𑁆𑀩𑀲𑀺𑀦𑁂𑀳𑁂𑀦𑀸𑀢𑀺 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀯𑁂 𑀪𑀸𑀯𑀺𑀢𑁂𑀦 𑀲𑀺𑀦𑁂𑀳𑁂𑀦. 𑀢𑀸𑀲𑀦𑁆𑀢𑀺 𑀧𑀚𑀸𑀧𑀢𑀺𑀬𑀸 𑀘 𑀢𑀺𑀲𑁆𑀲𑀦𑁆𑀦𑀁 𑀥𑀻𑀢𑀭𑀸𑀦𑀜𑁆𑀘. 𑀢𑀁 𑀧𑀦𑀸𑀢𑀺 𑀧𑀢𑁆𑀢𑀁 𑀧𑀦.

𑁭𑁯𑁫. 𑀫𑀕𑀥𑁂𑀲𑀽𑀢𑀺 𑀫𑀕𑀥𑀭𑀝𑁆𑀞𑁂 𑀞𑀺𑀢𑁂𑀲𑀼 𑀚𑀦𑀧𑀤𑁂𑀲𑀼. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀇𑀥𑀸𑀢𑀺 ‘‘𑀮𑀲𑀼𑀡𑀁 𑀔𑀸𑀤𑁂𑀬𑁆𑀬𑀸’’𑀢𑀺𑀧𑀤𑁂. 𑀢𑀫𑁆𑀧𑀻𑀢𑀺 𑀫𑀸𑀕𑀥𑀓𑀫𑁆𑀧𑀺. 𑀕𑀡𑁆𑀟𑀺𑀓𑀮𑀲𑀼𑀡𑀫𑁂𑀯𑀸𑀢𑀺 𑀕𑀡𑁆𑀟𑁄 𑀨𑁄𑀝𑁄 𑀏𑀢𑀲𑁆𑀲𑀢𑁆𑀣𑀻𑀢𑀺 𑀕𑀡𑁆𑀟𑀺𑀓𑀁. 𑀕𑀡𑁆𑀟𑀲𑀤𑁆𑀤𑁄 𑀳𑀺 𑀨𑁄𑀝𑀧𑀭𑀺𑀬𑀸𑀬𑁄, 𑀩𑀳𑀼𑀢𑁆𑀣𑁂 𑀇𑀓𑀧𑀘𑁆𑀘𑀬𑁄. 𑀩𑀳𑀼𑀕𑀡𑁆𑀟𑀺𑀓𑀮𑀲𑀼𑀡𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀕𑀡𑁆𑀟𑀲𑀤𑁆𑀤𑁄 𑀳𑀺 𑀨𑁄𑀝𑁂 𑀘 𑀓𑀧𑁄𑀮𑁂 𑀘𑀸𑀢𑀺 𑀤𑁆𑀯𑀻𑀲𑀼 𑀅𑀢𑁆𑀣𑁂𑀲𑀼 𑀯𑀢𑁆𑀢𑀢𑀺, 𑀇𑀥 𑀧𑀦 𑀨𑁄𑀝𑁂 𑀯𑀢𑁆𑀢𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀧𑁄𑀢𑁆𑀣𑀓𑁂𑀲𑀼 𑀧𑀦 𑀑𑀝𑁆𑀞𑀚𑁂𑀦 𑀘𑀢𑀼𑀢𑁆𑀣𑀓𑁆𑀔𑀭𑁂𑀦 𑀧𑀸𑀞𑁄 𑀅𑀢𑁆𑀣𑀺, 𑀲𑁄 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄. 𑀩𑀳𑀽𑀲𑀼 𑀳𑀺 𑀧𑀼𑀩𑁆𑀩𑀧𑁄𑀢𑁆𑀣𑀓𑁂𑀲𑀼 𑀓𑀡𑁆𑀞𑀚𑁄 𑀢𑀢𑀺𑀬𑀓𑁆𑀔𑀭𑁄 𑀘 𑀑𑀝𑁆𑀞𑀚𑁄 𑀘𑀢𑀼𑀢𑁆𑀣𑀓𑁆𑀔𑀭𑁄 𑀘𑀸𑀢𑀺 𑀤𑁆𑀯𑁂 𑀅𑀓𑁆𑀔𑀭𑀸 𑀅𑀜𑁆𑀜𑀫𑀜𑁆𑀜𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀦 𑀏𑀓𑀤𑁆𑀯𑀺𑀢𑀺𑀫𑀺𑀜𑁆𑀚𑀓𑀦𑁆𑀢𑀺 𑀏𑀓𑀫𑀺𑀜𑁆𑀚𑁄 𑀧𑀮𑀡𑁆𑀟𑀼𑀓𑁄 𑀦 𑀳𑁄𑀢𑀺, 𑀤𑁆𑀯𑀺𑀫𑀺𑀜𑁆𑀚𑁄 𑀪𑀜𑁆𑀚𑀦𑀓𑁄 𑀦 𑀳𑁄𑀢𑀺, 𑀢𑀺𑀫𑀺𑀜𑁆𑀚𑁄 𑀳𑀭𑀺𑀢𑀓𑁄 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀗𑁆𑀔𑀸𑀤𑀺𑀢𑁆𑀯𑀸𑀢𑀺 𑀤𑀦𑁆𑀢𑁂𑀳𑀺 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀢𑁆𑀯𑀸.

𑁭𑁯𑁭. 𑀧𑀮𑀡𑁆𑀟𑀼𑀓𑁄𑀢𑀺 𑀲𑀼𑀓𑀦𑁆𑀤𑀓𑁄 𑀏𑀓𑁄 𑀮𑀲𑀼𑀡𑀯𑀺𑀲𑁂𑀲𑁄. 𑀪𑀜𑁆𑀚𑀦𑀓𑀸𑀤𑀻𑀦𑀺 𑀮𑁄𑀓𑀲𑀗𑁆𑀓𑁂𑀢𑁄𑀧𑀤𑁂𑀲𑀢𑁄 𑀤𑀝𑁆𑀞𑀩𑁆𑀩𑀸𑀦𑀺. 𑀳𑀻𑀢𑀺 𑀲𑀘𑁆𑀘𑀁. 𑀢𑀲𑁆𑀲𑀸𑀢𑀺 𑀘𑀸𑀧𑀮𑀲𑀼𑀡𑀲𑁆𑀲. 𑀲𑀪𑀸𑀯𑁂𑀦𑁂𑀯𑀸𑀢𑀺 𑀲𑀽𑀧𑀲𑀫𑁆𑀧𑀸𑀓𑀸𑀤𑀺𑀁 𑀯𑀺𑀦𑀸 𑀅𑀢𑁆𑀢𑀦𑁄 𑀲𑀪𑀸𑀯𑀢𑁄 𑀏𑀯. 𑀢𑀦𑁆𑀢𑀺 𑀫𑀸𑀕𑀥𑀓𑀁, 𑀧𑀓𑁆𑀔𑀺𑀧𑀺𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀲𑀘𑁆𑀘𑀁. 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 𑀬𑁂𑀲𑀼 𑀓𑁂𑀲𑀼𑀘𑀻𑀢𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀁

𑁭𑁯𑁯. 𑀤𑀼𑀢𑀺𑀬𑁂 𑀲𑀁𑀤𑀲𑁆𑀲𑀦𑀁 𑀩𑀸𑀥𑀢𑀺 𑀦𑀺𑀲𑁂𑀥𑁂𑀢𑀺 𑀅𑀲𑁆𑀫𑀺𑀁 𑀞𑀸𑀦𑁂𑀢𑀺 𑀲𑀫𑁆𑀩𑀸𑀥𑀦𑁆𑀢𑀺 𑀯𑀘𑀦𑀢𑁆𑀣𑁂𑀦 𑀧𑀝𑀺𑀘𑁆𑀙𑀦𑁆𑀦𑁄𑀓𑀸𑀲𑁄 𑀲𑀫𑁆𑀩𑀸𑀥𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀝𑀺𑀘𑁆𑀙𑀦𑁆𑀦𑁄𑀓𑀸𑀲𑁂’’𑀢𑀺. 𑀉𑀪𑁄 𑀉𑀧𑀓𑀘𑁆𑀙𑀓𑀸𑀢𑀺 𑀤𑁆𑀯𑁂 𑀩𑀸𑀳𑀼𑀫𑀽𑀮𑀸. 𑀢𑁂 𑀳𑀺 𑀉𑀧𑀭𑀺 𑀬𑀁𑀓𑀺𑀜𑁆𑀘𑀺 𑀯𑀢𑁆𑀣𑀼𑀁 𑀓𑀘𑀢𑀺 𑀩𑀦𑁆𑀥𑀢𑀺 𑀏𑀢𑁆𑀣𑀸𑀢𑀺 𑀉𑀧𑀓𑀘𑁆𑀙𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀫𑀼𑀢𑁆𑀢𑀓𑀭𑀡𑀦𑁆𑀢𑀺 𑀧𑀲𑁆𑀲𑀸𑀯𑀫𑀕𑁆𑀕𑁄. 𑀲𑁄 𑀳𑀺 𑀫𑀼𑀢𑁆𑀢𑀁 𑀓𑀭𑁄𑀢𑀺 𑀅𑀦𑁂𑀦𑀸𑀢𑀺 𑀫𑀼𑀢𑁆𑀢𑀓𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀮𑁄𑀫𑁄 𑀓𑀢𑁆𑀢𑀻𑀬𑀢𑀺 𑀙𑀺𑀦𑁆𑀤𑀻𑀬𑀢𑀺 𑀇𑀫𑀸𑀬𑀸𑀢𑀺 𑀓𑀢𑁆𑀢𑀭𑀺, 𑀢𑀸𑀬 𑀯𑀸, 𑀲𑀼𑀝𑁆𑀞𑀼 𑀤𑀴𑁆𑀳𑀁 𑀮𑁄𑀫𑀁 𑀟𑀁𑀲𑀢𑀻𑀢𑀺 𑀲𑀡𑁆𑀟𑀸𑀲𑁄, 𑀲𑁄𑀬𑁂𑀯 𑀲𑀡𑁆𑀟𑀸𑀲𑀓𑁄, 𑀢𑁂𑀦 𑀯𑀸, 𑀔𑀼𑀭𑀢𑀺 𑀮𑁄𑀫𑀁 𑀙𑀺𑀦𑁆𑀤𑀢𑀻𑀢𑀺 𑀔𑀼𑀭𑁄, 𑀢𑁂𑀦 𑀯𑀸 𑀲𑀁𑀳𑀭𑀸𑀧𑁂𑀦𑁆𑀢𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀁𑀳𑀭𑀸𑀧𑁂𑀦𑁆𑀢𑀺𑀬𑀸𑀢𑀺 𑀅𑀧𑀦𑁂𑀦𑁆𑀢𑀺𑀬𑀸𑀢𑀺. 𑀤𑀼𑀢𑀺𑀬𑀁.

𑁩. 𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀁

𑁮𑁦𑁩. 𑀢𑀢𑀺𑀬𑁂 𑀫𑀼𑀢𑁆𑀢𑀓𑀭𑀡𑀢𑀮𑀖𑀸𑀢𑀦𑁂𑀢𑀺 𑀫𑀼𑀢𑁆𑀢𑀓𑀭𑀡𑀲𑁆𑀲 𑀢𑀮𑀁 𑀳𑀦𑀦𑀁 𑀧𑀳𑀭𑀡𑀁 𑀫𑀼𑀢𑁆𑀢𑀓𑀭𑀡𑀢𑀮𑀖𑀸𑀢𑀦𑀁, 𑀢𑀲𑁆𑀫𑀺𑀁 𑀫𑀼𑀢𑁆𑀢𑀓𑀭𑀡𑀢𑀮𑀖𑀸𑀢𑀦𑁂 𑀦𑀺𑀫𑀺𑀢𑁆𑀢𑀪𑀽𑀢𑁂. 𑀢𑀸𑀯 𑀫𑀳𑀦𑁆𑀢𑀦𑁆𑀢𑀺 𑀅𑀢𑀺𑀯𑀺𑀬 𑀫𑀳𑀦𑁆𑀢𑀁. 𑀓𑁂𑀲𑀭𑁂𑀦𑀸𑀧𑀻𑀢𑀺 𑀓𑀺𑀜𑁆𑀚𑀓𑁆𑀔𑁂𑀦𑀸𑀧𑀺. 𑀲𑁄 𑀳𑀺 𑀓𑁂 𑀚𑀮𑁂 𑀲𑀭𑀢𑀺 𑀧𑀯𑀢𑁆𑀢𑀢𑀻𑀢𑀺 𑀓𑁂𑀲𑀭𑁄𑀢𑀺 𑀯𑀼𑀘𑁆𑀘𑀢𑀺.

𑁮𑁦𑁫. 𑀕𑀡𑁆𑀟𑀁 𑀯𑀸𑀢𑀺 𑀧𑀻𑀴𑀓𑀁 𑀯𑀸. 𑀯𑀡𑀁 𑀯𑀸𑀢𑀺 𑀅𑀭𑀼𑀁 𑀯𑀸𑀢𑀺. 𑀢𑀢𑀺𑀬𑀁.

𑁪. 𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀁

𑁮𑁦𑁬. 𑀘𑀢𑀼𑀢𑁆𑀣𑁂 𑀭𑀜𑁆𑀜𑁄 𑀑𑀭𑁄𑀥𑀸 𑀭𑀸𑀚𑁄𑀭𑁄𑀥𑀸, 𑀧𑀼𑀭𑀸𑀡𑁂 𑀭𑀸𑀚𑁄𑀭𑁄𑀥𑀸 𑀧𑀼𑀭𑀸𑀡𑀭𑀸𑀚𑁄𑀭𑁄𑀥𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀼𑀭𑀸𑀡𑁂’’𑀢𑀺𑀆𑀤𑀺. ‘‘𑀕𑀺𑀳𑀺𑀪𑀸𑀯𑁂’’𑀢𑀺 𑀇𑀫𑀺𑀦𑀸 𑀧𑀼𑀭𑀸𑀡𑁂𑀢𑀺 𑀏𑀢𑁆𑀣 𑀡𑀧𑀘𑁆𑀘𑀬𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀘𑀺𑀭𑀸𑀘𑀺𑀭𑀦𑁆𑀢𑀺 𑀦𑀺𑀧𑀸𑀢𑀧𑀝𑀺𑀭𑀽𑀧𑀓𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀺𑀭𑁂𑀦 𑀘𑀺𑀭𑁂𑀦𑀸’’𑀢𑀺. ‘‘𑀲𑀓𑁆𑀓𑁄𑀣𑀸’’𑀢𑀺 𑀇𑀫𑀺𑀦𑀸 𑀓𑀣𑀁 𑀢𑀼𑀫𑁆𑀳𑁂 𑀭𑀸𑀕𑀘𑀺𑀢𑁆𑀢𑀁 𑀧𑀝𑀺𑀳𑀦𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀥𑀸𑀭𑁂𑀣 𑀥𑀸𑀭𑁂𑀢𑀼𑀁 𑀲𑀓𑁆𑀓𑁄𑀣𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀦𑀸𑀭𑁄𑀘𑀺𑀢𑁂𑀧𑀻𑀢𑀺 𑀪𑀽𑀢𑀢𑁄 𑀅𑀦𑀸𑀭𑁄𑀘𑀺𑀢𑁂𑀧𑀺.

𑁮𑁦𑁭. 𑀚𑀢𑀼𑀦𑀸𑀢𑀺 𑀮𑀸𑀔𑀸𑀬. 𑀧𑀝𑁆𑀞𑀤𑀡𑁆𑀟𑀓𑁂𑀢𑀺 𑀧𑀝𑀼𑀪𑀸𑀯𑁂𑀦 𑀞𑀸𑀢𑀺 𑀧𑀯𑀢𑁆𑀢𑀢𑀻𑀢𑀺 𑀧𑀝𑁆𑀞𑁄, 𑀲𑁄𑀬𑁂𑀯 𑀤𑀡𑁆𑀟𑁄 𑀧𑀝𑁆𑀞𑀤𑀡𑁆𑀟𑁄, 𑀢𑀲𑁆𑀲 𑀧𑀯𑁂𑀲𑀦𑀁 𑀧𑀝𑁆𑀞𑀤𑀡𑁆𑀟𑀓𑀁, 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀪𑀽𑀢𑁂. 𑀏𑀢𑀦𑁆𑀢𑀺 ‘‘𑀚𑀢𑀼𑀫𑀝𑁆𑀞𑀓𑁂’’𑀢𑀺 𑀏𑀢𑀁 𑀯𑀘𑀦𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀁

𑁮𑁧𑁦. 𑀧𑀜𑁆𑀘𑀫𑁂 ‘‘𑀅𑀢𑀺𑀕𑀫𑁆𑀪𑀻𑀭’’𑀦𑁆𑀢𑀺𑀧𑀤𑀁 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀦𑁆𑀢𑀺 𑀆𑀳 ‘‘𑀅𑀢𑀺𑀅𑀦𑁆𑀢𑁄 𑀧𑀯𑁂𑀲𑁂𑀢𑁆𑀯𑀸’’𑀢𑀺. ‘‘𑀉𑀤𑀓𑁂𑀦 𑀥𑁄𑀯𑀦𑀁 𑀓𑀼𑀭𑀼𑀫𑀸𑀦𑀸’’𑀢𑀺 𑀇𑀫𑀺𑀦𑀸 ‘‘𑀉𑀤𑀓𑀲𑀼𑀤𑁆𑀥𑀺𑀓’’𑀦𑁆𑀢𑀺𑀧𑀤𑀲𑁆𑀲 𑀉𑀤𑀓𑁂𑀦 𑀲𑀼𑀤𑁆𑀥𑀺𑀬𑀸 𑀓𑀭𑀡𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺.

𑁮𑁧𑁨. 𑀤𑁆𑀯𑀗𑁆𑀕𑀼𑀮𑀧𑀩𑁆𑀩𑀧𑀭𑀫𑀦𑁆𑀢𑀺 𑀏𑀢𑁆𑀣 𑀤𑁆𑀯𑁂 𑀅𑀗𑁆𑀕𑀼𑀮𑀸𑀦𑀺 𑀘 𑀤𑁆𑀯𑁂 𑀧𑀩𑁆𑀩𑀸𑀦𑀺 𑀘 𑀤𑁆𑀯𑀗𑁆𑀕𑀼𑀮𑀧𑀩𑁆𑀩𑀁, 𑀉𑀢𑁆𑀢𑀭𑀧𑀤𑁂 𑀧𑀼𑀩𑁆𑀩𑀧𑀤𑀮𑁄𑀧𑁄. 𑀤𑁆𑀯𑀗𑁆𑀕𑀼𑀮𑀧𑀩𑁆𑀩𑀁 𑀧𑀭𑀫𑀁 𑀧𑀫𑀸𑀡𑀁 𑀏𑀢𑀲𑁆𑀲 𑀉𑀤𑀓𑀲𑀼𑀤𑁆𑀥𑀺𑀓𑀲𑁆𑀲𑀸𑀢𑀺 𑀤𑁆𑀯𑀗𑁆𑀕𑀼𑀮𑀧𑀩𑁆𑀩𑀧𑀭𑀫𑀁. 𑀯𑀺𑀢𑁆𑀣𑀸𑀭𑀢𑁄 𑀤𑁆𑀯𑀗𑁆𑀕𑀼𑀮𑀧𑀭𑀫𑀁, 𑀕𑀫𑁆𑀪𑀻𑀭𑀢𑁄 𑀤𑁆𑀯𑀺𑀧𑀩𑁆𑀩𑀧𑀭𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀯𑀺𑀢𑁆𑀣𑀸𑀭𑀢𑁄’’𑀢𑀺𑀆𑀤𑀺. 𑀅𑀗𑁆𑀕𑀼𑀮𑀁 𑀧𑀯𑁂𑀲𑁂𑀦𑁆𑀢𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀲𑀘𑁆𑀘𑀁. ‘‘𑀘𑀢𑀼𑀦𑁆𑀦𑀁 𑀯𑀸’’𑀢𑀺 𑀇𑀤𑀁 𑀉𑀓𑁆𑀓𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀺𑀡𑁆𑀡𑀫𑁆𑀧𑀺 𑀧𑀩𑁆𑀩𑀁 𑀦 𑀯𑀝𑁆𑀝𑀢𑀺, 𑀘𑀢𑀼𑀦𑁆𑀦𑀁 𑀧𑀦 𑀧𑀕𑁂𑀯𑀸𑀢𑀺 𑀅𑀢𑁆𑀣𑁄𑀢𑀺. 𑀧𑀜𑁆𑀘𑀫𑀁.

𑁬. 𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀁

𑁮𑁧𑁫. 𑀙𑀝𑁆𑀞𑁂 𑀪𑀢𑁆𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀁 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑁄𑀢𑀺 𑀯𑀼𑀢𑁆𑀢𑁂 𑀪𑀢𑁆𑀢𑀓𑀺𑀘𑁆𑀘𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀢𑁆𑀢𑀓𑀺𑀘𑁆𑀘’’𑀦𑁆𑀢𑀺. 𑀧𑀸𑀦𑀻𑀬𑀲𑀤𑁆𑀤𑁂𑀦 𑀧𑀸𑀦𑀻𑀬𑀣𑀸𑀮𑀓𑀁 𑀕𑀳𑁂𑀢𑀩𑁆𑀩𑀁, 𑀯𑀺𑀥𑀽𑀧𑀦𑀲𑀤𑁆𑀤𑁂𑀦 𑀩𑀻𑀚𑀦𑀻 𑀕𑀳𑁂𑀢𑀩𑁆𑀩𑀸, 𑀉𑀧𑀲𑀤𑁆𑀤𑁄 𑀲𑀫𑀻𑀧𑀢𑁆𑀣𑁄𑀢𑀺 𑀲𑀩𑁆𑀩𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀓𑁂𑀦 𑀳𑀢𑁆𑀣𑁂𑀦𑀸’’𑀢𑀺𑀆𑀤𑀺. ‘‘𑀅𑀘𑁆𑀘𑀸𑀯𑀤𑀢𑀻’’𑀢𑀺𑀧𑀤𑀲𑁆𑀲 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀤𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀺 ‘‘𑀧𑀼𑀩𑁆𑀩𑁂𑀧𑀻’’𑀢𑀺𑀆𑀤𑀺𑀦𑀸.

𑁮𑁧𑁭. ‘‘𑀲𑀼𑀤𑁆𑀥𑀉𑀤𑀓𑀁 𑀯𑀸 𑀳𑁄𑀢𑀽’’𑀢𑀺𑀆𑀤𑀺𑀦𑀸 ‘‘𑀧𑀸𑀦𑀻𑀬𑁂𑀦𑀸’’𑀢𑀺 𑀯𑀘𑀦𑀁 𑀉𑀧𑀮𑀓𑁆𑀔𑀡𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀤𑀥𑀺𑀫𑀢𑁆𑀣𑀽𑀢𑀺 𑀤𑀥𑀺𑀫𑀡𑁆𑀟𑀁 𑀤𑀥𑀺𑀦𑁄 𑀲𑀸𑀭𑁄, 𑀤𑀥𑀺𑀫𑁆𑀳𑀺 𑀧𑀲𑀦𑁆𑀦𑁄𑀤𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀭𑀲𑁄𑀢𑀺 𑀫𑀘𑁆𑀙𑀭𑀲𑁄 𑀫𑀁𑀲𑀭𑀲𑁄. ‘‘𑀅𑀦𑁆𑀢𑀫𑀲𑁄 𑀘𑀻𑀯𑀭𑀓𑀡𑁆𑀡𑁄𑀧𑀻’’𑀢𑀺 𑀇𑀫𑀺𑀦𑀸 ‘‘𑀯𑀺𑀥𑀽𑀧𑀦𑁂𑀦𑀸’’𑀢𑀺 𑀯𑀘𑀦𑀁 𑀦𑀺𑀤𑀲𑁆𑀲𑀦𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺.

𑁮𑁧𑁯. 𑀤𑁂𑀢𑀻𑀢𑀺 𑀲𑀬𑀁 𑀤𑁂𑀢𑀺. 𑀤𑀸𑀧𑁂𑀢𑀻𑀢𑀺 𑀅𑀜𑁆𑀜𑁂𑀦 𑀤𑀸𑀧𑁂𑀢𑀺. 𑀉𑀪𑀬𑀫𑁆𑀧𑀻𑀢𑀺 𑀧𑀸𑀦𑀻𑀬𑀯𑀺𑀥𑀽𑀧𑀦𑀤𑁆𑀯𑀬𑀫𑁆𑀧𑀻𑀢𑀺. 𑀙𑀝𑁆𑀞𑀁.

𑁭. 𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀁

𑁮𑁨𑁨. 𑀲𑀢𑁆𑀢𑀫𑁂 ‘‘𑀧𑀬𑁄𑀕𑀤𑀼𑀓𑁆𑀓𑀝𑀁 𑀦𑀸𑀫𑀸’’𑀢𑀺 𑀇𑀫𑀺𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀲𑀼 𑀅𑀝𑁆𑀞𑀲𑀼 𑀤𑀼𑀓𑁆𑀓𑀝𑁂𑀲𑀼 𑀧𑀼𑀩𑁆𑀩𑀧𑀬𑁄𑀕𑀤𑀼𑀓𑁆𑀓𑀝𑀁 𑀤𑀲𑁆𑀲𑁂𑀢𑀺. 𑀦 𑀓𑁂𑀯𑀮𑀁 𑀧𑀼𑀩𑁆𑀩𑀧𑀬𑁄𑀕𑀤𑀼𑀓𑁆𑀓𑀝𑀁 𑀏𑀢𑁆𑀢𑀓𑀫𑁂𑀯, 𑀅𑀣 𑀔𑁄 𑀅𑀜𑁆𑀜𑀫𑁆𑀧𑀺 𑀩𑀳𑀼 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀲𑀗𑁆𑀖𑀝𑁆𑀝𑀦𑁂𑀲𑀼𑀧𑀻𑀢𑀺 𑀯𑀺𑀮𑁄𑀴𑀦𑁂𑀲𑀼𑀧𑀺. 𑀤𑀦𑁆𑀢𑁂𑀳𑀺 𑀲𑀗𑁆𑀔𑀸𑀤𑀢𑀻𑀢𑀺 𑀤𑀦𑁆𑀢𑁂𑀳𑀺 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀭𑁄𑀢𑀺. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂, 𑀅𑀜𑁆𑀜𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀓𑀸𑀭𑀸𑀧𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀜𑁆𑀜𑀸𑀬𑀸’’𑀢𑀺𑀧𑀤𑀁 ‘‘𑀯𑀺𑀜𑁆𑀜𑀸𑀧𑁂𑀢𑁆𑀯𑀸’’𑀢𑀺 𑀧𑀤𑁂 𑀓𑀸𑀭𑀺𑀢𑀓𑀫𑁆𑀫𑀁. 𑀫𑀸𑀢𑀭𑀫𑁆𑀧𑀻𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑁄 𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺𑀬𑀸 𑀧𑀕𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀸𑀬 𑀯𑀸𑀢𑀺 𑀯𑀺𑀜𑁆𑀜𑀸𑀧𑀺𑀢𑀪𑀺𑀓𑁆𑀔𑀼𑀦𑀺𑀬𑀸 𑀯𑀸. 𑀢𑀦𑁆𑀢𑀺 𑀆𑀫𑀓𑀥𑀜𑁆𑀜𑀁. 𑀢𑀦𑁆𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀯𑀘𑀦𑀁. 𑀧𑀼𑀩𑁆𑀩𑀸𑀧𑀭𑀯𑀺𑀭𑀼𑀤𑁆𑀥𑀦𑁆𑀢𑀺 𑀧𑀼𑀩𑁆𑀩𑀸𑀧𑀭𑀢𑁄 𑀯𑀺𑀭𑀼𑀤𑁆𑀥𑀁. ‘‘𑀅𑀜𑁆𑀜𑀸𑀬…𑀧𑁂… 𑀤𑀼𑀓𑁆𑀓𑀝𑀫𑁂𑀯𑀸’’𑀢𑀺 𑀧𑀼𑀩𑁆𑀩𑀯𑀘𑀦𑁂 𑀤𑀼𑀓𑁆𑀓𑀝𑀫𑁂𑀯 𑀯𑀼𑀢𑁆𑀢𑀁, 𑀧𑀼𑀦 ‘‘𑀅𑀜𑁆𑀜𑀸𑀬…𑀧𑁂… 𑀤𑀼𑀓𑁆𑀓𑀝’’𑀦𑁆𑀢𑀺 𑀘 𑀧𑀘𑁆𑀙𑀺𑀫𑀯𑀘𑀦𑁂 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀤𑀼𑀓𑁆𑀓𑀝𑀜𑁆𑀘 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀧𑀼𑀩𑁆𑀩𑀸𑀧𑀭𑀯𑀺𑀭𑀼𑀤𑁆𑀥𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸.

𑁮𑁨𑁩. 𑀮𑀩𑁆𑀪𑀫𑀸𑀦𑀁 𑀆𑀫𑀓𑀥𑀜𑁆𑀜𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑀁 𑀯𑀸 𑀬𑀁𑀓𑀺𑀜𑁆𑀘𑀻𑀢𑀺 𑀫𑀼𑀕𑁆𑀕𑀫𑀸𑀲𑀸𑀤𑀻𑀳𑀺 𑀯𑀸 𑀮𑀸𑀩𑀼𑀓𑀼𑀫𑁆𑀪𑀡𑁆𑀟𑀸𑀤𑀻𑀳𑀺 𑀯𑀸 𑀅𑀜𑁆𑀜𑀁 𑀬𑀁𑀓𑀺𑀜𑁆𑀘𑀺 𑀢𑀺𑀮𑀸𑀤𑀺𑀁 𑀯𑀸𑀢𑀺. 𑀲𑀢𑁆𑀢𑀫𑀁.

𑁮. 𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀁

𑁮𑁨𑁪. 𑀅𑀝𑁆𑀞𑀫𑁂 𑀦𑀺𑀩𑁆𑀩𑀺𑀝𑁆𑀞𑀭𑀸𑀚𑀪𑀝𑁄𑀢𑀺 𑀏𑀢𑁆𑀣 𑀉𑀢𑁆𑀢𑀭𑀧𑀤𑀲𑁆𑀲 𑀙𑀝𑁆𑀞𑀻𑀲𑀫𑀸𑀲𑀜𑁆𑀘 𑀧𑀼𑀩𑁆𑀩𑀧𑀤𑁂𑀦 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑀺𑀩𑁆𑀩𑀺𑀝𑁆𑀞𑁄’’𑀢𑀺𑀆𑀤𑀺. 𑀢𑀢𑁆𑀣 ‘‘𑀭𑀜𑁆𑀜𑁄 𑀪𑀢𑀻’’𑀢𑀺 𑀇𑀫𑀺𑀦𑀸 𑀭𑀜𑁆𑀜𑁄 𑀪𑀝𑁄 𑀭𑀸𑀚𑀪𑀝𑁄𑀢𑀺 𑀙𑀝𑁆𑀞𑀻𑀲𑀫𑀸𑀲𑀁 𑀤𑀲𑁆𑀲𑁂𑀢𑀺, ‘‘𑀏𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑀁. 𑀦𑀺𑀩𑁆𑀩𑀺𑀝𑁆𑀞𑁄𑀢𑀺 𑀦𑀺𑀯𑀺𑀝𑁆𑀞𑁄 𑀧𑀢𑀺𑀝𑁆𑀞𑀸𑀧𑀺𑀢𑁄𑀢𑀺 𑀅𑀢𑁆𑀣𑁄. 𑀓𑁂𑀡𑀻𑀢𑀺 𑀭𑀜𑁆𑀜𑁄 𑀤𑀸𑀢𑀩𑁆𑀩𑀲𑁆𑀲 𑀆𑀬𑀲𑁆𑀲𑁂𑀢𑀫𑀥𑀺𑀯𑀘𑀦𑀁. 𑀏𑀢𑁂𑀦𑀸𑀢𑀺 𑀩𑁆𑀭𑀸𑀳𑁆𑀫𑀡𑁂𑀦. 𑀢𑀢𑁄𑀢𑀺 𑀞𑀸𑀦𑀦𑁆𑀢𑀭𑀢𑁄. 𑀪𑀝𑀲𑀗𑁆𑀔𑀸𑀢𑀸𑀬 𑀓𑁂𑀡𑀺𑀬𑀸 𑀧𑀣𑀢𑁆𑀢𑀸 𑀓𑀸𑀭𑀡𑀢𑁆𑀢𑀸 𑀞𑀸𑀦𑀦𑁆𑀢𑀭𑀁 𑀪𑀝𑀧𑀣𑀦𑁆𑀢𑀺 𑀆𑀳 ‘‘𑀢𑀁𑀬𑁂𑀯 𑀞𑀸𑀦𑀦𑁆𑀢𑀭’’𑀦𑁆𑀢𑀺.

𑁮𑁨𑁬. 𑀘𑀢𑁆𑀢𑀸𑀭𑀺𑀧𑀺 𑀯𑀢𑁆𑀣𑀽𑀦𑀻𑀢𑀺 𑀉𑀘𑁆𑀘𑀸𑀭𑀸𑀤𑀻𑀦𑀺. 𑀧𑀸𑀝𑁂𑀓𑁆𑀓𑀦𑁆𑀢𑀺 𑀧𑀝𑀺𑀯𑀺𑀲𑀼𑀁 𑀏𑀓𑁂𑀓𑀫𑁂𑀯. 𑀉𑀘𑁆𑀘𑀸𑀭𑀁 𑀯𑀸𑀢𑀺𑀆𑀤𑀻𑀲𑀼 𑀯𑀸𑀲𑀤𑁆𑀤𑁂𑀦 𑀤𑀦𑁆𑀢𑀓𑀝𑁆𑀞𑀸𑀤𑀬𑁄𑀧𑀺 𑀕𑀳𑁂𑀢𑀩𑁆𑀩𑀸𑀢𑀺 𑀆𑀳 ‘‘𑀤𑀦𑁆𑀢𑀓𑀝𑁆𑀞…𑀧𑁂… 𑀧𑀸𑀘𑀺𑀢𑁆𑀢𑀺𑀬𑀫𑁂𑀯𑀸’’𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀉𑀘𑁆𑀘𑀸𑀭𑀸𑀤𑀻𑀲𑀽𑀢𑀺. 𑀅𑀝𑁆𑀞𑀫𑀁.

𑁯. 𑀦𑀯𑀫𑀲𑀺𑀓𑁆𑀔𑀸𑀧𑀤𑀁

𑁮𑁩𑁦. 𑀦𑀯𑀫𑁂 𑀭𑁄𑀧𑀺𑀫𑀳𑀭𑀺𑀢𑀝𑁆𑀞𑀸𑀦𑁂𑀢𑀺 𑀭𑁄𑀧𑀺𑀫𑀝𑁆𑀞𑀸𑀦𑁂 𑀘 𑀳𑀭𑀺𑀢𑀝𑁆𑀞𑀸𑀦𑁂 𑀘. 𑀭𑁄𑀧𑀺𑀬𑀢𑀺 𑀅𑀲𑁆𑀫𑀺𑀦𑁆𑀢𑀺 𑀭𑁄𑀧𑀺𑀬𑀁, 𑀢𑀁𑀬𑁂𑀯 𑀭𑁄𑀧𑀺𑀫𑀁 𑀬𑀓𑀸𑀭𑀲𑁆𑀲 𑀫𑀓𑀸𑀭𑀁 𑀓𑀢𑁆𑀯𑀸. 𑀏𑀢𑀸𑀦𑀻𑀢𑀺 𑀉𑀘𑁆𑀘𑀸𑀭𑀸𑀤𑀻𑀦𑀺. 𑀲𑀩𑁆𑀩𑁂𑀲𑀦𑁆𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀁. 𑀬𑀢𑁆𑀣 𑀧𑀦𑀸𑀢𑀺 𑀬𑀲𑁆𑀫𑀺𑀁 𑀔𑁂𑀢𑁆𑀢𑁂𑀢𑀺. 𑀦𑀯𑀫𑀁.

𑁧𑁦. 𑀤𑀲𑀫𑀲𑀺𑀓𑁆𑀔𑀸𑀧𑀤𑀁

𑁮𑁩𑁫. 𑀤𑀲𑀫𑁂 𑀲𑁄𑀡𑁆𑀟𑀸 𑀯𑀸𑀢𑀺 𑀲𑀼𑀭𑀸𑀲𑁄𑀡𑁆𑀟𑀸 𑀯𑀸. 𑀫𑁄𑀭𑁄𑀢𑀺 𑀫𑀬𑀽𑀭𑁄. 𑀲𑀼𑀯𑁄𑀢𑀺 𑀲𑀼𑀓𑁄. 𑀫𑀓𑁆𑀓𑀝𑁄𑀢𑀺 𑀯𑀸𑀦𑀭𑁄. 𑀆𑀤𑀺𑀲𑀤𑁆𑀤𑁂𑀦 𑀲𑀧𑁆𑀧𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺, 𑀫𑀓𑁆𑀓𑀝𑀸𑀤𑀬𑁄𑀧𑀺 𑀦𑀘𑁆𑀘𑀦𑁆𑀢𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑀁𑀬𑀢𑀪𑀺𑀓𑁆𑀔𑀽𑀦𑀦𑁆𑀢𑀺 𑀯𑀸𑀘𑀲𑀺𑀓𑀓𑀫𑁆𑀫𑁂 𑀅𑀲𑀁𑀬𑀢𑀸𑀦𑀁 𑀪𑀺𑀓𑁆𑀔𑀽𑀦𑀁, 𑀥𑀫𑁆𑀫𑀪𑀸𑀡𑀓𑀕𑀻𑀢𑀁 𑀯𑀸 𑀳𑁄𑀢𑀽𑀢𑀺 𑀬𑁄𑀚𑀦𑀸. 𑀢𑀦𑁆𑀢𑀺𑀬𑀸 𑀕𑀼𑀡𑁂𑀦 𑀩𑀤𑁆𑀥𑀸 𑀢𑀦𑁆𑀢𑀺𑀩𑀤𑁆𑀥𑀸. ‘‘𑀪𑀺’’𑀦𑁆𑀢𑀺𑀲𑀗𑁆𑀔𑀸𑀢𑁄 𑀭𑀸𑀲𑀤𑁆𑀤𑁄 𑀏𑀢𑀺𑀲𑁆𑀲𑀸𑀢𑀺 𑀪𑁂𑀭𑀺. 𑀓𑀼𑀝𑁂𑀦 𑀓𑀢𑀸 𑀪𑁂𑀭𑀺 𑀓𑀼𑀝𑀪𑁂𑀭𑀺, 𑀢𑀸𑀬 𑀯𑀸𑀤𑀺𑀢𑀁 𑀓𑀼𑀝𑀪𑁂𑀭𑀺𑀯𑀸𑀤𑀺𑀢𑀁, 𑀢𑀁 𑀯𑀸. 𑀉𑀤𑀓𑀪𑁂𑀭𑀻𑀢𑀺 𑀉𑀤𑀓𑁂𑀦 𑀧𑀓𑁆𑀔𑀺𑀢𑁆𑀢𑀸 𑀪𑁂𑀭𑀺, 𑀢𑀸𑀬 𑀯𑀸𑀤𑀺𑀢𑀫𑁆𑀧𑀺 𑀳𑁄𑀢𑀽𑀢𑀺 𑀲𑀫𑁆𑀩𑀦𑁆𑀥𑁄.

𑁮𑁩𑁬. 𑀢𑁂𑀲𑀁𑀬𑁂𑀯𑀸𑀢𑀺 𑀬𑁂𑀲𑀁 𑀦𑀘𑁆𑀘𑀁 𑀧𑀲𑁆𑀲𑀢𑀺, 𑀢𑁂𑀲𑀁𑀬𑁂𑀯. 𑀬𑀤𑀺 𑀧𑀦 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀲𑁆𑀲𑀢𑀺 𑀲𑀼𑀡𑀸𑀢𑀺, 𑀧𑀸𑀝𑁂𑀓𑁆𑀓𑀸 𑀆𑀧𑀢𑁆𑀢𑀺𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺. 𑀅𑀜𑁆𑀜𑀢𑁄𑀢𑀺 𑀅𑀜𑁆𑀜𑀢𑁄 𑀤𑁂𑀲𑀢𑁄, 𑀧𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀑𑀮𑁄𑀓𑁂𑀢𑁆𑀯𑀸’’𑀢𑀺 𑀧𑀤𑁂 𑀅𑀧𑁂𑀓𑁆𑀔𑀺𑀢𑁂 𑀉𑀧𑀬𑁄𑀕𑀢𑁆𑀣𑁂 𑀢𑁄𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀜𑁆𑀜𑀁 𑀑𑀮𑁄𑀓𑁂𑀢𑁆𑀯𑀸𑀢𑀺 𑀳𑀺 𑀅𑀢𑁆𑀣𑁄. 𑀅𑀜𑁆𑀜𑀢𑁄 𑀯𑀸𑀤𑁂𑀦𑁆𑀢𑁂 𑀧𑀲𑁆𑀲𑀢𑀻𑀢𑀺 𑀬𑁄𑀚𑀦𑀸. 𑀪𑀺𑀓𑁆𑀔𑀼𑀦𑀻 𑀦 𑀮𑀪𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑁂 𑀯𑀢𑁆𑀢𑀼𑀫𑁆𑀧𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑀳𑀸𑀭𑀦𑁆𑀢𑀺 𑀧𑀽𑀚𑀁. 𑀉𑀧𑀝𑁆𑀞𑀸𑀦𑀦𑁆𑀢𑀺 𑀧𑀸𑀭𑀺𑀘𑀭𑀺𑀬𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀲𑀬𑀁 𑀦𑀘𑁆𑀘𑀸𑀤𑀻𑀲𑀼.

𑁮𑁩𑁭. 𑀅𑀦𑁆𑀢𑀭𑀸𑀭𑀸𑀫𑁂 𑀯𑀸𑀢𑀺 𑀆𑀭𑀸𑀫𑀲𑁆𑀲 𑀅𑀦𑁆𑀢𑀭𑁂 𑀯𑀸. 𑀩𑀳𑀺𑀆𑀭𑀸𑀫𑁂 𑀯𑀸𑀢𑀺 𑀆𑀭𑀸𑀫𑀲𑁆𑀲 𑀩𑀳𑀺 𑀯𑀸. 𑀅𑀜𑁆𑀜𑁂𑀦 𑀯𑀸𑀢𑀺 𑀲𑀮𑀸𑀓𑀪𑀢𑁆𑀢𑀸𑀤𑀻𑀳𑀺 𑀅𑀜𑁆𑀜𑁂𑀦 𑀯𑀸. 𑀢𑀸𑀤𑀺𑀲𑁂𑀦𑀸𑀢𑀺 𑀬𑀸𑀤𑀺𑀲𑁄 𑀘𑁄𑀭𑀸𑀤𑀺𑀉𑀧𑀤𑁆𑀤𑀯𑁄, 𑀢𑀸𑀤𑀺𑀲𑁂𑀦𑀸𑀢𑀺. 𑀤𑀲𑀫𑀁.

𑀮𑀲𑀼𑀡𑀯𑀕𑁆𑀕𑁄 𑀧𑀞𑀫𑁄.

𑁨. 𑀅𑀦𑁆𑀥𑀓𑀸𑀭𑀯𑀕𑁆𑀕𑁄

𑁧. 𑀧𑀞𑀫𑀲𑀺𑀓𑁆𑀔𑀸𑀧𑀤-𑀅𑀢𑁆𑀣𑀬𑁄𑀚𑀦𑀸

𑁮𑁩𑁯. 𑀅𑀦𑁆𑀥𑀓𑀸𑀭𑀯𑀕𑁆𑀕𑀲𑁆𑀲 𑀧𑀞𑀫𑁂 𑀅𑀧𑁆𑀧𑀤𑀻𑀧𑁂𑀢𑀺 𑀉𑀧𑀮𑀓𑁆𑀔𑀡𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀅𑀜𑁆𑀜𑁂𑀧𑀺 𑀆𑀮𑁄𑀓𑀸 𑀕𑀳𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀤𑀻𑀧𑀘𑀦𑁆𑀤𑀲𑀽𑀭𑀺𑀬𑀅𑀕𑁆𑀕𑀻𑀲𑀽’’𑀢𑀺𑀆𑀤𑀺. 𑀅𑀲𑁆𑀲𑀸𑀢𑀺 ‘‘𑀅𑀧𑁆𑀧𑀤𑀻𑀧𑁂’’𑀢𑀺𑀧𑀤𑀲𑁆𑀲.

𑁮𑁪𑁧. 𑀦𑀭𑀳𑁄𑀅𑀲𑁆𑀲𑀸𑀤𑀸𑀧𑁂𑀓𑁆𑀔𑀸 𑀳𑀼𑀢𑁆𑀯𑀸 𑀘 𑀭𑀲𑁆𑀲𑀸𑀤𑀢𑁄 𑀅𑀜𑁆𑀜𑀯𑀺𑀳𑀺𑀢𑀸𑀯 𑀳𑀼𑀢𑁆𑀯𑀸 𑀘𑀸𑀢𑀺 𑀬𑁄𑀚𑀦𑀸. 𑀇𑀫𑀺𑀦𑀸 ‘‘𑀲𑀦𑁆𑀢𑀺𑀝𑁆𑀞𑀢𑀺 𑀯𑀸 𑀲𑀮𑁆𑀮𑀧𑀢𑀺 𑀯𑀸’’𑀢𑀺 𑀧𑀤𑁂 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀤𑀸𑀦𑁂𑀦 𑀯𑀸 𑀦𑀺𑀫𑀺𑀢𑁆𑀢𑀪𑀽𑀢𑁂𑀦, 𑀧𑀽𑀚𑀸𑀬 𑀯𑀸 𑀦𑀺𑀫𑀺𑀢𑁆𑀢𑀪𑀽𑀢𑀸𑀬 𑀫𑀦𑁆𑀢𑁂𑀢𑀻𑀢𑀺 𑀬𑁄𑀚𑀦𑀸𑀢𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀁

𑁮𑁪𑁨. 𑀤𑀼𑀢𑀺𑀬𑁂 𑀇𑀤𑀫𑁂𑀯 𑀧𑀤𑀁 𑀦𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄𑀢𑀺. 𑀤𑀼𑀢𑀺𑀬𑀁.