𑁮. 𑀓𑀸𑀮𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁪. 𑀓𑀸𑀮𑀺𑀓𑀸𑀢𑀺 𑀫𑀚𑁆𑀛𑀦𑁆𑀳𑀺𑀓𑀧𑀘𑁆𑀙𑀺𑀫𑀬𑀸𑀫𑀲𑀢𑁆𑀢𑀸𑀳𑀬𑀸𑀯𑀚𑀻𑀯𑀧𑁆𑀧𑀯𑀢𑁆𑀢𑀺𑀲𑀗𑁆𑀔𑀸𑀢𑁄 𑀓𑀸𑀮𑁄 𑀏𑀢𑁂𑀲𑀫𑀢𑁆𑀣𑀻𑀢𑀺 𑀓𑀸𑀮𑀺𑀓𑀸, 𑀲𑀩𑁆𑀩𑁂𑀧𑀺 𑀔𑀚𑁆𑀚𑀪𑁄𑀚𑁆𑀚𑀮𑁂𑀬𑁆𑀬𑀧𑁂𑀬𑁆𑀬𑀲𑀗𑁆𑀔𑀸𑀢𑀸 𑀅𑀢𑁆𑀣𑀸. 𑀢𑁂 𑀧𑀦 𑀕𑀡𑀦𑀧𑀭𑀺𑀘𑁆𑀙𑁂𑀤𑀢𑁄 𑀘𑀢𑁆𑀢𑀸𑀭𑁄 𑀳𑁄𑀦𑁆𑀢𑀺. 𑀓𑀺𑀁 𑀢𑁂 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀸𑀧𑀺 𑀲𑀪𑀸𑀯𑁂𑀦𑁂𑀯 𑀓𑀸𑀮𑀺𑀓𑀯𑁄𑀳𑀸𑀭𑀁 𑀮𑀪𑀦𑁆𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀣𑀸𑀧𑀻𑀢𑀺 𑀆𑀳 ‘‘𑀧𑀝𑀺𑀕𑁆𑀕𑀳𑀺𑀢𑀸’’𑀢𑀺, 𑀧𑀝𑀺𑀕𑁆𑀕𑀳𑀺𑀢𑀸𑀬𑁂𑀯 𑀢𑁂 𑀬𑀸𑀯𑀓𑀸𑀮𑀺𑀓𑀸𑀤𑀺 𑀓𑀸𑀮𑀺𑀓𑀯𑁄𑀳𑀸𑀭𑀮𑀸𑀪𑀺𑀦𑁄, 𑀦𑁄 𑀅𑀜𑁆𑀜𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀸𑀦𑀺 𑀢𑁂 𑀤𑀲𑁆𑀲𑁂𑀢𑀺 ‘‘𑀬𑀸𑀯𑀓𑀸𑀮𑀺𑀓’’𑀦𑁆𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀬𑀸𑀯 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑁄, 𑀢𑀸𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁆𑀢𑀸 𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑀲𑀗𑁆𑀔𑀸𑀢𑁄 𑀓𑀸𑀮𑁄 𑀅𑀲𑁆𑀲𑀸𑀢𑀺 𑀬𑀸𑀯𑀓𑀸𑀮𑀺𑀓𑀁, 𑀧𑀺𑀝𑁆𑀞𑀔𑀸𑀤𑀦𑀻𑀬𑀸𑀤𑀺𑀓𑀁 𑀯𑀢𑁆𑀣𑀼, 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑀢𑁄 𑀧𑀝𑁆𑀞𑀸𑀬 𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀲𑀓𑁆𑀓𑀸, 𑀓𑀸𑀮𑀧𑀭𑀺𑀘𑁆𑀙𑁂𑀤𑀚𑀸𑀦𑀦𑀢𑁆𑀣𑀁 𑀓𑀸𑀮𑀢𑁆𑀣𑀫𑁆𑀪𑁄 𑀯𑀸 𑀬𑁄𑀚𑁂𑀢𑀩𑁆𑀩𑁄, 𑀓𑀸𑀮𑀦𑁆𑀢𑀭𑁂 𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀸𑀢𑀩𑁆𑀩𑀁. 𑀬𑀸𑀯 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑀲𑀗𑁆𑀔𑀸𑀢𑁄 𑀬𑀸𑀫𑁄, 𑀢𑀸𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀬𑀸𑀫𑁄 𑀓𑀸𑀮𑁄 𑀅𑀲𑁆𑀲𑀸𑀢𑀺 𑀬𑀸𑀫𑀓𑀸𑀮𑀺𑀓𑀁. 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀦𑀺𑀥𑁂𑀢𑀩𑁆𑀩𑀢𑁄 𑀲𑀢𑁆𑀢𑀸𑀳𑁄 𑀓𑀸𑀮𑁄 𑀅𑀲𑁆𑀲𑀸𑀢𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀁. 𑀞𑀧𑁂𑀢𑁆𑀯𑀸 𑀉𑀤𑀓𑀁 𑀅𑀯𑀲𑁂𑀲𑀁 𑀲𑀩𑁆𑀩𑀫𑁆𑀧𑀺 𑀧𑀝𑀺𑀕𑁆𑀕𑀳𑀺𑀢𑀁 𑀬𑀸𑀯𑀚𑀻𑀯𑀁 𑀧𑀭𑀺𑀳𑀭𑀺𑀢𑁆𑀯𑀸 𑀲𑀢𑀺 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀚𑀻𑀯𑀲𑁆𑀲 𑀬𑀢𑁆𑀢𑀓𑁄 𑀧𑀭𑀺𑀘𑁆𑀙𑁂𑀤𑁄 𑀬𑀸𑀯𑀚𑀻𑀯𑀁, 𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀬𑀸𑀯𑀚𑀻𑀯𑀺𑀓𑀁.

𑀦𑀦𑀼 𑀘 𑀅𑀜𑁆𑀜𑀢𑁆𑀣 𑀯𑀺𑀬 ‘‘𑀬𑀸𑀯𑀚𑀻𑀯𑀺𑀓’’𑀦𑁆𑀢𑀺 𑀏𑀢𑁆𑀣 𑀓𑀸𑀮𑀲𑀼𑀢𑀺𑀬𑀸 𑀅𑀪𑀸𑀯𑁂 𑀓𑀣𑀁 ‘‘𑀘𑀢𑁆𑀢𑀸𑀭𑁄 𑀓𑀸𑀮𑀺𑀓𑀸’’𑀢𑀺 𑀬𑀼𑀚𑁆𑀚𑀢𑀻𑀢𑀺? 𑀬𑀼𑀚𑁆𑀚𑀢𑀺, 𑀲𑁄𑀕𑀢𑀸𑀦𑀁 𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀲𑁆𑀲𑁂𑀯 𑀓𑀸𑀮𑀲𑁆𑀲𑀸𑀪𑀸𑀯𑀢𑁄 𑀚𑀻𑀯𑀲𑀗𑁆𑀔𑀸𑀢𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀔𑀦𑁆𑀥𑀲𑀗𑁆𑀕𑀳𑀺𑀢𑀢𑁆𑀢𑀸 𑀲𑁄𑀧𑀺 𑀓𑀸𑀮𑁄𑀬𑁂𑀯𑀸𑀢𑀺. 𑀦𑀦𑀼 𑀘𑁂𑀢𑁆𑀣 ‘‘𑀬𑀸𑀯𑀓𑀸𑀮𑀺𑀓’’𑀦𑁆𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑀸𑀦𑁂𑀯 ‘‘𑀓𑀸𑀮𑀺𑀓𑀸’’𑀢𑀺 𑀯𑀼𑀢𑁆𑀢𑀸𑀦𑀺, ‘‘𑀓𑀸𑀮𑀺𑀓𑀸𑀦𑀻’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺? 𑀦𑁂𑀤𑀫𑁂𑀯𑀁 𑀯𑀺𑀜𑁆𑀜𑁂𑀬𑁆𑀬𑀁, ‘‘𑀓𑀸𑀮𑀺𑀓’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀣𑀼𑀲𑀫𑁆𑀩𑀦𑁆𑀥𑁂𑀦 𑀯𑀼𑀢𑁆𑀢𑀸𑀦𑀺, ‘‘𑀓𑀸𑀮𑀺𑀓𑀸’’𑀢𑀺 𑀧𑀦 𑀲𑀸𑀫𑀜𑁆𑀜𑀦𑁆𑀢𑀭𑀯𑀲𑁂𑀦 𑀅𑀢𑁆𑀣𑀲𑀤𑁆𑀤𑀲𑀫𑁆𑀩𑀦𑁆𑀥𑁂𑀦 𑀯𑀼𑀢𑁆𑀢𑀦𑁆𑀢𑀺 𑀦𑀢𑁆𑀣𑀺 𑀯𑀺𑀭𑁄𑀥𑁄𑀢𑀺.

𑁮𑁫. 𑀇𑀤𑀸𑀦𑀺 𑀢𑁂𑀲𑀼 ‘‘𑀧𑀺𑀝𑁆𑀞’’𑀦𑁆𑀢𑀺𑀆𑀤𑀺𑀦𑀸 𑀬𑀸𑀯𑀓𑀸𑀮𑀺𑀓𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀧𑀺𑀝𑁆𑀞𑀁 𑀫𑀽𑀮𑀁 𑀨𑀮𑀦𑁆𑀢𑀺 𑀧𑀺𑀝𑁆𑀞𑀔𑀸𑀤𑀦𑀻𑀬𑀁 𑀫𑀽𑀮𑀔𑀸𑀤𑀦𑀻𑀬𑀁 𑀨𑀮𑀔𑀸𑀤𑀦𑀻𑀬𑀜𑁆𑀘. 𑀢𑀢𑁆𑀣 𑀲𑀢𑁆𑀢𑀦𑁆𑀦𑀁 𑀢𑀸𑀯 𑀥𑀜𑁆𑀜𑀸𑀦𑀁 𑀥𑀜𑁆𑀜𑀸𑀦𑀼𑀮𑁄𑀫𑀸𑀦𑀁 𑀅𑀧𑀭𑀡𑁆𑀡𑀸𑀦𑀜𑁆𑀘 𑀧𑀺𑀝𑁆𑀞𑀁 𑀧𑀦𑀲𑀮𑀩𑀼𑀚𑀅𑀫𑁆𑀩𑀸𑀝𑀓𑀥𑁄𑀢𑀢𑀸𑀮𑀧𑀺𑀝𑁆𑀞𑀸𑀤𑀺𑀓𑀜𑁆𑀘𑁂𑀢𑀺 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀧𑀓𑀢𑀺𑀆𑀳𑀸𑀭𑀯𑀲𑁂𑀦 𑁦𑁩 𑀫𑀦𑀼𑀲𑁆𑀲𑀸𑀦𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀓𑀺𑀘𑁆𑀘𑀲𑀸𑀥𑀓𑀁 𑀧𑀺𑀝𑁆𑀞𑀁 𑀧𑀺𑀝𑁆𑀞𑀔𑀸𑀤𑀦𑀻𑀬𑀁. ‘‘𑀅𑀥𑁄𑀢𑀁 𑀢𑀸𑀮𑀧𑀺𑀝𑁆𑀞𑀁 𑀔𑀻𑀭𑀯𑀮𑁆𑀮𑀺𑀧𑀺𑀝𑁆𑀞’’𑀦𑁆𑀢𑀺𑀆𑀤𑀺𑀦𑀸 𑀕𑀡𑀺𑀬𑀫𑀸𑀦𑀸𑀦𑀁 𑀕𑀡𑀦𑀸𑀬 𑀅𑀦𑁆𑀢𑁄 𑀦𑀢𑁆𑀣𑀺, 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀓𑀺𑀘𑁆𑀘𑀲𑀸𑀥𑀓𑀪𑀸𑀯𑁄𑀬𑁂𑀯 𑀧𑀦𑁂𑀢𑁂𑀲𑀁 𑀮𑀓𑁆𑀔𑀡𑀁, 𑀲𑀼𑀩𑀳𑀼𑀁 𑀯𑀢𑁆𑀯𑀸𑀧𑀺 𑀇𑀫𑀲𑁆𑀫𑀺𑀁𑀬𑁂𑀯 𑀮𑀓𑁆𑀔𑀡𑁂 𑀞𑀸𑀢𑀩𑁆𑀩𑀦𑁆𑀢𑀺 𑀦 𑀯𑀺𑀢𑁆𑀣𑀸𑀭𑀬𑀸𑀫. 𑀏𑀯𑀁 𑀲𑀩𑁆𑀩𑀢𑁆𑀣. 𑀢𑀫𑁆𑀩𑀓𑀢𑀡𑁆𑀟𑀼𑀮𑁂𑀬𑁆𑀬𑀸𑀤𑀺𑀫𑀽𑀮𑀁 𑀫𑀽𑀮𑀔𑀸𑀤𑀦𑀻𑀬𑀁. 𑀧𑀦𑀲𑀮𑀩𑀼𑀚𑀦𑀸𑀴𑀺𑀓𑁂𑀭𑀸𑀤𑀺𑀨𑀮𑀁 𑀨𑀮𑀔𑀸𑀤𑀦𑀻𑀬𑀁. 𑀔𑀚𑁆𑀚𑀦𑁆𑀢𑀺 𑀲𑀓𑁆𑀔𑀮𑀺𑀫𑁄𑀤𑀓𑀸𑀤𑀺𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀫𑀬𑀁 𑀔𑀸𑀤𑀦𑀻𑀬𑀜𑁆𑀘. 𑀕𑁄𑀭𑀲𑁄𑀢𑀺 𑀔𑀻𑀭𑀤𑀥𑀺𑀢𑀓𑁆𑀓𑀲𑀗𑁆𑀔𑀸𑀢𑁄 𑀕𑀼𑀦𑁆𑀦𑀁 𑀭𑀲𑁄 𑀘. 𑀥𑀜𑁆𑀜𑀪𑁄𑀚𑀦𑀦𑁆𑀢𑀺 𑀲𑀸𑀦𑀼𑀮𑁄𑀫𑀸𑀦𑀁 𑀥𑀜𑁆𑀜𑀸𑀦𑀁 𑀑𑀤𑀦𑀲𑀢𑁆𑀢𑀼𑀓𑀼𑀫𑁆𑀫𑀸𑀲𑀲𑀗𑁆𑀔𑀸𑀢𑀪𑁄𑀚𑀦𑀜𑁆𑀘. 𑀝𑀻𑀓𑀸𑀬𑀁 𑀧𑀦 ‘‘𑀲𑀸𑀦𑀼𑀮𑁄𑀫𑀸𑀦𑀺 𑀲𑀢𑁆𑀢𑀥𑀜𑁆𑀜𑀸𑀦𑀺 𑀘 𑀧𑀜𑁆𑀘𑀯𑀺𑀥𑀪𑁄𑀚𑀦𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀦 𑀬𑀼𑀢𑁆𑀢𑀁, 𑀥𑀜𑁆𑀜𑀸𑀦𑀁 𑀯𑀺𑀲𑀼𑀁 𑀕𑀳𑀡𑁂 𑀧𑀬𑁄𑀚𑀦𑀸𑀪𑀸𑀯𑀸, 𑀧𑀬𑁄𑀚𑀦𑀲𑀫𑁆𑀪𑀯𑁂 𑀘 𑀨𑀮𑀕𑁆𑀕𑀳𑀡𑁂𑀦𑁂𑀯 𑀢𑁂𑀲𑀁 𑀕𑀳𑀡𑀲𑀫𑁆𑀪𑀯𑀢𑁄.

𑀬𑀸𑀕𑀼𑀲𑀽𑀧𑀧𑁆𑀧𑀪𑀼𑀢𑀬𑁄𑀢𑀺 𑀬𑀸𑀕𑀼 𑀘 𑀲𑀽𑀧𑀜𑁆𑀘, 𑀢𑀁 𑀧𑀪𑀼𑀢𑀺 𑀬𑁂𑀲𑀁 𑀢𑁂𑀢𑀺 𑀏𑀢𑁂 𑀬𑀸𑀯𑀓𑀸𑀮𑀺𑀓𑀸 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀘 𑀧𑀪𑀼𑀢𑀺-𑀲𑀤𑁆𑀤𑁂𑀦 𑀫𑀘𑁆𑀙𑀫𑀁𑀲𑀲𑀗𑁆𑀔𑀸𑀢𑀁 𑀥𑀜𑁆𑀜𑀪𑁄𑀚𑀦𑀢𑁄 𑀅𑀯𑀲𑀺𑀝𑁆𑀞𑀁 𑀪𑁄𑀚𑀦𑀜𑁆𑀘 𑀧𑀺𑀝𑁆𑀞𑀫𑀽𑀮𑀨𑀮𑀔𑀸𑀤𑀦𑀻𑀬𑀢𑁄 𑀅𑀯𑀲𑀺𑀝𑁆𑀞𑀁 𑀓𑀦𑁆𑀤𑀔𑀸𑀤𑀦𑀻𑀬𑀁, 𑀫𑀼𑀴𑀸𑀮𑀔𑀸𑀤𑀦𑀻𑀬𑀸𑀤𑀺𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀲𑀼 𑀤𑀻𑀖𑁄 𑀘 𑀪𑀺𑀲𑀓𑀦𑁆𑀤𑀸𑀤𑀺 𑀯𑀝𑁆𑀝𑁄 𑀘 𑀉𑀧𑁆𑀧𑀮𑀓𑀡𑁆𑀟𑀸𑀤𑀺 𑀓𑀦𑁆𑀤𑀔𑀸𑀤𑀦𑀻𑀬𑀁, 𑀧𑀤𑀼𑀫𑀫𑀽𑀮𑀸𑀤𑀺 𑀘 𑀢𑀁𑀲𑀤𑀺𑀲𑀁 𑀏𑀭𑀓𑀫𑀽𑀮𑀸𑀤𑀺 𑀘 𑀫𑀼𑀴𑀸𑀮𑀔𑀸𑀤𑀦𑀻𑀬𑀁, 𑀢𑀸𑀮𑀸𑀤𑀻𑀦𑀁 𑀓𑀴𑀻𑀭𑀲𑀗𑁆𑀔𑀸𑀢𑀸 𑀫𑀢𑁆𑀣𑀓𑀸 𑀫𑀢𑁆𑀣𑀓𑀔𑀸𑀤𑀦𑀻𑀬𑀁, 𑀉𑀘𑁆𑀙𑀼𑀓𑁆𑀔𑀦𑁆𑀥𑀸𑀤𑀬𑁄 𑀦𑀻𑀮𑀼𑀧𑁆𑀧𑀮𑀸𑀤𑀻𑀦𑀁 𑀤𑀡𑁆𑀟𑀓𑁆𑀔𑀦𑁆𑀥𑀓𑀸𑀤𑀺 𑀔𑀦𑁆𑀥𑀔𑀸𑀤𑀦𑀻𑀬𑀁, 𑀢𑀫𑁆𑀩𑀓𑀢𑀡𑁆𑀟𑀼𑀮𑁂𑀬𑁆𑀬𑀸𑀤𑀻𑀦𑀁 𑀧𑀡𑁆𑀡𑀁 𑀧𑀢𑁆𑀢𑀔𑀸𑀤𑀦𑀻𑀬𑀁, 𑀉𑀘𑁆𑀙𑀼𑀢𑀘𑁄𑀯 𑀏𑀓𑁄 𑀲𑀭𑀲𑁄 𑀢𑀘𑀔𑀸𑀤𑀦𑀻𑀬𑀁, 𑀢𑀫𑁆𑀩𑀓𑀲𑀺𑀕𑁆𑀕𑀼𑀧𑀼𑀧𑁆𑀨𑀸𑀤𑀺 𑀧𑀼𑀧𑁆𑀨𑀔𑀸𑀤𑀦𑀻𑀬𑀁, 𑀮𑀩𑀼𑀚𑀝𑁆𑀞𑀺𑀧𑀦𑀲𑀝𑁆𑀞𑀺𑀆𑀤𑀺𑀓𑀁 𑀅𑀝𑁆𑀞𑀺𑀔𑀸𑀤𑀦𑀻𑀬𑀁.

𑁮𑁬. ‘‘𑀫𑀥𑀽’’𑀢𑀺𑀆𑀤𑀺𑀦𑀸 𑀬𑀸𑀫𑀓𑀸𑀮𑀺𑀓𑀁 𑀤𑀲𑁆𑀲𑁂𑀢𑀺. 𑀫𑀥𑀼 𑀘 𑀫𑀼𑀤𑁆𑀤𑀺𑀓𑀸 𑀘 𑀲𑀸𑀮𑀽𑀓𑀜𑁆𑀘 𑀘𑁄𑀘𑀜𑁆𑀘 𑀫𑁄𑀘𑀜𑁆𑀘 𑀅𑀫𑁆𑀩𑀜𑁆𑀘 𑀚𑀫𑁆𑀩𑀼 𑀘𑀸𑀢𑀺 𑀤𑁆𑀯𑀦𑁆𑀤𑁄. 𑀫𑀼𑀤𑁆𑀤𑀺𑀓𑀸 𑀨𑀮𑁂𑀧𑀺 𑀇𑀢𑁆𑀣𑀺𑀬𑀁, 𑀨𑀮𑁂 𑀲𑁂𑀲𑀸 𑀦𑀧𑀼𑀁𑀲𑀓𑁂, ‘‘𑀚𑀫𑁆𑀩𑀼’’ 𑀇𑀢𑀺 𑀨𑀮𑀯𑀸𑀘𑀻 𑀦𑀧𑀼𑀁𑀲𑀓𑀲𑀤𑁆𑀤𑀦𑁆𑀢𑀭𑀁, 𑀢𑀢𑁄 𑀚𑀸𑀢𑀁 𑀫𑀥𑀼𑀧𑀸𑀦𑀸𑀤𑀺 𑀫𑀥𑀼…𑀧𑁂… 𑀚𑀫𑁆𑀩𑀼𑀚𑀁, 𑀢𑀜𑁆𑀘 𑀨𑀸𑀭𑀼𑀲𑀜𑁆𑀘 𑀧𑀸𑀦𑀓𑀦𑁆𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀫𑀥𑀼𑀚𑀁 𑀧𑀸𑀦𑀁 𑀦𑀸𑀫 𑀫𑀼𑀤𑁆𑀤𑀺𑀓𑀸𑀦𑀁 𑀚𑀸𑀢𑀺𑀭𑀲𑀁 𑀉𑀤𑀓𑀲𑀫𑁆𑀪𑀺𑀦𑁆𑀦𑀁 𑀓𑀢𑁆𑀯𑀸 𑀓𑀢𑀧𑀸𑀦𑀁. 𑀢𑀁 𑀅𑀢𑁆𑀢𑀦𑀸 𑀓𑀢𑀁 𑀧𑀼𑀭𑁂𑀪𑀢𑁆𑀢𑀫𑁂𑀯 𑀲𑀸𑀫𑀺𑀲𑀁 𑀦𑀺𑀭𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀓𑀢𑀁 𑀮𑀪𑀺𑀢𑁆𑀯𑀸 𑀧𑀦 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀁 𑀧𑀦 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀧𑀸𑀦𑁂𑀲𑀼. 𑀫𑀼𑀤𑁆𑀤𑀺𑀓𑀚𑀁 𑀧𑀸𑀦𑀁 𑀦𑀸𑀫 𑀫𑀼𑀤𑁆𑀤𑀺𑀓𑀸𑀦𑀁 𑀉𑀤𑀓𑁂 𑀫𑀤𑁆𑀤𑀺𑀢𑁆𑀯𑀸 𑀓𑀢𑀧𑀸𑀦𑀁. 𑀢𑀣𑀸 𑀲𑁂𑀲𑀧𑀸𑀦𑀸𑀦𑀺 𑀬𑀣𑀸𑀦𑀼𑀭𑀽𑀧𑀁 𑀯𑁂𑀤𑀺𑀢𑀩𑁆𑀩𑀸𑀦𑀺, 𑀲𑀸𑀮𑀽𑀓𑀁 𑀭𑀢𑁆𑀢𑀼𑀧𑁆𑀧𑀮𑀸𑀤𑀻𑀦𑀁 𑀲𑀸𑀮𑀽𑀓𑀁. 𑀘𑁄𑀘𑀁 𑀅𑀝𑁆𑀞𑀺𑀓𑀓𑀤𑀮𑀺𑀨𑀮𑀁. 𑀫𑁄𑀘𑀁 𑀅𑀦𑀝𑁆𑀞𑀺𑀓𑀁. 𑀇𑀫𑀸𑀦𑀺 𑀅𑀝𑁆𑀞 𑀧𑀸𑀦𑀸𑀦𑀺 𑀲𑀻𑀢𑀸𑀦𑀺𑀧𑀺 𑀆𑀤𑀺𑀘𑁆𑀘𑀧𑀸𑀓𑀸𑀦𑀺𑀧𑀺 𑀯𑀝𑁆𑀝𑀦𑁆𑀢𑀺, 𑀅𑀕𑁆𑀕𑀺𑀧𑀸𑀓𑀸𑀦𑀺 𑀧𑀦 𑀦 𑀯𑀝𑁆𑀝𑀦𑁆𑀢𑀺. 𑀢𑁂𑀦𑀸𑀳 ‘‘𑀦𑀸𑀕𑁆𑀕𑀺𑀲𑀦𑁆𑀢𑀢𑁆𑀢’’𑀦𑁆𑀢𑀺.

𑁮𑁭-𑁮. 𑀅𑀯𑀲𑁂𑀲𑀸𑀦𑀺 𑀧𑀦 𑀯𑁂𑀢𑁆𑀢𑀢𑀺𑀦𑁆𑀢𑀺𑀡𑀺𑀓𑀫𑀸𑀢𑀼𑀮𑀼𑀗𑁆𑀕𑀓𑀧𑀺𑀢𑁆𑀣𑀓𑀭𑀫𑀦𑁆𑀤𑀸𑀤𑀺𑀔𑀼𑀤𑁆𑀤𑀓𑀨𑀮𑀧𑀸𑀦𑀸𑀦𑀺 𑀅𑀝𑁆𑀞𑀧𑀸𑀦𑀕𑀢𑀺𑀓𑀸𑀦𑁂𑀯. 𑀢𑁂𑀦𑀸𑀳 ‘‘𑀲𑀸𑀦𑀼𑀮𑁄𑀫𑀸𑀦𑀺 𑀥𑀜𑁆𑀜𑀸𑀦𑀺, 𑀞𑀧𑁂𑀢𑁆𑀯𑀸 𑀨𑀮𑀚𑁄 𑀭𑀲𑁄’’𑀢𑀺. 𑀏𑀓𑀲𑁆𑀲 𑀧𑀦 𑀯𑀓𑁆𑀔𑀫𑀸𑀦𑀸𑀦𑀜𑁆𑀘 ‘‘𑀧𑀼𑀧𑁆𑀨𑀭𑀲𑁄’’𑀢𑀺𑀆𑀤𑀻𑀦𑀁 ‘‘𑀲𑀻𑀢𑁄𑀤𑀫𑀤𑁆𑀤𑀺𑀢𑀸𑀤𑀺𑀘𑁆𑀘𑀧𑀸𑀓𑁄 𑀯𑀸 𑀬𑀸𑀫𑀓𑀸𑀮𑀺𑀓𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀸𑀮𑀦𑀸𑀴𑀺𑀓𑁂𑀭𑀧𑀦𑀲𑀮𑀩𑀼𑀚𑀅𑀮𑀸𑀩𑀼𑀓𑀼𑀫𑁆𑀪𑀡𑁆𑀟𑀧𑀼𑀲𑁆𑀲𑀨𑀮𑀢𑀺𑀧𑀼𑀲𑀏𑀴𑀸𑀮𑀼𑀓𑀨𑀮𑀸𑀦𑀻𑀢𑀺 𑀦𑀯 𑀫𑀳𑀸𑀨𑀮𑀸𑀦𑀺, 𑀲𑀩𑁆𑀩𑀜𑁆𑀘 𑀅𑀧𑀭𑀡𑁆𑀡𑀁 𑀲𑀢𑁆𑀢𑀥𑀜𑁆𑀜𑀸𑀦𑀺 𑀅𑀦𑀼𑀮𑁄𑀫𑁂𑀦𑁆𑀢𑀻𑀢𑀺 𑀲𑀳 𑀅𑀦𑀼𑀮𑁄𑀫𑁂𑀳𑀻𑀢𑀺 𑀲𑀸𑀦𑀼𑀮𑁄𑀫𑀸𑀦𑀺. 𑀲𑀸𑀦𑀼𑀮𑁄𑀫𑀥𑀜𑁆𑀜𑀸𑀦𑀁 𑀧𑀦 𑀭𑀲𑁄 𑀬𑀸𑀯𑀓𑀸𑀮𑀺𑀓𑁄. ‘‘𑀲𑀸𑀦𑀼𑀮𑁄𑀫𑀸𑀦𑀺 𑀥𑀜𑁆𑀜𑀸𑀦𑀻’’𑀢𑀺 𑀨𑀮𑀸𑀦𑀺 𑀯𑀺𑀜𑁆𑀜𑀸𑀬𑀦𑁆𑀢𑀺. 𑀨𑀮𑀲𑀼𑀢𑀺𑀬𑀸 ‘‘𑀲𑁂𑀲𑀨𑀮𑀚𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀕𑀫𑁆𑀬𑀫𑀸𑀦𑀢𑁆𑀢𑀸 𑀦 𑀯𑀼𑀢𑁆𑀢𑀁. 𑀫𑀥𑀼𑀓𑀧𑀼𑀧𑁆𑀨𑀫𑀜𑁆𑀜𑀢𑁆𑀭𑀸𑀢𑀺 𑀫𑀥𑀼𑀓𑀧𑀼𑀧𑁆𑀨𑀁 𑀞𑀧𑁂𑀢𑁆𑀯𑀸. 𑀧𑀓𑁆𑀓𑀟𑀸𑀓𑀚𑀦𑁆𑀢𑀺 𑀧𑀓𑁆𑀓𑁂𑀳𑀺 𑀬𑀸𑀯𑀓𑀸𑀮𑀺𑀓𑁂𑀳𑀺 𑀟𑀸𑀓𑁂𑀳𑀺 𑀚𑀸𑀢𑀁 𑀭𑀲𑀁. 𑀲𑀻𑀢𑀫𑀼𑀤𑀓𑀁 𑀲𑀻𑀢𑁄𑀤𑀁, 𑀔𑀻𑀭𑁄𑀤𑁂 𑀯𑀺𑀬 𑀲𑀻𑀢𑁄𑀤𑁂 𑀫𑀤𑁆𑀤𑀺𑀢𑁄𑀢𑀺 𑀢𑀧𑁆𑀧𑀼𑀭𑀺𑀲𑁄. 𑀆𑀤𑀺𑀘𑁆𑀘-𑀲𑀤𑁆𑀤𑁄 𑀆𑀢𑀧𑁂 𑀯𑀢𑁆𑀢𑀢𑀺 𑀉𑀧𑀘𑀸𑀭𑀢𑁄𑀢𑀺 𑀆𑀤𑀺𑀘𑁆𑀘𑁂 𑀧𑀸𑀓𑁄 𑀬𑀲𑁆𑀲𑀸𑀢𑀺 𑀲𑀫𑀸𑀲𑁄.

𑁮𑁯. 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀤𑀲𑁆𑀲𑁂𑀢𑀺 ‘‘𑀲𑀧𑁆𑀧𑀻’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀲𑀢𑁆𑀢𑀸𑀳𑀓𑀸𑀮𑀺𑀓𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀺 𑀲𑀧𑁆𑀧𑀺𑀆𑀤𑀻𑀦𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀸𑀦𑀺. 𑀇𑀤𑀸𑀦𑀺 𑀲𑀧𑁆𑀧𑀺𑀆𑀤𑀻𑀦𑀺 𑀯𑀺𑀪𑀚𑀢𑀺 ‘‘𑀲𑀧𑁆𑀧𑀻’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀬𑁂𑀲𑀁 𑀕𑁄𑀫𑀳𑀺𑀁 𑀲𑀸𑀤𑀻𑀦𑀁 𑀫𑀁𑀲𑀁 𑀓𑀧𑁆𑀧𑀢𑀺, 𑀢𑁂𑀲𑀁 𑀲𑀧𑁆𑀧𑀺 𑀲𑀧𑁆𑀧𑀺 𑀦𑀸𑀫𑀸𑀢𑀺 ‘‘𑀲𑀧𑁆𑀧𑀻’’𑀢𑀺𑀆𑀤𑀺𑀦𑀸 𑀲𑀧𑁆𑀧𑀺𑀮𑀓𑁆𑀔𑀡𑀫𑀸𑀳. 𑀅𑀓𑀧𑁆𑀧𑀺𑀬𑀫𑀁𑀲𑀲𑀧𑁆𑀧𑀺𑀦𑁄𑀧𑀺 𑀓𑀧𑁆𑀧𑀺𑀬𑀲𑀫𑁆𑀪𑀯𑁂 𑀢𑀢𑁆𑀣 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀤𑀼𑀓𑁆𑀓𑀝𑀲𑁆𑀲 𑀯𑀓𑁆𑀔𑀫𑀸𑀦𑀢𑁆𑀢𑀸 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀫𑁂𑀯 𑀘𑁂𑀢𑁆𑀣 𑀤𑀲𑁆𑀲𑁂𑀢𑀼𑀁 ‘‘𑀬𑁂𑀲𑀁 𑀫𑀁𑀲𑀫𑀯𑀸𑀭𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀔𑀻𑀭𑀸𑀤𑀻𑀲𑀼 𑀳𑀺 𑀢𑁂𑀲𑀫𑀓𑀧𑁆𑀧𑀺𑀬𑀁 𑀦𑀸𑀫 𑀦𑀢𑁆𑀣𑀺. 𑀦𑀯𑀦𑀻𑀢𑀲𑁆𑀲 𑀲𑀧𑁆𑀧𑀺𑀲𑀤𑀺𑀲𑀢𑀸𑀬 𑀦𑀯𑀦𑀻𑀢𑀮𑀓𑁆𑀔𑀡𑀁 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀁. 𑀉𑀧𑀭𑀺 𑀲𑀧𑁆𑀧𑀺𑀧𑀺𑀡𑁆𑀟𑀁 𑀞𑀧𑁂𑀢𑁆𑀯𑀸 𑀲𑀻𑀢𑀮𑀧𑀸𑀬𑀸𑀲𑀁 𑀤𑁂𑀦𑁆𑀢𑀺, 𑀬𑀁 𑀧𑀸𑀬𑀸𑀲𑁂𑀦 𑀅𑀲𑀁𑀲𑀝𑁆𑀞𑀁, 𑀢𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀁, 𑀫𑀺𑀲𑁆𑀲𑀺𑀢𑀁 𑀧𑀦 𑀆𑀤𑀺𑀘𑁆𑀘𑀧𑀸𑀓𑀁 𑀓𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑀺𑀢𑀁, 𑀢𑀣𑀸 𑀔𑀻𑀭𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀢𑁂𑀮𑀫𑁆𑀧𑀺, 𑀢𑁂𑀲𑀼 𑀦𑀯𑀦𑀻𑀢𑀁 𑀦𑀸𑀫 𑀦𑀯𑀼𑀤𑁆𑀥𑀝𑀁. 𑀢𑁂𑀦 𑀓𑀢𑀁 𑀧𑀦 𑀲𑀧𑁆𑀧𑀺.

𑁯𑁦. 𑀢𑀺𑀮𑀸 𑀘 𑀯𑀲𑀸 𑀘 𑀏𑀭𑀡𑁆𑀟𑀸𑀦𑀺 𑀘 𑀫𑀥𑀼𑀓𑀸𑀦𑀺 𑀘 𑀲𑀸𑀲𑀧𑀸 𑀘𑀸𑀢𑀺 𑀤𑁆𑀯𑀦𑁆𑀤𑁄. 𑀢𑁂𑀳𑀺 𑀲𑀫𑁆𑀪𑀯𑁄 𑀬𑀲𑁆𑀲𑀸𑀢𑀺 𑀩𑀸𑀳𑀺𑀭𑀢𑁆𑀣𑁄, 𑀢𑀁 𑀢𑁂𑀮𑀁 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀔𑀼𑀤𑁆𑀤𑀸 𑀔𑀼𑀤𑁆𑀤𑀫𑀥𑀼𑀫𑀓𑁆𑀔𑀺𑀓𑀸 𑀘 𑀪𑀫𑀭𑀸 𑀘 𑀔𑀼𑀤𑁆𑀤𑀪𑀫𑀭𑀁, 𑀔𑀼𑀤𑁆𑀤𑀚𑀦𑁆𑀢𑀼𑀓𑀢𑁆𑀢𑀸 𑀦𑀧𑀼𑀁𑀲𑀓𑁂𑀓𑀯𑀘𑀦𑀁. 𑀫𑀥𑀼𑀁 𑀓𑀭𑁄𑀦𑁆𑀢𑀻𑀢𑀺 𑀫𑀥𑀼𑀓𑀭𑀺𑀬𑁄, 𑀢𑀸 𑀏𑀯 𑀫𑀓𑁆𑀔𑀺𑀓𑀸 𑀫𑀥𑀼𑀓𑀭𑀺𑀫𑀓𑁆𑀔𑀺𑀓𑀸, 𑀔𑀼𑀤𑁆𑀤𑀪𑀫𑀭𑀫𑁂𑀯 𑀫𑀥𑀼𑀓𑀭𑀺𑀫𑀓𑁆𑀔𑀺𑀓𑀸𑀢𑀺 𑀓𑀫𑁆𑀫𑀥𑀸𑀭𑀬𑁄. 𑀢𑀸𑀳𑀺 𑀓𑀢𑀁 𑀫𑀥𑀼 𑀫𑀥𑀼 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀝𑀻𑀓𑀸𑀬𑀁 𑀧𑀦 𑀯𑀺𑀲𑀼𑀁 𑀫𑀥𑀼𑀓𑀭𑀻-𑀲𑀤𑁆𑀤𑀁 𑀯𑀺𑀓𑀧𑁆𑀧𑁂𑀢𑁆𑀯𑀸 ‘‘𑀤𑀡𑁆𑀟𑀓𑁂𑀲𑀼 𑀫𑀥𑀼𑀓𑀭𑀸 𑀫𑀥𑀼𑀓𑀭𑀺𑀫𑀓𑁆𑀔𑀺𑀓𑀸 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀫𑀥𑀼𑀧𑀝𑀮𑀁 𑀯𑀸 𑀫𑀥𑀼𑀲𑀺𑀢𑁆𑀣𑀓𑀁 𑀯𑀸 𑀲𑀘𑁂 𑀫𑀥𑀼𑀦𑀸 𑀫𑀓𑁆𑀔𑀺𑀢𑀁, 𑀫𑀥𑀼𑀕𑀢𑀺𑀓𑀫𑁂𑀯. 𑀢𑀼𑀫𑁆𑀩𑀮𑀓𑀸𑀦𑀁 𑀘𑀻𑀭𑀺𑀓𑀸𑀦𑀜𑁆𑀘 𑀦𑀺𑀬𑁆𑀬𑀸𑀲𑀲𑀤𑀺𑀲𑀁 𑀫𑀥𑀼 𑀧𑀦 𑀬𑀸𑀯𑀚𑀻𑀯𑀺𑀓𑀁. 𑀭𑀲𑁄 𑀦𑀺𑀓𑁆𑀓𑀲𑀝𑁄 𑀆𑀤𑀺 𑀬𑀲𑁆𑀲𑀸 𑀲𑀸 𑀭𑀲𑀸𑀤𑀺. 𑀆𑀤𑀺-𑀲𑀤𑁆𑀤𑁂𑀦 𑀨𑀸𑀡𑀺𑀢𑀸𑀤𑀻𑀦𑀁 𑀕𑀳𑀡𑀁, 𑀲𑀸 𑀉𑀘𑁆𑀙𑀼𑀯𑀺𑀓𑀢𑀺. 𑀧𑀓𑁆𑀓𑀸𑀢𑀺 𑀅𑀯𑀢𑁆𑀣𑀼𑀓𑀧𑀓𑁆𑀓𑀸 𑀯𑀸, 𑀨𑀸𑀡𑀺𑀢𑀁 𑀨𑀸𑀡𑀺𑀢𑀁 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀲𑀻𑀢𑀽𑀤𑀓𑁂𑀦 𑀓𑀢𑀫𑀥𑀼𑀓𑀧𑀼𑀧𑁆𑀨𑀨𑀸𑀡𑀺𑀢𑀁 𑀧𑀦 𑀨𑀸𑀡𑀺𑀢𑀕𑀢𑀺𑀓𑀫𑁂𑀯. 𑀅𑀫𑁆𑀩𑀨𑀸𑀡𑀺𑀢𑀸𑀤𑀻𑀦𑀺 𑀬𑀸𑀯𑀓𑀸𑀮𑀺𑀓𑀸𑀦𑀺. 𑀏𑀢𑀸𑀦𑀺 𑀬𑀣𑀸𑀯𑀼𑀢𑁆𑀢𑀸𑀦𑀺 𑀲𑀧𑁆𑀧𑀺𑀆𑀤𑀻𑀦𑀺 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀧𑀭𑀺𑀪𑁄𑀕𑁂𑀦𑀸𑀧𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀢𑀸𑀦𑀺 𑀘 𑀧𑀘𑁆𑀙𑀸𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀸𑀦𑀺 𑀘 𑀲𑀢𑁆𑀢𑀸𑀳𑀁 𑀦𑀺𑀤𑀳𑀺𑀢𑁆𑀯𑀸 𑀦𑀺𑀭𑀸𑀫𑀺𑀲𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀺.

𑁯𑁧. 𑀇𑀤𑀸𑀦𑀺 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀯𑀲𑀸𑀬 𑀧𑀸𑀓𑀢𑁄 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸 𑀢𑀢𑁄 𑀲𑀧𑁆𑀧𑀺𑀆𑀤𑀻𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀯𑀢𑁆𑀣𑀽’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀁 𑀯𑀸 𑀅𑀢𑁆𑀢𑀦𑀸 𑀏𑀯. 𑀯𑀸-𑀲𑀤𑁆𑀤𑁂𑀦 𑀧𑀭𑁂𑀳𑀺 𑀯𑀸. 𑀅𑀫𑀸𑀦𑀼𑀲𑀸 𑀫𑀦𑀼𑀲𑁆𑀲𑀯𑀲𑀸𑀭𑀳𑀺𑀢𑀸. 𑀯𑀲𑀸 𑀅𑀘𑁆𑀙𑀸𑀤𑀻𑀦𑀁 𑀅𑀓𑀧𑁆𑀧𑀺𑀬𑀸𑀦𑀁, 𑀲𑀽𑀓𑀭𑀸𑀤𑀻𑀦𑀁 𑀓𑀧𑁆𑀧𑀺𑀬𑀸𑀦𑀜𑁆𑀘 𑀲𑀢𑁆𑀢𑀸𑀦𑀁 𑀯𑀲𑀸. 𑀲𑀯𑀢𑁆𑀣𑀼𑀧𑀓𑁆𑀓𑀸 𑀲𑀢𑁆𑀢𑀸𑀳𑀓𑀸𑀮𑀺𑀓𑀸 𑀳𑁄𑀢𑀻𑀢𑀺 𑀲𑁂𑀲𑁄. 𑀲𑀯𑀢𑁆𑀣𑀼𑀧𑀓𑁆𑀓𑀸𑀢𑀺 𑀲𑀯𑀢𑁆𑀣𑀼𑀓𑀁 𑀓𑀢𑁆𑀯𑀸 𑀧𑀓𑁆𑀓𑀸. 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀲𑀘𑁂 𑀧𑀦 𑀯𑀲𑀁 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀘𑀺𑀢𑁆𑀯𑀸 𑀢𑁂𑀮𑀁 𑀧𑀭𑀺𑀲𑁆𑀲𑀸𑀯𑀺𑀢𑀁 𑀲𑀢𑁆𑀢𑀸𑀳𑀸𑀦𑀺 𑀦𑀺𑀭𑀸𑀫𑀺𑀲𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀅𑀣 𑀧𑀭𑁂𑀳𑀺 𑀓𑀢𑀁 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁, 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀦𑀺𑀭𑀸𑀫𑀺𑀲𑀫𑁂𑀯, 𑀦𑁄 𑀘𑁂, 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺. 𑀓𑀸𑀭𑀺𑀬𑁂 𑀓𑀸𑀭𑀡𑁄𑀧𑀘𑀸𑀭𑁂𑀦 𑀧𑀦𑁂𑀢𑁆𑀣 ‘‘𑀯𑀲𑀸’’𑀢𑀺 𑀢𑁂𑀮𑀫𑁂𑀯 𑀯𑀼𑀢𑁆𑀢𑀁, 𑀯𑀲𑀸 𑀧𑀦 𑀬𑀸𑀯𑀓𑀸𑀮𑀺𑀓𑀸𑀯.

𑀝𑀻𑀓𑀸𑀬𑀁 𑀧𑀦 𑀯𑀲𑀸𑀬 ‘‘𑀲𑀢𑁆𑀢𑀸𑀳𑀓𑀸𑀮𑀺𑀓𑁂 𑀆𑀕𑀢𑀝𑁆𑀞𑀸𑀦𑀁 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑀻’’𑀢𑀺 𑀯𑀢𑁆𑀯𑀸 ‘‘𑀢𑀁 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 𑀯𑀲𑀸𑀬 𑀲𑀢𑁆𑀢𑀸𑀳𑀓𑀸𑀮𑀺𑀓𑀢𑁆𑀢𑀫𑀸𑀲𑀁𑀓𑀺𑀬𑀁 𑀯𑀼𑀢𑁆𑀢𑀁. 𑀓𑀺𑀫𑁂𑀢𑁆𑀣 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁? 𑀪𑁂𑀲𑀚𑁆𑀚𑀁 𑀅𑀦𑀼𑀚𑀸𑀦𑀢𑀸 𑀪𑀕𑀯𑀢𑀸 ‘‘𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺 𑀕𑀺𑀮𑀸𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀝𑀺𑀲𑀸𑀬𑀦𑀻𑀬𑀸𑀦𑀺 𑀪𑁂𑀲𑀚𑁆𑀚𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀧𑁆𑀧𑀺 𑀦𑀯𑀦𑀻𑀢𑀁 𑀢𑁂𑀮𑀁 𑀫𑀥𑀼 𑀨𑀸𑀡𑀺𑀢𑀁, 𑀢𑀸𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀢𑁆𑀢𑀸𑀳𑀧𑀭𑀫𑀁 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀻’’𑀢𑀺 (𑀧𑀸𑀭𑀸. 𑁬𑁨𑁨) 𑀲𑀧𑁆𑀧𑀺𑀆𑀤𑀻𑀦𑀫𑁂𑀯 𑀲𑀢𑁆𑀢𑀸𑀳𑀓𑀸𑀮𑀺𑀓𑀢𑁆𑀢𑀁 𑀯𑀼𑀢𑁆𑀢𑀁. 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁂𑀧𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀸𑀦𑀺 𑀧𑀜𑁆𑀘 𑀪𑁂𑀲𑀚𑁆𑀚𑀸𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀸𑀮𑁂𑀧𑀺 𑀯𑀺𑀓𑀸𑀮𑁂𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 (𑀫𑀳𑀸𑀯. 𑁨𑁬𑁦) 𑀢𑀸𑀦𑀺 𑀧𑀜𑁆𑀘𑁂𑀯 ‘‘𑀪𑁂𑀲𑀚𑁆𑀚𑀸𑀦𑀻’’𑀢𑀺 𑀯𑀢𑁆𑀯𑀸 𑀢𑁂𑀮𑀁 𑀦𑀺𑀬𑀫𑀢𑁄 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀲𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀅𑀘𑁆𑀙𑀯𑀲𑀁 𑀫𑀘𑁆𑀙𑀯𑀲𑀁 𑀲𑀼𑀲𑀼𑀓𑀸𑀯𑀲𑀁 𑀲𑀽𑀓𑀭𑀯𑀲𑀁 𑀕𑀤𑁆𑀭𑀪𑀯𑀲𑀁 𑀓𑀸𑀮𑁂 𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀦𑀺𑀧𑁆𑀧𑀓𑁆𑀓𑀁 𑀓𑀸𑀮𑁂 𑀲𑀁𑀲𑀝𑁆𑀞𑀁 𑀢𑁂𑀮𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 (𑀫𑀳𑀸𑀯. 𑁨𑁬𑁨) 𑀯𑀼𑀢𑁆𑀢𑀁. 𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀝𑁆𑀞𑀓𑀣𑀸𑀬𑀜𑁆𑀘 (𑀓𑀗𑁆𑀔𑀸. 𑀅𑀝𑁆𑀞. 𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀞𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑀯𑀲𑀁 𑀅𑀜𑁆𑀜𑀁 𑀬𑀁 𑀓𑀺𑀜𑁆𑀘𑀺 𑀯𑀲’’𑀦𑁆𑀢𑀺𑀆𑀤𑀺𑀦𑀸 𑀯𑀲𑀸𑀢𑁂𑀮𑀲𑁆𑀲 𑀯𑀺𑀥𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀅𑀜𑁆𑀜𑁂𑀲𑀁 𑀬𑀸𑀯𑀓𑀸𑀮𑀺𑀓𑀯𑀢𑁆𑀣𑀽𑀦𑀁 𑀯𑀢𑁆𑀣𑀼𑀁 𑀧𑀘𑀺𑀢𑀼𑀁 𑀦 𑀯𑀝𑁆𑀝𑀢𑀺𑀬𑁂𑀯𑀸’’𑀢𑀺 𑀯𑀤𑀢𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀦 𑀬𑀸𑀯𑀓𑀸𑀮𑀺𑀓𑁂𑀲𑀼 𑀯𑀲𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂𑀲𑀁 𑀬𑀸𑀯𑀓𑀸𑀮𑀺𑀓𑀯𑀢𑁆𑀣𑀽𑀦𑀁 𑀯𑀢𑁆𑀣𑀼𑀁 𑀧𑀘𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑀤𑀻𑀧𑀺𑀢𑁄𑀢𑀺 𑀯𑀲𑀸 ‘‘𑀬𑀸𑀯𑀓𑀸𑀮𑀺𑀓𑀸𑀬𑁂𑀯𑀸’’𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀓𑁄 𑀏𑀢𑁆𑀣 𑀲𑀼𑀔𑀼𑀫𑁄 𑀦𑀬𑁄𑀢𑀺.

𑀅𑀜𑁆𑀜𑁂𑀲𑀁 𑀯𑀲𑀸𑀢𑁂𑀮𑀢𑁄 𑀧𑀭𑁂𑀲𑀁 𑀬𑀸𑀯𑀓𑀸𑀮𑀺𑀓𑀯𑀢𑁆𑀣𑀽𑀦𑀁 𑀬𑁂𑀲𑀁 𑀢𑁂𑀲𑀁 𑀬𑀸𑀯𑀓𑀸𑀮𑀺𑀓𑀯𑀢𑁆𑀣𑀽𑀦𑀁 𑀲𑀧𑁆𑀧𑀺𑀆𑀤𑀻𑀦𑀁 𑀯𑀢𑁆𑀣𑀼𑀁 𑀬𑀸𑀯𑀓𑀸𑀮𑀺𑀓𑀲𑀗𑁆𑀔𑀸𑀢𑀁 𑀔𑀻𑀭𑀸𑀤𑀺𑀓𑀁 𑀦 𑀧𑀘𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀣𑀸 𑀲𑀢𑁆𑀢𑀸𑀳𑀧𑀭𑀺𑀪𑁄𑀕𑀢𑁆𑀣𑀸𑀬 𑀯𑀲𑀁 𑀓𑀸𑀮𑁂 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀸𑀮𑁂 𑀧𑀘𑀺𑀢𑀼𑀁 𑀯𑀝𑁆𑀝𑀢𑀺, 𑀦 𑀏𑀯𑀁 𑀲𑀧𑁆𑀧𑀺𑀆𑀤𑀻𑀦𑀁 𑀯𑀢𑁆𑀣𑀼𑀪𑀽𑀢𑀁 𑀔𑀻𑀭𑀸𑀤𑀺𑀬𑀸𑀯𑀓𑀸𑀮𑀺𑀓𑀁, 𑀢𑀁 𑀧𑀦 𑀲𑀢𑁆𑀢𑀸𑀳𑀧𑀭𑀺𑀪𑁄𑀕𑀢𑁆𑀣𑀸𑀬 𑀓𑀸𑀮𑁂𑀧𑀺 𑀦 𑀯𑀝𑁆𑀝𑀢𑀺. 𑀢𑀸𑀦𑀺 𑀳𑀺 𑀬𑀤𑀺 𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀬𑀁 𑀓𑀢𑀸𑀦𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀦 𑀯𑀝𑁆𑀝𑀦𑁆𑀢𑀺 𑀲𑀯𑀢𑁆𑀣𑀼𑀓𑀧𑁆𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸, 𑀲𑀸𑀫𑀺𑀲𑀁 𑀦 𑀯𑀝𑁆𑀝𑀦𑁆𑀢𑀺 𑀲𑀸𑀫𑀁𑀧𑀓𑁆𑀓𑀢𑁆𑀢𑀸, 𑀧𑀼𑀭𑁂𑀪𑀢𑁆𑀢𑀫𑁆𑀧𑀺 𑀦 𑀯𑀝𑁆𑀝𑀦𑁆𑀢𑀺 𑀬𑀸𑀯𑀓𑀸𑀮𑀺𑀓𑀯𑀢𑁆𑀣𑀼𑀢𑁄 𑀯𑀺𑀯𑁂𑀘𑀺𑀢𑀢𑁆𑀢𑀸. 𑀧𑀭𑁂𑀳𑀺 𑀓𑀢𑀸𑀦𑀺 𑀧𑀦 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀦𑁆𑀢𑀺 𑀅𑀢𑁆𑀢𑀦𑀸 𑀅𑀧𑀓𑁆𑀓𑀢𑁆𑀢𑀸. 𑀬𑀸𑀯𑀚𑀻𑀯𑀺𑀓𑀸𑀦𑀺 𑀢𑀼 𑀲𑀸𑀲𑀧𑀫𑀥𑀼𑀓𑀏𑀭𑀡𑁆𑀟𑀅𑀝𑁆𑀞𑀻𑀦𑀺 𑀢𑁂𑀮𑀓𑀭𑀡𑀢𑁆𑀣𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀤𑀳𑁂𑀯 𑀓𑀢𑀁 𑀢𑁂𑀮𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀁, 𑀤𑀼𑀢𑀺𑀬𑀤𑀺𑀯𑀲𑁂 𑀓𑀢𑀁 𑀙𑀸𑀳𑀁 𑀯𑀝𑁆𑀝𑀢𑀺, 𑀏𑀯𑀁 𑀬𑀸𑀯 𑀲𑀢𑁆𑀢𑀫𑀤𑀺𑀯𑀲𑁂 𑀓𑀢𑀁 𑀢𑀤𑀳𑁂𑀯 𑀯𑀝𑁆𑀝𑀢𑀺, 𑀉𑀕𑁆𑀕𑀢𑁂 𑀅𑀭𑀼𑀡𑁂 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀅𑀦𑀚𑁆𑀛𑁄𑀳𑀭𑀡𑀻𑀬𑀁, 𑀉𑀕𑁆𑀕𑀳𑀺𑀢𑁂𑀦 𑀬𑁂𑀦 𑀓𑁂𑀦𑀘𑀺 𑀯𑀢𑁆𑀣𑀼𑀦𑀸 𑀓𑀢𑀲𑀤𑀺𑀲𑀁 𑀳𑁄𑀢𑀺. 𑀢𑁂𑀮𑀢𑁆𑀣𑀸𑀬 𑀧𑀝𑀺𑀕𑁆𑀕𑀳𑀺𑀢𑀲𑀸𑀲𑀧𑀸𑀤𑀻𑀦𑀁 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀦 𑀤𑀼𑀓𑁆𑀓𑀝𑀁. 𑀦𑀺𑀩𑁆𑀩𑀢𑁆𑀢𑀺𑀢𑀁 𑀲𑀧𑁆𑀧𑀺 𑀯𑀸 𑀦𑀯𑀦𑀻𑀢𑀁 𑀯𑀸 𑀓𑀸𑀮𑁂𑀧𑀺 𑀯𑀺𑀓𑀸𑀮𑁂𑀧𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀘𑀺𑀢𑀼𑀁 𑀯𑀝𑁆𑀝𑀢𑀺. 𑀢𑀁 𑀧𑀦 𑀢𑀤𑀳𑀼 𑀧𑀼𑀭𑁂𑀪𑀢𑁆𑀢𑀫𑁆𑀧𑀺 𑀲𑀸𑀫𑀺𑀲𑀁 𑀦 𑀯𑀝𑁆𑀝𑀢𑀺, 𑀲𑀁𑀲𑀕𑁆𑀕𑀢𑁄 𑀬𑀸𑀯𑀓𑀸𑀮𑀺𑀓𑀫𑁆𑀧𑀺 𑀲𑀸𑀫𑀁𑀧𑀓𑁆𑀓𑀁 𑀲𑀺𑀬𑀸𑀢𑀺 𑀦𑀺𑀭𑀸𑀫𑀺𑀲𑀁 𑀧𑀦 𑀲𑀢𑁆𑀢𑀸𑀳𑀫𑁆𑀧𑀺 𑀯𑀝𑁆𑀝𑀢𑀺.

𑁯𑁨. 𑀇𑀤𑀸𑀦𑀺 ‘‘𑀳𑀮𑀺𑀤𑁆𑀤𑀺’’𑀦𑁆𑀢𑀺𑀆𑀤𑀺𑀦𑀸 𑀬𑀸𑀯𑀚𑀻𑀯𑀺𑀓𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 ‘‘𑀳𑀮𑀺𑀤𑁆𑀤𑀺 𑀦𑀸𑀫 𑀦𑀺𑀲𑀸’’𑀢𑀺𑀆𑀤𑀺𑀦𑀸 𑀯𑀼𑀘𑁆𑀘𑀫𑀸𑀦𑁂𑀧𑀺 𑀧𑀭𑀺𑀬𑀸𑀬𑀯𑀘𑀦𑁂 𑀲𑀫𑁆𑀫𑁄𑀳𑁄 𑀲𑀺𑀬𑀸𑀢𑀺 𑀦 𑀢𑀁𑀯𑀘𑀦𑁂𑀦 𑀪𑀼𑀲𑀁 𑀲𑀫𑁆𑀫𑁄𑀳𑀬𑀺𑀲𑁆𑀲𑀸𑀫, 𑀢𑀲𑁆𑀫𑀸 𑀢𑀸𑀦𑀺 𑀉𑀧𑀤𑁂𑀲𑀢𑁄𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀢𑁆𑀣 ‘‘𑀳𑀮𑀺𑀤𑁆𑀤𑀺’’𑀦𑁆𑀢𑀺 𑀩𑀺𑀦𑁆𑀤𑀼𑀆𑀕𑀫𑁂𑀦 𑀯𑀼𑀢𑁆𑀢𑀁. 𑀉𑀧𑀘𑀸𑀭𑁂𑀦 𑀢𑀼 𑀫𑀽𑀮𑀸𑀤𑀻𑀦𑀺 𑀳𑀮𑀺𑀤𑁆𑀤𑀸𑀤𑀺𑀲𑀤𑁆𑀤𑁂𑀦 𑀯𑀼𑀢𑁆𑀢𑀸𑀦𑀺. 𑀢𑀸 𑀳𑀮𑀺𑀤𑁆𑀤𑀸𑀤𑀬𑁄 𑀓𑁂𑀘𑀺 𑀇𑀢𑁆𑀣𑀺𑀮𑀺𑀗𑁆𑀕𑀸𑀬𑁂𑀯. 𑀫𑀽𑀮𑀨𑀮𑁂 𑀯𑀘𑀢𑁆𑀢𑀜𑁆𑀘…𑀧𑁂… 𑀪𑀤𑁆𑀤𑀫𑀼𑀢𑁆𑀢𑀜𑁆𑀘 𑀅𑀢𑀺𑀯𑀺𑀲𑀸𑀢𑀺 𑀧𑀤𑀘𑁆𑀙𑁂𑀤𑁄. 𑀧𑀜𑁆𑀘𑀫𑀽𑀮-𑀲𑀤𑁆𑀤𑁂𑀦 𑀘𑀽𑀴𑀧𑀜𑁆𑀘𑀫𑀽𑀮𑀫𑀳𑀸𑀧𑀜𑁆𑀘𑀫𑀽𑀮𑀸𑀦𑀺 𑀕𑀳𑀺𑀢𑀸𑀦𑀺. 𑀆𑀤𑀺-𑀲𑀤𑁆𑀤𑁂𑀦 𑀯𑀚𑀓𑀮𑀺𑀫𑀽𑀮𑁂 𑀚𑀭𑀝𑁆𑀞𑀦𑁆𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄.

𑁯𑁩-𑁫. 𑀕𑁄𑀝𑁆𑀞𑀨𑀮𑀦𑁆𑀢𑀺 𑀫𑀤𑀦𑀨𑀮𑀦𑁆𑀢𑀺 𑀯𑀤𑀦𑁆𑀢𑀻𑀢𑀺. 𑀢𑀻𑀡𑀺 𑀨𑀮𑀸𑀦𑀺 𑀬𑀲𑁆𑀲𑀁 𑀲𑀗𑁆𑀕𑀳𑀺𑀢𑀁 𑀲𑀸 𑀢𑀺𑀨𑀮𑀸. 𑀏𑀭𑀡𑁆𑀟𑀓𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀚𑀸𑀢𑀺𑀭𑀼𑀓𑁆𑀔𑀸𑀤𑀻𑀦𑀁 𑀕𑀳𑀡𑀁. 𑀲𑀼𑀮𑀲𑀸𑀤𑀻𑀦𑀁 𑀧𑀡𑁆𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀤𑀺-𑀲𑀤𑁆𑀤𑁂𑀦 𑀅𑀲𑁄𑀓𑀸𑀤𑀻𑀦𑀁 𑀕𑀳𑀡𑀁. 𑀲𑀽𑀧𑁂𑀬𑁆𑀬𑀧𑀡𑁆𑀡𑀦𑁆𑀢𑀺 𑀢𑀫𑁆𑀩𑀓𑀢𑀡𑁆𑀟𑀼𑀮𑁂𑀬𑁆𑀬𑀸𑀤𑀺𑀲𑀽𑀧𑀬𑁄𑀕𑁆𑀕𑀧𑀡𑁆𑀡𑀁. 𑀉𑀘𑁆𑀙𑀼𑀦𑀺𑀬𑁆𑀬𑀸𑀲𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑁄 𑀦𑀺𑀬𑁆𑀬𑀸𑀲𑁄 𑀘 𑀲𑀭𑀲𑀁 𑀉𑀘𑁆𑀙𑀼𑀚𑀁 𑀢𑀘𑀜𑁆𑀘 𑀞𑀧𑁂𑀢𑁆𑀯𑀸 𑀲𑀩𑁆𑀩𑁄 𑀢𑀘𑁄 𑀘𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀳𑀺𑀗𑁆𑀕𑀼𑀓𑀡𑀺𑀓𑀸𑀭𑀦𑀺𑀬𑁆𑀬𑀸𑀲𑀸𑀤𑀺 𑀲𑀩𑁆𑀩𑁄 𑀦𑀺𑀬𑁆𑀬𑀸𑀲𑁄 𑀦𑀸𑀫. 𑀦𑀺𑀭𑀲𑀉𑀘𑁆𑀙𑀼𑀢𑀘𑀸𑀤𑀺 𑀲𑀩𑁆𑀩𑁄 𑀢𑀘𑁄 𑀦𑀸𑀫. 𑀮𑁄𑀡𑀁 𑀲𑀸𑀫𑀼𑀤𑁆𑀤𑀸𑀤𑀺. 𑀮𑁄𑀳𑀁 𑀅𑀬𑀢𑀫𑁆𑀩𑀸𑀤𑀺. 𑀲𑀺𑀮𑀸 𑀓𑀸𑀴𑀲𑀺𑀮𑀸𑀤𑀺.

𑁯𑁬. 𑀲𑀼𑀤𑁆𑀥𑀲𑀺𑀢𑁆𑀣𑀦𑁆𑀢𑀺 𑀫𑀥𑀼𑀦𑀸 𑀅𑀫𑀓𑁆𑀔𑀺𑀢𑀁. 𑀫𑀥𑀼𑀫𑀓𑁆𑀔𑀺𑀢𑀁 𑀧𑀦 𑀲𑀢𑁆𑀢𑀸𑀳𑀓𑀸𑀮𑀺𑀓𑀁. 𑀬𑀜𑁆𑀘 𑀓𑀺𑀜𑁆𑀘𑀺 𑀲𑀼𑀛𑀸𑀧𑀺𑀢𑀦𑁆𑀢𑀺 𑀤𑀼𑀚𑁆𑀛𑀸𑀧𑀺𑀢𑀁 𑀅𑀓𑀢𑁆𑀯𑀸 𑀲𑀼𑀚𑁆𑀛𑀸𑀧𑀺𑀢𑀁 𑀬𑀁 𑀓𑀺𑀜𑁆𑀘𑀺 𑀘. 𑀯𑀺𑀓𑀝𑀸𑀤𑀺𑀧𑁆𑀧𑀪𑁂𑀤𑀦𑁆𑀢𑀺 𑀯𑀺𑀓𑀝𑀁 𑀕𑀽𑀣𑀫𑀢𑁆𑀢𑀺𑀓𑀸𑀫𑀼𑀢𑁆𑀢𑀙𑀸𑀭𑀺𑀓𑀸𑀲𑀗𑁆𑀔𑀸𑀢𑀁 𑀆𑀤𑀺 𑀬𑀲𑁆𑀲, 𑀲𑁄 𑀧𑀪𑁂𑀤𑁄 𑀬𑀲𑁆𑀲𑀸𑀢𑀺 𑀩𑀸𑀳𑀺𑀭𑀢𑁆𑀣𑁄, 𑀢𑀁. 𑀬𑀁 𑀓𑀺𑀜𑁆𑀘𑀺 𑀘𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀧𑀦 𑀆𑀤𑀺-𑀲𑀤𑁆𑀤𑁂𑀦 𑀓𑀦𑁆𑀤𑀔𑀸𑀤𑀦𑀻𑀬𑁂 𑀔𑀻𑀭𑀓𑀸𑀓𑁄𑀮𑀸𑀤𑀬𑁄, 𑀫𑀼𑀴𑀸𑀮𑀔𑀸𑀤𑀦𑀻𑀬𑁂 𑀳𑀮𑀺𑀤𑁆𑀤𑀺𑀲𑀺𑀗𑁆𑀕𑀺𑀯𑁂𑀭𑀫𑀽𑀮𑀸𑀤𑀬𑁄, 𑀫𑀢𑁆𑀣𑀓𑀔𑀸𑀤𑀦𑀻𑀬𑁂 𑀳𑀮𑀺𑀤𑁆𑀤𑀺𑀲𑀺𑀗𑁆𑀕𑀺𑀯𑁂𑀭𑀓𑀴𑀻𑀭𑀸𑀤𑀬𑁄, 𑀔𑀦𑁆𑀥𑀔𑀸𑀤𑀦𑀻𑀬𑁂 𑀉𑀧𑁆𑀧𑀮𑀧𑀡𑁆𑀡𑀤𑀡𑁆𑀟𑀸𑀤𑀬𑁄, 𑀧𑀼𑀧𑁆𑀨𑀔𑀸𑀤𑀦𑀻𑀬𑁂 𑀘𑀫𑁆𑀧𑀓𑀧𑀼𑀧𑁆𑀨𑀸𑀤𑀬𑁄, 𑀅𑀝𑁆𑀞𑀺𑀔𑀸𑀤𑀦𑀻𑀬𑁂 𑀫𑀥𑀼𑀓𑀝𑁆𑀞𑀺𑀏𑀭𑀡𑁆𑀟𑀲𑀸𑀲𑀧𑀸𑀤𑀬𑁄, 𑀧𑀺𑀝𑁆𑀞𑀔𑀸𑀤𑀦𑀻𑀬𑁂 𑀅𑀥𑁄𑀢𑀢𑀸𑀮𑀧𑀺𑀝𑁆𑀞𑀸𑀤𑀬𑁄 𑀘 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑁯𑁭. 𑀇𑀤𑀸𑀦𑀺 𑀲𑀩𑁆𑀩𑀲𑁄 𑀬𑀸𑀯𑀚𑀻𑀯𑀺𑀓𑀁 𑀤𑀲𑁆𑀲𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀯𑀼𑀢𑁆𑀢𑀸𑀦𑀺 𑀘 𑀅𑀯𑀼𑀢𑁆𑀢𑀸𑀦𑀺 𑀘 𑀏𑀓𑀢𑁄 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀢𑀢𑁆𑀣 𑀮𑀓𑁆𑀔𑀡𑀁 𑀞𑀧𑁂𑀦𑁆𑀢𑁄 ‘‘𑀫𑀽𑀮’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀲𑀸𑀭𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀸𑀭’’𑀦𑁆𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦𑀸𑀳. ‘‘𑀲𑀸𑀭𑁄 𑀩𑀮𑁂 𑀣𑀺𑀭𑀁𑀲𑁂 𑀘𑀸’’𑀢𑀺 𑀳𑀺 𑀦𑀺𑀖𑀡𑁆𑀟𑀼. 𑀆𑀳𑀸𑀭𑀝𑁆𑀞𑀦𑁆𑀢𑀺 𑀆𑀳𑀸𑀭𑁂𑀦 𑀚𑀸𑀢𑁄 𑀅𑀢𑁆𑀣𑁄 𑀧𑀬𑁄𑀚𑀦𑀁 𑀆𑀳𑀸𑀭𑀢𑁆𑀣𑁄, 𑀲𑁄𑀯 𑀆𑀳𑀸𑀭𑀝𑁆𑀞𑁄, 𑀢𑀁 𑀆𑀳𑀸𑀭𑀓𑀺𑀘𑁆𑀘𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁯𑁮. 𑀇𑀤𑀸𑀦𑀺 𑀘𑀢𑀽𑀲𑀼 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀸𑀤𑀺𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀺 ‘‘𑀲𑀩𑁆𑀩𑀸’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀲𑀩𑁆𑀩𑁂 𑀓𑀸𑀮𑀺𑀓𑀸, 𑀢𑁂𑀲𑀁 𑀲𑀫𑁆𑀪𑁄𑀕𑁄 𑀅𑀦𑀼𑀪𑀯𑁄𑀢𑀺 𑀲𑀫𑀸𑀲𑁄. 𑀓𑀸𑀮𑁂𑀢𑀺 𑀧𑀼𑀩𑁆𑀩𑀡𑁆𑀳𑀓𑀸𑀮𑁂. 𑀲𑀩𑁆𑀩𑀲𑁆𑀲𑀸𑀢𑀺 𑀕𑀺𑀮𑀸𑀦𑀸𑀕𑀺𑀮𑀸𑀦𑀲𑁆𑀲. 𑀲𑀢𑀺 𑀧𑀘𑁆𑀘𑀬𑁂𑀢𑀺 𑀢𑀻𑀲𑀼 𑀬𑀸𑀫𑀓𑀸𑀮𑀺𑀓𑀁 𑀧𑀺𑀧𑀸𑀲𑀸𑀤𑀺𑀓𑀸𑀭𑀡𑁂 𑀲𑀢𑀺, 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀬𑀸𑀯𑀚𑀻𑀯𑀺𑀓𑀜𑁆𑀘 𑀕𑁂𑀮𑀜𑁆𑀜𑀓𑀸𑀭𑀡𑁂 𑀲𑀢𑀻𑀢𑀺 𑀅𑀢𑁆𑀣𑁄, 𑀓𑀸𑀮𑀢𑁄 𑀯𑀺𑀕𑀢𑁄 𑀯𑀺𑀓𑀸𑀮𑁄, 𑀢𑀲𑁆𑀫𑀺𑀁, 𑀬𑀸𑀫𑀓𑀸𑀮𑀺𑀓𑀁 𑀯𑀺𑀓𑀸𑀮𑁂 𑀆𑀳𑀸𑀭𑀢𑁆𑀣𑀸𑀬 𑀅𑀚𑁆𑀛𑁄𑀳𑀭𑀡𑁂, 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀧𑀦 𑀬𑀸𑀯𑀚𑀻𑀯𑀺𑀓𑀜𑁆𑀘 𑀢𑀤𑀢𑁆𑀣𑀸𑀬 𑀧𑀝𑀺𑀕𑁆𑀕𑀳𑀡𑀫𑀢𑁆𑀢𑁂𑀧𑀺 𑀤𑀼𑀓𑁆𑀓𑀝𑀁.

𑁯𑁯. 𑀉𑀪𑁄𑀢𑀺 𑀬𑀸𑀯𑀓𑀸𑀮𑀺𑀓𑀁 𑀬𑀸𑀫𑀓𑀸𑀮𑀺𑀓𑀜𑁆𑀘. 𑀢𑀢𑁆𑀣 𑀬𑀸𑀯𑀓𑀸𑀮𑀺𑀓𑀁 𑀅𑀢𑁆𑀢𑀦𑁄 𑀓𑀸𑀮𑀸𑀢𑀺𑀓𑁆𑀓𑀦𑁆𑀢𑀁 𑀯𑀺𑀓𑀸𑀮𑀪𑁄𑀚𑀦𑀪𑀺𑀓𑁆𑀔𑀸𑀧𑀤𑁂𑀦 𑀧𑀸𑀘𑀺𑀢𑁆𑀢𑀺𑀬𑀁 𑀚𑀦𑀬𑀢𑀺, 𑀬𑀸𑀫𑀓𑀸𑀮𑀺𑀓𑀁 𑀬𑀸𑀫𑀸𑀢𑀺𑀓𑁆𑀓𑀦𑁆𑀢𑀁 𑀲𑀦𑁆𑀦𑀺𑀥𑀺𑀲𑀺𑀓𑁆𑀔𑀸𑀧𑀤𑁂𑀦. 𑀏𑀢𑁂 𑀉𑀪𑁄𑀧𑀺 𑀅𑀦𑁆𑀢𑁄𑀯𑀼𑀢𑁆𑀣𑀜𑁆𑀘 𑀲𑀦𑁆𑀦𑀺𑀥𑀺𑀜𑁆𑀘 𑀚𑀦𑀬𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀦𑁆𑀢𑁄𑀯𑀼𑀢𑁆𑀣𑀁 𑀲𑀦𑁆𑀦𑀺𑀥𑀺’’𑀦𑁆𑀢𑀺 𑀪𑀸𑀯𑀧𑁆𑀧𑀥𑀸𑀦𑁄𑀬𑀁 𑀦𑀺𑀤𑁆𑀤𑁂𑀲𑁄, 𑀅𑀦𑁆𑀢𑁄𑀯𑀼𑀢𑁆𑀣𑀢𑁆𑀢𑀁 𑀲𑀦𑁆𑀦𑀺𑀥𑀺𑀢𑁆𑀢𑀜𑁆𑀘𑀸𑀢𑀺 𑀅𑀢𑁆𑀣𑁄.

𑁧𑁦𑁦. 𑀅𑀢𑀺𑀦𑀸𑀫𑀺𑀢𑁂𑀢𑀺 𑀅𑀢𑀺𑀓𑁆𑀓𑀸𑀫𑀺𑀢𑁂. 𑀧𑀸𑀘𑀺𑀢𑁆𑀢𑀻𑀢𑀺 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀦𑁆𑀢𑀁 𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺 𑀘 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀘𑁂 𑀤𑁆𑀯𑀺𑀦𑁆𑀦𑀁 𑀲𑀦𑁆𑀢𑀓𑀁 𑀏𑀓𑁂𑀦 𑀧𑀝𑀺𑀕𑁆𑀕𑀳𑀺𑀢𑀁 𑀅𑀯𑀺𑀪𑀢𑁆𑀢𑀁 𑀳𑁄𑀢𑀺, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀦𑀸𑀧𑀢𑁆𑀢𑀺, 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀧𑀦 𑀦 𑀯𑀝𑁆𑀝𑀢𑀺. 𑀧𑀸𑀴𑀺𑀦𑀸𑀭𑀼𑀴𑁆𑀳𑁂𑀢𑀺 𑀧𑀸𑀴𑀺𑀬𑀁 𑀅𑀦𑀸𑀭𑀼𑀴𑁆𑀳𑁂 𑀲𑀧𑁆𑀧𑀺𑀆𑀤𑀺𑀫𑁆𑀳𑀺 𑀲𑀢𑁆𑀢 𑀅𑀳𑀸𑀦𑀺 𑀅𑀢𑀺𑀦𑀸𑀫𑀺𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀧𑁆𑀧𑀻𑀢𑀺 𑀫𑀦𑀼𑀲𑁆𑀲𑀸𑀤𑀻𑀦𑀁 𑀲𑀧𑁆𑀧𑀺. 𑀆𑀤𑀺-𑀲𑀤𑁆𑀤𑁂𑀦 𑀢𑁂𑀲𑀁𑀬𑁂𑀯 𑀦𑀯𑀦𑀻𑀢𑀁, 𑀦𑀸𑀴𑀺𑀓𑁂𑀭𑀸𑀤𑀺𑀢𑁂𑀮𑀁, 𑀲𑀻𑀢𑁄𑀤𑀓𑁂𑀦 𑀓𑀢𑀁 𑀫𑀥𑀼𑀓𑀧𑀼𑀧𑁆𑀨𑀨𑀸𑀡𑀺𑀢𑀜𑁆𑀘 𑀲𑀗𑁆𑀕𑀳𑀺𑀢𑀁.

𑁧𑁦𑁧. 𑀦𑀺𑀲𑁆𑀲𑀝𑁆𑀞𑀮𑀤𑁆𑀥𑀦𑁆𑀢𑀺 𑀦𑀺𑀲𑁆𑀲𑀝𑁆𑀞𑀁 𑀯𑀺𑀦𑀬𑀓𑀫𑁆𑀫𑀯𑀲𑁂𑀦 𑀦𑀺𑀲𑁆𑀲𑀚𑁆𑀚𑀺𑀢𑀜𑁆𑀘 𑀢𑀁 𑀮𑀤𑁆𑀥𑀜𑁆𑀘 𑀧𑀼𑀦 𑀢𑀣𑁂𑀯𑀸𑀢𑀺 𑀦𑀺𑀲𑁆𑀲𑀝𑁆𑀞𑀮𑀤𑁆𑀥𑀁. 𑀢𑀁 𑀕𑀳𑁂𑀢𑁆𑀯𑀸𑀢𑀺 𑀲𑁂𑀲𑁄. 𑀦𑀺𑀲𑁆𑀲𑀚𑁆𑀚𑀦𑀯𑀺𑀥𑀸𑀦𑀁 𑀧𑀦 𑀯𑀓𑁆𑀔𑀫𑀸𑀦𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. ‘‘𑀦𑀗𑁆𑀕’’𑀦𑁆𑀢𑀺𑀆𑀤𑀺 𑀉𑀧𑀮𑀓𑁆𑀔𑀡𑀫𑀢𑁆𑀢𑀁. 𑀢𑁂𑀦 𑀫𑀓𑁆𑀔𑀺𑀢𑀸𑀦𑀺 𑀓𑀸𑀲𑀸𑀯𑀸𑀤𑀻𑀦𑀺 𑀘 𑀧𑀦 𑀅𑀧𑀭𑀺𑀪𑁄𑀕𑀸𑀦𑀺𑀬𑁂𑀯. 𑀅𑀜𑁆𑀜𑀲𑁆𑀲 𑀧𑀦 𑀓𑀸𑀬𑀺𑀓𑀧𑀭𑀺𑀪𑁄𑀕𑁄 𑀯𑀝𑁆𑀝𑀢𑀺. 𑀯𑀺𑀓𑀧𑁆𑀧𑁂𑀦𑁆𑀢𑀲𑁆𑀲 𑀲𑀢𑁆𑀢𑀸𑀳𑁂 𑀲𑀸𑀫𑀡𑁂𑀭𑀲𑁆𑀲𑀸𑀢𑀺 𑀏𑀢𑁆𑀣 𑀝𑀻𑀓𑀸𑀬𑀁 ‘‘𑀇𑀤𑀁 𑀲𑀧𑁆𑀧𑀺𑀁 𑀢𑀼𑀬𑁆𑀳𑀁 𑀯𑀺𑀓𑀧𑁆𑀧𑁂𑀫𑀻’’𑀢𑀺𑀆𑀤𑀺𑀦𑀸 𑀢𑁂𑀲𑀁 𑀢𑁂𑀲𑀁 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀲𑀫𑁆𑀫𑀼𑀔𑀸𑀧𑀭𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀯𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀲𑀸𑀥𑀬𑀦𑁆𑀢𑁂𑀳𑀺 𑀅𑀯𑀺𑀓𑀧𑁆𑀧𑀺𑀢𑁂 𑀯𑀺𑀓𑀧𑁆𑀧𑀺𑀢𑀲𑀜𑁆𑀜𑀻 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀆𑀧𑀢𑁆𑀢𑀺𑀯𑀸𑀭𑁂 𑀧𑀸𑀴𑀺 𑀆𑀳𑀝𑀸. ‘‘𑀲𑀘𑁂 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀯𑀺𑀓𑀧𑁆𑀧𑁂𑀢𑀺, 𑀅𑀢𑁆𑀢𑀦𑁄 𑀏𑀯 𑀲𑀦𑁆𑀢𑀓𑀁 𑀳𑁄𑀢𑀺, 𑀧𑀝𑀺𑀕𑁆𑀕𑀳𑀡𑀫𑁆𑀧𑀺 𑀦 𑀯𑀺𑀚𑀳𑀢𑀻’’𑀢𑀺 𑀤𑁄𑀲𑀁 𑀯𑀢𑁆𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀯𑀺𑀓𑀧𑁆𑀧𑀦𑁂 𑀅𑀢𑁆𑀢𑀲𑀦𑁆𑀢𑀓𑀢𑁆𑀢𑀸𑀪𑀸𑀯𑁄, 𑀧𑀝𑀺𑀕𑁆𑀕𑀳𑀡𑀯𑀺𑀚𑀳𑀦𑀜𑁆𑀘 𑀧𑀬𑁄𑀚𑀦𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀤𑀸𑀫 𑁋 𑀆𑀧𑀢𑁆𑀢𑀺𑀯𑀸𑀭𑁂 ‘‘𑀅𑀯𑀺𑀓𑀧𑁆𑀧𑀺𑀢𑁂’’𑀢𑀺𑀆𑀤𑀺𑀧𑀸𑀴𑀺𑀬𑁂𑀯 𑀦𑀢𑁆𑀣𑀺, ‘‘𑀅𑀦𑀥𑀺𑀝𑁆𑀞𑀺𑀢𑁂 𑀅𑀥𑀺𑀝𑁆𑀞𑀺𑀢𑀲𑀜𑁆𑀜𑀻 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀅𑀯𑀺𑀲𑁆𑀲𑀚𑁆𑀚𑀺𑀢𑁂 𑀯𑀺𑀲𑁆𑀲𑀚𑁆𑀚𑀺𑀢𑀲𑀜𑁆𑀜𑀻 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁬𑁨𑁪) 𑀧𑀸𑀴𑀺𑀬𑀸 𑀆𑀕𑀢𑀢𑁆𑀢𑀸 𑀢𑀤𑀦𑀼𑀭𑀽𑀧𑀫𑁂𑀯 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 ‘‘𑀅𑀥𑀺𑀝𑁆𑀞𑁂𑀢𑀺, 𑀯𑀺𑀲𑁆𑀲𑀚𑁆𑀚𑁂𑀢𑀻’’𑀢𑀺𑀆𑀤𑀺𑀦𑀸𑀯 𑀧𑀸𑀴𑀺 𑀆𑀕𑀢𑀸. 𑀬𑀤𑀺 𑀪𑀯𑁂𑀬𑁆𑀬, 𑀯𑀡𑁆𑀡𑀦𑀻𑀬𑀝𑁆𑀞𑀸𑀦𑀢𑀸𑀬 𑀅𑀝𑁆𑀞𑀓𑀣𑀸𑀬 𑀪𑀯𑀺𑀢𑀩𑁆𑀩𑀁, 𑀦 𑀘𑁂𑀢𑁆𑀣 𑀅𑀝𑁆𑀞𑀓𑀣𑀸𑀬𑀁 𑀯𑀺𑀚𑁆𑀚𑀢𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀯𑀺𑀓𑀧𑁆𑀧𑀦𑁂 𑀘 𑀓𑀣𑀁 𑀧𑀝𑀺𑀕𑁆𑀕𑀳𑀡𑀁 𑀯𑀺𑀚𑀳𑀢𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀸𑀤𑀻𑀲𑀼 𑀙𑀲𑀼 𑀧𑀝𑀺𑀕𑁆𑀕𑀳𑀡𑀯𑀺𑀚𑀳𑀦𑀓𑀸𑀭𑀡𑁂𑀲𑀼 𑀯𑀺𑀓𑀧𑁆𑀧𑀦𑀲𑁆𑀲 𑀅𑀦𑀦𑁆𑀢𑁄𑀕𑀥𑀢𑁆𑀢𑀸, 𑀢𑀲𑁆𑀫𑀸 𑀦𑀸𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺.

𑀫𑀬𑀫𑁂𑀢𑁆𑀣 𑀏𑀯𑀫𑀢𑁆𑀣𑀁 𑀪𑀡𑀸𑀫 𑁋 𑀯𑀺𑀓𑀧𑁆𑀧𑁂𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 𑀯𑀺𑀓𑀧𑁆𑀧𑀦𑀁 𑀲𑀁𑀯𑀺𑀤𑀳𑀦𑀁 ‘‘𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁄’’𑀢𑀺𑀆𑀤𑀻𑀲𑀼 𑀯𑀺𑀬, 𑀉𑀪𑀬𑀢𑁆𑀣 𑀧𑀦 𑀉𑀧𑀲𑀕𑁆𑀕𑁂𑀳𑀺 𑀦𑀸𑀦𑀢𑁆𑀢𑀫𑀢𑁆𑀢𑀁, 𑀢𑀲𑁆𑀫𑀸 𑀅𑀦𑁆𑀢𑁄𑀲𑀢𑁆𑀢𑀸𑀳𑁂 𑀲𑀸𑀫𑀡𑁂𑀭𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀯𑀺𑀓𑀧𑁆𑀧𑁂𑀦𑁆𑀢𑀲𑁆𑀲 𑀲𑀁𑀯𑀺𑀤𑀳𑀦𑁆𑀢𑀲𑁆𑀲 𑀧𑀭𑀺𑀘𑁆𑀘𑀸𑀕𑀲𑀜𑁆𑀜𑀁 𑀧𑀭𑀺𑀘𑁆𑀘𑀸𑀕𑀘𑁂𑀢𑀦𑀁 𑀧𑀭𑀺𑀘𑁆𑀘𑀸𑀕𑀸𑀥𑀺𑀧𑁆𑀧𑀸𑀬𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀘 𑀫𑀳𑀸𑀲𑀼𑀫𑀢𑁆𑀣𑁂𑀭𑀯𑀸𑀤𑀫𑁄𑀮𑀼𑀩𑁆𑀪 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑀺 ‘‘𑀢𑁂𑀦 𑀘𑀺𑀢𑁆𑀢𑁂𑀦𑀸’’𑀢𑀺𑀆𑀤𑀻𑀲𑀼 𑀧𑀸𑀴𑀺𑀯𑀘𑀦𑁂𑀲𑀼 𑀅𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁂𑀦, ‘‘𑀇𑀤𑀁 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 𑀅𑀦𑁆𑀢𑁄𑀲𑀢𑁆𑀢𑀸𑀳𑁂 𑀤𑀢𑁆𑀯𑀸 𑀧𑀘𑁆𑀙𑀸 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁫). 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦𑀸𑀳 ‘‘𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀦𑁆𑀢𑀲𑁆𑀲 𑀧𑀦 𑀧𑀭𑀺𑀪𑁄𑀕𑁂 𑀅𑀦𑀸𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀫𑀺𑀤𑀁 𑀯𑀼𑀢𑁆𑀢’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁫). 𑀅𑀬𑀫𑁂𑀯 𑀯𑀸𑀤𑁄 𑀢𑁂𑀲𑀼 𑀲𑀼𑀦𑁆𑀤𑀭𑀢𑀭𑁄. 𑀲𑀢𑁆𑀢𑀸𑀳𑁂 𑀫𑀓𑁆𑀔𑀦𑀸𑀤𑀺𑀁 𑀅𑀥𑀺𑀝𑁆𑀞𑀢𑁄 𑀘 𑀅𑀜𑁆𑀜𑀲𑁆𑀲 𑀤𑀤𑀢𑁄𑀧𑀺 𑀘 𑀅𑀦𑀸𑀧𑀢𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀤𑀺-𑀲𑀤𑁆𑀤𑁂𑀦 𑀅𑀩𑁆𑀪𑀜𑁆𑀚𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑁋 𑀲𑀧𑁆𑀧𑀺𑀆𑀤𑀺𑀁 𑀅𑀩𑁆𑀪𑀜𑁆𑀚𑀦𑀸𑀤𑀺𑀁 𑀫𑀥𑀼𑀁 𑀅𑀭𑀼𑀫𑀓𑁆𑀔𑀦𑀁, 𑀨𑀸𑀡𑀺𑀢𑀁 𑀖𑀭𑀥𑀽𑀧𑀦𑀁 𑀅𑀥𑀺𑀝𑁆𑀞𑀢𑁄 𑀅𑀦𑀸𑀧𑀢𑁆𑀢𑀻𑀢𑀺. 𑀅𑀜𑁆𑀜𑀲𑁆𑀲𑀸𑀢𑀺 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀯𑀸.

𑁧𑁦𑁨. 𑀬𑀸𑀯𑀓𑀸𑀮𑀺𑀓𑀆𑀤𑀻𑀦𑀺 𑀅𑀢𑁆𑀢𑀦𑀸 𑀲𑀳 𑀲𑀁𑀲𑀝𑁆𑀞𑀸𑀦𑀺 𑀲𑀩𑁆𑀪𑀸𑀯𑀁 𑀕𑀸𑀳𑀸𑀧𑀬𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀪𑀸𑀯𑀦𑁆𑀢𑀺 𑀲𑀲𑁆𑀲 𑀅𑀢𑁆𑀢𑀦𑁄 𑀪𑀸𑀯𑁄 𑀤𑁆𑀯𑀺𑀢𑁆𑀢𑁂 𑀲𑀩𑁆𑀪𑀸𑀯𑁄, 𑀢𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀯𑀁, 𑀢𑀲𑁆𑀫𑀸. 𑀏𑀯𑀫𑀼𑀤𑀻𑀭𑀺𑀢𑀦𑁆𑀢𑀺 𑀏𑀯𑀁 ‘‘𑀯𑀺𑀓𑀧𑁆𑀧𑁂𑀦𑁆𑀢𑀲𑁆𑀲 𑀲𑀢𑁆𑀢𑀸𑀳𑁂’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁. 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀲𑁆𑀫𑀸 𑀅𑀢𑁆𑀢𑀦𑀸 𑀲𑀁𑀲𑀝𑁆𑀞𑀸𑀦𑀺 𑀅𑀢𑁆𑀢𑀦𑁄 𑀪𑀸𑀯𑀁 𑀕𑀸𑀳𑀸𑀧𑀬𑀦𑁆𑀢𑀺 𑀬𑀸𑀯𑀓𑀸𑀮𑀺𑀓𑀸𑀤𑀻𑀦𑀺, 𑀢𑀲𑁆𑀫𑀸 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀸𑀫𑀺𑀢𑀸𑀦𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀸𑀦𑀺 𑀧𑀸𑀘𑀺𑀢𑁆𑀢𑀺𑀬𑀚𑀦𑀓𑀸𑀦𑀺 𑀲𑀁𑀲𑀝𑁆𑀞𑀸𑀦𑀺 𑀅𑀢𑁆𑀢𑀲𑀁𑀲𑀝𑁆𑀞𑀸𑀦𑀺𑀧𑀺 𑀧𑀸𑀘𑀺𑀢𑁆𑀢𑀺𑀬𑀚𑀦𑀓𑀸𑀦𑀺 𑀓𑀭𑁄𑀦𑁆𑀢𑀻𑀢𑀺 𑀅𑀯𑀺𑀓𑀧𑁆𑀧𑀦𑀸𑀤𑀺𑀫𑁆𑀳𑀺 𑀲𑀢𑀺 𑀩𑁆𑀬𑀢𑀺𑀭𑁂𑀓𑀢𑁄 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀧𑀭𑀺𑀤𑀻𑀧𑀓𑀁 ‘‘𑀯𑀺𑀓𑀧𑁆𑀧𑁂𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺𑀓𑀁 𑀯𑀸𑀓𑁆𑀬𑀢𑁆𑀢𑀬𑀁 𑀯𑀼𑀢𑁆𑀢𑀦𑁆𑀢𑀺. 𑀝𑀻𑀓𑀸𑀬𑀁 𑀧𑀦 ‘‘𑀇𑀤𑀸𑀦𑀺 𑀯𑀓𑁆𑀔𑀫𑀸𑀦𑀁 𑀲𑀦𑁆𑀥𑀸𑀬 𑀏𑀯𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀯𑀓𑁆𑀔𑀫𑀸𑀦𑀲𑁆𑀲 𑀅𑀢𑀻𑀢𑀉𑀤𑀻𑀭𑀺𑀢𑀢𑁆𑀢𑀸𑀬𑁄𑀕𑀢𑁄 𑀓𑀣𑀁 𑀬𑀼𑀚𑁆𑀚𑀢𑀻𑀢𑀺. 𑀏𑀯𑀫𑀼𑀤𑀻𑀭𑀺𑀢𑀦𑁆𑀢𑀺 𑀯𑀸 𑀧𑀸𑀴𑀺𑀬𑀁 𑀅𑀝𑁆𑀞𑀓𑀣𑀸𑀬𑀜𑁆𑀘 𑀏𑀯𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀯-𑀲𑀤𑁆𑀤𑁄 𑀅𑀯𑀥𑀸𑀭𑀡𑁂.

𑁧𑁦𑁩-𑁫. 𑀇𑀤𑀸𑀦𑀺 𑀅𑀢𑁆𑀢𑀲𑀁𑀲𑀝𑁆𑀞𑀸𑀦𑀁 𑀬𑀸𑀯𑀓𑀸𑀮𑀺𑀓𑀸𑀤𑀻𑀦𑀁 𑀲𑀩𑁆𑀪𑀸𑀯𑀕𑀸𑀳𑀸𑀧𑀦𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀭𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀢𑁆𑀢𑀸𑀳𑀦𑁆𑀢𑀺 𑀲𑀢𑁆𑀢 𑀅𑀳𑀸𑀦𑀺 𑀬𑀲𑁆𑀲 𑀢𑀁 𑀲𑀢𑁆𑀢𑀸𑀳𑀁, 𑀲𑀢𑁆𑀢𑀸𑀳𑀓𑀸𑀮𑀺𑀓𑀁. 𑀘-𑀲𑀤𑁆𑀤𑁄 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄, 𑀲𑁄 𑀲𑀢𑁆𑀢𑀸𑀳𑀜𑁆𑀘 𑀬𑀸𑀯𑀚𑀻𑀯𑀺𑀓𑀜𑁆𑀘𑀸𑀢𑀺 𑀬𑁄𑀚𑁂𑀢𑀩𑁆𑀩𑁄. 𑀲𑁂𑀲𑀓𑀸𑀮𑀺𑀓𑀲𑀫𑁆𑀫𑀺𑀲𑁆𑀲𑀦𑁆𑀢𑀺 𑀲𑁂𑀲𑁂𑀳𑀺 𑀢𑀤𑀳𑀼 𑀧𑀝𑀺𑀕𑁆𑀕𑀳𑀺𑀢𑁂𑀳𑀺 𑀓𑀸𑀮𑀺𑀓𑁂𑀳𑀺 𑀬𑀸𑀯𑀓𑀸𑀮𑀺𑀓𑀬𑀸𑀫𑀓𑀸𑀮𑀺𑀓𑀲𑀗𑁆𑀔𑀸𑀢𑁂𑀳𑀺 𑀲𑀫𑁆𑀫𑀺𑀲𑁆𑀲𑀁. 𑀧𑀸𑀘𑀺𑀢𑁆𑀢𑀻𑀢𑀺 𑀲𑀦𑁆𑀦𑀺𑀥𑀺𑀲𑀺𑀓𑁆𑀔𑀸𑀧𑀤𑁂𑀦 𑀧𑀸𑀘𑀺𑀢𑁆𑀢𑀺. 𑀢𑀤𑀳𑀼 𑀧𑀝𑀺𑀕𑁆𑀕𑀳𑀺𑀢𑀦𑁆𑀢𑀺 𑀢𑀲𑁆𑀫𑀺𑀁𑀬𑁂𑀯 𑀤𑀺𑀦𑁂 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁. 𑀢𑀤𑀳𑁂𑀯𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀤𑀺𑀦𑁂 𑀧𑀼𑀭𑁂𑀪𑀢𑁆𑀢𑀫𑁂𑀯. 𑀲𑁂𑀲𑀦𑁆𑀢𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀬𑀸𑀯𑀚𑀻𑀯𑀺𑀓𑀜𑁆𑀘. 𑀏𑀯𑀦𑁆𑀢𑀺 𑀬𑀸𑀫𑁂 𑀏𑀯 𑀧𑀭𑀺𑀪𑀼𑀜𑁆𑀚𑀬𑁂𑀢𑀺 𑀯𑀺𑀚𑀸𑀦𑀻𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑀭𑀦𑁆𑀢𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀢𑁄 𑀅𑀜𑁆𑀜𑀁 𑀬𑀸𑀯𑀚𑀻𑀯𑀺𑀓𑀁.

𑀓𑀸𑀮𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.