𑀔𑀼𑀤𑁆𑀤𑀲𑀺𑀓𑁆𑀔𑀸-𑀅𑀪𑀺𑀦𑀯𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀢𑀺𑀮𑁄𑀓𑀢𑀺𑀮𑀓𑀁 𑀯𑀦𑁆𑀤𑁂, 𑀲𑀤𑁆𑀥𑀫𑁆𑀫𑀸𑀫𑀢𑀦𑀺𑀫𑁆𑀫𑀺𑀢𑀁;

𑀲𑀁𑀲𑀼𑀝𑁆𑀞𑀼𑀓𑀢𑀲𑀫𑁆𑀪𑀢𑁆𑀢𑀺𑀁, 𑀚𑀺𑀦𑀁 𑀚𑀦𑀫𑀦𑁄𑀭𑀫𑀁.

𑀲𑀸𑀭𑀺𑀧𑀼𑀢𑁆𑀢𑀁 𑀫𑀳𑀸𑀲𑀸𑀫𑀺𑀁, 𑀦𑁂𑀓𑀲𑀢𑁆𑀣𑀯𑀺𑀲𑀸𑀭𑀤𑀁;

𑀫𑀳𑀸𑀕𑀼𑀡𑀁 𑀫𑀳𑀸𑀧𑀜𑁆𑀜𑀁, 𑀦𑀫𑁄 𑀫𑁂 𑀲𑀺𑀭𑀲𑀸 𑀕𑀭𑀼𑀁.

𑀔𑀼𑀤𑁆𑀤𑀲𑀺𑀓𑁆𑀔𑀸𑀬 𑀝𑀻𑀓𑀸 𑀬𑀸, 𑀧𑀼𑀭𑀸𑀢𑀦𑀸 𑀲𑀫𑀻𑀭𑀺𑀢𑀸;

𑀦 𑀢𑀸𑀬 𑀲𑀓𑁆𑀓𑀸 𑀲𑀓𑁆𑀓𑀘𑁆𑀘𑀁, 𑀅𑀢𑁆𑀣𑁄 𑀲𑀩𑁆𑀩𑀢𑁆𑀣 𑀜𑀸𑀢𑀯𑁂.

𑀢𑀢𑁄𑀦𑁂𑀓𑀕𑀼𑀡𑀸𑀦𑀁 𑀬𑁄, 𑀫𑀜𑁆𑀚𑀽𑀲𑀸 𑀭𑀢𑀦𑀸𑀦𑀯;

𑀲𑀼𑀫𑀗𑁆𑀕𑀮𑀲𑀦𑀸𑀫𑁂𑀦, 𑀢𑁂𑀦 𑀧𑀜𑁆𑀜𑀯𑀢𑀸 𑀲𑀢𑀸.

𑀅𑀚𑁆𑀛𑁂𑀲𑀺𑀢𑁄 𑀬𑀢𑀺𑀦𑁆𑀤𑁂𑀦, 𑀲𑀤𑀸𑀭𑀜𑁆𑀜𑀦𑀺𑀯𑀸𑀲𑀺𑀦𑀸;

𑀲𑀯𑀺𑀦𑀺𑀘𑁆𑀙𑀬𑀫𑁂𑀢𑀺𑀲𑁆𑀲𑀸, 𑀓𑀭𑀺𑀲𑁆𑀲𑀸𑀫𑀢𑁆𑀣𑀯𑀡𑁆𑀡𑀦𑀁.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸

(𑀓) 𑀏𑀢𑁆𑀣𑀸𑀳 𑁋 𑀓𑀺𑀫𑀢𑁆𑀣𑀫𑀸𑀤𑀺𑀢𑁄𑀯𑀸𑀬𑀁 𑀕𑀸𑀣𑀸 𑀦𑀺𑀓𑁆𑀔𑀺𑀢𑁆𑀢𑀸, 𑀦𑀦𑀼 𑀬𑀣𑀸𑀥𑀺𑀧𑁆𑀧𑁂𑀢𑀫𑁂𑀯 𑀧𑀓𑀭𑀡𑀫𑀸𑀭𑀪𑀦𑀻𑀬𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀲𑀧𑁆𑀧𑀬𑁄𑀚𑀦𑀢𑁆𑀢𑀸. 𑀲𑀧𑁆𑀧𑀬𑁄𑀚𑀦𑀜𑁆𑀳𑀺 𑀢𑀁𑀤𑀲𑁆𑀲𑀦𑀁 𑀢𑀸𑀬 𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫𑀸𑀪𑀺𑀥𑁂𑀬𑁆𑀬𑀓𑀭𑀡𑀧𑁆𑀧𑀓𑀸𑀭𑀧𑁆𑀧𑀬𑁄𑀚𑀦𑀸𑀪𑀺𑀥𑀸𑀦𑀲𑀦𑁆𑀤𑀲𑁆𑀲𑀦𑀢𑁄. 𑀢𑀸𑀦𑀺 𑀘 𑀧𑀦 𑀲𑀧𑁆𑀧𑀬𑁄𑀚𑀦𑀸𑀦𑀺 𑀅𑀦𑀦𑁆𑀢𑀭𑀸𑀬𑁂𑀦 𑀕𑀦𑁆𑀣𑀧𑀭𑀺𑀲𑀫𑀸𑀧𑀦𑀸𑀤𑀺𑀧𑁆𑀧𑀬𑁄𑀚𑀦𑀸𑀦𑀫𑀪𑀺𑀦𑀺𑀧𑁆𑀨𑀸𑀤𑀦𑀢𑁄. 𑀢𑀣𑀸 𑀳𑀺 𑀲𑁄𑀢𑀽𑀦𑀫𑀢𑁆𑀢𑀦𑁄 𑀘 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀦𑀺𑀧𑁆𑀨𑀸𑀤𑀦𑀁 𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫𑀓𑀭𑀡𑀧𑁆𑀧𑀬𑁄𑀚𑀦𑀁. 𑀯𑀺𑀤𑀺𑀢𑀸𑀪𑀺𑀥𑁂𑀬𑁆𑀬𑀲𑁆𑀲 𑀕𑀦𑁆𑀣𑀲𑁆𑀲 𑀯𑀺𑀜𑁆𑀜𑀽𑀦𑀫𑀸𑀤𑀭𑀡𑀻𑀬𑀢𑀸 𑀅𑀪𑀺𑀥𑁂𑀬𑁆𑀬𑀓𑀣𑀦𑀧𑁆𑀧𑀬𑁄𑀚𑀦𑀁. 𑀲𑁄𑀢𑀼𑀚𑀦𑀲𑀫𑀼𑀲𑁆𑀲𑀸𑀳𑀚𑀦𑀦𑀁 𑀓𑀭𑀡𑀧𑁆𑀧𑀓𑀸𑀭𑀧𑁆𑀧𑀬𑁄𑀚𑀦𑀓𑀣𑀦𑀧𑁆𑀧𑀬𑁄𑀚𑀦𑀁. 𑀯𑁄𑀳𑀸𑀭𑀲𑀼𑀔𑀢𑀸 𑀧𑀦 𑀅𑀪𑀺𑀥𑀸𑀦𑀓𑀣𑀦𑀧𑁆𑀧𑀬𑁄𑀚𑀦𑀁.

𑀢𑀢𑁆𑀣 𑀯𑀦𑁆𑀤𑀺𑀢𑁆𑀯𑀸 𑀭𑀢𑀦𑀢𑁆𑀢𑀬𑀦𑁆𑀢𑀺 𑀇𑀫𑀺𑀦𑀸 𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫𑁄 𑀤𑀲𑁆𑀲𑀺𑀢𑁄, 𑀔𑀼𑀤𑁆𑀤𑀲𑀺𑀓𑁆𑀔𑀦𑁆𑀢𑀺 𑀇𑀫𑀺𑀦𑀸 𑀔𑀼𑀤𑁆𑀤𑀪𑀽𑀢𑀸𑀦𑀁 𑀲𑀺𑀓𑁆𑀔𑀸𑀦𑀁 𑀇𑀥 𑀧𑀝𑀺𑀧𑀸𑀤𑁂𑀢𑀩𑁆𑀩𑀢𑀸𑀤𑀻𑀧𑀦𑁂𑀦 𑀅𑀪𑀺𑀥𑁂𑀬𑁆𑀬𑀁, 𑀅𑀪𑀺𑀥𑁂𑀬𑁆𑀬𑁄 𑀘 𑀦𑀸𑀫𑁂𑀲 𑀲𑀫𑀼𑀤𑀺𑀢𑁂𑀦 𑀲𑀢𑁆𑀣𑁂𑀦 𑀯𑀘𑀦𑀻𑀬𑀢𑁆𑀣𑁄𑀢𑀺. 𑀅𑀪𑀺𑀥𑀸𑀦𑀜𑁆𑀘 𑀧𑀦 𑀇𑀫𑀺𑀦𑀸𑀯 𑀤𑀲𑁆𑀲𑀺𑀢𑀁 𑀢𑁂𑀦 𑀅𑀢𑁆𑀣𑀸𑀦𑀼𑀕𑀢𑀲𑀫𑀜𑁆𑀜𑀸𑀧𑀭𑀺𑀤𑀻𑀧𑀦𑀢𑁄. 𑀲𑀫𑀸𑀢𑀺𑀓𑀦𑁆𑀢𑀺 𑀇𑀫𑀺𑀦𑀸 𑀓𑀭𑀡𑀧𑁆𑀧𑀓𑀸𑀭𑁄, 𑀔𑀼𑀤𑁆𑀤𑀲𑀺𑀓𑁆𑀔𑀦𑁆𑀢𑀺 𑀇𑀫𑀺𑀦𑀸 𑀘, 𑀢𑁂𑀦 𑀔𑀼𑀤𑁆𑀤𑀪𑀽𑀢𑀸𑀦𑀁 𑀲𑀺𑀓𑁆𑀔𑀸𑀦𑀁 𑀇𑀥 𑀤𑀲𑁆𑀲𑁂𑀢𑀩𑁆𑀩𑀪𑀸𑀯𑀧𑁆𑀧𑀓𑀸𑀲𑀦𑀢𑁄. 𑀆𑀤𑀺𑀢𑁄 𑀉𑀧𑀲𑀫𑁆𑀧𑀦𑁆𑀦 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀧𑀬𑁄𑀚𑀦𑀧𑀬𑁄𑀚𑀦𑀁 𑀧𑀦 𑀇𑀫𑀺𑀦𑀸𑀯 𑀲𑀸𑀫𑀢𑁆𑀣𑀺𑀬𑀢𑁄 𑀤𑀲𑁆𑀲𑀺𑀢𑀫𑁂𑀯, 𑀢𑀸𑀲𑀁 𑀲𑀺𑀓𑁆𑀔𑀺𑀢𑀩𑁆𑀩𑀧𑁆𑀧𑀓𑀸𑀲𑀦𑁂𑀦 𑀳𑀺 𑀲𑀺𑀓𑁆𑀔𑀦𑁂 𑀲𑀢𑀺 𑀢𑀫𑁆𑀫𑀽𑀮𑀺𑀓𑀸𑀬 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀬𑀸 𑀲𑀁𑀲𑀺𑀚𑁆𑀛𑀦𑀢𑁄. 𑀧𑀓𑀭𑀡𑀧𑁆𑀧𑀬𑁄𑀚𑀦𑀸𑀦𑀁 𑀲𑀸𑀥𑀦𑀲𑀸𑀥𑀺𑀬𑀮𑀓𑁆𑀔𑀡𑁄 𑀲𑀫𑁆𑀩𑀦𑁆𑀥𑁄 𑀢𑀦𑁆𑀦𑀺𑀲𑁆𑀲𑀬𑀤𑀲𑁆𑀲𑀦𑁂𑀦𑁂𑀯 𑀤𑀲𑁆𑀲𑀺𑀢𑁄𑀬𑁂𑀯𑀸𑀢𑀺 𑀅𑀬𑀫𑁂𑀢𑁆𑀣 𑀲𑀫𑀼𑀤𑀸𑀬𑀢𑁆𑀣𑁄.

𑀅𑀬𑀁 𑀧𑀦𑁂𑀢𑁆𑀣𑀸𑀯𑀬𑀯𑀢𑁆𑀣𑁄 𑁋 𑀭𑀢𑀦𑀢𑁆𑀢𑀬𑀁 𑀯𑀦𑁆𑀤𑀺𑀢𑁆𑀯𑀸 𑀔𑀼𑀤𑁆𑀤𑀲𑀺𑀓𑁆𑀔𑀁 𑀧𑀯𑀓𑁆𑀔𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀭𑀢𑀺𑀚𑀦𑀦𑀝𑁆𑀞𑁂𑀦 𑀭𑀢𑀦𑀸𑀦𑀺, 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀣 𑀯𑀸 𑀘𑀺𑀢𑁆𑀢𑀻𑀓𑀢𑀸𑀤𑀺𑀦𑀸 𑀓𑀸𑀭𑀡𑁂𑀦 𑀭𑀢𑀦𑀸𑀦𑀺, 𑀩𑀼𑀤𑁆𑀥𑀸𑀤𑀬𑁄𑀯 𑀭𑀢𑀦𑀸𑀦𑀺. 𑀢𑀣𑀸 𑀘 𑀯𑀼𑀢𑁆𑀢𑀁 𑁋

‘‘𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀜𑁆𑀘, 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁;

𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁, 𑀭𑀢𑀦𑀁 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁩; 𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁨𑁨𑁩; 𑀔𑀼. 𑀧𑀸. 𑀅𑀝𑁆𑀞. 𑁩; 𑀲𑀼. 𑀦𑀺. 𑀅𑀝𑁆𑀞. 𑁧.𑁨𑁨𑁬; 𑀉𑀤𑀸. 𑀅𑀝𑁆𑀞. 𑁪𑁫; 𑀫𑀳𑀸𑀦𑀺. 𑀅𑀝𑁆𑀞. 𑁫𑁦);

𑀢𑀬𑁄 𑀅𑀯𑀬𑀯𑀸 𑀅𑀲𑁆𑀲𑀸𑀢𑀺 𑀢𑀬𑀁, 𑀲𑀫𑀼𑀤𑀸𑀬𑀸𑀧𑁂𑀓𑁆𑀔𑀁 𑀏𑀓𑀯𑀘𑀦𑀁, 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀧𑀦 𑀲𑀫𑀼𑀤𑀸𑀬𑀲𑁆𑀲 𑀅𑀪𑀸𑀯𑀢𑁄 𑀢𑀻𑀡𑀺 𑀏𑀯 𑀭𑀢𑀦𑀸𑀦𑀺 𑀯𑀼𑀘𑁆𑀘𑀦𑁆𑀢𑀺. 𑀭𑀢𑀦𑀸𑀦𑀁 𑀢𑀬𑀁 𑀭𑀢𑀦𑀢𑁆𑀢𑀬𑀁. 𑀯𑀦𑁆𑀤𑀺𑀢𑁆𑀯𑀸𑀢𑀺 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀦𑀫𑀲𑁆𑀲𑀺𑀢𑁆𑀯𑀸. ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀯𑀦𑁆𑀤𑀦𑀸 𑀓𑀸𑀬𑁂𑀦 𑀯𑀦𑁆𑀤𑀢𑀺, 𑀯𑀘𑀲𑀸 𑀯𑀦𑁆𑀤𑀢𑀺, 𑀫𑀦𑀲𑀸 𑀯𑀦𑁆𑀤𑀢𑀻’’𑀢𑀺 (𑀅. 𑀦𑀺. 𑁩.𑁧𑁫𑁫) 𑀳𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀺𑀜𑁆𑀜𑀢𑁆𑀢𑀺𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀓𑁂𑀯𑀮𑀁 𑀭𑀢𑀦𑀢𑁆𑀢𑀬𑀕𑀼𑀡𑀸𑀦𑀼𑀲𑁆𑀲𑀭𑀡𑀯𑀲𑁂𑀦 𑀫𑀦𑁄𑀤𑁆𑀯𑀸𑀭𑁂 𑀩𑀳𑀼𑀮𑀧𑁆𑀧𑀯𑀢𑁆𑀢𑀸 𑀓𑀼𑀲𑀮𑀘𑁂𑀢𑀦𑀸 𑀫𑀦𑁄𑀤𑁆𑀯𑀸𑀭𑀯𑀦𑁆𑀤𑀦𑀸. 𑀢𑀁 𑀢𑀁 𑀯𑀺𑀜𑁆𑀜𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀦 𑀧𑀯𑀢𑁆𑀢𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑀯𑀦𑁆𑀤𑀦𑀸. 𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺 𑀲𑀺𑀓𑁆𑀔𑀸, 𑀅𑀥𑀺𑀲𑀻𑀮𑀅𑀥𑀺𑀘𑀺𑀢𑁆𑀢𑀅𑀥𑀺𑀧𑀜𑁆𑀜𑀸𑀯𑀲𑁂𑀦 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸. 𑀲𑀺𑀓𑁆𑀔𑀦𑀜𑁆𑀘𑁂𑀢𑁆𑀣 𑀬𑀣𑀸𑀓𑁆𑀓𑀫𑀁 𑀲𑀻𑀮𑀸𑀤𑀺𑀥𑀫𑁆𑀫𑀸𑀦𑀁 𑀲𑀁𑀯𑀭𑀡𑀯𑀲𑁂𑀦, 𑀏𑀓𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀲𑀫𑀸𑀥𑀸𑀦𑀯𑀲𑁂𑀦, 𑀆𑀭𑀫𑁆𑀫𑀡𑀚𑀸𑀦𑀦𑀮𑀓𑁆𑀔𑀡𑀧𑁆𑀧𑀝𑀺𑀯𑁂𑀥𑀫𑀕𑁆𑀕𑀧𑀸𑀢𑀼𑀪𑀸𑀯𑀧𑀸𑀧𑀦𑀯𑀲𑁂𑀦 𑀘 𑀆𑀲𑁂𑀯𑀦𑀁 𑀤𑀝𑁆𑀞𑀩𑁆𑀩𑀁. 𑀅𑀜𑁆𑀜𑀢𑁆𑀣 𑀩𑀳𑀼𑀯𑀺𑀥𑀸 𑀲𑀺𑀓𑁆𑀔𑀸, 𑀇𑀥 𑀢𑀼 𑀲𑀗𑁆𑀔𑁂𑀧𑀦𑀬𑀢𑁆𑀢𑀸 𑀅𑀧𑁆𑀧𑀓𑀸𑀤𑀺𑀅𑀦𑁂𑀓𑀢𑁆𑀣𑀲𑀫𑁆𑀪𑀯𑁂𑀧𑀺 𑀔𑀼𑀤𑁆𑀤-𑀲𑀤𑁆𑀤𑀲𑁆𑀲 𑀅𑀧𑁆𑀧𑀓𑀢𑁆𑀣𑁄𑀯𑁂𑀢𑁆𑀣 𑀬𑀼𑀢𑁆𑀢𑀢𑀭𑁄𑀢𑀺 𑀔𑀼𑀤𑁆𑀤𑀸 𑀅𑀧𑁆𑀧𑀓𑀸 𑀲𑀺𑀓𑁆𑀔𑀸𑀢𑀺 𑀔𑀼𑀤𑁆𑀤𑀲𑀺𑀓𑁆𑀔𑀸. 𑀇𑀥 𑀧𑀦 𑀔𑀼𑀤𑁆𑀤𑀲𑀺𑀓𑁆𑀔𑀸𑀧𑁆𑀧𑀓𑀸𑀲𑀓𑁄 𑀕𑀦𑁆𑀣𑁄 𑀢𑀩𑁆𑀩𑁄𑀳𑀸𑀭𑀽𑀧𑀘𑀸𑀭𑀢𑁄 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 ‘‘𑀔𑀼𑀤𑁆𑀤𑀲𑀺𑀓𑁆𑀔𑀸’’𑀢𑀺 𑀯𑀼𑀘𑁆𑀘𑀢𑀺 𑀬𑀣𑀸 ‘‘𑀯𑀭𑀼𑀡𑀸𑀦𑀕𑀭’’𑀦𑁆𑀢𑀺. 𑀢𑀁 𑀔𑀼𑀤𑁆𑀤𑀲𑀺𑀓𑁆𑀔𑀁. 𑀧𑀯𑀓𑁆𑀔𑀸𑀫𑀻𑀢𑀺 𑀓𑀣𑁂𑀲𑁆𑀲𑀸𑀫𑀺.

𑀓𑀻𑀤𑀺𑀲𑀦𑁆𑀢𑀺 𑀆𑀳 ‘‘𑀆𑀤𑀺𑀢𑁄 𑀉𑀧𑀲𑀫𑁆𑀧𑀦𑁆𑀦𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺. 𑀆𑀤𑀺-𑀲𑀤𑁆𑀤𑁄𑀬𑀫𑀢𑁆𑀣𑀺 𑀅𑀯𑀬𑀯𑀯𑀘𑀦𑁄 𑀬𑀣𑀸 ‘‘𑀲𑀩𑁆𑀩𑀸𑀤𑀻𑀦𑀺 𑀲𑀩𑁆𑀩𑀦𑀸𑀫𑀸𑀦𑀻’’𑀢𑀺. 𑀅𑀢𑁆𑀣𑀺 𑀅𑀧𑀸𑀤𑀸𑀦𑀯𑀘𑀦𑁄 𑀬𑀣𑀸 ‘‘𑀧𑀩𑁆𑀩𑀢𑀸𑀤𑀻𑀦𑀺 𑀔𑁂𑀢𑁆𑀢𑀸𑀦𑀻’’𑀢𑀺. 𑀢𑀢𑁆𑀣𑀸𑀯𑀬𑀯𑀯𑀸𑀘𑀻 𑀓𑀫𑁆𑀫𑀲𑀸𑀥𑀦𑁄 ‘‘𑀆𑀤𑀺𑀬𑀢𑀻𑀢𑁆𑀬𑀸𑀤𑀻’’𑀢𑀺. 𑀇𑀢𑀭𑁄 𑀅𑀧𑀸𑀤𑀸𑀦𑀲𑀸𑀥𑀦𑁄 ‘‘𑀆𑀤𑀺𑀬𑀢𑀺 𑀏𑀢𑀲𑁆𑀫𑀸𑀢𑁆𑀬𑀸𑀤𑀻’’𑀢𑀺. 𑀢𑀢𑁆𑀣 𑀬𑁄 𑀅𑀯𑀬𑀯𑀯𑀘𑀦𑁄, 𑀢𑀲𑁆𑀲𑁂𑀤𑀁 𑀕𑀳𑀡𑀁, 𑀢𑀲𑁆𑀫𑀸 𑀉𑀧𑀲𑀫𑁆𑀧𑀦𑁆𑀦𑀓𑁆𑀔𑀡𑀫𑁆𑀧𑀺 𑀅𑀦𑁆𑀢𑁄 𑀓𑀢𑁆𑀯𑀸 𑀆𑀤𑀺𑀪𑀽𑀢𑀸 𑀉𑀧𑀲𑀫𑁆𑀧𑀦𑁆𑀦𑀓𑁆𑀔𑀡𑀢𑁄𑀬𑁂𑀯 𑀧𑀝𑁆𑀞𑀸𑀬𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀯-𑀲𑀤𑁆𑀤𑁄 𑀧𑀦𑁂𑀢𑁆𑀣 𑀲𑀩𑁆𑀩𑀯𑀸𑀓𑁆𑀬𑀸𑀦𑀁 𑀅𑀯𑀥𑀸𑀭𑀡𑀨𑀮𑀢𑁆𑀢𑀸 𑀮𑀩𑁆𑀪𑀢𑀺. 𑀢𑁄-𑀧𑀘𑁆𑀘𑀬𑁄 𑀅𑀯𑀥𑀺𑀫𑁆𑀳𑀺𑀬𑁂𑀯, 𑀦 𑀆𑀥𑀸𑀭𑁂. 𑀢𑀢𑁆𑀣 𑀳𑀺 𑀢𑁄𑀧𑀘𑁆𑀘𑀬𑁂 𑀆𑀥𑀸𑀭𑁂 𑀯𑀢𑁆𑀢𑀫𑀸𑀦𑁂 𑀆𑀤𑀺𑀫𑁆𑀳𑀺𑀬𑁂𑀯 𑀫𑀚𑁆𑀛𑀅𑀦𑁆𑀢𑀸𑀦𑀁 𑀅𑀯𑀬𑀯𑀪𑀽𑀢𑁂 𑀉𑀧𑀲𑀫𑁆𑀧𑀦𑁆𑀦𑀓𑁆𑀔𑀡𑁂𑀬𑁂𑀯𑀸𑀢𑀺 𑀅𑀢𑁆𑀣𑁄 𑀪𑀯𑁂𑀬𑁆𑀬, 𑀢𑀣𑀸 𑀲𑀢𑀺 𑀅𑀯𑀥𑀸𑀭𑀡𑀦𑀺𑀘𑁆𑀙𑀬𑁄 𑀦𑀺𑀬𑀫𑁄𑀢𑀺 𑀅𑀢𑁆𑀣𑀦𑁆𑀢𑀭𑀢𑁆𑀢𑀸 𑀆𑀤𑀺𑀓𑁆𑀔𑀡𑀦𑀺𑀬𑀫𑁂𑀦 𑀫𑀚𑁆𑀛𑀸𑀤𑀬𑁄 𑀦𑀺𑀯𑀢𑁆𑀢𑀺𑀬𑁂𑀬𑁆𑀬𑀼𑀁. 𑀅𑀧𑀸𑀤𑀸𑀦𑀯𑀘𑀦𑀲𑁆𑀲𑀸𑀧𑀺 𑀕𑀳𑀡𑁂 𑀅𑀯𑀥𑀺𑀪𑀽𑀢𑁄 𑀉𑀧𑀲𑀫𑁆𑀧𑀦𑁆𑀦𑀓𑁆𑀔𑀡𑁄 𑀦𑀺𑀯𑀢𑁆𑀢𑀺𑀬𑁂𑀬𑁆𑀬 ‘‘𑀧𑀩𑁆𑀩𑀢𑀸𑀤𑀻𑀦𑀺 𑀔𑁂𑀢𑁆𑀢𑀸𑀦𑀻’’𑀢𑀺 𑀏𑀢𑁆𑀣 𑀆𑀤𑀺𑀪𑀽𑀢𑀧𑀩𑁆𑀩𑀢𑀧𑀭𑀺𑀘𑁆𑀘𑀸𑀕𑁂𑀦 𑀔𑁂𑀢𑁆𑀢𑀕𑁆𑀕𑀳𑀡𑀁 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀝𑀻𑀓𑀸𑀬𑀁 𑀧𑀦 𑀆𑀥𑀸𑀭𑀢𑁆𑀣𑁄𑀧𑀺 𑀯𑀼𑀢𑁆𑀢𑁄, 𑀲𑁄 𑀬𑀣𑀸𑀯𑀼𑀢𑁆𑀢𑀤𑁄𑀲𑀁 𑀦𑀸𑀢𑀺𑀕𑀘𑁆𑀙𑀢𑀺. 𑀲𑀩𑁆𑀩𑀢𑁆𑀣 ‘‘𑀝𑀻𑀓𑀸𑀬’’𑀦𑁆𑀢𑀺 𑀘 𑀯𑀼𑀢𑁆𑀢𑁂 𑀏𑀢𑁆𑀣𑁂𑀯 𑀧𑀼𑀭𑀸𑀡𑀝𑀻𑀓𑀸𑀬𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀆𑀤𑀺𑀢𑁄𑀢𑀺 𑀇𑀫𑀺𑀦𑀸 𑀇𑀤𑀁 𑀤𑀻𑀧𑁂𑀢𑀺 𑁋 𑀅𑀢𑀺𑀤𑀼𑀮𑁆𑀮𑀪𑀁 𑀔𑀡𑀲𑀫𑀯𑀸𑀬𑀁 𑀮𑀪𑀺𑀢𑁆𑀯𑀸 𑀆𑀮𑀲𑀺𑀬𑀤𑁄𑀲𑁂𑀦 𑀅𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑁂𑀳𑀺 𑀘 𑀅𑀜𑁆𑀜𑀸𑀡𑀤𑁄𑀲𑁂𑀦 𑀅𑀜𑁆𑀜𑀣𑀸 𑀧𑀝𑀺𑀧𑀚𑁆𑀚𑀦𑁆𑀢𑁂𑀳𑀺 𑀘 𑀅𑀳𑀼𑀢𑁆𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀦𑀺𑀭𑀦𑁆𑀢𑀭𑀫𑁂𑀯 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀦𑀯𑀲𑁂𑀦 𑀆𑀤𑀭𑁄 𑀚𑀦𑁂𑀢𑀩𑁆𑀩𑁄𑀢𑀺.

𑀉𑀧𑀲𑀫𑁆𑀧𑀦𑁆𑀦𑁂𑀦 𑀉𑀧𑀲𑀫𑁆𑀧𑀦𑁆𑀦𑀸𑀬 𑀘 𑀲𑀺𑀓𑁆𑀔𑀺𑀢𑀩𑁆𑀩𑀁 𑀆𑀲𑁂𑀯𑀺𑀢𑀩𑁆𑀩𑀦𑁆𑀢𑀺 𑀉𑀧𑀲𑀫𑁆𑀧𑀦𑁆𑀦𑀲𑀺𑀓𑁆𑀔𑀺𑀢𑀩𑁆𑀩𑀁, 𑀏𑀓𑀲𑁂𑀲𑀦𑀬𑁂𑀦 𑀉𑀧𑀲𑀫𑁆𑀧𑀦𑁆𑀦𑀢𑀸𑀲𑀸𑀫𑀜𑁆𑀜𑁂𑀦 𑀯𑀸 𑀉𑀧𑀲𑀫𑁆𑀧𑀦𑁆𑀦𑀸𑀬𑀧𑀺 𑀏𑀢𑁆𑀣𑁂𑀯𑀸𑀯𑀺𑀭𑁄𑀥𑁄𑀢𑀺 𑀉𑀧𑀲𑀫𑁆𑀧𑀦𑁆𑀦𑁂𑀦 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀲𑀫𑀸𑀲𑁄. 𑀦𑀦𑀼 𑀅𑀥𑀺𑀲𑀻𑀮𑀸𑀤𑀬𑁄𑀯 𑀲𑀺𑀓𑁆𑀔𑀺𑀢𑀩𑁆𑀩𑀸, 𑀏𑀯𑀁 𑀲𑀢𑀺 𑀓𑀣𑀁 𑀧𑀓𑀭𑀡𑀁 𑀲𑀺𑀓𑁆𑀔𑀺𑀢𑀩𑁆𑀩𑀢𑁆𑀢𑁂𑀦 𑀯𑀼𑀢𑁆𑀢𑀦𑁆𑀢𑀺? 𑀦𑀸𑀬𑀁 𑀤𑁄𑀲𑁄, 𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀺𑀢𑀩𑁆𑀩𑀢𑁆𑀢𑁂 𑀲𑀢𑀺 𑀢𑀤𑁆𑀤𑀻𑀧𑀓𑀕𑀦𑁆𑀣𑀲𑁆𑀲𑀸𑀧𑀺 𑀆𑀲𑁂𑀯𑀺𑀢𑀩𑁆𑀩𑀢𑀸 𑀆𑀧𑀚𑁆𑀚𑀢𑀻𑀢𑀺. 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀯𑀢𑁆𑀢𑀩𑁆𑀩𑀯𑀺𑀦𑀺𑀘𑁆𑀙𑀬𑀁 𑀲𑀓𑀮𑀫𑁆𑀧𑀺 𑀲𑀗𑁆𑀕𑀳𑁂𑀢𑁆𑀯𑀸 𑀫𑀸𑀢𑀺𑀓𑀸𑀬 𑀞𑀧𑀦𑀢𑁄 𑀲𑀳 𑀫𑀸𑀢𑀺𑀓𑀸𑀬𑀸𑀢𑀺 𑀲𑀫𑀸𑀢𑀺𑀓𑀁. 𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑁄𑀬𑀁 𑀩𑀳𑀼𑀩𑁆𑀩𑀻𑀳𑀺 𑀢𑀲𑁆𑀲 𑀔𑀼𑀤𑁆𑀤𑀲𑀺𑀓𑁆𑀔𑀸𑀲𑀗𑁆𑀔𑀸𑀢𑀲𑁆𑀲 𑀅𑀜𑁆𑀜𑀧𑀤𑀢𑁆𑀣𑀲𑁆𑀲 𑀬𑁄 𑀕𑀼𑀡𑁄 𑀫𑀸𑀢𑀺𑀓𑀸𑀲𑀗𑁆𑀔𑀸𑀢𑀁 𑀯𑀺𑀲𑁂𑀲𑀦𑀁, 𑀢𑀲𑁆𑀲 𑀇𑀥 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸. 𑀲𑀼𑀔𑁂𑀦𑁂𑀯 𑀳𑀺 𑀕𑀳𑀡𑀁 𑀲𑀺𑀬𑀸 𑀫𑀸𑀢𑀺𑀓𑀸𑀦𑀼𑀲𑀸𑀭𑁂𑀦 𑀢𑀁 𑀢𑀁 𑀯𑀺𑀦𑀺𑀘𑁆𑀙𑀬𑀁 𑀑𑀮𑁄𑀓𑁂𑀦𑁆𑀢𑀸𑀦𑀁 𑀲𑀁𑀲𑀬𑀸𑀧𑀕𑀫𑀢𑁄.

𑀫𑀸𑀢𑀺𑀓𑀸𑀯𑀡𑁆𑀡𑀦𑀸

(𑀔-𑀚) 𑀇𑀤𑀸𑀦𑀺 ‘‘𑀲𑀫𑀸𑀢𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀫𑀸𑀢𑀺𑀓𑀸𑀧𑀤𑀸𑀦𑀺 𑀢𑀸𑀯 𑀉𑀤𑁆𑀤𑀺𑀲𑀺𑀢𑀼𑀁 ‘‘𑀧𑀸𑀭𑀸𑀚𑀺𑀓𑀸 𑀘 𑀘𑀢𑁆𑀢𑀸𑀭𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀏𑀢𑁆𑀣𑀸𑀳 𑁋 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀯 𑀓𑀲𑁆𑀫𑀸 𑀧𑀞𑀫𑀁 𑀯𑀼𑀢𑁆𑀢𑀸𑀢𑀺? 𑀲𑀩𑁆𑀩𑀲𑀺𑀓𑁆𑀔𑀸𑀦𑀁 𑀫𑀽𑀮𑀪𑀽𑀢𑀢𑁆𑀢𑀸. ‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄, 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁩; 𑀧𑁂𑀝𑀓𑁄. 𑁨𑁨; 𑀫𑀺. 𑀧. 𑁨.𑁧.𑁯) 𑀳𑀺 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀧𑀺 𑀫𑀳𑀸𑀲𑀸𑀯𑀚𑁆𑀚𑀢𑁆𑀢𑀸 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀲𑀩𑁆𑀩𑀧𑀞𑀫𑀁 𑀚𑀸𑀦𑀺𑀢𑀩𑁆𑀩𑀸𑀢𑀺 𑀧𑀸𑀭𑀸𑀚𑀺𑀓𑀸𑀯 𑀧𑀞𑀫𑀁 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀸𑀢𑀺𑀓𑀸𑀧𑀤𑀸𑀦𑀁 𑀧𑀦 𑀅𑀢𑁆𑀣𑁄 𑀢𑀲𑁆𑀲 𑀢𑀲𑁆𑀲 𑀫𑀸𑀢𑀺𑀓𑀸𑀧𑀤𑀲𑁆𑀲 𑀦𑀺𑀤𑁆𑀤𑁂𑀲𑀯𑀲𑁂𑀦𑁂𑀯 𑀯𑀺𑀜𑁆𑀜𑀸𑀬𑀢𑀻𑀢𑀺 𑀦 𑀇𑀥 𑀯𑀺𑀲𑀼𑀁 𑀤𑀲𑁆𑀲𑀬𑀺𑀲𑁆𑀲𑀸𑀫. 𑀅𑀯𑀺𑀜𑁆𑀜𑀸𑀬𑀫𑀸𑀦𑀁 𑀧𑀦 𑀢𑀢𑁆𑀣 𑀢𑀢𑁆𑀣𑁂𑀯 𑀧𑀓𑀸𑀲𑀬𑀺𑀲𑁆𑀲𑀸𑀫.

𑀇𑀤𑀸𑀦𑀺 𑀉𑀤𑁆𑀤𑀺𑀝𑁆𑀞𑀧𑀤𑀸𑀦𑀼𑀓𑁆𑀓𑀫𑁂𑀦 𑀦𑀺𑀤𑁆𑀤𑁂𑀲𑀁 𑀆𑀭𑀪𑀦𑁆𑀢𑁄 ‘‘𑀧𑀸𑀭𑀸𑀚𑀺𑀓𑀸 𑀘 𑀘𑀢𑁆𑀢𑀸𑀭𑁄’’𑀢𑀺 𑀧𑀞𑀫𑀁 𑀫𑀸𑀢𑀺𑀓𑀸𑀧𑀤𑀁 𑀉𑀤𑁆𑀥𑀭𑀺. 𑀏𑀯𑀫𑀼𑀧𑀭𑀺𑀧𑀺. 𑀇𑀤𑀸𑀦𑀺 𑀧𑀸𑀭𑀸𑀚𑀺𑀓𑀸𑀬𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀉𑀤𑁆𑀤𑀺𑀝𑁆𑀞𑀧𑀤𑀸𑀦𑀼𑀓𑁆𑀓𑀫𑁂𑀦 𑀦𑀺𑀤𑁆𑀤𑁂𑀲𑀁 𑀆𑀭𑀪𑀦𑁆𑀢𑁄 ‘‘𑀕𑀭𑀼𑀓𑀸 𑀦𑀯𑀸’’𑀢𑀺 𑀤𑀼𑀢𑀺𑀬𑀁 𑀧𑀤𑀁 𑀉𑀤𑁆𑀥𑀭𑀻𑀢𑀺𑀆𑀤𑀺𑀦𑀸 𑀬𑀣𑀸𑀬𑁄𑀕𑀁 𑀯𑀢𑁆𑀢𑀩𑁆𑀩𑀁. 𑀢𑀢𑁆𑀣 𑀲𑀺𑀓𑁆𑀔𑀸𑀧𑀤𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀸 𑀧𑀼𑀕𑁆𑀕𑀮𑀸 𑀢𑀸𑀬 𑀧𑀭𑀸𑀚𑀬𑀦𑁆𑀢𑀻𑀢𑀺 𑀧𑀭𑀸𑀚𑀺𑀬𑀸. 𑀢𑁂𑀬𑁂𑀯 𑀧𑀸𑀭𑀸𑀚𑀺𑀓𑀸 𑀉𑀧𑀲𑀕𑁆𑀕𑀲𑁆𑀲 𑀯𑀼𑀤𑁆𑀥𑀺𑀁 𑀓𑀢𑁆𑀯𑀸 𑀬-𑀓𑀸𑀭𑀲𑁆𑀲 𑀓-𑀓𑀸𑀭𑀓𑀭𑀡𑁂𑀦. 𑀢𑁂 𑀧𑀦 𑀕𑀡𑀦𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀘𑀢𑁆𑀢𑀸𑀭𑁄𑀢𑀺 𑀅𑀢𑁆𑀣𑁄.

𑁧. 𑀧𑀸𑀭𑀸𑀚𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧-𑁨. 𑀇𑀤𑀸𑀦𑀺 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀫𑀕𑁆𑀕𑀢𑁆𑀢𑀬𑁂’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀏𑀯𑀫𑀼𑀧𑀭𑀺𑀧𑀺 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀫𑀕𑁆𑀕𑀢𑁆𑀢𑀬𑁂𑀢𑀺 𑀏𑀢𑁆𑀣 𑀫𑀕𑁆𑀕𑀸 𑀘 𑀦𑀸𑀫 𑀢𑀺𑀁𑀲 𑀫𑀕𑁆𑀕𑀸. 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀕𑀢𑀯𑀲𑁂𑀦 𑀳𑀺 𑀢𑀺𑀲𑁆𑀲𑁄 𑀇𑀢𑁆𑀣𑀺𑀬𑁄. 𑀢𑀢𑁆𑀣 𑀢𑀺𑀭𑀘𑁆𑀙𑀸𑀦𑀕𑀢𑀸𑀬 𑀅𑀬𑀁 𑀧𑀭𑀺𑀘𑁆𑀙𑁂𑀤𑁄 𑁋

‘‘𑀅𑀧𑀤𑀸𑀦𑀁 𑀅𑀳𑀻 𑀫𑀘𑁆𑀙𑀸, 𑀤𑁆𑀯𑀺𑀧𑀤𑀸𑀦𑀜𑁆𑀘 𑀓𑀼𑀓𑁆𑀓𑀼𑀝𑀻;

𑀘𑀢𑀼𑀧𑁆𑀧𑀤𑀸𑀦𑀁 𑀫𑀚𑁆𑀚𑀸𑀭𑀻, 𑀯𑀢𑁆𑀣𑀼 𑀧𑀸𑀭𑀸𑀚𑀺𑀓𑀲𑁆𑀲𑀺𑀫𑀸’’𑀢𑀺. (𑀧𑀸𑀭𑀸. 𑀅𑀝𑁆𑀞. 𑁧.𑁫𑁫);

𑀢𑀸𑀲𑀁 𑀯𑀘𑁆𑀘𑀧𑀲𑁆𑀲𑀸𑀯𑀫𑀼𑀔𑀫𑀕𑁆𑀕𑀯𑀲𑁂𑀦 𑀢𑀬𑁄 𑀢𑀬𑁄 𑀓𑀢𑁆𑀯𑀸 𑀦𑀯 𑀫𑀕𑁆𑀕𑀸, 𑀢𑀣𑀸 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀦𑀁, 𑀧𑀼𑀭𑀺𑀲𑀸𑀦𑀁 𑀧𑀦 𑀯𑀘𑁆𑀘𑀫𑀼𑀔𑀫𑀕𑁆𑀕𑀯𑀲𑁂𑀦 𑀤𑁆𑀯𑁂 𑀤𑁆𑀯𑁂 𑀓𑀢𑁆𑀯𑀸 𑀙, 𑀢𑀣𑀸 𑀧𑀡𑁆𑀟𑀓𑀸𑀦𑀦𑁆𑀢𑀺 𑀢𑀺𑀁𑀲. 𑀢𑁂𑀲𑀁 𑀢𑀬𑁂. 𑀓𑀻𑀤𑀺𑀲𑁂𑀢𑀺 𑀆𑀳 ‘‘𑀲𑀦𑁆𑀣𑀢𑀲𑀦𑁆𑀣𑀢𑁂’’𑀢𑀺. 𑀲𑀦𑁆𑀣𑀢𑁂 𑀅𑀲𑀦𑁆𑀣𑀢𑁂𑀢𑀺 𑀧𑀤𑀘𑁆𑀙𑁂𑀤𑁄. 𑀦 𑀲𑀦𑁆𑀣𑀢𑀁 𑀅𑀲𑀦𑁆𑀣𑀢𑀁. 𑀢𑀲𑁆𑀫𑀺𑀁 𑀅𑀲𑀦𑁆𑀣𑀢𑁂. 𑀦-𑀓𑀸𑀭𑁄 𑀏𑀢𑁆𑀣 ‘‘𑀅𑀩𑁆𑀭𑀸𑀳𑁆𑀫𑀡𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀧𑀬𑀺𑀭𑀼𑀤𑀸𑀲𑁂, 𑀢𑀁 𑀓𑀺𑀭𑀺𑀬𑀸𑀬𑀼𑀢𑁆𑀢𑀲𑁆𑀲 𑀢𑀸𑀤𑀺𑀲𑀲𑁆𑀲 𑀅𑀜𑁆𑀜𑀲𑁆𑀲 𑀯𑀢𑁆𑀣𑀼𑀦𑁄 𑀯𑀺𑀥𑀸𑀦𑁂𑀦 𑀲𑀦𑁆𑀣𑀢𑀲𑁆𑀲 𑀯𑀢𑁆𑀣𑀼𑀦𑁄 𑀧𑀬𑀺𑀭𑀼𑀤𑀸𑀲𑀦𑀁 𑀧𑀭𑀺𑀘𑁆𑀘𑀚𑀦𑀁 𑀧𑀬𑀺𑀭𑀼𑀤𑀸𑀲𑁄𑀢𑀺. 𑀦 𑀧𑀲𑀚𑁆𑀚𑀧𑁆𑀧𑀝𑀺𑀲𑁂𑀥𑁂, 𑀲𑀦𑁆𑀣𑀢𑀁 𑀧𑀲𑀚𑁆𑀚 𑀧𑀢𑁆𑀯𑀸 𑀢𑀲𑁆𑀲 ‘‘𑀩𑁆𑀭𑀸𑀳𑁆𑀫𑀡𑁄 𑀦 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀦 𑀦𑀺𑀲𑁂𑀥𑁄𑀢𑀺. 𑀯𑀸-𑀲𑀤𑁆𑀤𑁄 𑀧𑀦𑁂𑀢𑁆𑀣 𑀯𑀘𑀦𑀬𑀼𑀢𑁆𑀢𑀺𑀩𑀮𑁂𑀦𑁂𑀯 𑀮𑀩𑁆𑀪𑀢𑀺, 𑀢𑀲𑁆𑀲 𑀧𑀮𑀺𑀯𑁂𑀞𑁂𑀢𑁆𑀯𑀸, 𑀅𑀦𑁆𑀢𑁄 𑀯𑀸 𑀧𑀯𑁂𑀲𑁂𑀢𑁆𑀯𑀸 𑀯𑀢𑁆𑀣𑀸𑀤𑀺𑀦𑀸 𑀓𑁂𑀦𑀘𑀺 𑀧𑀝𑀺𑀘𑁆𑀙𑀦𑁆𑀦𑁂 𑀯𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑁂 𑀯𑀸𑀢𑀺 𑀅𑀢𑁆𑀣𑁄. 𑀢𑀣𑀸𑀪𑀽𑀢𑁂 𑀅𑀮𑁆𑀮𑁄𑀓𑀸𑀲𑁂 𑀧𑀓𑀢𑀺𑀯𑀸𑀢𑁂𑀦 𑀅𑀲𑀫𑁆𑀨𑀼𑀝𑁆𑀞𑁂 𑀢𑀺𑀦𑁆𑀢𑀧𑁆𑀧𑀤𑁂𑀲𑁂. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀗𑁆𑀕𑀚𑀸𑀢𑀁. 𑀲𑀦𑁆𑀢𑀺𑀆𑀤𑀺 𑀢𑀩𑁆𑀩𑀺𑀲𑁂𑀲𑀦𑀁. 𑀲𑀦𑁆𑀢𑀺 𑀅𑀢𑁆𑀢𑀦𑀺𑀬𑀁. 𑀲𑀁-𑀲𑀤𑁆𑀤𑁄 𑀳𑀺 𑀅𑀢𑁆𑀢𑀦𑀺 𑀅𑀢𑁆𑀢𑀦𑀺𑀬𑁂 𑀘 𑀯𑀢𑁆𑀢𑀢𑀺. 𑀲𑀦𑁆𑀣𑀢𑀁 𑀅𑀲𑀦𑁆𑀣𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁 𑀯𑀸. 𑀉𑀧𑀸𑀤𑀺𑀡𑁆𑀡𑀦𑁆𑀢𑀺 𑀅𑀦𑀝𑁆𑀞𑀓𑀸𑀬𑀧𑁆𑀧𑀲𑀸𑀤𑀁. 𑀓𑀺𑀢𑁆𑀢𑀓𑀦𑁆𑀢𑀺 𑀆𑀳 ‘‘𑀢𑀺𑀮𑀫𑀢𑁆𑀢𑀫𑁆𑀧𑀻’’𑀢𑀺. 𑀢𑀺𑀮𑀲𑁆𑀲 𑀫𑀢𑁆𑀢𑀁 𑀲𑀸𑀓𑀮𑁆𑀮𑀁 𑀬𑀲𑁆𑀲 𑀢𑀁 𑀢𑀺𑀮𑀫𑀢𑁆𑀢𑀁. ‘‘𑀫𑀢𑁆𑀢𑀁 𑀲𑀸𑀓𑀮𑁆𑀮𑀁 𑀦𑀺𑀘𑁆𑀙𑀬𑁂’’𑀢𑀺 𑀳𑀺 𑀦𑀺𑀖𑀡𑁆𑀟𑀼. 𑀏𑀢𑁆𑀣𑀸𑀧𑀺 𑀅𑀯𑀬𑀯𑁂𑀦 𑀯𑀺𑀕𑁆𑀕𑀳𑁄 𑀲𑀫𑀼𑀤𑀸𑀬𑁄 𑀲𑀫𑀸𑀲𑀢𑁆𑀣𑁄, 𑀢𑀺𑀮𑀩𑀻𑀚𑀧𑁆𑀧𑀫𑀸𑀡𑀫𑁆𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀁 𑀢𑀁? 𑀦𑀺𑀫𑀺𑀢𑁆𑀢𑀁, 𑀧𑀯𑁂𑀲𑀦𑀁 𑀯𑀸. 𑀅𑀧𑀺-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑁂, ‘‘𑀢𑀺𑀮𑀩𑀻𑀚𑀫𑀢𑁆𑀢𑀫𑁆𑀧𑀻’’𑀢𑀺 𑀲𑀫𑁆𑀪𑀸𑀯𑀻𑀬𑀢𑀺, 𑀅𑀥𑀺𑀓𑁂 𑀓𑀸 𑀦𑀸𑀫 𑀓𑀣𑀸𑀢𑀺 𑀇𑀤𑀫𑁂𑀢𑁆𑀣 𑀲𑀫𑁆𑀪𑀸𑀯𑀦𑀁, 𑀏𑀯𑀁𑀪𑀽𑀢𑀁 𑀲𑀁 𑀅𑀗𑁆𑀕𑀚𑀸𑀢𑀁 𑀬𑀣𑀸𑀯𑀼𑀢𑁆𑀢𑁂 𑀫𑀕𑁆𑀕𑀢𑁆𑀢𑀬𑁂 𑀢𑀺𑀮𑀫𑀢𑁆𑀢𑀫𑁆𑀧𑀺 𑀧𑀯𑁂𑀲𑀦𑁆𑀢𑁄 𑀪𑀺𑀓𑁆𑀔𑀼 𑀘𑀼𑀢𑁄 𑀧𑀭𑀺𑀪𑀝𑁆𑀞𑁄, 𑀧𑀸𑀭𑀸𑀚𑀺𑀓𑁄 𑀦𑀸𑀫 𑀳𑁄𑀢𑀺 𑀲𑀸𑀲𑀦𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺 𑀕𑀫𑁆𑀫𑀫𑀸𑀦𑀢𑁆𑀣𑀲𑁆𑀲 𑀲𑀤𑁆𑀤𑀲𑁆𑀲 𑀧𑀬𑁄𑀕𑀁 𑀧𑀢𑀺 𑀓𑀸𑀫𑀸𑀘𑀸𑀭𑀢𑁆𑀢𑀸. 𑀓𑀻𑀤𑀺𑀲𑁄𑀢𑀺 𑀆𑀳 ‘‘𑀅𑀦𑀺𑀓𑁆𑀔𑀺𑀢𑁆𑀢𑀲𑀺𑀓𑁆𑀔𑁄’’𑀢𑀺. 𑀦𑀺𑀓𑁆𑀔𑀺𑀢𑁆𑀢𑀲𑀺𑀓𑁆𑀔𑁄 𑀧𑀦 𑀅𑀪𑀺𑀓𑁆𑀔𑀼𑀓𑀢𑁆𑀢𑀸 𑀧𑀭𑀺𑀘𑁆𑀘𑀢𑁆𑀢𑁄. 𑀢𑀢𑁆𑀣 𑀦𑀺𑀓𑁆𑀔𑀺𑀢𑁆𑀢𑀸 𑀑𑀳𑀺𑀢𑀸 𑀧𑀭𑀺𑀘𑁆𑀘𑀢𑁆𑀢𑀸 𑀧𑀘𑁆𑀘𑀓𑁆𑀔𑀸𑀢𑀸 𑀲𑀺𑀓𑁆𑀔𑀸 𑀏𑀢𑁂𑀦𑀸𑀢𑀺 𑀯𑀺𑀕𑁆𑀕𑀳𑁄. 𑀬𑀣𑀸𑀮𑀓𑁆𑀔𑀡𑀁 𑀦 𑀦𑀺𑀓𑁆𑀔𑀺𑀢𑁆𑀢𑀲𑀺𑀓𑁆𑀔𑁄 𑀅𑀦𑀺𑀓𑁆𑀔𑀺𑀢𑁆𑀢𑀲𑀺𑀓𑁆𑀔𑁄. 𑀢𑀢𑁆𑀣 𑀘𑀺𑀢𑁆𑀢𑀔𑁂𑀢𑁆𑀢𑀓𑀸𑀮𑀧𑁆𑀧𑀬𑁄𑀕𑀧𑀼𑀕𑁆𑀕𑀮𑀯𑀺𑀚𑀸𑀦𑀦𑀯𑀲𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀜𑀢𑁆𑀯𑀸 𑀢𑀤𑀪𑀸𑀯𑁂𑀦 𑀅𑀧𑀘𑁆𑀘𑀓𑁆𑀔𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀉𑀧𑀲𑀫𑁆𑀧𑀦𑁆𑀦𑀪𑀸𑀯𑀢𑁄 𑀘𑀯𑀺𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑀁 𑀘𑀺𑀢𑁆𑀢𑀁 𑀦𑀸𑀫. ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀻𑀦𑀺 ‘‘𑀕𑀺𑀳𑀻𑀢𑀺 𑀫𑀁 𑀥𑀸𑀭𑁂𑀳𑀺, 𑀉𑀧𑀸𑀲𑀓𑁄, 𑀆𑀭𑀸𑀫𑀺𑀓𑁄, 𑀲𑀸𑀫𑀡𑁂𑀭𑁄𑀢𑀺 𑀫𑀁 𑀥𑀸𑀭𑁂𑀳𑀻’’𑀢𑀺 ‘‘𑀅𑀮𑀁 𑀫𑁂 𑀩𑀼𑀤𑁆𑀥𑁂𑀦𑀸’’𑀢𑀺𑀆𑀤𑀻𑀦𑀺 𑀙 𑀔𑁂𑀢𑁆𑀢𑀧𑀤𑀸𑀦𑀺 𑀔𑁂𑀢𑁆𑀢𑀁 𑀦𑀸𑀫. ‘‘𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄 𑀯𑀢𑁆𑀢𑀫𑀸𑀦𑀓𑀸𑀮𑁄𑀬𑁂𑀯 𑀓𑀸𑀮𑁄 𑀦𑀸𑀫. 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬 𑀯𑀲𑁂𑀦 𑀯𑀸𑀘𑀲𑀺𑀓𑀧𑁆𑀧𑀬𑁄𑀕𑁄𑀯 𑀧𑀬𑁄𑀕𑁄 𑀦𑀸𑀫. 𑀅𑀦𑀼𑀫𑁆𑀫𑀢𑁆𑀢𑀸𑀤𑀺𑀓𑁄 𑀧𑀘𑁆𑀘𑀓𑁆𑀔𑀸𑀢𑁄 𑀘 𑀫𑀦𑀼𑀲𑁆𑀲𑀚𑀸𑀢𑀺𑀓𑁄 𑀲𑁄𑀯 𑀧𑀼𑀕𑁆𑀕𑀮𑁄 𑀦𑀸𑀫. 𑀧𑀘𑁆𑀘𑀓𑁆𑀔𑀸𑀢𑀓𑀲𑁆𑀲 𑀯𑀘𑀦𑀲𑀫𑀦𑀦𑁆𑀢𑀭𑀫𑁂𑀯 ‘‘𑀅𑀬𑀁 𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺 𑀯𑀸 ‘‘𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀢𑀻’’𑀢𑀺 𑀯𑀸 𑀲𑁄𑀢𑀼𑀦𑁄 𑀚𑀸𑀦𑀦𑀁 𑀯𑀺𑀚𑀸𑀦𑀦𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀦𑀝𑁆𑀞𑀓𑀸𑀬𑀧𑁆𑀧𑀲𑀸𑀤𑀁 𑀧𑀦 𑀧𑀺𑀴𑀓𑀁 𑀯𑀸 𑀘𑀫𑁆𑀫𑀔𑀺𑀮𑀁 𑀯𑀸 𑀮𑁄𑀫𑀁 𑀯𑀸 𑀧𑀯𑁂𑀲𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀅𑀓𑁆𑀔𑀺𑀦𑀸𑀲𑀓𑀡𑁆𑀡𑀘𑁆𑀙𑀺𑀤𑁆𑀤𑀯𑀢𑁆𑀣𑀺𑀓𑁄𑀲𑁂𑀲𑀼, 𑀲𑀢𑁆𑀣𑀓𑀸𑀤𑀻𑀳𑀺 𑀓𑀢𑀯𑀡𑁂 𑀯𑀸 𑀫𑁂𑀣𑀼𑀦𑀭𑀸𑀕𑁂𑀦 𑀦𑀺𑀫𑀺𑀢𑁆𑀢𑀁 𑀧𑀯𑁂𑀲𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁. 𑀅𑀯𑀲𑁂𑀲𑀲𑀭𑀻𑀭𑁂𑀲𑀼 𑀉𑀧𑀓𑀘𑁆𑀙𑀓𑀸𑀤𑀻𑀲𑀼 𑀤𑀼𑀓𑁆𑀓𑀝𑀁. 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀳𑀢𑁆𑀣𑀺𑀅𑀲𑁆𑀲𑀕𑁄𑀕𑀤𑁆𑀭𑀪𑀑𑀝𑁆𑀞𑀫𑀳𑀺𑀁𑀲𑀸𑀤𑀻𑀦𑀁 𑀦𑀸𑀲𑀸𑀬 𑀣𑀼𑀮𑁆𑀮𑀘𑁆𑀘𑀬𑀁, 𑀯𑀢𑁆𑀣𑀺𑀓𑁄𑀲𑁂 𑀣𑀼𑀮𑁆𑀮𑀘𑁆𑀘𑀬𑀫𑁂𑀯. 𑀲𑀩𑁆𑀩𑁂𑀲𑀫𑁆𑀧𑀺 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀅𑀓𑁆𑀔𑀺𑀓𑀡𑁆𑀡𑀯𑀡𑁂𑀲𑀼 𑀤𑀼𑀓𑁆𑀓𑀝𑀁. 𑀢𑀣𑀸 𑀅𑀯𑀲𑁂𑀲𑀲𑀭𑀻𑀭𑁂 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦, 𑀫𑁂𑀣𑀼𑀦𑀭𑀸𑀕𑁂𑀦 𑀯𑀸 𑀚𑀻𑀯𑀫𑀸𑀦𑀓𑀧𑀼𑀭𑀺𑀲𑀲𑁆𑀲 𑀯𑀢𑁆𑀣𑀺𑀓𑁄𑀲𑀁 𑀅𑀧𑁆𑀧𑀯𑁂𑀲𑀦𑁆𑀢𑁄 𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀙𑀼𑀧𑀢𑀺, 𑀤𑀼𑀓𑁆𑀓𑀝𑀁. 𑀩𑀳𑀺 𑀦𑀺𑀓𑁆𑀔𑀦𑁆𑀢𑀤𑀦𑁆𑀢𑁂𑀲𑀼 𑀯𑀸𑀬𑀫𑀦𑁆𑀢𑀲𑁆𑀲 𑀧𑀦 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀅𑀬𑀫𑁂𑀢𑁆𑀣 𑀲𑀯𑀺𑀦𑀺𑀘𑁆𑀙𑀬𑁄 𑀅𑀢𑁆𑀣𑀯𑀡𑁆𑀡𑀦𑀓𑁆𑀓𑀫𑁄.

𑀇𑀤𑀸𑀦𑀺 𑀧𑀯𑁂𑀲𑀦𑀁 𑀦𑀸𑀫 𑀦 𑀓𑁂𑀯𑀮𑀁 𑀅𑀢𑁆𑀢𑀼𑀧𑀓𑁆𑀓𑀫𑁂𑀦𑁂𑀯, 𑀧𑀭𑀽𑀧𑀓𑁆𑀓𑀫𑁂𑀦𑀸𑀧𑀺 𑀳𑁄𑀢𑀺, 𑀢𑀢𑁆𑀭𑀸𑀧𑀺 𑀲𑀸𑀤𑀺𑀬𑀦𑁆𑀢𑁄𑀯 𑀘𑀼𑀢𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀣 𑀯𑀸𑀢𑀺 𑀅𑀬𑀁 𑀦𑀺𑀧𑀸𑀢𑁄, 𑀦𑀺𑀧𑀸𑀢𑀲𑀫𑀼𑀤𑀸𑀬𑁄 𑀯𑀸 𑀧𑀓𑁆𑀔𑀦𑁆𑀢𑀭𑀸𑀭𑀫𑁆𑀪𑁂. 𑀧𑀯𑁂𑀲𑀦𑀜𑁆𑀘 𑀞𑀺𑀢𑀜𑁆𑀘 𑀉𑀤𑁆𑀥𑀸𑀭𑁄 𑀘 𑀧𑀯𑀺𑀝𑁆𑀞𑀜𑁆𑀘 𑀧𑀯𑁂𑀲𑀦…𑀧𑁂… 𑀧𑀯𑀺𑀝𑁆𑀞𑀸𑀦𑀺, 𑀇𑀢𑀭𑀻𑀢𑀭𑀬𑁄𑀕𑀤𑁆𑀯𑀦𑁆𑀤𑁄. 𑀇𑀢𑀭𑀻𑀢𑀭𑀬𑁄𑀕𑁄 𑀦𑀸𑀫 𑀅𑀜𑁆𑀜𑀫𑀜𑁆𑀜𑀢𑁆𑀣𑁄𑀧𑀸𑀤𑀸𑀦𑀢𑀸𑀢𑀺 𑀧𑀯𑁂𑀲𑀦𑀸𑀤𑀻𑀦𑀺 𑀞𑀺𑀢𑀸𑀤𑀺𑀅𑀢𑁆𑀣𑀸𑀦𑀺𑀧𑀺 𑀳𑁄𑀦𑁆𑀢𑀻𑀢𑀺 𑀧𑀯𑀺𑀝𑁆𑀞-𑀲𑀤𑁆𑀤𑁄𑀧𑀺 𑀧𑀯𑁂𑀲𑀦𑀸𑀤𑀺𑀅𑀢𑁆𑀣𑁄 𑀳𑁄𑀢𑀺, 𑀢𑀢𑁄𑀬𑁂𑀯𑁂𑀢𑁆𑀣 𑀢𑀲𑁆𑀫𑀸 𑀩𑀳𑀼𑀯𑀘𑀦𑀲𑀫𑁆𑀪𑀯𑁄. 𑀅𑀜𑁆𑀜𑀣𑀸 𑀤𑁆𑀯𑀦𑁆𑀤𑁂 𑀅𑀯𑀬𑀯𑀢𑁆𑀣𑀧𑀥𑀸𑀦𑀢𑁆𑀢𑀸 𑀏𑀓𑀢𑁆𑀣𑀯𑀸𑀘𑀓𑀸𑀧𑀺 𑀧𑀯𑀺𑀝𑁆𑀞-𑀲𑀤𑁆𑀤𑀸 𑀓𑀣𑀁 𑀩𑀳𑀼𑀯𑀘𑀦𑀧𑁆𑀧𑀲𑀗𑁆𑀕𑁄. 𑀲𑀫𑀸𑀳𑀸𑀭𑁂 𑀯𑀸 𑀤𑁆𑀯𑀦𑁆𑀤𑁄. 𑀔𑀡𑁄𑀢𑀺 𑀓𑀸𑀮𑀯𑀺𑀲𑁂𑀲𑁄. 𑀲𑁄 𑀘 𑀬𑁄𑀕𑀯𑀦𑁆𑀢𑀸𑀦𑀁 𑀔𑀡𑀦𑁆𑀢𑀭𑀯𑀺𑀦𑀺𑀫𑀼𑀢𑁆𑀢𑁄 𑀦𑀢𑁆𑀣𑀻𑀢𑀺 𑀧𑀯𑁂𑀲𑀦…𑀧𑁂…𑀧𑀯𑀺𑀝𑁆𑀞𑀸𑀦𑀺𑀬𑁂𑀯 𑀔𑀡𑁄𑀢𑀺 𑀓𑀫𑁆𑀫𑀥𑀸𑀭𑀬𑁄, 𑀅𑀪𑁂𑀤𑁂 𑀪𑁂𑀤𑀧𑀭𑀺𑀓𑀧𑁆𑀧𑀦𑀸𑀬 𑀯𑀸 𑀧𑀯𑁂𑀲𑀦…𑀧𑁂… 𑀧𑀯𑀺𑀝𑁆𑀞𑀸𑀦𑀁 𑀔𑀡𑁄𑀢𑀺 𑀙𑀝𑁆𑀞𑀻𑀢𑀧𑁆𑀧𑀼𑀭𑀺𑀲𑁄. 𑀢𑀲𑁆𑀲 𑀲𑀸𑀤𑀓𑁄, 𑀢𑀲𑁆𑀫𑀺𑀁 𑀯𑀸 𑀲𑀸𑀤𑀓𑁄 𑀧𑀯𑁂𑀲𑀦…𑀧𑁂… 𑀲𑀸𑀤𑀓𑁄. 𑀔𑀡-𑀲𑀤𑁆𑀤𑁄 𑀧𑀦𑁂𑀢𑁆𑀣 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄 𑀤𑁆𑀯𑀦𑁆𑀤𑀲𑀫𑀸𑀲𑀢𑁆𑀢𑀸, 𑀧𑀯𑁂𑀲𑀦𑀓𑀸𑀮𑀁 𑀞𑀺𑀢𑀓𑀸𑀮𑀁 𑀉𑀤𑁆𑀥𑀸𑀭𑀓𑀸𑀮𑀁 𑀧𑀯𑀺𑀝𑁆𑀞𑀓𑀸𑀮𑀁, 𑀢𑀲𑁆𑀫𑀺𑀁 𑀯𑀸 𑀲𑀸𑀤𑀺𑀬𑀦𑁆𑀢𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀁 𑀲𑁂𑀯𑀦𑀘𑀺𑀢𑁆𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑁂𑀦 𑀲𑀸𑀤𑀓𑁄 𑀪𑀺𑀓𑁆𑀔𑀼 𑀘𑀼𑀢𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀬𑀣𑀸𑀯𑀼𑀢𑁆𑀢𑀧𑁆𑀧𑀤𑁂𑀲𑀲𑁆𑀲 𑀅𑀦𑁆𑀢𑁄𑀓𑀭𑀡𑀁 𑀧𑀯𑁂𑀲𑀦𑀁 𑀦𑀸𑀫. 𑀬𑀸𑀯 𑀉𑀤𑁆𑀥𑀭𑀡𑀸𑀭𑀫𑁆𑀪𑀸 𑀦𑀺𑀯𑀢𑁆𑀢𑀁 𑀞𑀺𑀢𑀁 𑀦𑀸𑀫. 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁧.𑁫𑁮) 𑀧𑀦 𑀫𑀸𑀢𑀼𑀕𑀸𑀫𑀲𑁆𑀲 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀢𑁆𑀯𑀸 𑀲𑀩𑁆𑀩𑀣𑀸 𑀯𑀸𑀬𑀫𑀢𑁄 𑀑𑀭𑀫𑀺𑀢𑁆𑀯𑀸 𑀞𑀺𑀢𑀓𑀸𑀮𑀁 𑀲𑀦𑁆𑀥𑀸𑀬 ‘‘𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀫𑀬𑁂’’𑀢𑀺 𑀯𑀼𑀢𑁆𑀢𑀁. 𑀬𑀸𑀯 𑀅𑀕𑁆𑀕𑀸 𑀦𑀻𑀳𑀭𑀡𑀁 𑀉𑀤𑁆𑀥𑀸𑀭𑁄 𑀦𑀸𑀫. 𑀬𑀸𑀯 𑀧𑀯𑁂𑀲𑀦𑀸𑀭𑀳𑀝𑁆𑀞𑀸𑀦𑀸 𑀅𑀦𑁆𑀢𑁄𑀓𑀢𑀁 𑀧𑀯𑀺𑀝𑁆𑀞𑀁 𑀦𑀸𑀫.

𑀧𑀞𑀫𑀁.

𑁩-𑁪. 𑀇𑀤𑀸𑀦𑀺 𑀤𑀼𑀢𑀺𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀆𑀤𑀺𑀬𑁂𑀬𑁆𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀆𑀤𑀺𑀬𑁂𑀬𑁆𑀬…𑀧𑁂… 𑀲𑀗𑁆𑀓𑁂𑀢𑀁 𑀯𑀻𑀢𑀺𑀦𑀸𑀫𑀬𑁂, 𑀧𑀸𑀭𑀸𑀚𑀺𑀓𑁄 𑀪𑀯𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀤𑀺𑀦𑁆𑀦𑀦𑁆𑀢𑀺 𑀫𑀦𑀼𑀲𑁆𑀲𑀲𑀸𑀫𑀺𑀓𑁂𑀳𑀺 𑀓𑀸𑀬𑀯𑀸𑀘𑀸𑀳𑀺 𑀦 𑀤𑀺𑀦𑁆𑀦𑀁. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦𑀸𑀢𑀺 𑀣𑁂𑀦𑁄𑀢𑀺 𑀘𑁄𑀭𑁄, 𑀢𑀲𑁆𑀲 𑀪𑀸𑀯𑁄 𑀣𑁂𑀬𑁆𑀬𑀁 𑀦-𑀓𑀸𑀭𑀲𑁆𑀲 𑀬-𑀓𑀸𑀭𑀁 𑀓𑀢𑁆𑀯𑀸 𑀤𑁆𑀯𑀺𑀢𑁆𑀢𑁂𑀦. 𑀪𑀯𑀦𑁆𑀢𑀺 𑀏𑀢𑀲𑁆𑀫𑀸 𑀅𑀪𑀺𑀥𑀸𑀦𑀩𑀼𑀤𑁆𑀥𑀻𑀢𑀺 𑀪𑀸𑀯𑁄, 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀚𑀸𑀢𑀺𑀕𑀼𑀡𑀸𑀤𑀺. 𑀇𑀥 𑀧𑀦 𑀅𑀯𑀳𑀭𑀡𑀘𑀺𑀢𑁆𑀢𑀲𑀗𑁆𑀔𑀸𑀢𑀁 𑀤𑀩𑁆𑀩𑀁 𑀣𑁂𑀬𑁆𑀬𑀁. 𑀣𑁂𑀬𑁆𑀬𑀜𑁆𑀘 𑀢𑀁 𑀘𑀺𑀢𑁆𑀢𑀜𑁆𑀘𑀸𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑀁, 𑀢𑁂𑀦. 𑀆𑀤𑀺𑀬𑁂𑀬𑁆𑀬𑀸𑀢𑀺 𑀆𑀭𑀸𑀫𑀸𑀤𑀺𑀁 𑀅𑀪𑀺𑀬𑀼𑀜𑁆𑀚𑀺𑀢𑁆𑀯𑀸 𑀕𑀡𑁆𑀳𑁂𑀬𑁆𑀬. 𑀳𑀭𑁂𑀬𑁆𑀬𑀸𑀢𑀺 𑀳𑀭𑀦𑁆𑀢𑁄 𑀕𑀡𑁆𑀳𑁂𑀬𑁆𑀬. 𑀅𑀯𑀳𑀭𑁂𑀬𑁆𑀬𑀸𑀢𑀺 𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀪𑀡𑁆𑀟𑀁 ‘‘𑀤𑁂𑀳𑀺 𑀫𑁂 𑀪𑀡𑁆𑀟’’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁄 ‘‘𑀦 𑀫𑀬𑀸 𑀕𑀳𑀺𑀢’’𑀦𑁆𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀕𑀡𑁆𑀳𑁂𑀬𑁆𑀬. 𑀇𑀭𑀺𑀬𑀸𑀧𑀣𑀁 𑀓𑁄𑀧𑁂𑀬𑁆𑀬𑀸𑀢𑀺 𑀪𑀡𑁆𑀟𑀳𑀸𑀭𑀓𑀲𑁆𑀲 𑀕𑀫𑀦𑀸𑀤𑀺𑀇𑀭𑀺𑀬𑀸𑀧𑀣𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑁂𑀬𑁆𑀬. 𑀓𑁄𑀧𑀁 𑀓𑀢𑁆𑀯𑀸 𑀕𑀡𑁆𑀳𑀸𑀢𑀻𑀢𑀺 𑀳𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 ‘‘𑀓𑁄𑀧𑀻’’𑀢𑀺 𑀦𑀸𑀫𑀥𑀸𑀢𑀼. 𑀞𑀸𑀦𑀸 𑀘𑀸𑀯𑁂𑀬𑁆𑀬𑀸𑀢𑀺 𑀞𑀧𑀺𑀢𑀝𑁆𑀞𑀸𑀦𑀢𑁄 𑀘𑀸𑀯𑁂𑀬𑁆𑀬. 𑀲𑀗𑁆𑀓𑁂𑀢𑀁 𑀯𑀻𑀢𑀺𑀦𑀸𑀫𑀬𑁂𑀢𑀺 𑀧𑀭𑀺𑀓𑀧𑁆𑀧𑀺𑀢𑀝𑁆𑀞𑀸𑀦𑀁 𑀯𑀸 𑀲𑀼𑀗𑁆𑀓𑀖𑀸𑀢𑀁 𑀯𑀸 𑀅𑀢𑀺𑀓𑁆𑀓𑀸𑀫𑁂𑀬𑁆𑀬.

𑀏𑀢𑁆𑀣 𑀘 𑀆𑀭𑀸𑀫𑀸𑀤𑀺𑀅𑀪𑀺𑀬𑀼𑀜𑁆𑀚𑀦𑁂, 𑀲𑀸𑀫𑀺𑀓𑀲𑁆𑀲 𑀯𑀺𑀫𑀢𑀼𑀧𑁆𑀧𑀸𑀤𑀦𑀥𑀼𑀭𑀦𑀺𑀓𑁆𑀔𑁂𑀧𑁂, 𑀪𑀡𑁆𑀟𑀳𑀸𑀭𑀓𑀲𑁆𑀲 𑀲𑀻𑀲𑀪𑀸𑀭𑀸𑀫𑀲𑀦𑀨𑀦𑁆𑀤𑀸𑀧𑀦𑀔𑀦𑁆𑀥𑁄𑀭𑁄𑀧𑀦𑁂, 𑀉𑀧𑀦𑀺𑀓𑁆𑀔𑀺𑀢𑁆𑀢𑁂 ‘‘𑀤𑁂𑀳𑀺 𑀫𑁂 𑀪𑀡𑁆𑀟’’𑀦𑁆𑀢𑀺 𑀘𑁄𑀤𑀺𑀬𑀫𑀸𑀦𑀲𑁆𑀲 ‘‘𑀦𑀸𑀳𑀁 𑀕𑀡𑁆𑀳𑀸𑀫𑀻’’𑀢𑀺 𑀪𑀡𑀦𑀯𑀺𑀫𑀢𑀼𑀧𑁆𑀧𑀸𑀤𑀦𑀥𑀼𑀭𑀦𑀺𑀓𑁆𑀔𑁂𑀧𑁂, 𑀣𑀮𑀝𑁆𑀞𑀲𑁆𑀲 𑀣𑁂𑀬𑁆𑀬𑀘𑀺𑀢𑁆𑀢𑁂𑀦𑀸𑀫𑀲𑀦𑀨𑀦𑁆𑀤𑀸𑀧𑀦𑀞𑀸𑀦𑀸𑀘𑀸𑀯𑀦𑁂 𑀘𑀸𑀢𑀺 𑀘𑀢𑀽𑀲𑀼 𑀧𑀘𑁆𑀘𑁂𑀓𑀁 𑀬𑀣𑀸𑀓𑁆𑀓𑀫𑀁 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀧𑀸𑀭𑀸𑀚𑀺𑀓𑀸𑀬𑁄 𑀯𑁂𑀤𑀺𑀢𑀩𑁆𑀩𑀸. ‘‘𑀲𑀳𑀪𑀡𑁆𑀟𑀳𑀸𑀭𑀓𑀁 𑀦𑁂𑀲𑁆𑀲𑀸𑀫𑀻’’𑀢𑀺 𑀧𑀞𑀫𑀤𑀼𑀢𑀺𑀬𑀧𑀸𑀤𑀲𑀗𑁆𑀓𑀸𑀫𑀦𑁂, 𑀧𑀭𑀺𑀓𑀧𑁆𑀧𑀺𑀢𑀲𑀼𑀗𑁆𑀓𑀖𑀸𑀢𑀝𑁆𑀞𑀸𑀦𑀢𑁄 𑀧𑀞𑀫𑀤𑀼𑀢𑀺𑀬𑀧𑀸𑀤𑀸𑀢𑀺𑀓𑁆𑀓𑀸𑀫𑁂 𑀘𑀸𑀢𑀺 𑀤𑁆𑀯𑀻𑀲𑀼 𑀧𑀘𑁆𑀘𑁂𑀓𑀁 𑀓𑀫𑁂𑀦 𑀣𑀼𑀮𑁆𑀮𑀘𑁆𑀘𑀬𑀧𑀸𑀭𑀸𑀚𑀺𑀓𑀸𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀫𑁂𑀢𑁆𑀣 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑀫𑀺𑀲𑁆𑀲𑀓𑀢𑁆𑀢𑀸 𑀦𑀸𑀦𑀸𑀪𑀡𑁆𑀟𑀯𑀲𑁂𑀦 𑀬𑁄𑀚𑀦𑀸. 𑀏𑀓𑀪𑀡𑁆𑀟𑀯𑀲𑁂𑀦 𑀧𑀦 𑀲𑀲𑁆𑀲𑀸𑀫𑀺𑀓𑀲𑁆𑀲 𑀤𑀸𑀲𑀲𑁆𑀲 𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲 𑀯𑀸 𑀬𑀣𑀸𑀯𑀼𑀢𑁆𑀢𑁂𑀦 𑀅𑀪𑀺𑀬𑁄𑀕𑀸𑀤𑀺𑀦𑀸 𑀦𑀬𑁂𑀦 𑀆𑀤𑀺𑀬𑀦𑀳𑀭𑀡𑀸𑀤𑀺𑀯𑀲𑁂𑀦 𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸.

𑀅𑀧𑀺𑀘 𑀇𑀫𑀸𑀦𑀺 𑀙 𑀧𑀤𑀸𑀦𑀺 𑀯𑀡𑁆𑀡𑀬𑀦𑁆𑀢𑁂𑀦 𑀦𑀸𑀦𑀸𑀪𑀡𑁆𑀟𑀏𑀓𑀪𑀡𑁆𑀟𑀲𑀸𑀳𑀢𑁆𑀣𑀺𑀓𑀧𑀼𑀩𑁆𑀩𑀧𑁆𑀧𑀬𑁄𑀕𑀣𑁂𑀬𑁆𑀬𑀸𑀯𑀳𑀸𑀭𑀲𑀗𑁆𑀔𑀸𑀢𑁂 𑀧𑀜𑁆𑀘𑀧𑀜𑁆𑀘𑀓𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀧𑀜𑁆𑀘𑀯𑀻𑀲𑀢𑀺 𑀅𑀯𑀳𑀸𑀭𑀸 𑀤𑀲𑁆𑀲𑁂𑀢𑀩𑁆𑀩𑀸 𑀙𑀧𑁆𑀧𑀤𑀦𑁆𑀢𑁄𑀕𑀥𑀢𑁆𑀢𑀸 𑀲𑀩𑁆𑀩𑁂𑀲𑀫𑁆𑀧𑀺 𑀅𑀯𑀳𑀸𑀭𑀸𑀦𑀁. 𑀢𑁂 𑀧𑀦 𑀅𑀯𑀳𑀸𑀭𑀸 𑀬𑁂𑀦 𑀓𑁂𑀦𑀘𑀺 𑀅𑀪𑀺𑀬𑁄𑀕𑀸𑀤𑀺𑀆𑀓𑀸𑀭𑀦𑀸𑀦𑀢𑁆𑀢𑀫𑀢𑁆𑀢𑁂𑀦 𑀪𑀺𑀦𑁆𑀦𑀸𑀢𑀺 𑀢𑀁𑀯𑀲𑁂𑀦 𑀧𑀜𑁆𑀘𑀧𑀜𑁆𑀘𑀓𑀁 𑀦𑀸𑀫 𑀚𑀸𑀢𑀁. 𑀏𑀯𑀁 𑀲𑀁𑀯𑀡𑁆𑀡𑀺𑀢𑀜𑁆𑀳𑀺 𑀇𑀤𑀁 𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀭𑀸𑀚𑀺𑀓𑀁 𑀲𑀼𑀯𑀡𑁆𑀡𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂 𑀧𑀜𑁆𑀘𑀓𑀸𑀦𑀺 ‘‘𑀆𑀤𑀺𑀬𑁂𑀬𑁆𑀬𑀸’’𑀢𑀺𑀆𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀧𑀤𑀸𑀦𑀁 𑀯𑀲𑁂𑀦 𑀮𑀩𑁆𑀪𑀦𑁆𑀢𑀺. 𑀬𑀁 𑀧𑀦𑁂𑀢𑀁 ‘‘𑀲𑀗𑁆𑀓𑁂𑀢𑀁 𑀯𑀻𑀢𑀺𑀦𑀸𑀫𑀬𑁂’’𑀢𑀺 𑀙𑀝𑁆𑀞𑀁 𑀧𑀤𑀁, 𑀢𑀁 𑀢𑀢𑀺𑀬𑀧𑀜𑁆𑀘𑀫𑁂𑀲𑀼 𑀧𑀜𑁆𑀘𑀓𑁂𑀲𑀼 𑀦𑀺𑀲𑁆𑀲𑀕𑁆𑀕𑀺𑀬𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁.

𑀢𑀢𑁆𑀣 𑀲𑀸𑀳𑀢𑁆𑀣𑀺𑀓-𑀲𑀤𑁆𑀤𑁂𑀦 𑀉𑀧𑀘𑀸𑀭𑀢𑁄 𑀢𑀁𑀲𑀳𑀘𑀭𑀺𑀢𑀧𑀜𑁆𑀘𑀓𑀁 𑀕𑀳𑁂𑀢𑁆𑀯𑀸 ‘‘𑀲𑀸𑀳𑀢𑁆𑀣𑀺𑀓𑀜𑁆𑀘 𑀢𑀁 𑀧𑀜𑁆𑀘𑀓𑀜𑁆𑀘𑀸’’𑀢𑀺 𑀯𑀸 ‘‘𑀲𑀸𑀳𑀢𑁆𑀣𑀺𑀓𑀸𑀤𑀺 𑀧𑀜𑁆𑀘𑀓’’𑀦𑁆𑀢𑀺 𑀫𑀚𑁆𑀛𑁂𑀧𑀤𑀮𑁄𑀧𑀯𑀲𑁂𑀦 𑀯𑀸 𑀲𑀸𑀳𑀢𑁆𑀣𑀺𑀓𑀧𑀜𑁆𑀘𑀓𑀁. 𑀏𑀯𑀫𑀼𑀧𑀭𑀺𑀧𑀺. 𑀢𑀁 𑀧𑀦 𑀲𑀸𑀳𑀢𑁆𑀣𑀺𑀓𑁄 𑀆𑀡𑀢𑁆𑀢𑀺𑀓𑁄 𑀦𑀺𑀲𑁆𑀲𑀕𑁆𑀕𑀺𑀬𑁄 𑀅𑀢𑁆𑀣𑀲𑀸𑀥𑀓𑁄 𑀥𑀼𑀭𑀦𑀺𑀓𑁆𑀔𑁂𑀧𑁄 𑀘𑀸𑀢𑀺. 𑀢𑀢𑁆𑀣 𑀲𑀓𑁄 𑀳𑀢𑁆𑀣𑁄 𑀲𑀳𑀢𑁆𑀣𑁄, 𑀲𑀳𑀢𑁆𑀣𑁂𑀦 𑀦𑀺𑀩𑁆𑀩𑀢𑁆𑀢𑁄 𑀲𑀸𑀳𑀢𑁆𑀣𑀺𑀓𑁄. 𑀏𑀯𑀁 𑀆𑀡𑀢𑁆𑀢𑀺𑀓𑁄. 𑀲𑀼𑀗𑁆𑀓𑀖𑀸𑀢𑀧𑀭𑀺𑀓𑀧𑁆𑀧𑀺𑀢𑁄𑀓𑀸𑀲𑀸𑀦𑀁 𑀅𑀦𑁆𑀢𑁄 𑀞𑀢𑁆𑀯𑀸 𑀩𑀳𑀺 𑀦𑀺𑀲𑁆𑀲𑀚𑁆𑀚𑀦𑀁 𑀦𑀺𑀲𑁆𑀲𑀕𑁆𑀕𑁄, 𑀲𑁄 𑀏𑀯 𑀦𑀺𑀲𑁆𑀲𑀕𑁆𑀕𑀺𑀬𑁄. 𑀓𑀸𑀮𑀁 𑀅𑀦𑀺𑀬𑀫𑁂𑀢𑁆𑀯𑀸 𑀆𑀡𑀢𑁆𑀢𑀲𑁆𑀲 𑀪𑀡𑁆𑀟𑀕𑁆𑀕𑀳𑀡𑀢𑁄 𑀘 𑀧𑀭𑀲𑁆𑀲 𑀢𑁂𑀮𑀓𑀼𑀫𑁆𑀪𑀺𑀬𑀸 𑀧𑀸𑀤𑀕𑁆𑀖𑀦𑀓𑀁 𑀢𑁂𑀮𑀁 𑀅𑀯𑀲𑁆𑀲𑀁 𑀧𑀺𑀯𑀦𑀓𑀸𑀦𑀁 𑀉𑀧𑀸𑀳𑀦𑀸𑀤𑀻𑀦𑀁 𑀦𑀺𑀓𑁆𑀔𑀺𑀢𑁆𑀢𑀸𑀦𑀁 𑀢𑁂𑀮𑀧𑀸𑀢𑀦𑀢𑁄 𑀘 𑀧𑀼𑀭𑁂𑀢𑀭𑀫𑁂𑀯 𑀧𑀸𑀭𑀸𑀚𑀺𑀓𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀲𑀸𑀥𑁂𑀢𑀻𑀢𑀺 𑀅𑀢𑁆𑀣𑀲𑀸𑀥𑀓𑁄. 𑀲𑁄 𑀧𑀦 𑀆𑀡𑀸𑀧𑀦𑀧𑁆𑀧𑀬𑁄𑀕𑁄, 𑀉𑀧𑀸𑀳𑀦𑀸𑀤𑀻𑀦𑀁 𑀦𑀺𑀓𑁆𑀔𑁂𑀧𑀧𑁆𑀧𑀬𑁄𑀕𑁄 𑀘. 𑀆𑀭𑀸𑀫𑀸𑀪𑀺𑀬𑁄𑀕𑁂 𑀘 𑀉𑀧𑀦𑀺𑀓𑁆𑀔𑀺𑀢𑁆𑀢𑀪𑀡𑁆𑀟𑁂 𑀘 𑀢𑀸𑀯𑀓𑀸𑀮𑀺𑀓𑀪𑀡𑁆𑀟𑀤𑁂𑀬𑁆𑀬𑀸𑀦𑀫𑀤𑀸𑀦𑁂 𑀘 𑀥𑀼𑀭𑀲𑁆𑀲 𑀦𑀺𑀓𑁆𑀔𑁂𑀧𑁄 𑀥𑀼𑀭𑀦𑀺𑀓𑁆𑀔𑁂𑀧𑁄.

𑀧𑀼𑀩𑁆𑀩𑀧𑁆𑀧𑀬𑁄𑀕𑀧𑀜𑁆𑀘𑀓𑀁 𑀦𑀸𑀫 𑀧𑀼𑀩𑁆𑀩𑀧𑁆𑀧𑀬𑁄𑀕𑁄 𑀲𑀳𑀧𑁆𑀧𑀬𑁄𑀕𑁄 𑀲𑀁𑀯𑀺𑀥𑀸𑀯𑀳𑀸𑀭𑁄 𑀲𑀗𑁆𑀓𑁂𑀢𑀓𑀫𑁆𑀫𑀁 𑀦𑀺𑀫𑀺𑀢𑁆𑀢𑀓𑀫𑁆𑀫𑀦𑁆𑀢𑀺. 𑀢𑀢𑁆𑀣 𑀆𑀡𑀸𑀧𑀦𑀁 𑀪𑀡𑁆𑀟𑀕𑁆𑀕𑀳𑀡𑀢𑁄 𑀧𑀼𑀩𑁆𑀩𑀢𑁆𑀢𑀸 𑀧𑀼𑀩𑁆𑀩𑀧𑁆𑀧𑀬𑁄𑀕𑁄 𑀦𑀸𑀫. 𑀞𑀸𑀦𑀸𑀘𑀸𑀯𑀦𑀔𑀺𑀮𑀲𑀗𑁆𑀓𑀸𑀫𑀦𑀧𑁆𑀧𑀬𑁄𑀕𑁂𑀦 𑀲𑀳 𑀯𑀢𑁆𑀢𑀫𑀸𑀦𑁄 𑀲𑀳𑀧𑁆𑀧𑀬𑁄𑀕𑁄. 𑀲𑀁𑀯𑀺𑀥𑀸𑀬 𑀲𑀫𑁆𑀫𑀦𑁆𑀢𑀬𑀺𑀢𑁆𑀯𑀸 𑀕𑀢𑁂𑀲𑀼 𑀏𑀓𑁂𑀦𑀸𑀧𑀺 𑀪𑀡𑁆𑀟𑁂 𑀞𑀸𑀦𑀸 𑀘𑀸𑀯𑀺𑀢𑁂 𑀲𑀩𑁆𑀩𑁂𑀲𑀁 𑀅𑀯𑀳𑀸𑀭𑁄 𑀲𑀁𑀯𑀺𑀥𑀸𑀯𑀳𑀸𑀭𑁄. 𑀲𑀗𑁆𑀓𑁂𑀢𑀓𑀫𑁆𑀫𑀦𑁆𑀢𑀺 𑀧𑀼𑀩𑁆𑀩𑀡𑁆𑀳𑀸𑀤𑀺𑀓𑀸𑀮𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑀜𑁆𑀚𑀸𑀦𑀦𑀓𑀭𑀡𑀁. 𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀦𑀸𑀫 𑀲𑀜𑁆𑀜𑀼𑀧𑁆𑀧𑀸𑀤𑀦𑀢𑁆𑀣𑀁 𑀅𑀓𑁆𑀔𑀺𑀦𑀺𑀔𑀡𑀦𑀸𑀤𑀺𑀓𑀭𑀡𑀁.

𑀣𑁂𑀬𑁆𑀬𑀸𑀯𑀳𑀸𑀭𑀧𑀜𑁆𑀘𑀓𑀁 𑀧𑀦 𑀲𑀬𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀦𑀦𑀼 𑀘 𑀙𑀧𑁆𑀧𑀤𑀦𑁆𑀢𑁄𑀕𑀥𑀢𑁆𑀢𑀸 ‘‘𑀲𑀩𑁆𑀩𑁂𑀲𑀫𑁆𑀧𑀺 𑀅𑀯𑀳𑀸𑀭𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀲𑀢𑀺 ‘‘𑀅𑀣 𑀯𑀸’’𑀢𑀺 𑀧𑀓𑁆𑀔𑀦𑁆𑀢𑀭𑀯𑀲𑁂𑀦 𑀯𑀺𑀲𑀼𑀁 𑀯𑀺𑀬 𑀇𑀤𑀁 𑀧𑀜𑁆𑀘𑀓𑀁 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺? 𑀦𑀦𑀼 𑀅𑀯𑁄𑀘𑀼𑀫𑁆𑀳𑀸 ‘‘𑀬𑁂𑀦 𑀓𑁂𑀦𑀘𑀺 𑀅𑀪𑀺𑀬𑁄𑀕𑀸𑀤𑀺𑀆𑀓𑀸𑀭𑀦𑀸𑀦𑀢𑁆𑀢𑀫𑀢𑁆𑀢𑁂𑀦 𑀪𑀺𑀦𑁆𑀦𑀸’’𑀢𑀺, 𑀏𑀢𑀸𑀤𑀺𑀲𑀲𑁆𑀲 𑀪𑁂𑀤𑀲𑁆𑀲 𑀲𑀫𑁆𑀪𑀯𑀢𑁄 𑀧𑀓𑁆𑀔𑀦𑁆𑀢𑀭𑀯𑀲𑁂𑀦𑀸𑀧𑀺 𑀬𑀼𑀚𑁆𑀚𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀇𑀫𑀲𑁆𑀲 𑀧𑀜𑁆𑀘𑀓𑀲𑁆𑀲 𑀯𑀺𑀲𑀼𑀁 𑀉𑀤𑁆𑀥𑀭𑀺𑀢𑁆𑀯𑀸 𑀯𑀘𑀦𑀁 𑀧𑀦 𑀧𑀲𑀺𑀤𑁆𑀥𑀺𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁, 𑀓𑀼𑀲-𑀲𑀤𑁆𑀤𑁂𑀦 𑀓𑀼𑀲𑀲𑀗𑁆𑀓𑀸𑀫𑀦𑀫𑀥𑀺𑀧𑁆𑀧𑁂𑀢𑀁 𑀅𑀪𑁂𑀤𑁄𑀧𑀘𑀸𑀭𑁂𑀦. 𑀣𑁂𑀬𑁆𑀬𑀜𑁆𑀘 𑀩𑀮𑀜𑁆𑀘 𑀓𑀼𑀲𑁄 𑀘 𑀙𑀦𑁆𑀦𑀜𑁆𑀘 𑀧𑀭𑀺𑀓𑀧𑁆𑀧𑁄 𑀘 𑀣𑁂𑀬𑁆𑀬𑀸…𑀧𑁂… 𑀧𑀭𑀺𑀓𑀧𑁆𑀧𑀁, 𑀤𑀻𑀖𑁄 𑀲𑀦𑁆𑀥𑀺𑀯𑀲𑁂𑀦. 𑀢𑁂𑀦 𑀅𑀯𑀳𑀸𑀭𑀓𑁄 𑀧𑀸𑀭𑀸𑀚𑀺𑀓𑁄 𑀪𑀯𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁄 𑀧𑀦 𑀧𑀝𑀺𑀘𑁆𑀙𑀦𑁆𑀦𑁂𑀦 𑀅𑀯𑀳𑀸𑀭𑀓𑁄, 𑀲𑁄 𑀅𑀢𑁆𑀣𑀢𑁄 𑀧𑀝𑀺𑀘𑁆𑀙𑀦𑁆𑀦𑀲𑁆𑀲 𑀅𑀯𑀳𑀸𑀭𑀓𑁄 𑀳𑁄𑀢𑀻𑀢𑀺 𑀤𑁆𑀯𑀦𑁆𑀤𑀲𑀫𑀸𑀲𑀦𑁆𑀢𑁄𑀕𑀥𑀢𑁆𑀢𑁂𑀧𑀺𑀘𑀲𑁆𑀲 𑀯𑀺𑀭𑁄𑀥𑀸𑀪𑀸𑀯𑁄𑀪𑀸𑀯𑀲𑀸𑀥𑀦𑁄 𑀘𑀸𑀬𑀁 𑀙𑀦𑁆𑀦-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀣 𑀲𑀦𑁆𑀥𑀺𑀘𑁆𑀙𑁂𑀤𑀦𑀸𑀤𑀻𑀦𑀺 𑀓𑀢𑁆𑀯𑀸 𑀯𑀸 𑀢𑀼𑀮𑀸𑀓𑀽𑀝𑀫𑀸𑀦𑀓𑀽𑀝𑀓𑀳𑀸𑀧𑀡𑀓𑀽𑀝𑀸𑀤𑀻𑀳𑀺 𑀯𑀜𑁆𑀘𑁂𑀢𑁆𑀯𑀸 𑀯𑀸 𑀕𑀡𑁆𑀳𑀦𑁆𑀢𑁄 𑀣𑁂𑀬𑁆𑀬𑀸𑀯𑀳𑀸𑀭𑀓𑁄. 𑀩𑀮𑀓𑁆𑀓𑀸𑀭𑁂𑀦 𑀧𑀭𑀲𑀦𑁆𑀢𑀓𑀁 𑀕𑀡𑁆𑀳𑀦𑁆𑀢𑁄 𑀩𑀮𑀸𑀯𑀳𑀸𑀭𑀓𑁄. 𑀓𑀼𑀲𑀁 𑀲𑀗𑁆𑀓𑀸𑀫𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀓𑀼𑀲𑀸𑀯𑀳𑀸𑀭𑀓𑁄. 𑀢𑀺𑀡𑀧𑀡𑁆𑀡𑀸𑀤𑀻𑀳𑀺 𑀬𑀁 𑀓𑀺𑀜𑁆𑀘𑀺 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀘𑁆𑀙𑀸 𑀓𑀲𑁆𑀲 𑀧𑀝𑀺𑀘𑁆𑀙𑀦𑁆𑀦𑀲𑁆𑀲 𑀅𑀯𑀳𑀸𑀭𑀓𑁄 𑀧𑀝𑀺𑀘𑁆𑀙𑀦𑁆𑀦𑀸𑀯𑀳𑀸𑀭𑀓𑁄. 𑀲𑀸𑀝𑀓𑀸𑀤𑀺𑀪𑀡𑁆𑀟𑀯𑀲𑁂𑀦, 𑀕𑀩𑁆𑀪𑀤𑁆𑀯𑀸𑀭𑀸𑀤𑀺𑀑𑀓𑀸𑀲𑀯𑀲𑁂𑀦 𑀯𑀸 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑀓𑁄. 𑀏𑀢𑁆𑀣 𑀧𑀦 𑀧𑀭𑀺𑀓𑀧𑁆𑀧𑀺𑀢𑀪𑀡𑁆𑀟𑀕𑁆𑀕𑀳𑀡𑁂 𑀧𑀭𑀺𑀓𑀧𑁆𑀧𑀺𑀢𑀧𑀭𑀺𑀘𑁆𑀙𑁂𑀤𑀸𑀢𑀺𑀓𑁆𑀓𑀫𑁂 𑀘 𑀧𑀸𑀭𑀸𑀚𑀺𑀓𑀁 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀧𑀦𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀡𑁆𑀟𑀓𑀸𑀮𑀕𑁆𑀖𑀤𑁂𑀲𑁂𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀅𑀤𑀺𑀦𑁆𑀦𑀸𑀤𑀸𑀦𑁂 𑀪𑀡𑁆𑀟𑀜𑁆𑀘 𑀓𑀸𑀮𑁄 𑀘 𑀅𑀕𑁆𑀖𑁄 𑀘 𑀤𑁂𑀲𑁄 𑀘 𑀢𑁂𑀳𑀺 𑀘 𑀧𑀭𑀺𑀪𑁄𑀕𑁂𑀦 𑀘 𑀯𑀺𑀦𑀺𑀘𑁆𑀙𑀬𑁄 𑀓𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀅𑀯𑀳𑀝𑀪𑀡𑁆𑀟𑀲𑁆𑀲 𑀲𑀲𑁆𑀲𑀸𑀫𑀺𑀓𑀲𑁆𑀲𑀸𑀫𑀺𑀓𑀪𑀸𑀯𑀁 𑀲𑀲𑁆𑀲𑀸𑀫𑀺𑀓𑁂𑀧𑀺 𑀲𑀸𑀫𑀺𑀓𑀸𑀦𑀁 𑀲𑀸𑀮𑀬𑀦𑀺𑀭𑀸𑀮𑀬𑀪𑀸𑀯𑀜𑁆𑀘 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀲𑀸𑀮𑀬𑀓𑀸𑀮𑁂 𑀘𑁂 𑀅𑀯𑀳𑀝𑀁, 𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀓𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄 𑀪𑀡𑁆𑀟𑁂𑀦 𑀯𑀺𑀦𑀺𑀘𑁆𑀙𑀬𑁄. 𑀦𑀺𑀭𑀸𑀮𑀬𑀓𑀸𑀮𑁂 𑀘𑁂 𑀅𑀯𑀳𑀝𑀁, 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺, 𑀲𑀸𑀫𑀺𑀓𑁂𑀲𑀼 𑀧𑀼𑀦 𑀆𑀳𑀭𑀸𑀧𑁂𑀦𑁆𑀢𑁂𑀲𑀼 𑀤𑀸𑀢𑀩𑁆𑀩𑀁. 𑀢𑀤𑁂𑀯 𑀳𑀺 𑀪𑀡𑁆𑀟𑀁 𑀓𑀤𑀸𑀘𑀺 𑀫𑀳𑀕𑁆𑀖𑀁, 𑀓𑀤𑀸𑀘𑀺 𑀅𑀧𑁆𑀧𑀕𑁆𑀖𑀁, 𑀢𑀲𑁆𑀫𑀸 𑀬𑀲𑁆𑀫𑀺𑀁 𑀓𑀸𑀮𑁂 𑀪𑀡𑁆𑀟𑀁 𑀅𑀯𑀳𑀝𑀁, 𑀢𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀬𑁄 𑀢𑀲𑁆𑀲 𑀅𑀕𑁆𑀖𑁄, 𑀢𑁂𑀦 𑀓𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄 𑀓𑀸𑀮𑁂𑀦 𑀯𑀺𑀦𑀺𑀘𑁆𑀙𑀬𑁄. 𑀦𑀯𑀪𑀡𑁆𑀟𑀲𑁆𑀲 𑀬𑁄 𑀅𑀕𑁆𑀖𑁄, 𑀲𑁄 𑀧𑀘𑁆𑀙𑀸 𑀧𑀭𑀺𑀳𑀸𑀬𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀤𑀸 𑀧𑀓𑀢𑀺𑀅𑀕𑁆𑀖𑀯𑀲𑁂𑀦 𑀅𑀓𑀢𑁆𑀯𑀸 𑀓𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄 𑀅𑀕𑁆𑀖𑁂𑀦 𑀯𑀺𑀦𑀺𑀘𑁆𑀙𑀬𑁄. 𑀪𑀡𑁆𑀟𑀼𑀝𑁆𑀞𑀸𑀦𑀤𑁂𑀲𑁂 𑀪𑀡𑁆𑀟𑀁 𑀅𑀧𑁆𑀧𑀕𑁆𑀖𑀁 𑀳𑁄𑀢𑀺, 𑀅𑀜𑁆𑀜𑀢𑁆𑀣 𑀫𑀳𑀕𑁆𑀖𑀁, 𑀢𑀲𑁆𑀫𑀸 𑀬𑀲𑁆𑀫𑀺𑀁 𑀤𑁂𑀲𑁂 𑀪𑀡𑁆𑀟𑀁 𑀅𑀯𑀳𑀝𑀁, 𑀢𑀲𑁆𑀫𑀺𑀁𑀬𑁂𑀯 𑀤𑁂𑀲𑁂 𑀅𑀕𑁆𑀖𑁂𑀦 𑀓𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄 𑀤𑁂𑀲𑁂𑀦 𑀯𑀺𑀦𑀺𑀘𑁆𑀙𑀬𑁄. 𑀧𑀭𑀺𑀪𑁄𑀕𑁂𑀦 𑀲𑀸𑀝𑀓𑀸𑀤𑀺𑀦𑁄 𑀪𑀡𑁆𑀟𑀲𑁆𑀲 𑀅𑀕𑁆𑀖𑁄 𑀧𑀭𑀺𑀳𑀸𑀬𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀧𑀭𑀺𑀪𑁄𑀕𑀯𑀲𑁂𑀦 𑀧𑀭𑀺𑀳𑀻𑀦𑀸𑀧𑀭𑀺𑀳𑀻𑀦𑀪𑀸𑀯𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀓𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄 𑀧𑀭𑀺𑀪𑁄𑀕𑁂𑀦 𑀯𑀺𑀦𑀺𑀘𑁆𑀙𑀬𑁄.

𑀤𑀼𑀢𑀺𑀬𑀁.

𑁫-𑁭. 𑀇𑀤𑀸𑀦𑀺 𑀢𑀢𑀺𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀦𑀼𑀲𑁆𑀲𑀯𑀺𑀕𑁆𑀕𑀳’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀁 𑀓𑀮𑀮𑀢𑁄 𑀧𑀝𑁆𑀞𑀸𑀬 𑀚𑀻𑀯𑀫𑀸𑀦𑀓𑀫𑀦𑀼𑀲𑁆𑀲𑀚𑀸𑀢𑀺𑀓𑀸𑀦𑀁 𑀲𑀭𑀻𑀭𑀁. 𑀘𑀺𑀘𑁆𑀘 𑀧𑀸𑀡𑁄𑀢𑀺 𑀲𑀜𑁆𑀜𑀸𑀬 𑀲𑀤𑁆𑀥𑀺𑀁𑀬𑁂𑀯 ‘‘𑀯𑀥𑀸𑀫𑀺 𑀦’’𑀦𑁆𑀢𑀺 𑀯𑀥𑀓𑀘𑁂𑀢𑀦𑀸𑀬 𑀘𑁂𑀢𑁂𑀢𑁆𑀯𑀸 𑀧𑀓𑀧𑁆𑀧𑁂𑀢𑁆𑀯𑀸. 𑀚𑀻𑀯𑀺𑀢𑀸 𑀯𑀸 𑀯𑀺𑀬𑁄𑀚𑀬𑁂𑀢𑀺 𑀬𑁄 𑀪𑀺𑀓𑁆𑀔𑀼 𑀚𑀸𑀢𑀺𑀉𑀡𑁆𑀡𑀁𑀲𑀼𑀦𑀸 𑀲𑀫𑀼𑀤𑁆𑀥𑀝𑀢𑁂𑀮𑀩𑀺𑀦𑁆𑀤𑀼𑀫𑀢𑁆𑀢𑀁 𑀓𑀮𑀮𑀭𑀽𑀧𑀓𑀸𑀮𑁂 𑀢𑀸𑀧𑀦𑀸𑀤𑀻𑀳𑀺 𑀯𑀸 𑀢𑀢𑁄 𑀯𑀸 𑀉𑀤𑁆𑀥𑀫𑀧𑀺 𑀢𑀤𑀦𑀼𑀭𑀽𑀧𑁂𑀦 𑀉𑀧𑀓𑁆𑀓𑀫𑁂𑀦 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁄𑀧𑀓𑁆𑀓𑀫𑁂 𑀲𑀢𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀦𑁄 𑀅𑀭𑀽𑀧𑀚𑀻𑀯𑀺𑀢𑀲𑁆𑀲𑀸𑀧𑀺 𑀯𑁄𑀭𑁄𑀧𑀦𑀲𑀫𑁆𑀪𑀯𑀢𑁄 𑀉𑀪𑀬𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬. 𑀯𑀸-𑀲𑀤𑁆𑀤𑁄 𑀯𑀺𑀓𑀧𑁆𑀧𑁂. 𑀫𑀭𑀡𑀘𑁂𑀢𑀦𑁄𑀢𑀺 𑀫𑀭𑀡𑁂 𑀘𑁂𑀢𑀦𑀸 𑀬𑀲𑁆𑀲 𑀲𑁄 𑀫𑀭𑀡𑀸𑀥𑀺𑀧𑁆𑀧𑀸𑀬𑁄. 𑀲𑀢𑁆𑀣𑀳𑀸𑀭𑀓𑀦𑁆𑀢𑀺 𑀚𑀻𑀯𑀺𑀢𑀁 𑀳𑀭𑀢𑀻𑀢𑀺 𑀳𑀸𑀭𑀓𑀁, 𑀲𑀢𑁆𑀣𑀜𑁆𑀘 𑀢𑀁 𑀳𑀸𑀭𑀓𑀜𑁆𑀘𑀸𑀢𑀺 𑀲𑀢𑁆𑀣𑀳𑀸𑀭𑀓𑀁, 𑀢𑀁. 𑀅𑀲𑁆𑀲 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀲𑁆𑀲. 𑀉𑀧𑀦𑀺𑀓𑁆𑀔𑀺𑀧𑁂𑀢𑀺 𑀲𑀫𑀻𑀧𑁂 𑀦𑀺𑀓𑁆𑀔𑀺𑀧𑁂𑀬𑁆𑀬 𑀯𑀸. 𑀏𑀢𑁂𑀦 𑀣𑀸𑀯𑀭𑀧𑁆𑀧𑀬𑁄𑀕𑀁 𑀤𑀲𑁆𑀲𑁂𑀢𑀺. 𑀕𑀸𑀳𑁂𑀬𑁆𑀬 𑀫𑀭𑀡𑀽𑀧𑀸𑀬𑀦𑁆𑀢𑀺 ‘‘𑀲𑀢𑁆𑀣𑀁 𑀯𑀸 𑀆𑀳𑀭, 𑀯𑀺𑀲𑀁 𑀯𑀸 𑀔𑀸𑀤𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀭𑀡𑀢𑁆𑀣𑀸𑀬 𑀉𑀧𑀸𑀬𑀁 𑀕𑀸𑀳𑀸𑀧𑁂𑀬𑁆𑀬 𑀯𑀸. 𑀏𑀢𑁂𑀦 𑀆𑀡𑀢𑁆𑀢𑀺𑀧𑁆𑀧𑀬𑁄𑀕𑁄 𑀤𑀲𑁆𑀲𑀺𑀢𑁄. 𑀯𑀤𑁂𑀬𑁆𑀬 𑀫𑀭𑀡𑁂 𑀕𑀼𑀡𑀦𑁆𑀢𑀺 𑀓𑀸𑀬𑀯𑀸𑀘𑀸𑀤𑀽𑀢𑀮𑁂𑀔𑀸𑀳𑀺 ‘‘𑀬𑁄 𑀏𑀯𑀁 𑀫𑀭𑀢𑀺, 𑀲𑁄 𑀥𑀦𑀁 𑀯𑀸 𑀮𑀪𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀭𑀡𑁂 𑀕𑀼𑀡𑀁 𑀧𑀓𑀸𑀲𑁂𑀬𑁆𑀬 𑀯𑀸. 𑀉𑀪𑀬𑀢𑁆𑀣 𑀅𑀥𑀺𑀓𑀸𑀭𑀯𑀲𑁂𑀦 𑀯𑀸-𑀲𑀤𑁆𑀤𑁄 𑀆𑀳𑀭𑀺𑀢𑀩𑁆𑀩𑁄. 𑀲𑁄 𑀪𑀺𑀓𑁆𑀔𑀼 𑀘𑀼𑀢𑁄𑀢𑀺 𑀲𑀫𑁆𑀩𑀦𑁆𑀥𑁄, 𑀲𑀸𑀲𑀦𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺.

𑀇𑀤𑀸𑀦𑀺 𑀧𑀦𑀲𑁆𑀲 𑀙𑀩𑁆𑀩𑀺𑀥𑁂 𑀧𑀬𑁄𑀕𑁂𑀤𑀲𑁆𑀲𑁂𑀢𑀼𑀁 ‘‘𑀧𑀬𑁄𑀕𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀸𑀳𑀢𑁆𑀣𑀺…𑀧𑁂… 𑀇𑀤𑁆𑀥𑀺𑀯𑀺𑀚𑁆𑀚𑀸𑀫𑀬𑀸 𑀧𑀬𑁄𑀕𑀸𑀢𑀺 𑀇𑀫𑁂 𑀙 𑀧𑀬𑁄𑀕𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓-𑀓𑀸𑀭𑀮𑁄𑀧𑁂𑀦 𑀧𑀦𑁂𑀢𑁆𑀣 ‘‘𑀲𑀸𑀳𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀅𑀦𑁂𑀓𑀢𑁆𑀣𑁂 𑀅𑀦𑁂𑀓𑀢𑀤𑁆𑀥𑀺𑀢𑀲𑀫𑁆𑀪𑀯𑁂𑀦 𑀲𑀳𑀢𑁆𑀣𑀲𑁆𑀲𑀸𑀬𑀁 𑀧𑀬𑁄𑀕𑁄 𑀲𑀸𑀳𑀢𑁆𑀣𑀻𑀢𑀺 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀸𑀳𑀢𑁆𑀣𑀺 𑀘 𑀦𑀺𑀲𑁆𑀲𑀕𑁆𑀕𑁄 𑀘 𑀆𑀡𑀢𑁆𑀢𑀺 𑀘 𑀣𑀸𑀯𑀭𑁄 𑀘𑀸𑀢𑀺 𑀤𑁆𑀯𑀦𑁆𑀤𑁄. 𑀇𑀤𑁆𑀥𑀺 𑀘 𑀯𑀺𑀚𑁆𑀚𑀸 𑀘, 𑀢𑀸𑀲𑀫𑀺𑀫𑁂𑀢𑀺 𑀇𑀤𑁆𑀥𑀺𑀯𑀺𑀚𑁆𑀚𑀸𑀫𑀬𑀸, 𑀇𑀤𑁆𑀥𑀺𑀫𑀬𑁄 𑀯𑀺𑀚𑁆𑀚𑀸𑀫𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀬𑁄𑀕𑀸𑀢𑀺 𑀇𑀫𑁂 𑀙𑀧𑁆𑀧𑀬𑁄𑀕𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀲𑀬𑀁 𑀫𑀸𑀭𑁂𑀦𑁆𑀢𑀲𑁆𑀲 𑀓𑀸𑀬𑁂𑀦 𑀯𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀯𑀸 𑀧𑀳𑀭𑀡𑀁 𑀲𑀸𑀳𑀢𑁆𑀣𑀺𑀓𑁄 𑀧𑀬𑁄𑀕𑁄. 𑀤𑀽𑀭𑁂 𑀞𑀺𑀢𑀁 𑀫𑀸𑀭𑁂𑀢𑀼𑀓𑀸𑀫𑀲𑁆𑀲 𑀓𑀸𑀬𑀸𑀤𑀻𑀳𑀺 𑀉𑀲𑀼𑀲𑀢𑁆𑀢𑀺𑀆𑀤𑀻𑀦𑀁 𑀦𑀺𑀲𑁆𑀲𑀚𑁆𑀚𑀦𑀁 𑀦𑀺𑀲𑁆𑀲𑀕𑁆𑀕𑁄. ‘‘𑀅𑀲𑀼𑀓𑀁 𑀦𑀸𑀫 𑀫𑀸𑀭𑁂𑀳𑀻’’𑀢𑀺𑀆𑀤𑀺𑀦𑀸 𑀆𑀡𑀸𑀧𑁂𑀦𑁆𑀢𑀲𑁆𑀲 𑀆𑀡𑀸𑀧𑀦𑀁 𑀆𑀡𑀢𑁆𑀢𑀺, 𑀑𑀧𑀸𑀢𑀔𑀡𑀦𑀁 𑀅𑀧𑀲𑁆𑀲𑁂𑀦𑀲𑀁𑀯𑀺𑀥𑀸𑀦𑀁 𑀅𑀲𑀺𑀆𑀤𑀻𑀦𑀁 𑀉𑀧𑀦𑀺𑀓𑁆𑀔𑀺𑀧𑀦𑀸𑀤𑀺 𑀣𑀸𑀯𑀭𑁄. 𑀫𑀸𑀭𑀡𑀢𑁆𑀣𑀁 𑀓𑀫𑁆𑀫𑀯𑀺𑀧𑀸𑀓𑀚𑀸𑀬 𑀇𑀤𑁆𑀥𑀺𑀬𑀸 𑀧𑀬𑁄𑀚𑀦𑀁 𑀇𑀤𑁆𑀥𑀺𑀫𑀬𑁄. 𑀓𑀫𑁆𑀫𑀯𑀺𑀧𑀸𑀓𑀚𑀺𑀤𑁆𑀥𑀺 𑀘 𑀦𑀸𑀫𑁂𑀲𑀸 𑀭𑀸𑀚𑀸𑀤𑀻𑀦𑀁 𑀭𑀸𑀚𑀺𑀤𑁆𑀥𑀺𑀆𑀤𑀬𑁄. 𑀢𑀢𑁆𑀣 𑀧𑀺𑀢𑀼𑀭𑀜𑁆𑀜𑁄 𑀲𑀻𑀳𑀴𑀺𑀦𑁆𑀤𑀲𑁆𑀲 𑀤𑀸𑀞𑀸𑀓𑁄𑀝𑀦𑁂𑀦 𑀘𑀽𑀴𑀲𑀼𑀫𑀦𑀓𑀼𑀝𑀼𑀫𑁆𑀩𑀺𑀬𑀫𑀸𑀭𑀡𑁂 𑀭𑀸𑀚𑀺𑀤𑁆𑀥𑀺 𑀤𑀝𑁆𑀞𑀩𑁆𑀩𑀸, 𑀢𑀤𑀢𑁆𑀣𑀫𑁂𑀯 𑀅𑀣𑀩𑁆𑀩𑀡𑀸𑀤𑀺𑀯𑀺𑀚𑁆𑀚𑀸𑀬 𑀧𑀭𑀺𑀚𑀧𑁆𑀧𑀦𑀁 𑀯𑀺𑀚𑁆𑀚𑀸𑀫𑀬𑁄 𑀧𑀬𑁄𑀕𑁄.

𑀏𑀯𑀁 𑀙𑀧𑁆𑀧𑀬𑁄𑀕𑁂 𑀤𑀲𑁆𑀲𑁂𑀢𑁆𑀯𑀸 𑀢𑁂𑀲𑀼 𑀆𑀡𑀢𑁆𑀢𑀺𑀧𑁆𑀧𑀬𑁄𑀕𑀲𑁆𑀲 𑀦𑀺𑀬𑀸𑀫𑀓𑁂 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀮𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀣𑀸𑀯𑀼𑀢𑁆𑀢𑀁 𑀆𑀡𑀢𑁆𑀢𑀺𑀁 𑀦𑀺𑀬𑀫𑁂𑀦𑁆𑀢𑀺 𑀲𑀗𑁆𑀓𑁂𑀢𑀯𑀺𑀲𑀗𑁆𑀓𑁂𑀢𑀢𑀸𑀯𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑀻𑀢𑀺 𑀆𑀡𑀢𑁆𑀢𑀺𑀦𑀺𑀬𑀸𑀫𑀓𑀸. 𑀢𑁂 𑀧𑀦 𑀓𑀸𑀮𑁄 𑀘 𑀯𑀢𑁆𑀣𑀼 𑀘 𑀆𑀯𑀼𑀥𑀜𑁆𑀘 𑀇𑀭𑀺𑀬𑀸𑀧𑀣𑁄 𑀘𑀸𑀢𑀺 𑀘𑀢𑁆𑀢𑀸𑀭𑁄, 𑀢𑀣𑀸 𑀓𑀺𑀭𑀺𑀬𑀸𑀯𑀺𑀲𑁂𑀲𑁄 𑀑𑀓𑀸𑀲𑁄𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀙 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀓𑀸𑀮𑁄 𑀧𑀼𑀩𑁆𑀩𑀡𑁆𑀳𑀸𑀤𑀺 𑀬𑁄𑀩𑁆𑀩𑀦𑀸𑀤𑀺 𑀘. 𑀯𑀢𑁆𑀣𑀼 𑀫𑀸𑀭𑁂𑀢𑀩𑁆𑀩𑁄 𑀲𑀢𑁆𑀢𑁄. 𑀆𑀯𑀼𑀥𑀁 𑀅𑀲𑀺𑀆𑀤𑀺. 𑀇𑀭𑀺𑀬𑀸𑀧𑀣𑁄 𑀫𑀸𑀭𑁂𑀢𑀩𑁆𑀩𑀲𑁆𑀲 𑀕𑀫𑀦𑀸𑀤𑀺. 𑀓𑀺𑀭𑀺𑀬𑀸𑀯𑀺𑀲𑁂𑀲𑁄 𑀯𑀺𑀚𑁆𑀛𑀦𑀸𑀤𑀺. 𑀑𑀓𑀸𑀲𑁄 𑀕𑀸𑀫𑀸𑀤𑀺. 𑀬𑁄 𑀳𑀺 ‘‘𑀅𑀚𑁆𑀚, 𑀲𑁆𑀯𑁂’’𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 ‘‘𑀧𑀼𑀩𑁆𑀩𑀡𑁆𑀳𑁂 𑀫𑀸𑀭𑁂𑀳𑀻’’𑀢𑀺 𑀯𑀼𑀢𑁆𑀢𑁄 𑀬𑀤𑀸 𑀓𑀤𑀸𑀘𑀺 𑀧𑀼𑀩𑁆𑀩𑀡𑁆𑀳𑁂 𑀫𑀸𑀭𑁂𑀢𑀺, 𑀦𑀢𑁆𑀣𑀺 𑀯𑀺𑀲𑀗𑁆𑀓𑁂𑀢𑁄. 𑀬𑁄 𑀧𑀦 ‘‘𑀧𑀼𑀩𑁆𑀩𑀡𑁆𑀳𑁂’’𑀢𑀺 𑀯𑀼𑀢𑁆𑀢𑁄 𑀫𑀚𑁆𑀛𑀦𑁆𑀳𑀸𑀤𑀻𑀲𑀼 𑀫𑀸𑀭𑁂𑀢𑀺, 𑀯𑀺𑀲𑀗𑁆𑀓𑁂𑀢𑁄 𑀳𑁄𑀢𑀺, 𑀆𑀡𑀸𑀧𑀓𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀏𑀯𑀁 𑀓𑀸𑀮𑀲𑁆𑀲 𑀲𑀗𑁆𑀓𑁂𑀢𑀯𑀺𑀲𑀗𑁆𑀓𑁂𑀢𑀢𑀸𑀯𑀲𑁂𑀦 𑀦𑀺𑀬𑀸𑀫𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀺𑀦𑀸𑀯 𑀦𑀬𑁂𑀦 𑀯𑀢𑁆𑀣𑀼𑀆𑀤𑀻𑀲𑀼𑀧𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀢𑀢𑀺𑀬𑀁.

𑁮-𑁯. 𑀇𑀤𑀸𑀦𑀺 𑀘𑀢𑀼𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀛𑀸𑀦𑀸𑀤𑀺𑀪𑁂𑀤’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀢𑁆𑀢𑀦𑀺 𑀦𑁄𑀲𑀦𑁆𑀢𑀁 𑀅𑀢𑁆𑀢𑀼𑀧𑀦𑀸𑀬𑀺𑀓𑀜𑁆𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑀲𑁆𑀲𑀺𑀢𑀜𑁆𑀘 𑀅𑀜𑁆𑀜𑀸𑀧𑀤𑁂𑀲𑀭𑀳𑀺𑀢𑀜𑁆𑀘 𑀛𑀸𑀦𑀸𑀤𑀺𑀪𑁂𑀤𑀁 𑀓𑁄𑀝𑁆𑀞𑀸𑀲𑀁 𑀓𑀢𑁆𑀯𑀸 𑀯𑀸 𑀏𑀓𑁂𑀓𑀁 𑀓𑀢𑁆𑀯𑀸 𑀯𑀸 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀯𑀺𑀜𑁆𑀜𑀢𑁆𑀢𑀺𑀧𑀣𑁂 𑀤𑀻𑀧𑁂𑀦𑁆𑀢𑁄 𑀦𑀸𑀥𑀺𑀫𑀸𑀦𑀺𑀓𑁄 𑀜𑀸𑀢𑁂 𑀘𑀼𑀢𑁄 𑀪𑀯𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀅𑀢𑁆𑀢𑀦𑀺 𑀲𑀓𑀲𑀦𑁆𑀢𑀸𑀦𑁂 𑀦𑁄𑀲𑀦𑁆𑀢𑀁 𑀅𑀦𑀼𑀧𑁆𑀧𑀦𑁆𑀦𑀢𑁆𑀢𑀸𑀬𑁂𑀯 𑀅𑀯𑀺𑀚𑁆𑀚𑀫𑀸𑀦𑀁, 𑀏𑀢𑁆𑀣 𑀦𑁄𑀲𑀦𑁆𑀢𑁄𑀢𑀺 𑀅𑀢𑁆𑀣𑁂 𑀢𑀧𑁆𑀧𑀼𑀭𑀺𑀲𑁄. 𑀛𑀸𑀦𑀸𑀤𑀺𑀪𑁂𑀤𑀦𑁆𑀢𑀺 𑀛𑀸𑀦𑀁 𑀆𑀤𑀺 𑀬𑀲𑁆𑀲 ‘‘𑀯𑀺𑀫𑁄𑀓𑁆𑀔𑀲𑀫𑀸𑀥𑀺 𑀲𑀫𑀸𑀧𑀢𑁆𑀢𑀺 𑀜𑀸𑀡𑀤𑀲𑁆𑀲𑀦 𑀫𑀕𑁆𑀕𑀪𑀸𑀯𑀦𑀸 𑀨𑀮𑀲𑀘𑁆𑀙𑀺 𑀓𑀺𑀭𑀺𑀬𑀸𑀓𑀺𑀮𑁂𑀲𑀧𑁆𑀧𑀳𑀸𑀦𑀯𑀺𑀦𑀻𑀯𑀭𑀡𑀢𑀸𑀘𑀺𑀢𑁆𑀢𑀲𑁆𑀲 𑀲𑀼𑀜𑁆𑀜𑀸𑀕𑀸𑀭𑁂 𑀅𑀪𑀺𑀭𑀢𑀻’’𑀢𑀺 (𑀧𑀸𑀭𑀸. 𑁧𑁯𑁮) 𑀯𑀼𑀢𑁆𑀢𑀲𑁆𑀲 𑀲𑁄 𑀛𑀸𑀦𑀸𑀤𑀺, 𑀲𑁄𑀯 𑀪𑁂𑀤𑁄 𑀯𑀺𑀲𑁂𑀲𑁄𑀢𑀺 𑀲𑀫𑀸𑀲𑁄. 𑀢𑀁 𑀛𑀸𑀦𑀸𑀤𑀺𑀪𑁂𑀤𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁. 𑀅𑀢𑁆𑀢𑀼𑀧𑀦𑀸𑀬𑀺𑀓𑀦𑁆𑀢𑀺 ‘‘𑀅𑀬𑀁 𑀫𑀬𑀺 𑀅𑀢𑁆𑀣𑀻’’𑀢𑀺 𑀆𑀭𑁄𑀘𑀦𑀯𑀲𑁂𑀦 𑀅𑀢𑁆𑀢𑀦𑀺 𑀉𑀧𑀦𑀻𑀬𑀢𑀺, ‘‘𑀅𑀳𑀁 𑀯𑀸 𑀏𑀢𑁆𑀣 𑀲𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀸 𑀉𑀧𑀦𑀻𑀬𑀢𑀺 𑀏𑀢𑁆𑀣 𑀥𑀫𑁆𑀫𑁂𑀢𑀺 𑀯𑀸 𑀅𑀢𑁆𑀢𑀼𑀧𑀦𑀸𑀬𑀺𑀓𑁄, 𑀛𑀸𑀦𑀸𑀤𑀺𑀪𑁂𑀤𑁄, 𑀢𑀁. 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑀲𑁆𑀲𑀺𑀢𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑁄 𑀦𑀸𑀫 𑀇𑀤𑀸𑀦𑀺 𑀯𑀢𑁆𑀢𑀫𑀸𑀦𑁄 𑀅𑀢𑁆𑀢𑀪𑀸𑀯𑁄, 𑀢𑀦𑁆𑀦𑀺𑀲𑁆𑀲𑀺𑀢𑁄𑀢𑀺 𑀲𑀫𑀸𑀲𑁄, 𑀲𑁄 𑀘 𑀛𑀸𑀦𑀸𑀤𑀺𑀪𑁂𑀤𑁄𑀬𑁂𑀯, 𑀢𑀁.

𑀅𑀜𑁆𑀜𑀸𑀧𑀤𑁂𑀲𑀭𑀳𑀺𑀢𑀦𑁆𑀢𑀺 ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀺, 𑀲𑁄 𑀪𑀺𑀓𑁆𑀔𑀼 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁨𑁨𑁦) 𑀦𑀬𑁂𑀦 𑀅𑀜𑁆𑀜𑀲𑁆𑀲 𑀅𑀧𑀤𑁂𑀲𑁄, 𑀢𑁂𑀦 𑀭𑀳𑀺𑀢𑁄 𑀘𑀢𑁆𑀢𑁄𑀢𑀺 𑀢𑀧𑁆𑀧𑀼𑀭𑀺𑀲𑀲𑀫𑀸𑀲𑁄, 𑀲𑁄 𑀭𑀳𑀺𑀢𑁄 𑀢𑁂𑀦𑀸𑀢𑀺 𑀯𑀸 𑀩𑀳𑀼𑀩𑁆𑀩𑀻𑀳𑀺, 𑀛𑀸𑀦𑀸𑀤𑀺𑀪𑁂𑀤𑁄𑀯, 𑀢𑀁. 𑀓𑁄𑀝𑁆𑀞𑀸𑀲𑀁 𑀓𑀢𑁆𑀯𑀸 𑀯𑀸𑀢𑀺 ‘‘𑀧𑀞𑀫𑀁 𑀛𑀸𑀦𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀁, 𑀧𑀞𑀫𑀁 𑀛𑀸𑀦𑀁 𑀢𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑁄𑀝𑁆𑀞𑀸𑀲𑀁 𑀓𑀢𑁆𑀯𑀸 𑀯𑀸. 𑀏𑀓𑁂𑀓𑀁 𑀓𑀢𑁆𑀯𑀸 𑀯𑀸𑀢𑀺 ‘‘𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀁, 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀏𑀓𑁂𑀓𑀁 𑀓𑀢𑁆𑀯𑀸 𑀯𑀸. 𑀏𑀢𑁆𑀣 𑀘 𑀏𑀓𑀦𑁆𑀢𑀺 𑀞𑀺𑀢𑁂 𑀯𑀺𑀘𑁆𑀙𑀸𑀬𑀁 𑀤𑁆𑀯𑀺𑀢𑁆𑀢𑀁. 𑀏𑀢𑁆𑀣 𑀧𑀦 𑀓𑀢𑁆𑀯𑀸𑀢𑀺 𑀓𑀭𑀡𑀓𑀺𑀭𑀺𑀬𑀸𑀬 𑀏𑀓𑁂𑀓𑀯𑀲𑁂𑀦 𑀪𑀺𑀦𑁆𑀦𑀲𑁆𑀲 𑀛𑀸𑀦𑀸𑀤𑀺𑀦𑁄 𑀅𑀢𑁆𑀣𑀲𑁆𑀲 𑀲𑀫𑁆𑀩𑀦𑁆𑀥𑀦𑀺𑀘𑁆𑀙𑀸 𑀯𑀺𑀘𑁆𑀙𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀝𑀻𑀓𑀸𑀬𑀁 𑀧𑀦 ‘‘𑀓𑁄𑀝𑁆𑀞𑀸𑀲𑀁 𑀯𑀸𑀢𑀺 𑀏𑀢𑁆𑀣 ‘𑀛𑀸𑀦𑀮𑀸𑀪𑀻, 𑀯𑀺𑀫𑁄𑀓𑁆𑀔𑀮𑀸𑀪𑀻, 𑀲𑀫𑀸𑀥𑀺𑀮𑀸𑀪𑀻, 𑀲𑀫𑀸𑀧𑀢𑁆𑀢𑀺𑀮𑀸𑀪𑀻𑀫𑁆𑀳𑀻’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀓𑁄𑀝𑁆𑀞𑀸𑀲𑀢𑁄 𑀯𑀸𑀢𑀺 𑀅𑀢𑁆𑀣𑁄’’𑀢𑀺 𑀘 ‘‘𑀏𑀓𑁂𑀓𑀁 𑀯𑀸𑀢𑀺 ‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻, 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀫𑁆𑀳𑀻’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀏𑀓𑁂𑀓𑀁 𑀯𑀸𑀢𑀺 𑀅𑀢𑁆𑀣𑁄’’𑀢𑀺 𑀘 𑀯𑀼𑀢𑁆𑀢𑀁. 𑀲𑁄 𑀧𑀸𑀴𑀺𑀬𑀁 𑀅𑀝𑁆𑀞𑀓𑀣𑀸𑀬𑀜𑁆𑀘 𑀅𑀯𑀼𑀢𑁆𑀢𑀓𑁆𑀓𑀫𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀓𑀸𑀬𑁂𑀦 𑀯𑀸𑀢𑀺 𑀳𑀢𑁆𑀣𑀫𑀼𑀤𑁆𑀤𑀸𑀤𑀺𑀯𑀲𑁂𑀦 𑀓𑀸𑀬𑁂𑀦 𑀯𑀸. 𑀯𑀸𑀘𑀸𑀢𑀺 𑀏𑀢𑁆𑀣 𑀬-𑀓𑀸𑀭𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄 ‘‘𑀅𑀮𑀚𑁆𑀚𑀺𑀢𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀯𑀺𑀜𑁆𑀜𑀢𑁆𑀢𑀺𑀧𑀣𑁂𑀢𑀺 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀻𑀦𑀁 𑀕𑀳𑀡𑀬𑁄𑀕𑁆𑀬𑁂 𑀧𑀤𑁂𑀲𑁂 𑀞𑀢𑁆𑀯𑀸𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁. 𑀤𑀻𑀧𑁂𑀦𑁆𑀢𑁄𑀢𑀺 ‘‘𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦 𑀅𑀬𑀁 𑀥𑀫𑁆𑀫𑁄 𑀫𑀬𑀺 𑀅𑀢𑁆𑀣𑀻’’𑀢𑀺 𑀧𑀓𑀸𑀲𑁂𑀦𑁆𑀢𑁄. 𑀦𑀸𑀥𑀺𑀫𑀸𑀦𑀺𑀓𑁄𑀢𑀺 𑀅𑀧𑁆𑀧𑀢𑁆𑀢𑁂 𑀧𑀢𑁆𑀢𑀲𑀜𑁆𑀜𑀺𑀢𑀸𑀲𑀗𑁆𑀔𑀸𑀢𑁄 𑀅𑀥𑀺𑀓𑁄 𑀫𑀸𑀦𑁄, 𑀲𑁄 𑀦𑀢𑁆𑀣𑀺 𑀏𑀢𑀲𑁆𑀲𑀸𑀢𑀺 𑀦𑀸𑀥𑀺𑀫𑀸𑀦𑀺𑀓𑁄, 𑀪𑀺𑀓𑁆𑀔𑀼. 𑀜𑀸𑀢𑁂𑀢𑀺 𑀯𑀺𑀜𑁆𑀜𑀼𑀦𑀸 𑀫𑀦𑀼𑀲𑁆𑀲𑀚𑀸𑀢𑀺𑀓𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂 𑀯𑀼𑀢𑁆𑀢𑀦𑀬𑁂𑀦 𑀯𑀺𑀜𑁆𑀜𑀸𑀢𑁂 𑀲𑀢𑀺 𑀘𑀼𑀢𑁄 𑀪𑀯𑁂 𑀲𑀸𑀲𑀦𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀅𑀜𑁆𑀜𑀸𑀧𑀤𑁂𑀲𑁂𑀦 𑀤𑀻𑀧𑀬𑀢𑁄 𑀧𑀦 𑀣𑀼𑀮𑁆𑀮𑀘𑁆𑀘𑀬𑀁. 𑀏𑀢𑁆𑀣 𑀘 𑁋

𑀤𑀼𑀓𑁆𑀓𑀝𑀁 𑀧𑀞𑀫𑀲𑁆𑀲𑁂𑀯, 𑀲𑀸𑀫𑀦𑁆𑀢𑀫𑀺𑀢𑀺 𑀯𑀡𑁆𑀡𑀺𑀢𑀁;

𑀲𑁂𑀲𑀸𑀦𑀁 𑀧𑀦 𑀢𑀺𑀡𑁆𑀡𑀫𑁆𑀧𑀺, 𑀣𑀼𑀮𑁆𑀮𑀘𑁆𑀘𑀬𑀫𑀼𑀤𑀻𑀭𑀺𑀢𑀦𑁆𑀢𑀺.

𑀘𑀢𑀼𑀢𑁆𑀣𑀁.

𑁧𑁦. 𑀇𑀤𑀸𑀦𑀺 𑀘𑀢𑀼𑀦𑁆𑀦𑀫𑁆𑀧𑀺 𑀘𑁂𑀢𑁂𑀲𑀫𑀲𑀁𑀯𑀸𑀲𑀢𑀁 𑀅𑀪𑀩𑁆𑀩𑀢𑀜𑁆𑀘 𑀤𑀻𑀧𑁂𑀢𑀼𑀁 ‘‘𑀧𑀸𑀭𑀸𑀚𑀺𑀓𑁂𑀢𑁂’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀏𑀢𑁂 𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸 𑀧𑀼𑀕𑁆𑀕𑀮𑀸 𑀬𑀣𑀸 𑀧𑀼𑀭𑁂 𑀧𑀼𑀩𑁆𑀩𑁂 𑀕𑀺𑀳𑀺𑀓𑀸𑀮𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀘 𑀯𑀺𑀬 𑀅𑀲𑀁𑀯𑀸𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀳 𑀯𑀲𑀦𑁆𑀢𑀺 𑀬𑀲𑁆𑀫𑀸 𑀲𑀩𑁆𑀩𑁂𑀧𑀺 𑀮𑀚𑁆𑀚𑀺𑀦𑁄 𑀏𑀢𑁂𑀲𑀼 𑀓𑀫𑁆𑀫𑀸𑀤𑀻𑀲𑀼 𑀦 𑀏𑀓𑁄𑀧𑀺 𑀢𑀢𑁄 𑀩𑀳𑀺𑀤𑁆𑀥𑀸 𑀲𑀦𑁆𑀤𑀺𑀲𑁆𑀲𑀢𑀻𑀢𑀺 𑀏𑀓𑀓𑀫𑁆𑀫𑀁 𑀏𑀓𑀼𑀤𑁆𑀤𑁂𑀲𑁄 𑀲𑀫𑀲𑀺𑀓𑁆𑀔𑀢𑀸𑀢𑀺 𑀇𑀫𑁂 𑀢𑀬𑁄 𑀲𑀁𑀯𑀸𑀲𑀸 𑀦𑀸𑀫. 𑀢𑀢𑁆𑀣 𑀅𑀧𑀮𑁄𑀓𑀦𑀸𑀤𑀺𑀓𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀲𑀗𑁆𑀖𑀓𑀫𑁆𑀫𑀁 𑀲𑀻𑀫𑀸𑀧𑀭𑀺𑀘𑁆𑀙𑀺𑀦𑁆𑀦𑁂𑀳𑀺 𑀧𑀓𑀢𑀢𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀏𑀓𑀢𑁄 𑀓𑀢𑁆𑀢𑀩𑁆𑀩𑀢𑀸 𑀏𑀓𑀓𑀫𑁆𑀫𑀁 𑀦𑀸𑀫. 𑀢𑀣𑀸 𑀧𑀜𑁆𑀘𑀯𑀺𑀥𑁄𑀧𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀏𑀓𑀢𑁄 𑀉𑀤𑁆𑀤𑀺𑀲𑀺𑀢𑀩𑁆𑀩𑀢𑁆𑀢𑀸 𑀏𑀓𑀼𑀤𑁆𑀤𑁂𑀲𑁄 𑀦𑀸𑀫. 𑀧𑀜𑁆𑀜𑀢𑁆𑀢𑀁 𑀧𑀦 𑀲𑀺𑀓𑁆𑀔𑀸𑀧𑀤𑀁 𑀲𑀩𑁆𑀩𑁂𑀳𑀺𑀧𑀺 𑀮𑀚𑁆𑀚𑀻𑀧𑀼𑀕𑁆𑀕𑀮𑁂𑀳𑀺 𑀲𑀫𑀁 𑀲𑀺𑀓𑁆𑀔𑀺𑀢𑀩𑁆𑀩𑀪𑀸𑀯𑀢𑁄 𑀲𑀫𑀲𑀺𑀓𑁆𑀔𑀢𑀸 𑀦𑀸𑀫. 𑀦𑀢𑁆𑀣𑀺 𑀢𑁂 𑀲𑀁𑀯𑀸𑀲𑀸 𑀏𑀢𑁂𑀲𑀦𑁆𑀢𑀺 𑀅𑀲𑀁𑀯𑀸𑀲𑀸. ‘‘𑀅𑀪𑀩𑁆𑀩𑀸’’𑀢𑀺𑀆𑀤𑀻𑀲𑀼 𑀪𑀺𑀓𑁆𑀔𑀼𑀪𑀸𑀯𑀸𑀬𑀸𑀢𑀺 𑀢𑀼𑀫𑀢𑁆𑀣𑁂 𑀲𑀫𑁆𑀧𑀤𑀸𑀦𑀯𑀘𑀦𑀁, 𑀢𑀲𑁆𑀫𑀸 𑀬𑀣𑀸 𑀲𑀻𑀲𑀘𑁆𑀙𑀺𑀦𑁆𑀦𑁄 𑀚𑀻𑀯𑀺𑀢𑀼𑀁 𑀅𑀪𑀩𑁆𑀩𑁄, 𑀏𑀯𑀁 𑀘𑀢𑁆𑀢𑀸𑀭𑁄𑀫𑁂 𑀧𑀼𑀕𑁆𑀕𑀮𑀸 𑀪𑀺𑀓𑁆𑀔𑀼𑀪𑀸𑀯𑀸𑀬 𑀪𑀺𑀓𑁆𑀔𑀽 𑀪𑀯𑀺𑀢𑀼𑀁 𑀅𑀪𑀩𑁆𑀩𑀸𑀢𑀺 𑀅𑀢𑁆𑀣𑁄.

𑁧𑁧. 𑀇𑀤𑀸𑀦𑀺 𑀧𑀭𑀺𑀬𑀸𑀬𑀸𑀡𑀢𑁆𑀢𑀻𑀳𑀺 𑀲𑀫𑁆𑀪𑀯𑀦𑁆𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀺𑀬𑀸𑀬𑁄 𑀘𑀸’’𑀢𑀺𑀆𑀤𑀺𑀫𑀸𑀳. 𑀧𑀭𑀺𑀬𑀸𑀬𑁄 𑀘 𑀆𑀡𑀢𑁆𑀢𑀺 𑀘 𑀢𑀢𑀺𑀬𑁂 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁂 𑀮𑀩𑁆𑀪𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀓𑀸𑀬𑀸𑀤𑀻𑀳𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 ‘‘𑀬𑁄 𑀏𑀯𑀁 𑀫𑀭𑀢𑀺, 𑀲𑁄 𑀥𑀦𑀁 𑀯𑀸 𑀮𑀪𑀢𑀻’’𑀢𑀺 𑀏𑀯𑀫𑀸𑀤𑀺𑀯𑀺𑀜𑁆𑀜𑀸𑀧𑀓𑁄 𑀩𑁆𑀬𑀜𑁆𑀚𑀦𑀪𑀽𑀢𑁄 𑀓𑀸𑀬𑀯𑀘𑀻𑀧𑀬𑁄𑀕𑁄 𑀧𑀭𑀺𑀬𑀸𑀬𑁄. 𑀇𑀫𑀺𑀦𑀸 𑀇𑀤𑀁 𑀤𑀻𑀧𑁂𑀢𑀺 𑁋 𑀬𑀣𑀸 𑀅𑀤𑀺𑀦𑁆𑀦𑀸𑀤𑀸𑀦𑁂 ‘‘𑀆𑀤𑀺𑀬𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁯𑁨) 𑀯𑀼𑀢𑁆𑀢𑀢𑁆𑀢𑀸 𑀧𑀸𑀭𑀺𑀬𑀸𑀬𑀓𑀣𑀸𑀬 𑀫𑀼𑀘𑁆𑀘𑀢𑀺, 𑀦 𑀇𑀥 𑀏𑀯𑀁. ‘‘𑀲𑀁𑀯𑀡𑁆𑀡𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁧𑁭𑁨) 𑀧𑀭𑀺𑀬𑀸𑀬𑀓𑀬𑀸𑀬𑀧𑀺 𑀦 𑀫𑀼𑀘𑁆𑀘𑀢𑀻𑀢𑀺. ‘‘𑀤𑀼𑀢𑀺𑀬𑁂 𑀧𑀦𑀸’’𑀢𑀺𑀆𑀤𑀻𑀲𑀼 𑀅𑀢𑁆𑀣𑁄 𑀧𑀸𑀓𑀝𑁄𑀬𑁂𑀯. 𑀏𑀯𑀫𑀼𑀧𑀭𑀺𑀧𑀺 𑀧𑀸𑀓𑀝𑀫𑀼𑀧𑁂𑀓𑁆𑀔𑀺𑀲𑁆𑀲𑀸𑀫.

𑁧𑁨. 𑀇𑀤𑀸𑀦𑀺 𑀫𑁂𑀣𑀼𑀦𑀥𑀫𑁆𑀫𑀸𑀤𑀻𑀦𑀁 𑀅𑀗𑁆𑀕𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀲𑁂𑀯𑁂𑀢𑀽’’𑀢𑀺𑀆𑀤𑀺𑀫𑀸𑀳. 𑀲𑁂𑀯𑁂𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑀦𑁆𑀢𑀺 𑀫𑁂𑀣𑀼𑀦𑀁 𑀲𑁂𑀯𑁂𑀢𑀼𑀁 𑀓𑀸𑀫𑁂𑀢𑀻𑀢𑀺 𑀲𑁂𑀯𑁂𑀢𑀼𑀓𑀸𑀫𑁄, 𑀢𑀲𑁆𑀲 𑀪𑀸𑀯𑁄 𑀦𑀸𑀫 𑀢𑀡𑁆𑀳𑀸, 𑀢𑀸𑀬 𑀲𑁂𑀯𑁂𑀢𑀼𑀓𑀸𑀫𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀦𑁆𑀢𑀺 𑀢𑀧𑁆𑀧𑀼𑀭𑀺𑀲𑁄. 𑀫𑁂𑀣𑀼𑀦𑀥𑀫𑁆𑀫𑀲𑁆𑀲𑀸𑀢𑀺 𑀫𑀺𑀣𑀼𑀦𑀸𑀦𑀁 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀇𑀤𑀦𑁆𑀢𑀺 𑀫𑁂𑀣𑀼𑀦𑀁, 𑀢𑀫𑁂𑀯 𑀥𑀫𑁆𑀫𑁄𑀢𑀺 𑀫𑁂𑀣𑀼𑀦𑀥𑀫𑁆𑀫𑁄. 𑀇𑀥 𑀧𑀦 𑀉𑀧𑀘𑀸𑀭𑀯𑀲𑁂𑀦 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫. 𑀅𑀣 𑀯𑀸 𑀫𑁂𑀣𑀼𑀦𑁂𑀦 𑀚𑀸𑀢𑁄 𑀥𑀫𑁆𑀫𑁄 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀫𑁂𑀣𑀼𑀦𑀥𑀫𑁆𑀫𑁄, 𑀢𑀲𑁆𑀲 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸. 𑀅𑀗𑁆𑀕𑀤𑁆𑀯𑀬𑀦𑁆𑀢𑀺 𑀅𑀗𑁆𑀕𑀸𑀦𑀁 𑀓𑀸𑀭𑀡𑀸𑀦𑀁 𑀤𑁆𑀯𑀬𑀁. 𑀩𑀼𑀥𑀸𑀢𑀺 𑀯𑀺𑀦𑀬𑀥𑀭𑀸 𑀯𑀺𑀜𑁆𑀜𑀼𑀦𑁄.

𑁧𑁩. 𑀫𑀦𑀼𑀲𑁆𑀲𑀲𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀁 𑀲𑀁 𑀫𑀦𑀼𑀲𑁆𑀲𑀲𑀁, 𑀢𑀤𑀸𑀬𑀢𑁆𑀢𑀯𑀢𑁆𑀣𑀼𑀓𑀸 𑀘. 𑀏𑀢𑁂𑀦 𑀧𑁂𑀢𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀢𑁆𑀢𑀁 𑀦𑀺𑀯𑀢𑁆𑀢𑁂𑀢𑀺. 𑀢𑀣𑀸𑀲𑀜𑁆𑀜𑀻𑀢𑀺 𑀢𑀣𑀸 𑀢𑀸𑀤𑀺𑀲𑀸 𑀲𑀜𑁆𑀜𑀸 𑀢𑀣𑀸𑀲𑀜𑁆𑀜𑀸, 𑀲𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀢𑀣𑀸𑀲𑀜𑁆𑀜𑀻. 𑀧𑀭𑀸𑀬𑀢𑁆𑀢𑀲𑀜𑁆𑀜𑀺𑀢𑀸 𑀘𑀸𑀢𑀺 𑀅𑀢𑁆𑀣𑁄. 𑀪𑀸𑀯𑀧𑁆𑀧𑀥𑀸𑀦𑀸 𑀇𑀫𑁂 𑀦𑀺𑀤𑁆𑀤𑁂𑀲𑀸, 𑀪𑀸𑀯𑀧𑀘𑁆𑀘𑀬𑀮𑁄𑀧𑁄 𑀯𑀸 ‘‘𑀩𑀼𑀤𑁆𑀥𑁂 𑀭𑀢𑀦’’𑀦𑁆𑀢𑀺𑀆𑀤𑀻𑀲𑀼 (𑀔𑀼. 𑀧𑀸. 𑁬.𑁩) 𑀯𑀺𑀬. 𑀏𑀯𑀫𑀼𑀧𑀭𑀺𑀧𑀺 𑀈𑀤𑀺𑀲𑁂𑀲𑀼. 𑀣𑁂𑀬𑁆𑀬𑀘𑀺𑀢𑁆𑀢𑀦𑁆𑀢𑀺 𑀣𑁂𑀦𑀪𑀸𑀯𑀲𑀗𑁆𑀔𑀸𑀢𑀁 𑀘𑀺𑀢𑁆𑀢𑀜𑁆𑀘. 𑀯𑀢𑁆𑀣𑀼𑀦𑁄 𑀕𑀭𑀼𑀢𑀸𑀢𑀺 𑀪𑀡𑁆𑀟𑀲𑁆𑀲 𑀧𑀸𑀤𑀅𑀢𑀺𑀭𑁂𑀓𑀧𑀸𑀤𑀸𑀭𑀳𑀪𑀸𑀯𑁂𑀦 𑀕𑀭𑀼𑀢𑀸 𑀘. 𑀊𑀦𑀧𑀜𑁆𑀘𑀫𑀸𑀲𑀓𑁂 𑀯𑀸 𑀅𑀢𑀺𑀭𑁂𑀓𑀫𑀸𑀲𑀓𑁂 𑀯𑀸 𑀣𑀼𑀮𑁆𑀮𑀘𑁆𑀘𑀬𑀁. 𑀫𑀸𑀲𑀓𑁂 𑀯𑀸 𑀊𑀦𑀫𑀸𑀲𑀓𑁂 𑀯𑀸 𑀤𑀼𑀓𑁆𑀓𑀝𑀁. 𑀅𑀯𑀳𑀸𑀭𑁄𑀢𑀺 𑀧𑀜𑁆𑀘𑀯𑀻𑀲𑀢𑀺𑀬𑀸 𑀅𑀯𑀳𑀸𑀭𑀸𑀦𑀁 𑀅𑀜𑁆𑀜𑀢𑀭𑁂𑀦 𑀅𑀯𑀳𑀭𑀡𑀜𑁆𑀘𑀸𑀢𑀺 𑀇𑀫𑁂 𑀧𑀜𑁆𑀘 𑀅𑀤𑀺𑀦𑁆𑀦𑀸𑀤𑀸𑀦𑀳𑁂𑀢𑀼𑀬𑁄 𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀅𑀗𑁆𑀕𑀸𑀦𑀺.

𑁧𑁪. 𑀧𑀸𑀡𑁄 𑀫𑀸𑀦𑀼𑀲𑁆𑀲𑀓𑁄𑀢𑀺 𑀫𑀦𑀼𑀲𑁆𑀲𑀚𑀸𑀢𑀺𑀲𑀫𑁆𑀩𑀦𑁆𑀥𑁄 𑀧𑀸𑀡𑁄 𑀘, 𑀧𑀸𑀡𑁄𑀢𑀺 𑀳𑀺 𑀯𑁄𑀳𑀸𑀭𑀢𑁄 𑀲𑀢𑁆𑀢𑁄, 𑀧𑀭𑀫𑀢𑁆𑀣𑀢𑁄 𑀧𑀦 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀯𑀼𑀘𑁆𑀘𑀢𑀺. 𑀧𑀸𑀡𑀲𑀜𑁆𑀜𑀺𑀢𑀸𑀢𑀺 𑀧𑀸𑀡𑁄𑀢𑀺 𑀲𑀜𑁆𑀜𑀺𑀢𑀸 𑀘, 𑀖𑀸𑀢𑀦𑀁 𑀖𑀸𑀢𑁄, 𑀲𑁄 𑀏𑀯 𑀘𑁂𑀢𑀦𑀸 𑀖𑀸𑀢𑀘𑁂𑀢𑀦𑀸, ‘‘𑀯𑀥𑀸𑀫𑀺 𑀦’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀲𑀸 𑀘, 𑀢𑀁𑀲𑀫𑀼𑀝𑁆𑀞𑀺𑀢𑁄 𑀲𑀸𑀳𑀢𑁆𑀣𑀺𑀓𑀸𑀤𑀻𑀦𑀁 𑀙𑀦𑁆𑀦𑀫𑀜𑁆𑀜𑀢𑀭𑁄 𑀧𑀬𑁄𑀕𑁄 𑀘, 𑀢𑁂𑀦 𑀧𑀬𑁄𑀕𑁂𑀦 𑀫𑀭𑀡𑀜𑁆𑀘𑀸𑀢𑀺 𑀏𑀢𑁂 𑀬𑀣𑀸𑀯𑀼𑀢𑁆𑀢𑀸 𑀧𑀜𑁆𑀘 𑀯𑀥𑀳𑁂𑀢𑀼𑀬𑁄 𑀧𑀸𑀡𑀖𑀸𑀢𑀸𑀧𑀚𑁆𑀚𑀺𑀢𑀩𑁆𑀩𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀸𑀦𑀻𑀢𑀺 𑀅𑀢𑁆𑀣𑁄.

𑁧𑁫. 𑀅𑀢𑁆𑀢𑀦𑀺 𑀅𑀲𑀦𑁆𑀢𑀢𑀸𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀲𑀦𑁆𑀢𑀸𑀦𑁂 𑀅𑀯𑀺𑀚𑁆𑀚𑀫𑀸𑀦𑀢𑀸 𑀘. 𑀧𑀸𑀧𑀫𑀺𑀘𑁆𑀙𑀢𑀸𑀬𑀸𑀭𑁄𑀘𑀦𑀸𑀢𑀺 𑀬𑀸 𑀲𑀸 ‘‘𑀇𑀥𑁂𑀓𑀘𑁆𑀘𑁄 𑀤𑀼𑀲𑁆𑀲𑀻𑀮𑁄 𑀲𑀫𑀸𑀦𑁄 ‘𑀲𑀻𑀮𑀯𑀸𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁫𑁧) 𑀦𑀬𑁂𑀦 𑀯𑀼𑀢𑁆𑀢𑀸 𑀧𑀸𑀧𑀇𑀘𑁆𑀙𑀢𑀸𑀬 𑀲𑀫𑀦𑁆𑀦𑀸𑀕𑀢𑀸, 𑀢𑀸𑀬 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀆𑀭𑁄𑀘𑀦𑀸 𑀘. 𑀢𑀲𑁆𑀲𑀸𑀢𑀺 𑀬𑀲𑁆𑀲 𑀆𑀭𑁄𑀘𑁂𑀢𑀺, 𑀢𑀲𑁆𑀲. 𑀫𑀦𑀼𑀲𑁆𑀲𑀚𑀸𑀢𑀺𑀢𑀸𑀢𑀺 𑀫𑀦𑀼𑀲𑁆𑀲𑀸𑀦𑀁 𑀚𑀸𑀢𑀺 𑀬𑀲𑁆𑀲, 𑀢𑀲𑁆𑀲 𑀪𑀸𑀯𑁄 𑀫𑀦𑀼𑀲𑁆𑀲𑀚𑀸𑀢𑀺𑀢𑀸, 𑀲𑀸 𑀘, 𑀦𑀜𑁆𑀜𑀸𑀧𑀤𑁂𑀲𑁄𑀢𑀺 𑀦 𑀅𑀜𑁆𑀜𑀸𑀧𑀤𑁂𑀲𑁄 𑀅𑀜𑁆𑀜𑀸𑀧𑀤𑁂𑀲𑀸𑀪𑀸𑀯𑁄 𑀘, 𑀢𑀤𑁂𑀯 𑀚𑀸𑀦𑀦𑀦𑁆𑀢𑀺 𑀢𑀗𑁆𑀔𑀡𑀁𑀬𑁂𑀯 𑀯𑀺𑀚𑀸𑀦𑀦𑀜𑁆𑀘𑀸𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀏𑀢𑁆𑀣 𑀅𑀲𑀦𑁆𑀢𑀤𑀻𑀧𑀦𑁂 𑀅𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀅𑀯𑀺𑀚𑁆𑀚𑀫𑀸𑀦𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑁆𑀧𑀓𑀸𑀲𑀦𑀦𑀺𑀫𑀺𑀢𑁆𑀢𑁂 𑀧𑀸𑀭𑀸𑀚𑀺𑀓𑁂 𑀅𑀗𑁆𑀕𑀸𑀦𑀺 𑀳𑁂𑀢𑀼𑀬𑁄𑀢𑀺 𑀅𑀢𑁆𑀣𑁄.

𑁧𑁬. 𑀏𑀯𑀁 𑀢𑁂𑀲𑀫𑀲𑀁𑀯𑀸𑀲𑀢𑀸𑀪𑀩𑁆𑀩𑀢𑀸𑀤𑀻𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀦 𑀢𑁂 𑀘𑀢𑁆𑀢𑀸𑀭𑁄𑀯, 𑀅𑀣 𑀔𑁄 𑀲𑀦𑁆𑀢𑀜𑁆𑀜𑁂𑀧𑀻𑀢𑀺 𑀢𑁂 𑀲𑀩𑁆𑀩𑁂𑀧𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀲𑀸𑀥𑀸𑀭𑀡𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀲𑀸𑀥𑀸𑀭𑀡𑀸𑀢𑀺 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀦𑁂𑀯 𑀘𑁂𑀢𑁆𑀣 𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄. 𑀢𑀲𑁆𑀫𑀸 𑀪𑀺𑀓𑁆𑀔𑀼𑀦𑀻𑀦𑀁 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸 𑀘𑀢𑁆𑀢𑀸𑀭𑁄 𑀘𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀉𑀧𑀘𑀸𑀭𑀯𑀲𑁂𑀦 𑀢𑀼 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀺𑀓𑀸𑀤𑀺𑀓𑀸 𑀧𑀸𑀭𑀸𑀚𑀺𑀓𑀸𑀧𑀦𑁆𑀦𑀸 𑀧𑀭𑀺𑀕𑁆𑀕𑀬𑁆𑀳𑀦𑁆𑀢𑀺. 𑀢𑀸𑀲𑀼 𑀬𑀸 𑀅𑀯𑀲𑁆𑀲𑀼𑀢𑀸 𑀅𑀯𑀲𑁆𑀲𑀼𑀢𑀲𑁆𑀲 𑀫𑀦𑀼𑀲𑁆𑀲𑀧𑀼𑀭𑀺𑀲𑀲𑁆𑀲 𑀅𑀓𑁆𑀔𑀓𑀸𑀦𑀁 𑀅𑀥𑁄 𑀚𑀸𑀡𑀼𑀫𑀡𑁆𑀟𑀮𑀸𑀦𑀁 𑀓𑀧𑁆𑀧𑀭𑀸𑀦𑀜𑁆𑀘 𑀉𑀧𑀭𑀺 𑀓𑀸𑀬𑀲𑀁𑀲𑀕𑁆𑀕𑀁 𑀲𑀸𑀤𑀺𑀬𑀢𑀺, 𑀅𑀬𑀁 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀺𑀓𑀸. 𑀬𑀸 𑀧𑀦 𑀅𑀜𑁆𑀜𑀺𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀧𑀸𑀭𑀸𑀚𑀺𑀓𑀁 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀲𑀸 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸. 𑀬𑀸 𑀉𑀓𑁆𑀔𑀺𑀢𑁆𑀢𑀓𑀁 𑀪𑀺𑀓𑁆𑀔𑀼𑀁 𑀢𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀕𑀳𑀡𑀯𑀲𑁂𑀦 𑀅𑀦𑀼𑀯𑀢𑁆𑀢𑀢𑀺, 𑀲𑀸 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸. 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀢𑀺𑀦𑁆𑀢𑀲𑁆𑀲 𑀳𑀢𑁆𑀣𑀕𑁆𑀕𑀳𑀡𑀁 𑀲𑀗𑁆𑀖𑀸𑀝𑀺𑀓𑀡𑁆𑀡𑀕𑁆𑀕𑀳𑀡𑀁 𑀓𑀸𑀬𑀲𑀁𑀲𑀕𑁆𑀕𑀢𑁆𑀣𑀸𑀬 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀧𑀸𑀲𑁂 𑀞𑀸𑀦𑀁 𑀞𑀢𑁆𑀯𑀸 𑀲𑀮𑁆𑀮𑀧𑀦𑀁 𑀲𑀗𑁆𑀓𑁂𑀢𑀕𑀫𑀦𑀁 𑀧𑀼𑀭𑀺𑀲𑀲𑁆𑀲𑀸𑀕𑀫𑀦𑀲𑀸𑀤𑀺𑀬𑀦𑀁 𑀧𑀝𑀺𑀘𑁆𑀙𑀦𑁆𑀦𑁄𑀓𑀸𑀲𑀯𑀯𑀺𑀲𑀦𑀁 𑀳𑀢𑁆𑀣𑀧𑀸𑀲𑁂 𑀞𑀢𑁆𑀯𑀸 𑀓𑀸𑀬𑁄𑀧𑀲𑀁𑀳𑀭𑀡𑀦𑁆𑀢𑀺 𑀇𑀫𑀸𑀦𑀺 𑀅𑀝𑁆𑀞 𑀯𑀢𑁆𑀣𑀽𑀦𑀺 𑀬𑀲𑁆𑀲𑀸 𑀅𑀯𑀲𑁆𑀲𑀼𑀢𑀸𑀬, 𑀲𑀸 𑀅𑀝𑁆𑀞𑀯𑀢𑁆𑀣𑀼𑀓𑀸 𑀦𑀸𑀫.

𑀅𑀪𑀩𑁆𑀩𑀓𑀸 𑀏𑀓𑀸𑀤𑀲 𑀘𑀸𑀢𑀺 𑀏𑀢𑁆𑀣 𑀧𑀡𑁆𑀟𑀓𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀢𑀺𑀭𑀘𑁆𑀙𑀸𑀦𑀕𑀢𑁄 𑀫𑀸𑀢𑀼𑀖𑀸𑀢𑀓𑁄 𑀧𑀺𑀢𑀼𑀖𑀸𑀢𑀓𑁄 𑀅𑀭𑀳𑀦𑁆𑀢𑀖𑀸𑀢𑀓𑁄 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄 𑀲𑀗𑁆𑀖𑀪𑁂𑀤𑀓𑁄 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄𑀢𑀺 𑀇𑀫𑁂 𑀅𑀪𑀩𑁆𑀩𑀸 𑀏𑀓𑀸𑀤𑀲 𑀘. 𑀢𑁂𑀲𑀼 𑀧𑀡𑁆𑀟𑀓𑁄𑀢𑀺 𑀑𑀧𑀓𑁆𑀓𑀫𑀺𑀓𑀦𑀧𑀼𑀁𑀲𑀓𑀧𑀡𑁆𑀟𑀓𑀸 𑀘 𑀧𑀡𑁆𑀟𑀓𑀪𑀸𑀯𑀧𑀓𑁆𑀔𑁂 𑀧𑀓𑁆𑀔𑀧𑀡𑁆𑀟𑀓𑁄 𑀘 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀆𑀲𑀺𑀢𑁆𑀢𑀉𑀲𑀽𑀬𑀧𑀡𑁆𑀟𑀓𑀸𑀦𑀁 𑀧𑀦 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀦 𑀯𑀸𑀭𑀺𑀢𑀸. 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀧𑀦 𑀮𑀺𑀗𑁆𑀕𑀢𑁆𑀣𑁂𑀦𑀓𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑁄. 𑀢𑀢𑁆𑀣 𑀲𑀬𑀁 𑀧𑀩𑁆𑀩𑀚𑀺𑀢𑀢𑁆𑀢𑀸 𑀮𑀺𑀗𑁆𑀕𑀫𑀢𑁆𑀢𑀁 𑀣𑁂𑀦𑁂𑀢𑀻𑀢𑀺 𑀮𑀺𑀗𑁆𑀕𑀢𑁆𑀣𑁂𑀦𑀓𑁄. 𑀪𑀺𑀓𑁆𑀔𑀼𑀯𑀲𑁆𑀲𑀕𑀡𑀦𑀸𑀤𑀺𑀓𑀁 𑀲𑀁𑀯𑀸𑀲𑀁 𑀣𑁂𑀦𑁂𑀢𑀻𑀢𑀺 𑀲𑀁𑀯𑀸𑀲𑀢𑁆𑀣𑁂𑀦𑀓𑁄. 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀏𑀯𑀁 𑀧𑀝𑀺𑀧𑀚𑁆𑀚𑀦𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑀸𑀯𑀼𑀢𑁆𑀢𑀫𑀼𑀪𑀬𑀁 𑀣𑁂𑀦𑁂𑀢𑀻𑀢𑀺 𑀉𑀪𑀬𑀢𑁆𑀣𑁂𑀦𑀓𑁄. 𑀞𑀧𑁂𑀢𑁆𑀯𑀸 𑀧𑀦 𑀇𑀫𑀁 𑀢𑀺𑀯𑀺𑀥𑀁 𑁋

𑀭𑀸𑀚𑀤𑀼𑀩𑁆𑀪𑀺𑀓𑁆𑀔𑀓𑀦𑁆𑀢𑀸𑀭-𑀭𑁄𑀕𑀯𑁂𑀭𑀺𑀪𑀬𑁂𑀦 𑀯𑀸;

𑀘𑀻𑀯𑀭𑀸𑀳𑀭𑀡𑀢𑁆𑀣𑀁 𑀯𑀸, 𑀮𑀺𑀗𑁆𑀕𑀁 𑀆𑀤𑀺𑀬𑀢𑀻𑀥 𑀬𑁄.

𑀲𑀁𑀯𑀸𑀲𑀁 𑀦𑀸𑀥𑀺𑀯𑀸𑀲𑁂𑀢𑀺, 𑀬𑀸𑀯 𑀲𑁄 𑀲𑀼𑀤𑁆𑀥𑀫𑀸𑀦𑀲𑁄;

𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦𑀸𑀫, 𑀢𑀸𑀯 𑀏𑀲 𑀦 𑀯𑀼𑀘𑁆𑀘𑀢𑀻𑀢𑀺. (𑀫𑀳𑀸𑀯. 𑀅𑀝𑁆𑀞. 𑁧𑁧𑁦; 𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸);

𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀸𑀤𑀬𑁄 𑀢𑀼 𑀢𑀁𑀢𑀁𑀯𑀘𑀦𑀢𑁆𑀣𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀢𑀺𑀭𑀘𑁆𑀙𑀸𑀦𑀕𑀢𑁄 𑀧𑀦 𑀞𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑀚𑀸𑀢𑀺𑀓𑀁 𑀅𑀯𑀲𑁂𑀲𑁄 𑀲𑀩𑁆𑀩𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑁂 𑀏𑀓𑀸𑀤𑀲 𑀧𑀼𑀕𑁆𑀕𑀮𑀸 𑀪𑀺𑀓𑁆𑀔𑀼𑀪𑀸𑀯𑀸𑀬 𑀅𑀪𑀩𑁆𑀩𑀢𑁆𑀢𑀸 𑀧𑀸𑀭𑀸𑀚𑀺𑀓𑀸𑀧𑀦𑁆𑀦𑀲𑀤𑀺𑀲𑀢𑀸𑀬 ‘‘𑀧𑀸𑀭𑀸𑀚𑀺𑀓𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀯𑀺𑀩𑁆𑀪𑀦𑁆𑀢𑀸 𑀪𑀺𑀓𑁆𑀔𑀼𑀦𑀻𑀢𑀺 𑀕𑀺𑀳𑀺𑀦𑀺𑀯𑀸𑀲𑀦𑀦𑀺𑀯𑀢𑁆𑀣𑀸 𑀪𑀺𑀓𑁆𑀔𑀼𑀦𑀻 𑀘. 𑀲𑀸 𑀳𑀺 𑀏𑀢𑁆𑀢𑀸𑀯𑀢𑀸 𑀧𑀸𑀭𑀸𑀚𑀺𑀓𑀸. 𑀫𑀼𑀤𑀼𑀓𑀸 𑀧𑀺𑀝𑁆𑀞𑀺 𑀬𑀲𑁆𑀲, 𑀲𑁄 𑀘. 𑀲𑁄 𑀳𑀺 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀬𑀤𑀸 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁 𑀅𑀢𑁆𑀢𑀦𑁄 𑀯𑀘𑁆𑀘𑀫𑀼𑀔𑀫𑀕𑁆𑀕𑁂𑀲𑀼 𑀧𑀯𑁂𑀲𑁂𑀢𑀺, 𑀢𑀤𑀸 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺.

𑁧𑁭-𑁧𑁮. 𑀮𑀫𑁆𑀩𑀫𑀸𑀦𑀫𑀗𑁆𑀕𑀚𑀸𑀢𑀫𑁂𑀢𑀲𑁆𑀲𑀸𑀢𑀺 𑀮𑀫𑁆𑀩𑀻. 𑀲𑁄 𑀬𑀣𑀸𑀯𑀼𑀢𑁆𑀢𑁂𑀲𑀼 𑀧𑀯𑁂𑀲𑀺𑀢𑁄 𑀧𑀸𑀭𑀸𑀚𑀺𑀓𑁄. 𑀫𑀼𑀔𑁂𑀦 𑀕𑀡𑁆𑀳𑀦𑁆𑀢𑁄 𑀅𑀗𑁆𑀕𑀚𑀸𑀢𑀁 𑀧𑀭𑀲𑁆𑀲 𑀘𑀸𑀢𑀺 𑀬𑁄 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀧𑀭𑀲𑁆𑀲 𑀲𑀼𑀢𑁆𑀢𑀲𑁆𑀲 𑀯𑀸 𑀫𑀢𑀲𑁆𑀲 𑀯𑀸 𑀅𑀗𑁆𑀕𑀚𑀸𑀢𑀁 𑀫𑀼𑀔𑁂𑀦 𑀕𑀡𑁆𑀳𑀸𑀢𑀺, 𑀲𑁄 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑀁 𑀫𑀼𑀔𑁂𑀦 𑀕𑀡𑁆𑀳𑀦𑁆𑀢𑁄 𑀘. 𑀢𑀢𑁆𑀣𑁂𑀯𑀸𑀪𑀺𑀦𑀺𑀲𑀻𑀤𑀦𑁆𑀢𑁄𑀢𑀺 𑀬𑁄 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀢𑀢𑁆𑀣𑁂𑀯 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑁂 𑀯𑀘𑁆𑀘𑀫𑀕𑁆𑀕𑁂𑀦 𑀅𑀪𑀺𑀦𑀺𑀲𑀻𑀤𑀢𑀺, 𑀲𑁄 𑀘𑀸𑀢𑀺 𑀏𑀢𑁂 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀬𑀸 𑀅𑀪𑀸𑀯𑁂𑀧𑀺 𑀫𑀕𑁆𑀕𑁂 𑀫𑀕𑁆𑀕𑀧𑁆𑀧𑀯𑁂𑀲𑀦𑀳𑁂𑀢𑀼 𑀫𑁂𑀣𑀼𑀦𑀲𑁆𑀲 𑀅𑀦𑀼𑀮𑁄𑀫𑀺𑀓𑀸 𑀘𑀢𑁆𑀢𑀸𑀭𑁄 𑀘. 𑀇𑀥𑀸𑀕𑀢𑀸 𑀘𑀢𑁆𑀢𑀸𑀭𑁄𑀢𑀺 𑀇𑀥 𑀔𑀼𑀤𑁆𑀤𑀲𑀺𑀓𑁆𑀔𑀸𑀬𑀁 𑀬𑀣𑀸𑀯𑀼𑀢𑁆𑀢𑀸 𑀫𑁂𑀣𑀼𑀦𑀥𑀫𑁆𑀫𑀸 𑀧𑀸𑀭𑀸𑀚𑀺𑀓𑀸𑀤𑀬𑁄 𑀘𑀢𑁆𑀢𑀸𑀭𑁄 𑀘𑀸𑀢𑀺 𑀲𑀫𑁄𑀥𑀸𑀦𑀸 𑀧𑀺𑀡𑁆𑀟𑀻𑀓𑀭𑀡𑀯𑀲𑁂𑀦 𑀘𑀢𑀼𑀯𑀻𑀲𑀢𑀺 𑀧𑀸𑀭𑀸𑀚𑀺𑀓𑀸 𑀪𑀯𑀦𑁆𑀢𑀻𑀢𑀺 𑀲𑁂𑀲𑁄. 𑀏𑀢𑁆𑀣 𑀘 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀭𑀲𑁆𑀲𑀁 𑀓𑀢𑁆𑀯𑀸 ‘‘𑀧𑀭𑀸𑀚𑀺𑀓𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣𑀸𑀳 𑁋 𑀫𑀸𑀢𑀼𑀖𑀸𑀢𑀓𑀸𑀤𑀬𑁄 𑀢𑀢𑀺𑀬𑀁 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑀸, 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄, 𑀫𑀼𑀤𑀼𑀧𑀺𑀝𑁆𑀞𑀺𑀓𑀸𑀤𑀬𑁄 𑀘𑀢𑁆𑀢𑀸𑀭𑁄 𑀘 𑀧𑀞𑀫𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑀸 𑀏𑀯𑀸𑀢𑀺 𑀓𑀼𑀢𑁄 𑀘𑀢𑀼𑀯𑀻𑀲𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀫𑀸𑀢𑀼𑀖𑀸𑀢𑀓𑀸𑀤𑀬𑁄 𑀳𑀺 𑀘𑀢𑁆𑀢𑀸𑀭𑁄 𑀇𑀥 𑀅𑀦𑀼𑀧𑀲𑀫𑁆𑀧𑀦𑁆𑀦𑀸 𑀏𑀯 𑀅𑀥𑀺𑀧𑁆𑀧𑁂𑀢𑀸. 𑀫𑀼𑀤𑀼𑀧𑀺𑀝𑁆𑀞𑀺𑀓𑀸𑀤𑀬𑁄 𑀘𑀢𑁆𑀢𑀸𑀭𑁄 𑀓𑀺𑀜𑁆𑀘𑀸𑀧𑀺 𑀧𑀞𑀫𑀧𑀸𑀭𑀸𑀚𑀺𑀓𑁂𑀦 𑀲𑀗𑁆𑀕𑀳𑀺𑀢𑀸, 𑀬𑀲𑁆𑀫𑀸 𑀧𑀦 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀫𑁂𑀣𑀼𑀦𑀥𑀫𑁆𑀫𑀁 𑀅𑀧𑁆𑀧𑀝𑀺𑀲𑁂𑀯𑀺𑀦𑁄 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀺𑀲𑀼𑀁 𑀯𑀼𑀢𑁆𑀢𑀸𑀢𑀺.

𑀧𑀸𑀭𑀸𑀚𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀗𑁆𑀖𑀸𑀤𑀺𑀲𑁂𑀲𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁯. 𑀯𑀼𑀝𑁆𑀞𑀸𑀦𑀲𑁆𑀲 𑀕𑀭𑀼𑀓𑀢𑁆𑀢𑀸 𑀕𑀭𑀼𑀓𑀸𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀸 𑀯𑀼𑀘𑁆𑀘𑀦𑁆𑀢𑀺. 𑀦𑀯𑀸𑀢𑀺 𑀢𑁂𑀲𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀦𑀦𑀼 ‘‘𑀦𑀯𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, ‘‘𑀢𑁂𑀭𑀲𑀸’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦𑀸𑀬𑀁 𑀤𑁄𑀲𑁄, 𑀘𑀺𑀭𑁂𑀦𑀸𑀧𑀚𑁆𑀚𑀺𑀢𑀩𑁆𑀩𑁂 𑀘𑀢𑁆𑀢𑀸𑀭𑁄 𑀬𑀸𑀯𑀢𑀢𑀺𑀬𑀓𑁂 𑀞𑀧𑁂𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀓𑁆𑀔𑀡𑁂𑀬𑁂𑀯 𑀆𑀧𑀚𑁆𑀚𑀺𑀢𑀩𑁆𑀩𑀸 𑀧𑀞𑀫𑀸𑀧𑀢𑁆𑀢𑀺𑀓𑀸 𑀯𑀼𑀘𑁆𑀘𑀦𑁆𑀢𑀻𑀢𑀺. 𑀇𑀤𑀸𑀦𑀺 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀫𑁄𑀘𑁂𑀢𑀼𑀓𑀸𑀫𑀢𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀲𑀼𑀓𑁆𑀓𑀲𑁆𑀲𑀸𑀢𑀺 𑀆𑀲𑀬𑀥𑀸𑀢𑀼𑀦𑀸𑀦𑀢𑁆𑀢𑀢𑁄 𑀦𑀻𑀮𑀸𑀤𑀺𑀯𑀲𑁂𑀦 𑀤𑀲𑀯𑀺𑀥𑁂 𑀲𑀼𑀓𑁆𑀓𑁂 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀼𑀓𑁆𑀓𑀲𑁆𑀲. 𑀫𑁄𑀘𑁂𑀢𑀼𑀓𑀸𑀫𑀢𑀸𑀢𑀺 𑀫𑁄𑀘𑁂𑀢𑀼𑀓𑀸𑀫𑀢𑀸𑀬, 𑀬-𑀓𑀸𑀭𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄. 𑀇𑀫𑀺𑀦𑀸 𑀧𑀦 𑀯𑀘𑀦𑁂𑀦 𑀫𑁄𑀘𑀦𑀲𑁆𑀲𑀸𑀤 𑀫𑀼𑀘𑁆𑀘𑀦𑀲𑁆𑀲𑀸𑀤 𑀫𑀼𑀢𑁆𑀢𑀲𑁆𑀲𑀸𑀤𑀫𑁂𑀣𑀼𑀦𑀲𑁆𑀲𑀸𑀤 𑀨𑀲𑁆𑀲𑀲𑁆𑀲𑀸𑀤 𑀓𑀡𑁆𑀟𑀼𑀯𑀦𑀲𑁆𑀲𑀸𑀤 𑀤𑀲𑁆𑀲𑀦𑀲𑁆𑀲𑀸𑀤 𑀦𑀺𑀲𑀚𑁆𑀚𑀦𑀲𑁆𑀲𑀸𑀤 𑀯𑀸𑀘𑀲𑁆𑀲𑀸𑀤 𑀕𑁂𑀳𑀲𑀺𑀢𑀧𑁂𑀫 𑀯𑀦𑀪𑀗𑁆𑀕𑀺𑀬 𑀲𑀗𑁆𑀔𑀸𑀢𑁂𑀲𑀼 𑀏𑀓𑀸𑀤𑀲𑀲𑁆𑀲𑀸𑀤𑁂𑀲𑀼 𑀏𑀓𑀁𑀬𑁂𑀯 𑀫𑁄𑀘𑀦𑀲𑁆𑀲𑀸𑀤𑀁 𑀤𑀲𑁆𑀲𑁂𑀢𑀺.

𑀢𑀢𑁆𑀣 𑀫𑁄𑀘𑀦𑀸𑀬 𑀅𑀲𑁆𑀲𑀸𑀤𑁄 𑀲𑀼𑀔𑀯𑁂𑀤𑀦𑀸 𑀫𑁄𑀘𑀦𑀲𑁆𑀲𑀸𑀤𑁄. 𑀫𑀼𑀘𑁆𑀘𑀦𑁂 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀫𑀼𑀘𑁆𑀘𑀦𑁂 𑀅𑀲𑁆𑀲𑀸𑀤𑁄 𑀫𑀼𑀘𑁆𑀘𑀦𑀲𑁆𑀲𑀸𑀤𑁄. 𑀏𑀯𑀁 𑀲𑀩𑁆𑀩𑀢𑁆𑀣 𑀲𑀢𑁆𑀢𑀫𑀻𑀢𑀧𑁆𑀧𑀼𑀭𑀺𑀲𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀇𑀫𑁂𑀳𑀺 𑀧𑀦 𑀦𑀯𑀳𑀺 𑀧𑀤𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀅𑀲𑁆𑀲𑀸𑀤𑀲𑀻𑀲𑁂𑀦 𑀭𑀸𑀕𑁄 𑀯𑀼𑀢𑁆𑀢𑁄. 𑀕𑁂𑀳𑀦𑀺𑀲𑁆𑀲𑀺𑀢𑁂𑀲𑀼 𑀫𑀸𑀢𑀸𑀤𑀻𑀲𑀼 𑀧𑁂𑀫𑀁 𑀕𑁂𑀳𑁂 𑀲𑀺𑀢𑀁 𑀧𑁂𑀫𑀦𑁆𑀢𑀺 𑀕𑁂𑀳𑀲𑀺𑀢𑀧𑁂𑀫𑀁, 𑀇𑀫𑀺𑀦𑀸 𑀲𑀭𑀽𑀧𑁂𑀦𑁂𑀯 𑀭𑀸𑀕𑁄 𑀯𑀼𑀢𑁆𑀢𑁄. 𑀲𑀦𑁆𑀣𑀯𑀓𑀭𑀡𑀢𑁆𑀣𑀸𑀬 𑀇𑀢𑁆𑀣𑀺𑀬𑀸 𑀧𑁂𑀲𑀺𑀢𑀧𑀼𑀧𑁆𑀨𑀸𑀤𑀺 𑀯𑀦𑀪𑀗𑁆𑀕𑀺𑀬𑀁, 𑀇𑀫𑀺𑀦𑀸 𑀘 𑀯𑀢𑁆𑀣𑀼𑀯𑀲𑁂𑀦 𑀭𑀸𑀕𑁄 𑀯𑀼𑀢𑁆𑀢𑁄. 𑀫𑁂𑀣𑀼𑀦𑀲𑁆𑀲𑀸𑀤𑁄𑀧𑀺 𑀇𑀢𑁆𑀣𑀺𑀬𑀸 𑀕𑀳𑀡𑀧𑁆𑀧𑀬𑁄𑀕𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑀢𑁆𑀣𑁂𑀯 𑀘 𑀧𑀦 𑀘𑁂𑀢𑀦𑀸𑀦𑀺𑀫𑀺𑀢𑁆𑀢𑀼𑀧𑀓𑁆𑀓𑀫𑀫𑁄𑀘𑀦𑁂 𑀲𑀢𑀺 𑀯𑀺𑀲𑀗𑁆𑀓𑁂𑀢𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀉𑀧𑀓𑁆𑀓𑀫𑁆𑀫 𑀳𑀢𑁆𑀣𑀸𑀤𑀺𑀦𑀸 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀺𑀢𑁆𑀯𑀸. 𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑁂𑀦𑀸𑀢𑀺 𑀲𑀼𑀧𑀺𑀦𑁄𑀬𑁂𑀯 𑀲𑀼𑀧𑀺𑀦𑀦𑁆𑀢𑁄 ‘‘𑀓𑀫𑁆𑀫𑀫𑁂𑀯 𑀓𑀫𑁆𑀫𑀦𑁆𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀅𑀦𑁆𑀢-𑀲𑀤𑁆𑀤𑀲𑁆𑀲 𑀢𑀩𑁆𑀪𑀸𑀯𑀯𑀼𑀢𑁆𑀢𑀺𑀢𑁆𑀢𑀸. 𑀢𑀁 𑀲𑀼𑀧𑀺𑀦𑀦𑁆𑀢𑀁 𑀯𑀺𑀦𑀸 𑀯𑀺𑀫𑁄𑀘𑀬𑀁 𑀲𑀼𑀓𑁆𑀓𑀁 𑀯𑀺𑀫𑁄𑀘𑁂𑀦𑁆𑀢𑁄 𑀲𑀫𑀡𑁄 𑀬𑁄 𑀓𑁄𑀘𑀺 𑀪𑀺𑀓𑁆𑀔𑀼 𑀕𑀭𑀼𑀓𑀁 𑀕𑀭𑀼𑀓𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀲𑀗𑁆𑀖𑀸𑀤𑀺𑀲𑁂𑀲𑀁 𑀨𑀼𑀲𑁂 𑀨𑀼𑀲𑁂𑀬𑁆𑀬, 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣 𑀘 𑀅𑀚𑁆𑀛𑀢𑁆𑀢𑀭𑀽𑀧𑀩𑀳𑀺𑀤𑁆𑀥𑀸𑀭𑀽𑀧𑀉𑀪𑀬𑀭𑀽𑀧𑀆𑀓𑀸𑀲𑁂𑀓𑀝𑀺𑀓𑀫𑁆𑀧𑀦𑀲𑀗𑁆𑀔𑀸𑀢𑁂𑀲𑀼 𑀘𑀢𑀽𑀲𑀼 𑀉𑀧𑀸𑀬𑁂𑀲𑀼 𑀲𑀢𑀺 𑀭𑀸𑀕𑀽𑀧𑀢𑁆𑀣𑀫𑁆𑀪𑀸𑀤𑀻𑀲𑀼 𑀘 𑀓𑀸𑀮𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀅𑀗𑁆𑀕𑀚𑀸𑀢𑁂 𑀓𑀫𑁆𑀫𑀜𑁆𑀜𑀢𑀁 𑀧𑀢𑁆𑀢𑁂 ‘‘𑀆𑀭𑁄𑀕𑁆𑀬𑀢𑁆𑀣𑀸𑀬𑀸’’𑀢𑀺𑀆𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀅𑀥𑀺𑀧𑁆𑀧𑀸𑀬𑁂𑀦 𑀅𑀥𑀺𑀧𑁆𑀧𑀸𑀬𑀯𑀢𑁆𑀣𑀼𑀪𑀽𑀢𑀁 𑀬𑀁 𑀓𑀺𑀜𑁆𑀘𑀺 𑀲𑀼𑀓𑁆𑀓𑀁 𑀫𑁄𑀘𑀦𑀲𑁆𑀲𑀸𑀤𑀘𑁂𑀢𑀦𑀸𑀬 𑀏𑀯 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑁆𑀫 𑀫𑁄𑀘𑁂𑀦𑁆𑀢𑁄 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀢𑀻𑀢𑀺 𑀲𑀩𑁆𑀩𑀣𑀸 𑀅𑀥𑀺𑀧𑁆𑀧𑀸𑀬𑁄 𑀤𑀝𑁆𑀞𑀩𑁆𑀩𑁄.

𑀧𑀞𑀫𑁄.

𑁨𑁦. 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀯𑀸𑀢𑀺 𑀓𑀸𑀬𑁂 𑀲𑀁𑀲𑀕𑁆𑀕𑁄, 𑀢𑀲𑁆𑀫𑀺𑀁 𑀭𑀸𑀕𑁄, 𑀲𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀯𑀦𑁆𑀢𑀼, 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀲𑀫𑀗𑁆𑀕𑀻𑀢𑀺 𑀅𑀢𑁆𑀣𑁄. 𑀲𑀫𑀡𑁄 𑀇𑀢𑁆𑀣𑀺𑀲𑀜𑁆𑀜𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑀓𑁆𑀓𑀫𑁆𑀫𑀸𑀢𑀺 𑀓𑀸𑀬𑁂𑀦 𑀯𑀸𑀬𑀫𑀺𑀢𑁆𑀯𑀸. 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀲𑀫𑁆𑀨𑀼𑀲𑀦𑁆𑀢𑁄𑀢𑀺 𑀅𑀦𑁆𑀢𑀫𑀲𑁄 𑀮𑁄𑀫𑁂𑀦𑀧𑀺 𑀧𑀭𑀸𑀫𑀲𑀦𑁆𑀢𑁄 𑀕𑀭𑀼𑀓𑀁 𑀨𑀼𑀲𑁂𑀢𑀺 𑀬𑁄𑀚𑀦𑀸. 𑀫𑀦𑀼𑀲𑁆𑀲𑀪𑀽𑀢𑀸 𑀅𑀫𑀢𑀸 𑀇𑀢𑁆𑀣𑀻 𑀫𑀦𑀼𑀲𑁆𑀲𑀺𑀢𑁆𑀣𑀻. 𑀢𑀢𑁆𑀣 ‘‘𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀯𑀸’’𑀢𑀺 𑀇𑀫𑀺𑀦𑀸 𑀫𑀸𑀢𑀼𑀧𑁂𑀫𑀸𑀤𑀺𑀁, 𑀇𑀢𑁆𑀣𑀺𑀬𑀸 𑀕𑀳𑀺𑀢𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑀜𑁆𑀘 𑀧𑀝𑀺𑀓𑁆𑀔𑀺𑀧𑀢𑀺. 𑀇𑀢𑁆𑀣𑀺𑀬𑀸 𑀯𑁂𑀫𑀢𑀺𑀓𑀲𑁆𑀲, 𑀧𑀡𑁆𑀟𑀓𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀕𑀢𑀲𑀜𑁆𑀜𑀺𑀲𑁆𑀲 𑀘 𑀣𑀼𑀮𑁆𑀮𑀘𑁆𑀘𑀬𑀁. 𑀇𑀢𑁆𑀣𑀺𑀬𑀸 𑀧𑀦 𑀓𑀸𑀬𑁂𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀸𑀫𑀲𑀦𑁂, 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀓𑀸𑀬𑀸𑀫𑀲𑀦𑁂 𑀘 𑀬𑀓𑁆𑀔𑀻𑀧𑁂𑀢𑀻𑀧𑀡𑁆𑀟𑀓𑀸𑀦𑀁 𑀓𑀸𑀬𑁂𑀦 𑀓𑀸𑀬𑀸𑀫𑀲𑀦𑁂 𑀘 𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀻𑀦𑀁 𑀓𑀸𑀬𑁂𑀦 𑀓𑀸𑀬𑀸𑀫𑀲𑀦𑁂𑀧𑀺 𑀤𑀼𑀓𑁆𑀓𑀝𑀁, 𑀢𑀣𑀸𑀬𑀓𑁆𑀔𑀻𑀆𑀤𑀻𑀦𑀁 𑀓𑀸𑀬𑁂𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀸𑀤𑀻𑀲𑀼 𑀘. 𑀫𑀢𑀺𑀢𑁆𑀣𑀺𑀬𑀸 𑀧𑀦 𑀣𑀼𑀮𑁆𑀮𑀘𑁆𑀘𑀬𑀁. 𑀇𑀢𑁆𑀣𑀺𑀬𑀸 𑀧𑀦 𑀨𑀼𑀲𑀺𑀬𑀫𑀸𑀦𑁄 𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁄𑀧𑀺 𑀲𑀘𑁂 𑀓𑀸𑀬𑁂𑀦 𑀦 𑀯𑀸𑀬𑀫𑀢𑀺, 𑀅𑀦𑀸𑀧𑀢𑁆𑀢𑀺.

𑀤𑀼𑀢𑀺𑀬𑁄.

𑁨𑁧. 𑀢𑀣𑀸𑀢𑀺 𑀇𑀢𑁆𑀣𑀺𑀲𑀜𑁆𑀜𑀻. 𑀲𑀼𑀡𑀦𑁆𑀢𑀺𑀦𑁆𑀢𑀺 𑀯𑀺𑀜𑁆𑀜𑀢𑁆𑀢𑀺𑀧𑀣𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀯𑀘𑀦𑀁 𑀲𑀼𑀡𑀦𑁆𑀢𑀺𑀜𑁆𑀘. 𑀯𑀺𑀜𑁆𑀜𑀼𑀜𑁆𑀘𑀸𑀢𑀺 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀲𑀮𑁆𑀮𑀓𑁆𑀔𑀡𑀲𑀫𑀢𑁆𑀣𑀜𑁆𑀘 𑀫𑀦𑀼𑀲𑁆𑀲𑀺𑀢𑁆𑀣𑀺𑀁. 𑀫𑀕𑁆𑀕𑀁 𑀯𑀸𑀢𑀺 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀸𑀦𑀁 𑀯𑀲𑁂𑀦 𑀫𑀕𑁆𑀕𑀁 𑀯𑀸 𑀫𑁂𑀣𑀼𑀦𑀁 𑀯𑀸 𑀆𑀭𑀩𑁆𑀪𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀭𑀸𑀕𑁂𑀦𑀸𑀢𑀺 𑀤𑀼𑀝𑁆𑀞𑀸 𑀘 𑀲𑀸 𑀅𑀲𑀤𑁆𑀥𑀫𑁆𑀫𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀢𑀸𑀬 𑀣𑀽𑀮𑀸 𑀘 𑀮𑀸𑀫𑀓𑀚𑀦𑀲𑀸𑀥𑀸𑀭𑀡𑀢𑀸𑀬𑀸𑀢𑀺 𑀤𑀼𑀝𑁆𑀞𑀼𑀮𑁆𑀮𑀸. 𑀲𑀸𑀯 𑀧𑀼𑀦 𑀯𑀸𑀘𑀸 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸. 𑀢𑀲𑁆𑀲𑀁 𑀅𑀲𑁆𑀲𑀸𑀤𑀲𑀫𑁆𑀧𑀬𑀼𑀢𑁆𑀢𑁄 𑀭𑀸𑀕𑁄𑀢𑀺 𑀲𑀫𑀸𑀲𑁄, 𑀢𑁂𑀦. 𑀑𑀪𑀸𑀲𑀺𑀢𑁆𑀯𑀸𑀢𑀺 𑀯𑀡𑁆𑀡𑀸𑀯𑀡𑁆𑀡𑀬𑀸𑀘𑀦𑀸𑀤𑀺𑀯𑀲𑁂𑀦 𑀅𑀲𑀤𑁆𑀥𑀫𑁆𑀫𑀯𑀘𑀦𑀁 𑀯𑀢𑁆𑀯𑀸. 𑀅𑀲𑀼𑀡𑀦𑁆𑀢𑀺𑀬𑀸 𑀧𑀦 𑀤𑀽𑀢𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀆𑀭𑁄𑀘𑀺𑀢𑁂 𑀅𑀦𑀸𑀧𑀢𑁆𑀢𑀺. 𑀢𑀢𑁆𑀣 𑀤𑁆𑀯𑀺𑀦𑁆𑀦𑀁 𑀫𑀕𑁆𑀕𑀸𑀦𑀁 𑀯𑀲𑁂𑀦 𑀯𑀡𑁆𑀡𑀸𑀯𑀡𑁆𑀡𑁂𑀳𑀺, 𑀫𑁂𑀣𑀼𑀦𑀬𑀸𑀘𑀦𑀸𑀤𑀻𑀳𑀺 𑀯𑀸 ‘‘𑀲𑀺𑀔𑀭𑀡𑀻𑀲𑀺, 𑀲𑀫𑁆𑀪𑀺𑀦𑁆𑀦𑀸𑀲𑀺, 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀲𑀻’’𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀅𑀜𑁆𑀜𑀢𑀭𑁂𑀦 𑀅𑀓𑁆𑀓𑁄𑀲𑀯𑀘𑀦𑁂𑀦 𑀯𑀸 𑀑𑀪𑀸𑀲𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀅𑀥𑀓𑁆𑀔𑀓𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀁 𑀆𑀤𑀺𑀲𑁆𑀲 𑀯𑀡𑁆𑀡𑀸𑀤𑀺𑀪𑀡𑀦𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀢𑀣𑀸 𑀬𑀓𑁆𑀔𑀻𑀧𑁂𑀢𑀻𑀧𑀡𑁆𑀟𑀓𑀸𑀦𑀁 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑁂 𑀆𑀤𑀺𑀲𑁆𑀲 𑀯𑀡𑁆𑀡𑀸𑀤𑀺𑀪𑀡𑀦𑁂 𑀫𑁂𑀣𑀼𑀦𑀬𑀸𑀘𑀦𑀸𑀤𑀻𑀲𑀼𑀧𑀺. 𑀢𑁂𑀲𑀁 𑀧𑀦 𑀅𑀥𑀓𑁆𑀔𑀓𑀸𑀤𑀺𑀓𑁂 𑀤𑀼𑀓𑁆𑀓𑀝𑀁, 𑀢𑀣𑀸 𑀫𑀦𑀼𑀲𑁆𑀲𑀺𑀢𑁆𑀣𑀻𑀦𑀁 𑀉𑀩𑁆𑀪𑀓𑁆𑀔𑀓𑁂 𑀅𑀥𑁄𑀚𑀸𑀡𑀼𑀫𑀡𑁆𑀟𑀮𑁂 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂 𑀘.

𑀢𑀢𑀺𑀬𑁄.

𑁨𑁨. 𑀅𑀢𑁆𑀢𑀓𑀸𑀫𑀼𑀧𑀝𑁆𑀞𑀸𑀦𑀦𑁆𑀢𑀺 𑀫𑁂𑀣𑀼𑀦𑀥𑀫𑁆𑀫𑀲𑀗𑁆𑀔𑀸𑀢𑁂𑀦 𑀓𑀸𑀫𑁂𑀦 𑀉𑀧𑀝𑁆𑀞𑀸𑀦𑀁 𑀓𑀸𑀫𑀼𑀧𑀝𑁆𑀞𑀸𑀦𑀁. 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀓𑀸𑀫𑀼𑀧𑀝𑁆𑀞𑀸𑀦𑀁 𑀅𑀢𑁆𑀢𑀓𑀸𑀫𑀼𑀧𑀝𑁆𑀞𑀸𑀦𑀁. 𑀅𑀣 𑀯𑀸 𑀓𑀸𑀫𑀻𑀬𑀢𑀻𑀢𑀺 𑀓𑀸𑀫𑀁, 𑀅𑀢𑁆𑀢𑀦𑁄 𑀓𑀸𑀫𑀁 𑀅𑀢𑁆𑀢𑀓𑀸𑀫𑀁, 𑀲𑀬𑀁 𑀫𑁂𑀣𑀼𑀦𑀭𑀸𑀕𑀯𑀲𑁂𑀦 𑀧𑀢𑁆𑀣𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀓𑀸𑀫𑀜𑁆𑀘 𑀢𑀁 𑀉𑀧𑀝𑁆𑀞𑀸𑀦𑀜𑁆𑀘𑀸𑀢𑀺 𑀅𑀢𑁆𑀢𑀓𑀸𑀫𑀼𑀧𑀝𑁆𑀞𑀸𑀦𑀁. 𑀢𑀲𑁆𑀲 𑀯𑀡𑁆𑀡𑁄 𑀕𑀼𑀡𑁄, 𑀢𑀁. 𑀯𑀢𑁆𑀯𑀸𑀢𑀺 ‘‘𑀬𑀤𑀺𑀤𑀁 𑀓𑀸𑀫𑀼𑀧𑀝𑁆𑀞𑀸𑀦𑀁 𑀦𑀸𑀫, 𑀏𑀢𑀤𑀕𑁆𑀕𑀁 𑀉𑀧𑀝𑁆𑀞𑀸𑀦𑀸𑀦’’𑀦𑁆𑀢𑀺 𑀓𑀸𑀫𑀼𑀧𑀝𑁆𑀞𑀸𑀦𑁂 𑀯𑀡𑁆𑀡𑀁 𑀅𑀦𑁆𑀢𑀫𑀲𑁄 𑀳𑀢𑁆𑀣𑀫𑀼𑀤𑁆𑀤𑀸𑀬𑀧𑀺 𑀇𑀢𑁆𑀣𑀻𑀢𑀺 𑀲𑀜𑁆𑀜𑀻 𑀧𑀓𑀸𑀲𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀸𑀘𑀸𑀢𑀺 𑀯𑀸𑀘𑀸𑀬 𑀬𑀓𑀸𑀭𑀮𑁄𑀧𑀯𑀲𑁂𑀦. 𑀫𑁂𑀣𑀼𑀦𑀬𑀼𑀢𑁆𑀢𑁂𑀦𑀸𑀢𑀺 𑀫𑁂𑀣𑀼𑀦𑀬𑀼𑀢𑁆𑀢𑀸𑀬, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀢𑀸𑀬 ‘‘𑀅𑀭𑀳𑀲𑀺 𑀢𑁆𑀯𑀁 𑀫𑀬𑁆𑀳𑀁 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀤𑀸𑀢𑀼’’𑀦𑁆𑀢𑀺𑀆𑀤𑀺𑀓𑀸𑀬 𑀫𑁂𑀣𑀼𑀦𑀥𑀫𑁆𑀫𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀯𑀸𑀘𑀸𑀬 𑀫𑁂𑀣𑀼𑀦𑀬𑀸𑀘𑀦𑁂 𑀫𑁂𑀣𑀼𑀦𑀭𑀸𑀕𑀺𑀦𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀫𑁂𑀣𑀼𑀦𑁂𑀭𑀸𑀕𑁄, 𑀲𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀫𑁂𑀣𑀼𑀦𑀭𑀸𑀕𑀻, 𑀢𑀲𑁆𑀲. 𑀕𑀭𑀼 𑀳𑁄𑀢𑀻𑀢𑀺 𑀕𑀭𑀼𑀓𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀏𑀢𑁆𑀣 𑀧𑀦 𑀧𑀡𑁆𑀟𑀓𑁂 𑀧𑀡𑁆𑀟𑀓𑀲𑀜𑁆𑀜𑀺𑀦𑁄 𑀣𑀼𑀮𑁆𑀮𑀘𑁆𑀘𑀬𑀁, 𑀢𑀲𑁆𑀫𑀺𑀁𑀬𑁂𑀯 𑀇𑀢𑁆𑀣𑀺𑀲𑀜𑁆𑀜𑀺𑀦𑁄 𑀤𑀼𑀓𑁆𑀓𑀝𑀁.

𑀘𑀢𑀼𑀢𑁆𑀣𑁄.

𑁨𑁩. 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀲𑁆𑀲 𑀯𑀸 𑀲𑀦𑁆𑀤𑁂𑀲𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑁆𑀣𑀺𑀬𑀸 𑀯𑀸𑀢𑀺 ‘‘𑀤𑀲 𑀇𑀢𑁆𑀣𑀺𑀬𑁄 𑀫𑀸𑀢𑀼𑀭𑀓𑁆𑀔𑀺𑀢𑀸 𑀧𑀺𑀢𑀼𑀭𑀓𑁆𑀔𑀺𑀢𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁩𑁦𑁩) 𑀘 ‘‘𑀤𑀲 𑀪𑀭𑀺𑀬𑀸𑀬𑁄 𑀥𑀦𑀓𑁆𑀓𑀻𑀢𑀸 𑀙𑀦𑁆𑀤𑀯𑀸𑀲𑀺𑀦𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁩𑁦𑁩) 𑀘 𑀯𑀼𑀢𑁆𑀢𑀸𑀬 𑀯𑀻𑀲𑀢𑀺𑀯𑀺𑀥𑀸𑀬 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀲𑁆𑀲 𑀯𑀸 𑀢𑀁𑀲𑀫𑁆𑀩𑀦𑁆𑀥𑀯𑀲𑁂𑀦 𑀢𑁂𑀲𑀁 𑀫𑀸𑀢𑀸𑀤𑀻𑀦𑀁 𑀯𑀸. 𑀲𑀦𑁆𑀤𑁂𑀲𑀦𑁆𑀢𑀺 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑁂𑀦 𑀯𑀸 𑀉𑀪𑀺𑀦𑁆𑀦𑀁 𑀫𑀸𑀢𑀸𑀤𑀻𑀳𑀺 𑀯𑀸 ‘‘𑀏𑀳𑀺, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸 𑀏𑀯𑀁 𑀪𑀡𑀸𑀳𑀻’’𑀢𑀺 𑀯𑀼𑀢𑁆𑀢𑀁 𑀚𑀸𑀬𑀫𑁆𑀧𑀢𑀺𑀪𑀸𑀯𑀲𑀦𑁆𑀦𑀺𑀲𑁆𑀲𑀺𑀢𑀁 𑀲𑀦𑁆𑀤𑁂𑀲𑀯𑀘𑀦𑀁. 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀢𑀺 ‘‘𑀲𑀸𑀥𑀽’’𑀢𑀺 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸. 𑀯𑀻𑀫𑀁𑀲𑀺𑀢𑁆𑀯𑀸𑀢𑀺 𑀬𑀢𑁆𑀣 𑀧𑁂𑀲𑀺𑀢𑁄, 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀯𑀸 𑀉𑀧𑀧𑀭𑀺𑀓𑁆𑀔𑀸𑀧𑁂𑀢𑁆𑀯𑀸 𑀯𑀸. 𑀳𑀭𑀁 𑀧𑀘𑁆𑀘𑀸𑀢𑀺 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀢𑀼 𑀯𑀸, 𑀫𑀸 𑀯𑀸, 𑀬𑁂𑀳𑀺 𑀧𑁂𑀲𑀺𑀢𑁄, 𑀢𑁂𑀲𑀁 𑀧𑀘𑁆𑀘𑀸𑀳𑀭𑀦𑁆𑀢𑁄 𑀯𑀸 𑀳𑀭𑀸𑀧𑁂𑀦𑁆𑀢𑁄 𑀯𑀸, 𑀚𑀸𑀬𑀫𑁆𑀧𑀢𑀺𑀪𑀸𑀯𑁄 𑀳𑁄𑀢𑀼 𑀯𑀸, 𑀫𑀸 𑀯𑀸, 𑀅𑀓𑀸𑀭𑀡𑀫𑁂𑀢𑀁. 𑀇𑀫𑀸𑀬 𑀢𑀺𑀯𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀗𑁆𑀖𑀸𑀤𑀺𑀲𑁂𑀲𑁄 𑀘, 𑀤𑁆𑀯𑀻𑀳𑀺 𑀅𑀗𑁆𑀕𑁂𑀳𑀺 𑀧𑀡𑁆𑀟𑀓𑁂 𑀘 𑀅𑀗𑁆𑀕𑀢𑁆𑀢𑀬𑁂𑀦𑀸𑀧𑀺 𑀣𑀼𑀮𑁆𑀮𑀘𑁆𑀘𑀬𑀁, 𑀏𑀓𑁂𑀦 𑀤𑀼𑀓𑁆𑀓𑀝𑀁. 𑀓𑁂𑀘𑀺 𑀧𑀦 ‘‘𑀳𑀭𑀁 𑀧𑀘𑁆𑀙𑀸’’𑀢𑀺 𑀯𑀺𑀧𑀸𑀞𑀁 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 ‘‘𑀧𑀘𑁆𑀙𑀸 𑀳𑀭’’𑀦𑁆𑀢𑀺 𑀬𑁄𑀚𑁂𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁 𑀧𑀘𑁆𑀘𑀸𑀢𑀺 𑀉𑀧𑀲𑀕𑁆𑀕𑀢𑁆𑀢𑀸. 𑀧𑀤𑀲𑁆𑀲 𑀉𑀧𑀭𑀺 𑀅𑀢𑁆𑀣𑁂 𑀲𑀚𑁆𑀚𑁂𑀦𑁆𑀢𑁄 𑀧𑀓𑀸𑀲𑁂𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀳𑀺 𑀉𑀧𑀲𑀕𑁆𑀕𑁄 𑀦𑀸𑀫, 𑀢𑀲𑁆𑀫𑀸 ‘‘𑀧𑀢𑀺 𑀆’’𑀢𑀺 𑀉𑀧𑀲𑀕𑁆𑀕𑀸𑀦𑀁 ‘‘𑀳𑀭’’𑀦𑁆𑀢𑀺𑀫𑀲𑁆𑀲 𑀧𑀤𑀲𑁆𑀲 𑀉𑀧𑀭𑀺 𑀪𑀯𑀺𑀢𑀩𑁆𑀩𑀦𑁆𑀢𑀺.

𑀧𑀜𑁆𑀘𑀫𑁄.

𑁨𑁪. 𑀲𑀁𑀬𑀸𑀘𑀺𑀢𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀲𑀁 𑀅𑀢𑁆𑀢𑀦𑀸 𑀬𑀸𑀘𑀺𑀢𑁄 𑀯𑀸𑀲𑀺𑀆𑀤𑀺𑀓𑁄 𑀧𑀭𑀺𑀓𑁆𑀔𑀸𑀭𑁄 𑀬𑀲𑁆𑀲𑀸, 𑀢𑀁. 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀦𑁆𑀢𑀺 𑀉𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂𑀦 𑀅𑀤𑁂𑀲𑀺𑀢𑀁 𑀯𑀢𑁆𑀣𑀼 𑀓𑀼𑀝𑀺𑀓𑀭𑀡𑀧𑁆𑀧𑀤𑁂𑀲𑁄 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄, 𑀢𑀁. 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀦𑁆𑀢𑀺 𑀇𑀤𑀸𑀦𑀺 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑀺𑀲𑁆𑀲𑁄 𑀯𑀺𑀤𑀢𑁆𑀣𑀺𑀬𑁄 𑀲𑀼𑀕𑀢𑀯𑀺𑀤𑀢𑁆𑀣𑀺 𑀦𑀸𑀫, 𑀢𑀸𑀬 ‘‘𑀤𑀻𑀖𑀲𑁄 𑀤𑁆𑀯𑀸𑀤𑀲 𑀯𑀺𑀤𑀢𑁆𑀣𑀺𑀬𑁄 𑀲𑀼𑀕𑀢𑀲𑁆𑀲 𑀯𑀺𑀤𑀢𑁆𑀣𑀺𑀬𑀸 𑀢𑀺𑀭𑀺𑀬𑀁 𑀲𑀢𑁆𑀢𑀦𑁆𑀢𑀭𑀸’’𑀢𑀺 (𑀧𑀸𑀭𑀸. 𑁩𑁪𑁮) 𑀏𑀯𑀁 𑀯𑀼𑀢𑁆𑀢𑀧𑁆𑀧𑀫𑀸𑀡𑀁 𑀏𑀓𑀢𑁄𑀪𑀸𑀕𑁂𑀦𑀸𑀧𑀺 𑀅𑀢𑀺𑀓𑁆𑀓𑀦𑁆𑀢𑀸 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀸𑀢𑀺 𑀢𑀁 𑀢𑀺𑀭𑀺𑀬𑀁 𑀘𑀢𑀼𑀳𑀢𑁆𑀣𑀲𑀗𑁆𑀔𑀸𑀢𑀳𑁂𑀝𑁆𑀞𑀺𑀫𑀧𑁆𑀧𑀫𑀸𑀡𑁂 𑀲𑀢𑀺 𑀤𑀻𑀖𑀢𑁄 𑀯𑀼𑀢𑁆𑀢𑀧𑁆𑀧𑀫𑀸𑀡𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀯𑀟𑁆𑀠𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑀢𑁄 𑀊𑀦𑀓𑁂, 𑀤𑀻𑀖𑀢𑁄 𑀘 𑀯𑀟𑁆𑀠𑀺𑀢𑁂 𑀅𑀬𑀁 𑀓𑀼𑀝𑀺𑀲𑀗𑁆𑀔𑀁 𑀦 𑀕𑀘𑁆𑀙𑀢𑀻𑀢𑀺. ‘‘𑀫𑀬𑁆𑀳𑀁 𑀯𑀸𑀲𑀸𑀕𑀸𑀭𑀁 𑀏𑀢’’𑀦𑁆𑀢𑀺 𑀏𑀯𑀁 𑀅𑀢𑁆𑀢𑀸 𑀉𑀤𑁆𑀤𑁂𑀲𑁄 𑀏𑀢𑀺𑀲𑁆𑀲𑀸𑀢𑀺 𑀅𑀢𑁆𑀢𑀼𑀤𑁆𑀤𑁂𑀲𑀸. 𑀓𑀼𑀝𑀺𑀦𑁆𑀢𑀺 𑀉𑀮𑁆𑀮𑀺𑀢𑁆𑀢𑀸𑀤𑀺𑀓𑀁 𑀓𑀼𑀝𑀺𑀁 𑀓𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀉𑀮𑁆𑀮𑀺𑀢𑁆𑀢𑀸 𑀦𑀸𑀫 𑀅𑀦𑁆𑀢𑁄 𑀉𑀤𑁆𑀥𑀁𑀫𑀼𑀔𑀁 𑀮𑀺𑀢𑁆𑀢𑀸. 𑀅𑀯𑀮𑀺𑀢𑁆𑀢𑀸 𑀦𑀸𑀫 𑀩𑀳𑀺 𑀅𑀥𑁄𑀫𑀼𑀔𑀁 𑀮𑀺𑀢𑁆𑀢𑀸. 𑀉𑀪𑀬𑀣𑀸 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀸. 𑀓𑀢𑁆𑀯𑀸𑀢𑀺 𑀅𑀦𑁆𑀢𑁄𑀪𑀽𑀢𑀓𑀸𑀭𑀺𑀢𑀢𑁆𑀣𑀯𑀲𑁂𑀦 𑀓𑀸𑀭𑀸𑀧𑁂𑀢𑁆𑀯𑀸 𑀯𑀸.

𑀢𑀢𑁆𑀣𑀸𑀬𑀁 𑀯𑀢𑁆𑀣𑀼𑀤𑁂𑀲𑀦𑀓𑁆𑀓𑀫𑁄 𑁋 𑀢𑁂𑀦 𑀓𑀼𑀝𑀺𑀓𑀸𑀭𑀓𑁂𑀦 𑀪𑀺𑀓𑁆𑀔𑀼𑀦𑀸 𑀓𑀼𑀝𑀺𑀯𑀢𑁆𑀣𑀼𑀁 𑀲𑁄𑀥𑁂𑀢𑁆𑀯𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀧𑀤𑀪𑀸𑀚𑀦𑁂 (𑀧𑀸𑀭𑀸. 𑁩𑁪𑁯) 𑀯𑀼𑀢𑁆𑀢𑀦𑀬𑁂𑀦 𑀲𑀗𑁆𑀖𑀁 𑀢𑀺𑀓𑁆𑀔𑀢𑁆𑀢𑀼𑀁 𑀬𑀸𑀘𑀺𑀢𑁆𑀯𑀸 𑀲𑀩𑁆𑀩𑁂 𑀯𑀸 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑀸, 𑀲𑀗𑁆𑀖𑁂𑀦 𑀯𑀸 𑀲𑀫𑁆𑀫𑀢𑀸 𑀤𑁆𑀯𑁂 𑀢𑀬𑁄 𑀪𑀺𑀓𑁆𑀔𑀽 𑀢𑀢𑁆𑀣 𑀦𑁂𑀢𑀩𑁆𑀩𑀸. 𑀢𑁂𑀳𑀺 𑀘 𑀓𑀺𑀧𑀺𑀮𑁆𑀮𑀺𑀓𑀸𑀤𑀻𑀳𑀺 𑀲𑁄𑀴𑀲𑀳𑀺 𑀉𑀧𑀤𑁆𑀤𑀯𑁂𑀳𑀺 𑀯𑀺𑀭𑀳𑀺𑀢𑀢𑁆𑀢𑀸 𑀅𑀦𑀸𑀭𑀫𑁆𑀪𑀁 𑀅𑀦𑀼𑀧𑀤𑁆𑀤𑀯𑀁 𑀤𑁆𑀯𑀻𑀳𑀺 𑀘𑀢𑀽𑀳𑀺 𑀯𑀸 𑀩𑀮𑀺𑀩𑀤𑁆𑀤𑁂𑀳𑀺 𑀬𑀼𑀢𑁆𑀢𑁂𑀦 𑀲𑀓𑀝𑁂𑀦 𑀏𑀓𑀘𑀓𑁆𑀓𑀁 𑀦𑀺𑀩𑁆𑀩𑁄𑀤𑀓𑀧𑀢𑀦𑀝𑁆𑀞𑀸𑀦𑁂 𑀏𑀓𑀁 𑀩𑀳𑀺 𑀓𑀢𑁆𑀯𑀸 𑀆𑀯𑀺𑀜𑁆𑀙𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 ‘‘𑀲𑀧𑀭𑀺𑀓𑁆𑀓𑀫𑀦’’𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀘𑁂𑀧𑀺 𑀲𑀗𑁆𑀖𑀧𑁆𑀧𑀳𑁄𑀦𑀓𑀸 𑀳𑁄𑀦𑁆𑀢𑀺, 𑀢𑀢𑁆𑀣𑁂𑀯, 𑀦𑁄 𑀘𑁂, 𑀲𑀗𑁆𑀖𑀫𑀚𑁆𑀛𑀁 𑀕𑀦𑁆𑀢𑁆𑀯𑀸 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀬𑀸𑀘𑀺𑀢𑁂𑀳𑀺 𑀧𑀤𑀪𑀸𑀚𑀦𑁂 (𑀧𑀸𑀭𑀸. 𑁫𑁦, 𑁫𑁧) 𑀯𑀼𑀢𑁆𑀢𑀸𑀬 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀯𑀢𑁆𑀣𑀼 𑀤𑁂𑀲𑁂𑀢𑀩𑁆𑀩𑀦𑁆𑀢𑀺. 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀓𑀼𑀝𑀺𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀲𑀩𑁆𑀩𑀧𑁆𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀇𑀤𑀸𑀦𑀺 𑀤𑁆𑀯𑀻𑀳𑀺 𑀧𑀺𑀡𑁆𑀟𑁂𑀳𑀺 𑀦𑀺𑀝𑁆𑀞𑀸𑀦𑀁 𑀕𑀫𑀺𑀲𑁆𑀲𑀢𑀻𑀢𑀺 𑀧𑀞𑀫𑀧𑀺𑀡𑁆𑀟𑀤𑀸𑀦𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀤𑀼𑀢𑀺𑀬𑀤𑀸𑀦𑁂𑀦 𑀮𑁂𑀧𑁂 𑀲𑀗𑁆𑀖𑀝𑀺𑀢𑁂 𑀲𑀘𑁂 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀏𑀯 𑀯𑀸 𑀳𑁄𑀢𑀺, 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀸 𑀏𑀯 𑀯𑀸, 𑀏𑀓𑁄 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀲𑀸𑀭𑀫𑁆𑀪𑀅𑀧𑀭𑀺𑀓𑁆𑀓𑀫𑀦𑀢𑀸𑀬 𑀤𑁆𑀯𑁂 𑀘 𑀤𑀼𑀓𑁆𑀓𑀝𑀸𑀦𑀻𑀢𑀺 𑀲𑀘𑁂 𑀉𑀪𑀬𑀯𑀺𑀧𑀦𑁆𑀦𑀸, 𑀤𑁆𑀯𑁂 𑀘 𑀲𑀗𑁆𑀖𑀸𑀤𑀺𑀲𑁂𑀲𑀸 𑀤𑁆𑀯𑁂 𑀘 𑀤𑀼𑀓𑁆𑀓𑀝𑀸𑀦𑀻𑀢𑀺 𑀲𑀩𑁆𑀩𑀁 𑀜𑁂𑀬𑁆𑀬𑀁.

𑀙𑀝𑁆𑀞𑁄.

𑁨𑁫. 𑀫𑀳𑀮𑁆𑀮𑀓𑀦𑁆𑀢𑀺 𑀲𑀲𑁆𑀲𑀸𑀫𑀺𑀓𑀪𑀸𑀯𑁂𑀦 𑀲𑀁𑀬𑀸𑀘𑀺𑀢𑀓𑀼𑀝𑀺𑀢𑁄 𑀫𑀳𑀦𑁆𑀢𑀪𑀸𑀯𑁂𑀦, 𑀯𑀢𑁆𑀣𑀼𑀁 𑀤𑁂𑀲𑀸𑀧𑁂𑀢𑁆𑀯𑀸 𑀧𑀫𑀸𑀡𑀸𑀢𑀺𑀓𑁆𑀓𑀫𑁂𑀦𑀸𑀧𑀺 𑀓𑀸𑀢𑀩𑁆𑀩𑀪𑀸𑀯𑁂𑀦 𑀘 𑀫𑀳𑀦𑁆𑀢𑀢𑀸𑀬 𑀫𑀳𑀢𑁆𑀢𑀁 𑀮𑀸𑀢𑀺 𑀆𑀤𑀤𑀸𑀢𑀻𑀢𑀺 𑀫𑀳𑀮𑁆𑀮𑀓𑁄. 𑀫𑀳𑀢𑁆𑀢𑀮𑀓 𑀇𑀢𑀺 𑀞𑀺𑀢𑁂 𑀢𑁆𑀢𑀲𑁆𑀲 𑀮𑁄𑀧𑁄 𑀮𑀲𑁆𑀲 𑀘 𑀤𑁆𑀯𑀺𑀢𑁆𑀢𑀁, 𑀢𑀁. 𑀯𑀲𑀦𑀁 𑀅𑀢𑁆𑀣𑁄 𑀧𑀬𑁄𑀚𑀦𑀁 𑀯𑀲𑀦𑀢𑁆𑀣𑁄, 𑀢𑀸𑀬. 𑀏𑀢𑁆𑀣 𑀧𑀦 𑀅𑀤𑁂𑀲𑀺𑀢𑀯𑀢𑁆𑀣𑀼𑀪𑀸𑀯𑁂 𑀏𑀓𑁄 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀲𑁂𑀲𑀁 𑀅𑀦𑀦𑁆𑀢𑀭𑀲𑀤𑀺𑀲𑀫𑁂𑀯. 𑀇𑀥 𑀘 𑀢𑀢𑁆𑀣 𑀘 𑀮𑁂𑀡𑀕𑀼𑀳𑀸𑀢𑀺𑀡𑀓𑀼𑀝𑀺𑀧𑀡𑁆𑀡𑀘𑁆𑀙𑀤𑀦𑀕𑁂𑀳𑁂𑀲𑀼 𑀅𑀜𑁆𑀜𑀢𑀭𑀁 𑀓𑀸𑀭𑁂𑀦𑁆𑀢𑀲𑁆𑀲 𑀘 𑀓𑀼𑀝𑀺𑀫𑁆𑀧𑀺 𑀅𑀜𑁆𑀜𑀲𑁆𑀲 𑀯𑀸𑀲𑀢𑁆𑀣𑀸𑀬 𑀯𑀸𑀲𑀸𑀕𑀸𑀭𑀁 𑀯𑀸 𑀞𑀧𑁂𑀢𑁆𑀯𑀸 𑀉𑀧𑁄𑀲𑀣𑀸𑀕𑀸𑀭𑀸𑀤𑀻𑀲𑀼 𑀅𑀜𑁆𑀜𑀢𑀭𑀢𑁆𑀣𑀸𑀬 𑀓𑀭𑁄𑀦𑁆𑀢𑀲𑁆𑀲 𑀘 𑀅𑀦𑀸𑀧𑀢𑁆𑀢𑀺.

𑀲𑀢𑁆𑀢𑀫𑁄.

𑁨𑁬. 𑀅𑀫𑀽𑀮𑀓𑁂𑀦 𑀅𑀦𑁆𑀢𑀺𑀫𑁂𑀦 𑀯𑀢𑁆𑀣𑀼𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀫𑀽𑀮𑀓𑁂𑀦𑀸𑀢𑀺 𑀤𑀲𑁆𑀲𑀦𑀲𑀗𑁆𑀔𑀸𑀢𑀲𑁆𑀲, 𑀲𑀯𑀦𑀲𑀗𑁆𑀔𑀸𑀢𑀲𑁆𑀲, 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀲𑁂𑀦 𑀧𑀯𑀢𑁆𑀢𑀧𑀭𑀺𑀲𑀗𑁆𑀓𑀸𑀲𑀗𑁆𑀔𑀸𑀢𑀲𑁆𑀲 𑀘 𑀫𑀽𑀮𑀲𑁆𑀲 𑀅𑀪𑀸𑀯𑁂𑀦 𑀦𑀢𑁆𑀣𑀺 𑀫𑀽𑀮𑀫𑁂𑀢𑀲𑁆𑀲𑀸𑀢𑀺 𑀅𑀫𑀽𑀮𑀓𑀁, 𑀢𑁂𑀦. 𑀢𑀁 𑀧𑀦 𑀲𑁄 𑀆𑀧𑀦𑁆𑀦𑁄 𑀯𑀸 𑀳𑁄𑀢𑀼, 𑀦𑁄 𑀯𑀸, 𑀏𑀢𑀁 𑀇𑀥 𑀅𑀧𑁆𑀧𑀫𑀸𑀡𑀁. 𑀢𑀢𑁆𑀣 𑀪𑀺𑀓𑁆𑀔𑀼𑀜𑁆𑀘 𑀫𑀸𑀢𑀼𑀕𑀸𑀫𑀜𑁆𑀘 𑀢𑀣𑀸𑀭𑀽𑀧𑁂 𑀞𑀸𑀦𑁂 𑀤𑀺𑀲𑁆𑀯𑀸 𑀧𑀭𑀺𑀲𑀗𑁆𑀓𑀢𑀺, 𑀅𑀬𑀁 𑀤𑀺𑀝𑁆𑀞𑀧𑀭𑀺𑀲𑀗𑁆𑀓𑀸. 𑀅𑀦𑁆𑀥𑀓𑀸𑀭𑁂 𑀯𑀸 𑀧𑀝𑀺𑀘𑁆𑀙𑀦𑁆𑀦𑁂 𑀯𑀸 𑀪𑀺𑀓𑁆𑀔𑀼𑀲𑁆𑀲 𑀘 𑀫𑀸𑀢𑀼𑀕𑀸𑀫𑀲𑁆𑀲 𑀘 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀜𑁆𑀜𑀲𑁆𑀲 𑀅𑀢𑁆𑀣𑀺𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 𑀧𑀭𑀺𑀲𑀗𑁆𑀓𑀢𑀺, 𑀅𑀬𑀁 𑀲𑀼𑀢𑀧𑀭𑀺𑀲𑀗𑁆𑀓𑀸. 𑀥𑀼𑀢𑁆𑀢𑀸𑀦𑀁 𑀇𑀢𑁆𑀣𑀻𑀳𑀺 𑀲𑀤𑁆𑀥𑀺𑀁 𑀧𑀘𑁆𑀘𑀦𑁆𑀢𑀯𑀺𑀳𑀸𑀭𑁂𑀲𑀼 𑀧𑀼𑀧𑁆𑀨𑀕𑀦𑁆𑀥𑀲𑀼𑀭𑀸𑀤𑀻𑀳𑀺 𑀅𑀦𑀼𑀪𑀯𑀺𑀢𑁆𑀯𑀸 𑀕𑀢𑀝𑁆𑀞𑀸𑀦𑀁 𑀤𑀺𑀲𑁆𑀯𑀸 ‘‘𑀓𑁂𑀦 𑀦𑀼 𑀔𑁄 𑀇𑀤𑀁 𑀓𑀢’’𑀦𑁆𑀢𑀺 𑀯𑀻𑀫𑀁𑀲𑀦𑁆𑀢𑁄 𑀢𑀢𑁆𑀣 𑀓𑁂𑀦𑀘𑀺 𑀪𑀺𑀓𑁆𑀔𑀼𑀦𑀸 𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑀸 𑀓𑀢𑀸 𑀳𑁄𑀢𑀺, 𑀪𑁂𑀲𑀚𑁆𑀚𑀢𑁆𑀣𑀸𑀬 𑀅𑀭𑀺𑀝𑁆𑀞𑀁 𑀯𑀸 𑀧𑀻𑀢𑀁, 𑀲𑁄 𑀢𑀲𑁆𑀲 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 ‘‘𑀅𑀬𑀁 𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀭𑀺𑀲𑀗𑁆𑀓𑀢𑀺. 𑀅𑀬𑀁 𑀫𑀼𑀢𑀧𑀭𑀺𑀲𑀗𑁆𑀓𑀸 𑀦𑀸𑀫. 𑀅𑀦𑁆𑀢𑀺𑀫𑁂𑀦 𑀘𑀸𑀢𑀺 𑀢𑀢𑁄 𑀧𑀭𑀁 𑀯𑀚𑁆𑀚𑀸𑀪𑀸𑀯𑁂𑀦 𑀅𑀦𑁆𑀢𑁂 𑀪𑀯𑀢𑁆𑀢𑀸 𑀅𑀦𑁆𑀢𑀺𑀫𑁂𑀦𑁂𑀯. 𑀯𑀢𑁆𑀣𑀼𑀦𑀸𑀢𑀺 𑀪𑀺𑀓𑁆𑀔𑀼𑀦𑁄 𑀅𑀦𑀼𑀭𑀽𑀧𑁂𑀲𑀼 𑀏𑀓𑀽𑀦𑀯𑀻𑀲𑀢𑀺𑀬𑀸 𑀧𑀸𑀭𑀸𑀚𑀺𑀓𑁂𑀲𑀼 𑀥𑀫𑁆𑀫𑁂𑀲𑀼 𑀅𑀜𑁆𑀜𑀢𑀭𑁂𑀦 𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦. 𑀘-𑀓𑀸𑀭𑁄 𑀧𑀦𑁂𑀢𑁆𑀣 𑀅𑀯𑀥𑀸𑀭𑀡𑁂, 𑀢𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑀸𑀤𑀺𑀁 𑀦𑀺𑀯𑀢𑁆𑀢𑁂𑀢𑀺. 𑀅𑀣 𑀯𑀸 𑀘-𑀓𑀸𑀭𑁄 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄.

𑀘𑁄𑀤𑁂𑀦𑁆𑀢𑁄 𑀯𑀸 𑀘𑁄𑀤𑀸𑀧𑁂𑀦𑁆𑀢𑁄𑀯𑀸𑀘𑀸𑀢𑀺 𑀬𑁄𑀚𑁂𑀢𑀩𑁆𑀩𑁄. 𑀘𑀸𑀯𑁂𑀢𑀼𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀸 𑀘𑀸𑀯𑀦𑀢𑁆𑀣𑀸𑀬. 𑀏𑀢𑁂𑀦 𑀏𑀓𑀁 𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑀁 𑀕𑀳𑁂𑀢𑁆𑀯𑀸 𑀅𑀯𑀲𑁂𑀲𑁂 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑀯𑀼𑀝𑁆𑀞𑀸𑀧𑀦𑀸𑀥𑀺𑀧𑁆𑀧𑀸𑀬𑀸𑀤𑀺𑀓𑁂 𑀲𑀢𑁆𑀢𑀸𑀥𑀺𑀧𑁆𑀧𑀸𑀬𑁂 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀼𑀡𑀫𑀸𑀦𑀦𑁆𑀢𑀺 𑀇𑀤𑀁 ‘‘𑀘𑁄𑀤𑁂𑀦𑁆𑀢𑁄’’𑀢𑀺𑀆𑀤𑀻𑀦𑀁 𑀓𑀫𑁆𑀫𑀧𑀤𑀁, 𑀇𑀫𑀺𑀦𑀸 𑀧𑀭𑀫𑁆𑀫𑀼𑀔𑀸 𑀘𑁄𑀤𑀦𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀭𑀫𑁆𑀫𑀼𑀔𑀸 𑀧𑀦 𑀲𑀢𑁆𑀢𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀯𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀘𑁄𑀤𑁂𑀦𑁆𑀢𑁄𑀢𑀺 ‘‘𑀯𑀢𑁆𑀣𑀼𑀲𑀦𑁆𑀤𑀲𑁆𑀲𑀦𑀸 𑀆𑀧𑀢𑁆𑀢𑀺𑀲𑀦𑁆𑀤𑀲𑁆𑀲𑀦𑀸 𑀲𑀁𑀯𑀸𑀲𑀧𑁆𑀧𑀝𑀺𑀓𑁆𑀔𑁂𑀧𑁄 𑀲𑀸𑀫𑀻𑀘𑀺𑀧𑁆𑀧𑀝𑀺𑀓𑁆𑀔𑁂𑀧𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁮𑁫-𑁩𑁮𑁬) 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁 𑀘𑁄𑀤𑀦𑀸𑀦𑀁 𑀯𑀲𑁂𑀦 𑀲𑀬𑀁 𑀘𑁄𑀤𑁂𑀦𑁆𑀢𑁄 𑀯𑀸. 𑀘𑁄𑀤𑀸𑀧𑁂𑀦𑁆𑀢𑁄 𑀯𑀸𑀢𑀺 𑀧𑀭𑁂𑀦 𑀬𑁂𑀦 𑀓𑁂𑀦𑀘𑀺 𑀘𑁄𑀤𑀸𑀧𑁂𑀦𑁆𑀢𑁄 𑀯𑀸. 𑀢𑀲𑁆𑀫𑀸 𑀬𑁄 𑀪𑀺𑀓𑁆𑀔𑀼𑀲𑁆𑀲 𑀲𑀫𑀻𑀧𑁂 𑀞𑀢𑁆𑀯𑀸 ‘‘𑀢𑁆𑀯𑀁 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀲𑁂𑀯𑀺, 𑀅𑀲𑁆𑀲𑀫𑀡𑁄𑀲𑀻’’𑀢𑀺𑀆𑀤𑀺𑀦𑀸 𑀯𑀢𑁆𑀣𑀼𑀲𑀦𑁆𑀤𑀲𑁆𑀲𑀦𑀯𑀲𑁂𑀦 𑀯𑀸 ‘‘𑀢𑁆𑀯𑀁 𑀫𑁂𑀣𑀼𑀦𑀥𑀫𑁆𑀫𑀸𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’’𑀢𑀺𑀆𑀤𑀺𑀦𑀸 𑀆𑀧𑀢𑁆𑀢𑀺𑀲𑀦𑁆𑀤𑀲𑁆𑀲𑀦𑀯𑀲𑁂𑀦 𑀯𑀸 ‘‘𑀅𑀲𑁆𑀲𑀫𑀡𑁄𑀲𑀺, 𑀦𑀢𑁆𑀣𑀺 𑀢𑀬𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑁄 𑀯𑀸 𑀧𑀯𑀸𑀭𑀡𑀸 𑀯𑀸 𑀲𑀗𑁆𑀖𑀓𑀫𑁆𑀫𑀁 𑀯𑀸, 𑀅𑀲𑁆𑀲𑀫𑀡𑁄𑀲𑀻’’𑀢𑀺𑀆𑀤𑀺𑀦𑀸 𑀲𑀁𑀯𑀸𑀲𑀧𑁆𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀯𑀸 𑀅𑀪𑀺𑀯𑀸𑀤𑀦𑀸𑀤𑀺𑀲𑀁𑀯𑀸𑀲𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀅𑀲𑁆𑀲𑀫𑀡𑁄𑀢𑀺 𑀓𑀲𑁆𑀫𑀸𑀢𑀺 𑀧𑀼𑀝𑁆𑀞𑀲𑁆𑀲 ‘‘𑀅𑀲𑁆𑀲𑀫𑀡𑁄𑀲𑀻’’𑀢𑀺𑀆𑀤𑀺𑀯𑀘𑀦𑁂𑀳𑀺 𑀲𑀸𑀫𑀻𑀘𑀺𑀧𑁆𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀯𑀸 𑀅𑀦𑁆𑀢𑀫𑀲𑁄 𑀳𑀢𑁆𑀣𑀫𑀼𑀤𑁆𑀤𑀸𑀬 𑀏𑀯 𑀯𑀸𑀧𑀺 𑀏𑀢𑀫𑀢𑁆𑀣𑀁 𑀤𑀻𑀧𑀬𑀢𑁄 ‘‘𑀓𑀭𑁄𑀢𑀼 𑀫𑁂 𑀆𑀬𑀲𑁆𑀫𑀸 𑀑𑀓𑀸𑀲𑀁, 𑀅𑀳𑀁 𑀢𑀁 𑀯𑀢𑁆𑀢𑀼𑀓𑀸𑀫𑁄’’𑀢𑀺 𑀏𑀯𑀁 𑀑𑀓𑀸𑀲𑁂 𑀅𑀓𑀸𑀭𑀺𑀢𑁂 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁄 𑀘𑁂𑀯 𑀤𑀼𑀓𑁆𑀓𑀝𑀜𑁆𑀘, 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀘𑁄𑀤𑁂𑀦𑁆𑀢𑀲𑁆𑀲 𑀧𑀦 𑀲𑀗𑁆𑀖𑀸𑀤𑀺𑀲𑁂𑀲𑁄𑀯 𑀤𑀝𑁆𑀞𑀩𑁆𑀩𑁄.

𑀅𑀝𑁆𑀞𑀫𑁄.

𑁨𑁭. 𑀅𑀜𑁆𑀜𑀲𑁆𑀲𑀸𑀢𑀺 𑀔𑀢𑁆𑀢𑀺𑀬𑀸𑀤𑀺𑀚𑀸𑀢𑀺𑀓𑀲𑁆𑀲 𑀧𑀭𑀲𑁆𑀲. 𑀓𑀺𑀭𑀺𑀬𑀦𑁆𑀢𑀺 𑀫𑁂𑀣𑀼𑀦𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑀁 𑀓𑀺𑀭𑀺𑀬𑀁. 𑀢𑁂𑀦𑀸𑀢𑀺 𑀅𑀜𑁆𑀜𑀲𑁆𑀲 𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑀲𑁆𑀲 𑀫𑁂𑀣𑀼𑀦𑀯𑀻𑀢𑀺𑀓𑁆𑀓𑀫𑀲𑀦𑁆𑀤𑀲𑁆𑀲𑀦𑁂𑀦 𑀓𑀭𑀡𑀪𑀽𑀢𑁂𑀦. 𑀮𑁂𑀲𑁂𑀦𑀸𑀢𑀺 𑀬𑀲𑁆𑀲 𑀚𑀸𑀢𑀺𑀆𑀤𑀬𑁄 𑀢𑀢𑁄 𑀅𑀜𑁆𑀜𑀫𑁆𑀧𑀺 𑀯𑀢𑁆𑀣𑀼𑀁 𑀮𑀺𑀲𑁆𑀲𑀢𑀺 𑀉𑀤𑁆𑀤𑀺𑀝𑁆𑀞𑁂 𑀯𑀺𑀢𑁆𑀣𑀸𑀭𑀁 𑀲𑀺𑀮𑀺𑀲𑁆𑀲𑀢𑀺 𑀯𑁄𑀳𑀸𑀭𑀫𑀢𑁆𑀢𑁂𑀦𑁂𑀯𑀸𑀢𑀺 𑀚𑀸𑀢𑀺𑀆𑀤𑀬𑁄𑀯 ‘‘𑀮𑁂𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀦 𑀚𑀸𑀢𑀺𑀮𑁂𑀲𑀦𑀸𑀫𑀮𑁂𑀲𑀸𑀤𑀺𑀦𑀸 𑀮𑁂𑀲𑁂𑀦. 𑀅𑀜𑁆𑀜𑀦𑁆𑀢𑀺 𑀬𑁄 𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀤𑀺𑀝𑁆𑀞𑁄, 𑀢𑀢𑁄 𑀅𑀧𑀭𑀫𑁆𑀧𑀺 𑀪𑀺𑀓𑁆𑀔𑀼𑀁 𑀘𑀸𑀯𑁂𑀢𑀼𑀁 𑀅𑀦𑁆𑀢𑀺𑀫𑁂𑀦 𑀯𑀢𑁆𑀣𑀼𑀦𑀸 𑀘𑁄𑀤𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀣𑀁? 𑀓𑁄𑀘𑀺 𑀔𑀢𑁆𑀢𑀺𑀬𑀚𑀸𑀢𑀺𑀬𑁄 𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀤𑀺𑀝𑁆𑀞𑁄, 𑀢𑀢𑁄 𑀅𑀜𑁆𑀜𑀁 𑀅𑀢𑁆𑀢𑀦𑁄 𑀯𑁂𑀭𑀺𑀁 𑀔𑀢𑁆𑀢𑀺𑀬𑀚𑀸𑀢𑀺𑀓𑀁 𑀪𑀺𑀓𑁆𑀔𑀼𑀁 𑀧𑀲𑁆𑀲𑀺𑀢𑁆𑀯𑀸 𑀢𑀁 𑀔𑀢𑁆𑀢𑀺𑀬𑀁 𑀚𑀸𑀢𑀺𑀮𑁂𑀲𑀁 𑀕𑀳𑁂𑀢𑁆𑀯𑀸 ‘‘𑀔𑀢𑁆𑀢𑀺𑀬𑁄 𑀫𑀬𑀸 𑀤𑀺𑀝𑁆𑀞𑁄 𑀯𑀻𑀢𑀺𑀓𑁆𑀓𑀫𑀦𑁆𑀢𑁄, 𑀢𑁆𑀯𑀁 𑀔𑀢𑁆𑀢𑀺𑀬𑁄 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀆𑀧𑀦𑁆𑀦𑁄𑀲𑀻’’𑀢𑀺 𑀘𑁄𑀤𑁂𑀢𑀺 𑀘𑁄𑀤𑀸𑀧𑁂𑀢𑀺 𑀯𑀸. 𑀏𑀯𑀁 𑀦𑀸𑀫𑀮𑁂𑀲𑀸𑀤𑀬𑁄𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀸 𑀯𑀺𑀦𑀺𑀘𑁆𑀙𑀬𑀓𑀣𑀸 𑀅𑀝𑁆𑀞𑀫𑁂 𑀯𑀼𑀢𑁆𑀢𑀲𑀤𑀺𑀲𑀸𑀬𑁂𑀯.

𑀦𑀯𑀫𑁄.

𑁨𑁮. 𑀏𑀢𑁆𑀢𑀸𑀯𑀢𑀸 ‘‘𑀕𑀭𑀼𑀓𑀸 𑀦𑀯𑀸’’𑀢𑀺 𑀉𑀤𑁆𑀤𑀺𑀝𑁆𑀞𑁂 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀼 𑀆𑀧𑀦𑁆𑀦𑁂𑀲𑀼 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀙𑀸𑀤𑁂𑀢𑀺 𑀚𑀸𑀦𑀫𑀸𑀧𑀦𑁆𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀅𑀢𑁆𑀢𑀦𑀸 𑀆𑀧𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀁 𑀆𑀧𑀢𑁆𑀢𑀺𑀯𑀲𑁂𑀦 𑀯𑀸 𑀯𑀢𑁆𑀣𑀼𑀯𑀲𑁂𑀦 𑀯𑀸 𑀚𑀸𑀦𑀁 𑀚𑀸𑀦𑀦𑁆𑀢𑁄 𑀬𑀸𑀯𑀢𑀸 𑀬𑀢𑁆𑀢𑀓𑀸𑀦𑀺 𑀅𑀳𑀸𑀦𑀺 𑀙𑀸𑀤𑁂𑀢𑀺 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀢𑀸𑀯𑀢𑀸 𑀢𑀢𑁆𑀢𑀓𑀸𑀦𑀺 𑀅𑀳𑀸𑀦𑀺 𑀢𑀲𑁆𑀲 𑀧𑀭𑀺𑀯𑀸𑀲𑁄 𑀳𑁄𑀢𑀻𑀢𑀺 𑀏𑀯𑀁 𑀧𑀤𑀲𑀦𑁆𑀥𑀺𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄𑀢𑀺 𑀢𑀺𑀯𑀺𑀥𑁄 𑀧𑀭𑀺𑀯𑀸𑀲𑁄. 𑀢𑁂𑀲𑀁 𑀧𑀦 𑀅𑀢𑀺𑀲𑀗𑁆𑀔𑁂𑀧𑀦𑀬𑁂𑀦 𑀫𑀼𑀔𑀫𑀢𑁆𑀢𑁂𑀧𑀺 𑀤𑀲𑁆𑀲𑀺𑀢𑁂 𑀯𑀺𑀢𑁆𑀣𑀸𑀭𑀯𑀺𑀦𑀺𑀘𑁆𑀙𑀬𑀧𑀯𑁂𑀲𑁄𑀧𑀸𑀬𑀲𑀫𑁆𑀪𑀯𑁄 𑀲𑀺𑀬𑀸𑀢𑀺 𑀫𑀼𑀔𑀫𑀢𑁆𑀢𑀁 𑀤𑀲𑁆𑀲𑀬𑀺𑀲𑁆𑀲𑀸𑀫.

𑀢𑀢𑁆𑀣 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄 𑀦𑀸𑀫 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸 𑀤𑀸𑀢𑀩𑁆𑀩𑁄, 𑀢𑀲𑁆𑀫𑀸 𑀧𑀝𑀺𑀘𑁆𑀙𑀦𑁆𑀦𑀤𑀺𑀯𑀲𑁂 𑀘 𑀆𑀧𑀢𑁆𑀢𑀺𑀬𑁄 𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀘𑁂 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺, ‘‘𑀅𑀳𑀁, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄’’𑀢𑀺𑀆𑀤𑀺𑀦𑀸 𑀔𑀦𑁆𑀥𑀓𑁂 (𑀘𑀽𑀴𑀯. 𑁯𑁮-𑁯𑁯) 𑀆𑀕𑀢𑀦𑀬𑁂𑀦 𑀬𑀸𑀘𑀸𑀧𑁂𑀢𑁆𑀯𑀸 ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄’’𑀢𑀺𑀆𑀤𑀺𑀦𑀸 𑀔𑀦𑁆𑀥𑀓𑁂 𑀆𑀕𑀢𑀦𑀬𑁂𑀦𑁂𑀯 𑀓𑀫𑁆𑀫𑀯𑀸𑀘𑀁 𑀯𑀢𑁆𑀯𑀸 𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄. 𑀏𑀓𑀁 𑀆𑀧𑀚𑁆𑀚𑀺𑀢𑁆𑀯𑀸 ‘‘𑀲𑀫𑁆𑀩𑀳𑀼𑀮𑀸’’𑀢𑀺 𑀯𑀺𑀦𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲𑀸𑀧𑀺 𑀯𑀼𑀝𑁆𑀞𑀸𑀢𑀻𑀢𑀺 ‘‘𑀲𑀫𑁆𑀩𑀳𑀼𑀮𑀸’’𑀢𑀺 𑀯𑀼𑀢𑁆𑀢𑀁. 𑀦𑀸𑀦𑀸𑀯𑀢𑁆𑀣𑀼𑀓𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀣 𑀤𑁆𑀯𑀻𑀳𑀸𑀤𑀺𑀧𑁆𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀦𑁆𑀢𑀺, 𑀧𑀓𑁆𑀔𑀅𑀢𑀺𑀭𑁂𑀓𑀧𑀓𑁆𑀔𑀫𑀸𑀲𑀅𑀢𑀺𑀭𑁂𑀓𑀫𑀸𑀲𑀲𑀁𑀯𑀘𑁆𑀙𑀭𑀅𑀢𑀺𑀭𑁂𑀓𑀲𑀁𑀯𑀘𑁆𑀙𑀭𑀧𑁆𑀧𑀝𑀺𑀘𑁆𑀙𑀦𑁆𑀦𑀸 𑀯𑀸, ‘‘𑀤𑁆𑀯𑀻𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄 𑀯𑀸’’𑀢𑀺𑀆𑀤𑀺𑀦𑀸 𑀯𑀢𑁆𑀯𑀸 𑀬𑁄 𑀬𑁄 𑀆𑀧𑀦𑁆𑀦𑁄 𑀳𑁄𑀢𑀺, 𑀢𑀲𑁆𑀲 𑀢𑀲𑁆𑀲 𑀦𑀸𑀫𑀜𑁆𑀘 𑀕𑀳𑁂𑀢𑁆𑀯𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀘 𑀲𑀘𑁂 𑀅𑀧𑁆𑀧𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀳𑁄𑀢𑀺, 𑀲𑀓𑁆𑀓𑀸 𑀭𑀢𑁆𑀢𑀺𑀘𑁆𑀙𑁂𑀤𑀁 𑀅𑀦𑀸𑀧𑀚𑁆𑀚𑀦𑁆𑀢𑁂𑀦 𑀯𑀲𑀺𑀢𑀼𑀁, 𑀢𑀢𑁆𑀣𑁂𑀯 ‘‘𑀧𑀭𑀺𑀯𑀸𑀲𑀁 𑀲𑀫𑀸𑀤𑀺𑀬𑀸𑀫𑀺, 𑀯𑀢𑁆𑀢𑀁 𑀲𑀫𑀸𑀤𑀺𑀬𑀸𑀫𑀻’𑀢𑀺 𑀯𑀢𑁆𑀢𑀁 𑀲𑀫𑀸𑀤𑀸𑀬 𑀢𑀢𑁆𑀣𑁂𑀯 𑀲𑀗𑁆𑀖𑀲𑁆𑀲 ‘‘𑀅𑀳𑀁, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄’’𑀢𑀺𑀆𑀤𑀺𑀦𑀸 𑀆𑀭𑁄𑀘𑁂𑀢𑁆𑀯𑀸 𑀧𑀼𑀦 𑀆𑀕𑀢𑀸𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀦𑁆𑀢𑁂𑀦 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀲𑀳𑀯𑀸𑀲𑁄, 𑀢𑁂𑀦 𑀘 𑀯𑀺𑀦𑀸𑀯𑀸𑀲𑁄, 𑀆𑀕𑀦𑁆𑀢𑀼𑀓𑀸𑀤𑀻𑀦𑀁 𑀉𑀧𑀘𑀸𑀭𑀕𑀢𑀸𑀦𑀁 𑀅𑀦𑀸𑀭𑁄𑀘𑀦𑀸𑀢𑀺 𑀏𑀢𑁂𑀲𑀼 𑀏𑀓𑁂𑀦𑀸𑀧𑀺 𑀭𑀢𑁆𑀢𑀺𑀘𑁆𑀙𑁂𑀤𑀜𑁆𑀘 𑀯𑀢𑁆𑀢𑀪𑁂𑀤𑀜𑁆𑀘 𑀅𑀓𑀢𑁆𑀯𑀸 𑀧𑀭𑀺𑀯𑀢𑁆𑀣𑀩𑁆𑀩𑀁.

𑀲𑀘𑁂 𑀦 𑀲𑀓𑁆𑀓𑀸 𑀳𑁄𑀢𑀺 𑀧𑀭𑀺𑀯𑀸𑀲𑀁 𑀲𑁄𑀥𑁂𑀢𑀼𑀁, 𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑁂𑀦 𑀯𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀢𑁆𑀣𑁂𑀯 𑀲𑀗𑁆𑀖𑀫𑀚𑁆𑀛𑁂 𑀯𑀸 𑀏𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀲𑀦𑁆𑀢𑀺𑀓𑁂 ‘‘𑀧𑀭𑀺𑀯𑀸𑀲𑀁 𑀦𑀺𑀓𑁆𑀔𑀺𑀧𑀸𑀫𑀺, 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀸𑀫𑀻’’𑀢𑀺 𑀧𑀭𑀺𑀯𑀸𑀲𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀦𑀺𑀓𑁆𑀔𑀺𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀓𑀢𑀢𑁆𑀢𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀅𑀣𑀸𑀦𑁂𑀦 𑀧𑀘𑁆𑀘𑀽𑀲𑀲𑀫𑀬𑁂 𑀏𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀭𑀺𑀓𑁆𑀔𑁂𑀧𑀢𑁄, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀢𑁄 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀳𑀸𑀫𑀕𑁆𑀕𑀢𑁄 𑀑𑀓𑁆𑀓𑀫𑁆𑀫 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀦𑁆𑀢𑁄𑀅𑀭𑀼𑀡𑁂𑀬𑁂𑀯 𑀯𑀢𑁆𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀁. 𑀲𑀘𑁂 𑀩𑀳𑀺 𑀞𑀺𑀢𑀸𑀦𑀫𑁆𑀧𑀺 𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀧𑀲𑁆𑀲𑀢𑀺 𑀯𑀸, 𑀤𑀽𑀭𑀁 𑀕𑀦𑁆𑀢𑁆𑀯𑀸𑀧𑀺 𑀆𑀭𑁄𑀘𑁂𑀢𑀩𑁆𑀩𑀁, 𑀅𑀦𑀸𑀭𑁄𑀘𑁂𑀦𑁆𑀢𑁂 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘𑁂𑀯 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀜𑁆𑀘. 𑀲𑀘𑁂 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀉𑀧𑀘𑀸𑀭𑀲𑀻𑀫𑀁 𑀧𑀯𑀺𑀲𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀭𑀢𑁆𑀢𑀺𑀘𑁆𑀙𑁂𑀤𑁄𑀯 𑀳𑁄𑀢𑀺, 𑀦 𑀯𑀢𑁆𑀢𑀪𑁂𑀤𑁄. 𑀅𑀭𑀼𑀡𑁂 𑀉𑀝𑁆𑀞𑀺𑀢𑁂 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑀩𑁆𑀩𑀁. 𑀏𑀯𑀁 𑀬𑀸𑀯 𑀭𑀢𑁆𑀢𑀺𑀬𑁄 𑀧𑀽𑀭𑁂𑀦𑁆𑀢𑀺, 𑀢𑀸𑀯 𑀧𑀭𑀺𑀯𑀢𑁆𑀣𑀩𑁆𑀩𑀁. 𑀅𑀬𑀁 𑀢𑀸𑀯 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄.

𑀲𑀼𑀤𑁆𑀥𑀦𑁆𑀢𑁄 𑀤𑀼𑀯𑀺𑀥𑁄 𑀘𑀽𑀴𑀲𑀼𑀤𑁆𑀥𑀦𑁆𑀢𑁄 𑀫𑀳𑀸𑀲𑀼𑀤𑁆𑀥𑀦𑁆𑀢𑁄𑀢𑀺. 𑀢𑀢𑁆𑀣 𑀬𑁄 ‘‘𑀉𑀧𑀲𑀫𑁆𑀧𑀤𑀢𑁄 𑀧𑀝𑁆𑀞𑀸𑀬 𑀬𑀢𑁆𑀢𑀓𑀁 𑀦𑀸𑀫 𑀓𑀸𑀮𑀁 𑀅𑀳𑀁 𑀲𑀼𑀤𑁆𑀥𑁄’’𑀢𑀺 𑀚𑀸𑀦𑀸𑀢𑀺, 𑀢𑀢𑁆𑀢𑀓𑀁 𑀅𑀧𑀦𑁂𑀢𑁆𑀯𑀸 𑀢𑀢𑁄 𑀅𑀯𑀲𑁂𑀲𑁂 𑀭𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑁂 𑀏𑀓𑀢𑁄 𑀓𑀢𑁆𑀯𑀸 𑀤𑀸𑀢𑀩𑁆𑀩𑀧𑀭𑀺𑀯𑀸𑀲𑁄 𑀘𑀽𑀴𑀲𑀼𑀤𑁆𑀥𑀦𑁆𑀢𑁄. 𑀬𑁄 𑀧𑀦 𑀲𑀩𑁆𑀩𑀲𑁄 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀢𑀺 𑀦𑀲𑁆𑀲𑀭𑀢𑀺, 𑀢𑀢𑁆𑀣 𑀘 𑀯𑁂𑀫𑀢𑀺𑀓𑁄, 𑀢𑀲𑁆𑀲 𑀤𑀸𑀢𑀩𑁆𑀩𑁄 𑀫𑀳𑀸𑀲𑀼𑀤𑁆𑀥𑀦𑁆𑀢𑁄. 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀚𑀸𑀦𑀸𑀢𑀼 𑀯𑀸, 𑀫𑀸 𑀯𑀸, 𑀅𑀓𑀸𑀭𑀡𑀫𑁂𑀢𑀁.

𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄 𑀦𑀸𑀫 𑀢𑀺𑀯𑀺𑀥𑁄 𑀑𑀥𑀸𑀦𑀲𑀫𑁄𑀥𑀸𑀦𑁄 𑀅𑀕𑁆𑀖𑀲𑀫𑁄𑀥𑀸𑀦𑁄 𑀫𑀺𑀲𑁆𑀲𑀓𑀲𑀫𑁄𑀥𑀸𑀦𑁄𑀢𑀺. 𑀢𑀢𑁆𑀣 𑀬𑁄 𑀦𑀺𑀝𑁆𑀞𑀺𑀢𑀧𑀭𑀺𑀯𑀸𑀲𑁄𑀧𑀺 𑀯𑀸 𑀦𑀺𑀝𑁆𑀞𑀺𑀢𑀫𑀸𑀦𑀢𑁆𑀢𑁄𑀧𑀺 𑀯𑀸 𑀅𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑁄 𑀅𑀜𑁆𑀜𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀼𑀭𑀺𑀫𑀸𑀧𑀢𑁆𑀢𑀺𑀬𑀸 𑀲𑀫𑀸 𑀯𑀸 𑀊𑀦𑀢𑀭𑀸 𑀯𑀸 𑀭𑀢𑁆𑀢𑀺𑀬𑁄 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀢𑀲𑁆𑀲 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑁂𑀦 𑀢𑁂 𑀧𑀭𑀺𑀯𑀼𑀢𑁆𑀣𑀤𑀺𑀯𑀲𑁂 𑀘 𑀫𑀸𑀦𑀢𑁆𑀢𑀘𑀺𑀡𑁆𑀡𑀤𑀺𑀯𑀲𑁂 𑀘 𑀑𑀥𑀼𑀦𑀺𑀢𑁆𑀯𑀸 𑀫𑀓𑁆𑀔𑁂𑀢𑁆𑀯𑀸 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀫𑀽𑀮𑀤𑀺𑀯𑀲𑀧𑀭𑀺𑀘𑁆𑀙𑁂𑀤𑁂 𑀧𑀘𑁆𑀙𑀸 𑀆𑀧𑀦𑁆𑀦𑀁 𑀆𑀧𑀢𑁆𑀢𑀺𑀁 𑀲𑀫𑁄𑀤𑀳𑀺𑀢𑁆𑀯𑀸 𑀧𑀼𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀤𑀸𑀢𑀩𑁆𑀩𑀧𑀭𑀺𑀯𑀸𑀲𑁄 𑀑𑀥𑀸𑀦𑀲𑀫𑁄𑀥𑀸𑀦𑁄 𑀦𑀸𑀫. 𑀲𑀘𑁂 𑀓𑀲𑁆𑀲𑀘𑀺 𑀏𑀓𑀸𑀧𑀢𑁆𑀢𑀺 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀤𑁆𑀯𑀻𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀏𑀯𑀁 𑀬𑀸𑀯 𑀤𑀲𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀢𑀸𑀲𑀁 𑀅𑀕𑁆𑀖𑁂𑀦 𑀲𑀫𑁄𑀥𑀸𑀬 𑀢𑀸𑀲𑀁 𑀤𑀲𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀯𑀲𑁂𑀦 𑀅𑀯𑀲𑁂𑀲𑀸𑀦𑀁 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀤𑀻𑀦𑀫𑁆𑀧𑀺 𑀤𑀸𑀢𑀩𑁆𑀩𑀧𑀭𑀺𑀯𑀸𑀲𑁄 𑀅𑀕𑁆𑀖𑀲𑀫𑁄𑀥𑀸𑀦𑁄 𑀦𑀸𑀫. 𑀬𑁄 𑀧𑀦 𑀦𑀸𑀦𑀸𑀯𑀢𑁆𑀣𑀼𑀓𑀸 𑀆𑀧𑀢𑁆𑀢𑀺𑀬𑁄 𑀏𑀓𑀢𑁄 𑀓𑀢𑁆𑀯𑀸 𑀤𑀸𑀢𑀩𑁆𑀩𑀧𑀭𑀺𑀯𑀸𑀲𑁄 𑀫𑀺𑀲𑁆𑀲𑀓𑀲𑀫𑁄𑀥𑀸𑀦𑁄 𑀦𑀸𑀫. 𑀤𑀸𑀦𑀯𑀺𑀥𑀺 𑀧𑀦 𑀲𑀩𑁆𑀩𑀢𑁆𑀣 𑀔𑀦𑁆𑀥𑀓𑁂 (𑀘𑀽𑀴𑀯. 𑁧𑁩𑁪 𑀆𑀤𑀬𑁄) 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀪𑀺𑀓𑁆𑀔𑀼 𑀫𑀸𑀦𑀢𑁆𑀢𑀁 𑀪𑀺𑀓𑁆𑀔𑀽𑀦𑀁 𑀫𑀸𑀦𑀦𑀪𑀸𑀯𑀁 𑀙 𑀭𑀢𑁆𑀢𑀺𑀬𑁄 𑀅𑀔𑀡𑁆𑀟𑀁 𑀓𑀢𑁆𑀯𑀸 𑀘𑀭𑁂𑀬𑁆𑀬 𑀓𑀭𑁂𑀬𑁆𑀬, 𑀲𑀫𑁆𑀧𑀸𑀤𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀲𑀗𑁆𑀖𑁂𑀦 𑀕𑀡𑁂𑀦 𑀧𑀼𑀕𑁆𑀕𑀮𑁂𑀦 𑀓𑀢𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀫𑀚𑁆𑀛𑁂 𑀯𑀢𑁆𑀢𑀁 𑀲𑀫𑀸𑀤𑀸𑀧𑁂𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺’’𑀦𑁆𑀢𑀺𑀆𑀤𑀺𑀦𑀸 𑀔𑀦𑁆𑀥𑀓𑁂 𑀯𑀼𑀢𑁆𑀢𑀦𑀬𑁂𑀦 𑀬𑀸𑀘𑀸𑀧𑁂𑀢𑁆𑀯𑀸 𑀢𑀢𑁆𑀣𑁂𑀯 𑀯𑀼𑀢𑁆𑀢𑀦𑀬𑁂𑀦 𑀫𑀸𑀦𑀢𑁆𑀢𑀤𑀸𑀦𑀸𑀤𑀬𑁄𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀺𑀦𑀸𑀧𑀺 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀼𑀓𑀸𑀫𑁂𑀦 𑀘𑁂 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀘𑀢𑀽𑀳𑀺 𑀧𑀜𑁆𑀘𑀳𑀺 𑀲𑀤𑁆𑀥𑀺𑀁 𑀧𑀭𑀺𑀯𑀸𑀲𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀧𑀤𑁂𑀲𑀁 𑀕𑀦𑁆𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀲𑀳𑀯𑀸𑀲𑀸𑀤𑀺𑀁 𑀅𑀦𑁆𑀢𑀫𑀲𑁄 𑀘𑀢𑀽𑀳𑀺 𑀊𑀦𑀢𑁆𑀢𑀸 𑀊𑀦𑁂 𑀕𑀡𑁂 𑀘𑀭𑀡𑀤𑁄𑀲𑀜𑁆𑀘 𑀯𑀚𑁆𑀚𑁂𑀢𑁆𑀯𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀧𑀢𑁆𑀢𑀺𑀓𑀲𑁆𑀲 𑀧𑀦 𑀧𑀭𑀺𑀯𑀸𑀲𑀁 𑀅𑀤𑀢𑁆𑀯𑀸 𑀫𑀸𑀦𑀢𑁆𑀢𑀫𑁂𑀯 𑀤𑀸𑀢𑀩𑁆𑀩𑀁. 𑀏𑀯𑀁 𑀘𑀺𑀡𑁆𑀡𑀁 𑀓𑀢𑀁 𑀧𑀭𑀺𑀦𑀺𑀝𑁆𑀞𑀸𑀧𑀺𑀢𑀁 𑀫𑀸𑀦𑀢𑁆𑀢𑀁 𑀬𑁂𑀦, 𑀢𑀁 𑀪𑀺𑀓𑁆𑀔𑀼𑀁. 𑀯𑀻𑀲𑀢𑀺 𑀲𑀗𑁆𑀖𑁄 𑀕𑀡𑁄 𑀅𑀲𑁆𑀲𑀸𑀢𑀺 𑀯𑀻𑀲𑀢𑀻𑀕𑀡𑁄 𑀤𑀻𑀖𑀁 𑀓𑀢𑁆𑀯𑀸, 𑀲𑁄 𑀲𑀗𑁆𑀖𑁄 𑀅𑀩𑁆𑀪𑁂𑀬𑁆𑀬 𑀲𑀫𑁆𑀧𑀝𑀺𑀘𑁆𑀙𑁂𑀬𑁆𑀬, 𑀅𑀩𑁆𑀪𑀸𑀦𑀓𑀫𑁆𑀫𑀯𑀲𑁂𑀦 𑀑𑀲𑀸𑀭𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀅𑀯𑁆𑀳𑁂𑀬𑁆𑀬𑀸𑀢𑀺 𑀯𑀸 𑀅𑀢𑁆𑀣𑁄. 𑀏𑀢𑁆𑀣𑀸𑀧𑀺 𑀲𑀫𑀸𑀤𑀸𑀦𑀆𑀭𑁄𑀘𑀦𑀬𑀸𑀘𑀦𑀸𑀦𑀺, 𑀓𑀫𑁆𑀫𑀯𑀸𑀘𑀸 𑀘 𑀔𑀦𑁆𑀥𑀓𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸.

𑁨𑁯. 𑀏𑀯𑀁 𑀢𑁂𑀲𑀼 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀙𑀸𑀤𑀦𑀲𑁆𑀲 𑀅𑀗𑁆𑀕𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀆𑀧𑀢𑁆𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦 𑀉𑀓𑁆𑀔𑀺𑀢𑁆𑀢𑁄 𑀅𑀦𑀼𑀓𑁆𑀔𑀺𑀢𑁆𑀢𑁄, 𑀦𑀢𑁆𑀣𑀺 𑀅𑀦𑁆𑀢𑀭𑀸𑀬𑁄 𑀅𑀲𑁆𑀲𑀸𑀢𑀺 𑀅𑀦𑀦𑁆𑀢𑀭𑀸𑀬𑁄. 𑀲𑀓𑀢𑁆𑀣𑁂 𑀢𑁆𑀢𑀧𑀘𑁆𑀘𑀬𑀯𑀲𑁂𑀦 𑀯𑀸, 𑀧𑀳𑀼𑀦𑁄 𑀪𑀸𑀯𑁄 𑀧𑀳𑀼𑀢𑁆𑀢𑀁, 𑀢𑀁 𑀅𑀲𑁆𑀲𑀢𑁆𑀣𑀻𑀢𑀺 𑀲𑀤𑁆𑀥𑀸𑀤𑀺𑀯𑀲𑁂𑀦 𑀯𑀸 𑀧𑀳𑀼𑀢𑁆𑀢𑁄. 𑀅𑀦𑀼𑀓𑁆𑀔𑀺𑀢𑁆𑀢𑁄 𑀘 𑀅𑀦𑀦𑁆𑀢𑀭𑀸𑀬𑁄 𑀘 𑀧𑀳𑀼𑀢𑁆𑀢𑁄 𑀘𑀸𑀢𑀺 𑀤𑁆𑀯𑀦𑁆𑀤𑁄, 𑀢𑁂𑀲𑀁 𑀪𑀸𑀯𑁄 𑀅𑀦𑀼𑀓𑁆𑀔𑀺𑀢𑁆𑀢𑀸𑀤𑀺𑀕𑀼𑀡𑁄 𑀅𑀦𑀼𑀓𑁆𑀔𑀺𑀢𑁆𑀢…𑀧𑁂… 𑀧𑀳𑀼𑀢𑁆𑀢𑀢𑀸. 𑀆𑀧𑀢𑁆𑀢𑀺 𑀘 𑀅𑀦𑀼𑀓𑁆𑀔𑀺𑀢𑁆𑀢…𑀧𑁂… 𑀧𑀳𑀼𑀢𑁆𑀢𑀢𑀸 𑀘 𑀆𑀧𑀢𑁆𑀢𑀺…𑀧𑁂… 𑀧𑀳𑀼𑀢𑁆𑀢𑀢𑀸𑀬𑁄. 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀚𑁄. 𑀢𑀣𑀸 𑀢𑁂𑀦 𑀧𑀓𑀸𑀭𑁂𑀦 𑀆𑀧𑀢𑁆𑀢𑀺𑀆𑀤𑀻𑀲𑀼 𑀘𑀢𑀽𑀲𑀼 𑀆𑀧𑀢𑁆𑀢𑀸𑀤𑀺𑀧𑀓𑀸𑀭𑁂𑀦 𑀲𑀜𑁆𑀜𑀻 𑀢𑀣𑀲𑀜𑁆𑀜𑀻 𑀭𑀲𑁆𑀲𑀯𑀲𑁂𑀦. 𑀢𑀲𑁆𑀲 𑀪𑀸𑀯𑁄 𑀢𑀣𑀲𑀜𑁆𑀜𑀺𑀢𑀸, 𑀬𑀣𑀸𑀯𑀼𑀢𑁆𑀢𑀆𑀧𑀢𑁆𑀢𑀸𑀤𑀺𑀲𑀜𑁆𑀜𑀺𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘-𑀓𑀸𑀭𑁄 𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁄. 𑀓𑀫𑀦𑀁 𑀧𑀢𑁆𑀣𑀦𑀁 𑀓𑀸𑀫𑁄, 𑀙𑀸𑀤𑁂𑀢𑀼𑀁 𑀓𑀸𑀫𑁄 𑀙𑀸𑀤𑁂𑀢𑀼𑀓𑀸𑀫𑁄. 𑀇𑀢𑀺 𑀬𑀣𑀸𑀯𑀼𑀢𑁆𑀢𑀸 𑀦𑀯, 𑀅𑀣 𑀙𑀸𑀤𑀦𑀸 𑀘𑀸𑀢𑀺 𑀏𑀯𑀁 𑀤𑀲 𑀘 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀘𑀸𑀢𑀺, 𑀢𑁂𑀳𑀺. 𑀅𑀭𑀼𑀡𑀼𑀕𑁆𑀕𑀫𑀫𑁆𑀳𑀺 𑀅𑀭𑀼𑀡𑀲𑀗𑁆𑀔𑀸𑀢𑀲𑁆𑀲 𑀧𑀞𑀫𑀩𑀸𑀮𑀲𑀽𑀭𑀺𑀬𑀭𑀁𑀲𑀺𑀦𑁄 𑀉𑀕𑁆𑀕𑀫𑀦𑁂 𑀲𑀢𑀺 𑀙𑀦𑁆𑀦𑀸 𑀳𑁄𑀢𑀺, 𑀆𑀧𑀢𑁆𑀢𑀻𑀢𑀺 𑀲𑁂𑀲𑁄.

𑀢𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑁄 𑀪𑀺𑀓𑁆𑀔𑀼 𑀭𑀸𑀚𑀘𑁄𑀭𑀅𑀕𑁆𑀕𑀺𑀉𑀤𑀓𑀫𑀦𑀼𑀲𑁆𑀲𑀅𑀫𑀦𑀼𑀲𑁆𑀲𑀯𑀸𑀴𑀲𑀭𑀻𑀲𑀧𑀚𑀻𑀯𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑀸𑀦𑀁 𑀤𑀲𑀦𑁆𑀦𑀫𑁂𑀓𑀲𑁆𑀲𑀸𑀧𑀺 𑀦𑀢𑁆𑀣𑀺𑀢𑀸𑀬 𑀅𑀦𑀦𑁆𑀢𑀭𑀸𑀬𑀺𑀓𑁄 𑀲𑀫𑀸𑀦𑁄 𑀅𑀦𑀦𑁆𑀢𑀭𑀸𑀬𑀺𑀓𑀲𑀜𑁆𑀜𑀻 𑀳𑀼𑀢𑁆𑀯𑀸 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀜𑁆𑀘𑁂𑀯 𑀆𑀭𑁄𑀘𑁂𑀢𑀼𑀜𑁆𑀘 𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀧𑀳𑀼 𑀲𑀫𑀸𑀦𑁄 𑀧𑀳𑀼𑀲𑀜𑁆𑀜𑀻 𑀳𑀼𑀢𑁆𑀯𑀸 𑀢𑀺𑀯𑀺𑀥𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀸𑀓𑀭𑀡𑁂𑀦 𑀅𑀦𑀼𑀓𑁆𑀔𑀺𑀢𑁆𑀢𑁄 𑀲𑀫𑀸𑀦𑁄 𑀅𑀦𑀼𑀓𑁆𑀔𑀺𑀢𑁆𑀢𑀲𑀜𑁆𑀜𑀻 𑀳𑀼𑀢𑁆𑀯𑀸 𑀕𑀭𑀼𑀓𑀸𑀧𑀢𑁆𑀢𑀻𑀢𑀺 𑀲𑀜𑁆𑀜𑀻 𑀕𑀭𑀼𑀓𑀁𑀬𑁂𑀯 𑀆𑀧𑀢𑁆𑀢𑀺𑀁 𑀙𑀸𑀤𑁂𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀙𑀸𑀤𑁂𑀢𑀺, 𑀢𑀲𑁆𑀲𑀸𑀬𑀁 𑀆𑀧𑀢𑁆𑀢𑀺 𑀘 𑀙𑀦𑁆𑀦𑀸 𑀳𑁄𑀢𑀻𑀢𑀺. 𑀲𑀘𑁂 𑀧𑀦𑁂𑀢𑁆𑀣 𑀅𑀦𑀸𑀧𑀢𑁆𑀢𑀺𑀲𑀜𑁆𑀜𑀻 𑀯𑀸 𑀳𑁄𑀢𑀺 𑀅𑀜𑁆𑀜𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀲𑀜𑁆𑀜𑀻 𑀯𑀸 𑀯𑁂𑀫𑀢𑀺𑀓𑁄 𑀯𑀸, 𑀅𑀘𑁆𑀙𑀦𑁆𑀦𑀸 𑀳𑁄𑀦𑁆𑀢𑀺. 𑀆𑀭𑁄𑀘𑁂𑀦𑁆𑀢𑁂𑀦 𑀧𑀦 ‘‘𑀫𑀫 𑀏𑀓𑀸𑀧𑀢𑁆𑀢𑀺𑀁 𑀆𑀧𑀦𑁆𑀦𑀪𑀸𑀯𑀁 𑀚𑀸𑀦𑀸𑀳𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀭𑁄𑀘𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀯𑀢𑁆𑀣𑀼𑀲𑀪𑀸𑀕𑀸𑀧𑀢𑁆𑀢𑀺𑀓𑀲𑁆𑀲 𑀆𑀭𑁄𑀘𑁂𑀢𑀺, 𑀢𑀸𑀯 𑀢𑀧𑁆𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺.

𑀲𑀗𑁆𑀖𑀸𑀤𑀺𑀲𑁂𑀲𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀘𑀻𑀯𑀭𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁦. ‘‘𑀔𑁄𑀫𑀜𑁆𑀘 𑀓𑁄𑀲𑁂𑀬𑁆𑀬𑀜𑁆𑀘𑀸’’𑀢𑀺𑀆𑀤𑀺𑀦𑀸 𑀦𑀧𑀼𑀁𑀲𑀓𑀯𑀺𑀕𑁆𑀕𑀳𑁂𑀦 𑀤𑁆𑀯𑀦𑁆𑀤𑁂 𑀓𑀢𑁂 𑀔𑁄𑀫…𑀧𑁂… 𑀪𑀗𑁆𑀕𑀸𑀦𑀺. 𑀢𑀢𑁆𑀣 𑀔𑁄𑀫𑀦𑁆𑀢𑀺 𑀕𑀘𑁆𑀙𑀚𑀸𑀢𑀺. 𑀉𑀧𑀘𑀸𑀭𑀢𑁄 𑀧𑀦 𑀔𑁄𑀫𑁂𑀦 𑀔𑁄𑀫𑀲𑀼𑀢𑁆𑀢𑁂𑀦 𑀯𑀸𑀬𑀺𑀢𑀦𑁆𑀢𑀺 𑀢𑀤𑁆𑀥𑀺𑀢𑁂𑀦 𑀉𑀧𑀘𑀸𑀭𑁂𑀦 𑀯𑀸 𑀔𑁄𑀫𑀁 𑀔𑁄𑀫𑀧𑀝𑀘𑀻𑀯𑀭𑀁, 𑀢𑀣𑀸 𑀅𑀯𑀲𑁂𑀲𑀸𑀦𑀺. 𑀲𑀸𑀡𑀁 𑀲𑀸𑀡𑀯𑀸𑀓𑀲𑀼𑀢𑁆𑀢𑁂𑀳𑀺 𑀯𑀸𑀬𑀺𑀢𑀁 𑀘𑀻𑀯𑀭𑀁. 𑀪𑀗𑁆𑀕𑀁 𑀔𑁄𑀫𑀲𑀼𑀢𑁆𑀢𑀸𑀤𑀻𑀦𑀺 𑀲𑀩𑁆𑀩𑀸𑀦𑀺 𑀏𑀓𑀘𑁆𑀘𑀸𑀦𑀺 𑀯𑀸 𑀯𑁄𑀫𑀺𑀲𑁆𑀲𑁂𑀢𑁆𑀯𑀸 𑀯𑀸𑀬𑀺𑀢𑀘𑀻𑀯𑀭𑀁. 𑀯𑀸𑀓𑀫𑀬𑀫𑁂𑀯 𑀯𑀸𑀢𑀺 𑀓𑁂𑀘𑀺. 𑀓𑀫𑁆𑀩𑀮𑀦𑁆𑀢𑀺 𑀫𑀦𑀼𑀲𑁆𑀲𑀮𑁄𑀫𑀁 𑀯𑀸𑀴𑀮𑁄𑀫𑀜𑁆𑀘 𑀞𑀧𑁂𑀢𑁆𑀯𑀸 𑀲𑁂𑀲𑀮𑁄𑀫𑁂𑀳𑀺 𑀯𑀸𑀬𑀺𑀢𑀁. 𑀏𑀢𑀸𑀦𑀻𑀢𑀺 𑀔𑁄𑀫𑀸𑀤𑀻𑀦𑀺 𑀬𑀣𑀸𑀯𑀼𑀢𑁆𑀢𑀸𑀦𑀺. 𑀲𑀳 𑀅𑀦𑀼𑀮𑁄𑀫𑁂𑀳𑀻𑀢𑀺 𑀲𑀸𑀦𑀼𑀮𑁄𑀫𑀸𑀦𑀺. 𑀚𑀸𑀢𑀺𑀢𑁄 𑀓𑀧𑁆𑀧𑀺𑀬𑀸𑀦𑀺 𑀙 𑀘𑀻𑀯𑀭𑀸𑀦𑀺 𑀪𑀯𑀦𑁆𑀢𑀺.

𑁩𑁧. 𑀇𑀤𑀸𑀦𑀺 ‘‘𑀤𑀼𑀓𑀽𑀮’’𑀦𑁆𑀢𑀺𑀆𑀤𑀺𑀦𑀸 𑀢𑁂𑀲𑀁 𑀅𑀦𑀼𑀮𑁄𑀫𑀸𑀦𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀤𑀼𑀓𑀽𑀮𑀦𑁆𑀢𑀺 𑀤𑀼𑀓𑀽𑀮𑀲𑀗𑁆𑀔𑀸𑀢𑁂𑀦 𑀓𑁂𑀦𑀘𑀺 𑀯𑀸𑀓𑀯𑀺𑀲𑁂𑀲𑁂𑀦 𑀯𑀸𑀬𑀺𑀢𑀁 𑀘𑀻𑀯𑀭𑀁. 𑀘𑁂𑀯𑀸𑀢𑀺 𑀲𑀫𑀼𑀘𑁆𑀘𑀬𑁂, 𑀲𑁄 𑀉𑀧𑀭𑀺 𑀆𑀓𑀟𑁆𑀠𑀺𑀢𑀩𑁆𑀩𑁄. 𑀧𑀝𑁆𑀝𑀼𑀡𑁆𑀡𑀦𑁆𑀢𑀺 𑀧𑀝𑁆𑀝𑀼𑀡𑁆𑀡𑁂𑀲𑀼 𑀚𑀸𑀢𑀁 𑀧𑀝𑁆𑀝𑀼𑀡𑁆𑀡𑀁. 𑀤𑁂𑀲𑀯𑀸𑀘𑀺𑀦𑁄 𑀩𑀳𑀼𑀯𑀘𑀦𑀦𑁆𑀢𑀸𑀢𑀺 𑀩𑀳𑀼𑀯𑀘𑀦𑁂𑀦 𑀯𑀺𑀕𑁆𑀕𑀳𑁄. 𑀢𑀣𑀸 𑀲𑁄𑀫𑀸𑀭𑀸 𑀘 𑀘𑀻𑀦𑀸 𑀘, 𑀢𑁂𑀲𑀼 𑀚𑀸𑀢𑀁 𑀲𑁄𑀫𑀸𑀭𑀘𑀻𑀦𑀚𑀁. 𑀇𑀫𑀸𑀦𑀺 𑀢𑀻𑀡𑀺 𑀧𑀸𑀡𑀓𑁂𑀳𑀺 𑀓𑀢𑀲𑀼𑀢𑁆𑀢𑀫𑀬𑀸𑀦𑀺. 𑀏𑀳𑀺𑀪𑀺𑀓𑁆𑀔𑀽𑀦𑀁 𑀧𑀼𑀜𑁆𑀜𑀺𑀤𑁆𑀥𑀺𑀬𑀸 𑀚𑀸𑀢𑀁 𑀇𑀤𑁆𑀥𑀺𑀚𑀁, 𑀢𑀁 𑀧𑀦 𑀔𑁄𑀫𑀸𑀤𑀻𑀦𑀁 𑀅𑀜𑁆𑀜𑀢𑀭𑀁. 𑀤𑁂𑀯𑀤𑀺𑀦𑁆𑀦𑀦𑁆𑀢𑀺 𑀤𑁂𑀯𑁂𑀳𑀺 𑀤𑀺𑀦𑁆𑀦𑀁 𑀓𑀧𑁆𑀧𑀭𑀼𑀓𑁆𑀔𑁂 𑀦𑀺𑀩𑁆𑀩𑀢𑁆𑀢𑀁 𑀘𑀻𑀯𑀭𑀁. 𑀢𑀤𑁂𑀢𑀁 𑀤𑀼𑀓𑀽𑀮𑀸𑀤𑀺 𑀢𑀲𑁆𑀲 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁆𑀲 𑀔𑁄𑀫𑀸𑀤𑀺𑀦𑁄 𑀅𑀦𑀼𑀮𑁄𑀫𑀺𑀓𑀁 𑀳𑁄𑀢𑀺. 𑀢𑀢𑁆𑀣 𑀮𑁄𑀫𑀸𑀦𑀺 𑀅𑀦𑀼𑀕𑀢𑀁 𑀅𑀦𑀼𑀮𑁄𑀫𑀁, 𑀬𑀣𑀸 𑀲𑁂𑀲𑀮𑁄𑀫𑀸𑀦𑀺 𑀅𑀦𑀼𑀕𑀢𑀁 𑀮𑁄𑀫𑀁 𑀢𑀤𑀦𑀼𑀓𑀽𑀮𑀢𑁆𑀢𑀸 ‘‘𑀅𑀦𑀼𑀮𑁄𑀫’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀣𑀸 𑀢𑀁𑀚𑀸𑀢𑀺𑀬𑀓𑀁 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀅𑀦𑀼𑀓𑀽𑀮𑀁 𑀲𑀩𑁆𑀩𑀫𑁆𑀧𑀺 𑀭𑀼𑀴𑁆𑀳𑀻𑀯𑀲𑁂𑀦 ‘‘𑀅𑀦𑀼𑀮𑁄𑀫’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀫𑁂𑀯 𑀅𑀦𑀼𑀮𑁄𑀫𑀺𑀓𑀁, 𑀅𑀦𑀼𑀓𑀽𑀮𑀦𑁆𑀢𑀺 𑀅𑀢𑁆𑀣𑁄. 𑀓𑀣𑀁? 𑀤𑀼𑀓𑀽𑀮𑀁 𑀲𑀸𑀡𑀲𑁆𑀲 𑀅𑀦𑀼𑀮𑁄𑀫𑀁, 𑀧𑀝𑁆𑀝𑀼𑀡𑁆𑀡𑀸𑀤𑀻𑀦𑀺 𑀢𑀻𑀡𑀺 𑀓𑁄𑀲𑁂𑀬𑁆𑀬𑀲𑁆𑀲 𑀅𑀦𑀼𑀮𑁄𑀫𑀸𑀦𑀺, 𑀇𑀤𑁆𑀥𑀺𑀚𑀁 𑀤𑁂𑀯𑀤𑀺𑀦𑁆𑀦𑀜𑁆𑀘 𑀔𑁄𑀫𑀸𑀤𑀻𑀦𑀫𑀦𑀼𑀮𑁄𑀫𑀦𑁆𑀢𑀺.

𑁩𑁨-𑁩. 𑀏𑀯𑀁 𑀲𑀸𑀦𑀼𑀮𑁄𑀫𑀸𑀦𑀺 𑀘𑀻𑀯𑀭𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀥𑀺𑀝𑁆𑀞𑀸𑀦𑀸𑀤𑀺𑀓𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀺𑀘𑀻𑀯𑀭’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀯𑀼𑀢𑁆𑀢𑁂𑀧𑀺 𑀅𑀯𑀲𑁆𑀲𑀁 𑀯𑀢𑁆𑀢𑀩𑁆𑀩𑀢𑀸𑀬 𑀲𑀩𑁆𑀩𑀢𑁆𑀣 𑀘-𑀲𑀤𑁆𑀤𑁄 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑁄, 𑀢𑀺𑀘𑀻𑀯𑀭𑀜𑁆𑀘…𑀧𑁂… 𑀓𑀡𑁆𑀟𑀼𑀘𑁆𑀙𑀸𑀤𑀺𑀜𑁆𑀘 𑀅𑀥𑀺𑀝𑁆𑀞𑁂𑀬𑁆𑀬 𑀦 𑀯𑀺𑀓𑀧𑁆𑀧𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀲𑀫𑀸𑀳𑀸𑀭𑁄 𑀢𑀺𑀘𑀻𑀯𑀭𑀁. 𑀧𑀭𑀺𑀓𑁆𑀔𑀸𑀭𑀜𑁆𑀘 𑀢𑀁 𑀘𑁄𑀴𑀜𑁆𑀘𑀸𑀢𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀁. 𑀯𑀲𑁆𑀲𑀲𑁆𑀲 𑀬𑁄𑀕𑁆𑀕𑀸 𑀯𑀲𑁆𑀲𑀺𑀓𑀸, 𑀲𑀸𑀯 𑀲𑀸𑀝𑀺𑀓𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸. 𑀧𑀼𑀜𑁆𑀙𑀢𑀺 𑀅𑀦𑁂𑀦𑀸𑀢𑀺 𑀧𑀼𑀜𑁆𑀙𑀦𑀁, 𑀫𑀼𑀔𑀲𑁆𑀲 𑀧𑀼𑀜𑁆𑀙𑀦𑀁 𑀫𑀼𑀔𑀧𑀼𑀜𑁆𑀙𑀦𑀁. 𑀦𑀺𑀲𑀻𑀤𑀦𑁆𑀢𑀺 𑀏𑀢𑁆𑀣𑀸𑀢𑀺 𑀦𑀺𑀲𑀻𑀤𑀦𑀁, 𑀫𑀼𑀔𑀧𑀼𑀜𑁆𑀙𑀦𑀜𑁆𑀘 𑀦𑀺𑀲𑀻𑀤𑀦𑀜𑁆𑀘 𑀫𑀼𑀔𑀧𑀼𑀜𑁆𑀙𑀦𑀦𑀺𑀲𑀻𑀤𑀦𑀁. 𑀲𑀬𑀦𑀲𑀼𑀔𑀸𑀤𑀺𑀁 𑀧𑀝𑀺𑀘𑁆𑀘 𑀅𑀢𑁆𑀣𑀭𑀻𑀬𑀢𑀻𑀢𑀺 𑀧𑀘𑁆𑀘𑀢𑁆𑀣𑀭𑀡𑀁, 𑀢𑀤𑁂𑀯 𑀧𑀘𑁆𑀘𑀢𑁆𑀣𑀭𑀡𑀓𑀁. 𑀓𑀡𑁆𑀟𑀼𑀁 𑀙𑀸𑀤𑁂𑀢𑀻𑀢𑀺 𑀓𑀡𑁆𑀟𑀼𑀘𑁆𑀙𑀸𑀤𑀺. 𑀅𑀥𑀺𑀝𑁆𑀞𑀳𑁂𑀢𑀺 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀯𑀦𑁆𑀦𑀁 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀅𑀥𑀺𑀝𑁆𑀞𑁂𑀬𑁆𑀬. 𑀦 𑀯𑀺𑀓𑀧𑁆𑀧𑁂𑀬𑁆𑀬𑀸𑀢𑀺 𑀢𑀲𑁆𑀲 𑀢𑀲𑁆𑀲 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀦 𑀯𑀺𑀓𑀧𑁆𑀧𑁂𑀬𑁆𑀬, 𑀢𑀲𑁆𑀲 𑀢𑀲𑁆𑀲 𑀧𑀦 𑀦𑀸𑀫𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀇𑀫𑀁 𑀘𑀻𑀯𑀭𑀁 𑀢𑀼𑀬𑁆𑀳𑀁 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀯𑀺𑀓𑀧𑁆𑀧𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣𑀸𑀢𑀺 𑀇𑀫𑁂𑀲𑀼 𑀦𑀯𑀲𑀼 𑀘𑀻𑀯𑀭𑁂𑀲𑀼. 𑀢𑀺𑀘𑀻𑀯𑀭𑀦𑁆𑀢𑀺 𑀢𑀺𑀘𑀻𑀯𑀭𑀦𑀸𑀫𑁂𑀦 𑀅𑀥𑀺𑀝𑁆𑀞𑀺𑀢𑀁. 𑀢𑀣𑀸 𑀳𑀺 𑀅𑀥𑀺𑀝𑁆𑀞𑀸𑀦𑀢𑁄 𑀧𑀼𑀩𑁆𑀩𑁂 𑀯𑀺𑀲𑀼𑀁 𑀢𑀺𑀘𑀻𑀯𑀭𑀁 𑀦𑀸𑀫 𑀦𑀢𑁆𑀣𑀺 𑀲𑀗𑁆𑀖𑀸𑀝𑀺𑀆𑀤𑀺𑀧𑁆𑀧𑀳𑁄𑀦𑀓𑀲𑁆𑀲 𑀧𑀘𑁆𑀘𑀢𑁆𑀣𑀭𑀡𑀸𑀤𑀺𑀯𑀲𑁂𑀦𑀸𑀧𑀺 𑀅𑀥𑀺𑀝𑁆𑀞𑀸𑀢𑀼𑀁 𑀅𑀦𑀼𑀜𑁆𑀜𑀸𑀢𑀢𑁆𑀢𑀸. 𑀢𑀁 𑀯𑀺𑀦𑀸 𑀏𑀓𑀸𑀳𑀁 𑀏𑀓𑀤𑀺𑀯𑀲𑀫𑁆𑀧𑀺. 𑀦 𑀯𑀲𑁂𑀬𑁆𑀬𑀸𑀢𑀺 𑀅𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑁄 𑀪𑀺𑀓𑁆𑀔𑀼 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀢𑁄 𑀅𑀜𑁆𑀜𑀢𑁆𑀣 𑀯𑀸𑀲𑀁 𑀦 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀢𑀺 𑀢𑀺𑀘𑀻𑀯𑀭𑀜𑁆𑀘 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁 𑀳𑁄𑀢𑀺, 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻𑀢𑀺 𑀤𑀻𑀧𑁂𑀢𑀺. 𑀦𑀺𑀲𑀻𑀤𑀦𑀁 𑀯𑀺𑀦𑀸 𑀘𑀸𑀢𑀼𑀫𑀸𑀲𑀁 𑀦 𑀯𑀲𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀲𑀫𑀸𑀳𑀸𑀭𑁄 𑀘𑀢𑀼𑀫𑀸𑀲𑀁, 𑀢𑀫𑁂𑀯 𑀘𑀸𑀢𑀼𑀫𑀸𑀲𑀁. 𑀢𑀁 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀯𑀲𑁂𑀦.

𑁩𑁪. 𑀇𑀤𑀸𑀦𑀺 ‘‘𑀇𑀫’’𑀦𑁆𑀢𑀺𑀆𑀤𑀺𑀦𑀸 ‘‘𑀅𑀥𑀺𑀝𑁆𑀞𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀫𑀥𑀺𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀺. 𑀲𑀗𑁆𑀖𑀸𑀝𑀺𑀁 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀅𑀥𑀺𑀝𑁆𑀞𑀳𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀅𑀥𑀺𑀝𑁆𑀞𑀳𑁂𑀢𑀺 𑀳𑀢𑁆𑀣𑀧𑀸𑀲𑁂 𑀞𑀺𑀢𑀁 𑀏𑀯𑀁 𑀅𑀥𑀺𑀝𑁆𑀞𑁂𑀬𑁆𑀬. 𑀅𑀳𑀢𑁆𑀣𑀧𑀸𑀲𑀦𑁆𑀢𑀺 𑀳𑀢𑁆𑀣𑀲𑁆𑀲 𑀧𑀸𑀲𑁄 𑀲𑀫𑀻𑀧𑁄 𑀳𑀢𑁆𑀣𑀧𑀸𑀲𑁄, 𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑀩𑁆𑀪𑀦𑁆𑀢𑀭𑁄. 𑀤𑁆𑀯𑀸𑀤𑀲𑀳𑀢𑁆𑀣𑀩𑁆𑀪𑀦𑁆𑀢𑀭𑁄𑀢𑀺𑀧𑀺 𑀯𑀤𑀦𑁆𑀢𑀺. 𑀦𑀢𑁆𑀣𑀺 𑀳𑀢𑁆𑀣𑀧𑀸𑀲𑁄 𑀏𑀢𑀺𑀲𑁆𑀲𑀸𑀢𑀺 𑀅𑀳𑀢𑁆𑀣𑀧𑀸𑀲𑀸, 𑀢𑀁 𑀏𑀢𑀦𑁆𑀢𑀺 𑀅𑀥𑀺𑀝𑁆𑀞𑀳𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀅𑀦𑁆𑀢𑁄𑀕𑀩𑁆𑀪𑁂 𑀯𑀸 𑀉𑀧𑀭𑀺𑀧𑀸𑀲𑀸𑀤𑁂 𑀯𑀸 𑀢𑀤𑀳𑁂𑀯 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀦𑀬𑁄𑀕𑁆𑀕𑁂 𑀧𑀤𑁂𑀲𑁂 𑀯𑀸 𑀞𑀺𑀢𑀁 𑀘𑀻𑀯𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀏𑀢𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀅𑀥𑀺𑀝𑁆𑀞𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁄 𑀤𑀽𑀭𑁂 𑀞𑀺𑀢𑀫𑁆𑀧𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀲𑁂𑀲𑁂𑀲𑀼𑀧𑀻𑀢𑀺 𑀉𑀢𑁆𑀢𑀭𑀸𑀲𑀗𑁆𑀕𑀸𑀤𑀺𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀧𑀭𑀺𑀬𑀦𑁆𑀢𑁂𑀲𑀼𑀧𑀺 𑀅𑀯𑀲𑁂𑀲𑀘𑀻𑀯𑀭𑁂𑀲𑀼. 𑀅𑀬𑀁 𑀦𑀬𑁄𑀢𑀺 𑀅𑀬𑀫𑁂𑀯 𑀦𑀬𑁄. 𑀬𑀣𑀸 𑀲𑀗𑁆𑀖𑀸𑀝𑀺𑀬𑀸, 𑀏𑀯𑀁 ‘‘𑀇𑀫𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑁄𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀥𑀺𑀝𑁆𑀞𑀳𑀦𑁆𑀢𑁂𑀦 𑀧𑀦 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀓𑀸𑀬𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑁂𑀦 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀘𑀺𑀢𑁆𑀢𑁂𑀦 𑀆𑀪𑁄𑀕𑀁 𑀓𑀢𑁆𑀯𑀸 𑀓𑀸𑀬𑁂𑀦 𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀁, 𑀯𑀘𑀻𑀪𑁂𑀤𑀫𑀢𑁆𑀢𑀁 𑀓𑀢𑁆𑀯𑀸 𑀯𑀸𑀘𑀸𑀬 𑀯𑀸. 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀦𑀸𑀫 𑀧𑀸𑀝𑁂𑀓𑁆𑀓𑀁 𑀦𑀺𑀥𑀸𑀦𑀫𑀼𑀔𑀦𑁆𑀢𑀺 𑀢𑀺𑀘𑀻𑀯𑀭𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀫𑁆𑀧𑀺 𑀅𑀥𑀺𑀝𑁆𑀞𑀸𑀢𑀼𑀁 𑀯𑀝𑁆𑀝𑀢𑀻𑀢𑀺.

𑁩𑁫. 𑀇𑀤𑀸𑀦𑀺 𑀏𑀯𑀁 𑀅𑀥𑀺𑀝𑁆𑀞𑀳𑀢𑁄 𑀅𑀜𑁆𑀜𑀁 𑀮𑀤𑁆𑀥𑀸 𑀅𑀥𑀺𑀝𑁆𑀞𑀸𑀢𑀼𑀓𑀸𑀫𑁂𑀦 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀥𑀺𑀝𑁆𑀞𑀳𑀦𑁆𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀗𑁆𑀖𑀸𑀝𑀺 𑀧𑀪𑀼𑀢𑀺 𑀆𑀤𑀺 𑀬𑀲𑁆𑀲 𑀢𑀁 𑀲𑀗𑁆𑀖𑀸𑀝𑀺𑀧𑁆𑀧𑀪𑀼𑀢𑀺. 𑀏𑀢𑀁 ‘‘𑀅𑀥𑀺𑀝𑁆𑀞𑀳𑀦𑁆𑀢𑁄’’𑀢𑀺 𑀏𑀢𑁆𑀣𑀸𑀧𑀺 ‘‘𑀅𑀥𑀺𑀝𑁆𑀞𑁂𑀬𑁆𑀬𑀸’’𑀢𑀺 𑀏𑀢𑁆𑀣𑀸𑀧𑀺 𑀓𑀫𑁆𑀫𑀧𑀤𑀁, ‘‘𑀧𑀼𑀩𑁆𑀩𑀘𑀻𑀯𑀭’’𑀦𑁆𑀢𑀺 𑀏𑀢𑁆𑀣 𑀧𑀦 𑀯𑀺𑀲𑁂𑀲𑀦𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸𑀢𑀺 𑀧𑀭𑀺𑀘𑁆𑀘𑀚𑀺𑀢𑁆𑀯𑀸. 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑀸𑀫𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀞𑀧𑀺𑀢𑀯𑀢𑁆𑀣𑁂𑀳𑀺 𑀲𑀗𑁆𑀖𑀸𑀝𑀺𑀆𑀤𑀻𑀦𑀺 𑀓𑀭𑁄𑀢𑀺, 𑀦𑀺𑀝𑁆𑀞𑀺𑀢𑁂 𑀭𑀚𑀦𑁂 𑀘 𑀓𑀧𑁆𑀧𑁂 𑀘 𑀇𑀫𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀦𑀺. 𑀧𑀢𑁆𑀢𑀸𑀥𑀺𑀝𑁆𑀞𑀳𑀦𑁂𑀢𑀺 𑀧𑀢𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑁂. 𑀢𑀣𑀸𑀢𑀺 𑀘 𑀬𑀣𑀸 𑀘𑀻𑀯𑀭𑁂, 𑀢𑀣𑀸 𑀧𑀢𑁆𑀢𑁂𑀧𑀺 𑀅𑀥𑀺𑀝𑁆𑀞𑀸𑀦𑀸𑀤𑀺𑀓𑀁 𑀲𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀧𑀦 ‘‘𑀇𑀫𑀁 𑀧𑀢𑁆𑀢𑀁, 𑀏𑀢𑀁 𑀧𑀢𑁆𑀢’’𑀦𑁆𑀢𑀺 𑀯𑀸 𑀯𑀺𑀲𑁂𑀲𑁄.

𑁩𑁬. 𑀇𑀤𑀸𑀦𑀺 𑀧𑀘𑁆𑀘𑀼𑀤𑁆𑀥𑀸𑀭𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀫𑀁 𑀯 𑀇𑀢𑀺 𑀯𑀸-𑀲𑀤𑁆𑀤𑁄 𑀭𑀲𑁆𑀲𑀁 𑀓𑀢𑁆𑀯𑀸 𑀦𑀺𑀤𑁆𑀤𑀺𑀝𑁆𑀞𑁄, 𑀲𑁄 𑀇𑀢𑀺-𑀲𑀤𑁆𑀤𑀢𑁄 𑀧𑀭𑀁 𑀬𑁄𑀚𑁂𑀢𑀩𑁆𑀩𑁄, 𑀢𑀲𑁆𑀫𑀸 ‘‘𑀏𑀢𑀁 𑀲𑀗𑁆𑀖𑀸𑀝𑀺𑀁 𑀧𑀘𑁆𑀘𑀼𑀤𑁆𑀥𑀭𑀸𑀫𑀻’’𑀢𑀺 𑀯𑀸 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀧𑀘𑁆𑀘𑀼𑀤𑁆𑀥𑀭𑀸𑀫𑀻’’𑀢𑀺 𑀯𑀸 𑀲𑀁𑀲𑁂𑀢𑀺 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀁𑀲𑁂𑀢𑀺 𑀯𑀤𑁂𑀬𑁆𑀬. 𑀏𑀯𑀦𑁆𑀢𑀺 𑀬𑀣𑀸 𑀦𑀸𑀫𑁂𑀦 𑀲𑀗𑁆𑀖𑀸𑀝𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀸, 𑀢𑀣𑀸 𑀉𑀢𑁆𑀢𑀭𑀸𑀲𑀗𑁆𑀕𑀸𑀤𑀻𑀦𑀻𑀢𑀺 𑀅𑀢𑁆𑀣𑁄. 𑀯𑀺𑀤𑀽𑀢𑀺 𑀧𑀘𑁆𑀘𑀼𑀤𑁆𑀥𑀭𑁂𑀢𑀺𑀫𑀲𑁆𑀲 𑀓𑀢𑁆𑀢𑀼𑀧𑀤𑀁, 𑀧𑀜𑁆𑀜𑀯𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀢𑁆𑀣𑀸𑀧𑀺 𑀤𑀽𑀭𑀸𑀲𑀦𑁆𑀦𑀢𑀸𑀤𑀻 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸.

𑁩𑁭-𑁮. 𑀇𑀤𑀸𑀦𑀺 𑀲𑀗𑁆𑀖𑀸𑀝𑀺𑀆𑀤𑀻𑀦𑀁 𑀙𑀦𑁆𑀦𑀁 𑀧𑀫𑀸𑀡𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑀺 ‘‘𑀲𑀗𑁆𑀖𑀸𑀝𑀻’’𑀢𑀺𑀆𑀤𑀺𑀦𑀸. 𑀧𑀘𑁆𑀙𑀺𑀫𑁄 𑀅𑀦𑁆𑀢𑁄 𑀧𑀘𑁆𑀙𑀺𑀫𑀦𑁆𑀢𑁄, 𑀢𑁂𑀦, 𑀧𑀘𑁆𑀙𑀺𑀫𑀓𑁄𑀝𑀺𑀬𑀸𑀢𑀺 𑀅𑀢𑁆𑀣𑁄. 𑀤𑀻𑀖𑀲𑁄𑀢𑀺 𑀤𑀻𑀖𑀢𑁄. 𑀫𑀼𑀝𑁆𑀞𑀺𑀬𑀸 𑀲𑀳𑀺𑀢𑀁 𑀧𑀜𑁆𑀘𑀓𑀁 𑀬𑀲𑁆𑀲𑀸 𑀲𑀸 𑀫𑀼𑀝𑁆𑀞𑀺𑀧𑀜𑁆𑀘𑀓𑀸, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀧𑀦 𑀫𑀼𑀝𑁆𑀞𑀺𑀧𑀜𑁆𑀘𑀓𑁄. 𑀫𑀼𑀝𑁆𑀞𑀺-𑀲𑀤𑁆𑀤𑁂𑀦𑁂𑀢𑁆𑀣 𑀉𑀧𑀘𑀸𑀭𑀯𑀲𑁂𑀦 𑀓𑀢𑀫𑀼𑀝𑁆𑀞𑀺𑀓𑁄 𑀳𑀢𑁆𑀣𑁄𑀯 𑀯𑀼𑀢𑁆𑀢𑁄. 𑀲𑀼𑀕𑀢𑀲𑁆𑀲 𑀘𑀻𑀯𑀭𑀢𑁄 𑀊𑀦𑀸𑀢𑀺 𑀲𑀫𑀸𑀲𑁄. 𑀅𑀧𑀻𑀢𑀺 𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑁂, 𑀢𑁂𑀦 𑀬𑀣𑀸𑀯𑀼𑀢𑁆𑀢𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀸 𑀘 𑀅𑀬𑀜𑁆𑀘 𑀉𑀢𑁆𑀢𑀫𑀧𑁆𑀧𑀫𑀸𑀡𑀸𑀢𑀺 𑀅𑀢𑁆𑀣𑁄. ‘‘𑀧𑀘𑁆𑀙𑀺𑀫𑀦𑁆𑀢𑁂𑀦𑀸’’𑀢𑀺 𑀇𑀤𑀁 𑀫𑀼𑀝𑁆𑀞𑀺𑀢𑁆𑀢𑀺𑀓𑀜𑁆𑀘 𑀢𑀺𑀭𑀺𑀬𑀦𑁆𑀢𑀺 𑀏𑀢𑁆𑀣𑀸𑀧𑀺 𑀅𑀦𑀼𑀯𑀢𑁆𑀢𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀘-𑀲𑀤𑁆𑀤𑁄 ‘‘𑀉𑀢𑁆𑀢𑀫𑀦𑁆𑀢𑁂𑀦 𑀲𑀼𑀕𑀢𑀘𑀻𑀯𑀭𑀽𑀦𑀸𑀧𑀺 𑀯𑀝𑁆𑀝𑀢𑀻’’𑀢𑀺 𑀇𑀤𑀁 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀢𑀢𑁆𑀣 𑀇𑀤𑀸𑀦𑀺 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑀺𑀲𑁆𑀲𑁄 𑀯𑀺𑀤𑀢𑁆𑀣𑀺𑀬𑁄 𑀏𑀓𑀸 𑀲𑀼𑀕𑀢𑀯𑀺𑀤𑀢𑁆𑀣𑀺, 𑀢𑀸𑀬 𑀯𑀺𑀤𑀢𑁆𑀣𑀺𑀬𑀸 𑀦𑀯 𑀯𑀺𑀤𑀢𑁆𑀣𑀺𑀬𑁄 𑀤𑀻𑀖𑀢𑁄 𑀲𑀼𑀕𑀢𑀘𑀻𑀯𑀭𑀧𑁆𑀧𑀫𑀸𑀡𑀁, 𑀢𑀺𑀭𑀺𑀬𑀁 𑀙 𑀯𑀺𑀤𑀢𑁆𑀣𑀺𑀬𑁄, 𑀢𑀁 𑀧𑀦 𑀯𑀟𑁆𑀠𑀓𑀺𑀳𑀢𑁆𑀣𑁂𑀦 𑀤𑀻𑀖𑀢𑁄 𑀢𑁂𑀭𑀲 𑀳𑀢𑁆𑀣𑀸 𑀏𑀓𑀸 𑀘 𑀯𑀺𑀤𑀢𑁆𑀣𑀺, 𑀢𑀺𑀭𑀺𑀬𑀢𑁄 𑀦𑀯 𑀳𑀢𑁆𑀣𑀸 𑀳𑁄𑀦𑁆𑀢𑀺. 𑀢𑀁𑀯𑀲𑁂𑀦 𑀉𑀪𑀬𑀢𑁆𑀣 𑀊𑀦𑀢𑀸 𑀯𑀺𑀜𑁆𑀜𑀸𑀢𑀩𑁆𑀩𑀸.

𑀉𑀢𑁆𑀢𑀭𑀸𑀲𑀗𑁆𑀕𑁄𑀧𑀺 𑀢𑀢𑁆𑀢𑀓𑁄𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸 𑀏𑀓𑀁𑀲𑀺𑀓𑀲𑁆𑀲𑀧𑀻’’𑀢𑀺 𑀆𑀳. 𑀏𑀓𑁄 𑀅𑀁𑀲𑁄 𑀏𑀓𑀁𑀲𑁄, 𑀢𑀢𑁆𑀣 𑀓𑀸𑀢𑀩𑁆𑀩𑀦𑁆𑀢𑀺 𑀢𑀤𑁆𑀥𑀺𑀢𑁂 𑀏𑀓𑀁𑀲𑀺𑀓𑀁. ‘‘𑀅𑀦𑁆𑀢𑀭𑀯𑀸𑀲𑀓𑁄’’𑀘𑁆𑀘𑀸𑀤𑀺𑀦𑀸 𑀦𑀺𑀯𑀸𑀲𑀦𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀅𑀦𑁆𑀢𑀭𑀁 𑀫𑀚𑁆𑀛𑀧𑀤𑁂𑀲𑁄, 𑀅𑀦𑁆𑀢𑀭𑁂 𑀫𑀚𑁆𑀛𑁂 𑀓𑀝𑀺𑀧𑁆𑀧𑀤𑁂𑀲𑁂 𑀯𑀸𑀲𑁄 𑀯𑀢𑁆𑀣𑀁 𑀅𑀦𑁆𑀢𑀭𑀯𑀸𑀲𑁄, 𑀲𑁄𑀬𑁂𑀯 𑀅𑀦𑁆𑀢𑀭𑀯𑀸𑀲𑀓𑁄. 𑀘𑀸𑀧𑀻𑀢𑀺 𑀲𑀫𑀼𑀤𑀸𑀬𑁄, 𑀏𑀓𑁄 𑀯𑀸 𑀲𑀫𑀼𑀘𑁆𑀘𑀬𑁄. 𑀅𑀟𑁆𑀠𑁂𑀦 𑀢𑀢𑀺𑀬𑁄 𑀪𑀸𑀕𑁄 𑀅𑀟𑁆𑀠𑀢𑁂𑀬𑁆𑀬𑁄. 𑀏𑀢𑁆𑀣 𑀤𑁆𑀯𑀺𑀦𑁆𑀦𑀁 𑀳𑀢𑁆𑀣𑀓𑁄𑀝𑁆𑀞𑀸𑀲𑀸𑀦𑀁 𑀲𑀫𑁆𑀧𑀼𑀡𑁆𑀡𑀸𑀦𑀁 𑀢𑀢𑀺𑀬𑀓𑁄𑀝𑁆𑀞𑀸𑀲𑀲𑀁𑀲𑀺𑀚𑁆𑀛𑀦𑁂 𑀓𑀭𑀡𑀪𑀽𑀢𑀸 𑀅𑀟𑁆𑀠-𑀲𑀤𑁆𑀤𑀦𑀺𑀤𑁆𑀤𑀺𑀝𑁆𑀞𑀸 𑀬𑀸 𑀯𑀺𑀤𑀢𑁆𑀣𑀺, 𑀲𑀸𑀯 𑀢𑀢𑀺𑀬𑁄𑀢𑀺 𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀉𑀧𑀟𑁆𑀠𑀳𑀢𑁆𑀣𑀲𑀗𑁆𑀔𑀸𑀢𑁄 𑀢𑀢𑀺𑀬𑁄 𑀪𑀸𑀕𑁄 𑀅𑀟𑁆𑀠𑀢𑁂𑀬𑁆𑀬𑁄. 𑀲𑁄 𑀘 𑀦𑀸𑀦𑀦𑁆𑀢𑀭𑁂𑀦 𑀤𑁆𑀯𑀺𑀳𑀢𑁆𑀣𑀢𑀢𑀺𑀬𑀢𑀸 𑀮𑀩𑁆𑀪𑀢𑀻𑀢𑀺 𑀤𑁆𑀯𑁂 𑀳𑀢𑁆𑀣𑀸, 𑀏𑀓𑀸 𑀘 𑀯𑀺𑀤𑀢𑁆𑀣𑀺 𑀅𑀟𑁆𑀠𑀢𑁂𑀬𑁆𑀬𑁄. 𑀢𑀁𑀲𑀦𑁆𑀦𑀺𑀬𑁄𑀕𑁂𑀦 𑀧𑀦𑁂𑀢𑁆𑀣 𑀅𑀦𑁆𑀢𑀭𑀯𑀸𑀲𑀓𑁄𑀯 𑀅𑀟𑁆𑀠𑀢𑁂𑀬𑁆𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀤𑁆𑀯𑁂 𑀳𑀢𑁆𑀣𑀸 𑀬𑀲𑁆𑀲𑀸𑀢𑀺 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁄. 𑀧𑀸𑀭𑀼𑀧𑀦𑁂𑀦𑀸𑀧𑀺 𑀲𑀓𑁆𑀓𑀸 𑀦𑀸𑀪𑀺𑀁 𑀧𑀝𑀺𑀘𑁆𑀙𑀸𑀤𑁂𑀢𑀼𑀦𑁆𑀢𑀺 ‘‘𑀤𑁆𑀯𑀺𑀳𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀯𑀸-𑀲𑀤𑁆𑀤𑁄 𑀅𑀟𑁆𑀠𑀢𑁂𑀬𑁆𑀬𑀁 𑀯𑀺𑀓𑀧𑁆𑀧𑁂𑀢𑀺. 𑀢𑀺𑀭𑀺𑀬𑀲𑁆𑀲 𑀅𑀦𑁆𑀢𑁄𑀢𑀺 𑀙𑀝𑁆𑀞𑀻𑀢𑀧𑁆𑀧𑀼𑀭𑀺𑀲𑁄, 𑀢𑀺𑀭𑀺𑀬𑀫𑁂𑀯 𑀅𑀦𑁆𑀢𑁄𑀢𑀺 𑀯𑀸 𑀓𑀫𑁆𑀫𑀥𑀸𑀭𑀬𑁄 ‘‘𑀕𑀸𑀫𑀦𑁆𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀬.

𑁩𑁯. ‘‘𑀦𑀺𑀲𑀻𑀤𑀦𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀦𑀺𑀲𑀻𑀤𑀦𑀘𑀻𑀯𑀭𑀁 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀦𑀺𑀲𑀻𑀤𑀦𑀁 𑀦𑀸𑀫 𑀲𑀫𑁂 𑀪𑀽𑀫𑀺𑀪𑀸𑀕𑁂 𑀏𑀴𑀓𑀮𑁄𑀫𑀸𑀦𑀺 𑀉𑀧𑀭𑀽𑀧𑀭𑀺 𑀲𑀦𑁆𑀣𑀭𑀺𑀢𑁆𑀯𑀸 𑀓𑀜𑁆𑀚𑀺𑀓𑀸𑀤𑀻𑀳𑀺 𑀲𑀺𑀜𑁆𑀘𑀺𑀢𑁆𑀯𑀸 𑀓𑀢𑁄 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀨𑀸𑀮𑀺𑀢𑀢𑁆𑀢𑀸 𑀢𑀻𑀳𑀺 𑀤𑀲𑀸𑀳𑀺 𑀬𑀼𑀢𑁆𑀢𑁄 𑀧𑀭𑀺𑀓𑁆𑀔𑀸𑀭𑀯𑀺𑀲𑁂𑀲𑁄. 𑀯𑀺𑀤𑀢𑁆𑀣𑀻 𑀤𑁆𑀯𑁂𑀢𑀺 𑀤𑁆𑀯𑁂 𑀯𑀺𑀤𑀢𑁆𑀣𑀻. 𑀯𑀺𑀲𑀸𑀮𑀢𑁄 𑀧𑀼𑀣𑀼𑀮𑀢𑁄.

𑁪𑁦. ‘‘𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀻’’𑀢𑀺𑀆𑀤𑀺𑀦𑀸 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀓𑀡𑁆𑀟𑀽𑀢𑀺 𑀳𑀺 𑀦 𑀅𑀢𑁆𑀣𑀢𑁄 𑀦𑀸𑀦𑀁, 𑀢𑀕𑁆𑀕𑀳𑀡𑁂𑀦 𑀧𑀦𑁂𑀢𑁆𑀣 𑀧𑀺𑀴𑀓𑀲𑁆𑀲𑀸𑀯𑀣𑀼𑀮𑁆𑀮𑀓𑀘𑁆𑀙𑀸𑀩𑀸𑀥𑀁 𑀕𑀬𑁆𑀳𑀢𑀺. 𑀓𑀡𑁆𑀟𑀼𑀁 𑀬𑀣𑀸𑀯𑀼𑀢𑁆𑀢𑀁 𑀧𑀺𑀴𑀓𑀸𑀤𑀺𑀁 𑀧𑀝𑀺𑀘𑁆𑀙𑀸𑀤𑁂𑀢𑀻𑀢𑀺 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺. 𑀧𑀝𑀺𑀘𑁆𑀙𑀤𑀦𑀁 𑀯𑀸 𑀧𑀝𑀺𑀘𑁆𑀙𑀸𑀤𑁄, 𑀬𑀣𑀸𑀯𑀼𑀢𑁆𑀢𑀓𑀡𑁆𑀟𑀼𑀬𑀸 𑀧𑀝𑀺𑀘𑁆𑀙𑀸𑀤𑁄 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑁄, 𑀲𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀻, 𑀢𑀲𑁆𑀲. 𑀢𑀺𑀭𑀺𑀬𑀦𑁆𑀢𑀺 𑀢𑀺𑀭𑀺𑀬𑀢𑁄.

𑁪𑁧. ‘‘𑀯𑀲𑁆𑀲𑀺𑀓𑀸’’𑀢𑀺𑀆𑀤𑀺𑀦𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀤𑀲𑁆𑀲𑁂𑀢𑀺, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀁.

𑁪𑁨. 𑀏𑀯𑀁 𑀧𑀫𑀸𑀡𑀯𑀦𑁆𑀢𑀸𑀦𑀁 𑀧𑀫𑀸𑀡𑀁 𑀤𑀲𑁆𑀲𑁂𑀢𑁆𑀯𑀸 𑀯𑀼𑀢𑁆𑀢𑀧𑁆𑀧𑀫𑀸𑀡𑀸𑀢𑀺𑀓𑁆𑀓𑀫𑁂 𑀤𑁄𑀲𑀁, 𑀓𑁂𑀲𑀜𑁆𑀘𑀺 𑀧𑀫𑀸𑀡𑀸𑀪𑀸𑀯𑀕𑀡𑀦𑀸𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀢𑁆𑀣𑀸𑀢𑀺 𑀯𑀼𑀢𑁆𑀢𑀧𑁆𑀧𑀫𑀸𑀡𑀯𑀦𑁆𑀢𑁂𑀲𑀼 𑀘𑀻𑀯𑀭𑁂𑀲𑀼. 𑀢𑀤𑀼𑀢𑁆𑀢𑀭𑀺 𑀢𑀢𑁄 𑀯𑀼𑀢𑁆𑀢𑀧𑁆𑀧𑀫𑀸𑀡𑀢𑁄 𑀉𑀢𑁆𑀢𑀭𑀺 𑀦𑀺𑀧𑀸𑀢𑁂𑀦 𑀉𑀢𑁆𑀢𑀭𑀺-𑀲𑀤𑁆𑀤𑁂𑀦 𑀢𑀧𑁆𑀧𑀼𑀭𑀺𑀲𑁄. 𑀓𑀭𑁄𑀦𑁆𑀢𑀲𑁆𑀲 𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲. 𑀙𑁂𑀤𑀦𑀧𑀸𑀘𑀺𑀢𑁆𑀢𑀻𑀢𑀺 𑀙𑁂𑀤𑀦𑁂𑀦 𑀲𑀳𑀺𑀢𑀸 𑀧𑀸𑀘𑀺𑀢𑁆𑀢𑀺, 𑀅𑀢𑀺𑀭𑁂𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀘𑀺𑀢𑁆𑀢𑀺𑀬𑀁 𑀤𑁂𑀲𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀧𑁆𑀧𑀫𑀸𑀡𑀢𑁄 𑀧𑀦 𑀅𑀢𑀺𑀭𑁂𑀓𑀜𑁆𑀘 𑀊𑀦𑀓𑀜𑁆𑀘 ‘‘𑀧𑀭𑀺𑀓𑁆𑀔𑀸𑀭𑀘𑁄𑀴’’𑀦𑁆𑀢𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀬𑁂𑀦 𑀫𑀼𑀔𑀁 𑀧𑀼𑀜𑁆𑀙𑀦𑁆𑀢𑀺, 𑀢𑀁 𑀫𑀼𑀔𑀲𑀫𑁆𑀩𑀦𑁆𑀥𑀻𑀢𑀺 𑀫𑀼𑀔𑀲𑁆𑀲 𑀘𑁄𑀴𑀦𑁆𑀢𑀺 𑀲𑀫𑀸𑀲𑁂 𑀤𑁆𑀯𑀦𑁆𑀤𑁄. 𑀆𑀓𑀗𑁆𑀔𑀺𑀢𑀁 𑀇𑀘𑁆𑀙𑀺𑀢𑀁 𑀧𑀫𑀸𑀡𑀦𑁆𑀢𑀺 𑀓𑀫𑁆𑀫𑀥𑀸𑀭𑀬𑁄. 𑀢𑀫𑁂𑀢𑁂𑀲𑀫𑀢𑁆𑀣𑀻𑀢𑀺 𑀆𑀓𑀗𑁆𑀔𑀺𑀢𑀧𑁆𑀧𑀫𑀸𑀡𑀺𑀓𑀸. 𑀏𑀢𑁆𑀣 𑀘 𑀢𑀺𑀘𑀻𑀯𑀭𑀸𑀤𑀻𑀲𑀼 𑀅𑀯𑀼𑀢𑁆𑀢𑁂𑀧𑀺 𑀕𑀡𑀦𑀯𑀺𑀪𑀸𑀕𑁂 𑀧𑀘𑁆𑀘𑀢𑁆𑀣𑀭𑀡𑀫𑀼𑀔𑀧𑀼𑀜𑁆𑀙𑀦𑀧𑀭𑀺𑀓𑁆𑀔𑀸𑀭𑀘𑁄𑀴𑁂 𑀞𑀧𑁂𑀢𑁆𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀙𑀓𑁆𑀓𑀫𑁂𑀓𑁂𑀓𑀫𑁂𑀯 𑀯𑀝𑁆𑀝𑀢𑀺. 𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀸𑀦𑀺 𑀧𑀘𑁆𑀘𑀢𑁆𑀣𑀭𑀡𑀸𑀦𑀺 𑀘 𑀩𑀳𑀽𑀦𑀺𑀧𑀻𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀁.

𑁪𑁩. 𑀕𑀡𑀦𑀸𑀢𑀺 𑀏𑀢𑁆𑀣 𑀦𑀧𑀼𑀁𑀲𑀓𑀲𑁆𑀲 𑀇𑀢𑁆𑀣𑀺𑀯𑀘𑀦𑁂𑀦 𑀬𑁄𑀕𑀸𑀪𑀸𑀯𑀸 ‘‘𑀦 𑀤𑀻𑀧𑀺𑀢𑀸’’𑀢𑀺 𑀮𑀺𑀗𑁆𑀕𑀁 𑀯𑀺𑀧𑀭𑀺𑀡𑀸𑀫𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, 𑀅𑀝𑁆𑀞𑀓𑀣𑀸𑀬𑀁 𑀦 𑀧𑀓𑀸𑀲𑀺𑀢𑀸𑀢𑀺 𑀅𑀢𑁆𑀣𑁄. 𑀢𑀺𑀡𑁆𑀡𑀁 𑀧𑀦𑁂𑀢𑁂𑀲𑀁 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑁂𑀯 𑀯𑀼𑀢𑁆𑀢𑀁, 𑀯𑀺𑀓𑀧𑁆𑀧𑀦𑀽𑀧𑀕𑀧𑀘𑁆𑀙𑀺𑀫𑁂𑀦 𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀁 𑀅𑀢𑁆𑀣𑀺𑀬𑁂𑀯. 𑀇𑀤𑀸𑀦𑀺 𑀬𑀲𑁆𑀫𑀸 𑀢𑀢𑁆𑀣 𑀢𑀁 𑀲𑀩𑁆𑀩𑀁 𑀦 𑀤𑀻𑀧𑀺𑀢𑀁, 𑀢𑀲𑁆𑀫𑀸 𑀯𑀺𑀓𑀧𑁆𑀧𑀦𑀽𑀧𑀕𑀣𑀯𑀺𑀓𑀸𑀤𑀺 𑀲𑀩𑁆𑀩𑀁 𑀏𑀓𑀁 ‘‘𑀧𑀭𑀺𑀓𑁆𑀔𑀸𑀭𑀘𑁄𑀴’’𑀦𑁆𑀢𑀺, 𑀩𑀳𑀽𑀦𑀺 𑀏𑀓𑀢𑁄 𑀓𑀢𑁆𑀯𑀸 ‘‘𑀧𑀭𑀺𑀓𑁆𑀔𑀸𑀭𑀘𑁄𑀴𑀸𑀦𑀻’’𑀢𑀺𑀧𑀺 𑀯𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀣𑀸’’𑀢𑀺𑀆𑀤𑀺𑀫𑀸𑀳. 𑀇𑀫𑀺𑀦𑀸 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀦𑀸𑀫 𑀧𑀸𑀝𑁂𑀓𑁆𑀓𑀁 𑀦𑀺𑀥𑀸𑀦𑀫𑀼𑀔𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀣𑀯𑀺𑀓𑀸𑀤𑀺𑀁 𑀣𑀯𑀺𑀓𑀸 𑀆𑀤𑀺 𑀬𑀲𑁆𑀲 𑀧𑀭𑀺𑀲𑁆𑀲𑀸𑀯𑀦𑀸𑀤𑀺𑀦𑁄𑀢𑀺 𑀲𑀫𑀸𑀲𑁄. 𑀯𑀺𑀓𑀧𑁆𑀧𑀲𑁆𑀲 𑀉𑀧𑀕𑀁 𑀯𑀺𑀓𑀧𑁆𑀧𑀺𑀬𑀁, 𑀢𑀜𑁆𑀘 𑀉𑀧𑀭𑀺 𑀯𑀓𑁆𑀔𑀢𑀺.

𑁪𑁪. 𑀇𑀤𑀸𑀦𑀺 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀧𑀝𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀳𑀢𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀅𑀳𑀢𑁂𑀦 𑀦𑀯𑁂𑀦 𑀅𑀥𑁄𑀢𑁂𑀦 𑀓𑀧𑁆𑀧𑀁 𑀲𑀤𑀺𑀲𑀁 𑀅𑀳𑀢𑀓𑀧𑁆𑀧𑀁, 𑀏𑀓𑀯𑀸𑀭𑀥𑁄𑀢𑀁. 𑀅𑀳𑀢𑀜𑁆𑀘 𑀅𑀳𑀢𑀓𑀧𑁆𑀧𑀜𑁆𑀘 𑀅𑀳𑀢𑀸𑀳𑀢𑀓𑀧𑁆𑀧𑀸𑀦𑀺, 𑀯𑀢𑁆𑀣𑀸𑀦𑀺, 𑀢𑁂𑀲𑀁. 𑀤𑁆𑀯𑁂 𑀕𑀼𑀡𑀸 𑀧𑀝𑀮𑀸𑀦𑀺 𑀬𑀲𑁆𑀲 𑀲𑀸𑀢𑀺 𑀤𑀼𑀕𑀼𑀡𑀸. ‘‘𑀕𑀼𑀡𑁄 𑀧𑀝𑀮𑀭𑀸𑀲𑀻𑀲𑀽’’𑀢𑀺 𑀳𑀺 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸. 𑀤𑀼𑀕𑀼𑀡𑀸 𑀤𑀼𑀧𑀝𑁆𑀝𑀸, 𑀉𑀢𑁆𑀢𑀭𑀲𑁆𑀫𑀺𑀁 𑀤𑁂𑀳𑀪𑀸𑀕𑁂 𑀆𑀲𑀜𑁆𑀚𑀻𑀬𑀢𑀻𑀢𑀺 𑀉𑀓𑁆𑀓𑀭𑀸𑀲𑀗𑁆𑀕𑁄. 𑀏𑀓𑀘𑁆𑀘𑀁 𑀏𑀓𑀧𑀝𑁆𑀝𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀏𑀓𑀘𑁆𑀘𑀻, 𑀏𑀓𑀧𑀝𑁆𑀝𑁄𑀢𑀺 𑀅𑀢𑁆𑀣𑁄. 𑀦𑀺𑀧𑀸𑀢𑁄 𑀯𑀸 𑀏𑀓𑀘𑁆𑀘𑀻𑀢𑀺. 𑀢𑀣𑀸𑀢𑀺 𑀲𑀫𑀼𑀘𑁆𑀘𑀬𑁂, 𑀅𑀦𑁆𑀢𑀭𑀯𑀸𑀲𑀓𑁄 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀫𑀸𑀬𑀁 𑀯𑀸, 𑀬𑀣𑀸 𑀉𑀢𑁆𑀢𑀭𑀸𑀲𑀗𑁆𑀕𑁄 𑀏𑀓𑀘𑁆𑀘𑀺𑀬𑁄, 𑀏𑀯𑀁 𑀅𑀦𑁆𑀢𑀭𑀯𑀸𑀲𑀓𑁄𑀢𑀺 𑀅𑀢𑁆𑀣𑁄.

𑁪𑁫. ‘‘𑀉𑀢𑀽’’𑀢𑀺 𑀅𑀦𑁂𑀓𑀉𑀢𑀼 𑀕𑀳𑀺𑀢𑀸𑀢𑀺 𑀉𑀢𑀼𑀢𑁄 𑀤𑀻𑀖𑀓𑀸𑀮𑀢𑁄 𑀉𑀤𑁆𑀥𑀝𑀸 𑀉𑀢𑀼𑀤𑁆𑀥𑀝𑀸, 𑀢𑁂𑀲𑀁 𑀧𑀺𑀮𑁄𑀢𑀺𑀓𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀸𑀢𑀺 𑀉𑀢𑁆𑀢𑀭𑀸𑀲𑀗𑁆𑀕𑀅𑀦𑁆𑀢𑀭𑀯𑀸𑀲𑀓𑀸. 𑀧𑀁𑀲𑀼 𑀯𑀺𑀬 𑀓𑀼𑀘𑁆𑀙𑀺𑀢𑀁 𑀉𑀮𑀢𑀺 𑀧𑀯𑀢𑁆𑀢𑀢𑀻𑀢𑀺 𑀧𑀁𑀲𑀼𑀓𑀽𑀮𑀁, 𑀭𑀣𑀺𑀓𑀸𑀲𑀼𑀲𑀸𑀦𑀲𑀗𑁆𑀓𑀸𑀭𑀓𑀽𑀝𑀸𑀤𑀻𑀦𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀺𑀢𑀁 𑀘𑁄𑀴𑀔𑀡𑁆𑀟𑀁, 𑀢𑀲𑁆𑀫𑀺𑀁. 𑀬𑀸 𑀬𑀸 𑀭𑀼𑀘𑀻𑀢𑀺 𑀅𑀩𑁆𑀬𑀬𑀻𑀪𑀸𑀯𑁂 𑀬𑀣𑀸𑀭𑀼𑀘𑀺, 𑀬𑀸𑀯𑀤𑀢𑁆𑀣𑀁 𑀲𑀢𑀧𑀝𑁆𑀝𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁬. 𑀇𑀤𑀸𑀦𑀺 𑀢𑀻𑀲𑀼 𑀙𑀺𑀦𑁆𑀤𑀺𑀢𑁆𑀯𑀸 𑀓𑀸𑀢𑀼𑀁 𑀅𑀧𑁆𑀧𑀳𑁄𑀦𑁆𑀢𑁂𑀲𑀼 𑀓𑀸𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀻𑀲𑀽’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀺𑀘𑀻𑀯𑀭𑀲𑀫𑀼𑀤𑀸𑀬𑀢𑁄 𑀏𑀓𑀤𑁂𑀲𑀪𑀽𑀢𑀸𑀦𑀁 𑀤𑁆𑀯𑀺𑀦𑁆𑀦𑀫𑁂𑀓𑀲𑁆𑀲 𑀘 𑀲𑀗𑁆𑀔𑀸𑀕𑀼𑀡𑁂𑀦 𑀦𑀺𑀤𑁆𑀥𑀸𑀭𑀺𑀬𑀫𑀸𑀦𑀢𑁆𑀢𑀸 𑀢𑀻𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀏𑀓𑀯𑀘𑀦𑀲𑁆𑀲 𑀩𑀳𑁆𑀯𑀢𑁆𑀣𑁂𑀦 𑀬𑁄𑀕𑀸𑀪𑀸𑀯𑀢𑁄 𑀤𑁆𑀯𑀺𑀘𑀻𑀯𑀭𑀲𑀗𑁆𑀔𑀸𑀢𑀩𑀳𑁆𑀯𑀢𑁆𑀣𑀯𑀲𑁂𑀦 𑀯𑀘𑀦𑀁 𑀯𑀺𑀧𑀭𑀺𑀡𑀸𑀫𑁂𑀢𑁆𑀯𑀸 𑀬𑀸𑀦𑀺 𑀧𑀳𑁄𑀦𑁆𑀢𑀺, 𑀢𑀸𑀦𑀺 𑀤𑁆𑀯𑁂 𑀯𑀸𑀧𑀺 𑀙𑀺𑀦𑁆𑀤𑀺𑀢𑀩𑁆𑀩𑀸𑀦𑀺, 𑀬𑀁 𑀧𑀳𑁄𑀢𑀺, 𑀢𑀁 𑀏𑀓𑀁 𑀯𑀸 𑀙𑀺𑀦𑁆𑀤𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀧𑀳𑁄𑀦𑁆𑀢𑀻𑀢𑀺 𑀧𑀘𑁆𑀙𑀺𑀫𑀘𑀻𑀯𑀭𑀧𑁆𑀧𑀫𑀸𑀡𑀙𑀺𑀦𑁆𑀦𑀓𑀸𑀦𑀺 𑀧𑀳𑁄𑀦𑁆𑀢𑀺. 𑀅𑀧𑀻𑀢𑀺 𑀲𑀫𑁆𑀪𑀸𑀯𑀦𑁂, 𑀢𑀻𑀲𑀼 𑀓𑀸 𑀓𑀣𑀸𑀢𑀺 𑀅𑀢𑁆𑀣𑁄. 𑀅𑀦𑁆𑀯𑀸𑀥𑀺𑀦𑁆𑀢𑀺 𑀆𑀕𑀦𑁆𑀢𑀼𑀓𑀧𑀢𑁆𑀢𑀁. 𑀅𑀦𑀼 𑀧𑀘𑁆𑀙𑀸 𑀆𑀥𑀻𑀬𑀢𑀻𑀢𑀺 𑀅𑀦𑁆𑀯𑀸𑀥𑀺, 𑀬𑀁 𑀘𑀻𑀯𑀭𑀲𑁆𑀲𑁄𑀧𑀭𑀺 𑀲𑀗𑁆𑀖𑀸𑀝𑀺𑀆𑀓𑀸𑀭𑁂𑀦 𑀆𑀭𑁄𑀧𑁂𑀢𑀩𑁆𑀩𑀁. 𑀅𑀦𑀸𑀤𑀺𑀡𑁆𑀡𑀦𑁆𑀢𑀺 𑀅𑀦𑀸𑀭𑁄𑀧𑀺𑀢𑀁 𑀅𑀦𑁆𑀯𑀸𑀥𑀺𑀓𑀁. 𑀦 𑀥𑀸𑀭𑁂𑀬𑁆𑀬𑀸𑀢𑀺 𑀇𑀫𑀺𑀦𑀸 𑀬𑀤𑀺 𑀥𑀸𑀭𑁂𑀬𑁆𑀬, 𑀤𑀼𑀓𑁆𑀓𑀝𑀦𑁆𑀢𑀺 𑀤𑀻𑀧𑁂𑀢𑀺.

𑁪𑁭-𑁮. 𑀇𑀤𑀸𑀦𑀺 ‘‘𑀢𑀺𑀘𑀻𑀯𑀭𑀁 𑀦 𑀯𑀲𑁂𑀬𑁆𑀬 𑀯𑀺𑀦𑁂𑀓𑀸𑀳’’𑀦𑁆𑀢𑀺 𑀯𑀼𑀢𑁆𑀢𑀸𑀦𑀁 𑀢𑀺𑀡𑁆𑀡𑀁 𑀅𑀯𑀺𑀧𑁆𑀧𑀯𑀸𑀲𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀕𑀸𑀫𑁂’’𑀢𑀺𑀆𑀤𑀺𑀦𑀸 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑁂 (𑀧𑀸𑀭𑀸. 𑁪𑁭𑁧 𑀆𑀤𑀬𑁄) 𑀯𑀼𑀢𑁆𑀢𑀧𑀭𑀺𑀳𑀸𑀭𑀫𑀸𑀳. 𑀢𑀢𑁆𑀣 𑀕𑀸𑀫𑁂 𑀯𑀸…𑀧𑁂… 𑀯𑀺𑀳𑀸𑀭𑁂 𑀯𑀸 𑀢𑀺𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 ‘‘𑀧𑀝𑁄 𑀤𑀟𑁆𑀠𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀅𑀯𑀬𑀯𑁂𑀧𑀺 𑀲𑀫𑀼𑀤𑀸𑀬𑀯𑁄𑀳𑀸𑀭𑀯𑀲𑁂𑀦 𑀢𑀻𑀲𑀼 𑀏𑀓𑀫𑁆𑀧𑀺 ‘‘𑀢𑀺𑀘𑀻𑀯𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀜𑁆𑀜𑀢𑁆𑀭𑀸𑀢𑀺 𑀲𑀗𑁆𑀖𑁂𑀦 𑀕𑀺𑀮𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀻𑀬𑀫𑀸𑀦𑀁 𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺𑀁 𑀯𑀺𑀦𑀸. 𑀯𑀺𑀧𑁆𑀧𑀯𑀢𑁆𑀣𑀼𑀦𑁆𑀢𑀺 𑀏𑀓𑀽𑀧𑀘𑀸𑀭𑀦𑀸𑀦𑀽𑀧𑀘𑀸𑀭𑀕𑀸𑀫𑀸𑀤𑀺𑀢𑁄 𑀩𑀳𑀺, 𑀅𑀣 𑀯𑀸 𑀦𑀺𑀯𑁂𑀲𑀦𑀸𑀤𑀻𑀦𑀁, 𑀢𑀢𑁆𑀣 𑀘 𑀕𑀩𑁆𑀪𑁄𑀯𑀭𑀓𑀸𑀦𑀁 𑀘𑀻𑀯𑀭𑀲𑁆𑀲 𑀯𑀸 𑀳𑀢𑁆𑀣𑀧𑀸𑀲𑀁 𑀅𑀢𑀺𑀓𑁆𑀓𑀫𑁆𑀫 𑀘𑀻𑀯𑀭𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑁄 𑀳𑀼𑀢𑁆𑀯𑀸 𑀯𑀲𑀺𑀢𑀼𑀁. 𑀏𑀢𑁆𑀣 𑀘 𑀕𑀸𑀫𑀸𑀤𑀻𑀦𑀁 𑀏𑀓𑀽𑀧𑀘𑀸𑀭𑀦𑀸𑀦𑀽𑀧𑀘𑀸𑀭𑀢𑀸 𑀏𑀓𑀓𑀼𑀮𑀦𑀸𑀦𑀸𑀓𑀼𑀮𑀲𑀦𑁆𑀢𑀓𑀲𑁆𑀲 𑀕𑀸𑀫𑀸𑀤𑀺𑀦𑁄 𑀧𑀭𑀺𑀓𑁆𑀔𑁂𑀧𑀲𑁆𑀲, 𑀧𑀭𑀺𑀓𑁆𑀔𑁂𑀧𑁄𑀓𑀸𑀲𑀲𑁆𑀲 𑀘 𑀯𑀲𑁂𑀦 𑀲𑀢𑁆𑀣𑀅𑀩𑁆𑀪𑁄𑀓𑀸𑀲𑀸𑀦𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀯𑀲𑁂𑀦 𑀘 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀏𑀓𑁄 𑀅𑀩𑁆𑀪𑀦𑁆𑀢𑀭𑁄 𑀅𑀝𑁆𑀞𑀯𑀻𑀲𑀢𑀺𑀳𑀢𑁆𑀣𑁄 𑀳𑁄𑀢𑀺. 𑀏𑀢𑁆𑀣 𑀘 𑀦𑀺𑀯𑁂𑀲𑀦𑀸𑀤𑀻𑀦𑀺 𑀕𑀸𑀫𑀢𑁄 𑀩𑀳𑀺 𑀲𑀦𑁆𑀦𑀺𑀯𑀺𑀝𑁆𑀞𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁 𑀯𑀺𑀲𑀼𑀁 𑀕𑀸𑀫𑀲𑁆𑀲 𑀕𑀳𑀺𑀢𑀢𑁆𑀢𑀸, 𑀢𑀣𑀸 𑀉𑀤𑁄𑀲𑀺𑀢𑀸𑀤𑀻𑀳𑀺 𑀅𑀜𑁆𑀜𑀁 𑀦𑀺𑀯𑁂𑀲𑀦𑀁.

𑀢𑀢𑁆𑀣 𑀉𑀤𑁄𑀲𑀺𑀢𑁄 𑀦𑀸𑀫 𑀬𑀸𑀦𑀸𑀤𑀻𑀦𑀁 𑀪𑀡𑁆𑀟𑀸𑀦𑀁 𑀲𑀸𑀮𑀸. 𑀧𑀸𑀲𑀸𑀤𑁄 𑀤𑀻𑀖𑀧𑀸𑀲𑀸𑀤𑁄. 𑀳𑀫𑁆𑀫𑀺𑀬𑀁 𑀫𑀼𑀡𑁆𑀟𑀘𑁆𑀙𑀤𑀦𑀧𑀸𑀲𑀸𑀤𑁄. 𑀦𑀸𑀯𑀸 𑀘 𑀅𑀝𑁆𑀝𑁄 𑀘 𑀫𑀸𑀴𑁄 𑀘 𑀆𑀭𑀸𑀫𑁄 𑀘 𑀦𑀸𑀯𑀸…𑀧𑁂… 𑀆𑀭𑀸𑀫𑀁, 𑀢𑀲𑁆𑀫𑀺𑀁. 𑀅𑀝𑁆𑀝𑁄 𑀦𑀸𑀫 𑀧𑀝𑀺𑀭𑀸𑀚𑀸𑀤𑀻𑀦𑀁 𑀧𑀝𑀺𑀩𑀸𑀳𑀦𑀢𑁆𑀣𑀁 𑀇𑀝𑁆𑀞𑀓𑀸𑀳𑀺 𑀓𑀢𑁄 𑀩𑀳𑀮𑀪𑀺𑀢𑁆𑀢𑀺𑀓𑁄 𑀘𑀢𑀼𑀧𑀜𑁆𑀘𑀪𑀽𑀫𑀺𑀓𑁄 𑀧𑀢𑀺𑀲𑁆𑀲𑀬𑀯𑀺𑀲𑁂𑀲𑁄. 𑀫𑀸𑀴𑁄 𑀏𑀓𑀓𑀽𑀝𑀲𑀗𑁆𑀕𑀳𑀺𑀢𑁄 𑀘𑀢𑀼𑀭𑀲𑁆𑀲𑀧𑀸𑀲𑀸𑀤𑁄. 𑀆𑀭𑀸𑀫𑁄 𑀧𑀼𑀧𑁆𑀨𑀸𑀭𑀸𑀫𑁄 𑀯𑀸 𑀨𑀮𑀸𑀭𑀸𑀫𑁄 𑀯𑀸. 𑀲𑀢𑁆𑀣𑁄 𑀘 𑀔𑁂𑀢𑁆𑀢𑀜𑁆𑀘 𑀔𑀮𑀜𑁆𑀘𑀸𑀢𑀺 𑀤𑁆𑀯𑀦𑁆𑀤𑁄. 𑀲𑀢𑁆𑀣𑁄 𑀦𑀸𑀫 𑀚𑀗𑁆𑀖𑀲𑀢𑁆𑀣𑁄 𑀯𑀸 𑀲𑀓𑀝𑀲𑀢𑁆𑀣𑁄 𑀯𑀸. 𑀔𑀮𑀁 𑀯𑀼𑀘𑁆𑀘𑀢𑀺 𑀥𑀜𑁆𑀜𑀓𑀭𑀡𑀁. 𑀤𑀼𑀫𑁄 𑀦𑀸𑀫 𑀤𑀼𑀫𑀫𑀽𑀮𑀁 𑀙𑀸𑀬𑀸𑀬 𑀨𑀼𑀝𑁆𑀞𑁄𑀓𑀸𑀲𑁄 𑀉𑀧𑀘𑀸𑀭𑀯𑀲𑁂𑀦. 𑀅𑀩𑁆𑀪𑁄𑀓𑀸𑀲𑁄 𑀧𑀦 𑀅𑀕𑀸𑀫𑀓𑁂 𑀅𑀭𑀜𑁆𑀜𑁂𑀯 𑀅𑀥𑀺𑀧𑁆𑀧𑁂𑀢𑁄.

𑁪𑁯. 𑀇𑀤𑀸𑀦𑀺 ‘‘𑀏𑀢𑀁…𑀧𑁂… 𑀲𑀗𑁆𑀖𑀸𑀝𑀺’’𑀦𑁆𑀢𑀺𑀆𑀤𑀺𑀦𑀸 𑀦𑀯𑀦𑁆𑀦𑀫𑁂𑀯 𑀧𑀘𑁆𑀘𑀼𑀤𑁆𑀥𑀸𑀭𑁄 𑀯𑀼𑀢𑁆𑀢𑁄, 𑀦 𑀧𑀦 𑀢𑁂𑀲𑀁 𑀓𑀸𑀮𑀧𑀭𑀺𑀘𑁆𑀙𑁂𑀤𑁄𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀭𑁄𑀕𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀤𑁂𑀯𑀤𑀢𑁆𑀢𑁄 𑀤𑀢𑁆𑀢𑁄𑀢𑀺 𑀦𑀸𑀫𑁂𑀓𑀤𑁂𑀲𑁂𑀦𑀸𑀧𑀺 𑀦𑀸𑀫𑀯𑁄𑀳𑀸𑀭𑀢𑁄 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀯 ‘‘𑀲𑀸𑀝𑀺𑀓𑀸’’𑀢𑀺 𑀧𑀓𑀭𑀡𑀯𑀲𑁂𑀦 𑀕𑀫𑁆𑀫𑀫𑀸𑀦𑀢𑁆𑀣𑀢𑁆𑀢𑀸 𑀯𑀼𑀢𑁆𑀢𑀸. 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸 𑀘 𑀭𑁄𑀕𑀯𑀲𑁆𑀲𑀸𑀦𑀧𑀭𑀺𑀬𑀦𑁆𑀢𑀸. 𑀭𑁄𑀕𑀸 𑀘 𑀯𑀲𑁆𑀲𑀸𑀦𑀸 𑀘 𑀫𑀸𑀲𑀸 𑀭𑁄𑀕𑀯𑀲𑁆𑀲𑀸𑀦𑀸, 𑀢𑁂 𑀢𑀤𑀢𑀺𑀓𑁆𑀓𑀫𑁂𑀦 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀢𑀸𑀬 𑀧𑀭𑀺𑀬𑀦𑁆𑀢𑀸 𑀬𑀸𑀲𑀦𑁆𑀢𑀺 𑀯𑀺𑀕𑁆𑀕𑀳𑁄.

𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀯𑀲𑁆𑀲𑀸𑀦𑀫𑀸𑀲𑀸𑀢𑀺𑀓𑁆𑀓𑀫𑁂 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬 𑀏𑀯 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀸. 𑀢𑀣𑀸 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸 𑀆𑀩𑀸𑀥𑁂𑀲𑀼 𑀯𑀽𑀧𑀲𑀦𑁆𑀢𑁂𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀩𑁆𑀩𑀸’’𑀢𑀺 𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯) 𑀯𑀼𑀢𑁆𑀢𑀁. 𑀏𑀢𑁆𑀣 𑀧𑀦 𑀓𑁂𑀘𑀺 𑀆𑀘𑀭𑀺𑀬𑀸 ‘‘𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸𑀢𑀺 𑀯𑀲𑁆𑀲𑀺𑀓𑀲𑀸𑀝𑀺𑀓𑀪𑀸𑀯𑀢𑁄 𑀅𑀧𑀦𑁂𑀢𑁆𑀯𑀸’’𑀢𑀺 𑀯𑀤𑀺𑀁𑀲𑀼, 𑀢𑀁 𑀦 𑀬𑀼𑀚𑁆𑀚𑀢𑀺. 𑀧𑀘𑁆𑀘𑀼𑀤𑁆𑀥𑀸𑀭𑀯𑀺𑀦𑀬𑀓𑀫𑁆𑀫𑀯𑀺𑀲𑀬𑁂𑀬𑁂𑀯 𑀧𑀘𑁆𑀘𑀼𑀤𑁆𑀥𑀸𑀭-𑀲𑀤𑁆𑀤𑀲𑁆𑀲 𑀤𑀺𑀝𑁆𑀞𑀢𑁆𑀢𑀸, ‘‘𑀘𑀸𑀢𑀼𑀫𑀸𑀲𑀁 𑀅𑀥𑀺𑀝𑁆𑀞𑀸𑀢𑀼𑀁 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁫𑁮) 𑀧𑀸𑀴𑀺𑀯𑀘𑀦𑀢𑁄 𑀘. ‘‘𑀘𑀸𑀢𑀼𑀫𑀸𑀲𑀁 𑀅𑀥𑀺𑀝𑁆𑀞𑀸𑀢𑀼’’𑀦𑁆𑀢𑀺 𑀘 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀅𑀥𑀺𑀝𑁆𑀞𑀸𑀦𑁂𑀦 𑀲𑀳 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁄 𑀤𑀲𑁆𑀲𑀺𑀢𑁄𑀢𑀺 𑀦 𑀢𑁂𑀦 𑀅𑀥𑀺𑀝𑁆𑀞𑀸𑀦𑀪𑁂𑀤𑁄 𑀯𑀺𑀜𑁆𑀜𑀸𑀬𑀢𑀺. 𑀢𑁂𑀦𑁂𑀯 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀯𑀲𑁆𑀲𑀸𑀦𑀁 𑀘𑀸𑀢𑀼𑀫𑀸𑀲𑀁 𑀅𑀥𑀺𑀝𑁆𑀞𑀸𑀢𑀼𑀁, 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁫𑁮) 𑀯𑀘𑀦𑀢𑁄 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬 𑀏𑀯 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀳𑁂𑀫𑀦𑁆𑀢𑁂 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 ‘‘𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀯𑀲𑁆𑀲𑀸𑀦𑀫𑀸𑀲𑀸𑀢𑀺𑀓𑁆𑀓𑀫𑁂𑀦𑀸𑀧𑀺 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺 𑀆𑀩𑀸𑀥𑀯𑀽𑀧𑀲𑀫𑁂𑀦𑀸𑀧𑀺 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀻’’𑀢𑀺 (𑀓𑀗𑁆𑀓𑀸. 𑀅𑀝𑁆𑀞. 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁. 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀫𑁆𑀧𑀺 𑀧𑀘𑁆𑀘𑀼𑀤𑁆𑀥𑀸𑀭𑀯𑀲𑁂𑀦𑀸𑀧𑀺 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀻𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀏𑀯𑀜𑁆𑀳𑀺 𑀲𑀢𑀺 𑀲𑀩𑁆𑀩𑀝𑁆𑀞𑀓𑀣𑀸𑀬𑁄 𑀲𑀫𑁂𑀦𑁆𑀢𑀺, 𑀬𑀼𑀢𑁆𑀢𑀺 𑀘 𑀅𑀯𑀺𑀭𑀼𑀤𑁆𑀥𑀸 𑀳𑁄𑀦𑁆𑀢𑀻𑀢𑀺. 𑀢𑀢𑁄 𑀧𑀭𑀦𑁆𑀢𑀺 𑀧𑀘𑁆𑀘𑀼𑀤𑁆𑀥𑀸𑀭𑀢𑁄 𑀉𑀧𑀭𑀺. 𑀯𑀺𑀓𑀧𑁆𑀧𑁂𑀬𑁆𑀬𑀸𑀢𑀺 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀬𑁆𑀬. 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀳𑁂𑀫𑀦𑁆𑀢𑀲𑁆𑀲 𑀧𑀞𑀫𑀤𑀺𑀯𑀲𑁂 𑀯𑀺𑀓𑀧𑁆𑀧𑁂𑀬𑁆𑀬, 𑀏𑀯𑀁 𑀅𑀲𑀢𑀺 𑀤𑀼𑀓𑁆𑀓𑀝𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀲𑀸𑀢𑀺 𑀅𑀧𑀭𑁂 𑀲𑀢𑁆𑀢 𑀘𑀻𑀯𑀭𑀸𑀦𑀺 𑀲𑁂𑀲𑀸. 𑀦𑀢𑁆𑀣𑀺 𑀧𑀭𑀺𑀬𑀦𑁆𑀢𑀁 𑀯𑀼𑀢𑁆𑀢𑀲𑀤𑀺𑀲𑁄 𑀓𑀸𑀮𑀧𑀭𑀺𑀘𑁆𑀙𑁂𑀤𑁄 𑀏𑀢𑁂𑀲𑀦𑁆𑀢𑀺 𑀅𑀧𑀭𑀺𑀬𑀦𑁆𑀢𑀺𑀓𑀸.

𑁫𑁦. 𑀇𑀤𑀸𑀦𑀺 𑀧𑀘𑁆𑀘𑀢𑁆𑀣𑀭𑀡𑀸𑀤𑀺𑀓𑀁 𑀘𑀻𑀯𑀭𑀘𑀢𑀼𑀓𑁆𑀓𑀁 𑀲𑀤𑀲𑀸𑀤𑀺𑀓𑀁 𑀯𑀝𑁆𑀝𑀢𑀺, 𑀦𑀸𑀧𑀭𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀘𑁆𑀘𑀢𑁆𑀣𑀭𑀡𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀭𑀺𑀓𑁆𑀔𑀸𑀭𑁄 𑀘 𑀫𑀼𑀔𑀧𑀼𑀜𑁆𑀙𑀦𑀜𑁆𑀘𑀸𑀢𑀺 𑀤𑁆𑀯𑀦𑁆𑀤𑁄. 𑀧𑀭𑀺𑀓𑁆𑀔𑀸𑀭𑀫𑀼𑀔𑀧𑀼𑀜𑁆𑀙𑀦𑀫𑁂𑀯 𑀘𑁄𑀴𑀓𑀦𑁆𑀢𑀺 𑀓𑀫𑁆𑀫𑀥𑀸𑀭𑀬𑁄. 𑀤𑁆𑀯𑀦𑁆𑀤𑀲𑀫𑀸𑀲𑀦𑁆𑀢𑁂 𑀲𑀼𑀬𑁆𑀬𑀫𑀸𑀦𑀢𑁆𑀢𑀸 𑀧𑀦 𑀘𑁄𑀴𑀓-𑀲𑀤𑁆𑀤𑁄 𑀧𑀭𑀺𑀓𑁆𑀔𑀸𑀭-𑀲𑀤𑁆𑀤𑀢𑁄 𑀘 𑀧𑀭𑀁 𑀤𑀝𑁆𑀞𑀩𑁆𑀩𑁄 ‘‘𑀧𑀭𑀺𑀓𑁆𑀔𑀸𑀭𑀘𑁄𑀴𑀓’’𑀦𑁆𑀢𑀺. 𑀢𑀁 𑀧𑀦 𑀲𑀸𑀫𑀜𑁆𑀜𑀚𑁄𑀢𑀦𑀸𑀬 𑀯𑀺𑀲𑁂𑀲𑁂𑀧𑀺 𑀅𑀯𑀝𑁆𑀞𑀸𑀦𑀢𑁄 𑀞𑀧𑁂𑀢𑁆𑀯𑀸 𑀧𑀜𑁆𑀘 𑀘𑀻𑀯𑀭𑀸𑀦𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑀸𑀫𑁂𑀦𑀸𑀥𑀺𑀝𑁆𑀞𑀺𑀢𑀸𑀦𑀺 𑀅𑀯𑀲𑁂𑀲𑀁 𑀤𑀝𑁆𑀞𑀩𑁆𑀩𑀁. 𑀧𑀘𑁆𑀘𑀢𑁆𑀣𑀭𑀡𑀜𑁆𑀘 𑀧𑀭𑀺𑀓𑁆𑀔𑀸𑀭𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀓𑀜𑁆𑀘 𑀧𑀘𑁆𑀘𑀢𑁆𑀣𑀭𑀡…𑀧𑁂… 𑀘𑁄𑀴𑀓𑀜𑁆𑀘 𑀦𑀺𑀲𑀻𑀤𑀦𑀜𑁆𑀘𑀸𑀢𑀺 𑀏𑀢𑀁 𑀘𑀻𑀯𑀭𑀘𑀢𑀼𑀓𑁆𑀓𑀁 𑀲𑀤𑀲𑀫𑁆𑀧𑀺 𑀅𑀭𑀢𑁆𑀢𑀫𑁆𑀧𑀺 𑀅𑀦𑀸𑀤𑀺𑀡𑁆𑀡𑀓𑀧𑁆𑀧𑀫𑁆𑀧𑀺 𑀮𑀩𑁆𑀪𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀤𑀲𑀦𑁆𑀢𑀺 𑀲𑀳 𑀬𑀸𑀳𑀺 𑀓𑀸𑀳𑀺𑀘𑀺 𑀤𑀲𑀸𑀳𑀻𑀢𑀺 𑀲𑀤𑀲𑀁. 𑀲𑀤𑀲𑀓𑁂 𑀮𑀩𑁆𑀪𑀫𑀸𑀦𑁂 𑀅𑀤𑀲𑀫𑁆𑀧𑀺 𑀮𑀩𑁆𑀪𑀢𑁂𑀯𑀸𑀢𑀺 𑀲𑀤𑀲𑀫𑁆𑀧𑀺 𑀅𑀤𑀲𑀫𑁆𑀧𑀺 𑀧𑀼𑀧𑁆𑀨𑀤𑀲𑀫𑁆𑀧𑀻𑀢𑀺 𑀏𑀢𑁆𑀣 𑀅𑀢𑁆𑀣𑁄. 𑀧𑀺-𑀲𑀤𑁆𑀤𑁄 𑀯𑀼𑀢𑁆𑀢𑀸𑀯𑀼𑀢𑁆𑀢𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀅𑀭𑀢𑁆𑀢𑀦𑁆𑀢𑀺 𑀦𑀻𑀮𑀧𑀻𑀢𑀸𑀤𑀺𑀭𑀚𑀦𑁂𑀦 𑀅𑀭𑀜𑁆𑀚𑀺𑀢𑀫𑁆𑀧𑀺. 𑀧𑀺-𑀲𑀤𑁆𑀤𑁂𑀦 𑀭𑀜𑁆𑀚𑀺𑀢𑀦𑀻𑀮𑀧𑀻𑀢𑀸𑀤𑀺𑀓𑀫𑁆𑀧𑀺 𑀅𑀦𑀸𑀤𑀺𑀡𑁆𑀡𑀓𑀧𑁆𑀧𑀫𑁆𑀧𑀻𑀢𑀺. 𑀆𑀤𑀺𑀡𑁆𑀡𑁄 𑀓𑀧𑁆𑀧𑁄 𑀬𑀲𑁆𑀲 𑀦𑀢𑁆𑀣𑀻𑀢𑀺 𑀢𑀁 𑀅𑀦𑀸𑀤𑀺𑀡𑁆𑀡𑀓𑀧𑁆𑀧𑀫𑁆𑀧𑀺. 𑀧𑀺-𑀲𑀤𑁆𑀤𑁂𑀦 𑀆𑀤𑀺𑀡𑁆𑀡𑀓𑀧𑁆𑀧𑀫𑁆𑀧𑀺.

𑀦𑀦𑀼 𑀘 ‘‘𑀦 𑀪𑀺𑀓𑁆𑀔𑀯𑁂 𑀲𑀩𑁆𑀩𑀦𑀻𑀮𑀓𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀻’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁩𑁭𑁨) 𑀲𑀩𑁆𑀩𑀦𑀻𑀮𑀓𑀲𑀩𑁆𑀩𑀧𑀻𑀢𑀓𑀲𑀩𑁆𑀩𑀮𑁄𑀳𑀺𑀢𑀓𑀘𑀻𑀯𑀭𑀸𑀦𑀺 𑀲𑀸𑀫𑀜𑁆𑀜𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀻𑀢𑀺 𑀓𑀣𑀫𑀺𑀤𑀁 𑀘𑀻𑀯𑀭𑀘𑀢𑀼𑀓𑁆𑀓𑀁 𑀲𑀤𑀲𑀸𑀤𑀺𑀓𑀁 𑀯𑀝𑁆𑀝𑀢𑀺, 𑀓𑀣𑀜𑁆𑀘 𑀅𑀦𑀸𑀤𑀺𑀡𑁆𑀡𑀓𑀧𑁆𑀧𑀫𑁆𑀧𑀺 𑀯𑀝𑁆𑀝𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀓𑀼𑀲𑀘𑀻𑀭𑀁 𑀦𑀺𑀯𑀸𑀲𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀉𑀧𑁆𑀧𑀦𑁆𑀦𑀯𑀢𑁆𑀣𑀽𑀲𑀼 (𑀫𑀳𑀸𑀯. 𑁩𑁭𑁧) ‘‘𑀦 𑀪𑀺𑀓𑁆𑀔𑀯𑁂 𑀓𑀼𑀲𑀘𑀻𑀭𑀁…𑀧𑁂… 𑀢𑀺𑀢𑁆𑀣𑀺𑀬𑀤𑁆𑀥𑀚𑁄 𑀥𑀸𑀭𑁂𑀢𑀩𑁆𑀩𑁄. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁩𑁭𑁧) 𑀉𑀧𑁆𑀧𑀦𑁆𑀦𑀯𑀢𑁆𑀣𑀼𑀯𑀲𑁂𑀦𑁂𑀯 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀲𑀗𑁆𑀔𑀸𑀢𑀥𑀸𑀭𑀡𑀲𑁆𑀲 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀘 𑀢𑀢𑁆𑀣𑁂𑀯 𑀅𑀝𑁆𑀞𑀓𑀣𑀸𑀬𑀜𑁆𑀘 (𑀫𑀳𑀸𑀯. 𑀅𑀝𑁆𑀞. 𑁩𑁭𑁨) ‘‘𑀲𑀩𑁆𑀩𑀦𑀻𑀮𑀓𑀸𑀤𑀻𑀦𑀺 𑀭𑀚𑀦𑀁 𑀥𑁄𑀯𑀺𑀢𑁆𑀯𑀸 𑀧𑀼𑀦 𑀭𑀚𑀺𑀢𑁆𑀯𑀸 𑀥𑀸𑀭𑁂𑀢𑀩𑁆𑀩𑀸𑀦𑀺, 𑀦 𑀲𑀓𑁆𑀓𑀸 𑀘𑁂 𑀳𑁄𑀦𑁆𑀢𑀺 𑀥𑁄𑀯𑀺𑀢𑀼𑀁, 𑀧𑀘𑁆𑀘𑀢𑁆𑀣𑀭𑀡𑀸𑀦𑀺 𑀯𑀸 𑀓𑀸𑀢𑀩𑁆𑀩𑀸𑀦𑀺, 𑀤𑀼𑀧𑀝𑁆𑀝𑀘𑀻𑀯𑀭𑀲𑁆𑀲 𑀯𑀸 𑀫𑀚𑁆𑀛𑁂 𑀤𑀸𑀢𑀩𑁆𑀩𑀸𑀦𑀺, 𑀅𑀘𑁆𑀙𑀺𑀦𑁆𑀦𑀤𑀲𑀤𑀻𑀖𑀤𑀲𑀸𑀦𑀺 𑀤𑀲𑀸 𑀙𑀺𑀦𑁆𑀤𑀺𑀢𑁆𑀯𑀸 𑀥𑀸𑀭𑁂𑀢𑀩𑁆𑀩𑀸𑀦𑀺, 𑀓𑀜𑁆𑀘𑀼𑀓𑀁 𑀮𑀪𑀺𑀢𑁆𑀯𑀸 𑀨𑀸𑀮𑁂𑀢𑁆𑀯𑀸 𑀭𑀚𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀯𑁂𑀞𑀦𑁂𑀧𑀺 𑀏𑀲𑁂𑀯 𑀦𑀬𑁄’’𑀢𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀯𑀲𑁂𑀦𑁂𑀯 𑀥𑀸𑀭𑀡𑀧𑀭𑀺𑀪𑁄𑀕𑀸𑀦𑀁 𑀯𑀼𑀢𑁆𑀢𑀢𑁆𑀢𑀸 𑀘 𑀤𑀼𑀩𑁆𑀩𑀡𑁆𑀡𑀓𑀭𑀡𑀲𑀺𑀓𑁆𑀔𑀸𑀧𑀤𑁂 (𑀧𑀸𑀘𑀺. 𑀅𑀝𑁆𑀞. 𑁩𑁬𑁮) ‘‘𑀬𑀁 𑀦𑀺𑀯𑀸𑀲𑁂𑀢𑀼𑀁 𑀯𑀸 𑀧𑀸𑀭𑀼𑀧𑀺𑀢𑀼𑀁 𑀯𑀸 𑀲𑀓𑁆𑀓𑀸 𑀳𑁄𑀢𑀺, 𑀢𑀤𑁂𑀯 𑀘𑀻𑀯𑀭𑀦𑁆𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀧𑀜𑁆𑀘𑀦𑁆𑀦𑀁𑀬𑁂𑀯 𑀓𑀧𑁆𑀧𑀩𑀺𑀦𑁆𑀤𑀼𑀦𑁄 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀘 𑀢𑀺𑀘𑀻𑀯𑀭𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀯𑀲𑁆𑀲𑀺𑀓𑀲𑀸𑀝𑀺𑀓𑀲𑀗𑁆𑀔𑀸𑀢𑀸𑀦𑀺 𑀧𑀜𑁆𑀘 𑀘𑀻𑀯𑀭𑀸𑀦𑀺 𑀓𑀸𑀬𑀧𑀭𑀺𑀳𑀸𑀭𑀺𑀬𑀸𑀦𑁂𑀯 𑀅𑀤𑀲𑀸𑀦𑀺 𑀅𑀲𑀩𑁆𑀩𑀦𑀻𑀮𑀓𑀸𑀤𑀻𑀦𑀺 𑀓𑀧𑁆𑀧𑀺𑀬𑀭𑀚𑀦𑀭𑀚𑀺𑀢𑀸𑀦𑀺 𑀆𑀤𑀺𑀡𑁆𑀡𑀓𑀧𑁆𑀧𑀸𑀦𑀺𑀬𑁂𑀯 𑀳𑁄𑀦𑁆𑀢𑀺, 𑀦 𑀦𑀺𑀬𑀫𑁂𑀦 𑀦𑀺𑀯𑀢𑁆𑀢𑀺𑀢𑀸𑀦𑀺 𑀧𑀭𑀸𑀦𑀺 𑀘𑀢𑁆𑀢𑀸𑀭𑀻𑀢𑀺 𑀘𑀻𑀯𑀭𑀘𑀢𑀼𑀓𑁆𑀓𑀫𑁂𑀯 𑀲𑀤𑀲𑀸𑀤𑀺𑀓𑀁 𑀅𑀦𑀸𑀤𑀺𑀡𑁆𑀡𑀓𑀧𑁆𑀧𑀫𑁆𑀧𑀺 𑀯𑀝𑁆𑀝𑀢𑀻𑀢𑀺.

𑁫𑁧. 𑀲𑁂𑀲𑀘𑀻𑀯𑀭𑀧𑀜𑁆𑀘𑀓𑀁 𑀅𑀤𑀲𑀁𑀬𑁂𑀯 𑀭𑀚𑀺𑀢𑀁𑀬𑁂𑀯 𑀆𑀤𑀺𑀡𑁆𑀡𑀓𑀧𑁆𑀧𑀁𑀯 𑀓𑀧𑁆𑀧𑀢𑀻𑀢𑀺 𑀬𑁄𑀚𑀦𑀸. 𑀭𑀚𑀺𑀢𑀦𑁆𑀢𑀺 𑀓𑀧𑁆𑀧𑀺𑀬𑀭𑀚𑀦𑁂𑀦 𑀭𑀚𑀺𑀢𑀁. 𑀦𑀺𑀲𑀻𑀤𑀦𑀲𑁆𑀲 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀲𑀩𑁆𑀩𑀢𑁆𑀣 𑀅𑀤𑀲𑀢𑁆𑀣𑀁 𑀦𑀺𑀲𑁂𑀥𑁂𑀢𑀼𑀁 ‘‘𑀲𑀤𑀲𑀁𑀯 𑀦𑀺𑀲𑀻𑀤𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀢𑀺 𑀳𑀺 𑀲𑀫𑁆𑀪𑀯𑁂 𑀩𑁆𑀬𑀪𑀺𑀘𑀸𑀭𑁂 𑀘 𑀯𑀺𑀲𑁂𑀲𑀦𑀁 𑀲𑀸𑀢𑁆𑀣𑀓𑀁 𑀳𑁄𑀢𑀺.

𑁫𑁨. 𑀇𑀤𑀸𑀦𑀺 𑀅𑀦𑀥𑀺𑀝𑁆𑀞𑀺𑀢𑁂 𑀅𑀦𑀺𑀲𑁆𑀲𑀝𑁆𑀞𑁂 𑀘 𑀓𑀸 𑀧𑀯𑀢𑁆𑀢𑀻𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀥𑀺𑀝𑁆𑀞𑀺𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀥𑀺𑀝𑁆𑀞𑀺𑀢𑀦𑁆𑀢𑀺 𑀢𑀺𑀘𑀻𑀯𑀭𑀸𑀤𑀺𑀯𑀲𑁂𑀦 𑀅𑀦𑀥𑀺𑀝𑁆𑀞𑀺𑀢𑀁. 𑀅𑀦𑀺𑀲𑁆𑀲𑀝𑁆𑀞𑀦𑁆𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀤𑀸𑀦𑀮𑀓𑁆𑀔𑀡𑁂𑀦 𑀅𑀤𑀺𑀦𑁆𑀦𑀁. 𑀯𑀺𑀓𑀧𑁆𑀧𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀬𑁂𑀢𑀺 𑀯𑀓𑁆𑀔𑀫𑀸𑀦𑀦𑀬𑁂𑀦 𑀏𑀓𑀩𑀳𑀼𑀪𑀸𑀯𑀁, 𑀲𑀦𑁆𑀦𑀺𑀳𑀺𑀢𑀸𑀲𑀦𑁆𑀦𑀺𑀳𑀺𑀢𑀪𑀸𑀯𑀜𑁆𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑁆𑀯𑀸 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑁂𑀬𑁆𑀬. 𑀯𑀓𑁆𑀔𑀫𑀸𑀦𑀦𑀬𑁂𑀦 𑀧𑀦 𑀯𑀺𑀜𑁆𑀜𑀸𑀬𑀢𑀻𑀢𑀺 ‘‘𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸’’𑀢𑀺 𑀦 𑀯𑀼𑀢𑁆𑀢𑀁.

𑀇𑀤𑀸𑀦𑀺 ‘‘𑀯𑀺𑀓𑀧𑁆𑀧𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁 𑀓𑀻𑀤𑀺𑀲𑀁 𑀢𑀁 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀯𑀺𑀓𑀧𑁆𑀧𑀺𑀬𑀦𑁆𑀢𑀺 𑀆𑀳 ‘‘𑀳𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀳𑀢𑁆𑀣𑁄 𑀤𑀻𑀖𑁂𑀦 𑀬𑀲𑁆𑀲 𑀢𑀁 𑀳𑀢𑁆𑀣𑀤𑀻𑀖𑀁. 𑀢𑀢𑁄𑀢𑀺 𑀢𑀲𑁆𑀫𑀸 𑀳𑀢𑁆𑀣𑀢𑁄. 𑀉𑀧𑀟𑁆𑀠𑁄 𑀳𑀢𑁆𑀣𑀲𑁆𑀲 𑀤𑀼𑀢𑀺𑀬𑁄 𑀪𑀸𑀕𑁄 𑀯𑀺𑀤𑀢𑁆𑀣𑀺𑀲𑀗𑁆𑀔𑀸𑀢𑁄 𑀯𑀺𑀢𑁆𑀣𑀸𑀭𑁂𑀦 𑀬𑀲𑁆𑀲 𑀢𑀁 𑀉𑀧𑀟𑁆𑀠𑀯𑀺𑀢𑁆𑀣𑀸𑀭𑀁.

𑁫𑁩. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀯𑀺𑀥𑀸𑀦𑀁 𑀢𑁂𑀘𑀻𑀯𑀭𑀺𑀓𑀲𑁆𑀲𑁂𑀯 𑀯𑀲𑁂𑀦, 𑀅𑀧𑀭𑁄 𑀧𑀦 𑀅𑀜𑁆𑀜𑀣𑀸 𑀧𑀝𑀺𑀧𑀚𑁆𑀚𑀢𑀻𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀺𑀘𑀻𑀯𑀭𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀸𑀫𑁂𑀦𑀸𑀥𑀺𑀝𑁆𑀞𑀺𑀢𑀸𑀦𑀺 𑀢𑀻𑀡𑀺 𑀘𑀻𑀯𑀭𑀸𑀦𑀺 𑀏𑀢𑀲𑁆𑀲𑀸𑀢𑀺 𑀢𑀺𑀘𑀻𑀯𑀭𑁄. 𑀢𑀲𑁆𑀲 𑀯𑀺𑀦𑀬𑀢𑁂𑀘𑀻𑀯𑀭𑀺𑀓𑀲𑁆𑀲𑀸𑀢𑀺 𑀅𑀢𑁆𑀣𑁄, 𑀦 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑀸𑀫𑁂𑀦 𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀲. 𑀯𑀺𑀦𑀬𑀢𑁂𑀘𑀻𑀯𑀭𑀺𑀓𑀲𑁆𑀲 𑀧𑀦 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀧𑀭𑀺𑀳𑀸𑀭𑁄 𑀦𑀢𑁆𑀣𑀺. 𑀧𑀭𑀺𑀓𑁆𑀔𑀸𑀭𑀘𑁄𑀴𑀺𑀬𑁄𑀢𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀫𑀲𑁆𑀲 𑀅𑀢𑁆𑀣𑀻𑀢𑀺 𑀡𑀺𑀓𑁂𑀦 𑀬-𑀓𑀸𑀭𑁄. 𑀲𑀩𑁆𑀩𑀦𑁆𑀢𑀺 𑀲𑀓𑀮𑀁 𑀦𑀯𑀯𑀺𑀥𑀫𑁆𑀧𑀺 𑀘𑀻𑀯𑀭𑀁. 𑀢𑀣𑀸 𑀯𑀢𑁆𑀯𑀸𑀢𑀺 𑀏𑀓𑀩𑀳𑀼𑀪𑀸𑀯𑀁, 𑀲𑀦𑁆𑀦𑀺𑀳𑀺𑀢𑀸𑀲𑀦𑁆𑀦𑀺𑀳𑀺𑀢𑀪𑀸𑀯𑀜𑁆𑀘 𑀜𑀢𑁆𑀯𑀸 ‘‘𑀇𑀫𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺𑀆𑀤𑀺𑀦𑀸 𑀯𑀢𑁆𑀯𑀸. 𑀅𑀥𑀺𑀝𑁆𑀞𑀢𑀻𑀢𑀺 𑀅𑀥𑀺𑀝𑁆𑀞𑀸𑀢𑀺.

𑁫𑁪. 𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑀁 𑀧𑀦 𑀧𑀭𑀺𑀪𑀼𑀜𑁆𑀚𑀢𑁄 𑀓𑀣𑀁 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀻𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀘𑁆𑀙𑁂𑀤𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀘𑁆𑀙𑁂𑀤𑁄 𑀘 𑀯𑀺𑀲𑁆𑀲𑀚𑁆𑀚𑀦𑀜𑁆𑀘 𑀕𑀸𑀳𑁄 𑀘 𑀯𑀺𑀩𑁆𑀪𑀫𑁄 𑀘𑀸𑀢𑀺 𑀤𑁆𑀯𑀦𑁆𑀤𑁄. 𑀅𑀘𑁆𑀙𑁂𑀤𑁄 𑀦𑀸𑀫 𑀘𑁄𑀭𑀸𑀤𑀻𑀳𑀺 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀡𑀁. 𑀯𑀺𑀲𑁆𑀲𑀚𑁆𑀚𑀦𑀁 𑀧𑀭𑁂𑀲𑀁 𑀤𑀸𑀦𑀁. 𑀕𑀸𑀳𑁄 𑀯𑀺𑀲𑁆𑀲𑀸𑀲𑁂𑀦 𑀕𑀳𑀡𑀁. 𑀯𑀺𑀩𑁆𑀪𑀫𑁄 𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀕𑀺𑀳𑀺𑀪𑀸𑀯𑀽𑀧𑀕𑀫𑀦𑀁. 𑀢𑀤𑀸𑀧𑀺 𑀢𑀲𑁆𑀲 𑀅𑀜𑁆𑀜𑀲𑁆𑀲 𑀤𑀸𑀦𑁂 𑀯𑀺𑀬 𑀘𑀻𑀯𑀭𑀲𑁆𑀲 𑀦𑀺𑀭𑀸𑀮𑀬𑀪𑀸𑀯𑁂𑀦 𑀧𑀦 𑀧𑀭𑀺𑀘𑁆𑀘𑀸𑀕𑁄𑀢𑀺. 𑀝𑀻𑀓𑀸𑀬𑀁 𑀧𑀦 𑀪𑀸𑀤𑀺𑀲𑁄 𑀪𑀺𑀓𑁆𑀔𑀼𑀬𑁂𑀯𑀸𑀢𑀺 𑀅𑀥𑀺𑀝𑁆𑀞𑀸𑀦𑀁 𑀦 𑀯𑀺𑀚𑀳𑀢𑀻𑀢𑀺 𑀅𑀢𑁆𑀣𑀁 𑀯𑀺𑀓𑀧𑁆𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀕𑀺𑀳𑀺𑀪𑀸𑀯𑀽𑀧𑀕𑀫𑀦𑀁 𑀯𑀼𑀢𑁆𑀢𑀁, 𑀢𑀁 𑀦 𑀕𑀳𑁂𑀢𑀩𑁆𑀩𑀁, 𑀓𑀸𑀭𑀡𑀁 𑀧𑀦𑁂𑀢𑁆𑀣 𑀅𑀫𑁆𑀳𑀸𑀓𑀁 𑀕𑀭𑀽𑀳𑀺𑀬𑁂𑀯 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁪𑁬𑁯) ‘‘𑀪𑀺𑀓𑁆𑀔𑀼𑀦𑀺𑀬𑀸 ‘𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦𑀸’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀅𑀯𑀼𑀢𑁆𑀢𑀢𑁆𑀢𑀸 𑀪𑀺𑀓𑁆𑀔𑀼𑀦𑀺𑀬𑀸 𑀳𑀺 𑀕𑀺𑀳𑀺𑀪𑀸𑀯𑀽𑀧𑀕𑀫𑀦𑁂 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑀁 𑀯𑀺𑀲𑀼𑀁 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺 𑀢𑀲𑁆𑀲𑀸 𑀯𑀺𑀩𑁆𑀪𑀫𑀦𑁂𑀦𑁂𑀯 𑀅𑀲𑁆𑀲𑀫𑀡𑀻𑀪𑀸𑀯𑀢𑁄’’𑀢𑀺 𑀯𑀼𑀢𑁆𑀢𑀁. 𑀦𑀦𑀼 𑀘 𑀪𑀺𑀓𑁆𑀔𑀼𑀦𑁄 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀲𑀺𑀓𑁆𑀔𑀲𑁆𑀲 𑀕𑀺𑀳𑀺𑀪𑀸𑀯𑀽𑀧𑀕𑀫𑀦𑁂𑀦 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑁂𑀦 𑀦𑀺𑀭𑀸𑀮𑀬𑀪𑀸𑀯𑁄 𑀓𑀸𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑁄, 𑀏𑀯𑀁 𑀲𑀢𑀺 𑀧𑀭𑀺𑀯𑀢𑁆𑀢𑀮𑀺𑀗𑁆𑀕𑀲𑁆𑀲 𑀦𑀢𑁆𑀣𑀺 𑀦𑀺𑀭𑀸𑀮𑀬𑀪𑀸𑀯𑁄𑀢𑀺 𑀓𑀣𑀫𑀲𑁆𑀲 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑀣𑀸𑀧𑀺 𑀩𑀼𑀤𑁆𑀥𑀫𑀢𑀜𑁆𑀜𑀽𑀳𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁧.𑁬𑁯) ‘‘𑀬𑀁 𑀧𑀦𑀲𑁆𑀲 𑀪𑀺𑀓𑁆𑀔𑀼𑀪𑀸𑀯𑁂 𑀅𑀥𑀺𑀝𑁆𑀞𑀺𑀢𑀁 𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑁄 𑀘, 𑀢𑀁 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀺, 𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀦𑀢𑁆𑀣𑁂𑀢𑁆𑀣 𑀤𑁄𑀲𑁄𑀢𑀺.

𑀫𑀸𑀭𑀡𑀮𑀺𑀗𑁆𑀕𑀲𑀺𑀓𑁆𑀔𑀸𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀉𑀧𑀘𑀸𑀭𑁂𑀦 𑀯𑀸 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑀁 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀜𑁆𑀘 ‘‘𑀮𑀺𑀗𑁆𑀕𑀲𑀺𑀓𑁆𑀔𑀸’’𑀢𑀺 𑀘 𑀯𑀼𑀢𑁆𑀢𑀁. 𑀇𑀢𑀺 𑀏𑀢𑁂 𑀅𑀝𑁆𑀞 𑀲𑀩𑁆𑀩𑁂𑀲𑀼 𑀦𑀯𑀲𑀼 𑀘𑀻𑀯𑀭𑁂𑀲𑀼 𑀅𑀥𑀺𑀝𑁆𑀞𑀸𑀦𑀲𑁆𑀲 𑀯𑀺𑀬𑁄𑀕𑁄 𑀯𑀺𑀧𑁆𑀧𑀯𑀸𑀲𑁄, 𑀢𑀲𑁆𑀲 𑀓𑀸𑀭𑀡𑀸 𑀳𑁄𑀦𑁆𑀢𑀻𑀢𑀺 𑀧𑀸𑀞𑀲𑁂𑀲𑁄. 𑀢𑀺𑀘𑀻𑀯𑀭𑀲𑁆𑀲 𑀧𑀦 𑀦 𑀓𑁂𑀯𑀮𑀁 𑀇𑀫𑁂𑀬𑁂𑀯 𑀅𑀝𑁆𑀞, 𑀯𑀺𑀦𑀺𑀯𑀺𑀤𑁆𑀥𑀙𑀺𑀤𑁆𑀤𑀜𑁆𑀘 𑀅𑀥𑀺𑀝𑁆𑀞𑀸𑀦𑀯𑀺𑀬𑁄𑀕𑀓𑀸𑀭𑀡𑀦𑁆𑀢𑀺 𑀮𑀺𑀗𑁆𑀕𑀯𑀘𑀦𑀜𑁆𑀘 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀅𑀩𑁆𑀪𑀦𑁆𑀢𑀭𑁂 𑀏𑀓𑀲𑁆𑀲𑀧𑀺 𑀢𑀦𑁆𑀢𑀼𑀦𑁄 𑀅𑀪𑀸𑀯𑁂𑀦 𑀯𑀺𑀦𑀺𑀯𑀺𑀤𑁆𑀥𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀢𑀙𑀺𑀤𑁆𑀤𑀁𑀓𑀦𑀺𑀝𑁆𑀞𑀗𑁆𑀕𑀼𑀮𑀺𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑀁 𑀯𑀺𑀦𑀺𑀯𑀺𑀤𑁆𑀥𑀙𑀺𑀤𑁆𑀤𑀁. 𑀢𑀢𑁆𑀣 𑀲𑀗𑁆𑀖𑀸𑀝𑀺𑀬𑀸 𑀘 𑀉𑀢𑁆𑀢𑀭𑀸𑀲𑀗𑁆𑀕𑀲𑁆𑀲 𑀘 𑀤𑀻𑀖𑀦𑁆𑀢𑀢𑁄 𑀯𑀺𑀤𑀢𑁆𑀣𑀺𑀧𑁆𑀧𑀫𑀸𑀡𑀲𑁆𑀲, 𑀢𑀺𑀭𑀺𑀬𑀦𑁆𑀢𑀢𑁄 𑀅𑀝𑁆𑀞𑀗𑁆𑀕𑀼𑀮𑀧𑁆𑀧𑀫𑀸𑀡𑀲𑁆𑀲, 𑀅𑀦𑁆𑀢𑀭𑀯𑀸𑀲𑀓𑀲𑁆𑀲 𑀧𑀦 𑀤𑀻𑀖𑀦𑁆𑀢𑀢𑁄 𑀯𑀺𑀤𑀢𑁆𑀣𑀺𑀧𑁆𑀧𑀫𑀸𑀡𑀲𑁆𑀲𑁂𑀯 𑀢𑀺𑀭𑀺𑀬𑀦𑁆𑀢𑀢𑁄 𑀘𑀢𑀼𑀭𑀗𑁆𑀕𑀼𑀮𑀧𑁆𑀧𑀫𑀸𑀡𑀲𑁆𑀲 𑀧𑀤𑁂𑀲𑀲𑁆𑀲 𑀑𑀭𑀢𑁄 𑀙𑀺𑀤𑁆𑀤𑀁 𑀅𑀥𑀺𑀝𑁆𑀞𑀸𑀦𑀁 𑀪𑀺𑀦𑁆𑀤𑀢𑀺, 𑀲𑀽𑀘𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀲𑀽𑀘𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀦 𑀘 𑀙𑀺𑀦𑁆𑀤𑀺𑀢𑁆𑀯𑀸 𑀤𑀼𑀩𑁆𑀩𑀮𑀝𑁆𑀞𑀸𑀦𑀸𑀧𑀦𑀬𑀦𑁂𑀦 𑀙𑀺𑀤𑁆𑀤𑀁 𑀅𑀤𑀲𑁆𑀲𑁂𑀢𑁆𑀯𑀸 𑀓𑀸𑀢𑀩𑁆𑀩𑀁.

𑁫𑁫. 𑀇𑀤𑀸𑀦𑀺 𑀅𑀓𑀧𑁆𑀧𑀺𑀬𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀼𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀼𑀲𑀸 𑀘 𑀯𑀸𑀓𑀸 𑀘 𑀨𑀮𑀓𑀸𑀦𑀺 𑀘, 𑀢𑁂𑀲𑀁 𑀘𑀻𑀭𑀸𑀦𑀺 𑀓𑀼𑀲…𑀧𑁂… 𑀘𑀻𑀭𑀸𑀦𑀺. 𑀢𑀢𑁆𑀣 𑀓𑀼𑀲𑁂𑀦 𑀕𑀦𑁆𑀣𑁂𑀢𑁆𑀯𑀸 𑀓𑀢𑀁 𑀓𑀼𑀲𑀘𑀻𑀭𑀁. 𑀢𑀣𑀸 𑀯𑀸𑀓𑁂𑀦 𑀕𑀦𑁆𑀣𑁂𑀢𑁆𑀯𑀸 𑀓𑀢𑀁 𑀯𑀸𑀓𑀘𑀻𑀭𑀁, 𑀢𑀸𑀧𑀲𑀸𑀦𑀁 𑀯𑀓𑁆𑀓𑀮𑀁. 𑀨𑀮𑀓𑀲𑀡𑁆𑀞𑀸𑀦𑀸𑀦𑀺 𑀨𑀮𑀓𑀸𑀦𑀺 𑀲𑀺𑀩𑁆𑀩𑀺𑀢𑁆𑀯𑀸 𑀓𑀢𑀁 𑀨𑀮𑀓𑀘𑀻𑀭𑀁. 𑀓𑁂𑀲𑀯𑀸𑀮𑀚𑀦𑁆𑀢𑀺 𑀓𑁂𑀲𑁂𑀳𑀺 𑀘 𑀯𑀸𑀮𑁂𑀳𑀺 𑀘 𑀚𑀸𑀢𑀁 𑀯𑀸𑀬𑀺𑀢𑀁 𑀓𑀫𑁆𑀩𑀮𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀮𑀽𑀓𑀧𑀓𑁆𑀔𑀸𑀚𑀺𑀦𑀓𑁆𑀔𑀺𑀧𑁂𑀢𑀺 𑀉𑀮𑀽𑀓𑀸𑀦𑀁 𑀓𑁄𑀲𑀺𑀬𑀲𑀓𑀼𑀡𑀸𑀦𑀁 𑀧𑀓𑁆𑀔𑀁 𑀧𑀓𑁆𑀔𑁂𑀦 𑀓𑀢𑀁 𑀦𑀺𑀯𑀸𑀲𑀦𑀜𑁆𑀘 𑀅𑀚𑀺𑀦𑀓𑁆𑀔𑀺𑀧𑀁 𑀲𑀮𑁄𑀫𑀁 𑀲𑀔𑀼𑀭𑀁 𑀅𑀚𑀺𑀦𑀫𑀺𑀕𑀸𑀦𑀁 𑀘𑀫𑁆𑀫𑀜𑁆𑀘 𑀥𑀸𑀭𑀬𑀢𑁄 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁬. 𑀓𑀤𑀮𑁂𑀭𑀓𑀓𑁆𑀓𑀤𑀼𑀲𑁆𑀲𑁂𑀲𑀽𑀢𑀺 𑀓𑀤𑀮𑀺𑀬𑁄 𑀘 𑀏𑀭𑀓𑁄 𑀘 𑀅𑀓𑁆𑀓𑁄 𑀘, 𑀢𑁂𑀲𑀁 𑀤𑀼𑀲𑁆𑀲𑀸𑀦𑀺 𑀯𑀢𑁆𑀣𑀸𑀦𑀺, 𑀢𑁂𑀲𑀼 𑀘𑁂𑀯 𑀫𑀓𑀘𑀺𑀯𑀸𑀓𑁂𑀳𑀺 𑀓𑀢𑁂 𑀧𑁄𑀢𑁆𑀣𑀓𑁂 𑀘𑀸𑀧𑀺 𑀤𑀼𑀓𑁆𑀓𑀝𑀁. 𑀦𑀺𑀫𑀺𑀢𑁆𑀢𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀁. 𑀓𑀤𑀮𑀺𑀤𑀼𑀲𑁆𑀲𑀸𑀤𑀺𑀲𑀤𑁆𑀤𑁂𑀦 𑀢𑀁𑀥𑀸𑀭𑀡𑀫𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 𑀢𑀁𑀥𑀸𑀭𑀡𑀦𑀺𑀫𑀺𑀢𑁆𑀢𑀁 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀩𑁆𑀩𑀢𑁆𑀣. ‘‘𑀦𑀻𑀮𑀓𑁄 𑀘𑀸’’𑀢𑀺𑀆𑀤𑀺𑀦𑀸 𑀤𑁆𑀯𑀦𑁆𑀤𑁄. 𑀲𑀩𑁆𑀩𑀸 𑀦𑀻𑀮𑀓…𑀧𑁂… 𑀓𑀡𑁆𑀳𑀓𑀸𑀢𑀺 𑀓𑀫𑁆𑀫𑀥𑀸𑀭𑀬𑁄. 𑀦𑀻𑀮𑀸𑀤𑀺𑀯𑀡𑁆𑀡𑀬𑁄𑀕𑁂𑀦 𑀯𑀢𑁆𑀣𑀁 𑀦𑀻𑀮𑀸𑀤𑀺. 𑀦𑀻𑀮𑀓𑀁 𑀉𑀫𑀸𑀧𑀼𑀧𑁆𑀨𑀯𑀡𑁆𑀡𑀁. 𑀫𑀜𑁆𑀚𑁂𑀝𑁆𑀞𑀁 𑀫𑀜𑁆𑀚𑁂𑀝𑁆𑀞𑀺𑀓𑀯𑀡𑁆𑀡𑀁. 𑀧𑀻𑀢𑀁 𑀓𑀡𑀺𑀓𑀸𑀭𑀧𑀼𑀧𑁆𑀨𑀯𑀡𑁆𑀡𑀁. 𑀮𑁄𑀳𑀺𑀢𑀁 𑀚𑀬𑀲𑀼𑀫𑀦𑀧𑀼𑀧𑁆𑀨𑀯𑀡𑁆𑀡𑀁. 𑀓𑀡𑁆𑀳𑀓𑀁 𑀅𑀤𑁆𑀤𑀸𑀭𑀺𑀝𑁆𑀞𑀓𑀯𑀡𑁆𑀡𑀁. 𑀲𑀩𑁆𑀩-𑀲𑀤𑁆𑀤𑁄 𑀧𑀦𑁂𑀢𑁆𑀣 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄.

𑁫𑁭. 𑀫𑀳𑀸…𑀧𑁂… 𑀭𑀢𑁆𑀢𑁂𑀢𑀺 𑀫𑀳𑀸𑀭𑀗𑁆𑀕𑁄 𑀘 𑀫𑀳𑀸𑀦𑀸𑀫𑀭𑀗𑁆𑀕𑁄 𑀘, 𑀢𑁂𑀳𑀺 𑀭𑀢𑁆𑀢𑁂. 𑀏𑀢𑁆𑀣𑀸𑀧𑀺 𑀧𑀼𑀦 𑀲𑀼𑀬𑁆𑀬𑀫𑀸𑀦𑀁 𑀲𑀩𑁆𑀩𑀲𑀤𑁆𑀤𑀫𑀦𑀼𑀯𑀢𑁆𑀢𑀺𑀬𑀁, ‘‘𑀲𑀩𑁆𑀩𑀫𑀳𑀸𑀭𑀗𑁆𑀕𑀭𑀢𑁆𑀢𑁂’’𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀦𑀸 𑀘 𑀅𑀲𑀩𑁆𑀩𑀦𑀻𑀮𑀓𑀸𑀤𑀺 𑀓𑀧𑁆𑀧𑀺𑀬𑀭𑀚𑀦𑀭𑀚𑀺𑀢𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀦𑀢𑁆𑀣𑀺 𑀤𑁄𑀲𑁄𑀢𑀺 𑀤𑀻𑀧𑁂𑀢𑀺. 𑀢𑀢𑁆𑀣 𑀫𑀳𑀸𑀭𑀗𑁆𑀕𑁄 𑀲𑀢𑀧𑀤𑀺𑀧𑀺𑀝𑁆𑀞𑀺𑀯𑀡𑁆𑀡𑁄. 𑀫𑀳𑀸𑀦𑀸𑀫𑀭𑀗𑁆𑀕𑁄 𑀲𑀫𑁆𑀪𑀺𑀦𑁆𑀦𑀯𑀡𑁆𑀡𑁄, 𑀲𑁄 𑀧𑀦 𑀧𑀡𑁆𑀟𑀼𑀧𑀮𑀸𑀲𑀯𑀡𑁆𑀡𑁄 𑀳𑁄𑀢𑀺, 𑀧𑀤𑀼𑀫𑀯𑀡𑁆𑀡𑁄𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀺𑀭𑀻𑀝𑀓𑁂𑀢𑀺 𑀢𑀁 𑀦𑀸𑀫𑀓 𑀭𑀼𑀓𑁆𑀔𑀢𑀘𑁂. 𑀅𑀘𑁆𑀙𑀺𑀦𑁆𑀦𑀤𑀻𑀖𑀤𑀲𑀓𑁂𑀢𑀺 𑀲𑀩𑁆𑀩𑀲𑁄 𑀅𑀘𑁆𑀙𑀺𑀦𑁆𑀦𑀢𑁆𑀢𑀸 𑀅𑀘𑁆𑀙𑀺𑀦𑁆𑀦𑀸 𑀘 𑀫𑀚𑁆𑀛𑁂 𑀙𑀺𑀦𑁆𑀦𑀢𑁆𑀢𑀸 𑀤𑀻𑀖𑀸 𑀘 𑀲𑀸 𑀤𑀲𑀸 𑀘 𑀯𑀢𑁆𑀣𑀓𑁄𑀝𑀺 𑀬𑀲𑁆𑀲𑀸𑀢𑀺 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑁄. 𑀨𑀮𑀧𑀼𑀧𑁆𑀨𑀤𑀲𑁂𑀢𑀺 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀺𑀩𑁆𑀩𑀺𑀢𑁆𑀯𑀸 𑀓𑀢𑀸 𑀨𑀮𑀲𑀤𑀺𑀲𑀸 𑀤𑀲𑀸 ‘‘𑀨𑀮𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀓𑁂𑀢𑀓𑀸𑀤𑀺 𑀧𑀼𑀧𑁆𑀨𑀲𑀤𑀺𑀲𑀸𑀦𑀺 ‘‘𑀧𑀼𑀧𑁆𑀨𑀸𑀦𑀻’’𑀢𑀺 𑀘, 𑀨𑀮𑀸 𑀘 𑀧𑀼𑀧𑁆𑀨𑀸 𑀘 𑀤𑀲𑀸 𑀬𑀲𑁆𑀲, 𑀨𑀮𑀲𑀤𑀺𑀲𑁂 𑀤𑀲𑁂, 𑀧𑀼𑀧𑁆𑀨𑀲𑀤𑀺𑀲𑁂 𑀤𑀲𑁂 𑀘𑀸𑀢𑀺 𑀅𑀢𑁆𑀣𑁄. 𑀯𑁂𑀞𑀦𑁂𑀢𑀺 𑀲𑀻𑀲𑀯𑁂𑀞𑀦𑁂. 𑀢𑀣𑀸𑀢𑀺 𑀇𑀫𑀺𑀦𑀸 𑀲𑀩𑁆𑀩𑀦𑀻𑀮𑀓𑀸𑀤𑀻𑀲𑀼 𑀤𑀼𑀓𑁆𑀓𑀝𑀁 𑀅𑀢𑀺𑀤𑀺𑀲𑀢𑀺. 𑀲𑀩𑁆𑀩𑀦𑁆𑀢𑀺 𑀓𑀼𑀲𑀘𑀻𑀭𑀸𑀤𑀺𑀓𑀁 𑀲𑀓𑀮𑀁. 𑀅𑀘𑁆𑀙𑀺𑀦𑁆𑀦𑀁 𑀘𑀻𑀯𑀭𑀁 𑀬𑀲𑁆𑀲 𑀲𑁄 𑀮𑀪𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀘𑀻𑀯𑀭𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀭𑀚𑀦𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁮. 𑀫𑀽𑀮𑀜𑁆𑀘 𑀔𑀦𑁆𑀥𑁄 𑀘 𑀢𑀘𑁄 𑀘 𑀧𑀢𑁆𑀢𑀜𑁆𑀘 𑀨𑀮𑀜𑁆𑀘 𑀧𑀼𑀧𑁆𑀨𑀜𑁆𑀘, 𑀢𑁂𑀲𑀁 𑀧𑀪𑁂𑀤𑁄𑀢𑀺 𑀙𑀝𑁆𑀞𑀻𑀢𑀧𑁆𑀧𑀼𑀭𑀺𑀲𑁄. 𑀅𑀣 𑀯𑀸 𑀧𑀪𑁂𑀤-𑀲𑀤𑁆𑀤𑀲𑁆𑀲 𑀓𑀫𑁆𑀫𑀲𑀸𑀥𑀦𑀢𑁆𑀢𑁂 𑀢𑀸𑀦𑀺𑀬𑁂𑀯 𑀧𑀪𑁂𑀤𑁄𑀢𑀺 𑀓𑀫𑁆𑀫𑀥𑀸𑀭𑀬𑁄, 𑀢𑀢𑁄. 𑀭𑀚𑀦𑁆𑀢𑀺 𑀏𑀢𑁂𑀳𑀻𑀢𑀺 𑀭𑀚𑀦𑀸𑀦𑀺, 𑀫𑀽𑀮𑀸𑀤𑀻𑀦𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀙 𑀭𑀚𑀦𑀸𑀦𑀺 𑀫𑀽𑀮𑀭𑀚𑀦’’𑀦𑁆𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁩𑁪𑁪) 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀭𑀚𑀦𑀸 𑀙𑀧𑁆𑀧𑀓𑀸𑀭𑀸𑀦𑀺, 𑀅𑀦𑀼𑀜𑁆𑀜𑀸𑀢𑀸𑀦𑀺 𑀲𑀢𑁆𑀣𑀼𑀦𑀸’’𑀢𑀺.

𑁫𑁯. 𑀫𑀽𑀮𑁂𑀢𑀺 𑀫𑀽𑀮𑀭𑀚𑀦𑁂 𑀳𑀮𑀺𑀤𑁆𑀤𑀺𑀁 𑀯𑀺𑀯𑀚𑁆𑀚𑀺𑀬 𑀲𑀩𑁆𑀩𑀁 𑀮𑀩𑁆𑀪𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀲𑀩𑁆𑀩𑀢𑁆𑀣. 𑀫𑀜𑁆𑀚𑁂𑀝𑁆𑀞𑀺 𑀘 𑀢𑀼𑀗𑁆𑀕𑀳𑀸𑀭𑀓𑁄 𑀘𑀸𑀢𑀺 𑀤𑁆𑀯𑀦𑁆𑀤𑁄. 𑀅𑀮𑁆𑀮𑀺-𑀲𑀤𑁆𑀤𑁂𑀦 𑀦𑀻𑀮𑀺-𑀲𑀤𑁆𑀤𑁂𑀦 𑀘 𑀢𑁂𑀲𑀁 𑀕𑀘𑁆𑀙𑀚𑀸𑀢𑀻𑀦𑀁 𑀧𑀢𑁆𑀢𑀸𑀦𑀺 𑀕𑀳𑀺𑀢𑀸𑀦𑀺 𑀉𑀧𑀘𑀸𑀭𑁂𑀦, 𑀢𑀣𑀸 𑀮𑁄𑀤𑁆𑀤-𑀲𑀤𑁆𑀤𑁂𑀦 𑀓𑀡𑁆𑀟𑀼𑀮-𑀲𑀤𑁆𑀤𑁂𑀦 𑀘 𑀢𑀘𑁄, 𑀓𑀼𑀲𑀼𑀫𑁆𑀪-𑀲𑀤𑁆𑀤𑁂𑀦 𑀓𑀺𑀁 𑀲𑀼𑀓-𑀲𑀤𑁆𑀤𑁂𑀦 𑀘 𑀧𑀼𑀧𑁆𑀨𑀸𑀦𑀺. 𑀢𑁂𑀦𑁂𑀯 𑀘 𑀢𑀸𑀦𑀺 𑀦𑀧𑀼𑀁𑀲𑀓𑀸𑀦𑀺. 𑀢𑀼𑀗𑁆𑀕𑀳𑀸𑀭𑀓𑁄 𑀦𑀸𑀫 𑀏𑀓𑁄 𑀓𑀡𑁆𑀝𑀓𑀭𑀼𑀓𑁆𑀔𑁄, 𑀢𑀲𑁆𑀲 𑀳𑀭𑀺𑀢𑀸𑀮𑀯𑀡𑁆𑀡𑀁 𑀔𑀦𑁆𑀥𑀭𑀚𑀦𑀁 𑀳𑁄𑀢𑀺. 𑀅𑀮𑁆𑀮𑀺𑀧𑀢𑁆𑀢𑁂𑀦 𑀏𑀓𑀯𑀸𑀭𑀁 𑀕𑀺𑀳𑀺𑀧𑀭𑀺𑀪𑀼𑀢𑁆𑀢𑀁 𑀭𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀨𑀮𑀭𑀚𑀦𑁂 𑀲𑀩𑁆𑀩𑀫𑁆𑀧𑀺 𑀯𑀝𑁆𑀝𑀢𑀺.

𑀭𑀚𑀦𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁬𑁦. 𑀅𑀬𑁄𑀧𑀢𑁆𑀢𑁄 𑀦𑀸𑀫 𑀅𑀬𑀲𑀸 𑀓𑀸𑀴𑀮𑁄𑀳𑁂𑀦 𑀦𑀺𑀩𑁆𑀩𑀢𑁆𑀢𑁄 𑀧𑀢𑁆𑀢𑁄. 𑀚𑀸𑀢𑀺𑀬𑀸 𑀉𑀓𑁆𑀓𑀝𑁆𑀞𑀸𑀤𑀻𑀦𑀁 𑀲𑀸𑀫𑀜𑁆𑀜𑀯𑀲𑁂𑀦. 𑀧𑀫𑀸𑀡𑀢𑁄𑀢𑀺 𑀧𑀭𑀺𑀘𑁆𑀙𑁂𑀤𑀢𑁄. 𑀢𑀬𑁄 𑀧𑀢𑁆𑀢𑀸𑀢𑀺 𑀧𑀸𑀞𑀲𑁂𑀲𑁄.

𑁬𑁧. ‘‘𑀫𑀕𑀥𑁂𑀲𑀽’’𑀢𑀺 𑀯𑀢𑁆𑀢𑀩𑁆𑀩𑁂 𑀫𑀕𑀥𑁂𑀢𑀺 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦 𑀯𑀸 ‘‘𑀧𑀘𑁆𑀘𑀸𑀲𑀸 𑀲𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀲𑀼-𑀲𑀤𑁆𑀤𑀮𑁄𑀧𑁂𑀦 𑀯𑀸 𑀯𑀼𑀢𑁆𑀢𑀁. 𑀦𑀸𑀴𑀺𑀤𑁆𑀯𑀬𑀢𑀡𑁆𑀟𑀼𑀮𑀲𑀸𑀥𑀺𑀢𑀦𑁆𑀢𑀺 𑀏𑀢𑁆𑀣 𑀫𑀕𑀥𑀸𑀧𑁂𑀓𑁆𑀔𑁄𑀧𑀺 𑀦𑀸𑀴𑀺-𑀲𑀤𑁆𑀤𑁄 𑀤𑁆𑀯𑀬-𑀲𑀤𑁆𑀤𑁂𑀦 𑀲𑀫𑀸𑀲𑁄 𑀳𑁄𑀢𑀺 𑀕𑀫𑁆𑀫𑀓𑀢𑁆𑀢𑀸𑀢𑀺 𑀦𑀸𑀴𑀺𑀬𑀸 𑀤𑁆𑀯𑀬𑀁 𑀦𑀸𑀴𑀺𑀤𑁆𑀯𑀬𑀁. 𑀢𑀢𑁆𑀣 𑀫𑀕𑀥𑀦𑀸𑀴𑀺 𑀦𑀸𑀫 𑀅𑀟𑁆𑀠𑀢𑁂𑀭𑀲𑀧𑀮𑀸 𑀳𑁄𑀢𑀺. 𑀏𑀢𑁆𑀣 𑀘 𑀅𑀟𑁆𑀠𑀢𑁂𑀭𑀲𑀧𑀮𑀸𑀦𑀺 𑀫𑀸𑀲𑀸𑀦𑀦𑁆𑀢𑀺 𑀯𑀤𑀦𑁆𑀢𑀺. 𑀦𑀸𑀴𑀺𑀤𑁆𑀯𑀬𑁂𑀦 𑀧𑀫𑀺𑀢𑀸 𑀢𑀡𑁆𑀟𑀼𑀮𑀸 𑀲𑀼𑀓𑁄𑀝𑁆𑀝𑀺𑀢𑀧𑀭𑀺𑀲𑀼𑀤𑁆𑀥𑀸 𑀅𑀦𑀼𑀧𑀳𑀢𑀧𑀼𑀭𑀸𑀡𑀲𑀸𑀮𑀺𑀢𑀡𑁆𑀟𑀼𑀮𑀸 𑀦𑀸𑀴𑀺𑀤𑁆𑀯𑀬𑀢𑀡𑁆𑀟𑀼𑀮𑀸, 𑀢𑁂𑀳𑀺 𑀲𑀸𑀥𑀺𑀢𑀁 𑀧𑀘𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀑𑀤𑀦𑀦𑁆𑀢𑀺 𑀲𑀫𑁆𑀫𑀸 𑀲𑀫𑁆𑀧𑀸𑀤𑀺𑀢𑀁 𑀅𑀯𑀲𑁆𑀲𑀸𑀯𑀺𑀢𑁄𑀤𑀦𑀁. 𑀲𑀽𑀧𑀦𑁆𑀢𑀺 𑀑𑀤𑀦𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑀧𑁆𑀧𑀫𑀸𑀡𑀁 𑀦𑀸𑀢𑀺𑀖𑀦𑀁 𑀦𑀸𑀢𑀺𑀢𑀦𑀼𑀓𑀁 𑀳𑀢𑁆𑀣𑀳𑀸𑀭𑀺𑀬𑀁 𑀲𑀩𑁆𑀩𑀲𑀫𑁆𑀪𑀸𑀭𑀲𑀗𑁆𑀔𑀢𑀁 𑀫𑀼𑀕𑁆𑀕𑀲𑀼𑀧𑀁. 𑀩𑁆𑀬𑀜𑁆𑀚𑀦𑀜𑁆𑀘 𑀢𑀤𑀽𑀧𑀺𑀬𑀦𑁆𑀢𑀺 𑀢𑀲𑁆𑀲 𑀑𑀤𑀦𑀲𑁆𑀲 𑀉𑀧𑀺𑀬𑀁 𑀅𑀦𑀼𑀭𑀽𑀧𑀁 𑀬𑀸𑀯 𑀘𑀭𑀺𑀫𑀸𑀮𑁄𑀧𑀧𑁆𑀧𑀳𑁄𑀦𑀓𑀁 𑀫𑀘𑁆𑀙𑀫𑀁𑀲𑀸𑀤𑀺𑀩𑁆𑀬𑀜𑁆𑀚𑀦𑀜𑁆𑀘 𑀉𑀓𑁆𑀓𑀝𑁆𑀞𑁄 𑀕𑀡𑁆𑀳𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁬𑁨. 𑀢𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀑𑀤𑀦𑀸𑀤𑀺𑀦𑁄. 𑀉𑀧𑀟𑁆𑀠𑁄𑀢𑀺 𑀉𑀧𑀟𑁆𑀠𑀁 𑀦𑀸𑀴𑀺𑀓𑁄𑀤𑀦𑀸𑀤𑀺 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀉𑀧𑀟𑁆𑀠𑁄. 𑀏𑀯-𑀓𑀸𑀭𑁂𑀦 𑀅𑀢𑀺𑀭𑁂𑀓𑀁 𑀦𑀺𑀯𑀢𑁆𑀢𑁂𑀢𑀺. 𑀢𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀦𑀸𑀴𑀺𑀓𑁄𑀤𑀦𑀸𑀤𑀺𑀢𑁄. 𑀉𑀓𑁆𑀓𑀝𑁆𑀞𑀢𑁄 𑀉𑀓𑁆𑀓𑀝𑁆𑀞𑁄 𑀘 𑀑𑀫𑀓𑁄𑀫𑀓𑁄 𑀘 𑀅𑀧𑀢𑁆𑀢𑁄𑀢𑀺 𑀬𑁄𑀚𑀦𑀸. 𑀑𑀫𑀓𑀢𑁄 𑀑𑀫𑀓𑁄 𑀑𑀫𑀓𑁄𑀫𑀓𑁄. 𑀇𑀫𑀺𑀦𑀸 𑀧𑀼𑀦 𑀧𑀢𑁆𑀢𑀤𑁆𑀯𑀬𑀤𑀲𑁆𑀲𑀦𑁂𑀦 𑀧𑀫𑀸𑀡𑀢𑁄 𑀢𑀬𑁄𑀧𑀺 𑀧𑀢𑁆𑀢𑀸 𑀯𑀺𑀪𑀸𑀕𑀢𑁄 𑀦𑀯 𑀳𑁄𑀦𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀢𑀢𑁆𑀣 𑀬𑀲𑁆𑀫𑀺𑀁 𑀫𑀕𑀥𑀦𑀸𑀴𑀺𑀤𑁆𑀯𑀬𑀢𑀡𑁆𑀟𑀼𑀮𑁄𑀤𑀦𑀸𑀤𑀺𑀓𑀁 𑀲𑀩𑁆𑀩𑀫𑁆𑀧𑀺 𑀯𑀟𑁆𑀠𑀦𑀧𑀓𑁆𑀔𑁂 𑀞𑀺𑀢𑀁 𑀧𑀓𑁆𑀔𑀺𑀢𑁆𑀢𑀁 𑀲𑀘𑁂 𑀧𑀢𑁆𑀢𑀲𑁆𑀲 𑀫𑀼𑀔𑀯𑀝𑁆𑀝𑀺𑀬𑀸 𑀳𑁂𑀝𑁆𑀞𑀺𑀫𑀭𑀸𑀚𑀺𑀲𑀫𑀁 𑀢𑀺𑀝𑁆𑀞𑀢𑀺, 𑀲𑀼𑀢𑁆𑀢𑁂𑀦 𑀯𑀸 𑀳𑀻𑀭𑁂𑀦 𑀯𑀸 𑀙𑀺𑀦𑁆𑀤𑀦𑁆𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀯𑀸 𑀳𑀻𑀭𑀲𑁆𑀲 𑀯𑀸 𑀳𑁂𑀝𑁆𑀞𑀺𑀫𑀦𑁆𑀢𑀁 𑀨𑀼𑀲𑀢𑀺, 𑀅𑀬𑀁 𑀉𑀓𑁆𑀓𑀝𑁆𑀞𑁄 𑀦𑀸𑀫 𑀧𑀢𑁆𑀢𑁄. 𑀲𑀘𑁂 𑀢𑀁 𑀭𑀸𑀚𑀺𑀁 𑀅𑀢𑀺𑀓𑁆𑀓𑀫𑁆𑀫 𑀣𑀽𑀧𑀻𑀓𑀢𑀁 𑀢𑀺𑀝𑁆𑀞𑀢𑀺, 𑀅𑀬𑀁 𑀉𑀓𑁆𑀓𑀝𑁆𑀞𑁄𑀫𑀓𑁄 𑀦𑀸𑀫 𑀧𑀢𑁆𑀢𑁄. 𑀲𑀘𑁂 𑀢𑀁 𑀭𑀸𑀚𑀺𑀁 𑀦 𑀲𑀫𑁆𑀧𑀸𑀧𑀼𑀡𑀸𑀢𑀺 𑀅𑀦𑁆𑀢𑁄𑀕𑀢𑀫𑁂𑀯, 𑀅𑀬𑀁 𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑁄 𑀦𑀸𑀫 𑀧𑀢𑁆𑀢𑁄. ‘‘𑀏𑀓𑀁 𑀦𑀸𑀴𑀺𑀓𑁄𑀤𑀦𑀸𑀤𑀺 𑀲𑀩𑁆𑀩𑀫𑁆𑀧𑀺 𑀧𑀓𑁆𑀔𑀺𑀢𑁆𑀢𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀳𑁂𑀝𑁆𑀞𑀺𑀫𑀭𑀸𑀚𑀺𑀲𑀫𑀁 𑀢𑀺𑀝𑁆𑀞𑀢𑀺, 𑀅𑀬𑀁 𑀫𑀚𑁆𑀛𑀺𑀫𑁄 𑀦𑀸𑀫 𑀧𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀫𑀚𑁆𑀛𑀺𑀫𑀫𑀚𑁆𑀛𑀺𑀫𑁄𑀫𑀓𑀫𑀚𑁆𑀛𑀺𑀫𑀼𑀓𑁆𑀓𑀝𑁆𑀞𑀸 𑀘 ‘‘𑀬𑀢𑁆𑀣 𑀉𑀧𑀟𑁆𑀠𑀦𑀸𑀴𑀺𑀓𑁄𑀤𑀦𑀸𑀤𑀺 𑀲𑀩𑁆𑀩𑀫𑁆𑀧𑀺 𑀧𑀓𑁆𑀔𑀺𑀢𑁆𑀢𑀁 𑀳𑁂𑀝𑁆𑀞𑀺𑀫𑀭𑀸𑀚𑀺𑀲𑀫𑀁 𑀢𑀺𑀝𑁆𑀞𑀢𑀺, 𑀅𑀬𑀁 𑀑𑀫𑀓𑁄 𑀦𑀸𑀫 𑀧𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀑𑀫𑀓𑀑𑀫𑀓𑁄𑀫𑀓𑀑𑀫𑀓𑀼𑀓𑁆𑀓𑀝𑁆𑀞𑀸 𑀘 𑀧𑀢𑁆𑀢𑀸 𑀉𑀓𑁆𑀓𑀝𑁆𑀞𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀲𑀼 𑀤𑁆𑀯𑁂 𑀅𑀧𑀢𑁆𑀢𑀸 𑀪𑀸𑀚𑀦𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸, 𑀦𑀸𑀥𑀺𑀝𑁆𑀞𑀸𑀦𑀽𑀧𑀕𑀸, 𑀦 𑀯𑀺𑀓𑀧𑁆𑀧𑀦𑀽𑀧𑀕𑀸.

𑁬𑁩. 𑀓𑀧𑁆𑀧𑁄 𑀲𑀓𑁄 𑀅𑀢𑀺𑀭𑁂𑀓𑀧𑀢𑁆𑀢𑁄 𑀤𑀲𑀸𑀳𑀧𑀭𑀫𑀁 𑀥𑀸𑀭𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀓𑀧𑁆𑀧𑁄𑀢𑀺 𑀓𑀧𑁆𑀧𑀺𑀬𑁄. 𑀲𑀓𑁄𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑁄. 𑀓𑀧𑁆𑀧𑀺𑀬𑀢𑁆𑀢𑀸 𑀧𑀦 𑀅𑀢𑁆𑀢𑀲𑀦𑁆𑀢𑀓𑀢𑁆𑀢𑀸 𑀘 𑀲𑀢𑁆𑀢𑀦𑁆𑀦𑀫𑁆𑀧𑀺 𑀅𑀥𑀺𑀝𑁆𑀞𑀸𑀦𑀯𑀺𑀓𑀧𑁆𑀧𑀦𑀽𑀧𑀕𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀅𑀬𑁄𑀧𑀢𑁆𑀢𑁄 𑀧𑀜𑁆𑀘𑀳𑀺 𑀧𑀸𑀓𑁂𑀳𑀺, 𑀫𑀢𑁆𑀢𑀺𑀓𑀸𑀧𑀢𑁆𑀢𑁄 𑀤𑁆𑀯𑀻𑀳𑀺 𑀧𑀸𑀓𑁂𑀳𑀺 𑀧𑀓𑁆𑀓𑁄 𑀅𑀥𑀺𑀝𑁆𑀞𑀸𑀦𑀽𑀧𑀕𑁄 𑀘 𑀯𑀺𑀓𑀧𑁆𑀧𑀦𑀽𑀧𑀕𑁄 𑀘, 𑀢𑀣𑀸 𑀉𑀪𑁄𑀧𑀺 𑀓𑀸𑀓𑀡𑀺𑀓𑀫𑀢𑁆𑀢𑀲𑁆𑀲𑀸𑀧𑀺 𑀫𑀽𑀮𑀲𑁆𑀲 𑀅𑀦𑀯𑀲𑁂𑀲𑁂𑀢𑁆𑀯𑀸 𑀤𑀺𑀦𑁆𑀦𑁂, 𑀲𑀩𑁆𑀩𑀲𑁄 𑀅𑀢𑁆𑀢𑀲𑀦𑁆𑀢𑀓𑀢𑁆𑀢𑁂 𑀯𑀺𑀜𑁆𑀜𑀸𑀢𑁂 𑀘 𑀅𑀥𑀺𑀝𑁆𑀞𑀸𑀦𑀯𑀺𑀓𑀧𑁆𑀧𑀦𑀽𑀧𑀕𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀢𑀺𑀭𑁂𑀓𑀧𑀢𑁆𑀢𑁄𑀢𑀺 𑀅𑀦𑀥𑀺𑀝𑁆𑀞𑀺𑀢𑀸𑀯𑀺𑀓𑀧𑁆𑀧𑀺𑀢𑀢𑀸𑀬 𑀅𑀢𑀺𑀭𑁂𑀓𑀧𑀢𑁆𑀢𑁄. 𑀅𑀥𑀺𑀝𑁆𑀞𑀸𑀦𑀧𑀘𑁆𑀘𑀼𑀤𑁆𑀥𑀸𑀭𑀸 𑀧𑀦𑁂𑀢𑁆𑀣 𑀘𑀻𑀯𑀭𑁂 𑀯𑀼𑀢𑁆𑀢𑀸𑀯. 𑀯𑀺𑀓𑀧𑁆𑀧𑁂𑀦𑁆𑀢𑁂𑀦 𑀧𑀦 𑀧𑀢𑁆𑀢𑀸𑀦𑀁 𑀏𑀓𑀩𑀳𑀼𑀪𑀸𑀯𑀁, 𑀲𑀦𑁆𑀦𑀺𑀳𑀺𑀢𑀸𑀲𑀦𑁆𑀦𑀺𑀳𑀺𑀢𑀪𑀸𑀯𑀜𑁆𑀘 𑀜𑀢𑁆𑀯𑀸 ‘‘𑀇𑀫𑀁 𑀧𑀢𑁆𑀢’’𑀦𑁆𑀢𑀺 𑀯𑀸 ‘‘𑀇𑀫𑁂 𑀧𑀢𑁆𑀢𑁂’’𑀢𑀺 𑀯𑀸 ‘‘𑀏𑀢𑀁 𑀧𑀢𑁆𑀢’’𑀦𑁆𑀢𑀺 𑀯𑀸 ‘‘𑀏𑀢𑁂 𑀧𑀢𑁆𑀢𑁂’’𑀢𑀺 𑀯𑀸 𑀯𑀢𑁆𑀯𑀸 ‘‘𑀢𑀼𑀬𑁆𑀳𑀁 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀫𑁆𑀫𑀼𑀔𑀸𑀤𑀺𑀪𑁂𑀤𑁄 𑀧𑀦𑁂𑀢𑁆𑀣 𑀘𑀻𑀯𑀭𑁂 𑀯𑀓𑁆𑀔𑀫𑀸𑀦𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀤𑀲𑀸𑀳𑀧𑀭𑀫𑀦𑁆𑀢𑀺 𑀤𑀲 𑀅𑀳𑀸𑀦𑀺 𑀧𑀭𑀫𑁄 𑀧𑀭𑀺𑀘𑁆𑀙𑁂𑀤𑁄 𑀅𑀲𑁆𑀲𑀸𑀢𑀺 𑀤𑀳𑀸𑀳𑀧𑀭𑀫𑁄, 𑀓𑀸𑀮𑁄, 𑀢𑀁. 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀥𑀸𑀭𑁂𑀬𑁆𑀬𑁄𑀢𑀺 𑀧𑀭𑀺𑀪𑁄𑀕𑀯𑀲𑁂𑀦 𑀥𑀸𑀭𑁂𑀢𑀩𑁆𑀩𑁄. 𑀢𑀲𑁆𑀫𑀺𑀁𑀓𑀸𑀮𑁂 𑀅𑀢𑀺𑀦𑀸𑀫𑀺𑀢𑁂 𑀧𑀢𑁆𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀅𑀢𑀺𑀦𑀸𑀫𑀺𑀢𑁂𑀢𑀺 𑀅𑀢𑀺𑀓𑁆𑀓𑀸𑀫𑀺𑀢𑁂 𑀦𑀺𑀲𑁆𑀲𑀕𑁆𑀕𑀺𑀬𑁄 𑀳𑁄𑀢𑀺, 𑀏𑀓𑀸𑀤𑀲𑁂 𑀅𑀭𑀼𑀡𑀼𑀕𑁆𑀕𑀫𑀦𑁂 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀧𑀤𑀪𑀸𑀚𑀦𑀻𑀬𑁂 (𑀧𑀸𑀭𑀸. 𑁬𑁦𑁨) 𑀯𑀼𑀢𑁆𑀢𑀦𑀬𑁂𑀦 𑀧𑀢𑁆𑀢𑁄 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑁄 𑀳𑁄𑀢𑀺, 𑀢𑀣𑀸 𑀲𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺 𑀘𑀲𑁆𑀲 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬𑁪. ‘‘𑀅𑀘𑁆𑀙𑁂𑀤𑀸’’𑀢𑀺𑀆𑀤𑀺 𑀘𑀻𑀯𑀭𑁂 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀫𑁂𑀯. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀫𑀭𑀡𑀼𑀤𑁆𑀥𑀝𑀸𑀢𑀺 𑀉𑀤𑁆𑀥𑀭𑀡𑀁 𑀉𑀤𑁆𑀥𑀴𑀁, 𑀧𑀘𑁆𑀘𑀼𑀤𑁆𑀥𑀸𑀭𑁄. 𑀫𑀭𑀡𑀜𑁆𑀘 𑀉𑀤𑁆𑀥𑀝𑀜𑁆𑀘 𑀫𑀭𑀡𑀼𑀤𑁆𑀥𑀝𑀸, 𑀢𑀲𑁆𑀫𑀸. 𑀙𑀺𑀤𑁆𑀤𑁂𑀦𑀸𑀢𑀺 𑀬𑁂𑀦 𑀓𑀗𑁆𑀕𑀼𑀲𑀺𑀢𑁆𑀣𑀁 𑀦𑀺𑀓𑁆𑀔𑀫𑀢𑀺 𑀘𑁂𑀯 𑀧𑀯𑀺𑀲𑀢𑀺 𑀘, 𑀢𑁂𑀦 𑀫𑀼𑀔𑀯𑀝𑁆𑀝𑀺𑀢𑁄 𑀳𑁂𑀝𑁆𑀞𑀸 𑀤𑁆𑀯𑀗𑁆𑀕𑀼𑀮𑀙𑀺𑀤𑁆𑀤𑁂𑀦. 𑀧𑀢𑁆𑀢𑀸𑀥𑀺𑀝𑁆𑀞𑀸𑀦𑀫𑀼𑀚𑁆𑀛𑀢𑀻𑀢𑀺 𑀧𑀢𑁆𑀢𑁄 𑀅𑀥𑀺𑀝𑁆𑀞𑀸𑀦𑀁 𑀉𑀚𑁆𑀛𑀢𑀺 𑀯𑀺𑀲𑁆𑀲𑀚𑁆𑀚𑀢𑀺.

𑁬𑁫. 𑀇𑀤𑀸𑀦𑀺 ‘‘𑀧𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀅𑀜𑁆𑀜𑀣𑀸 𑀧𑀭𑀺𑀳𑀭𑀡𑁂 𑀤𑀼𑀓𑁆𑀓𑀝𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀲𑁄𑀤𑀓𑀁 𑀧𑀢𑁆𑀢𑀁 𑀦 𑀧𑀝𑀺𑀲𑀸𑀫𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀦 𑀧𑀝𑀺𑀲𑀸𑀫𑁂𑀬𑁆𑀬𑀸𑀢𑀺 𑀕𑀼𑀢𑁆𑀢𑀝𑁆𑀞𑀸𑀦𑁂 𑀦 𑀦𑀺𑀓𑁆𑀔𑀺𑀧𑁂𑀬𑁆𑀬, ‘‘𑀲𑁄𑀤𑀓𑀁 𑀧𑀢𑁆𑀢𑀁 𑀉𑀡𑁆𑀳𑁂 𑀦 𑀘 𑀑𑀢𑀧𑁂’’𑀢𑀺𑀆𑀤𑀺𑀦𑀸 𑀘 𑀬𑁄𑀚𑀦𑀻𑀬𑀁. 𑀦 𑀘 𑀑𑀢𑀧𑁂𑀢𑀺 𑀦𑁂𑀯 𑀈𑀲𑀓𑀁 𑀢𑀸𑀧𑁂𑀬𑁆𑀬. 𑀦 𑀦𑀺𑀤𑀳𑁂𑀢𑀺 𑀦𑀺𑀭𑀼𑀤𑀓𑀁 𑀓𑀢𑁆𑀯𑀸𑀧𑀺 𑀪𑀼𑀲𑀁 𑀦 𑀦𑀺𑀤𑀳𑁂𑀬𑁆𑀬, 𑀯𑁄𑀤𑀓𑀁 𑀓𑀢𑁆𑀯𑀸 𑀈𑀲𑀓𑀁 𑀢𑀸𑀧𑁂𑀬𑁆𑀬𑀸𑀢𑀺𑀧𑀺 𑀩𑁆𑀬𑀢𑀺𑀭𑁂𑀓𑀢𑁆𑀣𑁄. 𑀪𑀽𑀫𑁆𑀬𑀸 𑀦 𑀞𑀧𑁂𑀢𑀺 𑀔𑀭𑀸𑀬 𑀪𑀽𑀫𑀺𑀬𑀸 𑀦 𑀞𑀧𑁂𑀬𑁆𑀬. 𑀬𑀢𑁆𑀣 𑀧𑀦 𑀯𑀡𑁆𑀡𑁄 𑀦 𑀤𑀼𑀲𑁆𑀲𑀢𑀺, 𑀏𑀯𑀭𑀽𑀧𑀸𑀬 𑀫𑀢𑁆𑀢𑀺𑀓𑀸𑀬 𑀧𑀭𑀺𑀪𑀡𑁆𑀟𑀓𑀢𑀸𑀬 𑀪𑀽𑀫𑀺𑀬𑀸 𑀯𑀸 𑀢𑀣𑀸𑀭𑀽𑀧𑀸𑀬 𑀏𑀯 𑀯𑀸𑀮𑀺𑀓𑀸𑀬 𑀯𑀸 𑀦𑀺𑀓𑁆𑀓𑀼𑀚𑁆𑀚𑀺𑀢𑁆𑀯𑀸 𑀉𑀓𑁆𑀓𑀼𑀚𑁆𑀚𑀺𑀢𑁆𑀯𑀸 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀦𑁄 𑀘 𑀮𑀕𑁆𑀕𑀬𑁂𑀢𑀺 𑀪𑀺𑀢𑁆𑀢𑀺𑀔𑀺𑀮𑀸𑀤𑀻𑀲𑀼 𑀦 𑀑𑀮𑀫𑁆𑀩𑁂𑀬𑁆𑀬.

𑁬𑁬. ‘‘𑀫𑀺𑀟𑁆𑀠𑀦𑁆𑀢𑁂 𑀯𑀸’’𑀢𑀺𑀆𑀤𑀺𑀦𑀸 𑀯𑀢𑁆𑀯𑀸 𑀧𑀢𑁆𑀢𑀁 𑀞𑀧𑁂𑀢𑀼𑀁 𑀦 𑀘 𑀓𑀧𑁆𑀧𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀫𑀺𑀟𑁆𑀠𑀦𑁆𑀢𑁂𑀢𑀺 𑀆𑀴𑀺𑀦𑁆𑀤𑀓𑀫𑀺𑀟𑁆𑀠𑀺𑀓𑀸𑀤𑀻𑀦𑀁 𑀫𑀺𑀟𑁆𑀠𑀻𑀦𑀁 𑀅𑀦𑁆𑀢𑁂. 𑀲𑀘𑁂 𑀧𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀢𑀢𑁆𑀣𑁂𑀯 𑀧𑀢𑀺𑀝𑁆𑀞𑀸𑀢𑀺, 𑀏𑀯𑀭𑀽𑀧𑀸𑀬 𑀯𑀺𑀢𑁆𑀣𑀺𑀡𑁆𑀡𑀸𑀬 𑀫𑀺𑀟𑁆𑀠𑀺𑀬𑀸 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀧𑀭𑀺𑀪𑀡𑁆𑀟𑀦𑁆𑀢𑁂 𑀯𑀸𑀢𑀺 𑀩𑀸𑀳𑀺𑀭𑀧𑀲𑁆𑀲𑁂 𑀓𑀢𑀸𑀬 𑀢𑀦𑀼𑀓𑀸𑀬 𑀫𑀺𑀟𑁆𑀠𑀺𑀓𑀸𑀬 𑀅𑀦𑁆𑀢𑁂 𑀯𑀸. 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑁂, 𑀲𑁄 𑀘 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀅𑀗𑁆𑀓𑁂 𑀧𑀦 𑀅𑀁𑀲𑀩𑀤𑁆𑀥𑀓𑁂𑀦 𑀅𑀁𑀲𑀓𑀽𑀝𑁂 𑀮𑀕𑁆𑀕𑁂𑀢𑁆𑀯𑀸 𑀞𑀧𑁂𑀢𑀼𑀜𑁆𑀘 𑀯𑀝𑁆𑀝𑀢𑀺. 𑀙𑀢𑁆𑀢𑁂𑀧𑀺 𑀪𑀡𑁆𑀟𑀓𑁂𑀦 𑀲𑀤𑁆𑀥𑀺𑀁 𑀩𑀦𑁆𑀥𑀺𑀢𑁆𑀯𑀸 𑀯𑀸 𑀅𑀝𑁆𑀝𑀁 𑀓𑀢𑁆𑀯𑀸 𑀯𑀸 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀫𑀜𑁆𑀘𑁂𑀧𑀺 𑀅𑀜𑁆𑀜𑁂𑀦 𑀲𑀤𑁆𑀥𑀺𑀁 𑀩𑀦𑁆𑀥𑀺𑀢𑁆𑀯𑀸 𑀞𑀧𑁂𑀢𑀼𑀁, 𑀅𑀝𑀦𑀺𑀬𑀁 𑀩𑀦𑁆𑀥𑀺𑀢𑁆𑀯𑀸 𑀑𑀮𑀫𑁆𑀩𑁂𑀢𑀼𑀁 𑀯𑀝𑁆𑀝𑀢𑀺.

𑁬𑁭. 𑀧𑀢𑁆𑀢𑁂𑀦 𑀉𑀘𑁆𑀙𑀺𑀝𑁆𑀞𑁄𑀤𑀓𑀜𑁆𑀘 𑀘𑀮𑀓𑀝𑁆𑀞𑀺𑀓𑀜𑁆𑀘 𑀦 𑀦𑀻𑀳𑀭𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀘𑁆𑀙𑀺𑀝𑁆𑀞𑁄𑀤𑀓𑀦𑁆𑀢𑀺 𑀫𑀼𑀔𑀯𑀺𑀓𑁆𑀔𑀸𑀮𑀦𑁄𑀤𑀓𑀁. 𑀘𑀮𑀓𑀸𑀦𑀺 𑀘 𑀘𑀩𑁆𑀩𑁂𑀢𑁆𑀯𑀸 𑀅𑀧𑀯𑀺𑀤𑁆𑀥𑀸𑀫𑀺𑀲𑀸𑀦𑀺 𑀅𑀝𑁆𑀞𑀺𑀓𑀸𑀦𑀺 𑀫𑀘𑁆𑀙𑀫𑀁𑀲𑀅𑀝𑁆𑀞𑀺𑀓𑀸𑀦𑀺 𑀘 𑀘𑀮𑀓𑀝𑁆𑀞𑀺𑀓𑀁. 𑀧𑀢𑁆𑀢𑀁 𑀧𑀝𑀺𑀕𑁆𑀕𑀳𑀁 𑀓𑀢𑁆𑀯𑀸 𑀳𑀢𑁆𑀣𑀁 𑀥𑁄𑀯𑀺𑀢𑀼𑀫𑁆𑀧𑀺 𑀳𑀢𑁆𑀣𑀥𑁄𑀢𑀸𑀤𑀺 𑀉𑀤𑀓𑀫𑁆𑀧𑀺 𑀧𑀢𑁆𑀢𑁂 𑀆𑀓𑀺𑀭𑀺𑀢𑁆𑀯𑀸 𑀦𑀻𑀳𑀭𑀺𑀢𑀼𑀫𑁆𑀧𑀺 𑀅𑀦𑀼𑀘𑁆𑀙𑀺𑀝𑁆𑀞𑀁 𑀲𑀼𑀤𑁆𑀥𑀧𑀢𑁆𑀢𑀁 𑀉𑀘𑁆𑀙𑀺𑀝𑁆𑀞𑀳𑀢𑁆𑀣𑁂𑀦 𑀕𑀡𑁆𑀳𑀺𑀢𑀼𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀫𑀘𑁆𑀙𑀫𑀁𑀲𑀨𑀮𑀸𑀨𑀮𑀸𑀤𑀻𑀦𑀺 𑀔𑀸𑀤𑀦𑁆𑀢𑁄 𑀬𑀁 𑀢𑀢𑁆𑀣 𑀅𑀝𑁆𑀞𑀺𑀁 𑀯𑀸 𑀘𑀮𑀓𑀁 𑀯𑀸 𑀙𑀟𑁆𑀟𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀁 𑀧𑀢𑁆𑀢𑁂 𑀞𑀧𑁂𑀢𑀼𑀁 𑀦 𑀮𑀪𑀢𑀺. 𑀫𑀼𑀔𑀢𑁄 𑀦𑀻𑀳𑀝𑀁 𑀧𑀦 𑀬𑀁 𑀓𑀺𑀜𑁆𑀘𑀺 𑀧𑀼𑀦 𑀅𑀔𑀸𑀤𑀺𑀢𑀼𑀓𑀸𑀫𑁄 𑀧𑀢𑁆𑀢𑁂 𑀞𑀧𑁂𑀢𑀼𑀁 𑀦 𑀮𑀪𑀢𑀺. 𑀲𑀺𑀗𑁆𑀕𑀺𑀯𑁂𑀭𑀸𑀤𑀻𑀦𑀺 𑀟𑀁𑀲𑀺𑀢𑁆𑀯𑀸 𑀧𑀼𑀦 𑀞𑀧𑁂𑀢𑀼𑀁 𑀮𑀪𑀢𑀺. 𑀧𑀢𑁆𑀢𑀳𑀢𑁆𑀣𑁄𑀢𑀺 𑀧𑀢𑁆𑀢𑁄 𑀳𑀢𑁆𑀣𑁂 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. ‘‘𑀧𑀢𑁆𑀢𑀳𑀢𑁆𑀣𑁄, 𑀓𑀯𑀸𑀝’’𑀦𑁆𑀢𑀺 𑀘 𑀉𑀧𑀮𑀓𑁆𑀔𑀡𑀫𑁂𑀢𑀁. 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀭𑀻𑀭𑀸𑀯𑀬𑀯𑁂 𑀧𑀦 𑀧𑀢𑁆𑀢𑀲𑁆𑀫𑀺𑀁 𑀲𑀢𑀺 𑀬𑁂𑀦 𑀓𑁂𑀦𑀘𑀺 𑀲𑀭𑀻𑀭𑀸𑀯𑀬𑀯𑁂𑀦 𑀓𑀯𑀸𑀝𑀁 𑀧𑀡𑀸𑀫𑁂𑀢𑀼𑀁, 𑀖𑀝𑀺𑀓𑀁 𑀯𑀸 𑀉𑀓𑁆𑀔𑀺𑀧𑀺𑀢𑀼𑀁, 𑀲𑀽𑀘𑀺𑀁 𑀯𑀸 𑀓𑀼𑀜𑁆𑀘𑀺𑀓𑀸𑀬 𑀅𑀯𑀸𑀧𑀼𑀭𑀺𑀢𑀼𑀁 𑀦 𑀮𑀪𑀢𑀺. 𑀅𑀁𑀲𑀓𑀽𑀝𑁂 𑀧𑀦 𑀧𑀢𑁆𑀢𑀁 𑀮𑀕𑁆𑀕𑁂𑀢𑁆𑀯𑀸 𑀬𑀣𑀸𑀲𑀼𑀔𑀁 𑀅𑀯𑀸𑀧𑀼𑀭𑀺𑀢𑀼𑀁 𑀮𑀪𑀢𑀺.

𑁬𑁮. 𑀪𑀽𑀫𑀺𑀬𑀸 𑀪𑀽𑀫𑀺𑀲𑀫𑁆𑀩𑀦𑁆𑀥𑀻 𑀆𑀥𑀸𑀭𑀓𑁄, 𑀢𑀲𑁆𑀫𑀺𑀁 𑀤𑀦𑁆𑀢𑀯𑀮𑁆𑀮𑀺𑀯𑁂𑀢𑁆𑀢𑀸𑀤𑀻𑀳𑀺 𑀓𑀢𑁂 𑀯𑀮𑀬𑀸𑀥𑀸𑀭𑀓𑁂 𑀘 𑀏𑀓𑀤𑀸𑀭𑀼𑀦𑀸 𑀓𑀢𑁂 𑀤𑀸𑀭𑀼𑀆𑀥𑀸𑀭𑀓𑁂 𑀘 𑀩𑀳𑀽𑀳𑀺 𑀤𑀡𑁆𑀟𑁂𑀳𑀺 𑀓𑀢𑁂 𑀤𑀡𑁆𑀟𑀸𑀥𑀸𑀭𑀓𑁂 𑀘 𑀬𑀢𑁆𑀣 𑀞𑀧𑀺𑀢𑁄 𑀧𑀢𑁆𑀢𑁄 𑀬𑀣𑀸 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀦 𑀧𑀭𑀺𑀧𑀢𑀢𑀺, 𑀢𑀣𑀸 𑀲𑀼𑀝𑁆𑀞𑀼 𑀲𑀚𑁆𑀚𑀺𑀢𑁂 𑀢𑀲𑁆𑀫𑀺𑀁 𑀧𑀢𑁆𑀢𑀲𑁆𑀲𑀼𑀧𑀭𑀺 𑀧𑀢𑁆𑀢𑁄𑀢𑀺 𑀏𑀯𑀭𑀽𑀧𑁂 𑀤𑀼𑀯𑁂 𑀧𑀢𑁆𑀢𑁂 𑀞𑀧𑁂𑀬𑁆𑀬𑀸𑀢𑀺 𑀧𑀤𑀢𑁆𑀣𑀬𑁄𑀚𑀦𑀸. 𑀪𑀫𑀓𑁄𑀝𑀺𑀲𑀤𑀺𑀲𑁄 𑀧𑀦 𑀤𑀸𑀭𑀼𑀆𑀥𑀸𑀭𑀓𑁄 𑀢𑀻𑀳𑀺 𑀤𑀡𑁆𑀟𑀓𑁂𑀳𑀺 𑀩𑀤𑁆𑀥𑁄 𑀤𑀡𑁆𑀟𑀸𑀥𑀸𑀭𑀓𑁄 𑀘 𑀏𑀓𑀲𑁆𑀲𑀧𑀺 𑀧𑀢𑁆𑀢𑀲𑁆𑀲 𑀅𑀦𑁄𑀓𑀸𑀲𑁄, 𑀢𑀢𑁆𑀣 𑀞𑀧𑁂𑀢𑁆𑀯𑀸𑀧𑀺 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀪𑀽𑀫𑀺𑀬𑀦𑁆𑀢𑀺 𑀓𑀝𑀲𑀸𑀭𑀓𑀸𑀤𑀺𑀦𑀸 𑀅𑀢𑁆𑀣𑀢𑀸𑀬 𑀪𑀽𑀫𑀺𑀬𑀸 𑀧𑀦 𑀦𑀺𑀓𑁆𑀓𑀼𑀚𑁆𑀚𑀺𑀢𑁆𑀯𑀸 𑀯𑀸 𑀧𑀝𑀺𑀓𑀼𑀚𑁆𑀚𑀺𑀢𑁆𑀯𑀸 𑀯𑀸 𑀏𑀓𑀁 𑀧𑀢𑁆𑀢𑀁 𑀞𑀧𑁂𑀬𑁆𑀬𑀸𑀢𑀺 𑀬𑁄𑀚𑀦𑀸.

𑁬𑁯. 𑀇𑀤𑀸𑀦𑀺 𑀅𑀓𑀧𑁆𑀧𑀺𑀬𑀧𑀢𑁆𑀢𑁂 𑀤𑀲𑁆𑀲𑁂𑀢𑀺 ‘‘𑀤𑀸𑀭𑀽’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀲𑀼𑀯𑀡𑁆𑀡𑀫𑁂𑀯 𑀲𑁄𑀯𑀡𑁆𑀡𑀁. 𑀤𑀸𑀭𑀼 𑀘 𑀭𑀽𑀧𑀺𑀬𑀜𑁆𑀘 𑀲𑁄𑀯𑀡𑁆𑀡𑀜𑁆𑀘 𑀫𑀡𑀺 𑀘 𑀯𑁂𑀴𑀼𑀭𑀺𑀬𑀜𑁆𑀘 𑀤𑀸𑀭𑀼…𑀧𑁂… 𑀯𑁂𑀴𑀼𑀭𑀺𑀬𑀸𑀦𑀺, 𑀢𑁂𑀳𑀺 𑀦𑀺𑀩𑁆𑀩𑀢𑁆𑀢𑀸 𑀤𑀸𑀭𑀼…𑀧𑁂… 𑀫𑀬𑀸. 𑀤𑀻𑀖𑁄 𑀧𑀦 ‘‘𑀯𑁂𑀴𑀼𑀭𑀺𑀬𑀸𑀫𑀬𑀸’’𑀢𑀺 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀓𑀢𑁄. 𑀏𑀯𑀫𑀼𑀧𑀭𑀺𑀧𑀺 𑀢𑀸𑀤𑀺𑀲𑀁 𑀯𑀺𑀜𑁆𑀜𑁂𑀬𑁆𑀬𑀁. 𑀢𑀢𑁆𑀣 𑀇𑀦𑁆𑀤𑀦𑀻𑀮𑀸𑀤𑀺 𑀫𑀡𑀺 𑀦𑀸𑀫. 𑀓𑀁𑀲𑁄 𑀘 𑀓𑀸𑀘𑁄 𑀘 𑀢𑀺𑀧𑀼 𑀘 𑀲𑀻𑀲𑀜𑁆𑀘 𑀨𑀮𑀺𑀓𑀸 𑀘 𑀢𑀫𑁆𑀩𑀮𑁄𑀳𑁄 𑀘𑀸𑀢𑀺 𑀤𑁆𑀯𑀦𑁆𑀤𑁄, 𑀢𑁂𑀳𑀺 𑀚𑀸𑀢𑀸 𑀓𑀁𑀲…𑀧𑁂… 𑀚𑀸. 𑀢𑀢𑁆𑀣 𑀓𑀁𑀲-𑀲𑀤𑁆𑀤𑁂𑀦 𑀯𑀝𑁆𑀝𑀮𑁄𑀳𑁄𑀧𑀺 𑀲𑀗𑁆𑀕𑀳𑀺𑀢𑁄. 𑀲𑁂𑀢𑀁 𑀢𑀺𑀧𑀼, 𑀓𑀡𑁆𑀳𑀁 𑀲𑀻𑀲𑀁.

𑁭𑁦. 𑀙𑀯𑀲𑀻𑀲𑀫𑀬𑁄𑀢𑀺 𑀙𑀯𑀲𑁆𑀲 𑀫𑀢𑀫𑀦𑀼𑀲𑁆𑀲𑀲𑁆𑀲 𑀲𑀻𑀲𑀁 𑀲𑀻𑀲𑀓𑀧𑀸𑀮𑀁, 𑀢𑁂𑀦 𑀦𑀺𑀩𑁆𑀩𑀢𑁆𑀢𑁄 𑀙𑀯𑀲𑀻𑀲𑀫𑀬𑁄. 𑀖𑀝𑀺 𑀘 𑀢𑀼𑀫𑁆𑀩𑀜𑁆𑀘, 𑀢𑁂𑀲𑀁 𑀓𑀝𑀸𑀳𑁄, 𑀢𑁂𑀳𑀺 𑀚𑀸𑀢𑀸𑀢𑀺 𑀖𑀝𑀺𑀢𑀼𑀫𑁆𑀩𑀓𑀝𑀸𑀳𑀚𑀸. 𑀢𑀢𑁆𑀣 𑀖𑀝𑀻𑀢𑀺 𑀖𑀝𑁄𑀬𑁂𑀯. 𑀢𑀼𑀫𑁆𑀩𑀁 𑀅𑀮𑀸𑀩𑀼. 𑀇𑀢𑀺 𑀇𑀫𑁂 𑀲𑀩𑁆𑀩𑁂 𑀧𑀢𑁆𑀢𑀸 𑀅𑀓𑀧𑁆𑀧𑀺𑀬𑀸 𑀯𑀼𑀢𑁆𑀢𑀸, 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑀸 𑀘 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀭𑀽𑀧𑀺𑀬𑀸𑀤𑀻𑀲𑀼 𑀘𑀢𑀽𑀲𑀼 𑀲𑀘𑁂 𑀕𑀺𑀳𑀻 𑀪𑀢𑁆𑀢𑀕𑁆𑀕𑁂𑀲𑀼 𑀲𑀼𑀯𑀡𑁆𑀡𑀢𑀝𑁆𑀝𑀓𑀸𑀤𑀻𑀲𑀼 𑀩𑁆𑀬𑀜𑁆𑀚𑀦𑀁 𑀓𑀢𑁆𑀯𑀸 𑀉𑀧𑀦𑀸𑀫𑁂𑀦𑁆𑀢𑀺, 𑀆𑀫𑀲𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀓𑀁𑀲𑀓𑀸𑀘𑀨𑀮𑀺𑀓𑀚𑀸𑀦𑀺 𑀧𑀦 𑀢𑀝𑁆𑀝𑀓𑀸𑀤𑀻𑀦𑀺 𑀪𑀸𑀚𑀦𑀸𑀦𑀺 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦𑁂𑀯 𑀦 𑀯𑀝𑁆𑀝𑀦𑁆𑀢𑀺, 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀯𑀸 𑀕𑀺𑀳𑀺𑀯𑀺𑀓𑀝𑀸𑀦𑀺 𑀯𑀸 𑀯𑀝𑁆𑀝𑀦𑁆𑀢𑀺. 𑀖𑀝𑀺𑀢𑀼𑀫𑁆𑀩𑀓𑀝𑀸𑀳𑀚𑀸 𑀧𑀦 𑀮𑀪𑀺𑀢𑁆𑀯𑀸 𑀧𑀭𑀺𑀳𑀭𑀺𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺, 𑀢𑀸𑀯𑀓𑀸𑀮𑀺𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀦𑁆𑀢𑀺.

𑀧𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀣𑀸𑀮𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁭𑁧-𑁨. 𑀤𑀸𑀭𑀼 …𑀧𑁂… 𑀯𑁂𑀴𑀼𑀭𑀺𑀬𑀸𑀫𑀬𑀸 𑀅𑀓𑀧𑁆𑀧𑀺𑀬𑀸, 𑀨𑀮𑀺𑀓𑀸𑀓𑀸𑀘𑀓𑀁𑀲𑀚𑀸 𑀣𑀸𑀮𑀓𑀸 𑀕𑀺𑀳𑀺𑀲𑀦𑁆𑀢𑀓𑀸 𑀲𑀗𑁆𑀖𑀺𑀓𑀸 𑀘 𑀓𑀧𑁆𑀧𑀺𑀬𑀸, 𑀢𑀼𑀫𑁆𑀩𑀖𑀝𑀺𑀚𑀸 𑀢𑀸𑀯𑀓𑀸𑀮𑀺𑀓𑀸 𑀓𑀧𑁆𑀧𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀧𑁆𑀧𑀦𑁆𑀢𑀺 𑀧𑀭𑀺𑀓𑀧𑁆𑀧𑀦𑁆𑀢𑀺 𑀅𑀯𑀺𑀭𑁄𑀥𑀺𑀪𑀸𑀯𑁂𑀦𑁂𑀯𑀸𑀢𑀺 𑀓𑀧𑁆𑀧𑀸, 𑀢𑀣𑀸 𑀓𑀧𑁆𑀧𑀺𑀬𑀸. 𑀦 𑀓𑀧𑁆𑀧𑀸 𑀅𑀓𑀧𑁆𑀧𑀸. 𑀲𑀗𑁆𑀖𑀲𑁆𑀲 𑀇𑀫𑁂 𑀲𑀗𑁆𑀖𑀺𑀓𑀸. 𑀢𑀸𑀯-𑀲𑀤𑁆𑀤𑁄 𑀅𑀯𑀥𑀺𑀫𑁆𑀳𑀺. 𑀢𑀸𑀯 𑀪𑁄𑀚𑀦𑀸𑀯𑀥𑀺𑀪𑀽𑀢𑁄 𑀓𑀸𑀮𑁄 𑀏𑀢𑀸𑀲𑀦𑁆𑀢𑀺 𑀢𑀸𑀯𑀓𑀸𑀮𑀺𑀓𑀸, 𑀪𑀼𑀜𑁆𑀚𑀺𑀢𑁆𑀯𑀸 𑀙𑀟𑁆𑀟𑁂𑀢𑀩𑁆𑀩𑀸, 𑀦 𑀧𑀭𑀺𑀳𑀭𑀺𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀣𑀸𑀮𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.