𑁯. 𑀧𑀝𑀺𑀕𑁆𑀕𑀸𑀳𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁦𑁬. 𑀤𑀸𑀢𑀼𑀁 𑀓𑀸𑀫𑁂𑀢𑀻𑀢𑀺 𑀤𑀸𑀢𑀼𑀓𑀸𑀫𑁄, 𑀢𑀲𑁆𑀲 𑀅𑀪𑀺𑀳𑀸𑀭𑁄 𑀈𑀲𑀓𑀫𑁆𑀧𑀺 𑀑𑀡𑀫𑀦𑀸𑀤𑀺𑀦𑀸𑀪𑀺𑀳𑀭𑀡𑀦𑁆𑀢𑀺 𑀢𑀧𑁆𑀧𑀼𑀭𑀺𑀲𑁄, 𑀳𑀢𑁆𑀣𑀲𑁆𑀲 𑀧𑀸𑀲𑁄 𑀳𑀢𑁆𑀣𑀧𑀸𑀲𑁄. 𑀭𑀼𑀴𑁆𑀳𑀻𑀯𑀲𑁂𑀦 𑀢𑀼 𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑁄 𑀳𑀢𑁆𑀣𑀧𑀸𑀲𑁄 𑀦𑀸𑀫. 𑀲𑁄 𑀘 𑀲𑀘𑁂 𑀪𑀺𑀓𑁆𑀔𑀼 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀆𑀲𑀦𑀲𑁆𑀲 𑀧𑀘𑁆𑀙𑀺𑀫𑀦𑁆𑀢𑀢𑁄 𑀧𑀝𑁆𑀞𑀸𑀬, 𑀲𑀘𑁂 𑀞𑀺𑀢𑁄, 𑀧𑀡𑁆𑀳𑀺𑀅𑀦𑁆𑀢𑀢𑁄 𑀧𑀝𑁆𑀞𑀸𑀬, 𑀲𑀘𑁂 𑀦𑀺𑀧𑀦𑁆𑀦𑁄, 𑀬𑁂𑀦 𑀧𑀲𑁆𑀲𑁂𑀦 𑀦𑀺𑀧𑀦𑁆𑀦𑁄, 𑀢𑀲𑁆𑀲 𑀧𑀸𑀭𑀺𑀫𑀦𑁆𑀢𑀢𑁄 𑀧𑀝𑁆𑀞𑀸𑀬 𑀤𑀸𑀬𑀓𑀲𑁆𑀲 𑀦𑀺𑀲𑀺𑀦𑁆𑀦𑀲𑁆𑀲 𑀞𑀺𑀢𑀲𑁆𑀲 𑀯𑀸 𑀞𑀧𑁂𑀢𑁆𑀯𑀸 𑀧𑀲𑀸𑀭𑀺𑀢𑀳𑀢𑁆𑀣𑀁 𑀬𑀁 𑀆𑀲𑀦𑁆𑀦𑀢𑀭𑀁 𑀅𑀗𑁆𑀕𑀁, 𑀢𑀲𑁆𑀲 𑀑𑀭𑀺𑀫𑀦𑁆𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑁄. 𑀏𑀭𑀡𑀓𑁆𑀔𑀫𑀦𑁆𑀢𑀺 𑀣𑀸𑀫𑀫𑀚𑁆𑀛𑀺𑀫𑁂𑀦 𑀧𑀼𑀭𑀺𑀲𑁂𑀦 𑀏𑀭𑀡𑀲𑁆𑀲 𑀉𑀓𑁆𑀔𑀺𑀧𑀦𑀲𑁆𑀲 𑀔𑀫𑀁 𑀬𑁄𑀕𑁆𑀕𑀁. 𑀯𑀢𑁆𑀣𑀼𑀲𑀤𑁆𑀤𑀸𑀧𑁂𑀓𑁆𑀔𑀁 𑀦𑀧𑀼𑀁𑀲𑀓𑀢𑁆𑀢𑀁. 𑀢𑀺𑀥𑀸 𑀤𑁂𑀦𑁆𑀢𑁂𑀢𑀺 𑀓𑀸𑀬𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀁 𑀯𑀲𑁂𑀦 𑀢𑀻𑀳𑀺 𑀧𑀓𑀸𑀭𑁂𑀳𑀺 𑀤𑀸𑀬𑀓𑁂 𑀤𑀤𑀫𑀸𑀦𑁂. 𑀢𑀢𑁆𑀣 𑀬𑁂𑀦 𑀓𑁂𑀦𑀘𑀺 𑀲𑀭𑀻𑀭𑀸𑀯𑀬𑀯𑁂𑀦 𑀅𑀦𑁆𑀢𑀫𑀲𑁄 𑀧𑀸𑀤𑀗𑁆𑀕𑀼𑀮𑀺𑀬𑀸𑀧𑀺 𑀤𑀻𑀬𑀫𑀸𑀦𑀁 𑀓𑀸𑀬𑁂𑀦 𑀤𑀺𑀦𑁆𑀦𑀁 𑀦𑀸𑀫 𑀳𑁄𑀢𑀺, 𑀓𑀝𑀘𑁆𑀙𑀼𑀆𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀤𑀻𑀬𑀫𑀸𑀦𑀁 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦, 𑀓𑀸𑀬𑀢𑁄 𑀧𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀢𑁄 𑀯𑀸 𑀫𑁄𑀘𑁂𑀢𑁆𑀯𑀸 𑀳𑀢𑁆𑀣𑀧𑀸𑀲𑁂 𑀞𑀺𑀢𑀲𑁆𑀲 𑀓𑀸𑀬𑁂𑀦 𑀯𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀯𑀸 𑀧𑀸𑀢𑀺𑀬𑀫𑀸𑀦𑀁 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀧𑀬𑁄𑀕𑁂𑀦 𑀤𑀺𑀦𑁆𑀦𑀁 𑀦𑀸𑀫. 𑀤𑁆𑀯𑀺𑀥𑀸 𑀕𑀸𑀳𑁄𑀢𑀺 𑀓𑀸𑀬𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀸𑀦𑀁 𑀯𑀲𑁂𑀦 𑀤𑁆𑀯𑀻𑀳𑀺 𑀧𑀓𑀸𑀭𑁂𑀳𑀺 𑀬𑁂𑀳𑀺 𑀓𑁂𑀳𑀺𑀘𑀺 𑀤𑀻𑀬𑀫𑀸𑀦𑀲𑁆𑀲 𑀕𑀳𑀡𑀁. 𑀏𑀯𑀁 𑀧𑀝𑀺𑀕𑁆𑀕𑀳𑁄 𑀧𑀜𑁆𑀘𑀗𑁆𑀕𑁄𑀢𑀺 𑀬𑁄𑀚𑀦𑀸. 𑀧𑀜𑁆𑀘𑀗𑁆𑀕𑁄𑀢𑀺 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀬𑀲𑁆𑀲𑀸𑀢𑀺 𑀩𑀳𑀼𑀩𑁆𑀩𑀻𑀳𑀺.

𑁧𑁦𑁭. 𑀇𑀤𑀸𑀦𑀺 𑀅𑀦𑁂𑀭𑀡𑀓𑁆𑀔𑀫𑁂 𑀘 𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂 𑀘 𑀧𑀝𑀺𑀕𑁆𑀕𑀳𑀡𑀸𑀭𑁄𑀳𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀁𑀳𑀸𑀭𑀺𑀬𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀲𑀁𑀳𑀸𑀭𑀺𑀬𑁂𑀢𑀺 𑀆𑀦𑁂𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑁂 𑀨𑀮𑀓𑀧𑀸𑀲𑀸𑀡𑀸𑀤𑀺𑀫𑁆𑀳𑀺. 𑀢𑀢𑁆𑀣𑀚𑀸𑀢𑁂𑀢𑀺 𑀢𑁂𑀲𑀼𑀬𑁂𑀯 𑀭𑀼𑀓𑁆𑀔𑀸𑀤𑀻𑀲𑀼 𑀚𑀸𑀢𑁂 𑀓𑀺𑀁𑀲𑀼𑀓𑀧𑀤𑀼𑀫𑀺𑀦𑀺𑀧𑀡𑁆𑀡𑀸𑀤𑀺𑀓𑁂. 𑀘𑀺𑀜𑁆𑀘𑀆𑀤𑀻𑀦𑀁 𑀲𑀼𑀔𑀼𑀫𑁂 𑀧𑀡𑁆𑀡𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀸𑀦𑀺 𑀳𑀺 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑁂𑀲𑀁 𑀧𑀦 𑀲𑀸𑀔𑀸𑀲𑀼 𑀯𑀝𑁆𑀝𑀢𑀺. 𑀆𑀤𑀺-𑀲𑀤𑁆𑀤𑁂𑀦 ‘‘𑀅𑀗𑁆𑀕’’𑀦𑁆𑀢𑀺𑀆𑀤𑀺𑀓𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀸-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑁂. 𑀅𑀲𑀬𑁆𑀳𑀪𑀸𑀭𑁂𑀢𑀺 𑀣𑀸𑀫𑀫𑀚𑁆𑀛𑀺𑀫𑀧𑀼𑀭𑀺𑀲𑁂𑀦 𑀲𑀳𑀺𑀢𑀼𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁂 𑀪𑀸𑀭𑁂. 𑀲𑀩𑁆𑀩𑁂𑀲𑀁 𑀧𑀝𑀺𑀕𑁆𑀕𑀳𑁄 ‘‘𑀦 𑀭𑀽𑀳𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄.

𑁧𑁦𑁮. 𑀇𑀤𑀸𑀦𑀺 𑀧𑀝𑀺𑀕𑁆𑀕𑀳𑀡𑀯𑀺𑀚𑀳𑀦𑀁 𑀤𑀲𑁆𑀲𑁂𑀢𑀺 ‘‘𑀲𑀺𑀓𑁆𑀔𑀸’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀲𑀺𑀓𑁆𑀔𑀸𑀫𑀭𑀡𑀮𑀺𑀗𑁆𑀕𑁂𑀳𑀻𑀢𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂𑀦 𑀘 𑀫𑀭𑀡𑁂𑀦 𑀘 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑁂𑀦 𑀘. 𑀅𑀦𑀧𑁂𑀓𑁆𑀔𑀯𑀺𑀲𑀕𑁆𑀕𑀢𑁄𑀢𑀺 𑀦𑀢𑁆𑀣𑀺 𑀅𑀧𑁂𑀓𑁆𑀔𑁄 𑀏𑀢𑀲𑁆𑀲𑀸𑀢𑀺 𑀅𑀦𑀧𑁂𑀓𑁆𑀔𑁄, 𑀲𑁄𑀯 𑀯𑀺𑀲𑀕𑁆𑀕𑁄, 𑀢𑀢𑁄 𑀘. 𑀅𑀘𑁆𑀙𑁂𑀤𑀸𑀢𑀺 𑀘𑁄𑀭𑀸𑀤𑀻𑀳𑀺 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀡𑁂𑀦. 𑀅𑀦𑀼𑀧𑀲𑀫𑁆𑀧𑀦𑁆𑀦𑀤𑀸𑀦𑀸𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀸𑀦𑁂𑀦. 𑀘-𑀲𑀤𑁆𑀤𑁄 𑀲𑀩𑁆𑀩𑀢𑁆𑀣 𑀆𑀦𑁂𑀢𑀩𑁆𑀩𑁄. 𑀕𑀸𑀳𑁄𑀢𑀺 𑀧𑀝𑀺𑀕𑁆𑀕𑀳𑀡𑀁. 𑀉𑀧𑀲𑀫𑁆𑀫𑀢𑀻𑀢𑀺 𑀯𑀺𑀚𑀳𑀢𑀺.

𑁧𑁦𑁯-𑁧𑁦. 𑀇𑀤𑀸𑀦𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀁 𑀧𑀭𑀺𑀪𑁄𑀕𑁂 𑀤𑁄𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑁆𑀧𑀝𑀺𑀕𑁆𑀕𑀳𑀺𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀩𑁆𑀩𑀦𑁆𑀢𑀺 𑀘𑀢𑀼𑀓𑀸𑀮𑀺𑀓𑀧𑀭𑀺𑀬𑀸𑀧𑀦𑁆𑀦𑀁 𑀲𑀓𑀮𑀫𑁆𑀧𑀺. 𑀇𑀤𑀸𑀦𑀺 𑀅𑀧𑁆𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀤𑁆𑀥’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀤𑁆𑀥𑀁 𑀦𑀸𑀢𑀺𑀩𑀳𑀮𑀁 𑀉𑀤𑀓𑀜𑁆𑀘 𑀢𑀣𑀸 𑀅𑀗𑁆𑀕𑀮𑀕𑁆𑀕𑀁 𑀅𑀯𑀺𑀘𑁆𑀙𑀺𑀦𑁆𑀦𑀁 𑀤𑀦𑁆𑀢…𑀧𑁂… 𑀕𑀽𑀣𑀓𑀜𑁆𑀘 𑀮𑁄𑀡…𑀧𑁂… 𑀓𑀭𑀻𑀲𑀓𑀜𑁆𑀘 𑀓𑀧𑁆𑀧𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀲𑀼𑀤𑁆𑀥𑀦𑁆𑀢𑀺 𑀭𑀚𑀭𑁂𑀡𑀽𑀳𑀺 𑀅𑀜𑁆𑀜𑀭𑀲𑁂𑀦 𑀘 𑀅𑀲𑀫𑁆𑀫𑀺𑀲𑁆𑀲𑀢𑀸𑀬 𑀧𑀭𑀺𑀲𑀼𑀤𑁆𑀥𑀁. 𑀦𑀸𑀢𑀺𑀩𑀳𑀮𑀦𑁆𑀢𑀺 𑀬𑀁 𑀓𑀲𑀺𑀢𑀝𑁆𑀞𑀸𑀦𑁂 𑀩𑀳𑀮𑀫𑀼𑀤𑀓𑀁 𑀯𑀺𑀬 𑀫𑀼𑀔𑁂 𑀯𑀸 𑀳𑀢𑁆𑀣𑁂 𑀯𑀸 𑀦 𑀮𑀕𑁆𑀕𑀁, 𑀢𑀁. 𑀅𑀯𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀅𑀗𑁆𑀕𑀢𑁄 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦 𑀕𑀢𑀁. 𑀤𑀦𑁆𑀢𑀸𑀦𑀺 𑀘 𑀅𑀓𑁆𑀔𑀻𑀦𑀺 𑀘 𑀓𑀡𑁆𑀡𑀜𑁆𑀘 𑀤𑀦𑁆𑀢𑀓𑁆𑀔𑀺𑀓𑀡𑁆𑀡𑀁 𑀧𑀸𑀡𑁆𑀬𑀗𑁆𑀕𑀢𑁆𑀢𑀸, 𑀢𑀲𑁆𑀲 𑀕𑀽𑀣𑀓𑀦𑁆𑀢𑀺 𑀢𑀧𑁆𑀧𑀼𑀭𑀺𑀲𑁄. 𑀮𑁄𑀡𑀁 𑀲𑀭𑀻𑀭𑀼𑀝𑁆𑀞𑀺𑀢𑀁. 𑀲𑀺𑀗𑁆𑀖𑀸𑀡𑀻𑀢𑀺 𑀲𑀺𑀗𑁆𑀖𑀸𑀡𑀺𑀓𑀸. 𑀯𑀺𑀘𑁆𑀙𑀺𑀦𑁆𑀦𑀁 𑀦 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁.

𑁧𑁧𑁧. 𑀇𑀤𑀸𑀦𑀺 ‘‘𑀕𑀽𑀣𑀸’’𑀢𑀺𑀆𑀤𑀺𑀦𑀸 𑀓𑀸𑀮𑁄𑀤𑀺𑀲𑁆𑀲𑀁 𑀤𑀲𑁆𑀲𑁂𑀢𑀺. 𑀢𑀣𑀸𑀯𑀺𑀥𑁂𑀢𑀺 𑀲𑀧𑁆𑀧𑀤𑀝𑁆𑀞𑀓𑁆𑀔𑀡𑀸𑀤𑀺𑀓𑁂 𑀢𑀣𑀸𑀯𑀺𑀥𑁂 𑀓𑀸𑀮𑁂. 𑀢𑀣𑀸 𑀢𑀸𑀤𑀺𑀲𑁄 𑀯𑀺𑀥𑁄 𑀓𑀸𑀮𑁄 𑀏𑀢𑀲𑁆𑀲𑀸𑀢𑀺 𑀩𑀳𑀼𑀩𑁆𑀩𑀻𑀳𑀺. 𑀲𑁂𑀯𑁂𑀬𑁆𑀬𑀸𑀢𑀺 𑀲𑁂𑀯𑀦𑀁 𑀓𑀭𑁂𑀬𑁆𑀬, 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀲𑀦𑁆𑀢𑁂 𑀓𑀧𑁆𑀧𑀓𑀸𑀭𑀓𑁂𑀢𑀺 𑀏𑀢𑁆𑀣 𑀤𑀼𑀩𑁆𑀩𑀘𑁄𑀧𑀺 𑀅𑀲𑀫𑀢𑁆𑀣𑁄𑀧𑀺 𑀓𑀧𑁆𑀧𑀺𑀬𑀓𑀸𑀭𑀓𑁄 𑀅𑀲𑀦𑁆𑀢𑀧𑀓𑁆𑀔𑁂𑀬𑁂𑀯 𑀢𑀺𑀝𑁆𑀞𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀓𑀸𑀮𑁄𑀤𑀺𑀲𑁆𑀲𑀢𑁆𑀢𑀸 𑀧𑀦 𑀙𑀸𑀭𑀺𑀓𑀸𑀬 𑀅𑀲𑀢𑀺 𑀅𑀮𑁆𑀮𑀤𑀸𑀭𑀼𑀁 𑀭𑀼𑀓𑁆𑀔𑀢𑁄 𑀙𑀺𑀦𑁆𑀤𑀺𑀢𑁆𑀯𑀸 𑀓𑀸𑀢𑀼𑀁, 𑀫𑀢𑁆𑀢𑀺𑀓𑀸𑀬 𑀅𑀲𑀢𑀺 𑀪𑀽𑀫𑀺𑀁 𑀔𑀡𑀺𑀢𑁆𑀯𑀸𑀧𑀺 𑀫𑀢𑁆𑀢𑀺𑀓𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

𑁧𑁧𑁨. 𑀤𑀼𑀭𑀽𑀧𑀘𑀺𑀡𑁆𑀡𑁂𑀢𑀺 𑀤𑀼𑀝𑁆𑀞𑀼𑀁 𑀉𑀧𑀘𑀺𑀡𑁆𑀡𑀁 𑀆𑀫𑀝𑁆𑀞𑀁 𑀤𑀼𑀭𑀽𑀧𑀘𑀺𑀡𑁆𑀡𑀁. 𑀲𑀘𑁂 𑀪𑀺𑀓𑁆𑀔𑀼 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀁 𑀲𑀸𑀫𑀺𑀲𑀁 𑀪𑀸𑀚𑀦𑀁 𑀞𑀺𑀢𑀝𑁆𑀞𑀸𑀦𑀢𑁄 𑀅𑀧𑀦𑁂𑀢𑁆𑀯𑀸 𑀆𑀫𑀲𑀢𑀺, 𑀧𑀺𑀥𑀸𑀦𑀁 𑀆𑀫𑀲𑀢𑀺, 𑀉𑀧𑀭𑀺 𑀞𑀺𑀢𑀓𑀘𑀯𑀭𑀸𑀤𑀺𑀁 𑀙𑀟𑁆𑀟𑁂𑀢𑀺, 𑀢𑀢𑁆𑀣𑀚𑀸𑀢𑀓𑀨𑀮𑀺𑀦𑀺𑀬𑀸 𑀲𑀸𑀔𑀸𑀬 𑀯𑀸 𑀯𑀮𑁆𑀮𑀺𑀬𑀸 𑀯𑀸 𑀕𑀳𑁂𑀢𑁆𑀯𑀸 𑀯𑀸 𑀘𑀸𑀮𑁂𑀢𑀺, 𑀤𑀼𑀭𑀽𑀧𑀘𑀺𑀡𑁆𑀡𑀁 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀺𑀁 𑀤𑀼𑀓𑁆𑀓𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀨𑀮𑀭𑀼𑀓𑁆𑀔𑀁 𑀧𑀦 𑀅𑀧𑀲𑁆𑀲𑀬𑀺𑀢𑀼𑀁 𑀯𑀸 𑀢𑀢𑁆𑀣 𑀓𑀡𑁆𑀝𑀓𑀁 𑀯𑀸 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀭𑀜𑁆𑀜𑁂 𑀧𑀢𑀺𑀢𑀅𑀫𑁆𑀩𑀨𑀮𑀸𑀤𑀺𑀁 ‘‘𑀲𑀸𑀫𑀡𑁂𑀭𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀆𑀳𑀭𑀺𑀢𑁆𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀭𑀚𑁄𑀓𑀺𑀡𑁆𑀡𑁂𑀢𑀺 𑀭𑀚𑀲𑀸 𑀑𑀓𑀺𑀡𑁆𑀡𑁂, 𑀢𑀲𑁆𑀫𑀺𑀁 𑀧𑀢𑁆𑀢𑀸𑀤𑀺𑀓𑁂 𑀬𑀁 𑀓𑀺𑀜𑁆𑀘𑀺 𑀧𑀝𑀺𑀕𑁆𑀕𑀡𑁆𑀳𑀢𑁄 𑀯𑀺𑀦𑀬𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀘𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀲𑁆𑀲 𑀧𑀢𑁆𑀢𑁂 𑀭𑀚𑀁 𑀧𑀢𑀢𑀺, 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀸 𑀕𑀡𑁆𑀳𑀺𑀢𑀩𑁆𑀩𑀸. ‘‘𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀆𑀓𑀺𑀭𑀦𑁆𑀢𑀺, 𑀳𑀢𑁆𑀣𑀢𑁄 𑀅𑀫𑁄𑀘𑁂𑀦𑁆𑀢𑁂𑀦𑁂𑀯 𑀧𑀝𑀺𑀕𑁆𑀕𑀸𑀳𑀸𑀧𑀓𑀲𑁆𑀲 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀫𑀳𑀸𑀯𑀸𑀢𑁄 𑀢𑀢𑁄 𑀢𑀢𑁄 𑀭𑀚𑀁 𑀧𑀸𑀢𑁂𑀢𑀺, 𑀦 𑀲𑀓𑁆𑀓𑀸 𑀳𑁄𑀢𑀺 𑀪𑀺𑀓𑁆𑀔𑀁 𑀕𑀳𑁂𑀢𑀼𑀁, ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀆𑀪𑁄𑀕𑀁 𑀓𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺. 𑀢𑀁 𑀧𑀦 𑀢𑁂𑀦 𑀤𑀺𑀦𑁆𑀦𑀁 𑀯𑀸 𑀯𑀺𑀲𑁆𑀲𑀸𑀲𑁂𑀦 𑀯𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺.

𑀅𑀣𑀸𑀢𑀺 𑀯𑀓𑁆𑀔𑀫𑀸𑀦𑀸𑀭𑀫𑁆𑀪𑁂. 𑀉𑀕𑁆𑀕𑀳𑀧𑁆𑀧𑀝𑀺𑀕𑁆𑀕𑀳𑁂𑀢𑀺 𑀉𑀕𑁆𑀕𑀳𑀺𑀢𑁆𑀣𑀸𑀢𑀺 𑀉𑀕𑁆𑀕𑀳𑁄, 𑀉𑀕𑁆𑀕𑀳𑀺𑀢𑀁, 𑀢𑀲𑁆𑀲 𑀧𑀝𑀺𑀕𑁆𑀕𑀳𑁄, 𑀢𑀲𑁆𑀫𑀺𑀁. 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀪𑀸𑀯𑀁 𑀚𑀸𑀦𑀢𑁄 𑀅𑀢𑁆𑀢𑀦𑀸 𑀏𑀯 𑀉𑀕𑁆𑀕𑀳𑁂𑀢𑁆𑀯𑀸 𑀕𑀳𑀡𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀸𑀢𑀸𑀧𑀺𑀢𑀽𑀦𑀁 𑀅𑀢𑁆𑀣𑀸𑀬 𑀧𑀦 𑀅𑀧𑁆𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑁂𑀮𑀸𑀤𑀻𑀦𑀺, 𑀙𑀸𑀬𑀢𑁆𑀣𑀸𑀬 𑀲𑀸𑀔𑀸𑀤𑀻𑀦𑀺 𑀯𑀸 𑀕𑀳𑁂𑀢𑁆𑀯𑀸 𑀧𑀘𑁆𑀙𑀢𑁄 𑀪𑀼𑀜𑁆𑀚𑀺𑀢𑀼𑀓𑀸𑀫𑀢𑀸𑀬 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀉𑀘𑁆𑀙𑀼𑀆𑀤𑀻𑀲𑀼 𑀨𑀸𑀮𑀺𑀢𑁂𑀲𑀼 𑀫𑀮𑀁 𑀦 𑀧𑀜𑁆𑀜𑀸𑀬𑀢𑀺, 𑀫𑀽𑀮𑀪𑁂𑀲𑀚𑁆𑀚𑀸𑀤𑀻𑀦𑀺 𑀧𑀺𑀲𑀦𑁆𑀢𑀸𑀦𑀁 𑀯𑀸 𑀓𑁄𑀝𑁆𑀝𑁂𑀦𑁆𑀢𑀸𑀦𑀁 𑀯𑀸 𑀦𑀺𑀲𑀤𑀦𑀺𑀲𑀤𑀧𑁄𑀢𑀓𑀉𑀤𑀼𑀓𑁆𑀔𑀮𑀫𑀼𑀲𑀮𑀸𑀦𑀺 𑀔𑀻𑀬𑀦𑁆𑀢𑀺, 𑀤𑀦𑁆𑀢𑀦𑁆𑀢𑀭𑁂 𑀮𑀕𑁆𑀕𑀁 𑀲𑀼𑀔𑀼𑀫𑀆𑀫𑀺𑀲𑀁 𑀳𑁄𑀢𑀺, 𑀭𑀲𑁄 𑀦 𑀧𑀜𑁆𑀜𑀸𑀬𑀢𑀺, 𑀅𑀩𑁆𑀩𑁄𑀳𑀸𑀭𑀺𑀓𑀁. 𑀅𑀦𑁆𑀢𑁄𑀯𑀼𑀢𑁆𑀣𑁂𑀢𑀺 𑀅𑀓𑀧𑁆𑀧𑀺𑀬𑀓𑀼𑀝𑀺𑀬𑀸 𑀙𑀤𑀦𑀩𑁆𑀪𑀦𑁆𑀢𑀭𑁂 𑀯𑀼𑀢𑁆𑀣𑁂𑀢𑀺 𑀅𑀢𑁆𑀣𑁄. 𑀲𑀬𑀁𑀧𑀓𑁆𑀓𑁂𑀢𑀺 𑀅𑀢𑁆𑀢𑀦𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀓𑁆𑀓𑁂. 𑀲𑀘𑁂 𑀯𑀸𑀲𑀺𑀆𑀤𑀺𑀁 𑀢𑀸𑀧𑁂𑀢𑁆𑀯𑀸 𑀢𑀓𑁆𑀓𑀸𑀤𑀻𑀲𑀼 𑀧𑀓𑁆𑀔𑀺𑀧𑀢𑀺, 𑀏𑀢𑁆𑀢𑀸𑀯𑀢𑀸𑀧𑀺 𑀲𑀸𑀫𑀧𑀸𑀓𑀢𑁄 𑀦 𑀫𑀼𑀘𑁆𑀘𑀢𑀺. 𑀧𑀼𑀭𑀺𑀫𑀓𑀸𑀮𑀺𑀓𑀤𑁆𑀯𑀬𑁂 𑀧𑀼𑀦𑀧𑀸𑀓𑀜𑁆𑀳𑀺 𑀞𑀧𑁂𑀢𑁆𑀯𑀸 𑀬𑀁 𑀓𑀺𑀜𑁆𑀘𑀺 𑀆𑀫𑀺𑀲𑀁 𑀪𑀺𑀓𑁆𑀔𑀼𑀦𑁄 𑀧𑀘𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂𑀧𑀺𑀲𑁆𑀲 𑀉𑀡𑁆𑀳𑀬𑀸𑀕𑀼𑀬𑀸 𑀲𑀼𑀮𑀲𑀺𑀧𑀡𑁆𑀡𑀸𑀤𑀻𑀦𑀺 𑀯𑀸 𑀲𑀺𑀗𑁆𑀕𑀺𑀯𑁂𑀭𑀁 𑀯𑀸 𑀧𑀓𑁆𑀔𑀺𑀧𑀦𑁆𑀢𑀺, 𑀘𑀸𑀮𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀉𑀢𑁆𑀢𑀡𑁆𑀟𑀼𑀮𑀁 𑀪𑀢𑁆𑀢𑀁 𑀮𑀪𑀺𑀢𑁆𑀯𑀸 𑀧𑀺𑀤𑀳𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀦𑁆𑀢𑁄𑀧𑀓𑁆𑀓𑁂𑀢𑀺 𑀅𑀓𑀧𑁆𑀧𑀺𑀬𑀓𑀼𑀝𑀺𑀬𑀸 𑀅𑀦𑁆𑀢𑁄 𑀧𑀓𑁆𑀓𑁂. 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀝𑀺𑀕𑁆𑀕𑀸𑀳𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.