𑁭. 𑀧𑀯𑀸𑀭𑀡𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁭𑁩. 𑀬𑁂𑀦 𑀇𑀭𑀺𑀬𑀸𑀧𑀣𑁂𑀦 𑀉𑀧𑀮𑀓𑁆𑀔𑀺𑀢𑁄 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀬𑀁 𑀓𑀺𑀜𑁆𑀘𑀺 𑀪𑁄𑀚𑀦𑀁 𑀪𑀼𑀜𑁆𑀚𑀫𑀸𑀦𑁄 𑀅𑀬𑀁 𑀪𑀺𑀓𑁆𑀔𑀼 𑀓𑀧𑁆𑀧𑀺𑀬𑀸𑀦𑀁 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀳𑀢𑁆𑀣𑀧𑀸𑀲𑁄𑀧𑀦𑀻𑀢𑀸𑀦𑀁 𑀧𑀯𑀸𑀭𑀺𑀢𑁄, 𑀢𑀢𑁄 𑀇𑀭𑀺𑀬𑀸𑀧𑀣𑀢𑁄 𑀅𑀜𑁆𑀜𑁂𑀦 𑀇𑀭𑀺𑀬𑀸𑀧𑀣𑁂𑀦 𑀅𑀦𑀢𑀺𑀭𑀺𑀢𑁆𑀢𑀓𑀁 𑀬𑀸𑀯𑀓𑀸𑀮𑀺𑀓𑀁 𑀪𑀼𑀜𑁆𑀚𑁂𑀬𑁆𑀬 𑀘𑁂, 𑀇𑀫𑀲𑁆𑀲 𑀧𑀸𑀘𑀺𑀢𑁆𑀢𑀺 𑀳𑁄𑀢𑀻𑀢𑀺 𑀧𑀤𑀢𑁆𑀣𑀬𑁄𑀚𑀦𑀸. 𑀪𑀼𑀜𑁆𑀚𑀦𑀢𑁆𑀣𑀸𑀬 𑀧𑀝𑀺𑀕𑁆𑀕𑀳𑀡𑁂 𑀧𑀦 𑀤𑀼𑀓𑁆𑀓𑀝𑀁. 𑀢𑀢𑁆𑀣 𑀇𑀭𑀺𑀬𑀸𑀬 𑀓𑀸𑀬𑀺𑀓𑀓𑀺𑀭𑀺𑀬𑀸𑀬 𑀧𑀣𑁄 𑀧𑀯𑀢𑁆𑀢𑀦𑀽𑀧𑀸𑀬𑁄 𑀇𑀭𑀺𑀬𑀸𑀧𑀣𑁄, 𑀞𑀸𑀦𑀕𑀫𑀦𑀦𑀺𑀲𑀚𑁆𑀚𑀦𑀲𑀬𑀦𑀸𑀦𑀺. 𑀧𑀯𑀸𑀭𑁂𑀢𑀺 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀧𑀯𑀸𑀭𑀺𑀢𑁄, 𑀅𑀣 𑀯𑀸 𑀧𑀯𑀸𑀭𑀡𑀁 𑀧𑀝𑀺𑀓𑁆𑀔𑀺𑀧𑀦𑀁 𑀧𑀯𑀸𑀭𑀺𑀢𑀁, 𑀢𑀫𑀲𑁆𑀲 𑀅𑀢𑁆𑀣𑀻𑀢𑀺 𑀧𑀯𑀸𑀭𑀺𑀢𑁄, 𑀓𑀢𑀧𑁆𑀧𑀯𑀸𑀭𑀡𑁄 𑀓𑀢𑀧𑁆𑀧𑀝𑀺𑀓𑁆𑀔𑁂𑀧𑁄𑀢𑀺 𑀅𑀢𑁆𑀣𑁄, 𑀅𑀣 𑀯𑀸 𑀧𑀭𑀺𑀯𑁂𑀲𑀓𑁂𑀦 𑀯𑀸𑀭𑀻𑀬𑀢𑀻𑀢𑀺 𑀧𑀯𑀸𑀭𑀺𑀢𑁄 𑀧𑀝𑀺𑀓𑁆𑀔𑁂𑀧𑀺𑀢𑁄. 𑀅𑀦𑀢𑀺𑀭𑀺𑀢𑁆𑀢𑀓𑀦𑁆𑀢𑀺 𑀬𑀁 𑀧𑀯𑀸𑀭𑁂𑀢𑁆𑀯𑀸 𑀆𑀲𑀦𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 ‘‘𑀅𑀮𑀫𑁂𑀢𑀁 𑀲𑀩𑁆𑀩’’𑀦𑁆𑀢𑀺 𑀏𑀯𑀁 𑀅𑀢𑀺𑀭𑀺𑀢𑁆𑀢𑀓𑀭𑀡𑀸𑀤𑀻𑀳𑀺 𑀲𑀢𑁆𑀢𑀳𑀺 𑀯𑀺𑀦𑀬𑀓𑀫𑁆𑀫𑀸𑀓𑀸𑀭𑁂𑀳𑀺 𑀓𑀧𑁆𑀧𑀺𑀬𑀁 𑀓𑀢𑀁, 𑀢𑀜𑁆𑀘 ‘‘𑀅𑀚𑁆𑀚 𑀯𑀸 𑀬𑀤𑀸 𑀯𑀸 𑀇𑀘𑁆𑀙𑀢𑀺, 𑀢𑀤𑀸 𑀔𑀸𑀤𑀺𑀲𑁆𑀲𑀢𑀻’’𑀢𑀺 𑀆𑀳𑀝𑀁, 𑀕𑀺𑀮𑀸𑀦𑀸𑀢𑀺𑀭𑀺𑀢𑁆𑀢𑀜𑁆𑀘 𑀅𑀢𑀺𑀭𑀺𑀢𑁆𑀢𑀁 𑀅𑀥𑀺𑀓𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀢𑁄 𑀅𑀜𑁆𑀜𑀁 𑀅𑀦𑀢𑀺𑀭𑀺𑀢𑁆𑀢𑀓𑀁 𑀅𑀦𑀥𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀧𑀸𑀢𑁂𑀢𑀻𑀢𑀺 𑀧𑀸𑀘𑀺𑀢𑁆𑀢𑀺, 𑀢𑀲𑁆𑀫𑀸 𑀇𑀢𑁆𑀣𑀺𑀬𑀁 𑀢𑀺𑀫𑁆𑀳𑀺 𑀢-𑀓𑀸𑀭𑀲𑁆𑀲 𑀘-𑀓𑀸𑀭𑁂, 𑀤𑁆𑀯𑀺𑀢𑁆𑀢𑁂 𑀘 𑀧𑀸𑀘𑀺𑀢𑁆𑀢𑀺. 𑀬𑀸𑀫𑀓𑀸𑀮𑀺𑀓𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀬𑀸𑀯𑀚𑀻𑀯𑀺𑀓𑀁 𑀆𑀳𑀸𑀭𑀢𑁆𑀣𑀸𑀬 𑀧𑀝𑀺𑀕𑁆𑀕𑀡𑁆𑀳𑀢𑁄 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲, 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁭𑁪. 𑀇𑀤𑀸𑀦𑀺 𑀬𑀸𑀬 𑀧𑀯𑀸𑀭𑀺𑀢𑀸, 𑀲𑀸 𑀧𑀜𑁆𑀘𑀗𑁆𑀕𑀲𑀫𑁆𑀧𑀦𑁆𑀦𑀸𑀬𑁂𑀯 𑀧𑀯𑀸𑀭𑀡𑀸 𑀦𑀸𑀫 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀲𑀦𑀦𑁆𑀢𑀺 𑀪𑀼𑀜𑁆𑀚𑀫𑀸𑀦𑀲𑁆𑀲 𑀪𑀼𑀜𑁆𑀚𑀦𑀁. 𑀇𑀫𑀺𑀦𑀸 𑀬𑀁 𑀯𑀺𑀧𑁆𑀧𑀓𑀢𑀁 𑀪𑁄𑀚𑀦𑀁, 𑀢𑀁 𑀤𑀲𑁆𑀲𑁂𑀢𑀺. 𑀪𑁄𑀚𑀦𑀜𑁆𑀘𑁂𑀯𑀸𑀢𑀺 𑀧𑀯𑀸𑀭𑀡𑀧𑁆𑀧𑀳𑁄𑀦𑀓𑀁 𑀪𑁄𑀚𑀦𑀜𑁆𑀘𑁂𑀯 𑀳𑁄𑀢𑀻𑀢𑀺. 𑀅𑀪𑀺𑀳𑀸𑀭𑁄𑀢𑀺 𑀤𑀸𑀬𑀓𑀲𑁆𑀲 𑀓𑀸𑀬𑁂𑀦 𑀧𑀯𑀸𑀭𑀡𑀧𑁆𑀧𑀳𑁄𑀦𑀓𑀲𑁆𑀲 𑀅𑀪𑀺𑀳𑀭𑀡𑀁, 𑀦 𑀯𑀸𑀘𑀸𑀬. 𑀲𑀫𑀻𑀧𑀢𑀸𑀢𑀺 𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑀧𑁆𑀧𑀫𑀸𑀡𑀲𑀗𑁆𑀔𑀸𑀢𑀸 𑀲𑀫𑀻𑀧𑀢𑀸 𑀘. 𑀏𑀢𑁆𑀣 𑀧𑀦 𑀲𑀘𑁂 𑀪𑀺𑀓𑁆𑀔𑀼 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀆𑀲𑀦𑀲𑁆𑀲 𑀧𑀘𑁆𑀙𑀺𑀫𑀦𑁆𑀢𑀢𑁄 𑀧𑀝𑁆𑀞𑀸𑀬, 𑀲𑀘𑁂 𑀞𑀺𑀢𑁄, 𑀧𑀡𑁆𑀳𑀺𑀅𑀦𑁆𑀢𑀢𑁄 𑀧𑀝𑁆𑀞𑀸𑀬, 𑀲𑀘𑁂 𑀦𑀺𑀧𑀦𑁆𑀦𑁄, 𑀬𑁂𑀦 𑀧𑀲𑁆𑀲𑁂𑀦 𑀦𑀺𑀧𑀦𑁆𑀦𑁄, 𑀢𑀲𑁆𑀲 𑀧𑀸𑀭𑀺𑀫𑀦𑁆𑀢𑀢𑁄 𑀧𑀝𑁆𑀞𑀸𑀬 𑀤𑀸𑀬𑀓𑀲𑁆𑀲 𑀞𑀺𑀢𑀲𑁆𑀲 𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀯𑀸 𑀦𑀺𑀧𑀦𑁆𑀦𑀲𑁆𑀲 𑀯𑀸 𑀞𑀧𑁂𑀢𑁆𑀯𑀸 𑀧𑀲𑀸𑀭𑀺𑀢𑀳𑀢𑁆𑀣𑀁 𑀬𑀁 𑀆𑀲𑀦𑁆𑀦𑀢𑀭𑀁 𑀅𑀗𑁆𑀕𑀁, 𑀢𑀲𑁆𑀲 𑀑𑀭𑀺𑀫𑀦𑁆𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑀧𑀸𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀸𑀬𑀯𑀸𑀘𑀸𑀧𑀝𑀺𑀓𑁆𑀔𑁂𑀧𑁄𑀢𑀺 𑀢𑀲𑁆𑀲 𑀅𑀪𑀺𑀳𑀝𑀪𑁄𑀚𑀦𑀲𑁆𑀲 𑀅𑀗𑁆𑀕𑀼𑀮𑀺𑀘𑀮𑀦𑀸𑀤𑀺𑀓𑀸𑀬𑀯𑀺𑀓𑀸𑀭𑁂𑀦 𑀯𑀸 ‘‘𑀅𑀮’’𑀦𑁆𑀢𑀺𑀆𑀤𑀺𑀦𑀸 𑀯𑀘𑀻𑀯𑀺𑀓𑀸𑀭𑁂𑀦 𑀯𑀸 𑀧𑀝𑀺𑀓𑁆𑀔𑀺𑀧𑀦𑀁. 𑀇𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀗𑁆𑀕𑁂𑀳𑀺 𑀧𑀯𑀸𑀭𑀡𑀸 𑀧𑀓𑀸𑀭𑀬𑀼𑀢𑁆𑀢𑀯𑀸𑀭𑀡𑀸 𑀧𑀜𑁆𑀘𑀅𑀗𑁆𑀕𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀬𑀲𑁆𑀲𑀸 𑀲𑀸 𑀧𑀜𑁆𑀘𑀅𑀗𑁆𑀕𑀸.

𑁭𑁫. 𑀇𑀤𑀸𑀦𑀺 𑀏𑀢𑁂𑀲𑀼 𑀑𑀤𑀦𑀸𑀤𑀺𑀧𑀜𑁆𑀘𑀯𑀺𑀥𑀁 𑀪𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀢𑀸𑀦𑀺 𑀘 𑀧𑀼𑀦 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀑𑀤𑀦𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀲𑀸𑀮𑀻𑀢𑀺 𑀭𑀢𑁆𑀢𑀲𑀸𑀮𑀺𑀆𑀤𑀺𑀓𑀸 𑀲𑀩𑁆𑀩𑀸𑀧𑀺 𑀲𑀸𑀮𑀺𑀚𑀸𑀢𑀺. 𑀯𑀻𑀳𑀻𑀢𑀺 𑀲𑀩𑁆𑀩𑀸𑀧𑀺 𑀯𑀻𑀳𑀺𑀦𑀸𑀫𑀺𑀓𑀸 𑀯𑀻𑀳𑀺𑀚𑀸𑀢𑀺. 𑀓𑀗𑁆𑀕𑀽𑀢𑀺 𑀲𑁂𑀢𑀭𑀢𑁆𑀢𑀓𑀸𑀴𑀪𑁂𑀤𑀸 𑀲𑀩𑁆𑀩𑀸𑀧𑀺 𑀓𑀗𑁆𑀕𑀼𑀚𑀸𑀢𑀺. 𑀓𑀼𑀤𑁆𑀭𑀽𑀲𑁄 𑀦𑀸𑀫 𑀓𑀸𑀴𑀓𑁄𑀤𑁆𑀭𑀯𑁄. 𑀯𑀭𑀓𑁄 𑀦𑀸𑀫 𑀲𑁂𑀢𑀯𑀡𑁆𑀡𑁄 𑀓𑁄𑀤𑁆𑀭𑀯𑁄. 𑀬𑀯𑀕𑁄𑀥𑀼𑀫𑁂𑀲𑀼 𑀧𑀦 𑀪𑁂𑀤𑁄 𑀦𑀢𑁆𑀣𑀺. 𑀏𑀯𑀁 𑀬𑀣𑀸𑀯𑀼𑀢𑁆𑀢𑀸𑀦𑀁 𑀲𑀸𑀦𑀼𑀮𑁄𑀫𑀸𑀦𑀁 𑀲𑀢𑁆𑀢𑀦𑁆𑀦𑀁 𑀥𑀜𑁆𑀜𑀸𑀦𑀁 𑀪𑁄𑀚𑁆𑀚𑀬𑀸𑀕𑀼 𑀘𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀪𑁄𑀚𑁆𑀚𑀬𑀸𑀕𑀼 𑀘𑀸𑀢𑀺 𑀉𑀡𑁆𑀳𑀁 𑀯𑀸 𑀲𑀻𑀢𑀮𑀁 𑀯𑀸 𑀪𑀼𑀜𑁆𑀚𑀦𑁆𑀢𑀸𑀦𑀁 𑀪𑁄𑀚𑀦𑀓𑀸𑀮𑁂 𑀕𑀳𑀺𑀢𑀝𑁆𑀞𑀸𑀦𑁂 𑀑𑀥𑀺 𑀧𑀜𑁆𑀜𑀸𑀬𑀢𑀺, 𑀲𑀸 𑀪𑁄𑀚𑁆𑀚𑀬𑀸𑀕𑀼. 𑀘-𑀲𑀤𑁆𑀤𑁂𑀦 𑀑𑀤𑀦𑁄 𑀘𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀑𑀤𑀦𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀲𑀘𑁂 𑀧𑀦 𑀪𑀢𑁆𑀢𑁂 𑀉𑀤𑀓𑀓𑀜𑁆𑀚𑀺𑀓𑀔𑀻𑀭𑀸𑀤𑀻𑀦𑀺 𑀆𑀓𑀺𑀭𑀺𑀢𑁆𑀯𑀸 ‘‘𑀬𑀸𑀕𑀼𑀁 𑀕𑀡𑁆𑀳𑀣𑀸’’𑀢𑀺 𑀤𑁂𑀦𑁆𑀢𑀺, 𑀓𑀺𑀜𑁆𑀘𑀸𑀧𑀺 𑀢𑀦𑀼𑀓𑀸 𑀳𑁄𑀢𑀺, 𑀧𑀯𑀸𑀭𑀡𑀁 𑀚𑀦𑁂𑀢𑀺. 𑀲𑀘𑁂 𑀧𑀦 𑀉𑀤𑀓𑀸𑀤𑀻𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑀺𑀢𑁆𑀯𑀸 𑀤𑁂𑀦𑁆𑀢𑀺, 𑀬𑀸𑀕𑀼𑀲𑀗𑁆𑀕𑀳𑀫𑁂𑀯 𑀕𑀘𑁆𑀙𑀢𑀺. 𑀲𑀘𑁂 𑀧𑀦 𑀢𑀦𑀼𑀓𑀸𑀬𑀧𑀺 𑀬𑀸𑀕𑀼𑀬𑀸 𑀲𑀸𑀲𑀧𑀫𑀢𑁆𑀢𑀫𑁆𑀧𑀺 𑀫𑀘𑁆𑀙𑀫𑀁𑀲𑀔𑀡𑁆𑀟𑀁 𑀯𑀸 𑀦𑁆𑀳𑀸𑀭𑀼 𑀯𑀸 𑀧𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀧𑀯𑀸𑀭𑀡𑀁 𑀚𑀦𑁂𑀢𑀺.

𑁭𑁬. 𑀲𑀸𑀫𑀸𑀓𑀸𑀤𑀺𑀢𑀺𑀡𑀁 𑀓𑀼𑀤𑁆𑀭𑀽𑀲𑀓𑁂 𑀲𑀗𑁆𑀕𑀳𑀁 𑀕𑀢𑀁, 𑀯𑀭𑀓𑀘𑁄𑀭𑀓𑁄 𑀯𑀭𑀓𑁂 𑀲𑀗𑁆𑀕𑀳𑀁 𑀕𑀢𑁄, 𑀦𑀻𑀯𑀸𑀭𑁄 𑀘𑁂𑀯 𑀲𑀸𑀮𑀺𑀬𑀁 𑀲𑀗𑁆𑀕𑀳𑀁 𑀕𑀢𑁄𑀢𑀺 𑀬𑁄𑀚𑀦𑀸. 𑀲𑀸𑀫𑀸𑀓𑀸𑀤𑀺𑀢𑀺𑀡𑀦𑁆𑀢𑀺 𑀲𑀸𑀫𑀸𑀓𑁄 𑀆𑀤𑀺 𑀬𑀲𑁆𑀲, 𑀢𑀫𑁂𑀯 𑀢𑀺𑀡𑀁 𑀢𑀺𑀡𑀥𑀜𑁆𑀜𑀦𑁆𑀢𑀺 𑀲𑀫𑀸𑀲𑁄.

𑁭𑁭. 𑀪𑀝𑁆𑀞𑀥𑀜𑁆𑀜𑀫𑀬𑁄𑀢𑀺 𑀔𑀭𑀧𑀸𑀓𑀪𑀚𑁆𑀚𑀺𑀢𑁂𑀳𑀺 𑀲𑀢𑁆𑀢𑀯𑀺𑀥𑁂𑀳𑀺 𑀥𑀜𑁆𑀜𑁂𑀳𑀺 𑀓𑁄𑀝𑁆𑀝𑁂𑀢𑁆𑀯𑀸 𑀓𑀢𑁄, 𑀅𑀦𑁆𑀢𑀫𑀲𑁄 𑀘𑀼𑀡𑁆𑀡𑀫𑁆𑀧𑀺 𑀓𑀼𑀡𑁆𑀟𑀓𑀫𑁆𑀧𑀺 𑀲𑀢𑁆𑀢𑀼 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀲𑀫𑀧𑀸𑀓𑀪𑀚𑁆𑀚𑀺𑀢𑀸𑀦𑀁 𑀧𑀦 𑀆𑀢𑀧𑀲𑀼𑀓𑁆𑀔𑀸𑀦𑀁 𑀯𑀸 𑀢𑀡𑁆𑀟𑀼𑀮𑀸𑀦𑀁 𑀲𑀢𑁆𑀢𑀼 𑀯𑀸 𑀓𑀼𑀡𑁆𑀟𑀓𑀸𑀦𑀺 𑀏𑀯 𑀯𑀸 𑀦 𑀧𑀯𑀸𑀭𑁂𑀦𑁆𑀢𑀺. 𑀬𑀯𑁂𑀦 𑀲𑀫𑁆𑀪𑀯𑁄 𑀉𑀧𑁆𑀧𑀢𑁆𑀢𑀺 𑀅𑀲𑁆𑀲𑀸𑀢𑀺 𑀬𑀯𑀲𑀫𑁆𑀪𑀯𑁄, 𑀓𑀼𑀫𑁆𑀫𑀸𑀲𑁄 𑀓𑀼𑀫𑁆𑀫𑀸𑀲𑁄 𑀦𑀸𑀫. 𑀫𑀼𑀕𑁆𑀕𑀸𑀤𑀻𑀳𑀺 𑀓𑀢𑁄 𑀧𑀦 𑀧𑀯𑀸𑀭𑀡𑀁 𑀦 𑀚𑀦𑁂𑀢𑀺. 𑀓𑀧𑁆𑀧𑀺𑀬𑁄 𑀘𑀸𑀢𑀺 𑀓𑀧𑁆𑀧𑀺𑀬𑁄𑀬𑁂𑀯 𑀫𑀁𑀲𑁄 ‘‘𑀫𑀁𑀲𑁄’’𑀢𑀺 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸. 𑀘𑀸𑀢𑀺 𑀅𑀯𑀥𑀸𑀭𑀡𑁂. 𑀅𑀓𑀧𑁆𑀧𑀺𑀬𑁄 𑀧𑀦 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑁄𑀯. 𑀧𑀝𑀺𑀓𑁆𑀔𑀺𑀢𑁆𑀢𑁄𑀧𑀺 𑀦 𑀧𑀯𑀸𑀭𑁂𑀢𑀺. 𑀉𑀤𑀓𑁂 𑀲𑀫𑁆𑀪𑀯𑁄 𑀬𑀲𑁆𑀲 𑀲𑁄 𑀫𑀘𑁆𑀙𑁄 𑀦𑀸𑀫. 𑀤𑁆𑀯𑀻𑀲𑀼 𑀧𑀦𑁂𑀢𑁂𑀲𑀼 𑀲𑀘𑁂 𑀬𑀸𑀕𑀼𑀁 𑀧𑀺𑀯𑀦𑁆𑀢𑀲𑁆𑀲 𑀬𑀸𑀕𑀼𑀲𑀺𑀢𑁆𑀣𑀫𑀢𑁆𑀢𑁂𑀲𑀼𑀧𑀺 𑀫𑀘𑁆𑀙𑀔𑀡𑁆𑀟𑁂𑀲𑀼 𑀯𑀸 𑀫𑀁𑀲𑀔𑀡𑁆𑀟𑁂𑀲𑀼 𑀯𑀸 𑀏𑀓𑀁 𑀔𑀸𑀤𑀺𑀢𑀁 𑀏𑀓𑀁 𑀳𑀢𑁆𑀣𑁂 𑀯𑀸 𑀧𑀢𑁆𑀢𑁂 𑀯𑀸 𑀳𑁄𑀢𑀺, 𑀲𑁄 𑀘𑁂 𑀅𑀜𑁆𑀜𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀧𑀯𑀸𑀭𑁂𑀢𑀺. 𑀤𑁆𑀯𑁂𑀧𑀺 𑀔𑀸𑀤𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀫𑀼𑀔𑁂 𑀲𑀸𑀲𑀧𑀫𑀢𑁆𑀢𑀫𑁆𑀧𑀺 𑀅𑀯𑀲𑀺𑀝𑁆𑀞𑀁 𑀦𑀢𑁆𑀣𑀺, 𑀲𑀘𑁂𑀧𑀺 𑀅𑀜𑁆𑀜𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀧𑀯𑀸𑀭𑁂𑀢𑀺.

𑁭𑁮. 𑀇𑀤𑀸𑀦𑀺 ‘‘𑀓𑀻𑀤𑀺𑀲𑀁 𑀪𑀼𑀜𑁆𑀚𑀦𑁆𑀢𑁄 𑀓𑀺𑀦𑁆𑀢𑀺 𑀯𑀢𑁆𑀯𑀸 𑀉𑀧𑀦𑀻𑀢𑀁 𑀓𑀺𑀁 𑀦𑀸𑀫 𑀦𑀺𑀲𑁂𑀥𑁂𑀦𑁆𑀢𑁄 𑀧𑀯𑀸𑀭𑁂𑀢𑀺 𑀦𑀸𑀫𑀸’’𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀦𑀺𑀥𑀸𑀬𑀸𑀳 ‘‘𑀪𑀼𑀜𑁆𑀚𑀦𑁆𑀢𑁄’’𑀢𑀺𑀆𑀤𑀺. 𑀢𑀢𑁆𑀣 𑀓𑀧𑁆𑀧𑀁 𑀯𑀸 𑀅𑀓𑀧𑁆𑀧𑀁 𑀯𑀸 𑀧𑀜𑁆𑀘𑀲𑀼 𑀪𑁄𑀚𑀦𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀪𑁄𑀚𑀦𑀁 𑀪𑀼𑀜𑁆𑀚𑀦𑁆𑀢𑁄 𑀪𑀺𑀓𑁆𑀔𑀼 𑀢𑀦𑁆𑀦𑀸𑀫𑁂𑀦 𑀢𑁂𑀲𑀁 𑀧𑀯𑀸𑀭𑀡𑀸𑀚𑀦𑀓𑀪𑁄𑀚𑀦𑀸𑀦𑀁 𑀦𑀸𑀫𑁂𑀦 𑀯𑀸 ‘‘𑀇𑀫’’𑀦𑁆𑀢𑀺 𑀲𑀸𑀫𑀜𑁆𑀜𑁂𑀦 𑀯𑀸 𑀯𑀢𑁆𑀯𑀸 𑀅𑀪𑀺𑀳𑀝𑀁 𑀳𑀢𑁆𑀣𑀧𑀸𑀲𑁄𑀧𑀦𑀻𑀢𑀁 𑀓𑀧𑁆𑀧𑀁 𑀓𑀧𑁆𑀧𑀺𑀬𑀁 𑀬𑀣𑀸𑀯𑀼𑀢𑁆𑀢𑀪𑁄𑀚𑀦𑀁 𑀦𑀺𑀲𑁂𑀥𑀬𑀁 𑀦𑀺𑀲𑁂𑀥𑀬𑀦𑁆𑀢𑁄 𑀧𑀯𑀸𑀭𑁂𑀬𑁆𑀬𑀸𑀢𑀺 𑀧𑀤𑀢𑁆𑀣𑀲𑀫𑁆𑀩𑀦𑁆𑀥𑁄. 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑁂𑀦 𑀘𑁂 𑀅𑀓𑀧𑁆𑀧𑀺𑀬𑀫𑀁𑀲𑀜𑁆𑀘 𑀓𑀼𑀮𑀤𑀽𑀲𑀦𑀯𑁂𑀚𑁆𑀚𑀓𑀫𑁆𑀫𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀭𑁄𑀘𑀦𑀲𑀸𑀤𑀺𑀢𑀭𑀽𑀧𑀺𑀬𑀸𑀤𑀻𑀳𑀺 𑀦𑀺𑀩𑁆𑀩𑀢𑁆𑀢𑀁 𑀅𑀓𑀧𑁆𑀧𑀺𑀬𑀪𑁄𑀚𑀦𑀜𑁆𑀘 𑀢𑀣𑀸 𑀅𑀜𑁆𑀜𑀜𑁆𑀘 𑀓𑀧𑁆𑀧𑀺𑀬𑀁 𑀯𑀸 𑀅𑀓𑀧𑁆𑀧𑀺𑀬𑀁 𑀯𑀸 𑀏𑀓𑀲𑀺𑀢𑁆𑀣𑀫𑀢𑁆𑀢𑀫𑁆𑀧𑀺 𑀅𑀚𑁆𑀛𑁄𑀳𑀝𑀁 𑀳𑁄𑀢𑀺, 𑀲𑁄 𑀲𑀘𑁂 𑀧𑀢𑁆𑀢𑀫𑀼𑀔𑀳𑀢𑁆𑀣𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀪𑁄𑀚𑀦𑁂 𑀲𑀢𑀺 𑀲𑀸𑀧𑁂𑀓𑁆𑀔𑁄𑀯 𑀅𑀜𑁆𑀜𑀁 𑀳𑀢𑁆𑀣𑀧𑀸𑀲𑁂 𑀞𑀺𑀢𑁂𑀦 ‘‘𑀑𑀤𑀦𑀁 𑀕𑀡𑁆𑀳𑀣𑀸’’𑀢𑀺𑀆𑀤𑀺𑀦𑀸 𑀧𑀯𑀸𑀭𑀡𑀧𑁆𑀧𑀳𑁄𑀦𑀓𑀲𑁆𑀲𑁂𑀯 𑀦𑀸𑀫𑁂𑀦 𑀯𑀸 ‘‘𑀇𑀫’’𑀦𑁆𑀢𑀺 𑀲𑀸𑀫𑀜𑁆𑀜𑀯𑀲𑁂𑀦𑁂𑀯 𑀯𑀸 𑀓𑀸𑀬𑁂𑀦𑁂𑀯 𑀅𑀪𑀺𑀳𑀝𑀁 𑀯𑀼𑀢𑁆𑀢𑀮𑀓𑁆𑀔𑀡𑀁 𑀓𑀧𑁆𑀧𑀺𑀬𑀫𑁂𑀯 𑀪𑁄𑀚𑀦𑀁 𑀓𑁂𑀯𑀮𑀁 𑀯𑀸 𑀫𑀺𑀲𑁆𑀲𑀁 𑀯𑀸 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀧𑀝𑀺𑀓𑁆𑀔𑀺𑀧𑀢𑀺 𑀧𑀯𑀸𑀭𑁂𑀢𑀻𑀢𑀺. ‘‘𑀆𑀓𑀺𑀭 𑀆𑀓𑀺𑀭, 𑀓𑁄𑀝𑁆𑀝𑁂𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀧𑀽𑀭𑁂𑀳𑀻’’𑀢𑀺 𑀧𑀦 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑁭𑁯-𑁮𑁦. 𑀇𑀤𑀸𑀦𑀺 𑀬𑁂 𑀧𑀯𑀸𑀭𑀡𑀁 𑀦 𑀚𑀦𑁂𑀦𑁆𑀢𑀺, 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀮𑀸𑀚𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀮𑀸𑀚𑀸…𑀧𑁂… 𑀨𑀮𑀸𑀤𑀻𑀦𑀺 𑀧𑀯𑀸𑀭𑀡𑀁 𑀦 𑀚𑀦𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀮𑀸𑀚𑀸𑀢𑀺 𑀲𑀸𑀮𑀺𑀆𑀤𑀻𑀳𑀺 𑀓𑀢𑀸 𑀮𑀸𑀚𑀸. 𑀢𑀁𑀲𑀢𑁆𑀢𑀼𑀪𑀢𑁆𑀢𑀸𑀦𑀻𑀢𑀺 𑀢𑁂𑀳𑀺 𑀮𑀸𑀚𑁂𑀳𑀺 𑀓𑀢𑀸 𑀲𑀢𑁆𑀢𑀼 𑀘𑁂𑀯 𑀪𑀢𑁆𑀢𑀸𑀦𑀺 𑀘. 𑀕𑁄𑀭𑀲𑁄𑀢𑀺 𑀕𑀼𑀦𑁆𑀦𑀁 𑀭𑀲𑁄 𑀔𑀻𑀭𑀸𑀤𑀺. 𑀲𑀼𑀤𑁆𑀥𑀔𑀚𑁆𑀚𑀓𑁄𑀢𑀺 𑀫𑀘𑁆𑀙𑀫𑀁𑀲𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑀢𑀸𑀬 𑀲𑀼𑀤𑁆𑀥𑀔𑀚𑁆𑀚𑀓𑁄. 𑀲𑀢𑁆𑀢𑀼𑀬𑁄 𑀧𑀺𑀡𑁆𑀟𑁂𑀢𑁆𑀯𑀸 𑀓𑀢𑁄 𑀅𑀧𑀓𑁆𑀓𑁄 𑀲𑀢𑁆𑀢𑀼𑀕𑀼𑀴𑁄 𑀧𑀦 𑀲𑀢𑁆𑀢𑀼𑀫𑁄𑀤𑀓𑀲𑀗𑁆𑀔𑀸𑀢𑁄 𑀧𑀯𑀸𑀭𑁂𑀢𑀺. 𑀢𑀡𑁆𑀟𑀼𑀮𑀸𑀢𑀺 𑀲𑀫𑀧𑀸𑀓𑀪𑀚𑁆𑀚𑀺𑀢𑀸𑀦𑀁 𑀲𑀸𑀮𑀺𑀆𑀤𑀻𑀦𑀁 𑀢𑀡𑁆𑀟𑀼𑀮𑀸, 𑀪𑀚𑁆𑀚𑀺𑀢𑀢𑀡𑁆𑀟𑀼𑀮𑀸 𑀏𑀯 𑀯𑀸. 𑀪𑀝𑁆𑀞𑀧𑀺𑀝𑁆𑀞𑀦𑁆𑀢𑀺 𑀲𑀼𑀤𑁆𑀥𑀁 𑀬𑀁 𑀓𑀺𑀜𑁆𑀘𑀺 𑀪𑀚𑁆𑀚𑀺𑀢𑀁 𑀧𑀺𑀝𑁆𑀞𑀁. 𑀧𑀼𑀣𑀼𑀓𑀸𑀢𑀺 𑀲𑀸𑀮𑀺𑀆𑀤𑀻𑀦𑀁 𑀧𑀼𑀣𑀼𑀓𑀸. 𑀧𑀼𑀣𑀼𑀓𑀸 𑀳𑀺 𑀢𑀦𑁆𑀢𑀺𑀆𑀕𑀫𑀬𑀼𑀢𑁆𑀢𑀺𑀬𑀸 𑀯𑀺𑀲𑀼𑀫𑁆𑀧𑀺 𑀕𑀬𑁆𑀳𑀢𑀺, 𑀏𑀓𑀢𑁄𑀧𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀸𑀯𑀲𑁂𑀲𑀸𑀦𑀁 𑀧𑀼𑀣𑀼𑀓𑀸𑀯𑁂𑀴𑀼𑀆𑀤𑀻𑀦𑀁 𑀪𑀢𑁆𑀢𑀦𑁆𑀢𑀺 𑀘 𑀲𑀫𑁆𑀩𑀦𑁆𑀥𑁄. 𑀯𑁂𑀴𑀽𑀢𑀺 𑀢𑁂𑀲𑀁 𑀢𑀡𑁆𑀟𑀼𑀮𑀸 𑀯𑀼𑀘𑁆𑀘𑀦𑁆𑀢𑀺. 𑀧𑀼𑀣𑀼𑀓𑀸 𑀘 𑀯𑁂𑀴𑀼 𑀘, 𑀢𑁂 𑀆𑀤𑀬𑁄 𑀬𑁂𑀲𑀦𑁆𑀢𑀺 𑀲𑀫𑀸𑀲𑁄. 𑀘-𑀲𑀤𑁆𑀤𑁄 𑀧𑀦𑁂𑀢𑁆𑀣 𑀲𑀩𑁆𑀩𑀢𑁆𑀣𑀸𑀧𑀺 𑀬𑁄𑀚𑁂𑀢𑀩𑁆𑀩𑁄. 𑀆𑀤𑀺-𑀲𑀤𑁆𑀤𑁂𑀦 𑀓𑀦𑁆𑀤𑀫𑀽𑀮𑀨𑀮𑀸𑀦𑀺𑀧𑀺 𑀕𑀬𑁆𑀳𑀦𑁆𑀢𑀺. 𑀯𑀼𑀢𑁆𑀢𑀸𑀯𑀲𑁂𑀲𑀸𑀦𑀦𑁆𑀢𑀺 𑀯𑀼𑀢𑁆𑀢𑁂𑀳𑀺 𑀲𑀢𑁆𑀢𑀯𑀺𑀥𑁂𑀳𑀺 𑀥𑀜𑁆𑀜𑁂𑀳𑀺 𑀅𑀯𑀲𑁂𑀲𑀸𑀦𑀁. 𑀭𑀲𑀬𑀸𑀕𑀽𑀢𑀺 𑀭𑀲𑁂𑀳𑀺 𑀧𑀓𑁆𑀓𑀫𑀁𑀲𑀸𑀤𑀻𑀳𑀺 𑀲𑀫𑁆𑀫𑀺𑀲𑁆𑀲𑀸 𑀬𑀸𑀕𑀼. 𑀭𑀲𑁄𑀧𑀺 𑀢𑀸𑀤𑀺𑀲𑁄𑀯. 𑀲𑀼𑀤𑁆𑀥𑀬𑀸𑀕𑀽𑀢𑀺 𑀫𑀁𑀲𑀸𑀤𑀻𑀳𑀺 𑀅𑀫𑀺𑀲𑁆𑀲𑀸 𑀲𑀼𑀤𑁆𑀥𑀬𑀸𑀕𑀼. 𑀨𑀮𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀦𑁆𑀤𑀸𑀤𑀻𑀦𑀫𑁆𑀧𑀺 𑀕𑀳𑀡𑀁. 𑀅𑀧𑀺 𑀘𑀸𑀢𑀺 𑀦𑀺𑀧𑀸𑀢𑁄, 𑀦𑀺𑀧𑀸𑀢𑀲𑀫𑀼𑀤𑀸𑀬𑁄 𑀯𑀸 𑀲𑀫𑀼𑀘𑁆𑀘𑀬𑁂, 𑀲𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄.

𑁮𑁧. 𑀇𑀤𑀸𑀦𑀺 𑀬𑀲𑁆𑀫𑀸 𑀲𑀢𑁆𑀢𑀳𑀺 𑀯𑀺𑀦𑀬𑀓𑀫𑁆𑀫𑀸𑀓𑀸𑀭𑁂𑀳𑀺 𑀬𑀁 𑀅𑀢𑀺𑀭𑀺𑀢𑁆𑀢𑀁 𑀅𑀓𑀢𑀁, 𑀢𑀢𑁆𑀣 𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀩𑁆𑀬𑀢𑀺𑀭𑁂𑀓𑀢𑁄 𑀅𑀢𑀺𑀭𑀺𑀢𑁆𑀢𑀓𑀢𑁂 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀢𑀺𑀭𑀺𑀢𑁆𑀢𑀁 𑀓𑀭𑁄𑀦𑁆𑀢𑁂𑀦 𑀏𑀯𑀁 𑀓𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀯𑀸𑀭𑀺𑀢𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀯𑀸𑀭𑀺𑀢𑁂𑀦 𑀯𑀼𑀝𑁆𑀞𑀸𑀬 𑀅𑀢𑀺𑀭𑀺𑀢𑁆𑀢𑀁 𑀦 𑀓𑀸𑀢𑀩𑁆𑀩𑀁, 𑀪𑁄𑀚𑀦𑀁 𑀅𑀪𑀼𑀢𑁆𑀢𑁂𑀦 𑀘 𑀅𑀢𑀺𑀭𑀺𑀢𑁆𑀢𑀁 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀪𑁄𑀚𑀦𑀦𑁆𑀢𑀺 𑀧𑀯𑀸𑀭𑀡𑀧𑁆𑀧𑀳𑁄𑀦𑀓𑀪𑁄𑀚𑀦𑀁. 𑀅𑀪𑀼𑀢𑁆𑀢𑁂𑀦𑀸𑀢𑀺 𑀏𑀓𑀲𑀺𑀢𑁆𑀣𑀫𑀢𑁆𑀢𑀫𑁆𑀧𑀺 𑀅𑀪𑀼𑀢𑁆𑀢𑀸𑀯𑀺𑀦𑀸. 𑀬𑁂𑀦 𑀬𑀁𑀯𑀸 𑀧𑀼𑀭𑁂 𑀓𑀢𑀦𑁆𑀢𑀺 𑀏𑀢𑁆𑀣 𑀘 𑀏𑀯-𑀲𑀤𑁆𑀤𑁄 𑀤𑀻𑀖𑀁 𑀓𑀢𑁆𑀯𑀸 𑀦𑀺𑀤𑁆𑀤𑀺𑀝𑁆𑀞𑁄, 𑀲𑁄 𑀘 𑀅𑀚𑁆𑀛𑀸𑀳𑀝𑁂𑀦 𑀢𑀁-𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑀻𑀬𑀢𑀺, 𑀢𑀲𑁆𑀫𑀸 𑀬𑁂𑀦 𑀪𑀺𑀓𑁆𑀔𑀼𑀦𑀸 𑀬𑀁 𑀪𑁄𑀚𑀦𑀁 𑀧𑀼𑀭𑁂 𑀧𑀼𑀩𑁆𑀩𑁂 𑀅𑀢𑀺𑀭𑀺𑀢𑁆𑀢𑀁 𑀓𑀢𑀁, 𑀢𑁂𑀦𑁂𑀯 𑀢𑀫𑁂𑀯 𑀅𑀢𑀺𑀭𑀺𑀢𑁆𑀢𑀁 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀫𑀸 𑀓𑀧𑁆𑀧𑀺𑀬𑀁 𑀓𑀸𑀭𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀜𑁆𑀜𑀁 𑀆𑀫𑀺𑀲𑀁 𑀆𑀓𑀺𑀭𑀦𑁆𑀢𑀺, 𑀢𑀁 𑀲𑁄 𑀧𑀼𑀦 𑀓𑀸𑀢𑀼𑀁 𑀦 𑀮𑀪𑀢𑀺, 𑀢𑀲𑁆𑀫𑀺𑀁 𑀪𑁄𑀚𑀦𑁂 𑀓𑀭𑀺𑀬𑀫𑀸𑀦𑁂 𑀧𑀞𑀫𑀓𑀢𑁂𑀦 𑀲𑀤𑁆𑀥𑀺𑀁 𑀓𑀢𑀁 𑀳𑁄𑀢𑀻𑀢𑀺. 𑀅𑀜𑁆𑀜𑀲𑁆𑀫𑀺𑀁 𑀧𑀦 𑀢𑁂𑀦 𑀯𑀸 𑀅𑀜𑁆𑀜𑁂𑀦 𑀯𑀸 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑁮𑁨. ‘‘𑀓𑀧𑁆𑀧𑀺𑀬’’𑀦𑁆𑀢𑀺𑀆𑀤𑀻𑀦𑀺 ‘‘𑀓𑀭𑁄𑀦𑁆𑀢𑁄’’𑀢𑀺 𑀏𑀢𑀲𑁆𑀲 𑀓𑀫𑁆𑀫𑀧𑀤𑀸𑀦𑀺. 𑀓𑀧𑁆𑀧𑀺𑀬𑀜𑁆𑀘𑁂𑀯 𑀕𑀳𑀺𑀢𑀜𑁆𑀘𑁂𑀯 𑀉𑀘𑁆𑀘𑀸𑀭𑀺𑀢𑀜𑁆𑀘𑁂𑀯 𑀳𑀢𑁆𑀣𑀧𑀸𑀲𑀕𑀜𑁆𑀘𑁂𑀯 𑀬𑀸𑀯𑀓𑀸𑀮𑀺𑀓𑀁 𑀅𑀢𑀺𑀭𑀺𑀢𑁆𑀢𑀁 𑀓𑀭𑁄𑀦𑁆𑀢𑁄 ‘‘𑀅𑀮𑀫𑁂𑀢𑀁 𑀲𑀩𑁆𑀩’’𑀦𑁆𑀢𑀺 𑀏𑀯𑀁 𑀪𑀸𑀲𑀢𑀽𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀬𑀁 𑀨𑀮𑀁 𑀯𑀸 𑀓𑀦𑁆𑀤𑀫𑀽𑀮𑀸𑀤𑀺 𑀯𑀸 𑀧𑀜𑁆𑀘𑀳𑀺 𑀲𑀫𑀡𑀓𑀧𑁆𑀧𑁂𑀳𑀺 𑀓𑀧𑁆𑀧𑀺𑀬𑀁 𑀓𑀢𑀁, 𑀬𑀜𑁆𑀘 𑀓𑀧𑁆𑀧𑀺𑀬𑀫𑀁𑀲𑀁 𑀯𑀸 𑀓𑀧𑁆𑀧𑀺𑀬𑀪𑁄𑀚𑀦𑀁 𑀯𑀸, 𑀏𑀢𑀁 𑀓𑀧𑁆𑀧𑀺𑀬𑀁 𑀦𑀸𑀫. 𑀕𑀳𑀺𑀢𑀦𑁆𑀢𑀺 𑀪𑀺𑀓𑁆𑀔𑀼𑀦𑀸 𑀧𑀝𑀺𑀕𑁆𑀕𑀳𑀺𑀢𑀁. 𑀉𑀘𑁆𑀘𑀸𑀭𑀺𑀢𑀦𑁆𑀢𑀺 𑀓𑀧𑁆𑀧𑀺𑀬𑀁 𑀓𑀸𑀭𑁂𑀢𑀼𑀁 𑀆𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀈𑀲𑀓𑀫𑁆𑀧𑀺 𑀉𑀓𑁆𑀔𑀺𑀢𑁆𑀢𑀁 𑀯𑀸 𑀅𑀧𑀦𑀸𑀫𑀺𑀢𑀁 𑀯𑀸, 𑀢𑀁 𑀧𑀦 𑀅𑀢𑀺𑀭𑀺𑀢𑁆𑀢𑀓𑀸𑀭𑀓𑁂𑀦 ‘‘𑀅𑀮𑀫𑁂𑀢𑀁 𑀲𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑁂𑀦 𑀓𑀸𑀢𑀩𑁆𑀩𑀁. 𑀳𑀢𑁆𑀣𑀧𑀸𑀲𑀕𑀦𑁆𑀢𑀺 𑀓𑀧𑁆𑀧𑀺𑀬𑀁 𑀓𑀸𑀭𑁂𑀢𑀼𑀁 𑀆𑀕𑀢𑁂𑀦 𑀳𑀢𑁆𑀣𑀧𑀸𑀲𑀁 𑀕𑀢𑀁. 𑀅𑀢𑀺𑀭𑀺𑀢𑁆𑀢𑀁 𑀓𑀭𑁄𑀦𑁆𑀢𑁄𑀢𑀺 𑀈𑀤𑀺𑀲𑀁 𑀘𑀢𑀼𑀩𑁆𑀩𑀺𑀥𑀸𑀓𑀸𑀭𑀲𑀫𑁆𑀧𑀦𑁆𑀦𑀁 𑀪𑁄𑀚𑀦𑀁 𑀅𑀢𑀺𑀭𑀺𑀢𑁆𑀢𑀁 𑀓𑀭𑁄𑀦𑁆𑀢𑁄 𑀧𑀯𑀸𑀭𑁂𑀢𑁆𑀯𑀸 𑀆𑀲𑀦𑀸 𑀅𑀯𑀼𑀝𑁆𑀞𑀺𑀢𑁄 𑀯𑀸 𑀅𑀧𑁆𑀧𑀯𑀸𑀭𑁂𑀢𑁆𑀯𑀸𑀧𑀺 𑀲𑀩𑁆𑀩𑀣𑀸 𑀪𑀼𑀢𑁆𑀢𑁄 𑀯𑀸𑀢𑀺 𑀏𑀯𑀁 𑀤𑀼𑀯𑀺𑀥𑀯𑀺𑀦𑀬𑀓𑀫𑁆𑀫𑀸𑀓𑀸𑀭𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀼. 𑀅𑀮𑀫𑁂𑀢𑀁 𑀲𑀩𑁆𑀩𑀦𑁆𑀢𑀺 𑀏𑀯𑀁 𑀪𑀸𑀲𑀢𑀽𑀢𑀺 𑀅𑀮𑀫𑁂𑀢𑀁 𑀲𑀩𑁆𑀩𑀁 𑀇𑀢𑀺 𑀏𑀯𑀁 𑀪𑀸𑀲𑀢𑀼. 𑀏𑀯𑀁 𑀲𑀢𑁆𑀢𑀯𑀺𑀥𑀁 𑀯𑀺𑀦𑀬𑀓𑀫𑁆𑀫𑀸𑀓𑀸𑀭𑀁 𑀲𑀫𑁆𑀧𑀸𑀤𑁂𑀦𑁆𑀢𑁄 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀲𑀓𑀺𑀫𑁆𑀧𑀺 𑀏𑀯𑀁 𑀯𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁮𑁩. 𑀓𑀧𑁆𑀧𑀺𑀬𑀁 𑀓𑀭𑁄𑀦𑁆𑀢𑁂𑀦 𑀧𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀳𑀢𑁆𑀣𑁂 𑀞𑀺𑀢𑀁 𑀦 𑀓𑀸𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀦 𑀓𑀭𑁂…𑀧𑁂… 𑀳𑀢𑁆𑀣𑀕’’𑀦𑁆𑀢𑀺. 𑀉𑀧𑀲𑀫𑁆𑀧𑀦𑁆𑀦𑀢𑁄 𑀅𑀜𑁆𑀜𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄, 𑀢𑀲𑁆𑀲 𑀳𑀢𑁆𑀣𑁂 𑀕𑀢𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀳𑀢𑁆𑀣𑀕𑀁. 𑀧𑁂𑀲𑀬𑀺𑀢𑁆𑀯𑀸𑀧𑀻𑀢𑀺 𑀲𑀘𑁂 𑀢𑀢𑁆𑀣 𑀅𑀜𑁆𑀜𑁄 𑀩𑁆𑀬𑀢𑁆𑀢𑁄 𑀪𑀺𑀓𑁆𑀔𑀼 𑀦𑀢𑁆𑀣𑀺, 𑀬𑀢𑁆𑀣 𑀅𑀢𑁆𑀣𑀺, 𑀢𑀢𑁆𑀣 𑀧𑁂𑀲𑀬𑀺𑀢𑁆𑀯𑀸𑀧𑀺. 𑀢𑀁 𑀅𑀢𑀺𑀭𑀺𑀢𑁆𑀢𑀓𑀢𑀁 𑀅𑀓𑀸𑀭𑀓𑁄 𑀅𑀢𑀺𑀭𑀺𑀢𑁆𑀢𑀓𑀸𑀭𑀓𑀢𑁄 𑀅𑀜𑁆𑀜𑁄 𑀲𑀩𑁆𑀩𑁄 𑀧𑀯𑀸𑀭𑀺𑀢𑁄𑀧𑀺 𑀅𑀧𑁆𑀧𑀯𑀸𑀭𑀺𑀢𑁄𑀧𑀺 𑀪𑀼𑀜𑁆𑀚𑀺𑀢𑀼𑀁 𑀮𑀩𑁆𑀪𑀢𑁂𑀢𑀺 𑀲𑀫𑁆𑀩𑀦𑁆𑀥𑀦𑀻𑀬𑀁. 𑀧𑀯𑀸𑀭𑀺𑀢𑁂𑀦 𑀧𑀦 𑀫𑀼𑀔𑀜𑁆𑀘 𑀳𑀢𑁆𑀣𑀜𑁆𑀘 𑀲𑁄𑀥𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁.

𑀧𑀯𑀸𑀭𑀡𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.