𑁪𑁨. 𑀤𑁂𑀲𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁮𑁨. 𑀇𑀤𑀸𑀦𑀺 𑀤𑁂𑀲𑀦𑀸𑀦𑀺𑀤𑀲𑁆𑀲𑀦𑀩𑁆𑀬𑀸𑀲𑁂𑀦 𑀳𑁂𑀝𑁆𑀞𑀸 𑀅𑀯𑀼𑀢𑁆𑀢𑀸𑀦𑀺 𑀓𑀸𑀦𑀺𑀘𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀉𑀧𑀤𑀺𑀲𑀺𑀢𑀼𑀁 ‘‘𑀘𑀸𑀕𑁄’’𑀢𑀺𑀆𑀤𑀺𑀫𑀸𑀳. 𑀪𑀺𑀓𑁆𑀔𑀼𑀪𑀸𑀯𑀲𑁆𑀲 𑀬𑁄 𑀘𑀸𑀕𑁄, 𑀲𑀸 𑀧𑀸𑀭𑀸𑀚𑀺𑀓𑀤𑁂𑀲𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀯𑀢𑀺 𑀅𑀦𑁂𑀦𑀸𑀢𑀺 𑀪𑀸𑀯𑁄, 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁, 𑀪𑀺𑀓𑁆𑀔𑀼𑀦𑁄 𑀪𑀸𑀯𑁄 𑀪𑀺𑀓𑁆𑀔𑀼-𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀪𑀺𑀓𑁆𑀔𑀼𑀓𑀺𑀘𑁆𑀘𑀁 𑀪𑀺𑀓𑁆𑀔𑀼𑀪𑀸𑀯𑁄, 𑀢𑀲𑁆𑀲. 𑀤𑀺𑀲𑀻 𑀉𑀘𑁆𑀘𑀸𑀭𑀡𑁂, 𑀉𑀘𑁆𑀘𑀸𑀭𑀡𑀸 𑀧𑀓𑀸𑀲𑀦𑀸 𑀤𑁂𑀲𑀦𑀸. ‘‘𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀺, 𑀯𑀺𑀯𑀝𑁆𑀝𑀁 𑀦𑀸𑀢𑀺𑀯𑀲𑁆𑀲𑀢𑀻’’𑀢𑀺 (𑀉𑀤𑀸. 𑁪𑁫) 𑀳𑀺 𑀯𑀼𑀢𑁆𑀢𑀁. 𑀇𑀥 𑀧𑀦 𑀪𑀺𑀓𑁆𑀔𑀼𑀪𑀸𑀯𑀧𑀭𑀺𑀘𑁆𑀘𑀸𑀕𑁄𑀬𑁂𑀯 𑀧𑀸𑀭𑀸𑀚𑀺𑀓𑀸𑀬 𑀧𑀓𑀸𑀲𑀦𑀸 𑀦𑀸𑀫 𑀧𑀸𑀭𑀸𑀚𑀺𑀓𑀸𑀬 𑀤𑁂𑀲𑀦𑀸. ‘‘𑀬𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀲𑁄’’𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁, 𑀢𑀣𑀸𑀧𑀺 𑀲𑀩𑁆𑀩𑀸𑀤𑀻𑀳𑀺 𑀯𑀼𑀢𑁆𑀢𑀲𑁆𑀲 𑀯𑀸 𑀮𑀺𑀗𑁆𑀕𑀫𑀸𑀤𑀺𑀬𑁆𑀬𑀢𑁂 𑀯𑀓𑁆𑀔𑀫𑀸𑀦𑀲𑁆𑀲 𑀯𑀸𑀢𑀺 𑀯𑀓𑁆𑀔𑀫𑀸𑀦𑀤𑁂𑀲𑀦𑀸𑀧𑁂𑀓𑁆𑀔𑀸𑀬 ‘‘𑀲𑁄’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀬𑁂𑀦 𑀧𑀓𑀸𑀭𑁂𑀦 ‘‘𑀙𑀸𑀤𑁂𑀢𑀺 𑀚𑀸𑀦𑀫𑀸𑀧𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀬𑀣𑀸𑀯𑀼𑀢𑁆𑀢𑀁, 𑀢𑁂𑀦. 𑀯𑀼𑀢𑁆𑀢𑀫𑀦𑀢𑀺𑀓𑁆𑀓𑀫𑁆𑀫𑀸𑀢𑀺 𑀅𑀩𑁆𑀬𑀬𑀻𑀪𑀸𑀯𑀯𑀲𑁂𑀦 𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀥𑀸𑀧𑀺 𑀕𑀭𑀼𑀓𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦𑀸𑀦𑀢𑀺𑀓𑁆𑀓𑀫𑁂𑀦𑁂𑀯 𑀧𑀓𑀸𑀲𑀦𑀸 𑀤𑁂𑀲𑀦𑀸 𑀲𑀺𑀬𑀸𑀢𑀺 ‘‘𑀯𑀼𑀝𑁆𑀞𑀸𑀦𑀁 𑀕𑀭𑀼𑀓𑀸𑀧𑀢𑁆𑀢𑀺𑀤𑁂𑀲𑀦𑀸’’𑀢𑀺 𑀯𑀼𑀘𑁆𑀘𑀢𑀺.

𑁩𑁮𑁩. 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀲𑀦𑁆𑀥𑀸𑀬 ‘‘𑀏𑀯’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀓𑀲𑁆𑀲𑀸𑀢𑀺 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄.

𑁩𑁮𑁪. 𑀢𑀼𑀫𑁆𑀳𑀫𑀽𑀮𑁂𑀢𑀺 𑀢𑀼𑀫𑁆𑀳𑀸𑀓𑀁 𑀫𑀽𑀮𑁂 𑀲𑀫𑀻𑀧𑁂. 𑀧𑀝𑀺𑀤𑁂𑀲𑁂𑀫𑀻𑀢𑀺 𑀧𑀓𑀸𑀲𑁂𑀫𑀺. 𑀲𑀁𑀯𑀭𑁂𑀬𑁆𑀬𑀸𑀲𑀻𑀢𑀺 𑀲𑀁𑀬𑀫𑁂𑀬𑁆𑀬𑀸𑀲𑀺, 𑀲𑀁𑀯𑀭𑁂 𑀧𑀢𑀺𑀝𑁆𑀞𑁂𑀬𑁆𑀬𑀸𑀲𑀻𑀢𑀺 𑀅𑀢𑁆𑀣𑁄.

𑁩𑁮𑁫. 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀦𑀸𑀢𑀺 𑀏𑀓𑀩𑀳𑀼𑀪𑀸𑀯𑀁 𑀲𑀦𑁆𑀦𑀺𑀳𑀺𑀢𑀸𑀲𑀦𑁆𑀦𑀺𑀳𑀺𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀇𑀤𑀁 𑀫𑁂, 𑀪𑀦𑁆𑀢𑁂, 𑀘𑀻𑀯𑀭’’𑀦𑁆𑀢𑀺𑀆𑀤𑀺𑀦𑀸 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸. 𑀢𑁂𑀦𑀸𑀢𑀺 𑀬𑀲𑁆𑀲 𑀘𑀻𑀯𑀭𑀁 𑀦𑀺𑀲𑁆𑀲𑀝𑁆𑀞𑀁, 𑀢𑁂𑀦. ‘‘𑀇𑀫𑀁…𑀧𑁂… 𑀤𑀫𑁆𑀫𑀻’’𑀢𑀺 𑀦𑀺𑀲𑁆𑀲𑀝𑁆𑀞𑀘𑀻𑀯𑀭𑀁 𑀤𑁂𑀬𑁆𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. ‘‘𑀇𑀫𑀁 𑀘𑀻𑀯𑀭𑀁 𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁.

𑁩𑁮𑁬. (𑀓) 𑀘𑀻𑀯𑀭𑀦𑁆𑀢𑀺 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀦𑀬𑁂𑀦 𑀅𑀥𑀺𑀝𑁆𑀞𑀺𑀢𑁂𑀲𑀼 𑀲𑀗𑁆𑀖𑀸𑀝𑀺𑀆𑀤𑀻𑀲𑀼 𑀬𑀁 𑀓𑀺𑀜𑁆𑀘𑀺 𑀘𑀻𑀯𑀭𑀁. 𑀯𑀺𑀧𑁆𑀧𑀯𑀼𑀢𑁆𑀣𑀦𑁆𑀢𑀺 𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀯𑀼𑀢𑁆𑀣𑀁.

(𑀔) 𑀅𑀓𑀸𑀮𑀘𑀻𑀯𑀭𑀦𑁆𑀢𑀺 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀯𑀲𑁆𑀲𑀸𑀦𑀲𑁆𑀲 𑀧𑀘𑁆𑀙𑀺𑀫𑀫𑀸𑀲𑀁 𑀞𑀧𑁂𑀢𑁆𑀯𑀸 𑀲𑁂𑀲𑁂 𑀏𑀓𑀸𑀤𑀲𑀫𑀸𑀲𑁂, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀢𑀜𑁆𑀘 𑀫𑀸𑀲𑀁 𑀳𑁂𑀫𑀦𑁆𑀢𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀘 𑀞𑀧𑁂𑀢𑁆𑀯𑀸 𑀲𑁂𑀲𑁂 𑀲𑀢𑁆𑀢𑀫𑀸𑀲𑁂 𑀉𑀧𑁆𑀧𑀦𑁆𑀦𑀁, 𑀓𑀸𑀮𑁂𑀧𑀺 𑀲𑀗𑁆𑀖𑀲𑁆𑀲 𑀯𑀸 ‘‘𑀇𑀤𑀁 𑀅𑀓𑀸𑀮𑀘𑀻𑀯𑀭’’𑀦𑁆𑀢𑀺 𑀏𑀓𑀧𑀼𑀕𑁆𑀕𑀮𑀲𑁆𑀲 𑀯𑀸 ‘‘𑀇𑀤𑀁 𑀢𑀼𑀬𑁆𑀳𑀁 𑀤𑀫𑁆𑀫𑀻’’𑀢𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑀺𑀦𑁆𑀦𑀁. 𑀇𑀢𑀭𑀁 𑀧𑀦 𑀓𑀸𑀮𑀘𑀻𑀯𑀭𑀁. 𑀫𑀸𑀲𑀸𑀢𑀺𑀓𑁆𑀓𑀦𑁆𑀢𑀦𑁆𑀢𑀺 𑀅𑀓𑀸𑀮𑀘𑀻𑀯𑀭𑁂 𑀉𑀧𑁆𑀧𑀦𑁆𑀦𑁂 𑀊𑀦𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀲𑀗𑁆𑀖𑀕𑀡𑀸𑀤𑀺𑀢𑁄 𑀲𑀢𑀺𑀬𑀸 𑀧𑀘𑁆𑀘𑀸𑀲𑀸𑀬 𑀫𑀸𑀲𑀫𑁂𑀓𑀁 𑀧𑀭𑀺𑀳𑀸𑀭𑁄 𑀮𑀩𑁆𑀪𑀢𑀺, 𑀢𑀁 𑀫𑀸𑀲𑀁 𑀅𑀢𑀺𑀓𑁆𑀓𑀦𑁆𑀢𑀁.

(𑀕) 𑀧𑀼𑀭𑀸𑀡𑀘𑀻𑀯𑀭𑀦𑁆𑀢𑀺 𑀬𑀁 𑀅𑀦𑁆𑀢𑀫𑀲𑁄 𑀉𑀲𑁆𑀲𑀻𑀲𑀓𑀁 𑀓𑀢𑁆𑀯𑀸 𑀦𑀺𑀧𑀦𑁆𑀦𑁄. 𑀘𑀻𑀯𑀭𑀁 𑀦𑀸𑀫 𑀙𑀦𑁆𑀦𑀁 𑀅𑀜𑁆𑀜𑀢𑀭𑀁 𑀯𑀺𑀓𑀧𑁆𑀧𑀦𑀽𑀧𑀕𑀁. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑁂𑀲𑀼 𑀯𑀓𑁆𑀔𑀫𑀸𑀦𑀘𑀻𑀯𑀭𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑁂𑀲𑀼.

(𑀖) 𑀅𑀜𑁆𑀜𑀢𑁆𑀭 𑀧𑀸𑀭𑀺𑀯𑀢𑁆𑀢𑀓𑀸𑀢𑀺 𑀅𑀦𑁆𑀢𑀫𑀲𑁄 𑀳𑀭𑀻𑀢𑀓𑀻𑀔𑀡𑁆𑀟𑁂𑀦𑀧𑀺 𑀧𑀸𑀭𑀺𑀯𑀢𑁆𑀢𑀓𑀁 𑀯𑀺𑀦𑀸.

(𑀗) 𑀕𑀳𑀧𑀢𑀺𑀓𑀦𑁆𑀢𑀺 𑀪𑀺𑀓𑁆𑀔𑀽𑀲𑀼 𑀅𑀧𑀩𑁆𑀩𑀚𑀺𑀢𑀓𑀁. 𑀅𑀜𑁆𑀜𑀢𑁆𑀭 𑀲𑀫𑀬𑀸𑀢𑀺 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀦𑀝𑁆𑀞𑀘𑀻𑀯𑀭𑀲𑀫𑀬𑀁 𑀯𑀺𑀦𑀸, 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁂𑀳𑀺 𑀧𑀦 𑀲𑀸𑀔𑀸𑀧𑀮𑀸𑀲𑀁 𑀅𑀢𑁆𑀢𑀦𑀸 𑀪𑀜𑁆𑀚𑀺𑀢𑁆𑀯𑀸𑀧𑀺 𑀯𑀸𑀓𑀸𑀤𑀻𑀦𑀺 𑀕𑀡𑁆𑀳𑀺𑀢𑁆𑀯𑀸𑀧𑀺 𑀦𑀺𑀯𑀸𑀲𑁂𑀢𑀼𑀁 𑀯𑀝𑁆𑀝𑀢𑀺, 𑀧𑀕𑁂𑀯 𑀯𑀺𑀜𑁆𑀜𑀢𑁆𑀢𑀺. 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀦𑁆𑀢𑀺 𑀆𑀳 ‘‘𑀅𑀜𑁆𑀜𑀸𑀢𑀓’’𑀦𑁆𑀢𑀺𑀆𑀤𑀺.

(𑀘) 𑀢𑀤𑀼𑀢𑁆𑀢𑀭𑀻𑀢𑀺 𑀢𑀢𑁄 𑀯𑀼𑀢𑁆𑀢𑀧𑁆𑀧𑀫𑀸𑀡𑀢𑁄 𑀉𑀢𑁆𑀢𑀭𑀺, 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁂𑀦 𑀪𑀺𑀓𑁆𑀔𑀼𑀦𑀸 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀅𑀪𑀺𑀳𑀭𑀺𑀢𑁆𑀯𑀸 𑀧𑀯𑀸𑀭𑀺𑀢𑀘𑀻𑀯𑀭𑀢𑁄 𑀢𑀻𑀲𑀼 𑀦𑀝𑁆𑀞𑁂𑀲𑀼 𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀺, 𑀤𑁆𑀯𑀻𑀲𑀼 𑀦𑀝𑁆𑀞𑁂𑀲𑀼 𑀏𑀓𑀁 𑀲𑀸𑀤𑀺𑀢𑀩𑁆𑀩𑀁. 𑀧𑀓𑀢𑀺𑀬𑀸 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀘𑀭𑀦𑁆𑀢𑁂𑀦 𑀤𑁆𑀯𑀻𑀲𑀼 𑀦𑀝𑁆𑀞𑁂𑀲𑀼 𑀤𑁆𑀯𑁂𑀬𑁂𑀯 𑀲𑀸𑀤𑀺𑀢𑀩𑁆𑀩𑀸𑀦𑀺, 𑀏𑀓𑀲𑁆𑀫𑀺𑀁 𑀦𑀝𑁆𑀞𑁂 𑀏𑀓𑀁𑀬𑁂𑀯 𑀲𑀸𑀤𑀺𑀢𑀩𑁆𑀩𑀁. 𑀬𑀲𑁆𑀲 𑀏𑀓𑀁𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀺𑀁 𑀦𑀝𑁆𑀞𑁂 𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀺.

(𑀙) 𑀅𑀧𑁆𑀧𑀯𑀸𑀭𑀺𑀢𑁄𑀢𑀺 𑀕𑀳𑀧𑀢𑀺𑀦𑀸 𑀯𑀸 𑀕𑀳𑀧𑀢𑀸𑀦𑀺𑀬𑀸 𑀯𑀸. 𑀯𑀺𑀓𑀧𑁆𑀧𑀦𑁆𑀢𑀺 𑀧𑀞𑀫𑀅𑀥𑀺𑀧𑁆𑀧𑁂𑀢𑀢𑁄 𑀫𑀽𑀮𑀁 𑀯𑀟𑁆𑀠𑀸𑀧𑁂𑀦𑁆𑀢𑁄 𑀲𑀼𑀦𑁆𑀤𑀭𑀓𑀸𑀫𑀢𑀸𑀬 ‘‘𑀆𑀬𑀢𑀁 𑀯𑀸’’𑀢𑀺𑀆𑀤𑀺𑀦𑀸 𑀯𑀺𑀲𑀺𑀝𑁆𑀞𑀓𑀧𑁆𑀧𑀁 𑀅𑀥𑀺𑀓𑀯𑀺𑀥𑀸𑀦𑀁.

(𑀚) 𑀅𑀜𑁆𑀜𑀸𑀢𑀓𑁂 𑀕𑀳𑀧𑀢𑀺𑀓𑁂𑀢𑀺 𑀩𑀳𑀽𑀦𑀁 𑀯𑀲𑁂𑀦 𑀯𑀼𑀢𑁆𑀢𑀫𑀢𑁆𑀢𑀫𑁂𑀯 𑀧𑀼𑀭𑀺𑀫𑀢𑁄 𑀯𑀺𑀲𑁂𑀲𑁄.

(𑀛) 𑀘𑁄𑀤𑀦𑀸𑀬𑀸𑀢𑀺 ‘‘𑀅𑀢𑁆𑀣𑁄 𑀫𑁂, 𑀆𑀯𑀼𑀲𑁄, 𑀘𑀻𑀯𑀭𑁂𑀦𑀸’’𑀢𑀺 𑀘𑁄𑀤𑀦𑀸𑀬. 𑀞𑀸𑀦𑁂𑀦𑀸𑀢𑀺 𑀓𑀸𑀬𑀘𑁄𑀤𑀦𑀫𑀸𑀳. 𑀭𑀸𑀚𑀸𑀤𑀻𑀳𑀺 𑀧𑁂𑀲𑀺𑀢𑁂𑀦 𑀳𑀺 𑀤𑀽𑀢𑁂𑀦 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀲𑁆𑀲 𑀳𑀢𑁆𑀣𑁂 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑁂 𑀦𑀺𑀓𑁆𑀔𑀺𑀢𑁆𑀢𑁂 𑀢𑀺𑀲𑁆𑀲𑁄 𑀘𑁄𑀤𑀦𑀸 𑀅𑀦𑀼𑀜𑁆𑀜𑀸𑀢𑀸, 𑀘𑁄𑀤𑀦𑀸𑀬 𑀤𑀺𑀕𑀼𑀡𑀁 𑀞𑀸𑀦𑀁, 𑀢𑀲𑁆𑀫𑀸 𑀲𑀘𑁂 𑀘𑁄𑀤𑁂𑀢𑀺𑀬𑁂𑀯, 𑀦 𑀢𑀺𑀝𑁆𑀞𑀢𑀺, 𑀙 𑀘𑁄𑀤𑀦𑀸 𑀮𑀩𑁆𑀪𑀦𑁆𑀢𑀺. 𑀲𑀘𑁂 𑀢𑀺𑀝𑁆𑀞𑀢𑀺𑀬𑁂𑀯, 𑀦 𑀘𑁄𑀤𑁂𑀢𑀺, 𑀤𑁆𑀯𑀸𑀤𑀲 𑀞𑀸𑀦𑀸𑀦𑀺 𑀮𑀩𑁆𑀪𑀦𑁆𑀢𑀺. 𑀲𑀘𑁂 𑀉𑀪𑀬𑀁 𑀓𑀭𑁄𑀢𑀺, 𑀏𑀓𑀸𑀬 𑀘𑁄𑀤𑀦𑀸𑀬 𑀤𑁆𑀯𑁂 𑀞𑀸𑀦𑀸𑀦𑀺 𑀳𑀸𑀧𑁂𑀢𑀩𑁆𑀩𑀸𑀦𑀺.

(𑀝) 𑀲𑀼𑀤𑁆𑀥𑀸𑀦𑀺 𑀘 𑀢𑀸𑀦𑀺 𑀓𑀸𑀴𑀓𑀸𑀦𑀺 𑀘 𑀚𑀸𑀢𑀺𑀬𑀸 𑀭𑀚𑀦𑁂𑀦 𑀯𑀸.

(𑀞) 𑀢𑀼𑀮𑀦𑁆𑀢𑀺 𑀘𑀢𑀽𑀳𑀺 𑀢𑀼𑀮𑀸𑀳𑀺 𑀓𑀸𑀭𑁂𑀢𑀼𑀓𑀸𑀫𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀢𑁆𑀣𑀢𑁄 𑀧𑀦 𑀬𑀢𑁆𑀢𑀓𑁂𑀳𑀺 𑀏𑀴𑀓𑀮𑁄𑀫𑁂𑀳𑀺 𑀓𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀢𑁂𑀲𑀼 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀓𑀸𑀴𑀓𑀸𑀦𑀁, 𑀏𑀓𑁄 𑀑𑀤𑀸𑀢𑀸𑀦𑀁, 𑀏𑀓𑁄 𑀕𑁄𑀘𑀭𑀺𑀬𑀸𑀦𑀁 𑀕𑀳𑁂𑀢𑀩𑁆𑀩𑁄. 𑀢𑀼𑀮𑀸 𑀦𑀸𑀫 𑀧𑀮𑀲𑀢𑀁. 𑀕𑁄𑀘𑀭𑀺𑀬𑀸 𑀦𑀸𑀫 𑀓𑀧𑀺𑀮𑀯𑀡𑁆𑀡𑀸. 𑀇𑀤𑀁 𑀫𑁂 𑀲𑀦𑁆𑀣𑀢𑀁 𑀓𑀸𑀭𑀸𑀧𑀺𑀢𑀦𑁆𑀢𑀺 𑀬𑁄𑀚𑀦𑀸.

(𑀡) 𑀢𑀺𑀬𑁄𑀚𑀦𑀧𑀭𑀫𑀦𑁆𑀢𑀺 𑀕𑀳𑀺𑀢𑀝𑁆𑀞𑀸𑀦𑀢𑁄 𑀢𑀻𑀡𑀺 𑀬𑁄𑀚𑀦𑀸𑀦𑀺 𑀧𑀭𑀫𑁄 𑀅𑀲𑁆𑀲 𑀅𑀢𑀺𑀓𑁆𑀓𑀫𑀦𑀲𑁆𑀲𑀸𑀢𑀺 𑀪𑀸𑀯𑀦𑀧𑀼𑀁𑀲𑀓𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑀺𑀓𑁆𑀓𑀸𑀫𑀺𑀢𑀸𑀦𑀻𑀢𑀺 𑀅𑀦𑁆𑀢𑀫𑀲𑁄 𑀲𑀼𑀢𑁆𑀢𑀓𑁂𑀦𑀧𑀺 𑀪𑀡𑁆𑀟𑀓𑀢𑀪𑀡𑁆𑀟𑀳𑀭𑀡𑀁 𑀯𑀺𑀦𑀸 𑀅𑀦𑁆𑀢𑀫𑀲𑁄 𑀯𑀸𑀢𑀸𑀩𑀸𑀥𑀧𑁆𑀧𑀝𑀺𑀓𑀸𑀭𑀢𑁆𑀣𑀁 𑀓𑀡𑁆𑀡𑀘𑁆𑀙𑀺𑀤𑁆𑀤𑁂 𑀧𑀓𑁆𑀔𑀺𑀢𑁆𑀢𑀸𑀦𑀺 𑀅𑀢𑀺𑀓𑁆𑀓𑀸𑀫𑀺𑀢𑀸𑀦𑀺.

𑁩𑁮𑁭-𑁯. 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀦𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀯𑀢𑁆𑀣𑀽𑀦𑀺 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸. 𑀅𑀣𑀸𑀢𑀺 𑀤𑁂𑀲𑀺𑀢𑀸𑀦𑀦𑁆𑀢𑀭𑀁. ‘‘𑀇𑀫𑀁 𑀚𑀸𑀦𑀸𑀳𑀻’’𑀢𑀺 𑀕𑀺𑀳𑀺𑀁 𑀯𑀤𑁂𑀢𑀺 𑀬𑁄𑀚𑀦𑀸. 𑀲𑁄𑀢𑀺 𑀆𑀭𑀸𑀫𑀺𑀓𑀸𑀤𑀺𑀓𑁄 𑀕𑀺𑀳𑀻. ‘‘𑀇𑀫𑀺𑀦𑀸 𑀓𑀺𑀁 𑀆𑀳𑀭𑀸𑀫𑀻’’𑀢𑀺 𑀯𑀤𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀤𑁂𑀬𑁆𑀬𑀸𑀢𑀺 𑀬𑀤𑀺 𑀯𑀤𑀢𑀺. 𑀇𑀫𑀦𑁆𑀢𑀺 𑀅𑀯𑀢𑁆𑀯𑀸𑀢𑀺 ‘‘𑀇𑀫𑀁 𑀆𑀳𑀭𑀸’’𑀢𑀺 𑀅𑀯𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀓𑀧𑁆𑀧𑀺𑀬𑀁 𑀢𑁂𑀮𑀸𑀤𑀺𑀦𑁆𑀢𑀺 𑀯𑀤𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀤𑀺𑀦𑁆𑀢𑀺 𑀲𑀦𑁆𑀥𑀺𑀯𑀲𑁂𑀦 𑀦𑀺𑀕𑁆𑀕𑀳𑀺𑀢𑀁. 𑀢𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀦 𑀲𑁄 𑀬𑀁 𑀓𑀧𑁆𑀧𑀺𑀬𑀁 𑀆𑀳𑀭𑀢𑀻𑀢𑀺 𑀬𑁄𑀚𑀦𑀸. 𑀢𑁂𑀦𑀸𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀦𑀸. 𑀤𑁆𑀯𑁂𑀧𑁂𑀢𑁂 𑀞𑀧𑁂𑀢𑁆𑀯𑀸𑀢𑀺 𑀏𑀢𑁂 𑀭𑀽𑀧𑀺𑀬𑀧𑁆𑀧𑀝𑀺𑀕𑁆𑀕𑀸𑀳𑀓𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀓𑁂 𑀤𑁆𑀯𑁂 𑀞𑀧𑁂𑀢𑁆𑀯𑀸 𑀲𑁂𑀲𑁂𑀳𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀮𑀩𑁆𑀪𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀺𑀪𑀼𑀜𑁆𑀚𑀺𑀢𑀼𑀦𑁆𑀢𑀺 𑀢𑀁 𑀪𑀼𑀜𑁆𑀚𑀺𑀢𑀼𑀁. 𑀢𑀢𑁄𑀢𑀺 𑀧𑀭𑀺𑀯𑀢𑁆𑀢𑀺𑀢𑀓𑀧𑁆𑀧𑀺𑀬𑀢𑁄. 𑀅𑀜𑁆𑀜𑁂𑀦𑀸𑀢𑀺 𑀅𑀦𑁆𑀢𑀫𑀲𑁄 𑀆𑀭𑀸𑀫𑀺𑀓𑁂𑀦𑀸𑀧𑀺. 𑀢𑁂𑀲𑀦𑁆𑀢𑀺 𑀯𑀼𑀢𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁.

𑁩𑁯𑁦. 𑀅𑀦𑁆𑀢𑀫𑀲𑁄 𑀢𑀦𑁆𑀦𑀺𑀩𑁆𑀩𑀢𑁆𑀢𑀸 𑀭𑀼𑀓𑁆𑀔𑀘𑁆𑀙𑀸𑀬𑀸𑀧𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀦𑀺𑀩𑁆𑀩𑀢𑁆𑀢𑀸𑀢𑀺 𑀦𑀺𑀲𑁆𑀲𑀝𑁆𑀞𑀯𑀢𑁆𑀣𑀼𑀦𑀸 𑀓𑀺𑀡𑀺𑀢𑁆𑀯𑀸 𑀕𑀳𑀺𑀢𑀆𑀭𑀸𑀫𑁂 𑀭𑀼𑀓𑁆𑀔𑀘𑁆𑀙𑀸𑀬𑀸 𑀢𑀦𑁆𑀦𑀺𑀩𑁆𑀩𑀢𑁆𑀢𑀸 𑀳𑁄𑀢𑀻𑀢𑀺 𑀢𑀢𑁄 𑀦𑀺𑀩𑁆𑀩𑀢𑁆𑀢𑀸𑀢𑀺 𑀲𑀫𑀸𑀲𑁄. 𑀆𑀤𑀺𑀢𑁄 𑀲𑀦𑁆𑀣𑀢𑀢𑁆𑀢𑀬𑀦𑁆𑀢𑀺 𑀆𑀤𑀺𑀫𑁆𑀳𑀺 𑀓𑁄𑀲𑀺𑀬𑀲𑀼𑀤𑁆𑀥𑀓𑀸𑀴𑀓𑀤𑁆𑀯𑁂𑀪𑀸𑀕𑀲𑀦𑁆𑀣𑀢𑀢𑁆𑀢𑀬𑀁.

𑁩𑁯𑁧. 𑀏𑀯𑀁 𑀘𑁂 𑀦𑁄 𑀮𑀪𑁂𑀣𑀸𑀢𑀺 𑀏𑀯𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀓𑀧𑁆𑀧𑀺𑀬𑀓𑀸𑀭𑀓𑁄 𑀦𑁄 𑀘𑁂 𑀮𑀪𑁂𑀬𑁆𑀬, 𑀲𑁄 𑀕𑀺𑀳𑀻 ‘‘𑀇𑀫𑀁 𑀙𑀟𑁆𑀟𑁂𑀳𑀻’’𑀢𑀺 𑀲𑀁𑀲𑀺𑀬𑁄 𑀯𑀢𑁆𑀢𑀩𑁆𑀩𑁄, 𑀏𑀯𑀁 𑀭𑀽𑀧𑀺𑀬𑀙𑀟𑁆𑀟𑀓𑁄 𑀕𑀺𑀳𑀻 𑀦𑁄 𑀘𑁂 𑀮𑀪𑁂𑀬𑁆𑀬, 𑀲𑀫𑁆𑀫𑀢𑁄 𑀪𑀺𑀓𑁆𑀔𑀼 𑀙𑀟𑁆𑀟𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑁆𑀫𑀢𑁄𑀢𑀺 ‘‘𑀬𑁄 𑀙𑀦𑁆𑀤𑀸𑀕𑀢𑀺𑀁 𑀦 𑀕𑀘𑁆𑀙𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁮𑁪) 𑀯𑀼𑀢𑁆𑀢𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀭𑀽𑀧𑀺𑀬𑀙𑀟𑁆𑀟𑀓𑀲𑀫𑁆𑀫𑀼𑀢𑀺𑀬𑀸 𑀲𑀫𑁆𑀫𑀢𑁄 𑀪𑀺𑀓𑁆𑀔𑀼.

𑁩𑁯𑁨. 𑀏𑀢𑀸𑀦𑀻𑀢𑀺 𑀧𑀝𑀺𑀕𑁆𑀕𑀳𑀺𑀢𑀭𑀽𑀧𑀺𑀬𑀸𑀦𑀺. 𑀤𑀼𑀢𑀺𑀬𑀁 𑀧𑀢𑁆𑀢𑀦𑁆𑀢𑀺 𑀊𑀦𑀧𑀜𑁆𑀘𑀩𑀦𑁆𑀥𑀦𑁂 𑀲𑀢𑀺 𑀯𑀺𑀜𑁆𑀜𑀸𑀧𑀺𑀢𑀧𑀢𑁆𑀢𑀁 𑀲𑀗𑁆𑀖𑁂 𑀯𑀢𑁆𑀢𑀼𑀁 𑀮𑀩𑁆𑀪𑀭𑁂𑀢𑀺 𑀧𑀤𑀲𑀫𑁆𑀩𑀦𑁆𑀥𑁄. 𑀯𑀢𑁆𑀢𑀼𑀦𑁆𑀢𑀺 ‘‘𑀅𑀳𑀁 𑀪𑀦𑁆𑀢𑁂 𑀭𑀽𑀧𑀺𑀬𑀁 𑀧𑀝𑀺𑀕𑁆𑀕𑀳𑁂𑀲𑀺’’𑀦𑁆𑀢𑀺𑀆𑀤𑀺𑀦𑀸 𑀯𑀢𑁆𑀢𑀼𑀁. 𑀲𑁂𑀲𑀸𑀦𑀺 𑀅𑀯𑀲𑁂𑀲𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀽𑀦𑀺 𑀲𑀗𑁆𑀖𑁂 𑀏𑀓𑀲𑁆𑀫𑀺𑀁 𑀕𑀡𑁂 𑀘 𑀯𑀢𑁆𑀢𑀼𑀁 𑀮𑀩𑁆𑀪𑀭𑁂𑀢𑀺 𑀬𑁄𑀚𑀦𑀸. 𑀪𑀸𑀲𑀦𑁆𑀢𑀭𑁂𑀦𑀧𑀺 𑀯𑀢𑁆𑀢𑀼𑀁 𑀮𑀩𑁆𑀪𑀦𑁆𑀢𑀺 𑀦 𑀓𑁂𑀯𑀮𑀁 𑀧𑀸𑀴𑀺𑀪𑀸𑀲𑀸𑀬𑀫𑁂𑀯, 𑀲𑀻𑀳𑀴𑀸𑀤𑀺𑀪𑀸𑀲𑀸𑀬𑀧𑀺 𑀦𑀺𑀲𑁆𑀲𑀚𑁆𑀚𑀺𑀢𑀼𑀁 𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄.

𑁩𑁯𑁩. (𑀓) 𑀦𑀸𑀦𑀧𑁆𑀧𑀓𑀸𑀭𑀦𑁆𑀢𑀺 𑀘𑀻𑀯𑀭𑀸𑀤𑀻𑀦𑀁 𑀓𑀧𑁆𑀧𑀺𑀬𑀪𑀡𑁆𑀟𑀸𑀦𑀁 𑀯𑀲𑁂𑀦 𑀅𑀦𑁂𑀓𑀯𑀺𑀥𑀁. 𑀓𑀬𑁄 𑀕𑀳𑀡𑀁, 𑀯𑀺𑀓𑁆𑀓𑀬𑁄 𑀤𑀸𑀦𑀁. 𑀓𑀬𑁄 𑀘 𑀯𑀺𑀓𑁆𑀓𑀬𑁄 𑀘 𑀓𑀬𑀯𑀺𑀓𑁆𑀓𑀬𑀁.

(𑀕) 𑀊𑀦𑀧𑀜𑁆𑀘𑀩𑀦𑁆𑀥𑀦𑁂𑀦𑀸𑀢𑀺 𑀊𑀦𑀸𑀦𑀺 𑀧𑀜𑁆𑀘 𑀩𑀦𑁆𑀥𑀦𑀸𑀦𑀺 𑀬𑀲𑁆𑀲, 𑀢𑁂𑀦, 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀓𑀭𑀡𑀯𑀘𑀦𑀁. 𑀬𑀣𑀸𑀓𑀣𑀜𑁆𑀘𑀺 𑀧𑀦 𑀧𑀜𑁆𑀘𑀩𑀦𑁆𑀥𑀦𑁄 𑀧𑀢𑁆𑀢𑁄, 𑀧𑀜𑁆𑀘𑀩𑀦𑁆𑀥𑀦𑁄𑀓𑀸𑀲𑁄 𑀯𑀸, 𑀲𑁄 𑀅𑀧𑀢𑁆𑀢𑁄, 𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 𑀯𑀝𑁆𑀝𑀢𑀺.

𑁩𑁯𑁪. 𑀲𑀫𑁆𑀫𑀦𑁆𑀦𑀺𑀢𑁆𑀯𑀸𑀦𑀸𑀢𑀺 𑀧𑀤𑀪𑀸𑀚𑀦𑀻𑀬𑁂 𑀯𑀼𑀢𑁆𑀢𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂𑀦 𑀲𑀫𑁆𑀫𑀦𑁆𑀦𑀺𑀢𑁆𑀯𑀸. 𑀲𑀗𑁆𑀖𑀲𑁆𑀲 𑀧𑀢𑁆𑀢𑀦𑁆𑀢𑀦𑁆𑀢𑀺 𑀅𑀦𑁆𑀢-𑀲𑀤𑁆𑀤𑁂𑀦 𑀧𑀢𑁆𑀢𑀸𑀦𑀁 𑀅𑀦𑁆𑀢𑁂 𑀪𑀯𑁄 𑀮𑀸𑀫𑀓𑁄 𑀧𑀢𑁆𑀢𑁄𑀬𑁂𑀯 𑀕𑀳𑀺𑀢𑁄, 𑀦𑀺𑀲𑁆𑀲𑀝𑁆𑀞𑀧𑀢𑁆𑀢𑀲𑁆𑀲 𑀯𑀺𑀚𑁆𑀚𑀫𑀸𑀦𑀕𑀼𑀡𑀁 𑀯𑀢𑁆𑀯𑀸 𑀣𑁂𑀭𑀁, 𑀣𑁂𑀭𑀲𑁆𑀲 𑀧𑀢𑁆𑀢𑀁 𑀤𑀼𑀢𑀺𑀬𑀢𑁆𑀣𑁂𑀭𑀁 𑀕𑀸𑀳𑀸𑀧𑁂𑀢𑁆𑀯𑀸 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀬𑀸𑀯𑀲𑀗𑁆𑀖𑀦𑀯𑀓𑀁 𑀕𑀸𑀳𑀸𑀧𑁂𑀢𑁆𑀯𑀸 𑀬𑁄 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀲𑀗𑁆𑀖𑀲𑁆𑀲 𑀧𑀢𑁆𑀢𑁂𑀲𑀼 𑀧𑀭𑀺𑀬𑀦𑁆𑀢𑁄 𑀧𑀢𑁆𑀢𑁄, 𑀢𑀁 𑀧𑀢𑁆𑀢𑀦𑁆𑀢𑀺. 𑀢𑀲𑁆𑀲𑀸𑀢𑀺 𑀓𑀢𑀦𑀺𑀲𑁆𑀲𑀚𑁆𑀚𑀦𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀤𑀸𑀧𑀬𑁂𑀢𑀺 𑀲𑀫𑁆𑀫𑀢𑁂𑀦 𑀧𑀢𑁆𑀢𑀕𑀸𑀳𑀸𑀧𑀓𑁂𑀦 𑀤𑀸𑀧𑁂𑀬𑁆𑀬.

𑁩𑁯𑁫. (𑀓) 𑀪𑁂𑀲𑀚𑁆𑀚𑀦𑁆𑀢𑀺 𑀪𑁂𑀲𑀚𑁆𑀚𑀓𑀺𑀘𑁆𑀘𑀁 𑀓𑀭𑁄𑀢𑀼 𑀯𑀸, 𑀫𑀸 𑀯𑀸, 𑀏𑀯𑀁 𑀮𑀤𑁆𑀥𑀯𑁄𑀳𑀸𑀭𑀁 𑀲𑀧𑁆𑀧𑀺𑀆𑀤𑀺𑀓𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀁.

(𑀔) 𑀕𑀺𑀫𑁆𑀳𑀸𑀦𑀲𑁆𑀲 𑀧𑀘𑁆𑀙𑀺𑀫𑀫𑀸𑀲𑁂 𑀧𑀼𑀭𑀺𑀫𑁄 𑀅𑀤𑁆𑀥𑀫𑀸𑀲𑁄 𑀧𑀭𑀺𑀬𑁂𑀲𑀦𑀓𑀭𑀡𑀸𑀦𑀁 𑀔𑁂𑀢𑁆𑀢𑀁, 𑀧𑀘𑁆𑀙𑀺𑀫𑀤𑁆𑀥𑀫𑀸𑀲𑁄 𑀧𑀭𑀺𑀬𑁂𑀲𑀦𑀓𑀭𑀡𑀦𑀺𑀯𑀸𑀲𑀦𑀸𑀦𑀁 𑀔𑁂𑀢𑁆𑀢𑀁, 𑀯𑀲𑁆𑀲𑀺𑀓𑀫𑀸𑀲𑀸 𑀘𑀢𑁆𑀢𑀸𑀭𑁄𑀧𑀺 𑀅𑀥𑀺𑀝𑁆𑀞𑀸𑀦𑁂𑀦 𑀲𑀳 𑀘𑀢𑀼𑀦𑁆𑀦𑀫𑁆𑀧𑀺 𑀔𑁂𑀢𑁆𑀢𑀁, 𑀇𑀫𑁂𑀬𑁂𑀯 𑀧𑀜𑁆𑀘𑀫𑀸𑀲𑀸 𑀓𑀼𑀘𑁆𑀙𑀺𑀲𑀫𑀬𑁄, 𑀇𑀢𑀭𑀲𑀢𑁆𑀢𑀫𑀸𑀲𑀸 𑀧𑀺𑀝𑁆𑀞𑀺𑀲𑀫𑀬𑁄. 𑀧𑀺𑀝𑁆𑀞𑀺𑀲𑀫𑀬𑁂 𑀧𑀭𑀺𑀬𑁂𑀲𑀦𑁆𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀓𑀼𑀘𑁆𑀙𑀺𑀲𑀫𑀬𑁂 𑀘 𑀅𑀢𑀺𑀭𑁂𑀓𑀤𑁆𑀥𑀫𑀸𑀲𑁂 𑀓𑀢𑁆𑀯𑀸 𑀧𑀭𑀺𑀤𑀳𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀢𑀺𑀭𑁂𑀓𑀫𑀸𑀲𑁂 𑀲𑁂𑀲𑁂’’𑀢𑀺.

(𑀕) 𑀲𑀸𑀫𑀁 𑀤𑀢𑁆𑀯𑀸𑀢𑀺 𑀯𑁂𑀬𑁆𑀬𑀸𑀯𑀘𑁆𑀘𑀸𑀤𑀻𑀦𑀺 𑀧𑀘𑁆𑀘𑀸𑀲𑀻𑀲𑀫𑀸𑀦𑁄 𑀲𑀬𑀫𑁂𑀯 𑀤𑀢𑁆𑀯𑀸. 𑀅𑀘𑁆𑀙𑀺𑀦𑁆𑀦𑀦𑁆𑀢𑀺 𑀢𑀁 𑀅𑀓𑀭𑁄𑀦𑁆𑀢𑀁 𑀤𑀺𑀲𑁆𑀯𑀸 𑀲𑀓𑀲𑀜𑁆𑀜𑀸𑀬 𑀅𑀘𑁆𑀙𑀺𑀦𑁆𑀦𑀁. 𑀪𑀺𑀓𑁆𑀔𑀼𑀦𑁄𑀧𑀺 𑀘𑀻𑀯𑀭𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀧𑀭𑀺𑀓𑁆𑀔𑀸𑀭𑀁, 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀘 𑀬𑀁 𑀓𑀺𑀜𑁆𑀘𑀺 𑀧𑀭𑀺𑀓𑁆𑀔𑀸𑀭𑀁 𑀅𑀘𑁆𑀙𑀺𑀦𑁆𑀤𑀢𑁄 𑀤𑀼𑀓𑁆𑀓𑀝𑀁. 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀤𑀺𑀦𑁆𑀦𑀁 𑀲𑀓𑀲𑀜𑁆𑀜𑀁 𑀯𑀺𑀦𑀸 𑀅𑀘𑁆𑀙𑀺𑀦𑁆𑀤𑀦𑁆𑀢𑁄 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄.

(𑀗) 𑀯𑀺𑀓𑀧𑁆𑀧𑀦𑁆𑀢𑀺 ‘‘𑀆𑀬𑀢𑀜𑁆𑀘 𑀓𑀭𑁄𑀳𑀺 𑀯𑀺𑀢𑁆𑀣𑀢𑀜𑁆𑀘𑀸’’𑀢𑀺𑀆𑀤𑀺𑀓𑀁 𑀅𑀥𑀺𑀓𑀯𑀺𑀥𑀸𑀦𑀁.

(𑀘) 𑀅𑀘𑁆𑀘𑁂𑀓𑀘𑀻𑀯𑀭𑀦𑁆𑀢𑀺 𑀕𑀫𑀺𑀓𑀕𑀺𑀮𑀸𑀦𑀕𑀩𑁆𑀪𑀺𑀦𑀺𑀅𑀪𑀺𑀦𑀯𑀼𑀧𑁆𑀧𑀦𑁆𑀦𑀲𑀤𑁆𑀥𑀸𑀦𑀁 𑀅𑀜𑁆𑀜𑀢𑀭𑁂𑀦 𑀧𑀯𑀸𑀭𑀡𑀫𑀸𑀲𑀲𑁆𑀲 𑀚𑀼𑀡𑁆𑀳𑀧𑀓𑁆𑀔𑀧𑀜𑁆𑀘𑀫𑀺𑀢𑁄 𑀧𑀝𑁆𑀞𑀸𑀬 ‘‘𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑀲𑁆𑀲𑀸𑀫𑀻’’𑀢𑀺 𑀤𑀺𑀦𑁆𑀦𑀁 𑀅𑀘𑁆𑀘𑀸𑀬𑀺𑀓𑀘𑀻𑀯𑀭𑀁. 𑀅𑀘𑁆𑀘𑁂𑀓𑀘𑀻𑀯𑀭𑀲𑁆𑀲 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀤𑀺𑀯𑀲𑀸𑀥𑀺𑀓𑁄 𑀫𑀸𑀲𑁄, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀤𑀺𑀯𑀲𑀸𑀥𑀺𑀓𑀸 𑀧𑀜𑁆𑀘 𑀫𑀸𑀲𑀸 𑀘𑀻𑀯𑀭𑀓𑀸𑀮𑀲𑀫𑀬𑁄, 𑀢𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀻𑀯𑀭𑀓𑀸𑀮𑀲𑀫𑀬𑀁 𑀅𑀢𑀺𑀓𑁆𑀓𑀸𑀫𑀺𑀢’’𑀦𑁆𑀢𑀺. 𑀓𑀸𑀮𑁄 𑀘 𑀲𑁄 𑀲𑀫𑀬𑁄 𑀘 𑀘𑀻𑀯𑀭𑀲𑁆𑀲 𑀓𑀸𑀮𑀲𑀫𑀬𑁄, 𑀢𑀁.

(𑀙) 𑀲𑀧𑁆𑀧𑀝𑀺𑀪𑀬𑁂 𑀆𑀭𑀜𑁆𑀜𑀓𑀲𑁂𑀦𑀸𑀲𑀦𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀯𑀺𑀳𑀭𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀁 𑀘𑀻𑀯𑀭𑀁 𑀧𑀼𑀭𑀺𑀫𑀺𑀓𑀸𑀬 𑀉𑀧𑀕𑀦𑁆𑀢𑁆𑀯𑀸 𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑀢𑀸, 𑀓𑀢𑁆𑀢𑀺𑀓𑀫𑀸𑀲𑀢𑀸, 𑀧𑀜𑁆𑀘𑀥𑀦𑀼𑀲𑀢𑀺𑀓𑀧𑀘𑁆𑀙𑀺 𑀫𑀧𑁆𑀧𑀫𑀸𑀡𑀬𑀼𑀢𑁆𑀢𑀲𑁂𑀦𑀸𑀲𑀦𑀢𑀸, 𑀲𑀸𑀲𑀗𑁆𑀓𑀲𑀧𑁆𑀧𑀝𑀺𑀪𑀬𑀢𑀸𑀢𑀺 𑀏𑀯𑀁 𑀯𑀼𑀢𑁆𑀢𑀘𑀢𑀼𑀭𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸𑀅𑀦𑁆𑀢𑀭𑀖𑀭𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀢𑀺 𑀧𑀘𑁆𑀘𑀬𑁂 𑀙𑀸𑀭𑀢𑁆𑀢𑀧𑀭𑀫𑀁 𑀢𑁂𑀦 𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑀺𑀢𑀩𑁆𑀩𑀁. 𑀢𑀢𑁄 𑀘𑁂 𑀉𑀢𑁆𑀢𑀭𑀺 𑀯𑀺𑀧𑁆𑀧𑀯𑀲𑁂𑀬𑁆𑀬, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀢𑀺𑀭𑁂𑀓𑀙𑀸𑀭𑀢𑁆𑀢’’𑀦𑁆𑀢𑀺𑀆𑀤𑀺.

(𑀚) 𑀚𑀸𑀦𑀦𑁆𑀢𑀺 𑀚𑀸𑀦𑀦𑁆𑀢𑁄.

𑁩𑁯𑁬. 𑀆𑀤𑀺𑀫𑁆𑀳𑀺 𑀯𑀺𑀬𑀸𑀢𑀺 𑀧𑀞𑀫𑀦𑀺𑀲𑁆𑀲𑀕𑁆𑀕𑀺𑀬𑁂 𑀯𑀺𑀬.

𑁩𑁯𑁭. (𑀔) 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀳𑀢𑁆𑀣𑀢𑁄 𑀔𑀸𑀤𑀦𑀻𑀬𑀸𑀤𑀺𑀧𑁆𑀧𑀝𑀺𑀕𑁆𑀕𑀳𑀡𑁂 𑀘 𑀪𑀺𑀓𑁆𑀔𑀽𑀲𑀼 𑀓𑀼𑀮𑁂𑀲𑀼 𑀪𑀼𑀜𑁆𑀚𑀦𑁆𑀢𑁂𑀲𑀼 ‘‘𑀇𑀥 𑀧𑀽𑀯𑀁, 𑀲𑀽𑀧𑀁 𑀤𑁂𑀣𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑁄𑀲𑀸𑀲𑀫𑀸𑀦𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀅𑀦𑀧𑀲𑀸𑀤𑀦𑁂𑀦 𑀘 𑀲𑁂𑀔𑀲𑀫𑁆𑀫𑀢𑁂𑀲𑀼 𑀓𑀼𑀮𑁂𑀲𑀼 𑀧𑀼𑀩𑁆𑀩𑁂 𑀅𑀦𑀺𑀫𑀦𑁆𑀢𑀺𑀢𑀲𑁆𑀲 𑀔𑀸𑀤𑀦𑀻𑀬𑀸𑀤𑀻𑀦𑀁 𑀧𑀝𑀺𑀕𑁆𑀕𑀳𑀡𑁂 𑀘 𑀲𑀧𑁆𑀧𑀝𑀺𑀪𑀬𑁂 𑀆𑀭𑀜𑁆𑀜𑀓𑀲𑁂𑀦𑀸𑀲𑀦𑁂 𑀯𑀺𑀳𑀭𑀦𑁆𑀢𑀲𑁆𑀲 𑀧𑀼𑀩𑁆𑀩𑁂 𑀅𑀧𑁆𑀧𑀝𑀺𑀲𑀁𑀯𑀺𑀤𑀺𑀢𑀔𑀸𑀤𑀦𑀻𑀬𑀸𑀤𑀺𑀧𑁆𑀧𑀝𑀺𑀕𑁆𑀕𑀳𑀡𑁂 𑀘 𑀧𑀸𑀝𑀺𑀤𑁂𑀲𑀦𑀻𑀬𑀁 𑀦𑀸𑀫 𑀆𑀧𑀢𑁆𑀢𑀺𑀦𑀺𑀓𑀸𑀬𑁄 𑀯𑀼𑀢𑁆𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀕𑀸𑀭𑀬𑁆𑀳’’𑀦𑁆𑀢𑀺𑀆𑀤𑀺.

𑁩𑁯𑁮. ‘‘𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬’’𑀦𑁆𑀢𑀺𑀆𑀤𑀺 ‘‘𑀦 𑀤𑁂𑀲𑀬𑁂’’𑀢𑀺 𑀏𑀢𑁆𑀣 𑀓𑀫𑁆𑀫𑀁. 𑀧𑀸𑀭𑀸𑀚𑀺𑀓𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀘 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑁄 𑀦𑀸𑀫. 𑀦 𑀆𑀧𑀢𑁆𑀢𑀺 𑀅𑀦𑀸𑀧𑀢𑁆𑀢𑀺, 𑀢𑀁. 𑀓𑀢𑀤𑁂𑀲𑀦𑀁 𑀤𑁂𑀲𑀺𑀢𑀁. 𑀦𑀸𑀦𑀸𑀲𑀁𑀯𑀸𑀲𑀦𑀺𑀲𑁆𑀲𑀻𑀫𑀝𑁆𑀞𑀺𑀢𑀸𑀦𑀁 𑀦 𑀤𑁂𑀲𑀬𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀘𑀢𑀼𑀧𑀜𑁆𑀘𑀳𑀺 𑀦 𑀤𑁂𑀲𑀬𑁂, 𑀫𑀦𑀲𑀸 𑀦 𑀤𑁂𑀲𑀬𑁂, 𑀅𑀧𑀓𑀢𑀢𑁆𑀢𑀸𑀦𑀁 𑀦 𑀤𑁂𑀲𑀬𑁂, 𑀦𑀸𑀦𑀸 ‘‘𑀏𑀓𑀸’’𑀢𑀺 𑀦 𑀤𑁂𑀲𑀬𑁂𑀢𑀺. 𑀫𑀦𑀲𑀸𑀢𑀺 𑀓𑁂𑀯𑀮𑀁 𑀘𑀺𑀢𑁆𑀢𑁂𑀦𑁂𑀯. 𑀦𑀸𑀦𑀸𑀢𑀺 𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄 ‘‘𑀏𑀓𑀸’’𑀢𑀺 𑀯𑀢𑁆𑀯𑀸. 𑀏𑀓𑀁 𑀧𑀦 𑀆𑀧𑀢𑁆𑀢𑀺𑀁 ‘‘𑀲𑀫𑁆𑀩𑀳𑀼𑀮𑀸’’𑀢𑀺 𑀤𑁂𑀲𑁂𑀢𑀼𑀁 𑀯𑀝𑁆𑀝𑀢𑀻𑀢𑀺.

𑀤𑁂𑀲𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.