𑁪𑁩. 𑀙𑀦𑁆𑀤𑀤𑀸𑀦𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁯𑁯. 𑀓𑀫𑁆𑀫𑀧𑁆𑀧𑀢𑁆𑀢𑁂𑀢𑀺 𑀉𑀧𑁄𑀲𑀣𑀸𑀤𑀺𑀦𑁄 𑀓𑀫𑁆𑀫𑀲𑁆𑀲 𑀧𑀢𑁆𑀢𑁂 𑀬𑀼𑀢𑁆𑀢𑁂 𑀅𑀦𑀼𑀭𑀽𑀧𑁂. 𑀲𑀗𑁆𑀖𑁂 𑀲𑀫𑀸𑀕𑀢𑁂𑀢𑀺 𑀘𑀢𑀼𑀯𑀕𑁆𑀕𑀸𑀤𑀺𑀓𑁂 𑀲𑀗𑁆𑀖𑁂 𑀏𑀓𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑁂. 𑀏𑀢𑁆𑀣 𑀘 𑀙𑀦𑁆𑀤𑀳𑀸𑀭𑀓𑁂𑀦𑀸𑀧𑀺 𑀲𑀤𑁆𑀥𑀺𑀁 𑀘𑀢𑀼𑀯𑀕𑁆𑀕𑀸𑀤𑀺𑀓𑁄 𑀯𑁂𑀤𑀺𑀢𑀩𑁆𑀩𑁄.

𑁪𑁦𑁦. 𑀙𑀦𑁆𑀤𑀤𑀸𑀦𑀸𑀤𑀺𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀓’’𑀦𑁆𑀢𑀺𑀆𑀤𑀺𑀫𑀸𑀳. 𑀉𑀧𑀸𑀕𑀫𑁆𑀫𑀸𑀢𑀺 𑀲𑀦𑁆𑀢𑀺𑀁 𑀆𑀧𑀢𑁆𑀢𑀺𑀁 𑀧𑀓𑀸𑀲𑁂𑀢𑁆𑀯𑀸 𑀢𑀢𑁄 𑀧𑀘𑁆𑀙𑀸 𑀉𑀧𑀕𑀦𑁆𑀢𑁆𑀯𑀸. 𑀙𑀦𑁆𑀤𑀁 𑀤𑀤𑁂𑀢𑀺 𑀯𑀓𑁆𑀔𑀫𑀸𑀦𑁂𑀲𑀼 𑀢𑀻𑀲𑀼 𑀏𑀓𑁂𑀦𑀧𑀺 𑀩𑀳𑀺 𑀉𑀧𑁄𑀲𑀣𑀁 𑀓𑀢𑁆𑀯𑀸 𑀆𑀕𑀢𑁄 𑀙𑀦𑁆𑀤𑀁 𑀤𑀤𑁂𑀬𑁆𑀬, 𑀓𑁂𑀦𑀘𑀺 𑀓𑀭𑀡𑀻𑀬𑁂𑀦 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀓𑀸𑀬𑀲𑀸𑀫𑀕𑁆𑀕𑀺𑀁 𑀅𑀤𑁂𑀦𑁆𑀢𑁄 𑀧𑀦 𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑁂𑀦𑁆𑀢𑁄 𑀙𑀦𑁆𑀤𑀁 𑀤𑀤𑁂𑀬𑁆𑀬.

𑁪𑁦𑁨. 𑀉𑀪𑀺𑀦𑁆𑀦𑀁 𑀤𑀸𑀦𑁂 𑀓𑀺𑀁𑀧𑀬𑁄𑀚𑀦𑀦𑁆𑀢𑀺 𑀆𑀳 ‘‘𑀧𑀸𑀭𑀺𑀲𑀼𑀤𑁆𑀥𑀻’’𑀢𑀺𑀆𑀤𑀺. 𑀧𑀸𑀭𑀺𑀲𑀼𑀤𑁆𑀥𑀺𑀧𑁆𑀧𑀤𑀸𑀦𑁂𑀦 𑀲𑀗𑁆𑀖𑀲𑁆𑀲 𑀅𑀢𑁆𑀢𑀦𑁄 𑀘𑀸𑀧𑀺 𑀉𑀧𑁄𑀲𑀣𑀁 𑀲𑀫𑁆𑀧𑀸𑀤𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀺𑀲𑀼𑀤𑁆𑀥𑀺 𑀏𑀯 𑀧𑀸𑀭𑀺𑀲𑀼𑀤𑁆𑀥𑀺, 𑀢𑀲𑁆𑀲 𑀧𑀤𑀸𑀦𑀁, 𑀢𑁂𑀦. 𑀦𑀦𑀼 𑀘 𑀧𑀸𑀭𑀺𑀲𑀼𑀤𑁆𑀥𑀺𑀢𑀸𑀧𑀤𑀸𑀦𑀫𑀢𑁆𑀢𑀫𑁂𑀯 𑀉𑀧𑁄𑀲𑀣𑀓𑀫𑁆𑀫𑀁 𑀦𑀸𑀫𑀸𑀢𑀺 𑀧𑀸𑀭𑀺𑀲𑀼𑀤𑁆𑀥𑀺𑀧𑁆𑀧𑀤𑀸𑀦𑀁 𑀅𑀢𑁆𑀢𑀦𑁄 𑀉𑀧𑁄𑀲𑀣𑀁 𑀲𑀫𑁆𑀧𑀸𑀤𑁂𑀢𑀼, 𑀓𑀣𑀁 𑀲𑀗𑁆𑀖𑀲𑁆𑀲𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀧𑀸𑀭𑀺𑀲𑀼𑀤𑁆𑀥𑀺𑀤𑀸𑀦𑀲𑁆𑀲 𑀥𑀫𑁆𑀫𑀓𑀫𑁆𑀫𑀢𑀸𑀲𑀫𑁆𑀧𑀸𑀤𑀦𑁂𑀦 𑀲𑀗𑁆𑀖𑀲𑁆𑀲𑀸𑀧𑀺 𑀉𑀧𑁄𑀲𑀣𑀁 𑀲𑀫𑁆𑀧𑀸𑀤𑁂𑀢𑀻𑀢𑀺.

𑀏𑀢𑁆𑀣 𑀧𑀦 𑀘𑀢𑀽𑀲𑀼 𑀏𑀓𑀲𑁆𑀲 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀁 𑀆𑀳𑀭𑀺𑀢𑁆𑀯𑀸 𑀢𑀬𑁄 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀢𑀻𑀲𑀼 𑀯𑀸 𑀏𑀓𑀲𑁆𑀲 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀁 𑀆𑀳𑀭𑀺𑀢𑁆𑀯𑀸 𑀤𑁆𑀯𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺, 𑀅𑀥𑀫𑁆𑀫𑁂𑀦 𑀯𑀕𑁆𑀕𑀁 𑀉𑀧𑁄𑀲𑀣𑀓𑀫𑁆𑀫𑀁. 𑀘𑀢𑁆𑀢𑀸𑀭𑁄 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀢𑀬𑁄 𑀯𑀸 𑀤𑁆𑀯𑁂 𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀁. 𑀘𑀢𑀽𑀲𑀼 𑀏𑀓𑀲𑁆𑀲 𑀆𑀳𑀭𑀺𑀢𑁆𑀯𑀸 𑀢𑀬𑁄 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺, 𑀢𑀻𑀲𑀼 𑀯𑀸 𑀏𑀓𑀲𑁆𑀲 𑀆𑀳𑀭𑀺𑀢𑁆𑀯𑀸 𑀤𑁆𑀯𑁂 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀥𑀫𑁆𑀫𑁂𑀦 𑀯𑀕𑁆𑀕𑀁. 𑀲𑀘𑁂 𑀧𑀦 𑀘𑀢𑁆𑀢𑀸𑀭𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺, 𑀢𑀬𑁄 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁, 𑀤𑁆𑀯𑁂 𑀅𑀜𑁆𑀜𑀫𑀜𑁆𑀜𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀥𑀫𑁆𑀫𑁂𑀦 𑀲𑀫𑀕𑁆𑀕𑀁. 𑀧𑀯𑀸𑀭𑀡𑀓𑀫𑁆𑀫𑁂𑀲𑀼𑀧𑀺 𑀧𑀜𑁆𑀘𑀲𑀼 𑀏𑀓𑀲𑁆𑀲 𑀧𑀯𑀸𑀭𑀡𑀁 𑀆𑀳𑀭𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀕𑀡𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀧𑀯𑀸𑀭𑁂𑀦𑁆𑀢𑀺, 𑀘𑀢𑀽𑀲𑀼 𑀢𑀻𑀲𑀼 𑀯𑀸 𑀏𑀓𑀲𑁆𑀲 𑀆𑀳𑀭𑀺𑀢𑁆𑀯𑀸 𑀢𑀬𑁄 𑀤𑁆𑀯𑁂 𑀯𑀸 𑀲𑀗𑁆𑀖𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀧𑀯𑀸𑀭𑁂𑀦𑁆𑀢𑀺, 𑀅𑀥𑀫𑁆𑀫𑁂𑀦 𑀯𑀕𑁆𑀕𑀁 𑀧𑀯𑀸𑀭𑀡𑀓𑀫𑁆𑀫𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀲𑁂𑀲𑀓𑀫𑁆𑀫𑀁 𑀯𑀺𑀩𑀸𑀥𑀢𑀻𑀢𑀺 𑀅𑀯𑀲𑁂𑀲𑀲𑀗𑁆𑀖𑀓𑀺𑀘𑁆𑀘𑀁 𑀯𑀺𑀩𑀸𑀥𑁂𑀢𑀺 𑀅𑀮𑀤𑁆𑀥𑀸𑀥𑀺𑀧𑁆𑀧𑀸𑀬𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁦𑁩. 𑀤𑁆𑀯𑀬𑀦𑁆𑀢𑀺 𑀉𑀧𑁄𑀲𑀣𑀓𑀭𑀡𑀜𑁆𑀘𑁂𑀯 𑀅𑀯𑀲𑁂𑀲𑀓𑀺𑀘𑁆𑀘𑀜𑁆𑀘. 𑀅𑀢𑁆𑀢𑀦𑁄 𑀦 𑀲𑀸𑀥𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑀦𑀻𑀬𑀁.

𑁪𑁦𑁪. 𑀳𑀭𑁂𑀬𑁆𑀬𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀲𑀼𑀤𑁆𑀥𑀺𑀓𑀙𑀦𑁆𑀤𑀁 𑀯𑀸 𑀇𑀫𑀁 𑀯𑀸 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀁 𑀳𑀭𑁂𑀬𑁆𑀬. 𑀧𑀭𑀫𑁆𑀧𑀭𑀸 𑀦 𑀳𑀸𑀭𑀬𑁂𑀢𑀺 𑀧𑀭𑀫𑁆𑀧𑀭𑀸 𑀦 𑀆𑀳𑀭𑁂𑀬𑁆𑀬. 𑀓𑀲𑁆𑀫𑀸𑀢𑀺 𑀆𑀳 ‘‘𑀧𑀭𑀫𑁆𑀧𑀭𑀸𑀳𑀝𑀸’’𑀢𑀺𑀆𑀤𑀺. 𑀢𑁂𑀦𑀸𑀢𑀺 𑀧𑀞𑀫𑀢𑁄 𑀕𑀳𑀺𑀢𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀓𑁂𑀦. 𑀧𑀭𑀫𑁆𑀧𑀭𑀸𑀳𑀝𑀸𑀢𑀺 𑀬𑀣𑀸 𑀩𑀺𑀴𑀸𑀮𑀲𑀗𑁆𑀔𑀮𑀺𑀓𑀸𑀬 𑀧𑀞𑀫𑀁 𑀯𑀮𑀬𑀁 𑀤𑀼𑀢𑀺𑀬𑀁 𑀧𑀸𑀧𑀼𑀡𑀸𑀢𑀺, 𑀢𑀢𑀺𑀬𑀁 𑀦 𑀧𑀸𑀧𑀼𑀡𑀸𑀢𑀺, 𑀏𑀯𑀁 𑀤𑀼𑀢𑀺𑀬𑀲𑁆𑀲 𑀆𑀕𑀘𑁆𑀙𑀢𑀺, 𑀢𑀢𑀺𑀬𑀲𑁆𑀲 𑀦 𑀆𑀕𑀘𑁆𑀙𑀢𑀺. ‘‘𑀧𑀭𑀺𑀫𑁆𑀧𑀭𑀸𑀳𑀝𑀸 𑀙𑀦𑁆𑀤-𑀧𑀸𑀭𑀺𑀲𑀼𑀤𑁆𑀥𑀺 𑀦 𑀕𑀘𑁆𑀙𑀢𑀻’’𑀢𑀺 𑀯𑀸 𑀧𑀸𑀞𑁄.

𑁪𑁦𑁫. 𑀲𑀩𑁆𑀩𑀽𑀧𑀘𑀸𑀭𑀦𑁆𑀢𑀺 ‘‘𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸’’ 𑀢𑀺𑀆𑀤𑀺 𑀲𑀩𑁆𑀩𑀁 𑀉𑀧𑀘𑀸𑀭𑀁.

𑁪𑁦𑁬. 𑀲𑁄 𑀆𑀕𑀢𑁄 𑀆𑀭𑁄𑀘𑁂𑀢𑁆𑀯𑀸 𑀲𑀗𑁆𑀖𑀁 𑀧𑀯𑀸𑀭𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀅𑀣𑀸𑀢𑀺 𑀅𑀦𑀦𑁆𑀢𑀭𑀢𑁆𑀣𑁂. 𑀆𑀕𑀢𑁄𑀢𑀺 𑀧𑀯𑀸𑀭𑀡𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄 𑀪𑀺𑀓𑁆𑀔𑀼. 𑀆𑀭𑁄𑀘𑁂𑀢𑁆𑀯𑀸𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀭𑁄𑀘𑁂𑀢𑁆𑀯𑀸. 𑀏𑀯𑀦𑁆𑀢𑀺 𑀯𑀓𑁆𑀔𑀫𑀸𑀦𑀓𑁆𑀓𑀫𑁂𑀦.

𑁪𑁦𑁭-𑁮. 𑀕𑀳𑁂𑀢𑁆𑀯𑀸 𑀳𑀸𑀭𑀓𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀸𑀳𑀝𑀸𑀢𑀺 𑀆𑀳𑀝𑀸𑀯 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀳𑀸𑀭𑀓𑁄 𑀲𑀗𑁆𑀖𑀁 𑀧𑀢𑁆𑀯𑀸 𑀢𑀣𑀸 𑀳𑁂𑀬𑁆𑀬, 𑀆𑀳𑀝𑀸 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀢𑀣𑀸 𑀳𑁂𑀬𑁆𑀬𑀸𑀢𑀺 𑀯𑀺𑀩𑁆𑀪𑀦𑁆𑀢𑀸𑀤𑀺𑀓𑁄 𑀪𑀯𑁂𑀬𑁆𑀬.

𑁪𑁦𑁯. 𑀲𑀗𑁆𑀖𑀁 𑀧𑀢𑁆𑀢𑁄 𑀧𑀫𑀢𑁆𑀢𑁄 𑀯𑀸 𑀲𑀼𑀢𑁆𑀢𑁄 𑀯𑀸 𑀦𑀸𑀭𑁄𑀘𑀬𑁂𑀬𑁆𑀬 𑀅𑀦𑀸𑀧𑀢𑁆𑀢𑀺 𑀘𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀘-𑀲𑀤𑁆𑀤𑁄 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀳𑀭𑀡𑀁 𑀲𑀫𑁆𑀧𑀺𑀡𑁆𑀟𑁂𑀢𑀻𑀢𑀺.

𑀙𑀦𑁆𑀤𑀤𑀸𑀦𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪𑁪. 𑀉𑀧𑁄𑀲𑀣𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁪𑁧𑁦. 𑀤𑀼𑀯𑁂 𑀉𑀧𑁄𑀲𑀣𑀸𑀢𑀺 𑀲𑀼𑀮𑀪𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀬𑁄 𑀧𑀦 𑀤𑀺𑀯𑀲𑀯𑀲𑁂𑀦𑁂𑀯 𑀉𑀧𑁄𑀲𑀣𑀸 𑀘𑀸𑀢𑀼𑀤𑁆𑀤𑀲𑀺𑀓𑁄 𑀧𑀦𑁆𑀦𑀭𑀲𑀺𑀓𑁄 𑀲𑀸𑀫𑀕𑁆𑀕𑀺𑀓𑁄𑀢𑀺. 𑀢𑀢𑁆𑀣 𑀳𑁂𑀫𑀦𑁆𑀢𑀕𑀺𑀫𑁆𑀳𑀯𑀲𑁆𑀲𑀸𑀦𑀸𑀦𑀁 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀢𑀢𑀺𑀬𑀲𑀢𑁆𑀢𑀫𑀧𑀓𑁆𑀔𑁂𑀲𑀼 𑀤𑁆𑀯𑁂 𑀤𑁆𑀯𑁂 𑀓𑀢𑁆𑀯𑀸 𑀙 𑀘𑀸𑀢𑀼𑀤𑁆𑀤𑀲𑀺𑀓𑀸, 𑀲𑁂𑀲𑀸 𑀧𑀦𑁆𑀦𑀭𑀲𑀺𑀓𑀸𑀢𑀺 𑀏𑀯𑀁 𑀏𑀓𑀲𑀁𑀯𑀘𑁆𑀙𑀭𑁂 𑀘𑀢𑀼𑀯𑀻𑀲𑀢𑀺𑀉𑀧𑁄𑀲𑀣𑀸. 𑀇𑀤𑀁 𑀢𑀸𑀯 𑀮𑁄𑀓𑀲𑁆𑀲 𑀧𑀓𑀢𑀺𑀘𑀸𑀭𑀺𑀢𑁆𑀢𑀁. ‘‘𑀆𑀕𑀦𑁆𑀢𑀼𑀓𑁂𑀳𑀺 𑀆𑀯𑀸𑀲𑀺𑀓𑀸𑀦𑀁 𑀅𑀦𑀼𑀯𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀫𑀳𑀸𑀯. 𑁧𑁭𑁮) 𑀧𑀦 𑀢𑀣𑀸𑀭𑀽𑀧𑀧𑀘𑁆𑀘𑀬𑁂 𑀲𑀢𑀺 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀘𑀸𑀢𑀼𑀤𑁆𑀤𑀲𑁂 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑁪𑁧𑁧. 𑀲𑀼𑀢𑁆𑀢𑀼𑀤𑁆𑀤𑁂𑀲𑁄 𑀲𑀗𑁆𑀖𑀲𑁆𑀲𑁂𑀯𑀸𑀢𑀺 𑀬𑁄𑀚𑀦𑀸. 𑀅𑀥𑀺𑀝𑁆𑀞𑀸𑀦𑀜𑁆𑀘 𑀢𑀁 𑀉𑀧𑁄𑀲𑀣𑁄 𑀘𑀸𑀢𑀺 𑀓𑀫𑁆𑀫𑀥𑀸𑀭𑀬𑁄. 𑀲𑁂𑀲𑀸𑀦𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀯𑀸. ‘‘𑀤𑀼𑀯𑁂’’𑀢𑀺𑀆𑀤𑀺𑀦𑀸 𑀘 𑀘𑀸𑀢𑀼𑀤𑁆𑀤𑀲𑁄 𑀧𑀦𑁆𑀦𑀭𑀲𑁄 𑀲𑀸𑀫𑀕𑁆𑀕𑀻𑀢𑀺 𑀤𑀺𑀯𑀲𑀯𑀲𑁂𑀦, 𑀲𑀼𑀢𑁆𑀢𑀼𑀤𑁆𑀤𑁂𑀲𑁄 𑀅𑀥𑀺𑀝𑁆𑀞𑀸𑀦𑀁 𑀧𑀸𑀭𑀺𑀲𑀼𑀤𑁆𑀥𑀻𑀢𑀺 𑀓𑀭𑀡𑀧𑁆𑀧𑀓𑀸𑀭𑁂𑀦, 𑀲𑀗𑁆𑀖𑀼𑀧𑁄𑀲𑀣𑁄 𑀕𑀡𑀼𑀧𑁄𑀲𑀣𑁄 𑀧𑀼𑀕𑁆𑀕𑀮𑀼𑀧𑁄𑀲𑀣𑁄𑀢𑀺 𑀧𑀼𑀕𑁆𑀕𑀮𑀯𑀲𑁂𑀦 𑀘𑀸𑀢𑀺 𑀦𑀯 𑀉𑀧𑁄𑀲𑀣𑀸 𑀤𑀻𑀧𑀺𑀢𑀸 𑀳𑁄𑀦𑁆𑀢𑀺.

𑁪𑁧𑁨. 𑀧𑀼𑀩𑁆𑀩𑀓𑀺𑀘𑁆𑀘𑁂𑀢𑀺 𑁋

‘‘𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀉𑀢𑀼𑀓𑁆𑀔𑀸𑀦𑀁, 𑀪𑀺𑀓𑁆𑀔𑀼𑀕𑀡𑀦𑀸 𑀘 𑀑𑀯𑀸𑀤𑁄;

𑀉𑀧𑁄𑀲𑀣𑀲𑁆𑀲 𑀏𑀢𑀸𑀦𑀺, 𑀧𑀼𑀩𑁆𑀩𑀓𑀺𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. (𑀫𑀳𑀸𑀯. 𑀅𑀝𑁆𑀞. 𑁧𑁬𑁮) 𑁋

𑀏𑀯𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀯𑀼𑀢𑁆𑀢𑁂 𑀧𑀼𑀩𑁆𑀩𑀓𑀭𑀡𑀸𑀦𑀦𑁆𑀢𑀭𑀁 𑀓𑀢𑁆𑀢𑀩𑁆𑀩𑁂 𑀧𑀼𑀩𑁆𑀩𑀓𑀺𑀘𑁆𑀘𑁂.

𑀧𑀼𑀩𑁆𑀩𑀓𑀭𑀡𑁂𑀢𑀺 𑁋

‘‘𑀲𑀫𑁆𑀫𑀚𑁆𑀚𑀦𑀻 𑀧𑀤𑀻𑀧𑁄 𑀘, 𑀉𑀤𑀓𑀁 𑀆𑀲𑀦𑁂𑀦 𑀘;

𑀉𑀧𑁄𑀲𑀣𑀲𑁆𑀲 𑀏𑀢𑀸𑀦𑀺, 𑀧𑀼𑀩𑁆𑀩𑀓𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. (𑀫𑀳𑀸𑀯. 𑀅𑀝𑁆𑀞. 𑁧𑁬𑁮) 𑁋

𑀏𑀯𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑁂𑀯 𑀯𑀼𑀢𑁆𑀢𑁂 𑀲𑀩𑁆𑀩𑀧𑀞𑀫𑀁 𑀓𑀢𑁆𑀢𑀩𑁆𑀩𑁂 𑀧𑀼𑀩𑁆𑀩𑀓𑀭𑀡𑁂. 𑀧𑀢𑁆𑀢𑀓𑀮𑁆𑀮𑁂𑀢𑀺 𑀉𑀧𑁄𑀲𑀣𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀅𑀗𑁆𑀕𑀸𑀦𑀁 𑀲𑀫𑁆𑀪𑀯𑁂𑀦 𑀧𑀢𑁆𑀢𑁄 𑀓𑀸𑀮𑁄 𑀇𑀫𑀲𑁆𑀲𑀸𑀢𑀺 𑀧𑀢𑁆𑀢𑀓𑀸𑀮𑀁, 𑀧𑀢𑁆𑀢𑀓𑀸𑀮𑀫𑁂𑀯 𑀧𑀢𑁆𑀢𑀓𑀮𑁆𑀮𑀁. 𑀓𑀺𑀁 𑀢𑀁? 𑀉𑀧𑁄𑀲𑀣𑀸𑀤𑀺𑀓𑀫𑁆𑀫𑀁. 𑀢𑀁 𑀧𑀦 𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀲𑀗𑁆𑀕𑀳𑀺𑀢𑀁. 𑀬𑀣𑀸𑀳𑀼 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑁋

‘‘𑀉𑀧𑁄𑀲𑀣𑁄 𑀬𑀸𑀯𑀢𑀺𑀓𑀸 𑀘 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸,

𑀲𑀪𑀸𑀕𑀸𑀧𑀢𑁆𑀢𑀺𑀬𑁄 𑀘 𑀦 𑀯𑀺𑀚𑁆𑀚𑀦𑁆𑀢𑀺;

𑀯𑀚𑁆𑀚𑀦𑀻𑀬𑀸 𑀘 𑀧𑀼𑀕𑁆𑀕𑀮𑀸 𑀢𑀲𑁆𑀫𑀺𑀁 𑀦 𑀳𑁄𑀦𑁆𑀢𑀺,

𑀧𑀢𑁆𑀢𑀓𑀮𑁆𑀮𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. (𑀫𑀳𑀸𑀯. 𑀅𑀝𑁆𑀞. 𑁧𑁬𑁮);

𑀲𑀫𑀸𑀦𑀺𑀢𑁂𑀢𑀺 𑀲𑀫𑁆𑀫𑀸 𑀆𑀦𑀻𑀢𑁂 𑀧𑀯𑀢𑁆𑀢𑀺𑀢𑁂𑀢𑀺 𑀅𑀢𑁆𑀣𑁄. 𑀲𑁄𑀢𑀺 𑀲𑀼𑀢𑁆𑀢𑀼𑀤𑁆𑀤𑁂𑀲𑁄. 𑀧𑀜𑁆𑀘𑀥𑀸𑀢𑀺 𑀦𑀺𑀤𑀸𑀦𑀼𑀤𑁆𑀤𑁂𑀲𑁄 𑀧𑀸𑀭𑀸𑀚𑀺𑀓𑀼𑀤𑁆𑀤𑁂𑀲𑁄 𑀲𑀗𑁆𑀖𑀸𑀤𑀺𑀲𑁂𑀲𑀼𑀤𑁆𑀤𑁂𑀲𑁄 𑀅𑀦𑀺𑀬𑀢𑀼𑀤𑁆𑀤𑁂𑀲𑁄 𑀯𑀺𑀢𑁆𑀣𑀸𑀭𑀼𑀤𑁆𑀤𑁂𑀲𑁄𑀢𑀺 𑀏𑀯𑀁 𑀧𑀜𑁆𑀘𑀥𑀸.

𑁪𑁧𑁩. 𑀯𑀺𑀦𑀸𑀦𑁆𑀢𑀭𑀸𑀬𑀦𑁆𑀢𑀺 𑀭𑀸𑀚𑀦𑁆𑀢𑀭𑀸𑀬𑁄 𑀘𑁄𑀭𑀦𑁆𑀢𑀭𑀸𑀬𑁄 𑀅𑀕𑁆𑀬𑀦𑁆𑀢𑀭𑀸𑀬𑁄 𑀉𑀤𑀓𑀦𑁆𑀢𑀭𑀸𑀬𑁄 𑀫𑀦𑀼𑀲𑁆𑀲𑀦𑁆𑀢𑀭𑀸𑀬𑁄 𑀅𑀫𑀦𑀼𑀲𑁆𑀲𑀦𑁆𑀢𑀭𑀸𑀬𑁄 𑀯𑀸𑀴𑀦𑁆𑀢𑀭𑀸𑀬𑁄 𑀲𑀭𑀻𑀲𑀧𑀦𑁆𑀢𑀭𑀸𑀬𑁄 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄𑀢𑀺 (𑀫𑀳𑀸𑀯. 𑁧𑁫𑁦) 𑀯𑀼𑀢𑁆𑀢𑁂𑀲𑀼 𑀤𑀲𑀲𑀼 𑀬𑀁 𑀓𑀺𑀜𑁆𑀘𑀺 𑀅𑀦𑁆𑀢𑀭𑀸𑀬𑀁 𑀯𑀺𑀦𑀸. 𑀲𑀗𑁆𑀔𑁂𑀧𑁂𑀦𑀸𑀢𑀺 𑀯𑀺𑀦𑀸 𑀯𑀺𑀢𑁆𑀣𑀸𑀭𑀁. ‘‘𑀏𑀢𑁆𑀣 𑀤𑁆𑀯𑀻𑀲𑀼 𑀢𑀻𑀲𑀼 𑀯𑀸 𑀉𑀤𑁆𑀤𑁂𑀲𑁂𑀲𑀼 𑀯𑀺𑀲𑀤𑁂𑀲𑀼 𑀣𑁂𑀭𑁄𑀯 𑀇𑀲𑁆𑀲𑀭𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀯𑀢𑁆𑀢𑀦𑁆𑀢𑁂𑀧𑀺 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀸𑀢𑀺 𑀧𑀜𑁆𑀘𑀲𑀼 𑀉𑀤𑁆𑀤𑁂𑀲𑁂𑀲𑀼. 𑀅𑀯𑀢𑁆𑀢𑀦𑁆𑀢𑁂𑀢𑀺 𑀣𑁂𑀭𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀯𑀢𑁆𑀢𑀫𑀸𑀦𑁂 𑀅𑀧𑁆𑀧𑀕𑀼𑀡𑁂. 𑀯𑀝𑁆𑀝𑀢𑀻𑀢𑀺 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑀺𑀲𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀇𑀫𑀺𑀦𑀸𑀯 𑀬𑀲𑁆𑀲 𑀓𑀲𑁆𑀲𑀘𑀺 𑀉𑀤𑁆𑀤𑁂𑀲𑀓𑀲𑁆𑀲 𑀅𑀯𑀢𑁆𑀢𑀦𑁆𑀢𑁂𑀧𑀺 𑀯𑀝𑁆𑀝𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀤𑁆𑀯𑀻𑀲𑀼 𑀯𑀢𑁆𑀢𑀫𑀸𑀦𑁂𑀲𑀼 𑀇𑀲𑁆𑀲𑀭𑀢𑁆𑀢𑁂 𑀅𑀥𑀺𑀓𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀢𑀻𑀲𑀽’’𑀢𑀺 𑀯𑀼𑀢𑁆𑀢𑀁. ‘‘𑀣𑁂𑀭𑁄𑀯 𑀇𑀲𑁆𑀲𑀭𑁄’’𑀢𑀺𑀆𑀤𑀺𑀦𑀸 𑀇𑀤𑀁 𑀧𑀭𑀺𑀤𑀻𑀧𑁂𑀢𑀺 𑁋 𑀤𑁆𑀯𑁂 𑀅𑀔𑀡𑁆𑀟𑀸 𑀲𑀼𑀯𑀺𑀲𑀤𑀸 𑀯𑀸𑀘𑀼𑀕𑁆𑀕𑀢𑀸, 𑀣𑁂𑀭𑀸𑀥𑁂𑀬𑁆𑀬𑀁 𑀧𑀸𑀢𑀺𑀫𑁄𑀓𑁆𑀔𑀁, 𑀲𑀘𑁂 𑀧𑀦 𑀏𑀢𑁆𑀢𑀓𑀫𑁆𑀧𑀺 𑀯𑀺𑀲𑀤𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀩𑁆𑀬𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀬𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑀬𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁, 𑀅𑀜𑁆𑀜𑀸 𑀯𑀸 𑀅𑀚𑁆𑀛𑁂𑀲𑀺𑀢𑀩𑁆𑀩𑁄𑀢𑀺.

𑁪𑁧𑁪. 𑀉𑀤𑁆𑀤𑀺𑀲𑀦𑁆𑀢𑁂 𑀲𑀫𑀸 𑀯𑀸 𑀅𑀣 𑀣𑁄𑀓𑀺𑀓𑀸 𑀯𑀸 𑀬𑀤𑀺 𑀆𑀕𑀘𑁆𑀙𑁂𑀬𑁆𑀬𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑀦𑀻𑀬𑀁. 𑀉𑀤𑁆𑀤𑀺𑀲𑀦𑁆𑀢𑁂 𑀆𑀯𑀸𑀲𑀺𑀓𑁂𑀳𑀺 𑀧𑀸𑀢𑀺𑀫𑁄𑀓𑁆𑀔𑁂 𑀉𑀤𑁆𑀤𑀺𑀲𑁆𑀲𑀫𑀸𑀦𑁂. 𑀲𑀫𑀸 𑀯𑀸 𑀣𑁄𑀓𑀺𑀓𑀸 𑀯𑀸𑀢𑀺 𑀆𑀯𑀸𑀲𑀺𑀓𑁂𑀳𑀺 𑀲𑀫𑀸 𑀯𑀸 𑀣𑁄𑀓𑀺𑀓𑀸 𑀯𑀸 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽. 𑀅𑀯𑀲𑁂𑀲𑀓𑀁 𑀲𑁄𑀢𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀏𑀢𑁆𑀢𑀸𑀯𑀢𑀸𑀧𑀺 𑀉𑀧𑁄𑀲𑀣𑁄 𑀓𑀢𑁄𑀬𑁂𑀯 𑀦𑀸𑀫𑀸𑀢𑀺 𑀤𑀻𑀧𑁂𑀢𑀺.

𑁪𑁧𑁫. 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂𑀢𑀺 𑀉𑀤𑁆𑀤𑀺𑀝𑁆𑀞𑀁𑀬𑁂𑀯 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑀁. 𑀫𑀢𑁆𑀢-𑀲𑀤𑁆𑀤𑁄 𑀅𑀯𑀥𑀸𑀭𑀡𑁂. 𑀲𑀓𑀮𑀸𑀬 𑀏𑀓𑀘𑁆𑀘𑀸𑀬 𑀯𑀸 𑀉𑀝𑁆𑀞𑀺𑀢𑀸𑀬 𑀲𑀫𑀸 𑀯𑀸 𑀣𑁄𑀓𑀺𑀓𑀸 𑀯𑀸 𑀬𑀤𑀺 𑀆𑀕𑀘𑁆𑀙𑁂𑀬𑁆𑀬𑀼𑀦𑁆𑀢𑀺 𑀬𑁄𑀚𑀦𑀸. 𑀲𑀓𑀮𑀸𑀬𑀸𑀢𑀺 𑀲𑀩𑁆𑀩𑀸𑀬 𑀧𑀭𑀺𑀲𑀸𑀬. 𑀏𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺𑀁 𑀓𑀭𑁂𑀬𑁆𑀬𑀼𑀦𑁆𑀢𑀺 𑀏𑀲𑀁 𑀆𑀯𑀸𑀲𑀺𑀓𑀸𑀦𑀁 𑀲𑀫𑀻𑀧𑁂 𑀢𑁂 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀼𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀩𑀳𑀼𑀓𑀸 𑀘𑁂, 𑀲𑀩𑁆𑀩𑀯𑀺𑀓𑀧𑁆𑀧𑁂𑀲𑀼 𑀧𑀼𑀩𑁆𑀩𑀓𑀺𑀘𑁆𑀘𑀁 𑀓𑀢𑁆𑀯𑀸𑀢𑀺 𑀬𑁄𑀚𑀦𑀻𑀬𑀁. 𑀯𑀺𑀓𑀧𑁆𑀧𑀻𑀬𑀦𑁆𑀢𑀺 𑀧𑀭𑀺𑀓𑀧𑁆𑀧𑀻𑀬𑀦𑁆𑀢𑀻𑀢𑀺 𑀯𑀺𑀓𑀧𑁆𑀧𑀸, 𑀅𑀯𑀲𑁂𑀲𑀲𑀯𑀦𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀯𑀺𑀥𑀸𑀦𑀸 𑀲𑀩𑁆𑀩𑁂 𑀘 𑀢𑁂 𑀯𑀺𑀓𑀧𑁆𑀧𑀸 𑀘𑁂𑀢𑀺 𑀲𑀩𑁆𑀩𑀯𑀺𑀓𑀧𑁆𑀧𑀸. 𑀢𑁂𑀲𑀼. 𑀧𑀼𑀦𑀼𑀤𑁆𑀤𑀺𑀲𑁂𑀢𑀺 𑀧𑀼𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬.

𑁪𑁧𑁬. 𑀇𑀢𑀭𑀸𑀦𑀦𑁆𑀢𑀺 𑀆𑀕𑀦𑁆𑀢𑀼𑀓𑀸𑀦𑀁. 𑀇𑀢𑀭𑁄𑀢𑀺 𑀘𑀸𑀢𑀼𑀤𑁆𑀤𑀲𑁄. 𑀏𑀢𑁆𑀣 𑀧𑀦 𑀬𑁂𑀲𑀁 𑀧𑀦𑁆𑀦𑀭𑀲𑁄, 𑀢𑁂 𑀅𑀢𑀻𑀢𑀁 𑀉𑀧𑁄𑀲𑀣𑀁 𑀘𑀸𑀢𑀼𑀤𑁆𑀤𑀲𑀺𑀓𑀁 𑀅𑀓𑀁𑀲𑀽𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑁋 𑀢𑀸𑀤𑀺𑀲𑁂 𑀧𑀘𑁆𑀘𑀬𑁂 𑀲𑀢𑀺 𑀘𑀸𑀢𑀼𑀤𑁆𑀤𑀲𑀺𑀓𑀲𑁆𑀲 𑀓𑀢𑀢𑁆𑀢𑀸 𑀢𑁂𑀲𑀁 𑀬𑀣𑀸𑀯𑀼𑀢𑁆𑀢𑀢𑀢𑀺𑀬𑀲𑀢𑁆𑀢𑀫𑀧𑀓𑁆𑀔𑀲𑀗𑁆𑀔𑀸𑀢𑀘𑀸𑀢𑀼𑀤𑁆𑀤𑀲𑀺𑀓𑁂 𑀲𑀫𑁆𑀧𑀢𑁆𑀢𑁂 𑀢𑁂𑀭𑀲𑀻𑀘𑀸𑀢𑀼𑀤𑁆𑀤𑀲𑀻𑀓𑀢𑁆𑀢𑀩𑁆𑀩𑀢𑁆𑀢𑀸 𑀅𑀦𑀼𑀧𑁄𑀲𑀣𑀢𑁆𑀢𑀸 𑀧𑀦 𑀢𑀢𑁆𑀣 𑀉𑀧𑁄𑀲𑀣𑁄 𑀦 𑀓𑀢𑁄𑀢𑀺 𑀘𑀸𑀢𑀼𑀤𑁆𑀤𑀲𑁄𑀬𑁂𑀯 𑀧𑀦𑁆𑀦𑀭𑀲𑁄 𑀚𑀸𑀢𑁄. 𑀲𑀫𑀸𑀦𑁂𑀢𑀭𑁂𑀢𑀺 𑀲𑀫𑀸 𑀊𑀦𑀸 𑀇𑀢𑀭𑁂𑀢𑀺 𑀧𑀤𑀘𑁆𑀙𑁂𑀤𑁄. 𑀇𑀢𑀭𑁂𑀢𑀺 𑀆𑀕𑀦𑁆𑀢𑀼𑀓𑀸. 𑀧𑀼𑀭𑀺𑀫𑀸𑀦𑀁 𑀅𑀦𑀼𑀯𑀢𑁆𑀢𑀦𑁆𑀢𑀽𑀢𑀺 𑀆𑀯𑀸𑀲𑀺𑀓𑁂𑀳𑀺 ‘‘𑀅𑀚𑁆𑀚𑀼𑀧𑁄𑀲𑀣𑁄 𑀧𑀦𑁆𑀦𑀭𑀲𑁄’’𑀢𑀺 𑀧𑀼𑀩𑁆𑀩𑀓𑀺𑀘𑁆𑀘𑁂 𑀓𑀬𑀺𑀭𑀫𑀸𑀦𑁂 𑀧𑀼𑀭𑀺𑀫𑀸𑀦𑀁 𑀆𑀯𑀸𑀲𑀺𑀓𑀸𑀦𑀁 𑀅𑀦𑀼𑀯𑀢𑁆𑀢𑀦𑁆𑀢𑀽𑀢𑀺 𑀅𑀢𑁆𑀣𑁄. 𑀲𑀘𑁂𑀥𑀺𑀓𑀸𑀢𑀺 𑀬𑀤𑀺 𑀆𑀕𑀦𑁆𑀢𑀼𑀓𑀸 𑀩𑀳𑀼𑀓𑀸 𑀳𑁄𑀦𑁆𑀢𑀺. 𑀧𑀼𑀭𑀺𑀫𑀸𑀢𑀺 𑀆𑀯𑀸𑀲𑀺𑀓𑀸. 𑀢𑁂𑀲𑀁 𑀅𑀦𑀼𑀯𑀢𑁆𑀢𑀦𑁆𑀢𑀽𑀢𑀺 𑀢𑁂𑀲𑀁 𑀆𑀕𑀦𑁆𑀢𑀼𑀓𑀸𑀦𑀁 ‘‘𑀅𑀚𑁆𑀚𑀼𑀧𑁄𑀲𑀣𑁄 𑀘𑀸𑀢𑀼𑀤𑁆𑀤𑀲𑁄’’𑀢𑀺 𑀧𑀼𑀩𑁆𑀩𑀓𑀺𑀘𑁆𑀘𑁂 𑀓𑀬𑀺𑀭𑀫𑀸𑀦𑁂 𑀅𑀦𑀼𑀯𑀢𑁆𑀢𑀦𑁆𑀢𑀼. 𑀲𑁂𑀲𑁂𑀧𑀻𑀢𑀺 𑀆𑀕𑀦𑁆𑀢𑀼𑀓𑀸𑀦𑀁 𑀧𑀦𑁆𑀦𑀭𑀲𑀯𑀸𑀭𑁂𑀧𑀺. 𑀅𑀬𑀁 𑀦𑀬𑁄𑀢𑀺 ‘‘𑀆𑀕𑀦𑁆𑀢𑀼𑀓𑀸𑀦𑀁 𑀧𑀦𑁆𑀦𑀭𑀲𑁄 𑀇𑀢𑀭𑀸𑀦𑀁 𑀲𑀘𑁂𑀢𑀭𑁄’’𑀢𑀺𑀆𑀤𑀺𑀓𑁄 𑀅𑀬𑀫𑁂𑀯 𑀦𑀬𑁄. 𑀏𑀢𑁆𑀣 𑀧𑀦 𑀬𑁂𑀲𑀁 𑀧𑀦𑁆𑀦𑀭𑀲𑁄, 𑀢𑁂 𑀢𑀺𑀭𑁄𑀭𑀝𑁆𑀞𑀢𑁄 𑀯𑀸 𑀆𑀕𑀢𑀸 𑀅𑀢𑀻𑀢𑀁 𑀯𑀸 𑀉𑀧𑁄𑀲𑀣𑀁 𑀘𑀸𑀢𑀼𑀤𑁆𑀤𑀲𑀺𑀓𑀁 𑀅𑀓𑀁𑀲𑀽𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁪𑁧𑁭. 𑀅𑀢𑀻𑀢𑀼𑀧𑁄𑀲𑀣𑀲𑁆𑀲 𑀘𑀸𑀢𑀼𑀤𑁆𑀤𑀲𑀺𑀬𑀁 𑀓𑀢𑀢𑁆𑀢𑀸 𑀘𑀸𑀢𑀼𑀤𑁆𑀤𑀲𑀺𑀬𑀁 𑀧𑀦𑁆𑀦𑀭𑀲𑀼𑀧𑁄𑀲𑀣𑁄 𑀓𑀢𑁄𑀢𑀺 𑀧𑀦𑁆𑀦𑀭𑀲𑀻 𑀆𑀯𑀸𑀲𑀺𑀓𑀸𑀦𑀁 𑀧𑀸𑀝𑀺𑀧𑀤𑁄 𑀚𑀸𑀢𑁄𑀢𑀺 𑀆𑀳 ‘‘𑀆𑀯𑀸𑀲𑀺𑀓𑀸𑀦𑀁 𑀧𑀸𑀝𑀺𑀧𑀤𑁄’’𑀢𑀺. 𑀇𑀢𑀭𑀸𑀦𑀦𑁆𑀢𑀺 𑀆𑀕𑀦𑁆𑀢𑀼𑀓𑀸𑀦𑀁. 𑀉𑀧𑁄𑀲𑀣𑁄𑀢𑀺 𑀧𑀦𑁆𑀦𑀭𑀲𑁄 𑀉𑀧𑁄𑀲𑀣𑁄. 𑀲𑀫𑀣𑁄𑀓𑀸𑀦𑀦𑁆𑀢𑀺 𑀅𑀢𑁆𑀢𑀦𑀸 𑀲𑀫𑀸𑀦𑀁 𑀯𑀸 𑀣𑁄𑀓𑀸𑀦𑀁 𑀯𑀸 𑀆𑀕𑀦𑁆𑀢𑀼𑀓𑀸𑀦𑀁. 𑀫𑀽𑀮𑀝𑁆𑀞𑀸𑀢𑀺 𑀆𑀯𑀸𑀲𑀺𑀓𑀸. 𑀓𑀸𑀫𑀢𑁄 𑀤𑁂𑀦𑁆𑀢𑀽𑀢𑀺 𑀅𑀢𑁆𑀢𑀦𑁄 𑀇𑀘𑁆𑀙𑀸𑀬 𑀤𑁂𑀦𑁆𑀢𑀼.

𑁪𑁧𑁮. 𑀦𑁄 𑀘𑁂 𑀤𑁂𑀦𑁆𑀢𑀻𑀢𑀺 𑀬𑀤𑀺 𑀆𑀯𑀸𑀲𑀺𑀓𑀸 𑀓𑀸𑀬𑀲𑀸𑀫𑀕𑁆𑀕𑀺𑀁 𑀦 𑀤𑁂𑀦𑁆𑀢𑀺, 𑀢𑁂𑀲𑀁 𑀧𑀦 𑀆𑀯𑀸𑀲𑀺𑀓𑀸𑀦𑀁 𑀳𑀺𑀬𑁆𑀬𑁄 𑀉𑀧𑁄𑀲𑀣𑀲𑁆𑀲 𑀓𑀢𑀢𑁆𑀢𑀸 𑀅𑀚𑁆𑀚 𑀉𑀧𑁄𑀲𑀣𑀓𑀭𑀡𑀁 𑀦𑀢𑁆𑀣𑀺. 𑀩𑀳𑀽𑀲𑀼 𑀅𑀦𑀺𑀘𑁆𑀙𑀸𑀬 𑀓𑀸𑀬𑀲𑀸𑀫𑀕𑁆𑀕𑀺𑀁 𑀤𑀤𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀩𑀳𑀽𑀲𑀽𑀢𑀺 𑀆𑀕𑀦𑁆𑀢𑀼𑀓𑁂𑀲𑀼 𑀩𑀳𑀼𑀓𑁂𑀲𑀼. 𑀩𑀳𑀺 𑀯𑀸 𑀯𑀚𑁂𑀢𑀺 𑀆𑀯𑀸𑀲𑀺𑀓𑀪𑀺𑀓𑁆𑀔𑀼𑀧𑀭𑀺𑀲𑀸 𑀦𑀺𑀲𑁆𑀲𑀻𑀫𑀁 𑀯𑀸 𑀯𑀚𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁪𑁧𑁯. 𑀲𑀸𑀯𑁂𑀬𑁆𑀬 𑀲𑀼𑀢𑁆𑀢𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀗𑁆𑀔𑀸𑀢𑀁 𑀲𑀼𑀢𑁆𑀢𑀁 𑀯𑀸𑀬𑀫𑀺𑀢𑁆𑀯𑀸 𑀲𑀸𑀯𑁂𑀬𑁆𑀬.

𑁪𑁨𑁦. 𑀲𑀫𑁆𑀫𑀚𑁆𑀚𑀺𑀢𑀼𑀁 …𑀧𑁂… 𑀉𑀤𑀓𑀸𑀲𑀦𑀁 𑀧𑀜𑁆𑀜𑀧𑁂𑀢𑀼𑀜𑁆𑀘 𑀫𑀳𑀸𑀣𑁂𑀭𑁂𑀦 𑀧𑁂𑀲𑀺𑀢𑁄 𑀓𑀮𑁆𑀮𑁄 𑀦 𑀓𑀭𑁂𑀬𑁆𑀬 𑀢𑀣𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀮𑁆𑀮𑁄𑀢𑀺 𑀅𑀕𑀺𑀮𑀸𑀦𑁄. 𑀢𑀣𑀸𑀢𑀺 𑀤𑀼𑀓𑁆𑀓𑀝𑀁 𑀅𑀢𑀺𑀤𑀺𑀲𑀢𑀺. 𑀆𑀲𑀦𑁂𑀲𑀼 𑀅𑀲𑀢𑀺 𑀅𑀦𑁆𑀢𑀫𑀲𑁄 𑀲𑀸𑀔𑀸𑀪𑀗𑁆𑀕𑀫𑁆𑀧𑀺 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀢𑁂𑀮𑁂 𑀅𑀲𑀢𑀺 𑀓𑀧𑀮𑁆𑀮𑁂 𑀅𑀕𑁆𑀕𑀺𑀧𑀺 𑀚𑀸𑀮𑁂𑀢𑀩𑁆𑀩𑁄.

𑁪𑁨𑁧-𑁩. 𑀧𑀝𑁆𑀞𑀧𑁂𑀢𑁆𑀯𑀸 𑀤𑀓𑀸𑀲𑀦𑀦𑁆𑀢𑀺 𑀧𑀭𑀺𑀪𑁄𑀚𑀦𑀻𑀬𑀧𑀸𑀦𑀻𑀬𑁄𑀤𑀓𑀜𑁆𑀘 𑀆𑀲𑀦𑀜𑁆𑀘 𑀲𑀦𑁆𑀦𑀺𑀳𑀺𑀢𑀁 𑀓𑀢𑁆𑀯𑀸. 𑀕𑀡𑀜𑀢𑁆𑀢𑀺𑀦𑁆𑀢𑀺 𑀇𑀤𑀸𑀦𑀺 𑀯𑀓𑁆𑀔𑀫𑀸𑀦𑀁 𑀕𑀡𑁂𑀦 𑀞𑀧𑁂𑀢𑀩𑁆𑀩𑀁 𑀜𑀢𑁆𑀢𑀺𑀁. 𑀢𑁂𑀢𑀺 𑀅𑀜𑁆𑀜𑁂 𑀤𑀼𑀯𑁂 𑀪𑀺𑀓𑁆𑀔𑀽. 𑀲𑀫𑀢𑁆𑀢𑀧𑀼𑀩𑁆𑀩𑀸𑀭𑀫𑁆𑀪𑁂𑀦𑀸𑀢𑀺 𑀲𑀫𑀢𑁆𑀢𑁄 𑀦𑀺𑀝𑁆𑀞𑀺𑀢𑁄 𑀧𑀼𑀩𑁆𑀩𑁂𑀲𑀼 𑀉𑀢𑁆𑀢𑀭𑀸𑀲𑀗𑁆𑀕𑀏𑀓𑀁𑀲𑀓𑀭𑀡𑀸𑀤𑀻𑀲𑀼 𑀆𑀭𑀫𑁆𑀪𑁄 𑀬𑀲𑁆𑀲𑀸𑀢𑀺 𑀢𑀺𑀧𑀤𑀩𑀳𑀼𑀩𑁆𑀩𑀻𑀳𑀺. 𑀦𑀯𑁂𑀦 𑀢𑁂 𑀏𑀯𑀫𑀻𑀭𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀢𑀺 𑀇𑀢𑀭𑁂 𑀤𑁆𑀯𑁂.

𑁪𑁨𑁪. 𑀓𑀢𑁆𑀢𑀩𑁆𑀩𑀁 𑀓𑀢𑁆𑀯𑀸 𑀧𑀼𑀩𑁆𑀩𑀓𑀺𑀘𑁆𑀘𑀸𑀤𑀺𑀓𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀦𑀯𑁄 𑀏𑀯𑀁 𑀈𑀭𑀺𑀬𑁄𑀢𑀺 𑀬𑁄𑀚𑀦𑀸.

𑁪𑁨𑁭. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀏𑀓𑁂𑀓𑀲𑁆𑀲 𑀧𑀸𑀭𑀺𑀲𑀼𑀤𑁆𑀥𑀺𑀁 𑀳𑀭𑀺𑀢𑁆𑀯𑀸𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑁂𑀓𑀲𑁆𑀲𑀸𑀢𑀺 𑀏𑀢𑁆𑀣 𑀯𑀺𑀘𑁆𑀙𑀸𑀬𑀁 𑀤𑁆𑀯𑀺𑀢𑁆𑀢𑀁. 𑀓𑀺𑀭𑀺𑀬𑀸𑀬 𑀕𑀼𑀡𑁂𑀦 𑀤𑀩𑁆𑀩𑁂𑀦 𑀯𑀸 𑀪𑀺𑀦𑁆𑀦𑁂 𑀅𑀢𑁆𑀣𑁂 𑀩𑁆𑀬𑀸𑀧𑀺𑀢𑀼𑀁 𑀇𑀘𑁆𑀙𑀸 𑀯𑀺𑀘𑁆𑀙𑀸. 𑀏𑀢𑁆𑀣 𑀧𑀦 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀳𑀭𑀡𑀲𑀗𑁆𑀔𑀸𑀢𑀸𑀬 𑀓𑀺𑀭𑀺𑀬𑀸𑀬 𑀘𑀢𑀽𑀲𑀼 𑀘 𑀢𑀻𑀲𑀼 𑀘 𑀤𑁆𑀯𑀻𑀲𑀼 𑀘 𑀪𑀺𑀦𑁆𑀦𑀫𑁂𑀓𑁂𑀓𑀁 𑀩𑁆𑀬𑀸𑀧𑀺𑀢𑀼𑀁 𑀲𑀫𑁆𑀩𑀦𑁆𑀥𑀺𑀢𑀼𑀁 𑀇𑀘𑁆𑀙𑀸𑀢𑀺 𑀯𑀺𑀘𑁆𑀙𑀸. 𑀇𑀢𑀭𑀻𑀢𑀭𑁂𑀢𑀺 𑀏𑀢𑁆𑀣𑀸𑀧𑀺 𑀓𑀭𑀡𑀓𑀺𑀭𑀺𑀬𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑀬𑁄 𑀤𑁆𑀯𑁂 𑀏𑀓𑁄 𑀯𑀸 𑀢𑀁 𑀢𑀁 𑀲𑀗𑁆𑀖𑀼𑀧𑁄𑀲𑀣𑀁 𑀕𑀡𑀼𑀧𑁄𑀲𑀣𑀁 𑀧𑀼𑀕𑁆𑀕𑀮𑀼𑀧𑁄𑀲𑀣𑀁 𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑁋 𑀘𑀢𑀽𑀲𑀼 𑀏𑀓𑀲𑁆𑀲 𑀆𑀳𑀭𑀺𑀢𑁆𑀯𑀸 𑀢𑀬𑁄 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀢𑀻𑀲𑀼 𑀯𑀸 𑀏𑀓𑀲𑁆𑀲 𑀆𑀳𑀭𑀺𑀢𑁆𑀯𑀸 𑀤𑁆𑀯𑁂 𑀲𑀗𑁆𑀖𑀼𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀅𑀥𑀫𑁆𑀫𑁂𑀦 𑀯𑀕𑁆𑀕𑀁 𑀉𑀧𑁄𑀲𑀣𑀓𑀫𑁆𑀫𑀁. 𑀅𑀣 𑀧𑀦 𑀏𑀓𑀲𑁆𑀲 𑀆𑀳𑀭𑀺𑀢𑁆𑀯𑀸 𑀢𑀬𑁄 𑀲𑀗𑁆𑀖𑀼𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀏𑀓𑀲𑁆𑀲 𑀆𑀳𑀭𑀺𑀢𑁆𑀯𑀸 𑀤𑁆𑀯𑁂 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀅𑀥𑀫𑁆𑀫𑁂𑀦 𑀯𑀕𑁆𑀕𑀁 𑀦𑀸𑀫 𑀳𑁄𑀢𑀺. 𑀬𑀤𑀺 𑀧𑀦 𑀘𑀢𑁆𑀢𑀸𑀭𑁄𑀧𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀢𑀬𑁄 𑀯𑀸 𑀤𑁆𑀯𑁂 𑀯𑀸 𑀲𑀗𑁆𑀖𑀼𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀁 𑀦𑀸𑀫 𑀳𑁄𑀢𑀻𑀢𑀺. 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁂𑀦 𑀲𑀫𑀕𑁆𑀕𑀁 𑀯𑁂𑀤𑀺𑀢𑀩𑁆𑀩𑀁.

𑁪𑁨𑁮. 𑀯𑀕𑁆𑀕𑁂 𑀲𑀫𑀕𑁆𑀕𑁂 𑀯𑀸 ‘‘𑀯𑀕𑁆𑀕𑁄’’𑀢𑀺 𑀲𑀜𑁆𑀜𑀺𑀦𑁄 𑀯𑀺𑀫𑀢𑀺𑀲𑁆𑀲 𑀯𑀸 𑀓𑀭𑁄𑀢𑁄 𑀤𑀼𑀓𑁆𑀓𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀕𑁆𑀕𑁂𑀢𑀺 𑀯𑀕𑁆𑀕𑀲𑀗𑁆𑀖𑁂. 𑀯𑀺𑀫𑀢𑀺𑀲𑁆𑀲𑀸𑀢𑀺 ‘‘𑀯𑀕𑁆𑀕𑁄 𑀦𑀼 𑀔𑁄, 𑀲𑀫𑀕𑁆𑀕𑁄’’𑀢𑀺 𑀏𑀯𑀁 𑀯𑁂𑀫𑀢𑀺𑀓𑀲𑁆𑀲. 𑀇𑀫𑀺𑀦𑀸𑀯 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀯𑀸𑀭𑁄𑀧𑀺 𑀉𑀧𑀮𑀓𑁆𑀔𑀺𑀢𑁄. 𑀓𑀭𑁄𑀢𑁄𑀢𑀺 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀲𑁆𑀲. 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦 𑀓𑀭𑁄𑀢𑁄𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀧𑀦 𑀧𑀸𑀧𑀲𑁆𑀲 𑀩𑀮𑀯𑀢𑀸𑀬 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁. 𑀲𑀜𑁆𑀜𑀺𑀦𑁄𑀢𑀺 𑀲𑀜𑁆𑀜𑀸𑀲𑀻𑀲𑁂𑀦 𑀘𑀺𑀢𑁆𑀢𑀁 𑀯𑀼𑀢𑁆𑀢𑀁, 𑀘𑀺𑀢𑁆𑀢𑀯𑀢𑁄𑀢𑀺 𑀅𑀢𑁆𑀣𑁄.

𑁪𑁨𑁯-𑁩𑁦. ‘‘𑀉𑀓𑁆𑀔𑀺𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀯𑀚𑁆𑀚𑀦𑀻𑀬𑀧𑀼𑀕𑁆𑀕𑀮𑁂 𑀤𑀲𑁆𑀲𑁂𑀢𑀺. 𑀉𑀓𑁆𑀔𑀺𑀢𑁆𑀢𑀲𑁆𑀲𑀸𑀢𑀺 𑀓𑀢𑁆𑀢𑀼𑀅𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀦𑀺𑀲𑀺𑀦𑁆𑀦𑀲𑀤𑁆𑀤𑀲𑁆𑀲 𑀓𑀫𑁆𑀫𑀲𑀸𑀥𑀦𑀢𑁆𑀢𑀸 𑀉𑀓𑁆𑀔𑀺𑀢𑁆𑀢𑀸𑀤𑀻𑀳𑀺 𑀓𑀢𑁆𑀢𑀽𑀳𑀺 𑀪𑀯𑀺𑀢𑀩𑁆𑀩𑀦𑁆𑀢𑀺. ‘‘𑀲𑁂𑀲𑀸𑀦’’𑀦𑁆𑀢𑀺 𑀯𑀺𑀲𑁂𑀲𑀦𑀲𑁆𑀲 𑀪𑀺𑀓𑁆𑀔𑀽𑀦𑀁 𑀩𑁆𑀬𑀪𑀺𑀘𑀸𑀭𑁂𑀦 𑀲𑀸𑀢𑁆𑀣𑀓𑀢𑀸. 𑀅𑀪𑀩𑁆𑀩𑀲𑁆𑀲 𑀧𑀡𑁆𑀟𑀓𑀸𑀤𑀺𑀏𑀓𑀸𑀤𑀲𑀯𑀺𑀥𑀲𑁆𑀲 𑀅𑀪𑀩𑁆𑀩𑀲𑁆𑀲. 𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬𑀜𑁆𑀘 𑀧𑀸𑀢𑀺𑀫𑁄𑀓𑁆𑀔𑀁 𑀦 𑀉𑀤𑁆𑀤𑀺𑀲𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀪𑀸𑀕𑀸𑀧𑀢𑁆𑀢𑀺𑀓𑁄 𑀢𑀣𑀸 𑀦 𑀉𑀤𑁆𑀤𑀺𑀲𑁂𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀯𑀺𑀓𑀸𑀮𑀪𑁄𑀚𑀦𑀸𑀤𑀺𑀯𑀢𑁆𑀣𑀼𑀢𑁄 𑀲𑀫𑀸𑀦𑁄 𑀪𑀸𑀕𑁄 𑀓𑁄𑀝𑁆𑀞𑀸𑀲𑁄 𑀏𑀢𑀺𑀲𑁆𑀲𑀸𑀢𑀺 𑀲𑀪𑀸𑀕𑀸, 𑀲𑀸 𑀆𑀧𑀢𑁆𑀢𑀺 𑀅𑀲𑁆𑀲𑀸𑀢𑀺 𑀩𑀳𑀼𑀩𑁆𑀩𑀻𑀳𑀺.

𑀙𑀦𑁆𑀤𑁂𑀦 𑀧𑀭𑀺𑀯𑀼𑀢𑁆𑀣𑁂𑀦𑀸𑀢𑀺 𑀏𑀢𑁆𑀣 𑀘𑀢𑀼𑀩𑁆𑀩𑀺𑀥𑀁 𑀧𑀸𑀭𑀺𑀯𑀸𑀲𑀺𑀬𑀁 𑀧𑀭𑀺𑀲𑀧𑀸𑀭𑀺𑀯𑀸𑀲𑀺𑀬𑀁 𑀭𑀢𑁆𑀢𑀺𑀧𑀸𑀭𑀺𑀯𑀸𑀲𑀺𑀬𑀁 𑀙𑀦𑁆𑀤𑀧𑀸𑀭𑀺𑀯𑀸𑀲𑀺𑀬𑀁 𑀅𑀚𑁆𑀛𑀸𑀲𑀬𑀧𑀸𑀭𑀺𑀯𑀸𑀲𑀺𑀬𑀦𑁆𑀢𑀺. 𑀢𑀢𑁆𑀣 𑀪𑀺𑀓𑁆𑀔𑀽 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀺, 𑀅𑀣 𑀫𑁂𑀖𑀼𑀝𑁆𑀞𑀸𑀦𑀸𑀤𑀺𑀦𑀸 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀅𑀦𑁄𑀓𑀸𑀲𑁄, 𑀅𑀣 ‘‘𑀅𑀜𑁆𑀜𑀢𑁆𑀣 𑀕𑀘𑁆𑀙𑀸𑀫𑀸’’𑀢𑀺 𑀙𑀦𑁆𑀤𑀁 𑀅𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀯 𑀉𑀝𑁆𑀞𑀳𑀦𑁆𑀢𑀺, 𑀇𑀤𑀁 𑀧𑀭𑀺𑀲𑀧𑀸𑀭𑀺𑀯𑀸𑀲𑀺𑀬𑀁 𑀦𑀸𑀫 𑀓𑀺𑀜𑁆𑀘𑀸𑀧𑀺 𑀧𑀭𑀺𑀲𑀧𑀸𑀭𑀺𑀯𑀸𑀲𑀺𑀬𑀁, 𑀙𑀦𑁆𑀤𑀲𑁆𑀲 𑀧𑀦 𑀅𑀯𑀺𑀲𑁆𑀲𑀝𑁆𑀞𑀢𑁆𑀢𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺.

‘‘𑀬𑀸𑀯 𑀧𑀦 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀢𑀸𑀯 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀸’’𑀢𑀺 𑀏𑀓𑀁 𑀅𑀚𑁆𑀛𑁂𑀲𑀦𑁆𑀢𑀺, 𑀢𑀲𑁆𑀫𑀺𑀁 𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑁂𑀬𑁂𑀯 𑀅𑀭𑀼𑀡𑁄 𑀉𑀕𑁆𑀕𑀘𑁆𑀙𑀢𑀺, 𑀲𑀘𑁂 𑀘𑀸𑀢𑀼𑀤𑁆𑀤𑀲𑀺𑀓𑀁 𑀓𑀸𑀢𑀼𑀁 𑀦𑀺𑀲𑀺𑀦𑁆𑀦𑀸, 𑀧𑀦𑁆𑀦𑀭𑀲𑁄𑀢𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀲𑀘𑁂 𑀧𑀦𑁆𑀦𑀭𑀲𑀺𑀓𑀁 𑀓𑀸𑀢𑀼𑀁 𑀦𑀺𑀲𑀺𑀦𑁆𑀦𑀸, 𑀧𑀸𑀝𑀺𑀧𑀤𑁂 𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀅𑀜𑁆𑀜𑀁 𑀧𑀦 𑀲𑀗𑁆𑀖𑀓𑀺𑀘𑁆𑀘𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀇𑀤𑀁 𑀭𑀢𑁆𑀢𑀺𑀧𑀸𑀭𑀺𑀯𑀸𑀲𑀺𑀬𑀁 𑀦𑀸𑀫.

𑀏𑀯𑀁 𑀧𑀦 𑀦𑀺𑀲𑀺𑀦𑁆𑀦𑁂 𑀓𑁄𑀘𑀺 𑀦𑀓𑁆𑀔𑀢𑁆𑀢𑀧𑀸𑀞𑀓𑁄 𑀪𑀺𑀓𑁆𑀔𑀼 ‘‘𑀅𑀚𑁆𑀚 𑀦𑀓𑁆𑀔𑀢𑁆𑀢𑀁 𑀤𑀸𑀭𑀼𑀡𑀁, 𑀇𑀫𑀁 𑀓𑀫𑁆𑀫𑀁 𑀫𑀸 𑀓𑀭𑁄𑀣𑀸’’𑀢𑀺 𑀯𑀤𑀢𑀺, 𑀢𑁂 𑀢𑀲𑁆𑀲 𑀯𑀘𑀦𑁂𑀦 𑀙𑀦𑁆𑀤𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀅𑀣𑀜𑁆𑀜𑁄 𑀆𑀕𑀦𑁆𑀢𑁆𑀯𑀸 ‘‘𑀦𑀓𑁆𑀔𑀢𑁆𑀢𑀁 𑀧𑀝𑀺𑀫𑀸𑀦𑁂𑀦𑁆𑀢𑀁, 𑀅𑀢𑁆𑀣𑁄 𑀩𑀸𑀮𑀁 𑀉𑀧𑀘𑁆𑀘𑀕𑀸’’𑀢𑀺 (𑀚𑀸. 𑁧.𑁧.𑁪𑁯) 𑀯𑀢𑁆𑀯𑀸 ‘‘𑀓𑀺𑀁 𑀦𑀓𑁆𑀔𑀢𑁆𑀢𑁂𑀦, 𑀓𑀭𑁄𑀣𑀸’’𑀢𑀺 𑀯𑀤𑀢𑀺, 𑀇𑀤𑀁 𑀙𑀦𑁆𑀤𑀧𑀸𑀭𑀺𑀯𑀸𑀲𑀺𑀬𑀜𑁆𑀘𑁂𑀯 𑀅𑀚𑁆𑀛𑀸𑀲𑀬𑀧𑀸𑀭𑀺𑀯𑀸𑀲𑀺𑀬𑀜𑁆𑀘. 𑀏𑀓𑀲𑁆𑀫𑀺𑀁 𑀧𑀸𑀭𑀺𑀯𑀸𑀲𑀺𑀬𑁂 𑀧𑀼𑀦 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀁 𑀆𑀦𑁂𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑁪𑁩𑁧. 𑀆𑀧𑀦𑁆𑀦𑀜𑁆𑀘 𑀯𑁂𑀫𑀢𑀺𑀓𑀜𑁆𑀘 𑀅𑀤𑁂𑀲𑀬𑀺𑀢𑁆𑀯𑀸 𑀯𑀸 𑀦𑀸𑀯𑀺𑀓𑀢𑁆𑀯𑀸 𑀯𑀸 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀦 𑀘 𑀓𑀧𑁆𑀧𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀸𑀯𑀺𑀓𑀢𑁆𑀯𑀸𑀢𑀺 𑀕𑀭𑀼𑀓𑀸𑀧𑀢𑁆𑀢𑀺𑀁 𑀅𑀦𑀸𑀯𑀺𑀓𑀢𑁆𑀯𑀸. 𑀦 𑀘𑀸𑀢𑀺 𑀦𑁂𑀯.

𑁪𑁩𑁨. 𑀅𑀝𑁆𑀞𑀺𑀢𑁄𑀧𑁄𑀲𑀣𑀸𑀢𑀺 𑀅𑀝𑁆𑀞𑀺𑀢𑁄 𑀅𑀯𑀺𑀲𑁆𑀲𑀝𑁆𑀞𑁄 𑀉𑀧𑁄𑀲𑀣𑁄 𑀬𑀲𑁆𑀫𑀺𑀦𑁆𑀢𑀺 𑀩𑀳𑀼𑀩𑁆𑀩𑀻𑀳𑀺. 𑀢𑀤𑀳𑀽𑀢𑀺 𑀢𑀲𑁆𑀫𑀺𑀁 𑀉𑀧𑁄𑀲𑀣𑀤𑀺𑀯𑀲𑁂. 𑀅𑀦𑁆𑀢𑀭𑀸𑀬𑀁 𑀯𑀸 𑀲𑀗𑁆𑀖𑀁 𑀯𑀸 𑀯𑀺𑀦𑀸 𑀅𑀥𑀺𑀝𑁆𑀞𑀸𑀢𑀼𑀁 𑀲𑀻𑀫𑀫𑁂𑀯 𑀯𑀸 𑀦 𑀯𑀚𑁂𑀢𑀺 𑀬𑁄𑀚𑀦𑀸. 𑀅𑀥𑀺𑀝𑁆𑀞𑀸𑀢𑀼𑀦𑁆𑀢𑀺 𑀇𑀫𑀺𑀦𑀸 𑀕𑀡𑀼𑀧𑁄𑀲𑀣𑀫𑁆𑀧𑀺 𑀉𑀧𑀮𑀓𑁆𑀔𑁂𑀢𑀺. 𑀲𑀻𑀫𑀦𑁆𑀢𑀺 𑀇𑀫𑀺𑀦𑀸 𑀦𑀤𑀺𑀫𑁆𑀧𑀺.

𑀉𑀧𑁄𑀲𑀣𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪𑁫. 𑀧𑀯𑀸𑀭𑀡𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁪𑁩𑁩. ‘‘𑀅𑀜𑁆𑀜𑀫𑀜𑁆𑀜𑀧𑁆𑀧𑀯𑀸𑀭𑀡𑀸’’𑀢𑁆𑀬𑀸𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑁂𑀳𑀺 𑀓𑀸𑀢𑀩𑁆𑀩𑀸 𑀧𑀯𑀸𑀭𑀡𑀸. 𑀢𑀢𑁆𑀣 𑀢𑀺𑀡𑁆𑀡𑀁 𑀘𑀢𑀼𑀦𑁆𑀦𑀜𑁆𑀘 𑀕𑀡𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀧𑁆𑀧𑀯𑀸𑀭𑀡𑀸, 𑀤𑁆𑀯𑀺𑀦𑁆𑀦𑀁 𑀧𑀦 𑀅𑀝𑁆𑀞𑀧𑁂𑀢𑁆𑀯𑀸𑀯. 𑀅𑀥𑀺𑀝𑁆𑀞𑀸𑀦𑀦𑁆𑀢𑀺 𑀅𑀥𑀺𑀝𑁆𑀞𑀸𑀦𑀧𑁆𑀧𑀯𑀸𑀭𑀡𑀸, 𑀬𑀼𑀧𑀘𑁆𑀘𑀬𑀦𑁆𑀢𑀸𑀦𑀁 𑀪𑀸𑀯𑁂 𑀦𑀺𑀬𑀢𑀦𑀧𑀼𑀁𑀲𑀓𑀢𑁆𑀢𑀸 ‘‘𑀅𑀥𑀺𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀸 𑀧𑀜𑁆𑀘𑀸𑀤𑀻𑀳𑀺 𑀓𑀸𑀢𑀩𑁆𑀩𑀸 𑀅𑀯𑀲𑁂𑀲𑀸 𑀲𑀗𑁆𑀖𑀧𑁆𑀧𑀯𑀸𑀭𑀡𑀸 𑀲𑀗𑁆𑀖𑀯𑀲𑁂𑀦 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀓𑀸𑀢𑀩𑁆𑀩𑀸. 𑀏𑀢𑁂𑀦 𑀦𑀯𑀲𑀼 𑀲𑀗𑁆𑀖𑀧𑁆𑀧𑀯𑀸𑀭𑀡𑀸𑀤𑀬𑁄 𑀢𑀺𑀲𑁆𑀲𑁄 𑀤𑀲𑁆𑀲𑀺𑀢𑀸. 𑀦𑀯 𑀳𑀺 𑀧𑀯𑀸𑀭𑀡𑀸 𑀘𑀸𑀢𑀼𑀤𑁆𑀤𑀲𑀻 𑀧𑀦𑁆𑀦𑀭𑀲𑀻 𑀲𑀸𑀫𑀕𑁆𑀕𑀻𑀢𑀺 𑀤𑀺𑀯𑀲𑀯𑀲𑁂𑀦, 𑀢𑁂𑀯𑀸𑀘𑀻 𑀤𑁆𑀯𑁂𑀯𑀸𑀘𑀻 𑀏𑀓𑀯𑀸𑀘𑀻𑀢𑀺 𑀓𑀢𑁆𑀢𑀩𑁆𑀩𑀸𑀓𑀸𑀭𑀯𑀲𑁂𑀦, 𑀲𑀗𑁆𑀖𑁂 𑀧𑀯𑀸𑀭𑀡𑀸, 𑀕𑀡𑁂 𑀧𑀯𑀸𑀭𑀡𑀸, 𑀧𑀼𑀕𑁆𑀕𑀮𑁂 𑀧𑀯𑀸𑀭𑀡𑀸𑀢𑀺 𑀓𑀸𑀭𑀓𑀯𑀲𑁂𑀦 𑀘. 𑀢𑀢𑁆𑀣 𑀧𑀼𑀭𑀺𑀫𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀁 𑀧𑀼𑀩𑁆𑀩𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸 𑀯𑀸 𑀢𑁂𑀲𑀁𑀬𑁂𑀯 𑀲𑀘𑁂 𑀪𑀡𑁆𑀟𑀦𑀓𑀸𑀭𑀓𑁂𑀳𑀺 𑀉𑀧𑀤𑁆𑀤𑀼𑀢𑀸 𑀧𑀯𑀸𑀭𑀡𑀁 𑀧𑀘𑁆𑀘𑀼𑀓𑁆𑀓𑀟𑁆𑀠𑀦𑁆𑀢𑀺, 𑀅𑀣 𑀓𑀢𑁆𑀢𑀺𑀓𑀫𑀸𑀲𑀲𑁆𑀲 𑀓𑀸𑀴𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑁄 𑀯𑀸 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸 𑀯𑀸 𑀧𑀘𑁆𑀙𑀺𑀫𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀜𑁆𑀘 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸 𑀏𑀯 𑀯𑀸 𑀧𑀯𑀸𑀭𑀡𑀸𑀤𑀺𑀯𑀲𑀸 𑀳𑁄𑀦𑁆𑀢𑀺. 𑀇𑀤𑀁 𑀧𑀦 𑀧𑀓𑀢𑀺𑀘𑀸𑀭𑀺𑀢𑁆𑀢𑀁. 𑀢𑀣𑀸𑀭𑀽𑀧𑀧𑁆𑀧𑀘𑁆𑀘𑀬𑁂 𑀲𑀢𑀺 𑀤𑁆𑀯𑀺𑀦𑁆𑀦𑀁 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀦𑀁 𑀧𑀼𑀭𑀺𑀫𑁂𑀲𑀼 𑀘𑀸𑀢𑀼𑀤𑁆𑀤𑀲𑁂𑀲𑀼𑀧𑀺 𑀧𑀯𑀸𑀭𑀡𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀪𑀺𑀦𑁆𑀦𑀲𑁆𑀲 𑀧𑀦 𑀲𑀗𑁆𑀖𑀲𑁆𑀲 𑀲𑀸𑀫𑀕𑁆𑀕𑀺𑀬𑀁 𑀬𑁄 𑀓𑁄𑀘𑀺 𑀤𑀺𑀯𑀲𑁄 𑀧𑀯𑀸𑀭𑀡𑀸𑀤𑀺𑀯𑀲𑁄 𑀳𑁄𑀢𑀺. 𑀇𑀫𑀸 𑀤𑀺𑀯𑀲𑀯𑀲𑁂𑀦 𑀢𑀺𑀲𑁆𑀲𑁄 𑀧𑀯𑀸𑀭𑀡𑀸. 𑀓𑀢𑁆𑀢𑀩𑁆𑀩𑀸𑀓𑀸𑀭𑀯𑀲𑁂𑀦 𑀧𑀦 𑀯𑀓𑁆𑀔𑀫𑀸𑀦𑀦𑀬𑁂𑀦 𑀯𑀺𑀜𑁆𑀜𑀸𑀢𑀩𑁆𑀩𑀸.

𑁪𑁩𑁪. ‘‘𑀧𑀼𑀩𑁆𑀩𑀓𑀺𑀘𑁆𑀘𑁂’’𑀢𑀺𑀆𑀤𑀻𑀲𑀼 𑁋

‘‘𑀲𑀫𑁆𑀫𑀚𑁆𑀚𑀦𑀻 𑀧𑀤𑀻𑀧𑁄 𑀘, 𑀉𑀤𑀓𑀁 𑀆𑀲𑀦𑁂𑀦 𑀘;

𑀧𑀯𑀸𑀭𑀡𑀸𑀬 𑀏𑀢𑀸𑀦𑀺, 𑀧𑀼𑀩𑁆𑀩𑀓𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺.

‘‘𑀙𑀦𑁆𑀤𑀧𑁆𑀧𑀯𑀸𑀭𑀡𑀸 𑀉𑀢𑀼𑀓𑁆𑀔𑀸𑀦𑀁, 𑀪𑀺𑀓𑁆𑀔𑀼𑀕𑀡𑀦𑀸 𑀘 𑀑𑀯𑀸𑀤𑁄;

𑀧𑀯𑀸𑀭𑀡𑀸𑀬 𑀏𑀢𑀸𑀦𑀺, 𑀧𑀼𑀩𑁆𑀩𑀓𑀺𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀢𑀺.

‘‘𑀧𑀯𑀸𑀭𑀡𑀸 𑀬𑀸𑀯𑀢𑀺𑀓𑀸 𑀘 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸,

𑀲𑀪𑀸𑀕𑀸𑀧𑀢𑁆𑀢𑀺𑀬𑁄 𑀘 𑀦 𑀯𑀺𑀚𑁆𑀚𑀦𑁆𑀢𑀺;

𑀯𑀚𑁆𑀚𑀦𑀻𑀬𑀸 𑀘 𑀧𑀼𑀕𑁆𑀕𑀮𑀸 𑀢𑀲𑁆𑀫𑀺𑀁 𑀦 𑀳𑁄𑀦𑁆𑀢𑀺,

𑀧𑀢𑁆𑀢𑀓𑀮𑁆𑀮𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑁋

𑀏𑀯𑀁 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸 𑀧𑀼𑀩𑁆𑀩𑀓𑀺𑀘𑁆𑀘𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀜𑀢𑁆𑀢𑀺𑀦𑁆𑀢𑀺 𑀇𑀤𑀸𑀦𑀺 𑀯𑀓𑁆𑀔𑀫𑀸𑀦𑀁 𑀲𑀸𑀫𑀜𑁆𑀜𑀁 𑀲𑀗𑁆𑀖𑀜𑀢𑁆𑀢𑀺𑀁. 𑀏𑀯𑀁 𑀧𑀦 𑀜𑀢𑁆𑀢𑀺𑀬𑀸 𑀞𑀧𑀺𑀢𑀸𑀬 𑀓𑀸𑀭𑀡𑁂 𑀲𑀢𑀺 𑀢𑁂𑀯𑀸𑀘𑀺𑀓𑀤𑁆𑀯𑁂𑀯𑀸𑀘𑀺𑀓𑀏𑀓𑀯𑀸𑀘𑀺𑀓𑀲𑀫𑀸𑀦𑀯𑀲𑁆𑀲𑀺𑀓𑀯𑀲𑁂𑀦𑀧𑀺 𑀧𑀯𑀸𑀭𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀬𑀫𑁂𑀯 𑀧𑀦 𑀜𑀢𑁆𑀢𑀺 ‘‘𑀲𑀗𑁆𑀖𑁄 𑀧𑀯𑀸𑀭𑁂𑀬𑁆𑀬𑀸’’𑀢𑀺 𑀏𑀢𑁆𑀣 ‘‘𑀲𑀗𑁆𑀖𑁄 𑀢𑁂𑀯𑀸𑀘𑀺𑀓𑀁 𑀧𑀯𑀸𑀭𑁂𑀬𑁆𑀬, 𑀲𑀗𑁆𑀖𑁄 𑀤𑁆𑀯𑁂𑀯𑀸𑀘𑀺𑀓𑀁 𑀧𑀯𑀸𑀭𑁂𑀬𑁆𑀬, 𑀲𑀗𑁆𑀖𑁄 𑀏𑀓𑀯𑀸𑀘𑀺𑀓𑀁 𑀧𑀯𑀸𑀭𑁂𑀬𑁆𑀬, 𑀲𑀗𑁆𑀖𑁄 𑀲𑀫𑀸𑀦𑀯𑀲𑁆𑀲𑀺𑀓𑀁 𑀧𑀯𑀸𑀭𑁂𑀬𑁆𑀬𑀸’’𑀢𑀺𑀧𑀺 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀘𑀸𑀢𑀼𑀤𑁆𑀤𑀲𑀺𑀬𑀁 𑀧𑀦 𑀲𑀸𑀫𑀕𑁆𑀕𑀺𑀬𑀜𑁆𑀘 ‘‘𑀘𑀸𑀢𑀼𑀤𑁆𑀤𑀲𑀻 𑀲𑀸𑀫𑀕𑁆𑀕𑀻’’𑀢𑀺 𑀯𑀢𑁆𑀢𑀩𑁆𑀩𑀁.

𑁪𑁩𑁭. 𑀣𑁂𑀭𑁂𑀲𑀼 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀚𑁆𑀚 𑀧𑀯𑀸𑀭𑁂𑀦𑁆𑀢𑁂𑀲𑀼 𑀦𑀯𑁄 𑀬𑀸𑀯 𑀲𑀬𑀁 𑀧𑀯𑀸𑀭𑁂𑀢𑀺, 𑀢𑀸𑀯 𑀉𑀓𑁆𑀓𑀼𑀝𑀺𑀓𑁄 𑀏𑀯 𑀅𑀘𑁆𑀙𑀢𑀽𑀢𑀺 𑀬𑁄𑀚𑀦𑀸. 𑀅𑀘𑁆𑀙𑀢𑀽𑀢𑀺 𑀦𑀺𑀲𑀻𑀤𑁂𑀬𑁆𑀬.

𑁪𑁪𑁦-𑁨. 𑀥𑀫𑁆𑀫𑀲𑀸𑀓𑀘𑁆𑀙𑀸 𑀘 𑀓𑀮𑀳𑁄 𑀘𑀸𑀢𑀺 𑀤𑁆𑀯𑀦𑁆𑀤𑁄. 𑀭𑀢𑁆𑀢𑀺𑀬𑀸 𑀔𑁂𑀧𑀺𑀢𑀪𑀸𑀯𑀢𑁄 𑀢𑁂𑀯𑀸𑀘𑀺𑀓𑀸𑀬 𑀑𑀓𑀸𑀲𑁂 𑀅𑀲𑀢𑀺 𑀤𑀲𑀯𑀺𑀥𑁂 𑀯𑀸 𑀅𑀦𑁆𑀢𑀭𑀸𑀬𑁂 𑀲𑀢𑀺 ‘‘𑀲𑀼𑀡𑀸𑀢𑀼 𑀫𑁂…𑀧𑁂… 𑀲𑀫𑀸𑀦𑀯𑀲𑁆𑀲𑀺𑀓𑀁 𑀧𑀯𑀸𑀭𑁂𑀬𑁆𑀬𑀸’’𑀢𑀺 𑀅𑀦𑀼𑀭𑀽𑀧𑀢𑁄 𑀜𑀢𑁆𑀢𑀺𑀁 𑀯𑀢𑁆𑀯𑀸 𑀬𑀣𑀸𑀞𑀧𑀺𑀢𑀜𑀢𑁆𑀢𑀺𑀬𑀸 𑀅𑀦𑀼𑀭𑀽𑀧𑁂𑀦 𑀧𑀯𑀸𑀭𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀦𑀼𑀭𑀽𑀧𑀢𑁄𑀢𑀺 ‘‘𑀲𑀼𑀡𑀸𑀢𑀼 𑀫𑁂…𑀧𑁂… 𑀤𑀸𑀦𑀁 𑀤𑁂𑀦𑁆𑀢𑁂𑀳𑀺 𑀭𑀢𑁆𑀢𑀺 𑀔𑁂𑀧𑀺𑀢𑀸, 𑀲𑀘𑁂…𑀧𑁂… 𑀭𑀢𑁆𑀢𑀺 𑀯𑀺𑀪𑀸𑀬𑀺𑀲𑁆𑀲𑀢𑀺, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮’’𑀦𑁆𑀢𑀺𑀆𑀤𑀺𑀦𑀸 𑀢𑁂𑀦 𑀔𑁂𑀧𑀺𑀢𑀭𑀢𑁆𑀢𑀺𑀬𑀸 𑀅𑀦𑀼𑀭𑀽𑀧𑁂𑀦. ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀬𑀁 𑀭𑀸𑀚𑀦𑁆𑀢𑀭𑀸𑀬𑁄, 𑀲𑀘𑁂 𑀲𑀗𑁆𑀖𑁄 𑀢𑁂𑀯𑀸𑀘𑀺𑀓𑀁…𑀧𑁂… 𑀲𑀗𑁆𑀖𑁄 𑀪𑀯𑀺𑀲𑁆𑀲𑀢𑀺, 𑀅𑀣𑀸𑀬𑀁 𑀭𑀸𑀚𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀺, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮’’𑀦𑁆𑀢𑀺𑀆𑀤𑀺𑀦𑀸 𑀭𑀸𑀚𑀦𑁆𑀢𑀭𑀸𑀬𑀸𑀤𑀻𑀦𑀁 𑀅𑀦𑀼𑀭𑀽𑀧𑁂𑀦 𑀯𑀸𑀢𑀺 𑀅𑀢𑁆𑀣𑁄. ‘‘𑀅𑀣𑀸𑀬𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀦 𑀧𑁂𑀬𑁆𑀬𑀸𑀮𑀯𑀲𑁂𑀦 𑀅𑀦𑁆𑀢𑁂 𑀯𑀼𑀢𑁆𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. ‘‘𑀤𑁆𑀯𑁂𑀯𑀸𑀘𑀺𑀓’’𑀦𑁆𑀢𑀺𑀆𑀤𑀺𑀓𑀁 𑀧𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀢𑁆𑀢𑀩𑁆𑀩𑀫𑁆𑀧𑀺 𑀮𑀗𑁆𑀖𑀦𑀓𑁆𑀓𑀫𑁂𑀦 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀯𑀘𑀦𑀲𑀫𑀬𑁂 𑀧𑀦 ‘‘𑀤𑁆𑀯𑁂𑀯𑀸𑀘𑀺𑀓𑀁 𑀧𑀯𑀸𑀭𑁂𑀬𑁆𑀬’’𑀇𑀘𑁆𑀘𑀸𑀤𑀺𑀦𑀸 𑀯𑀢𑁆𑀢𑀩𑁆𑀩𑀁. 𑀆𑀕𑀘𑁆𑀙𑁂𑀬𑁆𑀬𑀼𑀁 𑀬𑀤𑀺 𑀲𑀫𑀸𑀆𑀤𑀺𑀓𑀸 𑀘𑀸𑀢𑀺 ‘‘𑀆𑀕𑀘𑁆𑀙𑁂𑀬𑁆𑀬𑀼𑀁 𑀬𑀤𑀺 𑀲𑀫𑀸’’𑀇𑀘𑁆𑀘𑀸𑀤𑀬𑁄 𑀉𑀧𑁄𑀲𑀣𑁂 𑀯𑀼𑀢𑁆𑀢𑀸 𑀕𑀸𑀣𑀸𑀬𑁄 𑀘. 𑀏𑀢𑁆𑀣𑀸𑀢𑀺 𑀏𑀢𑀺𑀲𑁆𑀲𑀁 𑀧𑀯𑀸𑀭𑀡𑀸𑀬𑀁. 𑀅𑀬𑀫𑁂𑀯 𑀘 𑀆𑀳𑀭𑀡𑀓𑁆𑀓𑀫𑁄 𑁋

𑀆𑀕𑀘𑁆𑀙𑁂𑀬𑁆𑀬𑀼𑀁 𑀬𑀤𑀺 𑀲𑀫𑀸, 𑀧𑀯𑀸𑀭𑁂𑀦𑁆𑀢𑁂𑀯 𑀣𑁄𑀓𑀺𑀓𑀸;

𑀧𑀯𑀸𑀭𑀺𑀢𑀸 𑀢𑁂 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀅𑀜𑁆𑀜𑁂𑀳𑀺 𑀘 𑀧𑀯𑀸𑀭𑀺𑀬𑀁;

𑀧𑀯𑀸𑀭𑀺𑀢𑁂𑀲𑀼 𑀲𑀓𑀮𑀸-𑀬𑁂𑀓𑀘𑁆𑀘𑀸𑀬𑀼𑀝𑁆𑀞𑀺𑀢𑀸𑀬 𑀯𑀸.

𑀧𑀯𑀸𑀭𑁂𑀬𑁆𑀬𑀼𑀜𑁆𑀘 𑀢𑁂 𑀢𑁂𑀲𑀁, 𑀲𑀦𑁆𑀢𑀺𑀓𑁂 𑀩𑀳𑀼𑀓𑀸 𑀲𑀘𑁂;

𑀓𑀢𑁆𑀯𑀸 𑀲𑀩𑁆𑀩𑀯𑀺𑀓𑀧𑁆𑀧𑁂𑀲𑀼, 𑀧𑀼𑀩𑁆𑀩𑀓𑀺𑀘𑁆𑀘𑀁 𑀧𑀼𑀦𑀼𑀤𑁆𑀤𑀺𑀲𑁂𑀢𑀺.

‘‘𑀆𑀯𑀸𑀲𑀺𑀓𑀸𑀦𑀁 𑀧𑀦𑁆𑀦𑀭𑀲𑁄’’𑀢𑀺𑀆𑀤𑀺𑀓𑀸 𑀕𑀸𑀣𑀸𑀬𑁄 𑀧𑀦 𑀏𑀢𑁆𑀣𑀸𑀧𑀺 𑀲𑀫𑀸𑀦𑀸.

𑁪𑁪𑁩. 𑀜𑀢𑁆𑀢𑀺𑀁 𑀯𑀢𑁆𑀯𑀸𑀢𑀺 𑀯𑀓𑁆𑀔𑀫𑀸𑀦𑀕𑀡𑀜𑀢𑁆𑀢𑀺𑀁 𑀯𑀢𑁆𑀯𑀸.

𑁪𑁪𑁪. 𑀲𑀫𑀼𑀤𑀻𑀭𑀺𑀬𑀸𑀢𑀺 𑀅𑀜𑁆𑀜𑁂 𑀤𑁆𑀯𑁂 𑀢𑀬𑁄 𑀯𑀸 𑀯𑀓𑁆𑀔𑀫𑀸𑀦𑀓𑁆𑀓𑀫𑁂𑀦 𑀯𑀢𑁆𑀢𑀩𑁆𑀩𑀸.

𑁪𑁪𑁬-𑁮. 𑀓𑀢𑁆𑀢𑀩𑁆𑀩𑀁 𑀓𑀢𑁆𑀯𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀓𑀢𑁆𑀢𑀩𑁆𑀩𑀦𑁆𑀢𑀺 𑀧𑀼𑀩𑁆𑀩𑀓𑀺𑀘𑁆𑀘𑀸𑀤𑀺𑀓𑀁. 𑀦𑀯𑁂𑀦𑀧𑀺 ‘‘𑀅𑀳𑀁 𑀪𑀦𑁆𑀢𑁂…𑀧𑁂… 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀣𑁂𑀭𑁄 𑀈𑀭𑀺𑀬𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀦𑁆𑀢𑀺 𑀇𑀤𑀸𑀦𑀺 𑀯𑀓𑁆𑀔𑀫𑀸𑀦𑀁 𑀧𑀭𑀸𑀫𑀲𑀢𑀺.

𑁪𑁪𑁯. ‘‘𑀬𑀲𑁆𑀫𑀺’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀫𑁂𑀯.

𑁪𑁫𑁦. 𑀕𑀸𑀣𑀸𑀬𑁄𑀢𑀺 ‘‘𑀯𑀕𑁆𑀕𑁂 𑀲𑀫𑀕𑁆𑀕𑁂 𑀯𑀕𑁆𑀕𑁄𑀢𑀺, 𑀲𑀜𑁆𑀜𑀺𑀦𑁄’’𑀢𑀺𑀆𑀤𑀺𑀓𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀕𑀸𑀣𑀸𑀬𑁄 𑀯𑀸. 𑀅𑀬𑀁 𑀧𑀦𑁂𑀢𑁆𑀣 𑀯𑀺𑀲𑁂𑀲𑁄 𑁋 𑀓𑀭𑁄𑀢𑁄𑀢𑀺 𑀏𑀢𑁆𑀣 𑀧𑀯𑀸𑀭𑀡𑀁 𑀓𑀭𑁄𑀢𑁄𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀢𑀢𑀺𑀬 𑀕𑀸𑀣𑀸𑀬 ‘‘𑀧𑀸𑀢𑀺𑀫𑁄𑀓𑁆𑀔𑀁 𑀦 𑀉𑀤𑁆𑀤𑀺𑀲𑁂’’𑀢𑀺 𑀅𑀧𑀦𑁂𑀢𑁆𑀯𑀸 ‘‘𑀦𑁄 𑀓𑀭𑁂𑀬𑁆𑀬 𑀧𑀯𑀸𑀭𑀡’’𑀦𑁆𑀢𑀺 𑀧𑀤𑀁 𑀧𑀓𑁆𑀔𑀺𑀧𑀺𑀢𑀩𑁆𑀩𑀁. 𑀘𑀢𑀼𑀢𑁆𑀣𑀕𑀸𑀣𑀸𑀬 ‘‘𑀅𑀦𑀼𑀧𑁄𑀲𑀣𑁂’’𑀢𑀺𑀆𑀤𑀺𑀕𑀸𑀣𑀸𑀩𑀦𑁆𑀥𑀁 𑀅𑀧𑀦𑁂𑀢𑁆𑀯𑀸 ‘‘𑀦𑁂𑀯 𑀧𑀯𑀸𑀭𑀡𑁂 𑀓𑀸𑀢𑀼𑀁, 𑀲𑀸 𑀓𑀧𑁆𑀧𑀢𑀺 𑀧𑀯𑀸𑀭𑀡𑀸’’𑀢𑀺 𑀧𑀓𑁆𑀔𑀺𑀧𑀺𑀢𑀩𑁆𑀩𑀁. 𑀧𑀜𑁆𑀘𑀫𑀕𑀸𑀣𑀸𑀬 ‘‘𑀅𑀝𑁆𑀞𑀺𑀢𑁄𑀧𑁄𑀲𑀣𑀸𑀯𑀸𑀲𑀸’’𑀢𑀺 𑀅𑀧𑀦𑁂𑀢𑁆𑀯𑀸 ‘‘𑀧𑀯𑀸𑀭𑀡𑀸𑀞𑀺𑀢𑀸𑀯𑀸𑀲𑀸’’𑀢𑀺 𑀧𑀓𑁆𑀔𑀺𑀧𑀺𑀢𑀩𑁆𑀩𑀁.

𑁪𑁫𑁧. 𑀲𑀗𑁆𑀖𑀫𑁆𑀳𑀺 𑀧𑀯𑀸𑀭𑀺𑀢𑁂𑀯𑀸𑀢𑀺 𑀧𑀼𑀭𑀺𑀫𑀯𑀲𑁆𑀲𑀽𑀧𑀕𑀢𑁂 𑀲𑀗𑁆𑀖𑀫𑁆𑀳𑀺 𑀧𑀯𑀸𑀭𑀺𑀢𑁂 𑀏𑀯. 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀢𑀺 𑀦 𑀏𑀓𑀲𑁆𑀫𑀺𑀁 𑀉𑀧𑁄𑀲𑀣𑀕𑁆𑀕𑁂 𑀤𑁆𑀯𑁂 𑀜𑀢𑁆𑀢𑀺𑀬𑁄 𑀞𑀧𑁂𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀕𑀦𑁆𑀢𑁆𑀯𑀸 𑀅𑀧𑀭𑀺𑀦𑀺𑀝𑁆𑀞𑀺𑀢𑀯𑀲𑁆𑀲𑁄 𑀅𑀯𑀼𑀢𑁆𑀣𑁄. 𑀅𑀦𑀼𑀧𑀸𑀕𑀢𑁄𑀢𑀺 𑀯𑀲𑁆𑀲𑀁 𑀅𑀦𑀼𑀧𑀸𑀕𑀢𑁄. 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑁋 𑀧𑀼𑀭𑀺𑀫𑀺𑀓𑀸𑀬 𑀯𑀲𑁆𑀲𑀁 𑀉𑀧𑀕𑀢𑀸 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀕𑀢𑀸 𑀢𑁂𑀳𑀺 𑀲𑀫𑀸 𑀯𑀸 𑀊𑀦𑀢𑀭𑀸 𑀯𑀸 𑀧𑀼𑀭𑀺𑀫𑀺𑀓𑀸𑀬 𑀯𑀸 𑀉𑀧𑀕𑀢𑁂𑀳𑀺 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀕𑀢𑀸 𑀣𑁄𑀓𑀢𑀭𑀸 𑀘𑁂𑀯 𑀳𑁄𑀦𑁆𑀢𑀺, 𑀲𑀗𑁆𑀖𑀧𑁆𑀧𑀯𑀸𑀭𑀡𑀸𑀬 𑀕𑀡𑀁 𑀧𑀽𑀭𑁂𑀦𑁆𑀢𑀺 𑀲𑀗𑁆𑀖𑀧𑁆𑀧𑀯𑀸𑀭𑀡𑀸𑀯𑀲𑁂𑀦 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸, 𑀅𑀣 𑀘 𑀉𑀪𑁄𑀧𑀺 𑀏𑀓𑀢𑁄 𑀳𑀼𑀢𑁆𑀯𑀸 𑀲𑀗𑁆𑀖𑀁 𑀦 𑀧𑀽𑀭𑁂𑀦𑁆𑀢𑀺, 𑀕𑀡𑀁 𑀧𑀦 𑀧𑀽𑀭𑁂𑀦𑁆𑀢𑀺, 𑀕𑀡𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀧𑀯𑀸𑀭𑁂𑀢𑀩𑁆𑀩𑀁, 𑀧𑀘𑁆𑀙𑀸 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀬𑀤𑀺 𑀧𑀦 𑀧𑀼𑀭𑀺𑀫𑀺𑀓𑀸𑀬 𑀏𑀓𑁄, 𑀧𑀘𑁆𑀙𑀺𑀫𑀺𑀓𑀸𑀬 𑀏𑀓𑁄, 𑀏𑀓𑁂𑀦 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁, 𑀏𑀓𑁂𑀦 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀲𑀘𑁂 𑀧𑀼𑀭𑀺𑀫𑁂𑀳𑀺 𑀯𑀲𑁆𑀲𑀽𑀧𑀕𑀢𑁂𑀳𑀺 𑀧𑀘𑁆𑀙𑀸 𑀯𑀲𑁆𑀲𑀽𑀧𑀕𑀢𑀸 𑀏𑀓𑁂𑀦𑀧𑀺 𑀅𑀥𑀺𑀓𑀸 𑀲𑀗𑁆𑀖𑀁 𑀧𑀽𑀭𑁂𑀦𑁆𑀢𑀺, 𑀧𑀞𑀫𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀧𑀘𑁆𑀙𑀸 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀦𑁆𑀢𑀺. 𑀕𑀡𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀫𑀼𑀧𑀭𑀺𑀧𑀺 𑀬𑀣𑀸𑀬𑁄𑀕𑀁 𑀘𑀺𑀦𑁆𑀢𑀦𑀻𑀬𑀁.

𑁪𑁫𑁨. 𑀘𑀸𑀢𑀼𑀫𑀸𑀲𑀺𑀦𑀺𑀬𑀸𑀢𑀺 𑀅𑀧𑀭𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬𑀁. 𑀲𑀗𑁆𑀖𑁂𑀦𑀸𑀢𑀺 𑀧𑀞𑀫𑀁 𑀯𑀲𑁆𑀲𑀽𑀧𑀕𑀢𑁂𑀦 𑀲𑀗𑁆𑀖𑁂𑀦. 𑀯𑀼𑀢𑁆𑀣𑀸 𑀯𑀲𑁆𑀲𑀸 𑀬𑁂𑀳𑀺 𑀢𑁂 𑀯𑀼𑀢𑁆𑀣𑀯𑀲𑁆𑀲𑀸, 𑀧𑀘𑁆𑀙𑀺𑀫𑀯𑀲𑁆𑀲𑀽𑀧𑀕𑀢𑀸. 𑀲𑀘𑁂 𑀅𑀧𑁆𑀧𑀢𑀭𑀸 𑀲𑀺𑀬𑀼𑀦𑁆𑀢𑀺 𑀇𑀫𑀺𑀦𑀸 𑀬𑀤𑀺 𑀅𑀥𑀺𑀓𑀢𑀭𑀸 𑀯𑀸 𑀲𑀫𑀲𑀫𑀸 𑀯𑀸 𑀳𑁄𑀦𑁆𑀢𑀺, 𑀧𑀯𑀸𑀭𑀡𑀸𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀧𑀘𑁆𑀙𑀺𑀫𑀯𑀲𑁆𑀲𑀽𑀧𑀕𑀢𑁂𑀳𑀺 𑀧𑀞𑀫𑀁 𑀧𑀯𑀸𑀭𑀺𑀢𑁂 𑀧𑀘𑁆𑀙𑀸 𑀇𑀢𑀭𑁂𑀳𑀺 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄𑀢𑀺 𑀤𑀻𑀧𑁂𑀢𑀻𑀢𑀺.

𑀧𑀯𑀸𑀭𑀡𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪𑁬. 𑀲𑀁𑀯𑀭𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁪𑁫𑁩. 𑀲𑀁𑀯𑀭𑀡𑀁 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀦𑀁 𑀲𑀢𑀺𑀓𑀯𑀸𑀝𑁂𑀦 𑀧𑀺𑀤𑀳𑀦𑀁 𑀲𑀁𑀯𑀭𑁄. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑁄 𑀦𑀢𑁆𑀣𑀺, 𑀦 𑀳𑀺 𑀘𑀓𑁆𑀔𑀼𑀧𑀲𑀸𑀤𑀁 𑀦𑀺𑀲𑁆𑀲𑀸𑀬 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀦𑁂𑀯 𑀪𑀯𑀗𑁆𑀕𑀲𑀫𑀬𑁂 𑀆𑀯𑀚𑁆𑀚𑀦𑀸𑀤𑀻𑀦𑀁 𑀅𑀜𑁆𑀜𑀢𑀭𑀲𑀫𑀬𑁂, 𑀚𑀯𑀦𑀓𑁆𑀔𑀡𑁂 𑀧𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀢𑀤𑀸 𑀲𑀁𑀯𑀭𑁄 𑀳𑁄𑀢𑀺, 𑀏𑀯𑀁 𑀳𑁄𑀦𑁆𑀢𑁂 𑀧𑀦 𑀲𑁄 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀦𑀁 𑀲𑀁𑀯𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀘𑀓𑁆𑀔𑀼𑀲𑁄𑀢𑀸𑀤𑀺𑀪𑁂𑀤𑁂𑀳𑀻𑀢𑀺 𑀘𑀓𑁆𑀔𑀼 𑀘 𑀲𑁄𑀢𑀜𑁆𑀘, 𑀢𑀸𑀦𑀺 𑀆𑀤𑀺 𑀬𑁂𑀲𑀁, 𑀢𑁂𑀯 𑀪𑁂𑀤𑀸 𑀘𑀸𑀢𑀺 𑀲𑀫𑀸𑀲𑁄, 𑀢𑁂𑀳𑀺 𑀤𑁆𑀯𑀸𑀭𑁂𑀳𑀺. 𑀅𑀪𑀺𑀚𑁆𑀛𑀸𑀤𑀺𑀧𑁆𑀧𑀯𑀢𑁆𑀢𑀺𑀬𑀸 𑀅𑀘𑁆𑀘𑀦𑁆𑀢𑁄𑀧𑀓𑀸𑀭𑀓𑀢𑁆𑀢𑀸 𑀓𑀭𑀡𑀢𑁆𑀣𑁂 𑀘𑁂𑀢𑁆𑀣 𑀢𑀢𑀺𑀬𑀸. 𑀏𑀢𑁂𑀦 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀫𑀦𑀲𑀗𑁆𑀔𑀸𑀢𑀸𑀦𑀺 𑀤𑁆𑀯𑀸𑀭𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀭𑀽𑀧𑀲𑀤𑁆𑀤𑀸𑀤𑀺𑀕𑁄𑀘𑀭𑁂𑀢𑀺 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀥𑀫𑁆𑀫𑀲𑀗𑁆𑀔𑀸𑀢𑁂 𑀯𑀺𑀲𑀬𑁂. 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸𑀤𑀺𑀧𑁆𑀧𑀯𑀢𑁆𑀢𑀺𑀦𑁆𑀢𑀺 𑀏𑀢𑁆𑀣 𑀧𑀭𑀲𑀫𑁆𑀧𑀢𑁆𑀢𑀺𑀁 𑀅𑀪𑀺𑀫𑀼𑀔𑀁 𑀛𑀸𑀬𑀢𑀻𑀢𑀺 𑀅𑀪𑀺𑀚𑁆𑀛𑀸, 𑀩𑀮𑀯𑀢𑀡𑁆𑀳𑀸. 𑀆𑀤𑀺-𑀲𑀤𑁆𑀤𑁂𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀬𑁄 𑀅𑀦𑁂𑀓𑁂 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀗𑁆𑀕𑀳𑀺𑀢𑀸.

𑁪𑁫𑁪. 𑀲𑀓𑀁 𑀘𑀺𑀢𑁆𑀢𑀁 𑀓𑀺𑀝𑁆𑀞𑀸𑀤𑀺𑀁 𑀤𑀼𑀧𑁆𑀧𑀲𑀼𑀁 𑀯𑀺𑀬 𑀦𑀺𑀕𑁆𑀕𑀡𑁆𑀳𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀝𑁆𑀞𑀦𑁆𑀢𑀺 𑀓𑀺𑀝𑁆𑀞𑀝𑁆𑀞𑀸𑀦𑁂 𑀉𑀧𑁆𑀧𑀦𑁆𑀦𑀁 𑀲𑀲𑁆𑀲𑀁 𑀕𑀳𑀺𑀢𑀁. 𑀓𑀺𑀝𑁆𑀞𑀁 𑀅𑀤𑀢𑀻𑀢𑀺 𑀓𑀺𑀝𑁆𑀞𑀸𑀤𑀺, 𑀢𑀁. 𑀲𑀫𑁆𑀧𑀚𑀸𑀦𑁄𑀢𑀺 𑀲𑀸𑀢𑁆𑀣𑀓𑀲𑀧𑁆𑀧𑀸𑀬𑀕𑁄𑀘𑀭𑀅𑀲𑀫𑁆𑀫𑁄𑀳𑀲𑀗𑁆𑀔𑀸𑀢𑁂𑀦 𑀘𑀢𑀼𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑁆𑀫𑀸 𑀧𑀚𑀸𑀦𑁄. 𑀇𑀫𑀺𑀦𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀁 𑀓𑀣𑀺𑀢𑀁.

𑀲𑀁𑀯𑀭𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪𑁭. 𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁪𑁫𑁫. 𑀤𑁂𑀲𑀦𑀸 𑀲𑀁𑀯𑀭𑁄 𑀏𑀝𑁆𑀞𑀺 𑀧𑀘𑁆𑀘𑀯𑁂𑀓𑁆𑀔𑀡𑀦𑁆𑀢𑀺 𑀪𑁂𑀤𑀢𑁄 𑀲𑀼𑀤𑁆𑀥𑀺 𑀘𑀢𑀼𑀩𑁆𑀩𑀺𑀥𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀘𑁆𑀘𑀯𑁂𑀓𑁆𑀔𑀡𑀁 𑀪𑁂𑀤𑀢𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀦𑀺𑀕𑁆𑀕𑀳𑀺𑀢𑀮𑁄𑀧𑁄 𑀤𑀝𑁆𑀞𑀩𑁆𑀩𑁄, 𑀤𑁂𑀲𑀦𑀸𑀲𑀼𑀤𑁆𑀥𑀺 𑀲𑀁𑀯𑀭𑀲𑀼𑀤𑁆𑀥𑀺 𑀧𑀭𑀺𑀬𑁂𑀝𑁆𑀞𑀺𑀲𑀼𑀤𑁆𑀥𑀺 𑀧𑀘𑁆𑀘𑀯𑁂𑀓𑁆𑀔𑀡𑀲𑀼𑀤𑁆𑀥𑀻𑀢𑀺 𑀘𑀢𑀼𑀩𑁆𑀩𑀺𑀥𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀲𑀼𑀚𑁆𑀛𑀢𑀻𑀢𑀺 𑀲𑀼𑀤𑁆𑀥𑀺, 𑀬𑀣𑀸𑀥𑀫𑁆𑀫𑀁 𑀤𑁂𑀲𑀦𑀸𑀬 𑀲𑀼𑀤𑁆𑀥𑀺 𑀤𑁂𑀲𑀦𑀸𑀲𑀼𑀤𑁆𑀥𑀺. 𑀯𑀼𑀝𑁆𑀞𑀸𑀦𑀲𑁆𑀲𑀸𑀧𑀺 𑀘𑁂𑀢𑁆𑀣 𑀤𑁂𑀲𑀦𑀸𑀬 𑀏𑀯 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀫𑀽𑀮𑀸𑀧𑀢𑁆𑀢𑀻𑀦𑀁 𑀧𑀦 𑀅𑀪𑀺𑀓𑁆𑀔𑀼𑀢𑀸𑀧𑀝𑀺𑀜𑁆𑀜𑀸𑀯 𑀤𑁂𑀲𑀦𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸, 𑀲𑀸𑀯𑀲𑁆𑀲 𑀧𑀸𑀭𑀸𑀚𑀺𑀓𑀸𑀧𑀦𑁆𑀦𑀲𑁆𑀲 𑀯𑀺𑀲𑀼𑀤𑁆𑀥𑀺 𑀦𑀸𑀫 𑀳𑁄𑀢𑀺. 𑀅𑀬𑀜𑁆𑀳𑀺 𑀬𑀲𑁆𑀫𑀸 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑁄, 𑀢𑀲𑁆𑀫𑀸 𑀪𑀺𑀓𑁆𑀔𑀼𑀪𑀸𑀯𑁂 𑀞𑀢𑁆𑀯𑀸 𑀅𑀪𑀩𑁆𑀩𑁄 𑀛𑀸𑀦𑀸𑀤𑀻𑀦𑀺 𑀅𑀥𑀺𑀕𑀦𑁆𑀢𑀼𑀁. 𑀪𑀺𑀓𑁆𑀔𑀼𑀪𑀸𑀯𑁄 𑀳𑀺𑀲𑁆𑀲 𑀲𑀕𑁆𑀕𑀦𑁆𑀢𑀭𑀸𑀬𑁄 𑀘𑁂𑀯 𑀳𑁄𑀢𑀺, 𑀫𑀕𑁆𑀕𑀦𑁆𑀢𑀭𑀸𑀬𑁄 𑀘. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑀸𑀫𑀜𑁆𑀜𑀁 𑀤𑀼𑀧𑁆𑀧𑀭𑀸𑀫𑀝𑁆𑀞𑀁, 𑀦𑀺𑀭𑀬𑀸𑀬𑀽𑀧𑀓𑀟𑁆𑀠𑀢𑀻’’𑀢𑀺. (𑀥. 𑀧. 𑁩𑁧𑁧);

𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 𑁋

‘‘𑀲𑀺𑀣𑀺𑀮𑁄 𑀳𑀺 𑀧𑀭𑀺𑀩𑁆𑀩𑀚𑁄, 𑀪𑀺𑀬𑁆𑀬𑁄 𑀆𑀓𑀺𑀭𑀢𑁂 𑀭𑀚’’𑀦𑁆𑀢𑀺. (𑀥. 𑀧. 𑁩𑁧𑁩);

𑀇𑀘𑁆𑀘𑀲𑁆𑀲 𑀪𑀺𑀓𑁆𑀔𑀼𑀪𑀸𑀯𑁄 𑀯𑀺𑀲𑀼𑀤𑁆𑀥𑀺 𑀦𑀸𑀫 𑀦 𑀳𑁄𑀢𑀺. 𑀬𑀲𑁆𑀫𑀸 𑀧𑀦 𑀕𑀺𑀳𑀺𑀆𑀤𑀺𑀓𑁄 𑀳𑀼𑀢𑁆𑀯𑀸 𑀤𑀸𑀦𑀲𑀭𑀡𑀲𑀻𑀮𑀲𑀁𑀯𑀭𑀸𑀤𑀻𑀳𑀺 𑀲𑀕𑁆𑀕𑀫𑀕𑁆𑀕𑀁 𑀯𑀸 𑀛𑀸𑀦𑀯𑀺𑀫𑁄𑀓𑁆𑀔𑀫𑀕𑁆𑀕𑀁 𑀯𑀸 𑀆𑀭𑀸𑀥𑁂𑀢𑀼𑀁 𑀪𑀩𑁆𑀩𑁄 𑀳𑁄𑀢𑀺, 𑀢𑀲𑁆𑀫𑀸𑀲𑁆𑀲 𑀕𑀺𑀳𑀺𑀆𑀤𑀺𑀪𑀸𑀯𑁄 𑀯𑀺𑀲𑀼𑀤𑁆𑀥𑀺 𑀦𑀸𑀫 𑀳𑁄𑀢𑀺. 𑀅𑀥𑀺𑀝𑁆𑀞𑀸𑀦𑀯𑀺𑀲𑀺𑀝𑁆𑀞𑁂𑀦 𑀲𑀁𑀯𑀭𑁂𑀦 𑀯𑀺𑀲𑀼𑀤𑁆𑀥𑀺 𑀲𑀁𑀯𑀭𑀯𑀺𑀲𑀼𑀤𑁆𑀥𑀺. 𑀥𑀫𑁆𑀫𑁂𑀦 𑀲𑀫𑁂𑀦 𑀧𑀘𑁆𑀘𑀬𑀸𑀦𑀁 𑀏𑀝𑁆𑀞𑀺𑀬𑀸 𑀲𑀼𑀤𑁆𑀥𑀺 𑀏𑀝𑁆𑀞𑀺𑀲𑀼𑀤𑁆𑀥𑀺. 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀲𑀼𑀤𑁆𑀥𑀺 𑀧𑀘𑁆𑀘𑀯𑁂𑀓𑁆𑀔𑀡𑀲𑀼𑀤𑁆𑀥𑀺. ‘‘𑀘𑀢𑀼𑀩𑁆𑀩𑀺𑀥𑀸 𑀧𑀸𑀢𑀻’’𑀢𑀺𑀆𑀤𑀻𑀲𑀼 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀫𑁆𑀫𑀢𑀦𑁆𑀢𑀺 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄’’𑀢𑀺 𑀲𑀫𑁆𑀫𑀢𑀁 𑀲𑀻𑀮𑀁.

𑁪𑁫𑁬. 𑀘𑀺𑀢𑁆𑀢𑀸𑀥𑀺𑀝𑁆𑀞𑀸𑀦𑀲𑀁𑀯𑀭𑀸 𑀲𑀼𑀚𑁆𑀛𑀢𑀻𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀲𑀁𑀯𑀭𑀲𑀼𑀤𑁆𑀥𑀻𑀢𑀺 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸.

𑁪𑁫𑁭. 𑀅𑀦𑁂𑀲𑀦𑀁 𑀧𑀳𑀸𑀬 𑀥𑀫𑁆𑀫𑁂𑀦 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀏𑀝𑁆𑀞𑀺𑀬𑀸 𑀲𑀼𑀤𑁆𑀥𑀢𑁆𑀢𑀸 𑀆𑀚𑀻𑀯𑀦𑀺𑀲𑁆𑀲𑀺𑀢𑀁 𑀏𑀝𑁆𑀞𑀺𑀲𑀼𑀤𑁆𑀥𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲𑀸𑀢𑀺 𑀧𑀘𑁆𑀘𑀬𑁂 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲.

𑁪𑁫𑁮. 𑀧𑀘𑁆𑀘𑀯𑁂𑀓𑁆𑀔𑀡𑀲𑀼𑀚𑁆𑀛𑀦𑀸𑀢𑀺 𑀳𑁂𑀢𑀼𑀫𑁆𑀳𑀺 𑀧𑀜𑁆𑀘𑀫𑀻𑀢𑀺.

𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪𑁮. 𑀲𑀦𑁆𑀢𑁄𑀲𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁪𑁫𑁯. 𑀧𑀁𑀲𑀼𑀓𑀽𑀮𑀁 𑀧𑀺𑀡𑁆𑀟𑀺𑀬𑀸𑀮𑁄𑀧𑁄 𑀭𑀼𑀓𑁆𑀔𑀫𑀽𑀮𑀁 𑀧𑀽𑀢𑀺𑀫𑀼𑀢𑁆𑀢𑀪𑁂𑀲𑀚𑁆𑀚𑀦𑁆𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀅𑀧𑁆𑀧𑀕𑁆𑀖𑀦𑀓𑀢𑀸𑀬 𑀅𑀧𑁆𑀧𑀸 𑀘𑁂𑀯 𑀓𑀲𑁆𑀲𑀘𑀺𑀧𑀺 𑀆𑀮𑀬𑀸𑀪𑀸𑀯𑁂𑀦 𑀅𑀦𑀯𑀚𑁆𑀚𑀸 𑀘 𑀕𑀢𑀕𑀢𑀝𑁆𑀞𑀸𑀦𑁂 𑀮𑀩𑁆𑀪𑀫𑀸𑀦𑀢𑀸𑀬 𑀲𑀼𑀮𑀪𑀸 𑀘𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀦𑀸𑀳 ‘‘𑀅𑀧𑁆𑀧𑁂𑀦𑀸’’𑀢𑀺𑀆𑀤𑀺. 𑀫𑀢𑁆𑀢𑀜𑁆𑀜𑀽𑀢𑀺 𑀧𑀭𑀺𑀬𑁂𑀲𑀦𑀧𑁆𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀘𑀢𑀽𑀲𑀼 𑀫𑀢𑁆𑀢𑀜𑁆𑀜𑀼𑀢𑀸𑀯𑀲𑁂𑀦 𑀧𑀫𑀸𑀡𑀜𑁆𑀜𑀽.

𑁪𑁬𑁦. 𑀓𑀣𑀁 𑀲𑀦𑁆𑀢𑀼𑀝𑁆𑀞𑁄𑀢𑀺 𑀆𑀳 ‘‘𑀅𑀢𑀻𑀢’’𑀦𑁆𑀢𑀺𑀆𑀤𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀬𑀸𑀧𑁂𑀦𑁆𑀢𑁄𑀢𑀺 𑀬𑀣𑀸𑀮𑀸𑀪𑀬𑀣𑀸𑀩𑀮𑀬𑀣𑀸𑀲𑀸𑀭𑀼𑀧𑁆𑀧𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀬𑀣𑀸𑀯𑀼𑀢𑁆𑀢𑀘𑀢𑀼𑀩𑁆𑀩𑀺𑀥𑀧𑀘𑁆𑀘𑀬𑁂𑀦 𑀬𑀸𑀧𑁂𑀦𑁆𑀢𑁄𑀢𑀺.

𑀲𑀦𑁆𑀢𑁄𑀲𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪𑁯. 𑀘𑀢𑀼𑀭𑀸𑀭𑀓𑁆𑀔𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁪𑁬𑁧-𑁨. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺 …𑀧𑁂… 𑀫𑀭𑀡𑀲𑁆𑀲𑀢𑀻𑀢𑀺 𑀇𑀫𑀸 𑀘𑀢𑀼𑀭𑀸𑀭𑀓𑁆𑀔𑀸 𑀦𑀸𑀫𑀸𑀢𑀺 𑀲𑁂𑀲𑁄. 𑀆𑀭𑀓𑀢𑁆𑀢𑀸𑀤𑀺𑀦𑀸𑀢𑀺 𑀆𑀭𑀓𑀪𑀸𑀯𑁄 𑀆𑀭𑀓𑀢𑁆𑀢𑀁, 𑀢𑀁 𑀆𑀤𑀺 𑀬𑀲𑁆𑀲 ‘‘𑀅𑀭𑀻𑀦𑀁 𑀳𑀢𑀢𑁆𑀢𑀸’’𑀢𑀺𑀆𑀤𑀺𑀓𑀲𑁆𑀲 𑀢𑀁 𑀆𑀭𑀓𑀢𑁆𑀢𑀸𑀤𑀺. 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀲𑀯𑀸𑀲𑀦𑀸𑀦𑀁 𑀅𑀭𑀸𑀦𑀁 𑀳𑀢𑀢𑁆𑀢𑀸 𑀆𑀭𑀓𑀸 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑁂 𑀞𑀺𑀢𑁄𑀢𑀺 𑀆-𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁, 𑀓-𑀓𑀸𑀭𑀲𑁆𑀲 𑀳-𑀓𑀸𑀭𑀁 𑀲𑀸𑀦𑀼𑀦𑀸𑀲𑀺𑀓𑀁 𑀓𑀢𑁆𑀯𑀸 ‘‘𑀅𑀭𑀳’’𑀦𑁆𑀢𑀺 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀆𑀭𑀓𑀸’’𑀢𑀺 𑀘 𑀯𑀼𑀢𑁆𑀢𑁂 𑀲𑀸𑀫𑀜𑁆𑀜𑀚𑁄𑀢𑀦𑀸𑀬 𑀯𑀺𑀲𑁂𑀲𑁂 𑀅𑀯𑀝𑁆𑀞𑀸𑀦𑀢𑁄, 𑀯𑀺𑀲𑁂𑀲𑀢𑁆𑀣𑀺𑀦𑀸 𑀘 𑀯𑀺𑀲𑁂𑀲𑀲𑁆𑀲 𑀅𑀦𑀼𑀧𑁆𑀧𑀬𑁄𑀚𑀺𑀢𑀩𑁆𑀩𑀢𑁆𑀢𑀸 ‘‘𑀓𑀺𑀮𑁂𑀲𑁂𑀳𑀻’’𑀢𑀺 𑀮𑀩𑁆𑀪𑀢𑀺.

𑀲𑀫𑁆𑀫𑀸𑀢𑀺 𑀅𑀯𑀺𑀧𑀭𑀻𑀢𑀁. 𑀲𑀸𑀫𑀦𑁆𑀢𑀺 𑀲𑀬𑀫𑁂𑀯, 𑀅𑀧𑀭𑀦𑁂𑀬𑁆𑀬𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀳𑀺 𑀏𑀢𑁆𑀣 𑀲𑀁-𑀲𑀤𑁆𑀤𑁄 ‘‘𑀲𑀬’’𑀦𑁆𑀢𑀺 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲 𑀩𑁄𑀥𑀓𑁄 𑀤𑀝𑁆𑀞𑀩𑁆𑀩𑁄. 𑀩𑀼𑀤𑁆𑀥𑀢𑁄𑀢𑀺 𑀪𑀸𑀯𑀧𑁆𑀧𑀥𑀸𑀦𑁄𑀬𑀁 𑀦𑀺𑀤𑁆𑀤𑁂𑀲𑁄, 𑀩𑀼𑀤𑁆𑀥𑀢𑁆𑀢𑀸𑀢𑀺 𑀅𑀢𑁆𑀣𑁄. ‘‘𑀅𑀭𑀳𑀁’’ 𑀇𑀢𑀺 𑀯𑀸 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’ 𑀇𑀢𑀺 𑀯𑀸 𑀪𑀕𑀯𑀢𑁄 𑀦𑀯𑀪𑁂𑀤𑁂 𑀕𑀼𑀡𑁂 𑀬𑀸 𑀧𑀼𑀦𑀧𑁆𑀧𑀼𑀦𑀁 𑀅𑀦𑀼𑀲𑁆𑀲𑀢𑀺, 𑀲𑀸 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀻𑀢𑀺 𑀬𑁄𑀚𑀦𑀸. ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀇𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀅-𑀓𑀸𑀭𑁄 𑀲𑀦𑁆𑀥𑀺𑀯𑀲𑁂𑀦 𑀆𑀕𑀢𑁄. 𑀇𑀢𑀺-𑀲𑀤𑁆𑀤𑁄 𑀧𑀦𑁂𑀢𑁆𑀣 𑀆𑀤𑀺𑀅𑀢𑁆𑀣𑁄, 𑀇𑀘𑁆𑀘𑀸𑀤𑀻𑀢𑀺 𑀅𑀢𑁆𑀣𑁄. 𑀦𑀯𑀪𑁂𑀤𑁂𑀢𑀺 ‘‘𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀻’’𑀢𑀺 𑀏𑀓𑀢𑁄 𑀕𑀳𑁂𑀢𑁆𑀯𑀸. 𑀏𑀢𑁆𑀣 𑀧𑀦 𑀉𑀧𑀘𑀸𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀦 𑀅𑀧𑁆𑀧𑀦𑀸, 𑀢𑀣𑀸 𑀫𑀭𑀡𑀲𑁆𑀲𑀢𑀺𑀬𑀁. 𑀇𑀢𑀭𑁂𑀲𑀼 𑀧𑀦 𑀉𑀪𑀬𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺.

𑁪𑁬𑁩-𑁪. ‘‘𑀲𑀻𑀫𑀝𑁆𑀞𑀸’’𑀢𑀺𑀆𑀤𑀺𑀦𑀸 𑀫𑁂𑀢𑁆𑀢𑀸𑀪𑀸𑀯𑀦𑀁 𑀤𑀲𑁆𑀲𑁂𑀢𑀺. 𑀲𑀻𑀫𑀝𑁆𑀞𑀲𑀗𑁆𑀖𑁂𑀢𑀺 𑀲𑀻𑀫𑀸𑀬𑀁 𑀢𑀺𑀝𑁆𑀞𑀢𑀻𑀢𑀺 𑀲𑀻𑀫𑀝𑁆𑀞𑁄, 𑀲𑁄𑀯 𑀲𑀗𑁆𑀖𑁄. 𑀕𑁄𑀘𑀭𑀕𑀸𑀫𑀫𑁆𑀳𑀺 𑀇𑀲𑁆𑀲𑀭𑁂 𑀚𑀦𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀫𑀸𑀦𑀼𑀲𑁂 𑀉𑀧𑀸𑀤𑀸𑀬 𑀲𑀩𑁆𑀩𑀲𑀢𑁆𑀢𑁂𑀲𑀽𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀕𑀸𑀫𑁂. 𑀲𑀼𑀔𑀺𑀢𑀸 𑀳𑁄𑀦𑁆𑀢𑀼 𑀅𑀯𑁂𑀭𑀸𑀢𑀺 𑀧𑀤𑀘𑁆𑀙𑁂𑀤𑁄. 𑀆𑀤𑀺𑀦𑀸𑀢𑀺 ‘‘𑀅𑀩𑁆𑀬𑀸𑀧𑀚𑁆𑀚𑀸 𑀳𑁄𑀦𑁆𑀢𑀼, 𑀅𑀦𑀻𑀖𑀸 𑀳𑁄𑀦𑁆𑀢𑀼, 𑀲𑀼𑀔𑀻 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀦𑁆𑀢𑀽’’𑀢𑀺 𑀇𑀫𑀺𑀦𑀸. 𑀧𑀭𑀺𑀘𑁆𑀙𑀺𑀚𑁆𑀚 𑀧𑀭𑀺𑀘𑁆𑀙𑀺𑀚𑁆𑀚𑀸𑀢𑀺 ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀲𑀩𑁆𑀩𑁂 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀦𑀸 𑀏𑀯𑀫𑁆𑀧𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀫𑁂𑀢𑁆𑀢𑀸𑀪𑀸𑀯𑀦𑀸.

𑁪𑁬𑁫-𑁬. 𑀇𑀤𑀸𑀦𑀺 𑀅𑀲𑀼𑀪𑀁 𑀦𑀺𑀤𑁆𑀤𑀺𑀲𑀦𑁆𑀢𑁄 𑀲𑀩𑁆𑀩𑀧𑀞𑀫𑀁 𑀲𑀸𑀥𑁂𑀢𑀩𑁆𑀩𑀁 𑀲𑀢𑁆𑀢𑀯𑀺𑀥𑀫𑀼𑀕𑁆𑀕𑀳𑀓𑁄𑀲𑀮𑁆𑀮𑀁 ‘‘𑀯𑀡𑁆𑀡𑁂’’𑀘𑁆𑀘𑀸𑀤𑀺𑀦𑀸 𑀤𑀲𑁆𑀲𑁂𑀢𑀺. 𑀲𑀢𑁆𑀢𑀯𑀺𑀥𑀜𑁆𑀳𑀺 𑀢𑀁 𑀦𑀬𑀢𑁄 𑀆𑀕𑀢𑀁 𑀯𑀸𑀘𑀸𑀲𑀚𑁆𑀛𑀸𑀬𑀫𑀦𑀲𑀸𑀲𑀚𑁆𑀛𑀸𑀬𑁂𑀳𑀺 𑀲𑀤𑁆𑀥𑀺𑀁. 𑀢𑀢𑁆𑀣 𑀧𑀞𑀫𑀁 𑀯𑀸𑀘𑀸𑀬 𑀲𑀚𑁆𑀛𑀸𑀬𑀦𑁆𑀢𑁂𑀦 𑀘𑀢𑁆𑀢𑀸𑀭𑀺 𑀢𑀘𑀧𑀜𑁆𑀘𑀓𑀸𑀤𑀻𑀦𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑀼𑀮𑁄𑀫𑀧𑁆𑀧𑀝𑀺𑀮𑁄𑀫𑀯𑀲𑁂𑀦 𑀓𑀸𑀢𑀩𑁆𑀩𑀁. 𑀬𑀣𑀸 𑀧𑀦 𑀯𑀘𑀲𑀸, 𑀢𑀣𑁂𑀯 𑀫𑀦𑀲𑀸𑀧𑀺 𑀲𑀚𑁆𑀛𑀸𑀬𑁄 𑀓𑀸𑀢𑀩𑁆𑀩𑁄. 𑀯𑀘𑀲𑀸 𑀲𑀚𑁆𑀛𑀸𑀬𑁄 𑀳𑀺 𑀫𑀦𑀲𑀸 𑀲𑀚𑁆𑀛𑀸𑀬𑀲𑁆𑀲 𑀧𑀘𑁆𑀘𑀬𑁄. 𑀲𑁄 𑀧𑀦 𑀮𑀓𑁆𑀔𑀡𑀧𑁆𑀧𑀝𑀺𑀯𑁂𑀥𑀲𑁆𑀲 𑀧𑀘𑁆𑀘𑀬𑁄. 𑀢𑀢𑁆𑀣 𑀯𑀡𑁆𑀡𑁄 𑀦𑀸𑀫 𑀓𑁂𑀲𑀸𑀤𑀻𑀦𑀁 𑀯𑀡𑁆𑀡𑁄. 𑀲𑀡𑁆𑀞𑀸𑀦𑀁 𑀢𑁂𑀲𑀁𑀬𑁂𑀯 𑀲𑀡𑁆𑀞𑀸𑀦𑀁. 𑀑𑀓𑀸𑀲𑁄 𑀢𑁂𑀲𑀁𑀬𑁂𑀯 𑀧𑀢𑀺𑀝𑁆𑀞𑁄𑀓𑀸𑀲𑁄. 𑀤𑀺𑀲𑀸 𑀦𑀸𑀪𑀺𑀢𑁄 𑀉𑀤𑁆𑀥𑀁 𑀉𑀧𑀭𑀺𑀫𑀤𑀺𑀲𑀸, 𑀅𑀥𑁄 𑀳𑁂𑀝𑁆𑀞𑀺𑀫𑀸. 𑀧𑀭𑀺𑀘𑁆𑀙𑁂𑀤𑁄 𑀦𑀸𑀫 ‘‘𑀅𑀬𑀁 𑀓𑁄𑀝𑁆𑀞𑀸𑀲𑁄 𑀳𑁂𑀝𑁆𑀞𑀸 𑀘 𑀉𑀧𑀭𑀺 𑀘 𑀢𑀺𑀭𑀺𑀬𑀜𑁆𑀘 𑀇𑀫𑀺𑀦𑀸 𑀦𑀸𑀫 𑀧𑀭𑀺𑀘𑁆𑀙𑀺𑀦𑁆𑀦𑁄’’𑀢𑀺 𑀏𑀯𑀁 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀘𑁂𑀯 ‘‘𑀓𑁂𑀲𑀸 𑀦 𑀮𑁄𑀫𑀸, 𑀮𑁄𑀫𑀸 𑀦 𑀓𑁂𑀲𑀸’’𑀢𑀺 𑀏𑀯𑀁 𑀅𑀫𑀺𑀲𑁆𑀲𑀓𑀢𑀸𑀯𑀲𑁂𑀦 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀘. 𑀓𑁂𑀲𑀸𑀤𑀺𑀓𑁄𑀝𑁆𑀞𑀸𑀲𑁂 𑀯𑀯𑀢𑁆𑀣𑀧𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀯𑀢𑁆𑀣𑀧𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀯𑀯𑀢𑁆𑀣𑀧𑁂𑀢𑁆𑀯𑀸.

𑀏𑀯𑀁 𑀯𑀯𑀢𑁆𑀣𑀧𑁂𑀦𑁆𑀢𑁂𑀦 𑀬𑀣𑀸𑀯𑀼𑀢𑁆𑀢𑀁 𑀲𑀢𑁆𑀢𑀯𑀺𑀥𑀁 𑀉𑀕𑁆𑀕𑀳𑀓𑁄𑀲𑀮𑁆𑀮𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀅𑀝𑁆𑀞𑀸𑀭𑀲𑀯𑀺𑀥𑀁 𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑀁 𑀲𑀫𑁆𑀧𑀸𑀤𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀼𑀧𑀼𑀩𑁆𑀩𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀧𑁆𑀧𑀦𑀸𑀢𑁄 𑀢𑀬𑁄 𑀘 𑀲𑀼𑀢𑁆𑀢𑀦𑁆𑀢𑀸𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄𑀧𑀺 𑀦𑀬𑀢𑁄𑀯𑀸𑀕𑀢𑁂 𑀦𑀸𑀢𑀺𑀲𑀻𑀖𑀸𑀤𑀻𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀲𑀯𑀺𑀥𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀦𑀼𑀧𑀼𑀩𑁆𑀩𑀢𑁄𑀢𑀺 𑀲𑀚𑁆𑀛𑀸𑀬𑀓𑀭𑀡𑀢𑁄 𑀧𑀝𑁆𑀞𑀸𑀬 𑀅𑀦𑀼𑀧𑀝𑀺𑀧𑀸𑀝𑀺𑀬𑀸. 𑀦𑀸𑀢𑀺𑀲𑀻𑀖𑀁 𑀦𑀸𑀢𑀺𑀲𑀡𑀺𑀓𑀁 𑀓𑀢𑁆𑀯𑀸𑀢𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁. 𑀯𑀺𑀓𑁆𑀔𑁂𑀧𑀁 𑀧𑀝𑀺𑀩𑀸𑀳𑀬𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀩𑀳𑀺𑀤𑁆𑀥𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂 𑀘𑁂𑀢𑀲𑁄 𑀯𑀺𑀓𑁆𑀔𑁂𑀧𑀁 𑀧𑀝𑀺𑀩𑀸𑀳𑀦𑁆𑀢𑁄. 𑀧𑀡𑁆𑀡𑀢𑁆𑀢𑀺𑀁 𑀲𑀫𑀢𑀺𑀓𑁆𑀓𑀫𑁆𑀫𑀸𑀢𑀺 𑀬𑀸𑀬𑀁 ‘‘𑀓𑁂𑀲𑀸 𑀮𑁄𑀫𑀸’’𑀢𑀺 𑀧𑀡𑁆𑀡𑀢𑁆𑀢𑀺, 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸, ‘‘𑀧𑀝𑀺𑀓𑁆𑀓𑀽𑀮’’𑀦𑁆𑀢𑀺 𑀘𑀺𑀢𑁆𑀢𑀁 𑀞𑀧𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀼𑀧𑀼𑀩𑁆𑀩𑀢𑁄 𑀫𑀼𑀜𑁆𑀘𑀦𑁆𑀢𑀲𑁆𑀲𑀸𑀢𑀺 𑀬𑁄 𑀬𑁄 𑀓𑁄𑀝𑁆𑀞𑀸𑀲𑁄 𑀦 𑀉𑀧𑀝𑁆𑀞𑀸𑀢𑀺, 𑀢𑀁 𑀢𑀁 𑀅𑀦𑀼𑀓𑁆𑀓𑀫𑁂𑀦 𑀫𑀼𑀜𑁆𑀘𑀢𑁄, 𑀢𑀲𑁆𑀲 ‘‘𑀪𑀸𑀯𑀦𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄.

𑁪𑁬𑁭. 𑀏𑀯𑀁 𑀉𑀪𑀬𑀓𑁄𑀲𑀮𑁆𑀮𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀲𑀩𑁆𑀩𑀓𑁄𑀝𑁆𑀞𑀸𑀲𑁂 𑀯𑀡𑁆𑀡𑀸𑀤𑀺𑀯𑀲𑁂𑀦 𑀯𑀯𑀢𑁆𑀣𑀧𑁂𑀢𑁆𑀯𑀸 𑀯𑀡𑁆𑀡𑀸𑀤𑀺𑀯𑀲𑁂𑀦𑁂𑀯 𑀧𑀜𑁆𑀘𑀥𑀸 𑀧𑀝𑀺𑀓𑁆𑀓𑀽𑀮𑀢𑀸 𑀯𑀯𑀢𑁆𑀣𑀧𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀡𑁆𑀡𑀸’’𑀢𑀺𑀆𑀤𑀺𑀫𑀸𑀳. 𑀯𑀡𑁆𑀡…𑀧𑁂… 𑀑𑀓𑀸𑀲𑁂𑀳𑀺 𑀓𑁄𑀝𑁆𑀞𑀸𑀲𑁂 𑀧𑀝𑀺𑀓𑁆𑀓𑀽𑀮𑀸𑀢𑀺 𑀪𑀸𑀯𑀦𑀸 𑀅𑀲𑀼𑀪𑀦𑁆𑀢𑀺 𑀬𑁄𑀚𑀦𑀸. 𑀢𑀢𑁆𑀭 𑀓𑁂𑀲𑀸 𑀢𑀸𑀯 𑀧𑀓𑀢𑀺𑀯𑀡𑁆𑀡𑁂𑀦 𑀓𑀸𑀴𑀓𑀸 𑀅𑀤𑁆𑀤𑀸𑀭𑀺𑀝𑁆𑀞𑀓𑀯𑀡𑁆𑀡𑀸, 𑀲𑀡𑁆𑀞𑀸𑀦𑀢𑁄 𑀤𑀻𑀖𑀯𑀝𑁆𑀝𑀢𑀼𑀮𑀸𑀤𑀡𑁆𑀟𑀲𑀡𑁆𑀞𑀸𑀦𑀸, 𑀤𑀺𑀲𑀢𑁄 𑀉𑀧𑀭𑀺𑀫𑀤𑀺𑀲𑀸𑀬 𑀚𑀸𑀢𑀸, 𑀑𑀓𑀸𑀲𑀢𑁄 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀓𑀡𑁆𑀡𑀘𑀽𑀴𑀺𑀓𑀸𑀳𑀺, 𑀧𑀼𑀭𑀢𑁄 𑀦𑀴𑀸𑀝𑀦𑁆𑀢𑁂𑀦, 𑀧𑀘𑁆𑀙𑀢𑁄 𑀕𑀴𑀯𑀸𑀝𑀓𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸, 𑀲𑀻𑀲𑀓𑀝𑀸𑀳𑀯𑁂𑀞𑀦𑀅𑀮𑁆𑀮𑀘𑀫𑁆𑀫𑀁 𑀓𑁂𑀲𑀸𑀦𑀁 𑀑𑀓𑀸𑀲𑁄. 𑀧𑀭𑀺𑀘𑁆𑀙𑁂𑀤𑀢𑁄 𑀓𑁂𑀲𑀸 𑀲𑀻𑀲𑀯𑁂𑀞𑀦𑀘𑀫𑁆𑀫𑁂 𑀯𑀻𑀳𑀕𑁆𑀕𑀫𑀢𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀧𑀢𑀺𑀝𑁆𑀞𑀺𑀢𑁂𑀦 𑀳𑁂𑀝𑁆𑀞𑀸 𑀅𑀢𑁆𑀢𑀦𑁄 𑀫𑀽𑀮𑀢𑀮𑁂𑀦, 𑀉𑀧𑀭𑀺 𑀆𑀓𑀸𑀲𑁂𑀦, 𑀢𑀺𑀭𑀺𑀬𑀁 𑀅𑀜𑁆𑀜𑀫𑀜𑁆𑀜𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸. 𑀤𑁆𑀯𑁂 𑀓𑁂𑀲𑀸 𑀏𑀓𑀢𑁄 𑀦𑀢𑁆𑀣𑀻𑀢𑀺 𑀅𑀬𑀁 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. ‘‘𑀓𑁂𑀲𑀸 𑀦 𑀮𑁄𑀫𑀸, 𑀮𑁄𑀫𑀸 𑀦 𑀓𑁂𑀲𑀸’’𑀢𑀺 𑀏𑀯𑀁 𑀅𑀯𑀲𑁂𑀲𑀏𑀓𑀢𑀺𑀁 𑀲𑀓𑁄𑀝𑁆𑀞𑀸𑀲𑁂𑀳𑀺 𑀅𑀫𑀺𑀲𑁆𑀲𑀻𑀓𑀢𑀸 𑀓𑁂𑀲𑀸 𑀦𑀸𑀫 𑀧𑀸𑀝𑀺𑀬𑁂𑀓𑁆𑀓𑁄 𑀏𑀓𑁄 𑀓𑁄𑀝𑁆𑀞𑀸𑀲𑁄𑀢𑀺 𑀅𑀬𑀁 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀇𑀤𑀁 𑀓𑁂𑀲𑀸𑀦𑀁 𑀯𑀡𑁆𑀡𑀸𑀤𑀺𑀢𑁄 𑀦𑀺𑀘𑁆𑀙𑀬𑀦𑀁. 𑀇𑀤𑀁 𑀧𑀦 𑀦𑁂𑀲𑀁 𑀯𑀡𑁆𑀡𑀸𑀤𑀺𑀯𑀲𑁂𑀦 𑀧𑀜𑁆𑀘𑀥𑀸 𑀧𑀝𑀺𑀓𑁆𑀓𑀽𑀮𑀢𑁄 𑀦𑀺𑀘𑁆𑀙𑀬𑀦𑀁 𑁋 𑀓𑁂𑀲𑀸 𑀦𑀸𑀫𑁂𑀢𑁂 𑀯𑀡𑁆𑀡𑀢𑁄𑀧𑀺 𑀧𑀝𑀺𑀓𑁆𑀓𑀽𑀮𑀸 𑀆𑀲𑀬𑀢𑁄𑀧𑀺 𑀲𑀡𑁆𑀞𑀸𑀦𑀢𑁄𑀧𑀺 𑀕𑀦𑁆𑀥𑀢𑁄𑀧𑀺 𑀑𑀓𑀸𑀲𑀢𑁄𑀧𑀺 𑀧𑀝𑀺𑀓𑁆𑀓𑀽𑀮𑀸𑀢𑀺 𑀏𑀯𑀁 𑀲𑁂𑀲𑀓𑁄𑀝𑁆𑀞𑀸𑀲𑀸𑀦𑀫𑁆𑀧𑀺 𑀬𑀣𑀸𑀬𑁄𑀕𑀁 𑀯𑁂𑀤𑀺𑀢𑀩𑁆𑀩𑀁.

𑀉𑀤𑁆𑀥𑀼𑀫𑀸𑀢𑀸𑀤𑀺𑀯𑀢𑁆𑀣𑀽𑀲𑀽𑀢𑀺 𑀉𑀤𑁆𑀥𑀼𑀫𑀸𑀢𑀓𑀯𑀺𑀦𑀻𑀮𑀓𑀯𑀺𑀧𑀼𑀩𑁆𑀩𑀓𑀯𑀺𑀘𑁆𑀙𑀺𑀤𑁆𑀤𑀓𑀯𑀺𑀓𑁆𑀔𑀸𑀬𑀺𑀢𑀓𑀯𑀺𑀓𑁆𑀔𑀺𑀢𑁆𑀢𑀓𑀳𑀢𑀯𑀺- 𑀓𑁆𑀔𑀺𑀢𑁆𑀢𑀓𑀮𑁄𑀳𑀺𑀢𑀓𑀧𑀼𑀴𑀯𑀓𑀅𑀝𑁆𑀞𑀺𑀓𑀲𑀗𑁆𑀔𑀸𑀢𑁂𑀲𑀼 𑀤𑀲𑁂𑀲𑀼 𑀅𑀯𑀺𑀜𑁆𑀜𑀸𑀡𑀓𑀅𑀲𑀼𑀪𑀯𑀢𑁆𑀣𑀽𑀲𑀼 𑀅𑀲𑀼𑀪𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀸 𑀪𑀸𑀯𑀦𑀸 𑀯𑀸 𑀅𑀲𑀼𑀪𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑀼𑀪𑀪𑀸𑀯𑀦𑀸.

𑁪𑁬𑁮. ‘‘𑀫𑀭𑀡𑀁 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀸 ‘‘𑀚𑀻𑀯𑀺𑀢𑀁 𑀫𑁂 𑀉𑀧𑀭𑀼𑀚𑁆𑀛𑀢𑀻’’𑀢𑀺 𑀯𑀸 ‘‘𑀫𑀭𑀡𑀁 𑀫𑀭𑀡’’𑀦𑁆𑀢𑀺 𑀯𑀸 𑀬𑁄𑀦𑀺𑀲𑁄 𑀪𑀸𑀯𑀬𑀺𑀢𑁆𑀯𑀸𑀦𑀸𑀢𑀺 𑀬𑁄𑀚𑀦𑀸. 𑀚𑀻𑀯𑀺𑀢𑀦𑁆𑀢𑀺 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘. 𑀬𑁄𑀦𑀺𑀲𑁄𑀢𑀺 𑀉𑀧𑀸𑀬𑁂𑀦. 𑀏𑀯𑀁 𑀧𑀯𑀢𑁆𑀢𑀬𑀢𑁄𑀬𑁂𑀯 𑀳𑀺 𑀏𑀓𑀘𑁆𑀘𑀲𑁆𑀲 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀦𑁆𑀢𑀺, 𑀫𑀭𑀡𑀸𑀭𑀫𑁆𑀫𑀡𑀸 𑀲𑀢𑀺 𑀲𑀡𑁆𑀞𑀸𑀢𑀺, 𑀉𑀧𑀘𑀸𑀭𑀧𑁆𑀧𑀢𑁆𑀢𑀫𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀳𑁄𑀢𑀺.

𑁪𑁬𑁯-𑁪𑁭𑁦. 𑀬𑀲𑁆𑀲 𑀧𑀦 𑀏𑀢𑁆𑀢𑀸𑀯𑀢𑀸 𑀦 𑀳𑁄𑀢𑀺, 𑀢𑁂𑀦 𑀯𑀥𑀓𑀧𑀘𑁆𑀘𑀽𑀧𑀝𑁆𑀞𑀸𑀦𑀸𑀤𑀻𑀳𑀺 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀫𑀭𑀡𑀁 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀥𑀓𑀲𑁆𑀲𑁂𑀯𑀸’’𑀢𑀺𑀆𑀤𑀺𑀫𑀸𑀳. 𑀯𑀥𑀓𑀲𑁆𑀲 𑀇𑀯 𑀉𑀧𑀝𑁆𑀞𑀸𑀦𑀸𑀢𑀺 ‘‘𑀇𑀫𑀲𑁆𑀲 𑀲𑀻𑀲𑀁 𑀙𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀅𑀲𑀺𑀁 𑀕𑀳𑁂𑀢𑁆𑀯𑀸 𑀕𑀻𑀯𑀸𑀬 𑀲𑀜𑁆𑀘𑀸𑀭𑀬𑀫𑀸𑀦𑀲𑁆𑀲 𑀯𑀥𑀓𑀲𑁆𑀲 𑀯𑀺𑀬 𑀫𑀭𑀡𑀲𑁆𑀲 𑀉𑀧𑀝𑁆𑀞𑀸𑀦𑀢𑁄. 𑀲𑀫𑁆𑀧𑀢𑁆𑀢𑀻𑀦𑀁 𑀯𑀺𑀧𑀢𑁆𑀢𑀺𑀢𑁄𑀢𑀺 𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀚𑀻𑀯𑀺𑀢𑀲𑀫𑁆𑀧𑀢𑁆𑀢𑀺𑀬𑀸 𑀘 𑀯𑀺𑀦𑀸𑀲𑀫𑀭𑀡𑀲𑀗𑁆𑀔𑀸𑀢𑀯𑀺𑀧𑀢𑁆𑀢𑀺𑀢𑁄. 𑀉𑀧𑀲𑀁𑀳𑀭𑀢𑁄𑀢𑀺 𑀬𑀲𑀫𑀳𑀢𑁆𑀢𑀢𑁄 𑀧𑀼𑀜𑁆𑀜𑀫𑀳𑀢𑁆𑀢𑀢𑁄 𑀣𑀸𑀫𑀫𑀳𑀢𑁆𑀢𑀢𑁄 𑀇𑀤𑁆𑀥𑀺𑀫𑀳𑀢𑁆𑀢𑀢𑁄 𑀧𑀜𑁆𑀜𑀸𑀫𑀳𑀢𑁆𑀢𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁄𑀢𑀺 𑀇𑀫𑁂𑀳𑀺 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀅𑀢𑁆𑀢𑀦𑁄 𑀉𑀧𑀲𑀁𑀳𑀭𑀡𑀢𑁄. 𑀓𑀸𑀬𑀩𑀳𑀼𑀲𑀸𑀥𑀸𑀭𑀡𑀸𑀢𑀺 𑀅𑀲𑀻𑀢𑀺𑀬𑀸 𑀓𑀺𑀫𑀺𑀓𑀼𑀮𑀸𑀦𑀁, 𑀅𑀦𑁂𑀓𑀲𑀢𑀸𑀦𑀁 𑀭𑁄𑀕𑀸𑀦𑀁, 𑀩𑀸𑀳𑀺𑀭𑀸𑀦𑀜𑁆𑀘 𑀅𑀳𑀺𑀯𑀺𑀘𑁆𑀙𑀺𑀓𑀸𑀤𑀻𑀦𑀁 𑀫𑀭𑀡𑀲𑁆𑀲 𑀧𑀘𑁆𑀘𑀬𑀸𑀦𑀁 𑀲𑀸𑀥𑀸𑀭𑀡𑀢𑁄. 𑀆𑀬𑀼𑀤𑀼𑀩𑁆𑀩𑀮𑀢𑁄𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀽𑀧𑀦𑀺𑀩𑀤𑁆𑀥𑀢𑁆𑀢𑀇𑀭𑀺𑀬𑀸𑀧𑀣𑀽𑀧𑀦𑀺𑀩𑀤𑁆𑀥𑀢𑁆𑀢𑀸𑀤𑀺𑀦𑀸 𑀆𑀬𑀼𑀦𑁄 𑀤𑀼𑀩𑁆𑀩𑀮𑀢𑁄. 𑀓𑀸𑀮𑀯𑀯𑀢𑁆𑀣𑀸𑀦𑀲𑁆𑀲 𑀅𑀪𑀸𑀯𑀢𑁄𑀢𑀺 ‘‘𑀇𑀫𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀫𑀭𑀺𑀢𑀩𑁆𑀩𑀁, 𑀦 𑀅𑀜𑁆𑀜𑀲𑁆𑀫𑀺’’𑀦𑁆𑀢𑀺 𑀏𑀯𑀁 𑀓𑀸𑀮𑀯𑀯𑀢𑁆𑀣𑀸𑀦𑀲𑁆𑀲 𑀅𑀪𑀸𑀯𑀢𑁄. 𑀅𑀤𑁆𑀥𑀸𑀦𑀲𑁆𑀲 𑀧𑀭𑀺𑀘𑁆𑀙𑁂𑀤𑀸𑀢𑀺 ‘‘𑀫𑀦𑀼𑀲𑁆𑀲𑀸𑀦𑀁 𑀚𑀻𑀯𑀺𑀢𑀲𑁆𑀲 𑀧𑀭𑀺𑀘𑁆𑀙𑁂𑀤𑁄 𑀦𑀸𑀫 𑀏𑀢𑀭𑀳𑀺 𑀧𑀭𑀺𑀢𑁆𑀢𑁄, 𑀅𑀤𑁆𑀥𑀸 𑀬𑁄 𑀘𑀺𑀭𑀁 𑀚𑀻𑀯𑀢𑀺, 𑀲𑁄 𑀯𑀲𑁆𑀲𑀲𑀢𑀁 𑀚𑀻𑀯𑀢𑀻’’𑀢𑀺 𑀏𑀯𑀁 𑀅𑀤𑁆𑀥𑀸𑀦𑀲𑁆𑀲 𑀓𑀸𑀮𑀲𑁆𑀲 𑀧𑀭𑀺𑀘𑁆𑀙𑁂𑀤𑀢𑁄.

𑀏𑀢𑁆𑀣 𑀧𑀦 𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀓𑀸𑀫𑁂𑀦 𑀩𑀼𑀤𑁆𑀥𑀧𑀼𑀢𑁆𑀢𑁂𑀦 𑀬𑀁 𑀓𑀸𑀢𑀩𑁆𑀩𑀁, 𑀢𑀁 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀯𑀲𑁂𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀗𑁆𑀔𑁂𑀧𑁂𑀦𑁄𑀧𑀤𑀺𑀲𑁆𑀲𑀸𑀫. 𑀘𑀢𑀼𑀩𑁆𑀩𑀺𑀥𑀁 𑀢𑀸𑀯 𑀲𑀻𑀮𑀁 𑀲𑁄𑀥𑁂𑀢𑀩𑁆𑀩𑀁. 𑀢𑀢𑁆𑀣 𑀢𑀺𑀯𑀺𑀥𑀸 𑀯𑀺𑀲𑀼𑀚𑁆𑀛𑀦𑀸 𑀅𑀦𑀸𑀧𑀚𑁆𑀚𑀦𑀁, 𑀆𑀧𑀦𑁆𑀦𑀯𑀼𑀝𑁆𑀞𑀸𑀦𑀁, 𑀓𑀺𑀮𑁂𑀲𑁂𑀳𑀺 𑀘 𑀅𑀧𑁆𑀧𑀝𑀺𑀧𑀻𑀴𑀦𑀁. 𑀏𑀯𑀁 𑀯𑀺𑀲𑀼𑀤𑁆𑀥𑀲𑀻𑀮𑀲𑁆𑀲 𑀳𑀺 𑀪𑀸𑀯𑀦𑀸 𑀲𑀫𑁆𑀧𑀚𑁆𑀚𑀢𑀺. 𑀬𑀫𑁆𑀧𑀺𑀤𑀁 𑀘𑁂𑀢𑀺𑀬𑀗𑁆𑀕𑀡𑀯𑀢𑁆𑀢𑀸𑀤𑀻𑀦𑀁 𑀯𑀲𑁂𑀦 𑀆𑀪𑀺𑀲𑀫𑀸𑀘𑀸𑀭𑀺𑀓𑀲𑀻𑀮𑀁 𑀯𑀼𑀘𑁆𑀘𑀢𑀺, 𑀢𑀫𑁆𑀧𑀺 𑀲𑀸𑀥𑀼𑀓𑀁 𑀧𑀭𑀺𑀧𑀽𑀭𑁂𑀢𑀩𑁆𑀩𑀁. 𑀢𑀢𑁄 𑁋

‘‘𑀆𑀯𑀸𑀲𑁄 𑀘 𑀓𑀼𑀮𑀁 𑀮𑀸𑀪𑁄, 𑀕𑀡𑁄 𑀓𑀫𑁆𑀫𑀜𑁆𑀘 𑀧𑀜𑁆𑀘𑀫𑀁;

𑀅𑀤𑁆𑀥𑀸𑀦𑀁 𑀜𑀸𑀢𑀺 𑀆𑀩𑀸𑀥𑁄, 𑀕𑀦𑁆𑀣𑁄 𑀇𑀤𑁆𑀥𑀻𑀢𑀺 𑀢𑁂 𑀤𑀲𑀸’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁪𑁧) 𑁋

𑀏𑀯𑀁 𑀯𑀼𑀢𑁆𑀢𑁂𑀲𑀼 𑀤𑀲𑀲𑀼 𑀧𑀮𑀺𑀩𑁄𑀥𑁂𑀲𑀼 𑀬𑁄 𑀧𑀮𑀺𑀩𑁄𑀥𑁄, 𑀬𑁄 𑀉𑀧𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄. 𑀏𑀯𑀁 𑀉𑀧𑀘𑁆𑀙𑀺𑀦𑁆𑀦𑀧𑀮𑀺𑀩𑁄𑀥𑁂𑀦 𑁋

‘‘𑀧𑀺𑀬𑁄 𑀕𑀭𑀼 𑀪𑀸𑀯𑀦𑀻𑀬𑁄, 𑀯𑀢𑁆𑀢𑀸 𑀘 𑀯𑀘𑀦𑀓𑁆𑀔𑀫𑁄;

𑀕𑀫𑁆𑀪𑀻𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸, 𑀦𑁄 𑀘𑀸𑀝𑁆𑀞𑀸𑀦𑁂 𑀦𑀺𑀬𑁄𑀚𑀓𑁄’’𑀢𑀺. (𑀅. 𑀦𑀺. 𑁭.𑁩𑁭) 𑁋

𑀏𑀯𑀁 𑀯𑀼𑀢𑁆𑀢𑀮𑀓𑁆𑀔𑀡𑀁 𑀆𑀘𑀭𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀳𑁂𑀢𑀩𑁆𑀩𑀁. 𑀢𑀁 𑀤𑀼𑀯𑀺𑀥𑀁 𑀳𑁄𑀢𑀺 𑀲𑀩𑁆𑀩𑀢𑁆𑀣𑀓𑀓𑀫𑁆𑀫𑀝𑁆𑀞𑀸𑀦𑀜𑁆𑀘 𑀧𑀸𑀭𑀺𑀳𑀸𑀭𑀺𑀬𑀓𑀫𑁆𑀫𑀝𑁆𑀞𑀸𑀦𑀜𑁆𑀘. 𑀢𑀢𑁆𑀣 𑀲𑀩𑁆𑀩𑀢𑁆𑀣𑀓𑀓𑀫𑁆𑀫𑀝𑁆𑀞𑀸𑀦𑀁 𑀦𑀸𑀫 𑀪𑀺𑀓𑁆𑀔𑀼𑀲𑀗𑁆𑀖𑀸𑀤𑀻𑀲𑀼 𑀫𑁂𑀢𑁆𑀢𑀸, 𑀫𑀭𑀡𑀲𑁆𑀲𑀢𑀺 𑀘, ‘‘𑀅𑀲𑀼𑀪𑀲𑀜𑁆𑀜𑀸’’𑀢𑀺𑀧𑀺 𑀏𑀓𑁂. 𑀏𑀢𑀁 𑀧𑀦 𑀢𑀬𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑀬𑀺𑀢𑀩𑁆𑀩𑀁 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀓𑀢𑁆𑀯𑀸, 𑀅𑀥𑀺𑀧𑁆𑀧𑁂𑀢𑀲𑁆𑀲 𑀘 𑀬𑁄𑀕𑀸𑀦𑀼𑀬𑁄𑀕𑀓𑀫𑁆𑀫𑀲𑁆𑀲 𑀧𑀤𑀝𑁆𑀞𑀸𑀦𑀢𑁆𑀢𑀸 ‘‘𑀲𑀩𑁆𑀩𑀢𑁆𑀣𑀓𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑁂𑀲𑀼 𑀧𑀦 𑀬𑀁 𑀬𑀲𑁆𑀲 𑀘𑀭𑀺𑀢𑀸𑀦𑀼𑀓𑀽𑀮𑀁, 𑀢𑀁 𑀢𑀲𑁆𑀲 𑀦𑀺𑀘𑁆𑀘𑀁 𑀧𑀭𑀺𑀳𑀭𑀺𑀢𑀩𑁆𑀩𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀦𑀬𑁂𑀦 ‘‘𑀧𑀸𑀭𑀺𑀳𑀸𑀭𑀺𑀬𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀢𑁄 𑁋

‘‘𑀫𑀳𑀸𑀯𑀸𑀲𑀁 𑀦𑀯𑀸𑀯𑀸𑀲𑀁, 𑀚𑀭𑀸𑀯𑀸𑀲𑀜𑁆𑀘 𑀧𑀦𑁆𑀣𑀦𑀺𑀁;

𑀲𑁄𑀡𑁆𑀟𑀺𑀁 𑀧𑀡𑁆𑀡𑀜𑁆𑀘 𑀧𑀼𑀧𑁆𑀨𑀜𑁆𑀘, 𑀨𑀮𑀁 𑀧𑀢𑁆𑀣𑀺𑀢𑀫𑁂𑀯 𑀘.

‘‘𑀦𑀕𑀭𑀁 𑀤𑀸𑀭𑀼𑀦𑀸 𑀔𑁂𑀢𑁆𑀢𑀁, 𑀯𑀺𑀲𑀪𑀸𑀕𑁂𑀦 𑀧𑀝𑁆𑀝𑀦𑀁;

𑀧𑀘𑁆𑀘𑀦𑁆𑀢𑀲𑀻𑀫𑀸𑀲𑀧𑁆𑀧𑀸𑀬𑀁, 𑀬𑀢𑁆𑀣 𑀫𑀺𑀢𑁆𑀢𑁄 𑀦 𑀮𑀩𑁆𑀪𑀢𑀺.

‘‘𑀅𑀝𑁆𑀞𑀸𑀭𑀲𑁂𑀢𑀸𑀦𑀺 𑀞𑀸𑀦𑀸𑀦𑀺, 𑀇𑀢𑀺 𑀯𑀺𑀜𑁆𑀜𑀸𑀬 𑀧𑀡𑁆𑀟𑀺𑀢𑁄;

𑀆𑀭𑀓𑀸 𑀧𑀭𑀺𑀯𑀚𑁆𑀚𑁂𑀬𑁆𑀬, 𑀫𑀕𑁆𑀕𑀁 𑀲𑀧𑁆𑀧𑀝𑀺𑀪𑀬𑀁 𑀬𑀣𑀸’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁫𑁨) 𑁋

𑀯𑀼𑀢𑁆𑀢𑀅𑀝𑁆𑀞𑀸𑀭𑀲𑀲𑁂𑀦𑀸𑀲𑀦𑀤𑁄𑀲𑀯𑀚𑁆𑀚𑀺𑀢𑀁 ‘‘𑀇𑀥, 𑀪𑀺𑀓𑁆𑀔𑀯𑁂, 𑀲𑁂𑀦𑀸𑀲𑀦𑀁 𑀦𑀸𑀢𑀺𑀤𑀽𑀭𑀁 𑀳𑁄𑀢𑀺 𑀦𑀘𑁆𑀘𑀸𑀲𑀦𑁆𑀦𑀁 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀁 𑀤𑀺𑀯𑀸 𑀅𑀧𑁆𑀧𑀸𑀓𑀺𑀡𑁆𑀡𑀁 𑀭𑀢𑁆𑀢𑀺𑀁 𑀅𑀧𑁆𑀧𑀲𑀤𑁆𑀤𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀁 𑀅𑀧𑁆𑀧𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀁. 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀯𑀺𑀳𑀭𑀦𑁆𑀢𑀲𑁆𑀲 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸. 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀣𑁂𑀭𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸 𑀆𑀕𑀢𑀸𑀕𑀫𑀸 𑀥𑀫𑁆𑀫𑀯𑀺𑀦𑀬𑀥𑀭𑀸 𑀫𑀸𑀢𑀺𑀓𑀸𑀥𑀭𑀸. 𑀢𑁂 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀭𑀺𑀧𑀼𑀘𑁆𑀙𑀢𑀺 𑀧𑀭𑀺𑀧𑀜𑁆𑀳𑀢𑀺 ‘𑀇𑀤𑀁 𑀪𑀦𑁆𑀢𑁂 𑀓𑀣𑀁, 𑀇𑀫𑀲𑁆𑀲 𑀓𑁄 𑀅𑀢𑁆𑀣𑁄’𑀢𑀺. 𑀢𑀲𑁆𑀲 𑀢𑁂 𑀆𑀬𑀲𑁆𑀫𑀦𑁆𑀢𑁄 𑀅𑀯𑀺𑀯𑀝𑀜𑁆𑀘𑁂𑀯 𑀯𑀺𑀯𑀭𑀦𑁆𑀢𑀺, 𑀅𑀦𑀼𑀢𑁆𑀢𑀸𑀦𑀻𑀓𑀢𑀜𑁆𑀘 𑀉𑀢𑁆𑀢𑀸𑀦𑀺𑀁 𑀓𑀭𑁄𑀦𑁆𑀢𑀺, 𑀅𑀦𑁂𑀓𑀯𑀺𑀳𑀺𑀢𑁂𑀲𑀼 𑀘 𑀓𑀗𑁆𑀔𑀸𑀞𑀸𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼 𑀓𑀗𑁆𑀔𑀁 𑀧𑀝𑀺𑀯𑀺𑀦𑁄𑀤𑁂𑀦𑁆𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑁂𑀦𑀸𑀲𑀦𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀳𑁄𑀢𑀻’’𑀢𑀺 (𑀅. 𑀦𑀺. 𑁧𑁦.𑁧𑁧) 𑀯𑀼𑀢𑁆𑀢𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀲𑁂𑀦𑀸𑀲𑀦𑀁 𑀉𑀧𑀕𑀫𑁆𑀫 𑀢𑀢𑁆𑀣 𑀯𑀲𑀦𑁆𑀢𑁂𑀦 ‘‘𑀤𑀻𑀖𑀸𑀦𑀺 𑀓𑁂𑀲𑀮𑁄𑀫𑀦𑀔𑀸𑀦𑀺 𑀙𑀺𑀦𑁆𑀤𑀺𑀢𑀩𑁆𑀩𑀸𑀦𑀺, 𑀚𑀺𑀡𑁆𑀡𑀘𑀻𑀯𑀭𑁂𑀲𑀼 𑀅𑀕𑁆𑀕𑀴𑀅𑀦𑀼𑀯𑀸𑀢𑀧𑀭𑀺𑀪𑀡𑁆𑀟𑀤𑀸𑀦𑀸𑀤𑀺𑀦𑀸 𑀤𑀴𑁆𑀳𑀻𑀓𑀫𑁆𑀫𑀁 𑀯𑀸 𑀢𑀦𑁆𑀢𑀘𑁆𑀙𑁂𑀤𑀸𑀤𑀻𑀲𑀼 𑀢𑀼𑀦𑁆𑀦𑀓𑀫𑁆𑀫𑀁 𑀯𑀸 𑀓𑀸𑀢𑀩𑁆𑀩𑀁, 𑀓𑀺𑀮𑀺𑀝𑁆𑀞𑀸𑀦𑀺 𑀭𑀚𑀺𑀢𑀩𑁆𑀩𑀸𑀦𑀺, 𑀲𑀘𑁂 𑀧𑀢𑁆𑀢𑁂 𑀫𑀮𑀁 𑀳𑁄𑀢𑀺, 𑀧𑀢𑁆𑀢𑁄 𑀧𑀘𑀺𑀢𑀩𑁆𑀩𑁄, 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀲𑁄𑀥𑁂𑀢𑀩𑁆𑀩𑀸𑀦𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀉𑀧𑀘𑁆𑀙𑀺𑀦𑁆𑀦𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑁂𑀦 𑀓𑀢𑀪𑀢𑁆𑀢𑀓𑀺𑀘𑁆𑀘𑁂𑀦 𑀪𑀢𑁆𑀢𑀲𑀫𑁆𑀫𑀤𑀁 𑀯𑀺𑀦𑁄𑀤𑁂𑀢𑁆𑀯𑀸 𑀭𑀢𑀦𑀢𑁆𑀢𑀬𑀕𑀼𑀡𑀸𑀦𑀼𑀲𑁆𑀲𑀭𑀡𑁂𑀦 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀆𑀘𑀭𑀺𑀬𑀼𑀕𑁆𑀕𑀳𑀢𑁄 𑀏𑀓𑀧𑀤𑀫𑁆𑀧𑀺 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁂𑀦 𑀫𑀦𑀲𑀺 𑀓𑀸𑀢𑀩𑁆𑀩𑀦𑁆𑀢𑀺.

𑀘𑀢𑀼𑀭𑀸𑀭𑀓𑁆𑀔𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫𑁦. 𑀯𑀺𑀧𑀲𑁆𑀲𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁪𑁭𑁧-𑁨. 𑀦𑀸𑀫𑀭𑀽𑀧𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀲𑀗𑁆𑀔𑀸𑀢𑀁 𑀦𑀸𑀫𑀜𑁆𑀘 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑀁 𑀭𑀽𑀧𑀜𑁆𑀘. ‘‘𑀦𑀫𑀦𑀮𑀓𑁆𑀔𑀡𑀁 𑀦𑀸𑀫𑀁, 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀭𑀽𑀧𑀁, 𑀦𑀸𑀫𑀭𑀽𑀧𑀢𑁄 𑀦 𑀅𑀜𑁆𑀜𑁄 𑀅𑀢𑁆𑀢𑀸𑀤𑀺𑀓𑁄 𑀓𑁄𑀘𑀺 𑀅𑀢𑁆𑀣𑀻’’𑀢𑀺 𑀏𑀯𑀁 𑀛𑀸𑀦𑀮𑀸𑀪𑀻 𑀘𑁂, 𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀛𑀸𑀦𑀕𑀢𑀁 𑀯𑀸 𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑁄 𑀘𑁂, 𑀧𑀓𑀺𑀡𑁆𑀡𑀓𑀪𑀽𑀢𑀁 𑀦𑀸𑀫𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀤𑀺 𑀲𑀻𑀮𑀯𑀺𑀲𑀼𑀤𑁆𑀥𑀺, 𑀘𑀢𑀼𑀭𑀸𑀭𑀓𑁆𑀔𑀯𑀲𑁂𑀦 𑀤𑀻𑀧𑀺𑀢𑀸 𑀲𑁄𑀧𑀘𑀸𑀭𑀲𑀫𑀸𑀥𑀺𑀲𑀗𑁆𑀔𑀸𑀢𑀸 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀘 𑀯𑀼𑀢𑁆𑀢𑀸𑀯 𑀦𑀸𑀫𑀸𑀢𑀺 𑀇𑀫𑀺𑀦𑀸 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀓𑀣𑀺𑀢𑀸. 𑀢𑀢𑁄 𑀢𑀲𑁆𑀲 𑀧𑀘𑁆𑀘𑀬𑀜𑁆𑀘 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲 𑀧𑀘𑁆𑀘𑀬𑀦𑁆𑀢𑀺 ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀦𑀸𑀫𑀭𑀽𑀧𑀤𑁆𑀯𑀬𑀫𑁂𑀯 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀉𑀧𑀸𑀤𑀸𑀦𑀓𑀫𑁆𑀫𑁂𑀳𑀺 𑀉𑀧𑁆𑀧𑀚𑁆𑀚𑀢𑀺, 𑀦 𑀇𑀲𑁆𑀲𑀭𑀸𑀤𑀺𑀓𑀸𑀭𑀡𑁂𑀦𑀸’’𑀢𑀺𑀆𑀤𑀺𑀦𑀸 𑀢𑀲𑁆𑀲 𑀓𑀸𑀭𑀡𑀁, 𑀇𑀫𑀺𑀦𑀸 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺 𑀤𑀲𑁆𑀲𑀺𑀢𑀸.

𑀳𑀼𑀢𑁆𑀯𑀸 𑀅𑀪𑀸𑀯𑀢𑁄 𑀅𑀦𑀺𑀘𑁆𑀘𑀸𑀢𑀺 𑀲𑀩𑁆𑀩𑁂𑀧𑀺 𑀦𑀸𑀫𑀭𑀽𑀧𑀲𑀗𑁆𑀔𑀸𑀭𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀅𑀪𑀸𑀯𑀸𑀧𑀚𑁆𑀚𑀦𑀢𑁄 𑀅𑀦𑀺𑀘𑁆𑀘𑀸. 𑀉𑀤𑀬𑀩𑁆𑀩𑀬𑀧𑀻𑀴𑀦𑀸 𑀤𑀼𑀓𑁆𑀔𑀸𑀢𑀺 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀲𑁂𑀦 𑀧𑀻𑀴𑀦𑀢𑁄 𑀤𑀼𑀓𑁆𑀔𑀸. 𑀅𑀯𑀲𑀯𑀢𑁆𑀢𑀺𑀢𑁆𑀢𑀸 𑀅𑀦𑀢𑁆𑀢𑀸𑀢𑀺 𑀅𑀢𑁆𑀢𑀦𑁄 𑀯𑀲𑁂 𑀅𑀯𑀢𑁆𑀢𑀦𑀢𑁄 𑀅𑀦𑀢𑁆𑀢𑀸𑀢𑀺 𑀏𑀯𑀁 𑀲𑀗𑁆𑀔𑀸𑀭𑁂𑀳𑀺 𑀲𑀤𑁆𑀥𑀺𑀁 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸. 𑀧𑀼𑀦𑀧𑁆𑀧𑀼𑀦𑀁 𑀲𑀫𑁆𑀫𑀲𑀦𑁆𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀲𑀫𑁆𑀫𑀲𑀦𑁆𑀢𑁄 𑀲𑀫𑀣𑀬𑀸𑀦𑀺𑀓𑁄 𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑁄 𑀘 𑀬𑁄𑀕𑀸𑀯𑀘𑀭𑁄. 𑀇𑀫𑀺𑀦𑀸 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺, 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀘 𑀤𑀲𑁆𑀲𑀺𑀢𑀸. 𑀲𑀗𑁆𑀔𑀸𑀭𑀸𑀦𑀫𑁂𑀯 𑀳𑀺 𑀉𑀤𑀬𑀩𑁆𑀩𑀬𑀸𑀤𑀺𑀦𑀸𑀦𑀼𑀧𑀲𑁆𑀲𑀦𑀢𑁄 𑀉𑀤𑀬𑀩𑁆𑀩𑀬𑀪𑀗𑁆𑀕𑀪𑀬𑀆𑀤𑀻𑀦𑀯𑀦𑀺𑀩𑁆𑀩𑀺𑀤𑀸𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀲- 𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀲𑀗𑁆𑀔𑀸𑀢𑀲𑁆𑀲 𑀅𑀝𑁆𑀞𑀯𑀺𑀥𑀲𑁆𑀲 𑀜𑀸𑀡𑀲𑁆𑀲 𑀯𑀲𑁂𑀦 𑀲𑀺𑀔𑀸𑀧𑁆𑀧𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀦𑀸𑀫. 𑀅𑀦𑀼𑀧𑀼𑀩𑁆𑀩𑁂𑀦 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑀁 𑀧𑀸𑀧𑀼𑀡𑁂𑀬𑁆𑀬𑀸𑀢𑀺 𑀇𑀫𑀺𑀦𑀸 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀤𑀲𑁆𑀲𑀺𑀢𑀸. 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑀦𑁆𑀢𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀧𑀜𑁆𑀘𑀦𑁆𑀦𑀁 𑀲𑀁𑀬𑁄𑀚𑀦𑀸𑀦𑀁 𑀳𑁂𑀝𑁆𑀞𑀸 𑀫𑀕𑁆𑀕𑀢𑁆𑀢𑀬𑁂𑀦 𑀔𑁂𑀧𑀺𑀢𑀢𑁆𑀢𑀸, 𑀇𑀢𑀭𑁂𑀲𑀁 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀔𑁂𑀧𑀺𑀢𑀢𑁆𑀢𑀸 𑀘 𑀲𑀩𑁆𑀩𑁂𑀲𑀁 𑀲𑀁𑀬𑁄𑀚𑀦𑀸𑀦𑀁 𑀔𑀬𑀦𑁆𑀢𑁂 𑀚𑀸𑀢𑀁 𑀅𑀭𑀳𑀢𑁆𑀢𑀫𑀕𑁆𑀕𑀁.

𑀦𑀺𑀕𑀫𑀦𑀓𑀣𑀸𑀯𑀡𑁆𑀡𑀦𑀸

𑁪𑁭𑁩. 𑀬𑀲𑁆𑀫𑀸 𑀓𑀸𑀭𑀡𑀸 𑀬𑀸 𑀲𑀺𑀓𑁆𑀔𑀦𑀸, 𑀅𑀬𑀁 𑀪𑀺𑀓𑁆𑀔𑀼𑀓𑀺𑀘𑁆𑀘𑀁, 𑀅𑀢𑁄 𑀢𑀲𑁆𑀫𑀸 𑀓𑀸𑀭𑀡𑀸𑀢𑀺 𑀅𑀢𑁆𑀣𑁄.

𑁪𑁭𑁪. 𑀦𑀺𑀘𑁆𑀘𑀲𑁄 𑀮𑁄𑀓𑀯𑀺𑀘𑀸𑀭𑀺𑀦𑁄𑀢𑀺 𑀦𑀺𑀘𑁆𑀘𑀁 𑀮𑁄𑀓𑁂 𑀯𑀺𑀘𑀭𑀢𑁄. 𑀫𑀸𑀮𑀼𑀢𑀲𑁆𑀲𑁂𑀯 𑀧𑀭𑀺𑀲𑁆𑀲𑀫𑁄 𑀦 𑀲𑀫𑁆𑀪𑁄𑀢𑀻𑀢𑀺 𑀬𑁄𑀚𑀦𑀸. 𑀫𑀸𑀮𑀼𑀢𑀲𑁆𑀲𑁂𑀯𑀸𑀢𑀺 𑀯𑀸𑀢𑀲𑁆𑀲 𑀇𑀯. 𑀦 𑀲𑀫𑁆𑀪𑁄𑀢𑀻𑀢𑀺 𑀦 𑀳𑁄𑀢𑀺.

𑁪𑁭𑁫-𑁬. 𑀢𑀫𑁆𑀩𑀧𑀡𑁆𑀡𑀺 𑀏𑀯 𑀢𑀫𑁆𑀩𑀧𑀡𑁆𑀡𑀺𑀬𑁄, 𑀓𑁂𑀢𑀼 𑀯𑀺𑀬 𑀓𑁂𑀢𑀼, 𑀢𑀫𑁆𑀩𑀧𑀡𑁆𑀡𑀺𑀬𑁂 𑀓𑁂𑀢𑀽𑀢𑀺 𑀢𑀧𑁆𑀧𑀼𑀭𑀺𑀲𑁄. 𑀢𑁂𑀦 𑀭𑀘𑀺𑀢𑀸 𑀥𑀫𑁆𑀫𑀯𑀺𑀦𑀬𑀜𑁆𑀜𑀼𑀧𑀲𑀁𑀲𑀺𑀢𑀸 𑀅𑀬𑀁 𑀔𑀼𑀤𑁆𑀤𑀲𑀺𑀓𑁆𑀔𑀸 𑀧𑀭𑀺𑀫𑀸𑀡𑀢𑁄 𑀕𑀸𑀣𑀸𑀦𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀲𑀢𑁂𑀳𑀺 𑀏𑀢𑁆𑀢𑀸𑀯𑀢𑀸 𑀦𑀺𑀝𑁆𑀞𑀸𑀦𑀫𑀼𑀧𑀸𑀕𑀢𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀦𑀺𑀕𑀫𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀓𑀣𑀸

𑀓𑀸𑀭𑀸𑀧𑀺𑀢𑁂𑀢𑀺𑀭𑀼𑀘𑀺𑀭𑁂 𑀧𑀯𑀭𑁂 𑀯𑀺𑀳𑀸𑀭𑁂;

𑀫𑀸𑀦𑀸𑀥𑀺𑀓𑀸𑀭𑀺𑀧𑀼𑀭𑀺𑀦𑀸 𑀕𑀭𑀼𑀦𑀸 𑀕𑀼𑀡𑁂𑀦;

𑀯𑀲𑁆𑀲𑀁 𑀯𑀲𑀁 𑀤𑀫𑀺𑀴𑀲𑁄 𑀯𑀺𑀥𑀳𑀁 𑀅𑀓𑀸𑀲𑀺𑀁;

𑀆𑀓𑀗𑁆𑀔𑀝𑀻𑀓 𑀚𑀺𑀦𑀲𑀸𑀲𑀦𑀲𑀫𑁆𑀧𑀯𑀼𑀤𑁆𑀥𑀺𑀁.

𑀧𑀼𑀜𑁆𑀜𑁂𑀦 𑀲𑀢𑁆𑀣𑀭𑀘𑀦𑀸𑀚𑀦𑀺𑀢𑁂𑀦 𑀢𑁂𑀦;

𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑀯𑀭𑁄𑀤𑀬𑀓𑀸𑀭𑀡𑁂𑀦;

𑀮𑁄𑀓𑀸𑀫𑀺𑀲𑁂𑀲𑀼 𑀧𑀦 𑀫𑁂 𑀲𑀫𑀬𑀁 𑀅𑀮𑀕𑁆𑀕𑁄;

𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑀯𑀭𑁄𑀤𑀬𑀫𑀸𑀘𑀭𑁂𑀬𑁆𑀬𑀁.

𑀅𑀢𑁆𑀣𑁂𑀲𑀼 𑀅𑀓𑁆𑀔𑀭𑀧𑀤𑁂𑀲𑀼 𑀯𑀺𑀦𑀺𑀘𑁆𑀙𑀬𑁂𑀲𑀼;

𑀧𑀼𑀩𑁆𑀩𑀸𑀧𑀭𑁂𑀲𑀼 𑀮𑀺𑀔𑀺𑀢𑀁 𑀔𑀮𑀺𑀢𑀁 𑀬𑀤𑀢𑁆𑀣𑀺;

𑀑𑀳𑀸𑀬 𑀔𑀦𑁆𑀢𑀼𑀫𑀭𑀳𑀦𑁆𑀢𑀺 𑀯𑀤𑀦𑁆𑀢𑀼 𑀲𑀦𑁆𑀢𑀸;

𑀤𑀺𑀝𑁆𑀞𑀸𑀧𑀭𑀸𑀥𑀫𑀣 𑀯𑀸 𑀓𑀺𑀫𑀼𑀮𑀸𑀮𑀦𑁂𑀦.

𑀬𑁂𑀦𑀦𑁆𑀢𑀢𑀦𑁆𑀢𑀭𑀢𑀦𑀸𑀓𑀭𑀫𑀦𑁆𑀣𑀦𑁂𑀦;

𑀫𑀦𑁆𑀣𑀸𑀘𑀮𑁄𑀮𑁆𑀮𑀲𑀺𑀢𑀜𑀸𑀡𑀯𑀭𑁂𑀦 𑀮𑀤𑁆𑀥𑀸;

𑀲𑀸𑀭𑀸𑀫𑀢𑀸𑀢𑀺𑀲𑀼𑀔𑀺𑀢𑀸 𑀲𑀼𑀔𑀬𑀦𑁆𑀢𑀺 𑀘𑀜𑁆𑀜𑁂;

𑀢𑁂 𑀫𑁂 𑀚𑀬𑀦𑁆𑀢𑀺 𑀕𑀭𑀯𑁄 𑀕𑀭𑀯𑁄 𑀕𑀼𑀡𑁂𑀳𑀺.

𑀧𑀭𑀢𑁆𑀣𑀲𑀫𑁆𑀧𑀸𑀤𑀦𑀢𑁄, 𑀧𑀼𑀜𑁆𑀜𑁂𑀦𑀸𑀥𑀺𑀕𑀢𑁂𑀦𑀳𑀁;

𑀧𑀭𑀢𑁆𑀣𑀲𑀫𑁆𑀧𑀸𑀤𑀦𑀓𑁄, 𑀪𑀯𑁂𑀬𑁆𑀬𑀁 𑀚𑀸𑀢𑀺𑀚𑀸𑀢𑀺𑀬𑀁.

𑀲𑀺𑀲𑁆𑀲𑁄 𑀆𑀳 𑁋

𑀧𑀭𑀫𑀧𑁆𑀧𑀺𑀘𑁆𑀙𑀢𑀸𑀦𑁂𑀓𑀲𑀦𑁆𑀢𑁄𑀲𑁄𑀧𑀲𑀫𑁂𑀲𑀺𑀦𑀁;

𑀲𑀼𑀘𑀺𑀲𑀮𑁆𑀮𑁂𑀔𑀯𑀼𑀢𑁆𑀢𑀻𑀦𑀁, 𑀲𑀤𑀸𑀭𑀜𑁆𑀜𑀦𑀺𑀯𑀸𑀲𑀺𑀦𑀁.

𑀲𑀸𑀲𑀦𑀼𑀚𑁆𑀚𑁄𑀢𑀓𑀸𑀭𑀻𑀦𑀁, 𑀆𑀘𑁂𑀭𑀢𑁆𑀢𑀫𑀼𑀧𑀸𑀕𑀢𑀁;

𑀉𑀤𑀼𑀫𑁆𑀩𑀭𑀕𑀺𑀭𑀺𑀔𑁆𑀬𑀸𑀢𑀬𑀢𑀻𑀦𑀁 𑀬𑀢𑀺𑀧𑀼𑀗𑁆𑀕𑀯𑀁.