𑁪𑁧. 𑀧𑀓𑀺𑀡𑁆𑀡𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁩𑁫. 𑀲𑀤𑁆𑀯𑀸𑀭𑀩𑀦𑁆𑀥𑀦𑁂 𑀲𑁄𑀤𑀼𑀓𑁆𑀔𑀮𑀓𑀧𑀸𑀲𑀓𑁂 𑀞𑀸𑀦𑁂 𑀤𑀺𑀯𑀸 𑀲𑀬𑀦𑁆𑀢𑁂𑀦 𑀧𑀭𑀺𑀯𑀢𑁆𑀢𑀓𑀁 𑀤𑁆𑀯𑀸𑀭𑀁 𑀩𑀦𑁆𑀥𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀤𑁆𑀯𑀸𑀭𑀜𑁆𑀘 𑀤𑁆𑀯𑀸𑀭𑀩𑀦𑁆𑀥𑀦𑀜𑁆𑀘 𑀤𑁆𑀯𑀸𑀭𑀩𑀦𑁆𑀥𑀦𑀸𑀦𑀺 𑀫𑀚𑁆𑀛𑁂𑀧𑀤𑀮𑁄𑀧𑀯𑀲𑁂𑀦, 𑀩𑀦𑁆𑀥𑀦-𑀲𑀤𑁆𑀤𑁂𑀦𑁂𑀯 𑀯𑀸 𑀤𑁆𑀯𑀸𑀭𑀩𑀸𑀳𑀸 𑀯𑀼𑀘𑁆𑀘𑀦𑁆𑀢𑀺, 𑀲𑀳 𑀤𑁆𑀯𑀸𑀭𑀩𑀦𑁆𑀥𑀦𑁂𑀳𑀻𑀢𑀺 𑀲𑀤𑁆𑀯𑀸𑀭𑀩𑀦𑁆𑀥𑀦𑀁, 𑀞𑀸𑀦𑀁. 𑀳𑁂𑀝𑁆𑀞𑀸 𑀉𑀤𑀼𑀓𑁆𑀔𑀮𑀓𑀜𑁆𑀘 𑀉𑀧𑀭𑀺 𑀧𑀸𑀲𑀓𑁄 𑀘, 𑀲𑀳 𑀉𑀤𑀼𑀓𑁆𑀔𑀮𑀧𑀸𑀲𑀓𑁂𑀳𑀻𑀢𑀺 𑀲𑀫𑀸𑀲𑁄. 𑀢𑀸𑀤𑀺𑀲𑁂 𑀞𑀸𑀦𑁂 𑀧𑀸𑀓𑀸𑀭𑀸𑀤𑀺𑀧𑀭𑀺𑀓𑁆𑀔𑁂𑀧𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑁂𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀲𑁄 𑀘 𑀉𑀘𑁆𑀘𑀢𑁄 𑀲𑀳𑀲𑁂𑀬𑁆𑀬𑀧𑁆𑀧𑀳𑁄𑀦𑀓𑁂 𑀯𑀼𑀢𑁆𑀢𑀦𑀬𑁄𑀢𑀺 𑀯𑀤𑀦𑁆𑀢𑀺. 𑀲𑀬𑀦𑁆𑀢𑁂𑀦𑀸𑀢𑀺 𑀧𑀸𑀤𑁂 𑀪𑀽𑀫𑀺𑀢𑁄 𑀫𑁄𑀘𑁂𑀢𑁆𑀯𑀸 𑀦𑀺𑀧𑀚𑁆𑀚𑀦𑁆𑀢𑁂𑀦. 𑀧𑀭𑀺𑀯𑀢𑁆𑀢𑀓𑀦𑁆𑀢𑀺 𑀲𑀁𑀯𑀭𑀡𑀯𑀺𑀯𑀭𑀡𑀯𑀲𑁂𑀦 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀯𑀢𑁆𑀢𑀦𑀬𑁄𑀕𑁆𑀕𑀁. 𑀤𑁆𑀯𑀸𑀭𑀦𑁆𑀢𑀺 𑀅𑀦𑁆𑀢𑀫𑀲𑁄 𑀤𑀼𑀲𑁆𑀲𑀲𑀸𑀡𑀺𑀤𑁆𑀯𑀸𑀭𑀫𑁆𑀧𑀺. 𑀩𑀦𑁆𑀥𑁂𑀬𑁆𑀬𑀸𑀢𑀺 𑀲𑀩𑁆𑀩𑀦𑁆𑀢𑀺𑀫𑁂𑀦 𑀯𑀺𑀥𑀺𑀦𑀸 𑀬𑀸𑀯𑀢𑀸 𑀲𑀻𑀲𑀁 𑀦 𑀧𑀯𑀺𑀲𑀢𑀺, 𑀢𑀸𑀯𑀢𑀸𑀧𑀺 𑀩𑀦𑁆𑀥𑁂𑀬𑁆𑀬, 𑀲𑀁𑀯𑀭𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁩𑁬. 𑀆𑀪𑁄𑀕𑁄 𑀘𑀸𑀧𑀻𑀢𑀺 ‘‘𑀏𑀲 𑀚𑀕𑁆𑀕𑀺𑀲𑁆𑀲𑀢𑀻’’𑀢𑀺 𑀆𑀪𑁄𑀕𑁄 𑀘𑀸𑀧𑀺. 𑀘-𑀲𑀤𑁆𑀤𑁂𑀦 ‘‘𑀤𑁆𑀯𑀸𑀭𑀁 𑀚𑀕𑁆𑀕𑀸𑀳𑀻’’𑀢𑀺 𑀯𑀘𑀦𑀫𑁆𑀧𑀺 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀲𑀯𑀲𑁂 𑀢𑀁 𑀆𑀓𑀸𑀭𑀁 𑀯𑀺𑀦𑀸𑀢𑀺 𑀲𑀲𑁆𑀲 𑀅𑀢𑁆𑀢𑀦𑁄 𑀯𑀲𑁂 𑀆𑀬𑀢𑁆𑀢𑁂 𑀞𑀸𑀦𑁂, 𑀬𑀢𑁆𑀣 𑀧𑀦 𑀩𑀳𑀽𑀦𑀁 𑀲𑀜𑁆𑀘𑀭𑀡𑀢𑁆𑀢𑀸 𑀤𑁆𑀯𑀸𑀭𑀁 𑀲𑀁𑀯𑀼𑀢𑀫𑁆𑀧𑀺 𑀲𑀁𑀯𑀼𑀢𑀝𑁆𑀞𑀸𑀦𑁂 𑀦 𑀢𑀺𑀝𑁆𑀞𑀢𑀺, 𑀤𑁆𑀯𑀸𑀭𑀁 𑀅𑀮𑀪𑀦𑁆𑀢𑀸 𑀧𑀸𑀓𑀸𑀭𑀁 𑀅𑀪𑀺𑀭𑀼𑀳𑀺𑀢𑁆𑀯𑀸𑀧𑀺 𑀯𑀺𑀘𑀭𑀦𑁆𑀢𑀺, 𑀢𑀸𑀤𑀺𑀲𑁂 𑀧𑀭𑀺𑀯𑁂𑀡𑁂 𑀲𑀁𑀯𑀭𑀡𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀅𑀣 𑀯𑀸 𑀲𑀲𑁆𑀲 𑀯𑀲𑁄 𑀆𑀬𑀢𑁆𑀢𑁄, 𑀦 𑀬𑀓𑁆𑀔𑀸𑀤𑀻𑀦𑀁 𑀢𑁂𑀳𑀺 𑀕𑀳𑀺𑀢𑀓𑀢𑁆𑀢𑀲𑁆𑀲, 𑀩𑀦𑁆𑀥𑀺𑀢𑁆𑀯𑀸 𑀦𑀺𑀧𑀚𑁆𑀚𑀸𑀧𑀺𑀢𑀢𑁆𑀢𑀲𑁆𑀲 𑀘 𑀅𑀪𑀸𑀯𑁂𑀦𑀸𑀢𑀺 𑀲𑀯𑀲𑁄. 𑀢𑀲𑁆𑀫𑀺𑀁 𑀲𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀤𑁆𑀯𑀸𑀭𑀁 𑀲𑀁𑀯𑀭𑀡𑀆𑀪𑁄𑀕𑀓𑀭𑀡𑀯𑀘𑀦𑀲𑀗𑁆𑀔𑀸𑀢𑀁 𑀆𑀓𑀸𑀭𑀦𑁆𑀢𑀺 𑀅𑀢𑁆𑀣𑁄.

𑁩𑁩𑁭. 𑀭𑀢𑀦𑀸𑀦𑀻𑀢𑀺 𑀫𑀼𑀢𑁆𑀢𑀸𑀤𑀻𑀦𑀺 𑀤𑀲𑀯𑀺𑀥𑀸𑀦𑀺. 𑀢𑀢𑁆𑀣 𑀧𑀦 𑀚𑀸𑀢𑀺𑀨𑀮𑀺𑀓𑀁 𑀉𑀧𑀸𑀤𑀸𑀬 𑀲𑀩𑁆𑀩𑁄𑀧𑀺 𑀫𑀡𑀺 𑀯𑁂𑀴𑀼𑀭𑀺𑀬𑁄𑀧𑀺 𑀮𑁄𑀳𑀺𑀢𑀗𑁆𑀓𑁄 𑀫𑀲𑀸𑀭𑀕𑀮𑁆𑀮𑁄 𑀘 𑀥𑁄𑀢𑀸𑀧𑀺 𑀅𑀥𑁄𑀢𑀯𑀺𑀤𑁆𑀥𑀸𑀧𑀺 𑀅𑀦𑀸𑀫𑀸𑀲𑀸, 𑀓𑀸𑀘𑀫𑀡𑀺 𑀘 𑀧𑀸𑀦𑀻𑀬𑀲𑀗𑁆𑀔𑁄 𑀥𑁄𑀢𑁄 𑀅𑀥𑁄𑀢𑁄𑀧𑀺 𑀆𑀫𑀸𑀲𑀸, 𑀲𑀺𑀮𑀸 𑀥𑁄𑀢𑀯𑀺𑀤𑁆𑀥𑀸 𑀲𑀼𑀯𑀡𑁆𑀡𑁂𑀦 𑀲𑀤𑁆𑀥𑀺𑀁 𑀧𑀘𑀺𑀢𑀸 𑀫𑀼𑀕𑁆𑀕𑀯𑀡𑁆𑀡𑀸 𑀘 𑀅𑀦𑀸𑀫𑀸𑀲𑀸. 𑀘𑁂𑀢𑀺𑀬𑀖𑀭𑀕𑁄𑀧𑀓𑀸𑀦𑀁 𑀲𑀼𑀯𑀡𑁆𑀡𑀘𑁂𑀢𑀺𑀬𑁂 𑀓𑀘𑀯𑀭𑀫𑁂𑀯 𑀳𑀭𑀺𑀢𑀼𑀁 𑀯𑀝𑁆𑀝𑀢𑀺. 𑀆𑀭𑀓𑀽𑀝𑀮𑁄𑀳𑀫𑁆𑀧𑀺 𑀚𑀸𑀢𑀭𑀽𑀧𑀕𑀢𑀺𑀓𑀫𑁂𑀯. 𑀇𑀢𑁆𑀣𑀺𑀭𑀽𑀧𑀸𑀦𑀻𑀢𑀺 𑀅𑀦𑁆𑀢𑀫𑀲𑁄 𑀧𑀺𑀝𑁆𑀞𑀫𑀬𑀇𑀢𑁆𑀣𑀺𑀭𑀽𑀧𑀸𑀦𑀺𑀧𑀺. 𑀥𑀜𑁆𑀜𑀦𑁆𑀢𑀺 𑀅𑀦𑁆𑀢𑀫𑀲𑁄 𑀢𑀢𑁆𑀣𑀚𑀸𑀢𑀓𑀫𑁆𑀧𑀺 𑀫𑀕𑁆𑀕𑁂 𑀧𑀲𑀸𑀭𑀺𑀢𑀫𑁆𑀧𑀺 𑀲𑀢𑁆𑀢𑀯𑀺𑀥𑀁 𑀥𑀜𑁆𑀜𑀁. 𑀓𑀻𑀴𑀸𑀯𑀲𑁂𑀦 𑀅𑀧𑀭𑀡𑁆𑀡𑀸𑀦𑀺 𑀢𑀸𑀮𑀨𑀮𑀸𑀤𑀻𑀦𑀺𑀧𑀺 𑀅𑀦𑀸𑀫𑀸𑀲𑀸𑀦𑀺, 𑀧𑀲𑀸𑀭𑀺𑀢𑀫𑁆𑀧𑀺 𑀦 𑀫𑀤𑁆𑀤𑀦𑁆𑀢𑁂𑀦 𑀕𑀦𑁆𑀢𑀩𑁆𑀩𑀁, 𑀅𑀲𑀢𑀺 𑀫𑀕𑁆𑀕𑁂 𑀫𑀕𑁆𑀕𑀁 𑀅𑀥𑀺𑀝𑁆𑀞𑀸𑀬 𑀕𑀦𑁆𑀢𑀩𑁆𑀩𑀁. 𑀇𑀢𑁆𑀣𑀺𑀧𑀲𑀸𑀥𑀦𑀦𑁆𑀢𑀺 𑀅𑀦𑁆𑀢𑀫𑀲𑁄 𑀧𑀺𑀴𑀦𑁆𑀥𑀦𑀢𑁆𑀣𑀸𑀬 𑀞𑀧𑀺𑀢𑀁 𑀦𑀺𑀯𑀸𑀲𑀦𑀢𑀸𑀮𑀧𑀡𑁆𑀡𑀫𑀼𑀤𑁆𑀤𑀺𑀓𑀫𑁆𑀧𑀺.

𑁩𑁩𑁮. 𑀲𑀺𑀢𑁆𑀣𑀢𑁂𑀮𑁄𑀤𑀢𑁂𑀮𑁂𑀳𑀻𑀢𑀺 𑀫𑀥𑀼𑀲𑀺𑀢𑁆𑀣𑀓𑀦𑀺𑀬𑁆𑀬𑀸𑀲𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀢𑁂𑀮𑀫𑀺𑀲𑁆𑀲𑀓𑀲𑀺𑀮𑁂𑀲𑁂𑀦 𑀘 𑀉𑀤𑀓𑀫𑀺𑀲𑁆𑀲𑀓𑀢𑁂𑀮𑁂𑀦 𑀘. 𑀨𑀡𑀳𑀢𑁆𑀣𑀨𑀡𑁂𑀳𑀻𑀢𑀺 𑀨𑀡𑀫𑀺𑀯 𑀨𑀡𑀁, 𑀅𑀗𑁆𑀕𑀼𑀮𑀻𑀳𑀺 𑀨𑀡𑀓𑀺𑀘𑁆𑀘𑀓𑀭𑀡𑁂𑀦 𑀳𑀢𑁆𑀣𑁄𑀬𑁂𑀯 𑀨𑀡𑀁 𑀳𑀢𑁆𑀣𑀨𑀡𑀁, 𑀤𑀦𑁆𑀢𑀫𑀬𑀸𑀤𑀺 𑀬𑀁 𑀓𑀺𑀜𑁆𑀘𑀺 𑀨𑀡𑀜𑁆𑀘𑁂𑀯 𑀳𑀢𑁆𑀣𑀨𑀡𑀜𑁆𑀘𑀸𑀢𑀺 𑀤𑁆𑀯𑀦𑁆𑀤𑁄. 𑀑𑀲𑀡𑁆𑀞𑁂𑀬𑁆𑀬𑀸𑀢𑀺 𑀑𑀮𑀺𑀔𑀺𑀢𑁆𑀯𑀸 𑀲𑀦𑁆𑀦𑀺𑀲𑀻𑀤𑀸𑀧𑁂𑀬𑁆𑀬.

𑁩𑁩𑁯. 𑀏𑀓𑀧𑀸𑀯𑀼𑀭𑀡𑀸 𑀯𑀸 𑀏𑀓𑀢𑁆𑀣𑀭𑀡𑀸 𑀯𑀸 𑀦 𑀢𑀼𑀯𑀝𑁆𑀝𑀬𑀼𑀁, 𑀏𑀓𑀫𑀜𑁆𑀘𑁂 𑀦 𑀢𑀼𑀯𑀝𑁆𑀝𑀬𑀼𑀦𑁆𑀢𑀺 𑀬𑁄𑀚𑀦𑀸. 𑀏𑀓𑀁 𑀧𑀸𑀯𑀼𑀭𑀡𑀁 𑀏𑀓𑀁 𑀅𑀢𑁆𑀣𑀭𑀡𑀁 𑀏𑀢𑁂𑀲𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀦 𑀢𑀼𑀯𑀝𑁆𑀝𑀬𑀼𑀦𑁆𑀢𑀺 𑀦 𑀦𑀺𑀧𑀚𑁆𑀚𑁂𑀬𑁆𑀬𑀼𑀁. 𑀏𑀓𑀲𑁆𑀫𑀺𑀁 𑀪𑀸𑀚𑀦𑁂 𑀯𑀸𑀧𑀺 𑀦 𑀪𑀼𑀜𑁆𑀚𑁂𑀬𑁆𑀬𑀼𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁.

𑁩𑁪𑁦. 𑀫𑀦𑀼𑀲𑁆𑀲𑀸𑀦𑀁 𑀧𑀫𑀸𑀡𑀗𑁆𑀕𑀼𑀮𑁂𑀦 𑀅𑀝𑁆𑀞 𑀅𑀗𑁆𑀕𑀼𑀮𑀸𑀦𑀺 𑀬𑀲𑁆𑀲, 𑀅𑀥𑀺𑀓𑁂𑀦 𑀲𑀳𑀺𑀢𑀁 𑀅𑀝𑁆𑀞𑀗𑁆𑀕𑀼𑀮𑀦𑁆𑀢𑀺 𑀲𑀫𑀸𑀲𑁄. 𑀮𑀲𑀼𑀡𑀁 𑀫𑀕𑀥𑁂𑀲𑀼 𑀚𑀸𑀢𑀁 𑀆𑀫𑀮𑀓𑀪𑀡𑁆𑀟𑀺𑀓𑀁 𑀮𑀲𑀼𑀡𑀁 𑀦 𑀔𑀸𑀤𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀦 𑀅𑀓𑀮𑁆𑀮𑀓𑁄𑀢𑀺 𑀅𑀕𑀺𑀮𑀸𑀦𑁄.

𑁩𑁪𑁧. 𑀳𑀻𑀦𑀼𑀓𑁆𑀓𑀝𑁆𑀞𑁂𑀳𑀺 𑀚𑀸𑀢𑀺𑀆𑀤𑀻𑀳𑀺 𑀉𑀓𑁆𑀓𑀝𑁆𑀞𑀁 𑀯𑀸 𑀳𑀻𑀦𑀁 𑀯𑀸 𑀉𑀚𑀼𑀁 𑀯𑀸 𑀅𑀜𑁆𑀜𑀸𑀧𑀤𑁂𑀲𑁂𑀦 𑀯𑀸 𑀤𑀯𑀸 𑀯𑀤𑁂, 𑀤𑀼𑀩𑁆𑀪𑀸𑀲𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀚𑀸𑀢𑀺𑀆𑀤𑀻𑀳𑀻𑀢𑀺 𑀚𑀸𑀢𑀺𑀦𑀸𑀫𑀕𑁄𑀢𑁆𑀢𑀓𑀫𑁆𑀫𑀲𑀺𑀧𑁆𑀧𑀆𑀩𑀸𑀥𑀮𑀺𑀗𑁆𑀕𑀓𑀺𑀮𑁂𑀲𑀆𑀧𑀢𑁆𑀢𑀺𑀅𑀓𑁆𑀓𑁄𑀲𑁂𑀳𑀺. 𑀉𑀓𑁆𑀓𑀝𑁆𑀞𑀦𑁆𑀢𑀺 𑀚𑀸𑀢𑁆𑀬𑀸𑀤𑀻𑀳𑀺𑀬𑁂𑀯 𑀉𑀓𑁆𑀓𑀝𑁆𑀞𑀁 𑀉𑀧𑀲𑀫𑁆𑀧𑀦𑁆𑀦𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀯𑀸. 𑀤𑀯𑀸𑀢𑀺 𑀓𑁂𑀴𑀺𑀳𑀲𑀸𑀥𑀺𑀧𑁆𑀧𑀸𑀬𑀢𑀸𑀬. 𑀉𑀚𑀼𑀁 𑀯𑀸𑀢𑀺 ‘‘𑀘𑀡𑁆𑀟𑀸𑀮𑁄𑀲𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦. 𑀅𑀜𑁆𑀜𑀸𑀧𑀤𑁂𑀲𑁂𑀦 𑀯𑀸𑀢𑀺 ‘‘𑀲𑀦𑁆𑀢𑀺 𑀇𑀥𑁂𑀓𑀘𑁆𑀘𑁂 𑀘𑀡𑁆𑀟𑀸𑀮𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦.

𑁩𑁪𑁨. 𑀤𑀻𑀖𑁂 𑀦𑀔𑁂𑀢𑀺 𑀫𑀁𑀲𑀧𑁆𑀧𑀫𑀸𑀡𑀢𑁄. 𑀤𑀻𑀖𑁂 𑀓𑁂𑀲𑁂𑀢𑀺 𑀤𑁆𑀯𑀗𑁆𑀕𑀼𑀮𑀢𑁄. 𑀲𑀘𑁂𑀧𑀺 𑀦 𑀤𑀻𑀖𑀸, 𑀤𑀼𑀫𑀸𑀲𑀢𑁄 𑀏𑀓𑀤𑀺𑀯𑀲𑀫𑁆𑀧𑀺 𑀅𑀢𑀺𑀓𑁆𑀓𑀸𑀫𑁂𑀢𑀼𑀁 𑀦 𑀮𑀪𑀢𑀺. 𑀤𑀻𑀖𑁂 𑀦𑀸𑀲𑀮𑁄𑀫𑁂𑀢𑀺 𑀦𑀸𑀲𑀢𑁄 𑀩𑀳𑀺 𑀦𑀺𑀓𑁆𑀔𑀦𑁆𑀢𑁂. 𑀯𑀻𑀲𑀢𑀺𑀫𑀝𑁆𑀞𑀦𑁆𑀢𑀺 𑀯𑀻𑀲𑀢𑀺𑀬𑀸 𑀦𑀔𑀸𑀦𑀁 𑀫𑀝𑁆𑀞𑀜𑁆𑀘. 𑀲𑀫𑁆𑀩𑀸𑀥𑁂𑀢𑀺 𑀉𑀪𑁄𑀲𑀼 𑀉𑀧𑀓𑀘𑁆𑀙𑀓𑁂𑀲𑀼, 𑀫𑀼𑀢𑁆𑀢𑀓𑀭𑀡𑁂 𑀘 𑀮𑁄𑀫𑀳𑀸𑀭𑀡𑀜𑁆𑀘 𑀦 𑀮𑀩𑁆𑀪𑀸𑀢𑀺 𑀲𑀫𑁆𑀩𑀦𑁆𑀥𑀦𑀻𑀬𑀁. 𑀦 𑀮𑀩𑁆𑀪𑀸𑀢𑀺 𑀏𑀢𑁂 𑀫𑀝𑁆𑀞𑀸𑀤𑀬𑁄 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀅𑀢𑁆𑀣𑁄, 𑀦𑀺𑀧𑀸𑀢𑁄 𑀯𑀸 𑀮𑀩𑁆𑀪𑀸𑀢𑀺. 𑀆𑀩𑀸𑀥𑀧𑁆𑀧𑀘𑁆𑀘𑀬𑀸 𑀧𑀦 𑀲𑀫𑁆𑀩𑀸𑀥𑁂 𑀮𑁄𑀫𑀁 𑀲𑀁𑀳𑀭𑀺𑀢𑀼𑀁 𑀯𑀝𑁆𑀝𑀢𑀺.

𑁩𑁪𑁩. 𑀲𑀗𑁆𑀖𑀼𑀤𑁆𑀤𑀺𑀝𑁆𑀞𑀁 𑀯𑀸 𑀲𑀗𑁆𑀖𑀺𑀓𑀁 𑀯𑀸 𑀲𑀬𑀦𑀸𑀲𑀦𑀁 𑀬𑀣𑀸𑀯𑀼𑀟𑁆𑀠𑀁 𑀦 𑀩𑀸𑀥𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀲𑀗𑁆𑀖𑀲𑁆𑀲 𑀉𑀤𑁆𑀤𑀺𑀝𑁆𑀞𑀁 𑀲𑀗𑁆𑀖𑀼𑀤𑁆𑀤𑀺𑀝𑁆𑀞𑀁, 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀓𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑁄 𑀬𑁄 𑀯𑀼𑀟𑁆𑀠𑁄 𑀬𑀣𑀸𑀯𑀼𑀟𑁆𑀠𑀁, 𑀯𑀼𑀟𑁆𑀠𑀧𑁆𑀧𑀝𑀺𑀧𑀸𑀝𑀺𑀬𑀸𑀢𑀺 𑀅𑀢𑁆𑀣𑁄. 𑀦 𑀩𑀸𑀥𑁂𑀬𑁆𑀬𑀸𑀢𑀺 𑀦 𑀧𑀝𑀺𑀩𑀸𑀳𑁂𑀬𑁆𑀬. 𑀅𑀮𑁆𑀮𑀧𑀸𑀤𑀸 𑀦𑀸𑀫 𑀬𑁂𑀳𑀺 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑁂 𑀉𑀤𑀓𑀁 𑀧𑀜𑁆𑀜𑀸𑀬𑀢𑀺. 𑀲𑀬𑀦𑀸𑀲𑀦𑀦𑁆𑀢𑀺 𑀫𑀜𑁆𑀘𑀧𑀻𑀞𑀸𑀤𑀺, 𑀇𑀫𑀺𑀦𑀸 𑀧𑀭𑀺𑀪𑀡𑁆𑀟𑀓𑀢𑀸 𑀪𑀽𑀫𑀻𑀢𑀺𑀧𑀺 𑀉𑀧𑀮𑀓𑁆𑀔𑀺𑀢𑀸. 𑀲𑀼𑀥𑁄𑀢𑀧𑀸𑀤𑀓𑀁 𑀯𑀸𑀧𑀺 𑀲𑀉𑀧𑀸𑀳𑀦𑁄 𑀢𑀣𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀼𑀥𑁄𑀢𑀧𑀸𑀤𑀓𑀦𑁆𑀢𑀺 𑀥𑁄𑀢𑀧𑀸𑀤𑁂𑀳𑁂𑀯 𑀅𑀓𑁆𑀓𑀫𑀺𑀢𑀩𑁆𑀩𑀝𑁆𑀞𑀸𑀦𑀁. 𑀥𑁄𑀢𑀸 𑀧𑀸𑀤𑀸 𑀬𑀲𑁆𑀲 𑀅𑀓𑁆𑀓𑀫𑀦𑀲𑁆𑀲𑀸𑀢𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀲𑀫𑀸𑀲𑁄. 𑀬𑀤𑀺 𑀧𑀦 𑀢𑀢𑁆𑀣 𑀦𑁂𑀯𑀸𑀲𑀺𑀓𑀸 𑀅𑀥𑁄𑀢𑀧𑀸𑀤𑁂𑀳𑀺𑀧𑀺 𑀯𑀴𑀜𑁆𑀚𑁂𑀦𑁆𑀢𑀺, 𑀢𑀣𑁂𑀯 𑀯𑀴𑀜𑁆𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀢𑀣𑁂𑀯𑀸𑀢𑀺 𑀧𑀭𑀺𑀪𑀡𑁆𑀟𑀓𑀢𑀁 𑀪𑀽𑀫𑀺𑀁 𑀲𑁂𑀦𑀸𑀲𑀦𑀁 𑀯𑀸 𑀦𑀓𑁆𑀓𑀫𑁂𑀢𑀺 𑀅𑀢𑁆𑀣𑁄.

𑁩𑁪𑁪. 𑀲𑀗𑁆𑀖𑀸𑀝𑀺𑀬𑀸𑀢𑀺 𑀅𑀥𑀺𑀝𑁆𑀞𑀺𑀢𑀲𑀗𑁆𑀖𑀸𑀝𑀺𑀬𑀸. 𑀧𑀸𑀤𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀆𑀲𑀦𑀁 𑀧𑀮𑁆𑀮𑀢𑁆𑀣𑁄, 𑀧𑀮𑁆𑀮𑀢𑁆𑀣𑀁 𑀓𑀭𑁄𑀢𑀻𑀢𑀺 𑀧𑀮𑁆𑀮𑀢𑁆𑀣𑀸𑀢𑀺𑀥𑀸𑀢𑀼𑀲𑁆𑀲 𑀧𑀮𑁆𑀮𑀢𑁆𑀣𑁂𑀢𑀺 𑀭𑀽𑀧𑀁. 𑀯𑀺𑀳𑀸𑀭𑁂𑀧𑀺 𑀅𑀦𑁆𑀢𑀭𑀖𑀭𑁂𑀧𑀺 𑀧𑀮𑁆𑀮𑀢𑁆𑀣𑀺𑀓𑀸𑀬 𑀦 𑀦𑀺𑀲𑀻𑀤𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀧𑀭𑀺𑀓𑀫𑁆𑀫𑀓𑀢𑀁 𑀪𑀺𑀢𑁆𑀢𑀸𑀤𑀺𑀦𑁆𑀢𑀺 𑀬𑁄𑀚𑀦𑀸. 𑀧𑀭𑀺𑀓𑀫𑁆𑀫𑀓𑀢𑀦𑁆𑀢𑀺 𑀲𑁂𑀢𑀯𑀡𑁆𑀡𑁂𑀦 𑀯𑀸 𑀘𑀺𑀢𑁆𑀢𑀓𑀫𑁆𑀫𑁂𑀦 𑀯𑀸 𑀓𑀢𑀧𑀭𑀺𑀓𑀫𑁆𑀫𑀁. 𑀆𑀤𑀺-𑀲𑀤𑁆𑀤𑁄 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀦 𑀅𑀧𑀲𑁆𑀲𑀬𑁂𑀢𑀺 𑀘𑀻𑀯𑀭𑀸𑀤𑀺𑀦𑀸 𑀅𑀧𑁆𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀧𑀲𑁆𑀲𑀬𑀦𑀁 𑀦 𑀓𑀭𑁂𑀬𑁆𑀬. 𑀦𑁄 𑀦 𑀆𑀘𑀫𑁂𑀢𑀺 𑀦𑁂𑀯 𑀦 𑀆𑀘𑀫𑁂, 𑀆𑀘𑀫𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀤𑁆𑀯𑁂 𑀧𑀝𑀺𑀲𑁂𑀥𑀸 𑀧𑀓𑀢𑀺𑀬𑀢𑁆𑀣𑀁 𑀕𑀫𑁂𑀦𑁆𑀢𑀻𑀢𑀺. 𑀲𑀦𑁆𑀢𑁂𑀢𑀺 𑀇𑀫𑀺𑀦𑀸 𑀉𑀤𑀓𑁂 𑀅𑀲𑀦𑁆𑀢𑁂 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺.

𑁩𑁪𑁫. 𑀅𑀓𑀧𑁆𑀧𑀺𑀬𑀲𑀫𑀸𑀤𑀸𑀦𑁂𑀢𑀺 𑀪𑀺𑀓𑁆𑀔𑀽𑀦𑀁 𑀲𑀸𑀫𑀡𑁂𑀭𑀸𑀦𑀁 𑀅𑀓𑀧𑁆𑀧𑀺𑀬𑁂 𑀲𑀫𑀸𑀤𑀸𑀦𑁂. 𑀤𑀯𑀸𑀢𑀺 𑀦𑀺𑀧𑀸𑀢𑁄, 𑀓𑀻𑀴𑀸𑀥𑀺𑀧𑁆𑀧𑀸𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀺𑀮𑀸𑀧𑀯𑀺𑀚𑁆𑀛𑀦𑁂𑀢𑀺 𑀅𑀦𑁆𑀢𑀫𑀲𑁄 𑀳𑀢𑁆𑀣𑀬𑀦𑁆𑀢𑁂𑀦𑀧𑀺 𑀲𑀓𑁆𑀔𑀭𑀺𑀓𑀸𑀬𑀧𑀺 𑀔𑀺𑀧𑀦𑁂. 𑀲𑀪𑀸𑀕𑀸𑀬 𑀤𑁂𑀲𑀦𑀸𑀬 𑀆𑀯𑀺𑀓𑀫𑁆𑀫𑁂 𑀘 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀪𑀸𑀕𑀸𑀬𑀸𑀢𑀺 𑀯𑀢𑁆𑀣𑀼𑀯𑀲𑁂𑀦 𑀲𑀫𑀸𑀦𑁄 𑀪𑀸𑀕𑁄 𑀏𑀢𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸𑀢𑀺 𑀯𑀺𑀕𑁆𑀕𑀳𑁄. 𑀘-𑀲𑀤𑁆𑀤𑁄 𑀢𑀸𑀤𑀺𑀲𑀺𑀬𑀸 𑀧𑀝𑀺𑀕𑁆𑀕𑀳𑀡𑀫𑀢𑁆𑀢𑀁 𑀲𑀫𑀼𑀘𑁆𑀘𑀺𑀦𑁄𑀢𑀺.

𑁩𑁪𑁬. 𑀧𑀝𑀺𑀲𑁆𑀲𑀯𑁄 𑀦𑀸𑀫 ‘‘𑀉𑀪𑁄𑀧𑀺 𑀫𑀬𑀁 𑀇𑀥 𑀯𑀲𑁆𑀲𑀁 𑀯𑀲𑀺𑀲𑁆𑀲𑀸𑀫, 𑀏𑀓𑀢𑁄 𑀉𑀤𑁆𑀤𑀺𑀲𑀸𑀧𑁂𑀫𑀸’’𑀢𑀺𑀆𑀤𑀺𑀧𑀝𑀺𑀚𑀸𑀦𑀦𑀁, 𑀢𑀲𑁆𑀲 𑀯𑀺𑀲𑀁𑀯𑀸𑀤𑁄 𑀧𑀘𑁆𑀙𑀸 𑀅𑀓𑀭𑀡𑀁 𑀧𑀝𑀺𑀲𑁆𑀲𑀯𑀯𑀺𑀲𑀁𑀯𑀸𑀤𑁄, 𑀢𑀲𑁆𑀫𑀺𑀁, 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁. 𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲𑀸𑀢𑀺 𑀓𑀣𑀦𑀲𑀫𑀬𑁂 ‘‘𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀘𑀺𑀢𑁆𑀢𑀲𑁆𑀲. 𑀇𑀢𑀭𑀲𑁆𑀲𑀸𑀢𑀺 𑀅𑀜𑁆𑀜𑀲𑁆𑀲 𑀅𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲.

𑁩𑁪𑁭. 𑀓𑀺𑀘𑁆𑀘𑁂𑀢𑀺 𑀲𑀼𑀓𑁆𑀔𑀓𑀝𑁆𑀞𑀸𑀤𑀺𑀕𑁆𑀕𑀳𑀡𑀓𑀺𑀘𑁆𑀘𑁂 𑀲𑀢𑀺 𑀏𑀯 𑀧𑁄𑀭𑀺𑀲𑀁 𑀧𑀼𑀭𑀺𑀲𑀧𑁆𑀧𑀫𑀸𑀡𑀁 𑀅𑀪𑀺𑀭𑀼𑀳𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀧𑀤𑀸𑀲𑀽𑀢𑀺 𑀯𑀸𑀴𑀫𑀺𑀕𑀤𑀲𑁆𑀲𑀦𑀸𑀤𑀻𑀲𑀼.

𑁩𑁪𑁮. 𑀧𑀭𑀺𑀲𑁆𑀲𑀸𑀯𑀦𑀁 𑀯𑀺𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀤𑁆𑀥𑀸𑀦𑀦𑁆𑀢𑀺 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀅𑀤𑁆𑀥𑀬𑁄𑀚𑀦𑀲𑀗𑁆𑀔𑀸𑀢𑀁 𑀅𑀤𑁆𑀥𑀸𑀦𑀁. 𑀲𑀘𑁂 𑀦 𑀳𑁄𑀢𑀺 𑀧𑀭𑀺𑀲𑁆𑀲𑀸𑀯𑀦𑀁 𑀯𑀸 𑀥𑀫𑁆𑀫𑀓𑀭𑀡𑁄 𑀯𑀸, 𑀲𑀗𑁆𑀖𑀸𑀝𑀺𑀓𑀡𑁆𑀡𑁄𑀧𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑁄. 𑀬𑀸𑀘𑀫𑀸𑀦𑀲𑁆𑀲𑀸𑀢𑀺 𑀧𑀭𑀺𑀲𑁆𑀲𑀸𑀯𑀦𑀁 𑀬𑀸𑀘𑀦𑁆𑀢𑀲𑁆𑀲.

𑁩𑁪𑁯. 𑀆𑀩𑀸𑀥𑀧𑁆𑀧𑀘𑁆𑀘𑀬𑀸 𑀅𑀜𑁆𑀜𑀢𑁆𑀭 𑀲𑁂𑀲𑀗𑁆𑀕𑁂 𑀘 𑀅𑀢𑁆𑀢𑀖𑀸𑀢𑀦𑁂 𑀘 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. 𑀲𑁂𑀲𑀗𑁆𑀕𑁂𑀢𑀺 𑀅𑀗𑁆𑀕𑀚𑀸𑀢𑀢𑁄 𑀓𑀡𑁆𑀡𑀦𑀸𑀲𑀸𑀤𑀺𑀅𑀯𑀲𑁂𑀲𑁂 𑀅𑀯𑀬𑀯𑀘𑁆𑀙𑁂𑀤𑀦𑁂. 𑀅𑀢𑁆𑀢𑀖𑀸𑀢𑀦𑁂𑀢𑀺 𑀆𑀳𑀸𑀭𑀼𑀧𑀘𑁆𑀙𑁂𑀤𑀸𑀤𑀺𑀦𑀸 𑀅𑀢𑁆𑀢𑀦𑁄 𑀫𑀸𑀭𑀡𑁂.

𑁩𑁫𑁦. 𑀢𑀽𑀮𑀺𑀓𑀸𑀬 𑀓𑀬𑀺𑀭𑀫𑀸𑀦𑀁 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀓𑀁 𑀘𑀺𑀢𑁆𑀢𑀜𑁆𑀘 𑀧𑁄𑀢𑁆𑀣𑀓𑀜𑁆𑀘 𑀓𑀝𑁆𑀞𑀸𑀤𑀻𑀲𑀼 𑀓𑀬𑀺𑀭𑀫𑀸𑀦𑀁 𑀘𑀺𑀢𑁆𑀢𑀧𑁄𑀢𑁆𑀣𑀓𑀸𑀦𑀺, 𑀢𑀸𑀦𑀺𑀬𑁂𑀯 𑀭𑀽𑀧𑀸𑀦𑀻𑀢𑀺 𑀲𑀫𑀸𑀲𑁄. 𑀚𑀸𑀢𑀓𑀸𑀤𑀻𑀦𑀺 𑀧𑀦 𑀧𑀭𑁂𑀳𑀺 𑀓𑀸𑀭𑀸𑀧𑁂𑀢𑀼𑀁 𑀮𑀩𑁆𑀪𑀦𑁆𑀢𑀺. 𑀫𑀸𑀮𑀸𑀓𑀫𑁆𑀫𑀸𑀤𑀻𑀦𑀺 𑀲𑀬𑀫𑁆𑀧𑀺 𑀓𑀸𑀢𑀼𑀁 𑀮𑀩𑁆𑀪𑀦𑁆𑀢𑀺. 𑀆𑀭𑀸𑀫𑀸𑀭𑀜𑁆𑀜𑀕𑁂𑀳𑁂𑀲𑀼 𑀪𑀼𑀜𑁆𑀚𑀦𑁆𑀢𑀁 𑀦 𑀉𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀯𑀺𑀳𑀸𑀭𑀲𑀗𑁆𑀔𑀸𑀢𑁄 𑀆𑀭𑀸𑀫𑁄 𑀘 𑀅𑀭𑀜𑁆𑀜𑀜𑁆𑀘 𑀅𑀦𑁆𑀢𑀭𑀖𑀭𑀲𑀗𑁆𑀔𑀸𑀢𑀁 𑀕𑁂𑀳𑀜𑁆𑀘𑀸𑀢𑀺 𑀤𑁆𑀯𑀦𑁆𑀤𑁄. ‘‘𑀆𑀭𑀸𑀫…𑀧𑁂… 𑀕𑁂𑀳𑁂𑀲𑀽’’𑀢𑀺 𑀯𑀢𑁆𑀢𑀩𑁆𑀩𑁂 𑀏-𑀓𑀸𑀭𑀲𑁆𑀲 𑀅-𑀓𑀸𑀭𑀓𑀭𑀡𑁂𑀦 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀯𑀼𑀢𑁆𑀢𑀁. 𑀑𑀓𑀸𑀲𑁂 𑀓𑀢𑁂 𑀧𑀦 ‘‘𑀧𑀯𑀺𑀲𑀣𑀸’’𑀢𑀺 𑀯𑀼𑀢𑁆𑀢𑁂 𑀘 𑀧𑀯𑀺𑀲𑀺𑀢𑀩𑁆𑀩𑀁 𑀉𑀧𑀦𑀺𑀲𑀻𑀤𑀺𑀢𑀩𑁆𑀩𑀜𑁆𑀘.

𑁩𑁫𑁧. 𑀧𑀼𑀫𑀬𑀼𑀢𑁆𑀢𑀸𑀦𑀺 𑀬𑀸𑀦𑀸𑀦𑀺 𑀘 𑀲𑀺𑀯𑀺𑀓𑀜𑁆𑀘 𑀳𑀢𑁆𑀣𑀯𑀝𑁆𑀝𑀓𑀜𑁆𑀘 𑀧𑀸𑀝𑀗𑁆𑀓𑀺𑀜𑁆𑀘 𑀅𑀪𑀺𑀭𑀼𑀳𑀺𑀢𑀼𑀁 𑀕𑀺𑀮𑀸𑀦𑀲𑁆𑀲 𑀓𑀧𑁆𑀧𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀫𑀬𑀼𑀢𑁆𑀢𑀸𑀦𑀻𑀢𑀺 𑀅𑀲𑁆𑀲𑀕𑀯𑀸𑀤𑀺𑀧𑀼𑀭𑀺𑀲𑀬𑀼𑀢𑁆𑀢𑀸𑀦𑀺, 𑀦 𑀥𑁂𑀦𑀼𑀬𑀼𑀢𑁆𑀢𑀸𑀦𑀺, 𑀲𑀸𑀭𑀣𑀺 𑀧𑀦 𑀇𑀢𑁆𑀣𑀻 𑀯𑀸 𑀳𑁄𑀢𑀼 𑀧𑀼𑀭𑀺𑀲𑁄 𑀯𑀸, 𑀯𑀝𑁆𑀝𑀢𑀺. 𑀳𑀢𑁆𑀣𑀯𑀝𑁆𑀝𑀓𑁂𑀧𑀺 𑀏𑀲𑁂𑀯 𑀦𑀬𑁄, 𑀬𑀸𑀦𑀸𑀦𑀻𑀢𑀺 𑀭𑀣𑀲𑀓𑀝𑀸𑀤𑀻𑀦𑀺, 𑀲𑀺𑀯𑀺𑀓𑀦𑁆𑀢𑀺 𑀧𑀻𑀞𑀓𑀲𑀺𑀯𑀺𑀓𑀁, 𑀧𑀻𑀞𑀓𑀬𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀝𑀗𑁆𑀓𑀻𑀢𑀺 𑀅𑀦𑁆𑀤𑁄𑀮𑀺𑀓𑀸. 𑀕𑀺𑀮𑀸𑀦𑀲𑁆𑀲𑀸𑀢𑀺 𑀏𑀢𑁆𑀣 𑀕𑀺𑀮𑀸𑀦𑁄 𑀦𑀸𑀫 𑀦 𑀅𑀧𑁆𑀧𑀓𑁂𑀦𑀧𑀺 𑀲𑀻𑀲𑀸𑀩𑀸𑀥𑀸𑀤𑀺𑀫𑀢𑁆𑀢𑁂𑀦 𑀯𑁂𑀤𑀺𑀢𑀩𑁆𑀩𑁄, 𑀬𑁄 𑀧𑀦 𑀦 𑀲𑀓𑁆𑀓𑁄𑀢𑀺 𑀯𑀺𑀦𑀸 𑀬𑀸𑀦𑁂𑀦 𑀕𑀦𑁆𑀢𑀼𑀁, 𑀏𑀯𑀭𑀽𑀧𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀳𑀺 𑀬𑀸𑀦𑀁 𑀅𑀦𑀼𑀚𑀸𑀦𑀦𑁆𑀢𑁂𑀦 𑀪𑀕𑀯𑀢𑀸 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂𑀲𑀼 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀲𑀸𑀯𑀢𑁆𑀣𑀺𑀁 𑀕𑀘𑁆𑀙𑀦𑁆𑀢𑀁 𑀅𑀜𑁆𑀜𑀢𑀭𑀁 𑀕𑀺𑀮𑀸𑀦𑀁 𑀪𑀺𑀓𑁆𑀔𑀼𑀁 𑀕𑀦𑁆𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑁂𑀳𑀺 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 ‘‘𑀏𑀳𑀺, 𑀪𑀦𑁆𑀢𑁂, 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦𑀸𑀳𑀁, 𑀆𑀯𑀼𑀲𑁄, 𑀕𑀫𑀺𑀲𑁆𑀲𑀸𑀫𑀺, 𑀕𑀺𑀮𑀸𑀦𑁄𑀫𑁆𑀳𑀻’’𑀢𑀺 𑀯𑀼𑀢𑁆𑀢𑀯𑀢𑁆𑀣𑀼𑀲𑁆𑀫𑀺𑀁 (𑀫𑀳𑀸𑀯. 𑁨𑁫𑁩) 𑀅𑀦𑀼𑀜𑁆𑀜𑀸𑀢𑀁, 𑀢𑀣𑀸 𑀯𑀤𑀦𑁆𑀢𑁄 𑀘 𑀲𑁄 𑀪𑀺𑀓𑁆𑀔𑀼 𑀕𑀫𑀦𑀼𑀧𑀘𑁆𑀙𑁂𑀤𑀲𑀸𑀥𑀓𑀫𑁂𑀯 𑀕𑁂𑀮𑀜𑁆𑀜𑀁 𑀲𑀦𑁆𑀥𑀸𑀬𑀸𑀳𑀸𑀢𑀺 𑀯𑀺𑀜𑁆𑀜𑀸𑀬𑀢𑀺 𑀅𑀥𑀺𑀧𑁆𑀧𑁂𑀢𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀬𑀸 𑀉𑀧𑀘𑁆𑀙𑀺𑀦𑁆𑀦𑀢𑁆𑀢𑀸, 𑀅𑀧𑀺𑀘 𑀬𑀸𑀦𑁂𑀦 𑀏𑀓𑀧𑀭𑀺𑀘𑁆𑀙𑁂𑀤𑀸𑀬 𑀉𑀧𑀸𑀳𑀦𑀸𑀬 𑀧𑀭𑀺𑀘𑁆𑀙𑁂𑀤𑀁 𑀞𑀧𑁂𑀦𑁆𑀢𑁂𑀦 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀦 ‘‘𑀕𑀺𑀮𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀲𑀉𑀧𑀸𑀳𑀦𑁂𑀦𑀸𑀢𑀺 𑀏𑀢𑁆𑀣 𑀕𑀺𑀮𑀸𑀦𑁄 𑀦𑀸𑀫 𑀬𑁄 𑀦 𑀲𑀓𑁆𑀓𑁄𑀢𑀺 𑀅𑀦𑀼𑀧𑀸𑀳𑀦𑁂𑀦 𑀕𑀸𑀫𑀁 𑀧𑀯𑀺𑀲𑀺𑀢𑀼’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁨𑁫𑁬) 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀕𑀺𑀮𑀸𑀦𑁄𑀯 𑀕𑀺𑀮𑀸𑀦𑁄𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑁩𑁫𑁨. 𑀤𑀯𑀁 𑀓𑀭𑀡𑁂𑀢𑀺 𑀓𑁂𑀴𑀺𑀬𑀸 𑀓𑀭𑀡𑁂. 𑀅𑀜𑁆𑀜𑀲𑁆𑀲𑀸𑀢𑀺 𑀅𑀦𑁆𑀢𑀫𑀲𑁄 𑀤𑀼𑀲𑁆𑀲𑀻𑀮𑀲𑁆𑀲𑀸𑀧𑀺. 𑀉𑀧𑀮𑀸𑀴𑀦𑁂𑀢𑀺 ‘‘𑀧𑀢𑁆𑀢𑀁 𑀤𑀲𑁆𑀲𑀸𑀫𑀺, 𑀘𑀻𑀯𑀭𑀁 𑀤𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸.

𑁩𑁫𑁩. 𑀯𑀺𑀯𑀭𑀺𑀢𑁆𑀯𑀸 𑀦 𑀤𑀲𑁆𑀲𑀬𑁂𑀢𑀺 𑀲𑀫𑁆𑀩𑀦𑁆𑀥𑀦𑀻𑀬𑀁. 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄.

𑁩𑁫𑁪. 𑀑𑀯𑀸𑀤𑀦𑁆𑀢𑀺 𑀪𑀺𑀓𑁆𑀔𑀼𑀦𑀻𑀳𑀺 𑀢𑁂𑀭𑀲𑀺𑀬𑀁 𑀯𑀸 𑀘𑀸𑀢𑀼𑀤𑁆𑀤𑀲𑀺𑀬𑀁 𑀯𑀸 𑀆𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀘𑀸𑀢𑀼𑀤𑁆𑀤𑀲𑁄’’𑀢𑀺𑀆𑀤𑀺𑀦𑀸 𑀪𑀺𑀓𑁆𑀔𑀼𑀦𑀸 𑀆𑀘𑀺𑀓𑁆𑀔𑀺𑀢𑁂 𑀧𑀼𑀦 𑀢𑀸𑀳𑀺 𑀉𑀧𑁄𑀲𑀣𑀤𑀺𑀯𑀲𑁂 𑀲𑀫𑀸𑀕𑀦𑁆𑀢𑁆𑀯𑀸 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀬𑀸𑀘𑀦𑀁, 𑀢𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀢𑁂𑀦 𑀓𑀢𑀲𑀦𑁆𑀦𑀺𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀧𑀸𑀝𑀺𑀧𑀤𑁂 𑀧𑀘𑁆𑀘𑀸𑀳𑀭𑀺𑀢𑀩𑁆𑀩𑀦𑁆𑀢𑀺 𑀅𑀚𑀸𑀦𑀦𑀓𑀁 𑀩𑀸𑀮𑀜𑁆𑀘 𑀢𑀣𑀸 𑀓𑀸𑀢𑀼𑀁 𑀅𑀲𑀫𑀢𑁆𑀣𑀁 𑀕𑀺𑀮𑀸𑀦𑀜𑁆𑀘 𑀧𑀸𑀝𑀺𑀧𑀤𑁂 𑀕𑀦𑁆𑀢𑀼𑀓𑀸𑀫𑀁 𑀕𑀫𑀺𑀬𑀜𑁆𑀘 𑀯𑀚𑁆𑀚𑁂𑀢𑁆𑀯𑀸 𑀅𑀜𑁆𑀜𑀲𑁆𑀲 𑀕𑀳𑀡𑀧𑀘𑁆𑀘𑀸𑀳𑀭𑀡𑀸𑀦𑀺 𑀅𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦 𑀕𑀡𑁆𑀳𑀢𑁄’’𑀢𑀺𑀆𑀤𑀺.

𑁩𑁫𑁫. 𑀮𑁄𑀓𑀸𑀬𑀢𑀦𑁆𑀢𑀺 𑀦𑀺𑀭𑀢𑁆𑀣𑀓𑀓𑀸𑀭𑀡𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁 𑀢𑀺𑀢𑁆𑀣𑀺𑀬𑀲𑀢𑁆𑀣𑀁. 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸 𑀘 𑀇𑀫𑀺𑀦𑀸𑀯 𑀉𑀧𑀮𑀓𑁆𑀔𑀺𑀢𑀸. 𑀦 𑀯𑀸𑀘𑁂𑀬𑁆𑀬𑀸𑀢𑀺 𑀧𑀭𑁂𑀲𑀁 𑀦 𑀯𑀸𑀘𑁂𑀬𑁆𑀬. 𑀇𑀫𑀺𑀦𑀸𑀯 𑀅𑀢𑁆𑀢𑀦𑁄 𑀧𑀭𑀺𑀬𑀸𑀧𑀼𑀡𑀦𑀫𑁆𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀁 𑀮𑁄𑀓𑀸𑀬𑀢𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀢𑀺 𑀘 𑀭𑀸𑀕𑀤𑁄𑀲𑀫𑁄𑀳𑀯𑀟𑁆𑀠𑀸𑀦𑀺 𑀩𑀼𑀤𑁆𑀥𑀸𑀤𑀺𑀕𑀭𑀳𑀺𑀢𑀸 𑀲𑀕𑁆𑀕𑀫𑁄𑀓𑁆𑀔𑀸𑀦𑀁 𑀢𑀺𑀭𑁄 𑀢𑀺𑀭𑀺𑀬𑀢𑁄 𑀅𑀜𑁆𑀘𑀺𑀢𑀸 𑀕𑀢𑀸 𑀧𑀯𑀢𑁆𑀢𑀸 𑀓𑀩𑁆𑀩𑀦𑀸𑀝𑀓𑀸𑀤𑀺𑀓𑀸 𑀲𑀩𑁆𑀩𑀸𑀧𑀺 𑀯𑀺𑀚𑁆𑀚𑀸 𑀅𑀦𑀼𑀮𑁄𑀫𑀯𑀲𑁂𑀦 𑀯𑀸 𑀯𑀺𑀦𑀬𑀧𑀭𑀺𑀬𑀸𑀬𑀁 𑀧𑀢𑁆𑀯𑀸 𑀕𑀭𑀼𑀓𑁂 𑀞𑀸𑀢𑀩𑁆𑀩𑀦𑁆𑀢𑀺 𑀯𑀺𑀦𑀬𑀬𑀼𑀢𑁆𑀢𑀺𑀢𑁄𑀧𑀺 𑀲𑀗𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀜𑁆𑀘 𑀦𑁄 𑀕𑀭𑀽𑀦𑀫𑀼𑀧𑀤𑁂𑀲𑁄. 𑀧𑁂𑀴𑀸𑀬𑀧𑀻𑀢𑀺 𑀬𑀢𑁆𑀣 𑀧𑀸𑀢𑀺𑀁 𑀞𑀧𑁂𑀢𑁆𑀯𑀸 𑀲𑀼𑀔𑀺𑀦𑁄 𑀪𑀼𑀜𑁆𑀚𑀦𑁆𑀢𑀺, 𑀢𑀫𑁆𑀩𑀮𑁄𑀳𑁂𑀦 𑀭𑀚𑀢𑁂𑀦 𑀯𑀸 𑀓𑀢𑀸𑀬 𑀢𑀸𑀬 𑀆𑀲𑀺𑀢𑁆𑀢𑀓𑀽𑀧𑀥𑀸𑀦𑀲𑀗𑁆𑀔𑀸𑀢𑀸𑀬 𑀧𑁂𑀴𑀸𑀬 𑀞𑀧𑁂𑀢𑁆𑀯𑀸.

𑁩𑁫𑁬. 𑀧𑀸𑀭𑀼𑀢𑀜𑁆𑀘 𑀦𑀺𑀯𑀸𑀲𑀦𑀜𑁆𑀘, 𑀕𑀺𑀳𑀻𑀦𑀁 𑀳𑀢𑁆𑀣𑀺𑀲𑁄𑀡𑁆𑀟𑀸𑀤𑀺𑀯𑀲𑁂𑀦 𑀧𑀸𑀭𑀼𑀢𑀦𑀺𑀯𑀸𑀲𑀦𑀁 𑀬𑀲𑁆𑀲 𑀧𑀸𑀭𑀼𑀧𑀦𑀲𑁆𑀲 𑀦𑀺𑀯𑀸𑀲𑀦𑀲𑁆𑀲𑀸𑀢𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀲𑀫𑀸𑀲𑁄. 𑀕𑀺𑀳𑀺𑀧𑀸𑀭𑀼𑀢𑀦𑀺𑀯𑀸𑀲𑀦𑀁 𑀦 𑀧𑀸𑀭𑀼𑀧𑁂 𑀦 𑀦𑀺𑀯𑀸𑀲𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀁𑀯𑁂𑀮𑁆𑀮𑀺𑀬𑀁 𑀦 𑀦𑀺𑀯𑀸𑀲𑁂𑀬𑁆𑀬𑀸𑀢𑀺 𑀫𑀮𑁆𑀮𑀓𑀫𑁆𑀫𑀓𑀭𑀸𑀤𑀬𑁄 𑀯𑀺𑀬 𑀓𑀘𑁆𑀙𑀁 𑀓𑀢𑁆𑀯𑀸 𑀦 𑀦𑀺𑀯𑀸𑀲𑁂𑀬𑁆𑀬. 𑀏𑀯𑀁 𑀦𑀺𑀯𑀸𑀲𑁂𑀢𑀼𑀁 𑀕𑀺𑀮𑀸𑀦𑀲𑁆𑀲𑀸𑀧𑀺 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀸𑀧𑀺 𑀦 𑀯𑀝𑁆𑀝𑀢𑀺. 𑀬𑀫𑁆𑀧𑀺 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀸 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀓𑁄𑀡𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑀭𑀯𑀸𑀲𑀓𑀲𑁆𑀲 𑀉𑀧𑀭𑀺 𑀮𑀕𑁆𑀕𑀦𑁆𑀢𑀺, 𑀦 𑀯𑀝𑁆𑀝𑀢𑀺. 𑀏𑀯𑀁 𑀅𑀧𑀸𑀭𑀼𑀧𑀺𑀢𑁆𑀯𑀸 𑀅𑀦𑀺𑀯𑀸𑀲𑁂𑀢𑁆𑀯𑀸 𑀘 𑀦𑀺𑀩𑁆𑀩𑀺𑀓𑀸𑀭𑀁 𑀧𑀭𑀺𑀫𑀡𑁆𑀟𑀮𑀁 𑀧𑀸𑀭𑀼𑀧𑀺𑀢𑀩𑁆𑀩𑀁 𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁂𑀦 𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀢𑀩𑁆𑀩𑀜𑁆𑀘, 𑀢𑀣𑀸 𑀅𑀧𑀸𑀭𑀼𑀧𑀺𑀢𑁆𑀯𑀸 𑀅𑀦𑀺𑀯𑀸𑀲𑁂𑀢𑁆𑀯𑀸 𑀘 𑀆𑀭𑀸𑀫𑁂 𑀯𑀸 𑀅𑀦𑁆𑀢𑀭𑀖𑀭𑁂 𑀯𑀸 𑀅𑀦𑀸𑀤𑀭𑁂𑀦 𑀬𑀁 𑀓𑀺𑀜𑁆𑀘𑀺 𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀤𑀸𑀬𑀦𑁆𑀢𑀺 𑀯𑀦𑀁. 𑀦𑀸𑀮𑀺𑀫𑁆𑀧𑀬𑁂𑀬𑁆𑀬𑀸𑀢𑀺 ‘‘𑀲𑀩𑁆𑀩𑀽𑀧𑀓𑀸𑀭𑀸𑀦𑀺 𑀯𑀺𑀦𑀲𑁆𑀲𑀦𑁆𑀢𑀽’’𑀢𑀺 𑀯𑀸 𑀔𑀺𑀟𑁆𑀟𑀸𑀥𑀺𑀧𑁆𑀧𑀸𑀬𑁂𑀦 𑀯𑀸 𑀦𑀸𑀮𑀺𑀫𑁆𑀧𑀬𑁂𑀬𑁆𑀬.

𑁩𑁫𑁭. 𑀯𑀟𑁆𑀠𑀺𑀁 𑀦𑁄 𑀧𑀬𑁄𑀚𑀬𑁂 𑀅𑀜𑁆𑀜𑀸𑀢𑀓𑀧𑁆𑀧𑀯𑀸𑀭𑀺𑀢𑁂 𑀦𑁄 𑀬𑀸𑀘𑁂𑀢𑀺 𑀬𑁄𑀚𑀦𑀸. 𑀅𑀜𑁆𑀜𑀲𑁆𑀲𑀸𑀢𑀺 𑀲𑀳𑀥𑀫𑁆𑀫𑀺𑀓𑀲𑁆𑀲𑀸𑀧𑀺. 𑀓𑀢𑀺𑀧𑀸𑀳𑀁 𑀪𑀼𑀢𑁆𑀯𑀸 𑀯𑀸𑀢𑀺 𑀬𑁄𑀚𑀦𑀻𑀬𑀁. 𑀧𑀼𑀦𑁄𑀢𑀺 𑀦𑀺𑀧𑀸𑀢𑁄.

𑁩𑁫𑁮. 𑀤𑀡𑁆𑀟𑀺𑀦𑀁 𑀜𑀢𑁆𑀯𑀸 𑀯𑀸 𑀅𑀜𑀢𑁆𑀯𑀸 𑀯𑀸 𑀉𑀤𑁆𑀤𑀺𑀲𑁆𑀲 𑀭𑀓𑁆𑀔𑀁 𑀬𑀸𑀘𑀦𑁂 𑀤𑀡𑁆𑀟𑀺𑀢𑁂 𑀤𑀡𑁆𑀟𑁄 𑀅𑀲𑁆𑀲 𑀕𑀻𑀯𑀸𑀢𑀺 𑀬𑁄𑀚𑀦𑀸. 𑀤𑀡𑁆𑀟𑀁 𑀕𑀡𑁆𑀳𑀢𑀻𑀢𑀺 𑀧𑀘𑁆𑀘𑀬𑀦𑁆𑀢𑀲𑁆𑀲 𑀤𑀡𑁆𑀟𑀺𑀦𑀁 𑀤𑀡𑁆𑀟𑀕𑁆𑀕𑀳𑀡𑀦𑁆𑀢𑀺 𑀅𑀢𑁆𑀣𑁄. 𑀉𑀤𑁆𑀤𑀺𑀲𑁆𑀲𑀸𑀢𑀺 ‘‘𑀅𑀫𑁆𑀳𑀸𑀓𑀁 𑀯𑀺𑀳𑀸𑀭𑁂 𑀅𑀲𑀼𑀓𑁂𑀦 𑀘 𑀅𑀲𑀼𑀓𑁂𑀦 𑀘 𑀇𑀤𑀁 𑀦𑀸𑀫 𑀓𑀢’’𑀦𑁆𑀢𑀺, ‘‘𑀓𑀭𑀺𑀲𑁆𑀲’’𑀦𑁆𑀢𑀺 𑀯𑀸 𑀏𑀯𑀁 𑀅𑀢𑀻𑀢𑀁 𑀯𑀸 𑀅𑀦𑀸𑀕𑀢𑀁 𑀯𑀸 𑀆𑀭𑀩𑁆𑀪. 𑀬𑀸𑀘𑀦𑁂𑀢𑀺 𑀯𑁄𑀳𑀸𑀭𑀺𑀓𑁂𑀲𑀼 𑀬𑀸𑀘𑀦𑁂 𑀲𑀢𑀺. 𑀤𑀡𑁆𑀟𑀺𑀢𑁂𑀢𑀺 𑀢𑁂𑀳𑀺 𑀤𑀡𑁆𑀟𑁂 𑀕𑀳𑀺𑀢𑁂 𑀲𑁄 𑀤𑀡𑁆𑀟𑁄 𑀅𑀲𑁆𑀲 𑀬𑀸𑀘𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀻𑀯𑀸, 𑀇𑀡𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀯𑁄𑀳𑀸𑀭𑀺𑀓𑁂𑀳𑀺 𑀧𑀦 ‘‘𑀓𑁂𑀦𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀲𑀼𑀓𑁂𑀦𑀸𑀢𑀺 𑀯𑀢𑁆𑀢𑀼𑀁 𑀅𑀫𑁆𑀳𑀸𑀓𑀁 𑀦 𑀯𑀝𑁆𑀝𑀢𑀺, 𑀢𑀼𑀫𑁆𑀳𑁂𑀬𑁂𑀯 𑀚𑀸𑀦𑀺𑀲𑁆𑀲𑀣, 𑀓𑁂𑀯𑀮𑀜𑁆𑀳𑀺 𑀫𑀬𑀁 𑀭𑀓𑁆𑀔𑀁 𑀬𑀸𑀘𑀸𑀫, 𑀢𑀁 𑀦𑁄 𑀤𑁂𑀣, 𑀅𑀯𑀳𑀝𑀪𑀡𑁆𑀟𑀜𑁆𑀘 𑀫𑀁 𑀆𑀳𑀭𑀸𑀧𑁂𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀏𑀯𑀁 𑀅𑀦𑁄𑀤𑀺𑀲𑁆𑀲 𑀆𑀘𑀺𑀓𑁆𑀔𑀡𑀸 𑀳𑁄𑀢𑀺, 𑀲𑀸 𑀯𑀝𑁆𑀝𑀢𑀺. 𑀧𑀸𑀭𑀸𑀚𑀺𑀓𑀸𑀤𑀺𑀓𑀸𑀢𑀺 𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀸𑀦𑀺.

𑁩𑁫𑁯. ‘‘𑀳𑀭𑀦𑁆𑀢𑁂𑀲𑀼 𑀧𑀭𑀺𑀓𑁆𑀔𑀸𑀭𑀁,

𑀘𑁄𑀭𑁄 𑀘𑁄𑀭𑁄𑀢𑀺 𑀪𑀸𑀲𑀺𑀢𑁂;

𑀅𑀦𑀢𑁆𑀣𑀸𑀬𑁂𑀲𑀁 𑀕𑀡𑁆𑀳𑀦𑁆𑀢𑁂’’𑀢𑀺. 𑁋

𑀧𑀸𑀞𑁂𑀳𑀺 𑀪𑀯𑀺𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀲𑀢𑀺 ‘‘𑀳𑀭𑀦𑁆𑀢𑁂𑀲𑀽’’𑀢𑀺 𑀩𑀳𑀼𑀯𑀘𑀦𑁂𑀦 𑀲𑀳 𑀖𑀝𑀢𑁂. 𑀧𑀭𑀺𑀓𑁆𑀔𑀸𑀭𑀁 𑀳𑀭𑀦𑁆𑀢𑁂𑀲𑀼 𑀏𑀲𑀁 𑀅𑀦𑀢𑁆𑀣𑀸𑀬 ‘‘𑀘𑁄𑀭𑁄 𑀘𑁄𑀭𑁄’’𑀢𑀺 𑀪𑀸𑀲𑀺𑀢𑁂 𑀤𑀡𑁆𑀟𑀁 𑀕𑀡𑁆𑀳𑀦𑁆𑀢𑁂 𑀢𑀢𑁆𑀢𑀓𑀁 𑀅𑀲𑁆𑀲 𑀕𑀻𑀯𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀳𑀭𑀦𑁆𑀢𑁂𑀲𑀽𑀢𑀺 𑀘𑁄𑀭𑁂𑀲𑀼 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁂𑀲𑀼. 𑀏𑀲𑀦𑁆𑀢𑀺 𑀘𑁄𑀭𑀸𑀦𑀁. 𑀕𑀡𑁆𑀳𑀦𑁆𑀢𑁂𑀢𑀺 𑀯𑁄𑀳𑀸𑀭𑀺𑀓𑀚𑀦𑁂 𑀕𑀡𑁆𑀳𑀦𑁆𑀢𑁂. 𑀬𑀢𑁆𑀢𑀓𑀁 𑀕𑀳𑀺𑀢𑀁, 𑀢𑀢𑁆𑀢𑀓𑀁 𑀅𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀻𑀯𑀸, 𑀪𑀡𑁆𑀟𑀤𑁂𑀬𑁆𑀬𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁩𑁬𑁦. 𑀧𑀸𑀓𑀸𑀭𑀓𑀼𑀝𑁆𑀝𑀸𑀦𑀁 𑀩𑀳𑀺 𑀯𑀴𑀜𑁆𑀚𑁂 𑀯𑀸𑀧𑀺 𑀯𑀻𑀳𑀸𑀤𑀺𑀦𑀸𑀴𑀺𑀓𑁂𑀭𑀸𑀤𑀺𑀭𑁄𑀧𑀺𑀫𑁂 𑀳𑀭𑀺𑀢𑁂 𑀯𑀸𑀧𑀺 𑀯𑀺𑀖𑀸𑀲𑀼𑀘𑁆𑀘𑀸𑀭𑀲𑀗𑁆𑀓𑀸𑀭𑀫𑀼𑀢𑁆𑀢𑀁 𑀦𑀸𑀯𑀮𑁄𑀓𑀺𑀬 𑀙𑀟𑁆𑀟𑁂𑀬𑁆𑀬, 𑀤𑀼𑀓𑁆𑀓𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀴𑀜𑁆𑀚𑁂 𑀦𑀸𑀯𑀮𑁄𑀓𑀺𑀬𑀸𑀢𑀺 𑀘 𑀇𑀫𑀺𑀦𑀸 𑀑𑀮𑁄𑀓𑁂𑀢𑁆𑀯𑀸 𑀯𑀸 𑀅𑀯𑀴𑀜𑁆𑀚𑁂 𑀯𑀸 𑀯𑀺𑀖𑀸𑀲𑀸𑀤𑀻𑀦𑀺 𑀙𑀟𑁆𑀟𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀯𑀻𑀳𑀺 𑀆𑀤𑀺 𑀬𑁂𑀲𑀁 𑀲𑀸𑀮𑀺𑀆𑀤𑀻𑀦𑀁 𑀢𑁂 𑀯𑀻𑀳𑀸𑀤𑀬𑁄, 𑀦𑀸𑀴𑀺𑀓𑁂𑀭𑁄 𑀆𑀤𑀺 𑀬𑁂𑀲𑀁 𑀅𑀫𑁆𑀩𑀧𑀦𑀲𑀸𑀤𑀻𑀦𑀁 𑀢𑁂 𑀦𑀸𑀴𑀺𑀓𑁂𑀭𑀸𑀤𑀬𑁄, 𑀯𑀻𑀳𑀸𑀤𑀬𑁄 𑀘 𑀦𑀸𑀴𑀺𑀓𑁂𑀭𑀸𑀤𑀬𑁄 𑀘𑀸𑀢𑀺 𑀤𑁆𑀯𑀦𑁆𑀤𑁄, 𑀢𑁂𑀲𑀁 𑀭𑁄𑀧𑁄, 𑀢𑁂𑀦 𑀦𑀺𑀩𑁆𑀩𑀢𑁆𑀢𑀁 𑀯𑀻𑀳𑀸𑀤𑀺…𑀧𑁂… 𑀭𑁄𑀧𑀺𑀫𑀁. 𑀳𑀭𑀺𑀢𑁂𑀢𑀺 𑀳𑀭𑀺𑀢𑀝𑁆𑀞𑀸𑀦𑁂. 𑀯𑀺𑀖𑀸𑀲𑁄 𑀦𑀸𑀫 𑀉𑀘𑁆𑀙𑀺𑀝𑁆𑀞𑁄𑀤𑀓𑀘𑀮𑀓𑀸𑀤𑀺.

𑁩𑁬𑁧. 𑀥𑀫𑁆𑀫𑀬𑀼𑀢𑁆𑀢𑀫𑁆𑀧𑀺 𑀦𑀘𑁆𑀘𑀜𑁆𑀘 𑀕𑀻𑀢𑀜𑁆𑀘 𑀯𑀸𑀤𑀺𑀢𑀜𑁆𑀘 𑀬𑁄𑀚𑀸𑀧𑁂𑀢𑀼𑀜𑁆𑀘 𑀧𑀬𑁄𑀚𑁂𑀢𑀼𑀜𑁆𑀘 𑀧𑀬𑀼𑀢𑁆𑀢𑀸𑀦𑀺 𑀧𑀲𑁆𑀲𑀺𑀢𑀼𑀜𑁆𑀘 ‘‘𑀉𑀧𑀳𑀸𑀭𑀁 𑀓𑀭𑁄𑀫𑀸’’𑀢𑀺 𑀯𑀼𑀢𑁆𑀢𑁂 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀸 𑀦 𑀮𑀩𑁆𑀪𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀥𑀫𑁆𑀫𑀬𑀼𑀢𑁆𑀢𑀫𑁆𑀧𑀻𑀢𑀺 𑀭𑀢𑀦𑀢𑁆𑀢𑀬𑀕𑀼𑀡𑀽𑀧𑀲𑀁𑀳𑀺𑀢𑀢𑀸𑀬 𑀅𑀦𑁆𑀢𑀫𑀲𑁄 𑀥𑀫𑁆𑀫𑁂𑀦 𑀧𑀼𑀜𑁆𑀜𑁂𑀦 𑀲𑀁𑀬𑀼𑀢𑁆𑀢𑀫𑁆𑀧𑀺. 𑀦𑀘𑁆𑀘𑀦𑁆𑀢𑀺 𑀅𑀦𑁆𑀢𑀫𑀲𑁄 𑀫𑁄𑀭𑀲𑀼𑀓𑀫𑀓𑁆𑀓𑀝𑀸𑀤𑀻𑀦𑀁 𑀦𑀘𑁆𑀘𑀫𑁆𑀧𑀺. 𑀕𑀻𑀢𑀦𑁆𑀢𑀺 𑀅𑀦𑁆𑀢𑀫𑀲𑁄 𑀕𑀻𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀓𑀬𑀺𑀭𑀫𑀸𑀦𑀁 𑀤𑀦𑁆𑀢𑀕𑀻𑀢𑀫𑁆𑀧𑀺. 𑀯𑀸𑀤𑀺𑀢𑀦𑁆𑀢𑀺 𑀅𑀦𑁆𑀢𑀫𑀲𑁄 𑀉𑀤𑀓𑀪𑁂𑀭𑀺𑀯𑀸𑀤𑀺𑀢𑀫𑁆𑀧𑀺. 𑀬𑁄𑀚𑀸𑀧𑁂𑀢𑀼𑀦𑁆𑀢𑀺 𑀅𑀜𑁆𑀜𑁂𑀳𑀺 𑀓𑀸𑀭𑀸𑀧𑁂𑀢𑀼𑀁. 𑀧𑀬𑁄𑀚𑁂𑀢𑀼𑀦𑁆𑀢𑀺 𑀅𑀢𑁆𑀢𑀦𑀸 𑀓𑀸𑀢𑀼𑀁. 𑀆𑀬𑀢𑀓𑁂𑀦 𑀕𑀻𑀢𑀲𑁆𑀲𑀭𑁂𑀦 𑀥𑀫𑁆𑀫𑀫𑁆𑀧𑀺 𑀪𑀸𑀲𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀧𑀬𑀼𑀢𑁆𑀢𑀸𑀦𑀻𑀢𑀺 𑀧𑀭𑁂𑀳𑀺 𑀬𑁂𑀳𑀺 𑀓𑁂𑀳𑀺𑀘𑀺 𑀓𑀢𑀸𑀦𑀺. 𑀧𑀲𑁆𑀲𑀺𑀢𑀼𑀦𑁆𑀢𑀺 𑀇𑀫𑀺𑀦𑀸 𑀅𑀦𑁄𑀮𑁄𑀘𑀦𑀤𑀲𑁆𑀲𑀦𑀫𑁆𑀧𑀺 𑀕𑀳𑀺𑀢𑀦𑁆𑀢𑀺 𑀲𑁄𑀢𑀼𑀦𑁆𑀢𑀺𑀧𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀅𑀦𑁆𑀢𑀭𑀸𑀭𑀸𑀫𑁂 𑀞𑀺𑀢𑀲𑁆𑀲 𑀧𑀲𑁆𑀲𑀢𑁄 𑀅𑀦𑀸𑀧𑀢𑁆𑀢𑀺. 𑀯𑀻𑀣𑀺𑀬𑀁 𑀞𑀢𑁆𑀯𑀸 𑀕𑀻𑀯𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀲𑁆𑀲𑀢𑁄𑀧𑀺 𑀆𑀧𑀢𑁆𑀢𑀺𑀬𑁂𑀯. 𑀬𑁂𑀦 𑀓𑁂𑀦𑀘𑀺 𑀓𑀭𑀡𑀻𑀬𑁂𑀦 𑀕𑀢𑀝𑁆𑀞𑀸𑀦𑁂 𑀧𑀲𑁆𑀲𑀢𑀺, 𑀲𑀼𑀡𑀸𑀢𑀺 𑀯𑀸, 𑀅𑀦𑀸𑀧𑀢𑁆𑀢𑀺. 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀦𑁆𑀢𑀺 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁. ‘‘𑀉𑀧𑀳𑀸𑀭𑀓𑀭𑀡𑀁 𑀦𑀸𑀫 𑀲𑀼𑀦𑁆𑀤𑀭’’𑀦𑁆𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀯𑀸-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑁂.

𑁩𑁬𑁨. ‘‘𑀓𑀻𑀴𑀢𑁆𑀣𑀁 𑀓𑀢𑀁 𑀭𑀸𑀚𑀸𑀕𑀸𑀭’’𑀦𑁆𑀢𑀺𑀆𑀤𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀘𑀺𑀢𑁆𑀢𑁂𑀦 𑀯𑀺𑀘𑀺𑀢𑁆𑀢𑀓𑀁 𑀆𑀕𑀸𑀭𑀁 𑀘𑀺𑀢𑁆𑀢𑀸𑀕𑀸𑀭𑀓𑀁.

𑁩𑁬𑁩. 𑀆𑀲𑀦𑁂𑀦 𑀦𑀯𑁂 𑀦 𑀧𑀝𑀺𑀩𑀸𑀳𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀆𑀲𑀦𑁂𑀦𑀸𑀢𑀺 𑀆𑀲𑀦𑀢𑁄. 𑀦 𑀧𑀝𑀺𑀩𑀸𑀳𑁂𑀬𑁆𑀬𑀸𑀢𑀺 𑀦 𑀉𑀝𑁆𑀞𑀸𑀧𑁂𑀬𑁆𑀬. 𑀉𑀡𑁆𑀳𑁂 𑀘𑀻𑀯𑀭𑀁 𑀦 𑀦𑀺𑀤𑀳𑁂𑀬𑁆𑀬𑀸𑀢𑀺 𑀬𑁄𑀚𑀦𑀻𑀬𑀁. 𑀦 𑀦𑀺𑀤𑀳𑁂𑀬𑁆𑀬𑀸𑀢𑀺 𑀅𑀥𑀺𑀓𑀁 𑀦 𑀦𑀺𑀤𑀳𑁂𑀬𑁆𑀬. 𑀕𑀭𑀼𑀦𑀸𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀦. 𑀧𑀡𑀸𑀫𑀺𑀢𑁄𑀢𑀺 ‘‘𑀫𑀸 𑀇𑀥 𑀧𑀯𑀺𑀲𑀸’’𑀢𑀺𑀆𑀤𑀺𑀦𑀸 𑀦𑀺𑀓𑁆𑀓𑀟𑁆𑀠𑀺𑀢𑁄.

𑁩𑁬𑁪. 𑀲𑀢𑁆𑀢𑀳𑀺 𑀆𑀧𑀢𑁆𑀢𑀻𑀳𑀺 𑀘 𑀪𑀺𑀓𑁆𑀔𑀼𑀁 𑀯𑀸𑀧𑀺 𑀅𑀜𑁆𑀜𑁂𑀦𑁂𑀯 𑀘 𑀉𑀧𑀸𑀲𑀓𑀁 𑀯𑀸𑀧𑀺 𑀧𑀭𑀫𑁆𑀫𑀼𑀔𑀸 𑀅𑀓𑁆𑀓𑁄𑀲𑀦𑁂 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀆𑀧𑀢𑁆𑀢𑀻𑀳𑀺 𑀘𑀸𑀢𑀺 𑀘-𑀲𑀤𑁆𑀤𑁄 𑀅𑀯𑀥𑀸𑀭𑀡𑁂. 𑀅𑀜𑁆𑀜𑁂𑀦𑁂𑀯 𑀘𑀸𑀢𑀺 𑀏𑀢𑁆𑀣 𑀏𑀯 𑀘𑀸𑀢𑀺 𑀦𑀺𑀧𑀸𑀢𑀲𑀫𑀼𑀤𑀸𑀬𑁄, 𑀏𑀓𑁄 𑀏𑀯 𑀯𑀸 𑀅𑀯𑀥𑀸𑀭𑀡𑁂, 𑀯𑀼𑀢𑁆𑀢𑀢𑁄 𑀅𑀜𑁆𑀜𑁂𑀦𑁂𑀯 ‘‘𑀅𑀲𑀤𑁆𑀥𑁄’’𑀢𑀺𑀆𑀤𑀺𑀦𑀸𑀢𑀺 𑀅𑀢𑁆𑀣𑁄. 𑀧𑀭𑀫𑁆𑀫𑀼𑀔𑀸𑀢𑀺 𑀦𑀺𑀧𑀸𑀢𑁄, 𑀢𑀲𑁆𑀲 𑀅𑀲𑀫𑁆𑀫𑀼𑀔𑁂𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀼𑀔𑀸 𑀯𑀤𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀧𑀸𑀧𑀕𑀭𑀳𑀡𑀯𑀲𑁂𑀦 𑀧𑀦 𑀯𑀤𑀢𑁄 𑀅𑀦𑀸𑀧𑀢𑁆𑀢𑀺.

𑁩𑁬𑁫. 𑀲𑀤𑁆𑀥𑀸𑀤𑁂𑀬𑁆𑀬𑀁 𑀲𑀤𑁆𑀥𑀸𑀬 𑀤𑀸𑀢𑀩𑁆𑀩𑀁 𑀘𑀻𑀯𑀭𑀜𑁆𑀘 𑀘-𑀲𑀤𑁆𑀤𑁂𑀦 𑀅𑀯𑀲𑁂𑀲𑀫𑁆𑀧𑀺 𑀯𑀺𑀦𑀺𑀧𑀸𑀢𑁂𑀢𑀼𑀁 𑀦𑀸𑀲𑁂𑀢𑀼𑀁 𑀦 𑀮𑀩𑁆𑀪𑀁, 𑀧𑀺𑀢𑀽𑀦𑀁 𑀮𑀩𑁆𑀪𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀜𑀸𑀢𑀻𑀦𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑁂.

𑁩𑁬𑁬. 𑀅𑀜𑁆𑀜𑀢𑁆𑀭 𑀯𑀲𑁆𑀲𑀁𑀯𑀼𑀢𑁆𑀣𑁄 𑀅𑀜𑁆𑀜𑀢𑁄 𑀪𑀸𑀕𑀁 𑀕𑀡𑁆𑀳𑁂𑀬𑁆𑀬, 𑀤𑀼𑀓𑁆𑀓𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑀢𑁆𑀭𑀸𑀢𑀺 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂. 𑀅𑀜𑁆𑀜𑀢𑁄𑀢𑀺 𑀅𑀜𑁆𑀜𑀯𑀺𑀳𑀸𑀭𑀢𑁄. 𑀧𑀝𑀺𑀤𑁂𑀬𑁆𑀬𑀸𑀢𑀺 𑀕𑀳𑀺𑀢𑀝𑁆𑀞𑀸𑀦𑁂 𑀤𑀤𑁂𑀬𑁆𑀬. 𑀕𑀳𑀺𑀢𑁂 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀦𑀝𑁆𑀞𑁂 𑀯𑀸 𑀚𑀺𑀡𑁆𑀡𑁂 𑀯𑀸 𑀢𑀲𑁆𑀲 𑀕𑀻𑀯𑀸𑀳𑁄 𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀘𑁄𑀤𑀺𑀢𑁄 𑀦𑁄 𑀤𑀤𑁂𑀬𑁆𑀬, 𑀢𑁂𑀲𑀁 𑀥𑀼𑀭𑀦𑀺𑀓𑁆𑀔𑁂𑀧𑀢𑁄 𑀪𑀡𑁆𑀟𑀕𑁆𑀖𑀓𑀸𑀭𑀺𑀬𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀘𑁄𑀤𑀺𑀢𑁄𑀢𑀺 𑀯𑀢𑁆𑀣𑀼𑀲𑀸𑀫𑀺𑀓𑁂𑀳𑀺 ‘‘𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁄. 𑀢𑁂𑀲𑀦𑁆𑀢𑀺 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀮𑀸𑀪𑀻𑀦𑀁 𑀪𑀺𑀓𑁆𑀔𑀽𑀦𑀁.

𑁩𑁬𑁭. 𑀲𑀦𑁆𑀢𑀭𑀼𑀢𑁆𑀢𑀭𑁄 𑀯𑀸 𑀓𑀮𑁆𑀮𑁄 𑀲𑀉𑀧𑀸𑀳𑀦𑁄 𑀯𑀸 𑀕𑀸𑀫𑀁 𑀦 𑀧𑀯𑀺𑀲𑁂𑀬𑁆𑀬, 𑀘𑀸𑀫𑀭𑀻𑀫𑀓𑀲𑀩𑀻𑀚𑀦𑀺𑀁 𑀦 𑀥𑀸𑀭𑁂𑀬𑁆𑀬𑀸𑀢𑀺 𑀬𑁄𑀚𑀦𑀻𑀬𑀁. 𑀅𑀦𑁆𑀢𑀭𑀜𑁆𑀘 𑀉𑀢𑁆𑀢𑀭𑀜𑁆𑀘, 𑀲𑀳 𑀅𑀦𑁆𑀢𑀭𑀼𑀢𑁆𑀢𑀭𑁂𑀦 𑀲𑀦𑁆𑀢𑀭𑀼𑀢𑁆𑀢𑀭𑁄. 𑀅𑀕𑁆𑀕𑀴𑀕𑀼𑀢𑁆𑀢𑁂 𑀯𑀺𑀳𑀸𑀭𑁂 𑀲𑀗𑁆𑀖𑀸𑀝𑀺𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀆𑀭𑀜𑁆𑀜𑀓𑁂𑀦 𑀧𑀦 𑀪𑀡𑁆𑀟𑀼𑀓𑁆𑀔𑀮𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀸𑀲𑀸𑀡𑀭𑀼𑀓𑁆𑀔𑀲𑀼𑀲𑀺𑀭𑀸𑀤𑀻𑀲𑀼 𑀧𑀝𑀺𑀘𑁆𑀙𑀦𑁆𑀦𑁂𑀲𑀼 𑀞𑀧𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀅𑀦𑁆𑀢𑀭𑀼𑀢𑁆𑀢𑀭𑀸𑀦𑀁 𑀦𑀺𑀓𑁆𑀔𑁂𑀧𑁂 𑀅𑀬𑀫𑁂𑀯 𑀦𑀬𑁄. 𑀓𑀮𑁆𑀮𑁄𑀢𑀺 𑀅𑀕𑀺𑀮𑀸𑀦𑁄. 𑀫𑀓𑀲𑀸𑀦𑀁 𑀩𑀻𑀚𑀦𑀻 𑀫𑀓𑀲𑀩𑀻𑀚𑀦𑀻, 𑀘𑀫𑀭𑀻𑀦𑀁 𑀯𑀸𑀴𑁂𑀳𑀺 𑀓𑀢𑀸 𑀫𑀓𑀲𑀩𑀻𑀚𑀦𑀻𑀢𑀺 𑀲𑀫𑀸𑀲𑁄.

𑁩𑁬𑁮. 𑀆𑀭𑀸𑀫𑀢𑁄 𑀩𑀳𑀻𑀢𑀺 𑀲𑀫𑁆𑀩𑀦𑁆𑀥𑀦𑀻𑀬𑀁. 𑀆𑀭𑀸𑀫𑀢𑁄𑀢𑀺 𑀆𑀭𑀸𑀫𑀽𑀧𑀘𑀸𑀭𑀢𑁄. 𑀦 𑀥𑀸𑀭𑁂𑀬𑁆𑀬𑀸𑀢𑀺 𑀅𑀕𑀺𑀮𑀸𑀦𑁄 𑀦 𑀥𑀸𑀭𑁂𑀬𑁆𑀬. 𑀬𑀲𑁆𑀲 𑀧𑀦 𑀓𑀸𑀬𑀤𑀸𑀳𑁄 𑀯𑀸 𑀧𑀺𑀢𑁆𑀢𑀓𑁄𑀧𑁄 𑀯𑀸 𑀳𑁄𑀢𑀺, 𑀘𑀓𑁆𑀔𑀼 𑀯𑀸 𑀤𑀼𑀩𑁆𑀩𑀮𑀁, 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀆𑀩𑀸𑀥𑁄 𑀯𑀺𑀦𑀸 𑀙𑀢𑁆𑀢𑁂𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀕𑀸𑀫𑁂 𑀯𑀸 𑀅𑀭𑀜𑁆𑀜𑁂 𑀯𑀸 𑀙𑀢𑁆𑀢𑀁 𑀯𑀝𑁆𑀝𑀢𑀺. 𑀕𑀼𑀢𑁆𑀢𑀺𑀬𑀸 𑀮𑀩𑁆𑀪𑀢𑀻𑀢𑀺 𑀯𑀲𑁆𑀲𑁂 𑀘𑀻𑀯𑀭𑀕𑀼𑀢𑁆𑀢𑀢𑁆𑀣𑀁, 𑀯𑀸𑀴𑀫𑀺𑀕𑀘𑁄𑀭𑀪𑀬𑁂𑀲𑀼 𑀅𑀢𑁆𑀢𑀕𑀼𑀢𑁆𑀢𑀢𑁆𑀣𑀫𑁆𑀧𑀺 𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀧𑀡𑁆𑀡𑀙𑀢𑁆𑀢𑀁 𑀧𑀦 𑀲𑀩𑁆𑀩𑀢𑁆𑀣𑁂𑀯 𑀯𑀝𑁆𑀝𑀢𑀺.

𑁩𑁬𑁯. 𑀉𑀪𑀢𑁄𑀓𑀸𑀚𑀁 𑀦 𑀕𑀸𑀳𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀪𑀢𑁄 𑀤𑀡𑁆𑀟𑀲𑁆𑀲 𑀉𑀪𑀬𑀓𑁄𑀝𑀺𑀬𑀁 𑀪𑀸𑀭𑀩𑀦𑁆𑀥𑀓𑀸𑀚𑀁 𑀉𑀪𑀢𑁄𑀓𑀸𑀚𑀁, 𑀅𑀮𑁄𑀧𑀢𑀧𑁆𑀧𑀼𑀭𑀺𑀲𑁄. 𑀏𑀓𑀦𑁆𑀢𑀭𑀺𑀓𑀓𑀸𑀚𑀓𑀦𑁆𑀢𑀺 𑀅𑀦𑁆𑀢𑀭𑀫𑁂𑀯 𑀅𑀦𑁆𑀢𑀭𑀺𑀓𑀁, 𑀏𑀓𑀜𑁆𑀘 𑀅𑀦𑁆𑀢𑀭𑀺𑀓𑀜𑁆𑀘𑀸𑀢𑀺 𑀤𑁆𑀯𑀦𑁆𑀤𑁄, 𑀏𑀓𑀦𑁆𑀢𑀭𑀺𑀓𑁂 𑀪𑀸𑀭𑀩𑀦𑁆𑀥𑀓𑀸𑀚𑀦𑁆𑀢𑀺 𑀢𑀧𑁆𑀧𑀼𑀭𑀺𑀲𑁄 𑀏𑀓𑀢𑁄𑀓𑀸𑀚𑀓𑀁, 𑀅𑀦𑁆𑀢𑀭𑀺𑀓𑀓𑀸𑀚𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀳𑀢𑁆𑀣𑁂 𑀑𑀮𑀫𑁆𑀩𑁄 𑀅𑀲𑁆𑀲 𑀪𑀸𑀭𑀲𑁆𑀲𑀸𑀢𑀺 𑀲𑀫𑀸𑀲𑁄.

𑁩𑁭𑁦. 𑀅𑀦𑁄𑀓𑀸𑀲𑀓𑀢𑀦𑁆𑀢𑀺 ‘‘𑀓𑀭𑁄𑀢𑀼 𑀫𑁂 𑀆𑀬𑀲𑁆𑀫𑀸 𑀑𑀓𑀸𑀲𑀁, 𑀅𑀳𑀁 𑀢𑀁 𑀯𑀢𑁆𑀢𑀼𑀓𑀸𑀫𑁄’’𑀢𑀺 𑀏𑀯𑀁 𑀘𑁄𑀤𑀓𑁂𑀦 𑀑𑀓𑀸𑀲𑁂 𑀓𑀸𑀭𑀸𑀧𑀺𑀢𑁂 𑀦𑀢𑁆𑀣𑀺 𑀑𑀓𑀸𑀲𑁄 𑀓𑀢𑁄 𑀅𑀦𑁂𑀦 𑀘𑀼𑀤𑀺𑀢𑀓𑁂𑀦𑀸𑀢𑀺 𑀩𑀳𑀼𑀩𑁆𑀩𑀻𑀳𑀺. 𑀘𑁄𑀤𑁂𑀬𑁆𑀬𑀸𑀢𑀺 𑀘𑀸𑀯𑀦𑀅𑀓𑁆𑀓𑁄𑀲𑀓𑀫𑁆𑀫𑀯𑀼𑀝𑁆𑀞𑀸𑀦𑀸𑀥𑀺𑀧𑁆𑀧𑀸𑀬𑁂𑀦 𑀘𑁄𑀤𑁂𑀬𑁆𑀬. 𑀉𑀧𑁄𑀲𑀣𑀧𑁆𑀧𑀯𑀸𑀭𑀡𑀝𑁆𑀞𑀧𑀦𑀅𑀦𑀼𑀯𑀺𑀚𑁆𑀚𑀥𑀫𑁆𑀫𑀓𑀣𑀸𑀥𑀺𑀧𑁆𑀧𑀸𑀬𑁂𑀲𑀼 𑀑𑀓𑀸𑀲𑀓𑀫𑁆𑀫𑀁 𑀦𑀢𑁆𑀣𑀺. 𑀲𑀼𑀤𑁆𑀥𑀲𑁆𑀲𑀸𑀢𑀺 𑀅𑀦𑀸𑀧𑀢𑁆𑀢𑀺𑀓𑀢𑀸𑀬 𑀲𑀼𑀤𑁆𑀥𑀲𑁆𑀲. 𑀅𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀅𑀓𑀸𑀭𑀡𑁂. 𑀢𑀣𑀸𑀢𑀺 𑀤𑀼𑀓𑁆𑀓𑀝𑀁 𑀅𑀢𑀺𑀤𑀺𑀲𑀢𑀺. 𑀓𑀭𑁄𑀦𑁆𑀢𑁂𑀦𑀸𑀧𑀺 ‘‘𑀪𑀽𑀢𑀫𑁂𑀯 𑀦𑀼 𑀔𑁄 𑀆𑀧𑀢𑁆𑀢𑀺𑀁 𑀯𑀤𑀢𑀺, 𑀅𑀪𑀽𑀢’’𑀦𑁆𑀢𑀺 𑀏𑀯𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀓𑀸𑀢𑀩𑁆𑀩𑀸. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀁 𑀢𑀼𑀮𑀬𑀺𑀢𑁆𑀯𑀸 𑀑𑀓𑀸𑀲𑀁 𑀓𑀸𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁫𑁩) 𑀳𑀺 𑀯𑀼𑀢𑁆𑀢𑀁.

𑁩𑁭𑁧. 𑀲𑀢𑁆𑀢𑀸𑀦𑀁 𑀧𑀓𑀢𑀗𑁆𑀕𑀼𑀮𑁂𑀦 𑀅𑀝𑁆𑀞𑀗𑁆𑀕𑀼𑀮𑀸𑀥𑀺𑀓𑀁 𑀫𑀜𑁆𑀘𑀧𑁆𑀧𑀝𑀺𑀧𑀸𑀤𑀁 𑀯𑀸 𑀉𑀘𑁆𑀘𑀧𑀸𑀤𑀓𑀁 𑀫𑀜𑁆𑀘𑀁 𑀯𑀸 𑀦 𑀥𑀸𑀭𑀬𑁂𑀢𑀺 𑀬𑁄𑀚𑀦𑀸. 𑀧𑀓𑀢𑀺𑀬𑀸 𑀅𑀗𑁆𑀕𑀼𑀮𑀁 𑀧𑀓𑀢𑀗𑁆𑀕𑀼𑀮𑀁. 𑀢𑀜𑁆𑀘 𑀯𑀟𑁆𑀠𑀓𑀺𑀅𑀗𑁆𑀕𑀼𑀮𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀝𑁆𑀞 𑀘 𑀢𑀸𑀦𑀺 𑀅𑀗𑁆𑀕𑀼𑀮𑀸𑀦𑀺 𑀘, 𑀢𑁂𑀳𑀺 𑀢𑀫𑀥𑀺𑀓𑀁 𑀬𑀲𑁆𑀲𑀸𑀢𑀺 𑀲𑀫𑀸𑀲𑁄. 𑀫𑀜𑁆𑀘𑀸𑀦𑀁 𑀧𑀝𑀺𑀧𑀸𑀤𑁄, 𑀬𑀢𑁆𑀣 𑀫𑀜𑁆𑀘𑀧𑀸𑀤𑁂 𑀦𑀺𑀓𑁆𑀔𑀺𑀧𑀦𑁆𑀢𑀺. 𑀅𑀝𑁆𑀞𑀗𑁆𑀕𑀼𑀮𑀢𑁄 𑀉𑀘𑁆𑀘𑀸 𑀧𑀸𑀤𑀸 𑀬𑀲𑁆𑀲𑀸𑀢𑀺 𑀩𑀳𑀼𑀩𑁆𑀩𑀻𑀳𑀺.

𑁩𑁭𑁨. 𑀫𑀽𑀕𑀩𑁆𑀩𑀢𑀸𑀤𑀺𑀦𑁆𑀢𑀺 𑀫𑀽𑀕𑀸𑀦𑀫𑀺𑀯 𑀢𑀼𑀡𑁆𑀳𑀻𑀪𑀸𑀯𑀲𑀗𑁆𑀔𑀸𑀢𑀁 𑀯𑀢𑀁 𑀆𑀤𑀺 𑀬𑀲𑁆𑀲 𑀕𑁄𑀯𑀢𑀸𑀤𑀺𑀦𑁄 𑀢𑀺𑀢𑁆𑀣𑀺𑀬𑀯𑀢𑀲𑁆𑀲𑀸𑀢𑀺 𑀲𑀫𑀸𑀲𑁄. 𑀔𑀼𑀭𑀫𑁂𑀯 𑀪𑀡𑁆𑀟𑀁 𑀔𑀼𑀭𑀪𑀡𑁆𑀟𑀁. 𑀧𑀼𑀩𑁆𑀩𑁂 𑀦𑁆𑀳𑀸𑀧𑀺𑀢𑁄 𑀦𑁆𑀳𑀸𑀧𑀺𑀢𑀧𑀼𑀩𑁆𑀩𑀓𑁄, 𑀯𑀺𑀲𑁂𑀲𑀦𑀲𑁆𑀲 𑀧𑀭𑀦𑀺𑀧𑀸𑀢𑁄.

𑁩𑁭𑁩. 𑀳𑀢𑁆𑀣𑀓𑀫𑁆𑀫𑀦𑁆𑀢𑀺 𑀳𑀢𑁆𑀣𑁂𑀦 𑀓𑀸𑀢𑀩𑁆𑀩𑀁 𑀯𑀟𑁆𑀠𑀓𑀺𑀆𑀤𑀻𑀦𑀁 𑀓𑀫𑁆𑀫𑀁. 𑀅𑀦𑀼𑀲𑁆𑀲𑀭𑀡𑀁 ‘‘𑀓𑀧𑁆𑀧𑀺𑀬𑀢𑁆𑀢𑀁 𑀫𑁂 𑀬𑁂𑀦 𑀬𑀸𑀘𑀺𑀢𑀁, 𑀅𑀫𑁆𑀳𑁂𑀳𑀺 𑀇𑀫𑀲𑁆𑀲 𑀤𑀸𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀅𑀦𑀼𑀲𑀸𑀭𑁄, 𑀢𑀲𑁆𑀲𑀸 𑀬𑀸𑀘𑀦𑀸𑀬 𑀅𑀦𑀼𑀲𑀸𑀭𑁄 𑀢𑀤𑀦𑀼𑀲𑀸𑀭𑁄, 𑀢𑀢𑁄 𑀮𑀤𑁆𑀥𑀁 𑀬𑀁 𑀓𑀺𑀜𑁆𑀘𑀺 𑀕𑀳𑁂𑀢𑀼𑀦𑁆𑀢𑀺 𑀬𑁄𑀚𑀦𑀸. 𑀓𑀫𑁆𑀫𑀢𑁄 𑀦𑀺𑀕𑁆𑀕𑀢𑁄 𑀦𑀺𑀓𑁆𑀓𑀫𑁆𑀫𑁄, 𑀯𑀺𑀖𑀸𑀲𑀸𑀤𑀸𑀤𑀺. 𑀢𑀁 𑀅𑀬𑀸𑀘𑀺𑀢𑁆𑀯𑀸𑀧𑀺 𑀓𑀸𑀭𑁂𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀳𑀭𑀸𑀧𑁂𑀢𑀼𑀦𑁆𑀢𑀺 𑀅𑀭𑀜𑁆𑀜𑀢𑁄 𑀆𑀦𑁂𑀢𑀼𑀁. 𑀅𑀧𑀭𑀲𑀦𑁆𑀢𑀓𑀦𑁆𑀢𑀺 𑀤𑀸𑀭𑀼𑀢𑀺𑀡𑀧𑀮𑀸𑀮𑀸𑀤𑀺𑀓𑀁 𑀅𑀧𑀭𑀧𑀭𑀺𑀕𑁆𑀕𑀳𑀺𑀢𑀁.

𑁩𑁭𑁪. 𑀕𑀺𑀳𑀻𑀦𑀁 𑀬𑀢𑁆𑀢𑀓𑀁 𑀤𑁂𑀢𑀺, 𑀕𑁄𑀧𑀓𑁂 𑀤𑁂𑀦𑁆𑀢𑁂 𑀕𑀳𑁂𑀢𑀼𑀁 𑀮𑀩𑁆𑀪𑀁, 𑀲𑀗𑁆𑀖𑀘𑁂𑀢𑀺𑀬𑀲𑀦𑁆𑀢𑀓𑁂 𑀬𑀣𑀸𑀧𑀭𑀺𑀘𑁆𑀙𑁂𑀤𑀁 𑀕𑀳𑁂𑀢𑀼𑀁 𑀮𑀩𑁆𑀪𑀦𑁆𑀢𑀺 𑀬𑁄𑀚𑀦𑀸. 𑀤𑁂𑀢𑀻𑀢𑀺 𑀕𑁄𑀧𑀓𑁄 𑀪𑀺𑀓𑁆𑀔𑀽𑀦𑀁 𑀤𑁂𑀢𑀺. 𑀕𑀳𑁂𑀢𑀼𑀦𑁆𑀢𑀺 𑀢𑀢𑁆𑀢𑀓𑀁 𑀕𑀳𑁂𑀢𑀼𑀁. 𑀲𑀗𑁆𑀖𑀘𑁂𑀢𑀺𑀬𑀲𑀦𑁆𑀢𑀓𑁂𑀢𑀺 𑀯𑁂𑀢𑀦𑀕𑁄𑀧𑀓𑁂𑀳𑀺 𑀤𑀻𑀬𑀫𑀸𑀦𑁂 𑀲𑀗𑁆𑀖𑀲𑁆𑀲 𑀘𑁂𑀢𑀺𑀬𑀲𑁆𑀲 𑀘 𑀲𑀦𑁆𑀢𑀓𑁂. 𑀬𑀣𑀸𑀧𑀭𑀺𑀘𑁆𑀙𑁂𑀤𑀦𑁆𑀢𑀺 𑀬𑀁 𑀢𑁂𑀲𑀁 𑀲𑀗𑁆𑀖𑁂𑀦 𑀅𑀦𑀼𑀜𑁆𑀜𑀸𑀢𑀁 𑀳𑁄𑀢𑀺 ‘‘𑀤𑀺𑀯𑀲𑁂 𑀤𑀺𑀯𑀲𑁂 𑀏𑀢𑁆𑀢𑀓𑀁 𑀦𑀸𑀫 𑀔𑀸𑀤𑀣𑀸’’𑀢𑀺, 𑀢𑀁 𑀧𑀭𑀺𑀘𑁆𑀙𑁂𑀤𑀁 𑀅𑀦𑀢𑀺𑀓𑁆𑀓𑀫𑁆𑀫. 𑀲𑀗𑁆𑀖𑀺𑀓𑁂 𑀘 𑀘𑁂𑀢𑀺𑀬𑀲𑀦𑁆𑀢𑀓𑁂 𑀘 𑀓𑁂𑀡𑀺𑀬𑀸 𑀕𑀳𑁂𑀢𑁆𑀯𑀸 𑀆𑀭𑀓𑁆𑀔𑀦𑁆𑀢𑀲𑁆𑀲𑁂𑀯 𑀳𑀺 𑀤𑀸𑀦𑁂 𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺.

𑁩𑁭𑁫. ‘‘𑀓𑀸𑀬𑀯𑀸𑀘𑀸𑀳𑀺 𑀤𑁆𑀯𑀻𑀳𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁, 𑀫𑁂𑀣𑀼𑀦𑀥𑀫𑁆𑀫𑁂 𑀧𑀭𑀽𑀧𑀓𑁆𑀓𑀫𑁂 𑀲𑀢𑀺 𑀲𑀸𑀤𑀺𑀬𑀦𑁆𑀢𑀲𑁆𑀲 𑀅𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀪𑀸𑀯𑀲𑀫𑁆𑀪𑀯𑀢𑁄. 𑀙𑀳𑀺 𑀯𑀸𑀢𑀺 𑀆𑀧𑀢𑁆𑀢𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀲𑀗𑁆𑀔𑀸𑀢𑁂𑀳𑀺 𑀙𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀯𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀸𑀧𑀢𑁆𑀢𑀻𑀦𑀜𑁆𑀳𑀺 𑀓𑀸𑀬𑁄 𑀯𑀸𑀘𑀸 𑀓𑀸𑀬𑀯𑀸𑀘𑀸 𑀓𑀸𑀬𑀘𑀺𑀢𑁆𑀢𑀁 𑀯𑀸𑀘𑀸𑀘𑀺𑀢𑁆𑀢𑀁 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀦𑁆𑀢𑀺 𑀙 𑀲𑀫𑀼𑀝𑁆𑀞𑀸𑀦𑀸𑀦𑀺. 𑀢𑀢𑁆𑀣 𑀧𑀼𑀭𑀺𑀫𑀸𑀦𑀺 𑀢𑀻𑀡𑀺 𑀅𑀘𑀺𑀢𑁆𑀢𑀓𑀸𑀦𑀺, 𑀧𑀘𑁆𑀙𑀺𑀫𑀸𑀦𑀺 𑀲𑀘𑀺𑀢𑁆𑀢𑀓𑀸𑀦𑀺.

𑀢𑀺𑀥𑀸 𑀏𑀓𑀲𑀫𑀼𑀝𑁆𑀞𑀸𑀦𑀸, 𑀧𑀜𑁆𑀘𑀥𑀸 𑀤𑁆𑀯𑀺𑀲𑀫𑀼𑀝𑁆𑀞𑀺𑀢𑀸;

𑀤𑁆𑀯𑀺𑀥𑀸 𑀢𑀺𑀘𑀢𑀼𑀭𑁄 𑀞𑀸𑀦𑀸, 𑀏𑀓𑀥𑀸 𑀙𑀲𑀫𑀼𑀝𑁆𑀞𑀺𑀢𑀸.

𑀢𑀢𑁆𑀣 𑀘𑀢𑀼𑀢𑁆𑀣𑁂𑀦 𑀧𑀜𑁆𑀘𑀫𑁂𑀦 𑀙𑀝𑁆𑀞𑁂𑀦 𑀘 𑀲𑀫𑀼𑀝𑁆𑀞𑀸𑀦𑀢𑁄 𑀏𑀓𑀲𑀫𑀼𑀝𑁆𑀞𑀸𑀦𑀸 𑀢𑀺𑀥𑀸. 𑀧𑀞𑀫𑀘𑀢𑀼𑀢𑁆𑀣𑁂𑀳𑀺 𑀘 𑀤𑀼𑀢𑀺𑀬𑀧𑀜𑁆𑀘𑀫𑁂𑀳𑀺 𑀘 𑀢𑀢𑀺𑀬𑀙𑀝𑁆𑀞𑁂𑀳𑀺 𑀘 𑀘𑀢𑀼𑀢𑁆𑀣𑀙𑀝𑁆𑀞𑁂𑀳𑀺 𑀘 𑀧𑀜𑁆𑀘𑀫𑀙𑀝𑁆𑀞𑁂𑀳𑀺 𑀘 𑀲𑀫𑀼𑀝𑁆𑀞𑀸𑀦𑀢𑁄 𑀤𑁆𑀯𑀺𑀲𑀫𑀼𑀝𑁆𑀞𑀺𑀢𑀸 𑀧𑀜𑁆𑀘𑀥𑀸. 𑀧𑀞𑀫𑁂𑀳𑀺 𑀘 𑀢𑀻𑀳𑀺 𑀧𑀘𑁆𑀙𑀺𑀫𑁂𑀳𑀺 𑀘 𑀢𑀻𑀳𑀺 𑀲𑀫𑀼𑀝𑁆𑀞𑀸𑀦𑀢𑁄 𑀢𑀺𑀲𑀫𑀼𑀝𑁆𑀞𑀸𑀦𑀸 𑀤𑁆𑀯𑀺𑀥𑀸. 𑀧𑀞𑀫𑀢𑀢𑀺𑀬𑀘𑀢𑀼𑀢𑁆𑀣𑀙𑀝𑁆𑀞𑁂𑀳𑀺 𑀘 𑀤𑀼𑀢𑀺𑀬𑀢𑀢𑀺𑀬𑀧𑀜𑁆𑀘𑀫𑀙𑀝𑁆𑀞𑁂𑀳𑀺 𑀘 𑀲𑀫𑀼𑀝𑁆𑀞𑀸𑀦𑀢𑁄 𑀘𑀢𑀼𑀲𑀫𑀼𑀝𑁆𑀞𑀸𑀦𑀸 𑀤𑁆𑀯𑀺𑀥𑀸. 𑀙𑀳𑀺𑀧𑀺 𑀲𑀫𑀼𑀝𑁆𑀞𑀺𑀢𑁄 𑀙𑀲𑀫𑀼𑀝𑁆𑀞𑀸𑀦𑀸 𑀏𑀓𑀥𑀸. 𑀅𑀮𑀚𑁆𑀚𑀺…𑀧𑁂… 𑀲𑀜𑁆𑀜𑀺𑀢𑀸𑀬 𑀘𑀸𑀢𑀺 𑀇𑀫𑁂𑀳𑀺 𑀙𑀳𑀺 𑀯𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁄 𑀲𑀜𑁆𑀘𑀺𑀘𑁆𑀘 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺𑀁 𑀧𑀭𑀺𑀕𑀽𑀳𑀢𑀺, 𑀅𑀕𑀢𑀺𑀕𑀫𑀦𑀜𑁆𑀘 𑀕𑀘𑁆𑀙𑀢𑀺, 𑀏𑀤𑀺𑀲𑁄 𑀯𑀼𑀘𑁆𑀘𑀢𑀺 𑀅𑀮𑀚𑁆𑀚𑀻 𑀧𑀼𑀕𑁆𑀕𑀮𑁄. 𑀅𑀮𑀚𑁆𑀚𑀻 𑀘 𑀅𑀜𑁆𑀜𑀸𑀡𑁄 𑀘 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑁄 𑀘 𑀓𑀼𑀓𑁆𑀓𑀼𑀘𑁆𑀘𑁂𑀦 𑀅𑀪𑀺𑀪𑀽𑀢𑁄𑀢𑀺 𑀤𑁆𑀯𑀦𑁆𑀤𑁄. 𑀪𑀸𑀯𑁂 𑀢𑁆𑀢𑀧𑁆𑀧𑀘𑁆𑀘𑀬𑁄.

𑀢𑀢𑁆𑀣 𑀬𑁄 𑀅𑀓𑀧𑁆𑀧𑀺𑀬𑀪𑀸𑀯𑀁 𑀚𑀸𑀦𑀦𑁆𑀢𑁄𑀬𑁂𑀯 𑀫𑀤𑁆𑀤𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀢𑀺, 𑀅𑀬𑀁 𑀅𑀮𑀚𑁆𑀚𑀺𑀢𑀸 𑀆𑀧𑀚𑁆𑀚𑀢𑀺. 𑀫𑀦𑁆𑀤𑁄 𑀫𑁄𑀫𑀽𑀳𑁄 𑀓𑀢𑁆𑀢𑀩𑁆𑀩𑀸𑀓𑀢𑁆𑀢𑀩𑁆𑀩𑀁 𑀅𑀚𑀸𑀦𑀦𑁆𑀢𑁄 𑀅𑀓𑀢𑁆𑀢𑀩𑁆𑀩𑀁 𑀓𑀭𑁄𑀢𑀺, 𑀓𑀢𑁆𑀢𑀩𑁆𑀩𑀁 𑀯𑀺𑀭𑀸𑀥𑁂𑀢𑀺, 𑀅𑀬𑀁 𑀅𑀜𑁆𑀜𑀸𑀡𑀢𑁆𑀢𑀸 𑀆𑀧𑀚𑁆𑀚𑀢𑀺. 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀦𑀺𑀲𑁆𑀲𑀸𑀬 𑀓𑀼𑀓𑁆𑀓𑀼𑀘𑁆𑀘𑁂 𑀉𑀧𑁆𑀧𑀦𑁆𑀦𑁂 𑀯𑀺𑀦𑀬𑀥𑀭𑀁 𑀅𑀧𑀼𑀘𑁆𑀙𑀺𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀢𑀺, 𑀅𑀬𑀁 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀢𑁆𑀢𑀸 𑀆𑀧𑀚𑁆𑀚𑀢𑀺. 𑀲𑀢𑀺𑀬𑀸 𑀧𑁆𑀮𑀯𑁄 𑀲𑀫𑁆𑀫𑁄𑀳𑁄 𑀲𑀢𑀺𑀧𑁆𑀮𑀯𑁄, 𑀲𑀳𑀲𑁂𑀬𑁆𑀬𑀢𑀺𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀸𑀤𑀻𑀦𑀺 𑀲𑀢𑀺𑀧𑁆𑀮𑀯𑀸 𑀆𑀧𑀚𑁆𑀚𑀢𑀺. 𑀓𑀧𑁆𑀧𑀜𑁆𑀘 𑀅𑀓𑀧𑁆𑀧𑀺𑀬𑀜𑁆𑀘 𑀓𑀧𑁆𑀧𑀸𑀓𑀧𑁆𑀧𑀺𑀬𑀁, 𑀓𑀧𑁆𑀧𑀸𑀓𑀧𑁆𑀧𑀺𑀬𑁂 𑀲𑀜𑁆𑀜𑀸, 𑀲𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀓𑀧𑁆𑀧𑀸…𑀧𑁂… 𑀲𑀜𑁆𑀜𑀻, 𑀢𑀲𑁆𑀲 𑀪𑀸𑀯𑁄𑀢𑀺 𑀢𑀸-𑀧𑀘𑁆𑀘𑀬𑁄. 𑀬-𑀮𑁄𑀧𑁂𑀦 𑀧𑀦 ‘‘𑀲𑀜𑁆𑀜𑀺𑀢𑀸’’𑀢𑀺 𑀯𑀼𑀢𑁆𑀢𑀁, 𑀓𑀭𑀡𑀢𑁆𑀣𑁂 𑀯𑀸 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀢𑁂 𑀘 ‘‘𑀅𑀓𑀧𑁆𑀧𑀺𑀬𑁂’’𑀢𑀺𑀆𑀤𑀻𑀦𑀁 𑀬𑀣𑀸𑀓𑁆𑀓𑀫𑁂𑀦 𑀬𑀼𑀚𑁆𑀚𑀦𑁆𑀢𑀺. 𑀢𑀢𑁆𑀣 𑀬𑁄 𑀅𑀘𑁆𑀙𑀫𑀁𑀲𑀁 ‘‘𑀲𑀽𑀓𑀭𑀫𑀁𑀲’’𑀦𑁆𑀢𑀺 𑀔𑀸𑀤𑀢𑀺, 𑀯𑀺𑀓𑀸𑀮𑁂 𑀓𑀸𑀮𑀲𑀜𑁆𑀜𑀺𑀢𑀸𑀬 𑀪𑀼𑀜𑁆𑀚𑀢𑀺, 𑀅𑀬𑀁 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸𑀬 𑀆𑀧𑀚𑁆𑀚𑀢𑀺. 𑀬𑁄 𑀧𑀦 𑀲𑀽𑀓𑀭𑀫𑀁𑀲𑀁 ‘‘𑀅𑀘𑁆𑀙𑀫𑀁𑀲’’𑀦𑁆𑀢𑀺 𑀔𑀸𑀤𑀢𑀺, 𑀓𑀸𑀮𑁂 𑀯𑀺𑀓𑀸𑀮𑀲𑀜𑁆𑀜𑀸𑀬 𑀪𑀼𑀜𑁆𑀚𑀢𑀺, 𑀅𑀬𑀁 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸𑀬 𑀆𑀧𑀚𑁆𑀚𑀢𑀺.

𑁩𑁭𑁬. 𑀅𑀮𑀚𑁆𑀚𑀺𑀅𑀜𑁆𑀜𑀸𑀡𑀢𑀸𑀬 𑀓𑀸𑀬𑀯𑀸𑀘𑀸𑀳𑀺 𑀆𑀧𑀢𑁆𑀢𑀺𑀁 𑀙𑀸𑀤𑀬𑁂𑀢𑀺 𑀬𑁄𑀚𑀦𑀸. 𑀮𑀺𑀗𑁆𑀕𑁂𑀢𑀺 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑀦𑀺𑀫𑀺𑀢𑁆𑀢𑀁. 𑀮𑀺𑀗𑁆𑀕𑁂 𑀲𑀗𑁆𑀖𑁂 𑀘 𑀕𑀡𑁂 𑀘 𑀏𑀓𑀲𑁆𑀫𑀺𑀁 𑀘𑀸𑀢𑀺 𑀆𑀧𑀢𑁆𑀢𑀺𑀯𑀼𑀝𑁆𑀞𑀺𑀢𑀺 𑀘𑀢𑀼𑀥𑀸 𑀳𑁄𑀢𑀻𑀢𑀺 𑀲𑁂𑀲𑁄.

𑁩𑁭𑁭. 𑀧𑀘𑁆𑀘𑀬𑀤𑁆𑀯𑀬𑁂𑀢𑀺 𑀘𑀻𑀯𑀭𑁂 𑀧𑀺𑀡𑁆𑀟𑀧𑀸𑀢𑁂 𑀘. 𑀧𑀭𑀺𑀓𑀣𑁄𑀪𑀸𑀲𑀯𑀺𑀜𑁆𑀜𑀢𑁆𑀢𑀻𑀢𑀺 𑀅𑀪𑀺𑀮𑀸𑀧𑀫𑀢𑁆𑀢𑀫𑁂𑀢𑀁. 𑀲𑀳𑀘𑀭𑀺𑀢𑀲𑁆𑀲 𑀧𑀦 𑀦𑀺𑀫𑀺𑀢𑁆𑀢𑀓𑀫𑁆𑀫𑀲𑁆𑀲𑀸𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀧𑀭𑀺𑀬𑀸𑀬𑁂𑀦 𑀓𑀣𑀦𑀁 𑀧𑀭𑀺𑀓𑀣𑀸. 𑀉𑀚𑀼𑀓𑀫𑁂𑀯 𑀅𑀯𑀢𑁆𑀯𑀸 𑀬𑀣𑀸 𑀅𑀥𑀺𑀧𑁆𑀧𑀸𑀬𑁄 𑀯𑀺𑀪𑀽𑀢𑁄 𑀳𑁄𑀢𑀺, 𑀏𑀯𑀁 𑀑𑀪𑀸𑀲𑀦𑀁 𑀑𑀪𑀸𑀲𑁄. 𑀧𑀘𑁆𑀘𑀬𑁂 𑀉𑀤𑁆𑀤𑀺𑀲𑁆𑀲 𑀬𑀣𑀸 𑀅𑀥𑀺𑀧𑁆𑀧𑀸𑀬𑁄 𑀜𑀸𑀬𑀢𑀺, 𑀏𑀯𑀁 𑀯𑀺𑀜𑁆𑀜𑀸𑀧𑀦𑀁 𑀯𑀺𑀜𑁆𑀜𑀢𑁆𑀢𑀺. 𑀦𑀺𑀫𑀺𑀢𑁆𑀢𑀓𑀭𑀡𑀁 𑀦𑀺𑀫𑀺𑀢𑁆𑀢𑀓𑀫𑁆𑀫𑀁. 𑀢𑀢𑀺𑀬𑁂𑀢𑀺 𑀲𑁂𑀦𑀸𑀲𑀦𑁂. 𑀲𑁂𑀲𑁂𑀢𑀺 𑀕𑀺𑀮𑀸𑀦𑀧𑀘𑁆𑀘𑀬𑁂.

𑁩𑁭𑁮. 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀁 𑀅𑀘𑁆𑀘𑀬𑁂 𑀤𑀸𑀦𑀁 𑀦 𑀭𑀽𑀳𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀘𑁆𑀘𑀬𑁂 𑀤𑀸𑀦𑀦𑁆𑀢𑀺 ‘‘𑀫𑀫𑀘𑁆𑀘𑀬𑁂𑀦 𑀫𑀬𑁆𑀳𑀁 𑀲𑀦𑁆𑀢𑀓𑀁 𑀉𑀧𑀚𑁆𑀛𑀸𑀬𑀲𑁆𑀲 𑀳𑁄𑀢𑀽’’𑀢𑀺𑀆𑀤𑀺𑀦𑀸 𑀏𑀯𑀁 𑀅𑀢𑁆𑀢𑀦𑁄 𑀅𑀧𑀕𑀫𑁂 𑀤𑀸𑀦𑀁. 𑀢𑀦𑁆𑀢𑀺 𑀅𑀘𑁆𑀘𑀬𑁂𑀦 𑀤𑀺𑀦𑁆𑀦𑀁 𑀘𑀻𑀯𑀭𑀸𑀤𑀺𑀓𑀁 𑀲𑀗𑁆𑀖𑀲𑁆𑀲𑁂𑀯 𑀘 𑀳𑁄𑀢𑀺, 𑀦 𑀪𑀺𑀓𑁆𑀔𑀼𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑀺𑀳𑀻𑀦𑀁 𑀧𑀦𑀸𑀢𑀺 𑀕𑀺𑀳𑀻𑀦𑀁 𑀅𑀘𑁆𑀘𑀬𑁂 𑀤𑀸𑀦𑀁 𑀧𑀦. 𑀇𑀤𑀫𑁂𑀢𑁆𑀣 𑀤𑀸𑀦𑀕𑁆𑀕𑀳𑀡𑀮𑀓𑁆𑀔𑀡𑀁 𑁋 ‘‘𑀇𑀤𑀁 𑀢𑀼𑀬𑁆𑀳𑀁 𑀤𑀫𑁆𑀫𑀻’’𑀢𑀺𑀆𑀤𑀺𑀦𑀸 𑀲𑀫𑁆𑀫𑀼𑀔𑀸 𑀯𑀸 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀫𑀻’’𑀢𑀺𑀆𑀤𑀺𑀦𑀸 𑀧𑀭𑀫𑁆𑀫𑀼𑀔𑀸𑀧𑀺 𑀤𑀺𑀦𑁆𑀦𑀁𑀬𑁂𑀯 𑀳𑁄𑀢𑀺. ‘‘𑀢𑀼𑀬𑁆𑀳𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀬𑁆𑀳𑀁 𑀕𑀡𑁆𑀳𑀸𑀫𑀻’’𑀢𑀺 𑀯𑀤𑀢𑀺, 𑀲𑀼𑀤𑀺𑀦𑁆𑀦𑀁 𑀲𑀼𑀕𑁆𑀕𑀳𑀺𑀢𑀜𑁆𑀘. ‘‘𑀢𑀯 𑀲𑀦𑁆𑀢𑀓𑀁 𑀓𑀭𑁄𑀳𑀺, 𑀢𑀯 𑀲𑀦𑁆𑀢𑀓𑀁 𑀳𑁄𑀢𑀼, 𑀢𑀯 𑀲𑀦𑁆𑀢𑀓𑀁 𑀓𑀸𑀭𑀸𑀧𑁂𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀫 𑀲𑀦𑁆𑀢𑀓𑀁 𑀓𑀭𑁄𑀫𑀺, 𑀫𑀫 𑀲𑀦𑁆𑀢𑀓𑀁 𑀳𑁄𑀢𑀼, 𑀫𑀫 𑀲𑀦𑁆𑀢𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺. 𑀤𑀼𑀤𑁆𑀤𑀺𑀦𑁆𑀦𑀁 𑀤𑀼𑀕𑁆𑀕𑀳𑀺𑀢𑀜𑁆𑀘. 𑀲𑀘𑁂 𑀧𑀦 ‘‘𑀢𑀯 𑀲𑀦𑁆𑀢𑀓𑀁 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼, 𑀪𑀦𑁆𑀢𑁂, 𑀫𑀬𑁆𑀳𑀁 𑀕𑀡𑁆𑀳𑀸𑀫𑀻’’𑀢𑀺 𑀕𑀡𑁆𑀳𑀸𑀢𑀺, 𑀲𑀼𑀕𑁆𑀕𑀳𑀺𑀢𑀦𑁆𑀢𑀺.

𑁩𑁭𑁯. 𑀪𑀺𑀓𑁆𑀔𑀼 𑀯𑀸 𑀲𑀸𑀫𑀡𑁂𑀭𑁄 𑀯𑀸 𑀉𑀧𑀲𑁆𑀲𑀬𑁂 𑀪𑀺𑀓𑁆𑀔𑀼𑀦𑀻𑀦𑀁 𑀯𑀺𑀳𑀸𑀭𑁂 𑀓𑀸𑀮𑀁 𑀓𑀬𑀺𑀭𑀸𑀣 𑀬𑀤𑀺 𑀓𑀸𑀮𑀗𑁆𑀓𑀭𑁂𑀬𑁆𑀬, 𑀢𑀢𑁆𑀣 𑀢𑀲𑁆𑀫𑀺𑀁 𑀉𑀪𑀺𑀦𑁆𑀦𑀁 𑀲𑀦𑁆𑀢𑀓𑁂 𑀪𑀺𑀓𑁆𑀔𑀼𑀲𑀗𑁆𑀖𑁄 𑀏𑀯 𑀤𑀸𑀬𑀚𑁆𑀚𑁄 𑀲𑀸𑀫𑀻 𑀳𑁄𑀢𑀻𑀢𑀺 𑀲𑁂𑀲𑁄. 𑀲𑁂𑀲𑁂𑀧𑀻𑀢𑀺 𑀅𑀯𑀲𑁂𑀲𑁂 𑀪𑀺𑀓𑁆𑀔𑀼𑀦𑀺𑀲𑀺𑀓𑁆𑀔𑀫𑀸𑀦𑀲𑀸𑀫𑀡𑁂𑀭𑀺𑀲𑀦𑁆𑀢𑀓𑁂𑀧𑀺. 𑀅𑀬𑀁 𑀦𑀬𑁄𑀢𑀺 𑀬𑀤𑀺 𑀢𑁂 𑀪𑀺𑀓𑁆𑀔𑀽𑀦𑀁 𑀯𑀺𑀳𑀸𑀭𑁂 𑀓𑀸𑀮𑀁 𑀓𑀭𑁂𑀬𑁆𑀬𑀼𑀁, 𑀢𑁂𑀲𑀁 𑀲𑀦𑁆𑀢𑀓𑁂 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀏𑀯 𑀤𑀸𑀬𑀚𑁆𑀚𑁄𑀢𑀺 𑀅𑀬𑀫𑁂𑀯 𑀦𑀬𑁄𑀢𑀺 𑀅𑀢𑁆𑀣𑁄.

𑁩𑁮𑁦. ‘‘𑀇𑀫𑀁 𑀦𑁂𑀢𑁆𑀯𑀸 𑀅𑀲𑀼𑀓𑀲𑁆𑀲 𑀤𑁂𑀳𑀻’’𑀢𑀺 𑀤𑀺𑀦𑁆𑀦𑀁 𑀬𑀸𑀯 𑀧𑀭𑀲𑁆𑀲 𑀳𑀢𑁆𑀣𑀁 𑀦 𑀧𑀸𑀧𑀼𑀡𑀸𑀢𑀺, 𑀢𑀸𑀯 𑀧𑀼𑀭𑀺𑀫𑀲𑁆𑀲𑁂𑀯, 𑀬𑁄 𑀧𑀳𑀺𑀡𑀢𑀺, 𑀢𑀲𑁆𑀲𑁂𑀯𑀸𑀢𑀺 𑀅𑀢𑁆𑀣𑁄. 𑀤𑀫𑁆𑀫𑀻𑀢𑀺 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀫𑀻’’𑀢𑀺 𑀤𑀺𑀦𑁆𑀦𑀁 𑀧𑀦 𑀧𑀘𑁆𑀙𑀺𑀫𑀲𑁆𑀲𑁂𑀯, 𑀬𑀲𑁆𑀲 𑀧𑀳𑀺𑀡𑀢𑀺, 𑀢𑀲𑁆𑀲𑁂𑀯 𑀲𑀦𑁆𑀢𑀓𑀦𑁆𑀢𑀺 𑀅𑀢𑁆𑀣𑁄. 𑀇𑀫𑀁 𑀯𑀺𑀥𑀺𑀁 ‘‘𑀯𑀼𑀢𑁆𑀢𑀦𑀬𑁂𑀦 𑀇𑀫𑁂 𑀲𑀸𑀫𑀺𑀦𑁄 𑀳𑁄𑀦𑁆𑀢𑀻’’𑀢𑀺 𑀏𑀢𑀁 𑀧𑀓𑀸𑀭𑀁 𑀜𑀢𑁆𑀯𑀸 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀁 𑀯𑀸 𑀕𑀡𑁆𑀳𑁂, 𑀫𑀢𑀓𑀘𑀻𑀯𑀭𑀁 𑀯𑀸 𑀅𑀥𑀺𑀝𑁆𑀞𑁂𑀢𑀺 𑀬𑁄𑀚𑀦𑀸. 𑀯𑀺𑀲𑁆𑀲𑀸𑀲𑀕𑀸𑀳𑀦𑁆𑀢𑀺 𑀲𑀸𑀫𑀻𑀲𑀼 𑀚𑀻𑀯𑀦𑁆𑀢𑁂𑀲𑀼 𑀯𑀺𑀲𑁆𑀲𑀸𑀲𑁂𑀦 𑀕𑀸𑀳𑀁 𑀕𑀳𑁂𑀢𑁆𑀯𑀸. 𑀫𑀢𑀓𑀘𑀻𑀯𑀭𑀁 𑀅𑀥𑀺𑀝𑁆𑀞𑁂𑀢𑀺 𑀢𑁂𑀲𑀼 𑀫𑀢𑁂𑀲𑀼 𑀅𑀜𑁆𑀜𑁂 𑀘𑁂 𑀪𑀺𑀓𑁆𑀔𑀽 𑀦 𑀲𑀦𑁆𑀢𑀺, ‘‘𑀫𑀬𑁆𑀳𑀁 𑀢𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀫𑀢𑀓𑀘𑀻𑀯𑀭𑀁 𑀅𑀥𑀺𑀝𑁆𑀞𑁂𑀬𑁆𑀬. 𑀅𑀜𑁆𑀜𑁂𑀲𑀁 𑀅𑀤𑀢𑁆𑀯𑀸 𑀤𑀽𑀭𑁂 𑀞𑀧𑀺𑀢𑀫𑀢𑀓𑀧𑀭𑀺𑀓𑁆𑀔𑀸𑀭𑀸 𑀧𑀦 𑀢𑀢𑁆𑀣 𑀢𑀢𑁆𑀣 𑀲𑀗𑁆𑀖𑀲𑁆𑀲𑁂𑀯 𑀳𑁄𑀦𑁆𑀢𑀺. 𑀪𑀺𑀓𑁆𑀔𑀼𑀫𑁆𑀳𑀺 𑀓𑀸𑀮𑀓𑀢𑁂 𑀲𑀗𑁆𑀖𑁄 𑀲𑀸𑀫𑀻 𑀧𑀢𑁆𑀢𑀘𑀻𑀯𑀭𑁂, 𑀅𑀧𑀺𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸 𑀩𑀳𑀽𑀧𑀓𑀸𑀭𑀸, 𑀲𑀗𑁆𑀖𑁂𑀦 𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑀜𑁆𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀤𑀸𑀢𑀩𑁆𑀩𑀁. 𑀬𑀁 𑀢𑀢𑁆𑀣 𑀮𑀳𑀼𑀪𑀡𑁆𑀟𑀁 𑀮𑀳𑀼𑀧𑀭𑀺𑀓𑁆𑀔𑀸𑀭𑀁, 𑀢𑀁 𑀲𑀫𑁆𑀫𑀼𑀔𑀻𑀪𑀽𑀢𑁂𑀦 𑀲𑀗𑁆𑀖𑁂𑀦 𑀪𑀸𑀚𑁂𑀢𑀩𑁆𑀩𑀁. 𑀬𑀁 𑀢𑀢𑁆𑀣 𑀕𑀭𑀼𑀪𑀡𑁆𑀟𑀁 𑀕𑀭𑀼𑀧𑀭𑀺𑀓𑁆𑀔𑀸𑀭𑀁, 𑀢𑀁 𑀆𑀕𑀢𑀸𑀦𑀸𑀕𑀢𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀲𑀗𑁆𑀖𑀲𑁆𑀲 𑀅𑀯𑀺𑀲𑁆𑀲𑀚𑁆𑀚𑀺𑀬𑀁 𑀅𑀯𑁂𑀪𑀗𑁆𑀕𑀺𑀬𑀁. 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀦𑀸𑀫 𑀕𑀺𑀳𑀻 𑀯𑀸 𑀳𑁄𑀢𑀼 𑀧𑀩𑁆𑀩𑀚𑀺𑀢𑁄 𑀯𑀸, 𑀅𑀦𑁆𑀢𑀫𑀲𑁄 𑀫𑀸𑀢𑀼𑀕𑀸𑀫𑁄𑀧𑀺, 𑀲𑀩𑁆𑀩𑁂 𑀪𑀸𑀕𑀁 𑀮𑀪𑀦𑁆𑀢𑀺. 𑀩𑀳𑀽 𑀘𑁂 𑀲𑀩𑁆𑀩𑁂 𑀲𑀫𑀕𑁆𑀕𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀲𑀩𑁆𑀩𑁂𑀲𑀁 𑀲𑀫𑀪𑀸𑀕𑁄 𑀤𑀸𑀢𑀩𑁆𑀩𑁄. 𑀬𑁄 𑀧𑀦𑁂𑀢𑁆𑀣 𑀯𑀺𑀲𑁂𑀲𑁂𑀦 𑀉𑀧𑀝𑁆𑀞𑀳𑀢𑀺, 𑀢𑀲𑁆𑀲 𑀯𑀺𑀲𑁂𑀲𑁄 𑀓𑀸𑀢𑀩𑁆𑀩𑁄.

𑁩𑁮𑁧. ‘‘𑀮𑁄𑀳𑀪𑀡𑁆𑀟𑁂 𑀧𑀳𑀭𑀡𑀺𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑀁 𑀓𑀧𑁆𑀧𑀢𑀻’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀧𑀳𑀭𑀡𑀺𑀦𑁆𑀢𑀺 𑀆𑀯𑀼𑀥𑀁. 𑀧𑀸𑀤𑀼𑀓𑀸 𑀘 𑀲𑀗𑁆𑀓𑀫𑀦𑀻𑀬𑁄 𑀧𑀮𑁆𑀮𑀗𑁆𑀓𑁄 𑀘𑀸𑀢𑀺 𑀤𑁆𑀯𑀦𑁆𑀤𑁄. 𑀫𑀢𑁆𑀢𑀺𑀓𑀸𑀫𑀬𑁂 𑀓𑀢𑀓𑀁 𑀓𑀼𑀫𑁆𑀪𑀓𑀸𑀭𑀺𑀓𑀜𑁆𑀘 𑀞𑀧𑁂𑀢𑁆𑀯𑀸 𑀲𑀩𑁆𑀩𑀁 𑀓𑀧𑁆𑀧𑀢𑀻𑀢𑀺 𑀬𑁄𑀚𑀦𑀻𑀬𑀁, 𑀥𑀦𑀺𑀬𑀲𑁆𑀲𑁂𑀯 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀓𑀼𑀝𑀺 𑀓𑀼𑀫𑁆𑀪𑀓𑀸𑀭𑀺𑀓𑀸𑀢𑀺.

𑀧𑀓𑀺𑀡𑁆𑀡𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.