𑁩𑁮. 𑀤𑀽𑀲𑀦𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁯𑁭. 𑀤𑀤𑀢𑁄𑀢𑀺 𑀲𑀲𑀦𑁆𑀢𑀓𑀁 𑀧𑀭𑀲𑀦𑁆𑀢𑀓𑀜𑁆𑀘 𑀤𑁂𑀦𑁆𑀢𑀲𑁆𑀲. 𑀓𑀼𑀮𑀤𑀽𑀲𑀦𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀢𑀦𑁄 𑀤𑀼𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀓𑀼𑀮𑀸𑀦𑀁 𑀤𑀽𑀲𑀦𑀁 𑀧𑀲𑀸𑀤𑀯𑀺𑀦𑀸𑀲𑀦𑀁 𑀓𑀼𑀮𑀤𑀽𑀲𑀦𑀁, 𑀢𑁂𑀦 𑀤𑀼𑀓𑁆𑀓𑀝𑀁 𑀓𑀼𑀮𑀤𑀽𑀲𑀦𑀤𑀼𑀓𑁆𑀓𑀝𑀁.

𑁨𑁯𑁮. 𑀏𑀢𑁆𑀣 𑀲𑀗𑁆𑀖𑀺𑀓𑀁 𑀕𑀭𑀼𑀪𑀡𑁆𑀟𑀁 𑀇𑀲𑁆𑀲𑀭𑁂𑀦 𑀤𑁂𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀁 𑀧𑀼𑀧𑁆𑀨𑀸𑀤𑀻𑀦𑀁 𑀫𑀚𑁆𑀛𑁂. 𑀇𑀲𑁆𑀲𑀭𑁂𑀦𑀸𑀢𑀺 𑀢𑀤𑁆𑀥𑀺𑀢𑀮𑁄𑀧𑁂𑀦 𑀯𑀼𑀢𑁆𑀢𑀁, 𑀇𑀲𑁆𑀲𑀭𑀺𑀬𑁂𑀦 𑀇𑀲𑁆𑀲𑀭𑀯𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀤𑁂𑀦𑁆𑀢𑀲𑁆𑀲𑀸𑀢𑀺 𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀇𑀲𑁆𑀲𑀭𑀯𑀢𑀸𑀬 𑀤𑀤𑀢𑁄. 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀤𑀤𑀢𑁄 ‘‘𑀓𑀼𑀮𑀤𑀽𑀲𑀦𑀤𑀼𑀓𑁆𑀓𑀝’’𑀦𑁆𑀢𑀺 𑀲𑀸𑀫𑀜𑁆𑀜𑀯𑀺𑀳𑀺𑀢𑀤𑀼𑀓𑁆𑀓𑀝𑁂𑀦 𑀲𑀤𑁆𑀥𑀺𑀁 ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀯𑀺𑀲𑁆𑀲𑀚𑁆𑀚𑀺𑀬𑀸𑀦𑀺, 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸𑀦𑀺 𑀲𑀗𑁆𑀖𑁂𑀦 𑀯𑀸 𑀕𑀡𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸, 𑀯𑀺𑀲𑁆𑀲𑀚𑁆𑀚𑀺𑀢𑀸𑀦𑀺𑀧𑀺 𑀅𑀯𑀺𑀲𑁆𑀲𑀚𑁆𑀚𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀬𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀘𑀽𑀴𑀯. 𑁩𑁨𑁧) 𑀏𑀯𑀁 𑀯𑀼𑀢𑁆𑀢𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀢𑁆𑀣 𑀣𑀼𑀮𑁆𑀮𑀘𑁆𑀘𑀬𑀫𑁂𑀯. 𑀲𑁂𑀦𑀸𑀲𑀦𑀢𑁆𑀣𑀸𑀬 𑀦𑀺𑀬𑀫𑀺𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀗𑁆𑀖𑀲𑁆𑀲 𑀲𑀦𑁆𑀢𑀓𑀁 𑀣𑁂𑀬𑁆𑀬𑀸 𑀤𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀸𑀤𑀻𑀦𑀻𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀤𑁂𑀦𑁆𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀤𑀼𑀓𑁆𑀓𑀝𑀸𑀤𑀻𑀦𑀻𑀢𑀺 𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀤𑀤𑀢𑁄 𑀓𑀼𑀮𑀤𑀽𑀲𑀦𑀤𑀼𑀓𑁆𑀓𑀝𑁂𑀦 𑀲𑀤𑁆𑀥𑀺𑀁 𑀫𑀸𑀲𑀓𑁂 𑀯𑀸 𑀊𑀦𑀫𑀸𑀲𑀓𑁂 𑀯𑀸 𑀤𑀼𑀓𑁆𑀓𑀝𑀁, 𑀅𑀢𑀺𑀭𑁂𑀓𑀫𑀸𑀲𑀓𑁂 𑀯𑀸 𑀊𑀦𑀧𑀜𑁆𑀘𑀫𑀸𑀲𑀓𑁂 𑀯𑀸 𑀣𑀼𑀮𑁆𑀮𑀘𑁆𑀘𑀬𑀁, 𑀧𑀜𑁆𑀘𑀫𑀸𑀲𑀓𑁂 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑁂 𑀯𑀸 𑀧𑀸𑀭𑀸𑀚𑀺𑀓𑀦𑁆𑀢𑀺 𑀏𑀯𑀁 𑀤𑀼𑀓𑁆𑀓𑀝𑀸𑀤𑀻𑀦𑀺 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀢𑁆𑀣 𑀤𑀼𑀓𑁆𑀓𑀝𑀸𑀤𑀻𑀦𑁂𑀯.

𑁨𑁯𑁯-𑁩𑁦𑁦. 𑀓𑀼𑀮𑀲𑀗𑁆𑀕𑀳𑀢𑁆𑀣𑀁 𑀨𑀮𑀧𑀼𑀧𑁆𑀨𑀽𑀧𑀕𑀁 𑀭𑀼𑀓𑁆𑀔𑀁 𑀲𑀩𑁆𑀩𑀣𑀸 𑀭𑁄𑀧𑁂𑀢𑀼𑀜𑁆𑀘 𑀭𑁄𑀧𑀸𑀧𑁂𑀢𑀼𑀜𑁆𑀘 𑀚𑀕𑁆𑀕𑀺𑀢𑀼𑀜𑁆𑀘 𑀦 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑀦𑀻𑀬𑀁. 𑀘-𑀲𑀤𑁆𑀤𑁄 𑀑𑀘𑀺𑀦𑀺𑀢𑀼𑀁 𑀑𑀘𑀺𑀦𑀸𑀧𑁂𑀢𑀼𑀁, 𑀕𑀦𑁆𑀣𑀺𑀢𑀼𑀁 𑀕𑀦𑁆𑀣𑀸𑀧𑁂𑀢𑀼𑀦𑁆𑀢𑀺 𑀘 𑀅𑀯𑀼𑀢𑁆𑀢𑀸𑀦𑀺 𑀘 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀨𑀮𑀧𑀼𑀧𑁆𑀨𑀸𑀦𑀺 𑀲𑀫𑁆𑀧𑀸𑀤𑀦𑀯𑀲𑁂𑀦 𑀉𑀧𑀕𑀘𑁆𑀙𑀢𑀻𑀢𑀺 𑀨𑀮𑀧𑀼𑀧𑁆𑀨𑀽𑀧𑀕𑀁. 𑀲𑀩𑁆𑀩𑀣𑀸𑀢𑀺 𑀓𑀧𑁆𑀧𑀺𑀬𑀯𑁄𑀳𑀸𑀭𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑀧𑀭𑀺𑀬𑀸𑀬𑀑𑀪𑀸𑀲𑀦𑀺𑀫𑀺𑀢𑁆𑀢𑀓𑀫𑁆𑀫𑀯𑀲𑁂𑀦 𑀲𑀩𑁆𑀩𑀧𑁆𑀧𑀓𑀸𑀭𑁂𑀦𑁂𑀯. 𑀢𑀢𑁆𑀣 𑀓𑀧𑁆𑀧𑀺𑀬𑀯𑁄𑀳𑀸𑀭𑁄 𑀦𑀸𑀫 ‘‘𑀇𑀫𑀁 𑀭𑀼𑀓𑁆𑀔𑀁 𑀚𑀸𑀦, 𑀇𑀫𑀁 𑀆𑀯𑀸𑀝𑀁 𑀚𑀸𑀦, 𑀇𑀫𑀁 𑀫𑀸𑀮𑀸𑀯𑀘𑁆𑀙𑀁 𑀚𑀸𑀦, 𑀏𑀢𑁆𑀣 𑀉𑀤𑀓𑀁 𑀚𑀸𑀦𑀸’’𑀢𑀺 𑀯𑀘𑀦𑀁, 𑀲𑀼𑀓𑁆𑀔𑀫𑀸𑀢𑀺𑀓𑀸𑀬 𑀉𑀚𑀼𑀓𑀭𑀡𑀜𑁆𑀘. 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁄 𑀦𑀸𑀫. 𑀧𑀭𑀺𑀬𑀸𑀬𑁄 𑀦𑀸𑀫 ‘‘𑀧𑀡𑁆𑀟𑀺𑀢𑁂𑀦 𑀫𑀸𑀮𑀸𑀯𑀘𑁆𑀙𑀸𑀤𑀬𑁄 𑀭𑁄𑀧𑀸𑀧𑁂𑀢𑀩𑁆𑀩𑀸, 𑀦 𑀘𑀺𑀭𑀲𑁆𑀲𑁂𑀯 𑀉𑀧𑀓𑀸𑀭𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺𑀆𑀤𑀺𑀯𑀘𑀦𑀁. 𑀑𑀪𑀸𑀲𑁄 𑀦𑀸𑀫 𑀓𑀼𑀤𑁆𑀤𑀸𑀮𑀔𑀡𑀺𑀢𑁆𑀢𑀸𑀤𑀻𑀦𑀺 𑀘 𑀫𑀸𑀮𑀸𑀯𑀘𑁆𑀙𑁂 𑀘 𑀕𑀳𑁂𑀢𑁆𑀯𑀸 𑀞𑀸𑀦𑀁. 𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀦𑀸𑀫 𑀓𑀼𑀤𑁆𑀤𑀸𑀮𑀉𑀤𑀓𑀪𑀸𑀚𑀦𑀸𑀤𑀻𑀦𑀁 𑀆𑀳𑀭𑀺𑀢𑁆𑀯𑀸 𑀲𑀫𑀻𑀧𑁂 𑀞𑀧𑀦𑀁. 𑀚𑀕𑁆𑀕𑀺𑀢𑀼𑀦𑁆𑀢𑀺 𑀯𑀤𑀦𑁆𑀢𑀺 𑀉𑀤𑀓𑀲𑁂𑀘𑀦𑀸𑀤𑀻𑀦𑀺 𑀓𑀢𑁆𑀯𑀸. 𑀕𑀦𑁆𑀣𑀦𑀕𑀦𑁆𑀣𑀸𑀧𑀦𑁂𑀲𑀼 𑀧𑀦 𑀲𑀩𑁆𑀩𑀸𑀧𑀺 𑀙 𑀧𑀼𑀧𑁆𑀨𑀯𑀺𑀓𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑀸 𑀕𑀦𑁆𑀣𑀺𑀫𑀁 𑀕𑁄𑀧𑁆𑀨𑀺𑀫𑀁 𑀯𑁂𑀥𑀺𑀫𑀁 𑀯𑁂𑀞𑀺𑀫𑀁 𑀧𑀽𑀭𑀺𑀫𑀁 𑀯𑀸𑀬𑀺𑀫𑀦𑁆𑀢𑀺. 𑀦𑀸𑀫𑀯𑀲𑁂𑀦𑁂𑀯 𑀧𑀦𑁂𑀢𑁂𑀲𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀁 𑀧𑀦 𑀓𑀼𑀮𑀲𑀗𑁆𑀕𑀳𑀢𑁄 𑀅𑀜𑁆𑀜𑀢𑁆𑀭𑀸𑀧𑀺 𑀪𑀺𑀓𑁆𑀔𑀼𑀲𑁆𑀲 𑀓𑀸𑀢𑀼𑀫𑁆𑀧𑀺 𑀅𑀓𑀧𑁆𑀧𑀺𑀬𑀯𑀘𑀦𑁂𑀦 𑀓𑀸𑀭𑀸𑀧𑁂𑀢𑀼𑀫𑁆𑀧𑀺 𑀦 𑀯𑀝𑁆𑀝𑀢𑀺. ‘‘𑀏𑀯𑀁 𑀚𑀸𑀦, 𑀏𑀯𑀁 𑀓𑀢𑁂 𑀲𑁄𑀪𑁂𑀬𑁆𑀬, 𑀬𑀣𑀸 𑀏𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀦 𑀯𑀺𑀓𑀺𑀭𑀺𑀬𑀦𑁆𑀢𑀺, 𑀢𑀣𑀸 𑀓𑀭𑁄𑀳𑀻’’𑀢𑀺𑀆𑀤𑀺𑀦𑀸 𑀧𑀦 𑀓𑀧𑁆𑀧𑀺𑀬𑀯𑀘𑀦𑁂𑀦 𑀓𑀸𑀭𑀸𑀧𑁂𑀢𑀼𑀁 𑀯𑀺𑀦𑀸 𑀓𑀼𑀮𑀲𑀗𑁆𑀕𑀳𑀁 𑀯𑀝𑁆𑀝𑀢𑀺. 𑀭𑁄𑀧𑀦𑀸𑀤𑀻𑀦𑀻𑀢𑀺 𑀅𑀓𑀧𑁆𑀧𑀺𑀬𑀧𑀣𑀯𑀺𑀬𑀁 𑀭𑁄𑀧𑀸𑀧𑀦𑀲𑀺𑀜𑁆𑀘𑀸𑀧𑀦𑀸𑀤𑀻𑀦𑀺, 𑀅𑀜𑁆𑀜𑀢𑁆𑀣 𑀭𑁄𑀧𑀦𑀸𑀤𑀻𑀦𑀺.

𑁩𑁦𑁧-𑁨. 𑀇𑀤𑀸𑀦𑀺 𑀧𑀼𑀧𑁆𑀨𑀤𑀸𑀦𑀸𑀤𑀻𑀲𑀼 𑀅𑀝𑁆𑀞𑀲𑀼 𑀓𑀼𑀮𑀲𑀗𑁆𑀕𑀳𑀯𑀢𑁆𑀣𑀽𑀲𑀼 𑀅𑀯𑀲𑁂𑀲𑀸𑀦𑀺 𑀤𑁆𑀯𑁂 𑀤𑀲𑁆𑀲𑁂𑀢𑀼𑀁 ‘‘𑀯𑀼𑀢𑁆𑀢𑀸𑀯𑀸’’𑀢𑀺𑀆𑀤𑀺𑀫𑀸𑀳. 𑀯𑀼𑀢𑁆𑀢𑀸𑀯 𑀫𑀺𑀘𑁆𑀙𑀸𑀚𑀻𑀯𑀯𑀺𑀯𑀚𑁆𑀚𑀦𑀸𑀬𑀁 𑀯𑀼𑀢𑁆𑀢𑀸 𑀏𑀯. 𑀚𑀗𑁆𑀖𑀧𑁂𑀲𑀦𑁂 𑀯𑀺𑀦𑀺𑀘𑁆𑀙𑀬𑁄 𑀯𑀼𑀘𑁆𑀘𑀢𑀻𑀢𑀺 𑀧𑀸𑀞𑀲𑁂𑀲𑁄. 𑀧𑀺𑀢𑀭𑁄 𑀪𑀡𑁆𑀟𑀼𑀁 𑀲𑀓𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀁 𑀞𑀧𑁂𑀢𑁆𑀯𑀸 𑀕𑀺𑀳𑀺𑀓𑀫𑁆𑀫𑁂𑀲𑀼 𑀤𑀽𑀢𑀲𑀸𑀲𑀦𑀁 𑀳𑀭𑀡𑁂 𑀧𑀤𑀯𑀸𑀭𑁂𑀦 𑀤𑀼𑀓𑁆𑀓𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀳𑀥𑀫𑁆𑀫𑀺𑀓𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀧𑀺𑀢𑀸𑀤𑀬𑁄𑀯 𑀯𑀼𑀢𑁆𑀢𑀸. 𑀕𑀺𑀳𑀺𑀓𑀫𑁆𑀫𑀲𑀽𑀢𑀺 𑀯𑀺𑀲𑀬𑀲𑀢𑁆𑀢𑀫𑀻. 𑀧𑀤𑀯𑀸𑀭𑁂𑀦𑀸𑀢𑀺 𑀧𑀤𑀓𑁆𑀓𑀫𑁂𑀦, 𑀧𑀤𑁂 𑀧𑀤𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀞𑀫𑀁 𑀲𑀸𑀲𑀦𑀁 𑀅𑀕𑁆𑀕𑀳𑁂𑀢𑁆𑀯𑀸𑀧𑀺 𑀧𑀼𑀦 𑀯𑀤𑀢𑁄 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀧𑀼𑀦𑀸𑀢𑀺 𑀧𑀘𑁆𑀙𑀸. ‘‘𑀅𑀬𑀁 𑀤𑀸𑀦𑀺 𑀲𑁄 𑀕𑀸𑀫𑁄, 𑀳𑀦𑁆𑀤 𑀦𑀁 𑀲𑀸𑀲𑀦𑀁 𑀆𑀭𑁄𑀘𑁂𑀫𑀻’’𑀢𑀺 𑀫𑀕𑁆𑀕𑀸 𑀑𑀓𑁆𑀓𑀫𑀦𑁆𑀢𑀲𑁆𑀲 𑀘 𑀧𑀤𑁂 𑀧𑀤𑁂 𑀯𑀤𑀢𑁄 𑀘 𑀤𑀼𑀓𑁆𑀓𑀝𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀲 𑀧𑀦 𑀲𑀸𑀲𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀬𑀫𑁂𑀯 𑀓𑀸𑀭𑀼𑀜𑁆𑀜𑁂 𑀞𑀺𑀢𑁂𑀦 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑀺𑀭𑀽𑀧𑀁 𑀲𑀸𑀲𑀦𑀁 𑀆𑀭𑁄𑀘𑁂𑀢𑀼𑀁, ‘‘𑀫𑀫 𑀯𑀘𑀦𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀯𑀦𑁆𑀤𑀣𑀸’’𑀢𑀺𑀆𑀤𑀺𑀓𑀁 𑀕𑀺𑀳𑀻𑀦𑀁 𑀓𑀧𑁆𑀧𑀺𑀬𑀲𑀸𑀲𑀦𑀁 𑀳𑀭𑀺𑀢𑀼𑀜𑁆𑀘 𑀯𑀝𑁆𑀝𑀢𑀺.

𑁩𑁦𑁩. 𑀅𑀪𑀽𑀢𑀸𑀭𑁄𑀘𑀦𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀼𑀕𑁆𑀕𑀳𑀸𑀤𑀺𑀲𑀸𑀢𑀺 𑀅𑀪𑀽𑀢𑀸𑀭𑁄𑀘𑀦𑀸𑀬 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑁂 𑀘 𑀉𑀕𑁆𑀕𑀳𑁂 𑀉𑀧𑁆𑀧𑀦𑁆𑀦𑀧𑀘𑁆𑀘𑀬𑁂 𑀆𑀤𑀺𑀲𑀦𑁆𑀢𑀺 𑀓𑀣𑁂𑀦𑁆𑀢𑀺 𑀧𑀓𑀸𑀲𑁂𑀦𑁆𑀢𑀻𑀢𑀺 𑀅𑀪𑀽𑀢𑀸…𑀧𑁂… 𑀳𑀸𑀤𑀺𑀲𑀸, 𑀢𑀁𑀲𑀤𑀺𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁦𑁪. 𑀧𑀺𑀢𑀽𑀦𑀁 𑀳𑀭𑀸𑀧𑁂𑀢𑁆𑀯𑀸 𑀳𑀭𑀺𑀢𑁆𑀯𑀸𑀧𑀺 𑀧𑀼𑀧𑁆𑀨𑀸𑀦𑀺 𑀯𑀢𑁆𑀣𑀼𑀧𑀽𑀚𑀢𑁆𑀣𑀁 𑀤𑀸𑀢𑀼𑀁, 𑀲𑁂𑀲𑀜𑀸𑀢𑀻𑀦𑀁 𑀧𑀢𑁆𑀢𑀸𑀦𑀁 𑀯𑀢𑁆𑀣𑀼𑀧𑀽𑀚𑀢𑁆𑀣𑀁 𑀤𑀸𑀢𑀼𑀦𑁆𑀢𑀺 𑀬𑁄𑀚𑀦𑀻𑀬𑀁. ‘‘𑀳𑀭𑀸𑀧𑁂𑀢𑁆𑀯𑀸 𑀳𑀭𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀧𑀓𑁆𑀓𑁄𑀲𑀺𑀢𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀯𑀸’’𑀢𑀺 𑀯𑀼𑀢𑁆𑀢𑀫𑁂𑀯 𑀲𑀺𑀬𑀸𑀢𑀺 𑀦 𑀯𑀼𑀢𑁆𑀢𑀁. 𑀧𑀢𑁆𑀢𑀸𑀦𑀦𑁆𑀢𑀺 𑀧𑀓𑁆𑀓𑁄𑀲𑀓𑁂𑀦 𑀧𑀢𑁆𑀢𑀸𑀧𑀺 𑀕𑀳𑀺𑀢𑀸. 𑀯𑀢𑁆𑀣𑀼𑀧𑀽𑀚𑀢𑁆𑀣𑀦𑁆𑀢𑀺 𑀭𑀢𑀦𑀢𑁆𑀢𑀬𑀧𑀽𑀚𑀦𑀢𑁆𑀣𑀁. 𑀉𑀧𑀸𑀲𑀓𑀸𑀦𑀫𑁆𑀧𑀺 𑀧𑀦 𑀲𑀫𑁆𑀧𑀢𑁆𑀢𑀸𑀦𑀁 𑀯𑀢𑁆𑀣𑀼𑀧𑀽𑀚𑀢𑁆𑀣𑀁 𑀤𑀸𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀮𑀺𑀗𑁆𑀕𑀸𑀤𑀺𑀧𑀽𑀚𑀢𑁆𑀣𑀦𑁆𑀢𑀺 𑀲𑀺𑀯𑀮𑀺𑀗𑁆𑀕𑀕𑀺𑀡𑁆𑀟𑀼𑀩𑀺𑀫𑁆𑀩𑀸𑀤𑀺𑀧𑀽𑀚𑀦𑀢𑁆𑀣𑀁.

𑁩𑁦𑁫. 𑀢𑀣𑀸 𑀨𑀮𑀦𑁆𑀢𑀺 𑀇𑀫𑀺𑀦𑀸 𑀧𑀼𑀧𑁆𑀨𑁂 𑀯𑀼𑀢𑁆𑀢𑀁 𑀲𑀩𑁆𑀩𑀁 𑀅𑀧𑀤𑀺𑀲𑀢𑀺. 𑀧𑀭𑀺𑀩𑁆𑀩𑀬𑀯𑀺𑀳𑀻𑀦𑀸𑀦𑀦𑁆𑀢𑀺 𑀧𑀭𑀺𑀩𑁆𑀩𑀬𑀁 𑀧𑀸𑀣𑁂𑀬𑁆𑀬𑀁 𑀯𑀺𑀳𑀻𑀦𑀁 𑀦𑀝𑁆𑀞𑀁 𑀬𑁂𑀲𑀁 𑀆𑀕𑀦𑁆𑀢𑀼𑀓𑀸𑀦𑀦𑁆𑀢𑀺 𑀲𑀫𑀸𑀲𑁄. 𑀲𑀧𑀭𑀦𑁆𑀢𑀺 𑀅𑀢𑁆𑀢𑀦𑁄 𑀯𑀺𑀲𑁆𑀲𑀸𑀲𑀺𑀓𑀸. 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁬-𑁪𑁩𑁭) 𑀧𑀦 ‘‘𑀅𑀢𑁆𑀢𑀦𑁄 𑀲𑀦𑁆𑀢𑀓𑀁𑀬𑁂𑀯𑀸’’𑀢𑀺 𑀯𑀘𑀦𑀁 𑀣𑀼𑀮𑁆𑀮𑀘𑁆𑀘𑀬𑀸𑀤𑀺𑀯𑀺𑀪𑀸𑀕𑀢𑁄 𑀫𑁄𑀘𑁂𑀢𑁆𑀯𑀸 𑀯𑀼𑀢𑁆𑀢𑀁.

𑁩𑁦𑁬. 𑀲𑀫𑁆𑀫𑀢𑁂𑀦 𑀤𑁂𑀬𑁆𑀬𑀦𑁆𑀢𑀺 𑀬𑁄𑀚𑀦𑀸. 𑀤𑁂𑀬𑁆𑀬𑀦𑁆𑀢𑀺 𑀘𑀢𑀼𑀢𑁆𑀣𑀪𑀸𑀕𑀁 𑀤𑀸𑀢𑀩𑁆𑀩𑀁. 𑀇𑀢𑀭𑁂𑀦 𑀢𑀼 𑀅𑀧𑀮𑁄𑀓𑁂𑀢𑁆𑀯𑀸 𑀤𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀇𑀢𑀭𑁂𑀦 𑀢𑀼 𑀅𑀲𑀫𑁆𑀫𑀢𑁂𑀦 𑀧𑀦.

𑁩𑁦𑁭. 𑀧𑀭𑀺𑀘𑁆𑀙𑀺𑀚𑁆𑀚𑀸𑀢𑀺 ‘‘𑀏𑀢𑁆𑀢𑀓𑀸𑀦𑀺 𑀨𑀮𑀸𑀦𑀺 𑀤𑀸𑀢𑀩𑁆𑀩𑀸𑀦𑀻’’𑀢𑀺 𑀏𑀯𑀁 𑀨𑀮𑀧𑀭𑀺𑀘𑁆𑀙𑁂𑀤𑁂𑀦 𑀯𑀸 ‘‘𑀇𑀫𑁂𑀳𑀺 𑀭𑀼𑀓𑁆𑀔𑁂𑀳𑀺 𑀤𑀸𑀢𑀩𑁆𑀩𑀸𑀦𑀻’’𑀢𑀺 𑀏𑀯𑀁 𑀭𑀼𑀓𑁆𑀔𑀧𑀭𑀺𑀘𑁆𑀙𑁂𑀤𑁂𑀦 𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀢𑀢𑁄𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀨𑀮𑀢𑁄 𑀭𑀼𑀓𑁆𑀔𑀢𑁄 𑀯𑀸. 𑀬𑀸𑀘𑀫𑀸𑀦𑀲𑁆𑀲 𑀕𑀺𑀮𑀸𑀦𑀲𑁆𑀲𑁂𑀢𑀭𑀲𑁆𑀲 𑀯𑀸𑀢𑀺 𑀲𑀫𑁆𑀩𑀦𑁆𑀥𑀦𑀻𑀬𑀁. 𑀭𑀼𑀓𑁆𑀔𑀸𑀯 𑀤𑀲𑁆𑀲𑀺𑀬𑀸𑀢𑀺 ‘‘𑀇𑀥 𑀨𑀮𑀸𑀦𑀺 𑀲𑀼𑀦𑁆𑀤𑀭𑀸𑀦𑀺, 𑀇𑀢𑁄 𑀕𑀡𑁆𑀳𑀣𑀸’’𑀢𑀺 𑀅𑀯𑀢𑁆𑀯𑀸 ‘‘𑀇𑀢𑁄 𑀕𑀳𑁂𑀢𑀼𑀁 𑀮𑀩𑁆𑀪𑀢𑀻’’𑀢𑀺 𑀭𑀼𑀓𑁆𑀔𑀸 𑀯𑀸 𑀤𑀲𑁆𑀲𑁂𑀢𑀩𑁆𑀩𑀸.

𑁩𑁦𑁮. 𑀇𑀤𑀸𑀦𑀺 𑀅𑀝𑁆𑀞𑀲𑀼 𑀧𑀼𑀧𑁆𑀨𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀨𑀮𑀧𑀼𑀧𑁆𑀨𑀯𑀺𑀦𑀺𑀘𑁆𑀙𑀬𑀁 𑀅𑀯𑀲𑁂𑀲𑁂𑀲𑀼 𑀘𑀢𑀽𑀲𑀼 𑀅𑀧𑀤𑀺𑀲𑀦𑁆𑀢𑁄 ‘‘𑀲𑀺𑀭𑀻𑀲𑀸’’𑀢𑀺𑀆𑀤𑀺𑀫𑀸𑀳. 𑀲𑀺𑀭𑀻𑀲𑀘𑀼𑀡𑁆𑀡𑀓𑀲𑀯𑀸𑀤𑀺𑀘𑀼𑀡𑁆𑀡𑁂𑀢𑀺 𑀓𑀲𑀸𑀯𑀁 𑀬𑀁 𑀓𑀺𑀜𑁆𑀘𑀺 𑀆𑀤𑀺 𑀬𑀲𑁆𑀲, 𑀢𑀫𑁂𑀯 𑀘𑀼𑀡𑁆𑀡𑀁, 𑀲𑀺𑀭𑀻𑀲𑀘𑀼𑀡𑁆𑀡𑀜𑁆𑀘 𑀓𑀲𑀸𑀯𑀸𑀤𑀺𑀘𑀼𑀡𑁆𑀡𑀜𑁆𑀘𑀸𑀢𑀺 𑀲𑀫𑀸𑀲𑁄. ‘‘𑀲𑀺𑀭𑀻𑀲𑀘𑀼𑀡𑁆𑀡𑀁 𑀯𑀸 𑀅𑀜𑁆𑀜𑀁 𑀯𑀸 𑀓𑀲𑀸𑀯’’𑀦𑁆𑀢𑀺 𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁬-𑁪𑁩𑁭) 𑀯𑀼𑀢𑁆𑀢𑀁. ‘‘𑀓𑀲𑀸𑀯𑀸𑀤𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀭𑀲𑁆𑀲𑁂𑀦 𑀯𑀼𑀢𑁆𑀢𑀁. 𑀲𑁂𑀲𑁂𑀲𑀽𑀢𑀺 𑀯𑁂𑀴𑀼𑀆𑀤𑀻𑀲𑀼 𑀢𑀻𑀲𑀼. 𑀧𑀸𑀴𑀺𑀬𑀸 𑀅𑀯𑀼𑀢𑁆𑀢𑀲𑁆𑀲𑀸𑀧𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀧𑀡𑁆𑀡𑀫𑁆𑀧𑁂𑀢𑁆𑀣 𑀧𑀯𑁂𑀲𑀬𑁂’’𑀢𑀺. 𑀏𑀢𑁆𑀣𑀸𑀢𑀺 𑀧𑀼𑀧𑁆𑀨𑀸𑀤𑀻𑀲𑀽𑀢𑀺.

𑀤𑀽𑀲𑀦𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.