𑁩𑁯. 𑀯𑀲𑁆𑀲𑀽𑀧𑀦𑀸𑀬𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁦𑁯-𑁩𑁧𑁦. 𑀧𑀼𑀭𑀺𑀫𑀺𑀓𑀸 𑀧𑀘𑁆𑀙𑀺𑀫𑀺𑀓𑀸 𑀇𑀢𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀸 𑀤𑀼𑀯𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸𑀬 𑀅𑀦𑀦𑁆𑀢𑀭𑁂 𑀧𑀸𑀝𑀺𑀧𑀤𑀤𑀺𑀯𑀲𑁂 𑀉𑀧𑀕𑀦𑁆𑀢𑀩𑁆𑀩𑀸 𑀧𑀘𑁆𑀙𑀺𑀫𑀺𑀓𑀸𑀬 𑀧𑀼𑀭𑁂 𑀪𑀯𑀸𑀢𑀺 𑀧𑀼𑀭𑀺𑀫𑀸, 𑀲𑀸 𑀏𑀯 𑀧𑀼𑀭𑀺𑀫𑀺𑀓𑀸. 𑀢𑀢𑁄 𑀧𑀘𑁆𑀙𑀸 𑀪𑀯𑀸 𑀅𑀧𑀭𑀸𑀬 𑀧𑀼𑀡𑁆𑀡𑀫𑀸𑀬 𑀅𑀦𑀦𑁆𑀢𑀭𑁂 𑀧𑀸𑀝𑀺𑀧𑀤𑀤𑀺𑀯𑀲𑁂 𑀉𑀧𑀕𑀦𑁆𑀢𑀩𑁆𑀩𑀸 𑀧𑀘𑁆𑀙𑀺𑀫𑀺𑀓𑀸. 𑀉𑀧𑀦𑀬𑀦𑀁 𑀧𑀸𑀧𑀼𑀡𑀦𑀁 𑀉𑀧𑀕𑀫𑀦𑀁 𑀉𑀧𑀦𑀸𑀬𑀺𑀓𑀸, 𑀯𑀲𑁆𑀲𑀦𑁆𑀢𑀺 𑀯𑀼𑀝𑁆𑀞𑀺, 𑀇𑀥 𑀧𑀦 𑀯𑀲𑁆𑀲𑀓𑀸𑀮𑀁 ‘‘𑀯𑀲𑁆𑀲’’𑀦𑁆𑀢𑀺 𑀉𑀧𑀘𑀸𑀭𑁂𑀦 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀯𑀸𑀲𑁄 𑀉𑀧𑀘𑀸𑀭𑁂𑀦𑁂𑀯 ‘‘𑀯𑀲𑁆𑀲’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀯𑀲𑁆𑀲𑀲𑁆𑀲 𑀯𑀲𑁆𑀲𑀸𑀯𑀸𑀲𑀲𑁆𑀲 𑀉𑀧𑀦𑀸𑀬𑀺𑀓𑀸 𑀯𑀘𑀻𑀪𑁂𑀤𑀯𑀲𑁂𑀦 𑀯𑀸 𑀆𑀮𑀬𑀓𑀭𑀡𑀯𑀲𑁂𑀦 𑀯𑀸 𑀉𑀧𑀕𑀫𑀦𑀁 𑀯𑀲𑁆𑀲𑀽𑀧𑀦𑀸𑀬𑀺𑀓𑀸. 𑀢𑀢𑁆𑀣 𑀆𑀮𑀬𑀧𑀭𑀺𑀕𑁆𑀕𑀸𑀳𑁄 𑀘 𑀯𑀘𑀻𑀪𑁂𑀤𑁄 𑀘𑀸𑀢𑀺 𑀧𑀼𑀭𑀺𑀫𑀺𑀓𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀸 𑀤𑀼𑀯𑁂, 𑀆𑀮𑀬𑀧𑀭𑀺𑀕𑁆𑀕𑀸𑀳𑁄 𑀘 𑀯𑀘𑀻𑀪𑁂𑀤𑁄 𑀘𑀸𑀢𑀺 𑀧𑀘𑁆𑀙𑀺𑀫𑀺𑀓𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀸 𑀤𑀼𑀯𑁂𑀪𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀤𑁆𑀯𑀻𑀲𑀼. 𑀢𑀤𑀼𑀪𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀤𑀺𑀲𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁄 𑀆𑀮𑀬𑀧𑀭𑀺𑀕𑁆𑀕𑀸𑀳𑁄 𑀘 𑀯𑀘𑀻𑀪𑁂𑀤𑁄 𑀘 ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀇𑀫𑀁 𑀢𑁂𑀫𑀸𑀲𑀁 𑀯𑀲𑁆𑀲𑀁 𑀉𑀧𑁂𑀫𑀺, 𑀇𑀥 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 𑀏𑀤𑀺𑀲𑁄, 𑀏𑀢𑀸𑀤𑀺𑀲𑁄𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀓𑀫𑀼𑀧𑁆𑀧𑀢𑁆𑀢𑀺𑀅𑀦𑀸𑀤𑀭𑀸 𑀯𑀘𑀻𑀪𑁂𑀤𑁄 𑀧𑀞𑀫𑀁 𑀯𑀼𑀢𑁆𑀢𑁄. 𑀉𑀪𑀬𑀣𑀸 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦𑁂𑀯 𑀅𑀝𑁆𑀞𑀓𑀣𑀸𑀬𑀁 (𑀯𑀺. 𑀲𑀗𑁆𑀕. 𑀅𑀝𑁆𑀞. 𑁧𑁭𑁯; 𑀫𑀳𑀸𑀯. 𑀅𑀝𑁆𑀞. 𑁨𑁦𑁭) ‘‘𑀲𑀘𑁂𑀧𑀺 ‘𑀇𑀥 𑀯𑀲𑁆𑀲𑀁 𑀯𑀲𑀺𑀲𑁆𑀲𑀸𑀫𑀻’𑀢𑀺 𑀆𑀮𑀬𑁄 𑀅𑀢𑁆𑀣𑀺, 𑀅𑀲𑀢𑀺𑀬𑀸 𑀧𑀦 𑀯𑀲𑁆𑀲𑀁 𑀦 𑀉𑀧𑁂𑀢𑀺, 𑀕𑀳𑀺𑀢𑀲𑁂𑀦𑀸𑀲𑀦𑀁 𑀲𑀼𑀕𑁆𑀕𑀳𑀺𑀢𑀁, 𑀙𑀺𑀦𑁆𑀦𑀯𑀲𑁆𑀲𑁄 𑀦 𑀳𑁄𑀢𑀺, 𑀧𑀯𑀸𑀭𑁂𑀢𑀼𑀁 𑀮𑀪𑀢𑀺𑀬𑁂𑀯, 𑀯𑀺𑀦𑀸𑀧𑀺 𑀳𑀺 𑀯𑀘𑀻𑀪𑁂𑀤𑀁 𑀆𑀮𑀬𑀓𑀭𑀡𑀫𑀢𑁆𑀢𑁂𑀦𑀧𑀺 𑀯𑀲𑁆𑀲𑀁 𑀉𑀧𑀕𑀢𑀫𑁂𑀯 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀦𑀸𑀯𑀸𑀲𑀢𑁆𑀣𑀯𑀚𑁂𑀲𑀼 𑀧𑀦 𑀧𑀭𑀺𑀬𑁂𑀲𑀺𑀢𑁆𑀯𑀸 𑀲𑁂𑀦𑀸𑀲𑀦𑀁 𑀅𑀮𑀪𑀦𑁆𑀢𑁂𑀦 𑀆𑀮𑀬𑀓𑀭𑀡𑀫𑀢𑁆𑀢𑁂𑀦𑁂𑀯 𑀉𑀧𑀕𑀦𑁆𑀢𑀩𑁆𑀩𑀁. 𑀉𑀧𑀕𑀘𑁆𑀙𑀦𑁆𑀢𑁂𑀦 𑀘 𑀯𑀺𑀳𑀸𑀭𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀲𑀩𑁆𑀩𑀁 𑀘𑁂𑀢𑀺𑀬𑀯𑀦𑁆𑀤𑀦𑀸𑀤𑀺𑀲𑀸𑀫𑀻𑀘𑀺𑀓𑀫𑁆𑀫𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀉𑀧𑀕𑀦𑁆𑀢𑀩𑁆𑀩𑀁. 𑀆𑀮𑀬𑀧𑀭𑀺𑀕𑁆𑀕𑀳𑁂 𑀆𑀮𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀢𑁆𑀣 𑀆𑀮𑀬𑁄’’𑀢𑀺 𑀆𑀳. 𑀏𑀢𑁆𑀣𑀸𑀢𑀺 𑀤𑁆𑀯𑀻𑀲𑀼.

𑁩𑁧𑁧. 𑀢𑀤𑀳𑀽𑀢𑀺 𑀢𑀲𑁆𑀫𑀺𑀁 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂. 𑀚𑀸𑀦𑀦𑁆𑀢𑀺 ‘‘𑀅𑀚𑁆𑀚 𑀯𑀲𑁆𑀲𑀽𑀧𑀦𑀸𑀬𑀺𑀓𑀸’’𑀢𑀺 𑀚𑀸𑀦𑀦𑁆𑀢𑁄, 𑀅𑀦𑀼𑀧𑀕𑀘𑁆𑀙𑀢𑁄𑀢𑀺𑀫𑀲𑁆𑀲 𑀯𑀺𑀲𑁂𑀲𑀦𑀁.

𑁩𑁧𑁨. 𑀤𑀼𑀢𑀺𑀬𑀦𑁆𑀢𑀺 𑀧𑀘𑁆𑀙𑀺𑀫𑀺𑀓𑀁. 𑀅𑀦𑀼𑀧𑀕𑀢𑁄𑀢𑀺 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁂𑀦 𑀧𑀼𑀭𑀺𑀫𑀺𑀓𑀁 𑀅𑀦𑀼𑀧𑀕𑀢𑁄. 𑀢𑁂𑀫𑀸𑀲𑀦𑁆𑀢𑀺 𑀧𑀼𑀭𑀺𑀫𑀁 𑀯𑀸 𑀢𑁂𑀫𑀸𑀲𑀁 𑀧𑀘𑁆𑀙𑀺𑀫𑀁 𑀯𑀸 𑀢𑁂𑀫𑀸𑀲𑀁. 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀧𑀦 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸𑀧𑀺 𑀢𑀤𑀳𑁂𑀯 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀦𑁆𑀢𑀲𑁆𑀲𑀸𑀧𑀺 𑀅𑀦𑁆𑀢𑁄𑀲𑀢𑁆𑀢𑀸𑀳𑁂 𑀦𑀺𑀯𑀢𑁆𑀢𑁂𑀦𑁆𑀢𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺.

𑁩𑁧𑁩-𑁫. 𑀫𑀸𑀢𑀸𑀧𑀺𑀢𑀽𑀦𑀁 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀜𑁆𑀘 𑀅𑀢𑁆𑀣𑀸𑀬 𑀕𑀺𑀮𑀸𑀦𑀢𑀤𑀼𑀧𑀝𑁆𑀞𑀸𑀓𑀪𑀢𑁆𑀢𑀁 𑀑𑀲𑀥𑀜𑁆𑀘 𑀏𑀲𑀺𑀲𑁆𑀲𑀁 𑀯𑀸 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀯𑀸 𑀉𑀧𑀝𑁆𑀞𑀺𑀲𑁆𑀲𑀁 𑀯𑀸 𑀕𑀦𑁆𑀢𑁆𑀯𑀸 𑀅𑀳𑀁 𑀦𑀸𑀪𑀺𑀭𑀢𑀁 𑀯𑀽𑀧𑀓𑀸𑀲𑁂𑀲𑁆𑀲𑀁 𑀯𑀸 𑀓𑀼𑀓𑁆𑀓𑀼𑀘𑁆𑀘𑀁 𑀯𑀺𑀦𑁄𑀤𑀦𑀜𑁆𑀘 𑀤𑀺𑀝𑁆𑀞𑀺𑀁 𑀯𑀺𑀯𑁂𑀘𑀦𑀜𑁆𑀘 𑀕𑀭𑀼𑀓𑀸𑀤𑀺𑀓𑀁 𑀯𑀼𑀝𑁆𑀞𑀸𑀦𑀁 𑀯𑀸𑀧𑀺 𑀉𑀲𑁆𑀲𑀼𑀓𑁆𑀓𑀁 𑀯𑀸𑀧𑀺 𑀓𑀭𑀺𑀲𑁆𑀲𑀁 𑀯𑀸𑀧𑀺 𑀓𑀸𑀭𑁂𑀲𑁆𑀲𑀁 𑀯𑀸𑀧𑀻𑀢𑀺 𑀏𑀯𑀫𑀸𑀤𑀺𑀦𑀸 𑀲𑀢𑁆𑀢𑀸𑀳𑀓𑀺𑀘𑁆𑀘𑁂𑀦 𑀧𑀳𑀺𑀢𑁂𑀧𑀺 𑀯𑀸 𑀅𑀧𑀳𑀺𑀢𑁂𑀧𑀺 𑀯𑀸 𑀕𑀦𑁆𑀢𑀼𑀁 𑀮𑀩𑁆𑀪𑀦𑁆𑀢𑀺 𑀬𑁄𑀚𑀦𑀸.

𑀏𑀢𑁆𑀣 𑀧𑀦 𑀮𑀩𑁆𑀪𑀫𑀸𑀦𑀓𑀯𑀲𑁂𑀦 𑀬𑁄𑀚𑁂𑀢𑁆𑀯𑀸 𑀯𑀓𑁆𑀔𑀫𑀸𑀦𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀸𑀢𑀸𑀤𑀺𑀲𑀼𑀢𑀺𑀬𑀸 𑀢𑁂𑀬𑁂𑀯 𑀕𑀺𑀮𑀸𑀦-𑀲𑀤𑁆𑀤𑁂𑀦 𑀕𑀬𑁆𑀳𑀦𑁆𑀢𑀺, 𑀢𑁂𑀲𑀁 𑀉𑀧𑀝𑁆𑀞𑀸𑀓𑀸 𑀢𑀤𑀼𑀧𑀝𑁆𑀞𑀸𑀓𑀸, 𑀕𑀺𑀮𑀸𑀦𑀸 𑀘 𑀢𑀤𑀼𑀧𑀝𑁆𑀞𑀸𑀓𑀸 𑀘, 𑀢𑁂𑀲𑀁 𑀪𑀢𑁆𑀢𑀦𑁆𑀢𑀺 𑀲𑀫𑀸𑀲𑁄. 𑀑𑀲𑀥𑀦𑁆𑀢𑀺 𑀢𑁂𑀲𑀁𑀬𑁂𑀯 𑀕𑀺𑀮𑀸𑀦𑀸𑀦𑀁 𑀪𑁂𑀲𑀚𑁆𑀚𑀁. 𑀏𑀲𑀺𑀲𑁆𑀲𑀦𑁆𑀢𑀺 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺. 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀢𑁂𑀬𑁂𑀯 𑀲𑀢𑁆𑀢𑀚𑀦𑁂 𑀕𑀺𑀮𑀸𑀦𑁂 𑀧𑀼𑀘𑁆𑀙𑀺𑀲𑁆𑀲𑀁. 𑀉𑀧𑀝𑁆𑀞𑀺𑀲𑁆𑀲𑀦𑁆𑀢𑀺 𑀢𑁂𑀬𑁂𑀯 𑀕𑀺𑀮𑀸𑀦𑁂 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺. 𑀅𑀪𑀺𑀭𑀫𑀢𑀻𑀢𑀺 𑀅𑀪𑀺𑀭𑀢𑁄, 𑀯𑀺𑀲𑀪𑀸𑀕𑀭𑀽𑀧𑀸𑀤𑀺𑀤𑀲𑁆𑀲𑀦𑁂𑀦 𑀲𑀸𑀲𑀦𑁂 𑀦 𑀅𑀪𑀺𑀭𑀢𑁄 𑀦𑀸𑀪𑀺𑀭𑀢𑁄. 𑀅𑀪𑀺𑀭𑀫𑀡𑀁 𑀯𑀸 𑀅𑀪𑀺𑀭𑀢𑀁, 𑀦𑀢𑁆𑀣𑀺 𑀅𑀪𑀺𑀭𑀢𑀫𑀲𑁆𑀲𑀸𑀢𑀺 𑀦𑀸𑀪𑀺𑀭𑀢𑁄, 𑀢𑀁. 𑀲𑀳𑀥𑀫𑁆𑀫𑀺𑀓𑁂𑀲𑀼 𑀬𑁄 𑀦𑀸𑀪𑀺𑀭𑀢𑁄, 𑀢𑀁 𑀯𑀽𑀧𑀓𑀸𑀲𑁂𑀲𑁆𑀲𑀁 𑀯𑀺𑀓𑁆𑀔𑁂𑀧𑀳𑀭𑀡𑀢𑁆𑀣𑀁 𑀅𑀜𑁆𑀜𑀢𑁆𑀣 𑀦𑀬𑀺𑀲𑁆𑀲𑀸𑀫𑀺. 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀧𑀜𑁆𑀘𑀦𑁆𑀦𑀁𑀬𑁂𑀯 𑀉𑀧𑁆𑀧𑀦𑁆𑀦𑀁 𑀯𑀺𑀦𑀬𑀓𑀼𑀓𑁆𑀓𑀼𑀘𑁆𑀘𑀁. 𑀓𑀺𑀢𑀓𑀬𑁄𑀕𑁂 𑀯𑀺𑀓𑀧𑁆𑀧𑁂𑀦 𑀤𑀼𑀢𑀺𑀬𑀸. 𑀤𑀺𑀝𑁆𑀞𑀺𑀦𑁆𑀢𑀺 𑀢𑁂𑀲𑀁𑀬𑁂𑀯 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸. 𑀕𑀭𑀼𑀓𑀫𑀸𑀤𑀺𑀓𑀦𑁆𑀢𑀺 𑀕𑀭𑀼𑀓𑀁 𑀆𑀤𑀺 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀆𑀤𑀺-𑀲𑀤𑁆𑀤𑁂𑀦 𑀲𑀸𑀫𑀡𑁂𑀭𑀸𑀦𑀁 𑀯𑀲𑁆𑀲𑀧𑀼𑀘𑁆𑀙𑀦𑀁, 𑀲𑀺𑀓𑁆𑀔𑀸𑀲𑀫𑀸𑀤𑀬𑀺𑀢𑀼𑀓𑀸𑀫𑀢𑀸, 𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑀓𑀭𑀡𑀁 𑀲𑀗𑁆𑀕𑀳𑀺𑀢𑀁. 𑀯𑀼𑀝𑁆𑀞𑀸𑀦𑀦𑁆𑀢𑀺 𑀪𑀺𑀓𑁆𑀔𑀼𑀦𑁄 𑀕𑀭𑀼𑀓𑀸𑀧𑀢𑁆𑀢𑀺𑀬𑀸 𑀧𑀭𑀺𑀯𑀸𑀲𑀫𑀸𑀦𑀢𑁆𑀢𑀤𑀸𑀦𑀸𑀤𑀻𑀳𑀺 𑀯𑀼𑀝𑁆𑀞𑀸𑀦𑀁. 𑀉𑀲𑁆𑀲𑀼𑀓𑁆𑀓𑀦𑁆𑀢𑀺 𑀯𑀲𑁆𑀲𑀧𑀼𑀘𑁆𑀙𑀦𑀸𑀤𑀺𑀉𑀲𑁆𑀲𑀼𑀓𑁆𑀓𑀁. 𑀏𑀯𑀫𑀸𑀤𑀺𑀦𑀸𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀤𑀺𑀝𑁆𑀞𑀺𑀕𑀢𑀸𑀤𑀻𑀦𑀁 𑀥𑀫𑁆𑀫𑀓𑀣𑀸𑀓𑀭𑀡𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀕𑀦𑁆𑀢𑀼𑀁 𑀮𑀩𑁆𑀪𑀦𑁆𑀢𑀺 𑀏𑀢𑁆𑀣 𑀕𑀘𑁆𑀙𑀦𑁆𑀢𑁂𑀦 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀺𑀢𑁂𑀦𑁂𑀯 ‘‘𑀅𑀦𑁆𑀢𑁄𑀲𑀢𑁆𑀢𑀸𑀳𑁂 𑀆𑀕𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀆𑀪𑁄𑀕𑀁 𑀅𑀓𑀢𑁆𑀯𑀸 𑀉𑀧𑀘𑀸𑀭𑀲𑀻𑀫𑀁 𑀅𑀢𑀺𑀓𑁆𑀓𑀫𑀢𑀺, 𑀙𑀺𑀦𑁆𑀦𑀯𑀲𑁆𑀲𑁄 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺. 𑀲𑀢𑁆𑀢𑀸𑀳𑀓𑀺𑀘𑁆𑀘𑁂𑀦𑀸𑀢𑀺 𑀲𑀢𑁆𑀢𑀸𑀳𑀲𑁆𑀲 𑀮𑀩𑁆𑀪𑀫𑀸𑀦𑀓𑀁 𑀯𑀼𑀢𑁆𑀢𑀁 𑀯𑀓𑁆𑀔𑀫𑀸𑀦𑀜𑁆𑀘 𑀲𑀗𑁆𑀖𑀓𑀫𑁆𑀫𑀸𑀤𑀺 𑀓𑀺𑀘𑁆𑀘𑀁 𑀲𑀢𑁆𑀢𑀸𑀳𑀓𑀺𑀘𑁆𑀘𑀁. 𑀲𑀢𑁆𑀢𑀫𑀅𑀭𑀼𑀡𑀫𑀢𑁆𑀢𑀲𑁆𑀲𑁂𑀯 𑀯𑀺𑀳𑀸𑀭𑁂 𑀉𑀝𑁆𑀞𑀸𑀧𑀦𑀻𑀬𑀢𑁆𑀢𑀸 𑀲𑀢𑁆𑀢𑀸𑀳𑀲𑁆𑀲 𑀲𑀸𑀓𑀮𑁆𑀮𑁂𑀦 𑀕𑀳𑀡𑀁.

𑁩𑁧𑁬. 𑀲𑀗𑁆𑀖𑀓𑀫𑁆𑀫𑁂 𑀯𑀚𑁂𑀢𑀺 𑀲𑀗𑁆𑀖𑀲𑁆𑀲 𑀓𑀺𑀘𑁆𑀘𑁂 𑀉𑀧𑁄𑀲𑀣𑀸𑀕𑀸𑀭𑀸𑀤𑀻𑀲𑀼 𑀲𑁂𑀦𑀸𑀲𑀦𑁂𑀲𑀼 𑀯𑀸 𑀘𑁂𑀢𑀺𑀬𑀙𑀢𑁆𑀢𑀯𑁂𑀤𑀺𑀓𑀸𑀤𑀻𑀲𑀼 𑀯𑀸 𑀅𑀦𑁆𑀢𑀫𑀲𑁄 𑀧𑀼𑀕𑁆𑀕𑀮𑀺𑀓𑀲𑁂𑀦𑀸𑀲𑀦𑁂𑀲𑀼 𑀯𑀸𑀧𑀺 𑀓𑀢𑁆𑀢𑀩𑁆𑀩𑀦𑀺𑀫𑀺𑀢𑁆𑀢𑁂 𑀯𑀚𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀲𑀯𑀦𑀢𑁆𑀣𑀁 𑀦𑀺𑀫𑀦𑁆𑀢𑀺𑀢𑁄 𑀯𑀸𑀧𑀺 𑀯𑀚𑁂, 𑀕𑀭𑀽𑀳𑀺 𑀧𑁂𑀲𑀺𑀢𑁄 𑀯𑀸𑀧𑀺 𑀯𑀚𑁂, 𑀕𑀭𑀽𑀦𑀁 𑀧𑀲𑁆𑀲𑀺𑀢𑀼𑀁 𑀯𑀸𑀧𑀺 𑀯𑀚𑁂𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀦𑀺𑀫𑀦𑁆𑀢𑀺𑀢𑁄𑀢𑀺 𑀏𑀢𑁆𑀣 𑀲𑀘𑁂 𑀧𑀞𑀫𑀁𑀬𑁂𑀯 𑀓𑀢𑀺𑀓𑀸 𑀓𑀢𑀸 𑀳𑁄𑀢𑀺, ‘‘𑀅𑀲𑀼𑀓𑀤𑀺𑀯𑀲𑀁 𑀦𑀸𑀫 𑀲𑀦𑁆𑀦𑀺𑀧𑀢𑀺𑀢𑀩𑁆𑀩’’𑀦𑁆𑀢𑀺 𑀦𑀺𑀫𑀦𑁆𑀢𑀺𑀢𑁄𑀬𑁂𑀯 𑀦𑀸𑀫 𑀳𑁄𑀢𑀺. 𑀕𑀭𑀽𑀳𑀻𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺. 𑀧𑀳𑀺𑀢𑁄𑀢𑀺 𑀪𑀡𑁆𑀟𑀥𑁄𑀯𑀦𑀸𑀤𑀺𑀅𑀢𑁆𑀣𑀸𑀬 𑀧𑁂𑀲𑀺𑀢𑁄. 𑀧𑀲𑁆𑀲𑀺𑀢𑀼𑀦𑁆𑀢𑀺 𑀅𑀕𑀺𑀮𑀸𑀦𑁂𑀧𑀺.

𑁩𑁧𑁭. 𑀪𑀡𑁆𑀟…𑀧𑁂… 𑀤𑀲𑁆𑀲𑀦𑁂 𑀦 𑀯𑀚𑁂𑀢𑀺 𑀬𑁄𑀚𑀦𑀻𑀬𑀁. 𑀏𑀢𑁆𑀣𑀸𑀧𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀲𑀢𑁆𑀢𑀫𑀻. 𑀪𑀡𑁆𑀟𑀁 𑀦𑀸𑀫 𑀘𑀻𑀯𑀭𑀁. 𑀜𑀸𑀢𑀻 𑀫𑀸𑀢𑀸𑀧𑀺𑀢𑀽𑀳𑀺 𑀅𑀜𑁆𑀜𑁂. 𑀉𑀧𑀝𑁆𑀞𑀸𑀓𑀸 𑀉𑀧𑀸𑀲𑀓𑀸. ‘‘𑀅𑀚𑁆𑀚𑁂𑀯 𑀆𑀕𑀫𑀺𑀲𑁆𑀲’’𑀦𑁆𑀢𑀺 𑀅𑀤𑀽𑀭𑀕𑁄 𑀦 𑀧𑀸𑀧𑀼𑀡𑁂𑀬𑁆𑀬, 𑀮𑀩𑁆𑀪𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀮𑀩𑁆𑀪𑀦𑁆𑀢𑀺 𑀇𑀫𑀲𑁆𑀲 𑀅𑀧𑀸𑀧𑀼𑀡𑀦𑀁 𑀯𑀼𑀢𑁆𑀢𑀓𑀫𑁆𑀫𑀁. 𑀅𑀚𑁆𑀚𑁂𑀯𑀸𑀕𑀫𑀺𑀲𑁆𑀲𑀦𑁆𑀢𑀺 𑀲𑀸𑀫𑀦𑁆𑀢𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀼𑀦 𑀆𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀘𑁂 𑀅𑀭𑀼𑀡𑀼𑀕𑁆𑀕𑀫𑀦𑀁 𑀳𑁄𑀢𑀺, 𑀯𑀲𑁆𑀲𑀘𑁆𑀙𑁂𑀤𑁄𑀧𑀺 𑀦 𑀳𑁄𑀢𑀺, 𑀭𑀢𑁆𑀢𑀺𑀘𑁆𑀙𑁂𑀤𑀤𑀼𑀓𑁆𑀓𑀝𑀜𑁆𑀘 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑀺.

𑁩𑁧𑁮. 𑀲𑁂𑀲𑀜𑀸𑀢𑀻𑀳𑀻𑀢𑀺 𑀫𑀸𑀢𑀸𑀧𑀺𑀢𑀽𑀳𑀺 𑀅𑀯𑀲𑁂𑀲𑀜𑀸𑀢𑀻𑀳𑀺. 𑀦𑀺𑀤𑁆𑀤𑀺𑀲𑀺𑀢𑁆𑀯𑀸𑀯𑀸𑀢𑀺 𑀤𑀸𑀦𑀥𑀫𑁆𑀫𑀲𑀯𑀦𑀸𑀤𑀻𑀦𑀺. ‘‘𑀧𑀳𑀺𑀢𑁂 𑀧𑁂𑀲𑀺𑀢𑁂’’𑀢𑀺 𑀘𑁂𑀢𑁆𑀣 ‘‘𑀮𑀩𑁆𑀪’’𑀦𑁆𑀢𑀺 𑀅𑀦𑀼𑀯𑀢𑁆𑀢𑀦𑀻𑀬𑀁.

𑁩𑁧𑁯. 𑀅𑀢𑁆𑀢𑀦𑁄 𑀅𑀦𑁆𑀢𑀭𑀸𑀬𑁂 𑀲𑀢𑀻𑀢𑀺 𑀘𑁄𑀭𑀲𑀭𑀻𑀲𑀧𑀯𑀸𑀴𑀚𑀻𑀯𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁂, 𑀅𑀦𑁆𑀢𑀫𑀲𑁄 𑀪𑁂𑀲𑀚𑁆𑀚𑀸𑀮𑀸𑀪𑀧𑀢𑀺𑀭𑀽𑀧𑀉𑀧𑀝𑁆𑀞𑀸𑀓𑀸𑀮𑀸𑀪𑁂𑀧𑀺. ‘‘𑀯𑀲𑁆𑀲𑀘𑁆𑀙𑁂𑀤𑀓𑀸𑀭𑀡𑀫𑁆𑀧𑀺 𑀲𑀢𑁆𑀢𑀸𑀳𑀓𑀭𑀡𑀻𑀬𑀁 𑀲𑀺𑀬𑀸’’𑀢𑀺 𑀓𑁂𑀘𑀺 𑀧𑁄𑀭𑀸𑀡𑀸 𑀯𑀤𑀦𑁆𑀢𑀺, 𑀢𑀁 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀲𑀩𑁆𑀩𑀣𑀸 𑀯𑀲𑁆𑀲𑀘𑁆𑀙𑁂𑀤𑁂𑀦 𑀩𑀳𑀺 𑀯𑀸𑀲𑀸𑀬 𑀅𑀦𑀼𑀜𑁆𑀜𑀸𑀢𑀓𑀸𑀭𑀡𑀁 𑀲𑀢𑁆𑀢𑀸𑀳𑀫𑀢𑁆𑀢𑀁 𑀩𑀳𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀅𑀦𑁆𑀢𑁄𑀯𑀺𑀳𑀸𑀭𑁂𑀬𑁂𑀯 𑀯𑀸𑀲𑁂𑀦 𑀯𑀲𑁆𑀲𑀘𑁆𑀙𑁂𑀤𑀸𑀓𑀸𑀭𑀡𑀁 𑀓𑀣𑀁 𑀦𑀸𑀫 𑀦 𑀲𑀺𑀬𑀸𑀢𑀺. 𑀙𑀺𑀦𑁆𑀦𑀯𑀲𑁆𑀲𑁄 𑀦𑁄 𑀧𑀯𑀸𑀭𑀬𑁂𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁨𑁦. ‘‘𑀅𑀲𑁂𑀦𑀸𑀲𑀦𑀺𑀓𑁂𑀦𑀸’’𑀢𑀺 𑀇𑀫𑀺𑀦𑀸𑀯 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀣𑀢𑁆𑀢𑁂𑀧𑀺 ‘‘𑀅𑀚𑁆𑀛𑁄𑀓𑀸𑀲𑁂 𑀘𑀸’’𑀢𑀺 𑀯𑀘𑀦𑀁 ‘‘𑀅𑀳𑀁 𑀅𑀩𑁆𑀪𑁄𑀓𑀸𑀲𑀺𑀓𑁄, 𑀓𑀺𑀁 𑀫𑁂 𑀲𑁂𑀦𑀸𑀲𑀦𑁂𑀦𑀸’’𑀢𑀺 𑀯𑀸𑀲𑀸𑀦𑀺𑀯𑀢𑁆𑀢𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀭𑀼𑀓𑁆𑀔𑀲𑁆𑀲 𑀲𑀼𑀲𑀺𑀭𑁂𑀢𑀺 𑀲𑀼𑀤𑁆𑀥𑁂 𑀭𑀼𑀓𑁆𑀔𑀲𑀼𑀲𑀺𑀭𑁂. 𑀫𑀳𑀦𑁆𑀢𑀲𑁆𑀲 𑀧𑀦 𑀲𑀼𑀲𑀺𑀭𑀲𑁆𑀲 𑀅𑀦𑁆𑀢𑁄 𑀧𑀤𑀭𑀘𑁆𑀙𑀤𑀦𑀓𑀼𑀝𑀺𑀓𑀁 𑀓𑀢𑁆𑀯𑀸 𑀧𑀯𑀺𑀲𑀦𑀤𑁆𑀯𑀸𑀭𑀁 𑀬𑁄𑀚𑁂𑀢𑁆𑀯𑀸 𑀉𑀧𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. ‘‘𑀯𑀺𑀝𑀧𑁂𑀧𑀺 𑀅𑀝𑁆𑀝𑀓𑀁 𑀩𑀦𑁆𑀥𑀺𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀢𑀣𑀸 𑀙𑀢𑁆𑀢𑀘𑀸𑀝𑀻𑀲𑀼𑀧𑀺 𑀢𑀤𑀦𑀼𑀭𑀽𑀧𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀙𑀯𑀓𑀼𑀝𑀺 𑀦𑀸𑀫 𑀝𑀗𑁆𑀓𑀺𑀢𑀫𑀜𑁆𑀘𑀸𑀤𑀺𑀪𑁂𑀤𑀸 𑀓𑀼𑀝𑀺. 𑀢𑀢𑁆𑀣 𑀝𑀗𑁆𑀓𑀺𑀢𑀫𑀜𑁆𑀘𑁄 𑀦𑀸𑀫 𑀤𑀻𑀖𑁂 𑀫𑀜𑁆𑀘𑀧𑀸𑀤𑁂 𑀫𑀚𑁆𑀛𑁂 𑀯𑀺𑀚𑁆𑀛𑀺𑀢𑁆𑀯𑀸 𑀅𑀝𑀦𑀺𑀬𑁄 𑀧𑀯𑁂𑀲𑁂𑀢𑁆𑀯𑀸 𑀓𑀢𑁄, 𑀘𑀢𑀼𑀦𑁆𑀦𑀁 𑀧𑀸𑀲𑀸𑀡𑀸𑀦𑀁 𑀉𑀧𑀭𑀺 𑀧𑀸𑀲𑀸𑀡𑀁 𑀅𑀢𑁆𑀣𑀭𑀺𑀢𑁆𑀯𑀸 𑀓𑀢𑀫𑁆𑀧𑀺 𑀝𑀗𑁆𑀓𑀺𑀢𑀫𑀜𑁆𑀘𑁄.

𑁩𑁨𑁧. 𑀅𑀲𑁂𑀦𑀸𑀲𑀦𑀺𑀓𑁂𑀦𑀸𑀢𑀺 𑀬𑀲𑁆𑀲 𑀢𑀺𑀡𑀧𑀡𑁆𑀡𑀇𑀝𑁆𑀞𑀓𑀲𑀺𑀮𑀸𑀲𑀼𑀥𑀸𑀲𑀗𑁆𑀔𑀸𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀙𑀤𑀦𑀸𑀦𑀁 𑀅𑀜𑁆𑀜𑀢𑀭𑁂𑀦 𑀙𑀦𑁆𑀦𑀁 𑀬𑁄𑀚𑀺𑀢𑀤𑁆𑀯𑀸𑀭𑀩𑀦𑁆𑀥𑀦𑀁 𑀲𑁂𑀦𑀸𑀲𑀦𑀁 𑀦𑀢𑁆𑀣𑀺, 𑀢𑁂𑀦. 𑀇𑀤𑀁 𑀧𑀦 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀁, 𑀢𑀣𑀸 𑀘 𑀲𑀢𑀺 𑀦𑀸𑀯𑀸𑀤𑀻𑀲𑀼 𑀯𑀺𑀬 𑀯𑀺𑀲𑀼𑀁 𑀯𑀺𑀥𑀸𑀦𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺. 𑀦𑀸𑀯𑀸𑀲𑀢𑁆𑀣𑀯𑀚𑀽𑀧𑀕𑁄𑀢𑀺 𑀇𑀫𑀺𑀦𑀸 𑀅𑀲𑁂𑀦𑀸𑀲𑀦𑀺𑀓𑁂𑀦 𑀦𑀸𑀯𑀸𑀤𑀻𑀲𑀼 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀢𑀢𑁆𑀣 𑀘 𑀓𑀼𑀝𑀺𑀓𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀮𑀪𑀦𑁆𑀢𑁂𑀦 𑀢𑀢𑁆𑀣 𑀧𑀯𑀺𑀲𑀺𑀢𑁆𑀯𑀸 𑀯𑀺𑀳𑀸𑀭𑀸𑀪𑀸𑀯𑀢𑁄 ‘‘𑀯𑀺𑀳𑀸𑀭𑁂’’𑀢𑀺 𑀅𑀯𑀢𑁆𑀯𑀸 ‘‘𑀇𑀥 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀢𑀩𑁆𑀩𑀁, 𑀅𑀮𑀪𑀦𑁆𑀢𑁂𑀦 𑀆𑀮𑀬𑁄 𑀓𑀸𑀢𑀩𑁆𑀩𑁄. 𑀧𑀯𑀸𑀭𑁂𑀢𑀼𑀜𑁆𑀘𑀸𑀢𑀺 𑀘-𑀲𑀤𑁆𑀤𑁂𑀦 𑀯𑀲𑁆𑀲𑀘𑁆𑀙𑁂𑀤𑀦𑀺𑀫𑀺𑀢𑁆𑀢𑀸𑀬 𑀆𑀧𑀢𑁆𑀢𑀺𑀬𑀸 𑀅𑀪𑀸𑀯𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. ‘‘𑀯𑀚𑁂 𑀲𑀢𑁆𑀣𑁂 𑀦𑀸𑀯𑀸𑀬𑀦𑁆𑀢𑀺 𑀢𑀻𑀲𑀼 𑀞𑀸𑀦𑁂𑀲𑀼 𑀦𑀢𑁆𑀣𑀺 𑀯𑀲𑁆𑀲𑀘𑁆𑀙𑁂𑀤𑁂 𑀆𑀧𑀢𑁆𑀢𑀺, 𑀧𑀯𑀸𑀭𑁂𑀢𑀼𑀜𑁆𑀘 𑀮𑀩𑁆𑀪𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁦𑁩) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀯𑀲𑁆𑀲𑀘𑁆𑀙𑁂𑀤𑁂𑀢𑀺 𑀘 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑁂𑀦 𑀯𑀚𑁄 𑀢𑁂𑀦 𑀕𑀦𑁆𑀢𑀼’’𑀦𑁆𑀢𑀺 (𑀫𑀳𑀸𑀯. 𑁨𑁦𑁩) 𑀯𑀼𑀢𑁆𑀢𑀢𑁆𑀢𑀸, 𑀲𑀢𑁆𑀣𑀲𑁆𑀲 𑀦𑀸𑀯𑀸𑀬 𑀘 𑀕𑀫𑀦𑀲𑀪𑀸𑀯𑁂𑀦𑁂𑀯 𑀞𑀺𑀢𑀢𑁆𑀢𑀸 𑀘 𑀯𑀲𑁆𑀲𑀽𑀧𑀕𑀢𑀝𑁆𑀞𑀸𑀦𑁂 𑀅𑀯𑀲𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀫𑀦𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀲𑁆𑀲𑀽𑀧𑀦𑀸𑀬𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.