𑁩𑁭. 𑀉𑀕𑁆𑀕𑀳𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁮𑁧. 𑀧𑀼𑀕𑁆𑀕𑀮-𑀲𑀤𑁆𑀤𑀫𑀢𑁆𑀢𑁂 𑀧𑀬𑀼𑀢𑁆𑀢𑁂 𑀅𑀢𑁆𑀢𑀦𑁄𑀧𑀺 𑀕𑀳𑀡𑀲𑀫𑁆𑀪𑀯𑁄 𑀲𑀺𑀬𑀸𑀢𑀺 𑀩𑁆𑀬𑀪𑀺𑀘𑀸𑀭𑀢𑁆𑀣𑀁 𑀅𑀜𑁆𑀜-𑀲𑀤𑁆𑀤𑀧𑁆𑀧𑀬𑁄𑀕𑁄. 𑀲𑀢𑀺 𑀲𑀫𑁆𑀪𑀯𑁂 𑀩𑁆𑀬𑀪𑀺𑀘𑀸𑀭𑁂 𑀯𑀺𑀲𑁂𑀲𑀦𑀁 𑀲𑀸𑀢𑁆𑀣𑀓𑀁 𑀳𑁄𑀢𑀻𑀢𑀺. 𑀤𑀲𑀪𑁂𑀤𑀫𑁆𑀧𑀺 𑀭𑀢𑀦𑀦𑁆𑀢𑀺 ‘‘𑀫𑀼𑀢𑁆𑀢𑀸 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀗𑁆𑀔𑁄 𑀲𑀺𑀮𑀸 𑀧𑀯𑀸𑀴𑀁 𑀭𑀚𑀢𑀁 𑀚𑀸𑀢𑀭𑀽𑀧𑀁 𑀮𑁄𑀳𑀺𑀢𑀗𑁆𑀓𑁄 𑀫𑀲𑀸𑀭𑀕𑀮𑁆𑀮’’𑀦𑁆𑀢𑀺 (𑀧𑀸𑀘𑀺. 𑁫𑁦𑁬) 𑀏𑀯𑀁 𑀯𑀼𑀢𑁆𑀢𑀁 𑀤𑀲𑀪𑁂𑀤𑀫𑁆𑀧𑀺 𑀭𑀢𑀦𑀁. 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀸𑀢𑀺 𑀕𑀡𑁆𑀳𑀦𑁆𑀢𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀲𑁆𑀲.

𑁨𑁮𑁨-𑁩. 𑀢𑁂𑀲𑀼 𑀅𑀢𑁆𑀢𑀢𑁆𑀣𑀁 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀤𑁆𑀯𑀻𑀲𑀼 𑀦𑀺𑀲𑁆𑀲𑀕𑁆𑀕𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀽𑀢𑀺 𑀢𑁂𑀲𑀼 𑀤𑀲𑀲𑀼 𑀫𑀚𑁆𑀛𑁂. 𑀤𑁆𑀯𑀻𑀲𑀽𑀢𑀺 𑀭𑀚𑀢𑀚𑀸𑀢𑀭𑀽𑀧𑀲𑀗𑁆𑀔𑀸𑀢𑁂𑀲𑀼 𑀤𑁆𑀯𑀻𑀲𑀼 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀽𑀲𑀼. 𑀅𑀢𑁆𑀢𑀢𑁆𑀣𑀦𑁆𑀢𑀺 𑀇𑀫𑀺𑀦𑀸 𑀦𑀯𑀓𑀫𑁆𑀫𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀅𑀢𑁆𑀣𑀸𑀬 𑀤𑀼𑀓𑁆𑀓𑀝𑀦𑁆𑀢𑀺 𑀤𑀻𑀧𑁂𑀢𑀺. 𑀲𑁂𑀲𑁂𑀲𑀼 𑀤𑀼𑀓𑁆𑀓𑀝𑀦𑁆𑀢𑀺 𑀅𑀯𑀲𑁂𑀲𑁂𑀲𑀼 𑀅𑀝𑁆𑀞𑀲𑀼 𑀲𑀩𑁆𑀩𑁂𑀲𑀫𑁆𑀧𑀺 𑀅𑀢𑁆𑀣𑀸𑀬 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄. 𑀕𑀡𑀜𑁆𑀘 𑀲𑀗𑁆𑀖𑀜𑁆𑀘 𑀧𑀼𑀕𑁆𑀕𑀮𑀜𑁆𑀘 𑀅𑀦𑀸𑀫𑀲𑀺𑀢𑁆𑀯𑀸 ‘‘𑀘𑁂𑀢𑁆𑀬𑀲𑁆𑀲 𑀦𑀯𑀓𑀫𑁆𑀫𑀲𑁆𑀲 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀘 𑀦 𑀧𑀝𑀺𑀓𑁆𑀔𑀺𑀧𑁂𑀢𑀺 𑀲𑀫𑁆𑀩𑀦𑁆𑀥𑀦𑀻𑀬𑀁. 𑀦 𑀧𑀝𑀺𑀓𑁆𑀔𑀺𑀧𑁂𑀢𑀺 𑀇𑀫𑀺𑀦𑀸 𑀲𑀗𑁆𑀖𑀸𑀤𑀺𑀁 𑀆𑀫𑀲𑀺𑀢𑁆𑀯𑀸 𑀯𑀼𑀢𑁆𑀢𑁂 𑀧𑀝𑀺𑀓𑁆𑀔𑀺𑀧𑀦𑀁 𑀤𑀻𑀧𑁂𑀢𑀺. 𑀧𑀝𑀺𑀓𑁆𑀔𑀺𑀢𑁆𑀢𑁂 ‘‘𑀓𑀧𑁆𑀧𑀺𑀬𑀓𑀸𑀭𑀓𑀸𑀦𑀁 𑀯𑀸 𑀳𑀢𑁆𑀣𑁂 𑀪𑀯𑀺𑀲𑁆𑀲𑀢𑀺, 𑀫𑀫 𑀧𑀼𑀭𑀺𑀲𑀸𑀦𑀁 𑀫𑀬𑁆𑀳𑀫𑁂𑀯 𑀯𑀸 𑀳𑀢𑁆𑀣𑁂 𑀪𑀯𑀺𑀲𑁆𑀲𑀢𑀺, 𑀓𑁂𑀯𑀮𑀁 𑀢𑀼𑀫𑁆𑀳𑁂 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀯𑀤𑀢𑀺, 𑀯𑀝𑁆𑀝𑀢𑀺. 𑀘𑀢𑀼𑀧𑀘𑁆𑀘𑀬𑀢𑁆𑀣𑀸𑀬 𑀘 𑀤𑀺𑀦𑁆𑀦𑀁 𑀬𑁂𑀦 𑀬𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀢𑀤𑀢𑁆𑀣𑀁 𑀉𑀧𑀦𑁂𑀢𑀩𑁆𑀩𑀁. 𑀢𑁂𑀲𑀁 𑀘𑀻𑀯𑀭𑀢𑁆𑀣𑀸𑀬 𑀤𑀺𑀦𑁆𑀦𑀁 𑀘𑀻𑀯𑀭𑁂𑀬𑁂𑀯 𑀉𑀧𑀦𑁂𑀢𑀩𑁆𑀩𑀁. 𑀲𑀘𑁂 𑀘𑀻𑀯𑀭𑁂𑀦 𑀢𑀸𑀤𑀺𑀲𑁄 𑀅𑀢𑁆𑀣𑁄 𑀦𑀢𑁆𑀣𑀺, 𑀧𑀺𑀡𑁆𑀟𑀧𑀸𑀢𑀸𑀤𑀻𑀳𑀺 𑀲𑀗𑁆𑀖𑁄 𑀓𑀺𑀮𑀫𑀢𑀺, 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬 𑀅𑀧𑀮𑁄𑀓𑁂𑀢𑁆𑀯𑀸 𑀢𑀤𑀢𑁆𑀣𑀸𑀬𑀧𑀺 𑀉𑀧𑀦𑁂𑀢𑀩𑁆𑀩𑀁. 𑀏𑀲 𑀦𑀬𑁄 𑀧𑀺𑀡𑁆𑀟𑀧𑀸𑀢𑀕𑀺𑀮𑀸𑀦𑀧𑀘𑁆𑀘𑀬𑀢𑁆𑀣𑀸𑀬 𑀤𑀺𑀦𑁆𑀦𑁂𑀧𑀺. 𑀲𑁂𑀦𑀸𑀲𑀦𑀢𑁆𑀣𑀸𑀬 𑀤𑀺𑀦𑁆𑀦𑀁 𑀧𑀦 𑀕𑀭𑀼𑀪𑀡𑁆𑀟𑀢𑁆𑀢𑀸 𑀢𑀢𑁆𑀣𑁂𑀯 𑀉𑀧𑀦𑁂𑀢𑀩𑁆𑀩𑀁, 𑀲𑁂𑀦𑀸𑀲𑀦𑁂𑀲𑀼 𑀦𑀲𑁆𑀲𑀦𑁆𑀢𑁂𑀲𑀼 𑀚𑀕𑁆𑀕𑀦𑀢𑁆𑀣𑀁 𑀫𑀽𑀮𑀘𑁆𑀙𑁂𑀚𑁆𑀚𑀁 𑀅𑀓𑀢𑁆𑀯𑀸 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀬𑀸𑀧𑀦𑀫𑀢𑁆𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁.

𑁨𑁮𑁪. 𑀔𑁂𑀢𑁆𑀢𑀸𑀤𑀻𑀦𑀁 𑀓𑁂𑀲𑀜𑁆𑀘𑀺 𑀤𑀼𑀓𑁆𑀓𑀝𑀯𑀢𑁆𑀣𑀽𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑀽𑀧𑀸𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀔𑁂𑀢𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀔𑁂𑀢𑁆𑀢𑀦𑁆𑀢𑀺 𑀧𑀼𑀩𑁆𑀩𑀡𑁆𑀡𑀯𑀺𑀭𑀼𑀳𑀦𑀝𑁆𑀞𑀸𑀦𑀁. 𑀯𑀢𑁆𑀣𑀼𑀦𑁆𑀢𑀺 𑀅𑀧𑀭𑀡𑁆𑀡𑀉𑀘𑁆𑀙𑀼𑀨𑀮𑀸𑀤𑀻𑀦𑀁 𑀯𑀺𑀭𑀼𑀳𑀦𑀝𑁆𑀞𑀸𑀦𑀁. 𑀤𑀸𑀲𑀧𑀲𑁆𑀯𑀸𑀤𑀺𑀓𑀦𑁆𑀢𑀺 𑀤𑀸𑀲𑀧𑀲𑀼𑀧𑀼𑀧𑁆𑀨𑀸𑀭𑀸𑀫𑀨𑀮𑀸𑀭𑀸𑀫𑀸𑀤𑀺𑀓𑀁. 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀓𑀧𑁆𑀧𑀺𑀬𑁂𑀦 𑀓𑀫𑁂𑀦 𑀘 𑀕𑀡𑁆𑀳𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀧𑁆𑀧𑀺𑀬𑁂𑀦 𑀓𑀫𑁂𑀦 𑀘𑀸𑀢𑀺 𑀏𑀢𑁆𑀣 𑀓𑀫-𑀲𑀤𑁆𑀤𑁄 𑀯𑁄𑀳𑀸𑀭𑀧𑁆𑀧𑀝𑀺𑀧𑀸𑀝𑀺𑀯𑀘𑀦𑁄, 𑀢𑀲𑁆𑀫𑀸 𑀧𑀭𑁂𑀲𑀁 𑀅𑀢𑁆𑀢𑀦𑁄 𑀘 𑀓𑀧𑁆𑀧𑀺𑀬𑀯𑁄𑀳𑀸𑀭𑀓𑁆𑀓𑀫𑁂𑀦𑁂𑀯𑀸𑀢𑀺 𑀅𑀢𑁆𑀣𑁄.

𑀲𑁄 𑀘 𑀔𑁂𑀢𑁆𑀢𑀯𑀢𑁆𑀣𑀽𑀲𑀼 𑀢𑀸𑀯 ‘‘𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀯𑀸 ‘‘𑀓𑀧𑁆𑀧𑀺𑀬𑀓𑀸𑀭𑀓𑀸𑀦𑀁 𑀳𑀢𑁆𑀣𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀸 ‘‘𑀲𑀗𑁆𑀖𑁄 𑀓𑀧𑁆𑀧𑀺𑀬𑀪𑀡𑁆𑀟𑀁 𑀪𑀼𑀜𑁆𑀚𑀢𑀽’’𑀢𑀺 𑀯𑀸 ‘‘𑀲𑀻𑀫𑀁 𑀤𑁂𑀫𑀸’’𑀢𑀺 𑀯𑀸 𑀧𑀭𑁂𑀳𑀺 𑀯𑀼𑀢𑁆𑀢𑁄, ‘‘𑀲𑀸𑀥𑀼, 𑀉𑀧𑀸𑀲𑀓 𑀫𑀺𑀕𑀧𑀓𑁆𑀔𑀺𑀦𑁄 𑀏𑀢𑁆𑀣 𑀦𑀺𑀩𑁆𑀪𑀬𑀸 𑀲𑀼𑀔𑁂𑀦 𑀚𑀻𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀢𑁆𑀢𑀦𑀸 𑀯𑀸 𑀢𑀴𑀸𑀓𑁂 𑀬𑀣𑀸𑀯𑀼𑀢𑁆𑀢𑁂𑀦𑁂𑀯 ‘‘𑀉𑀤𑀓𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺, 𑀪𑀡𑁆𑀟𑀓𑀁 𑀥𑁄𑀯𑀺𑀲𑁆𑀲𑀦𑁆𑀢𑀺, 𑀫𑀺𑀕𑀧𑀓𑁆𑀔𑀺𑀦𑁄 𑀧𑀺𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀧𑀭𑁂𑀳𑀺 𑀯𑀸 ‘‘𑀲𑀸𑀥𑀼, 𑀉𑀧𑀸𑀲𑀓, 𑀲𑀗𑁆𑀖𑁄 𑀧𑀸𑀦𑀻𑀬𑀁 𑀧𑀺𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑀸 𑀯𑀸 𑀤𑀸𑀲𑁂 ‘‘𑀆𑀭𑀸𑀫𑀺𑀓𑀁 𑀤𑀫𑁆𑀫𑀺, 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀁 𑀤𑀫𑁆𑀫𑀺, 𑀓𑀧𑁆𑀧𑀺𑀬𑀓𑀸𑀭𑀓𑀁 𑀤𑀫𑁆𑀫𑀻’’𑀢𑀺 𑀯𑀸 𑀧𑀲𑀽𑀲𑀼 ‘‘𑀧𑀜𑁆𑀘𑀕𑁄𑀭𑀲𑀧𑀭𑀺𑀪𑁄𑀕𑀢𑁆𑀣𑀸𑀬 𑀤𑀫𑁆𑀫𑀻’’𑀢𑀺 𑀆𑀭𑀸𑀫𑁂 ‘‘𑀯𑀦𑀁 𑀤𑀫𑁆𑀫𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀯𑀼𑀢𑁆𑀢𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀘𑁂 𑀧𑀦 𑀓𑁄𑀘𑀺 𑀅𑀩𑁆𑀬𑀢𑁆𑀢𑁄 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀔𑁂𑀢𑁆𑀢𑀸𑀤𑀺𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀸 𑀓𑀸𑀭𑁂𑀢𑀺 𑀯𑀸, 𑀢𑀁 𑀪𑀺𑀓𑁆𑀔𑀽𑀳𑀺 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁, 𑀢𑀁 𑀦𑀺𑀲𑁆𑀲𑀸𑀬 𑀮𑀤𑁆𑀥𑀁 𑀓𑀧𑁆𑀧𑀺𑀬𑀪𑀡𑁆𑀟𑀫𑁆𑀧𑀺 𑀅𑀓𑀧𑁆𑀧𑀺𑀬𑀫𑁂𑀯. 𑀅𑀩𑁆𑀬𑀢𑁆𑀢𑁂𑀦 𑀧𑀦 𑀮𑀚𑁆𑀚𑀻𑀪𑀺𑀓𑁆𑀔𑀼𑀦𑀸 𑀓𑀸𑀭𑀸𑀧𑀺𑀢𑁂𑀲𑀼 𑀓𑀺𑀜𑁆𑀘𑀸𑀧𑀺 𑀧𑀝𑀺𑀕𑁆𑀕𑀳𑀡𑀁 𑀓𑀧𑁆𑀧𑀺𑀬𑀁, 𑀪𑀺𑀓𑁆𑀔𑀼𑀲𑁆𑀲 𑀧𑀬𑁄𑀕𑀧𑀘𑁆𑀘𑀬𑀸 𑀉𑀧𑁆𑀧𑀦𑁆𑀦𑁂𑀦 𑀫𑀺𑀲𑁆𑀲𑀢𑁆𑀢𑀸 𑀯𑀺𑀲𑀕𑀢𑀧𑀺𑀡𑁆𑀟𑀧𑀸𑀢𑁄 𑀯𑀺𑀬, 𑀅𑀓𑀧𑁆𑀧𑀺𑀬𑀫𑀁𑀲𑀪𑁄𑀚𑀦𑀁 𑀯𑀺𑀬 𑀘 𑀤𑀼𑀩𑁆𑀩𑀺𑀦𑀺𑀩𑁆𑀪𑁄𑀕𑀁 𑀳𑁄𑀢𑀺, 𑀲𑀩𑁆𑀩𑁂𑀲𑀁 𑀅𑀓𑀧𑁆𑀧𑀺𑀬𑀫𑁂𑀯.

𑁨𑁮𑁫-𑁬. 𑀦𑀯…𑀧𑁂… 𑀓𑀺𑀭𑀺𑀬𑀸 𑀘 𑀅𑀦𑀯𑁂 𑀫𑀢𑁆𑀢𑀺𑀓𑀼𑀤𑁆𑀥𑀸𑀭𑀡𑀜𑁆𑀘 𑀩𑀦𑁆𑀥𑁄 𑀘 𑀆𑀴𑀺𑀬𑀸 𑀣𑀺𑀭𑀓𑀸𑀭𑁄 𑀘 𑀅𑀦𑀯𑁂 𑀓𑁂𑀤𑀸𑀭𑁂 𑀅𑀢𑀺𑀭𑁂𑀓𑀪𑀸𑀕𑀕𑁆𑀕𑀳𑀡𑀜𑁆𑀘 𑀦𑀯𑁂 𑀘 𑀅𑀧𑀭𑀺𑀘𑁆𑀙𑀺𑀦𑁆𑀦𑀪𑀸𑀕𑁂 𑀲𑀲𑁆𑀲𑁂 ‘‘𑀏𑀢𑁆𑀢𑀓𑁂 𑀤𑁂𑀣𑀸’’𑀢𑀺 𑀓𑀳𑀸𑀧𑀡𑀼𑀝𑁆𑀞𑀸𑀧𑀦𑀜𑁆𑀘𑀸𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀅𑀓𑀧𑁆𑀧𑀺𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀸𑀢𑀺𑀓𑀸 𑀘 𑀓𑁂𑀤𑀸𑀭𑁄 𑀘 𑀢𑀴𑀸𑀓𑁄 𑀘𑀸𑀢𑀺 𑀤𑁆𑀯𑀦𑁆𑀤𑁄 𑀫𑀸𑀢𑀺𑀓…𑀧𑁂… 𑀢𑀴𑀸𑀓𑀸. 𑀢𑁂𑀲𑀁 𑀓𑀺𑀭𑀺𑀬𑀸𑀢𑀺 𑀲𑀫𑀸𑀲𑁄. 𑀅𑀦𑀯𑁂𑀢𑀺 𑀘𑀢𑀼𑀧𑀘𑁆𑀘𑀬𑀯𑀲𑁂𑀦 𑀧𑀝𑀺𑀕𑁆𑀕𑀳𑀺𑀢𑁂 𑀧𑀼𑀭𑀸𑀡𑀢𑀴𑀸𑀓𑁂. 𑀉𑀤𑀓𑀯𑀲𑁂𑀦 𑀧𑀝𑀺𑀕𑁆𑀕𑀳𑀺𑀢𑁂 𑀧𑀦 𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀁 𑀯𑀝𑁆𑀝𑀢𑀺. 𑀩𑀦𑁆𑀥𑁄𑀢𑀺 𑀧𑀸𑀴𑀺𑀬𑀸 𑀩𑀦𑁆𑀥𑁄. 𑀧𑁄𑀭𑀸𑀡𑀓𑁂𑀤𑀸𑀭𑁂 𑀦𑀺𑀬𑀫𑀺𑀢𑀧𑀓𑀢𑀺𑀪𑀸𑀕𑀢𑁆𑀢𑀸 𑀆𑀳 ‘‘𑀅𑀦𑀯𑁂’’𑀢𑀺. 𑀅𑀧𑀭𑀺𑀘𑁆𑀙𑀺𑀦𑁆𑀦𑀪𑀸𑀕𑁂𑀢𑀺 ‘‘𑀏𑀢𑁆𑀢𑀓𑁂 𑀪𑀽𑀫𑀺𑀪𑀸𑀕𑁂 𑀏𑀢𑁆𑀢𑀓𑁄 𑀪𑀸𑀕𑁄 𑀤𑀸𑀢𑀩𑁆𑀩𑁄’’𑀢𑀺 𑀏𑀯𑀁 𑀅𑀧𑀭𑀺𑀘𑁆𑀙𑀺𑀦𑁆𑀦𑀪𑀸𑀕𑁂.

𑁨𑁮𑁭-𑁯. ‘‘𑀓𑀲 𑀯𑀧𑁆𑀧’’ 𑀇𑀘𑁆𑀘𑀸𑀤𑀺𑀁 𑀅𑀯𑀢𑁆𑀯𑀸 𑀘 ‘‘𑀏𑀢𑁆𑀢𑀓𑀸𑀬 𑀪𑀽𑀫𑀺𑀬𑀸 𑀏𑀢𑁆𑀢𑀓𑁄 𑀪𑀸𑀕𑁄 𑀤𑁂𑀬𑁆𑀬𑁄’’𑀢𑀺 𑀪𑀽𑀫𑀺𑀁 𑀯𑀸 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀢𑀲𑁆𑀲𑁂𑀯𑁂𑀢𑀫𑀓𑀧𑁆𑀧𑀺𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀘-𑀲𑀤𑁆𑀤𑁄 𑀅𑀯𑀥𑀸𑀭𑀡𑁂. 𑀧𑀢𑀺𑀝𑁆𑀞𑀸𑀧𑁂𑀢𑀻𑀢𑀺 𑀬𑁄 𑀪𑀺𑀓𑁆𑀔𑀼 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀢𑀲𑁆𑀲𑁂𑀯𑀸𑀢𑀺 𑀢𑀲𑁆𑀲 𑀧𑀢𑀺𑀝𑁆𑀞𑀸𑀧𑀓𑀪𑀺𑀓𑁆𑀔𑀼𑀲𑁆𑀲𑁂𑀯. 𑀏𑀢𑀦𑁆𑀢𑀺 𑀧𑀢𑀺𑀝𑁆𑀞𑀸𑀧𑀺𑀢𑀪𑀽𑀫𑀺𑀢𑁄 𑀮𑀤𑁆𑀥𑀥𑀜𑁆𑀜𑀁 ‘‘𑀏𑀢𑁆𑀢𑀓𑁂 𑀪𑀽𑀫𑀺𑀪𑀸𑀕𑁂 𑀲𑀲𑁆𑀲𑀁 𑀓𑀢𑀁, 𑀏𑀢𑁆𑀢𑀓𑀁 𑀕𑀡𑁆𑀳𑀣𑀸’’𑀢𑀺 𑀏𑀯𑀁 𑀯𑀤𑀦𑁆𑀢𑁂 𑀧𑀫𑀸𑀡𑀕𑀡𑁆𑀳𑀦𑀢𑁆𑀣𑀁 𑀤𑀡𑁆𑀟𑀭𑀚𑁆𑀚𑀼𑀪𑀺 𑀫𑀺𑀦𑀦𑁂 𑀯𑀸 𑀔𑀮𑁂 𑀞𑀢𑁆𑀯𑀸 𑀭𑀓𑁆𑀔𑀡𑁂 𑀯𑀸 𑀢𑀁 𑀦𑀻𑀳𑀭𑀸𑀧𑀦𑁂 𑀯𑀸 𑀓𑁄𑀝𑁆𑀞𑀸𑀕𑀸𑀭𑀸𑀤𑀺𑀧𑀝𑀺𑀲𑀸𑀫𑀦𑁂 𑀯𑀸 𑀏𑀢𑀁 𑀢𑀲𑁆𑀲𑁂𑀯 𑀅𑀓𑀧𑁆𑀧𑀺𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑀦𑀻𑀬𑀁. 𑀧𑀢𑀺𑀝𑁆𑀞𑀸𑀧𑁂𑀢𑀺 𑀘𑀸𑀢𑀺 𑀲𑁄 𑀪𑀺𑀓𑁆𑀔𑀼 𑀧𑀢𑀺𑀝𑁆𑀞𑀸𑀧𑁂𑀢𑀺 𑀘. 𑀓𑀢𑀦𑁆𑀢𑀺 𑀅𑀫𑁆𑀳𑁂𑀳𑀺 𑀓𑀢𑀁. 𑀯𑀤𑀦𑁆𑀢𑁂𑀯𑀦𑁆𑀢𑀺 𑀏𑀯𑀁 𑀓𑀲𑁆𑀲𑀓𑁂 𑀯𑀤𑀦𑁆𑀢𑁂. 𑀧𑀫𑀸𑀡𑀦𑁆𑀢𑀺 𑀪𑀽𑀫𑀺𑀧𑁆𑀧𑀫𑀸𑀡𑀁. 𑀦𑀻𑀳𑀭𑀸𑀧𑀦𑁂𑀢𑀺 𑀔𑀮𑀢𑁄 𑀕𑁂𑀳𑀲𑁆𑀲 𑀦𑀻𑀳𑀭𑀸𑀧𑀦𑁂. 𑀏𑀢𑀦𑁆𑀢𑀺 𑀫𑀺𑀢𑀮𑀤𑁆𑀥𑀭𑀓𑁆𑀔𑀺𑀢𑀸𑀤𑀺𑀓𑀁. 𑀢𑀲𑁆𑀲𑁂𑀯𑀸𑀢𑀺 𑀫𑀸𑀦𑀓𑀭𑀓𑁆𑀔𑀓𑀸𑀤𑀺𑀦𑁄 𑀏𑀯. 𑀅𑀧𑀼𑀩𑁆𑀩𑀲𑁆𑀲 𑀅𑀦𑀼𑀧𑁆𑀧𑀸𑀤𑀺𑀢𑀢𑁆𑀢𑀸 𑀅𑀜𑁆𑀜𑁂𑀲𑀁 𑀓𑀧𑁆𑀧𑀢𑀻𑀢𑀺 𑀆𑀳 ‘‘𑀢𑀲𑁆𑀲𑁂𑀯𑁂𑀢𑀫𑀓𑀧𑁆𑀧𑀺𑀬’’𑀦𑁆𑀢𑀺.

𑁨𑁯𑁦. 𑀧𑀝𑀺𑀲𑀸𑀫𑀦𑀧𑁆𑀧𑀲𑀗𑁆𑀕𑁂𑀦𑀸𑀳 ‘‘𑀧𑀝𑀺𑀲𑀸𑀫𑁂𑀬𑁆𑀬𑀸’’𑀢𑀺𑀆𑀤𑀺. 𑀧𑀺𑀢𑀼𑀲𑀦𑁆𑀢𑀓𑀫𑁆𑀧𑀺 𑀕𑀺𑀳𑀺𑀲𑀦𑁆𑀢𑀓𑀁 𑀬𑀁 𑀓𑀺𑀜𑁆𑀘𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀺𑀢𑀼𑀲𑀦𑁆𑀢𑀓𑀦𑁆𑀢𑀺 𑀧𑀺𑀢𑀸 𑀘 𑀫𑀸𑀢𑀸 𑀘 𑀧𑀺𑀢𑀭𑁄, 𑀢𑁂𑀲𑀁 𑀲𑀦𑁆𑀢𑀓𑀁. 𑀕𑀺𑀳𑀺𑀲𑀦𑁆𑀢𑀓𑀦𑁆𑀢𑀺 𑀇𑀫𑀺𑀦𑀸 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀁 𑀲𑀦𑁆𑀢𑀓𑀁 𑀬𑀁 𑀓𑀺𑀜𑁆𑀘𑀺 𑀧𑀭𑀺𑀓𑁆𑀔𑀸𑀭𑀁 𑀧𑀝𑀺𑀲𑀸𑀫𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀬𑀁 𑀓𑀺𑀜𑁆𑀘𑀻𑀢𑀺 𑀓𑀧𑁆𑀧𑀺𑀬𑀁 𑀅𑀓𑀧𑁆𑀧𑀺𑀬𑀁 𑀯𑀸 𑀅𑀦𑁆𑀢𑀫𑀲𑁄 𑀫𑀸𑀢𑀼𑀓𑀡𑁆𑀡𑀧𑀺𑀴𑀦𑁆𑀥𑀦𑀢𑀸𑀮𑀧𑀡𑁆𑀡𑀫𑁆𑀧𑀺. 𑀪𑀡𑁆𑀟𑀸𑀕𑀸𑀭𑀺𑀓𑀲𑀻𑀲𑁂𑀦𑀸𑀢𑀺 𑀲𑀻𑀲𑀗𑁆𑀕𑀫𑀺𑀯 𑀧𑀥𑀸𑀦𑀁 𑀬𑀁 𑀓𑀺𑀜𑁆𑀘𑀺 ‘‘𑀲𑀻𑀲’’𑀦𑁆𑀢𑀺 𑀇𑀥 𑀉𑀧𑀘𑀸𑀭𑀯𑀲𑁂𑀦 𑀯𑀼𑀘𑁆𑀘𑀢𑀺, 𑀢𑀣𑀸 𑀪𑀡𑁆𑀟𑀸𑀕𑀸𑀭𑀺𑀓𑀲𑀤𑁆𑀤𑁄𑀧𑀺 𑀪𑀸𑀯𑀧𑁆𑀧𑀥𑀸𑀦𑁄, 𑀪𑀡𑁆𑀟𑀸𑀕𑀸𑀭𑀺𑀓𑁄 𑀪𑀡𑁆𑀟𑀸𑀕𑀸𑀭𑀺𑀓𑀢𑁆𑀢𑀁 𑀲𑀻𑀲𑀁 𑀧𑀥𑀸𑀦𑀦𑁆𑀢𑀺 𑀯𑀺𑀲𑁂𑀲𑀦𑀧𑀭𑀧𑀤𑁂 𑀓𑀫𑁆𑀫𑀥𑀸𑀭𑀬𑁄, 𑀢𑁂𑀦, 𑀪𑀡𑁆𑀟𑀸𑀕𑀸𑀭𑀺𑀓𑀢𑁆𑀢𑀲𑁆𑀲 𑀧𑀥𑀸𑀦𑀓𑀭𑀡𑁂𑀦𑀸𑀢𑀺 𑀅𑀢𑁆𑀣𑁄.

𑁨𑁯𑁧-𑁨. 𑀅𑀯𑀲𑁆𑀲𑀁 𑀧𑀝𑀺𑀲𑀸𑀫𑀺𑀬𑀦𑁆𑀢𑀺 𑀅𑀯𑀲𑁆𑀲𑀁 𑀲𑀗𑁆𑀕𑁄𑀧𑁂𑀢𑀩𑁆𑀩𑀁. 𑀯𑀼𑀢𑁆𑀢𑁂𑀧𑀻𑀢𑀺 𑀫𑀸𑀢𑀸𑀧𑀺𑀢𑀽𑀳𑀺 𑀯𑀼𑀢𑁆𑀢𑁂𑀧𑀺.

𑁨𑁯𑁩-𑁪. 𑀯𑀟𑁆𑀠𑀓𑀺𑀆𑀤𑀬𑁄 𑀯𑀸 𑀭𑀸𑀚𑀯𑀮𑁆𑀮𑀪𑀸 𑀯𑀸 ‘‘𑀲𑀓𑀁 𑀧𑀭𑀺𑀓𑁆𑀔𑀸𑀭𑀁 𑀯𑀸 𑀲𑀬𑀦𑀪𑀡𑁆𑀟𑀁 𑀯𑀸 𑀧𑀝𑀺𑀲𑀸𑀫𑁂𑀢𑁆𑀯𑀸 𑀤𑁂𑀳𑀻’’𑀢𑀺 𑀬𑀤𑀺 𑀯𑀤𑀦𑁆𑀢𑀺, 𑀙𑀦𑁆𑀤𑀢𑁄𑀧𑀺 𑀪𑀬𑀸𑀧𑀺 𑀦 𑀓𑀭𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀯𑀸𑀲𑀺𑀨𑀭𑀲𑀼𑀆𑀤𑀺𑀉𑀧𑀓𑀭𑀡𑀪𑀡𑁆𑀟𑀁. 𑀙𑀦𑁆𑀤𑀢𑁄𑀧𑀺 𑀪𑀬𑀸𑀧𑀻𑀢𑀺 𑀯𑀟𑁆𑀠𑀓𑀺𑀆𑀤𑀻𑀲𑀼 𑀙𑀦𑁆𑀤𑁂𑀦, 𑀭𑀸𑀚𑀯𑀮𑁆𑀮𑀪𑁂𑀲𑀼 𑀪𑀬𑁂𑀦.

𑁨𑁯𑁫-𑁬. 𑀧𑀝𑀺𑀲𑀸𑀫𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀗𑁆𑀓𑀦𑁆𑀢𑀻𑀢𑀺 𑀬𑀸𑀤𑀺𑀲𑁂 𑀧𑀤𑁂𑀲𑁂 ‘‘𑀪𑀺𑀓𑁆𑀔𑀽𑀳𑀺 𑀯𑀸 𑀲𑀸𑀫𑀡𑁂𑀭𑁂𑀳𑀺 𑀯𑀸 𑀕𑀳𑀺𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀗𑁆𑀓𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀢𑀸𑀤𑀺𑀲𑁂 𑀯𑀺𑀳𑀸𑀭𑀸𑀯𑀲𑀣𑀲𑁆𑀲𑀦𑁆𑀢𑁄𑀢𑀺 𑀬𑁄𑀚𑀦𑀻𑀬𑀁. 𑀯𑀺𑀳𑀸𑀭𑀸𑀯𑀲𑀣𑀲𑁆𑀲𑀸𑀢𑀺 𑀯𑀺𑀳𑀸𑀭𑀲𑁆𑀲 𑀘 𑀆𑀯𑀲𑀣𑀲𑁆𑀲 𑀘. 𑀭𑀢𑀦𑀦𑁆𑀢𑀺 𑀤𑀲𑀯𑀺𑀥𑀁 𑀭𑀢𑀦𑀁. 𑀭𑀢𑁆𑀦𑀲𑀫𑁆𑀫𑀢𑀦𑁆𑀢𑀺 𑀯𑀢𑁆𑀣𑀸𑀤𑀺𑀓𑀁. 𑀦𑀺𑀓𑁆𑀔𑀺𑀧𑁂𑀬𑁆𑀬𑀸𑀢𑀺 𑀲𑀸𑀫𑀺𑀓𑁂 𑀤𑀺𑀝𑁆𑀞𑁂 𑀦𑀺𑀬𑀫𑁂𑀢𑁆𑀯𑀸 𑀤𑀸𑀢𑀼𑀁 ‘‘𑀏𑀢𑁆𑀢𑀓𑀸 𑀓𑀳𑀸𑀧𑀡𑀸’’𑀢𑀺𑀆𑀤𑀺𑀦𑀸𑀦𑀼𑀭𑀽𑀧𑁂𑀦 𑀫𑀢𑁆𑀢𑀺𑀓𑀮𑀜𑁆𑀙𑀦𑀸𑀤𑀺𑀦𑀺𑀫𑀺𑀢𑁆𑀢𑁂𑀦 𑀯𑀸 𑀲𑀜𑁆𑀜𑀸𑀡𑀁 𑀓𑀢𑁆𑀯𑀸 𑀦𑀺𑀓𑁆𑀔𑀺𑀧𑁂𑀬𑁆𑀬. 𑀕𑀳𑁂𑀢𑁆𑀯𑀸𑀦𑀸𑀢𑀺 𑀢𑀸𑀤𑀺𑀲𑁂 𑀅𑀲𑀢𑀺 𑀅𑀢𑁆𑀢𑀦𑀸𑀯 𑀕𑀳𑁂𑀢𑁆𑀯𑀸. 𑀢𑀸𑀤𑀺𑀲𑁂𑀢𑀺 𑀭𑀢𑀦𑁂 𑀯𑀸 𑀭𑀢𑀦𑀲𑀫𑁆𑀫𑀢𑁂 𑀯𑀸 𑀲𑀢𑀺. 𑀲𑀸𑀫𑀺𑀓𑀸𑀦𑀸𑀕𑀫𑀁 𑀜𑀢𑁆𑀯𑀸𑀢𑀺 𑀬𑀤𑀺 𑀅𑀢𑁆𑀢𑀦𑀺 𑀆𑀲𑀗𑁆𑀓𑀦𑁆𑀢𑀺, 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀦𑀺𑀲𑀻𑀤𑀺𑀬 𑀧𑀘𑁆𑀙𑀸 𑀲𑀸𑀫𑀺𑀓𑀸𑀦𑀁 𑀅𑀦𑀸𑀕𑀫𑀦𑀁 𑀯𑀺𑀜𑁆𑀜𑀸𑀬. 𑀧𑀢𑀺𑀭𑀽𑀧𑀦𑁆𑀢𑀺 𑀭𑀢𑀦𑀲𑀫𑁆𑀫𑀢𑁂 𑀧𑀁𑀲𑀼𑀓𑀽𑀮𑀕𑁆𑀕𑀳𑀡𑀁 𑀭𑀢𑀦𑁂 𑀦𑀺𑀭𑀼𑀲𑁆𑀲𑀼𑀓𑁆𑀓𑀕𑀫𑀦𑀦𑁆𑀢𑀺 𑀏𑀯𑀭𑀽𑀧𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀭𑀽𑀧𑀦𑁆𑀢𑀺.

𑀉𑀕𑁆𑀕𑀳𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.