𑁩𑁬. 𑀪𑁂𑀲𑀚𑁆𑀚𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁭𑁪-𑁫. 𑀚𑀦𑀲𑁆𑀲 𑀪𑁂𑀲𑀚𑁆𑀚𑀁 𑀓𑀸𑀢𑀼𑀁 𑀤𑀸𑀢𑀼𑀁 𑀯𑀢𑁆𑀢𑀼𑀜𑁆𑀘 𑀦 𑀮𑀩𑁆𑀪𑀢𑀻𑀢𑀺 𑀲𑀫𑁆𑀩𑀦𑁆𑀥𑀺𑀬𑀁. 𑀮𑀩𑁆𑀪𑀢𑀻𑀢𑀺 𑀏𑀢𑁆𑀣 ‘‘𑀪𑀺𑀓𑁆𑀔𑀼𑀦𑀸’’𑀢𑀺 𑀓𑀢𑁆𑀢𑀸 ‘‘𑀪𑁂𑀲𑀚𑁆𑀚’’𑀦𑁆𑀢𑀺 𑀯𑀼𑀢𑁆𑀢𑀓𑀫𑁆𑀫𑀁. 𑀦𑀦𑀼 𑀘 𑀓𑀸𑀢𑀼𑀦𑁆𑀢𑀺 𑀪𑀸𑀯𑀲𑀸𑀥𑀦𑀢𑁆𑀢𑀸 𑀢𑀲𑁆𑀲 𑀅𑀯𑀼𑀢𑁆𑀢𑀓𑀫𑁆𑀫𑁂𑀦𑀸𑀧𑀺 𑀪𑀯𑀺𑀢𑀩𑁆𑀩𑀁 𑀪𑀸𑀯𑁂 𑀯𑀺𑀳𑀺𑀢𑀓𑀺𑀢𑀓𑀧𑁆𑀧𑀘𑁆𑀘𑀬𑀸𑀦𑀁 𑀧𑀬𑁄𑀕𑁂 𑀓𑀫𑁆𑀫𑀓𑀸𑀭𑀓𑀲𑁆𑀲𑀸𑀧𑀺 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸𑀢𑀺? 𑀲𑀘𑁆𑀘𑀁, 𑀢𑀣𑀸𑀧𑀺 𑀧𑀥𑀸𑀦𑀪𑀽𑀢𑀓𑀫𑁆𑀫𑀲𑀢𑁆𑀢𑀺𑀬𑀸 𑀅𑀪𑀺𑀥𑀸𑀦𑁂 𑀲𑀢𑀺 𑀅𑀧𑁆𑀧𑀥𑀸𑀦𑀓𑀺𑀢𑀓𑀓𑀺𑀭𑀺𑀬𑀸𑀪𑀺𑀲𑀫𑁆𑀩𑀦𑁆𑀥𑁂𑀦 𑀕𑀼𑀡𑀻𑀪𑀽𑀢𑀸 𑀓𑀫𑁆𑀫𑀲𑀢𑁆𑀢𑀺 𑀅𑀪𑀺𑀳𑀺𑀢𑀸 𑀯𑀺𑀬 𑀯𑀺𑀜𑁆𑀜𑀸𑀬𑀢𑀺. 𑀢𑀣𑀸 𑀘 𑀯𑀼𑀢𑁆𑀢𑀁 𑀅𑀫𑁆𑀳𑁂𑀳𑀺 𑀬𑁄𑀕𑀯𑀺𑀦𑀺𑀘𑁆𑀙𑀬𑁂 ‘‘𑀧𑀥𑀸𑀦𑀸𑀦𑀼𑀬𑀸𑀬𑀺𑀢𑀸𑀬 𑀚𑀦𑀯𑁄𑀳𑀸𑀭𑀸𑀬 𑀧𑀥𑀸𑀦𑀲𑀢𑁆𑀬𑀸𑀪𑀺𑀥𑀸𑀦𑁂 𑀕𑀼𑀡𑀲𑀢𑁆𑀢𑀺 𑀅𑀪𑀺𑀳𑀺𑀢𑀸 𑀯𑀺𑀬 𑀧𑀓𑀸𑀲𑀢𑀻’’𑀢𑀺. 𑀚𑀦𑀲𑁆𑀲𑀸𑀢𑀺 𑀆𑀕𑀢𑀸𑀕𑀢𑀚𑀦𑀲𑁆𑀲. 𑀲𑀳𑀥𑀫𑁆𑀫𑀻𑀦𑀜𑁆𑀘 𑀧𑀺𑀢𑀽𑀦𑀜𑁆𑀘 𑀢𑀤𑀼𑀧𑀝𑁆𑀞𑀸𑀓𑀪𑀺𑀓𑁆𑀔𑀼𑀦𑀺𑀲𑁆𑀲𑀺𑀢𑀪𑀡𑁆𑀟𑀽𑀦𑀜𑁆𑀘 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀲𑁆𑀲 𑀘 𑀪𑀺𑀓𑁆𑀔𑀸𑀘𑀭𑀺𑀬𑀯𑀺𑀜𑁆𑀜𑀢𑁆𑀢𑀺𑀲𑀓𑁂𑀳𑀺 𑀪𑁂𑀲𑀚𑁆𑀚𑀓𑀭𑀡𑀁 𑀮𑀩𑁆𑀪𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀲𑀳𑀥𑀫𑁆𑀫𑀺𑀦𑀦𑁆𑀢𑀺 𑀲𑀳 𑀘𑀭𑀺𑀢𑀩𑁆𑀩𑁄 𑀥𑀫𑁆𑀫𑁄 𑀲𑀻𑀮𑀲𑀤𑁆𑀥𑀸𑀧𑀜𑁆𑀜𑀸𑀲𑀗𑁆𑀔𑀸𑀢𑁄 𑀲𑀳𑀥𑀫𑁆𑀫𑁄, 𑀲𑁄 𑀏𑀢𑁂𑀲𑀫𑀢𑁆𑀣𑀻𑀢𑀺 𑀲𑀳𑀥𑀫𑁆𑀫𑀺𑀦𑁄, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑀻 𑀲𑀺𑀓𑁆𑀔𑀫𑀸𑀦𑀸 𑀲𑀸𑀫𑀡𑁂𑀭𑁄 𑀲𑀸𑀫𑀡𑁂𑀭𑀻𑀢𑀺 𑀧𑀜𑁆𑀘, 𑀢𑁂𑀲𑀁. 𑀧𑀺𑀢𑀸 𑀘 𑀫𑀸𑀢𑀸 𑀘 𑀧𑀺𑀢𑀭𑁄 𑀏𑀓𑀲𑁂𑀲𑀦𑀬𑁂𑀦, 𑀉𑀪𑀺𑀦𑁆𑀦𑀁 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁄 𑀯𑀸, 𑀢𑁂𑀲𑀁. 𑀪𑀺𑀓𑁆𑀔𑀼𑀦𑀺𑀲𑁆𑀲𑀺𑀢𑁄 𑀦𑀸𑀫 𑀬𑁄 𑀯𑀺𑀳𑀸𑀭𑁂 𑀲𑀩𑁆𑀩𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑁄 𑀪𑀺𑀓𑁆𑀔𑀼𑀁 𑀦𑀺𑀲𑁆𑀲𑀸𑀬 𑀯𑀲𑀢𑀺. 𑀪𑀡𑁆𑀟𑀼 𑀦𑀸𑀫 𑀬𑁄 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑁄 𑀬𑀸𑀯 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀬𑀸𑀤𑀺𑀬𑀢𑀺, 𑀢𑀸𑀯 𑀯𑀺𑀳𑀸𑀭𑁂 𑀯𑀲𑀢𑀺, 𑀲𑁄 𑀧𑀡𑁆𑀟𑀼𑀧𑀮𑀸𑀲𑁄. 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀲𑁆𑀲𑀸𑀢𑀺 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑀲𑁆𑀲. 𑀏𑀢𑁂𑀲𑀼 𑀧𑀦 𑀫𑀸𑀢𑀸𑀧𑀺𑀢𑀭𑁄 𑀲𑀘𑁂 𑀭𑀚𑁆𑀚𑁂𑀧𑀺 𑀞𑀺𑀢𑀸 𑀧𑀘𑁆𑀘𑀸𑀲𑀻𑀲𑀦𑁆𑀢𑀺, 𑀅𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀫𑀸𑀢𑀭𑀁 𑀅𑀦𑀸𑀫𑀲𑀦𑁆𑀢𑁂𑀦 𑀲𑀩𑁆𑀩𑀁 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀧𑀺𑀢𑀸 𑀧𑀦 𑀲𑀳𑀢𑁆𑀣𑁂𑀦 𑀦𑀳𑀸𑀧𑀦𑀲𑀫𑁆𑀩𑀸𑀳𑀦𑀸𑀤𑀻𑀦𑀺 𑀓𑀢𑁆𑀯𑀸 𑀉𑀧𑀝𑁆𑀞𑀸𑀢𑀩𑁆𑀩𑁄.

𑁨𑁭𑁬. 𑀧𑀺𑀢𑀸 𑀘 𑀫𑀸𑀢𑀸 𑀘 𑀪𑀸𑀢𑀸 𑀘 𑀪𑀕𑀺𑀦𑀻 𑀘𑀸𑀢𑀺 𑀤𑁆𑀯𑀦𑁆𑀤𑁄 𑀧𑀺𑀢𑀸…𑀧𑁂… 𑀪𑀕𑀺𑀦𑀺𑀬𑁄. 𑀫𑀳𑀦𑁆𑀢𑁄 𑀘 𑀘𑀽𑀴𑁄 𑀘, 𑀫𑀳𑀸𑀘𑀽𑀴𑀸 𑀘 𑀢𑁂 𑀧𑀺𑀢𑀸…𑀧𑁂… 𑀪𑀕𑀺𑀦𑀺𑀬𑁄 𑀘𑀸𑀢𑀺 𑀓𑀫𑁆𑀫𑀥𑀸𑀭𑀬𑁄. 𑀢𑀸 𑀆𑀤𑀺 𑀬𑁂𑀲𑀦𑁆𑀢𑁂𑀢𑀺 𑀅𑀜𑁆𑀜𑀧𑀤𑀢𑁆𑀣𑁄. 𑀫𑀳𑀸𑀘𑀽𑀴-𑀲𑀤𑁆𑀤𑀸 𑀧𑀺𑀢𑀸𑀤𑀺-𑀲𑀤𑁆𑀤𑁂𑀳𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀸 ‘‘𑀫𑀳𑀸𑀧𑀺𑀢𑀼𑀦𑁄 𑀘𑀽𑀴𑀧𑀺𑀢𑀼𑀦𑁄’’𑀢𑀺𑀆𑀤𑀺𑀦𑀸. 𑀆𑀤𑀺-𑀲𑀤𑁆𑀤𑁂𑀦 𑀧𑀦𑁂𑀢𑁆𑀣 𑀧𑀺𑀢𑀼𑀘𑁆𑀙𑀸 𑀫𑀸𑀢𑀼𑀮𑁄, 𑀢𑁂𑀲𑀁 𑀤𑀲𑀦𑁆𑀦𑀫𑁆𑀧𑀺 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀧𑀼𑀢𑁆𑀢𑀧𑀭𑀫𑁆𑀧𑀭𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀲𑀁 𑀲𑀓𑁂 𑀪𑁂𑀲𑀚𑁆𑀚𑀓𑀭𑀡𑀁 𑀮𑀩𑁆𑀪𑀦𑁆𑀢𑀺 𑀬𑁄𑀚𑀦𑀸. 𑀢𑁂𑀲𑀁 𑀫𑀳𑀸𑀧𑀺𑀢𑀸𑀤𑀻𑀦𑀁 𑀲𑀦𑁆𑀢𑀓𑁂 𑀲𑀢𑀺 𑀢𑁂𑀦 𑀪𑁂𑀲𑀚𑁆𑀚𑀓𑀭𑀡𑀁 𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. 𑀦𑀸𑀢𑀺 𑀦𑀢𑁆𑀣𑀺 𑀘𑁂. 𑀅𑀢𑁆𑀢𑀦𑀺𑀬𑁂𑀢𑀺 𑀪𑀺𑀓𑁆𑀔𑀼𑀦𑁄 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀤𑀸𑀢𑀩𑁆𑀩𑀁 𑀢𑀸𑀯𑀓𑀸𑀮𑀺𑀓𑀦𑁆𑀢𑀺 𑀢𑀸𑀯𑀓𑀸𑀮𑀺𑀓𑀁 𑀓𑀢𑁆𑀯𑀸 𑀤𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑁂 𑀧𑀦 𑀲𑀘𑁂 𑀧𑀝𑀺𑀤𑁂𑀦𑁆𑀢𑀺, 𑀕𑀳𑁂𑀢𑀩𑁆𑀩𑀁, 𑀦𑁄 𑀘𑁂 𑀤𑁂𑀦𑁆𑀢𑀺, 𑀦 𑀘𑁄𑀤𑁂𑀢𑀩𑁆𑀩𑀸. 𑀬𑀸𑀯 𑀢𑀲𑁆𑀲 𑀤𑀸𑀦𑀁, 𑀢𑀸𑀯 𑀓𑀸𑀮𑁄 𑀅𑀲𑁆𑀲𑀸𑀢𑀺 𑀢𑀸𑀯𑀓𑀸𑀮𑀺𑀓𑀁. 𑀡𑀺𑀓𑁄 𑀲𑀫𑀸𑀲𑀦𑁆𑀢𑁂.

𑁨𑁭𑁭. 𑀪𑁂𑀲𑀚𑁆𑀚𑀓𑀭𑀡𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀦𑀸𑀫𑀝𑁆𑀞𑀧𑀺𑀡𑁆𑀟𑀤𑀸𑀦𑀸𑀤𑀻𑀦𑀁 𑀕𑀳𑀡𑀁, 𑀳𑀺-𑀲𑀤𑁆𑀤𑁄 𑀳𑁂𑀢𑀼𑀫𑁆𑀳𑀺, 𑀳𑀺 𑀬𑀲𑁆𑀫𑀸 𑀏𑀢𑁂𑀲𑀼 𑀓𑀼𑀮𑀤𑀽𑀲𑀦𑀸𑀤𑀬𑁄 𑀦 𑀭𑀼𑀳𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀪𑁂𑀲𑀚𑁆𑀚𑀓𑀭𑀡𑀁 𑀮𑀩𑁆𑀪𑀁, 𑀅𑀢𑁆𑀢𑀦𑀺𑀬𑁂 𑀘 𑀲𑀢𑀺 𑀤𑀸𑀢𑀩𑁆𑀩𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀦 𑀭𑀽𑀳𑀢𑀻𑀢𑀺 𑀦 𑀭𑁄𑀳𑀢𑀺 𑀦𑀧𑁆𑀧𑀯𑀢𑁆𑀢𑀢𑀺 𑀦 𑀳𑁄𑀢𑀺, 𑀆𑀧𑀢𑁆𑀢𑀺𑀁 𑀦 𑀚𑀦𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀲𑀁 𑀅𑀢𑁆𑀣𑀸𑀬 𑀜𑀸𑀢𑀺𑀲𑀸𑀫𑀡𑁂𑀭𑁂𑀳𑀺 𑀯𑀸 𑀪𑁂𑀲𑀚𑁆𑀚𑀁 𑀆𑀳𑀭𑀸𑀧𑁂𑀢𑀩𑁆𑀩𑀁, 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀸 𑀆𑀳𑀭𑀸𑀧𑁂𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀢𑁂𑀳𑀺𑀧𑀺 ‘‘𑀉𑀧𑀚𑁆𑀛𑀸𑀬𑀸𑀤𑀻𑀦𑀁 𑀆𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀢𑀲𑀻𑀲𑁂𑀦 𑀆𑀳𑀭𑀺𑀢𑀩𑁆𑀩𑀁. 𑀲𑀘𑁂 𑀅𑀜𑁆𑀜𑁂𑀧𑀺 𑀬𑁂 𑀕𑀺𑀮𑀸𑀦𑀸 𑀳𑀼𑀢𑁆𑀯𑀸 𑀯𑀺𑀳𑀸𑀭𑀁 𑀧𑀯𑀺𑀲𑀦𑁆𑀢𑀺, 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦 𑀪𑁂𑀲𑀚𑁆𑀚𑀁 𑀓𑀸𑀢𑀩𑁆𑀩𑀁. 𑀲𑀤𑁆𑀥𑀁 𑀓𑀼𑀮𑀁 𑀳𑁄𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀸𑀢𑀸𑀧𑀺𑀢𑀼𑀝𑁆𑀞𑀸𑀦𑀻𑀬𑀁, 𑀢𑀢𑁆𑀭 𑀘𑁂 𑀓𑁄𑀘𑀺 𑀕𑀺𑀮𑀸𑀦𑁄 𑀳𑁄𑀢𑀺, 𑀢𑀲𑁆𑀲𑀢𑁆𑀣𑀸𑀬 ‘‘𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀭𑁄𑀕𑀲𑁆𑀲 𑀓𑀺𑀁 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑀻’’𑀢𑀺 𑀓𑀧𑁆𑀧𑀺𑀬𑀁 𑀓𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀺, 𑀇𑀤𑀜𑁆𑀘𑀺𑀤𑀜𑁆𑀘 𑀕𑀳𑁂𑀢𑁆𑀯𑀸 𑀓𑀭𑁄𑀦𑁆𑀢𑀻𑀢𑀺 𑀯𑀝𑁆𑀝𑀢𑀺, 𑀪𑀺𑀓𑁆𑀔𑀽𑀳𑀺 𑀅𑀜𑁆𑀜𑀫𑀜𑁆𑀜𑀁 𑀯𑀸 𑀓𑀣𑀸 𑀓𑀸𑀢𑀩𑁆𑀩𑀸.

𑁨𑁭𑁮. 𑀙𑀦𑁆𑀦𑀁 𑀫𑀸𑀢𑀸𑀤𑀻𑀦𑀜𑁆𑀘 𑀤𑀸𑀫𑀭𑀺𑀓𑀘𑁄𑀭𑀲𑁆𑀲 𑀇𑀲𑁆𑀲𑀭𑀺𑀬𑀲𑁆𑀲 𑀅𑀦𑀸𑀫𑀝𑁆𑀞𑁄 𑀧𑀺𑀡𑁆𑀟𑀧𑀸𑀢𑁄 𑀤𑀸𑀢𑀼𑀁 𑀅𑀯𑀸𑀭𑀺𑀢𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀙𑀦𑁆𑀦𑀦𑁆𑀢𑀺 𑀫𑀸𑀢𑀸𑀤𑀻𑀦𑀁 𑀙𑀦𑁆𑀦𑀁 𑀫𑀚𑁆𑀛𑁂. 𑀫𑀸𑀢𑀸𑀤𑀻𑀦𑀦𑁆𑀢𑀺 𑀪𑀺𑀓𑁆𑀔𑀼𑀦𑀺𑀲𑁆𑀲𑀺𑀢𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀁 𑀧𑀜𑁆𑀘𑀦𑁆𑀦𑀁 𑀫𑀸𑀢𑀸𑀤𑀻𑀦𑀁. ‘‘𑀙𑀦𑁆𑀦’’𑀦𑁆𑀢𑀺 𑀧𑀦 𑀬𑁄𑀚𑀦𑀸𑀬 𑀅𑀝𑁆𑀞𑀓𑀣𑀸𑀬 𑀯𑀺𑀭𑀼𑀚𑁆𑀛𑀢𑀺. 𑀢𑀢𑁆𑀣 𑀳𑀺 ‘‘𑀫𑀸𑀢𑀸𑀧𑀺𑀢𑀽𑀦’’𑀦𑁆𑀢𑀺𑀆𑀤𑀺𑀦𑀸 𑀪𑀺𑀓𑁆𑀔𑀼𑀦𑀺𑀲𑁆𑀲𑀺𑀢𑀁 𑀑𑀳𑀸𑀬 𑀲𑀢𑁆𑀢𑁂𑀯 𑀯𑀼𑀢𑁆𑀢𑀸. 𑀆𑀘𑀭𑀺𑀬𑀩𑀼𑀤𑁆𑀥𑀤𑀢𑁆𑀢𑀢𑁆𑀣𑁂𑀭𑁂𑀦 𑀘 𑀢𑀣𑁂𑀯 𑀯𑀼𑀢𑁆𑀢𑀁 𑁋

‘‘𑀅𑀦𑀸𑀫𑀝𑁆𑀞𑁄𑀧𑀺 𑀤𑀸𑀢𑀩𑁆𑀩𑁄, 𑀧𑀺𑀡𑁆𑀟𑀧𑀸𑀢𑁄 𑀯𑀺𑀚𑀸𑀦𑀢𑀸;

𑀤𑁆𑀯𑀺𑀦𑁆𑀦𑀁 𑀫𑀸𑀢𑀸𑀧𑀺𑀢𑀽𑀦𑀫𑁆𑀧𑀺, 𑀢𑀤𑀼𑀧𑀝𑁆𑀞𑀸𑀬𑀓𑀲𑁆𑀲 𑀘.

‘‘𑀇𑀲𑁆𑀲𑀭𑀲𑁆𑀲𑀸𑀧𑀺 𑀤𑀸𑀢𑀩𑁆𑀩𑁄, 𑀘𑁄𑀭𑀤𑀸𑀫𑀭𑀺𑀓𑀲𑁆𑀲 𑀘;

𑀪𑀡𑁆𑀟𑀼𑀓𑀲𑁆𑀲𑀢𑁆𑀢𑀦𑁄 𑀘𑁂𑀯, 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀲𑁆𑀲𑀧𑀻’’𑀢𑀺. (𑀯𑀺𑀦𑀬 𑀯𑀺. 𑁪𑁯𑁩-𑁪𑁯𑁫);

𑀤𑀸𑀫𑀭𑀺𑀓𑀘𑁄𑀭𑀲𑁆𑀲𑀸𑀢𑀺 𑀭𑀚𑁆𑀚𑀁 𑀧𑀢𑁆𑀣𑀬𑀫𑀸𑀦𑀲𑁆𑀲 𑀧𑀸𑀓𑀝𑀘𑁄𑀭𑀲𑁆𑀲. 𑀅𑀦𑀸𑀫𑀝𑁆𑀞𑁄𑀢𑀺 𑀅𑀧𑀩𑁆𑀩𑀚𑀺𑀢𑀲𑁆𑀲 𑀳𑀢𑁆𑀣𑀢𑁄 𑀮𑀤𑁆𑀥𑀸 𑀅𑀢𑁆𑀢𑀦𑀸 𑀅𑀜𑁆𑀜𑁂𑀦 𑀯𑀸 𑀧𑀩𑁆𑀩𑀚𑀺𑀢𑁂𑀦 𑀅𑀕𑁆𑀕𑀳𑀺𑀢𑀅𑀕𑁆𑀕𑁄, 𑀅𑀬𑀁 𑀅𑀦𑀸𑀫𑀝𑁆𑀞𑀧𑀺𑀡𑁆𑀟𑀧𑀸𑀢𑁄. 𑀧𑀝𑀺𑀲𑀦𑁆𑀣𑀸𑀭𑁄 ‘‘𑀯𑀺𑀳𑀸𑀭𑀧𑁆𑀧𑀢𑁆𑀢𑀁 𑀆𑀕𑀦𑁆𑀢𑀼𑀓𑀁 𑀯𑀸 𑀤𑀮𑀺𑀤𑁆𑀤𑀸𑀤𑀺𑀁 𑀯𑀸 𑀤𑀺𑀲𑁆𑀯𑀸 ‘𑀧𑀸𑀦𑀻𑀬𑀁 𑀧𑀺𑀯𑀸’𑀢𑀺 𑀤𑀸𑀢𑀩𑁆𑀩𑀁, 𑀧𑀸𑀤𑀫𑀓𑁆𑀔𑀦𑀢𑁂𑀮𑀁 𑀤𑀸𑀢𑀩𑁆𑀩𑀁, 𑀓𑀸𑀮𑁂 𑀆𑀕𑀢𑀲𑁆𑀲 𑀬𑀸𑀕𑀼𑀪𑀢𑁆𑀢𑀁, 𑀯𑀺𑀓𑀸𑀮𑁂 𑀆𑀕𑀢𑀲𑁆𑀲 𑀲𑀘𑁂 𑀢𑀡𑁆𑀟𑀼𑀮𑀸 𑀅𑀢𑁆𑀣𑀺, 𑀢𑀡𑁆𑀟𑀼𑀮𑀸 𑀤𑀸𑀢𑀩𑁆𑀩𑀸, 𑀲𑀬𑀦𑀝𑁆𑀞𑀸𑀦𑀁 𑀤𑀸𑀢𑀩𑁆𑀩𑀁, 𑀘𑁄𑀭𑀸𑀦𑀁 𑀧𑀦 𑀲𑀗𑁆𑀖𑀺𑀓𑀫𑁆𑀧𑀺𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑁄. 𑀅𑀯𑀲𑁂𑀲𑀧𑀝𑀺𑀲𑀦𑁆𑀣𑀸𑀭𑁄 𑀧𑀦 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦 𑀓𑀸𑀢𑀩𑁆𑀩𑁄. 𑀢𑀣𑀸 𑀥𑀫𑁆𑀫𑀧𑀝𑀺𑀲𑀦𑁆𑀣𑀸𑀭𑁄𑀧𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀤𑀸𑀢𑀩𑁆𑀩𑁄𑀯.

𑁨𑁭𑁯. 𑀢𑁂𑀲𑀦𑁆𑀢𑀺 𑀅𑀜𑁆𑀜𑀸𑀢𑀓𑀸𑀤𑀻𑀦𑀁 𑀕𑀺𑀳𑀻𑀦𑀁. 𑀓𑀬𑀺𑀭𑀸𑀢𑀺 ‘‘𑀪𑀡𑀣𑀸’’𑀢𑀺 𑀯𑀼𑀢𑁆𑀢𑁂 𑀓𑀭𑁂𑀬𑁆𑀬. ‘‘𑀦 𑀓𑀭𑁄𑀫𑀸’’𑀢𑀺 𑀯𑀼𑀢𑁆𑀢𑁂 𑀲𑀘𑁂 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀺, 𑀓𑀸𑀢𑀩𑁆𑀩𑀁. 𑀦𑀢𑁆𑀢𑀦𑁄𑀢𑀺 𑀅𑀢𑁆𑀢𑀦𑁄 𑀲𑀼𑀢𑁆𑀢𑁄𑀤𑀓𑁂𑀳𑀺 𑀦 𑀓𑀬𑀺𑀭𑀸𑀢𑀺 𑀬𑁄𑀚𑀦𑀻𑀬𑀁. 𑀏𑀯𑀁 𑀲𑀸𑀫𑀜𑁆𑀜𑁂𑀦 𑀧𑀭𑀺𑀢𑁆𑀢𑁂 𑀧𑀝𑀺𑀧𑀚𑁆𑀚𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀆𑀝𑀸𑀦𑀸𑀝𑀺𑀬𑀧𑀭𑀺𑀢𑁆𑀢𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀡𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀫𑀸𑀳. 𑀪𑀡𑀸𑀧𑁂𑀦𑁆𑀢𑁂𑀢𑀺 ‘‘𑀪𑀡𑀣𑀸’’𑀢𑀺 𑀅𑀚𑁆𑀛𑁂𑀲𑀦𑀧𑀼𑀩𑁆𑀩𑀓𑀁 𑀧𑀬𑁄𑀚𑁂𑀦𑁆𑀢𑁂. 𑀧𑀭𑀺𑀢𑁆𑀢𑀁 𑀲𑀸𑀲𑀦𑁄𑀕𑀥𑀦𑁆𑀢𑀺 𑀧𑀞𑀫𑀫𑁂𑀯 𑀆𑀝𑀸𑀦𑀸𑀝𑀺𑀬𑀲𑀼𑀢𑁆𑀢𑀁 𑀅𑀪𑀡𑀺𑀢𑁆𑀯𑀸 𑀲𑀸𑀲𑀦𑀧𑀭𑀺𑀬𑀸𑀧𑀦𑁆𑀦𑀁 𑀫𑁂𑀢𑁆𑀢𑀲𑀼𑀢𑁆𑀢𑀁 𑀥𑀚𑀕𑁆𑀕𑀲𑀼𑀢𑁆𑀢𑀁 𑀭𑀢𑀦𑀲𑀼𑀢𑁆𑀢𑀦𑁆𑀢𑀺 𑀇𑀫𑀸𑀦𑀺 𑀲𑀼𑀢𑁆𑀢𑀸𑀦𑀺 𑀲𑀢𑁆𑀢𑀸𑀳𑀁 𑀪𑀡𑀺𑀢𑁆𑀯𑀸 𑀬𑀣𑀸𑀧𑀭𑀺𑀓𑀫𑁆𑀫𑀁 𑀧𑀭𑀺𑀢𑁆𑀢𑀁 𑀆𑀝𑀸𑀦𑀸𑀝𑀺𑀬𑀧𑀭𑀺𑀢𑁆𑀢𑀁 𑀪𑀡𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑁨𑁮𑁦. ‘‘𑀆𑀕𑀦𑁆𑀢𑁆𑀯𑀸 𑀲𑀻𑀮𑀁 𑀤𑁂𑀢𑀼, 𑀥𑀫𑁆𑀫𑀁 𑀧𑀭𑀺𑀢𑁆𑀢𑀜𑁆𑀘 𑀪𑀸𑀲𑀢𑀽’’𑀢𑀺 𑀓𑁂𑀦𑀘𑀺 𑀧𑁂𑀲𑀺𑀢𑁄 𑀕𑀦𑁆𑀢𑁆𑀯𑀸 𑀲𑀻𑀮𑀁 𑀯𑀸 𑀤𑀸𑀢𑀼𑀁 𑀥𑀫𑁆𑀫𑀁 𑀧𑀭𑀺𑀢𑁆𑀢𑀁 𑀯𑀸 𑀯𑀢𑁆𑀢𑀼𑀁 𑀮𑀩𑁆𑀪𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀪𑁂𑀲𑀚𑁆𑀚𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.