𑁩𑁫. 𑀧𑀭𑀺𑀓𑁆𑀔𑀸𑀭𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁫𑁯-𑁬𑁦. 𑀙𑀢𑁆𑀢𑁂 𑀅𑀦𑁆𑀢𑁄 𑀩𑀳𑀺 𑀘 𑀧𑀜𑁆𑀘𑀯𑀡𑁆𑀡𑁂𑀳𑀺 𑀲𑀼𑀢𑁆𑀢𑁂𑀳𑀺 𑀲𑀺𑀩𑁆𑀩𑀺𑀢𑀼𑀜𑁆𑀘 𑀧𑀡𑁆𑀡𑁂 𑀕𑀺𑀭𑀺𑀓𑀽𑀝𑀅𑀟𑁆𑀠𑀘𑀦𑁆𑀤𑀸𑀤𑀺𑀁 𑀙𑀺𑀦𑁆𑀤𑀺𑀢𑀼𑀜𑁆𑀘 𑀦 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀙𑀢𑁆𑀢𑁂𑀢𑀺 𑀢𑀸𑀮𑀧𑀡𑁆𑀡𑁂 𑀙𑀢𑁆𑀢𑁂. 𑀕𑀺𑀭𑀺𑀓𑀽𑀝𑀁 𑀦𑀸𑀫 𑀫𑀓𑀭𑀤𑀦𑁆𑀢𑀓𑀁, 𑀆𑀤𑀺-𑀲𑀤𑁆𑀤𑁂𑀦 𑀢𑀸𑀤𑀺𑀲𑀁 𑀅𑀜𑁆𑀜𑀁 𑀯𑀺𑀓𑀸𑀭𑀭𑀽𑀧𑀁 𑀲𑀗𑁆𑀕𑀳𑀺𑀢𑀁. 𑀖𑀝𑀓𑀦𑁆𑀢𑀺 𑀕𑁂𑀳𑀢𑁆𑀣𑀫𑁆𑀪𑁂𑀲𑀼 𑀯𑀺𑀬 𑀓𑀬𑀺𑀭𑀫𑀸𑀦𑀁 𑀖𑀝𑀓𑀁. 𑀤𑀡𑁆𑀟𑁂𑀢𑀺 𑀙𑀢𑁆𑀢𑀤𑀡𑁆𑀟𑁂. 𑀮𑁂𑀔𑀸𑀢𑀺 𑀢𑀳𑀺𑀁 𑀢𑀳𑀺𑀁 𑀤𑀺𑀦𑁆𑀦𑀸 𑀮𑁂𑀔𑀸. 𑀲𑀸𑀤𑀺𑀲𑀦𑁆𑀢𑀺 𑀤𑀻𑀖𑁂𑀦 𑀦𑀺𑀤𑁆𑀤𑀺𑀝𑁆𑀞𑀁. 𑀩𑀼𑀦𑁆𑀤𑀫𑁆𑀳𑀺 𑀫𑀽𑀮𑁂.

𑁨𑁬𑁧. 𑀣𑀺𑀭𑀢𑁆𑀣𑀁 𑀙𑀢𑁆𑀢𑁂 𑀏𑀓𑀯𑀡𑁆𑀡𑁂𑀦 𑀲𑀺𑀩𑁆𑀩𑀺𑀢𑀼𑀁 𑀯𑀸 𑀧𑀜𑁆𑀚𑀭𑀁 𑀯𑀺𑀦𑀦𑁆𑀥𑀺𑀢𑀼𑀁 𑀯𑀸 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀺𑀩𑁆𑀩𑀺𑀢𑀼𑀦𑁆𑀢𑀺 𑀅𑀦𑁆𑀢𑁄 𑀩𑀳𑀺 𑀘 𑀲𑀺𑀩𑁆𑀩𑀺𑀢𑀼𑀁. 𑀏𑀓𑀯𑀡𑁆𑀡𑁂𑀦𑀸𑀢𑀺 𑀦𑀻𑀮𑀸𑀤𑀺𑀦𑀸 𑀏𑀓𑀯𑀡𑁆𑀡𑁂𑀦. 𑀧𑀜𑁆𑀚𑀭𑀦𑁆𑀢𑀺 𑀙𑀢𑁆𑀢𑀤𑀡𑁆𑀟𑀕𑀸𑀳𑀓𑀲𑀮𑀸𑀓𑀧𑀜𑁆𑀚𑀭𑀁. 𑀣𑀺𑀭𑀢𑁆𑀣𑀦𑁆𑀢𑀺 𑀇𑀫𑀺𑀦𑀸 𑀦 𑀯𑀡𑁆𑀡𑀫𑀝𑁆𑀞𑀢𑁆𑀣𑀸𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀩𑀦𑁆𑀥𑀺𑀢𑀼𑀁 𑀤𑀡𑁆𑀟𑁂 𑀮𑁂𑀔𑀸 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀩𑀦𑁆𑀥𑀺𑀢𑀼𑀦𑁆𑀢𑀺 𑀯𑀸𑀢𑀧𑁆𑀧𑀳𑀸𑀭𑁂𑀦 𑀅𑀘𑀮𑀦𑀢𑁆𑀣𑀁 𑀙𑀢𑁆𑀢𑀫𑀡𑁆𑀟𑀮𑀺𑀓𑀁 𑀭𑀚𑁆𑀚𑀼𑀓𑁂𑀳𑀺 𑀕𑀳𑁂𑀢𑁆𑀯𑀸 𑀩𑀦𑁆𑀥𑀦𑀢𑁆𑀣𑀸𑀬. 𑀮𑁂𑀔𑀸𑀯𑀸𑀢𑀺 𑀯𑀮𑀬𑀫𑀺𑀯 𑀉𑀓𑁆𑀓𑀺𑀭𑀺𑀢𑁆𑀯𑀸 𑀓𑀢𑀸 𑀮𑁂𑀔𑀸 𑀏𑀯. 𑀯𑀝𑁆𑀝𑀢𑀻𑀢𑀺 𑀬𑀤𑀺𑀧𑀺 𑀦 𑀩𑀦𑁆𑀥𑀢𑀺, 𑀭𑀚𑁆𑀚𑀼𑀓𑁂𑀳𑀺 𑀩𑀦𑁆𑀥𑀺𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑀢𑁆𑀢𑀸 𑀯𑀝𑁆𑀝𑀢𑀺.

𑁨𑁬𑁨. 𑀘𑀻𑀯𑀭𑁂 𑀅𑀦𑁆𑀢𑁂 𑀯𑀸𑀧𑀺 𑀧𑀝𑁆𑀝𑀫𑀼𑀔𑁂 𑀯𑀸𑀧𑀺 𑀯𑁂𑀡𑀺𑀧𑀺 𑀯𑀸 𑀲𑀗𑁆𑀔𑀮𑀺𑀓𑀸𑀧𑀺 𑀯𑀸 𑀅𑀜𑁆𑀜𑀁 𑀲𑀽𑀘𑀺𑀯𑀺𑀓𑀸𑀭𑀁 𑀯𑀸 𑀧𑀸𑀴𑀺𑀓𑀡𑁆𑀡𑀺𑀓𑀆𑀤𑀺𑀓𑀁 𑀓𑀧𑁆𑀧𑀩𑀺𑀦𑁆𑀤𑀼𑀯𑀺𑀓𑀸𑀭𑀫𑁆𑀧𑀺 𑀯𑀸 𑀦 𑀘 𑀓𑀧𑁆𑀧𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑁆𑀢𑁂𑀢𑀺 𑀘𑀻𑀯𑀭𑀧𑀭𑀺𑀬𑀦𑁆𑀢𑁂, 𑀅𑀦𑀼𑀯𑀸𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀝𑁆𑀝𑀫𑀼𑀔𑁂𑀢𑀺 𑀧𑀝𑁆𑀝𑀓𑁄𑀝𑀺𑀬𑀁, 𑀤𑁆𑀯𑀺𑀦𑁆𑀦𑀁 𑀧𑀝𑁆𑀝𑀸𑀦𑀁 𑀲𑀗𑁆𑀖𑀝𑀺𑀢𑀝𑁆𑀞𑀸𑀦𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀯𑁂𑀡𑀻𑀢𑀺 𑀯𑀭𑀓𑀲𑀻𑀲𑀸𑀓𑀸𑀭𑁂𑀦 𑀲𑀺𑀩𑁆𑀩𑀦𑀁. 𑀲𑀗𑁆𑀔𑀮𑀺𑀓𑀸𑀢𑀺 𑀩𑀺𑀴𑀸𑀮𑀩𑀦𑁆𑀥𑀦𑀸𑀓𑀸𑀭𑁂𑀦 𑀲𑀺𑀩𑁆𑀩𑀦𑀁. 𑀅𑀜𑁆𑀜𑀁 𑀲𑀽𑀘𑀺𑀯𑀺𑀓𑀸𑀭𑀁 𑀯𑀸𑀢𑀺 𑀘𑀻𑀯𑀭𑀫𑀡𑁆𑀟𑀦𑀢𑁆𑀣𑀸𑀬 𑀓𑀬𑀺𑀭𑀫𑀸𑀦𑀁 𑀅𑀜𑁆𑀜𑀁 𑀬𑀁 𑀓𑀺𑀜𑁆𑀘𑀺 𑀲𑀽𑀘𑀺𑀓𑀫𑁆𑀫𑀯𑀺𑀓𑀸𑀭𑀁 𑀯𑀸. 𑀝𑀻𑀓𑀸𑀬𑀁 𑀧𑀦 ‘‘𑀲𑀢𑀧𑀤𑀺𑀲𑀤𑀺𑀲𑀁 𑀅𑀜𑁆𑀜𑀁 𑀯𑀸 𑀲𑀽𑀘𑀺𑀯𑀺𑀓𑀸𑀭𑀁 𑀦 𑀓𑀧𑁆𑀧𑀢𑀻’’𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀁. ‘‘𑀘𑀻𑀯𑀭𑀫𑀡𑁆𑀟𑀦𑀢𑁆𑀣𑀸𑀬 𑀦𑀸𑀦𑀸𑀲𑀼𑀢𑁆𑀢𑀓𑁂𑀳𑀺 𑀲𑀢𑀧𑀤𑀺𑀲𑀤𑀺𑀲𑀁 𑀲𑀺𑀩𑁆𑀩𑀦𑁆𑀢𑀸 𑀆𑀕𑀦𑁆𑀢𑀼𑀓𑀧𑀝𑁆𑀝𑀁 𑀞𑀧𑁂𑀦𑁆𑀢𑀺, 𑀅𑀜𑁆𑀜𑀫𑁆𑀧𑀺 𑀬𑀁 𑀓𑀺𑀜𑁆𑀘𑀺 𑀲𑀽𑀘𑀺𑀓𑀫𑁆𑀫𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀲𑀩𑁆𑀩𑀁 𑀦 𑀯𑀝𑁆𑀝𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀧𑀦 𑀦𑀸𑀦𑀸𑀯𑀡𑁆𑀡𑁂𑀳𑀺 𑀯𑀸 𑀳𑁄𑀢𑀼, 𑀏𑀓𑀯𑀡𑁆𑀡𑁂𑀦 𑀯𑀸 𑀳𑁄𑀢𑀼, 𑀘𑀻𑀯𑀭𑀫𑀡𑁆𑀟𑀦𑀢𑁆𑀣𑀸𑀬 𑀲𑀁𑀲𑀺𑀩𑁆𑀩𑀦𑁆𑀢𑀸𑀦𑀁 𑀲𑀽𑀘𑀺𑀓𑀫𑁆𑀫𑀯𑀺𑀓𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀘𑀻𑀯𑀭𑁂𑀲𑀼 𑀨𑀸𑀮𑀺𑀢𑀝𑁆𑀞𑀸𑀦𑀲𑁆𑀲 𑀣𑀺𑀭𑀪𑀸𑀯𑀢𑁆𑀣𑀁 𑀲𑀢𑀧𑀤𑀺𑀲𑀤𑀺𑀲𑀫𑁆𑀧𑀺 𑀲𑀺𑀩𑁆𑀩𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀧𑀸𑀴𑀺-𑀲𑀤𑁆𑀤𑁂𑀦, 𑀓𑀡𑁆𑀡𑀺𑀓-𑀲𑀤𑁆𑀤𑁂𑀦 𑀘 𑀓𑀧𑁆𑀧-𑀲𑀤𑁆𑀤𑀮𑁄𑀧𑁂𑀦 𑀯𑀸 𑀉𑀧𑀘𑀸𑀭𑁂𑀦 𑀯𑀸 𑀧𑀸𑀴𑀺𑀓𑀧𑁆𑀧𑀸𑀤𑀬𑁄𑀯 𑀕𑀳𑀺𑀢𑀸. 𑀧𑀸𑀴𑀺 𑀘 𑀓𑀡𑁆𑀡𑀺𑀓𑀸 𑀘 𑀧𑀸𑀴𑀺𑀓𑀡𑁆𑀡𑀺𑀓𑀸𑀬𑁄, 𑀢𑀸 𑀆𑀤𑀺 𑀬𑀲𑁆𑀲 𑀅𑀜𑁆𑀜𑀲𑁆𑀲 𑀢𑀸𑀤𑀺𑀲𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀢𑀢𑁆𑀣 𑀦𑀻𑀮𑀸𑀯𑀴𑀺𑀆𑀤𑀺𑀲𑀡𑁆𑀞𑀸𑀦𑀸𑀬 𑀩𑀺𑀦𑁆𑀤𑀼𑀧𑀦𑁆𑀢𑀺𑀬𑀸 𑀬𑀣𑀸 𑀲𑁄𑀪𑀢𑀺, 𑀢𑀣𑀸 𑀓𑀬𑀺𑀭𑀫𑀸𑀦𑁄 𑀧𑀸𑀴𑀺𑀓𑀧𑁆𑀧𑁄. 𑀢𑀣𑁂𑀯 𑀩𑀺𑀦𑁆𑀤𑀼𑀲𑀫𑀽𑀳𑁂 𑀓𑀢𑁆𑀣𑀘𑀺 𑀤𑀲𑁆𑀲𑁂𑀢𑁆𑀯𑀸 𑀓𑀬𑀺𑀭𑀫𑀸𑀦𑁄 𑀓𑀡𑁆𑀡𑀺𑀓𑀓𑀧𑁆𑀧𑁄.

𑁨𑁬𑁩. 𑀕𑀡𑁆𑀞𑀺𑀧𑀸𑀲𑀓𑀧𑀝𑁆𑀝𑀸𑀢𑀺 𑀕𑀡𑁆𑀞𑀺𑀦𑁄 𑀘 𑀧𑀸𑀲𑀓𑀲𑁆𑀲 𑀘 𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑁂 𑀞𑀧𑁂𑀢𑀩𑁆𑀩𑀸 𑀧𑀝𑁆𑀝𑀸. 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 ‘‘𑀕𑀡𑁆𑀞𑀺𑀧𑀸𑀲𑀓𑀸’’𑀢𑀺 𑀓𑀢𑁆𑀯𑀸 ‘‘𑀘𑀢𑀼𑀓𑁄𑀡𑀸𑀯 𑀯𑀝𑁆𑀝𑀦𑁆𑀢𑀻’’𑀢𑀺 𑀅𑀢𑁆𑀣𑀢𑁄 𑀯𑀘𑀦𑀁 𑀯𑀺𑀧𑀮𑁆𑀮𑀸𑀲𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀅𑀕𑁆𑀖𑀺𑀬𑀦𑁆𑀢𑀺 𑀘𑁂𑀢𑀺𑀬𑀲𑀡𑁆𑀞𑀸𑀦𑁂𑀦 𑀲𑀺𑀩𑁆𑀩𑀦𑀁. 𑀫𑀽𑀮𑁂 𑀘 𑀅𑀕𑁆𑀕𑁂 𑀘 𑀏𑀓𑀲𑀤𑀺𑀲𑀁 𑀓𑀢𑁆𑀯𑀸 𑀫𑀼𑀕𑁆𑀕𑀭𑀸𑀓𑀸𑀭𑁂𑀦 𑀲𑀺𑀩𑁆𑀩𑀦𑀁 𑀫𑀼𑀕𑁆𑀕𑀭𑁄. 𑀯𑀺𑀓𑀸𑀭𑀦𑁆𑀢𑀺 𑀯𑀺𑀓𑀸𑀭𑁄, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁. 𑀏𑀢𑁆𑀣𑀸𑀢𑀺 𑀕𑀡𑁆𑀞𑀺𑀧𑀸𑀲𑀓𑀧𑀝𑁆𑀝𑁂𑀲𑀼.

𑁨𑁬𑁪. 𑀓𑁄𑀡𑀲𑀼𑀢𑁆𑀢𑀸𑀢𑀺 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀕𑀡𑁆𑀞𑀺𑀧𑀸𑀲𑀓𑀧𑀝𑁆𑀝𑀸𑀦𑀁 𑀓𑁄𑀡𑁂𑀳𑀺 𑀦𑀻𑀳𑀝𑀲𑀼𑀢𑁆𑀢𑀓𑁄𑀝𑀺𑀬𑁄. 𑀧𑀻𑀴𑀓𑀸𑀢𑀺 𑀢𑀸𑀦𑀺𑀬𑁂𑀯 𑀦𑀺𑀯𑀢𑁆𑀢𑁂𑀢𑁆𑀯𑀸 𑀧𑀻𑀴𑀓𑀸𑀓𑀸𑀭𑁂𑀦 𑀓𑀢𑀸𑀦𑀺. 𑀤𑀼𑀯𑀺𑀜𑁆𑀜𑁂𑀬𑁆𑀬𑀸𑀯𑀸𑀢𑀺 𑀢𑁂𑀲𑀁 𑀅𑀦𑁆𑀢𑁂𑀲𑀼 𑀏𑀓𑀯𑀸𑀭𑀁 𑀕𑀡𑁆𑀞𑀺𑀓𑀭𑀡𑁂𑀦 𑀯𑀸 𑀧𑀼𑀦 𑀦𑀺𑀯𑀢𑁆𑀢𑁂𑀢𑁆𑀯𑀸 𑀲𑀺𑀩𑁆𑀩𑀦𑁂𑀦 𑀯𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀸 𑀏𑀯. 𑀕𑀦𑁆𑀥𑀁 𑀢𑁂𑀮𑀁 𑀯𑀸𑀢𑀺 𑀕𑀦𑁆𑀥𑀁 𑀯𑀸 𑀢𑁂𑀮𑀁 𑀯𑀸. 𑀓𑀜𑁆𑀘𑀺𑀓𑀧𑀺𑀝𑁆𑀞𑀔𑀮𑀺𑀓𑀆𑀤𑀻𑀦𑀺𑀧𑀺 𑀯𑀝𑁆𑀝𑀦𑁆𑀢𑀺.

𑁨𑁬𑁫. 𑀫𑀡𑀺𑀦𑀸𑀢𑀺 𑀫𑀲𑀸𑀭𑀕𑀮𑁆𑀮𑀸𑀤𑀺𑀧𑀸𑀲𑀸𑀡𑁂𑀦. 𑀦 𑀘 𑀖𑀝𑁆𑀝𑁂𑀬𑁆𑀬𑀸𑀢𑀺 𑀦𑁂𑀯 𑀖𑀝𑁆𑀝𑁂𑀬𑁆𑀬. 𑀅𑀜𑁆𑀜𑁂𑀦 𑀯𑀸𑀢𑀺 𑀫𑀼𑀕𑁆𑀕𑀭𑀫𑀼𑀲𑀮𑀸𑀤𑀺𑀦𑀸. 𑀅𑀁𑀲𑀩𑀤𑁆𑀥𑀓𑀓𑀸𑀬𑀩𑀦𑁆𑀥𑀦𑀸𑀦𑀺 𑀧𑀦 𑀢𑀣𑀸 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀤𑁄𑀡𑀺𑀬𑀁 𑀓𑀢𑁆𑀯𑀸 𑀦 𑀘 𑀖𑀁𑀲𑁂𑀬𑁆𑀬𑀸𑀢𑀺 𑀧𑀓𑁆𑀓𑀭𑀚𑀦𑀸𑀓𑀺𑀭𑀡𑀤𑁄𑀡𑀺𑀬𑀁 𑀞𑀧𑁂𑀢𑁆𑀯𑀸 𑀪𑀽𑀫𑀺𑀬𑀁 𑀚𑀡𑁆𑀡𑀼𑀓𑀸𑀦𑀺 𑀦𑀺𑀳𑀦𑁆𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀆𑀯𑀺𑀚𑁆𑀛𑀺𑀢𑁆𑀯𑀸 𑀦𑁂𑀯 𑀖𑀁𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁨𑁬𑁬-𑁭. 𑀓𑀡𑁆𑀡𑀓𑁄𑀡𑀓𑀲𑀼𑀢𑁆𑀢𑀸𑀦𑀻𑀢𑀺 𑀘𑀻𑀯𑀭𑀭𑀚𑀦𑀓𑀸𑀮𑁂 𑀮𑀕𑁆𑀕𑀦𑀢𑁆𑀣𑀸𑀬 𑀅𑀦𑀼𑀯𑀸𑀢𑁂 𑀘𑀢𑀽𑀲𑀼 𑀓𑁄𑀡𑁂𑀲𑀼 𑀘 𑀧𑀸𑀲𑀓𑀁 𑀓𑀢𑁆𑀯𑀸 𑀩𑀦𑁆𑀥𑀺𑀢𑀸𑀦𑀺 𑀲𑀼𑀢𑁆𑀢𑀸𑀦𑀺, 𑀬𑀸𑀦𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀡𑁆𑀡𑀲𑀼𑀢𑁆𑀢𑀓’’𑀦𑁆𑀢𑀺 (𑀫𑀳𑀸𑀯. 𑁩𑁪𑁪) 𑀏𑀯𑀁 𑀅𑀦𑀼𑀜𑁆𑀜𑀸𑀢𑀸𑀦𑀺. 𑀓𑀡𑁆𑀡𑀲𑀗𑁆𑀔𑀸𑀢𑀸 𑀓𑁄𑀡𑀸 𑀓𑀡𑁆𑀡𑀓𑁄𑀡𑀓𑀸, 𑀢𑁂𑀲𑀼 𑀲𑀼𑀢𑁆𑀢𑀸𑀦𑀺. 𑀕𑀡𑁆𑀞𑀺𑀓𑀧𑀸𑀲𑀓𑀧𑀝𑁆𑀝𑁂𑀲𑀼 𑀧𑀦 𑀓𑀡𑁆𑀡𑀓𑁄𑀡𑀓𑀲𑀼𑀢𑁆𑀢𑀸𑀦𑀁 𑀤𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀫𑁂𑀯 𑀓𑀧𑁆𑀧𑀺𑀬𑀢𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀢𑀺 𑀘𑀻𑀯𑀭𑁂 𑀭𑀢𑁆𑀢𑁂𑀬𑁂𑀯 𑀢𑁂𑀲𑀁 𑀙𑀺𑀦𑁆𑀤𑀺𑀢𑀩𑁆𑀩𑀢𑀸 𑀦𑀢𑁆𑀣𑀺, 𑀓𑀡𑁆𑀡𑀓𑁄𑀡𑀓𑀲𑀼𑀢𑁆𑀢𑀸𑀦𑀁 𑀙𑀺𑀦𑁆𑀤𑀺𑀢𑀩𑁆𑀩𑀢𑀸𑀬 𑀯𑀼𑀢𑁆𑀢𑀢𑁆𑀢𑀸 𑀅𑀦𑀼𑀯𑀸𑀢𑁂𑀳𑀺 𑀦𑀺𑀓𑁆𑀔𑀫𑀺𑀢𑀲𑀼𑀢𑁆𑀢𑀸𑀦𑀺𑀧𑀺 𑀙𑀺𑀦𑁆𑀤𑀺𑀢𑀩𑁆𑀩𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑀓𑀭𑀡𑁂 𑀙𑀢𑁆𑀢𑀯𑀝𑁆𑀝𑀺𑀬𑀁 𑀮𑁂𑀔𑀁 𑀞𑀧𑁂𑀢𑁆𑀯𑀸 𑀮𑁂𑀔𑀸 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀙𑀢𑁆𑀢𑀯𑀝𑁆𑀝𑀺𑀬𑀦𑁆𑀢𑀺 𑀙𑀢𑁆𑀢𑀲𑁆𑀲 𑀫𑀼𑀔𑀯𑀝𑁆𑀝𑀺𑀬𑀁. 𑀮𑁂𑀔𑀸𑀢𑀺 𑀉𑀧𑀭𑀺 𑀯𑀸 𑀳𑁂𑀝𑁆𑀞𑀸 𑀯𑀸 𑀓𑀼𑀘𑁆𑀙𑀺𑀬𑀁 𑀯𑀸 𑀅𑀜𑁆𑀜𑀸 𑀮𑁂𑀔𑀸. 𑀓𑀼𑀜𑁆𑀘𑀺𑀓𑀸𑀬 𑀘 𑀧𑀺𑀧𑁆𑀨𑀮𑁂 𑀘 𑀫𑀡𑀺𑀓𑀸 𑀘 𑀧𑀻𑀴𑀓𑀸 𑀘 𑀦 𑀯𑀝𑁆𑀝𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀡𑀺𑀓𑀸𑀢𑀺 𑀏𑀓𑀸 𑀯𑀝𑁆𑀝𑀫𑀡𑀺. 𑀧𑀻𑀴𑀓𑀸𑀢𑀺 𑀲𑀸𑀲𑀧𑀫𑀢𑁆𑀢𑀺𑀓𑀸 𑀫𑀼𑀢𑁆𑀢𑀭𑀸𑀚𑀺𑀲𑀤𑀺𑀲𑀸 𑀩𑀳𑀼𑀯𑀝𑁆𑀝𑀮𑁂𑀔𑀸. 𑀤𑀡𑁆𑀟𑀫𑁆𑀳𑀻𑀢𑀺 𑀧𑀺𑀧𑁆𑀨𑀮𑀤𑀡𑁆𑀟𑀓𑁂.

𑁨𑁬𑁮-𑁯. 𑀅𑀭𑀡𑀺𑀬𑀁 𑀫𑀸𑀮𑀸𑀤𑀺 𑀘 𑀧𑀢𑁆𑀢𑀫𑀡𑁆𑀟𑀮𑁂 𑀪𑀺𑀢𑁆𑀢𑀺𑀓𑀫𑁆𑀫𑀜𑁆𑀘 𑀦 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀅𑀭𑀡𑀺𑀬𑀦𑁆𑀢𑀺 𑀉𑀢𑁆𑀢𑀭𑀸𑀭𑀡𑀺 𑀅𑀥𑀭𑀸𑀭𑀡𑀺 𑀅𑀭𑀡𑀺𑀥𑀦𑀼𑀓𑀜𑁆𑀘 𑀲𑀸𑀫𑀜𑁆𑀜𑁂𑀦 𑀕𑀳𑀺𑀢𑀁. 𑀧𑀢𑁆𑀢𑀫𑀡𑁆𑀟𑀮𑁂𑀢𑀺 𑀢𑀺𑀧𑀼𑀲𑀻𑀲𑀸𑀤𑀺𑀫𑀬𑁂 𑀧𑀢𑁆𑀢𑀫𑀡𑁆𑀟𑀮𑁂. 𑀏𑀢𑁆𑀣 𑀧𑀦 𑀫𑀓𑀭𑀤𑀡𑁆𑀟𑀓𑀁 𑀯𑀝𑁆𑀝𑀢𑀺. 𑀳𑁂𑀝𑁆𑀞𑀸𑀢𑀺 𑀓𑀢𑁆𑀢𑀭𑀬𑀝𑁆𑀞𑀺𑀬𑀸 𑀳𑁂𑀝𑁆𑀞𑀸. 𑀉𑀤𑁆𑀥𑀦𑁆𑀢𑀺 𑀢𑀲𑁆𑀲𑀸𑀬𑁂𑀯 𑀉𑀧𑀭𑀺.

𑁨𑁭𑁦-𑁩. 𑀲𑀫𑁆𑀫𑀼𑀜𑁆𑀚𑀦𑀺𑀫𑁆𑀳𑀻𑀢𑀺 𑀲𑀫𑁆𑀫𑀼𑀜𑁆𑀚𑀦𑀺𑀬𑀸 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄. 𑀅𑀯𑀸𑀭𑀺𑀢𑀦𑁆𑀢𑀺 𑀇𑀢𑁆𑀣𑀺𑀭𑀽𑀧𑀁 𑀧𑀦 𑀯𑀸𑀭𑀺𑀢𑀁. 𑀲𑁄𑀯𑀡𑁆𑀡𑀫𑀬𑀫𑁆𑀧𑀻𑀢𑀺 𑀲𑀼𑀯𑀡𑁆𑀡𑀫𑀬𑀫𑁆𑀧𑀺. 𑀯𑀺𑀲𑀸𑀡𑀦𑀸𑀴𑀺 𑀦𑀸𑀫 𑀯𑀺𑀲𑀸𑀡𑀫𑀬𑀸 𑀦𑀸𑀴𑀺. 𑀏𑀢𑁆𑀣 𑀧𑀦 𑀅𑀯𑀼𑀢𑁆𑀢𑀸𑀦𑀺𑀧𑀺 𑀬𑀸𑀦𑀺 𑀓𑀸𑀦𑀺𑀘𑀺 𑀆𑀭𑀓𑀡𑁆𑀟𑀓𑀤𑀦𑁆𑀢𑀓𑀝𑁆𑀞𑀙𑁂𑀤𑀦𑀧𑀸𑀦𑀻𑀬𑀖𑀝𑀧𑀸𑀦𑀻𑀬𑀉𑀴𑀼𑀗𑁆𑀓𑀘𑀼𑀡𑁆𑀡𑀪𑀸𑀚𑀦𑀸𑀤𑀻𑀦𑀺 𑀯𑀼𑀢𑁆𑀢𑀸𑀦𑀁 𑀅𑀦𑀼𑀮𑁄𑀫𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀬𑁄 𑀧𑀦𑁂𑀢𑁆𑀣 𑀯𑀺𑀦𑀬𑀜𑁆𑀜𑀽 𑀢𑀸𑀤𑀺𑀲𑀁 𑀧𑀭𑀺𑀓𑁆𑀔𑀸𑀭𑀁 𑀤𑀺𑀲𑁆𑀯𑀸 𑀙𑀺𑀦𑁆𑀤𑁂𑀬𑁆𑀬 𑀯𑀸 𑀙𑀺𑀦𑁆𑀤𑀸𑀧𑁂𑀬𑁆𑀬 𑀯𑀸, 𑀅𑀦𑀼𑀧𑀯𑀚𑁆𑀚𑁄 𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀧𑀭𑀺𑀓𑁆𑀔𑀸𑀭𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.