𑁩𑁪. 𑀧𑀣𑀯𑀻𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁪𑁨. 𑀚𑀸𑀢𑀸𑀚𑀸𑀢𑀸𑀢𑀺 𑀤𑀼𑀯𑀺𑀥𑀸𑀢𑀺 𑀚𑀸𑀢𑀸 𑀧𑀣𑀯𑀻 𑀅𑀚𑀸𑀢𑀸 𑀧𑀣𑀯𑀻𑀢𑀺 𑀧𑀣𑀯𑀻 𑀤𑀼𑀯𑀺𑀥𑀸𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀚𑀸𑀢𑀧𑀣𑀯𑀺𑀜𑁆𑀘 𑀅𑀚𑀸𑀢𑀧𑀣𑀯𑀺𑀜𑁆𑀘 𑀤𑀲𑁆𑀲𑁂𑀢𑀺. 𑀢𑀸𑀲𑀁 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀺 ‘‘𑀲𑀼𑀤𑁆𑀥𑀸’’𑀢𑀺𑀆𑀤𑀺𑀦𑀸. 𑀲𑀼𑀤𑁆𑀥𑀫𑀢𑁆𑀢𑀺𑀓𑀧𑀁𑀲𑀼𑀓𑀸 𑀘 𑀅𑀤𑀟𑁆𑀠𑀸 𑀘 𑀩𑀳𑀼𑀫𑀢𑁆𑀢𑀺𑀓𑀧𑀁𑀲𑀼𑀓𑀸 𑀘 𑀘𑀸𑀢𑀼𑀫𑀸𑀲𑀸𑀥𑀺𑀓𑁄𑀯𑀝𑁆𑀞𑀧𑀁𑀲𑀼𑀫𑀢𑁆𑀢𑀺𑀓𑀭𑀸𑀲𑀺 𑀘 𑀚𑀸𑀢𑀸 𑀧𑀣𑀯𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀢𑁆𑀢𑀺𑀓𑀸 𑀘 𑀧𑀁𑀲𑀼 𑀘𑀸𑀢𑀺 𑀤𑁆𑀯𑀦𑁆𑀤𑁄. 𑀲𑀼𑀤𑁆𑀥𑀸 𑀅𑀧𑁆𑀧𑀲𑀓𑁆𑀔𑀭𑀸𑀤𑀺𑀢𑀸𑀬 𑀫𑀢𑁆𑀢𑀺𑀓𑀸 𑀧𑀁𑀲𑀯𑁄 𑀬𑀲𑁆𑀲𑀸𑀢𑀺 𑀩𑀸𑀳𑀺𑀭𑀢𑁆𑀣𑁄. 𑀅𑀤𑀟𑁆𑀠𑀸𑀢𑀺 𑀉𑀤𑁆𑀥𑀦𑀧𑀘𑀦𑀸𑀤𑀺𑀯𑀲𑁂𑀦 𑀢𑀣𑀸 𑀢𑀣𑀸 𑀅𑀤𑀟𑁆𑀠𑀸. 𑀲𑀸 𑀧𑀦 𑀯𑀺𑀲𑀼𑀁 𑀦𑀢𑁆𑀣𑀺, 𑀲𑀼𑀤𑁆𑀥𑀫𑀢𑁆𑀢𑀺𑀓𑀸𑀤𑀻𑀲𑀼 𑀅𑀜𑁆𑀜𑀢𑀭𑀸𑀯 𑀯𑁂𑀤𑀺𑀢𑀩𑁆𑀩𑀸. 𑀘𑀢𑁆𑀢𑀸𑀭𑁄 𑀫𑀸𑀲𑀸, 𑀢𑁂𑀳𑀺 𑀲𑀳𑀺𑀢𑁄 𑀅𑀢𑀺𑀭𑁂𑀓𑁄 𑀓𑀸𑀮𑁄, 𑀢𑀲𑁆𑀫𑀺𑀁 𑀑𑀯𑀝𑁆𑀞𑁄𑀢𑀺 𑀲𑀫𑀸𑀲𑁄. 𑀑𑀯𑀝𑁆𑀞𑁄𑀢𑀺 𑀬𑁂𑀦 𑀓𑁂𑀦𑀘𑀺 𑀉𑀤𑀓𑁂𑀦 𑀑𑀯𑀝𑁆𑀞𑁄. 𑀩𑀼𑀥𑀸 𑀧𑀦 ‘‘𑀆𑀓𑀸𑀲𑀢𑁄 𑀯𑀼𑀝𑁆𑀞𑀉𑀤𑀓𑁂𑀦𑁂𑀯, 𑀦 𑀅𑀜𑁆𑀜𑀢𑁆𑀣 𑀧𑀳𑀭𑀺𑀢𑁆𑀯𑀸 𑀧𑀢𑀺𑀢𑀩𑀺𑀦𑁆𑀤𑀼𑀦𑀸’’𑀢𑀺 𑀯𑀤𑀦𑁆𑀢𑀺, ‘‘𑀑𑀯𑀝𑁆𑀞𑁄’’𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀢𑁆𑀢𑀸 𑀘 ‘‘𑀧𑁄𑀓𑁆𑀔𑀭𑀡𑀺𑀬𑀸 𑀞𑀺𑀢𑀢𑀦𑀼𑀓𑀤𑁆𑀤𑀫𑁄 𑀯𑀝𑁆𑀝𑀢𑀺, 𑀩𑀳𑀮𑁄 𑀢𑀼 𑀦 𑀯𑀝𑁆𑀝𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁮𑁬) 𑀯𑀼𑀢𑁆𑀢𑀢𑁆𑀢𑀸 𑀘 ‘‘𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀲𑀫𑁆𑀧𑀢𑁆𑀢𑁂 𑀕𑀭𑀼𑀓𑁂 𑀞𑀸𑀢𑀩𑁆𑀩’’𑀦𑁆𑀢𑀺 𑀯𑀺𑀦𑀬𑀮𑀓𑁆𑀔𑀡𑀢𑁄 𑀘 𑀦 𑀢𑀁 𑀬𑀼𑀚𑁆𑀚𑀢𑀻𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀧𑀁𑀲𑀼𑀫𑀢𑁆𑀢𑀺𑀓𑀸𑀦𑀁 𑀭𑀸𑀲𑀺 𑀧𑀁𑀲𑀼𑀫𑀢𑁆𑀢𑀺𑀓𑀭𑀸𑀲𑀺. 𑀘𑀢𑀼…𑀧𑁂… 𑀯𑀝𑁆𑀞𑁄 𑀧𑀁𑀲𑀼𑀫𑀢𑁆𑀢𑀺𑀓𑀭𑀸𑀲𑀺 𑀬𑀲𑁆𑀲𑀸𑀢𑀺 𑀅𑀜𑁆𑀜𑀧𑀤𑀢𑁆𑀣𑁄, 𑀓𑀫𑁆𑀫𑀥𑀸𑀭𑀬𑁄 𑀯𑀸.

𑁨𑁪𑁩. 𑀯𑀸𑀮𑀼𑀓𑀸 𑀘 𑀤𑀟𑁆𑀠𑀸 𑀘 𑀬𑁂𑀪𑀼𑀬𑁆𑀬𑀲𑀓𑁆𑀔𑀭𑀸𑀤𑀺𑀫𑀳𑀻𑀧𑀺 𑀘 𑀘𑀸𑀢𑀼𑀫𑀸𑀲𑁄𑀫𑀯𑀝𑁆𑀞𑀓𑁄 𑀯𑀼𑀢𑁆𑀢𑀭𑀸𑀲𑀺 𑀘 𑀤𑀼𑀢𑀺𑀬𑀸 𑀪𑀽𑀫𑀻𑀢𑀺 𑀲𑀫𑁆𑀩𑀦𑁆𑀥𑁄 𑀲𑀓𑁆𑀔𑀭𑀸 𑀘 𑀧𑀸𑀲𑀸𑀡𑀸 𑀘 𑀫𑀭𑀼𑀫𑁆𑀩𑀸 𑀘 𑀓𑀣𑀮𑀸 𑀘 𑀯𑀸𑀮𑀼𑀓𑀸 𑀘𑀸𑀢𑀺 𑀤𑁆𑀯𑀦𑁆𑀤𑁄. 𑀲𑀼𑀤𑁆𑀥𑀸 𑀲𑀓𑁆𑀔𑀭…𑀧𑁂… 𑀯𑀸𑀮𑀼𑀓𑀸 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀳𑀢𑁆𑀣𑀫𑀼𑀝𑁆𑀞𑀺𑀦𑀸 𑀕𑀳𑁂𑀢𑀩𑁆𑀩𑀧𑁆𑀧𑀫𑀸𑀡𑀸 𑀲𑀓𑁆𑀔𑀭𑀸, 𑀢𑀢𑁄 𑀉𑀧𑀭𑀺 𑀧𑀸𑀲𑀸𑀡𑀸, 𑀓𑀝𑀲𑀓𑁆𑀔𑀭𑀸 𑀫𑀭𑀼𑀫𑁆𑀩𑀸, 𑀓𑀧𑀸𑀮𑀔𑀡𑁆𑀟𑀸𑀦𑀺 𑀓𑀣𑀮𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀤𑀼𑀢𑀺𑀬𑀸𑀢𑀺 𑀅𑀚𑀸𑀢𑀸. 𑀯𑀼𑀢𑁆𑀢𑀭𑀸𑀲𑀻𑀢𑀺 𑀯𑀼𑀢𑁆𑀢𑁄 𑀫𑀢𑁆𑀢𑀺𑀓𑀧𑀁𑀲𑀼𑀲𑀺𑀭𑀸.

𑁨𑁪𑁪. 𑀓𑀻𑀤𑀺𑀲𑀻 𑀬𑁂𑀪𑀼𑀬𑀼𑀫𑀢𑁆𑀢𑀺𑀓𑀸𑀤𑀻𑀢𑀺 𑀆𑀳 ‘‘𑀤𑁆𑀯𑁂 𑀪𑀸𑀕𑀸’’𑀢𑀺𑀆𑀤𑀺. 𑀬𑀲𑁆𑀲 𑀪𑀽𑀫𑀺𑀬𑀸𑀢𑀺 𑀬𑀲𑁆𑀲𑀸 𑀪𑀽𑀫𑀺𑀬𑀸. 𑀲𑁂𑀲𑁂𑀲𑀼𑀧𑀻𑀢𑀺 𑀬𑁂𑀪𑀼𑀬𑁆𑀬𑀧𑀁𑀲𑀼𑀬𑁂𑀪𑀼𑀬𑁆𑀬𑀲𑀓𑁆𑀔𑀭𑀬𑁂𑀪𑀼𑀬𑁆𑀬𑀧𑀸𑀲𑀸𑀡𑀸𑀤𑀻𑀲𑀼.

𑁨𑁪𑁫. ‘‘𑀧𑀸𑀘𑀺𑀢𑁆𑀢𑀻’’𑀢𑀺𑀆𑀤𑀺𑀦𑀸 𑀢𑀢𑁆𑀣 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀺. 𑀚𑀸𑀢𑁂 𑀚𑀸𑀢𑀲𑀜𑁆𑀜𑀺𑀲𑁆𑀲 𑀔𑀡𑀦𑁂 𑀧𑀸𑀘𑀺𑀢𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀚𑀸𑀢𑁂𑀢𑀺 𑀚𑀸𑀢𑁂 𑀪𑀽𑀫𑀺𑀪𑀸𑀕𑁂, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀯𑀸, 𑀚𑀸𑀢𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀚𑀸𑀢𑁂 𑀤𑁆𑀯𑁂𑀴𑁆𑀳𑀲𑁆𑀲 𑀯𑀺𑀫𑀢𑀺𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀚𑀸𑀢𑁂 𑀅𑀚𑀸𑀢𑀲𑀜𑁆𑀜𑀺𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀢𑀣𑀸 𑀆𑀡𑀸𑀧𑀦𑁂 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀅𑀚𑀸𑀢𑀲𑀜𑁆𑀜𑀺𑀲𑁆𑀲𑀸𑀢𑀺 𑀅𑀚𑀸𑀢𑀸𑀢𑀺 𑀲𑀜𑁆𑀜𑀸 𑀅𑀚𑀸𑀢𑀲𑀜𑁆𑀜𑀸, 𑀲𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀅𑀚𑀸𑀢𑀲𑀜𑁆𑀜𑀻, 𑀢𑀲𑁆𑀲.

𑁨𑁪𑁬. 𑀏𑀓𑀸𑀬𑀸𑀡𑀢𑁆𑀢𑀺𑀬𑀸 𑀏𑀓𑀸𑀢𑀺 𑀲𑀘𑁂 𑀲𑀓𑀺𑀁 𑀆𑀡𑀢𑁆𑀢𑁄 𑀤𑀺𑀯𑀲𑀫𑁆𑀧𑀺 𑀔𑀡𑀢𑀺, 𑀆𑀡𑀸𑀧𑀓𑀲𑁆𑀲 𑀏𑀓𑀸 𑀏𑀯 𑀆𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀯𑀸𑀘𑀲𑁄 𑀆𑀧𑀢𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀸𑀘𑀲𑁄𑀢𑀺 𑀯𑀺𑀘𑁆𑀙𑀸𑀬𑀁 𑀲𑁄, 𑀯𑀸𑀘𑀸𑀬 𑀯𑀸𑀘𑀸𑀬𑀸𑀢𑀺 𑀅𑀢𑁆𑀣𑁄.

𑁨𑁪𑁭. ‘‘𑀇𑀫𑀁 𑀞𑀸𑀦𑀁 𑀔𑀡 𑀯𑀸’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. ‘‘𑀏𑀢𑁆𑀣 𑀅𑀕𑁆𑀕𑀺𑀁 𑀚𑀸𑀮𑁂𑀳𑀺 𑀯𑀸’’𑀢𑀺 𑀬𑁄𑀚𑀦𑀸. ‘‘𑀯𑀢𑁆𑀢𑀼’’𑀦𑁆𑀢𑀺 𑀇𑀤𑀁 ‘‘𑀦 𑀯𑀝𑁆𑀝𑀢𑀻’’𑀢𑀺 𑀇𑀫𑀲𑁆𑀲 𑀓𑀢𑁆𑀢𑀼𑀧𑀤𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀯𑀸 ‘‘𑀇𑀫𑀁 𑀞𑀸𑀦𑀁 𑀔𑀡𑀸’’𑀢𑀺𑀆𑀤𑀺𑀧𑁆𑀧𑀓𑀸𑀭𑁄 𑀯𑀘𑀦𑀸𑀬 𑀦 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀬𑀫𑁂𑀢𑁆𑀯𑀸𑀢𑀺 𑀇𑀫𑀺𑀦𑀸 ‘‘𑀆𑀯𑀸𑀝𑀁 𑀔𑀡, 𑀓𑀦𑁆𑀤𑀁 𑀔𑀡𑀸’’𑀢𑀺𑀆𑀤𑀺𑀦𑀸 𑀅𑀦𑀺𑀬𑀫𑁂𑀢𑁆𑀯𑀸 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺.

𑁨𑁪𑁮. ‘‘𑀇𑀫𑀲𑁆𑀲 𑀣𑀫𑁆𑀪𑀲𑁆𑀲 𑀆𑀯𑀸𑀝𑀁 𑀚𑀸𑀦 𑀯𑀸, 𑀓𑀧𑁆𑀧𑀺𑀬𑀁 𑀓𑀭𑁄𑀳𑀺 𑀯𑀸’’𑀢𑀺 𑀘 ‘‘𑀫𑀢𑁆𑀢𑀺𑀓𑀁 𑀚𑀸𑀦 𑀯𑀸, 𑀫𑀢𑁆𑀢𑀺𑀓𑀁 𑀆𑀳𑀭 𑀯𑀸, 𑀫𑀢𑁆𑀢𑀺𑀓𑀁 𑀓𑀧𑁆𑀧𑀺𑀬𑀁 𑀓𑀭𑁄𑀳𑀺 𑀯𑀸’’𑀢𑀺 𑀘 𑀏𑀤𑀺𑀲𑀁 𑀯𑀘𑀦𑀁 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑀁 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺 𑀏𑀤𑀺𑀲𑀁, 𑀓𑀺𑀁 𑀢𑀁? ‘‘𑀫𑀢𑁆𑀢𑀺𑀓𑀁 𑀤𑁂𑀳𑀻’’𑀢𑀺𑀆𑀤𑀺𑀓𑀁 𑀉𑀧𑀫𑁂𑀬𑁆𑀬𑀁. ‘‘𑀫𑀢𑁆𑀢𑀺𑀓𑀁 𑀚𑀸𑀦𑀸’’𑀢𑀺𑀆𑀤𑀺𑀓𑀁 𑀧𑀦 𑀉𑀧𑀫𑀸𑀦𑀁, 𑀢𑁂𑀲𑀁 𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀸𑀦𑀁 𑀬𑀸 𑀓𑀧𑁆𑀧𑀺𑀬𑀲𑀗𑁆𑀔𑀸𑀢𑀸 𑀲𑀫𑀸𑀦𑀥𑀫𑁆𑀫𑀢𑀸, 𑀲𑀸 𑀉𑀧𑀫𑀸. 𑀢𑀣𑀸 𑀘 𑀯𑀼𑀢𑁆𑀢𑀁 𑀅𑀫𑁆𑀳𑁂𑀳𑀺 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁂 ‘‘𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀸𑀦𑀁, 𑀲𑀥𑀫𑁆𑀫𑀢𑁆𑀢𑀁 𑀲𑀺𑀬𑁄𑀧𑀫𑀸’’𑀢𑀺. 𑀅𑀜𑁆𑀜𑀣𑀸 𑀉𑀧𑀫𑀸𑀦𑀪𑀽𑀢𑀅𑀓𑁆𑀔𑀭𑀸𑀯𑀴𑀺𑀲𑀤𑀺𑀲𑀻𑀬𑁂𑀯, 𑀅𑀓𑁆𑀔𑀭𑀸𑀯𑀴𑀺 𑀉𑀧𑀫𑁂𑀬𑁆𑀬𑀁 𑀲𑀺𑀬𑀸. 𑀯𑀸𑀓𑁆𑀬𑁂 𑀯𑀺𑀬-𑀲𑀤𑁆𑀤𑁄𑀬𑁂𑀯 𑀧𑀦 𑀉𑀧𑀫𑀸𑀦𑀁 𑀚𑁄𑀢𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁨𑁪𑁯. 𑀧𑀣𑀯𑀺𑀬𑀸 𑀅𑀲𑀫𑁆𑀩𑀤𑁆𑀥𑀁 𑀲𑀼𑀓𑁆𑀔𑀓𑀤𑁆𑀤𑀫𑀆𑀤𑀺𑀓𑀜𑁆𑀘 𑀢𑀦𑀼𑀓𑀁 𑀉𑀲𑁆𑀲𑀺𑀜𑁆𑀘𑀦𑀻𑀬𑀓𑀤𑁆𑀤𑀫𑀜𑁆𑀘 𑀓𑁄𑀧𑁂𑀢𑀼𑀁 𑀮𑀩𑁆𑀪𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀤𑁆𑀤𑀫𑀆𑀤𑀺𑀓𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀉𑀤𑀓𑁂𑀦 𑀕𑀢𑀝𑁆𑀞𑀸𑀦𑁂 𑀉𑀤𑀓𑀧𑀧𑁆𑀧𑀝𑀓𑁄 𑀦𑀸𑀫 𑀳𑁄𑀢𑀺, 𑀬𑀁 𑀯𑀸𑀢𑀧𑁆𑀧𑀳𑀸𑀭𑁂𑀦 𑀘𑀮𑀢𑀺, 𑀢𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀉𑀲𑁆𑀲𑀺𑀜𑁆𑀘𑀦𑀻𑀬𑀓𑀤𑁆𑀤𑀫𑀦𑁆𑀢𑀺 𑀖𑀝𑁂𑀳𑀺 𑀉𑀲𑁆𑀲𑀺𑀜𑁆𑀘𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀓𑀤𑁆𑀤𑀫𑀁.

𑁨𑁫𑁦. ‘‘𑀘𑀸𑀢𑀼𑀫𑀸𑀲𑀸𑀥𑀺𑀓𑁄𑀯𑀝𑁆𑀞𑀁 𑀕𑀡𑁆𑀟𑀼𑀧𑁆𑀧𑀸𑀤’’𑀦𑁆𑀢𑀺𑀆𑀤𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀕𑀡𑁆𑀟𑀁 𑀧𑀣𑀯𑀺𑀬𑀸 𑀕𑀡𑁆𑀟𑀲𑀤𑀺𑀲𑀁 𑀫𑀢𑁆𑀢𑀺𑀓𑀭𑀸𑀲𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀻𑀢𑀺 𑀕𑀡𑁆𑀟𑀼𑀧𑁆𑀧𑀸𑀤𑀸. 𑀇𑀥 𑀧𑀦 𑀢𑁂𑀳𑀺 𑀉𑀝𑁆𑀞𑀸𑀧𑀺𑀢𑁄 𑀕𑀽𑀣𑁄 ‘‘𑀕𑀡𑁆𑀟𑀼𑀧𑁆𑀧𑀸𑀤’’𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑁄. 𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀕𑀡𑁆𑀟𑀼𑀧𑁆𑀧𑀸𑀤𑁄’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀢𑀁 ‘‘𑀦 𑀓𑁄𑀧𑀬𑁂’’𑀢𑀺 𑀏𑀢𑁆𑀣 𑀓𑀫𑁆𑀫𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀦 𑀬𑀼𑀚𑁆𑀚𑀢𑀺. 𑀫𑀽𑀲𑀺𑀓𑀼𑀓𑁆𑀓𑀺𑀭𑀦𑁆𑀢𑀺 𑀫𑀽𑀲𑀺𑀓𑀸𑀦𑀁 𑀉𑀓𑁆𑀓𑀺𑀭𑁄 𑀔𑀡𑀺𑀢𑁆𑀯𑀸 𑀩𑀳𑀺 𑀓𑀢𑀁 𑀧𑀁𑀲𑀼𑀭𑀸𑀲𑀺 𑀫𑀽𑀲𑀺𑀓𑀼𑀓𑁆𑀓𑀺𑀭𑁄𑀢𑀺. 𑀮𑁂𑀟𑁆𑀟𑀸𑀤𑀺𑀦𑁆𑀢𑀺 𑀏𑀢𑁆𑀣 𑀮𑁂𑀟𑁆𑀟𑀼𑀦𑁆𑀢𑀺 𑀓𑀲𑀺𑀢𑀝𑁆𑀞𑀸𑀦𑁂 𑀦𑀗𑁆𑀕𑀮𑀘𑁆𑀙𑀺𑀦𑁆𑀦𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀁. 𑀆𑀤𑀺-𑀲𑀤𑁆𑀤𑁂𑀦 𑀕𑀸𑀯𑀻𑀦𑀁 𑀔𑀼𑀭𑀘𑁆𑀙𑀺𑀦𑁆𑀦𑀁 𑀓𑀤𑁆𑀤𑀫𑀁 𑀲𑀗𑁆𑀕𑀡𑁆𑀳𑀸𑀢𑀺.

𑁨𑁫𑁧-𑁨. 𑀉𑀤𑀓𑀲𑀦𑁆𑀢𑀺𑀓𑁂 𑀧𑀢𑀺𑀢𑁂 𑀯𑀸𑀧𑀺𑀆𑀤𑀻𑀦𑀁 𑀓𑀽𑀮𑁂 𑀘 𑀧𑀸𑀲𑀸𑀡𑁂 𑀮𑀕𑁆𑀕𑁂 𑀭𑀚𑁂 𑀘 𑀦𑀯𑀲𑁄𑀡𑁆𑀟𑀺𑀬𑀸 𑀧𑀢𑀺𑀢𑁂 𑀭𑀚𑁂 𑀘 𑀅𑀩𑁆𑀪𑁄𑀓𑀸𑀲𑀼𑀝𑁆𑀞𑀺𑀢𑁂 𑀯𑀫𑁆𑀫𑀺𑀓𑁂 𑀘 𑀫𑀢𑁆𑀢𑀺𑀓𑀸𑀓𑀼𑀝𑁆𑀝𑁂 𑀘 𑀢𑀣𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀣𑀸𑀢𑀺 𑀇𑀫𑀺𑀦𑀸 𑀓𑀽𑀮𑀸𑀤𑀺𑀓𑁂 𑀘𑀸𑀢𑀼𑀫𑀸𑀲𑀸𑀥𑀺𑀓𑁄𑀯𑀝𑁆𑀞𑀁 𑀯𑀸 𑀲𑀩𑁆𑀩𑀁 𑀦 𑀓𑁄𑀧𑀬𑁂𑀢𑀺 𑀇𑀤𑀁 𑀅𑀢𑀺𑀤𑀺𑀲𑀢𑀺. 𑀇𑀝𑁆𑀞𑀓𑀓𑀼𑀝𑁆𑀝𑀓𑁄 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀬𑁂𑀪𑀼𑀬𑁆𑀬𑀸’’𑀢𑀺𑀆𑀤𑀺. 𑀬𑁂𑀪𑀼𑀬𑁆𑀬𑁂𑀦 𑀓𑀣𑀮𑀸 𑀏𑀢𑁆𑀣𑀸𑀢𑀺 𑀬𑁂𑀪𑀼𑀬𑁆𑀬𑀓𑀣𑀮𑀸, 𑀪𑀽𑀫𑀺, 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀞𑀸𑀦𑀁, 𑀬𑁂𑀪𑀼𑀬𑁆𑀬𑀓𑀣𑀮𑀸𑀬 𑀞𑀸𑀦𑀁, 𑀢𑀲𑁆𑀫𑀺𑀁. 𑀇𑀝𑁆𑀞𑀓𑀓𑀼𑀝𑁆𑀝𑀓𑁄 𑀬𑁂𑀪𑀼𑀬𑁆𑀬𑀓𑀣𑀮𑀸 𑀯𑀺𑀬 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀼𑀝𑁆𑀝𑀓𑀁 𑀓𑁄𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀝𑁆𑀞𑀓𑀸𑀬 𑀓𑀢𑁄 𑀓𑀼𑀝𑁆𑀝𑀓𑁄𑀢𑀺 𑀲𑀫𑀸𑀲𑁄.

𑁨𑁫𑁩-𑁫. 𑀲𑀜𑁆𑀘𑀸𑀮𑁂𑀢𑁆𑀯𑀸 𑀪𑀽𑀫𑀺𑀁 𑀯𑀺𑀓𑁄𑀧𑀬𑀁 𑀣𑀫𑁆𑀪𑀸𑀤𑀺𑀁 𑀕𑀡𑁆𑀳𑀺𑀢𑀼𑀁 𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀯𑀺𑀓𑁄𑀧𑀬𑀦𑁆𑀢𑀺 𑀓𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀯𑀺𑀓𑁄𑀧𑀬𑀢𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀣𑀸 𑀓𑀣𑀫𑁂𑀢𑁆𑀣 𑀧𑀞𑀫𑀸𑀧𑀲𑀗𑁆𑀕𑁄. 𑀧𑀞𑀫𑀸 𑀳𑀺 ‘‘𑀪𑀯’’𑀦𑁆𑀢𑀺 𑀯𑀼𑀢𑁆𑀢𑁂 𑀲𑀺𑀬𑀸, 𑀦 𑀘 ‘‘𑀕𑀡𑁆𑀳𑀺𑀢𑀼’’𑀦𑁆𑀢𑀺𑀆𑀤𑀻𑀲𑀼 𑀢𑀼𑀁-𑀧𑀘𑁆𑀘𑀬𑁂𑀳𑀺 𑀯𑀼𑀢𑁆𑀢𑁄 𑀓𑁄𑀘𑀺 𑀅𑀢𑁆𑀣𑀺, 𑀬𑀤𑀸 𑀪𑀸𑀯𑁂 𑀢𑀼𑀁-𑀧𑀘𑁆𑀘𑀬𑁄, 𑀢𑀤𑀸 𑀦 𑀓𑀺𑀜𑁆𑀘𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺, ‘‘𑀦 𑀓𑀧𑁆𑀧𑀢𑀻’’𑀢𑀺 𑀧𑀥𑀸𑀦𑀓𑀺𑀭𑀺𑀬𑀸𑀬𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀓𑀢𑁆𑀢𑀸 𑀅𑀜𑁆𑀜𑁄𑀬𑁂𑀯𑀸𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣. 𑀢𑀢𑀺𑀬𑀢𑁆𑀣𑁂 𑀢𑀼 𑀲𑀢𑀺 𑀇𑀢𑁄 𑀘𑀺𑀢𑁄 𑀲𑀜𑁆𑀘𑀸𑀮𑁂𑀢𑁆𑀯𑀸 𑀪𑀽𑀫𑀺𑀁 𑀯𑀺𑀓𑁄𑀧𑀬𑀢𑀸 𑀣𑀫𑁆𑀪𑀸𑀤𑀺𑀁 𑀕𑀡𑁆𑀳𑀺𑀢𑀼𑀁 𑀦 𑀓𑀧𑁆𑀧𑀢𑀻𑀢𑀺 𑀅𑀢𑀻𑀯 𑀬𑀼𑀚𑁆𑀚𑀢𑀺. 𑀥𑀸𑀭𑀸𑀬𑀸𑀢𑀺 𑀧𑀲𑁆𑀲𑀸𑀯𑀥𑀸𑀭𑀸𑀬. 𑀯𑀺𑀲𑀫𑀁 𑀲𑀫𑀁 𑀓𑀸𑀢𑀼𑀁 𑀲𑀫𑁆𑀫𑀼𑀜𑁆𑀚𑀦𑀻𑀳𑀺 𑀖𑀁𑀲𑀺𑀢𑀼𑀁 𑀯𑀸𑀢𑀺 𑀬𑁄𑀚𑀦𑀸. 𑀯𑀺𑀲𑀫𑀦𑁆𑀢𑀺 𑀯𑀺𑀲𑀫𑀝𑁆𑀞𑀸𑀦𑀁. ‘‘𑀧𑀤𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀪𑀽𑀫𑀺𑀁 𑀪𑀺𑀦𑁆𑀤𑀦𑁆𑀢𑁄 𑀘𑀗𑁆𑀓𑀫𑀺𑀢𑀼𑀁 𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀺𑀦𑁆𑀤𑀦𑁆𑀢𑁄𑀢𑀺 𑀪𑀺𑀦𑁆𑀤𑀢𑀸. 𑀓𑀡𑁆𑀟𑀼𑀭𑁄𑀕𑀻 𑀯𑀸 𑀢𑀝𑀸𑀤𑀻𑀲𑀼 𑀅𑀗𑁆𑀕𑀧𑀘𑁆𑀘𑀗𑁆𑀕𑀁 𑀖𑀁𑀲𑀺𑀢𑀼𑀦𑁆𑀢𑀺 𑀬𑁄𑀚𑀦𑀸. 𑀓𑀡𑁆𑀟𑀼𑀭𑁄𑀕𑀻𑀢𑀺 𑀓𑀡𑁆𑀟𑀼𑀭𑁄𑀕𑀺𑀦𑀸. 𑀘-𑀲𑀤𑁆𑀤𑁄 𑀅𑀯𑀥𑀸𑀭𑀡𑁂.

𑁨𑁫𑁬-𑁭. 𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲𑀸𑀢𑀺 𑀧𑀣𑀯𑀺𑀪𑁂𑀤𑀸𑀥𑀺𑀧𑁆𑀧𑀸𑀬𑀯𑀺𑀭𑀳𑁂𑀦 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲.

𑁨𑁫𑁮. 𑀅𑀕𑁆𑀕𑀺𑀲𑁆𑀲 𑀅𑀦𑀼𑀧𑀸𑀤𑀸𑀦𑁂 𑀓𑀧𑀸𑀮𑁂 𑀯𑀸 𑀅𑀦𑀼𑀧𑀸𑀤𑀸𑀦𑀸𑀬 𑀇𑀝𑁆𑀞𑀓𑀸𑀬 𑀯𑀸 𑀅𑀕𑁆𑀕𑀺𑀁 𑀧𑀸𑀢𑁂𑀢𑀼𑀁 𑀯𑀸 𑀅𑀯𑀲𑁂 𑀲𑀢𑀺 𑀪𑀽𑀫𑀺𑀬𑀁 𑀧𑀸𑀢𑁂𑀢𑀼𑀁 𑀯𑀸 𑀮𑀩𑁆𑀪𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑀸𑀤𑀸𑀦𑀁 𑀇𑀦𑁆𑀥𑀦𑀁, 𑀦 𑀉𑀧𑀸𑀤𑀸𑀦𑀁 𑀅𑀦𑀼𑀧𑀸𑀤𑀸𑀦𑀁, 𑀢𑀲𑁆𑀫𑀺𑀁. 𑀯𑀲𑁄 𑀧𑀪𑀼𑀢𑁆𑀢𑀁. ‘‘𑀯𑀲𑁄 𑀧𑀪𑀼𑀢𑁆𑀢𑁂 𑀆𑀬𑀢𑁆𑀢𑁂’’𑀢𑀺 𑀳𑀺 𑀦𑀺𑀖𑀡𑁆𑀟𑀼. 𑀦 𑀯𑀲𑁄 𑀅𑀯𑀲𑁄, 𑀢𑀲𑁆𑀫𑀺𑀁 𑀅𑀧𑀪𑀼𑀢𑁆𑀢𑁂𑀢𑀺 𑀅𑀢𑁆𑀣𑁄. 𑀧𑀢𑀺𑀢𑀝𑁆𑀞𑀸𑀦𑁂𑀬𑁂𑀯 𑀉𑀧𑀸𑀤𑀸𑀦𑀁 𑀤𑀢𑁆𑀯𑀸 𑀅𑀕𑁆𑀕𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀼𑀓𑁆𑀔𑀔𑀸𑀡𑀼𑀓𑀲𑀼𑀓𑁆𑀔𑀭𑀼𑀓𑁆𑀔𑀸𑀤𑀻𑀲𑀼 𑀘 𑀅𑀕𑁆𑀕𑀺𑀁 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀧𑀦 ‘‘𑀧𑀣𑀯𑀺𑀁 𑀅𑀧𑁆𑀧𑀢𑁆𑀢𑀫𑁂𑀯 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀤𑁂𑀢𑀺, 𑀯𑀝𑁆𑀝𑀢𑀺, 𑀧𑀘𑁆𑀙𑀸 𑀦𑀺𑀩𑁆𑀩𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀯𑀺𑀲𑀬𑀢𑁆𑀢𑀸 𑀅𑀦𑀸𑀧𑀢𑁆𑀢𑀺. ‘‘𑀪𑀽𑀫𑀺𑀬𑀁 𑀧𑀸𑀢𑁂𑀳𑀻’’𑀢𑀺 𑀏𑀯𑀫𑁆𑀧𑀺 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺.

𑀧𑀣𑀯𑀻𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.