𑁩𑁩. 𑀓𑀸𑀬𑀩𑀦𑁆𑀥𑀦𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁩𑁫. 𑀩𑀦𑁆𑀥𑀻𑀬𑀢𑀺 𑀅𑀦𑁂𑀦𑀸𑀢𑀺 𑀩𑀦𑁆𑀥𑀦𑀁, 𑀓𑀸𑀬𑀲𑁆𑀲 𑀩𑀦𑁆𑀥𑀦𑀁 𑀓𑀸𑀬𑀩𑀦𑁆𑀥𑀦𑀁, 𑀦𑀢𑁆𑀣𑀺 𑀓𑀸𑀬𑀩𑀦𑁆𑀥𑀦𑀫𑁂𑀢𑀲𑁆𑀲𑀸𑀢𑀺 𑀅𑀓𑀸𑀬𑀩𑀦𑁆𑀥𑀦𑁄. 𑀤𑀼𑀓𑁆𑀓𑀝𑀦𑁆𑀢𑀺 𑀲𑀜𑁆𑀘𑀺𑀘𑁆𑀘 𑀯𑀸 𑀅𑀲𑀜𑁆𑀘𑀺𑀘𑁆𑀘 𑀯𑀸 𑀧𑀯𑀺𑀲𑁂𑀬𑁆𑀬 𑀘𑁂, 𑀤𑀼𑀓𑁆𑀓𑀝𑀁. 𑀅𑀲𑀢𑀺𑀬𑀸 𑀕𑀢𑁄 𑀬𑀢𑁆𑀣 𑀲𑀭𑀢𑀺, 𑀢𑀢𑁆𑀣𑁂𑀯 𑀩𑀦𑁆𑀥𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀢𑁄𑀢𑀺 𑀅𑀦𑁆𑀢𑁄𑀕𑀸𑀫𑀁 𑀕𑀢𑁄. 𑀲𑀭𑀺𑀢𑁆𑀯𑀸 𑀬𑀸𑀯 𑀦 𑀩𑀦𑁆𑀥𑀢𑀺, 𑀦 𑀢𑀸𑀯 𑀧𑀺𑀡𑁆𑀟𑀸𑀬 𑀘𑀭𑀺𑀢𑀩𑁆𑀩𑀁.

𑁨𑁩𑁬. ‘‘𑀧𑀝𑁆𑀝𑀺𑀓𑀸’’𑀢𑀺𑀆𑀤𑀺𑀦𑀸 𑀲𑀩𑁆𑀩𑀲𑀗𑁆𑀕𑀸𑀳𑀓𑀁 𑀓𑀸𑀬𑀩𑀦𑁆𑀥𑀦𑀁 𑀦𑀺𑀤𑁆𑀤𑀺𑀲𑀢𑀺. 𑀧𑀝𑁆𑀝𑀺𑀓𑀸𑀢𑀺 𑀧𑀓𑀢𑀺𑀯𑀻𑀢𑀸 𑀯𑀸 𑀫𑀘𑁆𑀙𑀓𑀡𑁆𑀝𑀓𑀔𑀚𑁆𑀚𑀽𑀭𑀺𑀧𑀢𑁆𑀢𑀯𑀸𑀬𑀺𑀫𑀸 𑀯𑀸. 𑀲𑀽𑀓𑀭𑀸𑀦𑀁 𑀅𑀦𑁆𑀢𑀁 𑀲𑀽𑀓𑀭𑀦𑁆𑀢𑀁. 𑀇𑀥 𑀧𑀦 𑀢𑀁𑀲𑀤𑀺𑀲𑀁 𑀯𑀼𑀘𑁆𑀘𑀢𑀺. 𑀘𑀢𑀼𑀭𑀲𑁆𑀲𑀁 𑀅𑀓𑀢𑁆𑀯𑀸 𑀲𑀚𑁆𑀚𑀺𑀢𑀁 𑀫𑀼𑀤𑁆𑀤𑀺𑀓𑀓𑀸𑀬𑀩𑀦𑁆𑀥𑀦𑀫𑁆𑀧𑀺 𑀲𑀗𑁆𑀕𑀳𑁂𑀢𑁆𑀯𑀸 ‘‘𑀏𑀓𑀸 𑀭𑀚𑁆𑀚𑀽’’𑀢𑀺 𑀯𑀼𑀢𑁆𑀢𑀁. 𑀢𑀁 𑀧𑀦 𑀭𑀚𑁆𑀚𑀼𑀓𑀁 𑀩𑀦𑁆𑀥𑀦𑁆𑀢𑁂𑀦 𑀏𑀓𑀕𑀼𑀡𑀫𑁂𑀯 𑀓𑀢𑁆𑀯𑀸 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺, 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀤𑀺𑀕𑀼𑀡𑀁 𑀓𑀢𑁆𑀯𑀸 𑀩𑀦𑁆𑀥𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀤𑀺𑀕𑀼𑀡𑀁 𑀧𑀦 𑀅𑀓𑀢𑁆𑀯𑀸 𑀲𑀢𑀯𑀸𑀭𑀫𑁆𑀧𑀺 𑀧𑀼𑀦𑀧𑁆𑀧𑀼𑀦𑀁 𑀆𑀯𑀺𑀚𑁆𑀛𑀺𑀢𑁆𑀯𑀸 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺, 𑀧𑀸𑀫𑀗𑁆𑀕𑀲𑀡𑁆𑀞𑀸𑀦𑀁 𑀧𑀦 𑀏𑀓𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀩𑀳𑀼𑀭𑀚𑁆𑀚𑀼𑀓𑁂 𑀏𑀓𑀢𑁄 𑀓𑀢𑁆𑀯𑀸 𑀏𑀓𑁂𑀦 𑀦𑀺𑀭𑀦𑁆𑀢𑀭𑀁 𑀯𑁂𑀞𑁂𑀢𑁆𑀯𑀸 𑀓𑀢𑀁 ‘‘𑀩𑀳𑀼𑀭𑀚𑁆𑀚𑀼𑀓’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀝𑁆𑀝𑀢𑀺. 𑀢𑀤𑀦𑀼𑀮𑁄𑀫𑀺𑀓𑀸𑀢𑀺 𑀢𑁂𑀲𑀁 𑀧𑀝𑁆𑀝𑀺𑀓𑀸𑀲𑀽𑀓𑀭𑀦𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀤𑁆𑀯𑁂 𑀇𑀫𑁂 𑀬𑀣𑀸𑀓𑁆𑀓𑀫𑀫𑀦𑀼𑀮𑁄𑀫𑀺𑀓𑀸.

𑁨𑁩𑁭-𑁮. 𑀧𑀝𑁆𑀝𑀺𑀓𑀸 𑀓𑀻𑀤𑀺𑀲𑀻 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀫𑀘𑁆𑀙𑀸’’𑀢𑀺𑀆𑀤𑀺. 𑀧𑀝𑁆𑀝𑀺𑀓𑀸 𑀫𑀘𑁆𑀙𑀓𑀡𑁆𑀝𑀓𑀔𑀚𑁆𑀚𑀽𑀭𑀺𑀧𑀢𑁆𑀢𑀸 𑀯𑀸 𑀫𑀝𑁆𑀞𑀸 𑀯𑀸 𑀮𑀩𑁆𑀪𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀡𑁆𑀝𑀓-𑀲𑀤𑁆𑀤𑁂𑀦 𑀧𑀢𑁆𑀢-𑀲𑀤𑁆𑀤𑁂𑀦 𑀘 𑀢𑀤𑀸𑀓𑀸𑀭𑁄 𑀯𑀼𑀘𑁆𑀘𑀢𑀺, 𑀉𑀧𑀘𑀸𑀭𑀢𑁄 𑀳𑀺 𑀫𑀘𑁆𑀙𑀸𑀦𑀁 𑀓𑀡𑁆𑀝𑀓𑀸𑀓𑀸𑀭𑁄 𑀘 𑀔𑀚𑁆𑀚𑀽𑀭𑀻𑀦𑀁 𑀧𑀢𑁆𑀢𑀸𑀓𑀸𑀭𑁄 𑀘 𑀏𑀢𑀺𑀲𑁆𑀲𑀸𑀢𑀺 𑀲𑀫𑀸𑀲𑁄. 𑀫𑀝𑁆𑀞𑀸𑀢𑀺 𑀧𑀓𑀢𑀺𑀯𑀻𑀢𑀸. 𑀝𑀻𑀓𑀸𑀬𑀁 𑀧𑀦 ‘‘𑀏𑀢𑁂 𑀫𑀘𑁆𑀙𑀓𑀡𑁆𑀝𑀓𑀸𑀤𑀬𑁄 𑀫𑀝𑁆𑀞𑀸 𑀯𑀺𑀓𑀸𑀭𑀭𑀳𑀺𑀢𑀸 𑀧𑀝𑁆𑀝𑀺𑀓𑀸 𑀘 𑀢𑀤𑀦𑁆𑀢𑁄𑀕𑀥𑀸𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀯𑀼𑀢𑁆𑀢𑀁. 𑀓𑀣𑀁 𑀢𑁂𑀲𑀫𑀦𑁆𑀢𑁄𑀕𑀥𑀢𑀸? 𑀬𑀢𑁄 𑀢𑀸𑀦𑀺𑀬𑁂𑀯 𑀧𑀝𑁆𑀝𑀺𑀓𑀸 𑀦𑀸𑀫𑀸𑀢𑀺. 𑀢𑀣𑀸 𑀘 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀓𑀢𑀺𑀯𑀻𑀢𑀸 𑀯𑀸 𑀫𑀘𑁆𑀙𑀓𑀡𑁆𑀝𑀓𑀯𑀸𑀬𑀺𑀫𑀸 𑀯𑀸 𑀧𑀝𑁆𑀝𑀺𑀓𑀸 𑀯𑀝𑁆𑀝𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁨𑁭𑁮). 𑀏𑀢𑁆𑀣 𑀧𑀦 𑀫𑀘𑁆𑀙𑀓𑀡𑁆𑀝𑀓𑁂𑀬𑁂𑀯 𑀔𑀚𑁆𑀚𑀽𑀭𑀺𑀧𑀢𑁆𑀢𑀁 𑀧𑀯𑀺𑀝𑁆𑀞𑀁. 𑀘𑀢𑀲𑁆𑀲𑁄𑀧𑀺 𑀤𑀲𑀸 𑀮𑀩𑁆𑀪𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀢𑀲𑁆𑀲𑁄𑀢𑀺 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀢𑁄 𑀊𑀦𑀸𑀧𑀺 𑀯𑀝𑁆𑀝𑀦𑁆𑀢𑀺. 𑀅𑀦𑁆𑀢𑁂𑀢𑀺 𑀓𑀸𑀬𑀩𑀦𑁆𑀥𑀦𑀲𑁆𑀲 𑀉𑀪𑀬𑀦𑁆𑀢𑁂 𑀤𑀺𑀕𑀼𑀡𑀲𑀼𑀢𑁆𑀢𑀓𑀁 𑀮𑀩𑁆𑀪𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀼𑀡𑁄 𑀩𑀦𑁆𑀥𑀦𑀪𑀽𑀢𑀁 𑀲𑀼𑀢𑁆𑀢𑀓𑀁 𑀕𑀼𑀡𑀲𑀼𑀢𑁆𑀢𑀓𑀁. ‘‘𑀕𑀼𑀡𑁄 𑀧𑀝𑀮𑀭𑀸𑀲𑀻𑀲𑀼, 𑀆𑀦𑀺𑀲𑀁𑀲𑁂 𑀘 𑀩𑀦𑁆𑀥𑀦𑁂’’𑀢𑀺 𑀳𑀺 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸. 𑀤𑁆𑀯𑀺𑀦𑁆𑀦𑀁 𑀕𑀼𑀡𑀲𑀼𑀢𑁆𑀢𑀓𑀸𑀦𑀁 𑀲𑀫𑀸𑀳𑀸𑀭𑁄 𑀤𑀺𑀕𑀼𑀡𑀲𑀼𑀢𑁆𑀢𑀓𑀁. 𑀢𑀁 𑀤𑀲𑀸𑀫𑀼𑀔𑀲𑁆𑀲 𑀣𑀺𑀭𑀪𑀸𑀯𑀸𑀬 𑀓𑁄𑀝𑁆𑀝𑁂𑀢𑀼𑀁 𑀯𑀝𑁆𑀝𑀢𑀺, 𑀦 𑀲𑁄𑀪𑀦𑀢𑁆𑀣𑀁. 𑀢𑁂𑀦𑀸𑀳 ‘‘𑀫𑀸𑀮𑀸𑀤𑀺’’𑀦𑁆𑀢𑀺𑀆𑀤𑀺.

𑀫𑀸𑀮𑀸𑀤𑀺𑀁 𑀓𑀓𑁆𑀓𑀝𑀘𑁆𑀙𑀸𑀤𑀺𑀁 𑀓𑀼𑀜𑁆𑀚𑀭𑀘𑁆𑀙𑀸𑀤𑀺𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀕𑀼𑀡𑀲𑀼𑀢𑁆𑀢𑀓𑀓𑁄𑀝𑁆𑀝𑀺𑀢𑀸 𑀧𑀝𑁆𑀝𑀺𑀓𑀸 𑀦 𑀓𑀧𑁆𑀧𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀫𑀸𑀮𑀸𑀤𑀺’’𑀦𑁆𑀢𑀺𑀆𑀤𑀻𑀲𑀼 𑀆𑀤𑀺-𑀲𑀤𑁆𑀤𑁂𑀦 𑀢𑀸𑀤𑀺𑀲𑀁 𑀬𑀁 𑀓𑀺𑀜𑁆𑀘𑀺 𑀯𑀺𑀓𑀸𑀭𑀭𑀽𑀧𑀁 𑀕𑀬𑁆𑀳𑀢𑀺. 𑀓𑀓𑁆𑀓𑀝𑀸𑀦𑀁 𑀯𑀺𑀬 𑀅𑀘𑁆𑀙𑀻𑀦𑀺, 𑀢𑀸𑀦𑀺 𑀆𑀤𑀻𑀦𑀺 𑀬𑀲𑁆𑀲𑀸𑀢𑀺 𑀲𑀫𑀸𑀲𑁄. 𑀢𑀣𑀸 𑀓𑀼𑀜𑁆𑀚𑀭𑀘𑁆𑀙𑀸𑀤𑀺𑀦𑁆𑀢𑀺.

𑁨𑁩𑁯. 𑀖𑀝𑀓𑀦𑁆𑀢𑀺 𑀖𑀝𑀓𑀸𑀓𑀸𑀭𑀯𑀝𑁆𑀝𑀮𑁂𑀔𑀸𑀭𑀽𑀧𑀁. 𑀫𑀓𑀭𑀫𑀼𑀔𑀸𑀤𑀺𑀦𑁆𑀢𑀺 𑀏𑀢𑁆𑀣 𑀫𑀓𑀭𑀫𑀼𑀔𑀁 𑀦𑀸𑀫 𑀫𑀓𑀭𑀫𑀼𑀔𑀲𑀡𑁆𑀞𑀸𑀦𑀁. 𑀩𑀺𑀦𑁆𑀤𑀼 𑀧𑀦 𑀆𑀕𑀫𑀯𑀲𑁂𑀦 𑀯𑀼𑀢𑁆𑀢𑁄. 𑀆𑀤𑀺-𑀲𑀤𑁆𑀤𑁂𑀦 𑀤𑁂𑀟𑁆𑀟𑀼𑀪𑀲𑀻𑀲𑀸𑀤𑀺𑀯𑀺𑀓𑀸𑀭𑀭𑀽𑀧𑀁 𑀬𑀁 𑀓𑀺𑀜𑁆𑀘𑀺 𑀲𑀗𑁆𑀕𑀬𑁆𑀳𑀢𑀺. 𑀤𑀲𑀸𑀫𑀼𑀔𑁂𑀢𑀺 𑀤𑀲𑀸𑀦𑀁 𑀫𑀼𑀔𑀪𑀽𑀢𑁂 𑀅𑀦𑁆𑀢𑁂 𑀏𑀢𑀸𑀦𑀺 𑀦 𑀓𑀧𑁆𑀧𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀥𑁂 𑀉𑀪𑀦𑁆𑀢𑁂 𑀖𑀝𑀓𑀸 𑀮𑁂𑀔𑀸 𑀅𑀜𑁆𑀜𑀁 𑀘𑀺𑀢𑁆𑀢𑀓𑀜𑁆𑀘 𑀦 𑀓𑀧𑁆𑀧𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀖𑀝𑀓𑀸𑀢𑀺 𑀖𑀝𑀓𑀢𑁄. 𑀮𑁂𑀔𑀸𑀢𑀺 𑀮𑁂𑀔𑀸𑀬. 𑀧𑀜𑁆𑀘𑀫𑀺𑀬𑀸 𑀮𑁄𑀧𑁄. 𑀯𑀺𑀥𑁂𑀢𑀺 𑀓𑀸𑀬𑀩𑀦𑁆𑀥𑀦𑀲𑁆𑀲 𑀧𑀸𑀲𑀦𑁆𑀢𑁂 𑀤𑀲𑀸𑀫𑀽𑀮𑁂 𑀢𑀲𑁆𑀲 𑀣𑀺𑀭𑀪𑀸𑀯𑀢𑁆𑀣𑀁 𑀓𑀢𑁆𑀢𑀩𑁆𑀩𑁂 𑀤𑀦𑁆𑀢𑀯𑀺𑀲𑀸𑀡𑀸𑀤𑀺𑀫𑀬𑁂 𑀯𑀺𑀥𑁂.

𑁨𑁪𑁦. 𑀤𑁂𑀟𑁆𑀟𑀼𑀪𑀓𑀦𑁆𑀢𑀺 𑀉𑀤𑀓𑀲𑀧𑁆𑀧𑀲𑀻𑀲𑀲𑀤𑀺𑀲𑀁. 𑀫𑀼𑀭𑀚𑀦𑁆𑀢𑀺 𑀦𑀸𑀦𑀸𑀯𑀡𑁆𑀡𑁂𑀳𑀺 𑀲𑀼𑀢𑁆𑀢𑁂𑀳𑀺 𑀫𑀼𑀭𑀚𑀯𑀝𑁆𑀝𑀺𑀲𑀡𑁆𑀞𑀸𑀦𑀁 𑀯𑁂𑀞𑁂𑀢𑁆𑀯𑀸 𑀓𑀢𑀁. 𑀝𑀻𑀓𑀸𑀬𑀁 𑀧𑀦 ‘‘𑀫𑀼𑀭𑀚𑀦𑁆𑀢𑀺 𑀩𑀳𑀼𑀭𑀚𑁆𑀚𑀼𑀓𑁂 𑀏𑀓𑀢𑁄 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀏𑀓𑀸𑀬 𑀭𑀚𑁆𑀚𑀼𑀬𑀸 𑀧𑀮𑀺𑀯𑁂𑀞𑁂𑀢𑁆𑀯𑀸 𑀓𑀢𑀭𑀚𑁆𑀚𑀽’’𑀢𑀺 𑀯𑀼𑀢𑁆𑀢𑀁, 𑀢𑀁 ‘‘𑀩𑀳𑀼𑀭𑀚𑁆𑀚𑀼𑀓𑁂 𑀏𑀓𑀢𑁄 𑀓𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀢𑀺. 𑀫𑀤𑁆𑀤𑀯𑀻𑀡𑀦𑁆𑀢𑀺 𑀧𑀸𑀫𑀗𑁆𑀕𑀲𑀡𑁆𑀞𑀸𑀦𑀁. 𑀓𑀮𑀸𑀩𑀼𑀓𑀦𑁆𑀢𑀺 𑀩𑀳𑀼𑀭𑀚𑁆𑀚𑀼𑀓𑀁. 𑀢𑁂𑀲𑀁 ‘‘𑀦 𑀓𑀧𑁆𑀧𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀤𑁆𑀯𑁂 𑀫𑀚𑁆𑀛𑀺𑀫𑀸𑀢𑀺 𑀫𑀚𑁆𑀛𑁂 𑀪𑀯𑀸 𑀫𑀼𑀭𑀚𑀫𑀤𑁆𑀤𑀯𑀻𑀡𑀲𑀗𑁆𑀔𑀸𑀢𑀸 𑀤𑁆𑀯𑁂.

𑁨𑁪𑁧. 𑀕𑀡𑁆𑀞𑀺𑀬𑁄 𑀘𑀸𑀧𑀻𑀢𑀺 𑀘𑀻𑀯𑀭𑀲𑁆𑀲 𑀕𑀡𑁆𑀞𑀺𑀬𑁄 𑀘𑀸𑀧𑀺. 𑀢𑀫𑁆𑀫𑀬𑀸𑀢𑀺 𑀢𑁂𑀳𑀺 𑀯𑁂𑀴𑀼𑀆𑀤𑀻𑀳𑀺 𑀦𑀺𑀩𑁆𑀩𑀢𑁆𑀢𑀸. 𑀧𑀲𑀗𑁆𑀕𑁂𑀦 𑀧𑀦𑁂𑀢𑀁 𑀯𑀼𑀢𑁆𑀢𑀦𑁆𑀢𑀺.

𑀓𑀸𑀬𑀩𑀦𑁆𑀥𑀦𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀫𑀗𑁆𑀕𑀮𑀧𑁆𑀧𑀲𑀸𑀤𑀦𑀺𑀬𑀸 𑀦𑀸𑀫 𑀝𑀻𑀓𑀸𑀬

𑀧𑀞𑀫𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.