𑁩𑁨. 𑀦𑀺𑀲𑁆𑀲𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁩𑁦. 𑀩𑁆𑀬𑀢𑁆𑀢𑀲𑁆𑀲𑀸𑀢𑀺 ‘‘𑀓𑀸𑀭𑀺𑀬’’𑀦𑁆𑀢𑀺 𑀓𑀺𑀢𑀓𑀬𑁄𑀕𑁂 𑀓𑀢𑁆𑀢𑀭𑀺 𑀙𑀝𑁆𑀞𑀻. 𑀩𑁆𑀬𑀢𑁆𑀢𑁄 𑀘 𑀦𑀸𑀫 ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁, 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀉𑀪𑀬𑀸𑀦𑀺 𑀔𑁄 𑀧𑀦𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀸𑀦𑀺 𑀯𑀺𑀢𑁆𑀣𑀸𑀭𑁂𑀦 𑀲𑁆𑀯𑀸𑀕𑀢𑀸𑀦𑀺 𑀳𑁄𑀦𑁆𑀢𑀺 𑀲𑀼𑀯𑀺𑀪𑀢𑁆𑀢𑀸𑀦𑀺 𑀲𑀼𑀧𑁆𑀧𑀯𑀢𑁆𑀢𑀻𑀦𑀺 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀲𑀼𑀢𑁆𑀢𑀲𑁄 𑀅𑀦𑀼𑀩𑁆𑀬𑀜𑁆𑀚𑀦𑀲𑁄. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁧𑁦𑁩) 𑀏𑀯𑀁 𑀯𑀼𑀢𑁆𑀢𑀩𑁆𑀬𑀢𑁆𑀢𑁄 𑀘 𑀩𑀳𑀼𑀲𑁆𑀲𑀼𑀢𑀩𑁆𑀬𑀢𑁆𑀢𑁄 𑀘 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀲𑀼𑀯𑀺𑀪𑀢𑁆𑀢𑀸𑀦𑀻𑀢𑀺 𑀲𑀼𑀝𑁆𑀞𑀼 𑀯𑀺𑀪𑀢𑁆𑀢𑀸𑀦𑀺 𑀧𑀤𑀧𑀘𑁆𑀘𑀸𑀪𑀝𑁆𑀞𑀲𑀗𑁆𑀓𑀭𑀤𑁄𑀲𑀯𑀺𑀭𑀳𑀺𑀢𑀸𑀦𑀺. 𑀲𑀼𑀧𑁆𑀧𑀯𑀢𑁆𑀢𑀻𑀦𑀻𑀢𑀺 𑀧𑀕𑀼𑀡𑀸𑀦𑀺 𑀯𑀸𑀘𑀼𑀕𑁆𑀕𑀢𑀸𑀦𑀺. 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀲𑀼𑀢𑁆𑀢𑀲𑁄𑀢𑀺 𑀔𑀦𑁆𑀥𑀓𑀧𑀭𑀺𑀯𑀸𑀭𑀢𑁄 𑀆𑀳𑀭𑀺𑀢𑀩𑁆𑀩𑀲𑀼𑀢𑁆𑀢𑀯𑀲𑁂𑀦 𑀲𑀼𑀝𑁆𑀞𑀼 𑀯𑀺𑀦𑀺𑀘𑁆𑀙𑀺𑀢𑀸𑀦𑀺. 𑀅𑀦𑀼𑀩𑁆𑀬𑀜𑁆𑀚𑀦𑀲𑁄𑀢𑀺 𑀅𑀓𑁆𑀔𑀭𑀧𑀤𑀧𑀸𑀭𑀺𑀧𑀽𑀭𑀺𑀬𑀸 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀅𑀓𑁆𑀔𑀡𑁆𑀟𑀸𑀦𑀺 𑀅𑀯𑀺𑀧𑀭𑀻𑀢𑀓𑁆𑀔𑀭𑀸𑀦𑀺. 𑀏𑀢𑁂𑀦 𑀅𑀝𑁆𑀞𑀓𑀣𑀸 𑀤𑀻𑀧𑀺𑀢𑀸. 𑀅𑀝𑁆𑀞𑀓𑀣𑀸𑀢𑁄 𑀳𑀺 𑀏𑀲 𑀯𑀺𑀦𑀺𑀘𑁆𑀙𑀬𑁄 𑀳𑁄𑀢𑀻𑀢𑀺. 𑀩𑀳𑀼𑀲𑁆𑀲𑀼𑀢𑀩𑁆𑀬𑀢𑁆𑀢𑁄 𑀧𑀦 𑀬𑁂𑀦 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀤𑁆𑀯𑁂 𑀫𑀸𑀢𑀺𑀓𑀸 𑀧𑀕𑀼𑀡𑀸 𑀯𑀸𑀘𑀼𑀕𑁆𑀕𑀢𑀸, 𑀧𑀓𑁆𑀔𑀤𑀺𑀯𑀲𑁂𑀲𑀼 𑀥𑀫𑁆𑀫𑀲𑀯𑀦𑀢𑁆𑀣𑀸𑀬 𑀲𑀼𑀢𑁆𑀢𑀦𑁆𑀢𑀢𑁄 𑀘𑀢𑁆𑀢𑀸𑀭𑁄 𑀪𑀸𑀡𑀯𑀸𑀭𑀸, 𑀲𑀫𑁆𑀧𑀢𑁆𑀢𑀸𑀦𑀁 𑀧𑀭𑀺𑀲𑀸𑀦𑀁 𑀧𑀭𑀺𑀓𑀣𑀦𑀢𑁆𑀣𑀸𑀬 𑀅𑀦𑁆𑀥𑀓𑀯𑀺𑀦𑁆𑀤𑀫𑀳𑀸𑀭𑀸𑀳𑀼𑀮𑁄𑀯𑀸𑀤𑀅𑀫𑁆𑀩𑀝𑁆𑀞𑀲𑀤𑀺𑀲𑁄 𑀏𑀓𑁄 𑀓𑀣𑀸𑀫𑀕𑁆𑀕𑁄, 𑀲𑀗𑁆𑀖𑀪𑀢𑁆𑀢𑀫𑀗𑁆𑀕𑀮𑀸𑀫𑀗𑁆𑀕𑀮𑁂𑀲𑀼 𑀅𑀦𑀼𑀫𑁄𑀤𑀦𑀢𑁆𑀣𑀸𑀬 𑀢𑀺𑀲𑁆𑀲𑁄 𑀅𑀦𑀼𑀫𑁄𑀤𑀦𑀸, 𑀉𑀧𑁄𑀲𑀣𑀧𑁆𑀧𑀯𑀸𑀭𑀡𑀸𑀤𑀺𑀚𑀸𑀦𑀦𑀢𑁆𑀣𑀁 𑀓𑀫𑁆𑀫𑀸𑀓𑀫𑁆𑀫𑀯𑀺𑀦𑀺𑀘𑁆𑀙𑀬𑁄, 𑀲𑀫𑀡𑀥𑀫𑁆𑀫𑀓𑀭𑀡𑀢𑁆𑀣𑀁 𑀲𑀫𑀸𑀥𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀧𑀭𑀺𑀬𑁄𑀲𑀸𑀦𑀫𑁂𑀓𑀁 𑀓𑀫𑁆𑀫𑀝𑁆𑀞𑀸𑀦𑀁 𑀏𑀢𑁆𑀢𑀓𑀁 𑀉𑀕𑁆𑀕𑀳𑀺𑀢𑀁, 𑀲𑁆𑀯𑀸𑀬𑀁 𑀯𑀼𑀘𑁆𑀘𑀢𑀺. 𑀦𑀢𑁆𑀣𑀺 𑀦𑀺𑀲𑁆𑀲𑀸𑀬 𑀓𑀸𑀭𑀺𑀬𑀦𑁆𑀢𑀺 𑀆𑀘𑀭𑀺𑀬𑀸𑀤𑀺𑀁 𑀦𑀺𑀲𑁆𑀲𑀸𑀬 𑀯𑀸𑀲𑁂𑀦 𑀓𑀢𑁆𑀢𑀩𑁆𑀩𑀁 𑀦𑀢𑁆𑀣𑀺. ‘‘𑀦𑀺𑀲𑁆𑀲𑀬𑀓𑀸𑀭𑀺𑀬’’𑀦𑁆𑀢𑀺 𑀯𑀸 𑀧𑀸𑀞𑁄, 𑀦𑀺𑀲𑁆𑀲𑀬𑁂𑀦 𑀓𑀸𑀭𑀺𑀬𑀦𑁆𑀢𑀺 𑀲𑀫𑀸𑀲𑁄. 𑀚𑀻𑀯𑀲𑁆𑀲 𑀬𑀢𑁆𑀢𑀓𑁄 𑀧𑀭𑀺𑀘𑁆𑀙𑁂𑀤𑁄 𑀬𑀸𑀯𑀚𑀻𑀯𑀁.

𑁨𑁩𑁧. 𑀢𑁂𑀦 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁂𑀦 𑀏𑀯𑀁 𑀦𑀺𑀲𑁆𑀲𑀬𑁄 𑀕𑀳𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀁𑀲’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀓𑀁𑀲𑀦𑁆𑀢𑀺 𑀏𑀓𑁄 𑀅𑀁𑀲𑁄 𑀅𑀲𑁆𑀲 𑀘𑀻𑀯𑀭𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁 𑀯𑀸 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀉𑀧𑀬𑁄𑀕𑀯𑀘𑀦𑀁, 𑀏𑀓𑀲𑁆𑀫𑀺𑀁 𑀅𑀁𑀲𑁂𑀢𑀺 𑀅𑀢𑁆𑀣𑁄. 𑀅𑀜𑁆𑀚𑀮𑀺 𑀓𑀭𑀧𑀼𑀝𑁄. 𑀬𑀸𑀯𑀢𑀢𑀺𑀬𑀓𑀁 𑀯𑀤𑁂𑀢𑀺 𑀉𑀧𑀲𑀫𑁆𑀧𑀤𑀸𑀬 𑀲𑀝𑁆𑀞𑀺𑀯𑀲𑁆𑀲𑁂𑀦 𑀲𑀢𑁆𑀢𑀢𑀺𑀯𑀲𑁆𑀲𑁂𑀦 𑀯𑀸𑀧𑀺 𑀩𑁆𑀬𑀢𑁆𑀢𑀲𑁆𑀲 𑀦𑀯𑀓𑀲𑁆𑀲 𑀲𑀦𑁆𑀢𑀺𑀓𑁂 𑀬𑀸𑀯𑀢𑀢𑀺𑀬𑀓𑀁 𑀯𑀘𑀦𑀁 𑀓𑀭𑁂𑀬𑁆𑀬. 𑀬𑀸𑀯𑀢𑀢𑀺𑀬𑁄 𑀯𑀸𑀭𑁄 𑀅𑀲𑁆𑀲𑀸𑀢𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀲𑀫𑀸𑀲𑁄. 𑀆𑀬𑀲𑁆𑀫𑀢𑁄𑀢𑀺 𑀆𑀬𑀲𑁆𑀫𑀦𑁆𑀢𑀁. 𑀯𑀘𑁆𑀙𑀸𑀫𑀻𑀢𑀺 𑀯𑀲𑀸𑀫𑀺. 𑀉𑀧𑀚𑁆𑀛𑀁 𑀕𑀡𑁆𑀳𑀦𑁆𑀢𑁂𑀦𑀸𑀧𑀺 ‘‘𑀉𑀧𑀚𑁆𑀛𑀸𑀬𑁄 𑀫𑁂, 𑀪𑀦𑁆𑀢𑁂, 𑀳𑁄𑀳𑀻’’𑀢𑀺 𑀕𑀳𑁂𑀢𑀩𑁆𑀩𑀁. 𑀢𑀁 𑀧𑀦 ‘‘𑀆𑀘𑀭𑀺𑀬𑁄’’𑀢𑀺 𑀏𑀢𑁆𑀣 ‘‘𑀉𑀧𑀚𑁆𑀛𑀸𑀬𑁄’’𑀢𑀺 𑀯𑀘𑀦𑀁 𑀯𑀺𑀲𑁂𑀲𑁄𑀢𑀺 𑀏𑀢𑁆𑀣 𑀯𑀸𑀘𑀸𑀪𑁂𑀤𑀢𑁄 𑀦 𑀯𑀺𑀲𑀼𑀁 𑀯𑀼𑀢𑁆𑀢𑀁. 𑀦 𑀓𑁂𑀯𑀮𑀫𑁂𑀢𑁆𑀣 𑀦𑀺𑀲𑁆𑀲𑀬𑀼𑀧𑀚𑁆𑀛𑀸𑀬𑀕𑀳𑀡𑁂, 𑀕𑀸𑀫𑀧𑁆𑀧𑀯𑁂𑀲𑀦𑀸𑀤𑀻𑀲𑀼𑀧𑀺 𑀏𑀯𑀫𑁂𑀯 𑀓𑀢𑁆𑀯𑀸 ‘‘𑀅𑀳𑀁 𑀆𑀯𑀼𑀲𑁄’’𑀢𑀺 𑀯𑀸 ‘‘𑀪𑀦𑁆𑀢𑁂’’𑀢𑀺 𑀯𑀸 𑀯𑀢𑁆𑀯𑀸 ‘‘𑀕𑀸𑀫𑀧𑁆𑀧𑀯𑁂𑀲𑀦𑀁 𑀆𑀧𑀼𑀘𑁆𑀙𑀸𑀫𑀻’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀁.

𑁨𑁩𑁨. 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀤𑀲𑁆𑀲𑁂𑀢𑀺 ‘‘𑀧𑀓𑁆𑀓𑀦𑁆𑀢𑁂’’𑀢𑀺𑀆𑀤𑀺𑀦𑀸. 𑀧𑀓𑁆𑀓𑀦𑁆𑀢𑁂𑀢𑀺 𑀉𑀧𑀚𑁆𑀛𑀸𑀬𑁂 𑀆𑀘𑀭𑀺𑀬𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂 𑀅𑀦𑁆𑀢𑁂𑀯𑀸𑀲𑀺𑀓𑁂 𑀘 𑀕𑀸𑀫𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀆𑀧𑀼𑀘𑁆𑀙𑀺𑀢𑁆𑀯𑀸 𑀯𑀸 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀯𑀸 𑀕𑀢𑁂. 𑀢𑁂𑀲𑀼 𑀬𑁂𑀦 𑀓𑁂𑀦𑀘𑀺 ‘‘𑀅𑀲𑀼𑀓𑀁 𑀦𑀸𑀫 𑀕𑀸𑀫𑀁 𑀕𑀘𑁆𑀙𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀢𑁂𑀲𑀼𑀬𑁂𑀯 𑀬𑁂𑀦 𑀓𑁂𑀦𑀘𑀺 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁂𑀧𑀺 𑀢𑀁 𑀢𑀁 𑀦𑀺𑀬𑀫𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀓𑁆𑀓𑀦𑁆𑀢𑁂𑀧𑀺 𑀅𑀦𑀸𑀧𑀼𑀘𑁆𑀙𑀸 𑀧𑀦 𑀉𑀧𑀘𑀸𑀭𑀲𑀻𑀫𑀸𑀢𑀺𑀓𑁆𑀓𑀫𑁂𑀦 𑀧𑀓𑁆𑀓𑀦𑁆𑀢𑁂𑀧𑀺 𑀦𑀺𑀲𑁆𑀲𑀬𑁄 𑀲𑀫𑁆𑀫𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀧𑀓𑁆𑀔𑀲𑀗𑁆𑀓𑀦𑁆𑀢𑁂𑀢𑀺 𑀢𑀺𑀢𑁆𑀣𑀺𑀬𑀧𑀓𑁆𑀔𑀲𑀗𑁆𑀓𑀦𑁆𑀢𑁂 𑀘𑀸𑀧𑀺 𑀯𑀺𑀩𑁆𑀪𑀦𑁆𑀢𑁂 𑀘𑀸𑀧𑀺 𑀫𑀭𑀡𑁂𑀦 𑀘 𑀢𑀗𑁆𑀔𑀡𑀜𑁆𑀜𑁂𑀯 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀆𑀡𑀢𑁆𑀢𑀺 𑀦𑀸𑀫 ‘‘𑀧𑀡𑀸𑀫𑁂𑀫𑀺 𑀢’’𑀦𑁆𑀢𑀺 𑀯𑀸 ‘‘𑀫𑀸 𑀇𑀥 𑀧𑀯𑀺𑀲𑀸’’𑀢𑀺𑀆𑀤𑀺𑀓𑀸 𑀦𑀺𑀲𑁆𑀲𑀬𑀧𑁆𑀧𑀡𑀸𑀫𑀦𑀸. 𑀢𑀸𑀬 𑀧𑀡𑀸𑀫𑀺𑀢𑁂𑀦 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀔𑀫𑀸𑀧𑁂𑀢𑀩𑁆𑀩𑀸. 𑀅𑀔𑀫𑀦𑁆𑀢𑁂𑀲𑀼 𑀤𑀡𑁆𑀟𑀓𑀫𑁆𑀫𑀁 𑀓𑀢𑁆𑀯𑀸 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀫𑀳𑀸𑀣𑁂𑀭𑁂 𑀕𑀳𑁂𑀢𑁆𑀯𑀸𑀧𑀺 𑀲𑀸𑀫𑀦𑁆𑀢𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸𑀧𑀺 𑀔𑀫𑀸𑀧𑁂𑀢𑀩𑁆𑀩𑀸. 𑀦 𑀔𑀫𑀦𑁆𑀢𑀺 𑀘𑁂, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀲𑀪𑀸𑀕𑀸𑀦𑀁 𑀲𑀦𑁆𑀢𑀺𑀓𑁂 𑀯𑀲𑀺𑀢𑀩𑁆𑀩𑀁. 𑀬𑁂𑀦 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀦 𑀲𑀓𑁆𑀓𑀸 𑀳𑁄𑀢𑀺 𑀢𑀢𑁆𑀭 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀲𑀪𑀸𑀕𑀸𑀦𑀁 𑀲𑀦𑁆𑀢𑀺𑀓𑁂 𑀯𑀲𑀺𑀢𑀼𑀁, 𑀢𑀁𑀬𑁂𑀯 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 𑀅𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑁆𑀲𑀬𑀁 𑀕𑀳𑁂𑀢𑁆𑀯𑀸 𑀯𑀲𑀺𑀢𑀩𑁆𑀩𑀁. 𑀢𑀢𑁆𑀣 ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀅𑀧𑁆𑀧𑀡𑀸𑀫𑁂𑀦𑁆𑀢𑁄 𑀉𑀧𑀚𑁆𑀛𑀸𑀬𑁄 𑀲𑀸𑀢𑀺𑀲𑀸𑀭𑁄 𑀳𑁄𑀢𑀺, 𑀧𑀡𑀸𑀫𑁂𑀦𑁆𑀢𑁄 𑀅𑀦𑀢𑀺𑀲𑀸𑀭𑁄 𑀳𑁄𑀢𑀺. 𑀉𑀧𑀚𑁆𑀛𑀸𑀬𑀫𑁆𑀳𑀺 𑀦𑀸𑀥𑀺𑀫𑀢𑁆𑀢𑀁 𑀧𑁂𑀫𑀁 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑁄 𑀧𑀲𑀸𑀤𑁄 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑀸 𑀳𑀺𑀭𑀻 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑁄 𑀕𑀸𑀭𑀯𑁄 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑀸 𑀪𑀸𑀯𑀦𑀸 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺…𑀧𑁂… 𑀳𑁄𑀢𑀺 (𑀫𑀳𑀸𑀯. 𑁬𑁮). 𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀅𑀦𑁆𑀢𑁂𑀯𑀸𑀲𑀺𑀓𑀁 𑀅𑀧𑁆𑀧𑀡𑀸𑀫𑁂𑀦𑁆𑀢𑁄 𑀆𑀘𑀭𑀺𑀬𑁄…𑀧𑁂… 𑀳𑁄𑀢𑀻’’𑀢𑀺 (𑀫𑀳𑀸𑀯. 𑁮𑁧) 𑀯𑀼𑀢𑁆𑀢𑀢𑁆𑀢𑀸 𑀧𑀦 𑀅𑀲𑀫𑁆𑀫𑀸𑀯𑀢𑁆𑀢𑀦𑁆𑀢𑁂 𑀅𑀦𑁆𑀢𑁂𑀯𑀸𑀲𑀺𑀓𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂 𑀅𑀧𑁆𑀧𑀡𑀸𑀫𑁂𑀦𑁆𑀢𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀪𑀸𑀯𑀦𑀸𑀢𑀺 𑀫𑁂𑀢𑁆𑀢𑀸𑀪𑀸𑀯𑀦𑀸. 𑀉𑀧𑀚𑁆𑀛𑀸𑀬𑀲𑀫𑁄𑀥𑀸𑀦𑀁 𑀧𑀦 𑀢𑀲𑁆𑀲 𑀤𑀲𑁆𑀲𑀦𑀲𑀯𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁.

𑁨𑁩𑁩. 𑀅𑀮𑀚𑁆𑀚𑀺𑀦𑁆𑀢𑀺 𑁋

‘‘𑀲𑀜𑁆𑀘𑀺𑀘𑁆𑀘 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺;

𑀆𑀧𑀢𑁆𑀢𑀺𑀁 𑀧𑀭𑀺𑀕𑀽𑀳𑀢𑀺;

𑀅𑀕𑀢𑀺𑀕𑀫𑀦𑀜𑁆𑀘 𑀕𑀘𑁆𑀙𑀢𑀺;

𑀏𑀤𑀺𑀲𑁄 𑀯𑀼𑀘𑁆𑀘𑀢𑀺 𑀅𑀮𑀚𑁆𑀚𑀺𑀧𑀼𑀕𑁆𑀕𑀮𑁄’’𑀢𑀺. (𑀧𑀭𑀺. 𑁩𑁫𑁯) 𑁋

𑀏𑀯𑀁 𑀯𑀼𑀢𑁆𑀢𑀮𑀓𑁆𑀔𑀡𑀁 𑀅𑀮𑀚𑁆𑀚𑀺𑀁. 𑀦𑀺𑀲𑁆𑀲𑀬𑀁 𑀤𑁂𑀦𑁆𑀢𑁂𑀦𑀸𑀧𑀺 𑀮𑀚𑁆𑀚𑀺𑀦𑁄𑀬𑁂𑀯 𑀤𑀸𑀢𑀩𑁆𑀩𑀁. ‘‘𑀦 𑀪𑀺𑀓𑁆𑀔𑀯𑁂 𑀅𑀮𑀚𑁆𑀚𑀻𑀦𑀁 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄. 𑀬𑁄 𑀤𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁧𑁨𑁦) 𑀳𑀺 𑀯𑀼𑀢𑁆𑀢𑀁. 𑀅𑀤𑀺𑀝𑁆𑀞𑀧𑀼𑀩𑁆𑀩𑀲𑁆𑀲 𑀓𑀢𑀺𑀧𑀸𑀳𑀁 𑀆𑀘𑀸𑀭𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀅𑀧𑀼𑀩𑁆𑀩𑀦𑁆𑀢𑀺 𑀏𑀢𑁆𑀣 𑀲𑀫𑁆𑀩𑀦𑁆𑀥𑀺𑀲𑀤𑁆𑀤𑀢𑁆𑀢𑀸 𑀧𑀼𑀩𑁆𑀩-𑀲𑀤𑁆𑀤𑁂𑀦 𑀧𑀼𑀩𑁆𑀩𑀯𑀸𑀲𑁄 𑀕𑀳𑀺𑀢𑁄, 𑀦𑀢𑁆𑀣𑀺 𑀧𑀼𑀩𑁆𑀩𑁄 𑀅𑀲𑁆𑀲𑀸𑀢𑀺 𑀅𑀧𑀼𑀩𑁆𑀩𑀁, 𑀦𑀯𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸 𑀧𑀭𑀺𑀫𑀸𑀡𑀫𑁂𑀢𑁂𑀲𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀏𑀢𑁆𑀣 𑀧𑀦 𑀧𑀭𑀺𑀫𑀸𑀡-𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂𑀦 𑀲𑀗𑁆𑀔𑁆𑀬𑁂𑀬𑁆𑀬𑀯𑀸𑀘𑀺𑀦𑁄𑀧𑀺𑀢𑁂 𑀲𑀗𑁆𑀔𑁆𑀬𑀸𑀫𑀢𑁆𑀢𑀯𑀸𑀘𑀺𑀦𑁄 𑀳𑁄𑀦𑁆𑀢𑀻𑀢𑀺 𑀘𑀢𑀼𑀧𑀜𑁆𑀘𑀲𑀗𑁆𑀔𑁆𑀬𑀸𑀧𑀭𑀺𑀫𑀸𑀡𑀫𑁂𑀯 𑀲𑀗𑁆𑀔𑁆𑀬𑁂𑀬𑁆𑀬𑀫𑀸𑀳, 𑀢𑀲𑁆𑀫𑀸 𑀯𑀺𑀕𑁆𑀕𑀳𑀧𑀤𑀢𑁆𑀣𑁂𑀳𑀺 𑀪𑀺𑀦𑁆𑀦𑁄 𑀅𑀜𑁆𑀜𑀧𑀤𑀢𑁆𑀣𑁄 𑀲𑀫𑁆𑀪𑀯𑀢𑀻𑀢𑀺 𑀲𑀫𑀸𑀲𑁄. 𑀯𑀸-𑀲𑀤𑁆𑀤𑀲𑁆𑀲 𑀬𑁄 𑀯𑀺𑀓𑀧𑁆𑀧𑀢𑁆𑀣𑁄, 𑀢𑀢𑁆𑀣 𑀘𑀸𑀬𑀁 𑀲𑀫𑀸𑀲𑁄, 𑀘𑀢𑁆𑀢𑀸𑀭𑀺 𑀯𑀸 𑀧𑀜𑁆𑀘 𑀯𑀸, 𑀘𑀢𑀼𑀧𑀜𑁆𑀘 𑀅𑀳𑀸𑀦𑀺, 𑀢𑁂𑀲𑀁 𑀅𑀳𑀸𑀦𑀁 𑀲𑀫𑀸𑀳𑀸𑀭𑁄 𑀘𑀢𑀼𑀧𑀜𑁆𑀘𑀸𑀳𑀁. 𑀪𑀺𑀓𑁆𑀔𑀼𑀲𑀪𑀸𑀕𑀢𑀦𑁆𑀢𑀺 𑀲𑀫𑀸𑀦𑁄 𑀪𑀸𑀕𑁄 𑀮𑀚𑁆𑀚𑀺𑀢𑀸𑀲𑀗𑁆𑀔𑀸𑀢𑁄 𑀓𑁄𑀝𑁆𑀞𑀸𑀲𑁄 𑀬𑁂𑀲𑀁, 𑀪𑀺𑀓𑁆𑀔𑀽𑀳𑀺 𑀲𑀪𑀸𑀕𑀸, 𑀢𑁂𑀲𑀁 𑀪𑀸𑀯𑁄 𑀪𑀺𑀓𑁆𑀔𑀼𑀲𑀪𑀸𑀕𑀢𑀸, 𑀢𑀁, 𑀧𑁂𑀲𑀮𑀪𑀸𑀯𑀦𑁆𑀢𑀺 𑀅𑀢𑁆𑀣𑁄. ‘‘𑀣𑁂𑀭𑁄 𑀮𑀚𑁆𑀚𑀻’’𑀢𑀺 𑀚𑀸𑀦𑀦𑁆𑀢𑁂𑀦 𑀧𑀦 𑀧𑀓𑀢𑀺𑀬𑀸 𑀦𑀺𑀲𑁆𑀲𑀬𑀤𑀸𑀦𑀝𑁆𑀞𑀸𑀦𑀁 𑀕𑀢𑁂𑀦 𑀘 𑀢𑀤𑀳𑁂𑀯 𑀕𑀳𑁂𑀢𑀩𑁆𑀩𑁄, 𑀏𑀓𑀤𑀺𑀯𑀲𑀫𑁆𑀧𑀺 𑀧𑀭𑀺𑀳𑀸𑀭𑁄 𑀦𑀢𑁆𑀣𑀺. 𑀲𑀘𑁂 ‘‘𑀑𑀓𑀸𑀲𑁂 𑀅𑀮𑀪𑀦𑁆𑀢𑁂 𑀧𑀘𑁆𑀘𑀽𑀲𑀲𑀫𑀬𑁂 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀲𑀬𑀢𑀺, 𑀅𑀭𑀼𑀡𑀁 𑀉𑀕𑁆𑀕𑀢𑀫𑁆𑀧𑀺 𑀦 𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺. 𑀮𑀤𑁆𑀥𑀧𑀭𑀺𑀳𑀸𑀭𑁂𑀦𑀸𑀧𑀺 𑀯𑀲𑀺𑀢𑀼𑀁 𑀯𑀝𑁆𑀝𑀢𑀻𑀢𑀺.

𑁨𑁩𑁪. ‘‘𑀮𑀩𑁆𑀪𑀢𑀻’’𑀢𑀺 𑀓𑀫𑁆𑀫𑀦𑀺 𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀅𑀯𑀼𑀢𑁆𑀢𑀓𑀢𑁆𑀢𑀸𑀢𑀺 ‘‘𑀅𑀤𑁆𑀥𑀺𑀓𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀓𑀢𑁆𑀢𑀭𑀺 𑀲𑀸𑀫𑀺𑀯𑀘𑀦𑀁, ‘‘𑀅𑀤𑁆𑀥𑀺𑀓𑁂𑀦𑀸’’ 𑀢𑀺𑀆𑀤𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀲𑀮𑁆𑀮𑀓𑁆𑀔𑁂𑀦𑁆𑀢𑁂𑀦𑀸’’𑀢𑀺 𑀧𑀦 𑀲𑀭𑀽𑀧𑁂𑀦𑁂𑀯 𑀦𑀺𑀤𑁆𑀤𑀺𑀝𑁆𑀞𑀁. 𑀯𑀲𑀺𑀢𑀼𑀦𑁆𑀢𑀺 𑀯𑀼𑀢𑁆𑀢𑀓𑀫𑁆𑀫𑀁. 𑀪𑀸𑀯𑁂 𑀳𑀺 𑀢𑀼𑀁-𑀧𑀘𑁆𑀘𑀬𑁄, 𑀯𑀸𑀲𑁄𑀢𑀺 𑀅𑀢𑁆𑀣𑁄. 𑀬𑀸𑀘𑀺𑀢𑀲𑁆𑀲𑀸𑀢𑀺 ‘‘𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀲𑁆𑀲 𑀘𑀸’’𑀢𑀺 𑀏𑀢𑁆𑀣 𑀯𑀺𑀲𑁂𑀲𑀦𑀁. 𑀲𑀘𑁂 𑀧𑀦 ‘‘𑀬𑀸𑀘𑀸𑀳𑀺 𑀫’’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁄𑀧𑀺 𑀕𑀺𑀮𑀸𑀦𑁄 𑀫𑀸𑀦𑁂𑀦 𑀦 𑀬𑀸𑀘𑀢𑀺, 𑀕𑀦𑁆𑀢𑀩𑁆𑀩𑀁. 𑀅𑀭𑀜𑁆𑀜𑁂 𑀯𑀸 𑀲𑀮𑁆𑀮𑀓𑁆𑀔𑁂𑀦𑁆𑀢𑁂𑀦 𑀨𑀸𑀲𑀼𑀓𑀦𑁆𑀢𑀺 𑀬𑀢𑁆𑀣 𑀯𑀲𑀦𑁆𑀢𑀲𑁆𑀲 𑀧𑀝𑀺𑀮𑀤𑁆𑀥𑀢𑀭𑀼𑀡𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀺𑀲𑁂𑀲𑀪𑀸𑀕𑀺𑀢𑀸𑀯𑀲𑁂𑀦 𑀨𑀸𑀲𑀼 𑀳𑁄𑀢𑀺, 𑀢𑀲𑁆𑀫𑀺𑀁 𑀅𑀭𑀜𑁆𑀜𑁂 𑀢𑀸𑀤𑀺𑀲𑀁 𑀨𑀸𑀲𑀼𑀯𑀺𑀳𑀸𑀭𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁂𑀦 𑀆𑀭𑀜𑁆𑀜𑀓𑁂𑀦. 𑀤𑀸𑀬𑀓𑁂 𑀅𑀲𑀦𑁆𑀢𑁂𑀢𑀺 𑀧𑀤𑀘𑁆𑀙𑁂𑀤𑁄. 𑀢𑀸𑀯𑀸𑀢𑀺 𑀅𑀯𑀥𑀺𑀫𑁆𑀳𑀺, 𑀅𑀤𑁆𑀥𑀺𑀓𑀸𑀤𑀻𑀳𑀺 𑀬𑀸𑀯 𑀦𑀺𑀲𑁆𑀲𑀬𑀤𑀸𑀬𑀓𑁄 𑀮𑀩𑁆𑀪𑀢𑀺, 𑀢𑀸𑀯, 𑀆𑀭𑀜𑁆𑀜𑀓𑁂𑀦 𑀧𑀦 ‘‘𑀧𑀝𑀺𑀭𑀽𑀧𑁂 𑀦𑀺𑀲𑁆𑀲𑀬𑀤𑀸𑀬𑀓𑁂 𑀲𑀢𑀺 𑀦𑀺𑀲𑁆𑀲𑀸𑀬 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸 𑀬𑀸𑀯 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸, 𑀢𑀸𑀯𑀸𑀢𑀺 𑀅𑀢𑁆𑀣𑁄. ‘‘𑀲𑀘𑁂 𑀧𑀦 𑀆𑀲𑀸𑀴𑁆𑀳𑀺𑀫𑀸𑀲𑁂 𑀆𑀘𑀭𑀺𑀬𑁄 𑀦𑀸𑀕𑀘𑁆𑀙𑀢𑀺, 𑀬𑀢𑁆𑀣 𑀦𑀺𑀲𑁆𑀲𑀬𑁄 𑀮𑀩𑁆𑀪𑀢𑀺, 𑀢𑀢𑁆𑀣 𑀕𑀦𑁆𑀢𑀩𑁆𑀩𑀁 (𑀫𑀳𑀸𑀯. 𑀅𑀝𑁆𑀞. 𑁧𑁨𑁧). 𑀅𑀦𑁆𑀢𑁄𑀯𑀲𑁆𑀲𑁂 𑀧𑀦 𑀦𑀺𑀩𑀤𑁆𑀥𑀯𑀸𑀲𑀁 𑀯𑀲𑀺𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀘 𑀕𑀳𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁨𑁧) 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁.

𑀅𑀫𑁆𑀳𑀸𑀓𑀁 𑀧𑀦 𑀓𑁂𑀘𑀺 𑀅𑀦𑁆𑀢𑁂𑀯𑀸𑀲𑀺𑀓𑀢𑁆𑀣𑁂𑀭𑀸 ‘‘𑀦 𑀪𑀺𑀓𑁆𑀔𑀯𑁂 𑀯𑀲𑁆𑀲𑀁 𑀦 𑀉𑀧𑀕𑀦𑁆𑀢𑀩𑁆𑀩𑀁. 𑀬𑁄 𑀦 𑀉𑀧𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’𑀢𑀺 (𑀫𑀳𑀸𑀯. 𑁧𑁮𑁬) 𑀘 ‘𑀦 𑀪𑀺𑀓𑁆𑀔𑀯𑁂 𑀢𑀤𑀳𑀼 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀯𑀲𑁆𑀲𑀁 𑀅𑀦𑀼𑀧𑀕𑀦𑁆𑀢𑀼𑀓𑀸𑀫𑁂𑀦 𑀲𑀜𑁆𑀘𑀺𑀘𑁆𑀘 𑀆𑀯𑀸𑀲𑁄 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑁄. 𑀬𑁄 𑀅𑀢𑀺𑀓𑁆𑀓𑀫𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’𑀢𑀺 (𑀫𑀳𑀸𑀯. 𑁧𑁮𑁬) 𑀧𑀸𑀴𑀺𑀯𑀘𑀦𑀢𑁄 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀦𑀺𑀲𑁆𑀲𑀬𑀁 𑀅𑀮𑀪𑀫𑀸𑀦𑁂𑀦𑀧𑀺 𑀦 𑀲𑀓𑁆𑀓𑀸 𑀅𑀦𑁆𑀢𑁄𑀯𑀲𑁆𑀲𑁂 𑀯𑀲𑁆𑀲𑀁 𑀅𑀦𑀼𑀧𑀕𑀦𑁆𑀢𑀼𑀁. ‘𑀅𑀦𑁆𑀢𑁄𑀯𑀲𑁆𑀲𑁂 𑀧𑀦𑀸’𑀢𑀺𑀆𑀤𑀻𑀲𑀼 𑀧𑀦 𑀘-𑀲𑀤𑁆𑀤𑁄 𑀅𑀦𑁆𑀯𑀸𑀘𑀬𑀢𑁆𑀣𑁄, 𑀢𑀲𑁆𑀫𑀸 𑀢𑁂𑀦𑀸𑀧𑀺 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩𑀫𑁂𑀯𑀸’’𑀢𑀺 𑀯𑀤𑀺𑀁𑀲𑀼.

𑀫𑀬𑀁 𑀧𑀦𑁂𑀢𑁆𑀣 𑀏𑀯𑀫𑀯𑁄𑀘𑀼𑀫𑁆𑀳 ‘‘𑀪𑀕𑀯𑀢𑀸 𑀅𑀦𑀼𑀧𑀕𑀫𑀦𑁂 𑀤𑀼𑀓𑁆𑀓𑀝𑀁 𑀅𑀦𑀦𑁆𑀢𑀭𑀸𑀬𑀺𑀓𑀲𑁆𑀲𑁂𑀯 𑀯𑀼𑀢𑁆𑀢𑀁, 𑀢𑁂𑀦𑁂𑀯 ‘𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁂𑀦 𑀧𑀼𑀭𑀺𑀫𑀺𑀓𑀁 𑀅𑀦𑀼𑀧𑀕𑀢𑁂𑀦 𑀧𑀘𑁆𑀙𑀺𑀫𑀺𑀓𑀸 𑀉𑀧𑀕𑀦𑁆𑀢𑀩𑁆𑀩𑀸’𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁮𑁫) 𑀯𑀼𑀢𑁆𑀢𑀁. 𑀅𑀦𑁆𑀢𑀭𑀸𑀬𑁄 𑀘 𑀦𑀸𑀫 𑀅𑀦𑁆𑀢𑀭𑀸 𑀯𑁂𑀫𑀚𑁆𑀛𑁂 𑀏𑀢𑀻𑀢𑀺 𑀅𑀦𑁆𑀢𑀭𑀸𑀬𑁄, 𑀬𑁄 𑀓𑁄𑀘𑀺 𑀩𑀸𑀥𑀓𑀧𑁆𑀧𑀘𑁆𑀘𑀬𑀢𑀸𑀬 𑀅𑀥𑀺𑀧𑁆𑀧𑁂𑀢𑁄 𑀯𑀼𑀘𑁆𑀘𑀢𑀺 ‘𑀦 𑀮𑀪𑀦𑁆𑀢𑀺 𑀧𑀢𑀺𑀭𑀽𑀧𑀁 𑀉𑀧𑀝𑁆𑀞𑀸𑀓𑀁, 𑀏𑀲𑁂𑀯 𑀅𑀦𑁆𑀢𑀭𑀸𑀬𑁄𑀢𑀺 𑀧𑀓𑁆𑀓𑀫𑀺𑀢𑀩𑁆𑀩’𑀦𑁆𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁨𑁦𑁧) 𑀯𑀺𑀬, 𑀢𑀲𑁆𑀫𑀸 𑀩𑀸𑀥𑀓𑀧𑁆𑀧𑀘𑁆𑀘𑀬𑀢𑀸 𑀅𑀥𑀺𑀧𑁆𑀧𑁂𑀢𑀸. 𑀦𑀺𑀲𑁆𑀲𑀬𑀸𑀮𑀸𑀪𑁄𑀧𑀺 𑀅𑀦𑁆𑀢𑀭𑀸𑀬𑁄𑀢𑁆𑀯𑁂𑀯 𑀯𑀺𑀜𑁆𑀜𑀸𑀬𑀢𑀺. 𑀲𑀓𑁆𑀓𑀸 𑀳𑀺 𑀯𑀢𑁆𑀢𑀼𑀁 ‘𑀅𑀦𑁆𑀢𑀭𑀸𑀬𑁄 𑀯𑀲𑁆𑀲𑀽𑀧𑀕𑀫𑁄 𑀲𑀦𑁆𑀦𑀺𑀲𑁆𑀲𑀬𑀢𑁆𑀢𑀸 𑀢𑀭𑀼𑀡𑀲𑀫𑀣𑀯𑀺𑀧𑀲𑁆𑀲𑀦𑀸𑀮𑀸𑀪𑀻𑀦𑀁 𑀓𑀢𑁄𑀓𑀸𑀲𑁄 𑀯𑀺𑀬𑀸’𑀢𑀺. 𑀢𑀭𑀼𑀡𑀲𑀫𑀣𑀯𑀺𑀧𑀲𑁆𑀲𑀦𑀸𑀮𑀸𑀪𑀻𑀦𑀫𑁆𑀧𑀺 𑀳𑀺 𑀓𑀢𑁄𑀓𑀸𑀲𑁂𑀧𑀺 ‘𑀲𑀘𑁂 𑀧𑀦 𑀆𑀲𑀸𑀴𑁆𑀳𑀺𑀫𑀸𑀲𑁂 𑀆𑀘𑀭𑀺𑀬𑁄 𑀦𑀸𑀕𑀘𑁆𑀙𑀢𑀺, 𑀬𑀢𑁆𑀣 𑀦𑀺𑀲𑁆𑀲𑀬𑁄 𑀮𑀩𑁆𑀪𑀢𑀺, 𑀢𑀢𑁆𑀣 𑀕𑀦𑁆𑀢𑀩𑁆𑀩’𑀦𑁆𑀢𑀺 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁨𑁧) 𑀯𑀼𑀢𑁆𑀢𑀁. 𑀅𑀫𑁆𑀳𑀸𑀓𑀁 𑀕𑀭𑀽𑀳𑀺 𑀘 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁨𑁧) ‘𑀆𑀘𑀭𑀺𑀬𑀁 𑀆𑀕𑀫𑁂𑀦𑁆𑀢𑀲𑁆𑀲𑁂𑀯 𑀘𑁂 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁄 𑀳𑁄𑀢𑀺, 𑀳𑁄𑀢𑀼, 𑀕𑀦𑁆𑀢𑀩𑁆𑀩𑀁 𑀢𑀢𑁆𑀣, 𑀬𑀢𑁆𑀣 𑀦𑀺𑀲𑁆𑀲𑀬𑀤𑀸𑀬𑀓𑀁 𑀮𑀪𑀢𑀻’𑀢𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂𑀧𑀺 𑀦𑀺𑀲𑁆𑀲𑀬𑀢𑁆𑀣𑀸𑀬 𑀕𑀫𑀦𑀫𑁂𑀯 𑀯𑀼𑀢𑁆𑀢𑀁. 𑀅𑀣 𑀘 𑀧𑀦 𑀫𑀳𑀸𑀓𑀸𑀭𑀼𑀡𑀺𑀓𑁄𑀧𑀺 𑀪𑀕𑀯𑀸 ‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁂𑀦 𑀪𑀺𑀓𑁆𑀔𑀼𑀦𑀸 𑀦𑀺𑀲𑁆𑀲𑀬𑀁 𑀅𑀮𑀪𑀫𑀸𑀦𑁂𑀦 𑀬𑀸𑀘𑀺𑀬𑀫𑀸𑀦𑁂𑀦 𑀅𑀦𑀺𑀲𑁆𑀲𑀺𑀢𑀓𑁂𑀦 𑀯𑀢𑁆𑀣𑀼’𑀦𑁆𑀢𑀺 (𑀫𑀳𑀸𑀯. 𑁧𑁨𑁧) 𑀕𑀺𑀮𑀸𑀦𑀯𑀺𑀲𑀬𑁂𑀧𑀺 𑀦𑀺𑀲𑁆𑀲𑀬𑀁 𑀕𑀭𑀼𑀓𑀁 𑀓𑀢𑁆𑀯𑀸 𑀧𑀝𑁆𑀞𑀧𑁂𑀲𑀺. 𑀬𑀁 𑀧𑀦 𑀅𑀦𑀺𑀲𑁆𑀲𑀬𑀁, 𑀢𑀁 𑀅𑀦𑀦𑁆𑀢𑀭𑀸𑀬𑀁 𑀦𑀺𑀲𑁆𑀲𑀬𑀫𑀼𑀢𑁆𑀢𑀓𑀲𑁆𑀲 𑀯𑀲𑁆𑀲𑀽𑀧𑀕𑀫𑀦𑀁 𑀯𑀺𑀬. 𑀅𑀧𑀺𑀘 𑀦𑀸𑀯𑀸𑀬 𑀕𑀘𑁆𑀙𑀦𑁆𑀢𑀲𑁆𑀲 𑀧𑀦 𑀯𑀲𑁆𑀲𑀸𑀦𑁂 𑀆𑀕𑀢𑁂𑀧𑀺 𑀦𑀺𑀲𑁆𑀲𑀬𑀁 𑀅𑀮𑀪𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀦𑀸𑀯𑀸𑀬 𑀕𑀘𑁆𑀙𑀢𑁄𑀬𑁂𑀯 𑀆𑀯𑁂𑀡𑀺𑀓𑀸 𑀅𑀦𑀸𑀧𑀢𑁆𑀢𑀺𑀓𑀢𑀸 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀦𑀺𑀲𑁆𑀲𑀬𑀸𑀮𑀸𑀪𑁄 𑀩𑀸𑀥𑀓𑀧𑁆𑀧𑀘𑁆𑀘𑀬𑁄 𑀯𑀲𑁆𑀲𑀽𑀧𑀕𑀫𑀦𑀲𑁆𑀲, 𑀦 𑀯𑀲𑁆𑀲𑀽𑀧𑀕𑀫𑀦𑀁 𑀦𑀺𑀲𑁆𑀲𑀬𑀲𑁆𑀲𑀸𑀢𑀺 𑀅𑀦𑁆𑀢𑀭𑀸𑀬𑁄𑀬𑁂𑀯 𑀦𑀺𑀲𑁆𑀲𑀬𑀸𑀮𑀸𑀪𑁄. 𑀢𑀢𑁄𑀬𑁂𑀯 𑀝𑀻𑀓𑀸𑀬𑀁 ‘𑀅𑀦𑁆𑀢𑁄𑀯𑀲𑁆𑀲𑁂 𑀧𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀼𑀁 𑀦 𑀯𑀝𑁆𑀝𑀢𑀻’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸𑀬𑁂𑀯 𑀘 ‘𑀅𑀦𑁆𑀢𑁄𑀯𑀲𑁆𑀲𑁂 𑀧𑀦𑀸’𑀢𑀺𑀆𑀤𑀻𑀲𑀼 𑀦𑀺𑀲𑁆𑀲𑀬𑀤𑀸𑀬𑀓𑁂 𑀲𑀢𑀺 𑀦𑀺𑀩𑀤𑁆𑀥𑀯𑀸𑀲𑀁 𑀯𑀲𑀺𑀢𑀩𑁆𑀩𑀜𑁆𑀘 𑀦𑀺𑀲𑁆𑀲𑀬𑁄 𑀕𑀳𑁂𑀢𑀩𑁆𑀩𑁄 𑀘 𑀳𑁄𑀢𑀻𑀢𑀺 𑀕𑀫𑀦𑀓𑀺𑀭𑀺𑀬𑀸𑀬 𑀔𑀻𑀬𑀫𑀸𑀦𑀢𑀸𑀯𑀲𑁂𑀦 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑁄 𑀕𑀳𑁂𑀢𑀩𑁆𑀩𑁄’’𑀢𑀺.

𑀦𑀺𑀲𑁆𑀲𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.