𑁩𑁧. 𑀯𑀺𑀓𑀧𑁆𑀧𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁨𑁧. 𑀲𑀫𑁆𑀫𑀼𑀔𑀸 𑀧𑀭𑀫𑁆𑀫𑀼𑀔𑀸𑀢𑀺 𑀲𑀲𑁆𑀲 𑀫𑀼𑀔𑀁, 𑀧𑀭𑀲𑁆𑀲 𑀫𑀼𑀔𑀦𑁆𑀢𑀺 𑀯𑀺𑀕𑁆𑀕𑀳𑁄, 𑀲𑀫𑁆𑀫𑀼𑀔𑁂𑀦 𑀧𑀭𑀫𑁆𑀫𑀼𑀔𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸 𑀧𑀭𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸𑀢𑀺 𑀪𑁂𑀤𑀸 𑀤𑀼𑀯𑁂 𑀯𑀺𑀓𑀧𑁆𑀧𑀦𑀸 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀪𑁂𑀤𑀸𑀢𑀺 𑀯𑀺𑀲𑁂𑀲𑀢𑁄. 𑀅𑀣 𑀯𑀸 𑀲𑀲𑁆𑀲 𑀫𑀼𑀔𑀁 𑀫𑀼𑀔𑀲𑀫𑁆𑀩𑀦𑁆𑀥𑀺𑀯𑀘𑀦𑀁 𑀅𑀲𑁆𑀲𑀸 𑀯𑀺𑀓𑀧𑁆𑀧𑀦𑀸𑀬𑀸𑀢𑀺 𑀲𑀫𑀸𑀲𑁄. 𑀢𑀣𑀸 𑀧𑀭𑀫𑁆𑀫𑀼𑀔𑀸. 𑀲𑀫𑁆𑀫𑀼𑀔𑀸 𑀘 𑀧𑀭𑀫𑁆𑀫𑀼𑀔𑀸 𑀘, 𑀢𑀲𑁆𑀲𑀸 𑀪𑁂𑀤𑁄, 𑀢𑀢𑁄. 𑀲𑀫𑁆𑀫𑀼𑀔𑀸𑀬 𑀲𑀫𑁆𑀫𑀼𑀔𑀯𑀺𑀓𑀧𑁆𑀧𑀦𑀸𑀬. 𑀩𑁆𑀬𑀢𑁆𑀢𑀲𑁆𑀲𑀸𑀢𑀺 𑀯𑀺𑀓𑀧𑁆𑀧𑀦𑀯𑀺𑀥𑀸𑀦𑀁 𑀧𑀘𑁆𑀘𑀼𑀤𑁆𑀥𑀸𑀭𑀯𑀺𑀥𑀸𑀦𑀜𑁆𑀘 𑀚𑀸𑀦𑀦𑁆𑀢𑀲𑁆𑀲.

𑁨𑁨𑁨. 𑀢𑁂𑀦𑀸𑀢𑀺 𑀬𑀲𑁆𑀲 𑀲𑀦𑁆𑀢𑀺𑀓𑁂 𑀯𑀺𑀓𑀧𑁆𑀧𑁂𑀢𑀺, 𑀢𑁂𑀦 𑀪𑀺𑀓𑁆𑀔𑀼𑀦𑀸. 𑀧𑀭𑀺𑀪𑁄𑀕𑀸𑀤𑀺𑀓𑀦𑁆𑀢𑀺 𑀧𑀭𑀺𑀪𑁄𑀕𑀁 𑀯𑀺𑀲𑁆𑀲𑀚𑁆𑀚𑀦𑀁 𑀅𑀥𑀺𑀝𑁆𑀞𑀸𑀦𑀜𑁆𑀘.

𑁨𑁨𑁪-𑁫. 𑀅𑀧𑀭𑀸 𑀲𑀫𑁆𑀫𑀼𑀔𑀸𑀯𑁂𑀓𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀧𑀓𑁆𑀔𑀦𑁆𑀢𑀭𑁂, 𑀅𑀣 𑀯𑀸𑀢𑀺 𑀅𑀢𑁆𑀣𑁄, 𑀅𑀧𑀺-𑀲𑀤𑁆𑀤𑀢𑁆𑀣𑁄 𑀯𑀸 𑀯𑀸-𑀲𑀤𑁆𑀤𑁄, 𑀲𑁄 𑀅𑀧𑀭𑀸-𑀲𑀤𑁆𑀤𑀢𑁄 𑀧𑀭𑀁 𑀤𑀝𑁆𑀞𑀩𑁆𑀩𑁄, 𑀅𑀧𑀭𑀸𑀧𑀺 𑀏𑀓𑀸 𑀲𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀓𑀣𑀦𑁆𑀢𑀺 𑀆𑀳 ‘‘𑀪𑀺𑀓𑁆𑀔𑀼𑀲𑁆𑀲𑀸’’𑀢𑀺𑀆𑀤𑀺. ‘‘𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀻𑀦’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀢𑀺𑀲𑁆𑀲𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺𑀆𑀤𑀻𑀲𑀼 𑀢𑀺𑀲𑁆𑀲𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀢𑀺𑀲𑁆𑀲𑀸𑀬 𑀲𑀺𑀓𑁆𑀔𑀫𑀸𑀦𑀸𑀬 𑀢𑀺𑀲𑁆𑀲𑀸𑀬 𑀲𑀸𑀫𑀡𑁂𑀭𑀺𑀬𑀸 𑀢𑀺𑀲𑁆𑀲𑀲𑁆𑀲 𑀲𑀸𑀫𑀡𑁂𑀭𑀲𑁆𑀲𑀸𑀢𑀺𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑀁.

𑁨𑁨𑁬. 𑀧𑀭𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸𑀢𑀺 𑀧𑀭𑀫𑁆𑀫𑀼𑀔𑁂𑀦 𑀯𑀺𑀓𑀧𑁆𑀧𑀦𑁂𑀦, 𑀧𑀭𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸𑀢𑀺 𑀯𑀸 𑀕𑀳𑁂𑀢𑀩𑁆𑀩𑀁, 𑀧𑀭𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸 𑀓𑀣𑀦𑁆𑀢𑀺 𑀅𑀢𑁆𑀣𑁄.

𑁨𑁨𑁭. 𑀫𑀺𑀢𑁆𑀢𑁄𑀢𑀺 𑀤𑀴𑁆𑀳𑀫𑀺𑀢𑁆𑀢𑁄. 𑀲𑀦𑁆𑀤𑀺𑀝𑁆𑀞𑁄𑀢𑀺 𑀤𑀺𑀝𑁆𑀞𑀫𑀢𑁆𑀢𑀫𑀺𑀢𑁆𑀢𑁄. 𑀏𑀢𑁆𑀣 𑀧𑀦 𑀤𑁆𑀯𑀺𑀦𑁆𑀦𑀁 𑀯𑀺𑀓𑀧𑁆𑀧𑀦𑀸𑀦𑀁 𑀓𑀺𑀁 𑀦𑀸𑀦𑀸𑀓𑀭𑀡𑀦𑁆𑀢𑀺? 𑀲𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸𑀬 𑀢𑀸𑀯 𑀲𑀬𑀁 𑀯𑀺𑀓𑀧𑁆𑀧𑁂𑀢𑁆𑀯𑀸 𑀧𑀭𑁂𑀦 𑀧𑀘𑁆𑀘𑀼𑀤𑁆𑀥𑀭𑀸𑀧𑁂𑀢𑀺, 𑀢𑁂𑀦𑁂𑀯 𑀲𑀸 𑀲𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸 𑀦𑀸𑀫 𑀚𑀸𑀢𑀸. 𑀧𑀭𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸𑀬 𑀧𑀭𑁂𑀦𑁂𑀯 𑀯𑀺𑀓𑀧𑁆𑀧𑀸𑀧𑁂𑀢𑁆𑀯𑀸 𑀧𑀭𑁂𑀦𑁂𑀯 𑀧𑀘𑁆𑀘𑀼𑀤𑁆𑀥𑀭𑀸𑀧𑁂𑀢𑀺, 𑀢𑁂𑀦𑁂𑀯 𑀲𑀸 𑀧𑀭𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸 𑀦𑀸𑀫 𑀚𑀸𑀢𑀸𑀢𑀺 𑀇𑀤𑀫𑁂𑀢𑁆𑀣 𑀦𑀸𑀦𑀸𑀓𑀭𑀡𑀦𑁆𑀢𑀺.

𑁨𑁨𑁮. 𑀤𑀽𑀭𑀲𑀦𑁆𑀢𑀺𑀓𑀢𑁆𑀢𑁂𑀓𑀢𑁆𑀢𑀦𑁆𑀢𑀺 𑀏𑀢𑁆𑀣 𑀆𑀲𑀦𑁆𑀦𑀤𑀽𑀭𑀪𑀸𑀯𑁄 𑀅𑀥𑀺𑀝𑁆𑀞𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁨𑁨𑁯. 𑀤𑀲𑀸𑀳𑀁…𑀧𑁂… 𑀧𑀘𑁆𑀘𑀸𑀲𑀸𑀬 𑀲𑀢𑀺 𑀫𑀸𑀲𑀓𑀁 𑀦𑀸𑀥𑀺𑀝𑁆𑀞𑀺𑀢𑀯𑀺𑀓𑀧𑁆𑀧𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀁 𑀦𑀼𑀧𑁆𑀧𑀸𑀤𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀲 𑀅𑀳𑀸𑀦𑀺 𑀲𑀫𑀸𑀳𑀝𑀸𑀦𑀺 𑀤𑀲𑀸𑀳𑀁. 𑀲𑀩𑁆𑀩𑀢𑁆𑀣 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀤𑀼𑀢𑀺𑀬𑀸. 𑀢𑀢𑁆𑀣 𑀬𑀁 𑀤𑀺𑀯𑀲𑀁 𑀘𑀻𑀯𑀭𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀬𑁄 𑀅𑀭𑀼𑀡𑁄, 𑀲𑁄 𑀉𑀧𑁆𑀧𑀦𑁆𑀦𑀤𑀺𑀯𑀲𑀦𑀺𑀲𑁆𑀲𑀺𑀢𑁄, 𑀢𑀲𑁆𑀫𑀸 𑀘𑀻𑀯𑀭𑀼𑀧𑁆𑀧𑀸𑀤𑀤𑀺𑀯𑀲𑁂𑀦 𑀲𑀤𑁆𑀥𑀺𑀁 𑀏𑀓𑀸𑀤𑀲𑁂 𑀅𑀭𑀼𑀡𑀼𑀕𑁆𑀕𑀫𑀦𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀻𑀢𑀺 𑀆𑀳 ‘‘𑀤𑀲𑀸𑀳’’𑀦𑁆𑀢𑀺. 𑀫𑀸𑀲𑀫𑁂𑀓𑀁 𑀯𑀸𑀢𑀺 ‘‘𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀁 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀫𑀸𑀲’’𑀦𑁆𑀢𑀺 (𑀧𑀸𑀭𑀸. 𑁬𑁪𑁯 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀯𑀼𑀢𑁆𑀢𑀢𑁆𑀢𑀸 𑀓𑀣𑀺𑀦𑀢𑁆𑀣𑀢𑁂 𑀧𑀜𑁆𑀘 𑀫𑀸𑀲𑁂𑀢𑀺 𑀮𑀩𑁆𑀪𑀢𑀺. 𑀓𑀣𑀺𑀦𑀁 𑀅𑀢𑁆𑀣𑀢𑀁 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂𑀢𑀺 𑀲𑀫𑀸𑀲𑁄. 𑀧𑀸𑀭𑀺𑀧𑀽𑀭𑀢𑁆𑀣𑀦𑁆𑀢𑀺 𑀧𑀸𑀭𑀺𑀧𑀽𑀭𑀺 𑀅𑀢𑁆𑀣𑁄 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁, 𑀧𑀸𑀭𑀺𑀧𑀽𑀭𑀺𑀧𑁆𑀧𑀬𑁄𑀚𑀦𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀊𑀦𑀲𑁆𑀲𑀸𑀢𑀺 𑀬𑀢𑁆𑀢𑀓𑁂𑀦 𑀓𑀬𑀺𑀭𑀫𑀸𑀦𑀁 𑀅𑀥𑀺𑀝𑁆𑀞𑀸𑀦𑀁 𑀘𑀻𑀯𑀭𑀁 𑀧𑀳𑁄𑀢𑀺, 𑀢𑀢𑁆𑀢𑀓𑀢𑀸𑀪𑀸𑀯𑀢𑁄 𑀊𑀦𑀲𑁆𑀲 𑀏𑀓𑀸𑀤𑀲𑀫𑀸𑀲𑀲𑀢𑁆𑀢𑀫𑀸𑀲𑀲𑀗𑁆𑀔𑀸𑀢𑁂 𑀧𑀺𑀝𑁆𑀞𑀺𑀲𑀫𑀬𑁂 𑀉𑀧𑁆𑀧𑀦𑁆𑀦𑀲𑁆𑀲 𑀫𑀽𑀮𑀘𑀻𑀯𑀭𑀲𑁆𑀲. 𑀧𑀘𑁆𑀘𑀸𑀲𑀸 𑀲𑀢𑀻𑀢𑀺 ‘‘𑀲𑀗𑁆𑀖𑀸𑀤𑀺𑀢𑁄 𑀬𑀢𑁄 𑀓𑀼𑀢𑁄𑀘𑀺 𑀮𑀘𑁆𑀙𑀸𑀫𑀻’’𑀢𑀺 𑀏𑀯𑀁 𑀲𑀢𑀺𑀬𑀸 𑀧𑀘𑁆𑀘𑀸𑀲𑀸𑀬𑀸𑀢𑀺 𑀅𑀢𑁆𑀣𑁄. 𑀉𑀪𑀬𑀫𑁆𑀧𑀺 𑀬-𑀓𑀸𑀭𑀮𑁄𑀧𑁂𑀦 𑀦𑀺𑀤𑁆𑀤𑀺𑀝𑁆𑀞𑀁. 𑀲𑀢𑀻𑀢𑀺 𑀯𑀸 𑀦𑀺𑀧𑀸𑀢𑁄, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀸𑀳. 𑀏𑀢𑁆𑀣 𑀧𑀦 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀤𑀲𑀸𑀳𑀸𑀢𑀺𑀓𑁆𑀓𑀫𑀦𑀸𑀤𑀻𑀲𑀼 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀯𑀺𑀓𑀧𑁆𑀧𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.