𑁩𑁦. 𑀯𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁧𑁩. 𑀲𑀉𑀧𑀸𑀳𑀦𑁄…𑀧𑁂… 𑀘𑀻𑀯𑀭𑀁 𑀲𑀻𑀲𑁂 𑀓𑀭𑀺𑀢𑁆𑀯𑀸 𑀯𑀸 𑀆𑀕𑀦𑁆𑀢𑀼𑀓𑁄 𑀆𑀭𑀸𑀫𑀁 𑀦 𑀧𑀯𑀺𑀲𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀙𑀢𑁆𑀢𑁄𑀢𑀺 𑀲𑀻𑀲𑁂 𑀓𑀢𑀙𑀢𑁆𑀢𑁂𑀦 𑀲𑀙𑀢𑁆𑀢𑁄. 𑀑𑀕𑀼𑀡𑁆𑀞𑀺𑀢𑁄𑀢𑀺 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁄. ‘‘𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀭𑀺𑀓𑁆𑀔𑁂𑀧𑁄, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁 𑀉𑀧𑀘𑀸𑀭𑀲𑀻𑀫𑀸𑀲𑀫𑀻𑀧𑀁 𑀧𑀢𑁆𑀯𑀸 𑀉𑀧𑀸𑀳𑀦𑀸𑀑𑀫𑀼𑀜𑁆𑀘𑀦𑀸𑀤𑀺𑀲𑀩𑁆𑀩𑀁 𑀓𑀢𑁆𑀯𑀸 𑀆𑀭𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄𑀢𑀺 𑀅𑀬𑀫𑁂𑀢𑁆𑀣 𑀩𑁆𑀬𑀢𑀺𑀭𑁂𑀓𑀮𑀤𑁆𑀥𑁄 𑀅𑀢𑁆𑀣𑁄.

𑁨𑁧𑁪. 𑀧𑀸𑀦𑀻𑀬𑁂𑀦 𑀧𑀸𑀤𑁂 𑀦 𑀥𑁄𑀯𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀝𑀺𑀓𑁆𑀓𑀫𑀦𑀁 𑀧𑀢𑁆𑀯𑀸 𑀏𑀓𑀫𑀦𑁆𑀢𑁂 𑀧𑀢𑁆𑀢𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀢𑀺𑀭𑀽𑀧𑁂 𑀦𑀺𑀲𑀚𑁆𑀚 𑀧𑀼𑀘𑁆𑀙𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀸𑀢𑀩𑁆𑀩𑀁, 𑀧𑀭𑀺𑀪𑁄𑀚𑀦𑀻𑀬𑁂𑀦 𑀬𑀣𑀸𑀯𑀼𑀢𑁆𑀢𑀁 𑀧𑀸𑀤𑀸 𑀥𑁄𑀯𑀺𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀼𑀟𑁆𑀠𑀢𑀭𑁂 𑀆𑀯𑀸𑀲𑀺𑀓𑁂𑀧𑀺 𑀘 𑀅𑀪𑀺𑀯𑀸𑀤𑁂𑀬𑁆𑀬𑀸𑀢𑀺 𑀇𑀫𑀺𑀦𑀸 𑀯𑀲𑁆𑀲𑀁 𑀧𑀼𑀘𑁆𑀙𑀺𑀢𑁆𑀯𑀸 𑀦𑀯𑀓𑁂𑀦 𑀆𑀯𑀸𑀲𑀺𑀓𑁂𑀦 𑀅𑀪𑀺𑀯𑀸𑀤𑀸𑀧𑁂𑀢𑀩𑁆𑀩𑀦𑁆𑀢𑀺 𑀤𑀻𑀧𑁂𑀢𑀺. 𑀧𑀼𑀘𑁆𑀙𑁂𑀬𑁆𑀬 𑀲𑀬𑀦𑀸𑀲𑀦𑀦𑁆𑀢𑀺 ‘‘𑀓𑀢𑀫𑀁 𑀲𑁂𑀦𑀸𑀲𑀦𑀁 𑀧𑀸𑀧𑀼𑀡𑀸𑀢𑀺, 𑀅𑀚𑁆𑀛𑀸𑀯𑀼𑀢𑁆𑀣𑀁 𑀅𑀦𑀚𑁆𑀛𑀸𑀯𑀼𑀢𑁆𑀣𑀁 𑀯𑀸’’𑀢𑀺 𑀲𑁂𑀦𑀸𑀲𑀦𑀁 𑀧𑀼𑀘𑁆𑀙𑁂𑀬𑁆𑀬. 𑀇𑀤𑀜𑁆𑀘 𑀧𑀼𑀘𑁆𑀙𑀸𑀬 𑀮𑀓𑁆𑀔𑀡𑀯𑀘𑀦𑀁. 𑀢𑀲𑁆𑀫𑀸 𑀆𑀯𑀸𑀲𑀺𑀓𑀯𑀢𑁆𑀢𑁂 𑀯𑀼𑀢𑁆𑀢𑀫𑀚𑁆𑀛𑀸𑀯𑀼𑀢𑁆𑀣𑀸𑀤𑀺𑀓𑀜𑁆𑀘 𑀧𑀼𑀘𑁆𑀙𑀺𑀢𑀩𑁆𑀩𑀁. 𑀲𑀘𑁂 ‘‘𑀅𑀦𑀚𑁆𑀛𑀸𑀯𑀼𑀢𑁆𑀣’’𑀦𑁆𑀢𑀺 𑀯𑀤𑀦𑁆𑀢𑀺, 𑀓𑀯𑀸𑀝𑀁 𑀆𑀓𑁄𑀝𑁂𑀢𑁆𑀯𑀸 𑀫𑀼𑀳𑀼𑀢𑁆𑀢𑀁 𑀆𑀕𑀫𑁂𑀢𑁆𑀯𑀸 𑀖𑀝𑀺𑀓𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀓𑀯𑀸𑀝𑀁 𑀧𑀡𑀸𑀫𑁂𑀢𑁆𑀯𑀸 𑀩𑀳𑀺 𑀞𑀺𑀢𑁂𑀦 𑀉𑀮𑁆𑀮𑁄𑀓𑁂𑀢𑁆𑀯𑀸 𑀧𑀯𑀺𑀲𑀺𑀢𑁆𑀯𑀸 𑀲𑀩𑁆𑀩𑀁 𑀲𑁂𑀦𑀸𑀲𑀦𑀯𑀢𑁆𑀢𑀁 𑀓𑀸𑀢𑀩𑁆𑀩𑀁. 𑀆𑀕𑀦𑁆𑀢𑀼𑀓𑀯𑀢𑁆𑀢𑀁.

𑁨𑁧𑁫-𑁬. 𑀕𑀫𑀺𑀓𑁄 𑀧𑀓𑁆𑀓𑀫𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀝𑀺𑀲𑀸𑀫𑁂𑀢𑁆𑀯𑀸’’𑀢𑀺𑀆𑀤𑀻𑀦𑀺𑀫𑀲𑁆𑀲 𑀧𑀼𑀩𑁆𑀩𑀓𑀺𑀭𑀺𑀬𑀸𑀧𑀤𑀸𑀦𑀺. 𑀤𑀸𑀭𑀼𑀫𑀢𑁆𑀢𑀺𑀓𑀪𑀡𑁆𑀟𑀓𑀦𑁆𑀢𑀺 𑀏𑀢𑁆𑀣 𑀫𑀜𑁆𑀘𑀧𑀻𑀞𑀸𑀤𑀺𑀤𑀸𑀭𑀼𑀪𑀡𑁆𑀟𑀁 𑀭𑀚𑀦𑀪𑀸𑀚𑀦𑀸𑀤𑀺𑀫𑀢𑁆𑀢𑀺𑀓𑀸𑀪𑀡𑁆𑀟𑀁. 𑀧𑀝𑀺𑀲𑀸𑀫𑁂𑀢𑁆𑀯𑀸𑀢𑀺 𑀅𑀢𑁆𑀣𑀺 𑀘𑁂 𑀅𑀦𑁄𑀯𑀲𑁆𑀲𑀓𑁂 𑀲𑀡𑁆𑀞𑀧𑁂𑀢𑁆𑀯𑀸. 𑀣𑀓𑁂𑀢𑁆𑀯𑀸𑀦𑀸𑀢𑀺 𑀤𑁆𑀯𑀸𑀭𑀯𑀸𑀢𑀧𑀸𑀦𑁂𑀳𑀺 𑀧𑀺𑀥𑀸𑀬. 𑀲𑀸𑀥𑀼𑀓𑀁 𑀲𑀗𑁆𑀕𑁄𑀧𑁂𑀢𑁆𑀯𑀸𑀦𑀸𑀢𑀺 𑀘𑀢𑀽𑀲𑀼 𑀧𑀸𑀲𑀸𑀡𑁂𑀲𑀼 𑀫𑀜𑁆𑀘𑀁 𑀧𑀜𑁆𑀜𑀧𑁂𑀢𑁆𑀯𑀸 𑀫𑀜𑁆𑀘𑁂 𑀫𑀜𑁆𑀘𑀲𑁆𑀲, 𑀧𑀻𑀞𑁂 𑀧𑀻𑀞𑀲𑁆𑀲 𑀆𑀭𑁄𑀧𑀦𑁂𑀦 𑀲𑁂𑀦𑀸𑀲𑀦𑀲𑁆𑀲 𑀉𑀧𑀭𑀽𑀧𑀭𑀺 𑀧𑀼𑀜𑁆𑀚𑀓𑀭𑀡𑁂𑀦 𑀲𑀸𑀥𑀼𑀓𑀁 𑀲𑀗𑁆𑀕𑁄𑀧𑀦𑀁 𑀓𑀢𑁆𑀯𑀸. 𑀦 𑀘𑀸𑀢𑀺 𑀦𑁂𑀯. 𑀕𑀫𑀺𑀓𑀯𑀢𑁆𑀢𑀁.

𑁨𑁧𑁭-𑁮. 𑀆𑀯𑀸𑀲𑀺𑀓𑁄𑀢𑀺 𑀇𑀤𑀁 ‘‘𑀧𑀜𑁆𑀜𑀧𑁂𑀬𑁆𑀬𑀸’’𑀢𑀺𑀆𑀤𑀻𑀦𑀁 𑀓𑀢𑁆𑀢𑀼𑀧𑀤𑀁. 𑀦𑀯𑀓𑀫𑁆𑀫𑀓𑀭𑀡𑀸𑀤𑀺𑀪𑀸𑀭𑀦𑀺𑀢𑁆𑀣𑀭𑀡𑀢𑀸𑀬 𑀆𑀯𑀸𑀲𑁄 𑀯𑀺𑀳𑀸𑀭𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀆𑀯𑀸𑀲𑀺𑀓𑁄. 𑀬𑀲𑁆𑀲 𑀧𑀦 𑀓𑁂𑀯𑀮𑀁 𑀯𑀺𑀳𑀸𑀭𑁂 𑀦𑀺𑀯𑀸𑀲𑀦𑀫𑀢𑁆𑀢𑀁 𑀅𑀢𑁆𑀣𑀺, 𑀲𑁄 𑀦𑁂𑀯𑀸𑀲𑀺𑀓𑁄. 𑀉𑀪𑁄𑀧𑀺 𑀢𑁂 𑀇𑀥 𑀆𑀯𑀸𑀲𑀺𑀓-𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀸. 𑀧𑀸𑀤𑁄𑀤𑀧𑁆𑀧𑀪𑀼𑀢𑀺𑀦𑁆𑀢𑀺 𑀏𑀢𑁆𑀣 𑀧𑀪𑀼𑀢𑀺-𑀲𑀤𑁆𑀤𑁂𑀦 𑀧𑀸𑀤𑀧𑀻𑀞𑀧𑀸𑀤𑀓𑀣𑀮𑀺𑀓𑀸𑀦𑀁 𑀕𑀳𑀡𑀁. 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸𑀦 𑀧𑀢𑁆𑀢𑀘𑀻𑀯𑀭𑀁 𑀕𑀡𑁆𑀳𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀧𑀜𑁆𑀜𑀧𑁂 𑀲𑀬𑀦𑀸𑀲𑀦𑀦𑁆𑀢𑀺 ‘‘𑀏𑀢𑀁 𑀢𑀼𑀫𑁆𑀳𑀸𑀓𑀁 𑀲𑁂𑀦𑀸𑀲𑀦𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀏𑀯𑀁 𑀲𑀬𑀦𑀸𑀲𑀦𑀁 𑀧𑀜𑁆𑀜𑀧𑁂𑀬𑁆𑀬, 𑀧𑀓𑀸𑀲𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁧𑁯. 𑀅𑀚𑁆𑀛𑀸𑀯𑀼𑀢𑁆𑀣𑀦𑁆𑀢𑀺 𑀧𑀼𑀩𑁆𑀩𑁂 𑀪𑀺𑀓𑁆𑀔𑀽𑀳𑀺 𑀦𑀺𑀯𑀼𑀢𑁆𑀣𑀁. 𑀕𑁄𑀘𑀭𑀸𑀕𑁄𑀘𑀭𑀁 𑀯𑀤𑁂𑀢𑀺 ‘‘𑀪𑀺𑀓𑁆𑀔𑀸𑀘𑀸𑀭𑀕𑀸𑀫𑁄 𑀤𑀽𑀭𑁄, 𑀆𑀲𑀦𑁆𑀦𑁄’’𑀢𑀺 𑀯𑀸, ‘‘𑀓𑀸𑀮𑀲𑁆𑀲𑁂𑀯 𑀧𑀺𑀡𑁆𑀟𑀸𑀬 𑀘𑀭𑀺𑀢𑀩𑁆𑀩𑀁, 𑀤𑀺𑀯𑀸 𑀯𑀸’’𑀢𑀺 𑀏𑀯𑀁 𑀕𑁄𑀘𑀭𑀜𑁆𑀘, ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀦𑀁 𑀯𑀸 𑀕𑀸𑀫𑁄, 𑀧𑀭𑀺𑀘𑁆𑀙𑀺𑀦𑁆𑀦𑀪𑀺𑀓𑁆𑀔𑁄 𑀯𑀸’’𑀢𑀺𑀆𑀤𑀺𑀦𑀸 𑀅𑀕𑁄𑀘𑀭𑀜𑁆𑀘 𑀯𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀯𑀘𑁆𑀘𑀧𑀲𑁆𑀲𑀸𑀯𑀝𑁆𑀞𑀸𑀦𑀸𑀦𑀻𑀢𑀺𑀆𑀤𑀻𑀦𑀺𑀧𑀺 ‘‘𑀯𑀤𑁂’’𑀢𑀺 𑀇𑀫𑀲𑁆𑀲𑁂𑀯 𑀓𑀫𑁆𑀫𑀯𑀘𑀦𑀸𑀦𑀺. 𑀲𑁂𑀔𑀲𑀫𑁆𑀫𑀼𑀢𑀺𑀦𑁆𑀢𑀺 𑀬𑀲𑁆𑀲 𑀲𑀤𑁆𑀥𑀲𑁆𑀲 𑀓𑀼𑀮𑀲𑁆𑀲 𑀲𑀗𑁆𑀖𑁄 𑀲𑁂𑀔𑀲𑀫𑁆𑀫𑀼𑀢𑀺𑀁 𑀤𑁂𑀢𑀺, 𑀢𑀁 𑀓𑀼𑀮𑀜𑁆𑀘.

𑁨𑁨𑁦. 𑀧𑀯𑁂𑀲𑀦𑀺𑀓𑁆𑀔𑀫𑁂 𑀓𑀸𑀮𑀦𑁆𑀢𑀺 ‘‘𑀓𑁂𑀲𑀼𑀘𑀺 𑀞𑀸𑀦𑁂𑀲𑀼 𑀯𑀸𑀴𑀫𑀺𑀕𑀸 𑀯𑀸 𑀅𑀫𑀦𑀼𑀲𑁆𑀲𑀸 𑀯𑀸 𑀳𑁄𑀦𑁆𑀢𑀺, 𑀇𑀫𑀁 𑀓𑀸𑀮𑀁 𑀧𑀯𑀺𑀲𑀺𑀢𑀩𑁆𑀩𑀁 𑀦𑀺𑀓𑁆𑀔𑀫𑀺𑀢𑀩𑁆𑀩𑀜𑁆𑀘𑀸’’𑀢𑀺 𑀏𑀯𑀁 𑀧𑀯𑁂𑀲𑀦𑀺𑀓𑁆𑀔𑀫𑁂 𑀘 𑀓𑀸𑀮𑀁. 𑀏𑀢𑀁 𑀧𑀦 𑀆𑀲𑀦𑀧𑀜𑁆𑀜𑀧𑀦𑀸𑀤𑀺𑀓𑀁 𑀲𑀩𑁆𑀩𑀁 𑀯𑀢𑁆𑀢𑀁 𑀯𑀼𑀟𑁆𑀠𑀢𑀭𑁂 𑀆𑀕𑀢𑁂 𑀘𑀻𑀯𑀭𑀓𑀫𑁆𑀫𑀸𑀤𑀺𑀁 𑀯𑀸 𑀦𑀸𑀢𑀺𑀕𑀺𑀮𑀸𑀦𑀲𑁆𑀲 𑀪𑁂𑀲𑀚𑁆𑀚𑀁 𑀯𑀸 𑀞𑀧𑁂𑀢𑁆𑀯𑀸𑀧𑀺 𑀓𑀸𑀢𑀩𑁆𑀩𑀁. 𑀫𑀳𑀸𑀕𑀺𑀮𑀸𑀦𑀲𑁆𑀲 𑀧𑀦 𑀪𑁂𑀲𑀚𑁆𑀚𑀫𑁂𑀯 𑀓𑀸𑀢𑀩𑁆𑀩𑀁. 𑀘𑁂𑀢𑀺𑀬𑀗𑁆𑀕𑀡𑀯𑀢𑁆𑀢𑀁 𑀓𑀭𑁄𑀦𑁆𑀢𑁂𑀦𑀸𑀧𑀺 𑀢𑀲𑁆𑀲 𑀯𑀢𑁆𑀢𑀁 𑀓𑀸𑀢𑀼𑀁 𑀆𑀭𑀪𑀺𑀢𑀩𑁆𑀩𑀁. 𑀧𑀡𑁆𑀟𑀺𑀢𑁄 𑀳𑀺 𑀆𑀕𑀦𑁆𑀢𑀼𑀓𑁄 ‘‘𑀓𑀭𑁄𑀳𑀺 𑀢𑀸𑀯 𑀪𑁂𑀲𑀚𑁆𑀚𑀁, 𑀘𑁂𑀢𑀺𑀬𑀗𑁆𑀕𑀡𑀁 𑀲𑀫𑁆𑀫𑀚𑁆𑀚𑀸𑀳𑀻’’𑀢𑀺 𑀘 𑀯𑀤𑁂𑀬𑁆𑀬. 𑀅𑀧𑀺𑀘 𑀩𑀻𑀚𑀦𑁂𑀦 𑀩𑀻𑀚𑀺𑀢𑀩𑁆𑀩𑁄, 𑀧𑀸𑀤𑀸𑀧𑀺𑀲𑁆𑀲 𑀥𑁄𑀯𑀺𑀢𑀩𑁆𑀩𑀸, 𑀢𑁂𑀮𑁂𑀦 𑀫𑀓𑁆𑀔𑀺𑀢𑀩𑁆𑀩𑀸. 𑀧𑀺𑀝𑁆𑀞𑀺 𑀘𑁂 𑀆𑀕𑀺𑀮𑀸𑀬𑀢𑀺, 𑀲𑀫𑁆𑀩𑀸𑀥𑁂𑀢𑀩𑁆𑀩𑀸. 𑀦𑀯𑀓𑀲𑁆𑀲 𑀧𑀦 𑀆𑀕𑀦𑁆𑀢𑀼𑀓𑀲𑁆𑀲 ‘‘𑀇𑀤𑀫𑀸𑀲𑀦𑀁, 𑀏𑀢𑁆𑀣 𑀦𑀺𑀲𑀻𑀤𑀸’’𑀢𑀺𑀆𑀤𑀺𑀦𑀸 𑀆𑀘𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀺𑀲𑀺𑀦𑁆𑀦𑁄𑀬𑁂𑀯𑀸’’𑀢𑀺𑀆𑀤𑀺𑀫𑀸𑀳. 𑀦𑀺𑀲𑀺𑀦𑁆𑀦𑁄𑀬𑁂𑀯𑀸𑀢𑀺 𑀇𑀫𑀺𑀦𑀸 ‘‘𑀞𑀺𑀢𑁄𑀬𑁂𑀯𑀸’’𑀢𑀺𑀆𑀤𑀺𑀁 𑀉𑀧𑀮𑀓𑁆𑀔𑁂𑀢𑀺. 𑀲𑀫𑀼𑀤𑁆𑀤𑀺𑀲𑁂𑀢𑀺 𑀆𑀤𑀭𑁂𑀦 𑀯𑀤𑁂𑀬𑁆𑀬. 𑀆𑀯𑀸𑀲𑀺𑀓𑀯𑀢𑁆𑀢𑀁.

‘‘𑀯𑀢𑁆𑀢’’𑀦𑁆𑀢𑀺 𑀧𑀦 𑀲𑀸𑀫𑀜𑁆𑀜𑁂𑀦 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀦 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀢𑀺𑀅𑀮𑁆𑀮𑀻𑀬𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀫𑀳𑀸𑀣𑁂𑀭𑀲𑁆𑀲 𑀦𑀺𑀲𑀺𑀦𑁆𑀦𑀸𑀲𑀦𑀢𑁄 𑀏𑀓𑀁 𑀤𑁆𑀯𑁂 𑀆𑀲𑀦𑀸𑀦𑀺 𑀞𑀧𑁂𑀢𑁆𑀯𑀸 ‘‘𑀦𑀺𑀲𑀻𑀤𑀸’’𑀢𑀺 𑀯𑀼𑀢𑁆𑀢𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀦𑀯𑀸𑀧𑀺 𑀪𑀺𑀓𑁆𑀔𑀽 𑀆𑀲𑀦𑁂𑀦 𑀧𑀝𑀺𑀩𑀸𑀳𑀺𑀢𑀩𑁆𑀩𑀸, 𑀦 𑀲𑀗𑁆𑀖𑀸𑀝𑀺𑀁 𑀑𑀢𑁆𑀣𑀭𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀲𑀤𑁆𑀤𑀁 𑀅𑀓𑀢𑁆𑀯𑀸 𑀉𑀤𑀓𑀓𑀺𑀘𑁆𑀘𑀁 𑀓𑀸𑀢𑀩𑁆𑀩𑀁, 𑀬𑀣𑀸 𑀲𑀽𑀧𑀲𑁆𑀲 𑀑𑀓𑀸𑀲𑁄 𑀳𑁄𑀢𑀺, 𑀏𑀯𑀫𑀢𑁆𑀢𑀸𑀬 𑀑𑀤𑀦𑁄 𑀕𑀡𑁆𑀳𑀺𑀢𑀩𑁆𑀩𑁄, 𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 ‘‘𑀞𑀧𑁂𑀢𑁆𑀯𑀸 𑀅𑀧𑁆𑀧𑀓𑀁 𑀑𑀤𑀦𑀸𑀤𑀺𑀓𑀁 𑀲𑀩𑁆𑀩𑀁 𑀲𑀩𑁆𑀩𑁂𑀲𑀁 𑀲𑀫𑀓𑀁 𑀲𑀫𑁆𑀧𑀸𑀤𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑀁, 𑀦 𑀢𑀸𑀯 𑀣𑁂𑀭𑁂𑀦 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀪𑀼𑀢𑁆𑀢𑀸𑀯𑀺𑀦𑀸 𑀦 𑀢𑀸𑀯 𑀉𑀤𑀓𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀪𑀢𑁆𑀢𑀕𑁆𑀕𑀢𑁄 𑀦𑀺𑀯𑀢𑁆𑀢𑀦𑁆𑀢𑁂𑀳𑀺 𑀬𑀣𑀸𑀦𑀼𑀭𑀽𑀧𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀭𑀴𑀸𑀬 𑀧𑀸𑀴𑀺𑀬𑀸 𑀕𑀦𑁆𑀢𑀩𑁆𑀩𑀦𑁆𑀢𑀺 𑀏𑀯𑀫𑀸𑀤𑀺𑀓𑀜𑁆𑀘 𑀢𑀤𑀦𑀼𑀭𑀽𑀧𑀁 𑀲𑁂𑀔𑀺𑀬𑀯𑀢𑁆𑀢𑀜𑁆𑀘 𑀲𑀫𑁆𑀧𑀸𑀤𑁂𑀢𑀩𑁆𑀩𑀦𑁆𑀢𑀺 𑀇𑀤𑀁 𑀪𑀢𑁆𑀢𑀕𑁆𑀕𑀯𑀢𑁆𑀢𑀜𑁆𑀘 𑀲𑀸𑀥𑀼𑀓𑀁 𑀅𑀢𑀭𑀫𑀸𑀦𑁂𑀦 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄, ‘‘𑀇𑀫𑀺𑀦𑀸 𑀧𑀯𑀺𑀲𑀺𑀲𑁆𑀲𑀸𑀫𑀺, 𑀇𑀫𑀺𑀦𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀯𑁂𑀲𑀦𑀁 𑀧𑀯𑀺𑀲𑀦𑁆𑀢𑁂𑀦 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁, 𑀦𑀸𑀢𑀺𑀲𑀳𑀲𑀸 𑀧𑀯𑀺𑀲𑀺𑀢𑀩𑁆𑀩𑀁, 𑀦𑀸𑀢𑀺𑀲𑀳𑀲𑀸 𑀦𑀺𑀓𑁆𑀔𑀫𑀺𑀢𑀩𑁆𑀩𑀁, 𑀦𑀸𑀢𑀺𑀤𑀽𑀭𑁂 𑀦𑀘𑁆𑀘𑀸𑀲𑀦𑁆𑀦𑁂 𑀞𑀸𑀢𑀩𑁆𑀩𑀁, 𑀦𑀸𑀢𑀺𑀘𑀺𑀭𑀁 𑀞𑀸𑀢𑀩𑁆𑀩𑀁, 𑀦𑀸𑀢𑀺𑀮𑀳𑀼𑀓𑀁 𑀦𑀺𑀯𑀢𑁆𑀢𑀺𑀢𑀩𑁆𑀩𑀁, 𑀤𑀸𑀢𑀼𑀓𑀸𑀫𑀢𑀸𑀓𑀸𑀭𑀁 𑀜𑀢𑁆𑀯𑀸 𑀞𑀸𑀢𑀩𑁆𑀩𑀁, 𑀬𑁄 𑀧𑀞𑀫𑀁 𑀕𑀸𑀫𑀢𑁄 𑀧𑀝𑀺𑀓𑁆𑀓𑀫𑀢𑀺, 𑀢𑁂𑀦 𑀆𑀲𑀦𑀧𑀜𑁆𑀜𑀧𑀦𑀸𑀤𑀺 𑀲𑀩𑁆𑀩𑀁 𑀓𑀸𑀢𑀩𑁆𑀩𑀁, 𑀬𑁄 𑀧𑀘𑁆𑀙𑀸, 𑀢𑁂𑀦 𑀆𑀲𑀦𑀼𑀤𑁆𑀥𑀭𑀡𑀸𑀤𑀺 𑀲𑀩𑁆𑀩𑀁 𑀓𑀸𑀢𑀩𑁆𑀩𑀦𑁆𑀢𑀺 𑀏𑀯𑀫𑀸𑀤𑀺𑀓𑀜𑁆𑀘 𑀢𑀤𑀦𑀼𑀭𑀽𑀧𑀁 𑀲𑁂𑀔𑀺𑀬𑀯𑀢𑁆𑀢𑀜𑁆𑀘 𑀲𑀫𑁆𑀧𑀸𑀤𑁂𑀢𑀩𑁆𑀩𑀦𑁆𑀢𑀺 𑀇𑀤𑀁 𑀧𑀺𑀡𑁆𑀟𑀘𑀸𑀭𑀺𑀓𑀯𑀢𑁆𑀢𑀜𑁆𑀘 𑀓𑀸𑀢𑀩𑁆𑀩𑀁.

𑀲𑁂𑀦𑀸𑀲𑀦𑀝𑁆𑀞𑀸𑀦𑁂 𑀲𑀩𑁆𑀩𑀁 𑀯𑀢𑁆𑀢𑀜𑁆𑀘 𑀲𑀫𑁆𑀧𑀸𑀤𑁂𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀸𑀥𑀼𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀸𑀭𑀼𑀧𑀺𑀢𑁆𑀯𑀸 𑀘 𑀅𑀢𑀭𑀫𑀸𑀦𑁂𑀦 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄𑀢𑀺𑀆𑀤𑀺 𑀲𑀩𑁆𑀩𑀁 𑀧𑀺𑀡𑁆𑀟𑀘𑀸𑀭𑀺𑀓𑀯𑀢𑁆𑀢𑀁 𑀓𑀸𑀢𑀩𑁆𑀩𑀁. 𑀧𑀸𑀦𑀻𑀬𑀧𑀭𑀺𑀪𑁄𑀚𑀦𑀻𑀬𑀅𑀕𑁆𑀕𑀺𑀅𑀭𑀡𑀺𑀲𑀳𑀺𑀢𑀓𑀢𑁆𑀢𑀭𑀤𑀡𑁆𑀟𑀸 𑀉𑀧𑀝𑁆𑀞𑀧𑁂𑀢𑀩𑁆𑀩𑀸, 𑀦𑀓𑁆𑀔𑀢𑁆𑀢𑀧𑀤𑀸𑀦𑀺 𑀲𑀓𑀮𑀸𑀦𑀺 𑀯𑀸 𑀏𑀓𑀤𑁂𑀲𑀸𑀦𑀺 𑀯𑀸 𑀉𑀕𑁆𑀕𑀳𑁂𑀢𑀩𑁆𑀩𑀸𑀦𑀺, 𑀤𑀺𑀲𑀸𑀓𑀼𑀲𑀮𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀇𑀤𑀁 𑀆𑀭𑀜𑁆𑀜𑀺𑀓𑀯𑀢𑁆𑀢𑀜𑁆𑀘 𑀉𑀤𑁆𑀤𑀺𑀝𑁆𑀞𑀁𑀬𑁂𑀯 𑀳𑁄𑀢𑀻𑀢𑀺 𑀅𑀯𑀕𑀦𑁆𑀢𑀩𑁆𑀩𑀦𑁆𑀢𑀺.

𑀯𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.