𑁨𑁯. 𑀫𑀺𑀘𑁆𑀙𑀸𑀚𑀻𑀯𑀯𑀺𑀯𑀚𑁆𑀚𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁯. 𑀆𑀕𑀫𑁆𑀫 𑀚𑀻𑀯𑀦𑁆𑀢𑀺 𑀏𑀢𑁂𑀦𑀸𑀢𑀺 𑀆𑀚𑀻𑀯𑁄, 𑀓𑁄 𑀲𑁄? 𑀧𑀘𑁆𑀘𑀬𑀧𑀭𑀺𑀬𑁂𑀲𑀦𑀯𑀸𑀬𑀸𑀫𑁄. 𑀫𑀺𑀘𑁆𑀙𑀸𑀬 𑀆𑀚𑀻𑀯𑁄, 𑀢𑀲𑁆𑀲 𑀯𑀺𑀯𑀚𑁆𑀚𑀦𑀸 𑀫𑀺𑀘𑁆𑀙𑀸𑀚𑀻𑀯𑀯𑀺𑀯𑀚𑁆𑀚𑀦𑀸. 𑀲𑀸 𑀧𑀦𑀸𑀬𑀁 𑀅𑀢𑁆𑀣𑀢𑁄 ‘‘𑀇𑀥 𑀪𑀺𑀓𑁆𑀔𑀼 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄’’𑀢𑀺 (𑀯𑀺𑀪. 𑁫𑁦𑁮) 𑀏𑀯𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀫𑁆𑀧𑀢𑁆𑀢𑀺𑀬𑀸 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦 𑀆𑀕𑀢𑁄 𑀆𑀘𑀸𑀭𑁄 𑀘𑁂𑀯 𑀬𑀣𑀸𑀓𑁆𑀓𑀫𑁂𑀦 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀣𑀼𑀮𑁆𑀮𑀘𑁆𑀘𑀬𑀧𑀸𑀘𑀺𑀢𑁆𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀤𑀼𑀩𑁆𑀪𑀸𑀲𑀺𑀢𑀤𑀼𑀓𑁆𑀓𑀝𑀸𑀦𑀁 𑀓𑀸𑀭𑀡𑀪𑀽𑀢𑀲𑁆𑀲 𑀆𑀚𑀻𑀯𑀳𑁂𑀢𑀼𑀧𑀜𑁆𑀜𑀢𑁆𑀢𑀸𑀦𑀁 𑀅𑀪𑀽𑀢𑀸𑀭𑁄𑀘𑀦𑀲𑀜𑁆𑀘𑀭𑀺𑀢𑁆𑀢𑀅𑀜𑁆𑀜𑀸𑀧𑀤𑁂𑀲𑀪𑀽𑀢𑀸𑀭𑁄𑀘𑀦𑀧𑀡𑀻𑀢𑀪𑁄𑀚𑀦𑀯𑀺𑀜𑁆𑀜𑀢𑁆𑀢𑀺 𑀪𑀺𑀓𑁆𑀔𑀼𑀦𑀺𑀪𑁄𑀚𑀦𑀯𑀺𑀜𑁆𑀜𑀢𑁆𑀢𑀺𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀸𑀦𑀁 𑀯𑀻𑀢𑀺𑀓𑁆𑀓𑀫𑀲𑁆𑀲 𑀘 𑀓𑀼𑀳𑀦𑀮𑀧𑀦𑀦𑁂𑀫𑀺𑀢𑁆𑀢𑀺𑀓𑀢𑀸 𑀦𑀺𑀧𑁆𑀧𑁂𑀲𑀺𑀓𑀢𑀸 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀢𑀸𑀢𑀺 𑀏𑀯𑀫𑀸𑀤𑀻𑀦𑀜𑁆𑀘 𑀧𑀸𑀧𑀥𑀫𑁆𑀫𑀸𑀦𑀁 𑀯𑀲𑁂𑀦 𑀧𑀯𑀢𑁆𑀢𑀁 𑀫𑀺𑀘𑁆𑀙𑀸𑀚𑀻𑀯𑀯𑀺𑀭𑀢𑀺𑀲𑀗𑁆𑀔𑀸𑀢𑀁 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀜𑁆𑀘. 𑀢𑀲𑁆𑀲𑀸 𑀧𑀦 𑀓𑀲𑁆𑀲𑀘𑀺 𑀇𑀥 𑀤𑀲𑁆𑀲𑀦𑀁 𑀬𑀣𑀸 𑀤𑀲𑁆𑀲𑁂𑀢𑀼𑀫𑀸𑀭𑀤𑁆𑀥𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀗𑁆𑀔𑀸𑀢𑀸𑀬 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀬, 𑀘𑀢𑀼𑀭𑀸𑀭𑀓𑁆𑀔𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀆𑀕𑀢𑀸𑀦𑀁 𑀅𑀥𑀺𑀘𑀺𑀢𑁆𑀢𑀅𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀲𑀺𑀓𑁆𑀔𑀸𑀦𑀜𑁆𑀘 𑀉𑀧𑀓𑀸𑀭𑀓𑀥𑀫𑁆𑀫𑀧𑀭𑀺𑀤𑀻𑀧𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀏𑀯𑀫𑀻𑀤𑀺𑀲𑀁 𑀯𑀺𑀜𑁆𑀜𑁂𑀬𑁆𑀬𑀁, 𑀢𑀁 𑀤𑀲𑁆𑀲𑁂𑀢𑀺 ‘‘𑀤𑀸𑀭𑀼’’𑀦𑁆𑀢𑀺𑀆𑀤𑀺𑀦𑀸. 𑀢𑀢𑁆𑀣 ‘‘𑀤𑀸𑀭𑀼’’𑀦𑁆𑀢𑀺𑀆𑀤𑀻𑀦𑀺 ‘‘𑀤𑀤𑁂’’𑀢𑀺 𑀏𑀢𑀲𑁆𑀲 𑀧𑀢𑁆𑀢𑀺𑀓𑀫𑁆𑀫𑀁. 𑀘𑀼𑀡𑁆𑀡𑀁 𑀲𑀺𑀭𑀻𑀲𑀘𑀼𑀡𑁆𑀡𑀸𑀤𑀺𑀦𑀳𑀸𑀦𑀺𑀬𑀘𑀼𑀡𑁆𑀡𑀁. 𑀦𑁆𑀳𑀸𑀦𑀫𑀼𑀔𑁄𑀤𑀓𑀦𑁆𑀢𑀺 𑀦𑁆𑀳𑀸𑀦𑀜𑁆𑀘 𑀫𑀼𑀔𑀜𑁆𑀘, 𑀢𑀲𑁆𑀲 𑀉𑀤𑀓𑀦𑁆𑀢𑀺 𑀲𑀫𑀸𑀲𑁄. 𑀆𑀤𑀺-𑀲𑀤𑁆𑀤𑁂𑀦 𑀧𑀡𑁆𑀡𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀼𑀮𑀲𑀗𑁆𑀕𑀳𑀸𑀢𑀺 𑀓𑀼𑀮𑀲𑀗𑁆𑀕𑀳𑀓𑀭𑀡𑁂𑀦.

𑁨𑁧𑁦. 𑀧𑀭𑀺𑀪𑀝𑀢𑀺 𑀧𑀭𑁂𑀲𑀁 𑀤𑀸𑀭𑀓𑁂 𑀧𑀭𑀺𑀳𑀭𑀢𑀻𑀢𑀺 𑀧𑀭𑀺𑀪𑀝𑁄, 𑀧𑀭𑀺𑀪𑀝𑀲𑁆𑀲 𑀓𑀫𑁆𑀫𑀁 𑀧𑀸𑀭𑀺𑀪𑀝𑀓𑁄, 𑀲𑀓𑀢𑁆𑀣𑁂 𑀢𑀫𑁂𑀯 𑀧𑀸𑀭𑀺𑀪𑀝𑀓𑀢𑀸. 𑀅𑀮𑀗𑁆𑀓𑀭𑀡𑀸𑀤𑀺𑀦𑀸 𑀓𑀼𑀮𑀤𑀸𑀭𑀓𑀧𑀭𑀺𑀳𑀭𑀡𑀲𑁆𑀲𑁂𑀢𑀁 𑀦𑀸𑀫𑀁. 𑀫𑀼𑀕𑁆𑀕𑀲𑁆𑀲 𑀲𑀽𑀧𑁄 𑀫𑀼𑀕𑁆𑀕𑀲𑀽𑀧𑁄, 𑀲𑁄𑀬𑁂𑀯 𑀫𑀼𑀕𑁆𑀕𑀲𑀼𑀧𑁆𑀧𑁄. 𑀬𑀣𑀸 𑀫𑀼𑀕𑁆𑀕𑀲𑀽𑀧𑁂 𑀧𑀘𑁆𑀘𑀫𑀸𑀦𑁂 𑀓𑁄𑀘𑀺𑀤𑁂𑀯 𑀫𑀼𑀕𑁆𑀕𑁄 𑀦 𑀧𑀘𑁆𑀘𑀢𑀺, 𑀅𑀯𑀲𑁂𑀲𑀸 𑀧𑀘𑁆𑀘𑀦𑁆𑀢𑀺, 𑀏𑀯𑀁 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀘𑀦𑁂 𑀓𑀺𑀜𑁆𑀘𑀺𑀤𑁂𑀯 𑀲𑀘𑁆𑀘𑀁 𑀳𑁄𑀢𑀺, 𑀲𑁂𑀲𑀁 𑀅𑀮𑀺𑀓𑀁, 𑀅𑀬𑀁 𑀧𑀼𑀕𑁆𑀕𑀮𑁄 𑀫𑀼𑀕𑁆𑀕𑀲𑀽𑀧𑀲𑀤𑀺𑀲𑀢𑀸𑀬 𑀉𑀧𑀘𑀸𑀭𑁂𑀦 ‘‘𑀫𑀼𑀕𑁆𑀕𑀲𑀼𑀧𑁆𑀧𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀪𑀸𑀯𑁄 𑀫𑀼𑀕𑁆𑀕𑀲𑀼𑀧𑁆𑀧𑀢𑀸. 𑀲𑀘𑁆𑀘𑀸𑀮𑀺𑀓𑁂𑀦 𑀚𑀻𑀯𑀺𑀢𑀓𑀧𑁆𑀧𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀖𑀭𑀯𑀢𑁆𑀣𑀼𑀆𑀤𑀺𑀲𑀫𑁆𑀩𑀦𑁆𑀥𑀺𑀦𑀻 𑀯𑀺𑀚𑁆𑀚𑀸 𑀯𑀢𑁆𑀣𑀼𑀯𑀺𑀚𑁆𑀚𑀸. 𑀧𑀸𑀭𑀺𑀪𑀝𑀓𑀢𑀸 𑀘𑀸𑀢𑀺𑀆𑀤𑀺𑀦𑀸 𑀤𑁆𑀯𑀦𑁆𑀤𑁄 𑀦𑀧𑀼𑀁𑀲𑀓𑀢𑁆𑀢𑀸𑀪𑀸𑀯𑁂 𑀧𑀸𑀭𑀺…𑀧𑁂… 𑀯𑀺𑀚𑁆𑀚𑀸, 𑀢𑀸𑀬. 𑀭𑀲𑁆𑀲𑁄 𑀧𑀦 𑀕𑀸𑀣𑀸𑀩𑀦𑁆𑀥𑀯𑀲𑁂𑀦, 𑀢𑀣𑀸 𑀤𑀻𑀖𑁄. 𑀧𑀳𑀺𑀡𑀸𑀦𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀫𑁆𑀫𑁂 𑀢𑁂𑀲𑀁 𑀢𑁂𑀲𑀁 𑀦𑀺𑀬𑀼𑀜𑁆𑀚𑀦𑀁 𑀧𑀳𑁂𑀡𑀁. 𑀆𑀤𑀭𑁂𑀦 𑀤𑀽𑀢𑁂𑀦 𑀓𑀸𑀭𑁂𑀢𑀩𑁆𑀩𑀁 𑀬𑀁 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀤𑀽𑀢𑀓𑀫𑁆𑀫𑀁. 𑀧𑀺𑀲𑀦𑀁 𑀧𑁂𑀲𑀦𑀁, 𑀚𑀗𑁆𑀖𑀸𑀬 𑀧𑀸𑀤𑁂𑀦 𑀧𑁂𑀲𑀦𑀁 𑀚𑀗𑁆𑀖𑀧𑁂𑀲𑀦𑀁, 𑀢𑀫𑀲𑁆𑀲 𑀅𑀢𑁆𑀣𑀻𑀢𑀺 𑀚𑀗𑁆𑀖𑀧𑁂𑀲𑀦𑀺𑀬𑀁. 𑀢𑁂𑀲𑀁 𑀢𑁂𑀲𑀁 𑀕𑀺𑀳𑀻𑀦𑀁 𑀕𑀸𑀫𑀦𑁆𑀢𑀭𑀤𑁂𑀲𑀦𑁆𑀢𑀭𑀸𑀤𑀻𑀲𑀼 𑀲𑀸𑀲𑀦𑀧𑀝𑀺𑀲𑀸𑀲𑀦𑀳𑀭𑀡𑀲𑁆𑀲𑁂𑀢𑀫𑀥𑀺𑀯𑀘𑀦𑀁.

𑁨𑁧𑁧. 𑀮𑀸𑀪𑀸𑀲𑀸𑀬 𑀮𑀜𑁆𑀚𑀤𑀸𑀦𑀁 𑀅𑀦𑀼𑀧𑁆𑀧𑀤𑀸𑀦𑀁. 𑀲𑀫𑁆𑀩𑀼𑀤𑁆𑀥𑀧𑁆𑀧𑀝𑀺𑀓𑀼𑀝𑁆𑀞𑁂𑀦 𑀩𑀼𑀤𑁆𑀥𑀕𑀭𑀳𑀺𑀢𑁂𑀦 𑀅𑀗𑁆𑀕𑀯𑀺𑀚𑁆𑀚𑀸𑀦𑀓𑁆𑀔𑀢𑁆𑀢𑀯𑀺𑀚𑁆𑀚𑀸𑀲𑀼𑀧𑀺𑀦𑀯𑀺𑀚𑁆𑀚𑀸𑀪𑀽𑀢𑀯𑀺𑀚𑁆𑀚𑀸𑀤𑀺𑀦𑀸 𑀅𑀜𑁆𑀜𑁂𑀦 𑀯𑀸.

𑁨𑁧𑁨. 𑀅𑀜𑁆𑀜𑀸𑀢𑀓𑀸𑀦𑀁 𑀅𑀧𑁆𑀧𑀯𑀸𑀭𑀺𑀢𑀸𑀦𑀁 𑀯𑀺𑀜𑁆𑀜𑀸𑀧𑀦𑀁 𑀯𑀺𑀜𑁆𑀜𑀢𑁆𑀢𑀺, 𑀬𑀸𑀘𑀦𑀯𑀲𑁂𑀦 𑀧𑀯𑀢𑁆𑀢𑁄 𑀓𑀸𑀬𑀯𑀘𑀻𑀧𑀬𑁄𑀕𑁄. 𑀩𑀼𑀤𑁆𑀥𑀧𑁆𑀧𑀝𑀺𑀓𑀼𑀝𑁆𑀞𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦 𑀧𑀘𑁆𑀘𑀬𑀧𑀭𑀺𑀬𑁂𑀲𑀦𑀸 𑀅𑀦𑁂𑀲𑀦𑀸. 𑀅𑀪𑀽𑀢𑀲𑁆𑀲 𑀅𑀢𑁆𑀢𑀦𑀺 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀉𑀮𑁆𑀮𑀧𑀦𑀁 𑀓𑀣𑀦𑀁 𑀅𑀪𑀽𑀢𑀼𑀮𑁆𑀮𑀧𑀦𑀸. 𑀓𑀼𑀳𑀦𑀸𑀤𑀻𑀳𑀻𑀢𑀺 𑀓𑀼𑀳𑀦𑀸𑀮𑀧𑀦𑀸𑀤𑀻𑀳𑀺. 𑀢𑀢𑁆𑀣 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀧𑀘𑁆𑀘𑀬𑀧𑁆𑀧𑀝𑀺𑀲𑁂𑀯𑀦𑀲𑀸𑀫𑀦𑁆𑀢𑀚𑀧𑁆𑀧𑀦𑀇𑀭𑀺𑀬𑀸𑀧𑀣𑀲𑀡𑁆𑀞𑀸𑀧𑀦𑀯𑀲𑁂𑀦 𑀚𑀦𑀯𑀺𑀫𑁆𑀳𑀸𑀧𑀦𑀸 𑀓𑀼𑀳𑀦𑀸. 𑀯𑀺𑀳𑀸𑀭𑀁 𑀆𑀕𑀢𑁂 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 ‘‘𑀓𑀺𑀫𑀢𑁆𑀣𑀸𑀬 𑀪𑁄𑀦𑁆𑀢𑁄 𑀆𑀕𑀢𑀸, 𑀓𑀺𑀁 𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑁂𑀢𑀼’’𑀦𑁆𑀢𑀺 𑀯𑀸 ‘‘𑀫𑀬𑀺 𑀭𑀸𑀚𑀸 𑀧𑀲𑀦𑁆𑀦𑁄, 𑀅𑀲𑀼𑀓𑁄 𑀘 𑀅𑀲𑀼𑀓𑁄 𑀘 𑀭𑀸𑀚𑀫𑀳𑀸𑀫𑀢𑁆𑀢𑁄 𑀧𑀲𑀦𑁆𑀦𑁄’’𑀢𑀺 𑀯𑀸 𑀆𑀤𑀺𑀦𑀸 𑀦𑀬𑁂𑀦 𑀆𑀮𑀧𑀦𑀸 𑀮𑀧𑀦𑀸. 𑀔𑀸𑀤𑀦𑀻𑀬𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀓𑀺𑀁 𑀔𑀸𑀤𑀦𑀻𑀬𑀁 𑀮𑀪𑀺𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀺𑀫𑀺𑀢𑁆𑀢𑀓𑀭𑀡𑀸𑀤𑀺 𑀦𑁂𑀫𑀺𑀢𑁆𑀢𑀓𑀢𑀸. ‘‘𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀕𑀭𑀳𑀡𑀸𑀦𑀺 𑀘 ‘‘𑀏𑀢𑀁 𑀏𑀢𑁆𑀣 𑀓𑀣𑁂𑀣𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀸𑀘𑀸𑀬 𑀉𑀓𑁆𑀔𑀺𑀧𑀦𑀸𑀤𑀺 𑀘 𑀦𑀺𑀧𑁆𑀧𑁂𑀲𑀺𑀓𑀢𑀸. 𑀅𑀧𑁆𑀧𑁂𑀦 𑀮𑀸𑀪𑁂𑀦 𑀩𑀳𑀼𑀓𑀁 𑀯𑀜𑁆𑀘𑁂𑀢𑁆𑀯𑀸 𑀕𑀳𑁂𑀢𑀼𑀁 𑀇𑀘𑁆𑀙𑀦𑀁 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀢𑀸. 𑀓𑀼𑀮𑀤𑀽𑀲𑀸𑀤𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀭𑀽𑀧𑀺𑀬𑀧𑁆𑀧𑀝𑀺𑀕𑁆𑀕𑀳𑀡𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀸 𑀲𑀗𑁆𑀕𑀬𑁆𑀳𑀦𑁆𑀢𑀻𑀢𑀺.

𑀫𑀺𑀘𑁆𑀙𑀸𑀚𑀻𑀯𑀯𑀺𑀯𑀚𑁆𑀚𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.