𑁨𑁮. 𑀓𑀫𑁆𑀫𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁯𑁯. 𑀯𑀕𑁆𑀕𑁂𑀦 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀲𑀫𑀕𑁆𑀕𑁂𑀦 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀯𑀕𑁆𑀕𑁂𑀦 𑀥𑀫𑁆𑀫𑀓𑀫𑁆𑀫𑀜𑁆𑀘 𑀲𑀫𑀕𑁆𑀕𑁂𑀦 𑀥𑀫𑁆𑀫𑀓𑀫𑁆𑀫𑀜𑁆𑀘𑀸𑀢𑀺 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀻𑀢𑀺 𑀲𑁂𑀲𑁄. 𑀢𑀢𑁆𑀣 𑀯𑀕𑁆𑀕𑁂𑀦 𑀅𑀥𑀫𑁆𑀫𑀓𑀫𑁆𑀫𑀦𑁆𑀢𑀺 𑀯𑀕𑁆𑀕𑁂𑀦 𑀲𑀗𑁆𑀖𑁂𑀦 𑀓𑀭𑀡𑀻𑀬𑀁 𑀅𑀥𑀫𑁆𑀫𑀓𑀫𑁆𑀫𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀯𑀕𑁆𑀕𑁄𑀢𑀺 𑀘 𑀲𑀫𑀽𑀳𑁄 𑀯𑀼𑀘𑁆𑀘𑀢𑀺, 𑀲𑁄 𑀘 𑀘𑀢𑀼𑀯𑀕𑁆𑀕𑀸𑀤𑀺𑀓𑀭𑀡𑀻𑀬𑀸𑀤𑀻𑀲𑀼 𑀬𑀸𑀯𑀢𑀺𑀓𑀸𑀦𑀁 𑀓𑀫𑁆𑀫𑀧𑁆𑀧𑀢𑁆𑀢𑀸𑀦𑀁 𑀅𑀲𑀫𑁆𑀫𑀼𑀔𑀻𑀪𑀸𑀯𑁂𑀦, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑀸𑀦𑀸𑀳𑀭𑀡𑁂𑀦, 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀜𑁆𑀘 𑀧𑀝𑀺𑀓𑁆𑀓𑁄𑀲𑀦𑁂𑀦, 𑀢𑁂𑀲𑀼 𑀏𑀓𑁂𑀦𑀸𑀧𑀺 𑀯𑀸 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀅𑀥𑀫𑁆𑀫𑀓𑀫𑁆𑀫𑀦𑁆𑀢𑀺 𑀏𑀢𑁆𑀣 𑀧𑀦 𑀥𑀫𑁆𑀫𑁄 𑀦𑀸𑀫 ‘‘𑀉𑀢𑁆𑀢𑀺𑀤𑀼𑀢𑀺𑀬𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀏𑀓𑀸𑀬 𑀉𑀢𑁆𑀢𑀺𑀬𑀸 𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀘 𑀓𑀫𑁆𑀫𑀯𑀸𑀘𑀁 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀅𑀥𑀫𑁆𑀫𑀓𑀫𑁆𑀫’’𑀦𑁆𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁩𑁮𑁭) 𑀏𑀓𑀸𑀬𑁂𑀯 𑀜𑀢𑁆𑀢𑀺𑀬𑀸, 𑀢𑀣𑀸 𑀤𑁆𑀯𑀻𑀳𑀺 𑀜𑀢𑁆𑀢𑀻𑀳𑀺 𑀏𑀓𑀸𑀬𑁂𑀯 𑀯𑀸 𑀓𑀫𑁆𑀫𑀯𑀸𑀘𑀸𑀬, 𑀢𑀣𑀸 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀻𑀢𑀺 𑀆𑀕𑀢𑀸𑀬 𑀘 𑀢𑀣𑀸 𑀳𑀸𑀧𑀦𑀅𑀜𑁆𑀜𑀣𑀸𑀓𑀭𑀡𑀪𑀸𑀯𑁂𑀦 𑀜𑀢𑁆𑀢𑀺𑀓𑀫𑁆𑀫𑀁 𑀞𑀧𑁂𑀢𑁆𑀯𑀸 𑀜𑀢𑁆𑀢𑀺𑀘𑀢𑀼𑀢𑁆𑀣𑁂 𑀘 𑀓𑀫𑁆𑀫𑁂 𑀆𑀕𑀢𑀸𑀬 𑀘 𑀅𑀓𑀫𑁆𑀫𑀸𑀭𑀳𑀲𑁆𑀲 𑀢𑀚𑁆𑀚𑀦𑀻𑀬𑀧𑀩𑁆𑀩𑀸𑀚𑀦𑀻𑀬𑀧𑀝𑀺𑀲𑀸𑀭𑀡𑀻𑀬𑀦𑀺𑀬𑀲𑁆𑀲𑀢𑀺𑀯𑀺𑀥𑀉𑀓𑁆𑀔𑁂𑀧𑀦𑀻𑀬𑀸𑀦𑀁 𑀲𑀢𑁆𑀢𑀦𑁆𑀦𑀁 𑀓𑀫𑁆𑀫𑀸𑀦𑀁 𑀓𑀭𑀡𑀯𑀲𑁂𑀦, 𑀓𑀫𑁆𑀫𑀸𑀭𑀳𑀲𑁆𑀲 𑀘 𑀯𑀺𑀭𑀸𑀥𑁂𑀢𑁆𑀯𑀸 𑀓𑀭𑀡𑀯𑀲𑁂𑀦 𑀆𑀕𑀢𑀸𑀬 𑀘 𑀧𑀸𑀴𑀺𑀬𑀸 𑀯𑀺𑀧𑀭𑀻𑀢𑀸 𑀘 𑀧𑀸𑀴𑀺, 𑀉𑀧𑀲𑀫𑁆𑀧𑀤𑀸𑀤𑀺𑀓𑀫𑁆𑀫𑀯𑀲𑁂𑀦 𑀆𑀕𑀢𑀸 𑀘 𑀧𑀸𑀴𑀺, 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑀢𑀺𑀯𑀺𑀦𑀬𑀅𑀫𑀽𑀴𑁆𑀳𑀯𑀺𑀦𑀬𑀧𑀝𑀺𑀜𑁆𑀜𑀸𑀓𑀭𑀡𑀬𑁂𑀪𑀼𑀬𑁆𑀬𑀲𑀺𑀓𑀸𑀢𑀲𑁆𑀲𑀧𑀸𑀧𑀺- 𑀬𑀲𑀺𑀓𑀸𑀢𑀺𑀡𑀯𑀢𑁆𑀣𑀸𑀭𑀓𑀲𑀗𑁆𑀔𑀸𑀢𑀸𑀦𑀁 𑀲𑀢𑁆𑀢𑀦𑁆𑀦𑀁 𑀓𑀫𑁆𑀫𑀸𑀦𑀁 𑀬𑀣𑀸𑀮𑀸𑀪𑀓𑀭𑀡𑀯𑀲𑁂𑀦 𑀆𑀕𑀢𑀸 𑀘 𑀧𑀸𑀴𑀺, 𑀢𑁂𑀦 𑀓𑀭𑀡𑀻𑀬𑀁 𑀅𑀧𑀮𑁄𑀓𑀦𑀜𑀢𑁆𑀢𑀺𑀜𑀢𑁆𑀢𑀺𑀤𑀼𑀢𑀺𑀬𑀜𑀢𑁆𑀢𑀺𑀘𑀢𑀼𑀢𑁆𑀣𑀲𑀗𑁆𑀔𑀸𑀢𑀁 𑀘𑀢𑀼𑀩𑁆𑀩𑀺𑀥𑀁 𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀁, 𑀢𑀧𑁆𑀧𑀝𑀺𑀧𑀓𑁆𑀔𑀁 𑀅𑀥𑀫𑁆𑀫𑀓𑀫𑁆𑀫𑀁. 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀲𑀫𑀕𑁆𑀕𑁄 𑀥𑀫𑁆𑀫𑀓𑀫𑁆𑀫𑀜𑁆𑀘 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑁄 𑀬𑀣𑀸𑀯𑀼𑀢𑁆𑀢𑀸 𑀧𑀸𑀴𑀺 𑀅𑀲𑁆𑀲 𑀅𑀢𑁆𑀣𑀺, 𑀥𑀫𑁆𑀫𑁂𑀦 𑀓𑀢𑀁 𑀯𑀸𑀢𑀺 𑀥𑀫𑁆𑀫𑀺𑀓𑀁. 𑀢𑀩𑁆𑀩𑀺𑀧𑀭𑀻𑀢𑀁 𑀅𑀥𑀫𑁆𑀫𑀺𑀓𑀁. 𑀘𑀢𑀼𑀢𑁆𑀣𑀁𑀬𑁂𑀯𑀸𑀢𑀺 𑀢𑁂𑀲𑀼 𑀘𑀢𑀽𑀲𑀼 𑀓𑀫𑁆𑀫𑁂𑀲𑀼 𑀘𑀢𑀼𑀦𑁆𑀦𑀁 𑀧𑀽𑀭𑀡𑀁 𑀲𑀫𑀕𑁆𑀕𑁂𑀦 𑀥𑀫𑁆𑀫𑀺𑀓𑀁. 𑀲𑁂𑀲𑀓𑀫𑁆𑀫𑀸𑀦𑀁 𑀪𑀸𑀯𑁂𑀦 𑀪𑀺𑀓𑁆𑀔𑀼𑀦𑀸 𑀤𑀼𑀓𑁆𑀓𑀝𑀲𑁆𑀲 𑀪𑀯𑀦𑀁 𑀮𑀓𑁆𑀔𑀻𑀬𑀢𑀻𑀢𑀺 𑀲𑁂𑀲𑀓𑀫𑁆𑀫𑁂𑀲𑀽𑀢𑀺 𑀪𑀸𑀯𑀮𑀓𑁆𑀔𑀡𑁂 𑀲𑀢𑁆𑀢𑀫𑀻. 𑀤𑀼𑀓𑁆𑀓𑀝𑀦𑁆𑀢𑀺 𑀓𑀼𑀧𑁆𑀧𑀸𑀦𑀁 𑀅𑀥𑀫𑁆𑀫𑀓𑀫𑁆𑀫𑀯𑀕𑁆𑀕𑀓𑀫𑁆𑀫𑀸𑀦𑀁 𑀓𑀢𑀢𑁆𑀢𑀸 𑀤𑀼𑀓𑁆𑀓𑀝𑀁.

𑁨𑁦𑁦. 𑀇𑀤𑀸𑀦𑀺 𑀬𑀤𑀺𑀤𑀁 𑀲𑀫𑀕𑁆𑀕𑁂𑀦 𑀥𑀫𑁆𑀫𑀺𑀓𑀁 𑀦𑀸𑀫, 𑀢𑀁 𑀬𑁂𑀳𑀺 𑀲𑀗𑁆𑀖𑁂𑀳𑀺 𑀓𑀸𑀢𑀩𑁆𑀩𑀁, 𑀢𑁂𑀲𑀁 𑀧𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀼𑀯𑀕𑁆𑀕𑁄’’𑀢𑀺𑀆𑀤𑀺𑀫𑀸𑀳. 𑀘𑀢𑁆𑀯𑀸𑀤𑀻𑀦𑀁 𑀲𑀗𑁆𑀔𑁆𑀬𑁂𑀬𑀯𑀼𑀢𑁆𑀢𑀺𑀢𑁆𑀢𑀸 𑀘𑀢𑀼𑀦𑁆𑀦𑀁 𑀯𑀕𑁆𑀕𑁄𑀢𑀺𑀆𑀤𑀺𑀦𑀸 𑀯𑀺𑀕𑁆𑀕𑀳𑁄. 𑀤𑀲𑀯𑀻𑀲𑀢𑀺𑀯𑀕𑁆𑀕𑀺𑀓𑁄𑀢𑀺 𑀤𑀲𑀦𑁆𑀦𑀁 𑀯𑀻𑀲𑀢𑀺𑀬𑀸 𑀘 𑀯𑀕𑁆𑀕𑀪𑁂𑀤𑀯𑀲𑁂𑀦 𑀤𑀲𑀯𑀻𑀲𑀢𑀻𑀦𑀁 𑀯𑀕𑁆𑀕𑁄𑀢𑀺 𑀯𑀺𑀕𑁆𑀕𑀳𑁄, 𑀡𑀺𑀓𑁄 𑀲𑀓𑀢𑁆𑀣𑁂. 𑀯𑀻𑀲𑀢𑀺𑀬𑀸 𑀯𑀕𑁆𑀕𑁄, 𑀅𑀢𑀺𑀭𑁂𑀓𑁂𑀦 𑀲𑀳𑀺𑀢𑁄 𑀯𑀻𑀲𑀢𑀺𑀯𑀕𑁆𑀕𑁄𑀢𑀺 𑀯𑀺𑀕𑁆𑀕𑀳𑁄.

𑁨𑁦𑁧-𑁨. 𑀧𑀜𑁆𑀘𑀦𑁆𑀦𑀁 𑀓𑀫𑁆𑀫𑀸𑀦𑀁 𑀦𑀺𑀬𑀫𑁂𑀢𑀺 ‘‘𑀘𑀢𑀽’’𑀢𑀺𑀆𑀤𑀺𑀦𑀸. 𑀅𑀩𑁆𑀪𑀸𑀦𑀁 𑀉𑀧𑀲𑀫𑁆𑀧𑀤𑀁 𑀧𑀯𑀸𑀭𑀡𑀁 𑀞𑀧𑁂𑀢𑁆𑀯𑀸 𑀘𑀢𑀼𑀯𑀕𑁆𑀕𑁄 𑀘𑀸𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑁆𑀯𑀸 𑀲𑀩𑁆𑀩𑀓𑀫𑁆𑀫𑁂𑀲𑀼 𑀓𑀫𑁆𑀫𑀧𑁆𑀧𑀢𑁆𑀢𑁄𑀢𑀺 𑀤𑀻𑀧𑀺𑀢𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀢𑀢𑁆𑀣 𑀘-𑀲𑀤𑁆𑀤𑁄 𑀘𑀢𑀼𑀯𑀕𑁆𑀕𑀸𑀤𑀬𑁄 𑀓𑀫𑁆𑀫𑀧𑀢𑁆𑀢𑀺𑀓𑀺𑀭𑀺𑀬𑀸𑀬𑀁 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀇𑀥 𑀧𑀦 𑀲𑀩𑁆𑀩-𑀲𑀤𑁆𑀤𑁄 𑀅𑀩𑁆𑀪𑀸𑀦𑀸𑀤𑀻𑀦𑀁 𑀓𑁂𑀲𑀜𑁆𑀘𑀺 𑀞𑀧𑀺𑀢𑀢𑁆𑀢𑀸 𑀧𑀤𑁂𑀲𑀲𑀩𑁆𑀩𑁂 𑀕𑀬𑁆𑀳𑀢𑀺. 𑀓𑀫𑁆𑀫𑀧𑀢𑁆𑀢𑁄𑀢𑀺 𑀓𑀫𑁆𑀫𑀲𑁆𑀲 𑀧𑀢𑁆𑀢𑁄 𑀬𑀼𑀢𑁆𑀢𑁄 𑀅𑀦𑀼𑀭𑀽𑀧𑁄. 𑀇𑀢𑀭𑁄𑀢𑀺 𑀯𑀻𑀲𑀢𑀺𑀯𑀕𑁆𑀕𑁄 𑀅𑀢𑀺𑀭𑁂𑀓𑀯𑀻𑀲𑀢𑀺𑀯𑀕𑁆𑀕𑁄. 𑀲𑀩𑁆𑀩𑀓𑀫𑁆𑀫𑁂𑀲𑀽𑀢𑀺 𑀏𑀢𑁆𑀣 𑀧𑀦 𑀲𑀩𑁆𑀩-𑀲𑀤𑁆𑀤𑁄 𑀲𑀩𑁆𑀩𑀲𑀩𑁆𑀩𑁂. 𑀦𑀦𑀼 𑀘 𑀯𑀻𑀲𑀢𑀺𑀯𑀕𑁆𑀕𑀲𑁆𑀲 𑀓𑀫𑁆𑀫𑀧𑁆𑀧𑀢𑁆𑀢𑀪𑀸𑀯𑁂𑀲𑀢𑀺 𑀅𑀢𑀺𑀭𑁂𑀓𑀯𑀻𑀲𑀢𑀺𑀯𑀕𑁆𑀕𑀲𑁆𑀲 𑀧𑀕𑁂𑀯𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀢𑀣𑀸 𑀲𑀢𑀺 𑀲𑁄 𑀓𑀲𑁆𑀫𑀸 𑀯𑀼𑀢𑁆𑀢𑁄𑀢𑀺? 𑀲𑀘𑁆𑀘𑀁, 𑀢𑀣𑀸𑀧𑀺 𑀲𑁄 𑀘𑀢𑀼𑀯𑀕𑁆𑀕𑀸𑀤𑀺𑀦𑀸 𑀲𑀗𑁆𑀖𑁂𑀦 𑀓𑀢𑁆𑀢𑀩𑁆𑀩𑀓𑀫𑁆𑀫𑀁 𑀊𑀦𑀓𑀢𑀭𑁂𑀦 𑀦 𑀯𑀝𑁆𑀝𑀢𑀺, 𑀅𑀢𑀺𑀭𑁂𑀓𑁂𑀦 𑀧𑀦 𑀯𑀝𑁆𑀝𑀢𑀻𑀢𑀺 𑀜𑀸𑀧𑀦𑀢𑁆𑀣𑀁 𑀯𑀼𑀢𑁆𑀢𑁄.

𑁨𑁦𑁩. 𑀇𑀤𑀸𑀦𑀺 𑀘𑀢𑀼𑀯𑀕𑁆𑀕𑀸𑀤𑀺𑀓𑁂𑀦 𑀙𑀦𑁆𑀤𑀸𑀳𑀭𑀡𑁂𑀦 𑀧𑀽𑀭𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀘𑀢𑀽’’𑀢𑀺𑀆𑀤𑀺𑀦𑀸. 𑀧𑀸𑀭𑀸𑀚𑀺𑀓𑀸𑀤𑀺𑀪𑀸𑀯𑀫𑀦𑀸𑀧𑀦𑁆𑀦𑀢𑁆𑀢𑀸 𑀧𑀓𑀢𑀺𑀬𑀸 𑀲𑀪𑀸𑀯𑁂𑀦𑁂𑀯 𑀞𑀺𑀢𑁄 𑀅𑀢𑁆𑀢𑀸 𑀬𑁂𑀲𑀁, 𑀧𑀓𑀢𑁄 𑀯𑀸 𑀢𑀢𑁄𑀬𑁂𑀯 𑀓𑀫𑁆𑀫𑁂𑀲𑀼 𑀅𑀯𑀺𑀕𑀢𑁄 𑀅𑀢𑁆𑀢𑀸 𑀬𑁂𑀲𑀁 𑀢𑁂𑀢𑀺 𑀧𑀓𑀢𑀢𑁆𑀢𑀓𑀸, 𑀧𑀸𑀭𑀸𑀚𑀺𑀓𑀉𑀓𑁆𑀔𑀺𑀢𑁆𑀢𑀓𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑁂𑀳𑀺 𑀅𑀜𑁆𑀜𑁂. 𑀧𑀭𑁂𑀢𑀺 𑀏𑀓𑀲𑀻𑀫𑀝𑁆𑀞𑀸 𑀢𑀸𑀤𑀺𑀲𑀸𑀬𑁂𑀯 𑀅𑀜𑁆𑀜𑁂. 𑀲𑁂𑀲𑁂𑀧𑀻𑀢𑀺 𑀅𑀯𑀲𑁂𑀲𑁂 𑀧𑀜𑁆𑀘𑀯𑀕𑁆𑀕𑀸𑀤𑀺𑀓𑀭𑀡𑀻𑀬𑁂𑀧𑀺.

𑁨𑁦𑁪. 𑀇𑀤𑀸𑀦𑀺 𑀯𑀢𑁆𑀣𑀼𑀜𑀢𑁆𑀢𑀺𑀅𑀦𑀼𑀲𑁆𑀲𑀸𑀯𑀦𑀲𑀻𑀫𑀸𑀤𑀺𑀯𑀺𑀧𑀢𑁆𑀢𑀺𑀢𑁄, 𑀓𑀫𑁆𑀫𑀯𑀺𑀧𑀢𑁆𑀢𑀻𑀲𑀼 𑀧𑀭𑀺𑀲𑀢𑁄 𑀘 𑀧𑀝𑀺𑀓𑁆𑀓𑁄𑀲𑀢𑁄 𑀘 𑀓𑀫𑁆𑀫𑀲𑁆𑀲 𑀓𑀼𑀧𑁆𑀧𑀸𑀓𑀼𑀧𑁆𑀧𑀪𑀸𑀯𑀁 𑀢𑀢𑁆𑀣 𑀘 𑀆𑀧𑀢𑁆𑀢𑀺𑀆𑀤𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀽’’𑀢𑀺𑀆𑀤𑀺 𑀫𑀸𑀳. 𑀘𑀢𑀼𑀯𑀕𑁆𑀕𑀸𑀤𑀺𑀓𑀢𑁆𑀢𑀩𑁆𑀩𑀁 𑀅𑀲𑀁𑀯𑀸𑀲𑀕𑀡𑀧𑀽𑀭𑀁 𑀯𑀸 𑀓𑀫𑁆𑀫𑀸𑀭𑀳𑀕𑀡𑀧𑀽𑀭𑀁 𑀯𑀸 𑀓𑀫𑁆𑀫𑀜𑁆𑀘 𑀕𑀭𑀼𑀓𑀝𑁆𑀞𑀕𑀡𑀧𑀽𑀭𑀁 𑀯𑀸 𑀧𑀭𑀺𑀯𑀸𑀲𑀸𑀤𑀺𑀓𑀫𑁆𑀫𑀜𑁆𑀘𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 𑀓𑀫𑁆𑀫𑀸𑀭𑀳𑁄 𑀕𑀭𑀼𑀓𑀝𑁆𑀞𑀢𑁄 𑀅𑀜𑁆𑀜𑁄, 𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑁄 𑀧𑀦 𑀕𑀭𑀼𑀓𑀝𑁆𑀞𑁄 𑀕𑀡𑀧𑀽𑀭𑀓𑁄 𑀳𑁄𑀢𑀺𑀬𑁂𑀯. 𑀓𑀢𑀦𑁆𑀢𑀺 𑀘𑀢𑀼𑀯𑀕𑁆𑀕𑀸𑀤𑀺𑀦𑀸 𑀓𑀢𑀁.

𑁨𑁦𑁫. 𑀯𑀸𑀭𑁂𑀬𑁆𑀬𑀸𑀢𑀺 𑀅𑀦𑁆𑀢𑀭𑀸𑀬𑁂 𑀅𑀲𑀢𑀺 𑀅𑀦𑁆𑀢𑀫𑀲𑁄 𑀏𑀓𑁄𑀧𑀺 𑀯𑀸𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀦𑁆𑀢𑀭𑀸𑀬𑁂𑀢𑀺 𑀧𑀸𑀧𑁂𑀳𑀺 𑀓𑀭𑀺𑀬𑀫𑀸𑀦𑁂 𑀚𑀻𑀯𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁂 𑀲𑀢𑀺. 𑀅𑀦𑀦𑁆𑀢𑀭𑀸𑀬𑀺𑀓𑀸 𑀘𑁂 𑀦 𑀯𑀸𑀭𑁂𑀦𑁆𑀢𑀺, 𑀤𑀼𑀓𑁆𑀓𑀝𑀁. 𑀤𑀺𑀝𑁆𑀞𑀸𑀯𑀺𑀦𑁆𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀁 𑀮𑀤𑁆𑀥𑀺𑀁 ‘‘𑀅𑀥𑀫𑁆𑀫𑀓𑀫𑁆𑀫𑀁 𑀇𑀤𑀁, 𑀦 𑀫𑁂𑀢𑀁 𑀔𑀫𑀢𑀻’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀆𑀯𑀺 𑀓𑀭𑁂𑀬𑁆𑀬𑀼𑀦𑁆𑀢𑀺 𑀲𑁂𑀲𑁄. 𑀏𑀓𑁄𑀥𑀺𑀝𑁆𑀞𑀸𑀦𑀦𑁆𑀢𑀺 𑀏𑀓𑁄 𑀪𑀺𑀓𑁆𑀔𑀼 ‘‘𑀦 𑀫𑁂𑀢𑀁 𑀔𑀫𑀢𑀻’’𑀢𑀺 𑀅𑀥𑀺𑀝𑁆𑀞𑀸𑀦𑀁 𑀓𑀭𑁂𑀬𑁆𑀬𑀸𑀢𑀺 𑀲𑁂𑀲𑁄. 𑀢𑀢𑁄𑀥𑀺𑀓𑀸𑀢𑀺 𑀢𑀻𑀳𑀺 𑀅𑀥𑀺𑀓𑀸. 𑀢𑁂 𑀧𑀦 𑀲𑀗𑁆𑀖𑀢𑁆𑀢𑀸 𑀧𑀳𑁄𑀦𑁆𑀢𑀺 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀦𑀺𑀢𑁆𑀣𑀭𑀺𑀢𑀼𑀁.

𑁨𑁦𑁬. 𑀔𑀺𑀢𑁆𑀢𑀘𑀺𑀢𑁆𑀢𑁄 𑀦𑀸𑀫 𑀉𑀫𑁆𑀫𑀢𑁆𑀢𑀓𑁄. 𑀤𑀼𑀔𑀝𑁆𑀝𑀺𑀢𑁄𑀢𑀺 𑀯𑁂𑀤𑀦𑀝𑁆𑀝𑁄. 𑀦 𑀭𑀽𑀳𑀢𑀻𑀢𑀺 𑀕𑀬𑁆𑀳𑀢𑁆𑀢𑀁 𑀦 𑀭𑁄𑀳𑀢𑀻𑀢𑀺 𑀅𑀢𑁆𑀣𑁄.

𑁨𑁦𑁭. 𑀅𑀦𑁆𑀢𑀫𑀲𑁄 𑀅𑀦𑀦𑁆𑀢𑀭𑀲𑁆𑀲𑀸𑀧𑀺 𑀆𑀭𑁄𑀘𑁂𑀦𑁆𑀢𑀲𑁆𑀲 𑀧𑀓𑀢…𑀧𑁂… 𑀪𑀺𑀓𑁆𑀔𑀼𑀦𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑀲𑀻𑀫𑀸𑀬𑀁 𑀢𑀺𑀝𑁆𑀞𑀢𑀻𑀢𑀺 𑀏𑀓𑀲𑀻𑀫𑀝𑁆𑀞𑁄. 𑀲𑀫𑁄 𑀲𑀁𑀯𑀸𑀲𑁄 𑀅𑀲𑁆𑀲𑀸𑀢𑀺 𑀲𑀫𑀲𑀁𑀯𑀸𑀲𑁄. 𑀏𑀓𑀲𑀻𑀫𑀝𑁆𑀞𑁄 𑀘 𑀲𑁄 𑀲𑀫𑀲𑀁𑀯𑀸𑀲𑁄 𑀘, 𑀧𑀓𑀢𑀢𑁆𑀢𑁄 𑀘 𑀲𑁄 𑀏𑀓𑀲𑀻𑀫𑀝𑁆𑀞𑀲𑀫𑀲𑀁𑀯𑀸𑀲𑁄 𑀘, 𑀲𑁄 𑀘𑀸𑀬𑀁 𑀪𑀺𑀓𑁆𑀔𑀼 𑀘𑀸𑀢𑀺 𑀲𑀩𑁆𑀩𑀢𑁆𑀣 𑀓𑀫𑁆𑀫𑀥𑀸𑀭𑀬𑁄, 𑀢𑀲𑁆𑀲. 𑀏𑀢𑁆𑀣 𑀧𑀦 𑀅𑀯𑀺𑀧𑀦𑁆𑀦𑀲𑀻𑀮𑁄 𑀧𑀓𑀢𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀆𑀭𑁄𑀘𑁂𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀧𑀓𑀸𑀲𑁂𑀦𑁆𑀢𑀲𑁆𑀲. 𑀭𑀽𑀳𑀢𑀻𑀢𑀺 𑀧𑀝𑀺𑀓𑁆𑀔𑁂𑀧𑁄 𑀭𑀼𑀳𑀢𑀺.

𑁨𑁦𑁮. 𑀥𑀫𑁆𑀫𑀺𑀓𑀁 𑀓𑀫𑁆𑀫𑀦𑁆𑀢𑀺 𑀥𑀫𑁆𑀫𑁂𑀦 𑀓𑀢𑁆𑀢𑀩𑁆𑀩𑀁 𑀅𑀧𑀮𑁄𑀓𑀦𑀸𑀤𑀺𑀓𑀫𑁆𑀫𑀁. 𑀧𑀝𑀺𑀓𑁆𑀓𑁄𑀲𑁂𑀬𑁆𑀬𑀸𑀢𑀺 𑀦𑀺𑀯𑀸𑀭𑁂𑀬𑁆𑀬. 𑀢𑀺𑀭𑁄𑀓𑁆𑀔𑀸 𑀓𑀸𑀬𑀲𑀸𑀫𑀕𑁆𑀕𑀺𑀁 𑀯𑀸 𑀙𑀦𑁆𑀤𑀁 𑀯𑀸𑀢𑀺 𑀯𑀸-𑀲𑀤𑁆𑀤𑀁 𑀦𑁂𑀢𑁆𑀯𑀸 𑀅𑀢𑁆𑀣𑁄 𑀦𑁂𑀢𑀩𑁆𑀩𑁄. 𑀢𑀺𑀭𑁄𑀓𑁆𑀔𑀸𑀢𑀺 𑀧𑀭𑀫𑁆𑀫𑀼𑀔𑀸. 𑀲𑁄 𑀲𑀫𑁆𑀫𑀼𑀔𑀸-𑀲𑀤𑁆𑀤𑁄 𑀯𑀺𑀬 𑀦𑀺𑀧𑀸𑀢𑁄, 𑀅𑀣 𑀯𑀸 𑀅𑀓𑁆𑀔𑀸 𑀇𑀦𑁆𑀤𑁆𑀭𑀺𑀬𑀯𑀺𑀲𑀬𑀢𑁄 𑀢𑀺𑀭𑁄 𑀩𑀳𑀻𑀢𑀺 𑀅𑀢𑁆𑀣𑁄𑀢𑀺.

𑀓𑀫𑁆𑀫𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.