𑁧𑁪. 𑀪𑀽𑀫𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁩𑁬. 𑀬𑀸𑀲𑀼 𑀯𑀼𑀢𑁆𑀣𑀁 𑀧𑀓𑁆𑀓𑀜𑁆𑀘 𑀓𑀧𑁆𑀧𑀢𑀺, 𑀢𑀸 𑀓𑀧𑁆𑀧𑀺𑀬𑀸 𑀪𑀽𑀫𑀺𑀬𑁄 𑀲𑀫𑁆𑀫𑀼𑀢𑀺 𑀘 𑀲𑀫𑁆𑀫𑀼𑀢𑀺𑀓𑀼𑀝𑀺 𑀘…𑀧𑁂… 𑀕𑀳𑀧𑀢𑀺 𑀘 𑀕𑀳𑀧𑀢𑀺𑀓𑀼𑀝𑀺 𑀘𑀸𑀢𑀺 𑀇𑀫𑀸 𑀘𑀢𑀲𑁆𑀲𑁄 𑀳𑁄𑀦𑁆𑀢𑀻𑀢𑀺 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁨𑁯𑁫) 𑀯𑀼𑀢𑁆𑀢𑀸𑀬 𑀉𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬, 𑀅𑀧𑀮𑁄𑀓𑀦𑀓𑀫𑁆𑀫𑀯𑀲𑁂𑀦 𑀯𑀸 𑀲𑀸𑀯𑁂𑀢𑁆𑀯𑀸 𑀲𑀫𑁆𑀫𑀸 𑀉𑀢𑁆𑀢𑀺𑀲𑀫𑁆𑀧𑀦𑁆𑀦𑀁 𑀓𑀭𑀻𑀬𑀢𑀻𑀢𑀺 𑀲𑀫𑁆𑀫𑀼𑀢𑀺, 𑀣𑀫𑁆𑀪𑀸𑀦𑀁 𑀪𑀺𑀢𑁆𑀢𑀺𑀧𑀸𑀤𑀸𑀦𑀁 𑀯𑀸 𑀉𑀕𑁆𑀕𑀫𑀦𑀁 𑀉𑀤𑁆𑀥𑀁 𑀓𑀢𑁆𑀯𑀸 𑀞𑀧𑀦𑀁, ‘‘𑀓𑀧𑁆𑀧𑀺𑀬𑀓𑀼𑀝𑀺𑀁 𑀓𑀭𑁄𑀫𑀸’’𑀢𑀺 𑀯𑀸𑀘𑀸𑀬 𑀲𑀸𑀯𑀦𑀜𑁆𑀘 𑀅𑀦𑁆𑀢𑀁 𑀬𑀲𑁆𑀲𑀸 𑀲𑀸 𑀉𑀲𑁆𑀲𑀸𑀯𑀦𑀦𑁆𑀢𑀸. 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀣𑀫𑁆𑀪𑀧𑁆𑀧𑀢𑀺𑀝𑁆𑀞𑀸𑀦𑀜𑁆𑀘 𑀯𑀘𑀦𑀧𑀭𑀺𑀬𑁄𑀲𑀸𑀦𑀜𑁆𑀘 𑀲𑀫𑀓𑀸𑀮𑀁 𑀯𑀝𑁆𑀝𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁯𑁫). 𑀦𑀺𑀲𑀸𑀤𑀦𑀁 𑀧𑀯𑀺𑀲𑀦𑀁 𑀲𑀦𑁆𑀦𑀺𑀯𑁂𑀲𑀦𑀁 𑀦𑀺𑀲𑀸𑀤𑁄, 𑀕𑀼𑀦𑁆𑀦𑀁 𑀯𑀺𑀬 𑀦𑀺𑀲𑀸𑀤𑁄 𑀏𑀢𑀺𑀲𑁆𑀲𑀸𑀢𑀺 𑀕𑁄𑀦𑀺𑀲𑀸𑀤𑀺. 𑀪𑀺𑀓𑁆𑀔𑀼𑀁 𑀞𑀧𑁂𑀢𑁆𑀯𑀸 𑀲𑁂𑀲𑀲𑀳𑀥𑀫𑁆𑀫𑀺𑀓𑀸 𑀲𑀩𑁆𑀩𑁂 𑀘 𑀤𑁂𑀯𑀫𑀦𑀼𑀲𑁆𑀲𑀸 𑀇𑀥 𑀕𑀳𑀧𑀢𑀻𑀢𑀺 𑀲𑀸𑀫𑀜𑁆𑀜𑁂𑀦 𑀅𑀥𑀺𑀧𑁆𑀧𑁂𑀢𑀸. 𑀏𑀢𑁆𑀣 𑀧𑀦 𑀕𑀳𑀧𑀢𑀺𑀲𑀫𑁆𑀩𑀦𑁆𑀥𑀺𑀦𑀻 𑀓𑀼𑀝𑀺 𑀤𑀻𑀖𑁂𑀦 𑀕𑀳𑀧𑀢𑀻.

‘‘𑀬𑀁 𑀧𑀦 𑀅𑀓𑀧𑁆𑀧𑀺𑀬𑀪𑀽𑀫𑀺𑀬𑀁 𑀲𑀳𑀲𑁂𑀬𑁆𑀬𑀧𑁆𑀧𑀳𑁄𑀦𑀓𑁂 𑀕𑁂𑀳𑁂 𑀯𑀼𑀢𑁆𑀣’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁯𑁫) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀬𑀁 𑀲𑀗𑁆𑀖𑁄 𑀆𑀓𑀗𑁆𑀔𑀢𑀺 𑀯𑀺𑀳𑀸𑀭𑀁 𑀯𑀸 𑀅𑀟𑁆𑀠𑀬𑁄𑀕𑀁 𑀯𑀸 𑀧𑀸𑀲𑀸𑀤𑀁 𑀯𑀸 𑀳𑀫𑁆𑀫𑀺𑀬𑀁 𑀯𑀸 𑀕𑀼𑀳𑀁 𑀯𑀸 𑀮𑁂𑀡𑀸𑀤𑀺𑀁 𑀯𑀸, 𑀢𑁂𑀲𑀫𑁆𑀧𑀺 𑀲𑀸𑀫𑀜𑁆𑀜𑀯𑀘𑀦𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀢𑀁𑀢𑀁𑀮𑀓𑁆𑀔𑀡𑀧𑁆𑀧𑀢𑁆𑀢𑀸 𑀲𑀳𑀲𑁂𑀬𑁆𑀬𑀧𑁆𑀧𑀳𑁄𑀦𑀓𑀸 𑀮𑁂𑀡𑀸𑀤𑀬𑁄 𑀘𑀢𑀽𑀲𑁆𑀯𑁂𑀯 𑀓𑀼𑀝𑀻𑀲𑀼 𑀅𑀦𑁆𑀢𑁄𑀕𑀥𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀸𑀲𑀼 𑀘𑀢𑀽𑀲𑀼 𑀲𑀳𑀲𑁂𑀬𑁆𑀬𑀧𑁆𑀧𑀳𑁄𑀦𑀓𑁂 𑀧𑀤𑁂𑀲𑁂 𑀬𑀁 𑀲𑀗𑁆𑀖𑀺𑀓𑀁 𑀧𑀼𑀕𑁆𑀕𑀮𑀺𑀓𑀁 𑀯𑀸 𑀪𑀺𑀓𑁆𑀔𑀼𑀲𑀦𑁆𑀢𑀓𑀁 𑀏𑀓𑀭𑀢𑁆𑀢𑀫𑁆𑀧𑀺 𑀅𑀦𑁆𑀢𑁄𑀯𑀼𑀢𑁆𑀣𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀧𑀓𑁆𑀓𑀜𑁆𑀘 𑀬𑀸𑀯𑀓𑀸𑀮𑀺𑀓𑀁 𑀬𑀸𑀫𑀓𑀸𑀮𑀺𑀓𑀜𑁆𑀘 𑀅𑀦𑁆𑀢𑁄𑀯𑀼𑀢𑁆𑀣𑀅𑀦𑁆𑀢𑁄𑀧𑀓𑁆𑀓𑀲𑀗𑁆𑀔𑀁 𑀦 𑀕𑀘𑁆𑀙𑀢𑀺, 𑀓𑁄 𑀧𑀦 𑀯𑀸𑀤𑁄 𑀇𑀢𑀭𑀤𑁆𑀯𑀬𑁂. 𑀢𑀁 𑀧𑀦 𑀅𑀓𑀧𑁆𑀧𑀺𑀬𑀪𑀽𑀫𑀺𑀬𑀫𑁆𑀧𑀺 𑀯𑀼𑀢𑁆𑀣𑀁 𑀧𑀓𑁆𑀓𑀜𑁆𑀘 𑀯𑀝𑁆𑀝𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀸𑀲𑀼 𑀯𑀼𑀢𑁆𑀣𑀁 𑀧𑀓𑁆𑀓𑀜𑁆𑀘 𑀓𑀧𑁆𑀧𑀢𑀻’’𑀢𑀺.

𑁧𑁩𑁭. 𑀯𑀸𑀲𑀢𑁆𑀣𑀸𑀬 𑀓𑀢𑁂 𑀲𑀗𑁆𑀖𑀺𑀓𑁂 𑀯𑀸 𑀏𑀓𑀲𑀦𑁆𑀢𑀓𑁂 𑀯𑀸 𑀲𑀳𑀲𑁂𑀬𑁆𑀬𑀧𑁆𑀧𑀳𑁄𑀦𑀓𑁂 𑀕𑁂𑀳𑁂 𑀓𑀧𑁆𑀧𑀺𑀬𑀸𑀓𑀼𑀝𑀺 𑀮𑀤𑁆𑀥𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀯𑀸𑀲𑀢𑁆𑀣𑀸𑀬𑀸𑀢𑀺 𑀇𑀫𑀺𑀦𑀸 𑀅𑀯𑀸𑀲𑀢𑁆𑀣𑀸𑀬 𑀓𑀢𑀁 𑀦𑀺𑀯𑀢𑁆𑀢𑁂𑀢𑀺. 𑀏𑀓𑀲𑀦𑁆𑀢𑀓𑁂𑀢𑀺 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀓𑁂. 𑀓𑀧𑁆𑀧𑀺𑀬𑀸𑀓𑀼𑀝𑀻𑀢𑀺 𑀪𑀸𑀯𑀧𑁆𑀧𑀥𑀸𑀦𑁄𑀬𑀁 𑀦𑀺𑀤𑁆𑀤𑁂𑀲𑁄, 𑀦 𑀳𑀺 𑀕𑁂𑀳𑁂 𑀕𑁂𑀳𑀁 𑀮𑀤𑁆𑀥𑀼𑀁 𑀬𑀼𑀚𑁆𑀚𑀢𑀻𑀢𑀺 𑀓𑀧𑁆𑀧𑀺𑀬𑀓𑀼𑀝𑀺𑀢𑀸𑀢𑀺 𑀅𑀢𑁆𑀣𑁄. 𑀤𑀻𑀖𑁄 𑀧𑀦 𑀕𑀸𑀣𑀸𑀯𑀲𑁂𑀦, 𑀓𑀧𑁆𑀧𑀺𑀬𑀸 𑀓𑀼𑀝𑀺𑀢𑀸𑀢𑀺 𑀯𑀸 𑀯𑀺𑀲𑁂𑀲𑀦𑀯𑀲𑁂𑀦 𑀤𑀝𑁆𑀞𑀩𑁆𑀩𑀁. 𑀲𑀳𑀲𑁂𑀬𑁆𑀬𑀧𑁆𑀧𑀳𑁄𑀦𑀓𑁂𑀢𑀺 𑀏𑀢𑁆𑀣 𑀲𑀳𑀲𑁂𑀬𑁆𑀬𑀧𑁆𑀧𑀳𑁄𑀦𑀓𑀁 𑀯𑀸𑀲𑀸𑀕𑀸𑀭𑀮𑀓𑁆𑀔𑀡𑁂 𑀯𑀼𑀢𑁆𑀢𑀮𑀓𑁆𑀔𑀡𑀁 𑀲𑁂𑀦𑀸𑀲𑀦𑀁.

𑁧𑁩𑁮. 𑀇𑀤𑀸𑀦𑀺 𑀢𑀸 𑀓𑀼𑀝𑀺𑀬𑁄 𑀓𑀫𑁂𑀦 𑀤𑀲𑁆𑀲𑁂𑀢𑁆𑀯𑀸 𑀢𑀢𑁆𑀣 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀯𑀺𑀥𑀺𑀁, 𑀢𑀸𑀲𑀁 𑀲𑀩𑁆𑀩𑀣𑀸𑀧𑀕𑀫𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀕𑁂𑀳𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀓𑀧𑁆𑀧𑀺𑀬𑀓𑀼𑀝𑀺𑀁 𑀓𑀭𑁄𑀫, 𑀓𑀧𑁆𑀧𑀺𑀬𑀓𑀼𑀝𑀺𑀁 𑀓𑀭𑁄𑀫𑀸’’𑀢𑀺 𑀏𑀯𑀫𑀻𑀭𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀝𑁆𑀞𑀓𑀸 𑀘 𑀣𑀫𑁆𑀪𑀸 𑀘 ‘‘𑀇𑀝𑁆𑀞𑀓𑀸𑀣𑀫𑁆𑀪𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀭𑀲𑁆𑀲𑁄. 𑀇𑀝𑁆𑀞𑀓𑀣𑀫𑁆𑀪𑀸 𑀆𑀤𑀺 𑀬𑀲𑁆𑀲 𑀪𑀺𑀢𑁆𑀢𑀺𑀧𑀸𑀲𑀸𑀤𑀲𑁆𑀲𑀸𑀢𑀺 𑀩𑀳𑀼𑀩𑁆𑀩𑀻𑀳𑀺. 𑀧𑀘𑁆𑀙𑀸 𑀧𑀞𑀫𑀲𑀤𑁆𑀤𑁂𑀦 𑀓𑀫𑁆𑀫𑀥𑀸𑀭𑀬𑁄. ‘‘𑀞𑀧𑁂𑀬𑁆𑀬 𑀘𑁂, 𑀲𑀸 𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀸’’𑀢𑀺 𑀏𑀯𑀁 𑀘𑁂-𑀲𑀸-𑀲𑀤𑁆𑀤𑁂 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁩𑁯. 𑀲𑀓𑀮𑁄 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀆𑀭𑀸𑀫𑁄𑀧𑀺 𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀦𑀸𑀲𑀦𑀁 𑀧𑀭𑀺𑀓𑁆𑀔𑀺𑀢𑁆𑀢𑀁 𑀯𑀸 𑀳𑁄𑀢𑀼, 𑀅𑀧𑀭𑀺𑀓𑁆𑀔𑀺𑀢𑁆𑀢𑀁 𑀯𑀸, 𑀦 𑀢𑀁 𑀧𑀫𑀸𑀡𑀁.

𑁧𑁪𑁦. 𑀅𑀜𑁆𑀜𑁂𑀳𑀺 𑀓𑀧𑁆𑀧𑀺𑀬𑀓𑀼𑀝𑀺𑀬𑀸 𑀅𑀢𑁆𑀣𑀸𑀬 𑀤𑀺𑀦𑁆𑀦𑁄 𑀯𑀸 𑀢𑁂𑀲𑀁 𑀲𑀦𑁆𑀢𑀓𑁄 𑀯𑀸𑀢𑀺 𑀬𑁄𑀚𑀦𑀸.

𑁧𑁪𑁧. 𑀅𑀯𑀺𑀭𑁄𑀥𑀪𑀸𑀯𑁂𑀦 𑀓𑀧𑁆𑀧𑀦𑀻𑀬𑀸 𑀓𑀧𑁆𑀧𑀸, 𑀓𑀧𑁆𑀧 𑀲𑀸𑀫𑀢𑁆𑀣𑀺𑀬𑀫𑀺𑀘𑁆𑀘𑁂𑀢𑀲𑁆𑀫𑀸 𑀇𑀢𑁆𑀣𑀺𑀬𑀁 𑀆𑀧𑀘𑁆𑀘𑀬𑁂 𑀭𑀽𑀧𑀁, 𑀦 𑀓𑀧𑁆𑀧𑀸 𑀅𑀓𑀧𑁆𑀧𑀸, 𑀅𑀓𑀧𑁆𑀧𑀸 𑀘 𑀲𑀸 𑀓𑀼𑀝𑀺 𑀘𑁂𑀢𑀺 𑀅𑀓𑀧𑁆𑀧𑀓𑀼𑀝𑀺, 𑀢𑀸𑀬. 𑀲𑀧𑁆𑀧𑀺𑀆𑀤𑀻𑀢𑀺 𑀇𑀫𑀺𑀦𑀸 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀬𑀸𑀯𑀚𑀻𑀯𑀺𑀓𑀜𑁆𑀘 𑀕𑀳𑀺𑀢𑀁.

𑁧𑁪𑁨. 𑀢𑁂𑀳𑁂𑀯𑀸𑀢𑀺 𑀅𑀓𑀧𑁆𑀧𑀓𑀼𑀝𑀺𑀬𑀁 𑀯𑀼𑀢𑁆𑀣𑀲𑀧𑁆𑀧𑀺𑀆𑀤𑀻𑀳𑀺 𑀏𑀯 𑀲𑀤𑁆𑀥𑀺𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀲𑀁𑀲𑀝𑁆𑀞𑀢𑀸𑀬 ‘‘𑀲𑀢𑁆𑀢𑀸𑀳𑀁 𑀓𑀧𑁆𑀧𑀢𑁂’’𑀢𑀺 𑀯𑀼𑀢𑁆𑀢𑀁. 𑀲𑀸𑀫𑀺𑀲𑁂𑀢𑀺 𑀆𑀫𑀺𑀲𑀲𑀗𑁆𑀔𑀸𑀢𑁂𑀦 𑀧𑀼𑀭𑀺𑀫𑀤𑁆𑀯𑀬𑁂𑀦 𑀲𑀳𑀺𑀢𑁂. 𑀲𑀸𑀫𑀧𑀸𑀓𑀢𑀸𑀢𑀺 𑀲𑀸𑀫𑀁 𑀅𑀢𑁆𑀢𑀦𑀸 𑀧𑀸𑀓𑁄 𑀏𑀢𑀲𑁆𑀲𑀸𑀢𑀺 𑀲𑀸𑀫𑀧𑀸𑀓𑀁, 𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦 𑀲𑀳 𑀧𑀓𑁆𑀓𑀁 𑀲𑀸𑀫𑀺𑀲𑀁 𑀬𑀸𑀯𑀚𑀻𑀯𑀺𑀓𑀁, 𑀢𑀲𑁆𑀲 𑀪𑀸𑀯𑁄 𑀲𑀸𑀫𑀧𑀸𑀓𑀢𑀸. 𑀲𑀬𑀁 𑀧𑀓𑁆𑀓𑀁 𑀢𑀁 𑀅𑀢𑁆𑀢𑀦𑀸 𑀲𑀁𑀲𑀝𑁆𑀞𑀢𑀸𑀬 𑀢𑀫𑁆𑀧𑀺 𑀆𑀫𑀺𑀲𑀁 𑀲𑀸𑀫𑀧𑀸𑀓𑀕𑀢𑀺𑀓𑀁 𑀓𑀭𑁄𑀢𑀻𑀢𑀺 𑀢𑀲𑁆𑀲 𑀲𑀸𑀫𑀧𑀸𑀓𑀢𑀸 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁪𑁩. 𑀅𑀥𑀺𑀝𑁆𑀞𑀺𑀢𑀸𑀢𑀺 𑀧𑀢𑀺𑀝𑁆𑀞𑀺𑀢𑀸. 𑀏𑀯-𑀲𑀤𑁆𑀤𑁄 𑀢𑀺𑀝𑁆𑀞𑀢𑀺𑀲𑀤𑁆𑀤𑀲𑁆𑀲 𑀅𑀦𑁆𑀢𑁂 𑀤𑀝𑁆𑀞𑀩𑁆𑀩𑁄.

𑁧𑁪𑁪. 𑀲𑀩𑁆𑀩𑁂𑀲𑀽𑀢𑀺 𑀣𑀫𑁆𑀪𑀸𑀤𑀻𑀲𑀼 𑀲𑀓𑀮𑁂𑀲𑀼. 𑀚𑀳𑀺𑀢𑀁 𑀯𑀢𑁆𑀣𑀼 𑀓𑀼𑀝𑀺𑀪𑀽𑀫𑀺 𑀬𑀲𑁆𑀲𑀸 𑀚𑀳𑀺𑀢𑀯𑀢𑁆𑀣𑀼𑀓𑀸. 𑀧𑀭𑀺𑀓𑁆𑀔𑀺𑀢𑁆𑀢𑁂 𑀚𑀳𑀺𑀢𑀯𑀢𑁆𑀣𑀼𑀓𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀸𑀢𑀺 𑀇𑀢𑀭𑀸 𑀤𑁆𑀯𑁂 𑀓𑀼𑀝𑀺𑀬𑁄. 𑀙𑀤𑀦𑀯𑀺𑀩𑁆𑀪𑀫𑀸𑀢𑀺 𑀙𑀤𑀦𑀲𑁆𑀲 𑀯𑀺𑀦𑀸𑀲𑀸. 𑀏𑀢𑁆𑀣𑀸𑀧𑀺 ‘‘𑀚𑀳𑀺𑀢𑀯𑀢𑁆𑀣𑀼𑀓𑀸’’𑀢𑀺 𑀆𑀦𑁂𑀢𑀩𑁆𑀩𑀦𑁆𑀢𑀺.

𑀪𑀽𑀫𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.