𑁧𑁫. 𑀉𑀧𑀚𑁆𑀛𑀸𑀘𑀭𑀺𑀬𑀯𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁪𑁫. ‘‘𑀇𑀤𑀁 𑀢𑀬𑀸 𑀤𑀼𑀓𑁆𑀓𑀢𑀁, 𑀤𑀼𑀩𑁆𑀪𑀸𑀲𑀺𑀢’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀘𑁄𑀤𑀦𑀢𑁄, 𑀅𑀢𑁆𑀢𑀦𑁄 𑀯𑀚𑁆𑀚𑀁 𑀅𑀲𑁆𑀲𑀭𑀦𑁆𑀢𑀲𑁆𑀲 𑀲𑀢𑀼𑀧𑁆𑀧𑀸𑀤𑀯𑀲𑁂𑀦 𑀲𑀸𑀭𑀡𑀢𑁄, 𑀲𑀫𑁆𑀫𑀸 𑀧𑀝𑀺𑀧𑀢𑁆𑀢𑀺𑀬𑀁 𑀲𑀸𑀭𑀡𑀢𑁄 𑀧𑀯𑀢𑁆𑀢𑀸𑀧𑀦𑀢𑁄 𑀯𑀸 𑀯𑀚𑁆𑀚𑀸𑀯𑀚𑁆𑀚𑀁 𑀉𑀧𑀦𑀺𑀚𑁆𑀛𑀸𑀬𑀢𑀺 𑀪𑀼𑀲𑀁 𑀘𑀺𑀦𑁆𑀢𑁂𑀢𑀻𑀢𑀺 𑀉𑀧𑀚𑁆𑀛𑀸. 𑀉𑀧𑀚𑁆𑀛𑀸 𑀏𑀯 𑀉𑀧𑀚𑁆𑀛𑀸𑀬𑁄. ‘‘𑀏𑀯𑀁 𑀢𑀬𑀸 𑀩𑀼𑀤𑁆𑀥𑀯𑀘𑀦𑀁 𑀲𑀚𑁆𑀛𑀸𑀬𑀺𑀢𑀩𑁆𑀩𑀁, 𑀏𑀯𑀁 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀁, 𑀏𑀯𑀁 𑀧𑀝𑀺𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀆𑀘𑀸𑀭𑀲𑀺𑀓𑁆𑀔𑀸𑀧𑀦𑁂 𑀆𑀘𑀭𑀢𑀺 𑀧𑀯𑀢𑁆𑀢𑀢𑀻𑀢𑀺 𑀆𑀘𑀭𑀺𑀬𑁄. 𑀲𑁄 𑀘 𑀦𑀺𑀲𑁆𑀲𑀬𑀧𑀩𑁆𑀩𑀚𑁆𑀚𑀸𑀉𑀧𑀲𑀫𑁆𑀧𑀤𑀸𑀥𑀫𑁆𑀫𑀸𑀘𑀭𑀺𑀬𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄. 𑀉𑀧𑀚𑁆𑀛𑀸 𑀘 𑀆𑀘𑀭𑀺𑀬𑁄 𑀘 𑀉𑀧𑀚𑁆𑀛𑀸𑀘𑀭𑀺𑀬𑀸, 𑀢𑁂. 𑀦𑀺𑀲𑁆𑀲𑀸𑀬 𑀯𑀲𑀫𑀸𑀦𑁄𑀢𑀺 𑀇𑀫𑀺𑀦𑀸 𑀦𑀺𑀲𑁆𑀲𑀬𑀧𑀩𑁆𑀩𑀚𑁆𑀚𑀸𑀉𑀧𑀲𑀫𑁆𑀧𑀤𑀸𑀥𑀫𑁆𑀫𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀬𑁄 𑀦𑀺𑀲𑁆𑀲𑀸𑀬 𑀯𑀲𑀢𑀺, 𑀢𑀁 𑀤𑀲𑁆𑀲𑁂𑀢𑀺. 𑀘𑀢𑀽𑀲𑀼 𑀳𑀺 𑀢𑁂𑀲𑀼 𑀦𑀺𑀲𑁆𑀲𑀬𑀦𑁆𑀢𑁂𑀯𑀸𑀲𑀺𑀓𑁂𑀦 𑀬𑀸𑀯 𑀆𑀘𑀭𑀺𑀬𑀁 𑀦𑀺𑀲𑁆𑀲𑀸𑀬 𑀯𑀲𑀢𑀺, 𑀢𑀸𑀯𑀲𑀩𑁆𑀩𑀁 𑀆𑀘𑀭𑀺𑀬𑀯𑀢𑁆𑀢𑀁 𑀓𑀸𑀢𑀩𑁆𑀩𑀁, 𑀦𑁂𑀢𑀭𑁂𑀳𑀺. 𑀇𑀢𑀭𑁂𑀳𑀺, 𑀦𑀺𑀲𑁆𑀲𑀬𑀫𑀼𑀢𑁆𑀢𑀓𑁂𑀳𑀺𑀧𑀺 𑀬𑀸𑀯 𑀘𑀻𑀯𑀭𑀭𑀚𑀦𑀁, 𑀢𑀸𑀯 𑀘 𑀅𑀭𑀢𑀺𑀯𑀺𑀦𑁄𑀤𑀦𑀸𑀤𑀺𑀓𑀜𑁆𑀘 𑀯𑀢𑁆𑀢𑀁 𑀓𑀸𑀢𑀩𑁆𑀩𑀁. 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀤𑀸𑀦𑀸𑀤𑀺𑀫𑁆𑀳𑀺 𑀧𑀦 𑀏𑀢𑁂𑀲𑀁 𑀅𑀦𑀸𑀧𑀢𑁆𑀢𑀺. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀧𑀦 𑀉𑀧𑀚𑁆𑀛𑀸𑀬𑀸𑀦𑀁 𑀬𑀸𑀯 𑀘𑀻𑀯𑀭𑀭𑀚𑀦𑀁, 𑀢𑀸𑀯 𑀘 𑀅𑀭𑀢𑀺𑀯𑀺𑀦𑁄𑀤𑀦𑀸𑀤𑀺𑀓𑀜𑁆𑀘 𑀅𑀓𑀭𑁄𑀦𑁆𑀢𑀲𑁆𑀲 𑀦𑀺𑀲𑁆𑀲𑀬𑀫𑀼𑀢𑁆𑀢𑀓𑀲𑁆𑀲𑀸𑀧𑀺 𑀅𑀫𑀼𑀢𑁆𑀢𑀓𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑁂𑀯. 𑀏𑀓𑀘𑁆𑀘𑀲𑁆𑀲 𑀧𑀢𑁆𑀢𑀤𑀸𑀦𑀸𑀤𑀺𑀢𑁄 𑀧𑀝𑁆𑀞𑀸𑀬 𑀅𑀫𑀼𑀢𑁆𑀢𑀦𑀺𑀲𑁆𑀲𑀬𑀲𑁆𑀲𑁂𑀯 𑀆𑀧𑀢𑁆𑀢𑀺. 𑀢𑁂𑀲𑀼 𑀫𑀚𑁆𑀛𑁂 𑀤𑁆𑀯𑁂 𑀆𑀘𑀭𑀺𑀬𑀲𑁆𑀲 𑀬𑀸𑀯𑀚𑀻𑀯𑀁 𑀪𑀸𑀭𑀸. 𑀇𑀢𑀭𑁂 𑀧𑀦 𑀬𑀸𑀯 𑀲𑀫𑀻𑀧𑁂 𑀯𑀲𑀦𑁆𑀢𑀺, 𑀢𑀸𑀯𑀤𑁂𑀯, 𑀢𑀲𑁆𑀫𑀸 𑀆𑀘𑀭𑀺𑀬𑁂𑀦𑀸𑀧𑀺 𑀢𑁂𑀲𑀼 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁, 𑀉𑀧𑀚𑁆𑀛𑀸𑀬𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀲𑀼𑀧𑁂𑀲𑀮𑁄𑀢𑀺 𑀧𑀺𑀬𑀁 𑀲𑀻𑀮𑀫𑀲𑁆𑀲𑀸𑀢𑀺 𑀧𑁂𑀲𑀮𑁄, 𑀯𑀼𑀤𑁆𑀥𑀺, 𑀬-𑀮𑁄𑀧𑁂𑀦 𑀈-𑀓𑀸𑀭𑀲𑁆𑀲 𑀅𑀢𑁆𑀢𑀓𑀭𑀡𑁂𑀦, 𑀲𑀼𑀝𑁆𑀞𑀼 𑀧𑁂𑀲𑀮𑁄 𑀲𑀼𑀧𑁂𑀲𑀮𑁄, 𑀲𑀺𑀓𑁆𑀔𑀸𑀓𑀸𑀫𑁄𑀢𑀺 𑀅𑀢𑁆𑀣𑁄. ‘‘𑀤𑀦𑁆𑀢𑀓𑀝𑁆𑀞’’𑀦𑁆𑀢𑀺𑀆𑀤𑀺 ‘‘𑀤𑀤𑁂’’𑀢𑀺𑀫𑀲𑁆𑀲 𑀓𑀫𑁆𑀫𑀁. 𑀤𑀤𑁂𑀢𑀺 𑀲𑀫𑁆𑀫𑀸 𑀆𑀤𑀭𑁂𑀦 𑀬𑀣𑀸𑀥𑀺𑀧𑁆𑀧𑀸𑀬𑀁 𑀤𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀓𑀸𑀮𑁂𑀢𑀺 𑀢𑀤𑀦𑀼𑀭𑀽𑀧𑁂 𑀓𑀸𑀮𑁂.

𑁧𑁪𑁬. 𑀧𑀢𑁆𑀢𑁂 𑀘…𑀧𑁂… 𑀘𑀻𑀯𑀭𑁂 𑀘 𑀯𑀢𑁆𑀢𑀁 𑀘𑀭𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀭𑁂𑀢𑀺 𑀓𑀭𑁂𑀬𑁆𑀬. 𑀢𑀢𑁆𑀣 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑀭𑀺𑀖𑀁𑀲𑀦𑁆𑀢𑁂𑀦 𑀥𑁄𑀯𑀦𑀁, 𑀫𑀼𑀳𑀼𑀢𑁆𑀢𑀁 𑀉𑀡𑁆𑀳𑁂 𑀑𑀢𑀸𑀧𑀦𑀁, 𑀞𑀧𑀦𑀝𑁆𑀞𑀸𑀦𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀘𑀫𑁆𑀫𑀸𑀤𑀺𑀦𑀸 𑀓𑁂𑀦𑀘𑀺 𑀅𑀦𑁆𑀢𑀭𑀳𑀺𑀢𑀸𑀬 𑀦𑀺𑀓𑁆𑀔𑀺𑀧𑀦𑀁 𑀧𑀢𑁆𑀢𑁂 𑀯𑀢𑁆𑀢𑀁. 𑀕𑀸𑀫𑀁 𑀧𑀯𑀺𑀲𑀦𑁆𑀢𑀸𑀦𑀁 𑀦𑀺𑀯𑀸𑀲𑀦𑀓𑀸𑀬𑀩𑀦𑁆𑀥𑀦𑀲𑀗𑁆𑀖𑀸𑀝𑀺𑀤𑀸𑀦𑀁, 𑀥𑁄𑀯𑀺𑀢𑁆𑀯𑀸 𑀲𑁄𑀤𑀓𑀧𑀢𑁆𑀢𑀲𑁆𑀲 𑀤𑀸𑀦𑀁 𑀕𑀸𑀫𑀧𑁆𑀧𑀯𑁂𑀲𑁂 𑀯𑀢𑁆𑀢𑀁. 𑀬𑀤𑀺 𑀆𑀓𑀗𑁆𑀔𑀦𑁆𑀢𑀺, 𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀢𑁆𑀯𑀸 𑀘 𑀧𑀸𑀭𑀼𑀧𑀺𑀢𑁆𑀯𑀸 𑀘 𑀦𑀸𑀢𑀺𑀤𑀽𑀭𑀦𑀘𑁆𑀘𑀸𑀲𑀦𑁆𑀦𑁂 𑀕𑀫𑀦𑀁, 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀕𑁆𑀕𑀳𑀡𑀜𑁆𑀘 𑀕𑀫𑀦𑁂 𑀯𑀢𑁆𑀢𑀁. 𑀦𑀺𑀯𑀢𑁆𑀢𑁂𑀦𑁆𑀢𑁂 𑀧𑀦 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀆𑀲𑀦𑀧𑀜𑁆𑀜𑀸𑀧𑀦𑀁, 𑀧𑀸𑀤𑁄𑀤𑀓𑀸𑀤𑀺𑀉𑀧𑀦𑀺𑀓𑁆𑀔𑀺𑀧𑀦𑀁, 𑀧𑀢𑁆𑀢𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀳𑀡𑀁 𑀆𑀕𑀫𑁂 𑀆𑀕𑀫𑀦𑁂 𑀯𑀢𑁆𑀢𑀁. 𑀪𑀡𑀦𑁆𑀢𑀸𑀦𑀁 𑀅𑀦𑁆𑀢𑀭𑀸 𑀓𑀣𑀸𑀅𑀦𑁄𑀧𑀸𑀢𑀦𑀁 𑀲𑀩𑁆𑀩𑀢𑁆𑀣 𑀯𑀢𑁆𑀢𑀁. 𑀆𑀲𑀦𑀧𑀜𑁆𑀜𑀸𑀧𑀦𑀁, 𑀉𑀝𑁆𑀞𑀺𑀢𑁂𑀲𑀼 𑀆𑀲𑀦𑀉𑀤𑁆𑀥𑀭𑀡𑀁, 𑀧𑀸𑀤𑀧𑀻𑀞𑀓𑀣𑀮𑀸𑀦𑀁 𑀉𑀧𑀦𑀺𑀓𑁆𑀔𑀺𑀧𑀦𑀁, 𑀧𑀝𑀺𑀲𑀸𑀫𑀦𑀜𑁆𑀘 𑀆𑀲𑀦𑁂 𑀧𑀸𑀤𑀧𑀻𑀞𑁂 𑀧𑀸𑀤𑀓𑀣𑀮𑁂 𑀘 𑀯𑀢𑁆𑀢𑀁. 𑀥𑁄𑀢𑀧𑀸𑀤𑀝𑁆𑀞𑀧𑀦𑀓𑀁 𑀧𑀸𑀤𑀧𑀻𑀞𑀁. 𑀅𑀜𑁆𑀜𑀁 𑀓𑀣𑀮𑀁. 𑀉𑀧𑀸𑀳𑀦𑀸 𑀘 𑀘𑀻𑀯𑀭𑀜𑁆𑀘𑀸𑀢𑀺 𑀤𑁆𑀯𑀦𑁆𑀤𑁄, 𑀢𑀲𑁆𑀫𑀺𑀁. 𑀲𑀼𑀓𑁆𑀔𑀅𑀮𑁆𑀮𑀘𑁄𑀴𑁂𑀳𑀺 𑀧𑀼𑀜𑁆𑀙𑀦𑀁 𑀉𑀧𑀸𑀳𑀦𑀸𑀬 𑀯𑀢𑁆𑀢𑀁. 𑀲𑀺𑀦𑁆𑀦𑀘𑀻𑀯𑀭𑀲𑁆𑀲 𑀫𑀼𑀳𑀼𑀢𑁆𑀢𑀁 𑀑𑀢𑀸𑀧𑀦𑀁, 𑀘𑀢𑀼𑀭𑀗𑁆𑀕𑀼𑀮𑀁 𑀓𑀡𑁆𑀡𑀁 𑀉𑀲𑁆𑀲𑀸𑀭𑁂𑀢𑁆𑀯𑀸 𑀘𑀻𑀯𑀭𑀲𑀁𑀳𑀭𑀡𑀜𑁆𑀘 𑀘𑀻𑀯𑀭𑁂 𑀯𑀢𑁆𑀢𑀁.

𑁧𑁪𑁭. 𑀧𑀭𑀺𑀪𑁄𑀚𑀦𑀻𑀬…𑀧𑁂… 𑀧𑀲𑁆𑀲𑀸𑀯𑀝𑁆𑀞𑀸𑀦𑀺𑀲𑀼 𑀘 𑀯𑀺𑀳𑀸𑀭𑀲𑁄𑀥𑀦𑁂 𑀘 𑀧𑀼𑀦 𑀧𑀜𑁆𑀜𑀸𑀧𑀦𑁂 𑀘 𑀯𑀢𑁆𑀢𑀁 𑀢𑀣𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀘𑁆𑀘𑀜𑁆𑀘 𑀧𑀲𑁆𑀲𑀸𑀯𑁄 𑀘 𑀯𑀘𑁆𑀘𑀧𑀲𑁆𑀲𑀸𑀯𑀸. 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀞𑀸𑀦𑀻, 𑀓𑀼𑀝𑀺. 𑀯𑀘𑁆𑀘𑀧𑀲𑁆𑀲𑀸𑀯𑀸𑀦𑀁 𑀞𑀸𑀦𑀻𑀢𑀺 𑀢𑀧𑁆𑀧𑀼𑀭𑀺𑀲𑁄. 𑀅𑀣 𑀯𑀸 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀞𑀸𑀦𑀁, 𑀲𑁄𑀬𑁂𑀯 𑀲𑀫𑀸𑀲𑁄, 𑀯𑀘𑁆𑀘𑀧𑀲𑁆𑀲𑀸𑀯𑀲𑁆𑀲 𑀘 𑀧𑀢𑀦𑀝𑁆𑀞𑀸𑀦𑀁, 𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀇𑀝𑁆𑀞𑀕𑁂𑀳𑀸𑀤𑀺. 𑀧𑀭𑀺𑀪𑁄𑀚𑀦𑀻𑀬𑀜𑁆𑀘 𑀧𑀸𑀦𑀻𑀬𑀜𑁆𑀘 𑀯𑀘𑁆𑀘𑀧𑀲𑁆𑀲𑀸𑀯𑀝𑁆𑀞𑀸𑀦𑀻 𑀘 𑀧𑀭𑀺…𑀧𑁂… 𑀝𑁆𑀞𑀸𑀦𑀻. 𑀢𑀸𑀲𑀼 𑀢𑁂𑀲𑀼 𑀯𑀸. 𑀧𑀸𑀤𑁄𑀤𑀓𑀉𑀡𑁆𑀳𑀲𑀻𑀢𑀦𑀳𑀸𑀦𑁄𑀤𑀓𑀧𑁆𑀧𑀝𑀺𑀬𑀸𑀤𑀸𑀧𑀦𑀁 𑀧𑀭𑀺𑀪𑁄𑀚𑀦𑀻𑀬𑁂 𑀯𑀢𑁆𑀢𑀁. 𑀧𑀸𑀢𑀩𑁆𑀩𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀦𑀁 𑀉𑀧𑀝𑁆𑀞𑀸𑀧𑀦𑀜𑁆𑀘 𑀧𑀸𑀦𑀻𑀬𑁂 𑀯𑀢𑁆𑀢𑀁. 𑀲𑀫𑁆𑀫𑀚𑁆𑀚𑀦𑀧𑀸𑀦𑀻𑀬𑀉𑀧𑀝𑁆𑀞𑀸𑀧𑀦𑀁 𑀯𑀘𑁆𑀘𑀧𑀲𑁆𑀲𑀸𑀯𑀝𑁆𑀞𑀸𑀦𑀻𑀲𑀼 𑀯𑀢𑁆𑀢𑀁. 𑀧𑀞𑀫𑀁 𑀧𑀢𑁆𑀢𑀘𑀻𑀯𑀭𑀸𑀤𑀻𑀦𑀺 𑀳𑀭𑀸𑀧𑁂𑀢𑁆𑀯𑀸 𑀏𑀓𑀫𑀦𑁆𑀢𑁂 𑀦𑀺𑀓𑁆𑀔𑀺𑀧𑀦𑀸𑀤𑀺, 𑀉𑀮𑁆𑀮𑁄𑀓𑀢𑁄 𑀧𑀝𑁆𑀞𑀸𑀬 𑀫𑀓𑁆𑀓𑀝𑀲𑀦𑁆𑀢𑀸𑀦𑀁 𑀑𑀳𑀸𑀭𑁂𑀢𑁆𑀯𑀸 𑀲𑀫𑁆𑀫𑀚𑁆𑀚𑀦𑀜𑁆𑀘 𑀯𑀺𑀳𑀸𑀭𑀲𑁄𑀥𑀦𑁂 𑀯𑀢𑁆𑀢𑀁. 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀞𑀸𑀦𑁂 𑀪𑀽𑀫𑀢𑁆𑀣𑀭𑀡𑀸𑀤𑀺𑀧𑀜𑁆𑀜𑀸𑀧𑀦𑀁 𑀧𑀼𑀦 𑀧𑀜𑁆𑀜𑀸𑀧𑀦𑁂 𑀯𑀢𑁆𑀢𑀁. 𑀢𑀣𑀸𑀢𑀺 𑀇𑀫𑀺𑀦𑀸 ‘‘𑀘𑀭𑁂’’𑀢𑀺 𑀇𑀤𑀁 𑀅𑀢𑀺𑀤𑀺𑀲𑀢𑀺.

𑁧𑁪𑁮. 𑀯𑀺𑀳𑀸𑀭𑀁 𑀲𑁄𑀥𑁂𑀦𑁆𑀢𑁄 𑀪𑀺𑀓𑁆𑀔𑀼 𑀧𑀝𑀺𑀯𑀸𑀢𑁂 𑀯𑀸 𑀲𑀗𑁆𑀕𑀡𑁂 𑀯𑀸 𑀧𑀸𑀦𑀻𑀬𑀲𑀸𑀫𑀦𑁆𑀢𑀸 𑀯𑀸 𑀲𑀬𑀦𑀸𑀲𑀦𑀁 𑀦 𑀧𑀧𑁆𑀨𑁄𑀝𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀸𑀦𑀻𑀬-𑀲𑀤𑁆𑀤𑁂𑀦 𑀧𑀭𑀺𑀪𑁄𑀚𑀦𑀻𑀬𑀜𑁆𑀘 𑀲𑀗𑁆𑀕𑀳𑀺𑀢𑀁. 𑀧𑀝𑀺𑀯𑀸𑀢𑁂𑀢𑀺 𑀉𑀧𑀭𑀺𑀯𑀸𑀢𑁂. 𑀲𑀗𑁆𑀕𑀡𑁂𑀢𑀺 𑀩𑀳𑀽𑀦𑀁 𑀲𑀫𑁄𑀲𑀭𑀡𑁂 𑀯𑀺𑀯𑀝𑀧𑁆𑀧𑀤𑁂𑀲𑁂. 𑀲𑀬𑀦𑀸𑀲𑀦𑀁 𑀦𑀸𑀫 𑀪𑀽𑀫𑀢𑁆𑀣𑀭𑀡𑀫𑀜𑁆𑀘𑀸𑀤𑀺.

𑁧𑁪𑁯. 𑀦𑁆𑀳𑀸𑀦𑁂 𑀯𑀢𑁆𑀢𑀁 𑀘𑀭𑁂, 𑀦𑁆𑀳𑀸𑀢𑀲𑁆𑀲 𑀓𑀸𑀢𑀩𑁆𑀩𑁂 𑀘𑀭𑁂𑀢𑀺 𑀲𑀫𑁆𑀩𑀦𑁆𑀥𑀲𑁆𑀲 𑀧𑀼𑀭𑀺𑀲𑀸𑀥𑀻𑀦𑀢𑀸𑀬 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀳𑀡𑀕𑀢𑁆𑀢𑀧𑀭𑀺𑀓𑀫𑁆𑀫𑀓𑀭𑀡𑀁 𑀦𑀳𑀸𑀦𑁂 𑀯𑀢𑁆𑀢𑀁. 𑀓𑀸𑀢𑀩𑁆𑀩𑁂 𑀘𑀭𑁂𑀢𑀺 𑀕𑀢𑁆𑀢𑀢𑁄 𑀉𑀤𑀓𑀲𑀫𑁆𑀫𑀚𑁆𑀚𑀦𑀦𑀺𑀯𑀸𑀲𑀦𑀤𑀸𑀦𑀸𑀤𑀺𑀓𑀺𑀘𑁆𑀘𑁂 𑀧𑀯𑀢𑁆𑀢𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. ‘‘𑀯𑀦𑀧𑁆𑀧𑀕𑀼𑀫𑁆𑀩𑁂’’𑀢𑀺𑀆𑀤𑀻𑀲𑀼 𑀯𑀺𑀬 𑀲𑀺𑀲𑁆𑀲 𑀏-𑀓𑀸𑀭𑀸𑀤𑁂𑀲𑀁 𑀭𑀽𑀧𑀁, 𑀢𑀲𑁆𑀫𑀸 𑀓𑀸𑀢𑀩𑁆𑀩𑀁 𑀯𑀢𑁆𑀢𑀁 𑀘𑀭𑁂𑀬𑁆𑀬𑀸𑀢𑀺 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁. 𑀩𑀼𑀥𑀸 𑀧𑀦 ‘‘𑀦𑁆𑀳𑀸𑀦𑁂 𑀦𑁆𑀳𑀸𑀢𑀲𑁆𑀲 𑀓𑀸𑀢𑀩𑁆𑀩𑁂 𑀯𑀢𑁆𑀢𑀁 𑀘𑀭𑁂’’𑀢𑀺 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀏𑀯𑀁 𑀲𑀢𑀺 𑀓𑀸𑀢𑀩𑁆𑀩-𑀲𑀤𑁆𑀤𑀲𑁆𑀲 𑀓𑀫𑁆𑀫𑀲𑀸𑀥𑀦𑀢𑁆𑀢𑀸 𑀯𑀢𑁆𑀢𑀫𑁂𑀯 𑀓𑀸𑀢𑀩𑁆𑀩𑀁 𑀦𑀸𑀫𑀸𑀢𑀺 ‘‘𑀯𑀢𑁆𑀢𑁂 𑀯𑀢𑁆𑀢𑀁 𑀘𑀭𑁂’’𑀢𑀺 𑀯𑀼𑀢𑁆𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀯𑀺𑀭𑀼𑀚𑁆𑀛𑀢𑀺. ‘‘𑀦𑀳𑀸𑀢𑁂𑀦 𑀦𑀳𑀸𑀢𑀲𑁆𑀲𑀸’’𑀢𑀺 𑀯𑀸 𑀧𑀸𑀞𑁄, 𑀉𑀤𑀓𑁂 𑀕𑀢𑁆𑀢𑀧𑀭𑀺𑀓𑀫𑁆𑀫𑁂𑀦 𑀣𑁂𑀭𑀁 𑀧𑀞𑀫𑀁 𑀦𑀳𑀸𑀧𑁂𑀢𑁆𑀯𑀸 𑀲𑀬𑀫𑁆𑀧𑀺 𑀦𑀳𑀸𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀸𑀴𑀺𑀬𑀫𑁆𑀧𑀺 ‘‘𑀦𑀳𑀸𑀢𑁂𑀦 𑀧𑀞𑀫𑀢𑀭𑀁 𑀉𑀢𑁆𑀢𑀭𑀺𑀢𑁆𑀯𑀸’’𑀢𑀺 (𑀫𑀳𑀸𑀯. 𑁬𑁭) 𑀅𑀢𑁆𑀣𑀺. 𑀅𑀣 𑀭𑀗𑁆𑀕𑀧𑀸𑀓𑁂 𑀥𑁄𑀯𑀦𑁂 𑀲𑀺𑀩𑁆𑀩𑀦𑁂 𑀘 𑀯𑀢𑁆𑀢𑀁 𑀘𑀭𑁂𑀢𑀺 𑀲𑀫𑁆𑀩𑀦𑁆𑀥𑁄, 𑀭𑀚𑀦𑀧𑀸𑀓𑁂 𑀘𑀻𑀯𑀭𑀥𑁄𑀯𑀦𑁂 𑀘𑀻𑀯𑀭𑀲𑀺𑀩𑁆𑀩𑀦𑁂 𑀘𑀸𑀢𑀺 𑀅𑀢𑁆𑀣𑁄. 𑀭𑀚𑀦𑁆𑀢𑁄 𑀘𑀻𑀯𑀭𑁂 𑀣𑁂𑀯𑁂 𑀞𑀺𑀢𑁂 𑀦 𑀯𑀚𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀭𑀚𑀦𑁆𑀢𑁄𑀢𑀺 𑀘𑀻𑀯𑀭𑀁 𑀭𑀚𑀦𑁆𑀢𑁄. 𑀣𑁂𑀯𑁂𑀢𑀺 𑀭𑀚𑀦𑀩𑀺𑀦𑁆𑀤𑀼𑀫𑁆𑀳𑀺.

𑁧𑁫𑁦. 𑀏𑀓𑀘𑁆𑀘𑀲𑁆𑀲𑀸𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀯𑁂𑀭𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀸𑀦𑀺 𑀯𑀸 𑀓𑀺𑀜𑁆𑀘𑀦𑀁 𑀧𑀭𑀺𑀓𑁆𑀔𑀸𑀭𑀁 𑀯𑀸 𑀦 𑀤𑀤𑁂𑀬𑁆𑀬 𑀦 𑀕𑀡𑁆𑀳𑁂𑀬𑁆𑀬 𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀦 𑀤𑀤𑁂𑀬𑁆𑀬 𑀦 𑀕𑀡𑁆𑀳𑁂𑀬𑁆𑀬𑀸𑀢𑀺 𑀧𑀝𑀺𑀲𑀸𑀫𑀦𑀢𑁆𑀣𑀸𑀬𑀧𑀺 𑀦 𑀤𑀤𑁂𑀬𑁆𑀬, 𑀦 𑀕𑀡𑁆𑀳𑁂𑀬𑁆𑀬 𑀯𑀸𑀢𑀺 𑀅𑀢𑁆𑀣𑁄. ‘‘𑀆𑀓𑀺𑀜𑁆𑀘𑀦’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀓𑀺𑀜𑁆𑀘𑀦-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄, 𑀢𑀲𑁆𑀲 𑀓𑀺𑀜𑁆𑀘𑀻𑀢𑀺 𑀅𑀢𑁆𑀣𑁄. 𑀓𑀺𑀜𑁆𑀘𑀺𑀦𑀦𑁆𑀢𑀺 𑀯𑀸 𑀧𑀸𑀞𑁄, 𑀓𑀺𑀜𑁆𑀘𑀺 𑀦𑀁 𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀬𑁄𑀚𑀦𑀸. 𑀧𑀤𑀲𑀺𑀤𑁆𑀥𑀺𑀯𑀲𑁂𑀦𑁂𑀢𑁆𑀣 𑀦𑀦𑁆𑀢𑀺 𑀢-𑀲𑀤𑁆𑀤𑀧𑁆𑀧𑀬𑁄𑀕𑁄 𑀓𑀢𑁄.

𑁧𑁫𑁧-𑁨. 𑀧𑀘𑁆𑀙𑀢𑁄 𑀓𑀸𑀢𑀼𑀦𑁆𑀢𑀺 𑀧𑀘𑁆𑀙𑀸𑀲𑀫𑀡𑀁 𑀓𑀸𑀢𑀼𑀁. 𑀢𑀲𑁆𑀲𑀸𑀢𑀺 𑀏𑀓𑀘𑁆𑀘𑀲𑁆𑀲. 𑀧𑀘𑁆𑀙𑀢𑁄𑀢𑀺 𑀧𑀘𑁆𑀙𑀸𑀲𑀫𑀡𑁄 𑀳𑀼𑀢𑁆𑀯𑀸. 𑀦𑀺𑀦𑁆𑀦𑁂𑀢𑀼𑀦𑁆𑀢𑀺 𑀏𑀓𑀘𑁆𑀘𑀲𑁆𑀲 𑀦𑀻𑀳𑀭𑀺𑀢𑀼𑀁. 𑀲𑀩𑁆𑀩𑀢𑁆𑀣 𑀅𑀦𑀸𑀧𑀼𑀘𑁆𑀙𑀸 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀓𑀺𑀘𑁆𑀘𑀬𑀁 𑀯𑀸𑀢𑀺 𑀯𑁂𑀬𑁆𑀬𑀸𑀯𑀘𑁆𑀘𑀸𑀤𑀺 𑀬𑀁 𑀓𑀺𑀜𑁆𑀘𑀺 𑀓𑀺𑀘𑁆𑀘𑀁 𑀯𑀸. 𑀓𑀺𑀘𑁆𑀘𑀫𑁂𑀯 𑀓𑀺𑀘𑁆𑀘𑀬𑀁, 𑀓𑀲𑁆𑀲 𑀬𑁄 ‘‘𑀲𑁂𑀦𑀺𑀬𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀧𑀭𑀺𑀓𑀫𑁆𑀫𑀁 𑀯𑀸𑀢𑀺 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀸𑀤𑀺𑀧𑀭𑀺𑀓𑀫𑁆𑀫𑀁. 𑀅𑀢𑁆𑀢𑀦𑁄 𑀓𑀸𑀭𑀸𑀧𑁂𑀢𑀼𑀁 𑀯𑀸𑀢𑀺 𑀏𑀓𑀘𑁆𑀘𑁂𑀦 𑀅𑀢𑁆𑀢𑀦𑁄 𑀓𑀸𑀭𑀸𑀧𑁂𑀢𑀼𑀁 𑀯𑀸. 𑀓𑀸𑀢𑀼𑀁 𑀯𑀸𑀢𑀺 𑀢𑀲𑁆𑀲 𑀅𑀢𑁆𑀢𑀦𑀸 𑀓𑀸𑀢𑀼𑀁 𑀯𑀸.

𑁧𑁫𑁩. 𑀲𑀻𑀫𑀢𑁄 𑀦𑀺𑀕𑁆𑀕𑀢𑀸 𑀩𑀳𑀺𑀪𑀽𑀢𑀸 𑀦𑀺𑀲𑁆𑀲𑀻𑀫𑀸, 𑀢𑀁. 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀲𑀼 𑀅𑀯𑀢𑁆𑀯𑀸 𑀤𑀽𑀭𑀁 𑀪𑀺𑀓𑁆𑀔𑀸𑀘𑀸𑀭𑀁 𑀕𑀢𑁂𑀲𑀼𑀧𑀺 𑀅𑀧𑀲𑁆𑀲𑀦𑁆𑀢𑁂𑀦 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄. 𑀤𑀺𑀝𑁆𑀞𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀧𑀦 𑀆𑀧𑀼𑀘𑁆𑀙𑀺𑀢𑀼𑀁𑀬𑁂𑀯 𑀯𑀝𑁆𑀝𑀢𑀺. 𑀅𑀢𑁆𑀢𑀦𑁄 𑀓𑀺𑀘𑁆𑀘𑀬𑀁 𑀯𑀸𑀧𑀻𑀢𑀺 𑀅𑀢𑁆𑀢𑀦𑁄 𑀲𑀻𑀫𑀸𑀬𑀧𑀺 𑀧𑀢𑁆𑀢𑀧𑀘𑀦𑀘𑀻𑀯𑀭𑀭𑀚𑀦𑀸𑀤𑀺𑀓𑀁 𑀲𑀓𑀁 𑀓𑀭𑀡𑀻𑀬𑀁 𑀯𑀸𑀧𑀺 𑀓𑀸𑀢𑀼𑀁.

𑁧𑁫𑁪. 𑀅𑀭𑀢𑀺𑀦𑁆𑀢𑀺 𑀲𑀸𑀲𑀦𑁂 𑀅𑀦𑀪𑀺𑀭𑀢𑀺𑀁. 𑀲𑀗𑁆𑀖𑀸𑀬𑀢𑁆𑀢𑁂𑀲𑀼 𑀓𑀫𑁆𑀫𑁂𑀲𑀽𑀢𑀺 𑀧𑀭𑀺𑀯𑀸𑀲𑀸𑀤𑀺𑀢𑀚𑁆𑀚𑀦𑀻𑀬𑀸𑀤𑀻𑀲𑀼 𑀲𑀗𑁆𑀖𑀧𑁆𑀧𑀝𑀺𑀩𑀤𑁆𑀥𑁂𑀲𑀼 𑀓𑀫𑁆𑀫𑁂𑀲𑀼. 𑀉𑀲𑁆𑀲𑀼𑀓𑁆𑀓𑀁 𑀯𑀸𑀧𑀻𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀲𑀼 𑀕𑀭𑀼𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁂𑀲𑀼, 𑀓𑀫𑁆𑀫𑀸𑀭𑀳𑁂𑀲𑀼 𑀘 ‘‘𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 𑀉𑀲𑁆𑀲𑀸𑀳𑀁 𑀯𑀸𑀧𑀺.

𑁧𑁫𑁫. 𑀕𑀺𑀮𑀸𑀦𑁂𑀲𑀼 𑀉𑀧𑀝𑁆𑀞𑁂𑀬𑁆𑀬𑀸𑀢𑀺 ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀅𑀮𑀁 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀼𑀁, 𑀧𑀝𑀺𑀩𑀮𑁄 𑀳𑁄𑀢𑀺 𑀪𑁂𑀲𑀚𑁆𑀚𑀁 𑀲𑀁𑀯𑀺𑀥𑀸𑀢𑀼𑀁, 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀁 𑀚𑀸𑀦𑀸𑀢𑀺, 𑀅𑀲𑀧𑁆𑀧𑀸𑀬𑀁 𑀅𑀧𑀦𑀸𑀫𑁂𑀢𑀺, 𑀲𑀧𑁆𑀧𑀸𑀬𑀁 𑀉𑀧𑀦𑀸𑀫𑁂𑀢𑀺, 𑀫𑁂𑀢𑁆𑀢𑀘𑀺𑀢𑁆𑀢𑁄 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀺 𑀦𑁄 𑀆𑀫𑀺𑀲𑀦𑁆𑀢𑀭𑁄, 𑀅𑀚𑁂𑀕𑀼𑀘𑁆𑀙𑀻 𑀳𑁄𑀢𑀺 𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀔𑁂𑀴𑀁 𑀯𑀸 𑀯𑀦𑁆𑀢𑀁 𑀯𑀸 𑀦𑀻𑀳𑀸𑀢𑀼𑀁, 𑀧𑀝𑀺𑀩𑀮𑁄 𑀳𑁄𑀢𑀺 𑀕𑀺𑀮𑀸𑀦𑀁 𑀓𑀸𑀮𑁂𑀦 𑀓𑀸𑀮𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀼𑀁 𑀲𑀫𑀸𑀤𑀧𑁂𑀢𑀼𑀁 𑀲𑀫𑀼𑀢𑁆𑀢𑁂𑀚𑁂𑀢𑀼𑀁 𑀲𑀫𑁆𑀧𑀳𑀁𑀲𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁬𑁬) 𑀏𑀯𑀁 𑀯𑀼𑀢𑁆𑀢𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 𑀳𑀼𑀢𑁆𑀯𑀸 𑀕𑀺𑀮𑀸𑀦𑁂𑀲𑀼 𑀉𑀧𑀝𑁆𑀞𑀳𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀲𑀩𑁆𑀩𑁂𑀳𑀺𑀧𑀺 𑀆𑀘𑀭𑀺𑀢𑀩𑁆𑀩𑀁 𑀕𑀺𑀮𑀸𑀦𑀯𑀢𑁆𑀢𑀁 𑀉𑀧𑀤𑀺𑀲𑀢𑀺. 𑀯𑀼𑀝𑁆𑀞𑀸𑀦𑀦𑁆𑀢𑀺 𑀕𑁂𑀮𑀜𑁆𑀜𑀸 𑀯𑀼𑀝𑁆𑀞𑀺𑀢𑀁. 𑀆𑀕𑀫𑁂𑀢𑀺 𑀆𑀕𑀫𑁂𑀬𑁆𑀬, 𑀑𑀮𑁄𑀓𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀉𑀧𑀚𑁆𑀛𑀸𑀘𑀭𑀺𑀬𑁂𑀳𑀺 𑀘 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀬𑀤𑀺 𑀢𑁂 𑀕𑀺𑀮𑀸𑀦𑀸 𑀳𑁄𑀦𑁆𑀢𑀺, 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀘𑀻𑀯𑀭𑁂 𑀭𑀚𑀦𑀧𑀭𑀺𑀬𑁄𑀲𑀸𑀦𑀜𑁆𑀘 𑀅𑀭𑀢𑀺𑀯𑀺𑀦𑁄𑀤𑀦𑀸𑀤𑀺𑀓𑀜𑁆𑀘 𑀯𑀢𑁆𑀢𑀁, 𑀅𑀕𑀺𑀮𑀸𑀦𑁂𑀲𑀼 𑀧𑀦 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀬𑀸 𑀅𑀦𑀼𑀕𑁆𑀕𑀳𑁄𑀧𑀢𑁆𑀢𑀘𑀻𑀯𑀭𑀸𑀤𑀺𑀤𑀸𑀦𑀜𑁆𑀘𑀸𑀢𑀺 𑀲𑀩𑁆𑀩𑀁 𑀓𑀸𑀢𑀩𑁆𑀩𑀁. 𑀢𑁂𑀦𑁂𑀯 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 ‘‘𑀢𑀲𑁆𑀫𑀸 𑀆𑀘𑀭𑀺𑀬𑁂𑀦𑀸𑀧𑀺 𑀢𑁂𑀲𑀼 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁, 𑀉𑀧𑀚𑁆𑀛𑀸𑀬𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻’’𑀢𑀺.

𑀉𑀧𑀚𑁆𑀛𑀸𑀘𑀭𑀺𑀬𑀯𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.