𑁧𑁧. 𑀦𑀺𑀲𑁆𑀲𑀕𑁆𑀕𑀺𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁧𑁬-𑁭. 𑀭𑀽𑀧𑀺𑀬𑁂𑀦 𑀅𑀭𑀽𑀧𑀺𑀬𑀁 𑀭𑀽𑀧𑀺𑀬𑀜𑁆𑀘 𑀇𑀢𑀭𑁂𑀦 𑀭𑀽𑀧𑀺𑀬𑀜𑁆𑀘 𑀧𑀭𑀺𑀯𑀢𑁆𑀢𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀭𑀽𑀧𑀺𑀬𑁂𑀦𑀸𑀢𑀺 𑀭𑀽𑀧𑀺𑀬𑀲𑀗𑁆𑀔𑀸𑀢𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀦𑀸. 𑀅𑀭𑀽𑀧𑀺𑀬𑀦𑁆𑀢𑀺 𑀅𑀭𑀽𑀧𑀺𑀬𑀲𑀗𑁆𑀔𑀸𑀢𑀁 𑀤𑀼𑀓𑁆𑀓𑀝𑀯𑀢𑁆𑀣𑀼𑀁 𑀓𑀧𑁆𑀧𑀺𑀬𑀯𑀢𑁆𑀣𑀼𑀜𑁆𑀘. 𑀇𑀢𑀭𑁂𑀦𑀸𑀢𑀺 𑀅𑀭𑀽𑀧𑀺𑀬𑁂𑀦. 𑀦𑀺𑀲𑁆𑀲𑀕𑁆𑀕𑀻𑀢𑀺 𑀦𑀺𑀲𑁆𑀲𑀚𑁆𑀚𑀦𑀁 𑀦𑀺𑀲𑁆𑀲𑀕𑁆𑀕𑁄, 𑀧𑀼𑀩𑁆𑀩𑀪𑀸𑀕𑁂 𑀓𑀢𑁆𑀢𑀩𑁆𑀩𑀲𑁆𑀲 𑀯𑀺𑀦𑀬𑀓𑀫𑁆𑀫𑀲𑁆𑀲𑁂𑀢𑀁 𑀦𑀸𑀫𑀁. 𑀦𑀺𑀲𑁆𑀲𑀕𑁆𑀕𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀦𑀺𑀲𑁆𑀲𑀕𑁆𑀕𑀺, 𑀓𑀺𑀁 𑀢𑀁? 𑀧𑀸𑀘𑀺𑀢𑁆𑀢𑀺𑀬𑀁. 𑀭𑀽𑀧𑀺𑀬𑀲𑁆𑀲 𑀫𑀽𑀮𑀕𑁆𑀕𑀳𑀡𑁂 𑀧𑀦 𑀭𑀽𑀧𑀺𑀬𑀧𑁆𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁.

𑀇𑀤𑀸𑀦𑀺 𑀭𑀽𑀧𑀺𑀬𑀸𑀤𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀥𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀓𑀳𑀸…𑀧𑁂… 𑀫𑀸𑀲𑀓𑀁 𑀇𑀥 𑀭𑀽𑀧𑀺𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀓𑀳𑀸𑀧𑀡𑁄 𑀦𑀸𑀫 𑀲𑀼𑀯𑀡𑁆𑀡𑀫𑀬𑁄 𑀯𑀸 𑀭𑀚𑀢𑀫𑀬𑁄 𑀯𑀸 𑀏𑀢𑀭𑀳𑀺 𑀧𑀓𑀢𑀺𑀓𑀳𑀸𑀧𑀡𑁄 𑀯𑀸. 𑀲𑀚𑁆𑀛𑀽𑀢𑀺 𑀭𑀚𑀢𑀁. 𑀲𑀺𑀗𑁆𑀕𑀻𑀢𑀺 𑀲𑀼𑀯𑀡𑁆𑀡𑀪𑁂𑀤𑁄, 𑀢𑀣𑀸𑀧𑀺 𑀘𑁂𑀢𑁆𑀣 𑀲𑀸𑀫𑀜𑁆𑀜𑁂𑀦 𑀲𑀼𑀯𑀡𑁆𑀡𑀫𑀥𑀺𑀧𑁆𑀧𑁂𑀢𑀁. 𑀯𑁄𑀳𑀸𑀭𑀽𑀧𑀕𑀫𑀸𑀲𑀓𑀦𑁆𑀢𑀺 𑀯𑁄𑀳𑀸𑀭𑀁 𑀓𑀬𑀯𑀺𑀓𑁆𑀓𑀬𑀁 𑀉𑀧𑀕𑀘𑁆𑀙𑀢𑀻𑀢𑀺 𑀯𑁄𑀳𑀸𑀭𑀽𑀧𑀕𑀁, 𑀢𑀜𑁆𑀘 𑀢𑀁 𑀫𑀸𑀲𑀓𑀜𑁆𑀘. 𑀢𑀁 𑀧𑀦 𑀲𑀫𑀼𑀝𑁆𑀞𑀸𑀧𑀺𑀢𑀭𑀽𑀧𑀜𑁆𑀘 𑀅𑀲𑀫𑀼𑀝𑁆𑀞𑀸𑀧𑀺𑀢𑀭𑀽𑀧𑀜𑁆𑀘 𑀮𑁄𑀳𑀤𑀸𑀭𑀼𑀆𑀤𑀺𑀫𑀬𑀁 𑀯𑀼𑀘𑁆𑀘𑀢𑀺. 𑀇𑀥 𑀭𑀽𑀧𑀺𑀬𑀦𑁆𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀭𑀽𑀧𑀺𑀬𑀁 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀯𑀢𑁆𑀣𑀫𑀼𑀢𑁆𑀢𑀸𑀤𑀺 𑀓𑀧𑁆𑀧𑀁 𑀤𑀼𑀓𑁆𑀓𑀝𑀯𑀢𑁆𑀣𑀼𑀜𑁆𑀘 𑀇𑀢𑀭𑀦𑁆𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀯𑀢𑁆𑀣𑀜𑁆𑀘 𑀫𑀼𑀢𑁆𑀢𑀸 𑀘 𑀆𑀤𑀺 𑀬𑀲𑁆𑀲𑀸𑀢𑀺 𑀲𑀫𑀸𑀲𑁄. 𑀆𑀤𑀺-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄 ‘‘𑀯𑀢𑁆𑀣𑀸𑀤𑀺 𑀫𑀼𑀢𑁆𑀢𑀸𑀤𑀻’’𑀢𑀺. 𑀢𑀢𑁆𑀣 𑀧𑀞𑀫𑁂𑀦 𑀆𑀤𑀺-𑀲𑀤𑁆𑀤𑁂𑀦 𑀓𑀧𑁆𑀧𑀸𑀲𑀲𑀼𑀢𑁆𑀢𑀸𑀧𑀭𑀡𑁆𑀡𑀸𑀤𑀺𑀓𑀁 𑀬𑀁 𑀓𑀺𑀜𑁆𑀘𑀺 𑀓𑀧𑁆𑀧𑀺𑀬𑀯𑀢𑁆𑀣𑀼𑀁, 𑀤𑀼𑀢𑀺𑀬𑁂𑀦 𑀫𑀡𑀺 𑀲𑀗𑁆𑀔𑁄 𑀲𑀺𑀮𑀸 𑀧𑀯𑀸𑀴𑀁 𑀮𑁄𑀳𑀺𑀢𑀗𑁆𑀓𑁄 𑀫𑀲𑀸𑀭𑀕𑀮𑁆𑀮𑀁 𑀲𑀢𑁆𑀢𑀥𑀜𑁆𑀜𑀸𑀦𑀺 𑀤𑀸𑀲𑀺𑀤𑀸𑀲𑀔𑁂𑀢𑁆𑀢𑀯𑀢𑁆𑀣𑀼𑀧𑀼𑀧𑁆𑀨𑀸𑀭𑀸𑀫𑀨𑀮𑀸𑀭𑀸𑀫𑀸𑀤𑀬𑁄𑀢𑀺 𑀇𑀤𑀁 𑀤𑀼𑀓𑁆𑀓𑀝𑀯𑀢𑁆𑀣𑀼𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀢𑁆𑀣𑀸𑀤𑀺𑀓𑀧𑁆𑀧𑀺𑀬𑀯𑀢𑁆𑀣𑀼𑀁, 𑀫𑀼𑀢𑁆𑀢𑀸𑀤𑀺𑀤𑀼𑀓𑁆𑀓𑀝𑀯𑀢𑁆𑀣𑀼𑀜𑁆𑀘 𑀇𑀢𑀭𑀁 𑀅𑀜𑁆𑀜𑀁 𑀅𑀭𑀽𑀧𑀺𑀬𑀁 𑀦𑀸𑀫𑀸𑀢𑀺 𑀅𑀢𑁆𑀣𑁄.

𑁧𑁧𑁮. 𑀏𑀢𑁆𑀢𑀸𑀯𑀢𑀸 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀧𑁆𑀧𑀺𑀬𑀪𑀡𑁆𑀟𑁂 𑀓𑀬𑀯𑀺𑀓𑁆𑀓𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀇𑀫’’𑀦𑁆𑀢𑀺𑀆𑀤𑀺. 𑀢𑀢𑁆𑀣 ‘‘𑀇𑀫𑀁 𑀕𑀳𑁂𑀢𑁆𑀯𑀸 𑀇𑀫𑀁 𑀤𑁂𑀳𑀺, 𑀇𑀫𑀁 𑀓𑀭, 𑀇𑀫𑀁 𑀆𑀦𑀬𑀸’’𑀢𑀺 𑀯𑀸 ‘‘𑀇𑀫𑀁 𑀪𑀼𑀢𑁆𑀯𑀸 𑀇𑀫𑀁 𑀤𑁂𑀳𑀺, 𑀇𑀫𑀁 𑀓𑀭, 𑀇𑀫𑀁 𑀆𑀦𑀬𑀸’’𑀢𑀺 𑀯𑀸 ‘‘𑀇𑀫𑀁 𑀤𑁂𑀫𑀺, 𑀇𑀫𑀁 𑀤𑁂𑀳𑀺, 𑀇𑀫𑀁 𑀓𑀭, 𑀇𑀫𑀁 𑀆𑀦𑀬𑀸’’𑀢𑀺 𑀯𑀸 𑀓𑀬𑀯𑀺𑀓𑁆𑀓𑀬𑁂 𑀲𑀫𑀸𑀧𑀦𑁆𑀦𑁂 𑀦𑀺𑀲𑁆𑀲𑀕𑁆𑀕𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀇𑀫𑀦𑁆𑀢𑀺 𑀢𑀡𑁆𑀟𑀼𑀮𑀸𑀤𑀺𑀁. 𑀪𑀼𑀢𑁆𑀯𑀸𑀢𑀺 𑀑𑀤𑀦𑀸𑀤𑀺𑀁 𑀪𑀼𑀜𑁆𑀚𑀺𑀢𑁆𑀯𑀸. 𑀇𑀫𑀁 𑀤𑁂𑀳𑀻𑀢𑀺 𑀏𑀢𑀁 𑀯𑀢𑁆𑀣𑀸𑀤𑀺𑀓𑀁 𑀤𑁂𑀳𑀺. 𑀇𑀫𑀁 𑀓𑀭𑀸𑀢𑀺 𑀏𑀢𑀁 𑀭𑀚𑀦𑀧𑀘𑀦𑀸𑀤𑀺𑀁 𑀓𑀭𑁄𑀳𑀺. 𑀇𑀫𑀁 𑀆𑀦𑀬𑀸𑀢𑀺 𑀏𑀢𑀁 𑀭𑀚𑀦𑀓𑀝𑁆𑀞𑀸𑀤𑀺𑀁 𑀆𑀦𑁂𑀳𑀺. 𑀇𑀫𑀁 𑀤𑁂𑀫𑀻𑀢𑀺 𑀏𑀢𑀁 𑀯𑀢𑁆𑀣𑀸𑀤𑀺𑀓𑀁 𑀢𑀯 𑀤𑁂𑀫𑀺. 𑀲𑀫𑀸𑀧𑀦𑁆𑀦𑁂𑀢𑀺 𑀓𑀢𑁂. 𑀢𑀲𑁆𑀫𑀸 𑀓𑀧𑁆𑀧𑀺𑀬𑀁 𑀪𑀡𑁆𑀟𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑁂𑀦 𑀅𑀜𑁆𑀜𑀸𑀢𑀓𑁂𑀳𑀺 𑀲𑀤𑁆𑀥𑀺𑀁 ‘‘𑀇𑀫𑀁 𑀤𑁂𑀳𑀻’’𑀢𑀺 𑀯𑀤𑀢𑁄 𑀯𑀺𑀜𑁆𑀜𑀢𑁆𑀢𑀺, ‘‘𑀇𑀫𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀤𑀢𑁄 𑀲𑀤𑁆𑀥𑀸𑀤𑁂𑀬𑁆𑀬𑀯𑀺𑀦𑀺𑀧𑀸𑀢𑀦𑀁, ‘‘𑀇𑀫𑀺𑀦𑀸 𑀇𑀫𑀁 𑀤𑁂𑀳𑀻’’𑀢𑀺 𑀯𑀤𑀢𑁄 𑀓𑀬𑀯𑀺𑀓𑁆𑀓𑀬𑀦𑁆𑀢𑀺 𑀯𑀼𑀢𑁆𑀢𑀸 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄. 𑀫𑀸𑀢𑀸𑀧𑀺𑀢𑀽𑀳𑀺 𑀧𑀦 𑀲𑀤𑁆𑀥𑀺𑀁 𑀓𑀬𑀯𑀺𑀓𑁆𑀓𑀬𑀫𑀢𑁆𑀢𑀁 𑀫𑁄𑀘𑁂𑀦𑁆𑀢𑁂𑀦 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀁. 𑀅𑀬𑀜𑁆𑀳𑀺 𑀓𑀬𑀯𑀺𑀓𑁆𑀓𑀬𑁄 𑀞𑀧𑁂𑀢𑁆𑀯𑀸 𑀧𑀜𑁆𑀘𑀲𑀳𑀥𑀫𑁆𑀫𑀺𑀓𑁂 𑀅𑀯𑀲𑁂𑀲𑁂𑀳𑀺 𑀕𑀺𑀳𑀺𑀧𑀩𑁆𑀩𑀚𑀺𑀢𑁂𑀳𑀺 𑀦 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀦𑀯𑀓𑀫𑁆𑀫𑀸𑀦𑀺 𑀓𑀸𑀭𑁂𑀢𑀺, 𑀅𑀝𑁆𑀞𑀓𑀣𑀸𑀧𑀫𑀸𑀡𑁂𑀦 𑀧𑀸𑀘𑀺𑀢𑁆𑀢𑀺𑀬𑀫𑀢𑁆𑀢𑀁 𑀤𑁂𑀲𑁂𑀢𑀩𑁆𑀩𑀁.

𑁧𑁧𑁯-𑁧𑁨𑁦. 𑀇𑀤𑀸𑀦𑀺 𑀧𑀭𑀺𑀡𑀸𑀫𑀦𑀯𑀲𑁂𑀦 𑀆𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀢𑀦𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣𑀸𑀬𑀁 𑀧𑀺𑀡𑁆𑀟𑀢𑁆𑀣𑁄 𑁋 𑀲𑀗𑁆𑀖𑀲𑁆𑀲 𑀦𑀢𑀁 𑀮𑀸𑀪𑀁 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑁂𑀬𑁆𑀬, 𑀦𑀺𑀲𑁆𑀲𑀕𑁆𑀕𑀺. 𑀅𑀜𑁆𑀜𑀢𑁄 𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀡𑀸𑀫𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺. 𑀅𑀜𑁆𑀜𑀲𑁆𑀲 𑀲𑀗𑁆𑀖𑀲𑁆𑀲 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀧𑀭𑀺𑀡𑀸𑀫𑁂𑀬𑁆𑀬, 𑀤𑀼𑀓𑁆𑀓𑀝𑀁. 𑀅𑀜𑁆𑀜𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀦𑀢𑀁 𑀮𑀸𑀪𑀁 𑀅𑀢𑁆𑀢𑀦𑁄 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀅𑀜𑁆𑀜𑀧𑀼𑀕𑁆𑀕𑀮𑀲𑁆𑀲 𑀯𑀸 𑀅𑀜𑁆𑀜𑀘𑁂𑀢𑀺𑀬𑀲𑁆𑀲 𑀯𑀸 𑀧𑀭𑀺𑀡𑀸𑀫𑁂𑀬𑁆𑀬, 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀦𑀢𑀦𑁆𑀢𑀺 𑀓𑀸𑀬𑁂𑀦 𑀯𑀸 𑀯𑀘𑀲𑀸 𑀯𑀸 𑀦𑀺𑀦𑁆𑀦𑀁 𑀓𑀢𑀁. 𑀮𑀸𑀪𑀦𑁆𑀢𑀺 𑀮𑀪𑀺𑀢𑀩𑁆𑀩𑀁 𑀘𑀻𑀯𑀭𑀸𑀤𑀺. 𑀅𑀜𑁆𑀜𑀢𑁄 𑀅𑀜𑁆𑀜𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀯𑀸 𑀘𑁂𑀢𑀺𑀬𑁂 𑀯𑀸, 𑀘𑁂𑀢𑀺𑀬𑁂 𑀧𑀦 𑀤𑀼𑀓𑁆𑀓𑀝𑀁. 𑀅𑀜𑁆𑀜𑀲𑁆𑀲𑀸𑀢𑀺 𑀘𑁂𑀢𑀺𑀬𑀸𑀤𑀺𑀦𑁄 𑀅𑀦𑁆𑀢𑀫𑀲𑁄 𑀲𑀼𑀦𑀔𑀲𑁆𑀲. 𑀅𑀜𑁆𑀜𑀢𑁄 𑀯𑀸𑀢𑀺 𑀘𑁂𑀢𑀺𑀬𑀸𑀤𑀺𑀫𑁆𑀳𑀺 𑀯𑀸. 𑀲𑀗𑁆𑀖𑀲𑁆𑀲𑀸𑀢𑀺 𑀧𑀦 𑀇𑀤𑀁 𑀓𑀸𑀓𑀓𑁆𑀔𑀺𑀕𑁄𑀴𑀓𑀜𑀸𑀬𑁂𑀦 ‘‘𑀦𑀢𑀁 𑀧𑀭𑀺𑀡𑀸𑀫𑁂𑀬𑁆𑀬𑀸’’𑀢𑀺 𑀉𑀪𑀬𑀢𑁆𑀣 𑀧𑀭𑀺𑀯𑀢𑁆𑀢𑀢𑀺. 𑀦𑀺𑀲𑁆𑀲𑀝𑁆𑀞𑀁 𑀲𑀓𑀲𑀜𑁆𑀜𑀸𑀬 𑀦 𑀤𑀤𑁂𑀬𑁆𑀬 𑀯𑀸, 𑀤𑀼𑀓𑁆𑀓𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑀣𑀸 𑀅𑀜𑁆𑀜𑁂𑀦 𑀧𑀓𑀸𑀭𑁂𑀦, 𑀣𑁂𑀬𑁆𑀬𑀲𑀜𑁆𑀜𑀸𑀬 𑀦 𑀤𑀤𑁂𑀬𑁆𑀬 𑀘𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀢𑀭𑀦𑁆𑀢𑀺 𑀯𑀢𑁆𑀣𑀼𑀯𑀲𑁂𑀦 𑀅𑀜𑁆𑀜𑀁 𑀧𑀸𑀭𑀸𑀚𑀺𑀓𑀁 𑀣𑀼𑀮𑁆𑀮𑀘𑁆𑀘𑀬𑀁 𑀤𑀼𑀓𑁆𑀓𑀝𑀜𑁆𑀘 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀦𑀺𑀲𑁆𑀲𑀕𑁆𑀕𑀺𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.