𑁧𑁨. 𑀧𑀸𑀘𑀺𑀢𑁆𑀢𑀺𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁨𑁧. 𑀫𑀼𑀲𑀸 …𑀧𑁂… 𑀳𑀭𑀡𑁂𑀢𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁, 𑀢𑀲𑁆𑀲 ‘‘𑀧𑀸𑀘𑀺𑀢𑁆𑀢𑀺 𑀯𑀼𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀲𑀩𑁆𑀩𑀢𑁆𑀣. 𑀫𑀼𑀲𑀸𑀯𑀸𑀤𑁂𑀢𑀺 𑀦𑀺𑀧𑀸𑀢𑁂𑀦 𑀲𑀤𑁆𑀥𑀺𑀁 𑀢𑀧𑁆𑀧𑀼𑀭𑀺𑀲𑁄. 𑀧𑀼𑀩𑁆𑀩𑁂𑀧𑀺 𑀚𑀸𑀦𑀺𑀢𑁆𑀯𑀸 𑀯𑀘𑀦𑀓𑁆𑀔𑀡𑁂𑀧𑀺 𑀚𑀸𑀦𑀦𑁆𑀢𑀲𑁆𑀲 𑀫𑀼𑀲𑀸𑀪𑀡𑀦𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀪𑀡𑀦𑀜𑁆𑀘 𑀦𑀸𑀫 𑀇𑀥 𑀅𑀪𑀽𑀢𑀲𑁆𑀲 𑀯𑀸 𑀪𑀽𑀢𑀢𑀁, 𑀪𑀽𑀢𑀲𑁆𑀲 𑀯𑀸 𑀅𑀪𑀽𑀢𑀢𑀁 𑀓𑀢𑁆𑀯𑀸 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀯𑀺𑀜𑁆𑀜𑀸𑀧𑀦𑀧𑁆𑀧𑀬𑁄𑀕𑁄. 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀸𑀘𑀸𑀭𑀯𑀺𑀧𑀢𑁆𑀢𑀺𑀬𑁄 𑀅𑀫𑀽𑀮𑀺𑀓𑀸𑀬 𑀘𑁄𑀤𑁂𑀦𑁆𑀢𑀲𑁆𑀲 𑀬𑀣𑀸𑀓𑁆𑀓𑀫𑀁 𑀲𑀗𑁆𑀖𑀸𑀤𑀺𑀲𑁂𑀲𑀧𑀸𑀘𑀺𑀢𑁆𑀢𑀺𑀬𑀤𑀼𑀓𑁆𑀓𑀝𑀸𑀦𑀺. 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀲𑀳𑀲𑀸 𑀪𑀡𑀦𑁆𑀢𑀲𑁆𑀲, ‘‘𑀅𑀜𑁆𑀜𑀁 𑀪𑀡𑀺𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀁 𑀪𑀡𑀦𑁆𑀢𑀲𑁆𑀲 𑀬𑀲𑁆𑀲 𑀪𑀡𑀢𑀺, 𑀲𑁄 𑀦 𑀲𑀼𑀡𑀸𑀢𑀺, 𑀢𑀲𑁆𑀲 𑀘 𑀅𑀦𑀸𑀧𑀢𑁆𑀢𑀺.

𑀑𑀫𑀲𑀢𑀺 𑀅𑀫𑀦𑀸𑀧𑀢𑀸𑀬 𑀓𑀡𑁆𑀡𑁂𑀲𑀼 𑀯𑀺𑀚𑁆𑀛𑀢𑀺 𑀯𑀺𑀬 𑀏𑀢𑁂𑀦, 𑀑𑀫𑀲𑀢𑀺 𑀯𑀸𑀢𑀺 𑀑𑀫𑀲𑁄, 𑀲𑁄 𑀘𑀸𑀬𑀁 𑀯𑀸𑀤𑁄𑀘, 𑀢𑀲𑁆𑀫𑀺𑀁. 𑀤𑀻𑀖𑁄 𑀧𑀦 𑀕𑀸𑀣𑀸𑀩𑀦𑁆𑀥𑀯𑀲𑁂𑀦. 𑀏𑀯𑀁 𑀲𑀩𑁆𑀩𑀢𑁆𑀣. 𑀳𑀻𑀦𑀼𑀓𑁆𑀓𑀝𑁆𑀞𑁂𑀲𑀼 𑀘 𑀚𑀸𑀢𑀺𑀦𑀸𑀫𑀕𑁄𑀢𑁆𑀢𑀯𑀬𑀓𑀫𑁆𑀫𑀲𑀺𑀧𑁆𑀧𑀆𑀩𑀸𑀥𑀮𑀺𑀗𑁆𑀕𑀓𑀺𑀮𑁂𑀲𑀆𑀧𑀢𑁆𑀢𑀺𑀅𑀓𑁆𑀓𑁄𑀲𑀲𑀗𑁆𑀔𑀸𑀢𑁂𑀲𑀼 𑀤𑀲𑀲𑀼 𑀪𑀽𑀢𑁂𑀦 𑀯𑀸 𑀅𑀪𑀽𑀢𑁂𑀦 𑀯𑀸 ‘‘𑀔𑀢𑁆𑀢𑀺𑀬𑁄𑀲𑀺, 𑀘𑀡𑁆𑀟𑀸𑀮𑁄𑀲𑀻’’𑀢𑀺𑀆𑀤𑀺𑀦𑀸 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀅𑀦𑀜𑁆𑀜𑀸𑀧𑀤𑁂𑀲𑁂𑀦 𑀪𑀺𑀓𑁆𑀔𑀼𑀦𑁄 𑀔𑀼𑀁𑀲𑁂𑀢𑀼𑀓𑀸𑀫𑀢𑀸𑀬 𑀅𑀓𑁆𑀓𑁄𑀲𑀯𑀘𑀦𑁂𑀢𑀺 𑀅𑀢𑁆𑀣𑁄. ‘‘𑀲𑀦𑁆𑀢𑀺 𑀇𑀥𑁂𑀓𑀘𑁆𑀘𑁂 𑀘𑀡𑁆𑀟𑀸𑀮𑀸’’𑀢𑀺𑀆𑀤𑀺𑀦𑀸 𑀅𑀜𑁆𑀜𑀸𑀧𑀤𑁂𑀲𑁂𑀦 𑀯𑀸 ‘‘𑀘𑁄𑀭𑁄𑀲𑀺, 𑀯𑀺𑀓𑀸𑀭𑀻𑀲𑀺, 𑀫𑀸𑀢𑀼𑀖𑀸𑀢𑀓𑁄𑀲𑀻’’𑀢𑀺𑀆𑀤𑀻𑀳𑀺 𑀧𑀸𑀴𑀺𑀫𑀼𑀢𑁆𑀢𑀧𑀤𑁂𑀳𑀺 𑀯𑀸 𑀪𑀺𑀓𑁆𑀔𑀼𑀲𑁆𑀲, 𑀬𑀣𑀸 𑀯𑀸 𑀢𑀣𑀸 𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀁, 𑀧𑀭𑀫𑁆𑀫𑀼𑀔𑀸 𑀧𑀦 𑀲𑀩𑁆𑀩𑀫𑁆𑀧𑀺 𑀅𑀓𑁆𑀓𑁄𑀲𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀓𑁂𑀯𑀮𑀁 𑀤𑀯𑀓𑀫𑁆𑀬𑀢𑀸𑀬 𑀯𑀤𑀢𑁄 𑀧𑀦 𑀲𑀩𑁆𑀩𑀢𑁆𑀣 𑀤𑀼𑀩𑁆𑀪𑀸𑀲𑀺𑀢𑀁.

𑀧𑁂𑀲𑀼𑀜𑁆𑀜𑀳𑀭𑀡𑁂𑀢𑀺 𑀧𑀺𑀲𑀼𑀡𑀲𑁆𑀲 𑀪𑀸𑀯𑁄 𑀧𑁂𑀲𑀼𑀜𑁆𑀜𑀁. 𑀅𑀢𑁆𑀢𑀦𑁄 𑀧𑀺𑀬𑀓𑀫𑁆𑀬𑀢𑀸𑀬 𑀯𑀸 𑀧𑀭𑀲𑁆𑀲 𑀧𑀭𑁂𑀲𑀼 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦 𑀯𑀸 𑀚𑀸𑀢𑀺𑀆𑀤𑀻𑀳𑀺 𑀑𑀫𑀲𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀘𑀦𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀼𑀲𑁆𑀲 𑀢𑀲𑁆𑀲 𑀧𑁂𑀲𑀼𑀜𑁆𑀜𑀲𑁆𑀲 𑀳𑀭𑀡𑁂. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀳𑀭𑀡𑁂 𑀤𑀼𑀓𑁆𑀓𑀝𑀁. 𑀧𑀤𑀁 𑀧𑀤𑀁 𑀧𑀤𑀲𑁄, 𑀯𑀺𑀘𑁆𑀙𑀸𑀬𑀁 𑀲𑁄, 𑀓𑁄𑀝𑁆𑀞𑀸𑀲𑁂𑀦 𑀓𑁄𑀝𑁆𑀞𑀸𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀗𑁆𑀕𑀻𑀢𑀺𑀢𑁆𑀢𑀬𑀸𑀭𑀼𑀴𑁆𑀳𑁄 𑀢𑀺𑀧𑀺𑀝𑀓𑀥𑀫𑁆𑀫𑁄, 𑀅𑀦𑀸𑀭𑀼𑀴𑁆𑀳𑁄 𑀘 𑀭𑀸𑀚𑁄𑀯𑀸𑀤𑀸𑀤𑀺𑀓𑁄 𑀥𑀫𑁆𑀫𑁄 𑀦𑀸𑀫, 𑀢𑁂𑀦 𑀲𑀳 𑀧𑀤𑀲𑁄𑀢𑀺 𑀦𑀺𑀧𑀸𑀢𑀲𑁆𑀲 𑀢𑀢𑀺𑀬𑀸𑀢𑀧𑁆𑀧𑀼𑀭𑀺𑀲𑁄. 𑀧𑀤𑀲𑁄𑀥𑀫𑁆𑀫𑁂𑀢𑀺 𑀏𑀓𑀓𑁆𑀔𑀭𑀸𑀤𑀺𑀦𑀸 𑀓𑁄𑀝𑁆𑀞𑀸𑀲𑁂𑀦 𑀓𑁄𑀝𑁆𑀞𑀸𑀲𑁂𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀤𑁆𑀥𑀺𑀁 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀪𑀡𑀦𑁂𑀢𑀺 𑀅𑀢𑁆𑀣𑁄. 𑀧𑀤𑀲𑁄𑀥𑀫𑁆𑀫𑀪𑀡𑀦𑀜𑁆𑀳𑀺 𑀧𑀤𑀲𑁄𑀥𑀫𑁆𑀫-𑀲𑀤𑁆𑀤𑁂𑀦 𑀉𑀧𑀘𑀸𑀭𑁂𑀦 𑀯𑀼𑀢𑁆𑀢𑀁. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀉𑀤𑁆𑀤𑁂𑀲𑀕𑁆𑀕𑀳𑀡𑁂 𑀲𑀚𑁆𑀛𑀸𑀬𑀓𑀭𑀡𑁂, 𑀢𑀁𑀲𑀦𑁆𑀢𑀺𑀓𑁂 𑀉𑀤𑁆𑀤𑁂𑀲𑀕𑁆𑀕𑀳𑀡𑀸𑀤𑀺𑀓𑁂 𑀘 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀬𑁂𑀪𑀼𑀬𑁆𑀬𑁂𑀦 𑀧𑀕𑀼𑀡𑀁 𑀕𑀦𑁆𑀣𑀁 𑀪𑀡𑀦𑁆𑀢𑀲𑁆𑀲 𑀑𑀲𑀸𑀭𑁂𑀦𑁆𑀢𑀲𑁆𑀲 𑀔𑀮𑀺𑀢𑀝𑁆𑀞𑀸𑀦𑁂 ‘‘𑀏𑀯𑀁 𑀪𑀡𑀸𑀳𑀻’’𑀢𑀺 𑀏𑀓𑀢𑁄 𑀪𑀡𑀦𑁆𑀢𑀲𑁆𑀲𑀧𑀺 𑀅𑀦𑀸𑀧𑀢𑁆𑀢𑀺.

𑀅𑀦𑁆𑀢𑀫𑀲𑁄 𑀯𑀢𑁆𑀣𑀸𑀤𑀺𑀦𑀸 𑀬𑁂𑀦 𑀓𑁂𑀦𑀘𑀺 𑀲𑀩𑁆𑀩𑀘𑁆𑀙𑀦𑁆𑀦𑀁 𑀙𑀤𑀦𑀁 𑀅𑀦𑀸𑀳𑀘𑁆𑀘 𑀤𑀺𑀬𑀟𑁆𑀠𑀳𑀢𑁆𑀣𑀼𑀩𑁆𑀩𑁂𑀥𑁂𑀦𑀸𑀧𑀺 𑀲𑀩𑁆𑀩𑀧𑀭𑀺𑀘𑁆𑀙𑀺𑀦𑁆𑀦𑀁 𑀬𑁂𑀪𑀼𑀬𑁆𑀬𑁂𑀦𑀙𑀦𑁆𑀦𑀁 𑀬𑁂𑀪𑀼𑀬𑁆𑀬𑁂𑀦𑀧𑀭𑀺𑀘𑁆𑀙𑀺𑀦𑁆𑀦𑀜𑁆𑀘 𑀲𑁂𑀦𑀸𑀲𑀦𑀁 𑀅𑀕𑀸𑀭𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀢𑀢𑁆𑀭𑀝𑁆𑀞𑁄 𑀧𑀦 𑀪𑀺𑀓𑁆𑀔𑀼𑀁 𑀞𑀧𑁂𑀢𑁆𑀯𑀸 𑀅𑀦𑁆𑀢𑀫𑀲𑁄 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑁄 𑀢𑀺𑀭𑀘𑁆𑀙𑀸𑀦𑀕𑀢𑁄𑀧𑀺 𑀅𑀦𑁆𑀢𑀫𑀲𑁄 𑀢𑀤𑀳𑀼𑀚𑀸𑀢𑀸 𑀇𑀢𑁆𑀣𑀻𑀧𑀺 𑀉𑀧𑀘𑀸𑀭𑀢𑁄 𑀅𑀕𑀸𑀭-𑀲𑀤𑁆𑀤𑁂𑀦 𑀯𑀼𑀘𑁆𑀘𑀢𑀺. 𑀲𑀳 𑀅𑀕𑀸𑀭𑁂𑀦𑀸𑀢𑀺 𑀲𑀸𑀕𑀸𑀭𑁄, 𑀪𑀺𑀓𑁆𑀔𑀼. 𑀉𑀧𑀘𑀸𑀭𑁂𑀦𑁂𑀯 𑀘 𑀧𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦, 𑀫𑀸𑀢𑀼𑀕𑀸𑀫𑁂𑀦 𑀘 𑀲𑀳 𑀲𑁂𑀬𑁆𑀬𑀓𑀧𑁆𑀧𑀦𑀁 𑀲𑀸𑀕𑀸𑀭𑀪𑀸𑀯𑁄 𑀦𑀸𑀫𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀲𑀗𑁆𑀖𑀲𑀫𑁆𑀫𑀢𑀁 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑀸𑀤𑀺𑀪𑁂𑀤𑀁 𑀉𑀧𑀲𑀫𑁆𑀧𑀦𑁆𑀦𑀁 𑀅𑀬𑀲𑀓𑀸𑀫𑀸 𑀳𑀼𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀬𑁂𑀦 𑀘 𑀉𑀚𑁆𑀛𑀸𑀧𑁂𑀦𑁆𑀢𑀺 𑀅𑀯𑀚𑀸𑀦𑀸𑀧𑁂𑀦𑁆𑀢𑀺 𑀅𑀯𑀜𑁆𑀜𑀸𑀬 𑀑𑀮𑁄𑀓𑀸𑀧𑁂𑀦𑁆𑀢𑀺, 𑀮𑀸𑀫𑀓𑀢𑁄 𑀯𑀸 𑀘𑀺𑀦𑁆𑀢𑀸𑀧𑁂𑀦𑁆𑀢𑀺, 𑀢𑀁 𑀯𑀘𑀦𑀁 𑀉𑀚𑁆𑀛𑀸𑀧𑀦𑀓𑀁. 𑀬𑁂𑀦 𑀔𑀻𑀬𑀦𑁆𑀢𑀺 𑀲𑀩𑁆𑀩𑀢𑁆𑀣 𑀢𑀲𑁆𑀲 𑀅𑀯𑀡𑁆𑀡𑀁 𑀧𑀓𑀸𑀲𑁂𑀦𑁆𑀢𑀺, 𑀢𑀁 𑀔𑀻𑀬𑀦𑀁.

𑁧𑁨𑁨. 𑀢𑀮𑀦𑁆𑀢𑀺 𑀳𑀢𑁆𑀣𑀢𑀮𑀫𑀥𑀺𑀧𑁆𑀧𑁂𑀢𑀁. 𑀢𑀕𑁆𑀕𑀳𑀡𑁂𑀦 𑀧𑀦 𑀓𑀸𑀬𑁄𑀯 𑀢𑀮𑀁. 𑀲𑀢𑁆𑀢𑀻𑀢𑀺 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀸 𑀲𑀢𑁆𑀢𑀺 𑀆𑀯𑀼𑀥𑀯𑀺𑀲𑁂𑀲𑁄, 𑀉𑀧𑀮𑀓𑁆𑀔𑀡𑀢𑁆𑀢𑀸 𑀧𑀦 𑀲𑀩𑁆𑀩𑀫𑁆𑀧𑀺 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁 𑀲𑀢𑁆𑀢𑀺. 𑀢𑀮𑀜𑁆𑀘 𑀲𑀢𑁆𑀢𑀺 𑀘 𑀢𑀮𑀲𑀢𑁆𑀢𑀺. 𑀇𑀥 𑀧𑀦 𑀓𑁄𑀧𑁂𑀦 𑀪𑀺𑀓𑁆𑀔𑀼𑀲𑁆𑀲 𑀢𑀮𑀲𑀢𑁆𑀢𑀺𑀉𑀕𑁆𑀕𑀺𑀭𑀡𑀁 𑀢𑀮𑀲𑀢𑁆𑀢𑀺. 𑀲𑀘𑁂 𑀧𑀦 𑀯𑀺𑀭𑀤𑁆𑀥𑁄 𑀧𑀳𑀸𑀭𑀁 𑀤𑁂𑀢𑀺, 𑀦 𑀧𑀳𑀭𑀺𑀢𑀼𑀓𑀸𑀫𑀢𑀸𑀬 𑀤𑀺𑀦𑁆𑀦𑀢𑁆𑀢𑀸 𑀤𑀼𑀓𑁆𑀓𑀝𑀁, 𑀧𑀳𑀭𑀺𑀢𑀼𑀓𑀸𑀫𑀢𑀸𑀬 𑀧𑀸𑀘𑀺𑀢𑁆𑀢𑀺𑀬𑀁, 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀤𑀼𑀓𑁆𑀓𑀝𑀁, 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀧𑀜𑁆𑀜𑀢𑁆𑀢𑁂𑀦 𑀯𑀤𑀢𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀯𑀸 𑀢𑁂𑀦 𑀯𑀼𑀘𑁆𑀘𑀫𑀸𑀦𑀥𑀫𑁆𑀫𑀲𑁆𑀲 𑀯𑀸 𑀅𑀦𑀸𑀤𑀭𑀓𑀭𑀡𑀁 𑀅𑀦𑀸𑀤𑀭𑁄. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀢𑁂𑀦 𑀯𑀼𑀘𑁆𑀘𑀫𑀸𑀦𑀲𑁆𑀲 𑀯𑀸 𑀉𑀧𑀲𑀫𑁆𑀧𑀦𑁆𑀦𑁂𑀦, 𑀧𑀭𑁂𑀦 𑀯𑀸 𑀅𑀧𑀜𑁆𑀜𑀢𑁆𑀢𑁂𑀦 𑀯𑀸 𑀯𑀼𑀘𑁆𑀘𑀫𑀸𑀦𑀲𑁆𑀲 𑀅𑀦𑀸𑀤𑀭𑁂 𑀤𑀼𑀓𑁆𑀓𑀝𑀁.

‘‘𑀊𑀦𑀯𑀲𑁆𑀲𑁄 𑀢𑁆𑀯𑀁 𑀫𑀜𑁆𑀜𑁂’’𑀢𑀺𑀆𑀤𑀺𑀦𑀸 𑀪𑀺𑀓𑁆𑀔𑀼𑀦𑁄 𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑀦𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀼𑀓𑁆𑀓𑀝𑀁.

𑀅𑀦𑀸𑀧𑀼𑀘𑁆𑀙𑀸 𑀕𑀸𑀫𑀧𑁆𑀧𑀯𑁂𑀲𑀦𑁂𑀢𑀺 𑀧𑀓𑀢𑀺𑀯𑀘𑀦𑁂𑀦 𑀧𑀼𑀘𑁆𑀙𑀺𑀢𑀼𑀫𑀦𑀼𑀭𑀽𑀧𑀁 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬 𑀤𑀲𑁆𑀲𑀦𑀽𑀧𑀘𑀸𑀭𑁂 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 ‘‘𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑀁 𑀆𑀧𑀼𑀘𑁆𑀙𑀸𑀫𑀻’’𑀢𑀺 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑁂. 𑀤𑀻𑀖𑁄 𑀧𑀦 𑀲𑀦𑁆𑀥𑀺𑀯𑀲𑁂𑀦. 𑀆𑀧𑀤𑀸𑀲𑀼 𑀅𑀦𑀸𑀧𑀢𑁆𑀢𑀺.

𑀧𑀭𑀫𑁆𑀧𑀭𑀪𑁄𑀚𑀦𑁂𑀢𑀺 𑀧𑀭𑁄 𑀘 𑀧𑀭𑁄 𑀘 𑀧𑀭𑀫𑁆𑀧𑀭𑀸 𑀫-𑀓𑀸𑀭𑁄 𑀲𑀦𑁆𑀥𑀺𑀯𑀲𑁂𑀦, 𑀢𑀲𑁆𑀫𑀸 𑀧𑀭𑀫𑁆𑀧𑀭𑀸 𑀉𑀧𑁆𑀧𑀢𑁆𑀢𑀯𑀺𑀲𑀬𑀅𑀧𑀸𑀤𑀸𑀦𑀯𑀘𑀦𑀁, 𑀧𑀭𑀢𑁄 𑀧𑀭𑀢𑁄 𑀮𑀤𑁆𑀥𑀸 𑀪𑀼𑀜𑁆𑀚𑀦𑁂𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀧𑀜𑁆𑀘𑀳𑀺 𑀪𑁄𑀚𑀦𑁂𑀳𑀺 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀦𑀺𑀫𑀦𑁆𑀢𑀺𑀢𑀲𑁆𑀲 𑀬𑁂𑀦 𑀬𑁂𑀦 𑀧𑀞𑀫𑀁 𑀦𑀺𑀫𑀦𑁆𑀢𑀺𑀢𑁄, 𑀢𑀲𑁆𑀲 𑀢𑀲𑁆𑀲 𑀪𑁄𑀚𑀦𑀢𑁄 𑀉𑀧𑁆𑀧𑀝𑀺𑀧𑀸𑀝𑀺𑀬𑀸, ‘‘𑀫𑀬𑁆𑀳𑀁 𑀪𑀢𑁆𑀢𑀧𑀘𑁆𑀘𑀸𑀲𑀁 𑀢𑀼𑀬𑁆𑀳𑀁 𑀤𑀫𑁆𑀫𑀻’’𑀢𑀺 𑀯𑀸 ‘‘𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀯𑀸 𑀆𑀤𑀺𑀦𑀸 𑀲𑀫𑁆𑀫𑀼𑀔𑀸 𑀯𑀸 𑀧𑀭𑀫𑁆𑀫𑀼𑀔𑀸 𑀯𑀸 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀸 𑀅𑀜𑁆𑀜𑀢𑁄 𑀅𑀜𑁆𑀜𑀢𑁄 𑀧𑀜𑁆𑀘𑀪𑁄𑀚𑀦𑀸𑀤𑀻𑀦𑀺 𑀮𑀤𑁆𑀥𑀸 𑀪𑀼𑀜𑁆𑀚𑀫𑀸𑀦𑁂𑀢𑀺. 𑀕𑀺𑀮𑀸𑀦𑀘𑀻𑀯𑀭𑀤𑀸𑀦𑀘𑀻𑀯𑀭𑀓𑀸𑀭𑀲𑀫𑀬𑁂 𑀅𑀦𑀸𑀧𑀢𑁆𑀢𑀺.

𑁧𑁨𑁩. 𑀲𑁂𑀬𑁆𑀬𑀁 𑀲𑁂𑀦𑀸𑀲𑀦𑀸𑀦𑀺 𑀯𑀸 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀕𑀫𑀦𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀸-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑁂. 𑀢𑀢𑁆𑀣 ‘‘𑀪𑀺𑀲𑀺 𑀘𑀺𑀫𑀺𑀮𑀺𑀓𑀸 𑀉𑀢𑁆𑀢𑀭𑀢𑁆𑀣𑀭𑀡𑀁 𑀪𑀽𑀫𑀢𑁆𑀣𑀭𑀡𑀁 𑀢𑀝𑁆𑀝𑀺𑀓𑀸 𑀘𑀫𑁆𑀫𑀓𑁆𑀔𑀡𑁆𑀟𑁄 𑀦𑀺𑀲𑀻𑀤𑀦𑀁 𑀧𑀘𑁆𑀘𑀢𑁆𑀣𑀭𑀡𑀁 𑀢𑀺𑀡𑀲𑀦𑁆𑀣𑀸𑀭𑁄 𑀧𑀡𑁆𑀡𑀲𑀦𑁆𑀣𑀸𑀭𑁄’’𑀢𑀺 (𑀧𑀸𑀘𑀺. 𑁧𑁧𑁬) 𑀯𑀼𑀢𑁆𑀢𑀸𑀲𑀼 𑀤𑀲𑀲𑀼 𑀲𑁂𑀬𑁆𑀬𑀸𑀲𑀼 𑀏𑀓𑀫𑁆𑀧𑀺 𑀅𑀢𑁆𑀢𑀦𑁄 𑀯𑀲𑁆𑀲𑀕𑁆𑀕𑀦𑁂 𑀕𑀳𑁂𑀢𑁆𑀯𑀸 𑀲𑀗𑁆𑀖𑀺𑀓𑁂 𑀲𑀩𑁆𑀩𑀧𑁆𑀧𑀝𑀺𑀘𑁆𑀙𑀦𑁆𑀦𑁂 𑀕𑀼𑀢𑁆𑀢𑁂 𑀲𑁂𑀦𑀸𑀲𑀦𑁂 𑀲𑀦𑁆𑀣𑀭𑀺𑀢𑁆𑀯𑀸 𑀯𑀸 𑀲𑀦𑁆𑀣𑀭𑀸𑀧𑁂𑀢𑁆𑀯𑀸 𑀯𑀸 𑀬𑀣𑀸 𑀞𑀧𑀺𑀢𑀁 𑀉𑀧𑀘𑀺𑀓𑀸𑀤𑀻𑀳𑀺 𑀦 𑀔𑀚𑁆𑀚𑀢𑀺, 𑀢𑀣𑀸 𑀞𑀧𑀦𑀯𑀲𑁂𑀦 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀆𑀭𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑀁, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀉𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀫𑀦𑁂 𑀘, 𑀢𑀣𑀸 𑀫𑀜𑁆𑀘𑀧𑀻𑀞𑀢𑀺𑀲𑀺𑀓𑁄𑀘𑁆𑀙𑀲𑀗𑁆𑀔𑀸𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀯𑀲𑁆𑀲𑀓𑀸𑀮𑁂 𑀅𑀚𑁆𑀛𑁄𑀓𑀸𑀲𑁂 𑀲𑀦𑁆𑀣𑀭𑀺𑀢𑁆𑀯𑀸 𑀯𑀸 𑀲𑀦𑁆𑀣𑀭𑀸𑀧𑁂𑀢𑁆𑀯𑀸 𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀣𑀸𑀫𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀫𑀦𑁂 𑀘𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀯𑀼𑀢𑁆𑀢𑀢𑁄 𑀧𑀦 𑀅𑀜𑁆𑀜𑀢𑁆𑀣 𑀤𑀼𑀓𑁆𑀓𑀝𑀁.

𑀇𑀢𑁆𑀣𑀺𑀬𑀸 𑀅𑀤𑁆𑀥𑀸𑀦𑀕𑀫𑀦𑁂𑀢𑀺 ‘‘𑀕𑀘𑁆𑀙𑀸𑀫 𑀪𑀕𑀺𑀦𑀺, 𑀕𑀘𑁆𑀙𑀸𑀫 𑀅𑀬𑁆𑀬𑀸’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 ‘‘𑀅𑀚𑁆𑀚 𑀯𑀸 𑀲𑁆𑀯𑁂 𑀯𑀸’’𑀢𑀺𑀆𑀤𑀺𑀦𑀸 𑀦𑀺𑀬𑀫𑀺𑀢𑀓𑀸𑀮𑀯𑀺𑀲𑀗𑁆𑀓𑁂𑀢𑀁 𑀅𑀓𑀢𑁆𑀯𑀸𑀧𑀺 𑀤𑁆𑀯𑀸𑀭𑀯𑀺𑀲𑀗𑁆𑀓𑁂𑀢𑀁 𑀫𑀕𑁆𑀕𑀯𑀺𑀲𑀗𑁆𑀓𑁂𑀢𑀁 𑀓𑀢𑁆𑀯𑀸𑀧𑀺 𑀇𑀢𑁆𑀣𑀺𑀬𑀸 𑀲𑀤𑁆𑀥𑀺𑀁 𑀅𑀤𑁆𑀥𑀸𑀦𑀫𑀕𑁆𑀕𑀕𑀫𑀦𑁂𑀢𑀺 𑀅𑀢𑁆𑀣𑁄.

𑀏𑀓𑁂𑀓𑀸𑀬 𑀦𑀺𑀲𑀻𑀤𑀦𑁂𑀢𑀺 𑀏𑀓𑁂𑀦 𑀏𑀓𑀸𑀢𑀺 𑀏𑀓𑁂𑀓𑀸, 𑀢𑀲𑁆𑀲𑀸 𑀦𑀺𑀲𑀚𑁆𑀚𑀸𑀬𑀸𑀢𑀺 𑀅𑀢𑁆𑀣𑁄. 𑀏𑀓𑁂𑀦 𑀲𑀳 𑀏𑀓𑀺𑀲𑁆𑀲𑀸 𑀦𑀺𑀲𑀚𑁆𑀚𑀁 𑀯𑀺𑀦𑀸 𑀏𑀓𑀸𑀬 𑀲𑀳 𑀏𑀓𑀲𑁆𑀲 𑀦𑀺𑀲𑀚𑁆𑀚𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀏𑀓𑀸𑀬 𑀲𑀳 𑀏𑀓𑀲𑁆𑀲 𑀦𑀺𑀲𑀚𑁆𑀚𑀸𑀬𑀁 𑀲𑀢𑀺 𑀦𑀺𑀲𑀺𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀏𑀓𑀸𑀬𑁂𑀓𑀦𑀺𑀲𑀻𑀤𑀦𑁂’’𑀢𑀺 𑀯𑀸 𑀧𑀸𑀞𑁄.

𑁧𑁨𑁪. 𑀭𑀽𑀧𑀸𑀤𑀻𑀦𑀁 𑀉𑀧𑀲𑀁𑀳𑀸𑀭𑁂𑀦, 𑀪𑀬𑀸𑀦𑀓𑀓𑀣𑀸𑀓𑀣𑀦𑁂𑀦 𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀪𑀺𑀁𑀲𑀸𑀧𑀦𑁂. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀼𑀓𑁆𑀓𑀝𑀁.

𑀆𑀓𑁄𑀝𑀦𑁂 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀅𑀦𑁆𑀢𑀫𑀲𑁄 𑀉𑀧𑁆𑀧𑀮𑀧𑀢𑁆𑀢𑁂𑀦𑀸𑀧𑀺 𑀧𑀳𑀸𑀭𑀤𑀸𑀦𑁂. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲𑀧𑀺 𑀤𑀼𑀓𑁆𑀓𑀝𑀁. 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀲𑀗𑁆𑀖𑀫𑀚𑁆𑀛𑁂 𑀯𑀺𑀦𑀬𑀥𑀭𑁂𑀦 𑀅𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑀲𑁆𑀲 𑀧𑀼𑀘𑁆𑀙𑀺𑀢𑀢𑁄 𑀅𑀜𑁆𑀜𑀲𑁆𑀲 𑀯𑀸𑀤𑁄 𑀅𑀜𑁆𑀜𑁂𑀦 𑀅𑀜𑁆𑀜𑀁 𑀧𑀝𑀺𑀘𑀭𑀡𑀁 𑀅𑀜𑁆𑀜𑀯𑀸𑀤𑁄. 𑀢𑀣𑁂𑀯 𑀧𑀼𑀘𑁆𑀙𑀺𑀬𑀫𑀸𑀦𑀲𑁆𑀲 𑀅𑀓𑀣𑁂𑀢𑀼𑀓𑀸𑀫𑀢𑀸𑀬 𑀯𑀺𑀳𑁂𑀲𑀦𑀁 𑀢𑀼𑀡𑁆𑀳𑀻𑀪𑀸𑀯𑁄 𑀯𑀺𑀳𑁂𑀲𑀸. 𑀅𑀜𑁆𑀜𑀯𑀸𑀤𑀓𑀲𑁆𑀲 𑀯𑀺𑀳𑁂𑀲𑀓𑀲𑁆𑀲 𑀘 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂𑀦 𑀅𑀜𑁆𑀜𑀯𑀸𑀤𑀓𑀯𑀺𑀳𑁂𑀲𑀓𑀓𑀫𑁆𑀫𑁂 𑀓𑀢𑁂 𑀧𑀼𑀦 𑀅𑀜𑁆𑀜𑀯𑀸𑀤𑁂 𑀯𑀺𑀳𑁂𑀲𑀸𑀬 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀦𑀸𑀭𑁄𑀧𑀺𑀢𑁂 𑀧𑀦 𑀓𑀫𑁆𑀫𑁂 𑀤𑀼𑀓𑁆𑀓𑀝𑀁. 𑀓𑀺𑀜𑁆𑀘𑀺 𑀯𑀻𑀢𑀺𑀓𑁆𑀓𑀫𑀁 𑀤𑀺𑀲𑁆𑀯𑀸 ‘‘𑀆𑀯𑀼𑀲𑁄, 𑀇𑀤𑀁 𑀦𑀸𑀫 𑀢𑀬𑀸 𑀓𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀢𑀁 𑀦 𑀓𑀣𑁂𑀢𑀼𑀓𑀸𑀫𑁄 𑀢𑀼𑀡𑁆𑀳𑀻𑀪𑀽𑀢𑁄 𑀲𑀗𑁆𑀖𑀁 𑀯𑀺𑀳𑁂𑀲𑁂𑀢𑀻𑀢𑀺 𑀯𑀺𑀳𑁂𑀲𑀓𑁄. 𑀅𑀦𑀸𑀘𑀸𑀭𑀁 𑀆𑀘𑀭𑀺𑀢𑁆𑀯𑀸 𑀲𑀗𑁆𑀖𑀫𑀚𑁆𑀛𑁂 𑀆𑀧𑀢𑁆𑀢𑀺𑀬𑀸, 𑀯𑀢𑁆𑀣𑀼𑀦𑀸 𑀯𑀸 𑀅𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁂 𑀢𑀁 𑀅𑀓𑀣𑁂𑀢𑀼𑀓𑀸𑀫𑁄 ‘‘𑀓𑁄 𑀆𑀧𑀦𑁆𑀦𑁄, 𑀓𑀺𑀲𑁆𑀫𑀺𑀁 𑀆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀜𑁆𑀜𑁂𑀳𑀺 𑀯𑀘𑀦𑁂𑀳𑀺 𑀢𑀁 𑀯𑀘𑀦𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁄 𑀬𑁄 𑀅𑀜𑁆𑀜𑀁 𑀯𑀤𑀢𑀺, 𑀅𑀬𑀁 𑀅𑀜𑁆𑀜𑀯𑀸𑀤𑀓𑁄 𑀦𑀸𑀫.

𑀤𑀼𑀝𑁆𑀞𑀼𑀮𑁆𑀮𑀁 𑀦𑀸𑀫 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀸, 𑀇𑀥 𑀧𑀦 𑀲𑀗𑁆𑀖𑀸𑀤𑀺𑀲𑁂𑀲𑁄𑀯. 𑀧𑀓𑀸𑀲𑁄 𑀘 𑀙𑀸𑀤𑁄 𑀘 𑀧𑀓𑀸𑀲𑀙𑀸𑀤𑁄, 𑀤𑀼𑀝𑁆𑀞𑀼𑀮𑁆𑀮𑀲𑁆𑀲 𑀧𑀓𑀸𑀲𑀙𑀸𑀤𑁄𑀢𑀺 𑀢𑀧𑁆𑀧𑀼𑀭𑀺𑀲𑁄. 𑀅𑀪𑀺𑀡𑁆𑀳𑀸𑀧𑀢𑁆𑀢𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀬𑀢𑀺𑀁 𑀲𑀁𑀯𑀭𑀢𑁆𑀣𑀸𑀬 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀓𑀼𑀮𑀧𑀭𑀺𑀬𑀦𑁆𑀢𑀜𑁆𑀘 𑀓𑀢𑁆𑀯𑀸 𑀯𑀸 𑀅𑀓𑀢𑁆𑀯𑀸 𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀅𑀧𑀮𑁄𑀓𑁂𑀢𑁆𑀯𑀸 𑀓𑀸𑀢𑀩𑁆𑀩𑀁. 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀁 𑀞𑀧𑁂𑀢𑁆𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 ‘‘𑀅𑀬𑀁 𑀅𑀲𑀼𑀘𑀺𑀁 𑀫𑁄𑀘𑁂𑀢𑁆𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀢𑁆𑀣𑀼𑀦𑀸 𑀲𑀤𑁆𑀥𑀺𑀁 𑀆𑀧𑀢𑁆𑀢𑀺𑀁 𑀖𑀝𑁂𑀢𑁆𑀯𑀸 𑀢𑀲𑁆𑀲 𑀤𑀼𑀝𑁆𑀞𑀼𑀮𑁆𑀮𑀲𑁆𑀲 𑀧𑀓𑀸𑀲𑀦𑁂 𑀆𑀭𑁄𑀘𑀦𑁂 𑀘, 𑀢𑀲𑁆𑀲𑁂𑀯 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀜𑀢𑁆𑀯𑀸 𑀙𑀸𑀤𑀦𑁂 𑀘, 𑀅𑀤𑀼𑀝𑁆𑀞𑀼𑀮𑁆𑀮𑀸𑀭𑁄𑀘𑀦𑁂 𑀙𑀸𑀤𑀦𑁂 𑀘, 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑀦 𑀧𑀼𑀭𑀺𑀫𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑁂 𑀇𑀢𑀭𑀸 𑀤𑀼𑀝𑁆𑀞𑀼𑀮𑁆𑀮𑁂𑀧𑀺 𑀤𑀼𑀓𑁆𑀓𑀝𑀁.

𑀳𑀸𑀲𑁄𑀤𑀓𑁂𑀢𑀺 𑀏𑀢𑁆𑀣 𑀳𑀸𑀲𑁂 𑀉𑀤𑀓𑁂𑀢𑀺 𑀧𑀤𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀬𑁂𑀦 𑀓𑁂𑀦𑀘𑀺 𑀲𑀭𑀻𑀭𑀸𑀯𑀬𑀯𑁂𑀦 𑀳𑀲𑀸𑀥𑀺𑀧𑁆𑀧𑀸𑀬𑀲𑁆𑀲 𑀉𑀧𑀓𑀘𑁆𑀙𑀓𑀸𑀤𑀻𑀲𑀼 𑀳𑀸𑀲𑁂 𑀨𑀼𑀲𑀦𑁂. 𑀳𑀸𑀲𑀦𑀺𑀫𑀺𑀢𑁆𑀢𑀜𑁆𑀳𑀺 𑀨𑀼𑀲𑀦𑀁 𑀳𑀸𑀲𑁄. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀤𑀼𑀓𑁆𑀓𑀝𑀁. 𑀉𑀤𑀓𑁂 𑀳𑀸𑀲𑁂𑀢𑀺 𑀉𑀧𑀭𑀺𑀕𑁄𑀧𑁆𑀨𑀓𑁂 𑀉𑀤𑀓𑁂 𑀳𑀲𑀸𑀥𑀺𑀧𑁆𑀧𑀸𑀬𑀲𑁆𑀲 𑀉𑀫𑁆𑀫𑀼𑀚𑁆𑀚𑀦𑀦𑀺𑀫𑀼𑀚𑁆𑀚𑀦𑁂𑀦 𑀓𑀻𑀴𑀸𑀬. 𑀓𑀻𑀴𑀸 𑀳𑀺 𑀇𑀥 𑀳𑀸𑀲𑁄𑀢𑀺 𑀯𑀼𑀢𑁆𑀢𑁄. 𑀦𑀸𑀯𑀸𑀬 𑀓𑀻𑀴𑀢𑁄, 𑀳𑀢𑁆𑀣𑀸𑀤𑀺𑀦𑀸 𑀓𑀝𑁆𑀞𑀸𑀤𑀺𑀦𑀸 𑀯𑀸 𑀉𑀤𑀓𑀁 𑀳𑀦𑀢𑁄 𑀅𑀦𑁆𑀢𑀫𑀲𑁄 𑀪𑀸𑀚𑀦𑀕𑀢𑀓𑀜𑁆𑀚𑀺𑀓𑀸𑀤𑀻𑀦𑀺𑀧𑀺 𑀔𑀺𑀧𑀦𑀓𑀻𑀴𑀸𑀬 𑀓𑀻𑀴𑀢𑁄 𑀤𑀼𑀓𑁆𑀓𑀝𑀁. 𑀅𑀳𑀲𑀸𑀥𑀺𑀧𑁆𑀧𑀸𑀬𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀦𑀺𑀘𑁆𑀙𑀼𑀪𑀦𑁂 𑀯𑀺𑀳𑀸𑀭𑀸𑀢𑀺 𑀲𑀗𑁆𑀖𑀺𑀓𑀯𑀺𑀳𑀸𑀭𑀢𑁄 𑀪𑀺𑀓𑁆𑀔𑀼𑀦𑁄 𑀦𑀺𑀓𑁆𑀓𑀟𑁆𑀠𑀦𑀦𑀺𑀓𑁆𑀓𑀟𑁆𑀠𑀸𑀧𑀦𑁂. 𑀏𑀢𑁆𑀣 𑀘 𑀏𑀓𑀧𑁆𑀧𑀬𑁄𑀕𑁂 𑀏𑀓𑀸, 𑀦𑀸𑀦𑀸𑀧𑀬𑁄𑀕𑁂 𑀤𑁆𑀯𑀸𑀭𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄. 𑀧𑀼𑀕𑁆𑀕𑀮𑀺𑀓𑀦𑀺𑀓𑁆𑀓𑀟𑁆𑀠𑀦𑁂, 𑀢𑀲𑁆𑀲 𑀧𑀭𑀺𑀓𑁆𑀔𑀸𑀭𑀦𑀺𑀓𑁆𑀓𑀟𑁆𑀠𑀦𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑀦 𑀢𑀲𑁆𑀲 𑀧𑀭𑀺𑀓𑁆𑀔𑀸𑀭𑀲𑁆𑀲 𑀯𑀸 𑀦𑀺𑀓𑁆𑀓𑀟𑁆𑀠𑀦𑁂 𑀤𑀼𑀓𑁆𑀓𑀝𑀁. 𑀦 𑀲𑀫𑁆𑀫𑀸𑀯𑀢𑁆𑀢𑀦𑁆𑀢𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁 𑀯𑀸 𑀦𑀺𑀓𑁆𑀓𑀟𑁆𑀠𑀦𑁂, 𑀅𑀢𑁆𑀢𑀦𑁄 𑀯𑀺𑀲𑁆𑀲𑀸𑀲𑀺𑀓𑀲𑁆𑀲 𑀯𑀺𑀳𑀸𑀭𑀸 𑀦𑀺𑀓𑁆𑀓𑀟𑁆𑀠𑀦𑁂, 𑀪𑀡𑁆𑀟𑀦𑀓𑀸𑀭𑀓𑀲𑁆𑀲 𑀧𑀦 𑀲𑀓𑀮𑀲𑀗𑁆𑀖𑀸𑀭𑀸𑀫𑀢𑁄 𑀦𑀺𑀓𑁆𑀓𑀟𑁆𑀠𑀦𑁂 𑀅𑀦𑀸𑀧𑀢𑁆𑀢𑀺.

𑀅𑀦𑀼𑀧𑀔𑀚𑁆𑀚 𑀲𑀬𑀦𑁂𑀢𑀺 ‘‘𑀯𑀼𑀟𑁆𑀠𑁄, 𑀕𑀺𑀮𑀸𑀦𑁄, 𑀲𑀗𑁆𑀖𑁂𑀦 𑀤𑀺𑀦𑁆𑀦𑁄’’𑀢𑀺 𑀚𑀸𑀦𑀺𑀢𑁆𑀯𑀸 𑀫𑀜𑁆𑀘𑀧𑀻𑀞𑀸𑀦𑀁 𑀯𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀯𑀺𑀲𑀦𑁆𑀢𑀲𑁆𑀲 𑀯𑀸 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀯𑀸 𑀉𑀧𑀘𑀸𑀭𑀁 𑀅𑀦𑀼𑀧𑀔𑀚𑁆𑀚 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀲𑀗𑁆𑀖𑀺𑀓𑁂 𑀯𑀺𑀳𑀸𑀭𑁂 ‘‘𑀬𑀲𑁆𑀲 𑀲𑀫𑁆𑀩𑀸𑀥𑁄 𑀪𑀯𑀺𑀲𑁆𑀲𑀢𑀺, 𑀲𑁄 𑀧𑀓𑁆𑀓𑀫𑀺𑀲𑁆𑀲𑀢𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀦𑀺𑀲𑀻𑀤𑀦𑀦𑀺𑀲𑀚𑁆𑀚𑀦𑀯𑀲𑁂𑀦 𑀲𑀬𑀦𑁂. 𑀧𑀼𑀕𑁆𑀕𑀮𑀺𑀓𑁂 𑀤𑀼𑀓𑁆𑀓𑀝𑀁.

𑀏𑀢𑁆𑀣 𑀘 𑀧𑀸𑀘𑀺𑀢𑁆𑀢𑀻𑀢𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀓𑀸𑀦𑀺𑀘𑀺 𑀧𑀲𑀺𑀤𑁆𑀥𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀅𑀯𑀼𑀢𑁆𑀢𑀸𑀦𑀺 𑀧𑀦 𑀢𑀸𑀤𑀺𑀲𑀸𑀦𑀺 𑀇𑀫𑀺𑀦𑀸𑀯 𑀲𑀸𑀫𑀜𑁆𑀜𑀯𑀘𑀦𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀓𑀣𑀁? 𑀅𑀘𑁂𑀮𑀓𑀸𑀤𑀺𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀬𑀲𑁆𑀲 𑀓𑀲𑁆𑀲𑀘𑀺 𑀆𑀫𑀺𑀲𑀲𑁆𑀲 𑀲𑀳𑀢𑁆𑀣𑀸 𑀤𑀸𑀦𑁂 𑀘, 𑀲𑀧𑁆𑀧𑀺𑀦𑀯𑀦𑀻𑀢𑀢𑁂𑀮𑀫𑀥𑀼𑀨𑀸𑀡𑀺𑀢𑀫𑀘𑁆𑀙𑀫𑀁𑀲𑀔𑀻𑀭𑀤𑀥𑀺𑀲𑀗𑁆𑀔𑀸𑀢𑀸𑀦𑀁 𑀧𑀡𑀻𑀢𑀪𑁄𑀚𑀦𑀸𑀦𑀁 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁂, 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀇𑀢𑁆𑀣𑀺𑀧𑀼𑀭𑀺𑀲𑀲𑁆𑀲 𑀬𑁄𑀕𑁆𑀕𑁂 𑀓𑀼𑀮𑁂 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀚𑁆𑀚𑀦𑀓𑀧𑁆𑀧𑀦𑁂, 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑁂𑀦 𑀦𑀺𑀫𑀦𑁆𑀢𑀺𑀢𑁄 𑀢𑀲𑁆𑀫𑀺𑀁 𑀪𑀼𑀢𑁆𑀢𑁂 𑀯𑀸 𑀅𑀪𑀼𑀢𑁆𑀢𑁂 𑀯𑀸 𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀧𑀼𑀭𑁂𑀪𑀢𑁆𑀢𑀁 𑀧𑀘𑁆𑀙𑀸𑀪𑀢𑁆𑀢𑀁 𑀯𑀸 𑀬𑀲𑁆𑀫𑀺𑀁 𑀓𑀼𑀮𑁂 𑀦𑀺𑀫𑀦𑁆𑀢𑀺𑀢𑁄, 𑀢𑀢𑁄 𑀕𑀺𑀮𑀸𑀦𑀘𑀻𑀯𑀭𑀤𑀸𑀦𑀓𑀸𑀭𑀲𑀫𑀬𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀅𑀜𑁆𑀜𑀓𑀼𑀮𑀧𑁆𑀧𑀯𑁂𑀲𑀦𑁂, 𑀞𑀧𑁂𑀢𑁆𑀯𑀸 𑀏𑀓𑀤𑀺𑀯𑀲𑀁 𑀅𑀜𑁆𑀜𑀲𑁆𑀫𑀺𑀁 𑀤𑀺𑀦𑁂 𑀆𑀯𑀲𑀣𑀧𑀺𑀡𑁆𑀟𑀲𑁆𑀲 𑀅𑀕𑀺𑀮𑀸𑀦𑁂𑀦 𑀳𑀼𑀢𑁆𑀯𑀸 𑀪𑀼𑀜𑁆𑀚𑀦𑁂, 𑀭𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑀁 𑀯𑀸 𑀪𑁂𑀲𑀚𑁆𑀚𑀧𑀭𑀺𑀘𑁆𑀙𑁂𑀤𑀁 𑀯𑀸 𑀓𑀢𑁆𑀯𑀸 𑀧𑀯𑀸𑀭𑀺𑀢𑀢𑁄 𑀉𑀢𑁆𑀢𑀭𑀺 𑀅𑀜𑁆𑀜𑀢𑁆𑀭 𑀧𑀼𑀦 𑀧𑀯𑀸𑀭𑀡𑀸𑀬 𑀅𑀜𑁆𑀜𑀢𑁆𑀭 𑀦𑀺𑀘𑁆𑀘𑀧𑁆𑀧𑀯𑀸𑀭𑀡𑀸𑀬 𑀯𑀺𑀜𑁆𑀜𑀸𑀧𑀦𑁂, 𑀅𑀜𑁆𑀜𑀢𑁆𑀭 𑀢𑀣𑀸𑀭𑀽𑀧𑀧𑀘𑁆𑀘𑀬𑀸 𑀕𑀸𑀫𑀢𑁄 𑀦𑀺𑀓𑁆𑀔𑀦𑁆𑀢𑀲𑁂𑀦𑀸𑀤𑀲𑁆𑀲𑀦𑀸𑀬 𑀕𑀫𑀦𑁂, 𑀧𑀘𑁆𑀘𑀬𑁂𑀦𑀧𑀺 𑀕𑀦𑁆𑀢𑁆𑀯𑀸 𑀢𑀺𑀭𑀢𑁆𑀢𑀢𑁄 𑀉𑀢𑁆𑀢𑀭𑀺 𑀲𑁂𑀦𑀸𑀬 𑀯𑀸𑀲𑁂, 𑀢𑀲𑁆𑀲 𑀘 𑀯𑀲𑀦𑁆𑀢𑀲𑁆𑀲 𑀬𑀼𑀤𑁆𑀥𑀝𑁆𑀞𑀸𑀦𑀩𑀮𑀕𑀡𑀝𑁆𑀞𑀸𑀦𑀲𑁂𑀦𑀸𑀦𑀺𑀯𑁂𑀲𑀅𑀦𑀻𑀓𑀤𑀲𑁆𑀲𑀦𑀢𑁆𑀣𑀁 𑀕𑀫𑀦𑁂, 𑀧𑀺𑀝𑁆𑀞𑀸𑀤𑀻𑀳𑀺 𑀓𑀢𑀫𑀚𑁆𑀚𑀲𑀗𑁆𑀔𑀸𑀢𑀲𑀼𑀭𑀸𑀬, 𑀧𑀼𑀧𑁆𑀨𑀸𑀤𑀻𑀳𑀺 𑀓𑀢𑀆𑀲𑀯𑀲𑀗𑁆𑀔𑀸𑀢𑀫𑁂𑀭𑀬𑀲𑁆𑀲 𑀘 𑀧𑀸𑀦𑁂, 𑀧𑀤𑀻𑀧𑀼𑀚𑁆𑀚𑀮𑀧𑀢𑁆𑀢𑀧𑀘𑀦𑀸𑀤𑀺𑀓𑀸𑀭𑀡𑀁 𑀯𑀺𑀦𑀸 𑀯𑀺𑀲𑀺𑀩𑁆𑀩𑀺𑀢𑀼𑀓𑀸𑀫𑀢𑀸𑀬 𑀅𑀕𑀺𑀮𑀸𑀦𑀲𑁆𑀲 𑀅𑀕𑁆𑀕𑀺𑀦𑁄 𑀚𑀸𑀮𑀦𑀚𑀸𑀮𑀸𑀧𑀦𑁂, 𑀓𑀧𑁆𑀧𑀩𑀺𑀦𑁆𑀤𑀼𑀁 𑀅𑀦𑀸𑀤𑀸𑀬 𑀦𑀯𑀘𑀻𑀯𑀭𑀧𑀭𑀺𑀪𑁄𑀕𑁂, 𑀲𑀸𑀫𑀁 𑀘𑀻𑀯𑀭𑀁 𑀯𑀺𑀓𑀧𑁆𑀧𑁂𑀢𑁆𑀯𑀸 𑀅𑀧𑀘𑁆𑀘𑀼𑀤𑁆𑀥𑀸𑀬 𑀧𑀭𑀺𑀪𑁄𑀕𑁂, 𑀪𑀺𑀓𑁆𑀔𑀼𑀲𑀦𑁆𑀢𑀓𑀧𑀢𑁆𑀢𑀸𑀤𑀺𑀦𑁄 𑀅𑀦𑁆𑀢𑀫𑀲𑁄 𑀳𑀲𑀸𑀥𑀺𑀧𑁆𑀧𑀸𑀬𑁂𑀦𑀧𑀺 𑀅𑀧𑀦𑀺𑀥𑀸𑀦𑁂 𑀅𑀧𑀦𑀺𑀥𑀸𑀧𑀦𑁂, 𑀲𑀜𑁆𑀘𑀺𑀘𑁆𑀘 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲 𑀚𑀻𑀯𑀺𑀢𑀯𑁄𑀭𑁄𑀧𑀦𑁂, 𑀲𑀜𑁆𑀘𑀺𑀘𑁆𑀘 𑀬𑀣𑀸𑀥𑀫𑁆𑀫𑀁 𑀦𑀺𑀳𑀢𑀸𑀥𑀺𑀓𑀭𑀡𑀲𑁆𑀲 𑀧𑀼𑀦𑀓𑀫𑁆𑀫𑀸𑀬 𑀉𑀓𑁆𑀓𑁄𑀝𑀦𑁂, 𑀲𑀜𑁆𑀘𑀺𑀘𑁆𑀘 𑀣𑁂𑀬𑁆𑀬𑀲𑀢𑁆𑀣𑁂𑀦 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀏𑀓𑀤𑁆𑀥𑀸𑀦𑀕𑀫𑀦𑁂, 𑀪𑀺𑀓𑁆𑀔𑀽𑀳𑀺 𑀲𑀺𑀓𑁆𑀔𑀸𑀧𑀤𑁂𑀳𑀺 𑀯𑀼𑀘𑁆𑀘𑀫𑀸𑀦𑀲𑁆𑀲 𑀅𑀜𑁆𑀜𑀁 𑀅𑀯𑀺𑀘𑀸𑀭𑁂𑀢𑁆𑀯𑀸 ‘‘𑀦 𑀢𑀢𑁆𑀣 𑀲𑀺𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀪𑀡𑀦𑁂, 𑀲𑀺𑀓𑁆𑀔𑀸𑀧𑀤𑀯𑀺𑀯𑀡𑁆𑀡𑀦𑁂, 𑀇𑀫𑁂𑀲𑀁 ‘‘𑀲𑀼𑀢𑁆𑀯𑀸 𑀑𑀭𑀫𑀺𑀲𑁆𑀲𑀸𑀫𑀻’’𑀢𑀺 𑀅𑀥𑀺𑀧𑁆𑀧𑀸𑀬𑀁 𑀯𑀺𑀦𑀸 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀉𑀧𑀲𑁆𑀲𑀼𑀢𑀺𑀝𑁆𑀞𑀸𑀦𑁂, 𑀥𑀫𑁆𑀫𑀺𑀓𑀸𑀦𑀁 𑀓𑀫𑁆𑀫𑀸𑀦𑀁 𑀙𑀦𑁆𑀤𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀔𑀻𑀬𑀦𑀥𑀫𑁆𑀫𑀸𑀧𑀚𑁆𑀚𑀦𑁂, 𑀲𑀗𑁆𑀖𑁂 𑀯𑀺𑀦𑀺𑀘𑁆𑀙𑀬𑁂 𑀯𑀢𑁆𑀢𑀫𑀸𑀦𑁂 𑀙𑀦𑁆𑀤𑀁 𑀅𑀤𑀢𑁆𑀯𑀸 𑀧𑀓𑁆𑀓𑀫𑀦𑁂, 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀘𑀻𑀯𑀭𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀔𑀻𑀬𑀦𑀥𑀫𑁆𑀫𑀸𑀧𑀚𑁆𑀚𑀦𑁂, 𑀅𑀜𑁆𑀜𑀢𑁆𑀭 𑀅𑀚𑁆𑀛𑀸𑀭𑀸𑀫𑀸 𑀅𑀚𑁆𑀛𑀸𑀯𑀲𑀣𑀸 𑀯𑀸 𑀭𑀢𑀦𑀲𑁆𑀲 𑀯𑀸 𑀭𑀢𑀦𑀲𑀫𑁆𑀫𑀢𑀲𑁆𑀲 𑀯𑀸 𑀉𑀕𑁆𑀕𑀡𑁆𑀳𑀦𑀉𑀕𑁆𑀕𑀳𑀸𑀧𑀦𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺.

𑀧𑀸𑀘𑀺𑀢𑁆𑀢𑀺𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.