𑁮. 𑀓𑀸𑀮𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁪. 𑀇𑀤𑀸𑀦𑀺 𑀬𑁂 𑀢𑁂 𑀘𑀢𑁆𑀢𑀸𑀭𑁄 𑀓𑀸𑀮𑀺𑀓𑀸 𑀫𑀼𑀦𑀺𑀦𑀸 𑀯𑀼𑀢𑁆𑀢𑀸 ‘‘𑀬𑀸𑀯𑀓𑀸𑀮𑀺𑀓𑀁 𑀬𑀸𑀫𑀓𑀸𑀮𑀺𑀓𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀬𑀸𑀯𑀚𑀻𑀯𑀺𑀓’’𑀦𑁆𑀢𑀺, 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀮𑀺𑀓𑀸 𑀘𑀸’’𑀢𑀺 𑀧𑀤𑀁 𑀉𑀤𑁆𑀥𑀝𑀁. 𑀢𑀢𑁆𑀣 (𑀧𑀸𑀘𑀺. 𑁨𑁫𑁪-𑁨𑁫𑁬; 𑀧𑀸𑀘𑀺. 𑀅𑀝𑁆𑀞. 𑁨𑁫𑁩-𑁨𑁫𑁬) 𑀓𑀢𑀫𑁂 𑀢𑁂 𑀓𑀸𑀮𑀺𑀓𑀸𑀢𑀺 𑀘𑁂, 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀬𑀸𑀯𑀓𑀸𑀮𑀺𑀓’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑁂𑀲𑀼 𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀬𑀸𑀯 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑀸 𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀬𑀸𑀯𑀓𑀸𑀮𑀺𑀓𑀁. 𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀬𑀸𑀯 𑀬𑀸𑀫𑀸𑀯𑀲𑀸𑀦𑀸 𑀧𑀺𑀧𑀸𑀲𑀸𑀬 𑀲𑀢𑀺 𑀧𑀺𑀧𑀸𑀲𑀘𑁆𑀙𑁂𑀤𑀦𑀢𑁆𑀣𑀁 𑀧𑀸𑀢𑀩𑁆𑀩𑀢𑁄 𑀬𑀸𑀫𑁄 𑀓𑀸𑀮𑁄 𑀅𑀲𑁆𑀲𑀸𑀢𑀺 𑀬𑀸𑀫𑀓𑀸𑀮𑀺𑀓𑀁. 𑀢𑁂𑀦 𑀉𑀧𑀲𑀫𑁂𑀢𑀩𑁆𑀩𑁂 𑀆𑀩𑀸𑀥𑁂 𑀲𑀢𑀺 𑀬𑀸𑀯 𑀲𑀢𑁆𑀢𑀸𑀳𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀲𑀢𑁆𑀢𑀸𑀳𑀓𑀸𑀮𑀺𑀓𑀁. 𑀆𑀩𑀸𑀥𑁂 𑀲𑀢𑀺 𑀬𑀸𑀯𑀚𑀻𑀯𑀁 𑀧𑀭𑀺𑀳𑀭𑀺𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀬𑀸𑀯𑀚𑀻𑀯𑀺𑀓𑀁.

𑁮𑁫. 𑀢𑁂𑀲𑀼 𑀬𑀸𑀯𑀓𑀸𑀮𑀺𑀓𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀺𑀝𑁆𑀞𑀁 𑀫𑀽𑀮𑀁 𑀨𑀮𑀁 𑀔𑀚𑁆𑀚’’𑀦𑁆𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 (𑀧𑀸𑀘𑀺. 𑁨𑁪𑁮-𑁨𑁫𑁦; 𑀧𑀸𑀘𑀺. 𑀅𑀝𑁆𑀞. 𑁨𑁪𑁮-𑁨𑁪𑁯) 𑀧𑀺𑀝𑁆𑀞𑀔𑀸𑀤𑀦𑀻𑀬𑀁 𑀦𑀸𑀫 𑀲𑀢𑁆𑀢𑀦𑁆𑀦𑀁 𑀢𑀸𑀯 𑀥𑀜𑁆𑀜𑀸𑀦𑀁 𑀥𑀜𑁆𑀜𑀸𑀦𑀼𑀮𑁄𑀫𑀸𑀦𑀁 𑀅𑀧𑀭𑀡𑁆𑀡𑀸𑀦𑀜𑁆𑀘 𑀧𑀺𑀝𑁆𑀞𑀁 𑀧𑀦𑀲𑀧𑀺𑀝𑁆𑀞𑀁 𑀮𑀩𑀼𑀚𑀧𑀺𑀝𑁆𑀞𑀁 𑀅𑀫𑁆𑀩𑀸𑀝𑀓𑀧𑀺𑀝𑁆𑀞𑀁 𑀲𑀸𑀮𑀧𑀺𑀝𑁆𑀞𑀁 𑀥𑁄𑀢𑀓𑀢𑀸𑀮𑀧𑀺𑀝𑁆𑀞𑀁 𑀔𑀻𑀭𑀯𑀮𑁆𑀮𑀺𑀧𑀺𑀝𑁆𑀞𑀜𑁆𑀘𑀸𑀢𑀺 𑀏𑀯𑀫𑀸𑀤𑀻𑀦𑀺 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀧𑀓𑀢𑀺𑀆𑀳𑀸𑀭𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀁 𑀔𑀸𑀤𑀦𑀻𑀬𑀢𑁆𑀣𑀜𑁆𑀘 𑀪𑁄𑀚𑀦𑀻𑀬𑀢𑁆𑀣𑀜𑁆𑀘 𑀨𑀭𑀡𑀓𑀸𑀦𑀺 𑀧𑀺𑀝𑁆𑀞𑀸𑀦𑀺 𑀬𑀸𑀯𑀓𑀸𑀮𑀺𑀓𑀸𑀦𑀺. 𑀇𑀫𑀺𑀦𑀸𑀯 𑀮𑀓𑁆𑀔𑀡𑁂𑀦 𑀫𑀽𑀮𑀔𑀸𑀤𑀦𑀻𑀬𑀸𑀤𑀻𑀲𑀼𑀧𑀺 𑀬𑀸𑀯𑀓𑀸𑀮𑀺𑀓𑀮𑀓𑁆𑀔𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀅𑀢𑀺𑀯𑀺𑀢𑁆𑀣𑀸𑀭𑀪𑀬𑁂𑀦 𑀲𑀁𑀔𑀺𑀢𑁆𑀢𑀁. 𑀕𑁄𑀭𑀲𑁄 𑀦𑀸𑀫 𑀔𑀻𑀭𑀤𑀥𑀺𑀢𑀓𑁆𑀓𑀭𑀲𑁄. 𑀥𑀜𑁆𑀜𑀪𑁄𑀚𑀦𑀦𑁆𑀢𑀺 𑀲𑀸𑀦𑀼𑀮𑁄𑀫𑀸𑀦𑀺 𑀲𑀢𑁆𑀢𑀥𑀜𑁆𑀜𑀸𑀦𑀺 𑀘 𑀧𑀜𑁆𑀘𑀯𑀺𑀥𑀪𑁄𑀚𑀦𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀬𑀸𑀕𑀼𑀲𑀽𑀧𑀧𑁆𑀧𑀪𑀼𑀢𑀬𑁄𑀢𑀺 𑀏𑀢𑁆𑀣 𑀧𑀪𑀼𑀢𑀺-𑀲𑀤𑁆𑀤𑁂𑀦 𑀓𑀦𑁆𑀤𑀔𑀸𑀤𑀦𑀻𑀬𑀁 𑀫𑀼𑀴𑀸𑀮𑀔𑀸𑀤𑀦𑀻𑀬𑀁 𑀫𑀢𑁆𑀣𑀓𑀔𑀸𑀤𑀦𑀻𑀬𑀁 𑀔𑀦𑁆𑀥𑀔𑀸𑀤𑀦𑀻𑀬𑀁 𑀢𑀘𑀔𑀸𑀤𑀦𑀻𑀬𑀁 𑀧𑀢𑁆𑀢𑀔𑀸𑀤𑀦𑀻𑀬𑀁 𑀧𑀼𑀧𑁆𑀨𑀔𑀸𑀤𑀦𑀻𑀬𑀁 𑀅𑀝𑁆𑀞𑀺𑀔𑀸𑀤𑀦𑀻𑀬𑀁 𑀦𑀺𑀬𑁆𑀬𑀸𑀲𑀔𑀸𑀤𑀦𑀻𑀬𑀦𑁆𑀢𑀺 𑀇𑀫𑀸𑀦𑀺 𑀲𑀗𑁆𑀕𑀳𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀢𑀢𑁆𑀭𑀺𑀤𑀁 𑀫𑀼𑀔𑀫𑀢𑁆𑀢𑀦𑀺𑀤𑀲𑁆𑀲𑀦𑀁 𑁋 𑀪𑀺𑀲𑀲𑀗𑁆𑀔𑀸𑀢𑁄 𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀓𑀦𑁆𑀤𑁄 𑀧𑀺𑀡𑁆𑀟𑀸𑀮𑀼𑀫𑀲𑀸𑀮𑀼𑀓𑀆𑀤𑀬𑁄 𑀯𑀮𑁆𑀮𑀺𑀓𑀦𑁆𑀤𑁄 𑀆𑀮𑀼𑀯𑀓𑀦𑁆𑀤𑁄 𑀢𑀸𑀮𑀓𑀦𑁆𑀤𑁄𑀢𑀺 𑀏𑀯𑀫𑀸𑀤𑀺 𑀓𑀦𑁆𑀤𑀔𑀸𑀤𑀦𑀻𑀬𑀁. 𑀧𑀤𑀼𑀫𑀫𑀼𑀴𑀸𑀮𑀸𑀤𑀬𑁄 𑀫𑀼𑀴𑀸𑀮𑀔𑀸𑀤𑀦𑀻𑀬𑀁. 𑀢𑀸𑀮𑀳𑀺𑀦𑁆𑀢𑀸𑀮𑀓𑀼𑀦𑁆𑀢𑀸𑀮𑀓𑁂𑀢𑀓𑀦𑀸𑀴𑀺𑀓𑁂𑀭𑀧𑀽𑀕𑀭𑀼𑀓𑁆𑀔𑀔𑀚𑁆𑀚𑀽𑀭𑀻𑀆𑀤𑀻𑀦𑀁 𑀓𑀴𑀻𑀭𑀲𑀗𑁆𑀔𑀸𑀢𑀸 𑀫𑀢𑁆𑀣𑀓𑀸 𑀫𑀢𑁆𑀣𑀓𑀔𑀸𑀤𑀦𑀻𑀬𑀁. 𑀉𑀘𑁆𑀙𑀼𑀔𑀦𑁆𑀥𑁄 𑀦𑀻𑀮𑀼𑀧𑁆𑀧𑀮𑀭𑀢𑁆𑀢𑀼𑀧𑁆𑀧𑀮𑀓𑀼𑀫𑀼𑀤𑀲𑁄𑀕𑀦𑁆𑀥𑀺𑀓𑀸𑀦𑀁 𑀧𑀼𑀧𑁆𑀨𑀤𑀡𑁆𑀟𑀓𑀸𑀦𑀻𑀢𑀺 𑀏𑀯𑀫𑀸𑀤𑀺 𑀔𑀦𑁆𑀥𑀔𑀸𑀤𑀦𑀻𑀬𑀁. 𑀢𑀘𑀔𑀸𑀤𑀦𑀻𑀬𑀁 𑀉𑀘𑁆𑀙𑀼𑀢𑀘𑁄 𑀏𑀯 𑀏𑀓𑁄 𑀬𑀸𑀯𑀓𑀸𑀮𑀺𑀓𑁄, 𑀲𑁄𑀧𑀺 𑀲𑀭𑀲𑁄. 𑀫𑀽𑀮𑀓𑀁 𑀔𑀸𑀭𑀓𑁄 𑀘𑀘𑁆𑀘𑀼 𑀢𑀫𑁆𑀩𑀼𑀓𑁄 𑀢𑀡𑁆𑀟𑀼𑀮𑁂𑀬𑁆𑀬𑀓𑁄𑀢𑀺 𑀏𑀯𑀫𑀸𑀤𑀺 𑀧𑀢𑁆𑀢𑀔𑀸𑀤𑀦𑀻𑀬𑀁. 𑀫𑀽𑀮𑀓𑀧𑀼𑀧𑁆𑀨𑀁 𑀔𑀸𑀭𑀓𑀧𑀼𑀧𑁆𑀨𑀁 𑀘𑀘𑁆𑀘𑀼𑀧𑀼𑀧𑁆𑀨𑀁 𑀢𑀫𑁆𑀩𑀼𑀓𑀧𑀼𑀧𑁆𑀨𑀦𑁆𑀢𑀺 𑀏𑀯𑀫𑀸𑀤𑀺 𑀧𑀼𑀧𑁆𑀨𑀔𑀸𑀤𑀦𑀻𑀬𑀁, 𑀅𑀲𑁄𑀓𑀧𑀼𑀧𑁆𑀨𑀁 𑀧𑀦 𑀬𑀸𑀯𑀚𑀻𑀯𑀺𑀓𑀁. 𑀮𑀩𑀼𑀚𑀧𑀦𑀲𑀝𑁆𑀞𑀺𑀆𑀤𑀺 𑀅𑀝𑁆𑀞𑀺𑀔𑀸𑀤𑀦𑀻𑀬𑀁. 𑀦𑀺𑀬𑁆𑀬𑀸𑀲𑀔𑀸𑀤𑀦𑀻𑀬𑁂 𑀬𑀸𑀯𑀓𑀸𑀮𑀺𑀓𑀁 𑀦𑀢𑁆𑀣𑀺. 𑀏𑀢𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀬𑀸𑀯𑀓𑀸𑀮𑀺𑀓𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁮𑁬. 𑀇𑀤𑀸𑀦𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀝𑁆𑀞 𑀧𑀸𑀦𑀸𑀦𑀺 𑀅𑀫𑁆𑀩𑀧𑀸𑀦𑀁 𑀚𑀫𑁆𑀩𑀼𑀧𑀸𑀦𑀁 𑀘𑁄𑀘𑀧𑀸𑀦𑀁 𑀫𑁄𑀘𑀧𑀸𑀦𑀁 𑀫𑀥𑀼𑀓𑀧𑀸𑀦𑀁 𑀫𑀼𑀤𑁆𑀤𑀺𑀓𑀧𑀸𑀦𑀁 𑀲𑀸𑀮𑀽𑀓𑀧𑀸𑀦𑀁 𑀨𑀸𑀭𑀼𑀲𑀓𑀧𑀸𑀦’’𑀦𑁆𑀢𑀺 (𑀫𑀳𑀸𑀯. 𑁩𑁦𑁦) 𑀏𑀯𑀁 𑀯𑀼𑀢𑁆𑀢𑀁 𑀅𑀝𑁆𑀞𑀯𑀺𑀥𑀁 𑀧𑀸𑀦𑀓𑀁 𑀬𑀸𑀫𑀓𑀸𑀮𑀺𑀓𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀫𑀥𑀽’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 (𑀫𑀳𑀸𑀯. 𑀅𑀝𑁆𑀞. 𑁩𑁦𑁦) 𑀫𑀥𑀼𑀚𑀁 𑀫𑀼𑀤𑁆𑀤𑀺𑀓𑀚𑀁 𑀲𑀸𑀮𑀽𑀓𑀚𑀁 𑀘𑁄𑀘𑀚𑀁 𑀫𑁄𑀘𑀚𑀁 𑀅𑀫𑁆𑀩𑀼𑀚𑀁 𑀚𑀫𑁆𑀩𑀼𑀚𑀜𑁆𑀘𑀸𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀏𑀢𑁆𑀣 𑀫𑀥𑀼𑀚𑀁 𑀦𑀸𑀫 𑀫𑀥𑀼𑀓𑀸𑀦𑀁 𑀚𑀸𑀢𑀺𑀭𑀲𑁂𑀦 𑀓𑀢𑀁, 𑀢𑀁 𑀧𑀦 𑀉𑀤𑀓𑀲𑀫𑁆𑀪𑀺𑀦𑁆𑀦𑀫𑁂𑀯 𑀯𑀝𑁆𑀝𑀢𑀺, 𑀲𑀼𑀤𑁆𑀥𑀁 𑀦 𑀯𑀝𑁆𑀝𑀢𑀺. 𑀫𑀼𑀤𑁆𑀤𑀺𑀓𑀧𑀸𑀦𑀁 𑀦𑀸𑀫 𑀫𑀼𑀤𑁆𑀤𑀺𑀓𑀸 𑀉𑀤𑀓𑁂 𑀫𑀤𑁆𑀤𑀺𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀕𑀳𑀺𑀢𑀁. 𑀲𑀸𑀮𑀽𑀓𑀧𑀸𑀦𑀁 𑀦𑀸𑀫 𑀭𑀢𑁆𑀢𑀼𑀧𑁆𑀧𑀮𑀦𑀻𑀮𑀼𑀧𑁆𑀧𑀮𑀸𑀤𑀻𑀦𑀁 𑀓𑀺𑀜𑁆𑀚𑀓𑁆𑀔𑀭𑁂𑀳𑀺 𑀓𑀢𑀁. 𑀲𑁂𑀲𑀸𑀦𑀺 𑀧𑀸𑀓𑀝𑀸𑀦𑁂𑀯. 𑀏𑀢𑁆𑀣 𑀧𑀦 𑀲𑀘𑁂 𑀲𑀬𑀁 𑀏𑀢𑀸𑀦𑀺 𑀬𑀸𑀯𑀓𑀸𑀮𑀺𑀓𑀯𑀢𑁆𑀣𑀽𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀉𑀤𑀓𑁂 𑀫𑀤𑁆𑀤𑀺𑀢𑁆𑀯𑀸 𑀆𑀢𑀧𑁂 𑀆𑀤𑀺𑀘𑁆𑀘𑀧𑀸𑀓𑁂𑀦 𑀧𑀘𑀺𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀧𑀸𑀦𑀓𑀁 𑀓𑀭𑁄𑀢𑀺, 𑀢𑀁 𑀧𑀼𑀭𑁂𑀪𑀢𑁆𑀢𑀫𑁂𑀯 𑀓𑀧𑁆𑀧𑀢𑀺. 𑀲𑀘𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀓𑀢𑀁 𑀮𑀪𑀢𑀺, 𑀢𑀤𑀳𑀼𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀁 𑀦𑀺𑀭𑀸𑀫𑀺𑀲𑀧𑀭𑀺𑀪𑁄𑀕𑁂𑀦 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀯𑀝𑁆𑀝𑀢𑀺. 𑀇𑀫𑀸𑀦𑀺 𑀅𑀝𑁆𑀞 𑀧𑀸𑀦𑀸𑀦𑀺 𑀲𑀻𑀢𑀸𑀦𑀺𑀧𑀺 𑀆𑀤𑀺𑀘𑁆𑀘𑀧𑀸𑀓𑀸𑀦𑀺𑀧𑀺 𑀯𑀝𑁆𑀝𑀦𑁆𑀢𑀺, 𑀅𑀕𑁆𑀕𑀺𑀧𑀸𑀓𑀸𑀦𑀺 𑀧𑀦 𑀦 𑀯𑀝𑁆𑀝𑀦𑁆𑀢𑀺, 𑀢𑀲𑁆𑀫𑀸 ‘‘𑀦𑀕𑁆𑀕𑀺𑀲𑀦𑁆𑀢𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑁮𑁭. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀨𑀮𑀭𑀲𑀁 𑀞𑀧𑁂𑀢𑁆𑀯𑀸 𑀥𑀜𑁆𑀜𑀨𑀮𑀭𑀲’’𑀦𑁆𑀢𑀺 (𑀫𑀳𑀸𑀯. 𑁩𑁦𑁦) 𑀯𑀼𑀢𑁆𑀢𑀢𑁆𑀢𑀸 𑀥𑀜𑁆𑀜𑀨𑀮𑀭𑀲𑁄 𑀧𑀦 𑀦 𑀯𑀝𑁆𑀝𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀸𑀦𑀼𑀮𑁄𑀫𑀸𑀦𑀺 𑀥𑀜𑁆𑀜𑀸𑀦𑀺 𑀞𑀧𑁂𑀢𑁆𑀯𑀸’’𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀧𑀼𑀧𑁆𑀨𑀭𑀲𑀁 𑀞𑀧𑁂𑀢𑁆𑀯𑀸 𑀫𑀥𑀼𑀓𑀧𑀼𑀧𑁆𑀨𑀭𑀲’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀫𑀥𑀼𑀓𑀧𑀼𑀧𑁆𑀨𑀭𑀲𑁄 𑀆𑀤𑀺𑀘𑁆𑀘𑀧𑀸𑀓𑁄 𑀯𑀸 𑀳𑁄𑀢𑀼 𑀅𑀕𑁆𑀕𑀺𑀧𑀸𑀓𑁄 𑀯𑀸, 𑀧𑀘𑁆𑀙𑀸𑀪𑀢𑁆𑀢𑀁 𑀦 𑀯𑀝𑁆𑀝𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀥𑀼𑀓𑀧𑀼𑀧𑁆𑀨𑀫𑀜𑁆𑀜𑀢𑁆𑀭𑀸’’𑀢𑀺.

𑁮𑁮. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀧𑀢𑁆𑀢𑀭𑀲𑀁 𑀞𑀧𑁂𑀢𑁆𑀯𑀸 𑀟𑀸𑀓𑀭𑀲’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀉𑀤𑀓𑁂𑀦 𑀧𑀓𑁆𑀓𑀸𑀦𑀫𑁆𑀧𑀺 𑀬𑀸𑀯𑀓𑀸𑀮𑀺𑀓𑀧𑀢𑁆𑀢𑀸𑀦𑀁 𑀭𑀲𑁄 𑀧𑀼𑀭𑁂𑀪𑀢𑁆𑀢𑀫𑁂𑀯 𑀯𑀝𑁆𑀝𑀢𑀺, 𑀲𑀻𑀢𑁄𑀤𑀓𑁂𑀦 𑀫𑀤𑁆𑀤𑀺𑀢𑀸𑀦𑀁 𑀭𑀲𑁄 𑀬𑀸𑀫𑀓𑀸𑀮𑀺𑀓𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀞𑀧𑁂𑀢𑁆𑀯𑀸 𑀧𑀓𑁆𑀓𑀟𑀸𑀓𑀚’’𑀦𑁆𑀢𑀺. 𑀬𑀸𑀯𑀚𑀻𑀯𑀺𑀓𑀧𑀡𑁆𑀡𑀲𑁆𑀲 𑀉𑀤𑀓𑁂𑀦 𑀧𑀓𑁆𑀓𑀲𑁆𑀲 𑀭𑀲𑁄 𑀬𑀸𑀯𑀚𑀻𑀯𑀺𑀓𑁄 𑀳𑁄𑀢𑀺.

𑁮𑁯. 𑀇𑀤𑀸𑀦𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑁂 𑀤𑀲𑁆𑀲𑁂𑀢𑀼𑀁 ‘‘𑀲𑀧𑁆𑀧𑀻’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 (𑀫𑀳𑀸𑀯. 𑁨𑁬𑁦) 𑀧𑀦 𑁋

‘‘𑀲𑀧𑁆𑀧𑀺𑀦𑁄𑀦𑀻𑀢𑀢𑁂𑀮𑀸𑀦𑀺, 𑀫𑀥𑀼𑀨𑀸𑀡𑀺𑀢𑀫𑁂𑀯 𑀘;

𑀲𑀢𑁆𑀢𑀸𑀳𑀓𑀸𑀮𑀺𑀓𑀸 𑀲𑀧𑁆𑀧𑀺, 𑀬𑁂𑀲𑀁 𑀫𑀁𑀲𑀫𑀯𑀸𑀭𑀺𑀢’’𑀦𑁆𑀢𑀺. 𑁋

𑀧𑀸𑀞𑁄 𑀕𑀳𑁂𑀢𑀩𑁆𑀩𑁄. 𑀏𑀯𑀁 𑀧𑀦 𑀕𑀳𑀺𑀢𑁂 𑀯𑀲𑀸 𑀢𑁂𑀮𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀯 𑀳𑁄𑀢𑀺 ‘‘𑀢𑁂𑀮𑀁 𑀦𑀸𑀫 𑀢𑀺𑀮𑀢𑁂𑀮𑀁 𑀲𑀸𑀲𑀧𑀢𑁂𑀮𑀁 𑀫𑀥𑀼𑀓𑀢𑁂𑀮𑀁 𑀏𑀭𑀡𑁆𑀟𑀢𑁂𑀮𑀁 𑀯𑀲𑀸𑀢𑁂𑀮’’𑀦𑁆𑀢𑀺 (𑀧𑀸𑀭𑀸. 𑁬𑁨𑁩; 𑀧𑀸𑀘𑀺. 𑁨𑁬𑁦) 𑀏𑀯𑀁 𑀧𑀸𑀴𑀺𑀬𑀁 𑀯𑀺𑀢𑁆𑀣𑀸𑀭𑀺𑀢𑀢𑁆𑀢𑀸. 𑀏𑀯𑀁 𑀧𑀦 𑀅𑀕𑁆𑀕𑀳𑁂𑀢𑁆𑀯𑀸 𑀯𑀲𑀸 𑀘 ‘‘𑀫𑀥𑀼𑀨𑀸𑀡𑀺𑀢’’𑀦𑁆𑀢𑀺 𑀧𑀸𑀞𑁂 𑀕𑀳𑀺𑀢𑁂 𑀬𑀸𑀯𑀓𑀸𑀮𑀺𑀓𑀪𑀽𑀢𑀸 𑀯𑀲𑀸 𑀲𑀢𑁆𑀢𑀸𑀳𑀓𑀸𑀮𑀺𑀓𑀸𑀢𑀺 𑀆𑀧𑀚𑁆𑀚𑁂𑀬𑁆𑀬, ‘‘𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺 𑀕𑀺𑀮𑀸𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀝𑀺𑀲𑀸𑀬𑀦𑀻𑀬𑀸𑀦𑀺 𑀪𑁂𑀲𑀚𑁆𑀚𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀧𑁆𑀧𑀺 𑀦𑀯𑀦𑀻𑀢𑀁 𑀢𑁂𑀮𑀁 𑀫𑀥𑀼 𑀨𑀸𑀡𑀺𑀢’’𑀦𑁆𑀢𑀺 (𑀧𑀸𑀭𑀸. 𑁬𑁨𑁨) 𑀏𑀯𑀁 𑀧𑀜𑁆𑀘𑁂𑀯 𑀪𑀕𑀯𑀢𑀸 𑀲𑀢𑁆𑀢𑀸𑀳𑀓𑀸𑀮𑀺𑀓𑀪𑁂𑀲𑀚𑁆𑀚𑀸𑀦𑀺 𑀅𑀦𑀼𑀜𑁆𑀜𑀸𑀢𑀸𑀦𑀺, 𑀢𑀢𑁄 𑀉𑀢𑁆𑀢𑀭𑀺 𑀙𑀝𑁆𑀞𑀲𑁆𑀲 𑀲𑀢𑁆𑀢𑀸𑀳𑀓𑀸𑀮𑀺𑀓𑀪𑁂𑀲𑀚𑁆𑀚𑀲𑁆𑀲 𑀅𑀢𑁆𑀣𑀺𑀢𑀸𑀧𑀺 𑀆𑀧𑀚𑁆𑀚𑀢𑀺, 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁂𑀧𑀺 𑀪𑀕𑀯𑀢𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀲𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀅𑀘𑁆𑀙𑀯𑀲𑀁 𑀫𑀘𑁆𑀙𑀯𑀲𑀁 𑀲𑀼𑀲𑀼𑀓𑀸𑀯𑀲𑀁 𑀲𑀽𑀓𑀭𑀯𑀲𑀁 𑀕𑀤𑁆𑀭𑀪𑀯𑀲𑀁 𑀓𑀸𑀮𑁂 𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀦𑀺𑀧𑁆𑀧𑀓𑁆𑀓𑀁 𑀓𑀸𑀮𑁂 𑀲𑀁𑀲𑀝𑁆𑀞𑀁 𑀢𑁂𑀮𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 (𑀫𑀳𑀸𑀯. 𑁨𑁬𑁨) 𑀏𑀯𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀯𑀲𑁂𑀦 𑀯𑀲𑀁 𑀅𑀦𑀦𑀼𑀚𑀸𑀦𑀺𑀢𑁆𑀯𑀸 𑀢𑀢𑁄 𑀦𑀺𑀩𑁆𑀩𑀢𑁆𑀢𑀢𑁂𑀮𑀫𑁂𑀯 𑀅𑀦𑀼𑀜𑁆𑀜𑀸𑀢𑀁, 𑀢𑀲𑁆𑀫𑀸 ‘‘𑀫𑀥𑀼𑀨𑀸𑀡𑀺𑀢𑀫𑁂𑀯 𑀘𑀸’’𑀢𑀺 𑀧𑀸𑀞𑁂 𑀅𑀕𑁆𑀕𑀳𑀺𑀢𑁂 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀬 𑀘 𑀯𑀺𑀭𑀼𑀚𑁆𑀛𑀢𑀺. 𑀣𑁂𑀭𑁂𑀦 𑀧𑀦 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀻𑀦𑀁 𑀔𑀼𑀤𑁆𑀤𑀲𑀺𑀓𑁆𑀔𑀸𑀬 𑀆𑀕𑀢𑀦𑀬𑁂𑀦 𑀯𑀼𑀢𑁆𑀢𑀁. 𑀢𑁂𑀲𑀁 𑀧𑀦 𑁋

‘‘𑀲𑀧𑁆𑀧𑀺 𑀦𑀯𑀦𑀻𑀢𑀁 𑀢𑁂𑀮𑀁, 𑀫𑀥𑀼 𑀨𑀸𑀡𑀺𑀢𑀧𑀜𑁆𑀘𑀫𑀁;

𑀅𑀘𑁆𑀙𑀫𑀘𑁆𑀙𑀯𑀲𑀸𑀤𑀺 𑀘, 𑀳𑁄𑀦𑁆𑀢𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀸’’𑀢𑀺. 𑁋

𑀏𑀯𑀫𑀸𑀕𑀢𑀁. 𑀅𑀫𑁆𑀳𑀸𑀓𑀁 𑀧𑀦 𑀯𑀺𑀲𑀼𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑁂 𑀆𑀕𑀢𑀝𑁆𑀞𑀸𑀦𑀁 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑀺, 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀢𑁂𑀲𑀼 𑀲𑀧𑁆𑀧𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁂𑀲𑀁 𑀫𑀁𑀲𑀧𑀯𑀸𑀭𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀲𑀧𑁆𑀧𑀺𑀦𑀸𑀫 𑀕𑁄𑀲𑀧𑁆𑀧𑀺 𑀯𑀸 𑀅𑀚𑀺𑀓𑀸𑀲𑀧𑁆𑀧𑀺 𑀯𑀸 𑀫𑀳𑀺𑀁 𑀲𑀲𑀧𑁆𑀧𑀺 𑀯𑀸. 𑀬𑁂𑀲𑀁 𑀫𑀁𑀲𑀁 𑀓𑀧𑁆𑀧𑀢𑀺, 𑀢𑁂𑀲𑀁 𑀲𑀧𑁆𑀧𑀺, 𑀦𑀯𑀦𑀻𑀢𑀁 𑀦𑀸𑀫 𑀢𑁂𑀲𑀁𑀬𑁂𑀯 𑀦𑀯𑀦𑀻𑀢’’𑀦𑁆𑀢𑀺 (𑀧𑀸𑀭𑀸. 𑁬𑁨𑁩; 𑀧𑀸𑀘𑀺. 𑁨𑁬𑁦) 𑀧𑀸𑀴𑀺𑀬𑀁 𑀯𑀼𑀢𑁆𑀢𑀢𑁆𑀢𑀸 𑀦𑀯𑀦𑀻𑀢𑀁 𑀧𑀦 𑀕𑀳𑀺𑀢𑀦𑁆𑀢𑀺 𑀦 𑀯𑀺𑀢𑁆𑀣𑀸𑀭𑀺𑀢𑀁, 𑀲𑀧𑁆𑀧𑀺 𑀧𑀦 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀢𑀤𑀳𑀼 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺𑀦𑀺𑀭𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺. 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀲𑀘𑁂 𑀏𑀓𑀪𑀸𑀚𑀦𑁂 𑀞𑀧𑀺𑀢𑀁, 𑀏𑀓𑀁 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀲𑀘𑁂 𑀩𑀳𑀽𑀲𑀼, 𑀯𑀢𑁆𑀣𑀼𑀕𑀡𑀦𑀸𑀬 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀧𑀘𑁆𑀙𑀸𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺. 𑀲𑀧𑁆𑀧𑀺 𑀢𑀸𑀧𑁂𑀦𑁆𑀢𑀲𑁆𑀲 𑀲𑀸𑀫𑀁𑀧𑀸𑀓𑁄 𑀦 𑀳𑁄𑀢𑀺, ‘‘𑀦𑀯𑀦𑀻𑀢𑀁 𑀧𑀦 𑀢𑀸𑀧𑁂𑀦𑁆𑀢𑀲𑁆𑀲 𑀳𑀺 𑀲𑀸𑀫𑀁𑀧𑀸𑀓𑁄 𑀦 𑀳𑁄𑀢𑀺, 𑀲𑀸𑀫𑀁𑀧𑀓𑁆𑀓𑁂𑀦 𑀧𑀦 𑀢𑁂𑀦 𑀲𑀤𑁆𑀥𑀺𑀁 𑀆𑀫𑀺𑀲𑀁 𑀦 𑀯𑀝𑁆𑀝𑀢𑀻’’𑀢𑀺 𑀘 ‘‘𑀲𑀘𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀦𑀯𑀦𑀻𑀢𑁂𑀦 𑀲𑀧𑁆𑀧𑀺𑀁 𑀓𑀢𑁆𑀯𑀸 𑀤𑁂𑀢𑀺, 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀁 𑀯𑀝𑁆𑀝𑀢𑀺. 𑀲𑀘𑁂 𑀲𑀬𑀁 𑀓𑀭𑁄𑀢𑀺, 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀻’’𑀢𑀺 𑀘 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁨) 𑀦𑀯𑀦𑀻𑀢𑀫𑁆𑀳𑀺𑀬𑁂𑀯 𑀲𑀸𑀫𑀁𑀧𑀸𑀓𑀢𑀸 𑀯𑀼𑀢𑁆𑀢𑀸, 𑀦 𑀲𑀧𑁆𑀧𑀺𑀫𑁆𑀳𑀺. 𑀬𑀁 𑀧𑀦 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 𑀯𑀼𑀢𑁆𑀢𑀁 ‘‘𑀦𑀺𑀩𑁆𑀩𑀢𑁆𑀢𑀺𑀢𑀲𑀧𑁆𑀧𑀺 𑀯𑀸 𑀦𑀯𑀦𑀻𑀢𑀁 𑀯𑀸 𑀧𑀘𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺, ‘‘𑀢𑀁 𑀧𑀦 𑀢𑀤𑀳𑀼 𑀧𑀼𑀭𑁂𑀪𑀢𑁆𑀢𑀫𑁆𑀧𑀺 𑀲𑀸𑀫𑀺𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀘, 𑀢𑀢𑁆𑀣 𑀬𑀸𑀯𑀓𑀸𑀮𑀺𑀓𑀯𑀢𑁆𑀣𑀼𑀦𑀸 𑀅𑀲𑀫𑁆𑀫𑀺𑀲𑁆𑀲𑀁 𑀲𑀼𑀥𑁄𑀢𑀁 𑀦𑀯𑀦𑀻𑀢𑀁 𑀲𑀦𑁆𑀥𑀸𑀬 ‘‘𑀧𑀘𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀬𑀁𑀧𑀘𑀺𑀢𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦 𑀲𑀤𑁆𑀥𑀺𑀁 𑀬𑀤𑀺 𑀆𑀫𑀺𑀲𑀁 𑀪𑀼𑀜𑁆𑀚𑀢𑀺, 𑀢𑀁 𑀆𑀫𑀺𑀲𑀁 𑀲𑀬𑀁𑀧𑀓𑁆𑀓𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦 𑀫𑀺𑀲𑁆𑀲𑀺𑀢𑀁 𑀅𑀢𑁆𑀢𑀦𑁄 𑀬𑀸𑀯𑀓𑀸𑀮𑀺𑀓𑀪𑀸𑀯𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦 𑀕𑀡𑁆𑀳𑀸𑀧𑁂𑀢𑀺, 𑀢𑀣𑀸 𑀘 𑀲𑀢𑀺 𑀬𑀸𑀯𑀓𑀸𑀮𑀺𑀓𑀁 𑀅𑀧𑀓𑁆𑀓𑀫𑁆𑀧𑀺 𑀲𑀬𑀁𑀧𑀓𑁆𑀓𑀪𑀸𑀯𑀁 𑀉𑀧𑀕𑀘𑁆𑀙𑀢𑀻𑀢𑀺 ‘‘𑀲𑀸𑀫𑀺𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀲𑀬𑀁𑀧𑀓𑁆𑀓𑀲𑀢𑁆𑀢𑀸𑀳𑀓𑀸𑀮𑀺𑀓𑀯𑀲𑀸𑀢𑁂𑀮𑀁 𑀲𑀬𑀁𑀪𑀚𑁆𑀚𑀺𑀢𑀲𑀸𑀲𑀧𑀸𑀤𑀺𑀬𑀸𑀯𑀚𑀻𑀯𑀺𑀓𑀯𑀢𑁆𑀣𑀽𑀦𑀁 𑀢𑁂𑀮𑀜𑁆𑀘 𑀲𑀸𑀫𑀺𑀲𑀁 𑀢𑀤𑀳𑀼 𑀧𑀼𑀭𑁂𑀪𑀢𑁆𑀢𑀫𑁆𑀧𑀺 𑀦 𑀯𑀝𑁆𑀝𑀢𑀺, 𑀢𑀣𑀸 𑀦𑀯𑀦𑀻𑀢𑀲𑀧𑁆𑀧𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀓𑁆𑀔𑀢𑀺 𑀘 𑀆𑀘𑀭𑀺𑀬𑁄 𑁋

‘‘𑀬𑀸𑀯𑀓𑀸𑀮𑀺𑀓𑀆𑀤𑀻𑀦𑀺, 𑀲𑀁𑀲𑀝𑁆𑀞𑀸𑀦𑀺 𑀲𑀳𑀢𑁆𑀢𑀦𑀸. 𑀕𑀸𑀳𑀸𑀧𑀬𑀦𑁆𑀢𑀺 𑀲𑀩𑁆𑀪𑀸𑀯’’𑀦𑁆𑀢𑀺 𑀘,

‘‘𑀢𑁂𑀳𑁂𑀯 𑀪𑀺𑀓𑁆𑀔𑀼𑀦𑀸 𑀧𑀓𑁆𑀓𑀁, 𑀓𑀧𑁆𑀧𑀢𑁂 𑀬𑀸𑀯𑀚𑀻𑀯𑀺𑀓𑀁;

𑀦𑀺𑀭𑀸𑀫𑀺𑀲𑀜𑁆𑀘 𑀲𑀢𑁆𑀢𑀸𑀳𑀁, 𑀲𑀸𑀫𑀺𑀲𑁂 𑀲𑀸𑀫𑀧𑀸𑀓𑀢𑀸’’𑀢𑀺 𑀘.

𑀬𑀸 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀦𑀯𑀦𑀻𑀢𑀫𑁆𑀳𑀺 𑀲𑀸𑀫𑀁𑀧𑀸𑀓𑀢𑀸 𑀯𑀼𑀢𑁆𑀢𑀸, 𑀲𑀸 𑀢𑀓𑁆𑀓𑀸𑀤𑀺𑀲𑀫𑁆𑀫𑀺𑀲𑁆𑀲𑀁 𑀅𑀥𑁄𑀢𑀦𑀯𑀦𑀻𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀯𑀺𑀜𑁆𑀜𑀽𑀦𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀧𑀺 𑀓𑀗𑁆𑀔𑀸𑀯𑀺𑀢𑀭𑀡𑀻𑀧𑀺 𑀲𑀫𑁂𑀦𑁆𑀢𑀺, 𑀢𑀁 𑀦𑀯𑀦𑀻𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺. 𑀇𑀤𑀫𑁂𑀯 𑀬𑀼𑀢𑁆𑀢𑀁. 𑀬𑀤𑀺 𑀲𑀧𑁆𑀧𑀺𑀫𑁆𑀳𑀺 𑀲𑀸𑀫𑀁𑀧𑀸𑀓𑀢𑀸 𑀳𑁄𑀢𑀺, 𑀅𑀯𑀲𑁆𑀲𑀁𑀬𑁂𑀯 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀯𑀼𑀘𑁆𑀘𑁂𑀬𑁆𑀬, 𑀢𑀢𑁆𑀣 𑀧𑀦 ‘‘𑀲𑀧𑁆𑀧𑀺 𑀢𑀸𑀯 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁, 𑀢𑀤𑀳𑀼 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀦𑀺𑀭𑀸𑀫𑀺𑀲𑀫𑁆𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁨) 𑀳𑀺 𑀯𑀼𑀢𑁆𑀢𑀁, 𑀦 𑀧𑀘𑀦𑀯𑀺𑀥𑀸𑀦𑀁. 𑀫𑀦𑀼𑀲𑁆𑀲𑀲𑀧𑁆𑀧𑀺𑀦𑀯𑀦𑀻𑀢𑀸𑀦𑀁, 𑀅𑀜𑁆𑀜𑁂𑀲𑀫𑁆𑀧𑀺 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀦𑀁 𑀅𑀓𑀧𑁆𑀧𑀺𑀬𑀫𑀁𑀲𑀲𑀧𑁆𑀧𑀺𑀦𑀯𑀦𑀻𑀢𑀸𑀦𑀁 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀤𑀼𑀓𑁆𑀓𑀝𑀁. 𑀓𑀺𑀁 𑀧𑀦 𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺? 𑀆𑀫 𑀯𑀝𑁆𑀝𑀢𑀺. 𑀓𑀲𑁆𑀫𑀸? 𑀧𑀝𑀺𑀓𑁆𑀔𑁂𑀧𑀸𑀪𑀸𑀯𑀸 𑀘 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀘. ‘‘𑀬𑁂𑀲𑀁 𑀫𑀁𑀲𑀁 𑀓𑀧𑁆𑀧𑀢𑀺, 𑀢𑁂𑀲𑀁 𑀲𑀧𑁆𑀧𑀺, 𑀦𑀯𑀦𑀻𑀢’’𑀦𑁆𑀢𑀺 (𑀧𑀸𑀭𑀸. 𑁬𑁨𑁩) 𑀇𑀤𑀁 𑀧𑀦 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁, 𑀦 𑀅𑀜𑁆𑀜𑁂𑀲𑀁 𑀯𑀸𑀭𑀡𑀢𑁆𑀣𑀸𑀬.

𑁯𑁦. 𑀇𑀤𑀸𑀦𑀺 𑀢𑁂𑀮𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀮𑀁 𑀢𑀺𑀮𑀯𑀲𑁂𑀭𑀡𑁆𑀟𑀫𑀥𑀼𑀲𑀸𑀲𑀧𑀲𑀫𑁆𑀪𑀯’’𑀦𑁆𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀢𑀺𑀮𑀸𑀤𑀻𑀳𑀺 𑀲𑀫𑁆𑀪𑀯𑀁 𑀦𑀺𑀩𑁆𑀩𑀢𑁆𑀢𑀁 𑀢𑁂𑀮𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁦𑁦) 𑀧𑀦 𑀧𑀼𑀭𑁂𑀪𑀢𑁆𑀢𑀁 𑀢𑀺𑀮𑁂 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀢𑀢𑁂𑀮𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀲𑀯𑀢𑁆𑀣𑀼𑀓𑀧𑁆𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 𑀅𑀦𑀚𑁆𑀛𑁄𑀳𑀭𑀡𑀻𑀬𑀁. 𑀧𑀘𑁆𑀙𑀸𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀢𑀢𑁂𑀮𑀁 𑀅𑀦𑀚𑁆𑀛𑁄𑀳𑀭𑀡𑀻𑀬𑀁, 𑀲𑀻𑀲𑀫𑀓𑁆𑀔𑀦𑀸𑀤𑀻𑀲𑀼 𑀉𑀧𑀦𑁂𑀢𑀩𑁆𑀩𑀁. 𑀏𑀭𑀡𑁆𑀟𑀫𑀥𑀼𑀓𑀲𑀸𑀲𑀧𑀝𑁆𑀞𑀻𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀘𑁂 𑀢𑀸𑀦𑀺 𑀪𑀚𑁆𑀚𑀺𑀢𑁆𑀯𑀸 𑀢𑁂𑀮𑀁 𑀓𑀭𑁄𑀢𑀺, 𑀢𑀤𑀳𑀼 𑀧𑀼𑀭𑁂𑀪𑀢𑁆𑀢𑀫𑁆𑀧𑀺 𑀲𑀸𑀫𑀺𑀲𑀁 𑀦 𑀯𑀝𑁆𑀝𑀢𑀺, 𑀲𑀸𑀫𑀁𑀧𑀸𑀓𑀢𑀸 𑀳𑁄𑀢𑀺. 𑀲𑀘𑁂 𑀅𑀪𑀚𑁆𑀚𑀺𑀢𑁆𑀯𑀸 𑀓𑀭𑁄𑀢𑀺, 𑀢𑀤𑀳𑀼 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺, 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀯𑀢𑁆𑀣𑀽𑀦𑀁 𑀬𑀸𑀯𑀚𑀻𑀯𑀺𑀓𑀢𑁆𑀢𑀸 𑀲𑀯𑀢𑁆𑀣𑀼𑀓𑀧𑁆𑀧𑀝𑀺𑀕𑁆𑀕𑀳𑀡𑁂 𑀤𑁄𑀲𑁄 𑀦𑀢𑁆𑀣𑀻𑀢𑀺. 𑀢𑁂𑀮𑀕𑁆𑀕𑀳𑀡𑀢𑁆𑀣𑀸𑀬 𑀏𑀭𑀡𑁆𑀟𑀓𑀝𑁆𑀞𑀺𑀆𑀤𑀻𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀤𑀼𑀓𑁆𑀓𑀝𑀁. 𑀢𑀣𑀸 𑀧𑀸𑀴𑀺𑀬𑀁 𑀅𑀦𑀸𑀕𑀢𑀸𑀦𑀺 𑀅𑀤𑀲𑁆𑀲𑀺𑀢𑀸𑀦𑀺 𑀓𑁄𑀲𑀫𑁆𑀩𑀓𑀓𑀼𑀲𑀼𑀫𑁆𑀪𑀸𑀤𑀻𑀦𑀁 𑀢𑁂𑀮𑀸𑀦𑀺.

𑀇𑀤𑀸𑀦𑀺 𑀫𑀥𑀼𑀯𑀺𑀓𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀔𑀼𑀤𑁆𑀤𑀸𑀪𑀫𑀭𑀫𑀥𑀼𑀓𑀭𑀺-𑀫𑀓𑁆𑀔𑀺𑀓𑀸𑀳𑀺 𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁩) 𑀔𑀼𑀤𑁆𑀤𑀸𑀢𑀺 𑀔𑀼𑀤𑁆𑀤𑀫𑀓𑁆𑀔𑀺𑀓𑀸. 𑀪𑀫𑀭𑀸𑀢𑀺 𑀫𑀳𑀸𑀪𑀫𑀭𑀫𑀓𑁆𑀔𑀺𑀓𑀸. 𑀤𑀡𑁆𑀟𑀓𑁂𑀲𑀼 𑀫𑀥𑀼𑀓𑀭𑀸 𑀫𑀥𑀼𑀓𑀭𑀺𑀫𑀓𑁆𑀔𑀺𑀓𑀸 𑀦𑀸𑀫. 𑀏𑀢𑀸𑀳𑀺 𑀢𑀻𑀳𑀺 𑀫𑀓𑁆𑀔𑀺𑀓𑀸𑀳𑀺 𑀓𑀢𑀁 𑀫𑀥𑀼 𑀦𑀸𑀫𑀸𑀢𑀺 𑀅𑀢𑁆𑀣𑁄. ‘‘𑀫𑀥𑀼 𑀦𑀸𑀫 𑀫𑀓𑁆𑀔𑀺𑀓𑀸𑀫𑀥𑀽’’𑀢𑀺 𑀧𑀸𑀴𑀺𑀬𑀁 (𑀧𑀸𑀭𑀸. 𑁬𑁨𑁩; 𑀧𑀸𑀘𑀺. 𑁨𑁬𑁦) 𑀯𑀼𑀢𑁆𑀢𑀢𑁆𑀢𑀸 𑀅𑀜𑁆𑀜𑁂𑀳𑀺 𑀢𑀼𑀫𑁆𑀩𑀝𑀓𑀸𑀤𑀻𑀳𑀺 𑀓𑀢𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀦 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀨𑀸𑀡𑀺𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀲𑀸𑀤𑀺𑀉𑀘𑁆𑀙𑀼𑀯𑀺𑀓𑀢𑀺, 𑀧𑀓𑁆𑀓𑀸𑀧𑀓𑁆𑀓𑀸 𑀘 𑀨𑀸𑀡𑀺𑀢’’𑀦𑁆𑀢𑀺 𑀆𑀳. 𑀧𑀓𑁆𑀓𑀸 𑀘 𑀅𑀧𑀓𑁆𑀓𑀸 𑀘 𑀭𑀲𑀸𑀤𑀺𑀉𑀘𑁆𑀙𑀼𑀯𑀺𑀓𑀢𑀺 𑀨𑀸𑀡𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀫𑀥𑀼𑀓𑀧𑀼𑀧𑁆𑀨𑀨𑀸𑀡𑀺𑀢𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀁 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺. 𑀢𑀲𑁆𑀲 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀤𑀼𑀓𑁆𑀓𑀝𑀁. 𑀘𑀺𑀜𑁆𑀘𑀨𑀸𑀡𑀺𑀢𑀜𑁆𑀘 𑀅𑀫𑁆𑀩𑀨𑀸𑀡𑀺𑀢𑀜𑁆𑀘 𑀬𑀸𑀯𑀓𑀸𑀮𑀺𑀓𑀫𑁂𑀯.

𑁯𑁧. 𑀇𑀤𑀸𑀦𑀺 𑀏𑀢𑁂𑀲𑀼 𑀯𑀲𑀸𑀢𑁂𑀮𑀲𑁆𑀲 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀢𑀁 𑀯𑀺𑀲𑀼𑀁 𑀉𑀤𑁆𑀥𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀲𑀯𑀢𑁆𑀣𑀼𑀧𑀓𑁆𑀓𑀸 𑀲𑀸𑀫𑀁 𑀯𑀸’’𑀢𑀺𑀆𑀤𑀺𑀫𑀸𑀳. 𑀲𑀢𑁆𑀢𑀯𑀺𑀥𑀜𑁆𑀳𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁩) 𑀑𑀤𑀺𑀲𑁆𑀲𑀁 𑀦𑀸𑀫 𑀩𑁆𑀬𑀸𑀥𑁄𑀤𑀺𑀲𑁆𑀲𑀁 𑀧𑀼𑀕𑁆𑀕𑀮𑁄𑀤𑀺𑀲𑁆𑀲𑀁 𑀓𑀸𑀮𑁄𑀤𑀺𑀲𑁆𑀲𑀁 𑀲𑀫𑀬𑁄𑀤𑀺𑀲𑁆𑀲𑀁 𑀤𑁂𑀲𑁄𑀤𑀺𑀲𑁆𑀲𑀁 𑀯𑀲𑁄𑀤𑀺𑀲𑁆𑀲𑀁 𑀪𑁂𑀲𑀚𑁆𑀚𑁄𑀤𑀺𑀲𑁆𑀲𑀦𑁆𑀢𑀺.

𑀢𑀢𑁆𑀣 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀫𑀦𑀼𑀲𑁆𑀲𑀺𑀓𑀸𑀩𑀸𑀥𑁂 𑀆𑀫𑀓𑀫𑀁𑀲𑀁 𑀆𑀫𑀓𑀮𑁄𑀳𑀺𑀢’’𑀦𑁆𑀢𑀺 (𑀫𑀳𑀸𑀯. 𑁨𑁬𑁪) 𑀯𑀼𑀢𑁆𑀢𑀁, 𑀇𑀤𑀁 𑀩𑁆𑀬𑀸𑀥𑁄𑀤𑀺𑀲𑁆𑀲𑀁 𑀦𑀸𑀫. 𑀏𑀢𑁆𑀣 𑀧𑀦 𑀓𑀸𑀮𑁂𑀧𑀺 𑀯𑀺𑀓𑀸𑀮𑁂𑀧𑀺 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀫𑀁𑀲𑀮𑁄𑀳𑀺𑀢𑀁 𑀯𑀝𑁆𑀝𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀭𑁄𑀫𑀦𑁆𑀣𑀓𑀲𑁆𑀲 𑀭𑁄𑀫𑀦𑁆𑀣𑀦’’𑀦𑁆𑀢𑀺 (𑀘𑀽𑀴𑀯. 𑁨𑁭𑁩) 𑀏𑀯𑀁 𑀅𑀦𑀼𑀜𑁆𑀜𑀸𑀢𑀁 𑀧𑀼𑀕𑁆𑀕𑀮𑁄𑀤𑀺𑀲𑁆𑀲𑀁 𑀦𑀸𑀫. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀫𑀳𑀸𑀯𑀺𑀓𑀝𑀸𑀦𑀺 𑀤𑀸𑀢𑀼𑀁 𑀕𑀽𑀣𑀁 𑀫𑀼𑀢𑁆𑀢𑀁 𑀙𑀸𑀭𑀺𑀓𑀁 𑀫𑀢𑁆𑀢𑀺𑀓’’𑀦𑁆𑀢𑀺 (𑀫𑀳𑀸𑀯. 𑁨𑁬𑁮) 𑀏𑀯𑀁 𑀲𑀧𑁆𑀧𑀤𑀝𑁆𑀞𑀓𑀸𑀮𑁂 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀁 𑀅𑀦𑀼𑀜𑁆𑀜𑀸𑀢𑀁 𑀓𑀸𑀮𑁄𑀤𑀺𑀲𑁆𑀲𑀁 𑀦𑀸𑀫. 𑀕𑀡𑀪𑁄𑀚𑀦𑀸𑀤𑀺 𑀲𑀫𑀬𑁄𑀤𑀺𑀲𑁆𑀲𑀁 𑀦𑀸𑀫. 𑀕𑀡𑀗𑁆𑀕𑀡𑀽𑀧𑀸𑀳𑀦𑀸𑀦𑀺 𑀤𑁂𑀲𑁄𑀤𑀺𑀲𑁆𑀲𑀁 𑀦𑀸𑀫. 𑀯𑀲𑁄𑀤𑀺𑀲𑁆𑀲𑀁 𑀦𑀸𑀫 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀲𑀸𑀦𑀺 𑀪𑁂𑀲𑀚𑁆𑀚𑀸𑀦𑀻’’𑀢𑀺 (𑀫𑀳𑀸𑀯. 𑁨𑁬𑁨) 𑀏𑀯𑀁 𑀯𑀲𑀸𑀦𑀸𑀫𑁂𑀦 𑀅𑀦𑀼𑀜𑁆𑀜𑀸𑀢𑀁. 𑀢𑀁 𑀞𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑀯𑀲𑀁 𑀲𑀩𑁆𑀩𑁂𑀲𑀁 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀯𑀲𑀸𑀦𑀁 𑀢𑁂𑀮𑀁 𑀢𑀁𑀢𑀤𑀢𑁆𑀣𑀺𑀓𑀸𑀦𑀁 𑀢𑁂𑀮𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀪𑁂𑀲𑀚𑁆𑀚𑁄𑀤𑀺𑀲𑁆𑀲𑀁 𑀦𑀸𑀫 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀸𑀦𑀺 𑀧𑀜𑁆𑀘 𑀪𑁂𑀲𑀚𑁆𑀚𑀸𑀦𑀻’’𑀢𑀺 (𑀫𑀳𑀸𑀯. 𑁨𑁬𑁧) 𑀏𑀯𑀁 𑀪𑁂𑀲𑀚𑁆𑀚𑀦𑀸𑀫𑁂𑀦 𑀯𑀼𑀢𑁆𑀢𑀸𑀦𑀺 𑀲𑀧𑁆𑀧𑀺𑀆𑀤𑀻𑀦𑀺 𑀧𑀜𑁆𑀘.

𑀬𑀣𑀸 𑀧𑀦 𑀔𑀻𑀭𑀤𑀥𑀺𑀆𑀤𑀻𑀳𑀺 𑀧𑀓𑁆𑀓𑀢𑁂𑀮𑀁 𑀧𑀘𑁆𑀙𑀸𑀪𑀢𑁆𑀢𑀁 𑀦 𑀯𑀝𑁆𑀝𑀢𑀺, 𑀦 𑀏𑀯𑀫𑀺𑀤𑀁. 𑀇𑀤𑀁 𑀧𑀦 𑀢𑁂𑀮𑀁 𑀲𑀯𑀢𑁆𑀣𑀼𑀓𑀧𑀓𑁆𑀓𑀫𑁆𑀧𑀺 𑀯𑀝𑁆𑀝𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀯𑀢𑁆𑀣𑀼𑀧𑀓𑁆𑀓𑀸 𑀲𑀸𑀫𑀁 𑀯𑀸’’𑀢𑀺 𑀯𑀼𑀢𑁆𑀢𑀁. 𑀯𑀲𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀲𑀯𑀢𑁆𑀣𑀼𑀧𑀓𑁆𑀓𑀸’’𑀢𑀺 𑀯𑀼𑀢𑁆𑀢𑀁. 𑀲𑀸𑀫𑀁 𑀧𑀓𑁆𑀓𑀸 𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀲𑀯𑀢𑁆𑀣𑀼𑀓𑀧𑁆𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 𑀲𑀸𑀫𑀁𑀧𑀓𑁆𑀓𑀢𑁆𑀢𑀸 𑀤𑀥𑀺𑀆𑀤𑀻𑀳𑀺 𑀧𑀓𑁆𑀓𑀢𑁂𑀮𑀁 𑀅𑀢𑁆𑀢𑀦𑀸 𑀓𑀢𑀁 𑀧𑀼𑀭𑁂𑀪𑀢𑁆𑀢𑀫𑁆𑀧𑀺 𑀦 𑀯𑀝𑁆𑀝𑀢𑀺, 𑀦 𑀏𑀯𑀫𑀺𑀤𑀁. 𑀇𑀤𑀁 𑀧𑀦 𑀅𑀢𑁆𑀢𑀦𑀸 𑀲𑀯𑀢𑁆𑀣𑀼𑀓𑀧𑀓𑁆𑀓𑀫𑁆𑀧𑀺 𑀧𑀼𑀭𑁂𑀪𑀢𑁆𑀢𑀫𑁆𑀧𑀺 𑀧𑀘𑁆𑀙𑀸𑀪𑀢𑁆𑀢𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀧𑀦 𑀓𑀸𑀭𑀡𑀽𑀧𑀘𑀸𑀭𑁂𑀦 𑀯𑀲𑀸𑀢𑁂𑀮𑀁 ‘‘𑀯𑀲𑀸’’𑀢𑀺 𑀯𑀼𑀢𑁆𑀢𑀁.

𑀓𑀸𑀮𑁂𑀢𑀺 𑀧𑀼𑀭𑁂𑀪𑀢𑁆𑀢𑀓𑀸𑀮𑁂 𑀧𑀭𑁂𑀳𑀺 𑀯𑀸 𑀅𑀢𑁆𑀢𑀦𑀸 𑀯𑀸 𑀧𑀓𑁆𑀓𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀙𑀸𑀪𑀢𑁆𑀢𑀁 𑀧𑀦 𑀧𑀘𑀺𑀢𑀼𑀁 𑀦 𑀯𑀝𑁆𑀝𑀢𑀺 ‘‘𑀓𑀸𑀮𑁂 𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀦𑀺𑀧𑁆𑀧𑀓𑁆𑀓𑀁 𑀓𑀸𑀮𑁂 𑀲𑀁𑀲𑀝𑁆𑀞’’𑀦𑁆𑀢𑀺 (𑀫𑀳𑀸𑀯. 𑁨𑁬𑁨) 𑀯𑀼𑀢𑁆𑀢𑀢𑁆𑀢𑀸. 𑀢𑀲𑁆𑀫𑀸 ‘‘𑀓𑀸𑀮𑁂’’𑀢𑀺 𑀯𑀼𑀢𑁆𑀢𑀁. 𑀬𑁄 𑀧𑀦 𑀯𑀺𑀓𑀸𑀮𑁂 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀓𑀸𑀮𑁂 𑀧𑀘𑀺𑀢𑁆𑀯𑀸 𑀯𑀺𑀓𑀸𑀮𑁂 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀲𑁄 𑀢𑀻𑀡𑀺 𑀤𑀼𑀓𑁆𑀓𑀝𑀸𑀦𑀺 𑀆𑀧𑀚𑁆𑀚𑀢𑀺.

𑀅𑀫𑀸𑀦𑀼𑀲𑀸𑀢𑀺 𑀏𑀢𑁆𑀣 (𑀫𑀳𑀸𑀯. 𑁨𑁬𑁨) 𑀧𑀦 𑀅𑀘𑁆𑀙𑀯𑀲𑀸𑀤𑀻𑀦𑀁 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀞𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑀯𑀲𑀁 𑀲𑀩𑁆𑀩𑁂𑀲𑀁 𑀅𑀓𑀧𑁆𑀧𑀺𑀬𑀫𑀁𑀲𑀸𑀦𑀁 𑀯𑀲𑀸 𑀅𑀦𑀼𑀜𑁆𑀜𑀸𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀫𑀁𑀲𑁂𑀲𑀼 𑀳𑀺 𑀫𑀦𑀼𑀲𑁆𑀲𑀳𑀢𑁆𑀣𑀺𑀫𑀁𑀲𑀸𑀤𑀻𑀦𑀺 𑀤𑀲 𑀫𑀁𑀲𑀸𑀦𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀺, 𑀯𑀲𑀸 𑀧𑀦 𑀏𑀓𑀸 𑀫𑀦𑀼𑀲𑁆𑀲𑀯𑀲𑀸 𑀏𑀯.

𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁩) 𑀓𑀢𑀦𑀺𑀩𑁆𑀩𑀝𑁆𑀝𑀺𑀢𑀯𑀲𑀸𑀢𑁂𑀮𑀁 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺. 𑀬𑀁 𑀧𑀦𑁂𑀢𑁆𑀣 𑀲𑀼𑀔𑀼𑀫𑀭𑀚𑀲𑀤𑀺𑀲𑀁 𑀫𑀁𑀲𑀁 𑀯𑀸 𑀦𑁆𑀳𑀸𑀭𑀼 𑀯𑀸 𑀅𑀝𑁆𑀞𑀺 𑀯𑀸 𑀮𑁄𑀳𑀺𑀢𑀁 𑀯𑀸, 𑀢𑀁 𑀅𑀩𑁆𑀩𑁄𑀳𑀸𑀭𑀺𑀓𑀁. 𑀲𑀘𑁂 𑀲𑀬𑀁 𑀓𑀭𑁄𑀢𑀺, 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀘𑀺𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀫𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀦𑀺𑀭𑀸𑀫𑀺𑀲𑀧𑀭𑀺𑀪𑁄𑀕𑀜𑁆𑀳𑀺 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁 ‘‘𑀓𑀸𑀮𑁂 𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀦𑀺𑀧𑁆𑀧𑀓𑁆𑀓𑀁 𑀓𑀸𑀮𑁂 𑀲𑀁𑀲𑀝𑁆𑀞𑀁 𑀢𑁂𑀮𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 (𑀫𑀳𑀸𑀯. 𑁨𑁬𑁨). 𑀅𑀜𑁆𑀜𑁂𑀲𑀦𑁆𑀢𑀺 𑀲𑀧𑁆𑀧𑀺𑀆𑀤𑀻𑀦𑀁. 𑀯𑀢𑁆𑀣𑀼𑀦𑁆𑀢𑀺 𑀬𑀸𑀯𑀓𑀸𑀮𑀺𑀓𑀪𑀽𑀢𑀁 𑀯𑀢𑁆𑀣𑀼𑀁. 𑀬𑀸𑀯𑀓𑀸𑀮𑀺𑀓𑀯𑀢𑁆𑀣𑀽𑀦𑀁 𑀯𑀢𑁆𑀣𑀼𑀁 𑀦 𑀧𑀘𑁂𑀢𑀺 𑀲𑀫𑁆𑀩𑀦𑁆𑀥𑁄.

𑁯𑁨. 𑀇𑀤𑀸𑀦𑀺 𑀬𑀸𑀯𑀚𑀻𑀯𑀺𑀓𑀯𑀺𑀓𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀳𑀮𑀺𑀤𑁆𑀤𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀬𑀫𑀦𑀼𑀢𑁆𑀢𑀸𑀦𑀧𑀤𑀢𑁆𑀣𑁄 (𑀫𑀳𑀸𑀯. 𑁨𑁬𑁩; 𑀧𑀸𑀘𑀺. 𑀅𑀝𑁆𑀞. 𑁨𑁪𑁮-𑁨𑁪𑁯) 𑁋 𑀧𑀜𑁆𑀘𑀫𑀽𑀮𑀸𑀤𑀺𑀓𑀜𑁆𑀘𑀸𑀧𑀻𑀢𑀺 𑀏𑀢𑁆𑀣 𑀤𑁆𑀯𑀺𑀧𑀜𑁆𑀘𑀫𑀽𑀮𑁂𑀦 𑀲𑀤𑁆𑀥𑀺𑀁 𑀅𑀜𑁆𑀜𑀸𑀦𑀺𑀧𑀺 𑀢𑀕𑁆𑀕𑀢𑀺𑀓𑀸𑀦𑀺 𑀫𑀽𑀮𑀪𑁂𑀲𑀚𑁆𑀚𑀸𑀦𑀺 𑀕𑀳𑀺𑀢𑀸𑀦𑀻𑀢𑀺 𑀜𑀸𑀢𑀩𑁆𑀩𑀁.

𑁯𑁩-𑁫. 𑀩𑀺𑀴𑀗𑁆𑀕𑀸𑀤𑀻𑀦𑀺 𑀨𑀮𑀪𑁂𑀲𑀚𑁆𑀚𑀸𑀦𑀺. 𑀢𑀢𑁆𑀣 (𑀫𑀳𑀸𑀯. 𑁨𑁬𑁩) 𑀕𑁄𑀝𑁆𑀞𑀨𑀮𑀦𑁆𑀢𑀺 𑀫𑀤𑀦𑀨𑀮𑀦𑁆𑀢𑀺 𑀯𑀤𑀦𑁆𑀢𑀺. 𑀓𑀧𑁆𑀧𑀸𑀲𑀸𑀤𑀻𑀦𑀁 𑀧𑀡𑁆𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑁂 𑀧𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀫𑀽𑀮𑀪𑁂𑀲𑀚𑁆𑀚𑀨𑀮𑀪𑁂𑀲𑀚𑁆𑀚𑀧𑀡𑁆𑀡𑀪𑁂𑀲𑀚𑁆𑀚𑀯𑀲𑁂𑀦 𑀯𑀼𑀢𑁆𑀢𑀸 𑀲𑀩𑁆𑀩𑁂 𑀓𑀧𑁆𑀧𑀺𑀬𑀸. 𑀇𑀫𑁂𑀲𑀁 𑀧𑀼𑀧𑁆𑀨𑀨𑀮𑀧𑀡𑁆𑀡𑀫𑀽𑀮𑀸 𑀲𑀩𑁆𑀩𑁂𑀧𑀺 𑀓𑀧𑁆𑀧𑀺𑀬𑀸 𑀬𑀸𑀯𑀚𑀻𑀯𑀺𑀓𑀸𑀬𑁂𑀯. 𑀞𑀧𑁂𑀢𑁆𑀯𑀸 𑀉𑀘𑁆𑀙𑀼𑀦𑀺𑀬𑁆𑀬𑀸𑀲𑀁 𑀲𑀩𑁆𑀩𑁄 𑀘 𑀦𑀺𑀬𑁆𑀬𑀸𑀲𑁄 𑀲𑀭𑀲𑀜𑁆𑀘 𑀉𑀘𑁆𑀙𑀼𑀚𑀁 𑀢𑀘𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑁄 𑀘 𑀢𑀘𑁄𑀢𑀺 𑀲𑀫𑁆𑀩𑀦𑁆𑀥𑁄.

𑁯𑁬. 𑀫𑀥𑀼𑀦𑀸 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁩) 𑀅𑀫𑀓𑁆𑀔𑀺𑀢𑀁 𑀲𑀼𑀤𑁆𑀥𑀲𑀺𑀢𑁆𑀣𑀜𑁆𑀘. 𑀫𑀥𑀼𑀫𑀓𑁆𑀔𑀺𑀢𑀁 𑀧𑀦 𑀲𑀢𑁆𑀢𑀸𑀳𑀓𑀸𑀮𑀺𑀓𑀫𑁂𑀯. 𑀬𑀜𑁆𑀘 𑀓𑀺𑀜𑁆𑀘𑀻𑀢𑀺 𑀑𑀤𑀦𑀁 𑀫𑀁𑀲𑀁 𑀅𑀝𑁆𑀞𑀺𑀆𑀤𑀻𑀦𑀻𑀢𑀺 𑀅𑀢𑁆𑀣𑁄.

𑁯𑁭. ‘‘𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀦𑁂𑀯 𑀔𑀸𑀤𑀦𑀻𑀬𑁂 𑀔𑀸𑀤𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀺, 𑀦 𑀪𑁄𑀚𑀦𑀻𑀬𑁂 𑀪𑁄𑀚𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀺, 𑀢𑀸𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀧𑀭𑀺𑀳𑀭𑀺𑀢𑀼𑀁, 𑀲𑀢𑀺 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁, 𑀅𑀲𑀢𑀺 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁨𑁬𑁩) 𑀯𑀼𑀢𑁆𑀢𑀢𑁆𑀢𑀸 ‘‘𑀆𑀳𑀸𑀭𑀢𑁆𑀣𑀫𑀲𑀸𑀥𑁂𑀦𑁆𑀢𑀁, 𑀲𑀩𑁆𑀩𑀁 𑀢𑀁 𑀬𑀸𑀯𑀚𑀻𑀯𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁.

𑁯𑁮. 𑀲𑀩𑁆𑀩𑀲𑁆𑀲𑀸𑀢𑀺 𑀕𑀺𑀮𑀸𑀦𑀲𑁆𑀲𑀸𑀧𑀺 𑀅𑀕𑀺𑀮𑀸𑀦𑀲𑁆𑀲𑀧𑀻𑀢𑀺 𑀅𑀢𑁆𑀣𑁄. 𑀓𑀸𑀮𑀺𑀓𑀢𑁆𑀢𑀬𑀦𑁆𑀢𑀺 𑀬𑀸𑀯𑀓𑀸𑀮𑀺𑀓𑀁 𑀯𑀚𑁆𑀚𑁂𑀢𑁆𑀯𑀸 𑀅𑀯𑀲𑁂𑀲𑀁 𑀲𑀢𑀺 𑀧𑀘𑁆𑀘𑀬𑁂 𑀯𑀺𑀓𑀸𑀮𑁂 𑀓𑀧𑁆𑀧𑀢𑀻𑀢𑀺 𑀅𑀢𑁆𑀣𑁄.

𑁯𑁯. 𑀚𑀦𑀬𑀦𑁆𑀢𑀼𑀪𑁄𑀢𑀺 𑀚𑀦𑀬𑀦𑁆𑀢𑀺 𑀉𑀪𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀸𑀯𑀓𑀸𑀮𑀺𑀓𑀬𑀸𑀫𑀓𑀸𑀮𑀺𑀓𑀲𑀗𑁆𑀔𑀸𑀢𑀸 𑀉𑀪𑁄 𑀓𑀸𑀮𑀺𑀓𑀸 𑀅𑀢𑁆𑀢𑀦𑁄 𑀓𑀸𑀮𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀺𑀪𑀼𑀢𑁆𑀢𑀸 𑀧𑀸𑀘𑀺𑀢𑁆𑀢𑀺𑀁 𑀚𑀦𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀜𑁆𑀘 𑀪𑀺𑀬𑁆𑀬𑁄 (𑀫𑀳𑀸𑀯. 𑁨𑁭𑁪; 𑀫𑀳𑀸𑀯. 𑀅𑀝𑁆𑀞. 𑁨𑁭𑁪; 𑀓𑀗𑁆𑀔𑀸. 𑀅𑀝𑁆𑀞. 𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑁋 𑀉𑀪𑁄𑀧𑀺 𑀧𑀦𑁂𑀢𑁂 𑀅𑀓𑀧𑁆𑀧𑀺𑀬𑀓𑀼𑀝𑀺𑀬𑀁 𑀯𑀼𑀢𑁆𑀢𑀸 𑀅𑀦𑁆𑀢𑁄𑀯𑀼𑀢𑁆𑀣𑀁 𑀤𑀼𑀓𑁆𑀓𑀝𑀜𑁆𑀘, 𑀧𑀼𑀦𑀤𑀺𑀯𑀲𑁂 𑀧𑀭𑀺𑀪𑀼𑀜𑁆𑀚𑀢𑁄 𑀲𑀦𑁆𑀦𑀺𑀥𑀺𑀁 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀚𑀦𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁦𑁦. 𑀅𑀦𑀸𑀭𑀼𑀴𑁆𑀳𑁂𑀢𑀺 𑀧𑀸𑀴𑀺𑀬𑀁 𑀅𑀦𑀸𑀕𑀢𑁂 𑀫𑀦𑀼𑀲𑁆𑀲𑀲𑀧𑁆𑀧𑀺𑀆𑀤𑀺𑀫𑁆𑀳𑀻𑀢𑀺 𑀅𑀢𑁆𑀣𑁄.

𑁧𑁦𑁧. 𑀦𑀺𑀲𑁆𑀲𑀝𑁆𑀞𑀮𑀤𑁆𑀥𑀦𑁆𑀢𑀺 (𑀧𑀸𑀭𑀸. 𑁬𑁨𑁪) 𑀯𑀺𑀦𑀬𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀦 𑀮𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀓𑀧𑁆𑀧𑁂𑀦𑁆𑀢𑀲𑁆𑀲 𑀲𑀢𑁆𑀢𑀸𑀳𑁂𑀢𑀺 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀲𑀸𑀫𑀡𑁂𑀭𑀲𑁆𑀲 ‘‘𑀇𑀤𑀁 𑀲𑀧𑁆𑀧𑀺𑀁 𑀢𑁂𑀮’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀸𑀫𑀁 𑀕𑀳𑁂𑀢𑁆𑀯𑀸 ‘‘𑀢𑀼𑀬𑁆𑀳𑀁 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀯𑀸 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀯𑀸 𑀲𑀫𑁆𑀫𑀼𑀔𑀸𑀧𑀺 𑀯𑀸 𑀧𑀭𑀫𑁆𑀫𑀼𑀔𑀸𑀧𑀺 𑀯𑀸 𑀯𑀺𑀓𑀧𑁆𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀸𑀴𑀺𑀬𑀁 𑀧𑀦 ‘‘𑀅𑀦𑀸𑀧𑀢𑁆𑀢𑀺 𑀅𑀦𑁆𑀢𑁄𑀲𑀢𑁆𑀢𑀸𑀳𑁂 𑀅𑀥𑀺𑀝𑁆𑀞𑁂𑀢𑀺, 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀦𑀲𑁆𑀲𑀢𑀺, 𑀯𑀺𑀦𑀲𑁆𑀲𑀢𑀺, 𑀟𑀬𑁆𑀳𑀢𑀺, 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀺, 𑀯𑀺𑀲𑁆𑀲𑀸𑀲𑀁 𑀕𑀡𑁆𑀳𑀦𑁆𑀢𑀻’’𑀢𑀺 (𑀧𑀸𑀭𑀸. 𑁬𑁨𑁫) 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, ‘‘𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀇𑀤𑀁 𑀧𑀦 𑀦𑀢𑁆𑀣𑀺. 𑀓𑀺𑀜𑁆𑀘𑀸𑀧𑀺 𑀦𑀢𑁆𑀣𑀺, 𑀅𑀣 𑀔𑁄 ‘‘𑀅𑀦𑀥𑀺𑀝𑁆𑀞𑀺𑀢𑁂 𑀅𑀥𑀺𑀝𑁆𑀞𑀺𑀢𑀲𑀜𑁆𑀜𑀻 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀅𑀯𑀺𑀓𑀧𑁆𑀧𑀺𑀢𑁂 𑀯𑀺𑀓𑀧𑁆𑀧𑀺𑀢𑀲𑀜𑁆𑀜𑀻 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀭𑀸. 𑁬𑁨𑁪) 𑀆𑀧𑀢𑁆𑀢𑀺𑀯𑀸𑀭𑁂 𑀆𑀕𑀢𑀢𑁆𑀢𑀸 𑀣𑁂𑀭𑁂𑀦 𑀤𑀲𑁆𑀲𑀺𑀢𑀁. 𑀢𑀁 𑀤𑀲𑁆𑀲𑁂𑀦𑁆𑀢𑁂𑀦𑀸𑀧𑀺 𑀲𑀘𑁂 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀯𑀺𑀓𑀧𑁆𑀧𑁂𑀢𑀺, 𑀅𑀢𑁆𑀢𑀦𑁄 𑀏𑀯 𑀲𑀦𑁆𑀢𑀓𑀁 𑀳𑁄𑀢𑀺, 𑀧𑀝𑀺𑀕𑁆𑀕𑀳𑀡𑀫𑁆𑀧𑀺 𑀦 𑀯𑀺𑀚𑀳𑀢𑀺, 𑀢𑀲𑁆𑀫𑀸 𑀉𑀧𑀲𑀫𑁆𑀧𑀦𑁆𑀦𑀯𑀲𑁂𑀦 𑀅𑀤𑀲𑁆𑀲𑁂𑀢𑁆𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀯𑀲𑁂𑀦 𑀤𑀲𑁆𑀲𑀺𑀢𑀁. 𑀢𑀲𑁆𑀲 𑀳𑀺 𑀯𑀺𑀓𑀧𑁆𑀧𑀺𑀢𑁂 𑀧𑀝𑀺𑀕𑁆𑀕𑀳𑀡𑀫𑁆𑀧𑀺 𑀯𑀺𑀚𑀳𑀢𑀺, 𑀆𑀧𑀢𑁆𑀢𑀺𑀧𑀺 𑀦 𑀳𑁄𑀢𑀻𑀢𑀺. 𑀅𑀥𑀺𑀝𑁆𑀞𑀢𑁄𑀢𑀺 𑀅𑀩𑁆𑀪𑀜𑁆𑀚𑀦𑀸𑀤𑀻𑀦𑀺 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀘𑁂 𑀧𑀦 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀦𑀺𑀭𑀧𑁂𑀓𑁆𑀔𑁄 𑀳𑀼𑀢𑁆𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑀭𑀺𑀘𑁆𑀘𑀚𑀢𑀺, 𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 𑀅𑀦𑀸𑀧𑀢𑁆𑀢𑀺, 𑀇𑀢𑀭𑀲𑁆𑀲 𑀘 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 𑀉𑀪𑀺𑀦𑁆𑀦𑀫𑁆𑀧𑀺 𑀓𑀸𑀬𑀺𑀓𑀧𑀭𑀺𑀪𑁄𑀕𑁄 𑀯𑀝𑁆𑀝𑀢𑀺. 𑀅𑀦𑀺𑀲𑁆𑀲𑀕𑁆𑀕𑀺𑀬𑀢𑁆𑀢𑀸 𑀧𑀦 𑀩𑀸𑀳𑀺𑀭𑀧𑀭𑀺𑀪𑁄𑀕𑁂𑀦 𑀯𑀝𑁆𑀝𑀢𑀺. ‘‘𑀢𑀸𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀢𑁆𑀢𑀸𑀳𑀧𑀭𑀫𑀁 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀻’’𑀢𑀺 (𑀧𑀸𑀭𑀸. 𑁬𑁨𑁩) 𑀏𑀯𑀁 𑀦𑀺𑀬𑀫𑁂𑀢𑁆𑀯𑀸 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀜𑁆𑀜𑀲𑁆𑀲 𑀤𑀤𑀢𑁄𑀧𑀺 𑀘 𑀅𑀦𑀸𑀧𑀢𑁆𑀢𑀻’’𑀢𑀺.

𑁧𑁦𑁨. 𑀲𑀩𑁆𑀪𑀸𑀯𑀦𑁆𑀢𑀺 𑀅𑀢𑁆𑀢𑀦𑁄 𑀲𑀪𑀸𑀯𑀁. 𑀬𑀲𑁆𑀫𑀸 𑀕𑀸𑀳𑀸𑀧𑀬𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀫𑀼𑀤𑀻𑀭𑀺𑀢𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀯𑀓𑁆𑀔𑀫𑀸𑀦𑀁 𑀲𑀦𑁆𑀥𑀸𑀬 ‘‘𑀏𑀯’’𑀦𑁆𑀢𑀺 𑀯𑀼𑀢𑁆𑀢𑀁.

𑁧𑁦𑁩-𑁫. 𑀲𑀢𑁆𑀢𑀸𑀳𑀁 𑀬𑀸𑀯𑀚𑀻𑀯𑀺𑀓𑀦𑁆𑀢𑀺 (𑀫𑀳𑀸𑀯. 𑁩𑁦𑁫; 𑀫𑀳𑀸𑀯. 𑀅𑀝𑁆𑀞. 𑀓𑀗𑁆𑀔𑀸. 𑀅𑀝𑁆𑀞. 𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀲𑀢𑁆𑀢𑀸𑀳𑀓𑀸𑀮𑀺𑀓𑀜𑁆𑀘 𑀬𑀸𑀯𑀚𑀻𑀯𑀺𑀓𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀲𑀢𑁆𑀢𑀸𑀳𑀓𑀸𑀮𑀺𑀓𑀬𑀸𑀯𑀚𑀻𑀯𑀺𑀓𑀤𑁆𑀯𑀬𑀁 𑀲𑁂𑀲𑀓𑀸𑀮𑀺𑀓𑀲𑀫𑁆𑀫𑀺𑀲𑁆𑀲𑀁 𑀲𑀫𑁆𑀪𑀺𑀦𑁆𑀦𑀭𑀲𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑁄 𑀲𑀦𑁆𑀦𑀺𑀥𑀺𑀧𑀸𑀘𑀺𑀢𑁆𑀢𑀺 𑀳𑁄𑀢𑀻𑀢𑀺 𑀉𑀤𑀻𑀭𑀺𑀢𑀦𑁆𑀢𑀺. 𑀢𑀤𑀳𑀼 𑀧𑀝𑀺𑀕𑁆𑀕𑀳𑀺𑀢𑀁 𑀢𑀤𑀳𑁂𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀦𑁆𑀢𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀬𑀸𑀯𑀚𑀻𑀯𑀺𑀓𑀤𑁆𑀯𑀬𑀁. 𑀇𑀢𑀭𑀦𑁆𑀢𑀺 𑀬𑀸𑀯𑀚𑀻𑀯𑀺𑀓𑀁. 𑀧𑀼𑀭𑁂 𑀧𑀝𑀺𑀕𑁆𑀕𑀳𑀺𑀢𑀁 𑀯𑀸 𑀳𑁄𑀢𑀼, 𑀢𑀤𑀳𑀼 𑀯𑀸 𑀧𑀝𑀺𑀕𑁆𑀕𑀳𑀺𑀢𑀁, 𑀬𑀸𑀯𑀚𑀻𑀯𑀺𑀓𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦 𑀲𑀢𑁆𑀢𑀸𑀳𑀁 𑀓𑀧𑁆𑀧𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀬𑀸𑀯𑀓𑀸𑀮𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀬𑀸𑀫𑀓𑀸𑀮𑀺𑀓𑀁, 𑀲𑀢𑁆𑀢𑀸𑀳𑀓𑀸𑀮𑀺𑀓𑀁, 𑀬𑀸𑀯𑀚𑀻𑀯𑀺𑀓𑀁 𑀢𑀤𑀳𑀼 𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀓𑀧𑁆𑀧𑀢𑀺, 𑀦𑁄 𑀯𑀺𑀓𑀸𑀮𑁂. 𑀬𑀸𑀫𑀓𑀸𑀮𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀸𑀮𑀺𑀓𑀁, 𑀬𑀸𑀯𑀚𑀻𑀯𑀺𑀓𑀁 𑀢𑀤𑀳𑀼 𑀧𑀝𑀺𑀕𑁆𑀕𑀳𑀺𑀢𑀁 𑀬𑀸𑀫𑁂 𑀓𑀧𑁆𑀧𑀢𑀺, 𑀬𑀸𑀫𑀸𑀢𑀺𑀓𑁆𑀓𑀦𑁆𑀢𑁂 𑀦 𑀓𑀧𑁆𑀧𑀢𑀺. 𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀬𑀸𑀯𑀚𑀻𑀯𑀺𑀓𑀁 𑀧𑀝𑀺𑀕𑁆𑀕𑀳𑀺𑀢𑀁 𑀲𑀢𑁆𑀢𑀸𑀳𑀁 𑀓𑀧𑁆𑀧𑀢𑀺, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀦𑁆𑀢𑁂 𑀦 𑀓𑀧𑁆𑀧𑀢𑀻’’𑀢𑀺 𑀳𑀺 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁦𑁫) 𑀯𑀼𑀢𑁆𑀢𑀁. 𑀏𑀢𑁆𑀣 𑀧𑀦 ‘‘𑀢𑀤𑀳𑀼 𑀧𑀝𑀺𑀕𑁆𑀕𑀳𑀺𑀢’’𑀦𑁆𑀢𑀺 𑀯𑀺𑀲𑁂𑀲𑀯𑀘𑀦𑀲𑁆𑀲 𑀦𑀢𑁆𑀣𑀺𑀢𑀸𑀬 𑀧𑀼𑀭𑁂 𑀧𑀝𑀺𑀕𑁆𑀕𑀳𑀺𑀢𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀦𑁆𑀢𑀺. 𑀓𑀸𑀮𑀺𑀓𑀯𑀺𑀦𑀺𑀘𑁆𑀙𑀬𑁄.

𑀓𑀸𑀮𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.