𑁯. 𑀧𑀝𑀺𑀕𑁆𑀕𑀸𑀳𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁦𑁬. 𑀇𑀤𑀸𑀦𑀺 ‘‘𑀧𑀝𑀺𑀕𑁆𑀕𑀸𑀳𑁄’’𑀢𑀺 𑀧𑀤𑀁 𑀯𑀺𑀢𑁆𑀣𑀸𑀭𑁂𑀢𑀼𑀁 ‘‘𑀤𑀸𑀢𑀼𑀓𑀸𑀫𑀸𑀪𑀺𑀳𑀸𑀭𑁄 𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀤𑀸𑀢𑀼𑀓𑀸𑀫𑀲𑁆𑀲 𑀅𑀪𑀺𑀳𑀸𑀭𑁄 𑀤𑀸𑀢𑀼𑀓𑀸𑀫𑀸𑀪𑀺𑀳𑀸𑀭𑁄. 𑀏𑀢𑁂𑀦 𑀅𑀜𑁆𑀜𑀲𑁆𑀲 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑀼𑀁 𑀆𑀮𑀼𑀮𑁂𑀦𑁆𑀢𑀲𑁆𑀲 𑀨𑀼𑀲𑀺𑀢𑀸𑀦𑀺 𑀉𑀝𑁆𑀞𑀳𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀧𑀢𑁆𑀢𑁂 𑀲𑀘𑁂 𑀧𑀢𑀦𑁆𑀢𑀺, 𑀧𑀝𑀺𑀕𑁆𑀕𑀳𑀡𑀁 𑀦 𑀭𑀼𑀳𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀏𑀭𑀡𑀓𑁆𑀔𑀫𑀦𑁆𑀢𑀺 𑀣𑀸𑀫𑀫𑀚𑁆𑀛𑀺𑀫𑁂𑀦 𑀧𑀼𑀭𑀺𑀲𑁂𑀦 𑀉𑀓𑁆𑀔𑀺𑀧𑀦𑀓𑁆𑀔𑀫𑀁, 𑀢𑀢𑁄 𑀫𑀳𑀦𑁆𑀢𑁂 𑀧𑀝𑀺𑀕𑁆𑀕𑀳𑀡𑀁 𑀦 𑀭𑀼𑀳𑀢𑀺. 𑀢𑀺𑀥𑀸 𑀤𑁂𑀦𑁆𑀢𑁂𑀢𑀺 𑀓𑀸𑀬𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀁 𑀯𑀲𑁂𑀦 𑀢𑀺𑀥𑀸 𑀤𑁂𑀦𑁆𑀢𑁂. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀸𑀬𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀳𑀺 𑀤𑁆𑀯𑀺𑀥𑀸 𑀕𑀸𑀳𑁄𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀗𑁆𑀕𑁄 𑀏𑀯𑀁 𑀧𑀜𑁆𑀘𑀗𑁆𑀕𑁂𑀯𑀁. 𑀤𑀸𑀢𑀼𑀓𑀸𑀫𑀸𑀪𑀺𑀳𑀸𑀭𑁄 𑀏𑀓𑀁, 𑀳𑀢𑁆𑀣𑀧𑀸𑀲𑁄 𑀏𑀓𑀁, 𑀏𑀭𑀡𑀓𑁆𑀔𑀫𑀢𑀸 𑀏𑀓𑀁, 𑀤𑁂𑀯𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀕𑀢𑁂𑀲𑀼 𑀏𑀓𑁂𑀦 𑀢𑀺𑀥𑀸 𑀤𑀸𑀦𑀫𑁂𑀓𑀁, 𑀤𑁆𑀯𑀺𑀥𑀸 𑀕𑀸𑀳𑁄 𑀏𑀓𑀦𑁆𑀢𑀺 𑀏𑀯𑀁 𑀧𑀜𑁆𑀘𑀗𑁆𑀕𑀸𑀦𑀺 𑀳𑁄𑀦𑁆𑀢𑀺.

𑁧𑁦𑁭. 𑀇𑀤𑀸𑀦𑀺 𑀬𑁂𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀧𑀝𑀺𑀕𑁆𑀕𑀳𑀡𑀁 𑀦 𑀭𑀼𑀳𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀁𑀳𑀸𑀭𑀺𑀬𑁂’’𑀢𑀺𑀆𑀤𑀺𑀫𑀸𑀳. 𑀔𑀸𑀡𑀼𑀓𑁂 (𑀧𑀸𑀘𑀺. 𑀅𑀝𑁆𑀞. 𑁨𑁬𑁫) 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀫𑀜𑁆𑀘𑀸𑀤𑀺𑀫𑁆𑀳𑀺 𑀯𑀸 𑀨𑀮𑀓𑁂 𑀯𑀸 𑀧𑀸𑀲𑀸𑀡𑁂 𑀯𑀸 𑀅𑀲𑀁𑀳𑀸𑀭𑀺𑀬𑁂 𑀦 𑀭𑀼𑀳𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀚𑀸𑀢𑁂 𑀧𑀤𑀼𑀫𑀺𑀦𑀺𑀧𑀡𑁆𑀡𑁂 𑀯𑀸 𑀓𑀺𑀁𑀲𑀼𑀓𑀧𑀡𑁆𑀡𑀸𑀤𑀺𑀫𑁆𑀳𑀺 𑀯𑀸 𑀦 𑀯𑀝𑁆𑀝𑀢𑀺, 𑀲𑀼𑀔𑀼𑀫𑁂 𑀘𑀺𑀜𑁆𑀘𑀆𑀤𑀻𑀦𑀁 𑀧𑀡𑁆𑀡𑁂 𑀯𑀸 𑀦 𑀭𑀼𑀳𑀢𑀺, 𑀬𑀜𑁆𑀘 𑀫𑀚𑁆𑀛𑀺𑀫𑀧𑀼𑀭𑀺𑀲𑁄 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀺𑀁 𑀅𑀲𑀬𑁆𑀳𑀪𑀸𑀭𑁂 𑀘 𑀧𑀝𑀺𑀕𑁆𑀕𑀳𑁄 𑀦 𑀭𑀼𑀳𑀢𑀻𑀢𑀺 𑀅𑀢𑁆𑀣𑁄.

𑁧𑁦𑁮. 𑀇𑀤𑀸𑀦𑀺 𑀧𑀝𑀺𑀕𑁆𑀕𑀳𑀡𑀯𑀺𑀚𑀳𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀺𑀓𑁆𑀔𑀸𑀫𑀭𑀡𑀮𑀺𑀗𑁆𑀕𑁂𑀳𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣𑀸𑀬𑀁 𑀧𑀺𑀡𑁆𑀟𑀢𑁆𑀣𑁄 𑁋 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂𑀦 𑀘 𑀫𑀭𑀡𑁂𑀦 𑀘 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑁂𑀦 𑀘 ‘‘𑀦 𑀢𑀁 𑀤𑀸𑀦𑀺 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀦 𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀯𑀸 𑀏𑀯𑀁 𑀅𑀦𑀧𑁂𑀓𑁆𑀔𑀯𑀺𑀲𑁆𑀲𑀚𑁆𑀚𑀦𑁂𑀦 𑀘 𑀘𑁄𑀭𑀸𑀤𑀻𑀳𑀺 𑀯𑀸 𑀅𑀘𑁆𑀙𑁂𑀤𑀸 𑀘 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀸𑀦𑀸 𑀘 𑀕𑀸𑀳𑁄 𑀧𑀝𑀺𑀕𑁆𑀕𑀸𑀳𑁄 𑀉𑀧𑀲𑀫𑁆𑀫𑀢𑀺 𑀯𑀺𑀚𑀳𑀢𑀻𑀢𑀺. 𑀪𑀺𑀓𑁆𑀔𑀼𑀦𑀺𑀬𑀸 𑀧𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀲𑁆𑀲 𑀅𑀪𑀸𑀯𑀸 𑀯𑀺𑀩𑁆𑀪𑀫𑀦𑁂𑀦 𑀘 𑀯𑀺𑀚𑀳𑀢𑀻𑀢𑀺 𑀕𑀳𑁂𑀢𑀩𑁆𑀩𑀁.

𑁧𑁦𑁯-𑁧𑁧𑁦.

.𑀇𑀤𑀸𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀁 𑀲𑀩𑁆𑀩’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 (𑀓𑀗𑁆𑀔𑀸. 𑀅𑀝𑁆𑀞. 𑀤𑀦𑁆𑀢𑀧𑁄𑀦𑀲𑀺𑀓𑁆𑀔𑀸𑀧𑀤) 𑁋 𑀘𑀢𑀼𑀓𑀸𑀮𑀺𑀓𑀧𑀭𑀺𑀬𑀸𑀧𑀦𑁆𑀦𑀁 𑀅𑀦𑁆𑀢𑀫𑀲𑁄 𑀭𑀚𑀭𑁂𑀡𑀼𑀫𑁆𑀧𑀺 𑀅𑀧𑁆𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀩𑁆𑀩𑀁 𑀧𑀭𑀺𑀪𑀼𑀜𑁆𑀚𑀢𑁄 𑀧𑀸𑀘𑀺𑀢𑁆𑀢𑀺. 𑀇𑀤𑀸𑀦𑀺 𑀅𑀧𑁆𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀤𑁆𑀥𑀜𑁆𑀘 𑀦𑀸𑀢𑀺𑀩𑀳𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀼𑀤𑁆𑀥𑀜𑁆𑀘𑀸𑀢𑀺 𑀅𑀜𑁆𑀜𑁂𑀲𑀁 𑀭𑀲𑁂𑀦 𑀅𑀲𑀫𑁆𑀫𑀺𑀲𑁆𑀲𑀁. 𑀳𑀺𑀫𑁄𑀤𑀓𑀲𑀫𑀼𑀤𑁆𑀤𑁄𑀤𑀓𑀸𑀤𑀻𑀲𑀼 𑀧𑀝𑀺𑀕𑁆𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀮𑁄𑀡𑀜𑁆𑀘 𑀅𑀲𑁆𑀲𑀼 𑀘 𑀮𑁄𑀡𑀲𑁆𑀲𑀼. 𑀏𑀢𑁆𑀣 𑀮𑁄𑀡𑀁 𑀦𑀸𑀫 𑀲𑀭𑀻𑀭𑁂 𑀉𑀝𑁆𑀞𑀺𑀢𑀁. 𑀏𑀢𑀸𑀦𑀺 𑀧𑀦 𑀲𑀩𑁆𑀩𑀸𑀦𑀺 𑀅𑀯𑀺𑀘𑁆𑀙𑀺𑀦𑁆𑀦𑀸𑀦𑁂𑀯 𑀓𑀧𑁆𑀧𑀦𑁆𑀢𑀺, 𑀦𑁂𑀢𑀭𑀸𑀦𑀺.

𑁧𑁧𑁧. 𑀇𑀤𑀸𑀦𑀺 𑀅𑀦𑀗𑁆𑀕𑀮𑀕𑁆𑀕𑀸𑀦𑀺𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀕𑀽𑀣𑀫𑀢𑁆𑀢𑀺𑀓𑀫𑀼𑀢𑁆𑀢𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀢𑀣𑀸𑀯𑀺𑀥𑁂𑀢𑀺 𑀢𑀣𑀸𑀯𑀺𑀥𑁂 𑀓𑀸𑀮𑁂, 𑀲𑀧𑁆𑀧𑀤𑀝𑁆𑀞𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀅𑀜𑁆𑀜𑁂𑀲𑀁 𑀧𑀦 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀁 𑀅𑀦𑀗𑁆𑀕𑀮𑀕𑁆𑀕𑀁 𑀦 𑀯𑀝𑁆𑀝𑀢𑀺. 𑀓𑀲𑁆𑀫𑀸? ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀁 𑀓𑀭𑁄𑀦𑁆𑀢𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀲𑁆𑀯𑁂𑀯 𑀧𑀝𑀺𑀕𑁆𑀕𑀳𑁄 𑀓𑀢𑁄, 𑀦 𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁨𑁬𑁮) 𑀯𑀼𑀢𑁆𑀢𑀢𑁆𑀢𑀸.

𑁧𑁧𑁨. 𑀤𑀼𑀭𑀽𑀧𑀘𑀺𑀡𑁆𑀡𑁂𑀢𑀺 𑀤𑀼𑀧𑁆𑀧𑀭𑀸𑀫𑀝𑁆𑀞𑁂 𑀨𑀮𑀺𑀓𑀭𑀼𑀓𑁆𑀔𑀯𑀮𑁆𑀮𑀺𑀆𑀤𑀺𑀁 𑀘𑀸𑀮𑁂𑀦𑁆𑀢𑀲𑁆𑀲 𑀯𑀸 𑀆𑀫𑀺𑀲𑀪𑀭𑀺𑀢𑀪𑀸𑀚𑀦𑀁 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀁 𑀧𑀭𑀸𑀫𑀲𑀦𑁆𑀢𑀲𑁆𑀲 𑀯𑀸 𑀤𑀼𑀭𑀽𑀧𑀘𑀺𑀡𑁆𑀡𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀭𑀚𑁄𑀓𑀺𑀡𑁆𑀡𑁂𑀢𑀺 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑀲𑁆𑀲 𑀧𑀢𑁆𑀢𑁂 𑀧𑀢𑀺𑀢𑀭𑀚𑀁 𑀅𑀧𑁆𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀼𑀦 𑀪𑀺𑀓𑁆𑀔𑀁 𑀕𑀡𑁆𑀳𑀢𑁄 𑀯𑀺𑀦𑀬𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣𑀼𑀕𑁆𑀕𑀳𑀧𑁆𑀧𑀝𑀺𑀕𑁆𑀕𑀳𑁂𑀢𑀺 𑀅𑀣 𑀉𑀕𑁆𑀕𑀳𑀧𑁆𑀧𑀝𑀺𑀕𑁆𑀕𑀳𑁂, 𑀅𑀢𑁆𑀢𑀦𑀸 𑀏𑀯 𑀉𑀕𑁆𑀕𑀳𑁂𑀢𑁆𑀯𑀸 𑀕𑀳𑀺𑀢𑁂𑀢𑀺 𑀅𑀢𑁆𑀣𑁄. 𑀅𑀓𑀧𑁆𑀧𑀺𑀬𑀓𑀼𑀝𑀺𑀬𑀁 𑀅𑀦𑁆𑀢𑁄𑀯𑀼𑀢𑁆𑀣𑁂 𑀘 𑀬𑀢𑁆𑀣 𑀓𑀢𑁆𑀣𑀘𑀺 𑀪𑀺𑀓𑁆𑀔𑀼𑀦𑀸 𑀲𑀬𑀁𑀧𑀓𑁆𑀓𑁂 𑀘 𑀅𑀢𑁆𑀢𑀦𑀸 𑀯𑀸 𑀧𑀭𑁂𑀦 𑀯𑀸 𑀅𑀓𑀧𑁆𑀧𑀺𑀬𑀓𑀼𑀝𑀺𑀬𑀁 𑀅𑀦𑁆𑀢𑁄𑀧𑀓𑁆𑀓𑁂 𑀘𑀸𑀢𑀺 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀝𑀺𑀕𑁆𑀕𑀸𑀳𑀯𑀺𑀦𑀺𑀘𑁆𑀙𑀬𑁄.

𑀧𑀝𑀺𑀕𑁆𑀕𑀸𑀳𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.