𑀔𑀼𑀤𑁆𑀤𑀲𑀺𑀓𑁆𑀔𑀸-𑀧𑀼𑀭𑀸𑀡𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀬𑁄 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁, 𑀯𑀺𑀤𑀺𑀢𑁆𑀯𑀸 𑀤𑀼𑀓𑁆𑀔𑀺𑀢𑀁 𑀚𑀦𑀁;

𑀢𑀣𑀸𑀧𑀺 𑀦𑀸𑀯𑀩𑀼𑀚𑁆𑀛𑀦𑁆𑀢𑀫𑀦𑀼𑀓𑀫𑁆𑀧𑀸𑀬 𑀘𑁄𑀤𑀺𑀢𑁄.

𑀩𑁄𑀥𑀸𑀬 𑀧𑀡𑀺𑀥𑀺𑀁 𑀓𑀢𑁆𑀯𑀸, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁;

𑀢𑀲𑁆𑀲 𑀧𑀸𑀤𑁂 𑀦𑀫𑀲𑁆𑀲𑀺𑀢𑁆𑀯𑀸, 𑀥𑀫𑁆𑀫𑀁 𑀲𑀗𑁆𑀖𑀜𑁆𑀘 𑀲𑀸𑀥𑀼𑀓𑀁.

𑀧𑀼𑀩𑁆𑀩𑀸𑀘𑀭𑀺𑀬𑀧𑀸𑀤𑁂𑀲𑀼, 𑀞𑀧𑁂𑀢𑁆𑀯𑀸 𑀲𑀻𑀲𑀫𑀢𑁆𑀢𑀦𑁄;

𑀣𑁂𑀭𑁂𑀦 𑀥𑀫𑁆𑀫𑀲𑀺𑀭𑀺𑀦𑀸, 𑀣𑀺𑀭𑀲𑀻𑀮𑁂𑀦 𑀬𑀸 𑀓𑀢𑀸.

‘‘𑀆𑀤𑀺𑀢𑁄 𑀉𑀧𑀲𑀫𑁆𑀧𑀦𑁆𑀦𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸;

𑀔𑀼𑀤𑁆𑀤𑀲𑀺𑀓𑁆𑀔𑀸 𑀲𑀫𑀸𑀲𑁂𑀦, 𑀢𑀲𑁆𑀲𑀸 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀁.

𑀮𑀺𑀔𑀺𑀲𑁆𑀲𑀸𑀫𑀺 𑀳𑀺𑀢𑀢𑁆𑀣𑀸𑀬, 𑀆𑀤𑀺𑀓𑀫𑁆𑀫𑀺𑀓𑀪𑀺𑀓𑁆𑀔𑀼𑀦𑀁;

𑀢𑀢𑁆𑀣 𑀬𑀼𑀢𑁆𑀢𑀁 𑀕𑀳𑁂𑀢𑀩𑁆𑀩𑀫𑀬𑀼𑀢𑁆𑀢𑀁 𑀢𑀼𑀚𑁆𑀛𑀺𑀢𑀩𑁆𑀩𑀓𑀦𑁆𑀢𑀺;

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸

(𑀓) 𑀏𑀢𑁆𑀣𑀸𑀳 𑁋 𑀓𑀢𑀫𑀸 𑀔𑀼𑀤𑁆𑀤𑀲𑀺𑀓𑁆𑀔𑀸, 𑀓𑀣𑀁 𑀲𑀺𑀓𑁆𑀔𑀺𑀢𑀩𑁆𑀩𑀸, 𑀓𑀲𑁆𑀫𑀸 𑀲𑀺𑀓𑁆𑀔𑀺𑀢𑀩𑁆𑀩𑀸, 𑀓𑁂 𑀲𑀺𑀓𑁆𑀔𑀦𑁆𑀢𑀺, 𑀓𑁂 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀥𑀺𑀲𑀻𑀮𑀅𑀥𑀺𑀘𑀺𑀢𑁆𑀢𑀅𑀥𑀺𑀧𑀜𑁆𑀜𑀸𑀯𑀲𑁂𑀦 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸, 𑀕𑀦𑁆𑀣𑀯𑀲𑁂𑀦𑁂𑀢𑁆𑀣 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀢𑀤𑁆𑀤𑀻𑀧𑀦𑁄 𑀕𑀦𑁆𑀣𑁄 ‘‘𑀔𑀼𑀤𑁆𑀤𑀲𑀺𑀓𑁆𑀔𑀸’’𑀢𑀺 𑀯𑀼𑀘𑁆𑀘𑀢𑀺, 𑀅𑀣 𑀯𑀸 ‘‘𑀔𑀼𑀤𑁆𑀤𑀁 𑀅𑀦𑁂𑀮𑀓𑀁 𑀫𑀥𑀼𑀧𑀝𑀮’’𑀦𑁆𑀢𑀺𑀆𑀤𑀻𑀦𑀺 𑀯𑀺𑀬 𑀲𑀺𑀓𑁆𑀔𑀸𑀓𑀸𑀫𑀸𑀦𑀁 𑀫𑀥𑀼𑀭𑀢𑀸𑀬 𑀔𑀼𑀤𑁆𑀤𑀸 𑀘 𑀢𑀸 𑀲𑀺𑀓𑁆𑀔𑀸 𑀘𑀸𑀢𑀺 𑀔𑀼𑀤𑁆𑀤𑀲𑀺𑀓𑁆𑀔𑀸, 𑀅𑀣 𑀯𑀸 ‘‘𑀔𑀼𑀤𑁆𑀤𑀧𑀼𑀢𑁆𑀢𑀫𑁆𑀳𑀺 𑀲𑀫𑀡 𑀧𑁄𑀲 𑀫’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀩𑀳𑀼𑀯𑀺𑀥𑀢𑁆𑀢𑀸𑀧𑀺 𑀔𑀼𑀤𑁆𑀤𑀸 𑀘 𑀢𑀸 𑀲𑀺𑀓𑁆𑀔𑀺𑀢𑀩𑁆𑀩𑀢𑁄 𑀲𑀺𑀓𑁆𑀔𑀸 𑀘𑀸𑀢𑀺 𑀔𑀼𑀤𑁆𑀤𑀲𑀺𑀓𑁆𑀔𑀸. 𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑀧𑀦𑁂𑀢𑁆𑀣 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀯𑀲𑁂𑀦 𑀤𑀼𑀯𑀺𑀥𑀫𑁆𑀧𑀺 𑀲𑀻𑀮𑀁 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂𑀦 𑀢𑀧𑁆𑀧𑀝𑀺𑀧𑀓𑁆𑀔𑁂 𑀓𑀺𑀮𑁂𑀲𑁂 𑀢𑀤𑀗𑁆𑀕𑀧𑁆𑀧𑀳𑀸𑀦𑀯𑀲𑁂𑀦 𑀧𑀚𑀳𑀦𑁆𑀢𑁂𑀦 𑀲𑀺𑀓𑁆𑀔𑀺𑀢𑀩𑁆𑀩𑀸, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸 𑀧𑀦 𑀬𑀣𑀸𑀯𑀼𑀢𑁆𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀅𑀪𑀺𑀬𑁄𑀕𑀓𑀭𑀡𑀯𑀲𑁂𑀦 𑀛𑀸𑀦𑀧𑁆𑀧𑀝𑀺𑀧𑀓𑁆𑀔𑀸𑀦𑀁 𑀦𑀻𑀯𑀭𑀡𑀕𑀡𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁 𑀓𑀼𑀭𑀼𑀫𑀸𑀦𑁂𑀦 𑀲𑀺𑀓𑁆𑀔𑀺𑀢𑀩𑁆𑀩𑀸, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸 𑀧𑀦 𑀬𑀣𑀸𑀦𑀼𑀭𑀽𑀧𑀁 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀲𑀸𑀦𑀼𑀲𑀬𑁂 𑀓𑀺𑀮𑁂𑀲𑁂 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑁂𑀦 𑀲𑀺𑀓𑁆𑀔𑀺𑀢𑀩𑁆𑀩𑀸.

𑀓𑀲𑁆𑀫𑀸 𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺 𑀏𑀢𑁆𑀣 𑁋

𑀚𑀸𑀢𑀺𑀆𑀤𑀻𑀳𑀺 𑀤𑀼𑀓𑁆𑀔𑁂𑀳𑀺, 𑀅𑀦𑁂𑀓𑁂𑀳𑀺 𑀉𑀧𑀤𑁆𑀤𑀼𑀢𑀁;

𑀔𑀦𑁆𑀥𑀮𑁄𑀓𑀁 𑀚𑀳𑀺𑀢𑁆𑀯𑀸𑀦, 𑀧𑀢𑁆𑀢𑀼𑀁 𑀔𑁂𑀫𑀁 𑀧𑀼𑀭𑀁 𑀲𑀺𑀯𑀁.

𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁂𑀦 𑀲𑀳 𑀲𑀢𑁆𑀢 𑀲𑁂𑀓𑁆𑀔𑀸 𑀲𑀺𑀓𑁆𑀔𑀦𑁆𑀢𑀺. 𑀅𑀭𑀳𑀦𑁆𑀢𑁄 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸.

𑀬𑁂 𑀯𑀻𑀢𑀫𑁄𑀳𑀸 𑀫𑀼𑀦𑀺𑀧𑀼𑀗𑁆𑀕𑀯𑀲𑁆𑀲;

𑀲𑀺𑀲𑁆𑀲𑁂𑀲𑀼 𑀅𑀕𑁆𑀕𑀸 𑀫𑀼𑀦𑀺𑀦𑀸 𑀧𑀲𑀢𑁆𑀣𑀸;

𑀢𑁂 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀲𑀫𑀢𑁆𑀢𑀲𑀺𑀓𑁆𑀔𑀸;

𑀢𑀢𑁄 𑀧𑀭𑁂 𑀓𑁂𑀦 𑀲𑀫𑀢𑁆𑀢𑀲𑀺𑀓𑁆𑀔𑀸𑀢𑀺.

𑀆𑀤𑀺𑀢𑁄𑀢𑀺 𑀏𑀢𑁆𑀣 𑀆𑀤𑀺𑀫𑁆𑀳𑀺𑀬𑁂𑀯𑀸𑀢𑀺 𑀅𑀢𑁆𑀣𑁄, 𑀆𑀤𑀺𑀢𑁄 𑀧𑀝𑁆𑀞𑀸𑀬𑀸𑀢𑀺 𑀯𑀸. 𑀉𑀧𑀲𑀫𑁆𑀧𑀦𑁆𑀦𑁂𑀦 𑀘 𑀉𑀧𑀲𑀫𑁆𑀧𑀦𑁆𑀦𑀸𑀬 𑀘 𑀲𑀺𑀓𑁆𑀔𑀺𑀢𑀩𑁆𑀩𑀁 𑀉𑀧𑀲𑀫𑁆𑀧𑀦𑁆𑀦𑀲𑀺𑀓𑁆𑀔𑀺𑀢𑀩𑁆𑀩𑀁. 𑀲𑀳 𑀫𑀸𑀢𑀺𑀓𑀸𑀬 𑀲𑀫𑀸𑀢𑀺𑀓𑀁. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀔𑀼𑀤𑁆𑀤𑀲𑀺𑀓𑁆𑀔𑀁 𑀧𑀯𑀓𑁆𑀔𑀸𑀫𑀺 𑀆𑀤𑀭𑁂𑀦, 𑀧𑀓𑀸𑀭𑁂𑀦 𑀯𑀸 𑀯𑀓𑁆𑀔𑀸𑀫𑀺 𑀭𑀢𑀦𑀢𑁆𑀢𑀬𑀁 𑀯𑀦𑁆𑀤𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀣𑁂𑀭𑁄 𑀆𑀤𑀺𑀢𑁄𑀢𑀺 𑀯𑀘𑀦𑁂𑀦 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀆𑀮𑀲𑀺𑀬𑀤𑁄𑀲𑁂𑀦 𑀅𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀁 𑀅𑀜𑁆𑀜𑀸𑀡𑀤𑁄𑀲𑁂𑀦 𑀅𑀜𑁆𑀜𑀣𑀸 𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀁 𑀲𑀁𑀯𑁂𑀕𑀁 𑀚𑀦𑁂𑀢𑀺. 𑀓𑀣𑀁? 𑀅𑀢𑀺𑀤𑀼𑀮𑁆𑀮𑀪𑀁 𑀔𑀡𑀲𑀫𑀯𑀸𑀬𑀁 𑀧𑀝𑀺𑀮𑀪𑀺𑀢𑁆𑀯𑀸 𑀢𑀗𑁆𑀔𑀡𑀁 𑀦 𑀓𑀼𑀲𑀻𑀢𑁂𑀦 𑀯𑀸 𑀦𑀺𑀭𑀢𑁆𑀣𑀓𑀓𑀣𑀸𑀧𑀲𑀼𑀢𑁂𑀦 𑀯𑀸 𑀯𑀻𑀢𑀺𑀦𑀸𑀫𑁂𑀢𑀩𑁆𑀩𑀁, 𑀓𑀺𑀁 𑀓𑀸𑀢𑀩𑁆𑀩𑀁? 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀦𑀺𑀭𑀦𑁆𑀢𑀭𑀫𑁂𑀯 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀆𑀤𑀭𑁄 𑀚𑀦𑁂𑀢𑀩𑁆𑀩𑁄𑀢𑀺. 𑀏𑀢𑁆𑀣𑀸𑀳 𑁋 𑀓𑀺𑀁 𑀢𑀁 𑀭𑀢𑀦𑀢𑁆𑀢𑀬𑀁 𑀦𑀸𑀫, 𑀬𑀁 𑀯𑀦𑁆𑀤𑀺𑀢𑁆𑀯𑀸 𑀣𑁂𑀭𑁄 𑀔𑀼𑀤𑁆𑀤𑀲𑀺𑀓𑁆𑀔𑀁 𑀧𑀯𑀓𑁆𑀔𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀩𑀼𑀤𑁆𑀥𑀭𑀢𑀦𑀁 𑀥𑀫𑁆𑀫𑀭𑀢𑀦𑀁 𑀲𑀗𑁆𑀖𑀭𑀢𑀦𑀦𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀭𑀢𑀦𑀸𑀦𑀺. 𑀢𑀸𑀦𑀺 𑀳𑀺 𑀭𑀢𑀺𑀚𑀦𑀦𑀝𑁆𑀞𑁂𑀦 ‘‘𑀭𑀢𑀦𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀧𑀺𑀘 𑁋

‘‘𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀜𑁆𑀘, 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁;

𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁, 𑀭𑀢𑀦𑀁 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺. (𑀤𑀻. 𑀦𑀻. 𑀅𑀝𑁆𑀞. 𑁨.𑁩𑁩; 𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁨𑁨𑁩; 𑀔𑀼. 𑀧𑀸. 𑀅𑀝𑁆𑀞. 𑁬.𑁩; 𑀲𑀼. 𑀦𑀺. 𑀅𑀝𑁆𑀞. 𑁧.𑁨𑁨𑁬; 𑀫𑀳𑀸𑀦𑀺. 𑀅𑀝𑁆𑀞. 𑁫𑁦; 𑀉𑀤𑀸. 𑀅𑀝𑁆𑀞. 𑁪𑁫) 𑁋

𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀯𑀲𑁂𑀦 𑀭𑀢𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀫𑀸𑀢𑀺𑀓𑀸𑀯𑀡𑁆𑀡𑀦𑀸

(𑀔-𑀚) 𑀇𑀤𑀸𑀦𑀺 ‘‘𑀲𑀫𑀸𑀢𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀫𑀸𑀢𑀺𑀓𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀭𑀸𑀚𑀺𑀓𑀸 𑀘 𑀘𑀢𑁆𑀢𑀸𑀭𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀲𑀩𑁆𑀩𑀲𑀺𑀓𑁆𑀔𑀸𑀦𑀁 𑀧𑀦 𑀫𑀽𑀮𑀪𑀽𑀢𑀢𑁆𑀢𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀯 𑀧𑀞𑀫𑀁 𑀯𑀼𑀢𑁆𑀢𑀸. ‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬𑀸’’𑀢𑀺 (𑀲𑀼𑀁. 𑀦𑀺. 𑁧.𑁧.𑁨𑁩, 𑁧𑁯𑁨; 𑀧𑁂𑀝𑀓𑁄. 𑁨𑁨; 𑀫𑀺. 𑀧. 𑁨.𑁧.𑁯) 𑀳𑀺 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀧𑀺 𑀫𑀳𑀸𑀲𑀸𑀯𑀚𑁆𑀚𑀢𑁆𑀢𑀸, 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀘 𑀲𑀩𑁆𑀩𑀧𑀞𑀫𑀁 𑀚𑀸𑀦𑀺𑀢𑀩𑁆𑀩𑀸𑀢𑀺 𑀧𑀸𑀭𑀸𑀚𑀺𑀓𑀸𑀯 𑀧𑀞𑀫𑀁 𑀯𑀼𑀢𑁆𑀢𑀸𑀢𑀺. 𑀇𑀤𑀸𑀦𑀺 𑀬𑀣𑀸𑀦𑀺𑀓𑁆𑀔𑀺𑀢𑁆𑀢𑀸𑀦𑀺 𑀫𑀸𑀢𑀺𑀓𑀸𑀧𑀤𑀸𑀦𑀺 𑀧𑀝𑀺𑀧𑀸𑀝𑀺𑀬𑀸 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀭𑀸𑀚𑀺𑀓𑀸 𑀘 𑀘𑀢𑁆𑀢𑀸𑀭𑁄’’𑀢𑀺 𑀧𑀞𑀫𑀧𑀤𑀁 𑀉𑀤𑁆𑀥𑀝𑀁, 𑀢𑀲𑁆𑀲𑀸𑀬𑀫𑀢𑁆𑀣𑁄 𑁋 𑀧𑀸𑀭𑀸𑀚𑀺𑀓𑀸𑀢𑀺 𑀧𑀭𑀸𑀚𑀺𑀢𑀸 𑀧𑀭𑀸𑀚𑀬𑀫𑀸𑀧𑀦𑁆𑀦𑀸, 𑀲𑀺𑀓𑁆𑀔𑀸𑀧𑀤𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑁂𑀦𑁂𑀯 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸, 𑀢𑀸𑀬 𑀯𑀸 𑀧𑀭𑀸𑀚𑀬𑀫𑀸𑀧𑀸𑀤𑀺𑀢𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁, 𑀢𑁂 𑀧𑀦 𑀘𑀢𑁆𑀢𑀸𑀭𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧. 𑀧𑀸𑀭𑀸𑀚𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧-𑁨. 𑀇𑀤𑀸𑀦𑀺 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀫𑀕𑁆𑀕𑀢𑁆𑀢𑀬𑁂’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀯𑀲𑁂𑀦 𑀢𑀺𑀲𑁆𑀲𑁄 𑀇𑀢𑁆𑀣𑀺𑀬𑁄, 𑀢𑀬𑁄 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸, 𑀢𑀬𑁄 𑀧𑀡𑁆𑀟𑀓𑀸, 𑀢𑀬𑁄 𑀧𑀼𑀭𑀺𑀲𑀸𑀢𑀺 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑀸𑀦𑀁 𑀦𑀺𑀫𑀺𑀢𑁆𑀢𑀸𑀦𑀁 𑀦𑀺𑀲𑁆𑀲𑀬𑀸 𑀤𑁆𑀯𑀸𑀤𑀲𑀫𑀢𑁆𑀢𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀯𑀘𑁆𑀘𑀫𑀕𑁆𑀕𑀧𑁆𑀧𑀲𑁆𑀲𑀸𑀯𑀫𑀕𑁆𑀕𑀫𑀼𑀔𑀫𑀕𑁆𑀕𑀯𑀲𑁂𑀦 𑀢𑀬𑁄 𑀫𑀕𑁆𑀕𑀸. 𑀢𑀢𑁆𑀣 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀢𑀬𑁄, 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀢𑀬𑁄, 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸 𑀢𑀬𑁄𑀢𑀺 𑀦𑀯, 𑀢𑀣𑀸 𑀫𑀦𑀼𑀲𑁆𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀤𑀻𑀦𑀁. 𑀫𑀦𑀼𑀲𑁆𑀲𑀧𑀡𑁆𑀟𑀓𑀸𑀤𑀻𑀦𑀁 𑀧𑀦 𑀯𑀘𑁆𑀘𑀫𑀕𑁆𑀕𑀫𑀼𑀔𑀫𑀕𑁆𑀕𑀯𑀲𑁂𑀦 𑀤𑁆𑀯𑁂 𑀤𑁆𑀯𑁂 𑀓𑀢𑁆𑀯𑀸 𑀙, 𑀢𑀣𑀸 𑀫𑀦𑀼𑀲𑁆𑀲𑀧𑀼𑀭𑀺𑀲𑀸𑀤𑀻𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀯𑀲𑁂𑀦 𑀢𑀺𑀁𑀲 𑀫𑀕𑁆𑀕𑀸 𑀳𑁄𑀦𑁆𑀢𑀺. 𑀢𑁂 𑀲𑀩𑁆𑀩𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀇𑀥 ‘‘𑀫𑀕𑁆𑀕𑀢𑁆𑀢𑀬𑁂’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀺𑀁 𑀫𑀕𑁆𑀕𑀢𑁆𑀢𑀬𑁂𑀢𑀺 𑀅𑀢𑁆𑀣𑁄. 𑀅𑀦𑀺𑀓𑁆𑀔𑀺𑀢𑁆𑀢𑀲𑀺𑀓𑁆𑀔𑁄𑀢𑀺 𑀪𑀺𑀓𑁆𑀔𑀼𑀪𑀸𑀯𑀢𑁄 𑀘𑀯𑀺𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑁂𑀦 𑀬𑀣𑀸𑀮𑀓𑁆𑀔𑀡𑀁 𑀅𑀧𑀘𑁆𑀘𑀓𑁆𑀔𑀸𑀢𑀲𑀺𑀓𑁆𑀔𑁄𑀢𑀺 𑀅𑀢𑁆𑀣𑁄. 𑀲𑀦𑁆𑀣𑀢𑀲𑀦𑁆𑀣𑀢𑁂𑀢𑀺 𑀯𑀢𑁆𑀣𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀲𑀦𑁆𑀣𑀢𑁂 𑀯𑀸 𑀅𑀲𑀦𑁆𑀣𑀢𑁂 𑀯𑀸. 𑀅𑀮𑁆𑀮𑁄𑀓𑀸𑀲𑁂𑀢𑀺 𑀫𑀕𑁆𑀕𑀢𑁆𑀢𑀬𑀲𑁆𑀲 𑀧𑀓𑀢𑀺𑀯𑀸𑀢𑁂𑀦 𑀅𑀲𑀫𑁆𑀨𑀼𑀝𑁆𑀞𑀧𑁆𑀧𑀤𑁂𑀲𑁂. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀗𑁆𑀕𑀚𑀸𑀢𑀁. 𑀲𑀁𑀲𑀦𑁆𑀣𑀢𑀁 𑀯𑀸 𑀅𑀲𑀦𑁆𑀣𑀢𑀁 𑀯𑀸𑀢𑀺 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁 𑀯𑀢𑁆𑀣𑀸𑀤𑀻𑀦𑀁 𑀅𑀜𑁆𑀜𑀢𑀭𑁂𑀦 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁 𑀯𑀸. 𑀉𑀧𑀸𑀤𑀺𑀡𑁆𑀡𑀦𑁆𑀢𑀺 𑀅𑀦𑀝𑁆𑀞𑀓𑀸𑀬𑀧𑁆𑀧𑀲𑀸𑀤𑀁. 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀫𑀕𑁆𑀕𑀢𑁆𑀢𑀬𑁂 𑀧𑀯𑁂𑀲𑀦𑁆𑀢𑁄 𑀘𑀼𑀢𑁄 𑀧𑀸𑀭𑀸𑀚𑀺𑀓𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀝𑁆𑀞𑀓𑀸𑀬𑀧𑁆𑀧𑀲𑀸𑀤𑀁 𑀧𑀦 𑀧𑀻𑀴𑀓𑀁 𑀯𑀸 𑀘𑀫𑁆𑀫𑀔𑀺𑀮𑀁 𑀯𑀸 𑀮𑁄𑀫𑀁 𑀯𑀸 𑀧𑀯𑁂𑀲𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀫𑀦𑀼𑀲𑁆𑀲𑀸𑀦𑀁 𑀧𑀦 𑀚𑀻𑀯𑀫𑀸𑀦𑀓𑀲𑀭𑀻𑀭𑁂 𑀅𑀓𑁆𑀔𑀺𑀦𑀸𑀲𑀸𑀓𑀡𑁆𑀡𑀘𑁆𑀙𑀺𑀤𑁆𑀤𑀯𑀢𑁆𑀣𑀺𑀓𑁄𑀲𑁂𑀲𑀼 𑀲𑀢𑁆𑀣𑀓𑀸𑀤𑀻𑀳𑀺 𑀓𑀢𑀯𑀡𑁂 𑀯𑀸 𑀫𑁂𑀣𑀼𑀦𑀭𑀸𑀕𑁂𑀦 𑀢𑀺𑀮𑀩𑀻𑀚𑀫𑀢𑁆𑀢𑀫𑁆𑀧𑀺 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁, 𑀅𑀯𑀲𑁂𑀲𑀲𑀭𑀻𑀭𑁂𑀲𑀼 𑀉𑀧𑀓𑀘𑁆𑀙𑀓𑀸𑀤𑀻𑀲𑀼 𑀘 𑀤𑀼𑀓𑁆𑀓𑀝𑀁. 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀳𑀢𑁆𑀣𑀺𑀅𑀲𑁆𑀲𑀕𑁄𑀡𑀕𑀤𑁆𑀭𑀪𑀑𑀝𑁆𑀞𑀫𑀳𑀺𑀁𑀲𑀸𑀤𑀻𑀦𑀁 𑀦𑀸𑀲𑀸𑀬 𑀣𑀼𑀮𑁆𑀮𑀘𑁆𑀘𑀬𑀁, 𑀢𑀣𑀸 𑀢𑁂𑀲𑀁 𑀯𑀢𑁆𑀣𑀺𑀓𑁄𑀲𑁂𑀲𑀼. 𑀲𑀩𑁆𑀩𑁂𑀲𑀫𑁆𑀧𑀺 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀅𑀓𑁆𑀔𑀺𑀓𑀡𑁆𑀡𑀯𑀡𑁂𑀲𑀼 𑀤𑀼𑀓𑁆𑀓𑀝𑀁, 𑀢𑀣𑀸 𑀢𑁂𑀲𑀁 𑀅𑀯𑀲𑁂𑀲𑀲𑀭𑀻𑀭𑁂𑀲𑀼𑀧𑀺.

𑀇𑀤𑀸𑀦𑀺 𑀧𑀯𑁂𑀲𑀦𑀁 𑀦𑀸𑀫 𑀦 𑀓𑁂𑀯𑀮𑀁 𑀅𑀢𑁆𑀢𑀼𑀧𑀓𑁆𑀓𑀫𑁂𑀦𑁂𑀯 𑀳𑁄𑀢𑀺, 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸𑀤𑀻𑀦𑀁 𑀧𑀦 𑀯𑀲𑁂𑀦 𑀧𑀭𑀽𑀧𑀓𑁆𑀓𑀫𑁂𑀦𑀸𑀧𑀺 𑀳𑁄𑀢𑀺, 𑀢𑀢𑁆𑀣𑀸𑀧𑀺 𑀲𑁂𑀯𑀦𑀘𑀺𑀢𑁆𑀢𑁂 𑀲𑀢𑀺 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀪𑀺𑀓𑁆𑀔𑀼 𑀧𑀯𑁂𑀲𑀦𑀧𑀯𑀺𑀝𑁆𑀞𑀞𑀺𑀢𑀉𑀤𑁆𑀥𑀸𑀭𑀡𑀓𑁆𑀔𑀡𑁂𑀲𑀼 𑀲𑀸𑀤𑀺𑀬𑀢𑀺, 𑀢𑀲𑁆𑀫𑀺𑀁 𑀔𑀡𑁂 𑀲𑁂𑀯𑀦𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑀺, 𑀲𑁄𑀧𑀺 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀬𑁄 𑀧𑀦 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀅𑀲𑀸𑀤𑀺𑀬𑀦𑁆𑀢𑁄 𑀆𑀲𑀻𑀯𑀺𑀲𑀫𑀼𑀔𑀁 𑀅𑀗𑁆𑀕𑀸𑀭𑀓𑀸𑀲𑀼𑀜𑁆𑀘 𑀧𑀯𑀺𑀝𑁆𑀞𑀁 𑀯𑀺𑀬 𑀫𑀜𑁆𑀜𑀢𑀺, 𑀲𑁄 𑀦𑀺𑀧𑁆𑀧𑀭𑀸𑀥𑁄 𑀳𑁄𑀢𑀺. 𑀏𑀢𑁆𑀣 𑀞𑀺𑀢𑀁 𑀦𑀸𑀫 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀫𑀬𑀧𑁆𑀧𑀯𑀢𑁆𑀢𑀺.

𑀧𑀞𑀫𑀁.

𑁩-𑁪. 𑀇𑀤𑀸𑀦𑀺 𑀤𑀼𑀢𑀺𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀆𑀤𑀺𑀬𑁂𑀬𑁆𑀬𑀸’’𑀢𑀺𑀆𑀤𑀺𑀫𑀸𑀳. ‘‘𑀆𑀤𑀺𑀬𑁂𑀬𑁆𑀬𑀸’’𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 ‘‘𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀪𑀯𑁂 𑀧𑀸𑀭𑀸𑀚𑀺𑀓𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀆𑀤𑀺𑀬𑁂𑀬𑁆𑀬𑀸𑀢𑀺 𑀆𑀭𑀸𑀫𑀸𑀤𑀺𑀁 𑀅𑀪𑀺𑀬𑀼𑀜𑁆𑀚𑀺𑀢𑁆𑀯𑀸 𑀬𑁄 𑀪𑀺𑀓𑁆𑀔𑀼 𑀕𑀡𑁆𑀳𑁂𑀬𑁆𑀬, 𑀲𑁄 𑀪𑀯𑁂 𑀧𑀸𑀭𑀸𑀚𑀺𑀓𑁄𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀳𑀭𑁂𑀬𑁆𑀬𑀸𑀢𑀺 𑀯𑁂𑀢𑀦𑁂𑀦 𑀯𑀸 𑀫𑀺𑀢𑁆𑀢𑀪𑀸𑀯𑁂𑀦 𑀯𑀸 𑀅𑀜𑁆𑀜𑀲𑁆𑀲 𑀪𑀡𑁆𑀟𑀁 𑀳𑀭𑀦𑁆𑀢𑁄 𑀧𑀼𑀦 𑀣𑁂𑀬𑁆𑀬𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 ‘‘𑀲𑀻𑀲𑁂 𑀪𑀸𑀭𑀁 𑀣𑁂𑀬𑁆𑀬𑀘𑀺𑀢𑁆𑀢𑁄 𑀆𑀫𑀲𑀢𑀻’’𑀢𑀺𑀆𑀤𑀺𑀦𑀸 𑀕𑀡𑁆𑀳𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀯𑀳𑀭𑁂𑀬𑁆𑀬𑀸𑀢𑀺 ‘‘𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀪𑀡𑁆𑀟𑀁 ‘𑀤𑁂𑀳𑀺 𑀫𑁂 𑀪𑀡𑁆𑀟’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁄 ‘𑀦𑀸𑀳𑀁 𑀕𑀡𑁆𑀳𑀸𑀫𑀻’’𑀢𑀺𑀆𑀤𑀺𑀦𑀸 𑀅𑀯𑀳𑀭𑁂𑀬𑁆𑀬. 𑀇𑀭𑀺𑀬𑀸𑀧𑀣𑀁 𑀓𑁄𑀧𑁂𑀬𑁆𑀬𑀸𑀢𑀺 ‘‘𑀲𑀳𑀪𑀡𑁆𑀟𑀳𑀸𑀭𑀓𑀁 𑀦𑁂𑀲𑁆𑀲𑀸𑀫𑀻’’𑀢𑀺 𑀢𑁂𑀦𑁂𑀯 𑀧𑀼𑀭𑀺𑀲𑁂𑀦 𑀢𑀁 𑀦𑁂𑀢𑀼𑀁 𑀢𑀲𑁆𑀲 𑀕𑀫𑀦𑀧𑀣𑀁 𑀯𑀸𑀭𑁂𑀢𑁆𑀯𑀸 𑀅𑀜𑁆𑀜𑁂𑀦 𑀫𑀕𑁆𑀕𑁂𑀦 𑀢𑀁 𑀲𑀦𑁆𑀢𑀚𑁆𑀚𑁂𑀢𑁆𑀯𑀸 𑀦𑁂𑀢𑀺, 𑀏𑀯𑀁 𑀦𑁂𑀦𑁆𑀢𑀲𑁆𑀲 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀞𑀫𑀧𑀸𑀤𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀤𑀼𑀢𑀺𑀬𑀧𑀸𑀤𑀼𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓𑀁. ‘‘𑀣𑀮𑀝𑁆𑀞𑀁 𑀪𑀡𑁆𑀟𑀁 𑀣𑁂𑀬𑁆𑀬𑀘𑀺𑀢𑁆𑀢𑁄 𑀆𑀫𑀲𑀢𑀻’’𑀢𑀺𑀆𑀤𑀺𑀦𑀸 𑀞𑀸𑀦𑀸 𑀘𑀸𑀯𑁂𑀬𑁆𑀬. 𑀧𑀭𑀺𑀓𑀧𑁆𑀧𑀺𑀢𑀝𑁆𑀞𑀸𑀦𑀁 𑀯𑀸 𑀲𑀼𑀗𑁆𑀓𑀖𑀸𑀢𑀁 𑀯𑀸 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑁄 𑀲𑀗𑁆𑀓𑁂𑀢𑀁 𑀯𑀻𑀢𑀺𑀦𑀸𑀫𑁂𑀬𑁆𑀬. 𑀬𑀁 𑀓𑀺𑀜𑁆𑀘𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑀁 𑀲𑀲𑁆𑀲𑀸𑀫𑀺𑀓𑀁 𑀪𑀡𑁆𑀟𑀁 𑀢𑁂𑀳𑀺 𑀲𑀸𑀫𑀺𑀓𑁂𑀳𑀺 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀦 𑀤𑀺𑀦𑁆𑀦𑀦𑁆𑀢𑀺 𑀅𑀤𑀺𑀦𑁆𑀦𑀁.

𑀇𑀤𑀸𑀦𑀺 𑀦 𑀇𑀫𑀺𑀦𑀸𑀯 𑀆𑀓𑀸𑀭𑁂𑀦 𑀅𑀯𑀳𑀸𑀭𑀓𑁄 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺, 𑀅𑀜𑁆𑀜𑀣𑀸𑀧𑀺 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀣𑁂𑀬𑁆𑀬𑀸𑀯𑀳𑀸𑀭𑀓𑁄 𑀘 𑀩𑀮𑀸𑀯𑀳𑀸𑀭𑀓𑁄 𑀘 𑀓𑀼𑀲𑀸𑀯𑀳𑀸𑀭𑀓𑁄 𑀘 𑀧𑀝𑀺𑀘𑁆𑀙𑀦𑁆𑀦𑀸𑀯𑀳𑀸𑀭𑀓𑁄 𑀘 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑀓𑁄 𑀘 𑀪𑀯𑁂 𑀧𑀸𑀭𑀸𑀚𑀺𑀓𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀣𑁂𑀬𑁆𑀬𑀸𑀯𑀳𑀸𑀭𑁄 𑀦𑀸𑀫 𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀻𑀳𑀺 𑀯𑀸 𑀓𑀁𑀲𑀓𑀽𑀝𑀫𑀸𑀦𑀓𑀽𑀝𑀢𑀼𑀮𑀸𑀓𑀽𑀝𑀸𑀤𑀻𑀳𑀺 𑀯𑀸 𑀯𑀜𑁆𑀘𑁂𑀢𑁆𑀯𑀸 𑀕𑀳𑀡𑀁. 𑀧𑀲𑀬𑁆𑀳𑀸𑀯𑀳𑀸𑀭𑁄 𑀩𑀮𑀸𑀯𑀳𑀸𑀭𑁄. 𑀓𑀼𑀲𑀲𑀗𑁆𑀓𑀫𑀦𑀁 𑀓𑀢𑁆𑀯𑀸 𑀧𑀭𑀓𑁄𑀝𑁆𑀞𑀸𑀲𑀕𑁆𑀕𑀳𑀡𑀁 𑀓𑀼𑀲𑀸𑀯𑀳𑀸𑀭𑁄. 𑀧𑀭𑀪𑀡𑁆𑀟𑀁 𑀧𑀁𑀲𑀼𑀆𑀤𑀺𑀦𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀲𑀸𑀫𑀺𑀓𑁂𑀲𑀼 𑀅𑀧𑀲𑁆𑀲𑀺𑀢𑁆𑀯𑀸 𑀕𑀢𑁂𑀲𑀼 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀕𑀳𑀡𑀁 𑀧𑀝𑀺𑀘𑁆𑀙𑀦𑁆𑀦𑀸𑀯𑀳𑀸𑀭𑁄. 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄 𑀧𑀦 𑀤𑀼𑀯𑀺𑀥𑁄 𑀪𑀡𑁆𑀟𑁄𑀓𑀸𑀲𑀯𑀲𑁂𑀦. 𑀢𑀢𑁆𑀣 ‘‘𑀲𑀸𑀝𑀓𑁄 𑀘𑁂, 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀲𑀼𑀢𑁆𑀢𑀜𑁆𑀘𑁂, 𑀦 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀪𑀡𑁆𑀟𑀁 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀅𑀦𑁆𑀥𑀓𑀸𑀭𑁂 𑀧𑀲𑀺𑀩𑁆𑀩𑀓𑀁 𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀘𑁂 𑀲𑀸𑀝𑀓𑁄 𑀳𑁄𑀢𑀺, 𑀉𑀤𑁆𑀥𑀸𑀭𑁂𑀬𑁂𑀯 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀲𑀼𑀢𑁆𑀢𑀁 𑀳𑁄𑀢𑀺, 𑀭𑀓𑁆𑀔𑀢𑀺, 𑀧𑀼𑀦 ‘‘𑀲𑀼𑀢𑁆𑀢’’𑀦𑁆𑀢𑀺 𑀜𑀢𑁆𑀯𑀸𑀧𑀺 ‘‘𑀬𑀁 𑀮𑀤𑁆𑀥𑀁, 𑀢𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀉𑀕𑁆𑀕𑀡𑁆𑀳𑀦𑁆𑀢𑁄 𑀉𑀤𑁆𑀥𑀸𑀭𑁂𑀬𑁂𑀯 𑀧𑀸𑀭𑀸𑀚𑀺𑀓𑀁, 𑀅𑀬𑀁 𑀪𑀡𑁆𑀟𑀧𑀭𑀺𑀓𑀧𑁆𑀧𑁄. 𑀑𑀓𑀸𑀲𑀧𑀭𑀺𑀓𑀧𑁆𑀧𑁄 𑀕𑀩𑁆𑀪𑀤𑁆𑀯𑀸𑀭𑀧𑁆𑀧𑀫𑀼𑀔𑀯𑀺𑀳𑀸𑀭𑀸𑀤𑀻𑀦𑀁 𑀯𑀲𑁂𑀦 𑀧𑀭𑀺𑀘𑁆𑀙𑁂𑀤𑀁 𑀓𑀭𑁄𑀢𑀺 ‘‘𑀲𑀘𑁂 𑀫𑀁 𑀏𑀢𑁆𑀣𑀦𑁆𑀢𑀭𑁂 𑀧𑀲𑁆𑀲𑀦𑁆𑀢𑀺, 𑀤𑀲𑁆𑀲𑀸𑀫𑀺, 𑀦𑁄 𑀘𑁂 𑀧𑀲𑁆𑀲𑀦𑁆𑀢𑀺, 𑀕𑀡𑁆𑀳𑀺𑀢𑁆𑀯𑀸 𑀕𑀘𑁆𑀙𑀸𑀫𑀻’’𑀢𑀺, 𑀢𑀲𑁆𑀲 𑀢𑀁 𑀧𑀭𑀺𑀓𑀧𑁆𑀧𑀺𑀢𑀧𑀭𑀺𑀘𑁆𑀙𑁂𑀤𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀧𑀤𑀯𑀸𑀭𑁂𑀦 𑀧𑀸𑀭𑀸𑀚𑀺𑀓𑀁 𑀯𑁂𑀤𑀺𑀢𑀩𑁆𑀩𑀁, 𑀅𑀬𑀁 𑀑𑀓𑀸𑀲𑀧𑀭𑀺𑀓𑀧𑁆𑀧𑁄.

𑀇𑀤𑀸𑀦𑀺 𑀇𑀫𑀲𑁆𑀫𑀺𑀁 𑀅𑀤𑀺𑀦𑁆𑀦𑀸𑀤𑀸𑀦𑁂 𑀯𑀺𑀦𑀺𑀘𑁆𑀙𑀬𑀦𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀡𑁆𑀟𑀓𑀸𑀮𑀕𑁆𑀖𑀤𑁂𑀲𑁂𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣𑀸𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑁂. 𑀦𑀺𑀘𑁆𑀙𑀬𑁄𑀢𑀺 𑀯𑀺𑀦𑀺𑀘𑁆𑀙𑀬𑁄 𑀓𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀓𑁂𑀦𑀘𑀺 𑀪𑀺𑀓𑁆𑀔𑀼𑀦𑀸 ‘‘𑀫𑀬𑀸 𑀇𑀤𑀁 𑀦𑀸𑀫 𑀪𑀡𑁆𑀟𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀳𑀺𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀯𑀺𑀦𑀬𑀥𑀭𑁂𑀦 𑀲𑀳𑀲𑀸𑀯 𑀢𑀁 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀢𑀲𑁆𑀲 𑀪𑀡𑁆𑀟𑀲𑁆𑀲 𑀲𑀸𑀫𑀺𑀓𑀅𑀲𑁆𑀲𑀸𑀫𑀺𑀓𑀪𑀸𑀯𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀬𑀤𑀺 𑀲𑀲𑁆𑀲𑀸𑀫𑀺𑀓𑀁, 𑀢𑀲𑁆𑀲 𑀪𑀡𑁆𑀟𑀲𑁆𑀲 𑀅𑀕𑁆𑀖𑀯𑀲𑁂𑀦 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄. 𑀲𑀘𑁂 𑀦𑀺𑀭𑀸𑀮𑀬𑀓𑀸𑀮𑁂 𑀕𑀳𑀺𑀢𑀁, 𑀧𑀸𑀭𑀸𑀚𑀺𑀓𑁂𑀦 𑀦 𑀓𑀸𑀭𑁂𑀢𑀩𑁆𑀩𑁄, 𑀅𑀬𑀁 𑀪𑀡𑁆𑀟𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑁄.

𑀓𑀸𑀮𑁄𑀢𑀺 𑀅𑀯𑀳𑀸𑀭𑀓𑀸𑀮𑁄. 𑀢𑀤𑁂𑀯 𑀳𑀺 𑀪𑀡𑁆𑀟𑀁 𑀓𑀤𑀸𑀘𑀺 𑀫𑀳𑀕𑁆𑀖𑀁 𑀳𑁄𑀢𑀺, 𑀓𑀤𑀸𑀘𑀺 𑀅𑀧𑁆𑀧𑀕𑁆𑀖𑀁, 𑀢𑀲𑁆𑀫𑀸 𑀬𑀲𑁆𑀫𑀺𑀁 𑀓𑀸𑀮𑁂 𑀅𑀯𑀳𑀝𑀁, 𑀢𑀲𑁆𑀫𑀺𑀁 𑀓𑀸𑀮𑁂 𑀬𑁄 𑀢𑀲𑁆𑀲 𑀅𑀕𑁆𑀖𑁄, 𑀢𑁂𑀦 𑀅𑀕𑁆𑀖𑁂𑀦 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄, 𑀅𑀬𑀁 𑀓𑀸𑀮𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑁄.

𑀅𑀕𑁆𑀖𑁄𑀢𑀺 𑀪𑀡𑁆𑀟𑀕𑁆𑀖𑁄. 𑀦𑀯𑀪𑀡𑁆𑀟𑀲𑁆𑀲 𑀳𑀺 𑀬𑁄 𑀅𑀕𑁆𑀖𑁄, 𑀲𑁄 𑀧𑀘𑁆𑀙𑀸 𑀧𑀭𑀺𑀳𑀸𑀬𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀤𑀸 𑀪𑀡𑁆𑀟𑀁 𑀧𑀓𑀢𑀺𑀅𑀕𑁆𑀖𑀯𑀲𑁂𑀦𑁂𑀯 𑀦 𑀓𑀸𑀭𑁂𑀢𑀩𑁆𑀩𑀁, 𑀅𑀬𑀁 𑀅𑀕𑁆𑀖𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑁄. 𑀤𑁂𑀲𑁄𑀢𑀺 𑀅𑀯𑀳𑀸𑀭𑀤𑁂𑀲𑁄. 𑀪𑀡𑁆𑀟𑀼𑀝𑁆𑀞𑀸𑀦𑀤𑁂𑀲𑁂 𑀳𑀺 𑀪𑀡𑁆𑀟𑀁 𑀅𑀧𑁆𑀧𑀕𑁆𑀖𑀁 𑀳𑁄𑀢𑀺, 𑀅𑀜𑁆𑀜𑀢𑁆𑀣 𑀫𑀳𑀕𑁆𑀖𑀁, 𑀢𑀲𑁆𑀫𑀸 𑀬𑀲𑁆𑀫𑀺𑀁 𑀤𑁂𑀲𑁂 𑀪𑀡𑁆𑀟𑀁 𑀅𑀯𑀳𑀝𑀁, 𑀢𑀲𑁆𑀫𑀺𑀁𑀬𑁂𑀯 𑀤𑁂𑀲𑁂 𑀅𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄, 𑀅𑀬𑀁 𑀤𑁂𑀲𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑁄.

𑀧𑀭𑀺𑀪𑁄𑀕𑁂𑀦𑀧𑀺 𑀲𑀸𑀝𑀓𑀸𑀤𑀺𑀓𑀲𑁆𑀲 𑀪𑀡𑁆𑀟𑀲𑁆𑀲 𑀅𑀕𑁆𑀖𑁄 𑀧𑀭𑀺𑀳𑀸𑀬𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀧𑀭𑀺𑀪𑁄𑀕𑀯𑀲𑁂𑀦 𑀧𑀭𑀺𑀳𑀻𑀦𑀸𑀧𑀭𑀺𑀳𑀻𑀦𑀪𑀸𑀯𑁄 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄, 𑀅𑀬𑀁 𑀧𑀭𑀺𑀪𑁄𑀕𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑁄.

𑀤𑀼𑀢𑀺𑀬𑀁.

𑁫. 𑀇𑀤𑀸𑀦𑀺 𑀢𑀢𑀺𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀦𑀼𑀲𑁆𑀲𑀯𑀺𑀕𑁆𑀕𑀳’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀁 𑀓𑀮𑀮𑀭𑀽𑀧𑀁 𑀆𑀤𑀺𑀁 𑀓𑀢𑁆𑀯𑀸 𑀧𑀓𑀢𑀺𑀬𑀸 𑀯𑀻𑀲𑀢𑀺𑀯𑀲𑁆𑀲𑀲𑀢𑀸𑀬𑀼𑀓𑀲𑁆𑀲 𑀲𑀢𑁆𑀢𑀲𑁆𑀲 𑀬𑀸𑀯 𑀫𑀭𑀡𑀓𑀸𑀮𑀸 𑀏𑀢𑁆𑀣𑀦𑁆𑀢𑀭𑁂 𑀅𑀦𑀼𑀧𑀼𑀩𑁆𑀩𑁂𑀦 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀅𑀢𑁆𑀢𑀪𑀸𑀯𑁄, 𑀏𑀲𑁄 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄 𑀦𑀸𑀫, 𑀏𑀯𑀭𑀽𑀧𑀁 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀦𑁆𑀢𑀺 𑀅𑀢𑁆𑀣𑁄. 𑀘𑀺𑀘𑁆𑀘𑀸𑀢𑀺 𑀯𑀥𑀓𑀘𑁂𑀢𑀦𑀸𑀯𑀲𑁂𑀦 𑀲𑀜𑁆𑀘𑁂𑀢𑁂𑀢𑁆𑀯𑀸 𑀧𑀓𑀧𑁆𑀧𑁂𑀢𑁆𑀯𑀸 𑀅𑀪𑀺𑀯𑀺𑀢𑀭𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑁄𑀢𑀺 𑀅𑀢𑁆𑀣𑁄. 𑀚𑀻𑀯𑀺𑀢𑀸 𑀯𑀸 𑀯𑀺𑀬𑁄𑀚𑀬𑁂𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀁 𑀓𑀮𑀮𑀓𑀸𑀮𑁂𑀧𑀺 𑀢𑀸𑀧𑀦𑀫𑀤𑁆𑀤𑀦𑁂𑀳𑀺 𑀯𑀸 𑀪𑁂𑀲𑀚𑁆𑀚𑀲𑀫𑁆𑀧𑀤𑀸𑀦𑁂𑀦 𑀯𑀸 𑀢𑀢𑁄 𑀯𑀸 𑀉𑀤𑁆𑀥𑀫𑁆𑀧𑀺 𑀢𑀤𑀦𑀼𑀭𑀽𑀧𑁂𑀦 𑀉𑀧𑀓𑁆𑀓𑀫𑁂𑀦 𑀲𑀦𑁆𑀢𑀢𑀺𑀯𑀺𑀓𑁄𑀧𑀦𑀯𑀲𑁂𑀦 𑀬𑁄 𑀚𑀻𑀯𑀺𑀢𑀸 𑀯𑀺𑀬𑁄𑀚𑁂𑀬𑁆𑀬, 𑀲𑁄 𑀘𑀼𑀢𑁄 𑀪𑀯𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 ‘‘𑀲𑀢𑁆𑀣𑀳𑀸𑀭𑀓𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀳𑀭𑀢𑀻𑀢𑀺 𑀳𑀸𑀭𑀓𑀁, 𑀓𑀺𑀁 𑀳𑀭𑀢𑀺? 𑀚𑀻𑀯𑀺𑀢𑀁, 𑀳𑀭𑀺𑀢𑀩𑁆𑀩𑀦𑁆𑀢𑀺 𑀯𑀸 𑀳𑀸𑀭𑀓𑀁, 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄, 𑀲𑀢𑁆𑀣𑀜𑁆𑀘 𑀢𑀁 𑀳𑀸𑀭𑀓𑀜𑁆𑀘𑀸𑀢𑀺 𑀲𑀢𑁆𑀣𑀳𑀸𑀭𑀓𑀁. 𑀅𑀲𑁆𑀲𑀸𑀢𑀺 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀲𑁆𑀲. 𑀬𑀣𑀸 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀢𑀁 𑀅𑀲𑀺𑀆𑀤𑀺𑀲𑀢𑁆𑀣𑀁 𑀧𑀝𑀺𑀮𑀪𑀢𑀺, 𑀢𑀣𑀸 𑀲𑀬𑀁 𑀫𑀭𑀡𑀘𑁂𑀢𑀦𑁄 𑀫𑀭𑀡𑀸𑀥𑀺𑀧𑁆𑀧𑀸𑀬𑁄 𑀳𑀼𑀢𑁆𑀯𑀸 𑀉𑀧𑀦𑀺𑀓𑁆𑀔𑀺𑀧𑁂𑀬𑁆𑀬. 𑀲𑁄𑀧𑀺 𑀘𑀼𑀢𑁄 𑀪𑀯𑁂𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀣𑀸𑀯𑀭𑀧𑁆𑀧𑀬𑁄𑀕𑀁 𑀤𑀲𑁆𑀲𑁂𑀢𑀺.

𑁬-𑁭. 𑀇𑀤𑀸𑀦𑀺 ‘‘𑀫𑀭𑀡𑀯𑀡𑁆𑀡𑀁 𑀯𑀸 𑀲𑀁𑀯𑀡𑁆𑀡𑁂𑀬𑁆𑀬𑀸’’𑀢𑀺𑀆𑀤𑀺𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀕𑀸𑀳𑁂𑀬𑁆𑀬 𑀫𑀭𑀡𑀽𑀧𑀸𑀬𑀁, 𑀯𑀤𑁂𑀬𑁆𑀬 𑀫𑀭𑀡𑁂 𑀕𑀼𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀲𑀢𑁆𑀣𑀁 𑀯𑀸 𑀆𑀳𑀭, 𑀯𑀺𑀲𑀁 𑀯𑀸 𑀔𑀸𑀤, 𑀭𑀚𑁆𑀚𑀼𑀬𑀸 𑀯𑀸 𑀉𑀩𑁆𑀩𑀦𑁆𑀥𑀺𑀢𑁆𑀯𑀸 𑀓𑀸𑀮𑀁 𑀓𑀭𑁄𑀳𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀭𑀡𑀢𑁆𑀣𑀸𑀬 𑀉𑀧𑀸𑀬𑀁 𑀕𑀸𑀳𑁂𑀬𑁆𑀬. 𑀫𑀭𑀡𑀲𑀁𑀯𑀡𑁆𑀡𑀦𑀸 𑀧𑀦𑁂𑀢𑁆𑀣 𑀩𑀳𑀼𑀯𑀺𑀥𑀸 ‘‘𑀓𑀸𑀬𑁂𑀦 𑀲𑀁𑀯𑀡𑁆𑀡𑁂𑀢𑀺, 𑀯𑀸𑀘𑀸𑀬 𑀓𑀸𑀬𑀯𑀸𑀘𑀸𑀬 𑀤𑀽𑀢𑁂𑀦 𑀮𑁂𑀔𑀸𑀬 𑀯𑀸 𑀲𑀁𑀯𑀡𑁆𑀡𑁂𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀢𑀢𑁆𑀣 𑀓𑀸𑀬𑁂𑀦 𑀲𑀁𑀯𑀡𑁆𑀡𑁂𑀢𑀺 𑀦𑀸𑀫 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀺. ‘‘𑀬𑁄 𑀧𑀧𑀸𑀢𑁂 𑀧𑀧𑀢𑀦𑀸𑀤𑀻𑀦𑀺 𑀓𑀢𑁆𑀯𑀸 𑀫𑀭𑀢𑀺, 𑀲𑁄 𑀥𑀦𑀁 𑀯𑀸 𑀮𑀪𑀢𑀺, 𑀬𑀲𑀁 𑀯𑀸 𑀮𑀪𑀢𑀺, 𑀲𑀕𑁆𑀕𑀁 𑀯𑀸 𑀕𑀘𑁆𑀙𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀁𑀯𑀡𑁆𑀡𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀓𑁄𑀘𑀺 ‘‘𑀫𑀭𑀺𑀲𑁆𑀲𑀸𑀫𑀻’’𑀢𑀺 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀫𑀭𑀢𑀺 𑀘𑁂, 𑀧𑀸𑀭𑀸𑀚𑀺𑀓𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀤𑀽𑀢𑁂𑀦 𑀲𑀁𑀯𑀡𑁆𑀡𑀦𑀸𑀬𑀁 𑀧𑀦 𑀤𑀽𑀢𑀲𑁆𑀲 𑀲𑀸𑀲𑀦𑀁 𑀆𑀭𑁄𑀘𑀸𑀧𑁂𑀢𑀺 ‘‘𑀏𑀯𑀁 𑀆𑀭𑁄𑀘𑁂𑀳𑀻’’𑀢𑀺, ‘‘𑀬𑁄 𑀏𑀯𑀁 𑀫𑀭𑀢𑀺, 𑀲𑁄 𑀥𑀦𑀁 𑀯𑀸 𑀮𑀪𑀢𑀻’’𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀮𑁂𑀔𑀸𑀬 𑀲𑀁𑀯𑀡𑁆𑀡𑁂𑀢𑀺 𑀦𑀸𑀫 𑀕𑀺𑀭𑀺𑀧𑀩𑁆𑀩𑀢𑀧𑀼𑀭𑀸𑀡𑀸𑀤𑀺𑀮𑁂𑀔𑀁 𑀮𑀺𑀔𑀢𑀺, ‘‘𑀬𑁄 𑀏𑀯𑀁 𑀫𑀭𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀏𑀢𑁆𑀣𑀸𑀧𑀺 𑀬𑁄 𑀫𑀭𑀡𑀽𑀧𑀸𑀬𑀁 𑀯𑀸 𑀕𑀸𑀳𑁂𑀬𑁆𑀬, 𑀫𑀭𑀡𑁂 𑀯𑀸 𑀕𑀼𑀡𑀁 𑀯𑀤𑁂𑀬𑁆𑀬, 𑀲𑁄 𑀘𑀼𑀢𑁄 𑀪𑀯𑁂𑀢𑀺 𑀲𑀫𑁆𑀩𑀦𑁆𑀥𑁄.

𑀇𑀤𑀸𑀦𑀺 𑀧𑀦 𑀇𑀫𑀲𑁆𑀲 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀲𑁆𑀲 𑀙𑀩𑁆𑀩𑀺𑀥𑁂 𑀧𑀬𑁄𑀕𑁂 𑀤𑀲𑁆𑀲𑁂𑀢𑀼𑀁 ‘‘𑀧𑀬𑁄𑀕𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀲𑀸𑀳𑀢𑁆𑀣𑀺𑀓𑀦𑀺𑀲𑁆𑀲𑀕𑁆𑀕𑀺𑀓𑀆𑀡𑀢𑁆𑀢𑀺𑀓𑀣𑀸𑀯𑀭𑀇𑀤𑁆𑀥𑀺𑀫𑀬𑀯𑀺𑀚𑁆𑀚𑀸𑀫𑀬𑀸𑀦𑀁 𑀯𑀲𑁂𑀦 𑀢𑀲𑁆𑀲 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀲𑁆𑀲 𑀙𑀧𑁆𑀧𑀬𑁄𑀕𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀲𑀸𑀳𑀢𑁆𑀣𑀺𑀓𑁄𑀢𑀺 𑀲𑀬𑀁 𑀫𑀸𑀭𑁂𑀦𑁆𑀢𑀲𑁆𑀲 𑀓𑀸𑀬𑁂𑀦 𑀯𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀯𑀸 𑀧𑀳𑀭𑀡𑀁. 𑀦𑀺𑀲𑁆𑀲𑀕𑁆𑀕𑀺𑀓𑁄𑀢𑀺 𑀤𑀽𑀭𑁂 𑀞𑀺𑀢𑀁 𑀫𑀸𑀭𑁂𑀢𑀼𑀓𑀸𑀫𑀲𑁆𑀲 𑀓𑀸𑀬𑀸𑀤𑀻𑀳𑀺 𑀉𑀲𑀼𑀲𑀢𑁆𑀢𑀺𑀬𑀦𑁆𑀢𑀧𑀸𑀲𑀸𑀡𑀸𑀤𑀻𑀦𑀁 𑀦𑀺𑀲𑁆𑀲𑀚𑁆𑀚𑀦𑀁. 𑀆𑀡𑀢𑁆𑀢𑀺𑀓𑁄𑀢𑀺 ‘‘𑀅𑀲𑀼𑀓𑀁 𑀦𑀸𑀫 𑀫𑀸𑀭𑁂𑀳𑀻’’𑀢𑀺 𑀅𑀜𑁆𑀜𑀁 𑀆𑀡𑀸𑀧𑁂𑀦𑁆𑀢𑀲𑁆𑀲 𑀆𑀡𑀸𑀧𑀦𑀁. 𑀣𑀸𑀯𑀭𑁄𑀢𑀺 𑀑𑀧𑀸𑀢𑀓𑁆𑀔𑀡𑀦𑀁, 𑀅𑀧𑀲𑁆𑀲𑁂𑀦𑀲𑀁𑀯𑀺𑀥𑀸𑀦𑀁, 𑀅𑀲𑀺𑀆𑀤𑀻𑀦𑀁 𑀉𑀧𑀦𑀺𑀓𑁆𑀔𑀺𑀧𑀦𑀁, 𑀢𑀴𑀸𑀓𑀸𑀤𑀻𑀲𑀼 𑀯𑀺𑀲𑀲𑀫𑁆𑀧𑀬𑁄𑀚𑀦𑀁, 𑀭𑀽𑀧𑀽𑀧𑀳𑀸𑀭𑁄𑀢𑀺 𑀏𑀯𑀫𑀸𑀤𑀺. 𑀓𑀫𑁆𑀫𑀯𑀺𑀧𑀸𑀓𑀚𑀸𑀬 𑀇𑀤𑁆𑀥𑀺𑀬𑀸 𑀧𑀬𑁄𑀚𑀦𑀁 𑀇𑀤𑁆𑀥𑀺𑀧𑀬𑁄𑀕𑀁. 𑀫𑀸𑀭𑀡𑀢𑁆𑀣𑀸𑀬 𑀯𑀺𑀚𑁆𑀚𑀸𑀦𑀁 𑀧𑀭𑀺𑀚𑀧𑁆𑀧𑀦𑀁 𑀯𑀺𑀚𑁆𑀚𑀸𑀫𑀬𑁄𑀢𑀺.

𑀇𑀤𑀸𑀦𑀺 𑀇𑀫𑁂𑀲𑀼 𑀙𑀲𑀼 𑀧𑀬𑁄𑀕𑁂𑀲𑀼 𑀆𑀡𑀢𑁆𑀢𑀺𑀬𑀁 𑀲𑀗𑁆𑀓𑁂𑀢𑀯𑀺𑀲𑀗𑁆𑀓𑁂𑀢𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀮𑀯𑀢𑁆𑀣𑀸𑀯𑀼𑀥𑀺𑀭𑀺𑀬𑀸𑀧𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀸𑀮𑁄𑀢𑀺 𑀧𑀼𑀩𑁆𑀩𑀡𑁆𑀳𑀲𑀸𑀬𑀦𑁆𑀳𑀸𑀤𑀺𑀓𑀸𑀮𑁄 𑀘 𑀬𑁄𑀩𑁆𑀩𑀦𑀣𑀸𑀯𑀭𑀺𑀬𑀸𑀤𑀺𑀓𑀸𑀮𑁄𑀧𑀺 𑀘. 𑀇𑀫𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀓𑀸𑀮𑀁 𑀦𑀺𑀬𑀫𑁂𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀦𑀸𑀫 𑀓𑀸𑀮𑁂 𑀫𑀸𑀭𑁂𑀳𑀻’’𑀢𑀺 𑀆𑀡𑀢𑁆𑀢𑁄 𑀲𑀘𑁂 𑀢𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀫𑀸𑀭𑁂𑀢𑀺, 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀦𑀺𑀬𑀫𑀺𑀢𑀓𑀸𑀮𑀢𑁄 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸 𑀫𑀸𑀭𑁂𑀢𑀺, 𑀆𑀡𑀸𑀧𑀓𑁄 𑀫𑀼𑀘𑁆𑀘𑀢𑀺. 𑀯𑀢𑁆𑀣𑀽𑀢𑀺 𑀫𑀸𑀭𑁂𑀢𑀩𑁆𑀩𑁄 𑀧𑀼𑀕𑁆𑀕𑀮𑁄. 𑀲𑀘𑁂 𑀆𑀡𑀢𑁆𑀢𑁄 𑀢𑀫𑁂𑀯 𑀫𑀸𑀭𑁂𑀢𑀺, 𑀆𑀡𑀸𑀧𑀓𑀲𑁆𑀲 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑀁. 𑀅𑀣 𑀅𑀜𑁆𑀜𑀁 𑀫𑀸𑀭𑁂𑀢𑀺, 𑀆𑀡𑀸𑀧𑀓𑁄 𑀫𑀼𑀘𑁆𑀘𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀯𑀼𑀥𑀦𑁆𑀢𑀺 𑀅𑀲𑀺𑀆𑀤𑀺. 𑀇𑀭𑀺𑀬𑀸𑀧𑀣𑁄𑀢𑀺 𑀫𑀸𑀭𑁂𑀢𑀩𑁆𑀩𑀲𑁆𑀲 𑀕𑀫𑀦𑀁 𑀯𑀸 𑀦𑀺𑀲𑀚𑁆𑀚𑀸 𑀯𑀸𑀢𑀺 𑀏𑀯𑀫𑀸𑀤𑀺𑀓𑁄. 𑀓𑀺𑀭𑀺𑀬𑀸𑀯𑀺𑀲𑁂𑀲𑁄𑀢𑀺 𑀯𑀺𑀚𑁆𑀛𑀦𑀁 𑀯𑀸 𑀙𑁂𑀤𑀦𑀁 𑀯𑀸 𑀪𑁂𑀤𑀦𑀁 𑀯𑀸 𑀲𑀽𑀮𑀸𑀭𑁄𑀧𑀦𑀁 𑀯𑀸𑀢𑀺 𑀏𑀯𑀫𑀸𑀤𑀺𑀓𑁄. 𑀑𑀓𑀸𑀲𑁄𑀢𑀺 𑀕𑀸𑀫𑁄 𑀯𑀸 𑀯𑀦𑀁 𑀯𑀸 𑀕𑁂𑀳𑀁 𑀯𑀸𑀢𑀺 𑀏𑀯𑀫𑀸𑀤𑀺𑀓𑁄. 𑀇𑀫𑁂𑀲𑀼 𑀬𑀣𑀸 𑀬𑀣𑀸 𑀯𑀥𑀓𑁄 𑀆𑀡𑀢𑁆𑀢𑁄, 𑀢𑀣𑀸 𑀢𑀣𑀸 𑀓𑀢𑁂 𑀆𑀡𑀸𑀧𑀓𑀲𑁆𑀲 𑀆𑀧𑀢𑁆𑀢𑀺, 𑀅𑀜𑁆𑀜𑀣𑀸 𑀓𑀢𑁂 𑀯𑀺𑀲𑀗𑁆𑀓𑁂𑀢𑁄 𑀳𑁄𑀢𑀺. 𑀆𑀡𑀢𑁆𑀢𑀺𑀬𑀁 𑀧𑀦 𑀅𑀬𑀁 𑀯𑀺𑀲𑁂𑀲𑁄 ‘‘𑀅𑀥𑀺𑀝𑁆𑀞𑀸𑀬𑀸𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀆𑀡𑀸𑀧𑁂𑀢𑀺 ‘𑀏𑀯𑀁 𑀯𑀺𑀚𑁆𑀛, 𑀏𑀯𑀁 𑀧𑀳𑀭, 𑀏𑀯𑀁 𑀖𑀸𑀢𑁂𑀳𑀻’’𑀢𑀺 𑀯𑀼𑀢𑁆𑀢𑀸𑀬 𑀧𑀸𑀴𑀺𑀬𑀸 𑀮𑀩𑁆𑀪𑀢𑀻𑀢𑀺 𑀜𑀸𑀢𑀩𑁆𑀩𑁄.

𑀢𑀢𑀺𑀬𑀁.

𑁮-𑁯. 𑀇𑀤𑀸𑀦𑀺 𑀘𑀢𑀼𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀛𑀸𑀦𑀸𑀤𑀺𑀪𑁂𑀤’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 ‘‘𑀛𑀸𑀦𑀁 𑀯𑀺𑀫𑁄𑀓𑁆𑀔𑁄 𑀲𑀫𑀸𑀥𑀺 𑀲𑀫𑀸𑀧𑀢𑁆𑀢𑀺 𑀜𑀸𑀡𑀤𑀲𑁆𑀲𑀦𑀁 𑀫𑀕𑁆𑀕𑀪𑀸𑀯𑀦𑀸 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀯𑀺𑀦𑀻𑀯𑀭𑀡𑀢𑀸 𑀘𑀺𑀢𑁆𑀢𑀲𑁆𑀲 𑀲𑀼𑀜𑁆𑀜𑀸𑀕𑀸𑀭𑁂 𑀅𑀪𑀺𑀭𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀅𑀢𑁆𑀢𑀦𑀺 𑀦𑀢𑁆𑀣𑀺𑀢𑀸𑀬 𑀦𑁄𑀲𑀦𑁆𑀢𑀁 ‘‘𑀫𑀬𑀺 𑀅𑀢𑁆𑀣𑀻’’𑀢𑀺 𑀅𑀢𑁆𑀢𑀦𑀺 𑀯𑀸 𑀢𑀁 ‘‘𑀅𑀳𑀁 𑀏𑀢𑁆𑀣 𑀲𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀸𑀦𑀁 𑀯𑀸 𑀢𑀢𑁆𑀣 𑀉𑀧𑀦𑁂𑀢𑁆𑀯𑀸 𑀤𑀻𑀧𑁂𑀦𑁆𑀢𑁄 𑀘𑀼𑀢𑁄 𑀪𑀯𑁂. 𑀓𑁄𑀝𑁆𑀞𑀸𑀲𑀁 𑀯𑀸𑀢𑀺 𑀏𑀢𑁆𑀣 ‘‘𑀛𑀸𑀦𑀮𑀸𑀪𑀻, 𑀯𑀺𑀫𑁄𑀓𑁆𑀔𑀮𑀸𑀪𑀻, 𑀲𑀫𑀸𑀥𑀺𑀮𑀸𑀪𑀻, 𑀲𑀫𑀸𑀧𑀢𑁆𑀢𑀺𑀮𑀸𑀪𑀻𑀫𑁆𑀳𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀓𑁄𑀝𑁆𑀞𑀸𑀲𑀢𑁄 𑀯𑀸𑀢𑀺 𑀅𑀢𑁆𑀣𑁄. 𑀏𑀓𑁂𑀓𑀁 𑀯𑀸𑀢𑀺 ‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻, 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀫𑁆𑀳𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀏𑀓𑁂𑀓𑀁 𑀯𑀸𑀢𑀺 𑀅𑀢𑁆𑀣𑁄. ‘‘𑀅𑀢𑀻𑀢𑀪𑀯𑁂 𑀲𑁄𑀢𑀸𑀧𑀦𑁆𑀦𑁄𑀫𑁆𑀳𑀻’’𑀢𑀺 𑀯𑀤𑀢𑁄 𑀅𑀢𑀻𑀢𑀪𑀯𑀁 𑀲𑀦𑁆𑀥𑀸𑀬 𑀓𑀣𑀺𑀢𑀢𑁆𑀢𑀸 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑀲𑁆𑀲𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀸𑀧𑀤𑁂𑀲𑀭𑀳𑀺𑀢𑀦𑁆𑀢𑀺 ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀺, 𑀲𑁄 𑀪𑀺𑀓𑁆𑀔𑀼 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀜𑁆𑀜𑀸𑀧𑀤𑁂𑀲𑀁 𑀯𑀺𑀦𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀤𑀻𑀧𑁂𑀦𑁆𑀢𑁄 𑀳𑀺 𑀣𑀼𑀮𑁆𑀮𑀘𑁆𑀘𑀬𑀫𑀸𑀧𑀚𑁆𑀚𑀢𑀺. 𑀤𑀻𑀧𑁂𑀦𑁆𑀢𑁄𑀢𑀺 ‘‘𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀁, 𑀲𑀫𑀸𑀧𑀚𑁆𑀚𑀸𑀫𑀺, 𑀲𑀫𑀸𑀧𑀦𑁆𑀦𑁄, 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀫𑁆𑀳𑀺, 𑀯𑀲𑀻𑀫𑁆𑀳𑀺, 𑀲𑀘𑁆𑀙𑀺𑀓𑀢𑀁 𑀅𑀲𑁆𑀲𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀤𑀻𑀧𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. ‘‘𑀅𑀥𑀺𑀕𑀢𑁄’’𑀢𑀺 𑀫𑀸𑀦𑁄 𑀅𑀥𑀺𑀫𑀸𑀦𑁄, 𑀲𑁄 𑀬𑀲𑁆𑀲 𑀦𑀢𑁆𑀣𑀺, 𑀲𑁄 𑀅𑀦𑀥𑀺𑀫𑀸𑀦𑀺𑀓𑁄. 𑀓𑁂𑀦 𑀏𑀯𑀁 𑀤𑀻𑀧𑁂𑀦𑁆𑀢𑁄𑀢𑀺 𑀘𑁂? 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀬𑁂𑀦 𑀯𑀸𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀢𑀤𑀼𑀪𑀬𑁂𑀦 𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀜𑁆𑀜𑀢𑁆𑀢𑀺𑀧𑀣𑁂𑀢𑀺 𑀬𑀢𑁆𑀣 𑀞𑀺𑀢𑁄 𑀫𑀦𑀼𑀲𑁆𑀲𑀚𑀸𑀢𑀺𑀓𑁄 𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸 𑀢𑀲𑁆𑀲 𑀯𑀘𑀦𑀁 𑀧𑀓𑀢𑀺𑀲𑁄𑀢𑁂𑀦 𑀲𑀼𑀢𑁆𑀯𑀸 𑀲𑀫𑀦𑀦𑁆𑀢𑀭𑀫𑁂𑀯 ‘‘𑀇𑀫𑀁 𑀦𑀸𑀫 𑀏𑀲 𑀯𑀤𑀢𑀻’’𑀢𑀺 𑀚𑀸𑀦𑀸𑀢𑀺, 𑀢𑀢𑁆𑀣 𑀞𑀢𑁆𑀯𑀸 𑀤𑀻𑀧𑁂𑀦𑁆𑀢𑁄 𑀘𑀼𑀢𑁄 𑀪𑀯𑁂, 𑀦 𑀤𑁂𑀯𑀩𑁆𑀭𑀳𑁆𑀫𑀸𑀤𑀻𑀲𑀼 𑀅𑀜𑁆𑀜𑀢𑀭𑁂𑀦 𑀜𑀸𑀢𑁂𑀢𑀺 𑀅𑀢𑁆𑀣𑁄.

𑀘𑀢𑀼𑀢𑁆𑀣𑀁.

𑁧𑁦. 𑀇𑀤𑀸𑀦𑀺 𑀘𑀢𑀼𑀦𑁆𑀦𑀫𑁆𑀧𑀺 𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑀁 𑀯𑀢𑁆𑀢𑀼𑀁 ‘‘𑀧𑀸𑀭𑀸𑀚𑀺𑀓𑁂𑀢𑁂 𑀘𑀢𑁆𑀢𑀸𑀭𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑀸𑀬𑀁 𑀲𑀗𑁆𑀔𑁂𑀧𑁄 𑁋 𑀘𑀢𑁆𑀢𑀸𑀭𑁄𑀧𑀺 𑀏𑀢𑁂 𑀧𑀸𑀭𑀸𑀚𑀺𑀓𑀸 ‘‘𑀏𑀓𑀓𑀫𑁆𑀫𑀁 𑀏𑀓𑀼𑀤𑁆𑀤𑁂𑀲𑁄 𑀲𑀫𑀲𑀺𑀓𑁆𑀔𑀢𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀲𑀁𑀯𑀸𑀲𑀲𑁆𑀲 𑀅𑀪𑀩𑁆𑀩𑀢𑀸𑀬 𑀅𑀲𑀁𑀯𑀸𑀲𑀸, 𑀬𑀣𑀸𑀧𑀼𑀭𑁂 𑀧𑀼𑀩𑁆𑀩𑁂 𑀕𑀺𑀳𑀺𑀓𑀸𑀮𑁂 𑀘 𑀅𑀦𑀼𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀘 𑀅𑀲𑀁𑀯𑀸𑀲𑀺𑀓𑀸, 𑀏𑀯𑀁 𑀧𑀘𑁆𑀙𑀸 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑀸𑀧𑀺 𑀅𑀲𑀁𑀯𑀸𑀲𑀸𑀢𑀺. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀅𑀪𑀩𑁆𑀩𑀸 𑀪𑀺𑀓𑁆𑀔𑀼𑀪𑀸𑀯𑀸𑀬 𑀧𑀼𑀦 𑀢𑁂𑀦 𑀅𑀢𑁆𑀢𑀪𑀸𑀯𑁂𑀦 𑀉𑀧𑀲𑀫𑁆𑀧𑀤𑀸𑀬 𑀅𑀯𑀢𑁆𑀣𑀼𑀢𑀸𑀬 𑀉𑀧𑀲𑀫𑁆𑀧𑀦𑁆𑀦𑀸 𑀪𑀯𑀺𑀢𑀼𑀫𑁆𑀧𑀺 𑀅𑀪𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀓𑀺𑀁 𑀯𑀺𑀬𑀸𑀢𑀺 𑀘𑁂? 𑀲𑀻𑀲𑀘𑁆𑀙𑀺𑀦𑁆𑀦𑁄𑀯 𑀚𑀻𑀯𑀺𑀢𑀼𑀁, 𑀬𑀣𑀸𑀧𑀺 𑀲𑀻𑀲𑀘𑁆𑀙𑀺𑀦𑁆𑀦𑁄 𑀢𑁂𑀦 𑀅𑀢𑁆𑀢𑀪𑀸𑀯𑁂𑀦 𑀧𑀼𑀦 𑀚𑀻𑀯𑀺𑀢𑀼𑀁 𑀅𑀪𑀩𑁆𑀩𑁄, 𑀏𑀯𑀫𑀺𑀫𑁂 𑀘𑀢𑁆𑀢𑀸𑀭𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁧. 𑀇𑀤𑀸𑀦𑀺 𑀇𑀫𑁂𑀲𑀼 𑀘𑀢𑀽𑀲𑀼 𑀧𑀸𑀭𑀸𑀚𑀺𑀓𑁂𑀲𑀼 𑀬𑁂 𑀧𑀭𑀺𑀬𑀸𑀬𑀸𑀡𑀢𑁆𑀢𑀻𑀳𑀺 𑀲𑀫𑁆𑀪𑀯𑀦𑁆𑀢𑀺, 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀺𑀬𑀸𑀬𑁄 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀭𑀺𑀬𑀸𑀬𑁄𑀢𑀺 𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲 𑀓𑀸𑀬𑀧𑀬𑁄𑀕𑁄 𑀯𑀸 𑀯𑀘𑀻𑀧𑀬𑁄𑀕𑁄 𑀯𑀸. 𑀢𑀲𑁆𑀫𑀸 ‘‘𑀬𑁄 𑀈𑀤𑀺𑀲𑁂 𑀫𑀼𑀳𑀼𑀢𑁆𑀢𑁂 𑀲𑀢𑁆𑀣𑀁 𑀯𑀸 𑀆𑀳𑀭𑀺𑀢𑁆𑀯𑀸 𑀯𑀺𑀲𑀁 𑀯𑀸 𑀔𑀸𑀤𑀺𑀢𑁆𑀯𑀸 𑀲𑁄𑀩𑁆𑀪𑀸𑀤𑀻𑀲𑀼 𑀯𑀸 𑀧𑀧𑀢𑀺𑀢𑁆𑀯𑀸 𑀫𑀭𑀢𑀺, 𑀲𑁄 𑀥𑀦𑀁 𑀯𑀸 𑀮𑀪𑀢𑀺, 𑀬𑀲𑀁 𑀯𑀸 𑀮𑀪𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀭𑀡𑀁 𑀅𑀪𑀺𑀦𑀦𑁆𑀤𑀦𑁆𑀢𑁄 ‘‘𑀇𑀤𑀁 𑀲𑀼𑀢𑁆𑀯𑀸 𑀬𑁄 𑀓𑁄𑀘𑀺 𑀫𑀭𑀢𑀽’’𑀢𑀺 𑀬𑁄 𑀧𑀭𑀺𑀬𑀸𑀬𑁂𑀦 𑀯𑀤𑀢𑀺, 𑀢𑀁 𑀲𑀼𑀢𑁆𑀯𑀸 𑀲𑀘𑁂 𑀓𑁄𑀘𑀺 𑀢𑀣𑀸 𑀫𑀭𑀢𑀺, 𑀧𑀸𑀭𑀸𑀚𑀺𑀓𑀁. 𑀦𑀺𑀬𑀫𑀺𑀢𑁂𑀦 𑀧𑀦 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀲𑁆𑀲𑁂𑀯 𑀫𑀭𑀡𑁂 𑀧𑀸𑀭𑀸𑀚𑀺𑀓𑀁. 𑀆𑀡𑀢𑁆𑀢𑀺 𑀧𑀦 𑀯𑀼𑀢𑁆𑀢𑀢𑁆𑀣𑀸𑀬𑁂𑀯. 𑀢𑀢𑀺𑀬𑁂 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀧𑀸𑀭𑀸𑀚𑀺𑀓𑁂 𑀮𑀩𑁆𑀪𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀼𑀢𑀺𑀬𑁂 𑀧𑀦 𑀅𑀤𑀺𑀦𑁆𑀦𑀸𑀤𑀸𑀦𑁂 𑀆𑀡𑀢𑁆𑀢𑀺 𑀏𑀯 𑀮𑀩𑁆𑀪𑀢𑀺, 𑀦 𑀧𑀭𑀺𑀬𑀸𑀬𑁄𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀦𑀁 𑀧𑀭𑀺𑀬𑀸𑀬𑁂𑀦 𑀦𑀸𑀧𑀚𑁆𑀚𑀢𑀻𑀢𑀺? 𑀬𑀣𑀸 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁂 ‘‘𑀫𑀭𑀡𑀯𑀡𑁆𑀡𑀁 𑀯𑀸 𑀲𑀁𑀯𑀡𑁆𑀡𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀁, 𑀢𑀣𑀸 𑀇𑀥 𑀅𑀤𑀺𑀦𑁆𑀦𑀸𑀤𑀸𑀦𑁂 ‘‘𑀯𑀡𑁆𑀡𑀁 𑀯𑀸 𑀲𑀁𑀯𑀡𑁆𑀡𑁂𑀬𑁆𑀬𑀸’’𑀢𑀺 𑀅𑀯𑀼𑀢𑁆𑀢𑀢𑁆𑀢𑀸. 𑀲𑁂𑀲𑁂𑀲𑀽𑀢𑀺 𑀧𑀞𑀫𑀘𑀢𑀼𑀢𑁆𑀣𑁂𑀲𑀼 𑀧𑀭𑀺𑀬𑀸𑀬𑀸𑀡𑀢𑁆𑀢𑀺𑀤𑁆𑀯𑀬𑀁 𑀦 𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄.

𑁧𑁨. 𑀇𑀤𑀸𑀦𑀺 𑀘𑀢𑀽𑀲𑀼𑀧𑀺 𑀬𑀣𑀸𑀲𑀫𑁆𑀪𑀯𑀁 𑀅𑀗𑁆𑀕𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁂𑀯𑁂𑀢𑀼𑀓𑀸𑀫𑀢𑀸𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑁂𑀣𑀼𑀦𑀥𑀫𑁆𑀫𑀲𑁆𑀲𑀸𑀢𑀺 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀲𑁆𑀲. 𑀩𑀼𑀥𑀸𑀢𑀺 𑀯𑀺𑀦𑀬𑀥𑀭𑀸.

𑁧𑁩. 𑀫𑀦𑀼𑀲𑁆𑀲𑀲𑀦𑁆𑀢𑀺 𑀫𑀦𑀼𑀲𑁆𑀲𑀲𑀦𑁆𑀢𑀓𑀢𑀸. 𑀏𑀢𑁂𑀦 𑀧𑁂𑀢𑀢𑀺𑀭𑀘𑁆𑀙𑀸𑀦𑀕𑀢𑀧𑀭𑀺𑀕𑁆𑀕𑀳𑁂𑀲𑀼 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀢𑀣𑀸𑀲𑀜𑁆𑀜𑀻𑀢𑀺 𑀫𑀦𑀼𑀲𑁆𑀲𑀲𑀦𑁆𑀢𑀓𑀯𑀲𑁂𑀦 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀻𑀢𑀺 𑀅𑀢𑁆𑀣𑁄. 𑀯𑀢𑁆𑀣𑀼𑀦𑁄 𑀕𑀭𑀼𑀢𑀸𑀢𑀺 𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑀁 𑀯𑀸 𑀢𑀤𑀕𑁆𑀖𑀦𑀓𑀁 𑀪𑀡𑁆𑀟𑀁 𑀯𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀯𑀳𑀸𑀭𑁄 𑀘𑀸𑀢𑀺 𑀧𑀜𑁆𑀘𑀯𑀻𑀲𑀢𑀺𑀬𑀸 𑀅𑀯𑀳𑀸𑀭𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀅𑀯𑀳𑀸𑀭𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀤𑀺𑀦𑁆𑀦𑀸𑀤𑀸𑀦𑀳𑁂𑀢𑀼𑀬𑁄𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀭𑀸𑀚𑀺𑀓𑀲𑁆𑀲 𑀏𑀢𑀸𑀦𑀺 𑀧𑀜𑁆𑀘 𑀅𑀗𑁆𑀕𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁪. 𑀧𑀸𑀡𑁄 𑀫𑀸𑀦𑀼𑀲𑁆𑀲𑀓𑁄𑀢𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑀧𑀸𑀡𑁄. 𑀢𑀲𑁆𑀫𑀺𑀁 𑀧𑀸𑀡𑁂 𑀧𑀸𑀡𑀲𑀜𑁆𑀜𑀺𑀢𑀸. 𑀖𑀸𑀢𑀘𑁂𑀢𑀦𑀸𑀢𑀺 𑀯𑀥𑀓𑀘𑁂𑀢𑀦𑀸. 𑀧𑀬𑁄𑀕𑁄𑀢𑀺 𑀢𑀁𑀲𑀫𑀼𑀝𑁆𑀞𑀺𑀢𑁄 𑀲𑀸𑀳𑀢𑁆𑀣𑀺𑀓𑀸𑀤𑀻𑀦𑀁 𑀙𑀦𑁆𑀦𑀁 𑀧𑀬𑁄𑀕𑀸𑀦𑀁 𑀅𑀜𑁆𑀜𑀢𑀭𑀧𑀬𑁄𑀕𑁄. 𑀢𑁂𑀦 𑀧𑀬𑁄𑀕𑁂𑀦 𑀫𑀭𑀡𑀁. 𑀧𑀜𑁆𑀘𑁂𑀢𑁂 𑀯𑀥𑀳𑁂𑀢𑀼𑀬𑁄𑀢𑀺 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀧𑀸𑀭𑀸𑀚𑀺𑀓𑀲𑁆𑀲 𑀧𑀜𑁆𑀘 𑀅𑀗𑁆𑀕𑀸𑀦𑀻𑀢𑀺 𑀅𑀢𑁆𑀣𑁄.

𑁧𑁫. 𑀅𑀲𑀦𑁆𑀢𑀢𑀸𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀅𑀢𑁆𑀢𑀦𑀺 𑀅𑀲𑀦𑁆𑀢𑀢𑀸 𑀘𑀸𑀢𑀺 𑀅𑀢𑁆𑀣𑁄. 𑀧𑀸𑀧𑀫𑀺𑀘𑁆𑀙𑀢𑀸𑀬𑀸𑀭𑁄𑀘𑀦𑀸𑀢𑀺 𑀇𑀫𑀺𑀦𑀸 𑀬𑁄 𑀓𑁂𑀯𑀮𑀁 𑀧𑀸𑀧𑀫𑀺𑀘𑁆𑀙𑀢𑀁 𑀯𑀺𑀦𑀸 𑀫𑀦𑁆𑀤𑀢𑁆𑀢𑀸 𑀫𑁄𑀫𑀽𑀳𑀢𑁆𑀢𑀸 𑀪𑀡𑀢𑀺, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀢𑀲𑁆𑀲𑀸𑀢𑀺 𑀬𑀲𑁆𑀲 𑀆𑀭𑁄𑀘𑁂𑀢𑀺, 𑀢𑀲𑁆𑀲 𑀫𑀦𑀼𑀲𑁆𑀲𑀚𑀸𑀢𑀺𑀢𑀸 𑀘. ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀺, 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀸’’𑀢𑀺𑀆𑀤𑀺𑀦𑀸 (𑀧𑀭𑀺. 𑁧𑁬𑁦, 𑁩𑁩𑁬) 𑀦𑀸𑀜𑁆𑀜𑀸𑀧𑀤𑁂𑀲𑁄 𑀘. 𑀢𑀤𑁂𑀯𑀸𑀢𑀺 𑀢𑀤𑀸 𑀏𑀯 𑀢𑀗𑁆𑀔𑀡𑁂𑀬𑁂𑀯 𑀚𑀸𑀦𑀦𑀁. 𑀅𑀲𑀦𑁆𑀢𑀤𑀻𑀧𑀦𑁂𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀭𑁄𑀘𑀦𑀧𑀸𑀭𑀸𑀚𑀺𑀓𑁂𑀢𑀺 𑀅𑀢𑁆𑀣𑁄.

𑁧𑁬. 𑀇𑀤𑀸𑀦𑀺 ‘‘𑀧𑀸𑀭𑀸𑀚𑀺𑀓𑀸 𑀘 𑀘𑀢𑁆𑀢𑀸𑀭𑁄’’𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑁂𑀳𑀺 𑀲𑀤𑁆𑀥𑀺𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀸𑀥𑀸𑀭𑀡𑀸 𑀘𑀢𑁆𑀢𑀸𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀺𑀓𑀸 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸 𑀅𑀝𑁆𑀞𑀯𑀢𑁆𑀣𑀼𑀓𑀸𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀼𑀦𑀻𑀦𑀁 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸 𑀦𑀸𑀫. 𑀏𑀢𑀸𑀲𑀼 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀺𑀓𑀸 𑀦𑀸𑀫 𑀬𑀸 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀅𑀯𑀲𑁆𑀲𑀼𑀢𑀸 𑀢𑁂𑀦𑁂𑀯 𑀭𑀸𑀕𑁂𑀦 𑀅𑀯𑀲𑁆𑀲𑀼𑀢𑀲𑁆𑀲 𑀫𑀦𑀼𑀲𑁆𑀲𑀧𑀼𑀭𑀺𑀲𑀲𑁆𑀲 𑀅𑀓𑁆𑀔𑀓𑀸𑀦𑀁 𑀅𑀥𑁄, 𑀚𑀸𑀡𑀼𑀫𑀡𑁆𑀟𑀮𑀸𑀦𑀁 𑀓𑀧𑁆𑀧𑀭𑀸𑀦𑀜𑁆𑀘 𑀉𑀧𑀭𑀺 𑀬𑁂𑀦 𑀓𑁂𑀦𑀘𑀺 𑀲𑀭𑀻𑀭𑀸𑀯𑀬𑀯𑁂𑀦 𑀆𑀫𑀲𑀦𑀸𑀤𑀺𑀁 𑀲𑀸𑀤𑀺𑀬𑀢𑀺, 𑀢𑀲𑁆𑀲𑀸 𑀅𑀥𑀺𑀯𑀘𑀦𑀁. 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀅𑀜𑁆𑀜𑀺𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀧𑀸𑀭𑀸𑀚𑀺𑀓𑀲𑀗𑁆𑀔𑀸𑀢𑀁 𑀯𑀚𑁆𑀚𑀁 𑀚𑀸𑀦𑀁 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀲𑀸 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸 𑀦𑀸𑀫. 𑀲𑀫𑀕𑁆𑀕𑁂𑀦 𑀧𑀦 𑀲𑀗𑁆𑀖𑁂𑀦 𑀉𑀓𑁆𑀔𑀺𑀢𑁆𑀢𑀁 𑀪𑀺𑀓𑁆𑀔𑀼𑀁 𑀬𑀸 𑀪𑀺𑀓𑁆𑀔𑀼𑀦𑀻 𑀬𑀁𑀤𑀺𑀝𑁆𑀞𑀺𑀓𑁄 𑀲𑁄 𑀳𑁄𑀢𑀺, 𑀢𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀕𑀳𑀡𑀯𑀲𑁂𑀦 𑀅𑀦𑀼𑀯𑀢𑁆𑀢𑀢𑀺, 𑀲𑀸 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸 𑀦𑀸𑀫. 𑀬𑀸 𑀧𑀦 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀢𑀺𑀦𑁆𑀢𑀸 𑀢𑀣𑀸𑀯𑀺𑀥𑀲𑁆𑀲𑁂𑀯 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀕𑁆𑀕𑀳𑀡𑀁 𑀯𑀸 𑀲𑀗𑁆𑀖𑀸𑀝𑀺𑀓𑀡𑁆𑀡𑀕𑁆𑀕𑀳𑀡𑀁 𑀯𑀸 𑀲𑀸𑀤𑀺𑀬𑀢𑀺, 𑀓𑀸𑀬𑀲𑀁𑀲𑀕𑁆𑀕𑀲𑀗𑁆𑀔𑀸𑀢𑀲𑁆𑀲 𑀅𑀲𑀤𑁆𑀥𑀫𑁆𑀫𑀲𑁆𑀲 𑀧𑀝𑀺𑀲𑁂𑀯𑀦𑀢𑁆𑀣𑀸𑀬 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀧𑀸𑀲𑁂 𑀲𑀦𑁆𑀢𑀺𑀝𑁆𑀞𑀢𑀺 𑀯𑀸, 𑀢𑀢𑁆𑀣 𑀞𑀢𑁆𑀯𑀸 𑀲𑀮𑁆𑀮𑀧𑀢𑀺 𑀯𑀸, 𑀲𑀗𑁆𑀓𑁂𑀢𑀁 𑀯𑀸 𑀕𑀘𑁆𑀙𑀢𑀺, 𑀧𑀼𑀭𑀺𑀲𑀲𑁆𑀲 𑀆𑀕𑀫𑀦𑀁 𑀯𑀸 𑀲𑀸𑀤𑀺𑀬𑀢𑀺, 𑀓𑁂𑀦𑀘𑀺 𑀯𑀸 𑀧𑀝𑀺𑀘𑁆𑀙𑀦𑁆𑀦𑁄𑀓𑀸𑀲𑀁 𑀧𑀯𑀺𑀲𑀢𑀺, 𑀳𑀢𑁆𑀣𑀧𑀸𑀲𑁂 𑀞𑀢𑁆𑀯𑀸 𑀓𑀸𑀬𑀁 𑀉𑀧𑀲𑀁𑀳𑀭𑀢𑀺, 𑀅𑀬𑀁 𑀅𑀝𑁆𑀞𑀯𑀢𑁆𑀣𑀼𑀓𑀸 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀪𑀩𑁆𑀩𑀓𑀸 𑀏𑀓𑀸𑀤𑀲𑀸𑀢𑀺 𑀏𑀢𑁆𑀣 𑀧𑀡𑁆𑀟𑀓𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀢𑀺𑀭𑀘𑁆𑀙𑀸𑀦𑀕𑀢𑁄 𑀫𑀸𑀢𑀼𑀖𑀸𑀢𑀓𑁄 𑀧𑀺𑀢𑀼𑀖𑀸𑀢𑀓𑁄 𑀅𑀭𑀳𑀦𑁆𑀢𑀖𑀸𑀢𑀓𑁄 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄 𑀲𑀗𑁆𑀖𑀪𑁂𑀤𑀓𑁄 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄𑀢𑀺 𑀇𑀫𑁂 𑀏𑀓𑀸𑀤𑀲 𑀅𑀪𑀩𑁆𑀩𑀧𑀼𑀕𑁆𑀕𑀮𑀸 𑀦𑀸𑀫. 𑀯𑀺𑀩𑁆𑀪𑀦𑁆𑀢𑀸 𑀪𑀺𑀓𑁆𑀔𑀼𑀦𑀻𑀢𑀺 𑀬𑀤𑀸 𑀪𑀺𑀓𑁆𑀔𑀼𑀦𑀻 𑀯𑀺𑀩𑁆𑀪𑀫𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀲𑁂𑀢𑀯𑀢𑁆𑀣𑀁 𑀯𑀸 𑀓𑀸𑀲𑀸𑀬𑀫𑁂𑀯 𑀯𑀸 𑀕𑀺𑀳𑀺𑀦𑀺𑀯𑀸𑀲𑀦𑀸𑀓𑀸𑀭𑁂𑀦 𑀦𑀺𑀯𑀸𑀲𑁂𑀢𑀺, 𑀢𑀤𑀸 𑀧𑀸𑀭𑀸𑀚𑀺𑀓𑀫𑀸𑀧𑀦𑁆𑀦𑀸 𑀦𑀸𑀫 𑀳𑁄𑀢𑀺, 𑀧𑀼𑀦 𑀉𑀧𑀲𑀫𑁆𑀧𑀤𑀁 𑀦 𑀮𑀪𑀢𑀺, 𑀲𑀸 𑀘 𑀧𑀸𑀭𑀸𑀚𑀺𑀓𑀸𑀢𑀺 𑀅𑀢𑁆𑀣𑁄. 𑀫𑀼𑀤𑀼𑀧𑀺𑀝𑁆𑀞𑀺𑀓𑁄 𑀦𑀸𑀫 𑀓𑀢𑀧𑀭𑀺𑀓𑀫𑁆𑀫𑀸𑀬 𑀫𑀼𑀤𑀼𑀓𑀸𑀬 𑀧𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀲𑁄 𑀏𑀢𑁆𑀢𑀸𑀯𑀢𑀸 𑀦 𑀧𑀸𑀭𑀸𑀚𑀺𑀓𑁄, 𑀅𑀣 𑀔𑁄 𑀬𑀤𑀸 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁 𑀅𑀢𑁆𑀢𑀦𑁄 𑀫𑀼𑀔𑀫𑀕𑁆𑀕𑀯𑀘𑁆𑀘𑀫𑀕𑁆𑀕𑁂𑀲𑀼 𑀅𑀜𑁆𑀜𑀢𑀭𑀁 𑀧𑀯𑁂𑀲𑁂𑀢𑀺, 𑀢𑀤𑀸 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺.

𑁧𑁭-𑁧𑁮. 𑀮𑀫𑁆𑀩𑀻𑀢𑀺 𑀅𑀗𑁆𑀕𑀚𑀸𑀢𑀲𑁆𑀲 𑀤𑀻𑀖𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑁄. 𑀲𑁄𑀧𑀺 𑀬𑀤𑀸 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁 𑀅𑀢𑁆𑀢𑀦𑁄 𑀫𑀼𑀔𑁂 𑀯𑀸 𑀯𑀘𑁆𑀘𑀫𑀕𑁆𑀕𑁂 𑀯𑀸 𑀧𑀯𑁂𑀲𑁂𑀢𑀺, 𑀢𑀤𑀸 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀫𑀼𑀔𑁂𑀦 𑀕𑀡𑁆𑀳𑀦𑁆𑀢𑁄𑀢𑀺 𑀏𑀢𑁆𑀣 𑀬𑁄 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀧𑀭𑀲𑁆𑀲 𑀲𑀼𑀢𑁆𑀢𑀲𑁆𑀲 𑀯𑀸 𑀧𑀫𑀢𑁆𑀢𑀲𑁆𑀲 𑀯𑀸 𑀅𑀗𑁆𑀕𑀚𑀸𑀢𑀁 𑀅𑀢𑁆𑀢𑀦𑁄 𑀫𑀼𑀔𑁂𑀦 𑀕𑀡𑁆𑀳𑀸𑀢𑀺, 𑀲𑁄 𑀘𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣𑁂𑀯𑀸𑀢𑀺 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑁂𑀯𑀸𑀢𑀺 𑀅𑀢𑁆𑀣𑁄. 𑀬𑁄 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑀁 𑀓𑀫𑁆𑀫𑀦𑀺𑀬𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀯𑀘𑁆𑀘𑀫𑀕𑁆𑀕𑁂𑀦 𑀢𑀲𑁆𑀲 𑀉𑀧𑀭𑀺 𑀦𑀺𑀲𑀻𑀤𑀢𑀺, 𑀢𑀁 𑀅𑀢𑁆𑀢𑀦𑁄 𑀯𑀘𑁆𑀘𑀫𑀕𑁆𑀕𑀁 𑀧𑀯𑁂𑀲𑁂𑀢𑀺, 𑀲𑁄 𑀘𑀸𑀢𑀺 𑀅𑀢𑁆𑀣𑁄. 𑀏𑀢𑁂 𑀘𑀢𑁆𑀢𑀸𑀭𑁄 𑀅𑀦𑀼𑀮𑁄𑀫𑀺𑀓𑀸 𑀫𑁂𑀣𑀼𑀦𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀣𑀫𑀺𑀢𑀺 𑀘𑁂? 𑀫𑀕𑁆𑀕𑁂 𑀫𑀕𑁆𑀕𑀧𑁆𑀧𑀯𑁂𑀲𑀦𑀲𑀤𑀺𑀲𑀢𑀸𑀬, 𑀦 𑀉𑀪𑀺𑀦𑁆𑀦𑀁 𑀭𑀸𑀕𑀯𑀲𑁂𑀦 𑀲𑀤𑀺𑀲𑀪𑀸𑀯𑀽𑀧𑀕𑀢𑀸𑀦𑀁 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀲𑀤𑀺𑀲𑀢𑀸𑀬. 𑀇𑀥𑀸𑀕𑀢𑀸 𑀘𑀢𑁆𑀢𑀸𑀭𑁄𑀢𑀺 𑀫𑁂𑀣𑀼𑀦𑀥𑀫𑁆𑀫𑀸𑀤𑀺𑀯𑀲𑁂𑀦 𑀧𑀸𑀭𑀸𑀚𑀺𑀓𑀸 𑀘𑀢𑁆𑀢𑀸𑀭𑁄 𑀘𑀸𑀢𑀺 𑀏𑀯𑀁 𑀲𑀫𑁄𑀥𑀸𑀦𑀢𑁄 𑀘𑀢𑀼𑀯𑀻𑀲𑀢𑀺 𑀧𑀸𑀭𑀸𑀚𑀺𑀓𑀸𑀢𑀺 𑀅𑀢𑁆𑀣𑁄.

𑀏𑀢𑁆𑀣𑀸𑀳 𑁋 𑀫𑀸𑀢𑀼𑀖𑀸𑀢𑀓𑀧𑀺𑀢𑀼𑀖𑀸𑀢𑀓𑀅𑀭𑀳𑀦𑁆𑀢𑀖𑀸𑀢𑀓𑀸 𑀢𑀢𑀺𑀬𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑀸, 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄 𑀮𑀫𑁆𑀩𑀻𑀆𑀤𑀬𑁄 𑀘𑀢𑁆𑀢𑀸𑀭𑁄 𑀧𑀞𑀫𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑀸𑀬𑁂𑀯𑀸𑀢𑀺 𑀓𑀢𑁆𑀯𑀸 𑀓𑀼𑀢𑁄 𑀘𑀢𑀼𑀯𑀻𑀲𑀢𑀻𑀢𑀺? 𑀅𑀥𑀺𑀧𑁆𑀧𑀸𑀬𑁄 𑀧𑀦𑁂𑀢𑁆𑀣 𑀅𑀢𑁆𑀣𑀺, 𑀫𑀸𑀢𑀼𑀖𑀸𑀢𑀓𑀸𑀤𑀬𑁄 𑀳𑀺 𑀘𑀢𑁆𑀢𑀸𑀭𑁄 𑀇𑀥 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀬𑁂𑀯 𑀅𑀥𑀺𑀧𑁆𑀧𑁂𑀢𑀸, 𑀮𑀫𑁆𑀩𑀻𑀆𑀤𑀬𑁄 𑀘𑀢𑁆𑀢𑀸𑀭𑁄 𑀓𑀺𑀜𑁆𑀘𑀸𑀧𑀺 𑀧𑀞𑀫𑀧𑀸𑀭𑀸𑀚𑀺𑀓𑁂𑀦 𑀲𑀗𑁆𑀕𑀳𑀺𑀢𑀸, 𑀬𑀲𑁆𑀫𑀸 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀫𑁂𑀣𑀼𑀦𑀥𑀫𑁆𑀫𑀁 𑀅𑀧𑁆𑀧𑀝𑀺𑀲𑁂𑀯𑀺𑀦𑁄𑀧𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀺𑀲𑀼𑀁 𑀯𑀼𑀢𑁆𑀢𑀸𑀢𑀺. 𑀧𑀸𑀭𑀸𑀚𑀺𑀓𑀯𑀺𑀦𑀺𑀘𑁆𑀙𑀬𑁄.

𑀧𑀸𑀭𑀸𑀚𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀗𑁆𑀖𑀸𑀤𑀺𑀲𑁂𑀲𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁯. 𑀇𑀤𑀸𑀦𑀺 𑀲𑀗𑁆𑀖𑀸𑀤𑀺𑀲𑁂𑀲𑀁 𑀧𑀓𑀸𑀲𑁂𑀢𑀼𑀁 ‘‘𑀕𑀭𑀼𑀓𑀸 𑀦𑀯𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀕𑀭𑀼𑀓𑀸𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸, 𑀅𑀜𑁆𑀜𑀢𑁆𑀣 𑀧𑀦 𑀧𑀸𑀭𑀸𑀚𑀺𑀓𑀸𑀧𑀺 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀓𑀲𑁆𑀫𑀸 ‘‘𑀢𑁂𑀭𑀲𑀸’’𑀢𑀺 𑀅𑀯𑀢𑁆𑀯𑀸 ‘‘𑀦𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀯𑀻𑀢𑀺𑀓𑁆𑀓𑀫𑀓𑁆𑀔𑀡𑁂𑀬𑁂𑀯 𑀆𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀧𑀞𑀫𑀸𑀧𑀢𑁆𑀢𑀺𑀓𑀸 𑀯𑀼𑀢𑁆𑀢𑀸, 𑀬𑀸𑀯𑀢𑀢𑀺𑀬𑀓𑀸 𑀧𑀦 𑀘𑀢𑁆𑀢𑀸𑀭𑁄 𑀲𑀗𑁆𑀖𑀸𑀤𑀺𑀲𑁂𑀲𑀸 𑀲𑀗𑁆𑀖𑀸𑀬𑀢𑁆𑀢𑀢𑁆𑀢𑀸 𑀘𑀺𑀭𑁂𑀦 𑀆𑀧𑀚𑁆𑀚𑀦𑁆𑀢𑀻𑀢𑀺 𑀦 𑀯𑀼𑀢𑁆𑀢𑀸. 𑀢𑀢𑁆𑀣 𑀫𑁄𑀘𑁂𑀢𑀼𑀓𑀸𑀫𑀢𑀸𑀢𑀺 𑀫𑁄𑀘𑁂𑀢𑀼𑀓𑀸𑀫𑀢𑀸𑀬𑀸𑀢𑀺 𑀅𑀢𑁆𑀣𑁄 ‘‘𑀅𑀮𑀚𑁆𑀚𑀺𑀢𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀇𑀫𑀺𑀦𑀸 𑀧𑀦 𑀦𑀬𑁂𑀦 𑀫𑁄𑀘𑀦𑀲𑁆𑀲𑀸𑀤𑁄 𑀫𑀼𑀘𑁆𑀘𑀦𑀲𑁆𑀲𑀸𑀤𑁄 𑀫𑀼𑀢𑁆𑀢𑀲𑁆𑀲𑀸𑀤𑁄 𑀫𑁂𑀣𑀼𑀦𑀲𑁆𑀲𑀸𑀤𑁄 𑀨𑀲𑁆𑀲𑀲𑁆𑀲𑀸𑀤𑁄 𑀓𑀡𑁆𑀟𑀽𑀯𑀦𑀲𑁆𑀲𑀸𑀤𑁄 𑀤𑀲𑁆𑀲𑀦𑀲𑁆𑀲𑀸𑀤𑁄 𑀦𑀺𑀲𑀚𑁆𑀚𑀦𑀲𑁆𑀲𑀸𑀤𑁄 𑀯𑀸𑀘𑀲𑁆𑀲𑀸𑀤𑁄 𑀕𑁂𑀳𑀲𑀺𑀢𑀧𑁂𑀫𑀁 𑀯𑀦𑀪𑀗𑁆𑀕𑀺𑀬𑀦𑁆𑀢𑀺 𑀏𑀓𑀸𑀤𑀲 𑀅𑀲𑁆𑀲𑀸𑀤𑀸 𑀯𑀼𑀢𑁆𑀢𑀸, 𑀢𑁂𑀲𑀼 𑀏𑀓𑀁𑀬𑁂𑀯 𑀫𑁄𑀘𑀦𑀲𑁆𑀲𑀸𑀤𑀁 𑀕𑀳𑁂𑀢𑁆𑀯𑀸 𑀲𑁂𑀲𑀸 𑀧𑀝𑀺𑀓𑁆𑀔𑀺𑀢𑁆𑀢𑀸 𑀳𑁄𑀦𑁆𑀢𑀺.

𑀢𑁂𑀲𑀁 𑀅𑀲𑁆𑀲𑀸𑀤𑀸𑀦𑀁 𑀯𑀲𑁂𑀦 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀫𑁄𑀘𑁂𑀢𑀼𑀁 𑀅𑀲𑁆𑀲𑀸𑀤𑁄 𑀫𑁄𑀘𑀦𑀲𑁆𑀲𑀸𑀤𑁄. 𑀫𑁄𑀘𑀦𑀲𑁆𑀲𑀸𑀤𑀘𑁂𑀢𑀦𑀸𑀬 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀢𑀺, 𑀫𑀼𑀘𑁆𑀘𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀦 𑀫𑀼𑀘𑁆𑀘𑀢𑀺 𑀘𑁂, 𑀣𑀼𑀮𑁆𑀮𑀘𑁆𑀘𑀬𑀁. 𑀫𑀼𑀘𑁆𑀘𑀦𑀲𑁆𑀲𑀸𑀤𑁂 𑀲𑀘𑁂 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀫𑀼𑀘𑁆𑀘𑀫𑀸𑀦𑀁 𑀅𑀲𑁆𑀲𑀸𑀤𑁂𑀢𑀺, 𑀦 𑀉𑀧𑀓𑁆𑀓𑀫𑀢𑀺, 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀫𑀼𑀘𑁆𑀘𑀫𑀸𑀦𑀁 𑀅𑀲𑁆𑀲𑀸𑀤𑁂𑀦𑁆𑀢𑁄 𑀉𑀧𑀓𑁆𑀓𑀫𑀺𑀢𑁆𑀯𑀸 𑀫𑁄𑀘𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄𑀯. 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀫𑀼𑀢𑁆𑀢𑁂 𑀅𑀲𑁆𑀲𑀸𑀤𑁄 𑀫𑀼𑀢𑁆𑀢𑀲𑁆𑀲𑀸𑀤𑁄. 𑀏𑀢𑁆𑀣𑀸𑀧𑀺 𑀉𑀧𑀓𑁆𑀓𑀫𑀲𑁆𑀲 𑀦𑀢𑁆𑀣𑀺𑀢𑀸𑀬 𑀅𑀦𑀸𑀧𑀢𑁆𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣. 𑀫𑁂𑀣𑀼𑀦𑀲𑁆𑀲𑀸𑀤𑁂𑀦 𑀇𑀢𑁆𑀣𑀺𑀁 𑀕𑀡𑁆𑀳𑀦𑁆𑀢𑀲𑁆𑀲 𑀫𑀼𑀢𑁆𑀢𑁂𑀧𑀺 𑀅𑀦𑀸𑀧𑀢𑁆𑀢𑀺, 𑀅𑀬𑀁 𑀫𑁂𑀣𑀼𑀦𑀲𑁆𑀲𑀸𑀤𑁄. 𑀨𑀲𑁆𑀲𑀲𑁆𑀲𑀸𑀤𑁄 𑀤𑀼𑀯𑀺𑀥𑁄 𑀅𑀚𑁆𑀛𑀢𑁆𑀢𑀺𑀓𑁄 𑀩𑀸𑀳𑀺𑀭𑁄 𑀘𑀸𑀢𑀺. 𑀢𑀢𑁆𑀣 𑀅𑀚𑁆𑀛𑀢𑁆𑀢𑀺𑀓𑁂 𑀢𑀸𑀯 𑀅𑀢𑁆𑀢𑀦𑁄 𑀦𑀺𑀫𑀺𑀢𑁆𑀢𑀁 ‘‘𑀣𑀤𑁆𑀥𑀁 𑀫𑀼𑀤𑀼𑀓𑀦𑁆𑀢𑀺 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀯𑀸 𑀮𑁄𑀮𑀪𑀸𑀯𑁂𑀦 𑀯𑀸 𑀓𑀻𑀴𑀸𑀧𑀬𑀢𑁄 𑀲𑀘𑁂 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀩𑀸𑀳𑀺𑀭𑀨𑀲𑁆𑀲𑀲𑁆𑀲𑀸𑀤𑁂 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀫𑀸𑀢𑀼𑀕𑀸𑀫𑀁 𑀨𑀼𑀲𑀢𑁄 𑀆𑀮𑀺𑀗𑁆𑀕𑀢𑁄 𑀘 𑀫𑀼𑀢𑁆𑀢𑁂 𑀅𑀦𑀸𑀧𑀢𑁆𑀢𑀺. 𑀓𑀡𑁆𑀟𑀽𑀯𑀦𑀲𑁆𑀲𑀸𑀤𑁂 𑀤𑀤𑁆𑀤𑀼𑀓𑀘𑁆𑀙𑀸𑀤𑀻𑀦𑀁 𑀯𑀲𑁂𑀦 𑀔𑀚𑁆𑀚𑀫𑀸𑀦𑀁 𑀦𑀺𑀫𑀺𑀢𑁆𑀢𑀁 𑀓𑀡𑁆𑀟𑀽𑀯𑀦𑀲𑁆𑀲𑀸𑀤𑁂𑀦 𑀓𑀡𑁆𑀟𑀽𑀯𑀢𑁄 𑀫𑀼𑀢𑁆𑀢𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀤𑀲𑁆𑀲𑀦𑀲𑁆𑀲𑀸𑀤𑁂 𑀫𑀸𑀢𑀼𑀕𑀸𑀫𑀲𑁆𑀲 𑀅𑀦𑁄𑀓𑀸𑀲𑀁 𑀉𑀧𑀦𑀺𑀚𑁆𑀛𑀸𑀬𑀢𑁄 𑀫𑀼𑀢𑁆𑀢𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀦𑀺𑀲𑀚𑁆𑀚𑀦𑀲𑁆𑀲𑀸𑀤𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀭𑀳𑁄 𑀦𑀺𑀲𑀺𑀦𑁆𑀦𑀲𑁆𑀲 𑀫𑀼𑀢𑁆𑀢𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀯𑀸𑀘𑀸𑀬 𑀅𑀲𑁆𑀲𑀸𑀤𑁄 𑀯𑀸𑀘𑀲𑁆𑀲𑀸𑀤𑁄. 𑀢𑁂𑀦 𑀅𑀲𑁆𑀲𑀸𑀤𑁂𑀦 𑀫𑀸𑀢𑀼𑀕𑀸𑀫𑀁 𑀫𑁂𑀣𑀼𑀦𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸𑀳𑀺 𑀯𑀸𑀘𑀸𑀳𑀺 𑀑𑀪𑀸𑀲𑀦𑁆𑀢𑀲𑁆𑀲 𑀫𑀼𑀢𑁆𑀢𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀕𑁂𑀳𑀲𑀺𑀢𑀧𑁂𑀫𑁂 𑀫𑀸𑀢𑀸𑀤𑀻𑀦𑀁 𑀫𑀸𑀢𑀸𑀤𑀺𑀧𑁂𑀫𑁂𑀦 𑀆𑀮𑀺𑀗𑁆𑀕𑀦𑀸𑀤𑀺𑀁 𑀓𑀭𑁄𑀦𑁆𑀢𑀲𑁆𑀲 𑀫𑀼𑀢𑁆𑀢𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀯𑀦𑀪𑀗𑁆𑀕𑁂 𑀘 𑀲𑀦𑁆𑀣𑀯𑀓𑀭𑀡𑀢𑁆𑀣𑀸𑀬 𑀇𑀢𑁆𑀣𑀺𑀬𑀸 𑀧𑁂𑀲𑀺𑀢𑀁 𑀧𑀼𑀧𑁆𑀨𑀸𑀤𑀺𑀯𑀦𑀪𑀗𑁆𑀕𑀲𑀜𑁆𑀜𑀺𑀢𑀁 𑀧𑀡𑁆𑀡𑀸𑀓𑀸𑀭𑀁 ‘‘𑀇𑀢𑁆𑀣𑀦𑁆𑀦𑀸𑀫𑀸𑀬 𑀦𑀸𑀫 𑀇𑀤𑀁 𑀫𑁂 𑀧𑁂𑀲𑀺𑀢’’𑀦𑁆𑀢𑀺 𑀅𑀲𑁆𑀲𑀸𑀤𑁂𑀦 𑀆𑀫𑀲𑀦𑁆𑀢𑀲𑁆𑀲 𑀫𑀼𑀢𑁆𑀢𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀏𑀢𑁂𑀲𑀼 𑀧𑀦 𑀫𑁄𑀘𑀦𑀲𑁆𑀲𑀸𑀤𑀯𑀲𑁂𑀦𑁂𑀯 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀆𑀧𑀢𑁆𑀢𑀺, 𑀲𑁂𑀲𑀸𑀦𑀁 𑀯𑀲𑁂𑀦 𑀅𑀦𑀸𑀧𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀼𑀓𑁆𑀓𑀲𑁆𑀲𑀸𑀢𑀺 ‘‘𑀦𑀻𑀮𑀁 𑀧𑀻𑀢𑀓𑀁 𑀮𑁄𑀳𑀺𑀢𑀓𑀁 𑀑𑀤𑀸𑀢𑀁 𑀢𑀓𑁆𑀓𑀯𑀡𑁆𑀡𑀁 𑀤𑀓𑀯𑀡𑁆𑀡𑀁 𑀢𑁂𑀮𑀯𑀡𑁆𑀡𑀁 𑀔𑀻𑀭𑀯𑀡𑁆𑀡𑀁 𑀤𑀥𑀺𑀯𑀡𑁆𑀡𑀁 𑀲𑀧𑁆𑀧𑀺𑀯𑀡𑁆𑀡’’𑀦𑁆𑀢𑀺 (𑀧𑀸𑀭𑀸. 𑁨𑁩𑁭) 𑀏𑀯𑀁 𑀆𑀕𑀢𑁂𑀲𑀼 𑀤𑀲𑀲𑀼 𑀯𑀡𑁆𑀡𑁂𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀼𑀓𑁆𑀓𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀧𑀓𑁆𑀓𑀫𑁆𑀫𑀸𑀢𑀺 ‘‘𑀅𑀚𑁆𑀛𑀢𑁆𑀢𑀭𑀽𑀧𑁂 𑀫𑁄𑀘𑁂𑀢𑀺, 𑀩𑀳𑀺𑀤𑁆𑀥𑀸𑀭𑀽𑀧𑁂 𑀫𑁄𑀘𑁂𑀢𑀺, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀽𑀧𑁂 𑀫𑁄𑀘𑁂𑀢𑀺, 𑀆𑀓𑀸𑀲𑁂 𑀓𑀝𑀺𑀁 𑀓𑀫𑁆𑀧𑁂𑀦𑁆𑀢𑁄 𑀫𑁄𑀘𑁂𑀢𑀻’’𑀢𑀺 (𑀧𑀸𑀭𑀸. 𑁨𑁩𑁭) 𑀏𑀯𑀁 𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀉𑀧𑀸𑀬𑁂𑀲𑀼 𑀅𑀜𑁆𑀜𑀢𑀭𑁂𑀦 𑀉𑀧𑀸𑀬𑁂𑀦 ‘‘𑀭𑀸𑀕𑀽𑀧𑀢𑁆𑀣𑀫𑁆𑀪𑁂 𑀫𑁄𑀘𑁂𑀢𑀺, 𑀯𑀘𑁆𑀘𑀽𑀧𑀢𑁆𑀣𑀫𑁆𑀪𑁂 𑀫𑁄𑀘𑁂𑀢𑀺, 𑀧𑀲𑁆𑀲𑀸𑀯𑀽𑀧𑀢𑁆𑀣𑀫𑁆𑀪𑁂 𑀫𑁄𑀘𑁂𑀢𑀺, 𑀯𑀸𑀢𑀽𑀧𑀢𑁆𑀣𑀫𑁆𑀪𑁂 𑀫𑁄𑀘𑁂𑀢𑀺, 𑀉𑀘𑁆𑀘𑀸𑀮𑀺𑀗𑁆𑀕𑀧𑀸𑀡𑀓𑀤𑀝𑁆𑀞𑀽𑀧𑀢𑁆𑀣𑀫𑁆𑀪𑁂 𑀫𑁄𑀘𑁂𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀲𑀼 𑀧𑀜𑁆𑀘𑀲𑀼 𑀓𑀸𑀮𑁂𑀲𑀼 𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀮𑁂 𑀅𑀗𑁆𑀕𑀚𑀸𑀢𑁂 𑀓𑀫𑁆𑀫𑀦𑀺𑀬𑀁 𑀧𑀢𑁆𑀢𑁂 ‘‘𑀆𑀭𑁄𑀕𑁆𑀬𑀢𑁆𑀣𑀸𑀬 𑀫𑁄𑀘𑁂𑀢𑀺, 𑀲𑀼𑀔𑀢𑁆𑀣𑀸𑀬 𑀫𑁄𑀘𑁂𑀢𑀺, 𑀪𑁂𑀲𑀚𑁆𑀚𑀢𑁆𑀣𑀸𑀬, 𑀤𑀸𑀦𑀢𑁆𑀣𑀸𑀬, 𑀧𑀼𑀜𑁆𑀜𑀢𑁆𑀣𑀸𑀬, 𑀬𑀜𑁆𑀜𑀢𑁆𑀣𑀸𑀬, 𑀲𑀕𑁆𑀕𑀢𑁆𑀣𑀸𑀬, 𑀩𑀻𑀚𑀢𑁆𑀣𑀸𑀬, 𑀯𑀻𑀫𑀁𑀲𑀢𑁆𑀣𑀸𑀬, 𑀤𑀯𑀢𑁆𑀣𑀸𑀬 𑀫𑁄𑀘𑁂𑀢𑀻’’𑀢𑀺 (𑀧𑀸𑀭𑀸. 𑁨𑁩𑁭) 𑀏𑀯𑀁 𑀯𑀼𑀢𑁆𑀢𑁂𑀲𑀼 𑀤𑀲𑀲𑀼 𑀅𑀥𑀺𑀧𑁆𑀧𑀸𑀬𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀅𑀥𑀺𑀧𑁆𑀧𑀸𑀬𑁂𑀦 𑀳𑀢𑁆𑀣𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀉𑀧𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀫𑁄𑀘𑀬𑀦𑁆𑀢𑀺 𑀅𑀦𑁆𑀢𑀫𑀲𑁄 𑀬𑀁 𑀏𑀓𑀸 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸 𑀧𑀺𑀯𑁂𑀬𑁆𑀬, 𑀢𑀢𑁆𑀢𑀓𑀫𑁆𑀧𑀺 𑀫𑁄𑀘𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑁂𑀦𑀸𑀢𑀺 𑀬𑀸 𑀲𑀼𑀧𑀺𑀦𑀦𑁆𑀢𑁂 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀳𑁄𑀢𑀺, 𑀢𑀁 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀫𑀡𑁄𑀢𑀺 𑀬𑁄 𑀓𑁄𑀘𑀺 𑀉𑀧𑀲𑀫𑁆𑀧𑀦𑁆𑀦𑁄. 𑀕𑀭𑀼𑀓𑀦𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀁. 𑀨𑀼𑀲𑁂𑀢𑀺 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀺𑀓𑁆𑀔𑀸𑀧𑀤𑀁 𑀧𑀞𑀫𑀁.

𑁨𑁦. 𑀇𑀤𑀸𑀦𑀺 𑀓𑀸𑀬𑀲𑀁𑀲𑀕𑁆𑀕𑀁 𑀤𑀻𑀧𑁂𑀢𑀼𑀁 ‘‘𑀇𑀢𑁆𑀣𑀺𑀲𑀜𑁆𑀜𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀇𑀢𑁆𑀣𑀺𑀲𑀜𑁆𑀜𑀻𑀢𑀺 𑀢𑀤𑀳𑀼𑀚𑀸𑀢𑀸𑀬𑀧𑀺 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀻𑀬𑁂𑀯 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀘𑁂 𑀢𑀢𑁆𑀣 𑀯𑁂𑀫𑀢𑀺𑀓𑁄 𑀯𑀸 𑀧𑀡𑁆𑀟𑀓𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀕𑀢𑀲𑀜𑁆𑀜𑀻 𑀯𑀸 𑀳𑁄𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁, 𑀢𑀣𑀸 𑀇𑀢𑁆𑀣𑀺𑀬𑀸 𑀓𑀸𑀬𑁂𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀸𑀫𑀲𑀦𑁂 𑀘 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀓𑀸𑀬𑀸𑀫𑀲𑀦𑁂 𑀘 𑀬𑀓𑁆𑀔𑀻𑀧𑁂𑀢𑀻𑀧𑀡𑁆𑀟𑀓𑀸𑀦𑀁 𑀓𑀸𑀬𑁂𑀦 𑀓𑀸𑀬𑀸𑀫𑀲𑀦𑁂 𑀘. 𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀻𑀦𑀁 𑀧𑀦 𑀓𑀸𑀬𑁂𑀦 𑀓𑀸𑀬𑀸𑀫𑀲𑀦𑁂𑀧𑀺 𑀤𑀼𑀓𑁆𑀓𑀝𑀁, 𑀢𑀣𑀸 𑀬𑀓𑁆𑀔𑀻𑀆𑀤𑀻𑀦𑀁 𑀓𑀸𑀬𑁂𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀸𑀤𑀻𑀲𑀼 𑀘. 𑀫𑀢𑀺𑀢𑁆𑀣𑀺𑀬𑀸 𑀧𑀦 𑀣𑀼𑀮𑁆𑀮𑀘𑁆𑀘𑀬𑀁. 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀯𑀸𑀢𑀺 𑀇𑀫𑀺𑀦𑀸 𑀫𑀸𑀢𑀼𑀧𑁂𑀫𑀸𑀤𑀺𑀁 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑀜𑁆𑀘 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀫𑁆𑀨𑀼𑀲𑀦𑁆𑀢𑁄𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀉𑀧𑀓𑁆𑀓𑀫𑁆𑀫 𑀅𑀦𑁆𑀢𑀫𑀲𑁄 𑀮𑁄𑀫𑁂𑀦𑀧𑀺 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀲𑀫𑁆𑀨𑀼𑀲𑀦𑁆𑀢𑁄𑀢𑀺 𑀅𑀢𑁆𑀣𑀲𑀫𑁆𑀩𑀦𑁆𑀥𑁄. 𑀇𑀫𑀺𑀦𑀸 𑀬𑁄 𑀇𑀢𑁆𑀣𑀺𑀬𑀸 𑀆𑀮𑀺𑀗𑁆𑀕𑀢𑁄𑀧𑀺 𑀓𑀸𑀬𑁂𑀦 𑀦 𑀯𑀸𑀬𑀫𑀢𑀺, 𑀓𑁂𑀯𑀮𑀁 𑀨𑀲𑁆𑀲𑀁𑀬𑁂𑀯 𑀅𑀦𑀼𑀪𑀯𑀢𑀺, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺.

𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑀁 𑀤𑀼𑀢𑀺𑀬𑀁.

𑁨𑁧. 𑀇𑀤𑀸𑀦𑀺 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀁 𑀧𑀓𑀸𑀲𑁂𑀢𑀼𑀁 ‘‘𑀢𑀣𑀸 𑀲𑀼𑀡𑀦𑁆𑀢𑀺’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑀣𑀸𑀢𑀺 𑀇𑀢𑁆𑀣𑀺𑀲𑀜𑁆𑀜𑀻. 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀲𑀼𑀡𑀦𑁆𑀢𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀼𑀡𑀦𑁆𑀢𑀺𑀦𑁆𑀢𑀺 𑀇𑀫𑀺𑀦𑀸 𑀧𑀝𑀺𑀩𑀮𑀸𑀬𑀧𑀺 𑀇𑀢𑁆𑀣𑀺𑀬𑀸 𑀅𑀯𑀺𑀜𑁆𑀜𑀢𑁆𑀢𑀺𑀧𑀣𑁂 𑀞𑀺𑀢𑀸𑀬 𑀤𑀽𑀢𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀆𑀭𑁄𑀘𑁂𑀦𑁆𑀢𑀲𑁆𑀲 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀧𑀢𑁆𑀢𑀺𑀦 𑀳𑁄𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀯𑀺𑀜𑁆𑀜𑀼𑀜𑁆𑀘𑀸𑀢𑀺 𑀇𑀫𑀺𑀦𑀸 𑀬𑀸 𑀫𑀳𑀮𑁆𑀮𑀺𑀓𑀸𑀧𑀺 𑀩𑀸𑀮𑀸𑀧𑀺 𑀏𑀴𑀫𑀽𑀕𑀸𑀧𑀺 𑀅𑀲𑀤𑁆𑀥𑀫𑁆𑀫𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁 𑀓𑀣𑀁 𑀦 𑀚𑀸𑀦𑀸𑀢𑀺, 𑀲𑀸 𑀇𑀥 𑀦𑀸𑀥𑀺𑀧𑁆𑀧𑁂𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀸𑀦𑀁 𑀯𑀲𑁂𑀦 𑀫𑀕𑁆𑀕𑀁 𑀯𑀸 𑀫𑁂𑀣𑀼𑀦𑀁 𑀯𑀸 𑀆𑀭𑀩𑁆𑀪𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀬 𑀭𑀸𑀕𑁄 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀭𑀸𑀕𑁄, 𑀢𑁂𑀦 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀭𑀸𑀕𑁂𑀦. 𑀢𑀁 𑀅𑀲𑁆𑀲𑀸𑀤𑁂𑀦𑁆𑀢𑁄 𑀑𑀪𑀸𑀲𑁂𑀢𑁆𑀯𑀸 𑀤𑀼𑀭𑀼𑀢𑁆𑀢𑀯𑀘𑀦𑀁 𑀯𑀢𑁆𑀯𑀸 𑀕𑀭𑀼𑀓𑀁 𑀨𑀼𑀲𑁂𑀢𑀺 𑀅𑀢𑁆𑀣𑁄.

𑀓𑀣𑀁 𑀤𑁆𑀯𑁂 𑀫𑀕𑁆𑀕𑁂 𑀆𑀭𑀩𑁆𑀪 𑀧𑀲𑀁𑀲𑀢𑀺 𑀕𑀭𑀳𑀢𑀺? 𑀢𑀢𑁆𑀣 𑀧𑀲𑀁𑀲𑀸𑀬𑀧𑀺 𑀢𑀸𑀯 ‘‘𑀇𑀢𑁆𑀣𑀺𑀮𑀓𑁆𑀔𑀡𑁂𑀦 𑀲𑀼𑀪𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀲𑀻’’𑀢𑀺 𑀯𑀤𑀢𑀺, 𑀦 𑀢𑀸𑀯𑀲𑀻𑀲𑀁 𑀏𑀢𑀺. ‘‘𑀢𑀯 𑀯𑀘𑁆𑀘𑀫𑀕𑁆𑀕𑁄 𑀘 𑀧𑀲𑁆𑀲𑀸𑀯𑀫𑀕𑁆𑀕𑁄 𑀘 𑀲𑀼𑀪𑁄 𑀲𑀼𑀲𑀡𑁆𑀞𑀸𑀦𑁄 𑀤𑀲𑁆𑀲𑀦𑀻𑀬𑁄, 𑀈𑀤𑀺𑀲𑁂𑀦 𑀦𑀸𑀫 𑀇𑀢𑁆𑀣𑀺𑀮𑀓𑁆𑀔𑀡𑁂𑀦 𑀲𑀼𑀪𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀲𑀻’’𑀢𑀺 𑀯𑀤𑀢𑀺, 𑀲𑀻𑀲𑀁 𑀏𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀕𑀭𑀳𑀡𑁂 𑀧𑀦 ‘‘𑀲𑀺𑀔𑀭𑀡𑀻𑀲𑀺, 𑀲𑀫𑁆𑀪𑀺𑀦𑁆𑀦𑀸𑀲𑀺, 𑀉𑀪𑀢𑁄𑀩𑁆𑀬𑀜𑁆𑀚𑀦𑀸𑀲𑀻’’𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀲𑀼𑀤𑁆𑀥𑀸𑀦𑀺𑀬𑁂𑀯 𑀲𑀻𑀲𑀁 𑀏𑀦𑁆𑀢𑀺 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀸𑀦𑀁 𑀦𑀺𑀬𑀢𑀯𑀘𑀦𑀢𑁆𑀢𑀸 𑀅𑀘𑁆𑀘𑁄𑀴𑀸𑀭𑀺𑀓𑀢𑁆𑀢𑀸 𑀘. 𑀅𑀜𑁆𑀜𑀸𑀦𑀺 𑀧𑀦 ‘‘𑀅𑀦𑀺𑀫𑀺𑀢𑁆𑀢𑀸𑀲𑀺, 𑀦𑀺𑀫𑀺𑀢𑁆𑀢𑀫𑀢𑁆𑀢𑀸𑀲𑀻’’𑀢𑀺𑀆𑀤𑀻𑀦𑀺 𑀫𑀕𑁆𑀕𑀸𑀦𑀁 𑀅𑀦𑀺𑀬𑀢𑀯𑀘𑀦𑀢𑁆𑀢𑀸 𑀫𑁂𑀣𑀼𑀦𑁂𑀦 𑀖𑀝𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑀺 𑀏𑀯 𑀲𑀻𑀲𑀁 𑀏𑀦𑁆𑀢𑀺. 𑀫𑁂𑀣𑀼𑀦𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁂 ‘‘𑀤𑁂𑀳𑀺 𑀫𑁂, 𑀅𑀭𑀳𑀲𑀺 𑀫𑁂 𑀤𑀸𑀢𑀼’’𑀦𑁆𑀢𑀺𑀆𑀤𑀻𑀳𑀺 𑀧𑀦 𑀲𑀻𑀲𑀁 𑀦 𑀏𑀢𑀺, ‘‘𑀫𑁂𑀣𑀼𑀦𑀥𑀫𑁆𑀫𑀁 𑀤𑁂𑀳𑀻’’𑀢𑀺𑀆𑀤𑀺𑀦𑀸 𑀫𑁂𑀣𑀼𑀦𑀥𑀫𑁆𑀫𑁂 𑀖𑀝𑀺𑀢𑁂𑀬𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀇𑀢𑁆𑀣𑀺𑀬𑀸 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑁂 𑀞𑀧𑁂𑀢𑁆𑀯𑀸 𑀅𑀥𑀓𑁆𑀔𑀓𑀁 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀁 𑀆𑀤𑀺𑀲𑁆𑀲 𑀯𑀡𑁆𑀡𑀸𑀤𑀺𑀪𑀡𑀦𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀢𑀣𑀸 𑀬𑀓𑁆𑀔𑀻𑀧𑁂𑀢𑀻𑀧𑀡𑁆𑀟𑀓𑁂𑀲𑀼 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑁂 𑀫𑁂𑀣𑀼𑀦𑁂𑀧𑀺. 𑀇𑀫𑁂𑀲𑀁 𑀧𑀦 𑀬𑀓𑁆𑀔𑀻𑀆𑀤𑀻𑀦𑀁 𑀅𑀥𑀓𑁆𑀔𑀓𑀸𑀤𑀺𑀓𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀧𑀤𑁂𑀲𑁂 𑀤𑀼𑀁𑀓𑁆𑀓𑀝𑀁, 𑀢𑀣𑀸 𑀇𑀢𑁆𑀣𑀺𑀬𑀸𑀤𑀻𑀦𑀁 𑀉𑀩𑁆𑀪𑀓𑁆𑀔𑀓𑁂 𑀅𑀥𑁄𑀚𑀸𑀡𑀼𑀫𑀡𑁆𑀟𑀮𑁂 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂 𑀘𑀸𑀢𑀺.

𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀺𑀓𑁆𑀔𑀸𑀧𑀤𑀁 𑀢𑀢𑀺𑀬𑀁.

𑁨𑁨. 𑀇𑀤𑀸𑀦𑀺 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀢𑁆𑀯𑀸𑀢𑀺 𑀤𑀼𑀝𑁆𑀞𑀼𑀮𑁆𑀮𑁄𑀪𑀸𑀲𑀦𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀇𑀢𑁆𑀣𑀺𑀁 𑀇𑀢𑁆𑀣𑀺𑀲𑀜𑁆𑀜𑀻𑀬𑁂𑀯 𑀳𑀼𑀢𑁆𑀯𑀸 𑀯𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀓𑀸𑀫𑀼𑀧𑀝𑁆𑀞𑀸𑀦𑀯𑀡𑁆𑀡𑀦𑁆𑀢𑀺 𑀏𑀢𑁆𑀣 𑀫𑁂𑀣𑀼𑀦𑀥𑀫𑁆𑀫𑀲𑀗𑁆𑀔𑀸𑀢𑁂𑀦 𑀓𑀸𑀫𑁂𑀦 𑀉𑀧𑀝𑁆𑀞𑀸𑀦𑀁 𑀓𑀸𑀫𑀼𑀧𑀝𑁆𑀞𑀸𑀦𑀁, 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀓𑀸𑀫𑀼𑀧𑀝𑁆𑀞𑀸𑀦𑀁 𑀅𑀢𑁆𑀢𑀓𑀸𑀫𑀼𑀧𑀝𑁆𑀞𑀸𑀦𑀁, 𑀅𑀢𑁆𑀢𑀦𑀸 𑀯𑀸 𑀓𑀸𑀫𑀺𑀢𑀁 𑀇𑀘𑁆𑀙𑀺𑀢𑀦𑁆𑀢𑀺 𑀅𑀢𑁆𑀢𑀓𑀸𑀫𑀁, 𑀲𑀬𑀁 𑀫𑁂𑀣𑀼𑀦𑀭𑀸𑀕𑀯𑀲𑁂𑀦 𑀧𑀢𑁆𑀣𑀺𑀢𑀦𑁆𑀢𑀺 𑀅𑀢𑁆𑀣𑁄, 𑀅𑀢𑁆𑀢𑀓𑀸𑀫𑀜𑁆𑀘 𑀢𑀁 𑀉𑀧𑀝𑁆𑀞𑀸𑀦𑀜𑁆𑀘𑀸𑀢𑀺 𑀅𑀢𑁆𑀢𑀓𑀸𑀫𑀼𑀧𑀝𑁆𑀞𑀸𑀦𑀁, 𑀢𑀲𑁆𑀲 𑀯𑀡𑁆𑀡𑁄 𑀅𑀢𑁆𑀢𑀓𑀸𑀫𑀼𑀧𑀝𑁆𑀞𑀸𑀦𑀯𑀡𑁆𑀡𑁄, 𑀢𑀁 𑀅𑀢𑁆𑀢𑀓𑀸𑀫𑀼𑀧𑀝𑁆𑀞𑀸𑀦𑀯𑀡𑁆𑀡𑀁. ‘‘𑀏𑀢𑀤𑀕𑁆𑀕𑀁, 𑀪𑀕𑀺𑀦𑀺, 𑀧𑀸𑀭𑀺𑀘𑀭𑀺𑀬𑀸𑀦𑀁 𑀬𑀸 𑀫𑀸𑀤𑀺𑀲𑀁 𑀲𑀻𑀮𑀯𑀦𑁆𑀢𑀁 𑀓𑀮𑁆𑀬𑀸𑀡𑀥𑀫𑁆𑀫𑀁 𑀩𑁆𑀭𑀳𑁆𑀫𑀘𑀸𑀭𑀺𑀁 𑀏𑀢𑁂𑀦 𑀥𑀫𑁆𑀫𑁂𑀦 𑀧𑀭𑀺𑀘𑀭𑁂𑀬𑁆𑀬𑀸’’𑀢𑀺 𑀏𑀯𑀁 𑀯𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀫𑁂𑀣𑀼𑀦𑀭𑀸𑀕𑀺𑀦𑁄𑀢𑀺 𑀇𑀫𑀺𑀦𑀸 𑀕𑀺𑀮𑀸𑀦𑀧𑀘𑁆𑀘𑀬𑀸𑀤𑀻𑀳𑀺 𑀉𑀧𑀝𑁆𑀞𑀸𑀦𑀲𑁆𑀲 𑀯𑀡𑁆𑀡𑀁 𑀪𑀡𑀢𑁄 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀯𑀸𑀘𑀸 𑀫𑁂𑀣𑀼𑀦𑀬𑀼𑀢𑁆𑀢𑁂𑀦𑀸𑀢𑀺 𑀏𑀢𑁆𑀣 𑀫𑁂𑀣𑀼𑀦𑀬𑀼𑀢𑁆𑀢𑁂𑀦𑁂𑀯 𑀯𑀸𑀘𑀸𑀬 𑀫𑁂𑀣𑀼𑀦𑀬𑀸𑀘𑀦𑁂 𑀕𑀭𑀼𑀓𑀁 𑀳𑁄𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀲𑀺𑀓𑁆𑀔𑀸𑀧𑀤𑀁 𑀘𑀢𑀼𑀢𑁆𑀣𑀁.

𑁨𑁩. 𑀇𑀤𑀸𑀦𑀺 𑀲𑀜𑁆𑀘𑀭𑀺𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀝𑀺𑀕𑁆𑀕𑀳𑁂𑀢𑁆𑀯𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑁂𑀦 𑀯𑀸 𑀉𑀪𑀺𑀦𑁆𑀦𑀁 𑀫𑀸𑀢𑀸𑀤𑀻𑀳𑀺 𑀯𑀸 ‘‘𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸 𑀏𑀯𑀁 𑀪𑀡𑀸𑀳𑀻’’𑀢𑀺 𑀯𑀼𑀢𑁆𑀢𑁄 𑀢𑁂𑀲𑀁 𑀯𑀘𑀦𑀁 ‘‘𑀲𑀸𑀥𑀽’’𑀢𑀺 𑀯𑀸 ‘‘𑀳𑁄𑀢𑀽’’𑀢𑀺 𑀯𑀸 ‘‘𑀪𑀡𑀸𑀫𑀻’’𑀢𑀺 𑀯𑀸 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸, 𑀲𑀻𑀲𑀓𑀫𑁆𑀧𑀦𑀸𑀤𑀻𑀳𑀺 𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀦𑁆𑀤𑁂𑀲𑀦𑁆𑀢𑀺 𑀏𑀢𑁆𑀣 𑀧𑀦 𑀇𑀢𑁆𑀣𑀻 𑀤𑀲𑀯𑀺𑀥𑀸 𑀫𑀸𑀢𑀼𑀭𑀓𑁆𑀔𑀺𑀢𑀸 𑀧𑀺𑀢𑀼𑀭𑀓𑁆𑀔𑀺𑀢𑀸 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀸 𑀪𑀸𑀢𑀼𑀭𑀓𑁆𑀔𑀺𑀢𑀸 𑀪𑀕𑀺𑀦𑀺𑀭𑀓𑁆𑀔𑀺𑀢𑀸 𑀜𑀸𑀢𑀺𑀭𑀓𑁆𑀔𑀺𑀢𑀸 𑀕𑁄𑀢𑁆𑀢𑀭𑀓𑁆𑀔𑀺𑀢𑀸 𑀥𑀫𑁆𑀫𑀭𑀓𑁆𑀔𑀺𑀢𑀸 𑀲𑀸𑀭𑀓𑁆𑀔𑀸 𑀲𑀧𑀭𑀺𑀤𑀡𑁆𑀟𑀸𑀢𑀺. 𑀤𑀲 𑀪𑀭𑀺𑀬𑀸𑀬𑁄 𑀥𑀦𑀓𑁆𑀓𑀻𑀢𑀸 𑀙𑀦𑁆𑀤𑀯𑀸𑀲𑀺𑀦𑀻 𑀪𑁄𑀕𑀯𑀸𑀲𑀺𑀦𑀻 𑀧𑀝𑀯𑀸𑀲𑀺𑀦𑀻 𑀑𑀤𑀧𑀢𑁆𑀢𑀓𑀺𑀦𑀻 𑀑𑀪𑀝𑀘𑀼𑀫𑁆𑀩𑀝𑀓𑀸 𑀤𑀸𑀲𑀻 𑀘 𑀪𑀭𑀺𑀬𑀸 𑀘 𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀘 𑀥𑀚𑀸𑀳𑀝𑀸 𑀫𑀼𑀳𑀼𑀢𑁆𑀢𑀺𑀓𑀸 𑀘𑀸𑀢𑀺.

𑀢𑀸𑀲𑀼 𑀫𑀸𑀢𑀼𑀭𑀓𑁆𑀔𑀺𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀩𑁆𑀭𑀽𑀳𑀺 ‘𑀳𑁄𑀫𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸…𑀧𑁂… 𑀫𑀼𑀳𑀼𑀢𑁆𑀢𑀺𑀓𑀸 𑀘𑀸’’𑀢𑀺, 𑀅𑀬𑀁 𑀇𑀢𑁆𑀣𑀺𑀬𑀸 𑀲𑀦𑁆𑀤𑁂𑀲𑁄 𑀦𑀸𑀫. 𑀲𑀘𑁂 𑀫𑀸𑀢𑀼𑀭𑀓𑁆𑀔𑀺𑀢𑀸𑀬 𑀫𑀸𑀢𑀸𑀧𑀺𑀢𑀸𑀪𑀸𑀢𑀸𑀪𑀕𑀺𑀦𑀺𑀆𑀤𑀬𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀦𑁆𑀢𑀺 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀩𑁆𑀭𑀽𑀳𑀺 ‘𑀳𑁄𑀢𑀼 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸…𑀧𑁂… 𑀫𑀼𑀳𑀼𑀢𑁆𑀢𑀺𑀓𑀸 𑀘𑀸’’𑀢𑀺, 𑀅𑀬𑀫𑁆𑀧𑀺 𑀇𑀢𑁆𑀣𑀺𑀬𑀸 𑀲𑀦𑁆𑀤𑁂𑀲𑁄𑀬𑁂𑀯 𑀦𑀸𑀫. 𑀏𑀯𑀁 𑀧𑀺𑀢𑀼𑀭𑀓𑁆𑀔𑀺𑀢𑀸𑀤𑀻𑀲𑀼𑀧𑀺 𑀦𑀬𑁄 𑀦𑁂𑀢𑀩𑁆𑀩𑁄. 𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺…𑀧𑁂… 𑀲𑀧𑀭𑀺𑀤𑀡𑁆𑀟𑀁 𑀩𑁆𑀭𑀽𑀳𑀺 ‘𑀳𑁄𑀢𑀼 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸…𑀧𑁂… 𑀫𑀼𑀳𑀼𑀢𑁆𑀢𑀺𑀓𑀸 𑀘𑀸’’𑀢𑀺, 𑀅𑀬𑀁 𑀧𑀼𑀭𑀺𑀲𑀲𑁆𑀲 𑀲𑀦𑁆𑀤𑁂𑀲𑁄 𑀦𑀸𑀫. 𑀲𑀘𑁂 𑀧𑀼𑀭𑀺𑀲𑀲𑁆𑀲 𑀫𑀸𑀢𑀸𑀧𑀺𑀢𑀸𑀪𑀸𑀢𑀸𑀪𑀕𑀺𑀦𑀺𑀆𑀤𑀬𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀦𑁆𑀢𑀺 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺…𑀧𑁂… 𑀲𑀧𑀭𑀺𑀤𑀡𑁆𑀟𑀁 𑀩𑁆𑀭𑀽𑀳𑀺 ‘𑀳𑁄𑀢𑀼 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸…𑀧𑁂… 𑀫𑀼𑀳𑀼𑀢𑁆𑀢𑀺𑀓𑀸 𑀘𑀸’’𑀢𑀺, 𑀅𑀬𑀫𑁆𑀧𑀺 𑀧𑀼𑀭𑀺𑀲𑀲𑁆𑀲 𑀲𑀦𑁆𑀤𑁂𑀲𑁄𑀬𑁂𑀯 𑀦𑀸𑀫, 𑀆𑀡𑀸𑀧𑀦𑀦𑁆𑀢𑀺 𑀅𑀢𑁆𑀣𑁄.

𑀯𑀻𑀫𑀁𑀲𑀺𑀢𑁆𑀯𑀸𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀲𑁆𑀲 𑀯𑀸 𑀢𑁂𑀲𑀁 𑀅𑀯𑀲𑁆𑀲𑀸𑀭𑁄𑀘𑀦𑀓𑀸𑀦𑀁 𑀫𑀸𑀢𑀸𑀧𑀺𑀢𑀸𑀪𑀸𑀢𑀸𑀪𑀕𑀺𑀦𑀺𑀆𑀤𑀻𑀦𑀁 𑀯𑀸 𑀆𑀭𑁄𑀘𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀳𑀭𑀦𑁆𑀢𑀺 𑀬𑀢𑁆𑀣 𑀧𑀳𑀺𑀢𑁄, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀲𑁆𑀲 𑀯𑀸 𑀆𑀭𑁄𑀘𑁂𑀢𑀺, 𑀲𑀸 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀢𑀼 𑀯𑀸, 𑀫𑀸 𑀯𑀸, 𑀮𑀚𑁆𑀚𑀸𑀬 𑀯𑀸 𑀢𑀼𑀡𑁆𑀳𑀻 𑀳𑁄𑀢𑀼, 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀲𑁆𑀲 𑀯𑀸 𑀳𑀭𑀦𑁆𑀢𑁄 𑀕𑀭𑀼𑀓𑀁 𑀨𑀼𑀲𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀢𑀸𑀯𑀢𑀸 ‘‘𑀧𑀝𑀺𑀕𑁆𑀕𑀡𑁆𑀳𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀻’’𑀢𑀺 𑀯𑀼𑀢𑁆𑀢𑀁 𑀅𑀗𑁆𑀕𑀢𑁆𑀢𑀬𑀁 𑀲𑀫𑁆𑀧𑀸𑀤𑀺𑀢𑀁 𑀳𑁄𑀢𑀺. 𑀇𑀫𑀸𑀬 𑀢𑀺𑀯𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀇𑀢𑁄 𑀬𑁂𑀳𑀺 𑀓𑁂𑀳𑀺𑀘𑀺 𑀤𑁆𑀯𑀻𑀳𑀺 𑀅𑀗𑁆𑀕𑁂𑀳𑀺 𑀣𑀼𑀮𑁆𑀮𑀘𑁆𑀘𑀬𑀁, 𑀏𑀓𑁂𑀦 𑀤𑀼𑀓𑁆𑀓𑀝𑀁. 𑀬𑀓𑁆𑀔𑀻𑀧𑁂𑀢𑀻𑀧𑀡𑁆𑀟𑀓𑁂𑀲𑀼 𑀅𑀗𑁆𑀕𑀢𑁆𑀢𑀬𑁂𑀦𑀧𑀺 𑀣𑀼𑀮𑁆𑀮𑀘𑁆𑀘𑀬𑀫𑁂𑀯, 𑀏𑀓𑁂𑀦 𑀯𑀸 𑀤𑁆𑀯𑀻𑀳𑀺 𑀯𑀸 𑀤𑀼𑀓𑁆𑀓𑀝𑀦𑁆𑀢𑀺.

𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀘𑀫𑀁.

𑁨𑁪. 𑀇𑀤𑀸𑀦𑀺 𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀁 𑀆𑀯𑀺 𑀓𑀸𑀢𑀼𑀁 ‘‘𑀲𑀁𑀬𑀸𑀘𑀺𑀢𑀧𑀭𑀺𑀓𑁆𑀔𑀸𑀭’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 ‘‘𑀯𑀸𑀲𑀺𑀁 𑀤𑁂𑀣, 𑀨𑀭𑀲𑀼𑀁 𑀤𑁂𑀣𑀸’’𑀢𑀺𑀆𑀤𑀺𑀦𑀸 𑀲𑀬𑀁 𑀧𑀯𑀢𑁆𑀢𑀺𑀢𑀬𑀸𑀘𑀦𑀸𑀬 𑀕𑀳𑀺𑀢𑀧𑀭𑀺𑀓𑁆𑀔𑀸𑀭𑀁 𑀲𑀁𑀬𑀸𑀘𑀺𑀢𑀧𑀭𑀺𑀓𑁆𑀔𑀸𑀭𑀁 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀦𑀬𑁂𑀦 𑀲𑀗𑁆𑀖𑀁 𑀢𑀺𑀓𑁆𑀔𑀢𑁆𑀢𑀼𑀁 𑀬𑀸𑀘𑀺𑀢𑁆𑀯𑀸 𑀮𑀤𑁆𑀥𑀪𑀺𑀓𑁆𑀔𑀽𑀳𑀺 𑀯𑀸 𑀲𑀗𑁆𑀖𑁂𑀦𑁂𑀯 𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀸𑀭𑀫𑁆𑀪𑀸𑀦𑀸𑀭𑀫𑁆𑀪𑀲𑀧𑀭𑀺𑀓𑁆𑀓𑀫𑀦𑀸𑀧𑀭𑀺𑀓𑁆𑀓𑀫𑀦𑀪𑀸𑀯𑀁 𑀜𑀢𑁆𑀯𑀸 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 ‘‘𑀓𑀼𑀝𑀺 𑀦𑀸𑀫 𑀉𑀮𑁆𑀮𑀺𑀢𑁆𑀢𑀸 𑀯𑀸 𑀳𑁄𑀢𑀺 𑀅𑀯𑀮𑀺𑀢𑁆𑀢𑀸 𑀯𑀸 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀸 𑀯𑀸’’𑀢𑀺 (𑀧𑀸𑀭𑀸. 𑁩𑁪𑁯) 𑀏𑀯𑀁 𑀯𑀼𑀢𑁆𑀢𑀮𑀓𑁆𑀔𑀡𑀁 𑀓𑀼𑀝𑀺𑀁. ‘‘𑀢𑀢𑁆𑀭𑀺𑀤𑀁 𑀧𑀫𑀸𑀡𑀁, 𑀤𑀻𑀖𑀲𑁄 𑀤𑁆𑀯𑀸𑀤𑀲 𑀯𑀺𑀤𑀢𑁆𑀣𑀺𑀬𑁄 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸, 𑀢𑀺𑀭𑀺𑀬𑀁 𑀲𑀢𑁆𑀢𑀦𑁆𑀢𑀭𑀸’’𑀢𑀺 (𑀧𑀸𑀭𑀸. 𑁩𑁪𑁮) 𑀏𑀯𑀁 𑀯𑀼𑀢𑁆𑀢𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁, ‘‘𑀫𑀬𑁆𑀳𑀁 𑀯𑀸𑀲𑀸𑀕𑀸𑀭𑀁 𑀏𑀲𑀸’’𑀢𑀺 𑀏𑀯𑀁 𑀅𑀢𑁆𑀢𑀸 𑀉𑀤𑁆𑀤𑁂𑀲𑁄 𑀏𑀢𑀺𑀲𑁆𑀲𑀸𑀢𑀺 𑀅𑀢𑁆𑀢𑀼𑀤𑁆𑀤𑁂𑀲𑀸, 𑀢𑀁 𑀅𑀢𑁆𑀢𑀼𑀤𑁆𑀤𑁂𑀲𑀁 𑀓𑀢𑁆𑀯𑀸 𑀕𑀭𑀼𑀁 𑀲𑀗𑁆𑀖𑀸𑀤𑀺𑀲𑁂𑀲𑀁 𑀨𑀼𑀲𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑀁 𑀧𑀦𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑁋 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀸𑀤𑀻𑀦𑀁 𑀆𑀲𑀬𑁂 𑀓𑀢𑀢𑁆𑀢𑀸 𑀲𑀸𑀭𑀫𑁆𑀪𑀁 𑀤𑁆𑀯𑀻𑀳𑀺 𑀩𑀮𑀻𑀩𑀤𑁆𑀤𑁂𑀳𑀺 𑀬𑀼𑀢𑁆𑀢𑁂𑀦 𑀲𑀓𑀝𑁂𑀦 𑀕𑀦𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀧𑀭𑀺𑀓𑁆𑀓𑀫𑀦𑀁 𑀉𑀮𑁆𑀮𑀺𑀢𑁆𑀢𑀸𑀤𑀺𑀪𑁂𑀤𑀁 𑀓𑀼𑀝𑀺𑀁 𑀅𑀢𑁆𑀢𑀦𑁄 𑀯𑀲𑀦𑀢𑁆𑀣𑀸𑀬 𑀓𑀭𑁄𑀦𑁆𑀢𑁄 𑀯𑀸 𑀓𑀸𑀭𑀸𑀧𑁂𑀦𑁆𑀢𑁄 𑀯𑀸 ‘‘𑀇𑀤𑀸𑀦𑀺 𑀦𑀺𑀝𑁆𑀞𑀸𑀦𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀧𑀞𑀫𑀧𑀺𑀡𑁆𑀟𑀤𑀸𑀦𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀤𑀼𑀢𑀺𑀬𑀧𑀺𑀡𑁆𑀟𑀤𑀸𑀦𑁂𑀦 𑀮𑁂𑀧𑁂 𑀖𑀝𑀺𑀢𑁂 𑀤𑁆𑀯𑁂 𑀘 𑀲𑀗𑁆𑀖𑀸𑀤𑀺𑀲𑁂𑀲𑁂 𑀤𑁆𑀯𑁂 𑀘 𑀤𑀼𑀓𑁆𑀓𑀝𑀸𑀦𑀺, 𑀲𑀘𑁂 𑀤𑁂𑀲𑀺𑀢𑀯𑀢𑁆𑀣𑀼𑀓𑀸𑀬𑁂𑀯 𑀯𑀸 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀸𑀬𑁂𑀯 𑀯𑀸 𑀳𑁄𑀢𑀺, 𑀏𑀓𑀁 𑀲𑀗𑁆𑀖𑀸𑀤𑀺𑀲𑁂𑀲𑀁 𑀤𑁆𑀯𑁂 𑀘 𑀤𑀼𑀓𑁆𑀓𑀝𑀸𑀦𑀺 𑀆𑀧𑀚𑁆𑀚𑀢𑀻𑀢𑀺.

𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀁 𑀙𑀝𑁆𑀞𑀁.

𑁨𑁫. 𑀇𑀤𑀸𑀦𑀺 𑀯𑀺𑀳𑀸𑀭𑀓𑀸𑀭𑀲𑀺𑀓𑁆𑀔𑀸𑀧𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀳𑀮𑁆𑀮𑀓’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀫𑀳𑀮𑁆𑀮𑀓𑀦𑁆𑀢𑀺 𑀲𑀲𑁆𑀲𑀸𑀫𑀺𑀓𑀪𑀸𑀯𑁂𑀦 𑀲𑀁𑀬𑀸𑀘𑀺𑀢𑀓𑀼𑀝𑀺𑀢𑁄 𑀫𑀳𑀦𑁆𑀢𑀪𑀸𑀯𑁄 𑀏𑀢𑀲𑁆𑀲 𑀅𑀢𑁆𑀣𑀺, 𑀬𑀲𑁆𑀫𑀸 𑀯𑀸 𑀯𑀢𑁆𑀣𑀼𑀁 𑀤𑁂𑀲𑀸𑀧𑁂𑀢𑁆𑀯𑀸 𑀧𑀫𑀸𑀡𑀸𑀢𑀺𑀓𑁆𑀓𑀫𑁂𑀦𑀸𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀧𑀫𑀸𑀡𑀫𑀳𑀦𑁆𑀢𑀢𑀸𑀬𑀧𑀺 𑀫𑀳𑀮𑁆𑀮𑀓𑁄, 𑀢𑀁 𑀫𑀳𑀮𑁆𑀮𑀓𑀁 𑀯𑀺𑀳𑀸𑀭𑀁 𑀯𑀸 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀧𑀦 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀪𑀸𑀯𑁂𑀦 𑀏𑀓𑁄 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀲𑁂𑀲𑀁 𑀅𑀦𑀦𑁆𑀢𑀭𑀲𑀤𑀺𑀲𑀫𑁂𑀯. 𑀇𑀥 𑀘 𑀢𑀢𑁆𑀣 𑀘 𑀯𑀸𑀲𑀸𑀕𑀸𑀭𑀁 𑀞𑀧𑁂𑀢𑁆𑀯𑀸 𑀉𑀧𑁄𑀲𑀣𑀸𑀕𑀸𑀭𑀁 𑀯𑀸 𑀚𑀦𑁆𑀢𑀸𑀖𑀭𑀁 𑀯𑀸 𑀅𑀕𑁆𑀕𑀺𑀲𑀸𑀮𑀁 𑀯𑀸 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀓𑀭𑁄𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀯𑀺𑀳𑀸𑀭𑀓𑀸𑀭𑀲𑀺𑀓𑁆𑀔𑀸𑀧𑀤𑀁 𑀲𑀢𑁆𑀢𑀫𑀁.

𑁨𑁬. 𑀇𑀤𑀸𑀦𑀺 𑀅𑀫𑀽𑀮𑀓𑀲𑀺𑀓𑁆𑀔𑀸𑀧𑀤𑀁 𑀧𑀓𑀸𑀲𑁂𑀢𑀼𑀁 ‘‘𑀅𑀫𑀽𑀮𑀓𑁂𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀅𑀫𑀽𑀮𑀓𑁂𑀦𑀸𑀢𑀺 𑀬𑀁 𑀘𑁄𑀤𑀓𑁂𑀦 𑀘𑀼𑀤𑀺𑀢𑀓𑀫𑁆𑀳𑀺 𑀧𑀼𑀕𑁆𑀕𑀮𑁂 𑀅𑀤𑀺𑀝𑁆𑀞𑀁 𑀅𑀲𑀼𑀢𑀁 𑀅𑀧𑀭𑀺𑀲𑀗𑁆𑀓𑀺𑀢𑀁, 𑀇𑀤𑀁 𑀏𑀢𑁂𑀲𑀁 𑀤𑀲𑁆𑀲𑀦𑀲𑀯𑀦𑀧𑀭𑀺𑀲𑀗𑁆𑀓𑀸𑀲𑀗𑁆𑀔𑀸𑀢𑀸𑀦𑀁 𑀫𑀽𑀮𑀸𑀦𑀁 𑀅𑀪𑀸𑀯𑀢𑁄 𑀅𑀫𑀽𑀮𑀓𑀁, 𑀢𑁂𑀦 𑀅𑀫𑀽𑀮𑀓𑁂𑀦 𑀯𑀢𑁆𑀣𑀼𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀅𑀤𑀺𑀝𑁆𑀞𑀁 𑀦𑀸𑀫 𑀅𑀢𑁆𑀢𑀦𑁄 𑀧𑀲𑀸𑀤𑀘𑀓𑁆𑀔𑀼𑀦𑀸 𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀯𑀸 𑀅𑀤𑀺𑀝𑁆𑀞𑀁. 𑀅𑀲𑀼𑀢𑀁 𑀦𑀸𑀫 𑀢𑀣𑁂𑀯 𑀓𑁂𑀦𑀘𑀺 𑀯𑀼𑀘𑁆𑀘𑀫𑀸𑀦𑀁 𑀦 𑀲𑀼𑀢𑀁. 𑀅𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫 𑀘𑀺𑀢𑁆𑀢𑁂𑀦 𑀅𑀧𑀭𑀺𑀲𑀗𑁆𑀓𑀺𑀢𑀁, 𑀢𑀁 𑀧𑀦 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀲𑁂𑀦 𑀢𑀺𑀯𑀺𑀥𑀁. 𑀢𑀢𑁆𑀣 𑀪𑀺𑀓𑁆𑀔𑀼𑀜𑁆𑀘 𑀫𑀸𑀢𑀼𑀕𑀸𑀫𑀜𑁆𑀘 𑀢𑀣𑀸𑀭𑀽𑀧𑁂 𑀞𑀸𑀦𑁂 𑀤𑀺𑀲𑁆𑀯𑀸 ‘‘𑀅𑀤𑁆𑀥𑀸 𑀇𑀫𑁂𑀳𑀺 𑀓𑀢’’𑀦𑁆𑀢𑀺 𑀯𑀸 ‘‘𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀸 𑀧𑀭𑀺𑀲𑀗𑁆𑀓𑀢𑀺, 𑀇𑀤𑀁 𑀤𑀺𑀝𑁆𑀞𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫. 𑀅𑀦𑁆𑀥𑀓𑀸𑀭𑁂 𑀧𑀝𑀺𑀘𑁆𑀙𑀦𑁆𑀦𑁄𑀓𑀸𑀲𑁂 𑀯𑀸 𑀪𑀺𑀓𑁆𑀔𑀼𑀲𑁆𑀲 𑀘 𑀫𑀸𑀢𑀼𑀕𑀸𑀫𑀲𑁆𑀲 𑀘 𑀯𑀘𑀦𑀁 𑀲𑀼𑀢𑁆𑀯𑀸 𑀤𑀼𑀢𑀺𑀬𑀲𑁆𑀲 𑀅𑀢𑁆𑀣𑀺𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀧𑀭𑀺𑀲𑀗𑁆𑀓𑀢𑀺, 𑀇𑀤𑀁 𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫. 𑀥𑀼𑀢𑁆𑀢𑁂𑀳𑀺 𑀇𑀢𑁆𑀣𑀻𑀳𑀺 𑀲𑀤𑁆𑀥𑀺𑀁 𑀧𑀘𑁆𑀘𑀦𑁆𑀢𑀯𑀺𑀳𑀸𑀭𑁂𑀲𑀼 𑀧𑀼𑀧𑁆𑀨𑀕𑀦𑁆𑀥𑀲𑀼𑀭𑀸𑀤𑀻𑀳𑀺 𑀅𑀦𑀼𑀪𑀯𑀺𑀢𑁆𑀯𑀸 𑀕𑀢𑀝𑁆𑀞𑀸𑀦𑀁 𑀤𑀺𑀲𑁆𑀯𑀸 ‘‘𑀓𑁂𑀦 𑀦𑀼 𑀔𑁄 𑀇𑀤𑀁 𑀓𑀢’’𑀦𑁆𑀢𑀺 𑀯𑀻𑀫𑀁𑀲𑀦𑁆𑀢𑁄 𑀢𑀢𑁆𑀭 𑀓𑁂𑀦𑀘𑀺 𑀪𑀺𑀓𑁆𑀔𑀼𑀦𑀸 𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑀸 𑀓𑀢𑀸 𑀳𑁄𑀢𑀺, 𑀪𑁂𑀲𑀚𑁆𑀚𑀢𑁆𑀣𑀸𑀬 𑀅𑀭𑀺𑀝𑁆𑀞𑀁 𑀯𑀸 𑀧𑀻𑀢𑀁, 𑀲𑁄 𑀢𑀲𑁆𑀲 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 ‘‘𑀅𑀬𑀁 𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀭𑀺𑀲𑀗𑁆𑀓𑀢𑀺, 𑀇𑀤𑀁 𑀫𑀼𑀢𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫. 𑀏𑀯𑀁 𑀢𑀺𑀯𑀺𑀥𑀸𑀬 𑀧𑀭𑀺𑀲𑀗𑁆𑀓𑀸𑀬 𑀅𑀪𑀸𑀯𑁂𑀦 𑀅𑀧𑀭𑀺𑀲𑀗𑁆𑀓𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀘𑁄𑀤𑁂𑀦𑁆𑀢𑁄𑀢𑀺 ‘‘𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀆𑀧𑀦𑁆𑀦𑁄𑀲𑀺, 𑀅𑀲𑁆𑀲𑀫𑀡𑁄𑀲𑀺, 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀻’’𑀢𑀺𑀆𑀤𑀻𑀳𑀺 𑀯𑀘𑀦𑁂𑀳𑀺 𑀲𑀬𑀁 𑀘𑁄𑀤𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀏𑀯𑀁 𑀘𑁄𑀤𑁂𑀦𑁆𑀢𑀲𑁆𑀲 𑀯𑀸𑀘𑀸𑀬 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀘𑁄𑀤𑀸𑀧𑁂𑀦𑁆𑀢𑁄 𑀯𑀸𑀢𑀺 𑀅𑀢𑁆𑀢𑀦𑀸 𑀢𑀲𑁆𑀲 𑀲𑀫𑀻𑀧𑁂 𑀞𑀢𑁆𑀯𑀸 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑁆𑀯𑀸 𑀘𑁄𑀤𑀸𑀧𑁂𑀦𑁆𑀢𑁄 𑀢𑀲𑁆𑀲 𑀆𑀡𑀢𑁆𑀢𑀲𑁆𑀲 𑀯𑀸𑀘𑀸𑀬 𑀯𑀸𑀘𑀸𑀬 𑀕𑀭𑀼𑀁 𑀨𑀼𑀲𑁂𑀢𑀺 𑀅𑀢𑁆𑀣𑁄. 𑀅𑀣 𑀲𑁄𑀧𑀺 𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁂𑀦 ‘‘𑀫𑀬𑀸𑀧𑀺 𑀤𑀺𑀝𑁆𑀞𑀁 𑀅𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀘𑁄𑀤𑁂𑀢𑀺, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀸𑀘𑀸𑀬 𑀆𑀧𑀢𑁆𑀢𑀺. 𑀯𑀢𑁆𑀣𑀼𑀦𑀸 𑀅𑀦𑁆𑀢𑀺𑀫𑁂𑀦 𑀘𑀸𑀢𑀺 𑀪𑀺𑀓𑁆𑀔𑀼𑀦𑁄 𑀅𑀦𑀼𑀭𑀽𑀧𑁂𑀲𑀼 𑀏𑀓𑀽𑀦𑀯𑀻𑀲𑀢𑀺𑀬𑀸 𑀧𑀸𑀭𑀸𑀚𑀺𑀓𑁂𑀲𑀼 𑀅𑀜𑁆𑀜𑀢𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀘𑀸𑀯𑁂𑀢𑀼𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀸 𑀘𑀸𑀯𑁂𑀢𑀼𑀁, 𑀬𑁄 𑀲𑀼𑀤𑁆𑀥𑀁 𑀯𑀸 𑀅𑀲𑀼𑀤𑁆𑀥𑀁 𑀯𑀸 𑀓𑀢𑀽𑀧𑀲𑀫𑁆𑀧𑀤𑀁 𑀧𑀼𑀕𑁆𑀕𑀮𑀁 𑀲𑀼𑀤𑁆𑀥𑀤𑀺𑀝𑁆𑀞𑀺𑀓𑁄 𑀲𑀫𑀸𑀦𑁄 𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁂𑀦 𑀘𑁄𑀤𑁂𑀢𑀺 𑀯𑀸 𑀘𑁄𑀤𑀸𑀧𑁂𑀢𑀺 𑀯𑀸, 𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀡𑀫𑀸𑀦𑀦𑁆𑀢𑀺 𑀇𑀫𑀺𑀦𑀸 𑀧𑀭𑀫𑁆𑀫𑀼𑀔𑀸 𑀤𑀽𑀢𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀘𑁄𑀤𑁂𑀢𑀺. 𑀘𑁄𑀤𑁂𑀦𑁆𑀢𑀲𑁆𑀲 𑀦 𑀭𑀼𑀳𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀧𑀭𑀫𑁆𑀫𑀼𑀔𑀸 𑀧𑀦 𑀲𑀢𑁆𑀢𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀯𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀅𑀫𑀽𑀮𑀓𑀲𑀺𑀓𑁆𑀔𑀸𑀧𑀤𑀁 𑀅𑀝𑁆𑀞𑀫𑀁.

𑁨𑁭. 𑀇𑀤𑀸𑀦𑀺 𑀅𑀜𑁆𑀜𑀪𑀸𑀕𑀺𑀬𑀲𑀺𑀓𑁆𑀔𑀸𑀧𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀜𑁆𑀜𑀲𑁆𑀲 𑀓𑀺𑀭𑀺𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀜𑁆𑀜𑀲𑁆𑀲 𑀓𑀺𑀭𑀺𑀬𑀦𑁆𑀢𑀺 𑀅𑀜𑁆𑀜𑀲𑁆𑀲 𑀔𑀢𑁆𑀢𑀺𑀬𑀸𑀤𑀺𑀚𑀸𑀢𑀺𑀓𑀲𑁆𑀲 𑀧𑀸𑀭𑀸𑀚𑀺𑀓𑀲𑁆𑀲 𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑀁 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦 𑀮𑁂𑀲𑁂𑀦𑀸𑀢𑀺 ‘‘𑀤𑀲 𑀮𑁂𑀲𑀸 𑀚𑀸𑀢𑀺𑀮𑁂𑀲𑁄 𑀦𑀸𑀫𑀮𑁂𑀲𑁄 𑀕𑁄𑀢𑁆𑀢𑀮𑁂𑀲𑁄 𑀮𑀺𑀗𑁆𑀕𑀮𑁂𑀲𑁄 𑀆𑀧𑀢𑁆𑀢𑀺𑀮𑁂𑀲𑁄 𑀧𑀢𑁆𑀢𑀮𑁂𑀲𑁄 𑀘𑀻𑀯𑀭𑀮𑁂𑀲𑁄 𑀉𑀧𑀚𑁆𑀛𑀸𑀬𑀮𑁂𑀲𑁄 𑀆𑀘𑀭𑀺𑀬𑀮𑁂𑀲𑁄 𑀲𑁂𑀦𑀸𑀲𑀦𑀮𑁂𑀲𑁄’’𑀢𑀺 (𑀧𑀸𑀭𑀸. 𑁩𑁯𑁪) 𑀏𑀯𑀁 𑀯𑀼𑀢𑁆𑀢𑁂𑀲𑀼 𑀤𑀲𑀲𑀼 𑀮𑁂𑀲𑁂𑀲𑀼 𑀬𑁄 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀤𑀺𑀲𑁆𑀲𑀢𑀺, 𑀢𑁂𑀦 𑀮𑁂𑀲𑁂𑀦 𑀢𑀤𑀜𑁆𑀜𑀁 𑀧𑀼𑀕𑁆𑀕𑀮𑀁 𑀩𑁆𑀭𑀳𑁆𑀫𑀘𑀭𑀺𑀬𑀸 𑀘𑀸𑀯𑁂𑀢𑀼𑀁 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀘𑁄𑀤𑁂𑀦𑁆𑀢𑁄 𑀕𑀭𑀼𑀓𑀁 𑀨𑀼𑀲𑁂𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀅𑀜𑁆𑀜𑀫𑁆𑀧𑀺 𑀯𑀢𑁆𑀣𑀼𑀁 𑀮𑀺𑀲𑁆𑀲𑀢𑀺 𑀲𑀺𑀮𑀺𑀲𑁆𑀲𑀢𑀺 𑀯𑁄𑀳𑀸𑀭𑀫𑀢𑁆𑀢𑁂𑀦𑁂𑀯 𑀈𑀲𑀓𑀁 𑀅𑀮𑁆𑀮𑀻𑀬𑀢𑀻𑀢𑀺 𑀮𑁂𑀲𑁄, 𑀚𑀸𑀢𑀺𑀬𑁂𑀯 𑀮𑁂𑀲𑁄 𑀚𑀸𑀢𑀺𑀮𑁂𑀲𑁄. 𑀏𑀲 𑀦𑀬𑁄 𑀲𑁂𑀲𑀧𑀤𑁂𑀲𑀼𑀧𑀺. 𑀮𑁂𑀲𑁂𑀦 𑀘𑁄𑀤𑁂𑀦𑁆𑀢𑁄 𑀓𑀣𑀁 𑀘𑁄𑀤𑁂𑀢𑀺? 𑀅𑀜𑁆𑀜𑁄 𑀔𑀢𑁆𑀢𑀺𑀬𑀚𑀸𑀢𑀺𑀓𑁄 𑀇𑀫𑀺𑀦𑀸 𑀘𑁄𑀤𑀓𑁂𑀦 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄 𑀳𑁄𑀢𑀺, 𑀲𑁄 𑀅𑀜𑁆𑀜𑀁 𑀅𑀢𑁆𑀢𑀦𑁄 𑀯𑁂𑀭𑀺𑀁 𑀔𑀢𑁆𑀢𑀺𑀬𑀚𑀸𑀢𑀺𑀓𑀁 𑀪𑀺𑀓𑁆𑀔𑀼𑀁 𑀧𑀲𑁆𑀲𑀺𑀢𑁆𑀯𑀸 𑀢𑀁 𑀔𑀢𑁆𑀢𑀺𑀬𑀚𑀸𑀢𑀺𑀮𑁂𑀲𑀁 𑀕𑀳𑁂𑀢𑁆𑀯𑀸 𑀏𑀯𑀁 𑀘𑁄𑀤𑁂𑀢𑀺 ‘‘𑀔𑀢𑁆𑀢𑀺𑀬𑁄 𑀫𑀬𑀸 𑀤𑀺𑀝𑁆𑀞𑁄 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄, 𑀢𑁆𑀯𑀫𑁆𑀧𑀺 𑀔𑀢𑁆𑀢𑀺𑀬𑁄 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀆𑀧𑀦𑁆𑀦𑁄𑀲𑀻’’𑀢𑀺 𑀯𑀸 ‘‘𑀲𑁄 𑀢𑁆𑀯𑀁 𑀔𑀢𑁆𑀢𑀺𑀬𑁄, 𑀦𑀸𑀜𑁆𑀜𑁄, 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑀻’’𑀢𑀺 𑀯𑀸 𑀘𑁄𑀤𑁂𑀢𑀺. 𑀏𑀯𑀁 𑀦𑀸𑀫𑀮𑁂𑀲𑀸𑀤𑀬𑁄𑀧𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀜𑁆𑀜𑀪𑀸𑀕𑀺𑀬𑀲𑀺𑀓𑁆𑀔𑀸𑀧𑀤𑀁 𑀦𑀯𑀫𑀁.

𑁨𑁮. 𑀏𑀢𑁆𑀢𑀸𑀯𑀢𑀸 ‘‘𑀕𑀭𑀼𑀓𑀸 𑀦𑀯𑀸’’𑀢𑀺 𑀉𑀤𑁆𑀤𑀺𑀝𑁆𑀞𑁂 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀼 𑀆𑀧𑀦𑁆𑀦𑁂𑀲𑀼 𑀧𑀝𑀺𑀧𑀚𑁆𑀚𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀙𑀸𑀤𑁂𑀢𑀺 𑀚𑀸𑀦𑀫𑀸𑀧𑀦𑁆𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀸𑀬𑀁 𑀧𑀺𑀡𑁆𑀟𑀢𑁆𑀣𑁄 𑁋 𑀬𑁄 𑀪𑀺𑀓𑁆𑀔𑀼 ‘‘𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑀸 𑀆𑀧𑀢𑁆𑀢𑀻’’𑀢𑀺 𑀆𑀧𑀢𑁆𑀢𑀺𑀯𑀲𑁂𑀦 𑀯𑀸 ‘‘𑀇𑀤𑀁 𑀪𑀺𑀓𑁆𑀔𑀽𑀦𑀁 𑀦 𑀯𑀝𑁆𑀝𑀢𑀻’’𑀢𑀺 𑀏𑀯𑀁 𑀯𑀢𑁆𑀣𑀼𑀯𑀲𑁂𑀦 𑀯𑀸 𑀚𑀸𑀦𑀫𑀸𑀧𑀦𑁆𑀦𑀁 𑀆𑀧𑀢𑁆𑀢𑀺𑀁 𑀬𑀸𑀯 𑀙𑀸𑀤𑁂𑀢𑀺, 𑀢𑀸𑀯 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀓𑀸𑀫𑀸 𑀧𑀭𑀺𑀯𑀸𑀲𑁄 𑀯𑀲𑀺𑀢𑀩𑁆𑀩𑁄𑀢𑀺. 𑀘𑀭𑁂𑀬𑁆𑀬𑀸𑀢𑀺 𑀫𑀸𑀦𑀢𑁆𑀢𑀁 𑀲𑀫𑀸𑀤𑀸𑀬 𑀯𑀲𑁂𑀬𑁆𑀬. 𑀓𑀺𑀢𑁆𑀢𑀓𑀁 𑀤𑀺𑀯𑀲𑀦𑁆𑀢𑀺 𑀘𑁂? 𑀙 𑀭𑀢𑁆𑀢𑀺𑀬𑁄. 𑀫𑀸𑀦𑀢𑁆𑀢𑀯𑀸𑀲𑁄 𑀧𑀦 𑀲𑀗𑁆𑀖𑁂𑀬𑁂𑀯, 𑀦 𑀕𑀡𑁂, 𑀦 𑀧𑀼𑀕𑁆𑀕𑀮𑁂, 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀗𑁆𑀖𑁂’’𑀢𑀺. 𑀧𑀭𑀺𑀯𑀼𑀢𑁆𑀣𑁄𑀢𑀺 ‘‘𑀢𑀬𑁄 𑀔𑁄 𑀉𑀧𑀸𑀮𑀺 𑀧𑀸𑀭𑀺𑀯𑀸𑀲𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀢𑁆𑀢𑀺𑀘𑁆𑀙𑁂𑀤𑀸 𑀲𑀳𑀯𑀸𑀲𑁄 𑀯𑀺𑀧𑁆𑀧𑀯𑀸𑀲𑁄 𑀅𑀦𑀸𑀭𑁄𑀘𑀦𑀸’’𑀢𑀺 (𑀘𑀽𑀴𑀯. 𑁮𑁩) 𑀏𑀯𑀁 𑀯𑀼𑀢𑁆𑀢𑀁 𑀭𑀢𑁆𑀢𑀺𑀘𑁆𑀙𑁂𑀤𑀁 𑀅𑀓𑀢𑁆𑀯𑀸 𑀧𑀭𑀺𑀯𑀼𑀢𑁆𑀣𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀲𑀳𑀯𑀸𑀲𑁄𑀢𑀺 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀉𑀤𑀓𑀧𑀸𑀢𑀝𑁆𑀞𑀸𑀦𑀩𑁆𑀪𑀦𑁆𑀢𑀭𑁂 𑀯𑀸𑀲𑁄. 𑀯𑀺𑀧𑁆𑀧𑀯𑀸𑀲𑁄 𑀦𑀸𑀫 𑀅𑀜𑁆𑀜𑀁 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀁 𑀯𑀺𑀦𑀸 𑀯𑀸𑀲𑁄. 𑀅𑀦𑀸𑀭𑁄𑀘𑀦𑀸𑀢𑀺 𑀆𑀕𑀦𑁆𑀢𑀼𑀓𑀸𑀤𑀻𑀦𑀁 𑀅𑀦𑀸𑀭𑁄𑀘𑀦𑀸. 𑀏𑀢𑁂𑀲𑀼 𑀢𑀻𑀲𑀼 𑀏𑀓𑁂𑀦𑀸𑀧𑀺 𑀭𑀢𑁆𑀢𑀺𑀘𑁆𑀙𑁂𑀤𑁄 𑀳𑁄𑀢𑀺 𑀏𑀯. 𑀏𑀢𑁆𑀣 𑀧𑀦 𑀉𑀧𑀘𑀸𑀭𑀲𑀻𑀫𑀕𑀢𑀸𑀦𑀁 𑀆𑀭𑁄𑀘𑁂𑀢𑀩𑁆𑀩𑀁, 𑀦 𑀩𑀳𑀺 𑀞𑀺𑀢𑀸𑀦𑀁, 𑀩𑀳𑀺 𑀞𑀺𑀢𑀸𑀦𑀫𑁆𑀧𑀺 𑀲𑀘𑁂 𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀧𑀲𑁆𑀲𑀢𑀺, 𑀤𑀽𑀭𑀁 𑀯𑀸 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀫𑁂𑀯, 𑀅𑀦𑀸𑀭𑁄𑀘𑁂𑀦𑁆𑀢𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘𑁂𑀯 𑀯𑀢𑁆𑀢𑀪𑁂𑀤𑁂 𑀤𑀼𑀓𑁆𑀓𑀝𑀜𑁆𑀘 𑀳𑁄𑀢𑀺. 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀉𑀧𑀘𑀸𑀭𑀲𑀻𑀫𑀁 𑀧𑀯𑀺𑀲𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺 𑀘𑁂, 𑀭𑀢𑁆𑀢𑀺𑀘𑁆𑀙𑁂𑀤𑁄𑀯 𑀳𑁄𑀢𑀺, 𑀦 𑀯𑀢𑁆𑀢𑀪𑁂𑀤𑁄.

𑀘𑀺𑀡𑁆𑀡𑀫𑀸𑀦𑀢𑁆𑀢𑀦𑁆𑀢𑀺 ‘‘𑀘𑀢𑁆𑀢𑀸𑀭𑁄 𑀔𑁄, 𑀉𑀧𑀸𑀮𑀺, 𑀫𑀸𑀦𑀢𑁆𑀢𑀘𑀸𑀭𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀢𑁆𑀢𑀺𑀘𑁆𑀙𑁂𑀤𑀸 𑀲𑀳𑀯𑀸𑀲𑁄 𑀯𑀺𑀧𑁆𑀧𑀯𑀸𑀲𑁄 𑀅𑀦𑀸𑀭𑁄𑀘𑀦𑀸 𑀊𑀦𑁂 𑀕𑀡𑁂 𑀘𑀭𑀡’’𑀦𑁆𑀢𑀺 (𑀘𑀽𑀴𑀯. 𑁯𑁨) 𑀏𑀯𑀁 𑀯𑀼𑀢𑁆𑀢𑀁 𑀭𑀢𑁆𑀢𑀺𑀘𑁆𑀙𑁂𑀤𑀁 𑀅𑀓𑀢𑁆𑀯𑀸 𑀘𑀺𑀡𑁆𑀡𑀫𑀸𑀦𑀢𑁆𑀢𑀁 𑀧𑀭𑀺𑀦𑀺𑀝𑁆𑀞𑀺𑀢𑀫𑀸𑀦𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀧𑀦 𑀲𑀳𑀯𑀸𑀲𑀸𑀤𑀬𑁄 𑀧𑀭𑀺𑀯𑀸𑀲𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀏𑀯. ‘‘𑀊𑀦𑁂 𑀕𑀡𑁂 𑀘𑀭𑀡’’𑀦𑁆𑀢𑀺 𑀏𑀢𑁆𑀣 𑀕𑀡𑁄 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸 𑀪𑀺𑀓𑁆𑀔𑀽, 𑀢𑀲𑁆𑀫𑀸 𑀲𑀘𑁂𑀧𑀺 𑀢𑀻𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀯𑀲𑀢𑀺, 𑀭𑀢𑁆𑀢𑀺𑀘𑁆𑀙𑁂𑀤𑁄 𑀳𑁄𑀢𑀺𑀬𑁂𑀯, ‘‘𑀲𑀘𑁂 𑀧𑀦 𑀢𑁂𑀦 𑀢𑁂𑀲𑀁 𑀅𑀢𑁆𑀣𑀺𑀪𑀸𑀯𑀁 𑀤𑀺𑀲𑁆𑀯𑀸 𑀆𑀭𑁄𑀘𑀺𑀢𑁂 𑀧𑀓𑁆𑀓𑀫𑀦𑁆𑀢𑀺, 𑀊𑀦𑁂 𑀕𑀡𑁂 𑀘𑀭𑀡𑀤𑁄𑀲𑁄 𑀦 𑀳𑁄𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁯𑁭) 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁 𑀓𑀺𑀭. 𑀅𑀩𑁆𑀪𑁂𑀬𑁆𑀬𑀸𑀢𑀺 𑀢𑀁 𑀪𑀺𑀓𑁆𑀔𑀼𑀁 𑀯𑀻𑀲𑀢𑀺𑀕𑀡𑁄 𑀲𑀗𑁆𑀖𑁄 𑀅𑀩𑁆𑀪𑁂𑀬𑁆𑀬 𑀲𑀫𑁆𑀧𑀝𑀺𑀘𑁆𑀙𑁂𑀬𑁆𑀬, 𑀅𑀩𑁆𑀪𑀸𑀦𑀓𑀫𑁆𑀫𑀯𑀲𑁂𑀦 𑀑𑀲𑀸𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲𑀘𑁂 𑀏𑀓𑁂𑀦𑀧𑀺 𑀊𑀦𑁄 𑀯𑀻𑀲𑀢𑀺𑀕𑀡𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀢𑀁 𑀪𑀺𑀓𑁆𑀔𑀼𑀁 𑀅𑀩𑁆𑀪𑁂𑀬𑁆𑀬, 𑀲𑁄 𑀘 𑀪𑀺𑀓𑁆𑀔𑀼 𑀦 𑀅𑀩𑁆𑀪𑀺𑀢𑁄, 𑀢𑁂 𑀘 𑀪𑀺𑀓𑁆𑀔𑀽 𑀕𑀸𑀭𑀬𑁆𑀳𑀸, 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁨𑁯. 𑀇𑀤𑀸𑀦𑀺 𑀬𑀣𑀸 𑀙𑀸𑀤𑀺𑀢𑀸 𑀆𑀧𑀢𑁆𑀢𑀺 𑀙𑀦𑁆𑀦𑀸 𑀳𑁄𑀢𑀺, 𑀢𑀁 𑀧𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀆𑀧𑀢𑁆𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀬𑀁 𑀧𑀤𑀬𑁄𑀚𑀦𑀸 𑁋 𑀆𑀧𑀢𑁆𑀢𑀺𑀢𑀸 𑀘 𑀅𑀦𑀼𑀓𑁆𑀔𑀺𑀢𑁆𑀢𑀢𑀸 𑀘 𑀅𑀦𑀦𑁆𑀢𑀭𑀸𑀬𑀢𑀸 𑀘 𑀧𑀳𑀼𑀢𑁆𑀢𑀢𑀸 𑀘 𑀆𑀧𑀢𑁆𑀢𑀺𑀦𑀼𑀓𑁆𑀔𑀺𑀢𑁆𑀢𑀅𑀦𑀦𑁆𑀢𑀭𑀸𑀬𑀧𑀳𑀼𑀢𑁆𑀢𑀢𑀸𑀬𑁄, 𑀏𑀢𑀸𑀲𑀼 𑀘𑀢𑀽𑀲𑀼 𑀢𑀣𑀸𑀲𑀜𑁆𑀜𑀺𑀢𑀸 𑀘 𑀙𑀸𑀤𑁂𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀙𑀸𑀤𑀦𑀸 𑀘𑀸𑀢𑀺 𑀏𑀯𑀁 𑀤𑀲𑀳𑀗𑁆𑀕𑁂𑀳𑀺 𑀅𑀭𑀼𑀡𑀼𑀕𑁆𑀕𑀫𑀫𑁆𑀳𑀺 𑀙𑀦𑁆𑀦𑀸 𑀳𑁄𑀢𑀻𑀢𑀺. 𑀏𑀢𑁆𑀣 𑀧𑀦 𑀆𑀧𑀢𑁆𑀢𑀺𑀆𑀤𑀻𑀲𑀼 𑀘𑀢𑀽𑀲𑀼 𑀆𑀧𑀢𑁆𑀢𑀺𑀲𑀜𑁆𑀜𑀺𑀢𑀸 𑀘 𑀅𑀦𑀼𑀓𑁆𑀔𑀺𑀢𑁆𑀢𑀲𑀜𑁆𑀜𑀺𑀢𑀸 𑀘 𑀅𑀦𑀦𑁆𑀢𑀭𑀸𑀬𑀲𑀜𑁆𑀜𑀺𑀢𑀸 𑀘 𑀧𑀳𑀼𑀢𑁆𑀢𑀲𑀜𑁆𑀜𑀺𑀢𑀸 𑀘𑀸𑀢𑀺 𑀏𑀯𑀁 𑀲𑀜𑁆𑀜𑀸𑀯𑀲𑁂𑀦 𑀬𑁄𑀚𑁂𑀢𑁆𑀯𑀸 𑀅𑀝𑁆𑀞𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀺, 𑀙𑀸𑀤𑁂𑀢𑀼𑀓𑀸𑀫𑁄𑀢𑀺 𑀇𑀤𑀫𑁂𑀓𑀁, 𑀙𑀸𑀤𑀦𑀸𑀢𑀺 𑀇𑀤𑀫𑁂𑀓𑀦𑁆𑀢𑀺 𑀏𑀯𑀁 𑀤𑀲.

𑀏𑀢𑁂𑀲𑀼 𑀧𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 ‘‘𑀆𑀧𑀢𑁆𑀢𑀺 𑀘 𑀳𑁄𑀢𑀺 𑀆𑀧𑀢𑁆𑀢𑀺𑀲𑀜𑁆𑀜𑀻 𑀘𑀸’’𑀢𑀺 𑀏𑀢𑁆𑀣 𑀬𑀁 𑀆𑀧𑀦𑁆𑀦𑁄, 𑀲𑀸 𑀢𑁂𑀭𑀲𑀦𑁆𑀦𑀁 𑀅𑀜𑁆𑀜𑀢𑀭𑀸 𑀳𑁄𑀢𑀺, 𑀲𑁄𑀧𑀺 𑀘 𑀢𑀢𑁆𑀣 𑀕𑀭𑀼𑀓𑀸𑀧𑀢𑁆𑀢𑀺𑀲𑀜𑁆𑀜𑀻𑀬𑁂𑀯 𑀳𑀼𑀢𑁆𑀯𑀸 𑀚𑀸𑀦𑀦𑁆𑀢𑁄 𑀙𑀸𑀤𑁂𑀢𑀺, 𑀙𑀦𑁆𑀦𑀸 𑀳𑁄𑀢𑀺. 𑀲𑀘𑁂 𑀢𑀢𑁆𑀣 𑀅𑀦𑀸𑀧𑀢𑁆𑀢𑀺𑀲𑀜𑁆𑀜𑀻 𑀯𑀸 𑀅𑀜𑁆𑀜𑀸𑀧𑀢𑁆𑀢𑀺𑀲𑀜𑁆𑀜𑀻 𑀯𑀸 𑀯𑁂𑀫𑀢𑀺𑀓𑁄 𑀯𑀸 𑀳𑁄𑀢𑀺, 𑀅𑀘𑁆𑀙𑀦𑁆𑀦𑀸𑀯 𑀳𑁄𑀢𑀺. 𑀢𑀺𑀯𑀺𑀥𑀁 𑀧𑀦 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁, 𑀢𑁂𑀦 𑀅𑀓𑀢𑁄 𑀅𑀦𑀼𑀓𑁆𑀔𑀺𑀢𑁆𑀢𑁄. 𑀲𑁄 𑀘𑁂 𑀧𑀓𑀢𑀢𑁆𑀢𑀲𑀜𑁆𑀜𑀻 𑀳𑀼𑀢𑁆𑀯𑀸 𑀙𑀸𑀤𑁂𑀢𑀺, 𑀙𑀦𑁆𑀦𑀸 𑀳𑁄𑀢𑀺. 𑀲𑀘𑁂 𑀅𑀧𑀓𑀢𑀢𑁆𑀢𑀲𑀜𑁆𑀜𑀻 𑀙𑀸𑀤𑁂𑀢𑀺, 𑀅𑀘𑁆𑀙𑀦𑁆𑀦𑀸 𑀳𑁄𑀢𑀺. 𑀅𑀧𑀓𑀢𑀢𑁆𑀢𑁂𑀦 𑀧𑀦 𑀧𑀓𑀢𑀢𑁆𑀢𑀲𑀜𑁆𑀜𑀺𑀦𑀸𑀧𑀺 𑀅𑀧𑀓𑀢𑀢𑁆𑀢𑀲𑀜𑁆𑀜𑀺𑀦𑀸𑀧𑀺 𑀙𑀸𑀤𑀺𑀢𑀁 𑀅𑀘𑁆𑀙𑀸𑀤𑀺𑀢𑀫𑁂𑀯 𑀳𑁄𑀢𑀻𑀢𑀺. 𑀅𑀦𑀦𑁆𑀢𑀭𑀸𑀬𑀺𑀓𑁄𑀢𑀺 𑀬𑀲𑁆𑀲 𑀤𑀲𑀲𑀼 𑀭𑀸𑀚𑀘𑁄𑀭𑀅𑀕𑁆𑀕𑀺𑀉𑀤𑀓𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀯𑀸𑀴𑀲𑀭𑀻𑀲𑀧𑀚𑀻𑀯𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁂𑀲𑀼𑀧𑀺 𑀏𑀓𑁄𑀧𑀺 𑀦𑀢𑁆𑀣𑀺, 𑀲𑁄 𑀘𑁂 𑀅𑀦𑀦𑁆𑀢𑀭𑀸𑀬𑀺𑀓𑀲𑀜𑁆𑀜𑀻 𑀳𑀼𑀢𑁆𑀯𑀸 𑀙𑀸𑀤𑁂𑀢𑀺, 𑀙𑀦𑁆𑀦𑀸 𑀳𑁄𑀢𑀺. 𑀲𑀘𑁂 𑀲𑁄 𑀅𑀦𑁆𑀥𑀓𑀸𑀭𑀪𑀻𑀭𑀼𑀓𑁄 𑀅𑀦𑀦𑁆𑀢𑀭𑀸𑀬𑁂 𑀏𑀯 𑀯𑀸𑀴𑀸𑀤𑀺𑀅𑀦𑁆𑀢𑀭𑀸𑀬𑀲𑀜𑁆𑀜𑀻 𑀳𑀼𑀢𑁆𑀯𑀸 𑀙𑀸𑀤𑁂𑀢𑀺, 𑀅𑀘𑁆𑀙𑀦𑁆𑀦𑀸𑀯 𑀳𑁄𑀢𑀺. 𑀧𑀳𑀽𑀢𑀺 𑀬𑁄 𑀲𑀓𑁆𑀓𑁄𑀢𑀺 𑀲𑀪𑀸𑀕𑀪𑀺𑀓𑁆𑀔𑀼𑀦𑁄 𑀲𑀫𑀻𑀧𑀁 𑀕𑀦𑁆𑀢𑀼𑀜𑁆𑀘𑁂𑀯 𑀆𑀭𑁄𑀘𑀺𑀢𑀼𑀜𑁆𑀘, 𑀲𑁄 𑀘𑁂 𑀧𑀳𑀼𑀲𑀜𑁆𑀜𑀻 𑀳𑀼𑀢𑁆𑀯𑀸 𑀙𑀸𑀤𑁂𑀢𑀺, 𑀙𑀦𑁆𑀦𑀸 𑀳𑁄𑀢𑀺. 𑀬𑁄 𑀧𑀦 𑀅𑀧𑀳𑀼 𑀳𑀼𑀢𑁆𑀯𑀸 𑀧𑀳𑀼𑀲𑀜𑁆𑀜𑀻, 𑀧𑀳𑀼 𑀯𑀸 𑀅𑀧𑀳𑀼𑀲𑀜𑁆𑀜𑀻 𑀳𑀼𑀢𑁆𑀯𑀸 𑀙𑀸𑀤𑁂𑀢𑀺, 𑀅𑀘𑁆𑀙𑀦𑁆𑀦𑀸𑀯 𑀳𑁄𑀢𑀻𑀢𑀺.

𑀅𑀭𑀼𑀡𑀼𑀕𑁆𑀕𑀫𑀫𑁆𑀳𑀻𑀢𑀺 𑀏𑀢𑁆𑀣 𑀧𑀼𑀭𑁂𑀪𑀢𑁆𑀢𑀁 𑀯𑀸 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺 𑀧𑀘𑁆𑀙𑀸𑀪𑀢𑁆𑀢𑀁 𑀯𑀸, 𑀬𑀸𑀯 𑀅𑀭𑀼𑀡𑀁 𑀦 𑀉𑀕𑁆𑀕𑀘𑁆𑀙𑀢𑀺, 𑀢𑀸𑀯 𑀆𑀭𑁄𑀘𑁂𑀢𑀩𑁆𑀩𑀸. 𑀲𑀘𑁂 𑀧𑀦 𑀅𑀭𑀼𑀡𑀩𑁆𑀪𑀦𑁆𑀢𑀭𑁂 𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀙𑀸𑀤𑁂𑀢𑀼𑀓𑀸𑀫𑀢𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀘𑁆𑀙𑀦𑁆𑀦𑀸𑀯 𑀳𑁄𑀢𑀺. 𑀆𑀭𑁄𑀘𑁂𑀦𑁆𑀢𑁄 𑀧𑀦 𑀲𑀪𑀸𑀕𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀦𑁆𑀦𑀲𑁆𑀲 𑀆𑀭𑁄𑀘𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀆𑀭𑁄𑀘𑁂𑀢𑀺, 𑀆𑀧𑀢𑁆𑀢𑀺 𑀧𑀦 𑀆𑀯𑀺𑀓𑀢𑀸 𑀳𑁄𑀢𑀺, 𑀆𑀭𑁄𑀘𑀦𑀧𑀘𑁆𑀘𑀬𑀸 𑀧𑀦 𑀅𑀜𑁆𑀜𑀁 𑀤𑀼𑀓𑁆𑀓𑀝𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀇𑀫𑀺𑀦𑀸 𑀅𑀜𑁆𑀜𑀫𑁆𑀧𑀺 𑀯𑀢𑁆𑀣𑀼𑀲𑀪𑀸𑀕𑀸𑀧𑀢𑁆𑀢𑀺𑀁 𑀆𑀭𑁄𑀘𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀻𑀧𑀺𑀢𑁄 𑀳𑁄𑀢𑀺. 𑀆𑀭𑁄𑀘𑁂𑀦𑁆𑀢𑁂𑀦 𑀧𑀦 ‘‘𑀅𑀳𑀁 𑀢𑀯 𑀲𑀦𑁆𑀢𑀺𑀓𑁂 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀯𑀺 𑀓𑀭𑁄𑀫𑀻’’𑀢𑀺 𑀯𑀸 ‘‘𑀆𑀘𑀺𑀓𑁆𑀔𑀸𑀫𑀻’’𑀢𑀺 𑀯𑀸 ‘‘𑀆𑀭𑁄𑀘𑁂𑀫𑀻’’𑀢𑀺 𑀯𑀸 ‘‘𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀪𑀸𑀯𑀁 𑀚𑀸𑀦𑀸𑀳𑀻’’𑀢𑀺 𑀯𑀸 ‘‘𑀏𑀓𑀁 𑀕𑀭𑀼𑀓𑀸𑀧𑀢𑁆𑀢𑀺𑀁 𑀆𑀯𑀺 𑀓𑀭𑁄𑀫𑀻’’𑀢𑀺 𑀯𑀸 𑀆𑀤𑀺𑀦𑀸 𑀦𑀬𑁂𑀦 𑀯𑀢𑁆𑀢𑀩𑁆𑀩𑀁, 𑀏𑀢𑁆𑀢𑀸𑀯𑀢𑀸 𑀅𑀘𑁆𑀙𑀦𑁆𑀦𑀸𑀯 𑀳𑁄𑀢𑀺. 𑀲𑀘𑁂 ‘‘𑀮𑀳𑀼𑀓𑀸𑀧𑀢𑁆𑀢𑀺𑀁 𑀆𑀭𑁄𑀘𑁂𑀫𑀻’’𑀢𑀺 𑀯𑀤𑀢𑀺, 𑀙𑀦𑁆𑀦𑀸𑀯 𑀳𑁄𑀢𑀻𑀢𑀺. 𑀲𑀗𑁆𑀖𑀸𑀤𑀺𑀲𑁂𑀲𑀯𑀺𑀦𑀺𑀘𑁆𑀙𑀬𑁄.

𑀲𑀗𑁆𑀖𑀸𑀤𑀺𑀲𑁂𑀲𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀘𑀻𑀯𑀭𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁦. 𑀏𑀯𑀁 𑀕𑀭𑀼𑀓𑁂 𑀲𑀺𑀓𑁆𑀔𑀺𑀢𑀩𑁆𑀩𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀘𑀻𑀯𑀭𑁂𑀲𑀼 𑀤𑀲𑁆𑀲𑁂𑀢𑀼𑀁 ‘‘𑀘𑀻𑀯𑀭’’𑀦𑁆𑀢𑀺 𑀉𑀤𑁆𑀥𑀝𑀁. 𑀢𑀢𑁆𑀣 𑀚𑀸𑀢𑀺𑀢𑁄 𑀙 𑀘𑀻𑀯𑀭𑀸𑀦𑀺 (𑀫𑀳𑀸𑀯. 𑁩𑁩𑁯; 𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁨-𑁪𑁬𑁩; 𑀓𑀗𑁆𑀔𑀸. 𑀅𑀝𑁆𑀞. 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸), 𑀢𑀸𑀦𑀺 𑀓𑀸𑀦𑀻𑀢𑀺 𑀘𑁂, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀔𑁄𑀫𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀔𑁄𑀫𑀁 𑀦𑀸𑀫 𑀔𑁄𑀫𑀯𑀸𑀓𑀲𑀼𑀢𑁆𑀢𑁂𑀳𑀺 𑀓𑀢𑀁 𑀯𑀢𑁆𑀣𑀁. 𑀲𑀸𑀡𑀁 𑀦𑀸𑀫 𑀲𑀸𑀡𑀯𑀸𑀓𑁂𑀳𑀺 𑀓𑀢𑀁 𑀯𑀢𑁆𑀣𑀁. 𑀪𑀗𑁆𑀕𑀁 𑀦𑀸𑀫 𑀔𑁄𑀫𑀲𑀼𑀢𑁆𑀢𑀸𑀤𑀻𑀳𑀺 𑀧𑀜𑁆𑀘𑀳𑀺 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀁 𑀯𑀢𑁆𑀣𑀁. 𑀧𑀸𑀝𑁂𑀓𑁆𑀓𑀁 𑀯𑀸𑀓𑀫𑀬𑀫𑁂𑀯 𑀯𑀸𑀢𑀺 𑀯𑀤𑀦𑁆𑀢𑀺. 𑀓𑀫𑁆𑀩𑀮𑀁 𑀦𑀸𑀫 𑀫𑀦𑀼𑀲𑁆𑀲𑀮𑁄𑀫𑀁 𑀯𑀸𑀴𑀮𑁄𑀫𑀁 𑀞𑀧𑁂𑀢𑁆𑀯𑀸 𑀮𑁄𑀫𑁂𑀳𑀺 𑀯𑀸𑀬𑀺𑀢𑁆𑀯𑀸 𑀓𑀢𑀁 𑀯𑀢𑁆𑀣𑀁. 𑀙𑀴𑁂𑀢𑀸𑀦𑀻𑀢𑀺 𑀙 𑀏𑀢𑀸𑀦𑀺. 𑀲𑀳 𑀅𑀦𑀼𑀮𑁄𑀫𑁂𑀳𑀻𑀢𑀺 𑀲𑀸𑀦𑀼𑀮𑁄𑀫𑀸𑀦𑀺. 𑀚𑀸𑀢𑀺𑀢𑁄 𑀧𑀦 𑀓𑀧𑁆𑀧𑀺𑀬𑀸𑀦𑀺 𑀙 𑀘𑀻𑀯𑀭𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁧. 𑀇𑀤𑀸𑀦𑀺 𑀢𑁂𑀲𑀁 𑀅𑀦𑀼𑀮𑁄𑀫𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀓𑀽𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 (𑀫𑀳𑀸𑀯. 𑀅𑀝𑁆𑀞. 𑁩𑁦𑁫) 𑀤𑀼𑀓𑀽𑀮𑀁 𑀲𑀸𑀡𑀲𑁆𑀲 𑀅𑀦𑀼𑀮𑁄𑀫𑀁 𑀯𑀸𑀓𑀫𑀬𑀢𑁆𑀢𑀸. 𑀧𑀝𑁆𑀝𑀼𑀡𑁆𑀡𑀦𑁆𑀢𑀺 𑀧𑀝𑁆𑀝𑀼𑀡𑁆𑀡𑀤𑁂𑀲𑁂 𑀧𑀸𑀡𑀓𑁂𑀳𑀺 𑀲𑀜𑁆𑀚𑀸𑀢𑀯𑀢𑁆𑀣𑀁. 𑀲𑁄𑀫𑀸𑀭𑀤𑁂𑀲𑁂, 𑀘𑀻𑀦𑀤𑁂𑀲𑁂 𑀚𑀸𑀢𑀁 𑀲𑁄𑀫𑀸𑀭𑀘𑀻𑀦𑀚𑀁 𑀧𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀸𑀦𑀺 𑀢𑀻𑀡𑀺𑀧𑀺 𑀓𑁄𑀲𑁂𑀬𑁆𑀬𑀲𑁆𑀲 𑀅𑀦𑀼𑀮𑁄𑀫𑀸𑀦𑀺 𑀧𑀸𑀡𑀓𑁂𑀳𑀺 𑀓𑀢𑀲𑀼𑀢𑁆𑀢𑀫𑀬𑀢𑁆𑀢𑀸. 𑀇𑀤𑁆𑀥𑀺𑀚𑀦𑁆𑀢𑀺 𑀏𑀳𑀺𑀪𑀺𑀓𑁆𑀔𑀽𑀦𑀁 𑀧𑀼𑀜𑁆𑀜𑀺𑀤𑁆𑀥𑀺𑀬𑀸 𑀦𑀺𑀩𑁆𑀩𑀢𑁆𑀢𑀘𑀻𑀯𑀭𑀁. 𑀢𑀁 𑀧𑀦 𑀔𑁄𑀫𑀸𑀤𑀻𑀦𑀁 𑀅𑀜𑁆𑀜𑀢𑀭𑀁 𑀳𑁄𑀢𑀺. 𑀓𑀧𑁆𑀧𑀭𑀼𑀓𑁆𑀔𑁂𑀳𑀺 𑀦𑀺𑀩𑁆𑀩𑀢𑁆𑀢𑀁 𑀚𑀸𑀮𑀺𑀦𑀺𑀬𑀸 𑀤𑁂𑀯𑀓𑀜𑁆𑀜𑀸𑀬 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲 𑀤𑀺𑀦𑁆𑀦𑀯𑀢𑁆𑀣𑀸𑀤𑀺𑀓𑀁 𑀤𑁂𑀯𑀤𑀺𑀦𑁆𑀦𑀁. 𑀢𑀫𑁆𑀧𑀺 𑀔𑁄𑀫𑀸𑀤𑀻𑀳𑀺 𑀦𑀺𑀩𑁆𑀩𑀢𑁆𑀢𑀯𑀢𑁆𑀣𑀲𑀤𑀺𑀲𑀢𑁆𑀢𑀸 𑀙𑀦𑁆𑀦𑀫𑁆𑀧𑀺 𑀅𑀦𑀼𑀮𑁄𑀫𑀁 𑀳𑁄𑀢𑀺𑀬𑁂𑀯 𑀓𑀧𑁆𑀧𑀸𑀲𑀺𑀓𑀲𑁆𑀲 𑀯𑀸, 𑀇𑀤𑁆𑀥𑀺𑀚𑀫𑁆𑀧𑀺 𑀢𑀣𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀲 𑀢𑀲𑁆𑀲𑀸𑀢𑀺 𑀔𑁄𑀫𑀸𑀤𑀺𑀓𑀲𑁆𑀲. 𑀅𑀦𑀼𑀮𑁄𑀫𑀺𑀓𑀦𑁆𑀢𑀺 𑀅𑀦𑀼𑀭𑀽𑀧𑀁.

𑁩𑁨-𑁩𑁩. 𑀏𑀯𑀁 𑀚𑀸𑀢𑀺𑀢𑁄 𑀲𑀸𑀦𑀼𑀮𑁄𑀫𑀸𑀦𑀺 𑀙 𑀘𑀻𑀯𑀭𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀼 𑀅𑀥𑀺𑀝𑁆𑀞𑀸𑀦𑀸𑀤𑀺𑀓𑀁 𑀯𑀺𑀥𑀸𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀺𑀘𑀻𑀯𑀭’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 (𑀓𑀗𑁆𑀔𑀸. 𑀅𑀝𑁆𑀞. 𑀓𑀣𑀺𑀦𑀲𑀺𑀓𑀔𑀸𑀧𑀤𑀯𑀡𑁆𑀡𑀦𑀸; 𑀫𑀳𑀸𑀯. 𑁩𑁫𑁮) 𑀥𑀺𑀝𑁆𑀞𑀸𑀦𑀢𑁄 𑀧𑀼𑀩𑁆𑀩𑁂 𑀢𑀺𑀘𑀻𑀯𑀭𑀁 𑀦𑀸𑀫 𑀧𑀸𑀝𑁂𑀓𑁆𑀓𑀁 𑀦𑀢𑁆𑀣𑀺 𑀲𑀗𑁆𑀖𑀸𑀝𑀺𑀆𑀤𑀺𑀧𑁆𑀧𑀳𑁄𑀦𑀓𑀲𑁆𑀲 𑀧𑀘𑁆𑀘𑀢𑁆𑀣𑀭𑀡𑀸𑀤𑀺𑀯𑀲𑁂𑀦𑀸𑀧𑀺 𑀅𑀥𑀺𑀝𑁆𑀞𑀸𑀢𑀼𑀁 𑀅𑀦𑀼𑀜𑁆𑀜𑀸𑀢𑀢𑁆𑀢𑀸. 𑀢𑀲𑁆𑀫𑀸 ‘‘𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑁂𑀬𑁆𑀬 𑀦 𑀯𑀺𑀓𑀧𑁆𑀧𑁂𑀬𑁆𑀬𑀸’’𑀢𑀺 𑀏𑀢𑁆𑀣 ‘‘𑀇𑀫𑀁 𑀲𑀗𑁆𑀖𑀸𑀝𑀺’’𑀦𑁆𑀢𑀺 𑀏𑀯𑀁 𑀦𑀸𑀫𑁂 𑀕𑀳𑀺𑀢𑁂 ‘‘𑀅𑀥𑀺𑀝𑁆𑀞𑀸𑀦’’𑀫𑀺𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀁, ‘‘𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀧𑀦 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀫𑀼𑀔𑀧𑀼𑀜𑁆𑀙𑀦𑀜𑁆𑀘 𑀦𑀺𑀲𑀻𑀤𑀦𑀜𑁆𑀘 𑀫𑀼𑀔𑀧𑀼𑀜𑁆𑀙𑀦𑀦𑀺𑀲𑀻𑀤𑀦𑀁. 𑀓𑀡𑁆𑀟𑀼𑀘𑁆𑀙𑀸𑀤𑀺𑀦𑁆𑀢𑀺 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀁 𑀅𑀥𑀺𑀝𑁆𑀞𑁂𑀬𑁆𑀬, 𑀦 𑀯𑀺𑀓𑀧𑁆𑀧𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀇𑀫𑁂𑀲𑀼 𑀦𑀯𑀲𑀼 𑀘𑀻𑀯𑀭𑁂𑀲𑀼. 𑀢𑀺𑀘𑀻𑀯𑀭𑀦𑁆𑀢𑀺 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀦𑀬𑁂𑀦 𑀅𑀥𑀺𑀝𑁆𑀞𑀺𑀢𑀢𑀺𑀘𑀻𑀯𑀭𑀁. 𑀯𑀺𑀦𑀸 𑀅𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑁄 𑀪𑀺𑀓𑁆𑀔𑀼 𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺𑀅𑀮𑀤𑁆𑀥𑀝𑁆𑀞𑀸𑀦𑁂 𑀏𑀓𑀸𑀳𑀫𑁆𑀧𑀺 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀦 𑀯𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. ‘‘𑀦 𑀪𑀺𑀓𑁆𑀔𑀯𑁂 𑀘𑀸𑀢𑀼𑀫𑀸𑀲𑀁 𑀦𑀺𑀲𑀻𑀤𑀦𑁂𑀦 𑀯𑀺𑀧𑁆𑀧𑀯𑀲𑀺𑀢𑀩𑁆𑀩𑀁, 𑀬𑁄 𑀯𑀺𑀧𑁆𑀧𑀯𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀔𑀼𑀤𑁆𑀤𑀓𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁨𑁬𑁩) 𑀯𑀼𑀢𑁆𑀢𑀢𑁆𑀢𑀸 𑀘𑀸𑀢𑀼𑀫𑀸𑀲𑀁 𑀦𑀺𑀲𑀻𑀤𑀦𑀁 𑀯𑀺𑀦𑀸 𑀦 𑀯𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁩𑁪. 𑀇𑀤𑀸𑀦𑀺 𑀅𑀥𑀺𑀝𑁆𑀞𑀸𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑀁 𑀲𑀗𑁆𑀖𑀸𑀝𑀺’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀺𑀘𑁆𑀘𑀥𑀺𑀝𑁆𑀞𑀬𑁂𑀢𑀺 𑀇𑀢𑀺 𑀅𑀥𑀺𑀝𑁆𑀞𑀬𑁂, ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀏𑀯𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀬𑁂𑀢𑀺 𑀅𑀢𑁆𑀣𑁄. 𑀅𑀳𑀢𑁆𑀣𑀧𑀸𑀲𑀫𑁂𑀢𑀦𑁆𑀢𑀺 𑀤𑀽𑀭𑁂 𑀞𑀺𑀢𑀁 𑀧𑀦 𑀞𑀧𑀺𑀢𑁄𑀓𑀸𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀘𑁂 𑀏𑀓𑀁, ‘‘𑀏𑀢’’𑀦𑁆𑀢𑀺, 𑀩𑀳𑀽𑀦𑀺 𑀘𑁂, ‘‘𑀏𑀢𑀸𑀦𑀻’’𑀢𑀺 𑀯𑀢𑁆𑀯𑀸 𑀅𑀥𑀺𑀝𑁆𑀞𑀬𑁂𑀢𑀺 𑀅𑀢𑁆𑀣𑀲𑀫𑁆𑀩𑀦𑁆𑀥𑁄. 𑀲𑁂𑀲𑁂𑀲𑀼𑀧𑀺 𑀅𑀬𑀁 𑀦𑀬𑁄𑀢𑀺 𑀬𑀣𑀸 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 ‘‘𑀇𑀫𑀁 𑀉𑀢𑁆𑀢𑀭𑀸𑀲𑀗𑁆𑀕𑀁, 𑀇𑀫𑀁 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀦𑀸𑀫𑁂𑀦𑁂𑀯 𑀯𑀢𑁆𑀯𑀸 𑀲𑀫𑁆𑀫𑀼𑀔𑀸𑀧𑀺 𑀧𑀭𑀫𑁆𑀫𑀼𑀔𑀸𑀧𑀺 𑀯𑀼𑀢𑁆𑀢𑀦𑀬𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁫. 𑀇𑀤𑀸𑀦𑀺 𑀲𑀘𑁂 𑀧𑀼𑀩𑁆𑀩𑁂 𑀅𑀥𑀺𑀝𑁆𑀞𑀺𑀢𑀁 𑀢𑀺𑀘𑀻𑀯𑀭𑀁 𑀦𑀺𑀲𑀻𑀤𑀦𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀻𑀢𑀺 𑀇𑀫𑁂𑀲𑀼 𑀙𑀲𑀼 𑀘𑀻𑀯𑀭𑁂𑀲𑀼 𑀅𑀜𑁆𑀜𑀢𑀭𑀁 𑀘𑀻𑀯𑀭𑀁 𑀅𑀢𑁆𑀣𑀺, 𑀧𑀼𑀦 𑀢𑀣𑀸𑀯𑀺𑀥𑀁 𑀘𑀻𑀯𑀭𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀳𑀭𑀺𑀢𑀼𑀁 𑀇𑀘𑁆𑀙𑀦𑁆𑀢𑁂𑀦 ‘‘𑀤𑁆𑀯𑁂 𑀧𑀦 𑀦 𑀯𑀝𑁆𑀝𑀦𑁆𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯; 𑀓𑀗𑁆𑀔𑀸. 𑀅𑀝𑁆𑀞. 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀼𑀢𑁆𑀢𑀢𑁆𑀢𑀸 𑀧𑀼𑀩𑁆𑀩𑁂 𑀅𑀥𑀺𑀝𑁆𑀞𑀺𑀢𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀥𑀺𑀝𑁆𑀞𑀳𑀦𑁆𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀉𑀢𑁆𑀢𑀸𑀦𑀫𑁂𑀯. 𑀧𑀢𑁆𑀢𑀸𑀥𑀺𑀝𑁆𑀞𑀳𑀦𑁂 𑀢𑀣𑀸𑀢𑀺 ‘‘𑀇𑀫𑀁 𑀧𑀢𑁆𑀢𑀁, 𑀏𑀢𑀁 𑀧𑀢𑁆𑀢’’𑀦𑁆𑀢𑀺 𑀏𑀯𑀁 𑀦𑀸𑀫𑀫𑀢𑁆𑀢𑀫𑁂𑀯 𑀯𑀺𑀲𑁂𑀲𑁄. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺 𑀅𑀢𑁆𑀣𑁄.

𑁩𑁬. 𑀏𑀢𑀁 𑀇𑀫𑀁 𑀯 𑀲𑀗𑁆𑀖𑀸𑀝𑀺𑀁 𑀲𑀁𑀲𑁂𑀢𑀺 𑀏𑀢𑁆𑀣 𑀲𑀘𑁂 𑀅𑀦𑁆𑀢𑁄𑀕𑀩𑁆𑀪𑁂 𑀯𑀸 𑀲𑀸𑀫𑀦𑁆𑀢𑀯𑀺𑀳𑀸𑀭𑁂 𑀯𑀸 𑀳𑁄𑀢𑀺, 𑀞𑀧𑀺𑀢𑀝𑁆𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀏𑀢𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀯𑀸𑀘𑀸 𑀪𑀺𑀦𑁆𑀤𑀺𑀢𑀩𑁆𑀩𑀸, 𑀲𑀘𑁂 𑀳𑀢𑁆𑀣𑀧𑀸𑀲𑁂 𑀳𑁄𑀢𑀺, ‘‘𑀇𑀫𑀁 𑀲𑀗𑁆𑀖𑀸𑀝𑀺’’𑀦𑁆𑀢𑀺 𑀢𑁂𑀲𑀁 𑀢𑁂𑀲𑀁 𑀦𑀸𑀫𑀯𑀲𑁂𑀦 𑀯𑀸𑀘𑀸 𑀪𑀺𑀦𑁆𑀤𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀼𑀤𑁆𑀥𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀧𑀦 ‘‘𑀤𑁆𑀯𑁂 𑀘𑀻𑀯𑀭𑀲𑁆𑀲 𑀅𑀥𑀺𑀝𑁆𑀞𑀸𑀦𑀸 𑀓𑀸𑀬𑁂𑀦 𑀯𑀸 𑀅𑀥𑀺𑀝𑁆𑀞𑁂𑀢𑀺, 𑀯𑀸𑀘𑀸𑀬 𑀯𑀸 𑀅𑀥𑀺𑀝𑁆𑀞𑁂𑀢𑀻’’𑀢𑀺 (𑀧𑀭𑀺. 𑁩𑁨𑁨) 𑀯𑀼𑀢𑁆𑀢𑀢𑁆𑀢𑀸 𑀲𑀗𑁆𑀖𑀸𑀝𑀺𑀆𑀤𑀺𑀓𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀘𑀺𑀢𑁆𑀢𑁂𑀦 𑀆𑀪𑁄𑀕𑀁 𑀓𑀢𑁆𑀯𑀸 𑀓𑀸𑀬𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑁂𑀦 𑀓𑀸𑀬𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁, 𑀬𑁂𑀦 𑀓𑁂𑀦𑀘𑀺 𑀲𑀭𑀻𑀭𑀸𑀯𑀬𑀯𑁂𑀦 𑀅𑀨𑀼𑀲𑀦𑁆𑀢𑀲𑁆𑀲 𑀦 𑀯𑀝𑁆𑀝𑀢𑀺. 𑀯𑀸𑀘𑀸𑀬 𑀅𑀥𑀺𑀝𑁆𑀞𑀳𑀦𑁆𑀢𑁂𑀦 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀢𑀣𑀸 𑀧𑀢𑁆𑀢𑁂𑀧𑀺. 𑀯𑀺𑀤𑀽𑀢𑀺 𑀧𑀡𑁆𑀟𑀺𑀢𑁄.

𑁩𑁭-𑁮. 𑀇𑀤𑀸𑀦𑀺 𑀢𑁂𑀲𑀁 𑀧𑀫𑀸𑀡𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀖𑀸𑀝𑀺 𑀧𑀘𑁆𑀙𑀺𑀫𑀦𑁆𑀢𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑀻𑀖𑀢𑁄 𑀫𑀼𑀝𑁆𑀞𑀺𑀧𑀜𑁆𑀘𑀓𑀢𑁄 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯; 𑀓𑀗𑁆𑀔𑀸. 𑀅𑀝𑁆𑀞. 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀧𑀝𑁆𑀞𑀸𑀬 ‘‘𑀢𑀢𑁆𑀭𑀺𑀤𑀁 𑀲𑀼𑀕𑀢𑀲𑁆𑀲 𑀲𑀼𑀕𑀢𑀘𑀻𑀯𑀭𑀧𑁆𑀧𑀫𑀸𑀡𑀁, 𑀤𑀻𑀖𑀲𑁄 𑀦𑀯 𑀯𑀺𑀤𑀢𑁆𑀣𑀺𑀬𑁄 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸, 𑀢𑀺𑀭𑀺𑀬𑀁 𑀙 𑀯𑀺𑀤𑀢𑁆𑀣𑀺𑀬𑁄’’𑀢𑀺 (𑀧𑀸𑀘𑀺. 𑁫𑁪𑁮) 𑀏𑀯𑀁 𑀯𑀼𑀢𑁆𑀢𑀲𑀼𑀕𑀢𑀘𑀻𑀯𑀭𑀽𑀦𑀸𑀧𑀺 𑀯𑀝𑁆𑀝𑀢𑀺. 𑀢𑀺𑀭𑀺𑀬𑀁 𑀧𑀦 𑀫𑀼𑀝𑁆𑀞𑀺𑀢𑁆𑀢𑀺𑀓𑀁. 𑀘-𑀲𑀤𑁆𑀤𑁂𑀦 𑀅𑀢𑀺𑀭𑁂𑀓𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀉𑀢𑁆𑀢𑀭𑀸𑀲𑀗𑁆𑀕𑀲𑁆𑀲𑀧𑀺 𑀏𑀢𑀤𑁂𑀯 𑀧𑀫𑀸𑀡𑀦𑁆𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸 𑀏𑀓𑀁𑀲𑀺𑀓𑀲𑁆𑀲𑀸𑀧𑀻’’𑀢𑀺 𑀯𑀼𑀢𑁆𑀢𑀁. 𑀅𑀦𑁆𑀢𑀭𑀯𑀸𑀲𑀓𑀲𑁆𑀲 𑀧𑀦 ‘‘𑀧𑀸𑀭𑀼𑀧𑀦𑁂𑀦𑀧𑀺 𑀳𑀺 𑀲𑀓𑁆𑀓𑀸 𑀦𑀸𑀪𑀺𑀁 𑀧𑀝𑀺𑀘𑁆𑀙𑀸𑀤𑁂𑀢𑀼’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 ‘‘𑀤𑁆𑀯𑀺𑀳𑀢𑁆𑀣𑁄 𑀯𑀸’’𑀢𑀺 𑀯𑀼𑀢𑁆𑀢𑀁.

𑁩𑁯. 𑀦𑀺𑀲𑀻𑀤𑀦𑀲𑁆𑀲 𑀤𑀻𑀖𑁂𑀦𑀸𑀢𑀺 𑀏𑀢𑁆𑀣 (𑀧𑀸𑀘𑀺. 𑁫𑁩𑁧 𑀆𑀤𑀬𑁄; 𑀧𑀸𑀘𑀺. 𑀅𑀝𑁆𑀞. 𑁫𑁩𑁧; 𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀦𑀺𑀲𑀻𑀤𑀦𑀦𑁆𑀢𑀺 𑀲𑀦𑁆𑀣𑀢𑀲𑀤𑀺𑀲𑀁 𑀲𑀦𑁆𑀣𑀭𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀅𑀦𑁆𑀢𑁂 𑀯𑀼𑀢𑁆𑀢𑀧𑁆𑀧𑀫𑀸𑀡𑁂𑀦 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀨𑀸𑀮𑁂𑀢𑁆𑀯𑀸 𑀓𑀢𑀸𑀳𑀺 𑀢𑀻𑀳𑀺 𑀤𑀲𑀸𑀳𑀺 𑀬𑀼𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑀸𑀭𑀲𑁆𑀲𑁂𑀢𑀁 𑀦𑀸𑀫𑀁.

𑁪𑁦. 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺 (𑀧𑀸𑀘𑀺. 𑁫𑁩𑁮; 𑀫𑀳𑀸𑀯. 𑁩𑁫𑁪; 𑀧𑀸𑀘𑀺. 𑀅𑀝𑁆𑀞. 𑁫𑁩𑁭; 𑀓𑀗𑁆𑀔𑀸. 𑀅𑀝𑁆𑀞. 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀦𑀸𑀫 𑀬𑀲𑁆𑀲 𑀅𑀥𑁄𑀦𑀸𑀪𑀺𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀁 𑀓𑀡𑁆𑀟𑀼 𑀯𑀸 𑀧𑀺𑀴𑀓𑀸 𑀯𑀸 𑀅𑀲𑁆𑀲𑀸𑀯𑁄 𑀯𑀸 𑀣𑀼𑀮𑁆𑀮𑀓𑀘𑁆𑀙𑀼 𑀯𑀸 𑀆𑀩𑀸𑀥𑁄, 𑀢𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀸𑀬 𑀅𑀦𑀼𑀜𑁆𑀜𑀸𑀢𑀁 𑀘𑀻𑀯𑀭𑀁. 𑀕𑀸𑀣𑀸𑀬𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀯.

𑁪𑁧. 𑀅𑀟𑁆𑀠𑀢𑁂𑀬𑁆𑀬𑀸𑀯𑀸𑀢𑀺 (𑀧𑀸𑀘𑀺. 𑁫𑁪𑁪) 𑀏𑀢𑁆𑀣 𑀢𑀢𑁄 𑀉𑀤𑁆𑀥𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄.

𑁪𑁨. 𑀏𑀢𑁆𑀣𑀸𑀢𑀺 𑀲𑀗𑁆𑀖𑀸𑀝𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀯𑀲𑁆𑀲𑀺𑀓𑀲𑀸𑀝𑀺𑀓𑀸, 𑀢𑀸𑀯 𑀤𑀲𑁆𑀲𑀺𑀢𑀘𑀻𑀯𑀭𑁂𑀲𑀽𑀢𑀺 𑀅𑀢𑁆𑀣𑁄. 𑀢𑀤𑀼𑀢𑁆𑀢𑀭𑀺𑀦𑁆𑀢𑀺 𑀢𑀢𑁄 𑀢𑁂𑀲𑀁 𑀘𑀻𑀯𑀭𑀸𑀦𑀁 𑀯𑀼𑀢𑁆𑀢𑀧𑁆𑀧𑀫𑀸𑀡𑀢𑁄 𑀉𑀢𑁆𑀢𑀭𑀺𑀁 𑀓𑀭𑁄𑀦𑁆𑀢𑀲𑁆𑀲 𑀙𑁂𑀤𑀦𑀧𑀸𑀘𑀺𑀢𑁆𑀢𑀺 𑀳𑁄𑀢𑀻𑀢𑀺 𑀧𑀸𑀞𑀲𑁂𑀲𑁄, 𑀢𑀁 𑀅𑀢𑀺𑀭𑁂𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀼𑀦 𑀧𑀸𑀘𑀺𑀢𑁆𑀢𑀺𑀬𑀁 𑀤𑁂𑀲𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀢𑁆𑀣𑀭𑀡𑀫𑀼𑀔𑀘𑁄𑀴𑀸𑀢𑀺 𑀏𑀢𑁆𑀣 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀸𑀯 𑀫𑀳𑀦𑁆𑀢𑀁 𑀧𑀘𑁆𑀘𑀢𑁆𑀣𑀭𑀡𑀁 𑀆𑀓𑀗𑁆𑀔𑀢𑀺, 𑀢𑀸𑀯 𑀫𑀳𑀦𑁆𑀢𑀁 𑀧𑀘𑁆𑀘𑀢𑁆𑀣𑀭𑀡𑀁 𑀓𑀸𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁫𑁩) 𑀯𑀼𑀢𑁆𑀢𑀢𑁆𑀢𑀸 𑀧𑀘𑁆𑀘𑀢𑁆𑀣𑀭𑀡𑀲𑁆𑀲 𑀧𑀫𑀸𑀡𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺,. 𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀲𑁆𑀲 𑀧𑀦 𑀉𑀓𑁆𑀓𑀝𑁆𑀞𑀯𑀲𑁂𑀦 𑀯𑀸 𑀅𑀦𑁆𑀢𑀺𑀫𑀯𑀲𑁂𑀦 𑀯𑀸 𑀧𑀫𑀸𑀡𑀧𑀭𑀺𑀘𑁆𑀙𑁂𑀤𑁄 𑀦 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀢𑀫𑁆𑀧𑀺 𑀅𑀧𑁆𑀧𑀫𑀸𑀡𑀺𑀓𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀓𑀗𑁆𑀔𑀺𑀢𑀧𑁆𑀧𑀫𑀸𑀡𑀺𑀓𑀸’’𑀢𑀺, 𑀇𑀘𑁆𑀙𑀺𑀢𑀧𑁆𑀧𑀫𑀸𑀡𑀺𑀓𑀸𑀢𑀺 𑀅𑀢𑁆𑀣𑁄. 𑀬𑀸𑀯 𑀏𑀓𑀁 𑀥𑁄𑀯𑀻𑀬𑀢𑀺, 𑀢𑀸𑀯 𑀅𑀜𑁆𑀜𑀁 𑀧𑀭𑀺𑀪𑁄𑀕𑀢𑁆𑀣𑀸𑀬 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀤𑁆𑀯𑁂𑀧𑀺 𑀯𑀝𑁆𑀝𑀦𑁆𑀢𑀺.

𑁪𑁩. 𑀦 𑀤𑀻𑀧𑀺𑀢𑀦𑁆𑀢𑀺 𑀓𑀢𑁆𑀣 𑀦 𑀤𑀻𑀧𑀺𑀢𑀁? 𑀅𑀝𑁆𑀞𑀓𑀣𑀸𑀲𑀼. 𑀓𑀲𑁆𑀫𑀸𑀢𑀺 𑀘𑁂? ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽𑀦𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺 𑀢𑀺𑀘𑀻𑀯𑀭𑀁, 𑀅𑀢𑁆𑀣𑁄 𑀘 𑀳𑁄𑀢𑀺 𑀧𑀭𑀺𑀲𑁆𑀲𑀸𑀯𑀦𑁂𑀳𑀺𑀧𑀺 𑀣𑀯𑀺𑀓𑀸𑀳𑀺𑀧𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀭𑀺𑀓𑁆𑀔𑀸𑀭𑀘𑁄𑀴𑀓’’𑀦𑁆𑀢𑀺 (𑀫𑀳𑀸𑀯. 𑁩𑁫𑁭) 𑀩𑀳𑀽𑀦𑀁 𑀧𑀢𑁆𑀢𑀣𑀯𑀺𑀓𑀧𑀭𑀺𑀲𑁆𑀲𑀸𑀯𑀦𑀸𑀤𑀻𑀦𑀁 𑀲𑀗𑁆𑀕𑀳𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀧𑀸𑀝𑁂𑀓𑁆𑀓𑀁 𑀦𑀺𑀥𑀸𑀦𑀫𑀼𑀔𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀪𑀕𑀯𑀢𑀸 ‘‘𑀬𑀁 𑀬𑀁 𑀮𑀩𑁆𑀪𑀢𑀺, 𑀢𑀁 𑀢𑀁 𑀇𑀫𑀺𑀦𑀸 𑀯𑀺𑀥𑀸𑀦𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀼𑀦 𑀬𑁂𑀦 𑀬𑁂𑀦 𑀧𑀭𑀺𑀲𑁆𑀲𑀸𑀯𑀦𑀸𑀤𑀺𑀦𑀸 𑀅𑀢𑁆𑀣𑁄 𑀳𑁄𑀢𑀺, 𑀢𑀁 𑀢𑀁 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑀽’’𑀢𑀺 𑀅𑀦𑀼𑀓𑀫𑁆𑀧𑀸𑀬 𑀅𑀦𑀼𑀜𑁆𑀜𑀸𑀢𑀁, 𑀢𑀲𑁆𑀫𑀸 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀘𑀻𑀯𑀭𑀧𑁆𑀧𑀫𑀸𑀡𑀁 𑀣𑀯𑀺𑀓𑀫𑁆𑀧𑀺 𑀧𑀝𑀧𑀭𑀺𑀲𑁆𑀲𑀸𑀯𑀦𑀫𑁆𑀧𑀺 𑀩𑀳𑀽𑀦𑀺𑀧𑀺 𑀏𑀓𑀢𑁄 𑀓𑀢𑁆𑀯𑀸 ‘‘𑀇𑀫𑀸𑀦𑀺 𑀘𑀻𑀯𑀭𑀸𑀦𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀸𑀦𑀺 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀯𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑀣𑀸 𑀯𑀢𑁆𑀯𑀸’’𑀢𑀺, ‘‘𑀧𑀭𑀺𑀓𑁆𑀔𑀸𑀭𑀘𑁄𑀴’’𑀦𑁆𑀢𑀺 𑀯𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀓𑀧𑁆𑀧𑀺𑀬𑀦𑁆𑀢𑀺 𑀯𑀺𑀓𑀧𑁆𑀧𑀦𑀼𑀧𑀕𑀁.

𑁪𑁪. 𑀅𑀳𑀢𑀓𑀧𑁆𑀧𑀸𑀦𑀦𑁆𑀢𑀺 (𑀫𑀳𑀸𑀯. 𑁩𑁪𑁮) 𑀏𑀓𑀯𑀸𑀭𑀁 𑀥𑁄𑀯𑀺𑀢𑀓𑀸𑀦𑀁.

𑁪𑁫. 𑀉𑀢𑀼𑀤𑁆𑀥𑀝𑀸𑀦𑀦𑁆𑀢𑀺 𑀉𑀢𑀼𑀢𑁄 𑀤𑀻𑀖𑀓𑀸𑀮𑀢𑁄 𑀉𑀤𑁆𑀥𑀝𑀸𑀦𑀁, 𑀓𑀢𑀯𑀢𑁆𑀣𑀓𑀺𑀘𑁆𑀘𑀸𑀦𑀁 𑀧𑀺𑀮𑁄𑀢𑀺𑀓𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀸𑀢𑀺 𑀉𑀢𑁆𑀢𑀭𑀸𑀲𑀗𑁆𑀕𑀅𑀦𑁆𑀢𑀭𑀯𑀸𑀲𑀓𑀸. 𑀧𑀁𑀲𑀼 𑀯𑀺𑀬 𑀓𑀼𑀘𑁆𑀙𑀺𑀢𑀪𑀸𑀯𑀁 𑀧𑀝𑀺𑀓𑁆𑀓𑀽𑀮𑀪𑀸𑀯𑀁 𑀉𑀮𑀢𑀺 𑀕𑀘𑁆𑀙𑀢𑀻𑀢𑀺 𑀧𑀁𑀲𑀼𑀓𑀽𑀮𑀁, 𑀘𑁄𑀴𑀔𑀡𑁆𑀟𑀸𑀦𑀫𑁂𑀢𑀁 𑀦𑀸𑀫𑀁, 𑀢𑀲𑁆𑀫𑀺𑀁 𑀧𑀁𑀲𑀼𑀓𑀽𑀮𑁂 𑀬𑀣𑀸𑀭𑀼𑀘𑀻𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸𑀢𑀺 𑀘𑁂? ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀳𑀢𑀸𑀦𑀁 𑀤𑀼𑀲𑁆𑀲𑀸𑀦𑀁 𑀅𑀳𑀢𑀓𑀧𑁆𑀧𑀸𑀦𑀁 𑀤𑀺𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀏𑀓𑀘𑁆𑀘𑀺𑀬𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀏𑀓𑀘𑁆𑀘𑀺𑀬𑀁 𑀅𑀦𑁆𑀢𑀭𑀯𑀸𑀲𑀓𑀁, 𑀉𑀢𑀼𑀤𑁆𑀥𑀝𑀸𑀦𑀁 𑀤𑀼𑀲𑁆𑀲𑀸𑀦𑀁 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀤𑀺𑀕𑀼𑀡𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀤𑀺𑀕𑀼𑀡𑀁 𑀅𑀦𑁆𑀢𑀭𑀯𑀸𑀲𑀓𑀁, 𑀧𑀁𑀲𑀼𑀓𑀽𑀮𑁂 𑀬𑀸𑀯𑀤𑀢𑁆𑀣𑀁, 𑀧𑀸𑀧𑀡𑀺𑀓𑁂 𑀉𑀲𑁆𑀲𑀸𑀳𑁄 𑀓𑀭𑀡𑀻𑀬𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀢𑀲𑁆𑀫𑀸 𑀲𑀼𑀲𑀸𑀦𑀸𑀤𑀻𑀲𑀼 𑀧𑀢𑀺𑀢𑀧𑀁𑀲𑀼𑀓𑀽𑀮𑁂 𑀘 𑀅𑀦𑁆𑀢𑀭𑀸𑀧𑀡𑁂 𑀧𑀢𑀺𑀢𑀧𑀺𑀮𑁄𑀢𑀺𑀓𑀘𑀻𑀯𑀭𑁂 𑀘 𑀧𑀝𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺, 𑀧𑀝𑀲𑀢𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁.

𑁪𑁬. 𑀇𑀤𑀸𑀦𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀙𑀺𑀦𑁆𑀦𑀓𑀁 𑀲𑀗𑁆𑀖𑀸𑀝𑀺𑀁 𑀙𑀺𑀦𑁆𑀦𑀓𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀙𑀺𑀦𑁆𑀦𑀓𑀁 𑀅𑀦𑁆𑀢𑀭𑀯𑀸𑀲𑀓’’𑀦𑁆𑀢𑀺 (𑀫𑀳𑀸𑀯. 𑁩𑁪𑁫) 𑀯𑀢𑁆𑀯𑀸 𑀧𑀼𑀦 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀘𑀻𑀯𑀭𑁂 𑀓𑀬𑀺𑀭𑀫𑀸𑀦𑁂 𑀲𑀩𑁆𑀩𑀁 𑀙𑀺𑀦𑁆𑀦𑀓𑀁 𑀦𑀧𑁆𑀧𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀙𑀺𑀦𑁆𑀦𑀓𑀸𑀦𑀺 𑀏𑀓𑀁 𑀅𑀘𑁆𑀙𑀺𑀦𑁆𑀦𑀓𑀦𑁆𑀢𑀺. 𑀤𑁆𑀯𑁂 𑀙𑀺𑀦𑁆𑀦𑀓𑀸𑀦𑀺 𑀏𑀓𑀁 𑀅𑀘𑁆𑀙𑀺𑀦𑁆𑀦𑀓𑀁 𑀦𑀧𑁆𑀧𑀳𑁄𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀅𑀘𑁆𑀙𑀺𑀦𑁆𑀦𑀓𑀸𑀦𑀺 𑀏𑀓𑀁 𑀙𑀺𑀦𑁆𑀦𑀓𑀦𑁆𑀢𑀺. 𑀏𑀓𑀁 𑀙𑀺𑀦𑁆𑀦𑀓𑀁 𑀦𑀧𑁆𑀧𑀳𑁄𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀦𑁆𑀯𑀸𑀥𑀺𑀓𑀫𑁆𑀧𑀺 𑀆𑀭𑁄𑀧𑁂𑀢𑀼𑀁. 𑀦 𑀘, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀅𑀘𑁆𑀙𑀺𑀦𑁆𑀦𑀓𑀁 𑀥𑀸𑀭𑁂𑀢𑀩𑁆𑀩𑀁, 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁩𑁬𑁦) 𑀏𑀯𑀁 𑀯𑀼𑀢𑁆𑀢𑀯𑀺𑀥𑀸𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀻𑀲𑀽’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀲𑁆𑀲 𑀅𑀢𑁆𑀣𑁄 𑁋 𑀢𑀻𑀲𑀼 𑀘𑀻𑀯𑀭𑁂𑀲𑀼 𑀬𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀺𑀩𑁆𑀩𑀺𑀢𑀼𑀁 𑀲𑀩𑁆𑀩𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀁 𑀧𑀳𑁄𑀢𑀺, 𑀢𑀁 𑀙𑀺𑀦𑁆𑀤𑀺𑀢𑀩𑁆𑀩𑀁. 𑀲𑀩𑁆𑀩𑁂𑀲𑀼 𑀧𑀦 𑀅𑀧𑁆𑀧𑀳𑁄𑀦𑁆𑀢𑁂𑀲𑀼 𑀅𑀦𑁆𑀯𑀸𑀥𑀺𑀓𑀁 𑀆𑀤𑀺𑀬𑁂𑀬𑁆𑀬𑀸𑀢𑀺. 𑀢𑀢𑁆𑀣 𑀅𑀦𑁆𑀯𑀸𑀥𑀺 𑀦𑀸𑀫 𑀅𑀦𑀼𑀯𑀸𑀢𑀁 𑀯𑀺𑀬 𑀲𑀁𑀳𑀭𑀺𑀢𑁆𑀯𑀸 𑀘𑀻𑀯𑀭𑀲𑁆𑀲 𑀉𑀧𑀭𑀺 𑀲𑀗𑁆𑀖𑀸𑀝𑀺𑀆𑀓𑀸𑀭𑁂𑀦 𑀆𑀭𑁄𑀧𑁂𑀢𑀩𑁆𑀩𑀁. 𑀆𑀕𑀦𑁆𑀢𑀼𑀓𑀧𑀢𑁆𑀢𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀇𑀤𑀁 𑀧𑀦 𑀅𑀧𑁆𑀧𑀳𑁄𑀦𑀓𑁂 𑀅𑀦𑀼𑀜𑁆𑀜𑀸𑀢𑀁. 𑀲𑀘𑁂 𑀧𑀳𑁄𑀢𑀺, 𑀦 𑀯𑀝𑁆𑀝𑀦𑁆𑀢𑀺, 𑀙𑀺𑀦𑁆𑀤𑀺𑀢𑀩𑁆𑀩𑀫𑁂𑀯. 𑀅𑀦𑀸𑀤𑀺𑀡𑁆𑀡𑀦𑁆𑀢𑀺 𑀅𑀦𑀸𑀭𑁄𑀧𑀺𑀢𑀁 𑀅𑀦𑁆𑀯𑀸𑀥𑀺𑀓𑀁. 𑀦 𑀥𑀸𑀭𑁂𑀬𑁆𑀬𑀸𑀢𑀺 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀯𑀲𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀦 𑀥𑀸𑀭𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁭-𑁮. 𑀇𑀤𑀸𑀦𑀺 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑀦𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀕𑀸𑀫𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀧𑀦 𑀲𑀘𑁂 𑀕𑀸𑀫𑁄 (𑀧𑀸𑀭𑀸. 𑁪𑁭𑁮; 𑀧𑀸𑀭𑀸. 𑀅𑀝𑁆𑀞. 𑁨.𑁪𑁭𑁭-𑁪𑁭𑁮; 𑀓𑀗𑁆𑀔𑀸. 𑀅𑀝𑁆𑀞. 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀏𑀓𑀲𑁆𑀲 𑀭𑀜𑁆𑀜𑁄 𑀯𑀸 𑀪𑁄𑀚𑀓𑀲𑁆𑀲 𑀯𑀸 𑀯𑀲𑁂𑀦 𑀏𑀓𑀓𑀼𑀮𑀲𑁆𑀲 𑀳𑁄𑀢𑀺, 𑀧𑀸𑀓𑀸𑀭𑀸𑀤𑀺𑀦𑀸 𑀧𑀭𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀏𑀓𑀽𑀧𑀘𑀸𑀭𑁄 𑀘, 𑀏𑀯𑀭𑀽𑀧𑁂 𑀕𑀸𑀫𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀫𑀺𑀁 𑀕𑀸𑀫𑁂 𑀬𑀣𑀸𑀭𑀼𑀘𑀺𑀢𑀝𑁆𑀞𑀸𑀦𑁂 𑀯𑀲𑀺𑀢𑀼𑀁 𑀮𑀩𑁆𑀪𑀢𑀺. 𑀲𑀘𑁂 𑀲𑁄 𑀕𑀸𑀫𑁄 𑀅𑀧𑀭𑀺𑀓𑁆𑀔𑀺𑀢𑁆𑀢𑁄, 𑀬𑀲𑁆𑀫𑀺𑀁 𑀖𑀭𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀖𑀭𑁂 𑀯𑀲𑀺𑀢𑀩𑁆𑀩𑀁, 𑀢𑀲𑁆𑀲 𑀯𑀸 𑀖𑀭𑀲𑁆𑀲 𑀲𑀫𑀦𑁆𑀢𑀢𑁄 𑀳𑀢𑁆𑀣𑀧𑀸𑀲𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁.

𑀲𑀘𑁂 𑀲𑁄 𑀕𑀸𑀫𑁄 𑀯𑁂𑀲𑀸𑀮𑀺𑀓𑀼𑀲𑀺𑀦𑀸𑀭𑀸𑀤𑀬𑁄 𑀯𑀺𑀬 𑀦𑀸𑀦𑀸𑀭𑀸𑀚𑀽𑀦𑀁 𑀯𑀸 𑀪𑁄𑀚𑀓𑀸𑀦𑀁 𑀯𑀸 𑀳𑁄𑀢𑀺, 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑁄 𑀘, 𑀏𑀯𑀭𑀽𑀧𑁂 𑀕𑀸𑀫𑁂 𑀬𑀲𑁆𑀫𑀺𑀁 𑀖𑀭𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀫𑀺𑀁 𑀖𑀭𑁂 𑀯𑀸 𑀯𑀢𑁆𑀣𑀩𑁆𑀩𑀁. 𑀬𑀲𑁆𑀲𑀸 𑀯𑀻𑀣𑀺𑀬𑀸 𑀢𑀁 𑀖𑀭𑀁 𑀳𑁄𑀢𑀺, 𑀢𑀲𑁆𑀲𑀸 𑀯𑀻𑀣𑀺𑀬𑀸 𑀢𑀲𑁆𑀲 𑀖𑀭𑀲𑁆𑀲 𑀲𑀫𑁆𑀫𑀼𑀔𑀸𑀝𑁆𑀞𑀸𑀦𑁂 𑀲𑀪𑀸𑀬𑁂 𑀯𑀸 𑀦𑀕𑀭𑀤𑁆𑀯𑀸𑀭𑁂 𑀯𑀸 𑀯𑀢𑁆𑀣𑀩𑁆𑀩𑀁, 𑀢𑁂𑀲𑀁 𑀲𑀪𑀸𑀬𑀤𑁆𑀯𑀸𑀭𑀸𑀦𑀁 𑀳𑀢𑁆𑀣𑀧𑀸𑀲𑀸 𑀯𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁. 𑀲𑀘𑁂 𑀅𑀧𑀭𑀺𑀓𑁆𑀔𑀺𑀢𑁆𑀢𑁄, 𑀬𑀲𑁆𑀫𑀺𑀁 𑀖𑀭𑁂 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀢𑁆𑀣 𑀯𑀸 𑀢𑀲𑁆𑀲 𑀳𑀢𑁆𑀣𑀧𑀸𑀲𑁂 𑀯𑀸 𑀯𑀢𑁆𑀣𑀩𑁆𑀩𑀁.

𑀦𑀺𑀯𑁂𑀲𑀦𑀸𑀤𑀬𑁄 𑀳𑀫𑁆𑀫𑀺𑀬𑀧𑀭𑀺𑀬𑁄𑀲𑀸𑀦𑀸 𑀕𑀸𑀫𑀧𑀭𑀺𑀓𑁆𑀔𑁂𑀧𑀢𑁄 𑀩𑀳𑀺 𑀲𑀦𑁆𑀦𑀺𑀯𑀺𑀝𑁆𑀞𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀢𑀭𑀣𑀸 𑀢𑁂𑀲𑀁 𑀕𑀸𑀫𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀢𑁆𑀢𑀸 𑀕𑀸𑀫𑀲𑁆𑀲 𑀏𑀓𑀓𑀼𑀮𑀦𑀸𑀦𑀸𑀓𑀼𑀮𑀏𑀓𑀽𑀧𑀘𑀸𑀭𑀦𑀸𑀦𑀽𑀧𑀘𑀸𑀭𑀢𑀸𑀯𑀲𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸. 𑀦𑀺𑀯𑁂𑀲𑀦𑀸𑀤𑀻𑀦𑀁 𑀯𑀲𑁂𑀦𑁂𑀯 𑀧𑀸𑀴𑀺𑀬𑀁 (𑀧𑀸𑀭𑀸. 𑁪𑁭𑁮 𑀆𑀤𑀬𑁄) 𑀅𑀢𑁆𑀣𑁄 𑀯𑀺𑀪𑀢𑁆𑀢𑁄, 𑀦 𑀕𑀸𑀫𑀯𑀲𑁂𑀦. 𑀉𑀤𑁄𑀲𑀺𑀢𑀯𑀺𑀦𑀺𑀘𑁆𑀙𑀬𑁂 𑀅𑀬𑀁 𑀦𑀬𑁄 𑀯𑀼𑀢𑁆𑀢𑁄𑀬𑁂𑀯.

𑀦𑀺𑀯𑁂𑀲𑀦𑁂𑀢𑀺 𑀏𑀢𑁆𑀣 𑀲𑀘𑁂 𑀏𑀓𑀓𑀼𑀮𑀲𑁆𑀲 𑀦𑀺𑀯𑁂𑀲𑀦𑀁 𑀳𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀜𑁆𑀘, 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀯𑀢𑁆𑀣𑀩𑁆𑀩𑀁. 𑀅𑀧𑀭𑀺𑀓𑁆𑀔𑀺𑀢𑁆𑀢𑀜𑁆𑀘𑁂 𑀳𑁄𑀢𑀺, 𑀬𑀲𑁆𑀫𑀺𑀁 𑀕𑀩𑁆𑀪𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀫𑀺𑀁 𑀯𑀢𑁆𑀣𑀩𑁆𑀩𑀁, 𑀢𑀲𑁆𑀲 𑀕𑀩𑁆𑀪𑀲𑁆𑀲 𑀳𑀢𑁆𑀣𑀧𑀸𑀲𑀸 𑀯𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁. 𑀲𑀘𑁂 𑀦𑀸𑀦𑀸𑀓𑀼𑀮𑀲𑁆𑀲 𑀳𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀜𑁆𑀘, 𑀬𑀲𑁆𑀫𑀺𑀁 𑀕𑀩𑁆𑀪𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀫𑀺𑀁 𑀕𑀩𑁆𑀪𑁂 𑀯𑀢𑁆𑀣𑀩𑁆𑀩𑀁, 𑀲𑀩𑁆𑀩𑁂𑀲𑀁 𑀲𑀸𑀥𑀸𑀭𑀡𑀤𑁆𑀯𑀸𑀭𑀫𑀽𑀮𑁂 𑀯𑀸 𑀢𑁂𑀲𑀁 𑀕𑀩𑁆𑀪𑀤𑁆𑀯𑀸𑀭𑀫𑀽𑀮𑁂 𑀯𑀸 𑀢𑁂𑀲𑀁 𑀕𑀩𑁆𑀪𑀤𑁆𑀯𑀸𑀭𑀫𑀽𑀮𑀸𑀦𑀁 𑀯𑀸 𑀳𑀢𑁆𑀣𑀧𑀸𑀲𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁. 𑀅𑀧𑀭𑀺𑀓𑁆𑀔𑀺𑀢𑁆𑀢𑀜𑁆𑀘𑁂 𑀳𑁄𑀢𑀺, 𑀬𑀲𑁆𑀫𑀺𑀁 𑀕𑀩𑁆𑀪𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀫𑀺𑀁 𑀕𑀩𑁆𑀪𑁂 𑀯𑀢𑁆𑀣𑀩𑁆𑀩𑀁, 𑀳𑀢𑁆𑀣𑀧𑀸𑀲𑀸 𑀯𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁.

𑀉𑀤𑁄𑀲𑀺𑀢𑁄𑀢𑀺 𑀬𑀸𑀦𑀸𑀤𑀻𑀦𑀁 𑀪𑀡𑁆𑀟𑀸𑀦𑀁 𑀲𑀸𑀮𑀸. 𑀧𑀸𑀲𑀸𑀤𑁄𑀢𑀺 𑀤𑀻𑀖𑀧𑀸𑀲𑀸𑀤𑁄. 𑀳𑀫𑁆𑀫𑀺𑀬𑀦𑁆𑀢𑀺 𑀫𑀼𑀡𑁆𑀟𑀘𑁆𑀙𑀤𑀦𑀧𑀸𑀲𑀸𑀤𑁄. 𑀦𑀸𑀯𑀸 𑀧𑀦 𑀣𑀮𑀁 𑀆𑀭𑁄𑀧𑁂𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑀸𑀧𑀺 𑀳𑁄𑀢𑀺, 𑀲𑀫𑀼𑀤𑁆𑀤𑁂 𑀞𑀺𑀢𑀸𑀧𑀺. 𑀲𑀘𑁂 𑀏𑀓𑀓𑀼𑀮𑀲𑁆𑀲 𑀦𑀸𑀯𑀸 𑀳𑁄𑀢𑀺, 𑀅𑀦𑁆𑀢𑁄𑀦𑀸𑀯𑀸𑀬 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑁄𑀦𑀸𑀯𑀸𑀬 𑀯𑀢𑁆𑀣𑀩𑁆𑀩𑀁. 𑀦𑀸𑀦𑀸𑀓𑀼𑀮𑀲𑁆𑀲 𑀦𑀸𑀯𑀸 𑀳𑁄𑀢𑀺 𑀦𑀸𑀦𑀸𑀕𑀩𑁆𑀪𑀸 𑀦𑀸𑀦𑀸𑀑𑀯𑀭𑀓𑀸, 𑀬𑀲𑁆𑀫𑀺𑀁 𑀑𑀯𑀭𑀓𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀫𑀺𑀁 𑀯𑀢𑁆𑀣𑀩𑁆𑀩𑀁, 𑀘𑀻𑀯𑀭𑀲𑁆𑀲 𑀳𑀢𑁆𑀣𑀧𑀸𑀲𑀸 𑀯𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁.

𑀅𑀝𑁆𑀝𑁄𑀢𑀺 𑀧𑀝𑀺𑀭𑀸𑀚𑀸𑀤𑀻𑀦𑀁 𑀧𑀝𑀺𑀩𑀸𑀳𑀦𑀢𑁆𑀣𑀁 𑀇𑀝𑁆𑀞𑀓𑀸𑀳𑀺 𑀓𑀢𑁄 𑀩𑀳𑀮𑀪𑀺𑀢𑁆𑀢𑀺𑀓𑁄 𑀘𑀢𑀼𑀧𑀜𑁆𑀘𑀪𑀽𑀫𑀺𑀓𑁄 𑀧𑀢𑀺𑀲𑁆𑀲𑀬𑀯𑀺𑀲𑁂𑀲𑁄. 𑀫𑀸𑀴𑁄𑀢𑀺 𑀏𑀓𑀓𑀽𑀝𑀲𑀗𑁆𑀕𑀳𑀺𑀢𑁄 𑀘𑀢𑀼𑀭𑀲𑁆𑀲𑀧𑀸𑀲𑀸𑀤𑁄. 𑀇𑀫𑁂𑀲𑀼 𑀧𑀦 𑀉𑀤𑁄𑀲𑀺𑀢𑀸𑀤𑀻𑀲𑀼 𑀫𑀸𑀴𑀧𑀭𑀺𑀬𑁄𑀲𑀸𑀦𑁂𑀲𑀼 𑀦𑀺𑀯𑁂𑀲𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀺𑀯𑁂𑀲𑀦𑀦𑁆𑀢𑀺 𑀧𑀦 𑀉𑀤𑁄𑀲𑀺𑀢𑀸𑀤𑀻𑀦𑀁 𑀯𑀲𑁂𑀦 𑀅𑀓𑀢𑀸𑀬 𑀧𑀢𑀺𑀲𑁆𑀲𑀬𑀯𑀺𑀓𑀢𑀺𑀬𑀸 𑀅𑀥𑀺𑀯𑀘𑀦𑀁.

𑀆𑀭𑀸𑀫𑁄 𑀦𑀸𑀫 𑀧𑀼𑀧𑁆𑀨𑀸𑀭𑀸𑀫𑀨𑀮𑀸𑀭𑀸𑀫𑀸𑀤𑀺𑀓𑁄. 𑀲𑀘𑁂 𑀏𑀓𑀓𑀼𑀮𑀲𑁆𑀲 𑀆𑀭𑀸𑀫𑁄 𑀳𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑁄 𑀘, 𑀅𑀦𑁆𑀢𑁄𑀆𑀭𑀸𑀫𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑁄𑀆𑀭𑀸𑀫𑁂 𑀯𑀢𑁆𑀣𑀩𑁆𑀩𑀁. 𑀲𑀘𑁂 𑀅𑀧𑀭𑀺𑀓𑁆𑀔𑀺𑀢𑁆𑀢𑁄, 𑀘𑀻𑀯𑀭𑀲𑁆𑀲 𑀳𑀢𑁆𑀣𑀧𑀸𑀲𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁. 𑀲𑀘𑁂 𑀦𑀸𑀦𑀸𑀓𑀼𑀮𑀲𑁆𑀲 𑀆𑀭𑀸𑀫𑁄 𑀳𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑁄 𑀘, 𑀤𑁆𑀯𑀸𑀭𑀫𑀽𑀮𑁂 𑀯𑀸 𑀯𑀢𑁆𑀣𑀩𑁆𑀩𑀁, 𑀤𑁆𑀯𑀸𑀭𑀫𑀽𑀮𑀲𑁆𑀲 𑀳𑀢𑁆𑀣𑀧𑀸𑀲𑀸 𑀯𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁. 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀘𑁂, 𑀘𑀻𑀯𑀭𑀲𑁆𑀲 𑀳𑀢𑁆𑀣𑀧𑀸𑀲𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁.

𑀲𑀢𑁆𑀣𑁄 𑀦𑀸𑀫 𑀚𑀗𑁆𑀖𑀲𑀢𑁆𑀣𑀲𑀓𑀝𑀲𑀢𑁆𑀣𑀸𑀦𑀫𑀜𑁆𑀜𑀢𑀭𑁄. 𑀲𑀘𑁂 𑀏𑀓𑀓𑀼𑀮𑀲𑁆𑀲 𑀲𑀢𑁆𑀣𑁄 𑀳𑁄𑀢𑀺, 𑀲𑀢𑁆𑀣𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸 𑀦 𑀯𑀺𑀚𑀳𑀺𑀢𑀩𑁆𑀩𑀸, 𑀧𑀲𑁆𑀲𑀢𑁄 𑀅𑀩𑁆𑀪𑀦𑁆𑀢𑀭𑀁 𑀦 𑀯𑀺𑀚𑀳𑀺𑀢𑀩𑁆𑀩𑀁. 𑀅𑀩𑁆𑀪𑀦𑁆𑀢𑀭𑀁 𑀦𑀸𑀫 𑀅𑀝𑁆𑀞𑀯𑀻𑀲𑀢𑀺𑀳𑀢𑁆𑀣𑀁 𑀳𑁄𑀢𑀺. 𑀲𑀘𑁂 𑀕𑀘𑁆𑀙𑀦𑁆𑀢𑁄 𑀲𑀢𑁆𑀣𑁄 𑀲𑀓𑀝𑁂 𑀯𑀸 𑀪𑀕𑁆𑀕𑁂, 𑀕𑁄𑀡𑁂 𑀯𑀸 𑀦𑀝𑁆𑀞𑁂 𑀅𑀦𑁆𑀢𑀭𑀸 𑀙𑀺𑀚𑁆𑀚𑀢𑀺, 𑀬𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀢𑀢𑁆𑀣 𑀯𑀲𑀺𑀢𑀩𑁆𑀩𑀁. 𑀲𑀘𑁂 𑀦𑀸𑀦𑀸𑀓𑀼𑀮𑀲𑁆𑀲 𑀳𑁄𑀢𑀺, 𑀲𑀢𑁆𑀣𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀘𑀻𑀯𑀭𑀲𑁆𑀲 𑀳𑀢𑁆𑀣𑀧𑀸𑀲𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁.

𑀔𑁂𑀢𑁆𑀢𑀔𑀮𑁂𑀲𑀼 𑀆𑀭𑀸𑀫𑁂 𑀯𑀼𑀢𑁆𑀢𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄. 𑀤𑀼𑀫𑁂𑀢𑀺 𑀭𑀼𑀓𑁆𑀔𑀫𑀽𑀮𑁂. 𑀲𑀘𑁂 𑀏𑀓𑀓𑀼𑀮𑀲𑁆𑀲 𑀭𑀼𑀓𑁆𑀔𑀫𑀽𑀮𑀁 𑀳𑁄𑀢𑀺, 𑀬𑀁 𑀫𑀚𑁆𑀛𑀦𑁆𑀳𑀺𑀓𑀓𑀸𑀮𑁂 𑀲𑀫𑀦𑁆𑀢𑀸 𑀙𑀸𑀬𑀸 𑀨𑀭𑀢𑀺, 𑀢𑀲𑁆𑀫𑀺𑀁 𑀞𑀸𑀦𑁂 𑀅𑀯𑀺𑀭𑀴𑁂 𑀧𑀤𑁂𑀲𑁂 𑀢𑀲𑁆𑀲 𑀙𑀸𑀬𑀸𑀬 𑀨𑀼𑀝𑁆𑀞𑁄𑀓𑀸𑀲𑀲𑁆𑀲 𑀅𑀦𑁆𑀢𑁄 𑀏𑀯 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀲𑀘𑁂 𑀯𑀺𑀭𑀴𑀲𑀸𑀔𑀲𑁆𑀲 𑀧𑀦 𑀭𑀼𑀓𑁆𑀔𑀲𑁆𑀲 𑀆𑀢𑀧𑁂𑀦 𑀨𑀼𑀝𑁆𑀞𑁄𑀓𑀸𑀲𑁂 𑀞𑀧𑁂𑀢𑀺, 𑀅𑀭𑀼𑀡𑀼𑀕𑁆𑀕𑀫𑀦𑁂 𑀲𑀘𑁂 𑀲𑁄 𑀪𑀺𑀓𑁆𑀔𑀼 𑀢𑀲𑁆𑀲 𑀳𑀢𑁆𑀣𑀧𑀸𑀲𑁂 𑀦 𑀳𑁄𑀢𑀺, 𑀅𑀜𑁆𑀜𑀲𑁆𑀫𑀺𑀁 𑀯𑀸 𑀞𑀸𑀦𑁂 𑀢𑀲𑁆𑀲 𑀙𑀸𑀬𑀸𑀬𑀧𑀺 𑀳𑁄𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺𑀬𑁂𑀯. 𑀦𑀸𑀦𑀸𑀓𑀼𑀮𑀲𑁆𑀲 𑀘𑁂 𑀳𑁄𑀢𑀺, 𑀘𑀻𑀯𑀭𑀲𑁆𑀲 𑀳𑀢𑁆𑀣𑀧𑀸𑀲𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁.

𑀅𑀚𑁆𑀛𑁄𑀓𑀸𑀲𑁂 𑀧𑀦 𑀯𑀺𑀜𑁆𑀛𑀸𑀝𑀯𑀻𑀆𑀤𑀻𑀲𑀼 𑀅𑀭𑀜𑁆𑀜𑁂𑀲𑀼𑀧𑀺 𑀲𑀫𑀼𑀤𑁆𑀤𑀫𑀚𑁆𑀛𑁂 𑀫𑀘𑁆𑀙𑀩𑀦𑁆𑀥𑀸𑀦𑀁 𑀅𑀕𑀫𑀦𑀧𑀣𑁂𑀲𑀼 𑀤𑀻𑀧𑀓𑁂𑀲𑀼𑀧𑀺 𑀘𑀻𑀯𑀭𑀁 𑀞𑀧𑁂𑀢𑁆𑀯𑀸 𑀢𑀢𑁄 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑁂 𑀧𑀤𑁂𑀲𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀲𑀺𑀢𑀩𑁆𑀩𑀁. 𑀲𑀘𑁂 𑀲𑀢𑁆𑀢𑀩𑁆𑀪𑀦𑁆𑀢𑀭𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀭𑀼𑀡𑀁 𑀉𑀝𑁆𑀞𑀧𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺.

𑀏𑀢𑁆𑀣 𑀧𑀦 𑀧𑀸𑀴𑀺𑀬𑀁 ‘‘𑀕𑀸𑀫𑁄 𑀏𑀓𑀽𑀧𑀘𑀸𑀭𑁄 𑀦𑀸𑀦𑀽𑀧𑀘𑀸𑀭𑁄’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁭𑁭) 𑀅𑀯𑀺𑀲𑁂𑀲𑁂𑀦 𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀧𑀺 𑀕𑀸𑀫𑀦𑀺𑀯𑁂𑀲𑀦𑀉𑀤𑁄𑀲𑀺𑀢𑀔𑁂𑀢𑁆𑀢𑀥𑀜𑁆𑀜𑀓𑀭𑀡𑀆𑀭𑀸𑀫𑀯𑀺𑀳𑀸𑀭𑀸𑀦𑀁 𑀏𑀓𑀽𑀧𑀘𑀸𑀭𑀦𑀸𑀦𑀽𑀧𑀘𑀸𑀭𑀢𑀸 ‘‘𑀕𑀸𑀫𑁄 𑀏𑀓𑀽𑀧𑀘𑀸𑀭𑁄 𑀦𑀸𑀫 𑀏𑀓𑀓𑀼𑀮𑀲𑁆𑀲 𑀕𑀸𑀫𑁄 𑀳𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑁄 𑀘 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀘𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁭𑁮) 𑀧𑀭𑀺𑀓𑁆𑀔𑀺𑀢𑁆𑀢𑀸𑀧𑀭𑀺𑀓𑁆𑀔𑀺𑀢𑁆𑀢𑀯𑀲𑁂𑀦 𑀯𑀺𑀪𑀢𑁆𑀢𑀸. 𑀅𑀝𑁆𑀝𑀫𑀸𑀴𑀧𑀸𑀲𑀸𑀤𑀳𑀫𑁆𑀫𑀺𑀬𑀦𑀸𑀯𑀸𑀲𑀢𑁆𑀣𑀭𑀼𑀓𑁆𑀔𑀫𑀽𑀮𑀅𑀚𑁆𑀛𑁄𑀓𑀸𑀲𑀸𑀦𑀫𑁆𑀧𑀺 𑀏𑀯𑀁 𑀅𑀯𑀢𑁆𑀯𑀸 ‘‘𑀏𑀓𑀓𑀼𑀮𑀲𑁆𑀲 𑀅𑀝𑁆𑀝𑁄 𑀳𑁄𑀢𑀺, 𑀦𑀸𑀦𑀸𑀓𑀼𑀮𑀲𑁆𑀲 𑀅𑀝𑁆𑀝𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁮𑁪) 𑀦𑀬𑁂𑀦 𑀏𑀓𑀓𑀼𑀮𑀦𑀸𑀦𑀸𑀓𑀼𑀮𑀯𑀲𑁂𑀦 𑀘 𑀅𑀦𑁆𑀢𑁂 ‘‘𑀅𑀚𑁆𑀛𑁄𑀓𑀸𑀲𑁄 𑀏𑀓𑀽𑀧𑀘𑀸𑀭𑁄 𑀦𑀸𑀫 𑀅𑀕𑀸𑀫𑀓𑁂 𑀅𑀭𑀜𑁆𑀜𑁂 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸 𑀏𑀓𑀽𑀧𑀘𑀸𑀭𑁄, 𑀢𑀢𑁄 𑀧𑀭𑀁 𑀦𑀸𑀦𑀽𑀧𑀘𑀸𑀭𑁄’’𑀢𑀺 (𑀧𑀸𑀭𑀸. 𑁪𑁯𑁪) 𑀘 𑀏𑀯𑀁 𑀏𑀓𑀽𑀧𑀘𑀸𑀭𑀦𑀸𑀦𑀽𑀧𑀘𑀸𑀭𑀢𑀸 𑀯𑀺𑀪𑀢𑁆𑀢𑀸. 𑀢𑀲𑁆𑀫𑀸 𑀕𑀸𑀫𑀸𑀤𑀻𑀲𑀼 𑀧𑀭𑀺𑀓𑁆𑀔𑀺𑀢𑁆𑀢𑀁 𑀏𑀓𑀽𑀧𑀘𑀸𑀭𑀁, 𑀅𑀧𑀭𑀺𑀓𑁆𑀔𑀺𑀢𑁆𑀢𑀁 𑀦𑀸𑀦𑀽𑀧𑀘𑀸𑀭𑀦𑁆𑀢𑀺 𑀘 𑀅𑀝𑁆𑀝𑀸𑀤𑀻𑀲𑀼 𑀬𑀁 𑀏𑀓𑀓𑀼𑀮𑀲𑁆𑀲, 𑀢𑀁 𑀏𑀓𑀽𑀧𑀘𑀸𑀭𑀁 𑀦𑀸𑀦𑀸𑀓𑀼𑀮𑀲𑁆𑀲 𑀦𑀸𑀦𑀽𑀧𑀘𑀸𑀭𑀦𑁆𑀢𑀺 𑀘 𑀕𑀳𑁂𑀢𑀩𑁆𑀩𑀁. 𑀅𑀚𑁆𑀛𑁄𑀓𑀸𑀲𑀧𑀤𑁂 𑀯𑀼𑀢𑁆𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑀁.

𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸𑀜𑁆𑀜𑀢𑁆𑀭𑀸𑀢𑀺 𑀬𑀁 𑀕𑀺𑀮𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦 𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺 𑀤𑀻𑀬𑀢𑀺, 𑀢𑀁 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑀲𑁆𑀲 𑀧𑀦 𑀬𑀸𑀯 𑀭𑁄𑀕𑁄 𑀦 𑀯𑀽𑀧𑀲𑀫𑁆𑀫𑀢𑀺, 𑀢𑀲𑁆𑀫𑀺𑀁 𑀯𑀽𑀧𑀲𑀦𑁆𑀢𑁂 𑀅𑀜𑁆𑀜𑁄 𑀯𑀸 𑀓𑀼𑀧𑁆𑀧𑀢𑀺, 𑀅𑀦𑀸𑀧𑀢𑁆𑀢𑀺𑀬𑁂𑀯.

𑁪𑁯. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀁 𑀬𑀸𑀯 𑀆𑀩𑀸𑀥𑀸 𑀅𑀥𑀺𑀝𑁆𑀞𑀸𑀢𑀼𑀁, 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼𑀁. 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀯𑀲𑁆𑀲𑀸𑀦𑀁 𑀘𑀸𑀢𑀼𑀫𑀸𑀲𑀁 𑀅𑀥𑀺𑀝𑁆𑀞𑀸𑀢𑀼𑀁, 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁫𑁮) 𑀯𑀼𑀢𑁆𑀢𑀢𑁆𑀢𑀸 𑀭𑁄𑀕𑀧𑀭𑀺𑀬𑀦𑁆𑀢𑀸 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺, 𑀯𑀲𑁆𑀲𑀸𑀦𑀧𑀭𑀺𑀬𑀦𑁆𑀢𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀸𑀢𑀺 𑀢𑀺𑀘𑀻𑀯𑀭𑀸𑀤𑀬𑁄 𑀓𑀸𑀮𑀯𑀲𑁂𑀦 𑀅𑀧𑀭𑀺𑀬𑀦𑁆𑀢𑀺𑀓𑀸𑀢𑀺 𑀅𑀢𑁆𑀣𑁄.

𑁫𑁦. 𑀧𑀘𑁆𑀘𑀢𑁆𑀣𑀭𑀡𑀸𑀤𑀺𑀢𑁆𑀢𑀬𑀁 𑀲𑀤𑀲𑀫𑁆𑀧𑀺 𑀅𑀤𑀲𑀫𑁆𑀧𑀺 𑀭𑀢𑁆𑀢𑀫𑁆𑀧𑀺 𑀅𑀭𑀢𑁆𑀢𑀫𑁆𑀧𑀺 𑀆𑀤𑀺𑀡𑁆𑀡𑀓𑀧𑁆𑀧𑀫𑁆𑀧𑀺 𑀅𑀦𑀸𑀤𑀺𑀡𑁆𑀡𑀓𑀧𑁆𑀧𑀫𑁆𑀧𑀺 𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀲𑀻𑀤𑀦𑀦𑁆𑀢𑀺 𑀦𑀺𑀲𑀻𑀤𑀦𑀜𑁆𑀘 𑀭𑀢𑁆𑀢𑀁 𑀅𑀦𑀸𑀤𑀺𑀡𑁆𑀡𑀓𑀧𑁆𑀧𑀜𑁆𑀘 𑀮𑀩𑁆𑀪𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀘𑁆𑀘𑀢𑁆𑀣𑀭𑀡𑀧𑀭𑀺𑀓𑁆𑀔𑀸𑀭𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀸𑀦𑀺 𑀧𑀦 𑀦𑀻𑀮𑀫𑁆𑀧𑀺 𑀧𑀻𑀢𑀓𑀫𑁆𑀧𑀺 𑀮𑁄𑀳𑀺𑀢𑀓𑀫𑁆𑀧𑀺 𑀧𑀼𑀧𑁆𑀨𑀤𑀲𑀸𑀤𑀺𑀓𑀫𑁆𑀧𑀺 𑀯𑀝𑁆𑀝𑀦𑁆𑀢𑀺, 𑀢𑀲𑁆𑀫𑀸 ‘‘𑀲𑀤𑀲𑀫𑁆𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀭𑀽𑀧𑀁 𑀧𑀦 𑀦𑀺𑀯𑀸𑀲𑁂𑀢𑀼𑀁 𑀯𑀸 𑀧𑀸𑀭𑀼𑀧𑀺𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀺, 𑀓𑁂𑀯𑀮𑀁 𑀧𑀘𑁆𑀘𑀢𑁆𑀣𑀭𑀡𑀸𑀤𑀺𑀯𑀲𑁂𑀦 𑀅𑀥𑀺𑀝𑁆𑀞𑀸𑀦𑀫𑀢𑁆𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑁫𑁧. 𑀢𑀺𑀘𑀻𑀯𑀭𑀁 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀢𑀺 𑀇𑀤𑀁 𑀧𑀦 𑀲𑁂𑀲𑀘𑀻𑀯𑀭𑀧𑀜𑁆𑀘𑀓𑀁 𑀅𑀤𑀲𑀁 𑀭𑀚𑀺𑀢𑀁𑀬𑁂𑀯 𑀓𑀧𑁆𑀧𑀢𑀺, 𑀢𑀜𑁆𑀘 𑀆𑀤𑀺𑀡𑁆𑀡𑀓𑀧𑁆𑀧𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀲𑀤𑀲𑀁𑀯 𑀦𑀺𑀲𑀻𑀤𑀦𑀦𑁆𑀢𑀺 𑀇𑀤𑀁 𑀧𑀦 𑀧𑀼𑀩𑁆𑀩𑁂 ‘‘𑀲𑀤𑀲𑀫𑁆𑀧𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀢𑁆𑀢𑀸 𑀅𑀤𑀲𑀫𑁆𑀧𑀺 𑀦𑀺𑀲𑀻𑀤𑀦𑀁 𑀯𑀝𑁆𑀝𑀢𑀻𑀢𑀺 𑀲𑀫𑁆𑀫𑁄𑀳𑀦𑀺𑀯𑀸𑀭𑀡𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺.

𑁫𑁨. 𑀅𑀦𑀥𑀺𑀝𑁆𑀞𑀺𑀢𑀦𑁆𑀢𑀺 𑀢𑀺𑀘𑀻𑀯𑀭𑀸𑀤𑀺𑀯𑀲𑁂𑀦 𑀅𑀦𑀥𑀺𑀝𑁆𑀞𑀺𑀢𑀁. 𑀅𑀦𑀺𑀲𑁆𑀲𑀝𑁆𑀞𑀁 𑀦𑀸𑀫 𑀅𑀜𑁆𑀜𑁂𑀲𑀁 𑀅𑀯𑀺𑀲𑁆𑀲𑀚𑁆𑀚𑀺𑀢𑀁, 𑀢𑀁 𑀧𑀦 𑀯𑀺𑀓𑀧𑁆𑀧𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀯𑀺𑀓𑀧𑁆𑀧𑀦𑀼𑀧𑀕𑀲𑁆𑀲 𑀧𑀫𑀸𑀡𑀁 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀳𑀢𑁆𑀣𑀤𑀻𑀖’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀬𑀸𑀫𑁂𑀦 𑀅𑀝𑁆𑀞𑀗𑁆𑀕𑀼𑀮𑀁 𑀲𑀼𑀕𑀢𑀗𑁆𑀕𑀼𑀮𑁂𑀦 𑀘𑀢𑀼𑀭𑀗𑁆𑀕𑀼𑀮𑀯𑀺𑀢𑁆𑀣𑀢𑀁 𑀧𑀘𑁆𑀙𑀺𑀫𑀁 𑀘𑀻𑀯𑀭𑀁 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁫𑁮) 𑀯𑀼𑀢𑁆𑀢𑀢𑁆𑀢𑀸 𑀤𑀻𑀖𑀢𑁄 𑀏𑀓𑀳𑀢𑁆𑀣𑀁 𑀧𑀼𑀣𑀼𑀮𑀢𑁄 𑀉𑀧𑀟𑁆𑀠𑀳𑀢𑁆𑀣𑀁 𑀯𑀺𑀓𑀧𑁆𑀧𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁫𑁩. 𑀢𑀺𑀘𑀻𑀯𑀭𑀲𑁆𑀲𑀸𑀢𑀺 𑀯𑀺𑀦𑀬𑀢𑀺𑀘𑀻𑀯𑀭𑀲𑁆𑀲, 𑀦 𑀥𑀼𑀢𑀗𑁆𑀕𑀢𑀺𑀘𑀻𑀯𑀭𑀲𑁆𑀲. 𑀢𑀲𑁆𑀲 𑀧𑀦 𑀇𑀫𑁂𑀲𑀼 𑀦𑀯𑀲𑀼 𑀘𑀻𑀯𑀭𑀢𑁆𑀢𑀬𑀫𑁂𑀯 𑀮𑀩𑁆𑀪𑀢𑀺, 𑀦 𑀅𑀜𑁆𑀜𑀁 𑀮𑀩𑁆𑀪𑀢𑀺. 𑀲𑀩𑁆𑀩𑀫𑁂𑀢𑀦𑁆𑀢𑀺 𑀲𑀩𑁆𑀩𑀁 𑀅𑀥𑀺𑀝𑁆𑀞𑀸𑀦𑀯𑀺𑀥𑀸𑀦𑀜𑁆𑀘 𑀧𑀭𑀺𑀳𑀭𑀡𑀯𑀺𑀥𑀸𑀦𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀓𑁆𑀔𑀸𑀭𑀘𑁄𑀴𑀺𑀬𑁄 𑀲𑀩𑁆𑀩𑀦𑁆𑀢𑀺 𑀢𑀺𑀘𑀻𑀯𑀭𑀸𑀤𑀺𑀓𑀁 𑀦𑀯𑀯𑀺𑀥𑀫𑁆𑀧𑀺 𑀘𑀻𑀯𑀭𑀁. 𑀢𑀣𑀸 𑀯𑀢𑁆𑀯𑀸𑀢𑀺 ‘‘𑀧𑀭𑀺𑀓𑁆𑀔𑀸𑀭𑀘𑁄𑀴’’𑀦𑁆𑀢𑀺 𑀯𑀢𑁆𑀯𑀸. 𑀅𑀥𑀺𑀝𑁆𑀞𑀢𑀻𑀢𑀺 𑀅𑀥𑀺𑀝𑁆𑀞𑀸𑀢𑀺. 𑀓𑀺𑀁 𑀧𑀦 𑀢𑀺𑀘𑀻𑀯𑀭𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀼𑀁 𑀯𑀝𑁆𑀝𑀢𑀻𑀢𑀺? 𑀆𑀫 𑀯𑀝𑁆𑀝𑀢𑀺, ‘‘𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀦𑀸𑀫 𑀧𑀸𑀝𑁂𑀓𑁆𑀓𑀁 𑀦𑀺𑀥𑀸𑀦𑀫𑀼𑀔𑀫𑁂𑀢𑀦𑁆𑀢𑀺 𑀢𑀺𑀘𑀻𑀯𑀭𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑁂 𑀧𑀦 𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀳𑀭𑀦𑁆𑀢𑀲𑁆𑀲 𑀧𑀭𑀺𑀳𑀸𑀭𑁄 𑀯𑀼𑀢𑁆𑀢𑁄’’𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯) 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀺𑀘𑀻𑀯𑀭𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀳𑀦𑁆𑀢𑁂𑀦 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁.

𑁫𑁪. 𑀇𑀤𑀸𑀦𑀺 𑀏𑀢𑁂𑀲𑀁 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀘𑁆𑀙𑁂𑀤𑀯𑀺𑀲𑁆𑀲𑀚𑁆𑀚𑀦𑀕𑀸𑀳𑀯𑀺𑀩𑁆𑀪𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀘𑁆𑀙𑁂𑀤𑁄𑀢𑀺 𑀘𑁄𑀭𑀸𑀤𑀻𑀳𑀺 𑀅𑀘𑁆𑀙𑀺𑀦𑁆𑀤𑀦𑀁. 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀅𑀜𑁆𑀜𑁂𑀲𑀁 𑀤𑀸𑀦𑀁. 𑀓𑀣𑀁 𑀧𑀦 𑀤𑀺𑀦𑁆𑀦𑀁, 𑀓𑀣𑀁 𑀕𑀳𑀺𑀢𑀁 𑀲𑀼𑀤𑀺𑀦𑁆𑀦𑀁 𑀲𑀼𑀕𑁆𑀕𑀳𑀺𑀢𑀜𑁆𑀘 𑀳𑁄𑀢𑀻𑀢𑀺? 𑀲𑀘𑁂 ‘‘𑀇𑀤𑀁 𑀢𑀼𑀬𑁆𑀳𑀁 𑀤𑁂𑀫𑀺 𑀤𑀤𑀸𑀫𑀺 𑀤𑀚𑁆𑀚𑀸𑀫𑀺 𑀑𑀡𑁄𑀚𑁂𑀫𑀺 𑀧𑀭𑀺𑀘𑁆𑀘𑀚𑀸𑀫𑀺 𑀦𑀺𑀲𑁆𑀲𑀚𑁆𑀚𑀸𑀫𑀺 𑀯𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀯𑀸 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀫𑀺…𑀧𑁂… 𑀯𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀯𑀸 𑀯𑀤𑀢𑀺, 𑀲𑀫𑁆𑀫𑀼𑀔𑀸𑀧𑀺 𑀧𑀭𑀫𑁆𑀫𑀼𑀔𑀸𑀧𑀺 𑀤𑀺𑀦𑁆𑀦𑀁𑀬𑁂𑀯 𑀳𑁄𑀢𑀺. ‘‘𑀢𑀼𑀬𑁆𑀳𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀬𑁆𑀳𑀁 𑀕𑀡𑁆𑀳𑀸𑀫𑀻’’𑀢𑀺 𑀯𑀤𑀢𑀺, 𑀲𑀼𑀤𑀺𑀦𑁆𑀦𑀁 𑀲𑀼𑀕𑁆𑀕𑀳𑀺𑀢𑀜𑁆𑀘. ‘‘𑀢𑀯 𑀲𑀦𑁆𑀢𑀓𑀁 𑀓𑀭𑁄𑀳𑀺, 𑀢𑀯 𑀲𑀦𑁆𑀢𑀓𑀁 𑀳𑁄𑀢𑀼, 𑀢𑀯 𑀲𑀦𑁆𑀢𑀓𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀫𑀲𑀦𑁆𑀢𑀓𑀁 𑀓𑀭𑁄𑀫𑀺, 𑀫𑀫 𑀲𑀦𑁆𑀢𑀓𑀁 𑀳𑁄𑀢𑀼, 𑀫𑀫 𑀲𑀦𑁆𑀢𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺, 𑀤𑀼𑀤𑁆𑀤𑀺𑀦𑁆𑀦𑀁 𑀤𑀼𑀕𑁆𑀕𑀳𑀺𑀢𑀜𑁆𑀘. 𑀲𑀘𑁂 𑀧𑀦 ‘‘𑀢𑀯 𑀲𑀦𑁆𑀢𑀓𑀁 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼, 𑀪𑀦𑁆𑀢𑁂, 𑀫𑀬𑁆𑀳𑀁 𑀕𑀡𑁆𑀳𑀸𑀫𑀻’’𑀢𑀺 𑀕𑀡𑁆𑀳𑀸𑀢𑀺, 𑀲𑀼𑀕𑁆𑀕𑀳𑀺𑀢𑀁.

𑀕𑀸𑀳𑁄𑀢𑀺 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁄 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁩𑁧). 𑀲𑁄 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀯𑀺𑀲𑁆𑀲𑀸𑀲𑀁 𑀕𑀳𑁂𑀢𑀼𑀁. 𑀲𑀦𑁆𑀤𑀺𑀝𑁆𑀞𑁄 𑀘 𑀳𑁄𑀢𑀺, 𑀲𑀫𑁆𑀪𑀢𑁆𑀢𑁄 𑀘, 𑀆𑀮𑀧𑀺𑀢𑁄 𑀘, 𑀚𑀻𑀯𑀢𑀺 𑀘, 𑀚𑀸𑀦𑀸𑀢𑀺 𑀘 ‘𑀕𑀳𑀺𑀢𑁂 𑀫𑁂 𑀅𑀢𑁆𑀢𑀫𑀦𑁄 𑀪𑀯𑀺𑀲𑁆𑀲𑀢𑀻’’’𑀢𑀺 (𑀫𑀳𑀸𑀯. 𑁩𑁫𑁬). 𑀢𑀢𑁆𑀣 𑀲𑀦𑁆𑀤𑀺𑀝𑁆𑀞𑁄𑀢𑀺 𑀤𑀺𑀝𑁆𑀞𑀫𑀢𑁆𑀢𑀓𑀫𑀺𑀢𑁆𑀢𑁄. 𑀲𑀫𑁆𑀪𑀢𑁆𑀢𑁄𑀢𑀺 𑀤𑀴𑁆𑀳𑀫𑀺𑀢𑁆𑀢𑁄. 𑀆𑀮𑀧𑀺𑀢𑁄𑀢𑀺 ‘‘𑀫𑀫 𑀲𑀦𑁆𑀢𑀓𑀁 𑀬𑀁 𑀇𑀘𑁆𑀙𑀲𑀺, 𑀢𑀁 𑀕𑀡𑁆𑀳𑁂𑀬𑁆𑀬𑀸𑀲𑀺, 𑀆𑀧𑀼𑀘𑁆𑀙𑀺𑀢𑁆𑀯𑀸 𑀕𑀳𑀡𑁂 𑀓𑀸𑀭𑀡𑀁 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑁄. 𑀚𑀻𑀯𑀢𑀻𑀢𑀺 𑀅𑀦𑀼𑀝𑁆𑀞𑀸𑀦𑀲𑁂𑀬𑁆𑀬𑀸𑀬 𑀲𑀬𑀺𑀢𑁄𑀧𑀺 𑀬𑀸𑀯 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀁 𑀦 𑀧𑀸𑀧𑀼𑀡𑀸𑀢𑀺. 𑀕𑀳𑀺𑀢𑁂 𑀘 𑀅𑀢𑁆𑀢𑀫𑀦𑁄𑀢𑀺 𑀕𑀳𑀺𑀢𑁂 𑀘 𑀢𑀼𑀝𑁆𑀞𑀘𑀺𑀢𑁆𑀢𑁄. 𑀏𑀯𑀭𑀽𑀧𑀲𑁆𑀲 𑀲𑀦𑁆𑀢𑀓𑀁 ‘‘𑀕𑀳𑀺𑀢𑁂 𑀫𑁂 𑀅𑀢𑁆𑀢𑀫𑀦𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀦𑁆𑀢𑁂𑀦 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀯𑀲𑁂𑀦 𑀘𑁂𑀢𑀸𑀦𑀺 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁄 𑀧𑀦 𑀢𑀻𑀳𑀺 𑀅𑀗𑁆𑀕𑁂𑀳𑀺 𑀭𑀼𑀳𑀢𑀺. 𑀓𑀣𑀁? 𑀲𑀦𑁆𑀤𑀺𑀝𑁆𑀞𑁄 𑀚𑀻𑀯𑀢𑀺 𑀕𑀳𑀺𑀢𑁂 𑀅𑀢𑁆𑀢𑀫𑀦𑁄, 𑀲𑀫𑁆𑀪𑀢𑁆𑀢𑁄 𑀚𑀻𑀯𑀢𑀺 𑀕𑀳𑀺𑀢𑁂 𑀅𑀢𑁆𑀢𑀫𑀦𑁄, 𑀆𑀮𑀧𑀺𑀢𑁄 𑀚𑀻𑀯𑀢𑀺 𑀕𑀳𑀺𑀢𑁂 𑀅𑀢𑁆𑀢𑀫𑀦𑁄𑀢𑀺 𑀏𑀯𑀁.

𑀬𑁄 𑀧𑀦 𑀚𑀻𑀯𑀢𑀺, 𑀦 𑀘 𑀕𑀳𑀺𑀢𑁂 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀢𑀲𑁆𑀲 𑀲𑀦𑁆𑀢𑀓𑀁 𑀯𑀺𑀲𑁆𑀲𑀸𑀲𑀪𑀸𑀯𑁂𑀦 𑀕𑀳𑀺𑀢𑀫𑁆𑀧𑀺 𑀧𑀼𑀦 𑀤𑀸𑀢𑀩𑁆𑀩𑀁. 𑀤𑀤𑀦𑁆𑀢𑁂𑀦 𑀫𑀢𑀓𑀥𑀦𑀁 𑀢𑀸𑀯 𑀬𑁂 𑀢𑀲𑁆𑀲 𑀥𑀦𑁂 𑀇𑀲𑁆𑀲𑀭𑀸 𑀕𑀳𑀝𑁆𑀞𑀸 𑀯𑀸 𑀧𑀩𑁆𑀩𑀚𑀺𑀢𑀸 𑀯𑀸, 𑀢𑁂𑀲𑀁 𑀤𑀸𑀢𑀩𑁆𑀩𑀁. 𑀬𑁄 𑀧𑀦 𑀧𑀞𑀫𑀁𑀬𑁂𑀯 ‘‘𑀲𑀼𑀝𑁆𑀞𑀼 𑀓𑀢𑀁 𑀢𑀬𑀸 𑀫𑀫 𑀲𑀦𑁆𑀢𑀓𑀁 𑀕𑀡𑁆𑀳𑀦𑁆𑀢𑁂𑀦𑀸’’𑀢𑀺 𑀯𑀘𑀻𑀪𑁂𑀤𑁂𑀦 𑀯𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦 𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀧𑀘𑁆𑀙𑀸 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀓𑀼𑀧𑀺𑀢𑁄, 𑀲𑁄 𑀧𑀘𑁆𑀘𑀸𑀳𑀭𑀸𑀧𑁂𑀢𑀼𑀁 𑀦 𑀮𑀪𑀢𑀺. 𑀬𑁄𑀧𑀺 𑀅𑀤𑀸𑀢𑀼𑀓𑀸𑀫𑁄, 𑀘𑀺𑀢𑁆𑀢𑁂𑀦 𑀧𑀦 𑀅𑀥𑀺𑀯𑀸𑀲𑁂𑀢𑀺, 𑀦 𑀓𑀺𑀜𑁆𑀘𑀺 𑀯𑀤𑀢𑀺, 𑀲𑁄𑀧𑀺 𑀧𑀼𑀦 𑀧𑀘𑁆𑀘𑀸𑀳𑀭𑀸𑀧𑁂𑀢𑀼𑀁 𑀦 𑀮𑀪𑀢𑀺. 𑀬𑁄 𑀧𑀦 ‘‘𑀫𑀬𑀸 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀓𑀁 𑀕𑀳𑀺𑀢’’𑀦𑁆𑀢𑀺 𑀯𑀸 ‘‘𑀧𑀭𑀺𑀪𑀼𑀢𑁆𑀢’’𑀦𑁆𑀢𑀺 𑀯𑀸 𑀯𑀼𑀢𑁆𑀢𑁂 𑀦𑀸𑀥𑀺𑀯𑀸𑀲𑁂𑀢𑀺, ‘‘𑀧𑀝𑀺𑀤𑁂𑀳𑀻’’𑀢𑀺 𑀪𑀡𑀢𑀺, 𑀲𑁄 𑀧𑀘𑁆𑀘𑀸𑀳𑀭𑀸𑀧𑁂𑀢𑀼𑀁 𑀮𑀪𑀢𑀺.

𑀯𑀺𑀩𑁆𑀪𑀫𑀸𑀢𑀺 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀺𑀬𑀸𑀬𑁂𑀯 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑀁 𑀕𑀳𑀺𑀢𑀁 𑀳𑁄𑀢𑀺. 𑀲𑀸 𑀧𑀦 𑀬𑀤𑀸 𑀯𑀺𑀩𑁆𑀪𑀫𑀢𑀺, 𑀢𑀤𑀸 𑀅𑀲𑁆𑀲𑀫𑀡𑀻 𑀳𑁄𑀢𑀺. 𑀪𑀺𑀓𑁆𑀔𑀼 𑀧𑀦 𑀯𑀺𑀩𑁆𑀪𑀫𑀦𑁆𑀢𑁄𑀧𑀺 𑀬𑀸𑀯 𑀲𑀺𑀓𑁆𑀔𑀁 𑀦 𑀧𑀘𑁆𑀘𑀓𑁆𑀔𑀸𑀢𑀺, 𑀢𑀸𑀯 𑀪𑀺𑀓𑁆𑀔𑀼𑀬𑁂𑀯𑀸𑀢𑀺 𑀅𑀥𑀺𑀝𑁆𑀞𑀸𑀦𑀁 𑀦 𑀯𑀺𑀚𑀳𑀢𑀻𑀢𑀺. 𑀮𑀺𑀗𑁆𑀕𑀲𑀺𑀓𑁆𑀔𑀸𑀢𑀺 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑀜𑁆𑀘 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁂𑀲𑀽𑀢𑀺 𑀦𑀯𑀲𑀼 𑀘𑀻𑀯𑀭𑁂𑀲𑀼. 𑀅𑀥𑀺𑀝𑁆𑀞𑀸𑀦𑀯𑀺𑀬𑁄𑀕𑀓𑀸𑀭𑀡𑀸𑀢𑀺 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑀓𑀸𑀭𑀡𑀸, 𑀇𑀫𑁂𑀲𑀼 𑀅𑀜𑁆𑀜𑀢𑀭𑁂𑀦 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀻𑀢𑀺 𑀅𑀢𑁆𑀣𑁄.

𑀓𑀺𑀜𑁆𑀘 𑀪𑀺𑀬𑁆𑀬𑁄 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯) 𑁋 𑀢𑀺𑀘𑀻𑀯𑀭𑀲𑁆𑀲 𑀧𑀦 𑀯𑀺𑀦𑀺𑀩𑁆𑀩𑀺𑀤𑁆𑀥𑀙𑀺𑀤𑁆𑀤𑀜𑁆𑀘 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀲𑀗𑁆𑀖𑀸𑀝𑀺𑀉𑀢𑁆𑀢𑀭𑀸𑀲𑀗𑁆𑀕𑀸𑀦𑀁 𑀤𑀻𑀖𑀦𑁆𑀢𑀢𑁄 𑀯𑀺𑀤𑀢𑁆𑀣𑀺𑀧𑁆𑀧𑀫𑀸𑀡𑀲𑁆𑀲 𑀢𑀺𑀭𑀺𑀬𑀦𑁆𑀢𑀢𑁄 𑀅𑀝𑁆𑀞𑀗𑁆𑀕𑀼𑀮𑀧𑁆𑀧𑀫𑀸𑀡𑀲𑁆𑀲 𑀧𑀤𑁂𑀲𑀲𑁆𑀲 𑀑𑀭𑀢𑁄 𑀓𑀦𑀺𑀝𑁆𑀞𑀗𑁆𑀕𑀼𑀮𑀺𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑀓𑀁 𑀙𑀺𑀤𑁆𑀤𑀁 𑀅𑀥𑀺𑀝𑁆𑀞𑀸𑀦𑀁 𑀪𑀺𑀦𑁆𑀤𑀢𑀺. 𑀅𑀦𑁆𑀢𑀭𑀯𑀸𑀲𑀓𑀲𑁆𑀲 𑀤𑀻𑀖𑀦𑁆𑀢𑀢𑁄 𑀯𑀺𑀤𑀢𑁆𑀣𑀺𑀧𑁆𑀧𑀫𑀸𑀡𑀲𑁆𑀲𑁂𑀯 𑀢𑀺𑀭𑀺𑀬𑀦𑁆𑀢𑀢𑁄 𑀘𑀢𑀼𑀭𑀗𑁆𑀕𑀼𑀮𑀧𑁆𑀧𑀫𑀸𑀡𑀲𑁆𑀲 𑀧𑀤𑁂𑀲𑀲𑁆𑀲 𑀑𑀭𑀢𑁄 𑀙𑀺𑀤𑁆𑀤𑀁 𑀅𑀥𑀺𑀝𑁆𑀞𑀸𑀦𑀁 𑀪𑀺𑀦𑁆𑀤𑀢𑀺, 𑀧𑀭𑀢𑁄 𑀧𑀦 𑀦 𑀪𑀺𑀦𑁆𑀤𑀢𑀺. 𑀢𑀲𑁆𑀫𑀸 𑀙𑀺𑀤𑁆𑀤𑁂 𑀚𑀸𑀢𑁂 𑀢𑀺𑀘𑀻𑀯𑀭𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀳𑁄𑀢𑀺, 𑀲𑀽𑀘𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀇𑀢𑀭𑁂𑀲𑀁 𑀧𑀦 𑀙𑀺𑀤𑁆𑀤𑁂𑀦 𑀯𑀺𑀚𑀳𑀦𑀁 𑀦𑀸𑀫 𑀦𑀢𑁆𑀣𑀺. 𑀬𑁄 𑀧𑀦 𑀢𑀺𑀘𑀻𑀯𑀭𑁂𑀧𑀺 𑀤𑀼𑀩𑁆𑀩𑀮𑀝𑁆𑀞𑀸𑀦𑁂 𑀧𑀞𑀫𑀁 𑀅𑀕𑁆𑀕𑀴𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀤𑀼𑀩𑁆𑀩𑀮𑀝𑁆𑀞𑀸𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀧𑀦𑁂𑀢𑀺, 𑀅𑀥𑀺𑀝𑁆𑀞𑀸𑀦𑀁 𑀦 𑀪𑀺𑀚𑁆𑀚𑀢𑀺. 𑀫𑀡𑁆𑀟𑀮𑀧𑀭𑀺𑀯𑀢𑁆𑀢𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑁄 𑀧𑀦 𑀉𑀪𑁄 𑀓𑁄𑀝𑀺𑀬𑁄 𑀫𑀚𑁆𑀛𑁂 𑀓𑀭𑁄𑀦𑁆𑀢𑁄 𑀲𑀘𑁂 𑀧𑀞𑀫𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀘𑁆𑀙𑀸 𑀖𑀝𑁂𑀢𑀺, 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀺, 𑀅𑀣 𑀖𑀝𑁂𑀢𑁆𑀯𑀸 𑀙𑀺𑀦𑁆𑀤𑀢𑀺, 𑀦 𑀯𑀺𑀚𑀳𑀢𑀺. 𑀭𑀚𑀓𑁂𑀳𑀺 𑀥𑁄𑀯𑀸𑀧𑁂𑀢𑁆𑀯𑀸 𑀲𑁂𑀢𑀓𑀁 𑀓𑀭𑁄𑀦𑁆𑀢𑀲𑁆𑀲𑀸𑀧𑀺 𑀦 𑀯𑀺𑀚𑀳𑀢𑀺 𑀏𑀯.

𑁫𑁫. 𑀇𑀤𑀸𑀦𑀺 𑀅𑀓𑀧𑁆𑀧𑀺𑀬𑀘𑀻𑀯𑀭𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀼𑀲𑀯𑀸𑀓𑀨𑀮𑀓𑀸𑀦𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀓𑀼𑀲𑀘𑀻𑀭𑀁 (𑀫𑀳𑀸𑀯. 𑁩𑁭𑁧; 𑀫𑀳𑀸𑀯. 𑀅𑀝𑁆𑀞. ) 𑀦𑀸𑀫 𑀓𑀼𑀲𑁂 𑀕𑀦𑁆𑀣𑁂𑀢𑁆𑀯𑀸 𑀓𑀢𑀘𑀻𑀯𑀭𑀁. 𑀯𑀸𑀓𑀘𑀻𑀭𑀁 𑀦𑀸𑀫 𑀢𑀸𑀧𑀲𑀸𑀦𑀁 𑀯𑀓𑁆𑀓𑀮𑀁. 𑀨𑀮𑀓𑀘𑀻𑀭𑀁 𑀦𑀸𑀫 𑀨𑀮𑀓𑀸𑀦𑀺 𑀲𑀺𑀩𑁆𑀩𑀺𑀢𑁆𑀯𑀸 𑀓𑀢𑀘𑀻𑀯𑀭𑀁. 𑀓𑁂𑀲𑀓𑀫𑁆𑀩𑀮𑀦𑁆𑀢𑀺 𑀓𑁂𑀲𑁂𑀳𑀺 𑀢𑀦𑁆𑀢𑀁 𑀯𑀸𑀬𑀺𑀢𑁆𑀯𑀸 𑀓𑀢𑀓𑀫𑁆𑀩𑀮𑀁. 𑀯𑀸𑀮𑀓𑀫𑁆𑀩𑀮𑀦𑁆𑀢𑀺 𑀘𑀫𑀭𑀯𑀸𑀮𑁂𑀳𑀺 𑀯𑀸𑀬𑀺𑀢𑁆𑀯𑀸 𑀓𑀢𑀓𑀫𑁆𑀩𑀮𑀁. 𑀉𑀮𑀽𑀓𑀧𑀓𑁆𑀔𑀦𑁆𑀢𑀺 𑀉𑀮𑀽𑀓𑀲𑀓𑀼𑀡𑀲𑁆𑀲 𑀧𑀓𑁆𑀔𑁂𑀳𑀺 𑀓𑀢𑀦𑀺𑀯𑀸𑀲𑀦𑀁. 𑀅𑀚𑀺𑀦𑀓𑁆𑀔𑀺𑀧𑀦𑁆𑀢𑀺 𑀲𑀮𑁄𑀫𑀁 𑀲𑀔𑀼𑀭𑀁 𑀅𑀚𑀺𑀦𑀫𑀺𑀕𑀘𑀫𑁆𑀫𑀁. 𑀇𑀫𑁂𑀲𑀼 𑀲𑀢𑁆𑀢𑀲𑀼 𑀯𑀢𑁆𑀣𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀥𑀸𑀭𑀬𑀢𑁄 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸 𑀇𑀫𑁂𑀲𑀼 𑀣𑀼𑀮𑁆𑀮𑀘𑁆𑀘𑀬𑀁, 𑀢𑀣𑀸 𑀅𑀓𑁆𑀓𑀦𑀸𑀴𑀁 𑀦𑀺𑀯𑀸𑀲𑁂𑀦𑁆𑀢𑀲𑁆𑀲. 𑀅𑀓𑁆𑀓𑀦𑀸𑀴𑀁 𑀦𑀸𑀫 𑀅𑀓𑁆𑀓𑀤𑀡𑁆𑀟𑁂 𑀯𑀸𑀓𑀸𑀤𑀻𑀳𑀺 𑀕𑀦𑁆𑀣𑁂𑀢𑁆𑀯𑀸 𑀓𑀢𑀘𑀻𑀯𑀭𑀁. ‘‘𑀦 𑀪𑀺𑀓𑁆𑀔𑀯𑁂 𑀅𑀓𑁆𑀓𑀦𑀸𑀴𑀁 𑀦𑀺𑀯𑀸𑀲𑁂𑀢𑀩𑁆𑀩𑀁, 𑀬𑁄 𑀦𑀺𑀯𑀸𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀫𑀳𑀸𑀯. 𑁩𑁭𑁧) 𑀳𑀺 𑀯𑀼𑀢𑁆𑀢𑀁.

𑁫𑁬. 𑀓𑀤𑀮𑁂𑀭𑀓𑀓𑁆𑀓𑀤𑀼𑀲𑁆𑀲𑁂 𑀧𑁄𑀢𑁆𑀣𑀓𑁂 𑀘𑀸𑀧𑀻𑀢𑀺 𑀏𑀢𑁆𑀣 𑀓𑀤𑀮𑀺𑀏𑀭𑀓𑀅𑀓𑁆𑀓𑀫𑀓𑀘𑀺𑀯𑀸𑀓𑁂𑀳𑀺 𑀓𑀢𑀸𑀦𑀺 𑀯𑀢𑁆𑀣𑀸𑀦𑀺 𑀏𑀯𑀁 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀢𑁂𑀲𑀼 𑀧𑁄𑀢𑁆𑀣𑀓𑁄𑀬𑁂𑀯 𑀧𑀸𑀴𑀺𑀬𑀁 𑀆𑀕𑀢𑁄, 𑀇𑀢𑀭𑀸𑀦𑀺 𑀢𑀕𑁆𑀕𑀢𑀺𑀓𑀢𑁆𑀢𑀸 𑀅𑀝𑁆𑀞𑀓𑀣𑀸𑀲𑀼 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀺. 𑀇𑀫𑁂𑀲𑀼 𑀘𑀢𑀽𑀲𑀼𑀧𑀺 𑀤𑀼𑀓𑁆𑀓𑀝𑀫𑁂𑀯. ‘‘𑀦 𑀪𑀺𑀓𑁆𑀔𑀯𑁂 𑀦𑀕𑁆𑀕𑀺𑀬𑀁 𑀢𑀺𑀢𑁆𑀣𑀺𑀬𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀺𑀢𑀩𑁆𑀩𑀁, 𑀬𑁄 𑀲𑀫𑀸𑀤𑀺𑀬𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀫𑀳𑀸𑀯. 𑁩𑁭𑁦) 𑀯𑀼𑀢𑁆𑀢𑀢𑁆𑀢𑀸 𑀦𑀕𑁆𑀕𑀺𑀬𑀫𑁆𑀧𑀺 𑀦 𑀓𑀧𑁆𑀧𑀢𑀺 𑀏𑀯. 𑀲𑀩𑁆𑀩𑀫𑁂𑀯 𑀦𑀻𑀮𑀓𑀁 𑀲𑀩𑁆𑀩𑀦𑀻𑀮𑀓𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀏𑀢𑁆𑀣 𑀦𑀻𑀮𑀁 𑀉𑀫𑀸𑀧𑀼𑀧𑁆𑀨𑀯𑀡𑁆𑀡𑀁 𑀳𑁄𑀢𑀺. 𑀫𑀜𑁆𑀚𑁂𑀝𑁆𑀞𑀓𑀁 𑀫𑀜𑁆𑀚𑁂𑀝𑁆𑀞𑀓𑀯𑀡𑁆𑀡𑀫𑁂𑀯. 𑀧𑀻𑀢𑀓𑀁 𑀓𑀡𑀺𑀓𑀸𑀭𑀧𑀼𑀧𑁆𑀨𑀯𑀡𑁆𑀡𑀁. 𑀮𑁄𑀳𑀺𑀢𑀓𑀁 𑀚𑀬𑀲𑀼𑀫𑀦𑀧𑀼𑀧𑁆𑀨𑀯𑀡𑁆𑀡𑀁. 𑀓𑀡𑁆𑀳𑀓𑀁 𑀅𑀤𑁆𑀤𑀸𑀭𑀺𑀝𑁆𑀞𑀓𑀯𑀡𑁆𑀡𑀁.

𑁫𑁭. 𑀫𑀳𑀸𑀭𑀗𑁆𑀕𑀁 𑀦𑀸𑀫 𑀲𑀢𑀧𑀤𑀺𑀧𑀺𑀝𑁆𑀞𑀺𑀯𑀡𑁆𑀡𑀁. 𑀫𑀳𑀸𑀦𑀸𑀫𑀁 𑀦𑀸𑀫 𑀭𑀢𑁆𑀢𑀲𑀫𑁆𑀪𑀺𑀦𑁆𑀦𑀯𑀡𑁆𑀡𑀁 𑀳𑁄𑀢𑀺. 𑀧𑀤𑀼𑀫𑀧𑀼𑀧𑁆𑀨𑀯𑀡𑁆𑀡𑀦𑁆𑀢𑀺𑀧𑀺 𑀯𑀼𑀢𑁆𑀢𑀁, 𑀫𑀦𑁆𑀤𑀭𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀺𑀭𑀻𑀝𑀓𑁂𑀢𑀺 𑀭𑀼𑀓𑁆𑀔𑀢𑀘𑁂. 𑀅𑀘𑁆𑀙𑀺𑀦𑁆𑀦𑀤𑀻𑀖𑀤𑀲𑀓𑁂𑀢𑀺 𑀲𑀩𑁆𑀩𑀲𑁄 𑀅𑀘𑁆𑀙𑀺𑀦𑁆𑀦𑀤𑀲𑀓𑁂 𑀘 𑀫𑀚𑁆𑀛𑁂 𑀙𑀺𑀦𑁆𑀦𑀤𑀲𑀓𑁂 𑀘𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀺𑀩𑁆𑀩𑀺𑀢𑁆𑀯𑀸 𑀓𑀢𑀤𑀲𑀁 𑀨𑀮𑀤𑀲𑀁 𑀦𑀸𑀫. 𑀓𑁂𑀢𑀓𑀧𑀼𑀧𑁆𑀨𑀸𑀤𑀺𑀧𑀼𑀧𑁆𑀨𑀲𑀤𑀺𑀲𑀸𑀳𑀺 𑀤𑀲𑀸𑀳𑀺 𑀬𑀼𑀢𑁆𑀢𑀁 𑀧𑀼𑀧𑁆𑀨𑀤𑀲𑀁 𑀦𑀸𑀫. 𑀏𑀢𑁂𑀲𑀼𑀧𑀺 ‘‘𑀧𑁄𑀢𑁆𑀣𑀓𑁂 𑀘𑀸𑀧𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀅𑀧𑀺-𑀲𑀤𑁆𑀤𑁂𑀦 𑀤𑀼𑀓𑁆𑀓𑀝𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸𑀢𑀺 𑀬𑀣𑀸 𑀏𑀢𑁂𑀲𑀼 𑀓𑀤𑀮𑀺𑀤𑀼𑀲𑁆𑀲𑀸𑀤𑀻𑀲𑀼 𑀧𑀼𑀧𑁆𑀨𑀤𑀲𑀸𑀯𑀲𑀸𑀦𑁂𑀲𑀼 𑀤𑀼𑀓𑁆𑀓𑀝𑀁, 𑀢𑀣𑀸 𑀓𑀜𑁆𑀘𑀼𑀓𑀯𑁂𑀞𑀦𑁂𑀲𑀼𑀧𑀺 𑀬𑀁 𑀓𑀺𑀜𑁆𑀘𑀺 𑀥𑀸𑀭𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄.

𑀏𑀢𑁂𑀲𑀼 𑀧𑀦 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 (𑀫𑀳𑀸𑀯. 𑀅𑀝𑁆𑀞. 𑁩𑁭𑁨) 𑁋 𑀲𑀩𑁆𑀩𑀦𑀻𑀮𑀓𑀸𑀤𑀻𑀦𑀺 𑀭𑀚𑀦𑀸𑀦𑀺 𑀯𑀫𑁂𑀢𑁆𑀯𑀸 𑀧𑀼𑀦 𑀭𑀚𑀺𑀢𑁆𑀯𑀸 𑀥𑀸𑀭𑁂𑀢𑀩𑁆𑀩𑀸𑀦𑀺, 𑀦 𑀲𑀓𑁆𑀓𑀸 𑀘𑁂 𑀯𑀫𑁂𑀢𑀼𑀁, 𑀧𑀘𑁆𑀘𑀢𑁆𑀣𑀭𑀡𑀸𑀤𑀻𑀦𑀺 𑀯𑀸 𑀓𑀸𑀭𑁂𑀢𑀩𑁆𑀩𑀸𑀦𑀺, 𑀢𑀺𑀧𑀝𑁆𑀝𑀘𑀻𑀯𑀭𑀲𑁆𑀲 𑀫𑀚𑁆𑀛𑁂 𑀯𑀸 𑀤𑀸𑀢𑀩𑁆𑀩𑀸𑀦𑀺. 𑀅𑀘𑁆𑀙𑀺𑀦𑁆𑀦𑀤𑀲𑀓𑀸𑀤𑀻𑀦𑀺 𑀤𑀲𑀸 𑀙𑀺𑀦𑁆𑀤𑀺𑀢𑁆𑀯𑀸 𑀥𑀸𑀭𑁂𑀢𑀩𑁆𑀩𑀸𑀦𑀺. 𑀓𑀜𑁆𑀘𑀼𑀓𑀁 𑀯𑀺𑀚𑀝𑁂𑀢𑁆𑀯𑀸 𑀭𑀚𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀯𑁂𑀞𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀺𑀭𑀻𑀝𑀓𑀁 𑀧𑀸𑀤𑀧𑀼𑀜𑁆𑀙𑀦𑀁 𑀓𑀸𑀢𑀩𑁆𑀩𑀁. 𑀲𑀩𑁆𑀩𑀦𑁆𑀢𑀺 𑀇𑀫𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀓𑀼𑀲𑀘𑀻𑀭𑀸𑀤𑀺𑀓𑀁 𑀅𑀓𑀧𑁆𑀧𑀺𑀬𑀘𑀻𑀯𑀭𑀁 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁄 𑀮𑀪𑀢𑀻𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀧𑀭𑀺𑀯𑀸𑀭𑁂.

‘‘𑀅𑀓𑀧𑁆𑀧𑀓𑀢𑀁 𑀦𑀸𑀧𑀺 𑀭𑀚𑀦𑀸𑀬 𑀭𑀢𑁆𑀢𑀁,

𑀢𑁂𑀦 𑀦𑀺𑀯𑀢𑁆𑀣𑁄 𑀬𑁂𑀦 𑀓𑀸𑀫𑀁 𑀯𑀚𑁂𑀬𑁆𑀬;

𑀦 𑀘𑀲𑁆𑀲 𑀳𑁄𑀢𑀺 𑀆𑀧𑀢𑁆𑀢𑀺,

𑀲𑁄 𑀘 𑀥𑀫𑁆𑀫𑁄 𑀲𑀼𑀕𑀢𑁂𑀦 𑀤𑁂𑀲𑀺𑀢𑁄;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸’’𑀢𑀺. (𑀧𑀭𑀺. 𑁪𑁮𑁧);

𑀅𑀬𑀜𑁆𑀳𑀺 𑀧𑀜𑁆𑀳𑁄 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀪𑀺𑀓𑁆𑀔𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀳𑀺 𑀬𑀁 𑀓𑀺𑀜𑁆𑀘𑀺 𑀅𑀓𑀧𑁆𑀧𑀺𑀬𑀘𑀻𑀯𑀭𑀁 𑀦𑀺𑀯𑀸𑀲𑁂𑀢𑁆𑀯𑀸 𑀯𑀸 𑀧𑀸𑀭𑀼𑀧𑀺𑀢𑁆𑀯𑀸 𑀯𑀸 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀓𑁂𑀦 𑀅𑀜𑁆𑀜𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀏𑀢𑁆𑀣 𑀧𑀦 ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸 𑀦𑀺𑀲𑁆𑀲𑀻𑀫𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀁 𑀤𑁂𑀦𑁆𑀢𑀺 ‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀫𑀸’𑀢𑀺, 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀸𑀤𑀺𑀢𑀼𑀁, 𑀦 𑀢𑀸𑀯 𑀢𑀁 𑀕𑀡𑀦𑀽𑀧𑀕𑀁, 𑀬𑀸𑀯 𑀦 𑀳𑀢𑁆𑀣𑀁 𑀕𑀘𑁆𑀙𑀢𑀻’’𑀢𑀺 (𑀫𑀳𑀸𑀯. 𑁨𑁫𑁯) 𑀯𑀼𑀢𑁆𑀢𑀢𑁆𑀢𑀸 𑀬𑀸𑀯 𑀆𑀳𑀭𑀺𑀢𑁆𑀯𑀸 𑀢𑀁 𑀦 𑀤𑀺𑀦𑁆𑀦𑀁, ‘‘𑀢𑀼𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀘𑀻𑀯𑀭𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀧𑀳𑀺𑀡𑀺𑀢𑁆𑀯𑀸 𑀯𑀸 𑀦𑀸𑀭𑁄𑀘𑀺𑀢𑀁, 𑀢𑀸𑀯 𑀕𑀡𑀦𑀁 𑀦 𑀉𑀧𑁂𑀢𑀺, 𑀅𑀦𑀥𑀺𑀝𑁆𑀞𑀺𑀢𑀁 𑀯𑀝𑁆𑀝𑀢𑀺. 𑀧𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀆𑀦𑁂𑀢𑁆𑀯𑀸 𑀤𑀺𑀦𑁆𑀦𑁂 𑀯𑀸 𑀆𑀭𑁄𑀘𑀺𑀢𑁂 𑀯𑀸 𑀧𑀭𑀺𑀳𑀸𑀭𑁄 𑀦𑀢𑁆𑀣𑀺, 𑀤𑀲𑀸𑀳𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀘𑀻𑀯𑀭𑀯𑀺𑀦𑀺𑀘𑁆𑀙𑀬𑁄.

𑀘𑀻𑀯𑀭𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀭𑀚𑀦𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁮. 𑀇𑀤𑀸𑀦𑀺 𑀢𑁂𑀲𑀁 𑀘𑀻𑀯𑀭𑀸𑀦𑀁 𑀭𑀚𑀦𑀯𑀺𑀥𑀸𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀚𑀦𑀸𑀦𑀺 𑀘𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀙 𑀭𑀚𑀦𑀸𑀦𑀺 𑀫𑀽𑀮𑀭𑀚𑀦𑀁 𑀔𑀦𑁆𑀥𑀭𑀚𑀦𑀁 𑀢𑀘𑀭𑀚𑀦𑀁 𑀧𑀢𑁆𑀢𑀭𑀚𑀦𑀁 𑀧𑀼𑀧𑁆𑀨𑀭𑀚𑀦𑀁 𑀨𑀮𑀭𑀚𑀦’’𑀦𑁆𑀢𑀺 (𑀫𑀳𑀸𑀯. 𑁩𑁪𑁪) 𑀏𑀯𑀁 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 ‘‘𑀙𑀧𑁆𑀧𑀓𑀸𑀭𑀸𑀦𑀺 𑀅𑀦𑀼𑀜𑁆𑀜𑀸𑀢𑀸𑀦𑀺 𑀲𑀢𑁆𑀣𑀼𑀦𑀸’’𑀢𑀺 𑀯𑀼𑀢𑁆𑀢𑀁.

𑁫𑁯. 𑀢𑀢𑁆𑀣 𑀫𑀽𑀮𑁂𑀢𑀺 𑀫𑀽𑀮𑀭𑀚𑀦𑁂𑀢𑀺 𑀅𑀢𑁆𑀣𑁄. 𑀳𑀮𑀺𑀤𑁆𑀤𑀺𑀁 𑀯𑀺𑀯𑀚𑁆𑀚𑀺𑀬 𑀲𑀩𑁆𑀩𑀁 𑀮𑀩𑁆𑀪𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀢𑀼𑀗𑁆𑀕𑀳𑀸𑀭𑀓𑁄 𑀦𑀸𑀫 𑀏𑀓𑁄 𑀲𑀓𑀡𑁆𑀝𑀓𑀭𑀼𑀓𑁆𑀔𑁄, 𑀢𑀲𑁆𑀲 𑀳𑀭𑀺𑀢𑀸𑀮𑀯𑀡𑁆𑀡𑀁 𑀔𑀦𑁆𑀥𑀭𑀚𑀦𑀁 𑀳𑁄𑀢𑀺. 𑀕𑀺𑀳𑀺𑀧𑀭𑀺𑀪𑀼𑀢𑁆𑀢𑀁 𑀧𑀦 𑀅𑀮𑁆𑀮𑀺𑀧𑀢𑁆𑀢𑁂𑀦 𑀏𑀓𑀯𑀸𑀭𑀁 𑀭𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀨𑀮𑀭𑀚𑀦𑁂 𑀅𑀓𑀧𑁆𑀧𑀺𑀬𑀁 𑀦𑀸𑀫 𑀦𑀢𑁆𑀣𑀺, 𑀲𑀩𑁆𑀩𑀁 𑀯𑀝𑁆𑀝𑀢𑀻𑀢𑀺. 𑀭𑀚𑀦𑀯𑀺𑀦𑀺𑀘𑁆𑀙𑀬𑁄.

𑀭𑀚𑀦𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁬𑁦. 𑀇𑀤𑀸𑀦𑀺 𑀪𑀸𑀚𑀦𑀯𑀺𑀓𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀢𑁆𑀢𑁄 𑀘𑀸’’𑀢𑀺 𑀉𑀤𑁆𑀥𑀝𑀁. 𑀏𑀢𑁆𑀣 𑀧𑀦 𑀧𑀞𑀫𑀕𑀸𑀣𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀸.

𑁬𑁧. 𑀤𑀼𑀢𑀺𑀬𑁂 ‘‘𑀫𑀕𑀥𑀦𑀸𑀴𑀺𑀤𑁆𑀯𑀬𑀢𑀡𑁆𑀟𑀼𑀮𑀲𑀸𑀥𑀺𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀯𑀺𑀪𑀢𑁆𑀢𑀺𑀮𑁄𑀧𑀁 𑀅𑀓𑀢𑁆𑀯𑀸 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 ‘‘𑀫𑀕𑀥𑁂 𑀦𑀸𑀴𑀺𑀤𑁆𑀯𑀬𑀢𑀡𑁆𑀟𑀼𑀮𑀲𑀸𑀥𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀧𑀘𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 (𑀧𑀸𑀭𑀸. 𑁬𑁦𑁨; 𑀧𑀸𑀭𑀸. 𑀅𑀝𑁆𑀞. 𑁨.𑁬𑁦𑁨; 𑀓𑀗𑁆𑀔𑀸. 𑀅𑀝𑁆𑀞. 𑀧𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀫𑀕𑀥𑀦𑀸𑀴𑀺 𑀦𑀸𑀫 𑀅𑀟𑁆𑀠𑀢𑁂𑀭𑀲𑀧𑀮𑀁 𑀕𑀡𑁆𑀳𑀸𑀢𑀺. 𑀑𑀤𑀦𑀦𑁆𑀢𑀺 𑀏𑀢𑁆𑀣 𑀲𑀩𑁆𑀩𑀧𑁆𑀧𑀓𑀸𑀭𑀲𑀫𑁆𑀧𑀦𑁆𑀦𑀁 𑀅𑀯𑀲𑁆𑀲𑀸𑀯𑀺𑀢𑁄𑀤𑀦𑀁 𑀕𑀳𑁂𑀢𑀩𑁆𑀩𑀁. 𑀑𑀤𑀦𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑀧𑁆𑀧𑀫𑀸𑀡𑀁 𑀦𑀸𑀢𑀺𑀖𑀦𑀁 𑀦𑀸𑀢𑀺𑀢𑀦𑀼𑀓𑀁 𑀳𑀢𑁆𑀣𑀳𑀸𑀭𑀺𑀬𑀫𑀼𑀕𑁆𑀕𑀲𑀽𑀧𑀜𑁆𑀘 𑀆𑀮𑁄𑀧𑀲𑁆𑀲 𑀆𑀮𑁄𑀧𑀲𑁆𑀲 𑀅𑀦𑀼𑀭𑀽𑀧𑀁 𑀬𑀸𑀯 𑀘𑀭𑀺𑀫𑀓𑀸𑀮𑁄𑀧𑀧𑁆𑀧𑀳𑁄𑀦𑀓𑀁 𑀫𑀘𑁆𑀙𑀫𑀁𑀲𑀸𑀤𑀺𑀩𑁆𑀬𑀜𑁆𑀚𑀦𑀜𑁆𑀘 𑀬𑁄 𑀧𑀢𑁆𑀢𑁄 𑀕𑀡𑁆𑀳𑀸𑀢𑀺, 𑀲𑁄 𑀉𑀓𑁆𑀓𑀝𑁆𑀞𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀲𑀧𑁆𑀧𑀺𑀢𑁂𑀮𑀢𑀓𑁆𑀓𑀭𑀲𑀓𑀜𑁆𑀚𑀺𑀓𑀸𑀤𑀻𑀦𑀺 𑀧𑀦 𑀕𑀡𑀦𑀽𑀧𑀕𑀸𑀦𑀺 𑀦 𑀳𑁄𑀦𑁆𑀢𑀺, 𑀢𑀸𑀦𑀺 𑀳𑀺 𑀑𑀤𑀦𑀕𑀢𑀺𑀓𑀸𑀦𑁂𑀯 𑀳𑁄𑀦𑁆𑀢𑀺, 𑀦𑁂𑀯 𑀳𑀸𑀧𑁂𑀢𑀼𑀁, 𑀦 𑀯𑀟𑁆𑀠𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀏𑀯𑀫𑁂𑀢𑀁 𑀲𑀩𑁆𑀩𑀁 𑀧𑀓𑁆𑀔𑀺𑀢𑁆𑀢𑀁 𑀲𑀘𑁂 𑀧𑀢𑁆𑀢𑀲𑁆𑀲 𑀳𑁂𑀝𑁆𑀞𑀺𑀫𑀭𑀸𑀚𑀺𑀲𑀫𑀁 𑀢𑀺𑀝𑁆𑀞𑀢𑀺, 𑀲𑀼𑀢𑁆𑀢𑁂𑀦 𑀯𑀸 𑀳𑀻𑀭𑁂𑀦 𑀯𑀸 𑀙𑀺𑀦𑁆𑀤𑀦𑁆𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀯𑀸 𑀳𑀻𑀭𑀲𑁆𑀲 𑀯𑀸 𑀳𑁂𑀝𑁆𑀞𑀺𑀫𑀦𑁆𑀢𑀁 𑀨𑀼𑀲𑀢𑀺, 𑀅𑀬𑀁 𑀉𑀓𑁆𑀓𑀝𑁆𑀞𑁄 𑀦𑀸𑀫 𑀧𑀢𑁆𑀢𑁄. 𑀲𑀘𑁂 𑀢𑀁 𑀭𑀸𑀚𑀺𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀣𑀽𑀧𑀻𑀓𑀢𑀁 𑀢𑀺𑀝𑁆𑀞𑀢𑀺, 𑀅𑀬𑀁 𑀉𑀓𑁆𑀓𑀝𑁆𑀞𑁄𑀫𑀓𑁄 𑀦𑀸𑀫 𑀧𑀢𑁆𑀢𑁄. 𑀲𑀘𑁂 𑀢𑀁 𑀭𑀸𑀚𑀺𑀁 𑀦 𑀲𑀫𑁆𑀧𑀸𑀧𑀼𑀡𑀸𑀢𑀺, 𑀅𑀦𑁆𑀢𑁄𑀕𑀢𑀫𑁂𑀯 𑀳𑁄𑀢𑀺, 𑀅𑀬𑀁 𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑁄 𑀦𑀸𑀫 𑀧𑀢𑁆𑀢𑁄.

𑁬𑁨. ‘‘𑀫𑀚𑁆𑀛𑀺𑀫𑁄 𑀦𑀸𑀫 𑀧𑀢𑁆𑀢𑁄 𑀦𑀸𑀴𑀺𑀓𑁄𑀤𑀦𑀁 𑀕𑀡𑁆𑀳𑀸𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀫𑀚𑁆𑀛𑀺𑀫𑁄 𑀢𑀲𑁆𑀲𑀼𑀧𑀟𑁆𑀠𑁄 𑀯𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀫𑀚𑁆𑀛𑀺𑀫𑁄 𑀫𑀚𑁆𑀛𑀺𑀫𑁄𑀫𑀓𑁄 𑀫𑀚𑁆𑀛𑀺𑀫𑀼𑀓𑁆𑀓𑀝𑁆𑀞𑁄𑀢𑀺 𑀧𑀢𑁆𑀢𑀢𑁆𑀢𑀺𑀓𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀑𑀫𑀓𑁄 𑀦𑀸𑀫 𑀧𑀢𑁆𑀢𑁄 𑀧𑀢𑁆𑀣𑁄𑀤𑀦𑀁 𑀕𑀡𑁆𑀳𑀸𑀢𑀻’’𑀢𑀺 (𑀧𑀸𑀭𑀸. 𑁬𑁦𑁨) 𑀯𑀘𑀦𑀢𑁄 ‘‘𑀢𑀢𑁄𑀧𑀟𑁆𑀠𑁄’’𑀢𑀺 𑀯𑀼𑀢𑁆𑀢𑀁. 𑀫𑀕𑀥𑀦𑀸𑀴𑀺𑀬𑀸 𑀉𑀧𑀟𑁆𑀠𑀦𑀸𑀴𑀺𑀓𑁄𑀤𑀦𑀜𑁆𑀘 𑀢𑀤𑀽𑀧𑀺𑀬𑀁 𑀲𑀽𑀧𑀁 𑀩𑁆𑀬𑀜𑁆𑀚𑀦𑀜𑁆𑀘 𑀕𑀡𑁆𑀳𑀸𑀢𑀺, 𑀲𑁄 𑀑𑀫𑀓𑁄 𑀦𑀸𑀫. 𑀇𑀥𑀸𑀧𑀺 𑀑𑀫𑀓𑁄 𑀑𑀫𑀓𑁄𑀫𑀓𑁄 𑀑𑀫𑀓𑀼𑀓𑁆𑀓𑀝𑁆𑀞𑁄𑀢𑀺 𑀧𑀢𑁆𑀢𑀢𑁆𑀢𑀺𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀫𑁂𑀲𑀼 𑀧𑀦 𑀦𑀯𑀲𑀼 𑀧𑀢𑁆𑀢𑁂𑀲𑀼 𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑁄 𑀘 𑀑𑀫𑀓𑁄𑀫𑀓𑁄 𑀘 𑀅𑀧𑀢𑁆𑀢𑁄. 𑀏𑀢𑁂𑀲𑀼 𑀅𑀥𑀺𑀝𑁆𑀞𑀸𑀢𑀩𑁆𑀩𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀲𑁂𑀲𑀸 𑀲𑀢𑁆𑀢 𑀧𑀢𑁆𑀢𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀸, 𑀯𑀺𑀓𑀧𑁆𑀧𑁂𑀢𑀩𑁆𑀩𑀸 𑀘𑀸𑀢𑀺 𑀅𑀢𑁆𑀣𑁄.

𑁬𑁩. 𑀅𑀢𑀺𑀭𑁂𑀓𑀧𑀢𑁆𑀢𑁄𑀢𑀺 (𑀧𑀸𑀭𑀸. 𑁬𑁦𑁧) 𑀅𑀦𑀥𑀺𑀝𑁆𑀞𑀺𑀢𑁄 𑀅𑀯𑀺𑀓𑀧𑁆𑀧𑀺𑀢𑁄. 𑀲𑀓𑁄𑀢𑀺 𑀲𑀲𑀦𑁆𑀢𑀓𑁄. 𑀓𑀧𑁆𑀧𑁄𑀢𑀺 𑀓𑀧𑁆𑀧𑀺𑀬𑁄. 𑀅𑀬𑀫𑁂𑀯𑁂𑀢𑁆𑀣 𑀲𑀗𑁆𑀔𑁂𑀧𑁄 𑁋 𑀬𑁄 𑀧𑀢𑁆𑀢𑁄 𑀓𑀸𑀓𑀡𑀺𑀓𑀫𑀢𑁆𑀢𑀲𑁆𑀲𑀸𑀧𑀺 𑀫𑀽𑀮𑀲𑁆𑀲 𑀤𑀸𑀢𑀩𑁆𑀩𑀲𑁆𑀲 𑀦𑀢𑁆𑀣𑀺𑀢𑀸𑀬 𑀲𑀓𑁄. 𑀅𑀬𑁄𑀧𑀢𑁆𑀢𑁄 𑀧𑀜𑁆𑀘𑀳𑀺 𑀧𑀸𑀓𑁂𑀳𑀺 𑀫𑀢𑁆𑀢𑀺𑀓𑀸𑀧𑀢𑁆𑀢𑁄 𑀤𑁆𑀯𑀻𑀳𑀺 𑀧𑀸𑀓𑁂𑀳𑀺 𑀧𑀓𑁆𑀓𑀢𑁆𑀢𑀸 𑀓𑀧𑁆𑀧𑁄. 𑀲𑁄 𑀤𑀲𑀸𑀳𑀧𑀭𑀫𑀁 𑀓𑀸𑀮𑀁 𑀅𑀦𑀥𑀺𑀝𑁆𑀞𑀺𑀢𑁄 𑀅𑀯𑀺𑀓𑀧𑁆𑀧𑀺𑀢𑁄 𑀥𑀸𑀭𑁂𑀬𑁆𑀬𑁄𑀢𑀺.

𑁬𑁪. 𑀅𑀘𑁆𑀙𑁂𑀤𑀸𑀤𑀬𑁄 𑀘𑀻𑀯𑀭𑁂 𑀯𑀼𑀢𑁆𑀢𑀧𑁆𑀧𑀪𑁂𑀤𑀸𑀬𑁂𑀯. 𑀙𑀺𑀤𑁆𑀤𑁂𑀦𑀸𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁦𑁮; 𑀓𑀗𑁆𑀔𑀸. 𑀅𑀝𑁆𑀞. 𑀧𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀏𑀢𑁆𑀣 𑀬𑀲𑁆𑀲 𑀧𑀢𑁆𑀢𑀲𑁆𑀲 𑀫𑀼𑀔𑀯𑀝𑁆𑀝𑀺𑀢𑁄 𑀳𑁂𑀝𑁆𑀞𑀸 𑀤𑁆𑀯𑀗𑁆𑀕𑀼𑀮𑀧𑁆𑀧𑀤𑁂𑀲𑁂 𑀬𑁂𑀦 𑀙𑀺𑀤𑁆𑀤𑁂𑀦 𑀓𑀗𑁆𑀕𑀼𑀲𑀺𑀢𑁆𑀣𑀁 𑀦𑀺𑀓𑁆𑀔𑀫𑀢𑀺, 𑀢𑀢𑁆𑀢𑀓𑁂𑀦 𑀙𑀺𑀤𑁆𑀤𑁂𑀦 𑀪𑀺𑀚𑁆𑀚𑀢𑀺. 𑀢𑀲𑁆𑀫𑀺𑀁 𑀧𑀦 𑀅𑀬𑀘𑀼𑀡𑁆𑀡𑀸𑀤𑀻𑀳𑀺 𑀧𑀝𑀺𑀧𑀸𑀓𑀢𑀺𑀓𑁂 𑀓𑀢𑁂 𑀤𑀲𑀸𑀳𑀩𑁆𑀪𑀦𑁆𑀢𑀭𑁂 𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀧𑀢𑁆𑀢𑀸𑀥𑀺𑀝𑁆𑀞𑀸𑀦𑀫𑀼𑀚𑁆𑀛𑀢𑀻𑀢𑀺 𑀧𑀢𑁆𑀢𑁄 𑀅𑀥𑀺𑀝𑁆𑀞𑀸𑀦𑀁 𑀉𑀚𑁆𑀛𑀢𑀺.

𑁬𑁫. 𑀇𑀤𑀸𑀦𑀺 𑀧𑀭𑀺𑀳𑀭𑀡𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀢𑁆𑀢𑀁 𑀦 𑀧𑀝𑀺𑀲𑀸𑀫𑁂𑀬𑁆𑀬 𑀲𑁄𑀤𑀓’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀲𑁄𑀤𑀓𑀁 (𑀘𑀽𑀴𑀯. 𑁨𑁫𑁪) 𑀧𑀢𑁆𑀢𑀁 𑀦 𑀧𑀝𑀺𑀲𑀸𑀫𑁂𑀬𑁆𑀬, 𑀆𑀢𑀧𑁂 𑀘 𑀲𑁄𑀤𑀓𑀁 𑀧𑀢𑁆𑀢𑀁 𑀦 𑀑𑀢𑀧𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀦𑀺𑀤𑀳𑁂𑀢𑀺 𑀦𑀺𑀭𑀼𑀤𑀓𑀁 𑀓𑀢𑁆𑀯𑀸𑀧𑀺 𑀅𑀢𑀺𑀓𑀸𑀮𑀁 𑀦 𑀦𑀺𑀤𑀳𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀼𑀫𑁆𑀬𑀸𑀢𑀺 𑀪𑀽𑀫𑀺𑀬𑀁. 𑀦 𑀞𑀧𑁂𑀢𑀺 𑀢𑀝𑁆𑀝𑀺𑀓𑀸𑀘𑀫𑁆𑀫𑀔𑀡𑁆𑀟𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀅𑀦𑀢𑁆𑀣𑀢𑀸𑀬 𑀧𑀁𑀲𑀼𑀲𑀓𑁆𑀔𑀭𑀫𑀺𑀲𑁆𑀲𑀸𑀬 𑀪𑀽𑀫𑀺𑀬𑀸 𑀦 𑀞𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀦𑁄 𑀘 𑀮𑀕𑁆𑀕𑀬𑁂𑀢𑀺 𑀏𑀢𑁆𑀣𑀧𑀺 𑀦𑀸𑀕𑀤𑀦𑁆𑀢𑀸𑀤𑀻𑀲𑀼 (𑀘𑀽𑀴𑀯. 𑁨𑁫𑁪) 𑀬𑀢𑁆𑀣 𑀓𑀢𑁆𑀣𑀘𑀺 𑀮𑀕𑁆𑀕𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯.

𑁬𑁬. 𑀫𑀺𑀟𑁆𑀠𑀦𑁆𑀢𑁂𑀢𑀺 (𑀘𑀽𑀴𑀯. 𑁨𑁫𑁪; 𑀘𑀽𑀴𑀯. 𑀅𑀝𑁆𑀞. 𑁨𑁫𑁪) 𑀫𑀺𑀟𑁆𑀠𑀧𑀭𑀺𑀬𑀦𑁆𑀢𑁂. 𑀲𑀘𑁂 𑀧𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀢𑀢𑁆𑀣𑁂𑀯 𑀧𑀢𑀺𑀝𑁆𑀞𑀸𑀢𑀺, 𑀏𑀯𑀭𑀽𑀧𑀸𑀬 𑀯𑀺𑀢𑁆𑀣𑀺𑀡𑁆𑀡𑀸𑀬 𑀫𑀺𑀟𑁆𑀠𑀺𑀬𑀸 𑀅𑀩𑁆𑀪𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑁂 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺, 𑀦 𑀧𑀭𑀺𑀬𑀦𑁆𑀢𑁂. 𑀧𑀭𑀺𑀪𑀡𑁆𑀟𑀦𑁆𑀢𑁂𑀢𑀺 𑀩𑀸𑀳𑀺𑀭𑀧𑀲𑁆𑀲𑁂 𑀓𑀢𑀸𑀬 𑀢𑀦𑀼𑀓𑀫𑀺𑀟𑁆𑀠𑀺𑀬𑀸 𑀅𑀦𑁆𑀢𑁂𑀢𑀺 𑀅𑀢𑁆𑀣𑁄. 𑀅𑀗𑁆𑀓𑁂 𑀯𑀸𑀢𑀺 (𑀘𑀽𑀴𑀯. 𑁨𑁫𑁪) 𑀤𑁆𑀯𑀺𑀦𑁆𑀦𑀁 𑀊𑀭𑀽𑀦𑀁 𑀫𑀚𑁆𑀛𑁂. 𑀏𑀢𑁆𑀣 𑀧𑀦 𑀅𑀁𑀲𑀩𑀤𑁆𑀥𑀓𑁂 𑀅𑀁𑀲𑀓𑀽𑀝𑁂 𑀮𑀕𑁆𑀕𑁂𑀢𑁆𑀯𑀸 𑀅𑀗𑁆𑀓𑁂 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺, 𑀦 𑀇𑀢𑀭𑀣𑀸. 𑀆𑀢𑀧𑀢𑁆𑀢𑀓𑁂𑀢𑀺 𑀙𑀢𑁆𑀢𑁂. 𑀏𑀢𑁆𑀣 𑀪𑀢𑁆𑀢𑀧𑀽𑀭𑁄𑀧𑀺 𑀅𑀁𑀲𑀓𑀽𑀝𑁂 𑀮𑀕𑁆𑀕𑀺𑀢𑀧𑀢𑁆𑀢𑁄𑀧𑀺 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺.