𑁭. 𑀧𑀯𑀸𑀭𑀡𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁭𑁩. 𑀇𑀤𑀸𑀦𑀺 𑀧𑀯𑀸𑀭𑀡𑀸𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀯𑀸𑀭𑀡𑀸’’𑀢𑀺 (𑀧𑀸𑀘𑀺. 𑁨𑁩𑁮-𑁨𑁩𑁯; 𑀧𑀸𑀘𑀺. 𑀅𑀝𑁆𑀞. 𑁨𑁩𑁮-𑁨𑁩𑁯; 𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀧𑀯𑀸𑀭𑀡𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀧𑀤𑀁 𑀉𑀤𑁆𑀥𑀝𑀁. 𑀢𑀢𑁆𑀣 𑀇𑀭𑀺𑀬𑀸𑀧𑀣𑁂𑀦𑀸𑀢𑀺 𑀞𑀸𑀦𑀕𑀫𑀦𑀲𑀬𑀦𑀦𑀺𑀲𑀚𑁆𑀚𑀸𑀦𑀁 𑀅𑀜𑁆𑀜𑀢𑀭𑁂𑀦 𑀇𑀭𑀺𑀬𑀸𑀧𑀣𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀢𑁄 𑀇𑀭𑀺𑀬𑀸𑀧𑀣𑀢𑁄 𑀅𑀜𑁆𑀜𑁂𑀦 𑀇𑀭𑀺𑀬𑀸𑀧𑀣𑁂𑀦 𑀅𑀦𑀢𑀺𑀭𑀺𑀢𑁆𑀢𑀓𑀁 𑀧𑀭𑀺𑀪𑀼𑀜𑁆𑀚𑁂𑀬𑁆𑀬 𑀘𑁂, 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀘𑀺𑀢𑁆𑀢𑀺𑀦𑀢𑀺𑀭𑀺𑀢𑁆𑀢𑀓𑀦𑁆𑀢𑀺 𑀧𑀸𑀘𑀺𑀢𑁆𑀢𑀺 𑀅𑀦𑀢𑀺𑀭𑀺𑀢𑁆𑀢𑀓𑀁.

𑁭𑁪. 𑀇𑀤𑀸𑀦𑀺 𑀬𑁂𑀳𑀺 𑀅𑀗𑁆𑀕𑁂𑀳𑀺 𑀧𑀯𑀸𑀭𑀡𑀸 𑀳𑁄𑀢𑀺, 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀲𑀦𑀦𑁆𑀢𑀺 𑀏𑀢𑁂𑀦 𑀅𑀯𑀺𑀧𑁆𑀧𑀓𑀢𑀪𑁄𑀚𑀦𑀢𑀸 𑀯𑀼𑀢𑁆𑀢𑀸, 𑀪𑀼𑀜𑁆𑀚𑀫𑀸𑀦𑁄 𑀘 𑀲𑁄 𑀧𑀼𑀕𑁆𑀕𑀮𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀪𑁄𑀚𑀦𑀜𑁆𑀘𑁂𑀯𑀸𑀢𑀺 𑀬𑀁 𑀪𑀼𑀜𑁆𑀚𑀦𑁆𑀢𑁄 𑀧𑀯𑀸𑀭𑁂𑀢𑀺, 𑀢𑀁 𑀑𑀤𑀦𑁄 𑀓𑀼𑀫𑁆𑀫𑀸𑀲𑁄 𑀲𑀢𑁆𑀢𑀼 𑀫𑀘𑁆𑀙𑁄 𑀫𑀁𑀲𑀦𑁆𑀢𑀺 𑀇𑀫𑁂𑀲𑀼 𑀅𑀜𑁆𑀜𑀢𑀭𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀪𑀺𑀳𑀸𑀭𑁄𑀢𑀺 𑀤𑀸𑀬𑀓𑁄 𑀢𑀲𑁆𑀲 𑀢𑀁 𑀪𑀢𑁆𑀢𑀁 𑀓𑀸𑀬𑁂𑀦 𑀅𑀪𑀺𑀳𑀭𑀢𑀻𑀢𑀺 𑀅𑀢𑁆𑀣𑁄, 𑀯𑀸𑀘𑀸𑀪𑀺𑀳𑀸𑀭𑁄 𑀧𑀦 𑀦 𑀕𑀳𑁂𑀢𑀩𑁆𑀩𑁄. 𑀲𑀫𑀻𑀧𑀢𑀸𑀢𑀺 𑀤𑀸𑀬𑀓𑁄 𑀧𑀯𑀸𑀭𑀡𑀧𑁆𑀧𑀳𑁄𑀦𑀓𑀪𑁄𑀚𑀦𑀁 𑀕𑀳𑁂𑀢𑁆𑀯𑀸 𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑀧𑁆𑀧𑀫𑀸𑀡𑁂 𑀑𑀓𑀸𑀲𑁂 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀬𑀯𑀸𑀘𑀸𑀧𑀝𑀺𑀓𑁆𑀔𑁂𑀧𑁄𑀢𑀺 𑀳𑀢𑁆𑀣𑀧𑀸𑀲𑁂 𑀞𑀺𑀢𑁂𑀦 𑀅𑀪𑀺𑀳𑀝𑀁 𑀪𑀺𑀓𑁆𑀔𑀁 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀧𑀝𑀺𑀓𑁆𑀔𑀺𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀧𑀦 𑀲𑀘𑁂 𑀪𑀺𑀓𑁆𑀔𑀼 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀆𑀦𑀺𑀲𑀤𑀲𑁆𑀲 𑀧𑀸𑀭𑀺𑀫𑀦𑁆𑀢𑀢𑁄 𑀧𑀝𑁆𑀞𑀸𑀬, 𑀲𑀘𑁂 𑀞𑀺𑀢𑁄, 𑀧𑀡𑁆𑀳𑀺𑀅𑀦𑁆𑀢𑀢𑁄 𑀧𑀝𑁆𑀞𑀸𑀬, 𑀲𑀘𑁂 𑀦𑀺𑀧𑀦𑁆𑀦𑁄, 𑀬𑁂𑀦 𑀧𑀲𑁆𑀲𑁂𑀦 𑀦𑀺𑀧𑀦𑁆𑀦𑁄, 𑀢𑀲𑁆𑀲 𑀧𑀸𑀭𑀺𑀫𑀦𑁆𑀢𑀢𑁄 𑀧𑀝𑁆𑀞𑀸𑀬 𑀤𑀸𑀬𑀓𑀲𑁆𑀲𑀸𑀧𑀺 𑀢𑀣𑀸𑀯𑀺𑀥𑀲𑁆𑀲 𑀞𑀧𑁂𑀢𑁆𑀯𑀸 𑀧𑀲𑀸𑀭𑀺𑀢𑀳𑀢𑁆𑀣𑀁 𑀬𑀁 𑀢𑀲𑁆𑀲 𑀆𑀲𑀦𑁆𑀦𑀢𑀭𑀁 𑀅𑀗𑁆𑀕𑀁, 𑀢𑀲𑁆𑀲 𑀯𑀲𑁂𑀦 𑀧𑀭𑀺𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄. 𑀧𑀜𑁆𑀘 𑀅𑀗𑁆𑀕𑀸 𑀧𑀯𑀸𑀭𑀡𑀸𑀢𑀺 ‘‘𑀅𑀲𑀦𑀁 𑀧𑀜𑁆𑀜𑀸𑀬𑀢𑀺, 𑀪𑁄𑀚𑀦𑀁 𑀧𑀜𑁆𑀜𑀸𑀬𑀢𑀺, 𑀳𑀢𑁆𑀣𑀧𑀸𑀲𑁂 𑀞𑀺𑀢𑁄 𑀅𑀪𑀺𑀳𑀭𑀢𑀺, 𑀧𑀝𑀺𑀓𑁆𑀔𑁂𑀧𑁄 𑀧𑀜𑁆𑀜𑀸𑀬𑀢𑀻’’𑀢𑀺 (𑀧𑀸𑀘𑀺. 𑁨𑁩𑁯; 𑀧𑀭𑀺. 𑁪𑁨𑁮) 𑀧𑀸𑀴𑀺𑀬𑀁 𑀯𑀼𑀢𑁆𑀢𑁂𑀳𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀧𑀯𑀸𑀭𑀡𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁭𑁫. 𑀇𑀤𑀸𑀦𑀺 𑀏𑀢𑁂𑀲𑀼 𑀧𑀜𑁆𑀘𑀲𑀼 𑀪𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀑𑀤𑀦𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀑𑀤𑀦𑀸𑀤𑀬𑁄 𑀇𑀫𑁂𑀳𑀺 𑀦𑀺𑀩𑁆𑀩𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀸𑀮𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑁂𑀢𑀭𑀢𑁆𑀢𑀓𑀸𑀴𑀪𑁂𑀤𑀸 𑀲𑀩𑁆𑀩𑀸𑀧𑀺 𑀓𑀗𑁆𑀕𑀼𑀚𑀸𑀢𑀺𑀬𑁄 𑀓𑀗𑁆𑀕𑀽𑀢𑀺 𑀕𑀳𑁂𑀢𑀩𑁆𑀩𑀸. 𑀓𑀸𑀴𑀲𑁂𑀢𑀸 𑀓𑀼𑀤𑁆𑀭𑀽𑀲𑀯𑀭𑀓𑀸. 𑀇𑀫𑁂𑀲𑀁 𑀲𑀢𑁆𑀢𑀦𑁆𑀦𑀁 𑀥𑀜𑁆𑀜𑀸𑀦𑀁 𑀑𑀤𑀦𑁄 𑀘 𑀪𑁄𑀚𑁆𑀚𑀬𑀸𑀕𑀼 𑀘 𑀑𑀤𑀦𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄.

𑁭𑁬. 𑀲𑀸𑀫𑀸𑀓𑀸𑀤𑀺𑀢𑀺𑀡𑀁 (𑀧𑀸𑀘𑀺. 𑀅𑀝𑁆𑀞. 𑁨𑁩𑁮-𑁨𑁩𑁯) 𑀓𑀼𑀤𑁆𑀭𑀽𑀲𑀓𑁂 𑀲𑀗𑁆𑀕𑀳𑀁 𑀕𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀭𑀓𑀘𑁄𑀭𑀓𑁄 𑀯𑀭𑀓𑁂 𑀲𑀗𑁆𑀕𑀳𑀁 𑀕𑀢𑁄, 𑀲𑀸𑀮𑀺𑀬𑀜𑁆𑀘𑁂𑀯 𑀦𑀻𑀯𑀸𑀭𑁄 𑀲𑀗𑁆𑀕𑀳𑀁 𑀕𑀢𑁄 𑀲𑁂𑀢𑀢𑁆𑀢𑀸𑀢𑀺 𑀯𑀤𑀦𑁆𑀢𑀺. 𑀇𑀫𑁂𑀲𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀲𑀸𑀦𑀼𑀮𑁄𑀫𑀸𑀦𑀁 𑀲𑀢𑁆𑀢𑀦𑁆𑀦𑀁 𑀥𑀜𑁆𑀜𑀸𑀦𑀁 𑀢𑀡𑁆𑀟𑀼𑀮𑁂 𑀕𑀳𑁂𑀢𑁆𑀯𑀸 ‘‘𑀬𑀸𑀕𑀼𑀁 𑀧𑀘𑀺𑀲𑁆𑀲𑀸𑀫𑀸’’𑀢𑀺 𑀯𑀸 ‘‘𑀪𑀢𑁆𑀢𑀁 𑀧𑀘𑀺𑀲𑁆𑀲𑀸𑀫𑀸’’𑀢𑀺 𑀯𑀸 𑀬𑀁 𑀓𑀺𑀜𑁆𑀘𑀺 𑀲𑀦𑁆𑀥𑀸𑀬 𑀧𑀘𑀦𑁆𑀢𑀺, 𑀲𑀘𑁂 𑀉𑀡𑁆𑀳𑀁 𑀯𑀸 𑀲𑀻𑀢𑀮𑀁 𑀯𑀸 𑀪𑀼𑀜𑁆𑀚𑀦𑁆𑀢𑀸𑀦𑀁 𑀪𑁄𑀚𑀦𑀓𑀸𑀮𑁂 𑀕𑀳𑀺𑀢𑀕𑀳𑀺𑀢𑀝𑁆𑀞𑀸𑀦𑁂 𑀑𑀥𑀺 𑀧𑀜𑁆𑀜𑀸𑀬𑀢𑀺, 𑀅𑀬𑀁 𑀑𑀤𑀦𑁄 𑀦𑀸𑀫, 𑀧𑀯𑀸𑀭𑀡𑀁 𑀚𑀦𑁂𑀢𑀺. 𑀬𑁄𑀧𑀺 𑀧𑀸𑀬𑀸𑀲𑁄 𑀯𑀸 𑀅𑀫𑁆𑀩𑀺𑀮𑀬𑀸𑀕𑀼 𑀯𑀸 𑀉𑀤𑁆𑀥𑀦𑀢𑁄 𑀑𑀢𑀸𑀭𑀺𑀢𑀫𑀢𑁆𑀢𑀸 𑀅𑀩𑁆𑀪𑀼𑀡𑁆𑀳𑀸 𑀆𑀯𑀺𑀚𑁆𑀛𑀺𑀢𑁆𑀯𑀸 𑀧𑀺𑀯𑀺𑀢𑀼𑀁 𑀲𑀓𑁆𑀓𑀸, 𑀕𑀳𑀺𑀢𑁄𑀓𑀸𑀲𑁂𑀧𑀺 𑀑𑀥𑀺𑀁 𑀦 𑀤𑀲𑁆𑀲𑁂𑀢𑀺, 𑀅𑀬𑀁 𑀧𑀯𑀸𑀭𑀡𑀁 𑀦 𑀚𑀦𑁂𑀢𑀺. 𑀉𑀲𑀼𑀫𑀸𑀬 𑀧𑀦 𑀯𑀺𑀕𑀢𑀸𑀬 𑀖𑀦𑀪𑀸𑀯𑀁 𑀕𑀘𑁆𑀙𑀢𑀺, 𑀑𑀥𑀺 𑀧𑀜𑁆𑀜𑀸𑀬𑀢𑀺, 𑀧𑀼𑀦 𑀧𑀯𑀸𑀭𑀡𑀁 𑀚𑀦𑁂𑀢𑀺, 𑀧𑀼𑀩𑁆𑀩𑁂 𑀢𑀦𑀼𑀓𑀪𑀸𑀯𑁄 𑀦 𑀭𑀓𑁆𑀔𑀢𑀺. 𑀪𑀢𑁆𑀢𑁂 𑀧𑀦 𑀉𑀤𑀓𑀓𑀜𑁆𑀚𑀺𑀓𑀔𑀻𑀭𑀸𑀤𑀻𑀦𑀺 𑀆𑀓𑀺𑀭𑀺𑀢𑁆𑀯𑀸 ‘‘𑀬𑀸𑀕𑀼𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀦𑁆𑀢𑀺, 𑀓𑀺𑀜𑁆𑀘𑀸𑀧𑀺 𑀢𑀦𑀼𑀓𑀸 𑀳𑁄𑀢𑀺, 𑀧𑀯𑀸𑀭𑀡𑀁 𑀚𑀦𑁂𑀢𑀺𑀬𑁂𑀯 𑀢𑀲𑁆𑀫𑀺𑀁 𑀬𑀸𑀕𑀼𑀬𑀸 𑀦𑀢𑁆𑀣𑀺𑀪𑀸𑀯𑀢𑁄. 𑀲𑀘𑁂 𑀧𑀦 𑀧𑀓𑁆𑀓𑀼𑀣𑀺𑀢𑁂𑀲𑀼 𑀉𑀤𑀓𑀸𑀤𑀻𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑀺𑀢𑁆𑀯𑀸 𑀤𑁂𑀦𑁆𑀢𑀺, 𑀬𑀸𑀕𑀼𑀲𑀗𑁆𑀕𑀳𑀫𑁂𑀯 𑀕𑀘𑁆𑀙𑀢𑀺.

𑁭𑁭. 𑀪𑀝𑁆𑀞𑀥𑀜𑁆𑀜𑀫𑀬𑁄𑀢𑀺 𑀲𑀢𑁆𑀢𑀯𑀺𑀥𑀸𑀦𑀺𑀧𑀺 𑀥𑀜𑁆𑀜𑀸𑀦𑀺 𑀕𑀳𑁂𑀢𑁆𑀯𑀸 𑀔𑀭𑀧𑀸𑀓𑀪𑀚𑁆𑀚𑀺𑀢𑀸𑀦𑀁 𑀢𑁂𑀲𑀁 𑀢𑀡𑁆𑀟𑀼𑀮𑁂 𑀓𑁄𑀝𑁆𑀝𑁂𑀢𑁆𑀯𑀸 𑀓𑀢𑀘𑀼𑀡𑁆𑀡𑀓𑀼𑀡𑁆𑀟𑀓𑀸𑀦𑀺 𑀲𑀢𑁆𑀢𑀼 𑀦𑀸𑀫. 𑀲𑀫𑀧𑀸𑀓𑀪𑀚𑁆𑀚𑀺𑀢𑀸𑀦𑀁 𑀧𑀦 𑀆𑀢𑀧𑀲𑀼𑀓𑁆𑀔𑀸𑀦𑀁 𑀯𑀸 𑀢𑀡𑁆𑀟𑀼𑀮𑀸𑀦𑀁 𑀘𑀼𑀡𑁆𑀡𑀓𑀼𑀡𑁆𑀟𑀓𑀸𑀦𑀺 𑀲𑀢𑁆𑀢𑀼𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀦𑁆𑀢𑀺. 𑀬𑀯𑀲𑀫𑁆𑀪𑀯𑁄𑀢𑀺 𑀅𑀜𑁆𑀜𑁂𑀳𑀺 𑀧𑀦 𑀫𑀼𑀕𑁆𑀕𑀸𑀤𑀻𑀳𑀺 𑀓𑀢𑀓𑀼𑀫𑁆𑀫𑀸𑀲𑁄 𑀦 𑀧𑀯𑀸𑀭𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀤𑀓𑀲𑀫𑁆𑀪𑀯𑁄𑀢𑀺 𑀇𑀫𑀺𑀦𑀸 𑀓𑀓𑁆𑀓𑀝𑀓𑀲𑀺𑀧𑁆𑀧𑀺𑀓𑀲𑀫𑁆𑀩𑀼𑀓𑀸𑀤𑀬𑁄𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀲𑀘𑁂 𑀬𑀸𑀕𑀼𑀧𑀸𑀦𑀓𑀸𑀮𑁂 𑀏𑀓𑀲𑁆𑀫𑀺𑀁 𑀪𑀸𑀚𑀦𑁂 𑀞𑀧𑁂𑀢𑁆𑀯𑀸 𑀫𑀘𑁆𑀙𑀫𑀁𑀲𑀁 𑀯𑀸 𑀔𑀸𑀤𑀦𑁆𑀢𑀺, 𑀢𑁂 𑀘𑁂 𑀅𑀔𑀸𑀤𑀦𑁆𑀢𑁄 𑀅𑀜𑁆𑀜𑀁 𑀧𑀯𑀸𑀭𑀡𑀧𑁆𑀧𑀳𑁄𑀦𑀓𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀧𑀯𑀸𑀭𑁂𑀢𑀺. 𑀔𑀸𑀤𑀺𑀢𑁂𑀧𑀺 𑀲𑀘𑁂 𑀫𑀼𑀔𑁂 𑀅𑀯𑀲𑀺𑀝𑁆𑀞𑀁 𑀦𑀢𑁆𑀣𑀺, 𑀢𑀤𑀸 𑀧𑀝𑀺𑀓𑁆𑀔𑀺𑀧𑀦𑁆𑀢𑁄𑀧𑀺 𑀦 𑀧𑀯𑀸𑀭𑁂𑀢𑀺𑀬𑁂𑀯. 𑀲𑀘𑁂 𑀧𑀢𑁆𑀢𑁂 𑀅𑀯𑀲𑀺𑀝𑁆𑀞𑀁 𑀅𑀢𑁆𑀣𑀺, 𑀫𑀼𑀔𑁂 𑀦𑀢𑁆𑀣𑀺, 𑀢𑀜𑁆𑀘𑁂 𑀅𑀔𑀸𑀤𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀅𑀜𑁆𑀜𑀢𑁆𑀣 𑀯𑀸 𑀕𑀦𑁆𑀢𑁆𑀯𑀸 𑀔𑀸𑀤𑀺𑀢𑀼𑀓𑀸𑀫𑁄, 𑀢𑀲𑁆𑀫𑀺𑀁 𑀔𑀡𑁂 𑀧𑀝𑀺𑀓𑁆𑀔𑀺𑀧𑀦𑁆𑀢𑁄𑀧𑀺 𑀦 𑀧𑀯𑀸𑀭𑁂𑀢𑀺𑀬𑁂𑀯.

𑁭𑁮. 𑀪𑁄𑀚𑀦𑀦𑁆𑀢𑀺 (𑀧𑀸𑀘𑀺. 𑀅𑀝𑁆𑀞. 𑁨𑁩𑁮-𑁨𑁩𑁯) 𑀧𑀜𑁆𑀘𑀲𑀼 𑀪𑁄𑀚𑀦𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀪𑁄𑀚𑀦𑀁. 𑀓𑀧𑁆𑀧𑀺𑀬𑀁 𑀯𑀸 𑀅𑀓𑀧𑁆𑀧𑀺𑀬𑀁 𑀯𑀸 𑀪𑀼𑀜𑁆𑀚𑀦𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀲𑁂𑀥𑀬𑀦𑁆𑀢𑀺 𑀓𑀸𑀬𑁂𑀦𑀸𑀪𑀺𑀳𑀝𑀁 𑀅𑀗𑁆𑀕𑀼𑀮𑀺𑀘𑀮𑀦𑀸𑀤𑀺𑀦𑀸 𑀯𑀸 𑀪𑀫𑀼𑀓𑀯𑀺𑀓𑀸𑀭𑁂𑀦 𑀯𑀸 𑀓𑀼𑀤𑁆𑀥𑀪𑀸𑀯𑁂𑀦 𑀑𑀮𑁄𑀓𑁂𑀦 𑀯𑀸 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀓𑀸𑀬𑁂𑀦 𑀯𑀸 ‘‘𑀅𑀮’’𑀦𑁆𑀢𑀺 𑀯𑀸 ‘‘𑀦 𑀕𑀡𑁆𑀳𑀸𑀫𑀻’’𑀢𑀺 𑀯𑀸 ‘‘𑀫𑀸 𑀆𑀓𑀺𑀭𑀸’’𑀢𑀺 𑀯𑀸 ‘‘𑀅𑀧𑀕𑀘𑁆𑀙𑀸’’𑀢𑀺 𑀯𑀸 𑀆𑀤𑀺𑀦𑀸 𑀦𑀬𑁂𑀦 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀯𑀸𑀘𑀸𑀬 𑀯𑀸 𑀦𑀺𑀲𑁂𑀥𑀬𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀓𑀧𑁆𑀧𑀦𑁆𑀢𑀺 𑀓𑀧𑁆𑀧𑀺𑀬𑀪𑁄𑀚𑀦𑀫𑁂𑀯 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀲𑁄 𑀧𑀯𑀸𑀭𑁂𑀢𑀺, 𑀅𑀓𑀧𑁆𑀧𑀺𑀬𑀫𑀁𑀲𑀁 𑀯𑀸 𑀪𑁄𑀚𑀦𑀁 𑀯𑀸 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀦 𑀧𑀯𑀸𑀭𑁂𑀢𑀺. 𑀓𑀲𑁆𑀫𑀸? 𑀢𑀲𑁆𑀲 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀝𑁆𑀞𑀸𑀦𑁂 𑀞𑀺𑀢𑀢𑁆𑀢𑀸. 𑀲𑀘𑁂 𑀓𑀧𑁆𑀧𑀺𑀬𑀪𑁄𑀚𑀦𑀁 𑀪𑀼𑀜𑁆𑀚𑀫𑀸𑀦𑁄 𑀅𑀓𑀧𑁆𑀧𑀺𑀬𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀧𑀯𑀸𑀭𑁂𑀢𑀺. 𑀓𑀲𑁆𑀫𑀸? 𑀢𑀲𑁆𑀲 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀢𑁄. 𑀇𑀤𑀸𑀦𑀺 𑀫𑀺𑀲𑁆𑀲𑀓𑀦𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀦𑁆𑀦𑀸𑀫𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀧𑀺𑀡𑁆𑀟𑀢𑁆𑀣𑁄 𑁋 𑀢𑀦𑁆𑀦𑀸𑀫𑁂𑀦 𑀯𑀸 𑀇𑀫𑀦𑁆𑀢𑀺 𑀯𑀸 𑀅𑀪𑀺𑀳𑀝𑀁 𑀓𑀧𑁆𑀧𑀺𑀬𑀁 𑀦𑀺𑀲𑁂𑀥𑀬𑀁 𑀧𑀯𑀸𑀭𑁂𑀬𑁆𑀬𑀸𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑁄 𑀧𑀦 𑀫𑀘𑁆𑀙𑀫𑀁𑀲𑀫𑀺𑀲𑁆𑀲𑀁 (𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀧𑀯𑀸𑀭𑀡𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸; 𑀧𑀸𑀘𑀺. 𑀅𑀝𑁆𑀞. 𑁨𑁩𑁮-𑁨𑁩𑁯) 𑀬𑀸𑀕𑀼𑀁 𑀩𑁆𑀬𑀜𑁆𑀚𑀦𑀁 𑀯𑀸 𑀆𑀳𑀭𑀺𑀢𑁆𑀯𑀸 ‘‘𑀫𑀘𑁆𑀙𑀁 𑀕𑀡𑁆𑀳𑀣, 𑀫𑀁𑀲𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀢𑀁 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸 𑀳𑁄𑀢𑀺. 𑀲𑀘𑁂 ‘‘𑀬𑀸𑀕𑀼𑀁 𑀕𑀡𑁆𑀳𑀣, 𑀭𑀲𑀩𑁆𑀬𑀜𑁆𑀚𑀦𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀢𑀁 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸 𑀦 𑀳𑁄𑀢𑀺. 𑀓𑀲𑁆𑀫𑀸? 𑀢𑀲𑁆𑀲𑀸𑀧𑀺 𑀅𑀢𑁆𑀣𑀺𑀢𑀸𑀬. 𑀲𑀘𑁂 ‘‘𑀇𑀫𑀁 𑀕𑀡𑁆𑀳𑀣𑀸’’𑀢𑀺 𑀲𑀯𑀢𑁆𑀣𑀼𑀓𑀁 𑀓𑀢𑁆𑀯𑀸 𑀤𑁂𑀢𑀺, 𑀢𑀁 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸 𑀳𑁄𑀢𑀺. 𑀪𑀢𑁆𑀢𑀫𑀺𑀲𑁆𑀲𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀅𑀜𑁆𑀜𑀲𑁆𑀲 𑀅𑀪𑀺𑀳𑀝𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀧𑀯𑀸𑀭𑀡𑀸 𑀦𑀢𑁆𑀣𑀺𑀬𑁂𑀯.

𑁭𑁯-𑁮𑁦. 𑀇𑀤𑀸𑀦𑀺 𑀧𑀯𑀸𑀭𑀡𑀁 𑀅𑀚𑀦𑁂𑀦𑁆𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀮𑀸𑀚𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀮𑀸𑀚𑀸 𑀢𑀁𑀲𑀢𑁆𑀢𑀼𑀪𑀢𑁆𑀢𑀸𑀦𑀻𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀧𑀯𑀸𑀭𑀡𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀮𑀸𑀚𑀸 𑀘 𑀮𑀸𑀚𑁂𑀳𑀺 𑀓𑀢𑀲𑀢𑁆𑀢𑀼𑀪𑀢𑁆𑀢𑀸𑀦𑀺 𑀘𑀸𑀢𑀺 𑀅𑀢𑁆𑀣𑁄. 𑀫𑀘𑁆𑀙𑀫𑀁𑀲𑀧𑀽𑀯𑁂𑀲𑀼 𑀧𑀦 𑀧𑀯𑀸𑀭𑀡𑀸 𑀳𑁄𑀢𑀺, 𑀢𑀲𑁆𑀫𑀸 ‘‘𑀲𑀼𑀤𑁆𑀥𑀔𑀚𑁆𑀚𑀓𑁄’’𑀢𑀺 𑀯𑀼𑀢𑁆𑀢𑀁. 𑀪𑀝𑁆𑀞𑀧𑀺𑀝𑁆𑀞𑀦𑁆𑀢𑀺 𑀧𑀼𑀩𑁆𑀩𑁂 𑀆𑀫𑀓𑀁 𑀧𑀘𑁆𑀙𑀸 𑀪𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑁂𑀴𑀼𑀆𑀤𑀻𑀦𑀁 𑀯𑀼𑀢𑁆𑀢𑀸𑀯𑀲𑁂𑀲𑀸𑀦𑀁 𑀪𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀭𑀲𑀬𑀸𑀕𑀼 𑀭𑀲𑁄 𑀧𑀓𑁆𑀓𑀬𑀸𑀕𑀼. 𑀫𑀁𑀲𑀸𑀤𑀻𑀳𑀺 𑀅𑀫𑀺𑀲𑁆𑀲𑀺𑀢𑀸 𑀲𑀼𑀤𑁆𑀥𑀬𑀸𑀕𑀼. 𑀧𑀼𑀣𑀼𑀓𑀸𑀫𑀬𑀁 𑀧𑀦 𑀬𑀁 𑀓𑀺𑀜𑁆𑀘𑀺 𑀧𑀯𑀸𑀭𑀡𑀁 𑀦 𑀚𑀦𑁂𑀢𑀺.

𑁮𑁧. 𑀯𑀼𑀝𑁆𑀞𑀸𑀬𑀸𑀢𑀺 (𑀧𑀸𑀘𑀺. 𑀅𑀝𑁆𑀞. 𑁨𑁩𑁮-𑁨𑁩𑁯) 𑀆𑀲𑀦𑀸 𑀉𑀝𑁆𑀞𑀸𑀬 𑀅𑀢𑀺𑀭𑀺𑀢𑁆𑀢𑀁 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀘𑁂 𑀧𑀯𑀸𑀭𑁂𑀢𑁆𑀯𑀸 𑀆𑀲𑀦𑀸 𑀦 𑀯𑀼𑀝𑁆𑀞𑀸𑀢𑀺 𑀪𑀺𑀓𑁆𑀔𑀼, 𑀢𑀲𑁆𑀲𑀸𑀧𑀺 𑀅𑀢𑀺𑀭𑀺𑀢𑁆𑀢𑀁 𑀓𑀸𑀢𑀼𑀁 𑀮𑀪𑀢𑀺. 𑀅𑀪𑀼𑀢𑁆𑀢𑁂𑀦 𑀘 𑀪𑁄𑀚𑀦𑀦𑁆𑀢𑀺 𑀬𑁂𑀦 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑀁 𑀪𑁄𑀚𑀦𑀁 𑀅𑀦𑁆𑀢𑀫𑀲𑁄 𑀓𑀼𑀲𑀕𑁆𑀕𑁂𑀦𑀸𑀧𑀺 𑀦 𑀪𑀼𑀢𑁆𑀢𑀁, 𑀢𑁂𑀦𑀸𑀧𑀺 𑀅𑀢𑀺𑀭𑀺𑀢𑁆𑀢𑀁 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀬𑁂𑀦 𑀧𑀦 𑀅𑀭𑀼𑀡𑀼𑀕𑁆𑀕𑀫𑁂𑀧𑀺 𑀪𑀼𑀢𑁆𑀢𑀁 𑀳𑁄𑀢𑀺, 𑀲𑁄 𑀘𑁂 𑀅𑀧𑀯𑀸𑀭𑀺𑀢𑁄 𑀆𑀲𑀦𑀸 𑀯𑀼𑀝𑁆𑀞𑀺𑀢𑁄𑀧𑀺 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂𑀧𑀺 𑀧𑀼𑀦 𑀓𑀺𑀜𑁆𑀘𑀺 𑀅𑀪𑀼𑀢𑁆𑀯𑀸𑀧𑀺 𑀓𑀸𑀢𑀼𑀁 𑀮𑀪𑀢𑀺. 𑀬𑁂𑀦 𑀬𑀁 𑀯𑀸 𑀧𑀼𑀭𑁂 𑀓𑀢𑀦𑁆𑀢𑀺 𑀬𑁂𑀦 𑀬𑀁 𑀯𑀸 𑀧𑀼𑀩𑁆𑀩𑁂 𑀓𑀢𑀁, 𑀢𑁂𑀦 𑀢𑀫𑁆𑀧𑀺 𑀧𑀘𑁆𑀙𑀸 𑀦 𑀓𑀸𑀢𑀩𑁆𑀩𑀁. 𑀅𑀜𑁆𑀜𑁂𑀦 𑀧𑀦 𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺.

𑁮𑁨. 𑀬𑀁 𑀨𑀮𑀁 𑀯𑀸 𑀓𑀦𑁆𑀤𑀫𑀽𑀮𑀁 𑀯𑀸 𑀧𑀜𑁆𑀘𑀳𑀺 𑀲𑀫𑀡𑀓𑀧𑁆𑀧𑁂𑀳𑀺 𑀓𑀢𑀓𑀧𑁆𑀧𑀺𑀬𑀁 𑀅𑀜𑁆𑀜𑀫𑁆𑀧𑀺 𑀓𑀧𑁆𑀧𑀺𑀬𑀪𑁄𑀚𑀦𑀁 𑀯𑀸 𑀓𑀧𑁆𑀧𑀺𑀬𑀫𑀁𑀲𑀁 𑀯𑀸, 𑀇𑀤𑀁 𑀓𑀧𑁆𑀧𑀺𑀬𑀁 𑀦𑀸𑀫, 𑀯𑀼𑀢𑁆𑀢𑀧𑁆𑀧𑀓𑀸𑀭𑀯𑀺𑀧𑀭𑀻𑀢𑀁 𑀅𑀓𑀧𑁆𑀧𑀺𑀬𑀁 𑀦𑀸𑀫, 𑀢𑀲𑁆𑀫𑀺𑀁 𑀅𑀢𑀺𑀭𑀺𑀢𑁆𑀢𑀓𑀭𑀡𑀁 𑀦 𑀭𑀼𑀳𑀢𑀺, 𑀬𑀜𑁆𑀘 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦 𑀕𑀳𑀺𑀢𑀁, 𑀢𑀲𑁆𑀫𑀺𑀫𑁆𑀧𑀺 𑀦 𑀭𑀼𑀳𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀧𑁆𑀧𑀺𑀬𑀁 𑀕𑀳𑀺𑀢𑀜𑁆𑀘𑁂𑀯𑀸’’𑀢𑀺. 𑀉𑀘𑁆𑀘𑀸𑀭𑀺𑀢𑀦𑁆𑀢𑀺 𑀓𑀧𑁆𑀧𑀺𑀬𑀁 𑀓𑀸𑀭𑁂𑀢𑀼𑀁 𑀆𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀈𑀲𑀓𑀫𑁆𑀧𑀺 𑀉𑀓𑁆𑀔𑀺𑀢𑁆𑀢𑀁 𑀯𑀸 𑀅𑀧𑀦𑀫𑀺𑀢𑀁 𑀯𑀸𑀢𑀺 𑀅𑀢𑁆𑀣𑁄. 𑀳𑀢𑁆𑀣𑀧𑀸𑀲𑀢𑁄 𑀩𑀳𑀺 𑀞𑀺𑀢𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀳𑀢𑁆𑀣𑀧𑀸𑀲𑀕’’𑀦𑁆𑀢𑀺. 𑀅𑀢𑀺𑀭𑀺𑀢𑁆𑀢𑀁 𑀓𑀭𑁄𑀦𑁆𑀢𑁂𑀯𑀦𑁆𑀢𑀺 𑀅𑀢𑀺𑀭𑀺𑀢𑁆𑀢𑀁 𑀓𑀭𑁄𑀦𑁆𑀢𑁄 ‘‘𑀅𑀮𑀫𑁂𑀢𑀁 𑀲𑀩𑁆𑀩’’𑀦𑁆𑀢𑀺 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀏𑀯𑀁 𑀪𑀸𑀲𑀢𑀽𑀢𑀺 𑀅𑀢𑁆𑀣𑁄. ‘‘𑀅𑀮𑀫𑁂𑀢𑀁 𑀲𑀩𑁆𑀩’’𑀦𑁆𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀢𑀩𑁆𑀩𑀁, 𑀅𑀬𑀁 𑀓𑀺𑀭 𑀆𑀘𑀺𑀡𑁆𑀡𑁄. 𑀯𑀺𑀦𑀬𑀥𑀭𑀸 𑀓𑀺𑀭 𑀧𑀦 ‘‘𑀲𑀓𑀺𑀁 𑀏𑀯 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀮𑀫𑁂𑀢𑀁 𑀲𑀩𑁆𑀩𑀦𑁆𑀢𑀺 𑀇𑀤𑀫𑁆𑀧𑀺 𑀯𑁄 𑀅𑀥𑀺𑀓𑀁, 𑀇𑀢𑁄 𑀅𑀜𑁆𑀜𑀁 𑀦 𑀮𑀘𑁆𑀙𑀲𑀻𑀢𑀺 𑀅𑀢𑁆𑀣𑁄.

𑁮𑁩. 𑀅𑀦𑀼𑀧𑀲𑀫𑁆𑀧𑀦𑁆𑀦𑀳𑀢𑁆𑀣𑀕𑀦𑁆𑀢𑀺 𑀓𑀧𑁆𑀧𑀺𑀬𑀁 𑀓𑀭𑁄𑀦𑁆𑀢𑁂𑀦 𑀧𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀳𑀢𑁆𑀣𑁂 𑀞𑀺𑀢𑀁𑀬𑁂𑀯 𑀦 𑀓𑀸𑀢𑀩𑁆𑀩𑀁, 𑀢𑀁 𑀧𑀦 𑀅𑀜𑁆𑀜𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀕𑁆𑀕𑀳𑀸𑀧𑁂𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑁂 𑀞𑀺𑀢𑀁 𑀅𑀢𑀺𑀭𑀺𑀢𑁆𑀢𑀁 𑀓𑀢𑁆𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀅𑀢𑁆𑀢𑀦𑀸 𑀆𑀕𑀦𑁆𑀢𑁆𑀯𑀸 𑀅𑀜𑁆𑀜𑀲𑁆𑀲 𑀳𑀢𑁆𑀣𑁂 𑀘 𑀧𑁂𑀲𑀬𑀺𑀢𑁆𑀯𑀸𑀧𑀺 𑀓𑀸𑀭𑁂𑀢𑀼𑀁 𑀮𑀩𑁆𑀪𑀢𑁂𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀅𑀢𑀺𑀭𑀺𑀢𑁆𑀢𑀓𑀸𑀭𑀓𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁄 𑀲𑀩𑁆𑀩𑁄 𑀧𑀯𑀸𑀭𑀺𑀢𑁄𑀧𑀺 𑀅𑀧𑁆𑀧𑀯𑀸𑀭𑀺𑀢𑁄𑀧𑀺 𑀪𑀼𑀜𑁆𑀚𑀺𑀢𑀼𑀁 𑀮𑀪𑀢𑀻𑀢𑀺 𑀅𑀢𑁆𑀣𑁄. 𑀲𑀘𑁂 𑀧𑀯𑀸𑀭𑀺𑀢𑁄 𑀧𑀭𑀺𑀪𑀼𑀜𑁆𑀚𑀢𑀺, 𑀬𑀣𑀸 𑀅𑀓𑀢𑁂𑀦 𑀫𑀺𑀲𑁆𑀲𑀁 𑀦 𑀳𑁄𑀢𑀺, 𑀢𑀣𑀸 𑀫𑀼𑀔𑀜𑁆𑀘 𑀳𑀢𑁆𑀣𑀜𑁆𑀘 𑀲𑀼𑀤𑁆𑀥𑀁 𑀓𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀕𑀺𑀮𑀸𑀦𑀲𑁆𑀲 𑀪𑀼𑀢𑁆𑀢𑀸𑀯𑀲𑁂𑀲𑀫𑁆𑀧𑀺 𑀢𑀲𑁆𑀲 ‘‘𑀅𑀚𑁆𑀚 𑀯𑀸 𑀲𑁆𑀯𑁂 𑀯𑀸 𑀔𑀸𑀤𑀺𑀲𑁆𑀲𑀢𑀻’’𑀢𑀺 𑀆𑀳𑀝𑀫𑁆𑀧𑀺 𑀅𑀦𑀢𑀺𑀭𑀺𑀢𑁆𑀢𑀓𑀢𑀁 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀧𑀯𑀸𑀭𑀡𑀸𑀯𑀺𑀦𑀺𑀘𑁆𑀙𑀬𑁄.

𑀧𑀯𑀸𑀭𑀡𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.