𑁪𑁧. 𑀧𑀓𑀺𑀡𑁆𑀡𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁩𑁫-𑁬. 𑀲𑀤𑁆𑀯𑀸𑀭𑀩𑀦𑁆𑀥𑀦𑁂 𑀞𑀸𑀦𑁂…𑀧𑁂… 𑀲𑀬𑀦𑁆𑀢𑁄 𑀤𑀼𑀓𑁆𑀓𑀝𑀁 𑀨𑀼𑀲𑁂𑀢𑀺 𑀏𑀯𑀭𑀽𑀧𑁂 𑀞𑀸𑀦𑁂 𑀤𑀺𑀯𑀸 𑀲𑀬𑀦𑁆𑀢𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀤𑁆𑀯𑀸𑀭𑀩𑀦𑁆𑀥𑀦𑁂 (𑀧𑀸𑀭𑀸. 𑁭𑁭; 𑀧𑀸𑀭𑀸. 𑀅𑀝𑁆𑀞. 𑁧.𑁭𑁭) 𑀧𑀦 𑀞𑀸𑀦𑁂 𑀬𑁂𑀦 𑀓𑁂𑀦𑀘𑀺 𑀧𑀭𑀺𑀓𑁆𑀔𑀺𑀢𑁆𑀢𑁂 𑀅𑀩𑁆𑀪𑁄𑀓𑀸𑀲𑁂𑀧𑀺 𑀭𑀼𑀓𑁆𑀔𑀫𑀽𑀮𑁂𑀧𑀺 𑀅𑀦𑁆𑀢𑀫𑀲𑁄 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀬𑀼𑀢𑁆𑀢𑁂 𑀆𑀓𑀸𑀲𑀗𑁆𑀕𑀡𑁂𑀧𑀺 𑀲𑀬𑀦𑁆𑀢𑁂𑀦 𑀤𑁆𑀯𑀸𑀭𑀁 𑀩𑀦𑁆𑀥𑀺𑀢𑀩𑁆𑀩𑀫𑁂𑀯. 𑀯𑀺𑀜𑁆𑀜𑀼𑀫𑁆𑀳𑀺 𑀧𑀼𑀭𑀺𑀲𑁂𑀢𑀺 𑀪𑀺𑀓𑁆𑀔𑀼𑀫𑁆𑀳𑀺 𑀯𑀸 𑀲𑀸𑀫𑀡𑁂𑀭𑁂 𑀯𑀸 𑀅𑀦𑁆𑀢𑀫𑀲𑁄 𑀉𑀧𑀸𑀲𑀓𑀆𑀭𑀸𑀫𑀺𑀓𑁂𑀲𑀼𑀧𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀲𑀢𑀻𑀢𑀺 𑀅𑀢𑁆𑀣𑁄. ‘‘𑀏𑀲 𑀚𑀕𑁆𑀕𑀺𑀲𑁆𑀲𑀢𑀻’’𑀢𑀺 𑀆𑀪𑁄𑀕𑁄 𑀘𑀸𑀧𑀺 𑀓𑀧𑁆𑀧𑀢𑀻𑀢𑀺 𑀓𑁂𑀯𑀮𑀁 𑀪𑀺𑀓𑁆𑀔𑀼𑀦𑀺𑀁 𑀯𑀸 𑀫𑀸𑀢𑀼𑀕𑀸𑀫𑀁 𑀯𑀸 𑀆𑀧𑀼𑀘𑁆𑀙𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀯𑀲𑁂𑀢𑀺 𑀅𑀢𑁆𑀢𑀦𑁄 𑀯𑀲𑁂, 𑀅𑀩𑀳𑀼𑀲𑀸𑀥𑀸𑀭𑀡𑀝𑁆𑀞𑀸𑀦𑁂𑀢𑀺 𑀅𑀢𑁆𑀣𑁄. 𑀢𑀁 𑀯𑀺𑀦𑀸𑀓𑀸𑀭𑀦𑁆𑀢𑀺 𑀢𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀤𑁆𑀯𑀸𑀭𑀣𑀓𑀦𑀆𑀪𑁄𑀕𑀓𑀭𑀡𑀲𑀗𑁆𑀔𑀸𑀢𑀁 𑀆𑀓𑀸𑀭𑀁 𑀯𑀺𑀦𑀸𑀢𑀺 𑀅𑀢𑁆𑀣𑁄. 𑀅𑀘𑀺𑀢𑁆𑀢𑀓𑀸𑀧𑀢𑁆𑀢𑀺𑀓𑀺𑀭𑀺𑀬𑀸𑀬𑀁 𑀲𑀗𑁆𑀔𑁂𑀧𑁄.

𑁩𑁩𑁭. 𑀭𑀢𑀦𑀸𑀦𑀻𑀢𑀺 𑀫𑀼𑀢𑁆𑀢𑀸𑀤𑀺𑀤𑀲𑀯𑀺𑀥𑀭𑀢𑀦𑀸𑀦𑀺. 𑀥𑀜𑁆𑀜𑀦𑁆𑀢𑀺 𑀲𑀢𑁆𑀢𑀯𑀺𑀥𑀁 𑀥𑀜𑁆𑀜𑀁.

𑁩𑁩𑁮. 𑀲𑀺𑀢𑁆𑀣𑀢𑁂𑀮𑁄𑀤𑀢𑁂𑀮𑁂𑀳𑀻𑀢𑀺 𑀏𑀢𑁆𑀣 (𑀘𑀽𑀴𑀯. 𑁨𑁪𑁬; 𑀘𑀽𑀴𑀯. 𑀅𑀝𑁆𑀞. 𑁨𑁪𑁬) 𑀧𑀦 𑀬𑁄 𑀫𑀥𑀼𑀲𑀺𑀢𑁆𑀣𑀓𑀢𑁂𑀮𑁂𑀦 𑀯𑀸 𑀉𑀤𑀓𑀫𑀺𑀲𑁆𑀲𑀓𑀢𑁂𑀮𑁂𑀦 𑀯𑀸 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀯𑀺𑀓𑀸𑀭𑁂𑀦 𑀯𑀸 𑀓𑁂𑀲𑁂 𑀑𑀲𑀡𑁆𑀞𑁂𑀢𑀺, 𑀤𑀦𑁆𑀢𑀫𑀬𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀨𑀡𑁂𑀦 𑀯𑀸 𑀓𑁄𑀘𑁆𑀙𑁂𑀦 𑀯𑀸 𑀳𑀢𑁆𑀣𑁂𑀦 𑀯𑀸 𑀨𑀡𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑁄 𑀅𑀗𑁆𑀕𑀼𑀮𑀻𑀳𑀺 𑀯𑀸 𑀑𑀲𑀡𑁆𑀞𑁂𑀢𑀺, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁩𑁩𑁯. 𑀦𑁂𑀓𑀧𑀸𑀯𑀼𑀭𑀡𑀸𑀢𑀺 (𑀘𑀽𑀴𑀯. 𑁨𑁬𑁪) 𑀦 𑀏𑀓𑀧𑀸𑀯𑀼𑀭𑀡𑀸. 𑀢𑀼𑀯𑀝𑁆𑀝𑀬𑀼𑀦𑁆𑀢𑀺 𑀦𑀺𑀧𑀚𑁆𑀚𑁂𑀬𑁆𑀬𑀼𑀁. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀤𑀺 𑀏𑀓𑀧𑀸𑀯𑀼𑀭𑀡𑀸 𑀯𑀸 𑀏𑀓𑀢𑁆𑀣𑀭𑀡𑀸 𑀯𑀸 𑀏𑀓𑀫𑀜𑁆𑀘𑁂 𑀯𑀸 𑀢𑀼𑀯𑀝𑁆𑀝𑁂𑀬𑁆𑀬𑀼𑀁, 𑀦 𑀯𑀝𑁆𑀝𑀢𑀺, 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀓𑀫𑁆𑀳𑀺 (𑀘𑀽𑀴𑀯. 𑀅𑀝𑁆𑀞. 𑁨𑁬𑁪) 𑀯𑀸 𑀪𑀸𑀚𑀦𑁂 𑀦 𑀪𑀼𑀜𑁆𑀚𑁂𑀬𑁆𑀬𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁪𑁦. 𑀘𑀢𑀼𑀭𑀗𑁆𑀕𑀼𑀮𑀢𑁄 (𑀘𑀽𑀴𑀯. 𑁨𑁮𑁨; 𑀘𑀽𑀴𑀯. 𑀅𑀝𑁆𑀞. 𑁨𑁮𑁨) 𑀊𑀦𑀁 𑀤𑀦𑁆𑀢𑀓𑀝𑁆𑀞𑀁 𑀦 𑀔𑀸𑀤𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀥𑀺𑀓𑀝𑁆𑀞𑀗𑁆𑀕𑀼𑀮𑀦𑁆𑀢𑀺 𑀅𑀝𑁆𑀞𑀗𑁆𑀕𑀼𑀮𑀢𑁄 𑀅𑀥𑀺𑀓𑀁. 𑀢𑀣𑀸𑀢𑀺 𑀦 𑀔𑀸𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀓𑀮𑁆𑀮𑀓𑁄 (𑀘𑀽𑀴𑀯. 𑁨𑁮𑁯) 𑀮𑀲𑀼𑀡𑀁 𑀦 𑀔𑀸𑀤𑁂𑀬𑁆𑀬.

𑁩𑁪𑁧. 𑀳𑀻𑀦𑁂𑀳𑀺 (𑀧𑀸𑀘𑀺. 𑁩𑁧 𑀆𑀤𑀬𑁄) 𑀯𑀸 𑀉𑀓𑁆𑀓𑀝𑁆𑀞𑁂𑀳𑀺 𑀯𑀸 𑀚𑀸𑀢𑀺𑀆𑀤𑀻𑀳𑀺 𑀏𑀯 𑀉𑀓𑁆𑀓𑀝𑁆𑀞𑀁 𑀯𑀸 𑀳𑀻𑀦𑀁 𑀯𑀸 ‘‘𑀘𑀡𑁆𑀟𑀸𑀮𑁄𑀲𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀉𑀚𑀼𑀁 𑀯𑀸 ‘‘𑀲𑀦𑁆𑀢𑀺 𑀯𑀸 𑀇𑀥𑁂𑀓𑀘𑁆𑀘𑁂 𑀘𑀡𑁆𑀟𑀸𑀮𑀸, 𑀯𑁂𑀦𑀸, 𑀦𑁂𑀲𑀸𑀤𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀜𑁆𑀜𑀸𑀧𑀤𑁂𑀲𑁂𑀦 𑀯𑀸 𑀉𑀧𑀲𑀫𑁆𑀧𑀦𑁆𑀦𑀁 𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀯𑀸 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑀁 𑀯𑀺𑀦𑀸 𑀓𑁂𑀯𑀮𑀁 𑀤𑀯𑀸𑀥𑀺𑀧𑁆𑀧𑀸𑀬𑁂𑀦 𑀯𑀤𑁂, 𑀤𑀼𑀩𑁆𑀪𑀸𑀲𑀺𑀢𑀦𑁆𑀢𑀺 𑀅𑀢𑁆𑀣𑁄.

𑁩𑁪𑁨. 𑀦𑀔𑁂 𑀯𑀸 𑀓𑁂𑀲𑁂 𑀯𑀸 𑀦𑀸𑀲𑀮𑁄𑀫𑁂 (𑀘𑀽𑀴𑀯. 𑁨𑁭𑁫) 𑀯𑀸 𑀤𑀻𑀖𑁂 𑀦 𑀥𑀸𑀭𑀬𑁂𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀁𑀲𑀧𑁆𑀧𑀫𑀸𑀡𑁂𑀦 𑀦𑀔𑁂 𑀙𑀺𑀦𑁆𑀤𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁭𑁪) 𑀘 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀼𑀫𑀸𑀲𑀺𑀓𑀁 𑀯𑀸 𑀤𑀼𑀯𑀗𑁆𑀕𑀼𑀮𑀁 𑀯𑀸’’𑀢𑀺 (𑀘𑀽𑀴𑀯. 𑁨𑁪𑁬) 𑀘 𑀯𑀼𑀢𑁆𑀢𑀁. 𑀦 𑀮𑀩𑁆𑀪𑀁 𑀯𑀻𑀲𑀢𑀺𑀫𑀝𑁆𑀞𑀦𑁆𑀢𑀺 𑀏𑀢𑁆𑀣 𑀏𑀓𑀦𑀔𑀫𑁆𑀧𑀺 𑀫𑀝𑁆𑀞𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺 𑀏𑀯. ‘‘𑀦 𑀪𑀺𑀓𑁆𑀔𑀯𑁂 𑀯𑀻𑀲𑀢𑀺𑀫𑀝𑁆𑀞𑀁 𑀓𑀸𑀭𑀸𑀧𑁂𑀢𑀩𑁆𑀩𑀁. 𑀬𑁄 𑀓𑀸𑀭𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲 (𑀘𑀽𑀴𑀯. 𑁨𑁭𑁪). 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀮𑀫𑀢𑁆𑀢𑀁 𑀅𑀧𑀓𑀟𑁆𑀠𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁭𑁪) 𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀦𑀔𑀢𑁄 𑀫𑀮𑀫𑀢𑁆𑀢𑀁 𑀅𑀧𑀓𑀟𑁆𑀠𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀫𑁆𑀩𑀸𑀥𑁂 𑀮𑁄𑀫𑀳𑀸𑀭𑀡𑀦𑁆𑀢𑀺 𑀏𑀢𑁆𑀣 𑀲𑀫𑁆𑀩𑀸𑀥𑁄 𑀦𑀸𑀫 𑀉𑀪𑁄 𑀉𑀧𑀓𑀘𑁆𑀙𑀓𑀸 𑀫𑀼𑀢𑁆𑀢𑀓𑀭𑀡𑀜𑁆𑀘. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀩𑀸𑀥𑀧𑀘𑁆𑀘𑀬𑀸 𑀲𑀫𑁆𑀩𑀸𑀥𑁂 𑀮𑁄𑀫𑀁 𑀲𑀁𑀳𑀭𑀸𑀧𑁂𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁭𑁫) 𑀳𑀺 𑀯𑀼𑀢𑁆𑀢𑀁.

𑁩𑁪𑁩. 𑀬𑀣𑀸𑀯𑀼𑀟𑁆𑀠𑀦𑁆𑀢𑀺 𑀯𑀼𑀟𑁆𑀠𑀧𑀝𑀺𑀧𑀸𑀝𑀺𑀬𑀸 𑀮𑀤𑁆𑀥𑀩𑁆𑀩𑀁. 𑀦 𑀩𑀸𑀥𑁂𑀬𑁆𑀬𑀸𑀢𑀺 𑀦 𑀯𑀸𑀭𑁂𑀬𑁆𑀬. 𑀲𑀗𑁆𑀖𑀼𑀤𑁆𑀤𑀺𑀝𑁆𑀞𑀁𑀯𑀸𑀢𑀺 𑀉𑀧𑀸𑀲𑀓𑀸𑀤𑀻𑀳𑀺 𑀬𑀣𑀸𑀯𑀼𑀟𑁆𑀠𑀁 ‘‘𑀅𑀬𑁆𑀬𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀽’’𑀢𑀺 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀯 𑀤𑀺𑀦𑁆𑀦𑀁 𑀲𑁂𑀦𑀸𑀲𑀦𑀸𑀤𑀺. ‘‘𑀦 𑀪𑀺𑀓𑁆𑀔𑀯𑁂 𑀉𑀤𑁆𑀤𑀺𑀲𑁆𑀲𑀓𑀢𑀫𑁆𑀧𑀺 𑀬𑀣𑀸𑀯𑀼𑀟𑁆𑀠𑀁 𑀧𑀝𑀺𑀩𑀸𑀳𑀺𑀢𑀩𑁆𑀩𑀁. 𑀬𑁄 𑀧𑀝𑀺𑀩𑀸𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁩𑁧𑁩) 𑀳𑀺 𑀯𑀼𑀢𑁆𑀢𑀁. 𑀅𑀥𑁄𑀢𑀧𑀸𑀤𑁂𑀳𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁪) 𑀯𑀸 𑀅𑀮𑁆𑀮𑀧𑀸𑀤𑁂𑀳𑀺 𑀯𑀸 𑀦𑀓𑁆𑀓𑀫𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀼𑀥𑁄𑀢𑀧𑀸𑀤𑀓𑀁 𑀯𑀸𑀧𑀻𑀢𑀺 𑀥𑁄𑀢𑀧𑀸𑀤𑁂𑀳𑁂𑀯 𑀅𑀓𑁆𑀓𑀫𑀺𑀢𑀩𑁆𑀩𑀝𑁆𑀞𑀸𑀦𑀁. 𑀢𑀣𑁂𑀯𑀸𑀢𑀺 𑀦𑀓𑁆𑀓𑀫𑁂𑀬𑁆𑀬 𑀲𑀉𑀧𑀸𑀳𑀦𑁄𑀢𑀺 𑀅𑀢𑁆𑀣𑁄. ‘‘𑀦 𑀪𑀺𑀓𑁆𑀔𑀯𑁂 𑀅𑀥𑁄𑀢𑁂𑀳𑀺 𑀧𑀸𑀤𑁂𑀳𑀺, 𑀅𑀮𑁆𑀮𑁂𑀳𑀺 𑀧𑀸𑀤𑁂𑀳𑀺, 𑀲𑀉𑀧𑀸𑀳𑀦𑁂𑀦 𑀲𑁂𑀦𑀸𑀲𑀦𑀁 𑀅𑀓𑁆𑀓𑀫𑀺𑀢𑀩𑁆𑀩𑀁. 𑀬𑁄 𑀅𑀓𑁆𑀓𑀫𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁩𑁨𑁪), 𑀳𑀺 𑀯𑀼𑀢𑁆𑀢𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀢𑁆𑀣𑀭𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁩𑁨𑁪) 𑀯𑀼𑀢𑁆𑀢𑀢𑁆𑀢𑀸 𑀧𑀭𑀺𑀪𑀡𑁆𑀟𑀓𑀢𑀁 𑀪𑀽𑀫𑀺𑀁 𑀯𑀸 𑀪𑀽𑀫𑀢𑁆𑀣𑀭𑀡𑀲𑁂𑀦𑀸𑀲𑀦𑀁 𑀯𑀸 𑀲𑀗𑁆𑀖𑀺𑀓𑀁 𑀫𑀜𑁆𑀘𑀧𑀻𑀞𑀁 𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦 𑀧𑀘𑁆𑀘𑀢𑁆𑀣𑀭𑀡𑁂𑀦 𑀧𑀘𑁆𑀘𑀢𑁆𑀣𑀭𑀺𑀢𑁆𑀯𑀸𑀯 𑀦𑀺𑀧𑀚𑁆𑀚𑀺𑀢𑀩𑁆𑀩𑀁.

𑁩𑁪𑁪. 𑀲𑀗𑁆𑀖𑀸𑀝𑀺𑀬𑀸 𑀦 𑀧𑀮𑁆𑀮𑀢𑁆𑀣𑁂𑀢𑀺 𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑁂𑀦 𑀯𑀺𑀳𑀸𑀭𑁂 𑀯𑀸 𑀅𑀦𑁆𑀢𑀭𑀖𑀭𑁂 𑀯𑀸 𑀧𑀮𑁆𑀮𑀢𑁆𑀣𑀺𑀓𑀸 𑀦 𑀓𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀓𑀫𑁆𑀫𑀓𑀢𑀁 (𑀘𑀽𑀴𑀯. 𑀅𑀝𑁆𑀞. 𑁩𑁨𑁪) 𑀪𑀺𑀢𑁆𑀢𑀺𑀆𑀤𑀺𑀁 𑀦 𑀅𑀧𑀲𑁆𑀲𑀬𑁂. ‘‘𑀦 𑀪𑀺𑀓𑁆𑀔𑀯𑁂 𑀧𑀭𑀺𑀓𑀫𑁆𑀫𑀓𑀢𑀸 𑀪𑀺𑀢𑁆𑀢𑀺 𑀅𑀧𑀲𑁆𑀲𑁂𑀢𑀩𑁆𑀩𑀸. 𑀬𑁄 𑀅𑀧𑀲𑁆𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁩𑁨𑁪) 𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀲𑁂𑀢𑀪𑀺𑀢𑁆𑀢𑀺 𑀯𑀸 𑀘𑀺𑀢𑁆𑀢𑀓𑀫𑁆𑀫𑀓𑀢𑀸 𑀯𑀸 𑀪𑀺𑀢𑁆𑀢𑀺 𑀦 𑀅𑀧𑀲𑁆𑀲𑀬𑀺𑀢𑀩𑁆𑀩𑀸. 𑀦 𑀓𑁂𑀯𑀮𑀁 𑀪𑀺𑀢𑁆𑀢𑀺𑀬𑁂𑀯, 𑀧𑀭𑀺𑀓𑀫𑁆𑀫𑀓𑀢𑀸 𑀤𑁆𑀯𑀸𑀭𑀓𑀯𑀸𑀝𑀯𑀸𑀢𑀧𑀸𑀦𑀢𑁆𑀣𑀫𑁆𑀪𑀸𑀤𑀬𑁄𑀧𑀺 𑀦 𑀅𑀧𑀲𑁆𑀲𑀬𑀺𑀢𑀩𑁆𑀩𑀸. 𑀏𑀢𑁆𑀣𑀧𑀺 𑀮𑁄𑀫𑀕𑀡𑀦𑀸𑀬 𑀏𑀯 𑀆𑀧𑀢𑁆𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀲𑀦𑁆𑀢𑁂 𑀉𑀤𑀓𑁂 𑀦𑁄 𑀦 𑀆𑀘𑀫𑁂𑀢𑀺 (𑀘𑀽𑀴𑀯. 𑁩𑁭𑁩; 𑀘𑀽𑀴𑀯. 𑀅𑀝𑁆𑀞. 𑁩𑁭𑁩) 𑀦𑁄 𑀦 𑀆𑀘𑀫𑁂𑀢𑀼𑀁, 𑀉𑀤𑀓𑀲𑀼𑀤𑁆𑀥𑀺𑀁 𑀅𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀲𑀦𑁆𑀢𑁂𑀢𑀺 𑀯𑀘𑀦𑁂𑀦 𑀅𑀲𑀦𑁆𑀢𑁂 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺.

𑁩𑁪𑁫. 𑀅𑀓𑀧𑁆𑀧𑀺𑀬𑀲𑀫𑀸𑀤𑀸𑀦𑁂𑀢𑀺 𑀪𑀺𑀓𑁆𑀔𑀼𑀁 𑀯𑀸 𑀲𑀸𑀫𑀡𑁂𑀭𑀸𑀤𑀺𑀓𑁂 𑀲𑁂𑀲𑀲𑀳𑀥𑀫𑁆𑀫𑀺𑀓𑁂 𑀯𑀸 𑀅𑀓𑀧𑁆𑀧𑀺𑀬𑁂 𑀦𑀺𑀬𑁄𑀚𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯. ‘‘𑀦, 𑀪𑀺𑀓𑁆𑀔𑀯𑁂, 𑀧𑀩𑁆𑀩𑀚𑀺𑀢𑁂𑀦 𑀅𑀓𑀧𑁆𑀧𑀺𑀬𑁂 𑀲𑀫𑀸𑀤𑀧𑁂𑀢𑀩𑁆𑀩𑀁. 𑀬𑁄 𑀲𑀫𑀸𑀤𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁩𑁦𑁩) 𑀳𑀺 𑀯𑀼𑀢𑁆𑀢𑀁. 𑀲𑀪𑀸𑀕𑀸𑀬 (𑀫𑀳𑀸𑀯. 𑀅𑀝𑁆𑀞. 𑁧𑁬𑁯) 𑀆𑀧𑀢𑁆𑀢𑀺𑀬𑀸 𑀤𑁂𑀲𑀦𑀸𑀬𑀸𑀢𑀺 𑀅𑀢𑁆𑀣𑁄. 𑀯𑀢𑁆𑀣𑀼𑀲𑀪𑀸𑀕𑀢𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸, 𑀦 𑀆𑀧𑀢𑁆𑀢𑀺𑀲𑀪𑀸𑀕𑀢𑀸. ‘‘𑀦 𑀪𑀺𑀓𑁆𑀔𑀯𑁂 𑀲𑀪𑀸𑀕𑀸 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸. 𑀬𑁄 𑀤𑁂𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁧𑁬𑁯) 𑀘 ‘‘𑀦 𑀪𑀺𑀓𑁆𑀔𑀯𑁂 𑀲𑀪𑀸𑀕𑀸 𑀆𑀧𑀢𑁆𑀢𑀺 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸. 𑀬𑁄 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁧𑁬𑁯) 𑀘 𑀯𑀼𑀢𑁆𑀢𑀁. 𑀯𑀢𑁆𑀣𑀼𑀲𑀪𑀸𑀕𑀁 𑀆𑀧𑀢𑁆𑀢𑀺𑀁 𑀆𑀯𑀺 𑀓𑀸𑀢𑀼𑀫𑁆𑀧𑀺 𑀦 𑀯𑀝𑁆𑀝𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀯𑀺𑀓𑀫𑁆𑀫𑁂 𑀘 𑀤𑀼𑀓𑁆𑀓𑀝’’𑀦𑁆𑀢𑀺. ‘‘𑀅𑀳𑀁, 𑀆𑀯𑀼𑀲𑁄, 𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁, 𑀢𑀁 𑀇𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀲𑁆𑀲 𑀯𑀘𑀦𑀁 𑀆𑀯𑀺𑀓𑀫𑁆𑀫𑀁𑀦𑀸𑀫.

𑁩𑁪𑁬. 𑀇𑀢𑀭𑀲𑁆𑀲 𑀢𑀽𑀢𑀺 𑀅𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲.

𑁩𑁪𑁭. 𑀧𑁄𑀭𑀺𑀲𑀦𑁆𑀢𑀺 (𑀘𑀽𑀴𑀯. 𑀅𑀝𑁆𑀞. 𑁨𑁮𑁪) 𑀧𑀼𑀭𑀺𑀲𑀧𑁆𑀧𑀫𑀸𑀡𑀁 𑀅𑀪𑀺𑀭𑀼𑀳𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀢𑀺 𑀓𑀭𑀡𑀻𑀬𑁂 𑀧𑁄𑀭𑀺𑀲𑀁 𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀢𑀼𑀁, 𑀆𑀧𑀤𑀸𑀲𑀼 𑀬𑀸𑀯𑀤𑀢𑁆𑀣’’𑀦𑁆𑀢𑀺 (𑀘𑀽𑀴𑀯. 𑁨𑁮𑁪) 𑀳𑀺 𑀯𑀼𑀢𑁆𑀢𑀁.

𑁩𑁪𑁮. 𑀧𑀭𑀺𑀲𑁆𑀲𑀸𑀯𑀦𑀁 (𑀘𑀽𑀴𑀯. 𑁨𑁫𑁯; 𑀘𑀽𑀴𑀯. 𑀅𑀝𑁆𑀞. 𑁨𑁫𑁯) 𑀯𑀺𑀦𑀸 𑀅𑀟𑁆𑀠𑀬𑁄𑀚𑀦𑀁 𑀕𑀘𑁆𑀙𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀤𑁆𑀥𑀸𑀦𑀕𑀫𑀦𑀲𑀫𑀬𑁄 𑀦𑀸𑀫 𑀅𑀟𑁆𑀠𑀬𑁄𑀚𑀦𑀁 𑀕𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀘𑀺. 𑁨𑁧𑁮) 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀟𑁆𑀠𑀬𑁄𑀚𑀦𑀫𑁂𑀯 𑀅𑀦𑁆𑀢𑀺𑀫𑀁 𑀅𑀤𑁆𑀥𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀪𑀺𑀓𑁆𑀔𑀼𑀦𑀺𑀬𑀸 𑀘 𑀫𑀸𑀢𑀼𑀕𑀸𑀫𑁂𑀦 𑀘 𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑁂 ‘‘𑀏𑀓𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑁂𑀬𑁆𑀬, 𑀅𑀦𑁆𑀢𑀫𑀲𑁄 𑀕𑀸𑀫𑀦𑁆𑀢𑀭𑀫𑁆𑀧𑀻’’𑀢𑀺 (𑀧𑀸𑀘𑀺. 𑁧𑁮𑁨, 𑁪𑁧𑁩) 𑀏𑀯𑀁 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 ‘‘𑀓𑀼𑀓𑁆𑀓𑀼𑀝𑀲𑀫𑁆𑀧𑀸𑀢𑁂 𑀕𑀸𑀫𑁂 𑀕𑀸𑀫𑀦𑁆𑀢𑀭𑁂 𑀕𑀸𑀫𑀦𑁆𑀢𑀭𑁂 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 (𑀧𑀸𑀘𑀺. 𑁧𑁮𑁩, 𑁪𑁧𑁪) 𑀯𑀼𑀢𑁆𑀢𑀁, 𑀦 𑀅𑀤𑁆𑀥𑀸𑀦𑀮𑀓𑁆𑀔𑀡𑁂𑀦. 𑀬𑀤𑀺 𑀕𑀸𑀫𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑁂𑀦 𑀅𑀤𑁆𑀥𑀸𑀦𑀁 𑀯𑀼𑀘𑁆𑀘𑀢𑀺, 𑀕𑀡𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑁂𑀧𑀺 ‘‘𑀅𑀤𑁆𑀥𑀸𑀦𑀕𑀫𑀦𑀲𑀫𑀬𑁄 𑀦𑀸𑀫 𑀕𑀸𑀫𑀦𑁆𑀢𑀭𑀫𑁆𑀧𑀺 𑀕𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀯𑀤𑁂𑀬𑁆𑀬, 𑀦 𑀘 𑀯𑀼𑀢𑁆𑀢𑀁. 𑀢𑀲𑁆𑀫𑀸 ‘‘𑀦 𑀪𑀺𑀓𑁆𑀔𑀯𑁂 𑀅𑀧𑀭𑀺𑀲𑁆𑀲𑀸𑀯𑀦𑀓𑁂𑀦 𑀅𑀤𑁆𑀥𑀸𑀦𑁄 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑁄. 𑀬𑁄 𑀧𑀝𑀺𑀧𑀚𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑀘𑁂 𑀦 𑀳𑁄𑀢𑀺 𑀧𑀭𑀺𑀲𑁆𑀲𑀸𑀯𑀦𑀁 𑀯𑀸 𑀥𑀫𑁆𑀫𑀓𑀭𑀡𑁄 𑀯𑀸, 𑀲𑀗𑁆𑀖𑀸𑀝𑀺𑀓𑀡𑁆𑀡𑁄𑀧𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑁄 𑀇𑀫𑀺𑀦𑀸 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀧𑀺𑀯𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂𑀧𑀺 𑀅𑀟𑁆𑀠𑀬𑁄𑀚𑀦𑀯𑀲𑁂𑀦𑁂𑀯 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀪𑀬𑀕𑀺𑀭𑀺𑀯𑀸𑀲𑀻𑀦𑀁 𑀧𑀦 ‘‘𑀤𑁆𑀯𑀺𑀕𑀸𑀯𑀼𑀢𑀯𑀲𑁂𑀦 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑁄’’𑀢𑀺 𑀧𑀸𑀴𑀺𑀬𑀁 𑀏𑀯 𑀅𑀢𑁆𑀣𑀺. 𑀬𑀸𑀘𑀫𑀸𑀦𑀲𑁆𑀲𑀸𑀢𑀺 𑀬𑀸𑀘𑀦𑁆𑀢𑀲𑁆𑀲. ‘‘𑀦 𑀘 𑀪𑀺𑀓𑁆𑀔𑀯𑁂 𑀅𑀤𑁆𑀥𑀸𑀦𑀧𑁆𑀧𑀝𑀺𑀧𑀦𑁆𑀦𑁂𑀦 𑀪𑀺𑀓𑁆𑀔𑀼𑀦𑀸 𑀧𑀭𑀺𑀲𑁆𑀲𑀸𑀯𑀦𑀁 𑀬𑀸𑀘𑀺𑀬𑀫𑀸𑀦𑁂𑀦 𑀦 𑀤𑀸𑀢𑀩𑁆𑀩𑀁. 𑀬𑁄 𑀦 𑀤𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀳𑀺 𑀯𑀼𑀢𑁆𑀢𑀁.

𑁩𑁪𑁯. 𑀅𑀜𑁆𑀜𑀢𑁆𑀭 𑀆𑀩𑀸𑀥𑀧𑁆𑀧𑀘𑁆𑀘𑀬𑀸 𑀓𑀡𑁆𑀡𑀦𑀸𑀲𑀸𑀤𑀺𑀓𑁂 𑀲𑁂𑀲𑀗𑁆𑀕𑁂 𑀤𑀼𑀓𑁆𑀓𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀩𑀸𑀥𑁂 𑀲𑀢𑀺 𑀅𑀗𑁆𑀕𑀼𑀮𑀺𑀆𑀤𑀻𑀦𑀺 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀗𑁆𑀕𑀚𑀸𑀢𑀁 𑀯𑀸 𑀩𑀻𑀚𑀸𑀦𑀺 𑀯𑀸 𑀙𑀺𑀦𑁆𑀤𑀺𑀢𑀼𑀁 𑀦 𑀯𑀝𑁆𑀝𑀢𑀺 𑀏𑀯. 𑀅𑀢𑁆𑀢𑀖𑀸𑀢𑀦𑁂 𑀘 𑀤𑀼𑀓𑁆𑀓𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀦 𑀘 𑀪𑀺𑀓𑁆𑀔𑀯𑁂 𑀅𑀢𑁆𑀢𑀸𑀦𑀁 𑀖𑀸𑀢𑁂𑀢𑀩𑁆𑀩𑀁. 𑀬𑁄 𑀖𑀸𑀢𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀳𑀺 𑀯𑀼𑀢𑁆𑀢𑀁.

𑁩𑁫𑁦. ‘‘𑀦 𑀘 𑀪𑀺𑀓𑁆𑀔𑀯𑁂 𑀧𑀝𑀺𑀪𑀸𑀦𑀘𑀺𑀢𑁆𑀢𑀁 𑀓𑀸𑀭𑀸𑀧𑁂𑀢𑀩𑁆𑀩𑀁 𑀇𑀢𑁆𑀣𑀺𑀭𑀽𑀧𑀓𑀁 𑀧𑀼𑀭𑀺𑀲𑀭𑀽𑀧𑀓𑀁. 𑀬𑁄 𑀓𑀸𑀭𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀸𑀮𑀸𑀓𑀫𑁆𑀫𑀁 𑀮𑀢𑀸𑀓𑀫𑁆𑀫𑀁 𑀫𑀓𑀭𑀤𑀦𑁆𑀢𑀓𑀁 𑀧𑀜𑁆𑀘𑀧𑀝𑀺𑀓’’𑀦𑁆𑀢𑀺 (𑀘𑀽𑀴𑀯. 𑁨𑁯𑁯) 𑀯𑀼𑀢𑁆𑀢𑀢𑁆𑀢𑀸 ‘‘𑀘𑀺𑀢𑁆𑀢𑀧𑁄𑀢𑁆𑀣𑀓𑀭𑀽𑀧𑀸𑀦𑀺, 𑀦 𑀓𑀭𑁂 𑀦 𑀘 𑀓𑀸𑀭𑀬𑁂’’𑀢𑀺 𑀯𑀼𑀢𑁆𑀢𑀁. 𑀪𑀼𑀜𑁆𑀚𑀦𑁆𑀢𑀦𑁆𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁧𑁬) 𑀯𑀺𑀧𑁆𑀧𑀓𑀢𑀪𑁄𑀚𑀦𑀁. ‘‘𑀦 𑀪𑀺𑀓𑁆𑀔𑀯𑁂 𑀯𑀺𑀧𑁆𑀧𑀓𑀢𑀪𑁄𑀚𑀦𑁄 𑀪𑀺𑀓𑁆𑀔𑀼 𑀯𑀼𑀝𑁆𑀞𑀸𑀧𑁂𑀢𑀩𑁆𑀩𑁄. 𑀬𑁄 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁩𑁧𑁬) 𑀳𑀺 𑀯𑀼𑀢𑁆𑀢𑀁.

𑁩𑁫𑁧. 𑀬𑀸𑀦𑀸𑀦𑀻𑀢𑀺 𑀯𑀬𑁆𑀳𑀁 𑀭𑀣𑁄 𑀲𑀓𑀝𑀁 𑀲𑀦𑁆𑀤𑀫𑀸𑀦𑀺𑀓𑀸𑀤𑀻𑀦𑀺 𑀕𑀺𑀮𑀸𑀦𑀲𑁆𑀲 𑀅𑀪𑀺𑀭𑀼𑀳𑀺𑀢𑀼𑀁 𑀓𑀧𑁆𑀧𑀦𑁆𑀢𑀺, 𑀲𑀺𑀯𑀺𑀓𑁄 𑀘 𑀓𑀧𑁆𑀧𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑀲𑁆𑀲 𑀬𑀸𑀦𑀁, 𑀧𑀼𑀭𑀺𑀲𑀬𑀼𑀢𑁆𑀢𑀁 𑀳𑀢𑁆𑀣𑀯𑀝𑁆𑀝𑀓𑀁, 𑀲𑀺𑀯𑀺𑀓𑀁 𑀧𑀸𑀝𑀗𑁆𑀓𑀺’’𑀦𑁆𑀢𑀺 (𑀫𑀳𑀸𑀯. 𑁨𑁫𑁩) 𑀳𑀺 𑀯𑀼𑀢𑁆𑀢𑀁.

𑁩𑁫𑁨. 𑀤𑀯𑀦𑁆𑀢𑀺 𑀓𑁂𑀴𑀺𑀁. ‘‘𑀦 𑀪𑀺𑀓𑁆𑀔𑀯𑁂 𑀩𑀼𑀤𑁆𑀥𑀁 𑀯𑀸 𑀥𑀫𑁆𑀫𑀁 𑀯𑀸 𑀲𑀗𑁆𑀖𑀁 𑀯𑀸 𑀆𑀭𑀩𑁆𑀪 𑀤𑀯𑁄 𑀓𑀸𑀢𑀩𑁆𑀩𑁄. 𑀬𑁄 𑀓𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀘𑀺. 𑁬𑁨𑁭) 𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 ‘‘𑀓𑀺𑀁 𑀩𑀼𑀤𑁆𑀥𑁄 𑀲𑀺𑀮𑀓𑀩𑀼𑀤𑁆𑀥𑁄, 𑀉𑀤𑀸𑀳𑀼 𑀧𑀝𑀺𑀩𑀼𑀤𑁆𑀥𑁄’’𑀢𑀺 𑀯𑀸 ‘‘𑀓𑀺𑀁 𑀥𑀫𑁆𑀫𑁄 𑀕𑁄𑀥𑀫𑁆𑀫𑁄 𑀅𑀚𑀥𑀫𑁆𑀫𑁄’’𑀢𑀺 𑀯𑀸 ‘‘𑀓𑀺𑀁 𑀲𑀗𑁆𑀖𑁄 𑀅𑀚𑀲𑀗𑁆𑀖𑁄 𑀫𑀺𑀕𑀲𑀗𑁆𑀖𑁄’’𑀢𑀺 𑀯𑀸 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀬𑁄 𑀤𑀯𑀁 𑀓𑀭𑁄𑀢𑀺, 𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀢𑀼𑀫𑁆𑀳𑀸𑀓𑀁 𑀘𑀻𑀯𑀭𑀁 𑀤𑀲𑁆𑀲𑀸𑀫, 𑀧𑀢𑁆𑀢𑀁 𑀤𑀲𑁆𑀲𑀸𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀸𑀫𑀡𑁂𑀭𑀁 𑀯𑀸 𑀉𑀧𑀲𑀫𑁆𑀧𑀦𑁆𑀦𑀁 𑀯𑀸 𑀅𑀜𑁆𑀜𑀲𑁆𑀲 𑀅𑀦𑁆𑀢𑀫𑀲𑁄 𑀤𑀼𑀲𑁆𑀲𑀻𑀮𑀲𑁆𑀲𑀸𑀧𑀺 𑀧𑀭𑀺𑀲𑀪𑀽𑀢𑀁 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑀓𑀭𑀡𑀢𑁆𑀣𑀁 𑀉𑀧𑀮𑀸𑀴𑀦𑁂 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄. ‘‘𑀦 𑀪𑀺𑀓𑁆𑀔𑀯𑁂 𑀅𑀜𑁆𑀜𑀲𑁆𑀲 𑀧𑀭𑀺𑀲𑀸 𑀅𑀧𑀮𑀸𑀴𑁂𑀢𑀩𑁆𑀩𑀸. 𑀬𑁄 𑀅𑀧𑀮𑀸𑀴𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀳𑀺 𑀯𑀼𑀢𑁆𑀢𑀁.

𑁩𑁫𑁩. 𑀓𑀸𑀬𑀁 (𑀘𑀽𑀴𑀯. 𑁪𑁧𑁧) 𑀯𑀸 𑀊𑀭𑀼𑀁 𑀯𑀸 𑀦𑀺𑀫𑀺𑀢𑁆𑀢𑀁 𑀯𑀸 𑀯𑀺𑀯𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀦 𑀤𑀲𑁆𑀲𑀬𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀤𑁆𑀤𑀫𑀼𑀤𑀓𑀸𑀤𑀺𑀦𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀲𑀺𑀜𑁆𑀘𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀦 𑀓𑁂𑀯𑀮𑀁 𑀓𑀤𑁆𑀤𑀫𑀼𑀤𑀓𑀸𑀤𑀺𑀓𑁂𑀦𑁂𑀯, 𑀯𑀺𑀧𑁆𑀧𑀲𑀦𑁆𑀦𑀉𑀤𑀓𑀭𑀚𑀦𑀓𑀤𑁆𑀤𑀫𑀸𑀤𑀻𑀲𑀼𑀧𑀺 𑀬𑁂𑀦 𑀓𑁂𑀦𑀘𑀺 𑀑𑀲𑀺𑀜𑁆𑀘𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯.

𑁩𑁫𑁪. 𑀩𑀸𑀮𑀦𑁆𑀢𑀺 𑀏𑀢𑁆𑀣 𑀩𑀸𑀮𑁄 𑀦𑀸𑀫 𑀬𑁄 𑀑𑀯𑀸𑀤𑀁 𑀕𑀳𑁂𑀢𑁆𑀯𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀧𑀸𑀝𑀺𑀧𑀤𑁂 𑀧𑀘𑁆𑀘𑀸𑀳𑀭𑀺𑀢𑀩𑁆𑀩𑀦𑁆𑀢𑀺 𑀦 𑀚𑀸𑀦𑀸𑀢𑀺. 𑀕𑀺𑀮𑀸𑀦𑁄 𑀦𑀸𑀫 𑀬𑁄 𑀑𑀯𑀸𑀤𑀁 𑀕𑀳𑁂𑀢𑁆𑀯𑀸 𑀉𑀧𑁄𑀲𑀣𑀕𑁆𑀕𑀁 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀢𑀼𑀜𑁆𑀘 𑀧𑀘𑁆𑀘𑀸𑀳𑀭𑀺𑀢𑀼𑀜𑁆𑀘 𑀦 𑀲𑀓𑁆𑀓𑁄𑀢𑀺. 𑀕𑀫𑀺𑀬𑁄 𑀦𑀸𑀫 𑀬𑁄 𑀧𑀝𑀺𑀤𑁂𑀲𑀁 𑀕𑀦𑁆𑀢𑀼𑀓𑀸𑀫𑁄.

‘‘𑀦 𑀪𑀺𑀓𑁆𑀔𑀯𑁂 𑀑𑀯𑀸𑀤𑁄 𑀦 𑀕𑀳𑁂𑀢𑀩𑁆𑀩𑁄. 𑀬𑁄 𑀦 𑀕𑀡𑁆𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁪𑁧𑁪) 𑀘 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀞𑀧𑁂𑀢𑁆𑀯𑀸 𑀩𑀸𑀮𑀁, 𑀞𑀧𑁂𑀢𑁆𑀯𑀸 𑀕𑀺𑀮𑀸𑀦𑀁, 𑀞𑀧𑁂𑀢𑁆𑀯𑀸 𑀕𑀫𑀺𑀓𑀁, 𑀅𑀯𑀲𑁂𑀲𑁂𑀳𑀺 𑀑𑀯𑀸𑀤𑀁 𑀕𑀳𑁂𑀢𑀼’’𑀦𑁆𑀢𑀺 (𑀘𑀽𑀴𑀯. 𑁪𑁧𑁪) 𑀘 ‘‘𑀦 𑀪𑀺𑀓𑁆𑀔𑀯𑁂 𑀑𑀯𑀸𑀤𑁄 𑀦 𑀧𑀘𑁆𑀘𑀸𑀳𑀭𑀺𑀢𑀩𑁆𑀩𑁄. 𑀬𑁄 𑀦 𑀧𑀘𑁆𑀘𑀸𑀳𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀘𑀺. 𑁪𑁧𑁫) 𑀘 𑀯𑀼𑀢𑁆𑀢𑀢𑁆𑀢𑀸 𑀪𑀺𑀓𑁆𑀔𑀼𑀦𑀻𑀳𑀺 𑀢𑁂𑀭𑀲𑀺𑀬𑀁 𑀯𑀸 𑀘𑀸𑀢𑀼𑀤𑁆𑀤𑀲𑀺𑀬𑀁 𑀯𑀸 𑀆𑀕𑀦𑁆𑀢𑁆𑀯𑀸 ‘‘𑀅𑀬𑀁 𑀉𑀧𑁄𑀲𑀣𑁄 𑀘𑀸𑀢𑀼𑀤𑁆𑀤𑀲𑁄’’𑀢𑀺 𑀯𑀸 ‘‘𑀧𑀦𑁆𑀦𑀭𑀲𑁄’’𑀢𑀺 𑀯𑀸 ‘‘𑀓𑀤𑀸 𑀅𑀬𑁆𑀬 𑀉𑀧𑁄𑀲𑀣𑁄’’𑀢𑀺 𑀯𑀸 𑀧𑀼𑀘𑁆𑀙𑀺𑀢𑁂 ‘‘𑀘𑀸𑀢𑀼𑀤𑁆𑀤𑀲𑁄’’𑀢𑀺 𑀯𑀸 ‘‘𑀧𑀦𑁆𑀦𑀭𑀲𑁄’’𑀢𑀺 𑀯𑀸 ‘‘𑀲𑁆𑀯𑁂 𑀪𑀕𑀺𑀦𑀺 𑀉𑀧𑁄𑀲𑀣𑁄’’𑀢𑀺 𑀯𑀸 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀢𑀸𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀉𑀧𑁄𑀲𑀣𑀤𑀺𑀯𑀲𑁂 𑀆𑀕𑀦𑁆𑀢𑁆𑀯𑀸 ‘‘𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀅𑀬𑁆𑀬 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀸𑀤𑁂 𑀯𑀦𑁆𑀤𑀢𑀺, 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀜𑁆𑀘 𑀬𑀸𑀘𑀢𑀺, 𑀮𑀪𑀢𑀼 𑀓𑀺𑀭 𑀅𑀬𑁆𑀬 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀑𑀯𑀸𑀤𑀽𑀧𑀲𑀗𑁆𑀓𑀫𑀦’’𑀦𑁆𑀢𑀺 𑀏𑀯𑀁 𑀬𑀸𑀘𑀺𑀢𑀩𑁆𑀩𑀁, 𑀢𑀁 𑀯𑀘𑀦𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀉𑀧𑁄𑀲𑀣𑀕𑁆𑀕𑁂 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑀲𑁆𑀲 ‘‘𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀸𑀤𑁂 𑀯𑀦𑁆𑀤𑀢𑀺, 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀜𑁆𑀘 𑀬𑀸𑀘𑀢𑀺, 𑀮𑀪𑀢𑀼 𑀓𑀺𑀭, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀑𑀯𑀸𑀤𑀽𑀧𑀲𑀗𑁆𑀓𑀫𑀦’’𑀦𑁆𑀢𑀺 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁂𑀦𑀸𑀧𑀺 𑀲𑀘𑁂 𑀢𑀢𑁆𑀣 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀅𑀢𑁆𑀣𑀺, ‘‘𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀲𑀫𑁆𑀫𑀢𑁄, 𑀢𑀁 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀉𑀧𑀲𑀗𑁆𑀓𑀫𑀢𑀽’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀦𑀢𑁆𑀣𑀺, ‘‘𑀓𑁄 𑀆𑀬𑀲𑁆𑀫𑀸 𑀉𑀲𑁆𑀲𑀳𑀢𑀺 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀺𑀢𑀼’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀲𑀘𑁂 𑀅𑀢𑁆𑀣𑀺 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼, 𑀢𑀁 𑀢𑀢𑁆𑀣𑁂𑀯 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀑𑀯𑀸𑀤𑀧𑁆𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀆𑀭𑁄𑀘𑁂𑀢𑀩𑁆𑀩𑀁. 𑀬𑀤𑀺 𑀦𑀢𑁆𑀣𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀲𑀫𑁆𑀫𑀢𑁄, ‘‘𑀧𑀸𑀲𑀸𑀤𑀺𑀓𑁂𑀦 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀲𑀫𑁆𑀧𑀸𑀤𑁂𑀢𑀽’’𑀢𑀺 𑀯𑀢𑁆𑀢𑀩𑁆𑀩𑀁. 𑀢𑁂𑀦 𑀪𑀺𑀓𑁆𑀔𑀼𑀦𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀸𑀝𑀺𑀧𑀤𑁂 𑀪𑀺𑀓𑁆𑀔𑀼𑀦𑀻𑀦𑀁 ‘‘𑀦𑀢𑁆𑀣𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀲𑀫𑁆𑀫𑀢𑁄, 𑀧𑀸𑀲𑀸𑀤𑀺𑀓𑁂𑀦 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀲𑀫𑁆𑀧𑀸𑀤𑁂𑀢𑀽’’𑀢𑀺 𑀯𑀢𑁆𑀢𑀩𑁆𑀩𑀁. 𑀢𑀸𑀳𑀺𑀧𑀺 ‘‘𑀲𑀸𑀥𑀼 𑀅𑀬𑁆𑀬𑀸’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. 𑀇𑀫𑀺𑀦𑀸 𑀦𑀬𑁂𑀦 𑀕𑀡𑀧𑀼𑀕𑁆𑀕𑀮𑁂𑀲𑀼𑀧𑀺 𑀯𑀘𑀦𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁫𑁫. 𑀮𑁄𑀓𑀸𑀬𑀢𑀁 (𑀘𑀽𑀴𑀯. 𑁨𑁮𑁬; 𑀘𑀽𑀴𑀯. 𑀅𑀝𑁆𑀞. 𑁨𑁮𑁬) 𑀦𑀸𑀫 𑀯𑀺𑀢𑀡𑁆𑀟𑀲𑀢𑁆𑀣𑀁. ‘‘𑀦 𑀪𑀺𑀓𑁆𑀔𑀯𑁂 𑀆𑀲𑀺𑀢𑁆𑀢𑀓𑀽𑀧𑀥𑀸𑀦𑁂 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑁄 𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁬𑁪) 𑀯𑀼𑀢𑁆𑀢𑀢𑁆𑀢𑀸 ‘‘𑀧𑁂𑀴𑀸𑀬𑀧𑀺 𑀦 𑀪𑀼𑀜𑁆𑀚𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀁.

𑁩𑁫𑁬. 𑀕𑀺𑀳𑀺𑀧𑀸𑀭𑀼𑀢𑀁 𑀦 𑀧𑀸𑀭𑀼𑀧𑁂𑀬𑁆𑀬, 𑀕𑀺𑀳𑀺𑀦𑀺𑀯𑀸𑀲𑀦𑀁 𑀦 𑀦𑀺𑀯𑀸𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. ‘‘𑀦 𑀪𑀺𑀓𑁆𑀔𑀯𑁂 𑀕𑀺𑀳𑀺𑀦𑀺𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑀩𑁆𑀩𑀁 𑀳𑀢𑁆𑀣𑀺𑀲𑁄𑀡𑁆𑀟𑀓𑀁 𑀫𑀘𑁆𑀙𑀯𑀸𑀴𑀓𑀁 𑀘𑀢𑀼𑀓𑀡𑁆𑀡𑀓𑀁 𑀢𑀸𑀮𑀯𑀡𑁆𑀝𑀓𑀁 𑀲𑀢𑀯𑀮𑀺𑀓𑀁. 𑀬𑁄 𑀦𑀺𑀯𑀸𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁮𑁦) 𑀳𑀺 𑀯𑀼𑀢𑁆𑀢𑀁. 𑀧𑀭𑀺𑀫𑀡𑁆𑀟𑀮𑀢𑁄 𑀅𑀜𑁆𑀜𑀣𑀸 𑀧𑀸𑀭𑀼𑀧𑀦𑀁, 𑀲𑀩𑁆𑀩𑀫𑁂𑀢𑀁 𑀕𑀺𑀳𑀺𑀧𑀸𑀭𑀼𑀢𑀁 𑀦𑀸𑀫. 𑀢𑀁 𑀧𑀦 𑀦 𑀧𑀸𑀭𑀼𑀧𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀲𑀁𑀯𑁂𑀮𑁆𑀮𑀺𑀬𑀦𑁆𑀢𑀺 𑀏𑀢𑁆𑀣 𑀓𑀘𑁆𑀙𑀁 𑀩𑀦𑁆𑀥𑀺𑀢𑁆𑀯𑀸 𑀦 𑀦𑀺𑀯𑀸𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀤𑀸𑀬𑀦𑁆𑀢𑀺 (𑀘𑀽𑀴𑀯. 𑁨𑁮𑁩; 𑀘𑀽𑀴𑀯. 𑀅𑀝𑁆𑀞. 𑁨𑁮𑁩) 𑀅𑀭𑀜𑁆𑀜𑀁. 𑀦𑀸𑀮𑀺𑀫𑁆𑀧𑀬𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁫𑁭. 𑀯𑀟𑁆𑀠𑀺𑀜𑁆𑀘 𑀦 𑀧𑀬𑁄𑀚𑀬𑁂, 𑀦𑁄𑀜𑀸𑀢𑀓𑁂 𑀦𑀧𑁆𑀧𑀯𑀸𑀭𑀺𑀢𑁂 𑀦 𑀬𑀸𑀘𑁂𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀲𑁆𑀲𑀸𑀢𑀺 𑀏𑀢𑁆𑀣 (𑀘𑀽𑀴𑀯. 𑁪𑁨𑁦; 𑀘𑀽𑀴𑀯. 𑀅𑀝𑁆𑀞. 𑁪𑁨𑁦) ‘‘𑀢𑀼𑀫𑁆𑀳𑁂 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀦𑀺𑀬𑀫𑁂𑀢𑁆𑀯𑀸 𑀤𑀺𑀦𑁆𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀫𑁆𑀧𑀺 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀕𑁆𑀕𑀁 𑀕𑀳𑁂𑀢𑁆𑀯𑀸 𑀯𑀸 𑀓𑀢𑀺𑀧𑀸𑀳𑀁 𑀪𑀼𑀢𑁆𑀯𑀸 𑀯𑀸 𑀧𑀼𑀦 𑀤𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁩𑁫𑁮. 𑀉𑀤𑁆𑀤𑀺𑀲𑁆𑀲 𑀬𑀸𑀘𑀦𑁂𑀢𑀺 𑀏𑀢𑁆𑀣 (𑀧𑀸𑀘𑀺. 𑀅𑀝𑁆𑀞. 𑁬𑁭𑁯) ‘‘𑀅𑀫𑁆𑀳𑀸𑀓𑀁 𑀯𑀺𑀳𑀸𑀭𑁂 𑀇𑀢𑁆𑀣𑀦𑁆𑀦𑀸𑀫𑁂𑀦 𑀇𑀤𑀜𑁆𑀘𑀺𑀤𑀜𑁆𑀘 𑀓𑀢’’𑀦𑁆𑀢𑀺 𑀯𑀸 ‘‘𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀸 𑀏𑀯𑀁 𑀉𑀤𑁆𑀤𑀺𑀲𑁆𑀲 𑀭𑀓𑁆𑀔𑀁 𑀬𑀸𑀘𑀦𑁂𑀢𑀺 𑀅𑀢𑁆𑀣𑁄. 𑀜𑀢𑁆𑀯𑀸𑀜𑀢𑁆𑀯𑀸 𑀯𑀸𑀢𑀺 𑀏𑀯𑀁 ‘‘𑀅𑀫𑁆𑀳𑁂𑀳𑀺 𑀬𑀸𑀘𑀺𑀬𑀫𑀸𑀦𑀸 𑀇𑀫𑁂𑀲𑀁 𑀤𑀡𑁆𑀟𑁂𑀲𑁆𑀲𑀦𑁆𑀢𑀻’’𑀢𑀺 𑀢𑁂𑀲𑀁 𑀤𑀡𑁆𑀟𑀺𑀦𑀁 𑀜𑀢𑁆𑀯𑀸 𑀯𑀸 𑀅𑀜𑀢𑁆𑀯𑀸 𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀳𑀺 𑀧𑀦 𑀤𑀡𑁆𑀟𑀺𑀢𑁂 𑀲𑁄 𑀤𑀡𑁆𑀟𑁄 𑀉𑀤𑁆𑀤𑀺𑀲𑁆𑀲 𑀬𑀸𑀘𑀦𑁆𑀢𑀸𑀦𑀁 𑀕𑀻𑀯𑀸𑀯 𑀪𑀡𑁆𑀟𑀤𑁂𑀬𑁆𑀬𑀁 𑀳𑁄𑀢𑀺 𑀏𑀯𑀸𑀢𑀺 𑀅𑀢𑁆𑀣𑁄. ‘‘𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀇𑀤𑀜𑁆𑀘 𑀇𑀤𑀜𑁆𑀘 𑀓𑀢𑀁, 𑀏𑀢𑁆𑀢𑀓𑀁 𑀤𑀡𑁆𑀟𑀁 𑀕𑀡𑁆𑀳𑀣𑀸’’𑀢𑀺 𑀲𑀬𑀁 𑀤𑀡𑁆𑀟𑀸𑀧𑀦𑁂 𑀧𑀦 𑀅𑀲𑁆𑀲 𑀤𑀡𑁆𑀟𑀲𑁆𑀲 𑀅𑀕𑁆𑀖𑀪𑁂𑀤𑁂𑀦 𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀸 𑀜𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁩𑁫𑁯. 𑀅𑀦𑀢𑁆𑀣𑀸𑀬 𑀅𑀲𑁆𑀲 𑀘𑁄𑀭𑀲𑁆𑀲 𑀪𑀸𑀲𑀺𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀳𑀺 𑀢𑀲𑁆𑀲 𑀘𑁄𑀭𑀲𑁆𑀲 𑀤𑀡𑁆𑀟𑀁 𑀕𑀡𑁆𑀳𑀦𑁆𑀢𑁂 𑀅𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀢𑀢𑁆𑀢𑀓𑀁 𑀕𑀻𑀯𑀸𑀢𑀺 𑀅𑀢𑁆𑀣𑁄.

𑁩𑁬𑁦. 𑀯𑀺𑀖𑀸𑀲𑀁 (𑀧𑀸𑀘𑀺. 𑁮𑁨𑁫-𑁮𑁨𑁬) 𑀯𑀸 𑀉𑀘𑁆𑀘𑀸𑀭𑀁 𑀯𑀸 𑀲𑀗𑁆𑀓𑀸𑀭𑀁 𑀯𑀸 𑀫𑀼𑀢𑁆𑀢𑀁 𑀯𑀸 𑀧𑀸𑀓𑀸𑀭𑀓𑀼𑀝𑁆𑀝𑀸𑀦𑀁 𑀩𑀳𑀺 𑀙𑀟𑁆𑀟𑁂𑀬𑁆𑀬, 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄. 𑀯𑀴𑀜𑁆𑀚𑁂 𑀦𑀸𑀯𑀮𑁄𑀓𑀺𑀬𑀸𑀢𑀺 𑀇𑀫𑀺𑀦𑀸𑀯 𑀅𑀯𑀴𑀜𑁆𑀚𑀦𑀓𑀸𑀮𑁂 𑀦𑀸𑀯𑀮𑁄𑀓𑁂𑀢𑁆𑀯𑀸 𑀙𑀟𑁆𑀟𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀦 𑀓𑁂𑀯𑀮𑀁 𑀢𑀢𑁆𑀣𑁂𑀯, 𑀅𑀣 𑀔𑁄 𑀳𑀭𑀺𑀢𑁂 𑀯𑀸𑀧𑀺 𑀯𑀻𑀳𑀸𑀤𑀺𑀦𑀸𑀴𑀺𑀓𑁂𑀭𑀸𑀤𑀺𑀭𑁄𑀧𑀺𑀫𑁂 𑀙𑀟𑁆𑀟𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀅𑀢𑁆𑀣𑁄.

𑁩𑁬𑁧. ‘‘𑀉𑀧𑀳𑀸𑀭𑀁 𑀓𑀭𑁄𑀫𑀸’’𑀢𑀺 𑀯𑀼𑀢𑁆𑀢𑁂𑀢𑀺 𑀧𑀼𑀘𑁆𑀙𑀺𑀢𑁂𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁬𑁨. 𑀓𑀻𑀴𑀢𑁆𑀣𑀁 (𑀧𑀸𑀘𑀺. 𑁯𑁭𑁯; 𑀧𑀸𑀘𑀺. 𑀅𑀝𑁆𑀞. 𑁯𑁭𑁮) 𑀓𑀢𑀁 𑀭𑀸𑀚𑀸𑀕𑀸𑀭𑀁 𑀯𑀸 𑀧𑁄𑀓𑁆𑀔𑀭𑀡𑀺𑀁 𑀯𑀸 𑀉𑀬𑁆𑀬𑀸𑀦𑀁 𑀯𑀸 𑀘𑀺𑀢𑁆𑀢𑀸𑀕𑀸𑀭𑀁 𑀯𑀸 𑀆𑀭𑀸𑀫𑀁 𑀯𑀸 𑀤𑀝𑁆𑀞𑀼𑀁 𑀕𑀘𑁆𑀙𑀢𑁄 𑀧𑀤𑁂 𑀧𑀤𑁂 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄.

𑁩𑁬𑁩. 𑀆𑀲𑀦𑁂𑀦 (𑀘𑀽𑀴𑀯. 𑁩𑁬𑁪) 𑀦𑀯𑁂 𑀦 𑀧𑀝𑀺𑀩𑀸𑀳𑁂𑀬𑁆𑀬, 𑀉𑀡𑁆𑀳𑁂 (𑀫𑀳𑀸𑀯. 𑁬𑁭, 𑁭𑁮, 𑁭𑁯; 𑀘𑀽𑀴𑀯. 𑁩𑁭𑁬, 𑁩𑁭𑁮, 𑁩𑁮𑁦, 𑁩𑁮𑁨) 𑀘𑀻𑀯𑀭𑀁 𑀦 𑀦𑀺𑀤𑀳𑁂𑀬𑁆𑀬. 𑀕𑀼𑀭𑀼𑀦𑀸𑀢𑀺 𑀆𑀘𑀭𑀺𑀬𑀸𑀤𑀺𑀦𑀸 𑀧𑀡𑀸𑀫𑀺𑀢𑁄 𑀔𑀫𑀸𑀧𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁬𑁪. 𑀆𑀧𑀢𑁆𑀢𑀻𑀳𑀺 𑀘 𑀲𑀢𑁆𑀢𑀳𑀻𑀢𑀺 (𑀯𑀚𑀺𑀭. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨𑁬) 𑀲𑀢𑁆𑀢𑀳𑀺 𑀆𑀧𑀢𑁆𑀢𑀻𑀳𑀺 𑀪𑀺𑀓𑁆𑀔𑀼𑀁 𑀧𑀭𑀫𑁆𑀫𑀼𑀔𑀸 𑀅𑀓𑁆𑀓𑁄𑀲𑀦𑁂𑀦 𑀘 ‘‘𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄 𑀩𑀻𑀚𑀪𑁄𑀚𑀻’’𑀢𑀺𑀆𑀤𑀺𑀦𑀸 𑀅𑀜𑁆𑀜𑁂𑀦𑁂𑀯 𑀯𑀸 𑀅𑀓𑁆𑀓𑁄𑀲𑀦𑁂𑀦 𑀘 𑀤𑀼𑀓𑁆𑀓𑀝𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁬𑁫. 𑀲𑀤𑁆𑀥𑀸𑀤𑁂𑀬𑁆𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁬𑁧) 𑀘𑀻𑀯𑀭𑀁 𑀯𑀸 𑀧𑀺𑀡𑁆𑀟𑀧𑀸𑀢𑀁 𑀯𑀸𑀢𑀺 𑀅𑀢𑁆𑀣𑁄. ‘‘𑀦 𑀪𑀺𑀓𑁆𑀔𑀯𑁂 𑀲𑀤𑁆𑀥𑀸𑀤𑁂𑀬𑁆𑀬𑀁 𑀯𑀺𑀦𑀺𑀧𑀸𑀢𑁂𑀢𑀩𑁆𑀩𑀁. 𑀬𑁄 𑀯𑀺𑀦𑀺𑀧𑀸𑀢𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁩𑁬𑁧) 𑀳𑀺 𑀯𑀼𑀢𑁆𑀢𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀸𑀢𑀸𑀧𑀺𑀢𑀽𑀦𑀁 𑀤𑀸𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁬𑁧) 𑀯𑀼𑀢𑁆𑀢𑀢𑁆𑀢𑀸 ‘‘𑀮𑀩𑁆𑀪𑀁 𑀧𑀺𑀢𑀽𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑁩𑁬𑁬. 𑀯𑀲𑁆𑀲𑀁𑀯𑀼𑀢𑁆𑀣𑁄 𑀅𑀜𑁆𑀜𑀢𑁆𑀭𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀢𑁄𑀢𑀺 𑀅𑀜𑁆𑀜𑀯𑀺𑀳𑀸𑀭𑀢𑁄. ‘‘𑀦 𑀪𑀺𑀓𑁆𑀔𑀯𑁂 𑀅𑀜𑁆𑀜𑀢𑁆𑀭 𑀯𑀲𑁆𑀲𑀁𑀯𑀼𑀢𑁆𑀣𑁂𑀦 𑀅𑀜𑁆𑀜𑀢𑁆𑀭 𑀘𑀻𑀯𑀭𑀪𑀸𑀕𑁄 𑀲𑀸𑀤𑀺𑀢𑀩𑁆𑀩𑁄. 𑀬𑁄 𑀲𑀸𑀤𑀺𑀬𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁩𑁬𑁪) 𑀳𑀺 𑀯𑀼𑀢𑁆𑀢𑀁. 𑀢𑁂𑀲𑀦𑁆𑀢𑀺 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀢𑀁 𑀘𑀻𑀯𑀭𑀁 𑀪𑀸𑀚𑁂𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀬𑀼𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑀢𑁄 𑀳𑁄𑀢𑀺 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑀺𑀬𑁄𑀢𑀺 𑀅𑀢𑁆𑀣𑁄.

𑁩𑁬𑁭. 𑀲𑀳 𑀅𑀦𑁆𑀢𑀭𑁂𑀦 𑀉𑀢𑁆𑀢𑀭𑁄𑀢𑀺 𑀲𑀦𑁆𑀢𑀭𑀼𑀢𑁆𑀢𑀭𑁄, 𑀕𑀸𑀫𑀁 𑀦 𑀧𑀯𑀺𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. ‘‘𑀦 𑀪𑀺𑀓𑁆𑀔𑀯𑁂 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄. 𑀬𑁄 𑀧𑀯𑀺𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁩𑁬𑁨) 𑀳𑀺 𑀯𑀼𑀢𑁆𑀢𑀁. 𑀓𑀮𑁆𑀮𑁄 𑀯𑀸𑀢𑀺 𑀅𑀕𑀺𑀮𑀸𑀦𑁄. 𑀲𑀉𑀧𑀸𑀳𑀦𑁄 𑀕𑀸𑀫𑀁 𑀦 𑀧𑀯𑀺𑀲𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀦 𑀪𑀺𑀓𑁆𑀔𑀯𑁂 𑀘𑀸𑀫𑀭𑀺𑀩𑀻𑀚𑀦𑀻 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁬𑁯), ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀩𑀻𑀚𑀦𑀺𑀬𑁄 𑀯𑀸𑀓𑀫𑀬𑀁 𑀉𑀲𑀻𑀭𑀫𑀬𑀁 𑀫𑁄𑀭𑀧𑀺𑀜𑁆𑀙𑀫𑀬’’𑀦𑁆𑀢𑀺 (𑀘𑀽𑀴𑀯. 𑁨𑁬𑁯) 𑀘 𑀯𑀼𑀢𑁆𑀢𑀢𑁆𑀢𑀸 ‘‘𑀦 𑀥𑀸𑀭𑁂𑀬𑁆𑀬 𑀘𑀸𑀫𑀭𑀻𑀫𑀓𑀲𑀩𑀻𑀚𑀦𑀺’’𑀦𑁆𑀢𑀺 𑀯𑀼𑀢𑁆𑀢𑀁. 𑀫𑀓𑀲𑀩𑀻𑀚𑀦𑀻 𑀧𑀦 𑀤𑀦𑁆𑀢𑀯𑀺𑀲𑀸𑀡𑀤𑀸𑀭𑀼𑀤𑀡𑁆𑀟𑀓𑀸𑀧𑀺 𑀯𑀝𑁆𑀝𑀢𑀺.

𑁩𑁬𑁮. 𑀆𑀭𑀸𑀫𑀢𑁄 𑀩𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀦 𑀪𑀺𑀓𑁆𑀔𑀯𑁂 𑀙𑀢𑁆𑀢𑀁 𑀥𑀸𑀭𑁂𑀢𑀩𑁆𑀩𑀁. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺, ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑀲𑁆𑀲 𑀙𑀢𑁆𑀢’’𑀦𑁆𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 𑀅𑀕𑀺𑀮𑀸𑀦𑁄 𑀆𑀭𑀸𑀫𑀢𑁄 𑀩𑀳𑀺 𑀦 𑀮𑀪𑀢𑀺, 𑀘𑀻𑀯𑀭𑀕𑀼𑀢𑁆𑀢𑀺𑀬𑀸𑀤𑀺𑀅𑀢𑁆𑀣𑀸𑀬 𑀅𑀕𑀺𑀮𑀸𑀦𑁄𑀧𑀺 𑀮𑀪𑀢𑀻𑀢𑀺 𑀅𑀢𑁆𑀣𑁄.

𑁩𑁬𑁯. 𑀕𑀸𑀳𑁂𑀬𑁆𑀬 𑀦𑀼𑀪𑀢𑁄𑀓𑀸𑀚𑀦𑁆𑀢𑀺 𑀦 𑀕𑀸𑀳𑁂𑀬𑁆𑀬 𑀉𑀪𑀢𑁄𑀓𑀸𑀚𑀁. 𑀏𑀓𑀦𑁆𑀢𑀭𑀺𑀓𑀓𑀸𑀚𑀓𑀦𑁆𑀢𑀺 𑀏𑀓𑀢𑁄𑀓𑀸𑀚𑀜𑁆𑀘 𑀅𑀦𑁆𑀢𑀭𑀓𑀸𑀚𑀜𑁆𑀘. 𑀲𑀻𑀲𑀪𑀸𑀭𑁄 𑀘 𑀔𑀦𑁆𑀥𑀪𑀸𑀭𑁄 𑀘 𑀓𑀝𑀺𑀪𑀸𑀭𑁄 𑀘 𑀲𑀻𑀲𑀓𑁆𑀔𑀦𑁆𑀥𑀓𑀝𑀺𑀪𑀸𑀭𑀸. ‘‘𑀦 𑀪𑀺𑀓𑁆𑀔𑀯𑁂 𑀉𑀪𑀢𑁄𑀓𑀸𑀚𑀁 𑀳𑀭𑀺𑀢𑀩𑁆𑀩𑀁. 𑀬𑁄 𑀳𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁮𑁧), ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀏𑀓𑀢𑁄𑀓𑀸𑀚𑀁 𑀅𑀦𑁆𑀢𑀭𑀓𑀸𑀚𑀁 𑀲𑀻𑀲𑀪𑀸𑀭𑀁 𑀔𑀦𑁆𑀥𑀪𑀸𑀭𑀁 𑀓𑀝𑀺𑀪𑀸𑀭𑀁 𑀑𑀮𑀫𑁆𑀩𑀓’’𑀦𑁆𑀢𑀺 (𑀘𑀽𑀴𑀯. 𑁨𑁮𑁧) 𑀘 𑀯𑀼𑀢𑁆𑀢𑀢𑁆𑀢𑀸 𑀉𑀪𑀢𑁄𑀓𑀸𑀚𑀫𑁂𑀯 𑀦 𑀯𑀝𑁆𑀝𑀢𑀺, 𑀲𑁂𑀲𑀸𑀦𑀺 𑀯𑀝𑁆𑀝𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁩𑁭𑁦. 𑀅𑀦𑁄𑀓𑀸𑀲𑀓𑀢𑀦𑁆𑀢𑀺 (𑀫𑀳𑀸𑀯. 𑁧𑁫𑁩) 𑀬𑁄 𑀧𑀞𑀫𑀫𑁂𑀯 ‘‘𑀓𑀭𑁄𑀳𑀺 𑀫𑁂 𑀆𑀯𑀼𑀲𑁄 𑀑𑀓𑀸𑀲𑀁, 𑀅𑀳𑀁 𑀢𑀁 𑀯𑀢𑁆𑀢𑀼𑀓𑀸𑀫𑁄’’𑀢𑀺 𑀏𑀯𑀁 𑀅𑀓𑀢𑁄𑀓𑀸𑀲𑀁 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸𑀢𑀺 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀅𑀢𑁆𑀣𑁄.

𑁩𑁭𑁧. 𑀧𑀓𑀢𑀗𑁆𑀕𑀼𑀮𑁂𑀦, 𑀦 𑀲𑀼𑀕𑀢𑀗𑁆𑀕𑀼𑀮𑁂𑀦𑀸𑀢𑀺 𑀅𑀢𑁆𑀣𑁄.

𑁩𑁭𑁨. 𑀫𑀽𑀕𑀩𑁆𑀩𑀢𑀸𑀤𑀺𑀁 (𑀫𑀳𑀸𑀯. 𑁨𑁦𑁯; 𑀫𑀳𑀸𑀯. 𑀅𑀝𑁆𑀞. 𑁨𑁦𑁯) 𑀢𑀺𑀢𑁆𑀣𑀺𑀬𑀩𑁆𑀩𑀢𑀁 𑀬𑀤𑀺 𑀕𑀡𑁆𑀳𑁂𑀬𑁆𑀬, 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄. 𑀆𑀤𑀺-𑀲𑀤𑁆𑀤𑁂𑀦 𑀕𑁄𑀯𑀢𑀓𑀼𑀓𑁆𑀓𑀼𑀭𑀯𑀢𑀸𑀤𑀬𑁄 𑀲𑀗𑁆𑀕𑀳𑀺𑀢𑀸. 𑀢𑀣𑀸𑀢𑀺 (𑀫𑀳𑀸𑀯. 𑁩𑁦𑁩; 𑀫𑀳𑀸𑀯. 𑀅𑀝𑁆𑀞. 𑁩𑁦𑁩) 𑀦𑁆𑀳𑀸𑀧𑀺𑀢𑀧𑀼𑀩𑁆𑀩𑀓𑁄 𑀔𑀼𑀭𑀪𑀡𑁆𑀟𑀁 𑀬𑀤𑀺 𑀧𑀭𑀺𑀳𑀭𑁂𑀬𑁆𑀬, 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀅𑀢𑁆𑀣𑁄.

𑁩𑁭𑁩. 𑀬𑀁 𑀓𑀺𑀜𑁆𑀘𑀻𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀦𑁆𑀳𑀸𑀧𑀺𑀢𑀢𑀼𑀡𑁆𑀡𑀓𑀸𑀭𑀓𑀫𑁆𑀫𑀸𑀤𑀺 𑀬𑀁 𑀓𑀺𑀜𑁆𑀘𑀺 𑀳𑀢𑁆𑀣𑀓𑀫𑁆𑀫𑀦𑁆𑀢𑀺 𑀅𑀢𑁆𑀣𑁄. 𑀢𑀤𑀦𑀼𑀲𑀸𑀭𑀢𑁄𑀢𑀺 𑀳𑀢𑁆𑀣𑀓𑀫𑁆𑀫𑀬𑀸𑀘𑀦𑀸𑀦𑀼𑀲𑀸𑀭𑀢𑁄𑀢𑀺 𑀅𑀢𑁆𑀣𑁄. 𑀲𑀘𑁂 𑀏𑀯𑀁 𑀬𑀸𑀘𑀢𑁄 𑀳𑀢𑁆𑀣𑀓𑀫𑁆𑀫𑀫𑀽𑀮𑀫𑁂𑀯 𑀤𑁂𑀢𑀺, 𑀢𑀁 𑀅𑀜𑁆𑀜𑀲𑁆𑀲 𑀤𑀸𑀧𑁂𑀢𑁆𑀯𑀸 𑀓𑀸𑀭𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀓𑁆𑀓𑀫𑁆𑀫𑀁 𑀧𑀦 𑀳𑀢𑁆𑀣𑀓𑀫𑁆𑀫𑀯𑀲𑁂𑀦 𑀅𑀬𑀸𑀘𑀺𑀢𑁆𑀯𑀸𑀧𑀺 ‘‘𑀏𑀳𑀺 𑀇𑀫𑀁 𑀓𑀭𑁄𑀳𑀻’’𑀢𑀺 𑀓𑀸𑀭𑁂𑀢𑀼𑀁 𑀓𑀧𑁆𑀧𑀢𑀻𑀢𑀺 𑀅𑀢𑁆𑀣𑁄. 𑀬𑀁 𑀓𑀺𑀜𑁆𑀘𑀺𑀧𑀭𑀲𑀦𑁆𑀢𑀓𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀤𑀸𑀭𑀼𑀢𑀺𑀡𑀸𑀤𑀺𑀓𑀁 𑀅𑀧𑀭𑀲𑀦𑁆𑀢𑀓𑀁 𑀅𑀧𑀭𑀺𑀕𑁆𑀕𑀳𑀺𑀢𑀁 𑀆𑀳𑀭𑀸𑀧𑁂𑀢𑀼𑀁 𑀓𑀧𑁆𑀧𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁭𑁪. 𑀕𑀺𑀳𑀻𑀦𑀦𑁆𑀢𑀺 𑀕𑀺𑀳𑀻𑀦𑀁 𑀲𑀦𑁆𑀢𑀓𑀁. 𑀕𑁄𑀧𑀓𑁂𑀢𑀺 𑀭𑀓𑁆𑀔𑀓𑁂. 𑀬𑀢𑁆𑀢𑀓𑀁 𑀤𑁂𑀢𑀺, 𑀢𑀢𑁆𑀢𑀓𑀁 𑀕𑀳𑁂𑀢𑀼𑀁 𑀓𑀧𑁆𑀧𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸𑀧𑀭𑀺𑀘𑁆𑀙𑁂𑀤𑀦𑁆𑀢𑀺 ‘‘𑀤𑀺𑀯𑀲𑁂 𑀤𑀺𑀯𑀲𑁂 𑀏𑀢𑁆𑀢𑀓𑀁 𑀉𑀘𑁆𑀙𑀼𑀦𑀸𑀴𑀺𑀓𑁂𑀭𑀁 𑀅𑀫𑁆𑀩𑀧𑀓𑁆𑀓𑀁 𑀢𑀼𑀫𑁆𑀳𑁂 𑀔𑀸𑀤𑀣𑀸’’𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀺𑀦𑁆𑀦𑀫𑁂𑀯 𑀢𑁂𑀲𑀼 𑀤𑁂𑀦𑁆𑀢𑁂𑀲𑀼 𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄.

𑁩𑁭𑁫. 𑀤𑁆𑀯𑀺𑀳𑀸𑀧𑀚𑁆𑀚𑁂𑀬𑁆𑀬𑀸𑀢𑀺 𑀤𑁆𑀯𑀻𑀳𑀺 𑀆𑀧𑀚𑁆𑀚𑁂𑀬𑁆𑀬. 𑀓𑀢𑀫𑁂𑀳𑀺 𑀤𑁆𑀯𑀻𑀳𑀻𑀢𑀺 𑀘𑁂, 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀬𑀯𑀸𑀘𑀸𑀳𑀻’’𑀢𑀺 𑀯𑀼𑀢𑁆𑀢𑀁, ‘‘𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀓𑀸𑀬𑁂𑀦 𑀆𑀧𑀚𑁆𑀚𑀢𑀺, 𑀯𑀸𑀘𑀸𑀬 𑀆𑀧𑀚𑁆𑀚𑀢𑀻’’𑀢𑀺 (𑀧𑀭𑀺. 𑁩𑁨𑁨) 𑀳𑀺 𑀯𑀼𑀢𑁆𑀢𑀁. 𑀓𑀸𑀬𑀯𑀸𑀘𑀸𑀳𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑁄 𑀘 𑀙𑀳𑀺 𑀆𑀓𑀸𑀭𑁂𑀳𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀢𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀮𑀚𑁆𑀚𑀺𑀜𑀸𑀡𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀢𑁆𑀢𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 (𑀧𑀭𑀺. 𑁨𑁯𑁫) 𑀧𑀦 𑀅𑀓𑀧𑁆𑀧𑀺𑀬𑀪𑀸𑀯𑀁 𑀚𑀸𑀦𑀦𑁆𑀢𑁄 𑀏𑀯 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀦𑁆𑀢𑁄 𑀅𑀮𑀚𑁆𑀚𑀺𑀢𑀸𑀬 𑀆𑀧𑀚𑁆𑀚𑀢𑀺 𑀦𑀸𑀫. 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀅𑀚𑀸𑀦𑀺𑀢𑁆𑀯𑀸 𑀆𑀧𑀚𑁆𑀚𑀦𑁆𑀢𑁄 𑀅𑀜𑁆𑀜𑀸𑀡𑀢𑀸𑀬. 𑀓𑀧𑁆𑀧𑀺𑀬𑀁 𑀦𑀼 𑀔𑁄, 𑀦𑁄 𑀦𑀼 𑀔𑁄’’𑀢𑀺 𑀲𑀁𑀲𑀬𑁂 𑀉𑀧𑁆𑀧𑀦𑁆𑀦𑁂 𑀢𑀫𑀪𑀺𑀯𑀺𑀢𑀭𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀦𑁆𑀢𑁄 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀢𑁆𑀢𑀸 𑀆𑀧𑀚𑁆𑀚𑀢𑀺. 𑀲𑀳𑀲𑁂𑀬𑁆𑀬𑀸𑀤𑀺𑀁 𑀆𑀧𑀚𑁆𑀚𑀦𑁆𑀢𑁄 𑀲𑀢𑀺𑀧𑁆𑀮𑀯𑀸, 𑀲𑀢𑀺𑀲𑀫𑁆𑀫𑁄𑀲𑀸𑀢𑀺 𑀅𑀢𑁆𑀣𑁄. 𑀅𑀘𑁆𑀙𑀫𑀁𑀲𑀁 ‘‘𑀲𑀽𑀓𑀭𑀫𑀁𑀲’’𑀦𑁆𑀢𑀺 𑀯𑀸 𑀲𑀽𑀓𑀭𑀫𑀁𑀲𑀁 ‘‘𑀅𑀘𑁆𑀙𑀫𑀁𑀲’’𑀦𑁆𑀢𑀺 𑀯𑀸 𑀔𑀸𑀤𑀦𑁆𑀢𑁄 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸𑀬 𑀘 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸𑀬 𑀘 𑀆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁩𑁭𑁬. 𑀅𑀮𑀚𑁆𑀚𑀺𑀢𑀸𑀬 𑀯𑀸 𑀅𑀜𑁆𑀜𑀸𑀡𑀢𑀸𑀬 𑀯𑀸 𑀆𑀧𑀢𑁆𑀢𑀺𑀁 𑀓𑀸𑀬𑀯𑀸𑀘𑀸𑀳𑀺 𑀙𑀸𑀤𑀬𑁂𑀢𑀺 𑀅𑀢𑁆𑀣𑁄. 𑀏𑀓𑁂 𑀯𑀸 𑀏𑀓𑀲𑁆𑀫𑀺𑀁 𑀯𑀸. 𑀮𑀺𑀗𑁆𑀕𑁂𑀢𑀺 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑀢𑁄. 𑀏𑀯𑀁 𑀘𑀢𑀼𑀥𑀸 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀺𑀡𑀯𑀢𑁆𑀣𑀸𑀭𑀓𑀲𑀫𑀣𑀅𑀩𑁆𑀪𑀸𑀦𑀸𑀤𑀻𑀦𑀁 𑀯𑀲𑁂𑀦 𑀲𑀗𑁆𑀖𑁂 𑀆𑀧𑀢𑁆𑀢𑀺 𑀯𑀼𑀝𑁆𑀞𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁 𑀦𑀺𑀲𑁆𑀲𑀚𑁆𑀚𑀦𑀸𑀤𑀻𑀲𑀼 𑀕𑀡𑁂. 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀯𑀼𑀝𑁆𑀞𑀸𑀦𑀁 𑀧𑀸𑀓𑀝𑀫𑁂𑀯. ‘‘𑀬𑀸 𑀆𑀧𑀢𑁆𑀢𑀺𑀬𑁄 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀳𑀺 𑀅𑀲𑀸𑀥𑀸𑀭𑀡𑀸, 𑀢𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑁬𑁯) 𑀯𑀘𑀦𑀢𑁄 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑁂 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀁 𑀜𑀸𑀢𑀩𑁆𑀩𑀁.

𑁩𑁭𑁭. 𑀧𑀘𑁆𑀘𑀬𑀤𑁆𑀯𑀬𑁂𑀢𑀺 𑀘𑀻𑀯𑀭𑁂 𑀘 𑀧𑀺𑀡𑁆𑀟𑀧𑀸𑀢𑁂 𑀘. 𑀦 𑀓𑁂𑀯𑀮𑀜𑁆𑀘 𑀇𑀫𑁂 𑀏𑀯, 𑀦𑀺𑀫𑀺𑀢𑁆𑀢𑀓𑀫𑁆𑀫𑀫𑁆𑀧𑀺 𑀦 𑀮𑀩𑁆𑀪𑀢𑁂𑀯, 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀧𑀦 𑀦 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀦𑀸𑀫 𑀬𑀁 𑀓𑀺𑀜𑁆𑀘𑀺 𑀧𑀭𑁂𑀲𑀁 𑀧𑀘𑁆𑀘𑀬𑀤𑀸𑀦𑀲𑀁𑀬𑁄𑀚𑀦𑀓𑀁 𑀓𑀸𑀬𑀯𑀘𑀻𑀓𑀫𑁆𑀫𑀁. 𑀔𑀸𑀤𑀦𑀻𑀬𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀓𑀺𑀁 𑀔𑀸𑀤𑀦𑀻𑀬𑀁 𑀮𑀪𑀺𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀲𑁆𑀲 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀺𑀓𑀣𑀸 𑀦𑀸𑀫 𑀬𑀣𑀸 𑀬𑀣𑀸 𑀢𑀁 𑀮𑀪𑀢𑀺, 𑀢𑀣𑀸 𑀢𑀣𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀓𑀣𑀦𑀁. ‘‘𑀏𑀢𑀭𑀳𑀺 𑀪𑀺𑀓𑁆𑀔𑀽 𑀧𑀺𑀡𑁆𑀟𑀧𑀸𑀢𑁂𑀦 𑀓𑀺𑀮𑀫𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀲𑁆𑀲 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀑𑀪𑀸𑀲𑁄 𑀦𑀸𑀫 𑀧𑀘𑁆𑀘𑀬𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀸. 𑀯𑀺𑀜𑁆𑀜𑀢𑁆𑀢𑀺 𑀧𑀦 𑀧𑀸𑀓𑀝𑀸 𑀏𑀯. 𑀢𑀢𑀺𑀬𑁂𑀢𑀺 𑀲𑁂𑀦𑀸𑀲𑀦𑁂. 𑀲𑁂𑀦𑀸𑀲𑀦𑁂 𑀧𑀦 𑀦𑀺𑀫𑀺𑀢𑁆𑀢𑁄𑀪𑀸𑀲𑀧𑀭𑀺𑀓𑀣𑀸 𑀯𑀝𑁆𑀝𑀦𑁆𑀢𑀺, 𑀯𑀺𑀜𑁆𑀜𑀢𑁆𑀢𑀺 𑀏𑀯 𑀏𑀓𑀸 𑀦 𑀯𑀝𑁆𑀝𑀢𑀺. 𑀢𑀢𑁆𑀣 𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀦𑀸𑀫 𑀉𑀧𑀸𑀲𑀓𑁂 𑀤𑀺𑀲𑁆𑀯𑀸 𑀲𑁂𑀦𑀸𑀲𑀦𑀢𑁆𑀣𑀁 𑀪𑀽𑀫𑀺𑀧𑀭𑀺𑀓𑀫𑁆𑀫𑀓𑀭𑀡𑀸𑀤𑀺. 𑀑𑀪𑀸𑀲𑁄 𑀦𑀸𑀫 ‘‘𑀉𑀧𑀸𑀲𑀓𑀸, 𑀢𑀼𑀫𑁆𑀳𑁂 𑀓𑀼𑀳𑀺𑀁 𑀯𑀲𑀣𑀸’’𑀢𑀺 ‘‘𑀧𑀸𑀲𑀸𑀤𑁂, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀪𑀺𑀓𑁆𑀔𑀽𑀦𑀁 𑀧𑀸𑀲𑀸𑀤𑁄 𑀦 𑀯𑀝𑁆𑀝𑀢𑀻’’𑀢𑀺𑀆𑀤𑀺𑀓𑀁 𑀯𑀘𑀦𑀁. 𑀧𑀭𑀺𑀓𑀣𑀸 𑀦𑀸𑀫 ‘‘𑀪𑀺𑀓𑁆𑀔𑀽𑀦𑀁 𑀲𑁂𑀦𑀸𑀲𑀦𑀁 𑀲𑀫𑁆𑀩𑀸𑀥’’𑀦𑁆𑀢𑀺 𑀯𑀘𑀦𑀁. 𑀲𑁂𑀲𑁂𑀢𑀺 𑀕𑀺𑀮𑀸𑀦𑀧𑀘𑁆𑀘𑀬𑁂.

𑁩𑁭𑁮. 𑀦 𑀭𑀼𑀳𑀢𑀻𑀢𑀺 𑀦 𑀳𑁄𑀢𑀺. 𑀅𑀘𑁆𑀘𑀬𑁂 𑀤𑀸𑀦𑀦𑁆𑀢𑀺 𑀅𑀘𑁆𑀘𑀬𑀤𑀸𑀦𑀁. 𑀧𑀜𑁆𑀘𑀲𑀼 𑀲𑀳𑀥𑀫𑁆𑀫𑀺𑀓𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀓𑀸𑀮𑀁 𑀓𑀭𑁄𑀦𑁆𑀢𑁂𑀦 ‘‘𑀫𑀫𑀘𑁆𑀘𑀬𑁂𑀦 𑀫𑀬𑁆𑀳𑀁 𑀧𑀭𑀺𑀓𑁆𑀔𑀸𑀭𑁄 𑀉𑀧𑀚𑁆𑀛𑀸𑀬𑀲𑁆𑀲 𑀳𑁄𑀢𑀼, 𑀆𑀘𑀭𑀺𑀬𑀲𑁆𑀲 𑀳𑁄𑀢𑀼, 𑀅𑀜𑁆𑀜𑀲𑁆𑀲 𑀯𑀸 𑀓𑀲𑁆𑀲𑀘𑀺 𑀳𑁄𑀢𑀽’’𑀢𑀺 𑀯𑀼𑀢𑁆𑀢𑁂 𑀢𑁂𑀲𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀦 𑀭𑀼𑀳𑀢𑀻’’𑀢𑀺. 𑀲𑀗𑁆𑀖𑀲𑁆𑀲𑁂𑀯 𑀘 𑀢𑀁 𑀳𑁄𑀢𑀻𑀢𑀺 𑀬𑀤𑀺 𑀪𑀺𑀓𑁆𑀔𑀼𑀲𑀸𑀫𑀡𑁂𑀭𑁂𑀳𑀺 𑀏𑀯𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀺𑀁 𑀫𑀢𑁂𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑁂𑀯 𑀳𑁄𑀢𑀺, 𑀪𑀺𑀓𑁆𑀔𑀼𑀦𑀺𑀲𑀺𑀓𑁆𑀔𑀫𑀸𑀦𑀲𑀸𑀫𑀡𑁂𑀭𑀻𑀳𑀺 𑀘𑁂 𑀯𑀼𑀢𑁆𑀢𑀁, 𑀢𑀲𑁆𑀫𑀺𑀁 𑀫𑀢𑁂 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀢𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀕𑀺𑀳𑀻𑀦𑀁 𑀧𑀦 𑀭𑀽𑀳𑀢𑀻𑀢𑀺 𑀕𑀺𑀳𑀻𑀦𑀁 𑀧𑀦 𑀅𑀘𑁆𑀘𑀬𑀤𑀸𑀦𑀁 𑀏𑀯 𑀲𑀩𑁆𑀩𑁂𑀲𑀁 𑀭𑀼𑀳𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁭𑁯. 𑀉𑀧𑀲𑁆𑀲𑀬𑁂𑀢𑀺 𑀪𑀺𑀓𑁆𑀔𑀼𑀦𑀺𑀯𑀺𑀳𑀸𑀭𑁂. 𑀤𑀸𑀬𑀚𑁆𑀚𑁄𑀢𑀺 𑀢𑀲𑁆𑀲 𑀧𑀭𑀺𑀓𑁆𑀔𑀸𑀭𑀲𑁆𑀲 𑀤𑀸𑀬𑀚𑁆𑀚𑁄. 𑀲𑁂𑀲𑁂𑀧𑀻𑀢𑀺 𑀲𑀘𑁂 𑀪𑀺𑀓𑁆𑀔𑀼𑀦𑀺𑀲𑀺𑀓𑁆𑀔𑀫𑀸𑀦𑀲𑀸𑀫𑀡𑁂𑀭𑀺𑀬𑁄 𑀪𑀺𑀓𑁆𑀔𑀼𑀯𑀺𑀳𑀸𑀭𑁂 𑀓𑀸𑀮𑀁 𑀓𑀭𑁄𑀦𑁆𑀢𑀺, 𑀢𑀸𑀲𑀁 𑀧𑀭𑀺𑀓𑁆𑀔𑀸𑀭𑀸𑀦𑀁 𑀪𑀺𑀓𑁆𑀔𑀼𑀲𑀗𑁆𑀖𑁄𑀯 𑀤𑀸𑀬𑀚𑁆𑀚𑁄𑀢𑀺 𑀅𑀢𑁆𑀣𑁄.

𑁩𑁮𑁦. 𑀧𑀼𑀭𑀺𑀫𑀲𑁆𑀲𑁂𑀯𑀸𑀢𑀺 𑀏𑀢𑁆𑀣 ‘‘𑀇𑀫𑀁 𑀧𑀭𑀺𑀓𑁆𑀔𑀸𑀭𑀁 𑀦𑁂𑀢𑁆𑀯𑀸 𑀅𑀲𑀼𑀓𑀲𑁆𑀲 𑀤𑁂𑀳𑀻’’𑀢𑀺 𑀤𑀺𑀦𑁆𑀦𑀁 𑀧𑀼𑀭𑀺𑀫𑀲𑁆𑀲𑁂𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄. ‘‘𑀅𑀲𑀼𑀓𑀲𑁆𑀲 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑀁 𑀧𑀦 𑀧𑀘𑁆𑀙𑀺𑀫𑀲𑁆𑀲𑁂𑀯 𑀳𑁄𑀢𑀺 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀤𑀺𑀦𑁆𑀦𑀢𑁆𑀢𑀸. 𑀇𑀫𑀁 𑀯𑀺𑀥𑀺𑀁 𑀜𑀢𑁆𑀯𑀸𑀯 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀁 𑀯𑀸 𑀕𑀡𑁆𑀳𑁂𑀬𑁆𑀬, 𑀫𑀢𑀓𑀘𑀻𑀯𑀭𑀁 𑀯𑀸 𑀅𑀥𑀺𑀝𑁆𑀞𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀢𑀓𑀘𑀻𑀯𑀭𑀅𑀥𑀺𑀝𑁆𑀞𑀸𑀦𑀁 𑀦𑀸𑀫 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀓𑀸𑀮𑀁 𑀖𑁄𑀲𑁂𑀢𑁆𑀯𑀸 𑀣𑁄𑀓𑀁 𑀆𑀕𑀫𑁂𑀢𑁆𑀯𑀸 𑀲𑀘𑁂 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺, 𑀢𑁂𑀳𑀺 𑀲𑀤𑁆𑀥𑀺𑀁 𑀪𑀸𑀚𑁂𑀢𑀩𑁆𑀩𑀸𑀦𑀺, 𑀦𑁄 𑀘𑁂 𑀆𑀕𑀘𑁆𑀙𑀦𑁆𑀢𑀺, ‘‘𑀫𑀬𑁆𑀳𑀺𑀫𑀸𑀦𑀺 𑀘𑀻𑀯𑀭𑀸𑀦𑀺 𑀧𑀸𑀧𑀼𑀡𑀦𑁆𑀢𑀻’’𑀢𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀦𑀺. 𑀏𑀯𑀁 𑀅𑀥𑀺𑀝𑁆𑀞𑀺𑀢𑁂 𑀲𑀩𑁆𑀩𑀸𑀦𑀺 𑀢𑀲𑁆𑀲𑁂𑀯 𑀳𑁄𑀦𑁆𑀢𑀺, 𑀞𑀺𑀢𑀺𑀓𑀸 𑀧𑀦 𑀦 𑀢𑀺𑀝𑁆𑀞𑀢𑀺. 𑀲𑀘𑁂 𑀏𑀓𑁂𑀓𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀅𑀬𑀁 𑀧𑀞𑀫𑀪𑀸𑀕𑁄 𑀫𑀬𑁆𑀳𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀤𑀼𑀢𑀺𑀬𑀪𑀸𑀕𑁄’’𑀢𑀺 𑀏𑀯𑀁 𑀕𑀡𑁆𑀳𑀸𑀢𑀺, 𑀕𑀳𑀺𑀢𑀸𑀦𑀺 𑀘 𑀲𑀼𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀞𑀺𑀢𑀺𑀓𑀸 𑀘 𑀢𑀺𑀝𑁆𑀞𑀢𑀺. 𑀏𑀯𑀁 𑀧𑀸𑀧𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁂𑀦𑀸𑀧𑀺 𑀅𑀥𑀺𑀝𑁆𑀞𑀺𑀢𑀫𑁂𑀯 𑀳𑁄𑀢𑀺.

𑁩𑁮𑁧. 𑀮𑁄𑀳𑀪𑀡𑁆𑀟𑁂 𑀧𑀳𑀭𑀡𑀺𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑀁 𑀓𑀧𑁆𑀧𑀢𑀺, 𑀤𑀸𑀭𑀼𑀪𑀡𑁆𑀟𑁂 𑀘 𑀤𑀸𑀭𑀼𑀚𑀁 𑀧𑀢𑁆𑀢𑀜𑁆𑀘 𑀧𑀸𑀤𑀼𑀓𑀜𑁆𑀘, 𑀧𑀮𑁆𑀮𑀗𑁆𑀓𑀜𑁆𑀘 𑀆𑀲𑀦𑁆𑀤𑀺𑀜𑁆𑀘 𑀞𑀧𑁂𑀢𑁆𑀯𑀸 𑀲𑀩𑁆𑀩𑀁 𑀓𑀧𑁆𑀧𑀢𑀺, 𑀫𑀢𑁆𑀢𑀺𑀓𑀸𑀫𑀬𑁂 𑀓𑀢𑀓𑀜𑁆𑀘 𑀓𑀼𑀫𑁆𑀪𑀓𑀸𑀭𑀺𑀓𑀜𑁆𑀘 𑀞𑀧𑁂𑀢𑁆𑀯𑀸 𑀲𑀩𑁆𑀩𑀁 𑀓𑀧𑁆𑀧𑀢𑀻𑀢𑀺 𑀅𑀢𑁆𑀣𑁄. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀞𑀧𑁂𑀢𑁆𑀯𑀸 𑀧𑀳𑀭𑀡𑀺𑀁 𑀲𑀩𑁆𑀩𑀁 𑀮𑁄𑀳𑀪𑀡𑁆𑀟𑀁, 𑀞𑀧𑁂𑀢𑁆𑀯𑀸 𑀆𑀲𑀦𑁆𑀤𑀺𑀁 𑀧𑀮𑁆𑀮𑀗𑁆𑀓𑀁 𑀤𑀸𑀭𑀼𑀧𑀢𑁆𑀢𑀁 𑀤𑀸𑀭𑀼𑀧𑀸𑀤𑀼𑀓𑀁 𑀲𑀩𑁆𑀩𑀁 𑀤𑀸𑀭𑀼𑀪𑀡𑁆𑀟𑀁, 𑀞𑀧𑁂𑀢𑁆𑀯𑀸 𑀓𑀢𑀓𑀜𑁆𑀘 𑀓𑀼𑀫𑁆𑀪𑀓𑀸𑀭𑀺𑀓𑀜𑁆𑀘 𑀲𑀩𑁆𑀩𑀁 𑀫𑀢𑁆𑀢𑀺𑀓𑀸𑀪𑀡𑁆𑀟’’𑀦𑁆𑀢𑀺 (𑀘𑀽𑀴𑀯. 𑁨𑁯𑁩) 𑀳𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀓𑀢𑀓𑀦𑁆𑀢𑀺 𑀧𑀤𑀼𑀫𑀓𑀡𑁆𑀡𑀺𑀓𑀸𑀓𑀸𑀭𑁂𑀦 𑀓𑀢𑀫𑀮𑁆𑀮𑀓𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀥𑀦𑀺𑀬𑀲𑁆𑀲𑁂𑀯 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀸 𑀓𑀼𑀝𑀺 𑀓𑀼𑀫𑁆𑀪𑀓𑀸𑀭𑀺𑀓𑀦𑁆𑀢𑀺. 𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑁄.

𑀧𑀓𑀺𑀡𑁆𑀡𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.