𑁪𑁨. 𑀤𑁂𑀲𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁮𑁨. 𑀪𑀺𑀓𑁆𑀔𑀼𑀪𑀸𑀯𑀲𑁆𑀲 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁯𑁮) 𑀬𑁄 𑀘𑀸𑀕𑁄, 𑀲𑀸 𑀧𑀸𑀭𑀸𑀚𑀺𑀓𑀤𑁂𑀲𑀦𑀸𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀯𑀺𑀲𑀼𑀤𑁆𑀥𑀸𑀧𑁂𑀓𑁆𑀔𑁄𑀢𑀺 𑀕𑀺𑀳𑀺 𑀯𑀸 𑀳𑁄𑀢𑀼𑀓𑀸𑀫𑁄 𑀉𑀧𑀸𑀲𑀓𑁄 𑀯𑀸 𑀳𑁄𑀢𑀼𑀓𑀸𑀫𑁄 𑀆𑀭𑀸𑀫𑀺𑀓𑁄 𑀯𑀸 𑀳𑁄𑀢𑀼𑀓𑀸𑀫𑁄 𑀲𑀸𑀫𑀡𑁂𑀭𑁄 𑀯𑀸 𑀳𑁄𑀢𑀼𑀓𑀸𑀫𑁄’’𑀢𑀺 (𑀧𑀸𑀭𑀸. 𑁧𑁯𑁮). 𑀢𑀲𑁆𑀫𑀸 𑀕𑀺𑀳𑀺𑀪𑀸𑀯𑀸𑀤𑀺𑀓𑀁𑀬𑁂𑀯 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑀲𑁆𑀲 𑀯𑀺𑀲𑀼𑀤𑁆𑀥𑀺 𑀦𑀸𑀫, 𑀅𑀜𑁆𑀜𑀢𑀭𑀲𑁆𑀲 𑀯𑀺𑀲𑀼𑀤𑁆𑀥𑀺 𑀏𑀯 𑀦𑀢𑁆𑀣𑀺. ‘‘𑀙𑀸𑀤𑁂𑀢𑀺 𑀚𑀸𑀦𑀫𑀸𑀧𑀦𑁆𑀦𑀁, 𑀧𑀭𑀺𑀯𑀲𑁂𑀬𑁆𑀬 𑀢𑀸𑀯𑀢𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀯𑀺𑀥𑀺𑀁 𑀲𑀦𑁆𑀥𑀸𑀬 ‘‘𑀬𑀣𑀸𑀯𑀼𑀢𑁆𑀢𑁂𑀦 𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑁩𑁮𑁩. 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀢𑀁 𑀲𑀦𑁆𑀥𑀸𑀬 ‘‘𑀏𑀯’’𑀦𑁆𑀢𑀺 𑀯𑀼𑀢𑁆𑀢𑀁.

𑁩𑁮𑁪. 𑀧𑀝𑀺𑀤𑁂𑀲𑁂𑀫𑀻𑀢𑀺 𑀆𑀭𑁄𑀘𑁂𑀫𑀺. 𑀏𑀢𑀸𑀦𑀺 𑀅𑀳𑀁 𑀏𑀢𑀸𑀦𑀸𑀳𑀁.

𑁩𑁮𑁬. (𑀓) 𑀬𑀁 𑀲𑀗𑁆𑀖𑁄 𑀕𑀺𑀮𑀸𑀦𑀲𑁆𑀲 𑀢𑀺𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺𑀁 𑀤𑁂𑀢𑀺, 𑀢𑀁 𑀅𑀜𑁆𑀜𑀢𑁆𑀭𑀸𑀢𑀺 𑀅𑀢𑁆𑀣𑁄.

(𑀔) 𑀅𑀓𑀸𑀮𑀘𑀻𑀯𑀭𑀁 (𑀧𑀸𑀭𑀸. 𑁫𑁦𑁦) 𑀦𑀸𑀫 ‘‘𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀫𑀸𑀲𑁂 𑀉𑀧𑁆𑀧𑀦𑁆𑀦𑀁, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀲𑀢𑁆𑀢𑀫𑀸𑀲𑁂 𑀉𑀧𑁆𑀧𑀦𑁆𑀦𑀁, 𑀓𑀸𑀮𑁂𑀧𑀺 𑀆𑀤𑀺𑀲𑁆𑀲 𑀤𑀺𑀦𑁆𑀦𑀁, 𑀏𑀢𑀁 𑀅𑀓𑀸𑀮𑀘𑀻𑀯𑀭𑀁 𑀦𑀸𑀫𑀸’’𑀢𑀺.

(𑀕) 𑀧𑀼𑀭𑀸𑀡𑀘𑀻𑀯𑀭𑀁 (𑀧𑀸𑀭𑀸. 𑁫𑁦𑁫) 𑀦𑀸𑀫 ‘‘𑀲𑀓𑀺𑀁 𑀦𑀺𑀯𑀢𑁆𑀣𑀫𑁆𑀧𑀺 𑀲𑀓𑀺𑀁 𑀧𑀸𑀭𑀼𑀢𑀫𑁆𑀧𑀻’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀸𑀢𑀺𑀓𑀸 𑀦𑀸𑀫 𑀫𑀸𑀢𑀺𑀢𑁄 𑀯𑀸 𑀧𑀺𑀢𑀺𑀢𑁄 𑀯𑀸 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀅𑀲𑀫𑁆𑀩𑀦𑁆𑀥𑀸. 𑀦𑀺𑀲𑀻𑀤𑀦𑀧𑀘𑁆𑀘𑀢𑁆𑀣𑀭𑀡𑀥𑁄𑀯𑀸𑀧𑀦𑁂 𑀤𑀼𑀓𑁆𑀓𑀝𑀁.

(𑀖) 𑀅𑀜𑁆𑀜𑀢𑁆𑀭 𑀧𑀸𑀭𑀺𑀯𑀢𑁆𑀢𑀓𑀸𑀢𑀺 (𑀧𑀸𑀭𑀸. 𑁫𑁧𑁨) 𑀏𑀢𑁆𑀣 𑀳𑀭𑀻𑀢𑀓𑀻𑀔𑀡𑁆𑀟𑀫𑁆𑀧𑀺 𑀯𑀝𑁆𑀝𑀢𑀺. 𑀘𑀻𑀯𑀭𑀁 𑀦𑀸𑀫 𑀇𑀥 𑀯𑀺𑀓𑀧𑁆𑀧𑀦𑀽𑀧𑀕𑀧𑀘𑁆𑀙𑀺𑀫𑀢𑁄 𑀧𑀝𑁆𑀞𑀸𑀬 𑀅𑀥𑀺𑀧𑁆𑀧𑁂𑀢𑀁.

(𑀗) 𑀅𑀜𑁆𑀜𑀢𑁆𑀭 𑀲𑀫𑀬𑀸𑀢𑀺 (𑀧𑀸𑀭𑀸. 𑁫𑁧𑁯) 𑀏𑀢𑁆𑀣 ‘‘𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁄 𑀯𑀸 𑀳𑁄𑀢𑀺 𑀪𑀺𑀓𑁆𑀔𑀼 𑀦𑀝𑁆𑀞𑀘𑀻𑀯𑀭𑁄 𑀯𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀲𑀫𑀬𑀦𑁆𑀢𑀺 𑀅𑀢𑁆𑀣𑁄.

(𑀘) ‘‘𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑀢𑁄 𑀘𑀻𑀯𑀭𑀁 𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑁫𑁨𑁪) 𑀯𑀼𑀢𑁆𑀢𑀢𑁆𑀢𑀸 ‘‘𑀢𑀢𑀼𑀢𑁆𑀢𑀭𑀻’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀧𑀦 ‘‘𑀲𑀘𑁂 𑀢𑀻𑀡𑀺 𑀦𑀝𑁆𑀞𑀸𑀦𑀺 𑀳𑁄𑀦𑁆𑀢𑀺, 𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀺. 𑀤𑁆𑀯𑁂 𑀦𑀝𑁆𑀞𑀸𑀦𑀺, 𑀏𑀓𑀁 𑀲𑀸𑀤𑀺𑀢𑀩𑁆𑀩𑀁, 𑀏𑀓𑀁 𑀦𑀝𑁆𑀞𑀁, 𑀦 𑀓𑀺𑀜𑁆𑀘𑀺 𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑁫𑁨𑁪) 𑀯𑀼𑀢𑁆𑀢𑀁.

(𑀙-𑀚) ‘‘𑀓𑀻𑀤𑀺𑀲𑁂𑀦 𑀢𑁂 (𑀧𑀸𑀭𑀸. 𑁫𑁨𑁯), 𑀪𑀦𑁆𑀢𑁂, 𑀘𑀻𑀯𑀭𑁂𑀦 𑀅𑀢𑁆𑀣𑁄, 𑀓𑀻𑀤𑀺𑀲𑀁 𑀢𑁂 𑀘𑀻𑀯𑀭𑀁 𑀘𑁂𑀢𑀸𑀧𑁂𑀫𑀻’’𑀢𑀺 𑀏𑀯𑀁 𑀅𑀧𑁆𑀧𑀯𑀸𑀭𑀺𑀢𑁄𑀢𑀺 𑀅𑀢𑁆𑀣𑁄. 𑀯𑀺𑀓𑀧𑁆𑀧𑀦𑁆𑀢𑀺 𑀯𑀺𑀲𑀺𑀝𑁆𑀞𑀓𑀧𑁆𑀧𑀁 𑀅𑀥𑀺𑀓𑀯𑀺𑀥𑀸𑀦𑀁 𑀆𑀧𑀦𑁆𑀦𑀁. 𑀇𑀥 𑀧𑀼𑀭𑀺𑀫𑀁 𑀏𑀓𑀲𑁆𑀲, 𑀤𑀼𑀢𑀺𑀬𑀁 𑀩𑀳𑀽𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁, 𑀏𑀢𑁆𑀢𑀓𑀁 𑀦𑀸𑀦𑀢𑁆𑀢𑀁.

(𑀛) 𑀅𑀢𑀺𑀭𑁂𑀓𑀢𑀺𑀓𑁆𑀔𑀢𑁆𑀢𑀼𑀦𑁆𑀢𑀺 𑀏𑀢𑁆𑀣 𑀓𑁂𑀦𑀘𑀺 𑀬𑀁 𑀓𑀺𑀜𑁆𑀘𑀺 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀆𑀦𑁂𑀢𑁆𑀯𑀸 ‘‘𑀇𑀤𑀁 𑀔𑁄 𑀫𑁂, 𑀪𑀦𑁆𑀢𑁂, 𑀆𑀬𑀲𑁆𑀫𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀆𑀪𑀢𑀁, 𑀧𑀝𑀺𑀕𑁆𑀕𑀡𑁆𑀳𑀢𑀼 𑀆𑀬𑀲𑁆𑀫𑀸 𑀘𑀻𑀯𑀭𑀘𑁂𑀢𑀸𑀧𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀦 𑀔𑁄 𑀫𑀬𑀁, 𑀆𑀯𑀼𑀲𑁄, 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀧𑀝𑀺𑀕𑁆𑀕𑀡𑁆𑀳𑀸𑀫, 𑀘𑀻𑀯𑀭𑀜𑁆𑀘 𑀔𑁄 𑀫𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀫 𑀓𑀸𑀮𑁂𑀦 𑀓𑀧𑁆𑀧𑀺𑀬’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀏𑀯𑀁 𑀯𑀼𑀢𑁆𑀢𑁂 𑀲𑀘𑁂 𑀲𑁄 ‘‘𑀅𑀢𑁆𑀣𑀺 𑀓𑁄𑀘𑀺 𑀓𑀧𑁆𑀧𑀺𑀬𑀓𑀸𑀭𑀓𑁄’’𑀢𑀺 𑀯𑀤𑀢𑀺, 𑀘𑀻𑀯𑀭𑀢𑁆𑀣𑀺𑀓𑁂𑀦 𑀞𑀧𑁂𑀢𑁆𑀯𑀸 𑀧𑀜𑁆𑀘 𑀲𑀳𑀥𑀫𑁆𑀫𑀺𑀓𑁂 𑀬𑁄 𑀓𑁄𑀘𑀺 𑀉𑀤𑁆𑀤𑀺𑀲𑀺𑀢𑀩𑁆𑀩𑁄 ‘‘𑀏𑀲𑁄 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀽𑀦𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄’’𑀢𑀺, 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩𑀁. 𑀏𑀯𑀁 𑀯𑀼𑀢𑁆𑀢𑁂 𑀲𑀘𑁂 𑀤𑀸𑀬𑀓𑁄 𑀢𑀲𑁆𑀲 𑀳𑀢𑁆𑀣𑁂 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀤𑀢𑁆𑀯𑀸 ‘‘𑀏𑀲𑁄 𑀅𑀬𑁆𑀬𑀲𑁆𑀲 𑀘𑀻𑀯𑀭𑀁 𑀘𑁂𑀢𑀸𑀧𑁂𑀢𑁆𑀯𑀸 𑀤𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑁂𑀢𑀩𑁆𑀩𑁄 𑀲𑀸𑀭𑁂𑀢𑀩𑁆𑀩𑁄 ‘‘𑀅𑀢𑁆𑀣𑁄 𑀫𑁂, 𑀆𑀯𑀼𑀲𑁄, 𑀘𑀻𑀯𑀭𑁂𑀦𑀸’’𑀢𑀺, 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩𑀁, ‘‘𑀤𑁂𑀳𑀺 𑀫𑁂 𑀘𑀻𑀯𑀭’’𑀦𑁆𑀢𑀺𑀆𑀤𑀺𑀦𑀸 𑀦 𑀯𑀢𑁆𑀢𑀩𑁆𑀩𑀁. 𑀏𑀯𑀁 𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑀦𑀸𑀬 𑀢𑀁 𑀘𑀻𑀯𑀭𑀁 𑀮𑀪𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑀢𑀺, 𑀙𑀓𑁆𑀔𑀢𑁆𑀢𑀼𑀧𑀭𑀫𑀁 𑀢𑀼𑀡𑁆𑀳𑀻𑀪𑀽𑀢𑁂𑀦 𑀞𑀸𑀢𑀩𑁆𑀩𑀁, 𑀦 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀆𑀫𑀺𑀲𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀦 𑀥𑀫𑁆𑀫𑁄 𑀪𑀸𑀲𑀺𑀢𑀩𑁆𑀩𑁄. ‘‘𑀓𑀺𑀁 𑀓𑀸𑀭𑀡𑀸 𑀆𑀕𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀚𑀸𑀦𑀸𑀳𑀺, 𑀆𑀯𑀼𑀲𑁄’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀦𑀺𑀲𑀚𑁆𑀚𑀸𑀤𑀻𑀦𑀺 𑀓𑀭𑁄𑀢𑀺, 𑀞𑀸𑀦𑀁 𑀪𑀜𑁆𑀚𑀢𑀺. 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀜𑁆𑀘 𑀆𑀧𑀚𑁆𑀚𑀢𑀻𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀧𑀦 𑀅𑀧𑁆𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀅𑀢𑀺𑀭𑁂𑀓𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑀦𑀸𑀬 𑀅𑀢𑀺𑀭𑁂𑀓𑀙𑀓𑁆𑀔𑀢𑁆𑀢𑀼𑀁 𑀞𑀸𑀦𑁂𑀦 𑀲𑀘𑁂 𑀦𑀺𑀧𑁆𑀨𑀸𑀤𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀅𑀢𑁆𑀣𑁄.

(𑀜) 𑀲𑀦𑁆𑀣𑀢𑀁 (𑀧𑀸𑀭𑀸. 𑁫𑁪𑁪) 𑀦𑀸𑀫 𑀲𑀦𑁆𑀣𑀭𑀺𑀢𑁆𑀯𑀸 𑀓𑀢𑀁 𑀳𑁄𑀢𑀺 𑀅𑀯𑀸𑀬𑀺𑀫𑀁. 𑀏𑀓𑀓𑁄𑀲𑀺𑀬𑀁𑀲𑀼𑀦𑀸𑀧𑀺 𑀘𑁂 𑀫𑀺𑀲𑁆𑀲𑁂𑀢𑁆𑀯𑀸 𑀓𑀭𑁄𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁.

(𑀝) 𑀲𑀼𑀤𑁆𑀥𑀓𑀸𑀴𑀓𑀸𑀦𑀦𑁆𑀢𑀺 (𑀧𑀸𑀭𑀸. 𑁫𑁪𑁭-𑁫𑁪𑁯) 𑀅𑀜𑁆𑀜𑁂𑀳𑀺 𑀅𑀫𑀺𑀲𑁆𑀲𑀺𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀓𑀸𑀴𑀓𑀁 𑀦𑀸𑀫 𑀤𑁆𑀯𑁂 𑀓𑀸𑀴𑀓𑀸𑀦𑀺 𑀚𑀸𑀢𑀺𑀓𑀸𑀴𑀓𑀁 𑀯𑀸 𑀭𑀚𑀦𑀓𑀸𑀴𑀓𑀁 𑀯𑀸’’𑀢𑀺 𑀯𑀼𑀢𑁆𑀢𑀁.

(𑀞) 𑀅𑀦𑀸𑀤𑀺𑀬𑀺𑀢𑁆𑀯𑀸…𑀧𑁂… 𑀢𑀼𑀮𑀦𑁆𑀢𑀺 (𑀧𑀸𑀭𑀸. 𑁫𑁫𑁪) 𑀏𑀢𑁆𑀣 𑀧𑀦 𑀬𑀢𑁆𑀢𑀓𑁂𑀳𑀺 𑀏𑀴𑀓𑀮𑁄𑀫𑁂𑀳𑀺 𑀓𑀢𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀢𑁂𑀲𑀼 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀓𑀸𑀴𑀓𑀸𑀦𑀁, 𑀏𑀓𑁄 𑀑𑀤𑀸𑀢𑀸𑀦𑀁, 𑀏𑀓𑁄 𑀕𑁄𑀘𑀭𑀺𑀬𑀸𑀦𑀁 𑀆𑀤𑀸𑀢𑀩𑁆𑀩𑁄𑀢𑀺 𑀯𑀺𑀦𑀺𑀘𑁆𑀙𑀬𑁄. 𑀏𑀓𑀲𑁆𑀲𑀸𑀧𑀺 𑀓𑀸𑀴𑀓𑀮𑁄𑀫𑀲𑁆𑀲 𑀅𑀢𑀺𑀭𑁂𑀓𑀪𑀸𑀕𑁂 𑀲𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯.

(𑀟) 𑀊𑀦𑀓𑀙𑀩𑁆𑀩𑀲𑁆𑀲𑀸𑀦𑀻𑀢𑀺 (𑀧𑀸𑀭𑀸. 𑁫𑁬𑁨) 𑀙𑀩𑁆𑀩𑀲𑁆𑀲𑀢𑁄 𑀑𑀭𑀪𑀸𑀕𑁂.

(𑀠) 𑀦𑀺𑀲𑀻𑀤𑀦𑀲𑀦𑁆𑀣𑀢𑀁 (𑀧𑀸𑀭𑀸. 𑁫𑁬𑁭) 𑀧𑀦 𑀓𑀸𑀭𑀸𑀧𑁂𑀦𑁆𑀢𑁂𑀦 𑀧𑀼𑀭𑀸𑀡𑀲𑀦𑁆𑀣𑀢𑀲𑁆𑀲 𑀏𑀓𑀧𑀲𑁆𑀲𑀢𑁄 𑀯𑀝𑁆𑀝𑀁 𑀯𑀸 𑀘𑀢𑀼𑀭𑀲𑁆𑀲𑀁 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀺𑀢𑀝𑁆𑀞𑀸𑀦𑀁 𑀬𑀣𑀸 𑀯𑀺𑀤𑀢𑁆𑀣𑀺𑀫𑀢𑁆𑀢𑀁 𑀳𑁄𑀢𑀺, 𑀏𑀯𑀁 𑀕𑀳𑁂𑀢𑁆𑀯𑀸 𑀏𑀓𑀤𑁂𑀲𑀁 𑀯𑀸 𑀲𑀦𑁆𑀣𑀭𑀺𑀢𑀩𑁆𑀩𑀁, 𑀯𑀺𑀚𑀝𑁂𑀢𑁆𑀯𑀸 𑀯𑀸 𑀲𑀦𑁆𑀣𑀭𑀺𑀢𑀩𑁆𑀩𑀁.

(𑀢) 𑀦 𑀓𑁂𑀯𑀮𑀁 𑀥𑁄𑀯𑀸𑀧𑀦𑁂 (𑀧𑀸𑀭𑀸. 𑁫𑁭𑁮) 𑀏𑀯 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀭𑀚𑀦𑁂𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯.

(𑀤) 𑀭𑀽𑀧𑀺𑀬𑀧𑀝𑀺𑀕𑁆𑀕𑀳𑀡𑀲𑁆𑀲𑁂𑀯 (𑀧𑀸𑀭𑀸. 𑁫𑁮𑁯) 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀧𑀝𑀺𑀕𑁆𑀕𑀳𑀺𑀢𑀧𑀭𑀺𑀯𑀢𑁆𑀢𑀦𑁂 𑀤𑁄𑀲𑀁 𑀅𑀧𑀲𑁆𑀲𑀦𑁆𑀢𑀸 𑀓𑀢𑀸𑀓𑀢𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑀁 𑀚𑀸𑀢𑀭𑀽𑀧𑀧𑀭𑀺𑀯𑀢𑁆𑀢𑀦𑀁 𑀓𑀭𑁄𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬 ‘‘𑀦𑀸𑀦𑀧𑁆𑀧𑀓𑀸𑀭𑀓’’𑀦𑁆𑀢𑀺 𑀯𑀼𑀢𑁆𑀢𑀁.

𑁩𑁮𑁭-𑁯. 𑀆𑀧𑀢𑁆𑀢𑀺𑀁 𑀤𑁂𑀲𑁂𑀢𑁆𑀯𑀸 𑀧𑀘𑁆𑀙𑀸 𑀓𑀢𑁆𑀢𑀩𑁆𑀩𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣𑀸’’𑀢𑀺 𑀯𑀼𑀢𑁆𑀢𑀁. 𑀕𑀺𑀳𑀺𑀁 𑀯𑀤𑁂𑀢𑀺 𑀲𑀘𑁂 𑀢𑀢𑁆𑀣 𑀆𑀕𑀘𑁆𑀙𑀢𑀺 𑀆𑀭𑀸𑀫𑀺𑀓𑁄 𑀯𑀸 𑀉𑀧𑀸𑀲𑀓𑁄 𑀯𑀸, 𑀢𑀁 𑀯𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀯𑀼𑀢𑁆𑀢𑁄 𑀲𑁄 ‘‘𑀇𑀫𑀺𑀦𑀸 𑀓𑀺𑀁 𑀆𑀳𑀭𑀸𑀫𑀻’’𑀢𑀺 𑀘𑁂 𑀯𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀯𑀢𑁆𑀯𑀸𑀫𑀦𑁆𑀢𑀺 ‘‘𑀇𑀫𑀁 𑀯𑀸 𑀇𑀫𑀁 𑀯𑀸 𑀆𑀳𑀭𑀸’’𑀢𑀺 𑀅𑀯𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀤𑁂𑀢𑀺 ‘‘𑀓𑀧𑁆𑀧𑀺𑀬𑀁 𑀆𑀘𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑁫𑁮𑁪, 𑁫𑁮𑁯) 𑀯𑀘𑀦𑀢𑁄 ‘‘𑀧𑀩𑁆𑀩𑀚𑀺𑀢𑀸𑀦𑀁 𑀲𑀧𑁆𑀧𑀺 𑀯𑀸 𑀢𑁂𑀮𑀁 𑀯𑀸 𑀫𑀥𑀼 𑀯𑀸 𑀨𑀸𑀡𑀺𑀢𑀁 𑀯𑀸 𑀯𑀝𑁆𑀝𑀢𑀻’’𑀢𑀺 𑀏𑀯𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁, ‘‘𑀇𑀫𑀁 𑀦𑀸𑀫 𑀆𑀳𑀭𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀫𑁂𑀯. 𑀤𑁆𑀯𑁂𑀧𑁂𑀢𑁂𑀢𑀺 𑀤𑁆𑀯𑁂𑀧𑀺 𑀏𑀢𑁂 𑀭𑀽𑀧𑀺𑀬𑀧𑀝𑀺𑀕𑁆𑀕𑀸𑀳𑀓𑀜𑁆𑀘 𑀭𑀽𑀧𑀺𑀬𑀲𑀩𑁆𑀬𑁄𑀳𑀸𑀭𑀺𑀓𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑁂𑀦𑀸𑀢𑀺 𑀅𑀦𑁆𑀢𑀫𑀲𑁄 𑀆𑀭𑀸𑀫𑀺𑀓𑁂𑀦𑀸𑀧𑀺 𑀮𑀤𑁆𑀥𑀪𑀸𑀕𑁄 𑀦 𑀓𑀧𑁆𑀧𑀢𑀺 𑀏𑀯.

𑁩𑁯𑁦. 𑀅𑀦𑁆𑀢𑀫𑀲𑁄 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁮𑁩-𑁪) 𑀢𑀦𑁆𑀦𑀺𑀩𑁆𑀩𑀢𑁆𑀢𑀸 𑀭𑀼𑀓𑁆𑀔𑀘𑁆𑀙𑀸𑀬𑀸𑀧𑀺 𑀦 𑀓𑀧𑁆𑀧𑀢𑀻𑀢𑀺. 𑀦𑀺𑀲𑁆𑀲𑀝𑁆𑀞𑀁 𑀧𑀝𑀺𑀮𑀤𑁆𑀥𑀫𑁆𑀧𑀻𑀢𑀺 𑀏𑀢𑁆𑀣 𑀬𑀣𑀸 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀁 𑀓𑀢𑁆𑀯𑀸 𑀮𑀤𑁆𑀥𑀯𑀢𑁆𑀣𑀼𑀢𑁄 𑀆𑀪𑀢𑀁 𑀦 𑀓𑀧𑁆𑀧𑀢𑀺, 𑀢𑀣𑀸 𑀓𑁄𑀲𑀺𑀬𑀫𑀺𑀲𑁆𑀲𑀓𑀲𑀦𑁆𑀣𑀢𑀸𑀤𑀺𑀢𑁆𑀢𑀬𑀫𑁆𑀧𑀺 𑀦 𑀓𑀧𑁆𑀧𑀢𑀺. 𑀦 𑀓𑁂𑀯𑀮𑀁 𑀢𑀲𑁆𑀲𑁂𑀯, 𑀅𑀜𑁆𑀜𑁂𑀲𑀫𑁆𑀧𑀺 𑀦 𑀓𑀧𑁆𑀧𑀢𑁂𑀯 ‘‘𑀅𑀜𑁆𑀜𑁂𑀦 𑀓𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁫𑁪𑁫, 𑁫𑁫𑁦, 𑁫𑁫𑁫) 𑀯𑀼𑀢𑁆𑀢𑀢𑁆𑀢𑀸.

𑁩𑁯𑁧. 𑀏𑀯𑀁 𑀦𑁄 𑀘𑁂 𑀮𑀪𑁂𑀣, 𑀲𑁄 𑀆𑀭𑀸𑀫𑀺𑀓𑀸𑀤𑀺𑀓𑁄 ‘‘𑀇𑀫𑀁 𑀙𑀟𑁆𑀟𑁂𑀳𑀻’’𑀢𑀺 𑀲𑀁𑀲𑀺𑀬𑁄 𑀯𑀢𑁆𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀏𑀯𑀫𑁆𑀧𑀺 𑀦𑁄 𑀘𑁂 𑀮𑀪𑁂𑀬𑁆𑀬, 𑀲𑀫𑁆𑀫𑀢𑁄 𑀪𑀺𑀓𑁆𑀔𑀼 𑀙𑀟𑁆𑀟𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁩𑁯𑁨. 𑀧𑀝𑀺𑀕𑁆𑀕𑀳𑀺𑀢𑀭𑀽𑀧𑀺𑀬𑀜𑁆𑀘 𑀧𑀭𑀺𑀯𑀢𑁆𑀢𑀺𑀢𑀭𑀽𑀧𑀺𑀬𑀜𑁆𑀘 𑀲𑀦𑁆𑀥𑀸𑀬 ‘‘𑀏𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀧𑀢𑁆𑀢𑁄 𑀦𑀸𑀫 ‘‘𑀊𑀦𑀧𑀜𑁆𑀘𑀩𑀦𑁆𑀥𑀦𑁂𑀦 𑀧𑀢𑁆𑀢𑁂𑀦 𑀅𑀜𑁆𑀜𑀁 𑀦𑀯𑀁 𑀧𑀢𑁆𑀢𑀁 𑀘𑁂𑀢𑀸𑀧𑁂𑀬𑁆𑀬, 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 (𑀧𑀸𑀭𑀸. 𑁬𑁧𑁨) 𑀯𑀼𑀢𑁆𑀢𑀧𑀢𑁆𑀢𑁄. 𑀲𑁄 𑀘 𑀏𑀢𑀸𑀦𑀺 𑀘 𑀲𑀗𑁆𑀖𑁂 𑀦𑀺𑀲𑁆𑀲𑀝𑁆𑀞𑀼𑀁 𑀮𑀩𑁆𑀪𑀭𑁂𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁, 𑀪𑀺𑀓𑁆𑀔𑀼𑀧𑀭𑀺𑀲𑀸𑀬 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑁫𑁮𑁪, 𑁫𑁮𑁯) 𑀘 𑀯𑀼𑀢𑁆𑀢𑀢𑁆𑀢𑀸 𑀦 𑀕𑀡𑀧𑀼𑀕𑁆𑀕𑀮𑀸𑀦𑀁 𑀦𑀺𑀲𑁆𑀲𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀲𑁂𑀲𑀸𑀦𑀺 𑀧𑀦 𑀢𑀻𑀡𑀺 𑀘𑀻𑀯𑀭𑀸𑀤𑀺𑀯𑀢𑁆𑀣𑀽𑀦𑀺 ‘‘𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 (𑀧𑀸𑀭𑀸. 𑁪𑁬𑁩) 𑀲𑀗𑁆𑀖𑀸𑀤𑀻𑀦𑀁 𑀦𑀺𑀲𑁆𑀲𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀪𑀸𑀲𑀦𑁆𑀢𑀭𑁂𑀦𑀧𑀻𑀢𑀺 𑀧𑀸𑀴𑀺𑀬𑀸 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀤𑀫𑀺𑀴𑀪𑀸𑀲𑀸𑀤𑀻𑀲𑀼 𑀅𑀜𑁆𑀜𑀢𑀭𑀸𑀬𑀧𑀺 𑀦𑀺𑀲𑁆𑀲𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄.

𑁩𑁯𑁩. (𑀓-𑀕) 𑀦𑀸𑀦𑀧𑁆𑀧𑀓𑀸𑀭𑀓𑀁 𑀦𑀸𑀫 ‘‘𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸, ‘‘𑀅𑀦𑁆𑀢𑀫𑀲𑁄 𑀘𑀼𑀡𑁆𑀡𑀧𑀺𑀡𑁆𑀟𑁄𑀧𑀺 𑀤𑀦𑁆𑀢𑀓𑀝𑁆𑀞𑀫𑁆𑀧𑀺 𑀤𑀲𑀺𑀓𑀲𑀼𑀢𑁆𑀢𑀫𑁆𑀧𑀻’’𑀢𑀺 (𑀧𑀸𑀭𑀸. 𑁫𑁯𑁫) 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀘𑁂𑀢𑀸𑀧𑀺𑀢𑁄𑀢𑀺 (𑀧𑀸𑀭𑀸. 𑁬𑁧𑁩) 𑀬𑀸𑀘𑀺𑀢𑁆𑀯𑀸 𑀕𑀳𑀺𑀢𑁄.

𑁩𑁯𑁪. 𑀲𑀫𑁆𑀫𑀦𑁆𑀦𑀺𑀢𑁆𑀯𑀸𑀦 𑀧𑀢𑁆𑀢𑀕𑀸𑀳𑀓𑀁 𑀲𑀗𑁆𑀖𑀲𑁆𑀲 𑀧𑀢𑁆𑀢𑀦𑁆𑀢𑀦𑁆𑀢𑀺 (𑀧𑀸𑀭𑀸. 𑁬𑁧𑁪; 𑀓𑀗𑁆𑀔𑀸. 𑀅𑀝𑁆𑀞. 𑀊𑀦𑀧𑀜𑁆𑀘𑀩𑀤𑁆𑀥𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀬 𑀅𑀦𑁆𑀢𑀺𑀫𑀁 𑀧𑀢𑁆𑀢𑀁, 𑀢𑀁 𑀢𑀲𑁆𑀲 𑀤𑀸𑀧𑀬𑁂𑀢𑀺 𑀅𑀢𑁆𑀣𑁄.

𑁩𑁯𑁫. (𑀔) 𑀧𑀭𑀺𑀤𑀳𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀏𑀢𑁆𑀣 (𑀧𑀸𑀭𑀸. 𑁬𑁨𑁬-𑁬𑁨𑁮; 𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁮) 𑀧𑀦 𑀞𑀢𑁆𑀯𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀧𑀭𑀺𑀬𑁂𑀲𑀦𑀓𑁆𑀔𑁂𑀢𑁆𑀢𑀁 𑀓𑀭𑀡𑀓𑁆𑀔𑁂𑀢𑁆𑀢𑀁 𑀦𑀺𑀯𑀸𑀲𑀦𑀓𑁆𑀔𑁂𑀢𑁆𑀢𑀁 𑀅𑀥𑀺𑀝𑁆𑀞𑀸𑀦𑀓𑁆𑀔𑁂𑀢𑁆𑀢𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀔𑁂𑀢𑁆𑀢𑀜𑁆𑀘 𑀓𑀼𑀘𑁆𑀙𑀺𑀲𑀫𑀬𑁄 𑀧𑀺𑀝𑁆𑀞𑀺𑀲𑀫𑀬𑁄𑀢𑀺 𑀤𑀼𑀯𑀺𑀥𑁄 𑀲𑀫𑀬𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀓𑀣𑀁? 𑀕𑀺𑀫𑁆𑀳𑀸𑀦𑀫𑀸𑀲𑁂𑀲𑀼 𑀧𑀘𑁆𑀙𑀺𑀫𑀫𑀸𑀲𑀲𑁆𑀲 𑀧𑀼𑀭𑀺𑀫𑁄 𑀅𑀟𑁆𑀠𑀫𑀸𑀲𑁄 𑀧𑀭𑀺𑀬𑁂𑀲𑀦𑀓𑁆𑀔𑁂𑀢𑁆𑀢𑀁, 𑀧𑀘𑁆𑀙𑀺𑀫𑁄 𑀓𑀭𑀡𑀓𑁆𑀔𑁂𑀢𑁆𑀢𑀜𑁆𑀘 𑀦𑀺𑀯𑀸𑀲𑀦𑀓𑁆𑀔𑁂𑀢𑁆𑀢𑀜𑁆𑀘, 𑀧𑀭𑀺𑀬𑁂𑀲𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺, 𑀅𑀥𑀺𑀝𑁆𑀞𑀸𑀢𑀼𑀁 𑀧𑀦 𑀦 𑀯𑀝𑁆𑀝𑀢𑀺. 𑀯𑀲𑁆𑀲𑀺𑀓𑀸 𑀧𑀦 𑀘𑀢𑁆𑀢𑀸𑀭𑁄 𑀫𑀸𑀲𑀸 𑀧𑀭𑀺𑀬𑁂𑀲𑀦𑀸𑀤𑀻𑀦𑀁 𑀘𑀢𑀼𑀦𑁆𑀦𑀫𑁆𑀧𑀺 𑀔𑁂𑀢𑁆𑀢𑀁. 𑀏𑀢𑁂 𑀏𑀯 𑀧𑀜𑁆𑀘 𑀫𑀸𑀲𑀸 𑀓𑀼𑀘𑁆𑀙𑀺𑀲𑀫𑀬𑁄 𑀦𑀸𑀫. 𑀇𑀢𑀭𑁂 𑀲𑀢𑁆𑀢 𑀫𑀸𑀲𑀸 𑀧𑀺𑀝𑁆𑀞𑀺𑀲𑀫𑀬𑁄, 𑀢𑀢𑁆𑀣 𑀲𑀢𑀼𑀧𑁆𑀧𑀸𑀤𑀓𑀭𑀡𑀁 𑀦 𑀯𑀝𑁆𑀝𑀢𑀺.

(𑀕) 𑀅𑀘𑁆𑀙𑀺𑀦𑁆𑀦𑀦𑁆𑀢𑀺 𑀏𑀢𑁆𑀣 ‘‘𑀬𑁄 𑀧𑀦 𑀫𑀫 𑀧𑀢𑁆𑀢𑀘𑀻𑀯𑀭𑀸𑀤𑀻𑀦𑀺 𑀯𑀳𑀦𑁆𑀢𑁄 𑀫𑀬𑀸 𑀲𑀤𑁆𑀥𑀺𑀁 𑀘𑀭𑀺𑀲𑁆𑀲𑀢𑀻’’𑀢𑀺 𑀲𑀜𑁆𑀜𑀸𑀬 𑀘𑀻𑀯𑀭𑀁 𑀤𑀢𑁆𑀯𑀸 𑀧𑀼𑀦 𑀲𑀓𑀲𑀜𑁆𑀜𑀸𑀬 𑀏𑀯 𑀅𑀢𑁆𑀢𑀦𑁄 𑀯𑁂𑀬𑁆𑀬𑀸𑀯𑀘𑁆𑀘𑀁 𑀅𑀓𑀭𑁄𑀦𑁆𑀢𑀁 𑀤𑀺𑀲𑁆𑀯𑀸 𑀅𑀘𑁆𑀙𑀺𑀦𑁆𑀤𑀢𑀺, 𑀲𑁄 𑀇𑀫𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀓𑁂𑀯𑀮𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀤𑀺𑀦𑁆𑀦𑀁 𑀕𑀳𑁂𑀢𑀼𑀫𑁂𑀯 𑀦 𑀮𑀪𑀢𑀺.

(𑀖) 𑀲𑀼𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀢𑀺 𑀏𑀢𑁆𑀣 𑀘𑀻𑀯𑀭𑀓𑀸𑀭𑀲𑀫𑀬𑀸𑀤𑀻𑀲𑀼 𑀘𑀻𑀯𑀭𑀲𑀺𑀩𑁆𑀩𑀦𑀸𑀤𑀻𑀦𑀫𑀢𑁆𑀣𑀸𑀬 𑀲𑀼𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀣𑀸 𑀲𑀼𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀢𑀼𑀫𑁂𑀯 𑀦 𑀯𑀝𑁆𑀝𑀢𑀺. 𑀯𑀺𑀜𑁆𑀜𑀢𑁆𑀢𑀺𑀬𑀸 𑀏𑀯 𑀮𑀤𑁆𑀥𑀢𑀦𑁆𑀢𑀯𑀸𑀬𑁂𑀳𑀻𑀢𑀺 𑀅𑀢𑁆𑀣𑁄. 𑀲𑀼𑀢𑁆𑀢𑀢𑀦𑁆𑀢𑀯𑀸𑀬𑀸𑀦𑀁 𑀅𑀓𑀧𑁆𑀧𑀺𑀬𑀪𑀸𑀯𑁂 𑀲𑀢𑀺 𑀤𑀻𑀖𑀢𑁄 𑀯𑀺𑀤𑀢𑁆𑀣𑀺𑀫𑀢𑁆𑀢𑁂, 𑀢𑀺𑀭𑀺𑀬𑀦𑁆𑀢𑀢𑁄 𑀳𑀢𑁆𑀣𑀫𑀢𑁆𑀢𑁂 𑀯𑀻𑀢𑁂 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀏𑀓𑀢𑁄 𑀅𑀓𑀧𑁆𑀧𑀺𑀬𑀧𑀓𑁆𑀔𑁂 𑀤𑀼𑀓𑁆𑀓𑀝𑀁.

(𑀗) 𑀯𑀺𑀓𑀧𑁆𑀧𑀁 𑀆𑀧𑀦𑁆𑀦𑀦𑁆𑀢𑀺 (𑀧𑀸𑀭𑀸. 𑁬𑁪𑁩) ‘‘𑀇𑀤𑀁 𑀔𑁄, 𑀆𑀯𑀼𑀲𑁄, 𑀘𑀻𑀯𑀭𑀁 𑀫𑀁 𑀉𑀤𑁆𑀤𑀺𑀲𑁆𑀲 𑀯𑀺𑀬𑁆𑀬𑀢𑀺, 𑀆𑀬𑀢𑀜𑁆𑀘 𑀓𑀭𑁄𑀣 𑀯𑀺𑀢𑁆𑀣𑀢𑀜𑁆𑀘𑀸’’𑀢𑀺𑀆𑀤𑀺𑀦𑀸 𑀅𑀥𑀺𑀓𑀁 𑀯𑀺𑀥𑀸𑀦𑀁 𑀆𑀧𑀦𑁆𑀦𑀦𑁆𑀢𑀺 𑀅𑀢𑁆𑀣𑁄.

(𑀘) 𑀅𑀘𑁆𑀘𑁂𑀓𑀘𑀻𑀯𑀭𑀁 (𑀧𑀸𑀭𑀸. 𑁬𑁪𑁯-𑁬𑁫𑁦) 𑀦𑀸𑀫 𑀲𑁂𑀦𑀸𑀬 𑀕𑀦𑁆𑀢𑀼𑀓𑀸𑀫𑀸𑀤𑀻𑀳𑀺 𑀤𑀺𑀦𑁆𑀦𑀁.

(𑀙) 𑀅𑀢𑀺𑀭𑁂𑀓𑀙𑀸𑀭𑀢𑁆𑀢𑀦𑁆𑀢𑀺 (𑀧𑀸𑀭𑀸. 𑁬𑁫𑁪-𑁬𑁫𑁫) 𑀙𑀤𑀺𑀯𑀲𑀢𑁄 𑀅𑀢𑀺𑀭𑁂𑀓𑀁. ‘‘𑀅𑀢𑁆𑀣𑀢𑀓𑀣𑀺𑀦𑀸𑀦𑀁 𑀯𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀓𑀧𑁆𑀧𑀺𑀲𑁆𑀲𑀦𑁆𑀢𑀺, 𑀅𑀦𑀸𑀫𑀦𑁆𑀢𑀘𑀸𑀭𑁄 𑀅𑀲𑀫𑀸𑀤𑀸𑀦𑀘𑀸𑀭𑁄 𑀕𑀡𑀪𑁄𑀚𑀦𑀁 𑀬𑀸𑀯𑀤𑀢𑁆𑀣𑀘𑀻𑀯𑀭𑀁 𑀬𑁄 𑀘 𑀢𑀢𑁆𑀣 𑀘𑀻𑀯𑀭𑀼𑀧𑁆𑀧𑀸𑀤𑁄, 𑀲𑁄 𑀦𑁂𑀲𑀁 𑀪𑀯𑀺𑀲𑁆𑀲𑀢𑀻’’𑀢𑀺 (𑀫𑀳𑀸𑀯. 𑁩𑁦𑁬) 𑀯𑀼𑀢𑁆𑀢𑀆𑀦𑀺𑀲𑀁𑀲𑁂𑀲𑀼 𑀘𑀻𑀯𑀭𑀫𑀸𑀲𑁂 𑀅𑀲𑀫𑀸𑀤𑀸𑀦𑀘𑀸𑀭𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀺𑀲𑀁𑀲𑀸 𑀮𑀩𑁆𑀪𑀦𑁆𑀢𑀺. 𑀬𑀤𑀺 𑀅𑀲𑀫𑀸𑀤𑀸𑀦𑀘𑀸𑀭𑁄 𑀮𑀩𑁆𑀪𑁂𑀬𑁆𑀬, 𑀧𑀸𑀯𑁂𑀬𑁆𑀬𑀓𑀸 𑀪𑀺𑀓𑁆𑀔𑀽 𑀯𑀲𑁆𑀲𑀁𑀯𑀼𑀢𑁆𑀣𑀸 𑀑𑀓𑀧𑀼𑀡𑁆𑀡𑁂𑀳𑀺 𑀘𑀻𑀯𑀭𑁂𑀳𑀺 𑀦 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑁂𑀬𑁆𑀬𑀼𑀁, 𑀬𑀲𑁆𑀫𑀸 𑀢𑀁 𑀦 𑀮𑀪𑀦𑁆𑀢𑀺, 𑀢𑀲𑁆𑀫𑀸 𑀘𑀻𑀯𑀭𑀫𑀸𑀲𑁂𑀧𑀺 𑀢𑀺𑀘𑀻𑀯𑀭𑀁 𑀆𑀤𑀸𑀬 𑀏𑀯 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀢𑀲𑁆𑀫𑀸 𑀯𑁂𑀤𑀺𑀢𑀩𑁆𑀩𑀁 𑀅𑀲𑀫𑀸𑀤𑀸𑀦𑀘𑀸𑀭𑀧𑀭𑀺𑀳𑀸𑀭𑀁 𑀅𑀢𑁆𑀣𑀢𑀓𑀣𑀺𑀦𑀸 𑀏𑀯 𑀮𑀪𑀦𑁆𑀢𑀺, 𑀦 𑀇𑀢𑀭𑁂𑀢𑀺 𑀯𑀤𑀦𑁆𑀢𑀺.

𑁩𑁯𑁭. (𑀔) ‘‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀧𑀸𑀝𑀺𑀤𑁂𑀲𑀦𑀻𑀬𑀸𑀧𑀢𑁆𑀢𑀺𑀁, 𑀤𑁆𑀯𑁂, 𑀲𑀫𑁆𑀩𑀳𑀼𑀮𑀸 𑀧𑀸𑀝𑀺𑀤𑁂𑀲𑀦𑀻𑀬𑀸𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺’’𑀦𑁆𑀢𑀺 𑀇𑀫𑀁 𑀧𑀦 𑀬𑁂𑀲𑀼 𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀺𑀢𑀁, 𑀢𑀁 𑀅𑀪𑀬𑀕𑀺𑀭𑀺𑀯𑀸𑀲𑀻𑀦𑀁 𑀔𑀼𑀤𑁆𑀤𑀲𑀺𑀓𑁆𑀔𑀸𑀯𑀲𑁂𑀦 𑀤𑀲𑁆𑀲𑀺𑀢𑀁 𑀓𑀺𑀭. 𑀢𑀢𑁆𑀣 ‘‘𑀅𑀳𑀁, 𑀆𑀬𑀲𑁆𑀫𑀸, 𑀲𑀫𑁆𑀩𑀳𑀼𑀮𑀸 𑀧𑀸𑀝𑀺𑀤𑁂𑀲𑀦𑀻𑀬𑀸 𑀆𑀧𑀢𑁆𑀢𑀺𑀬𑁄 𑀆𑀧𑀦𑁆𑀦𑁄, 𑀢𑀸𑀬𑁄 𑀧𑀝𑀺𑀤𑁂𑀲𑁂𑀫𑀺. 𑀅𑀳𑀁, 𑀆𑀬𑀲𑁆𑀫𑀸, 𑀏𑀓𑀁 𑀧𑀸𑀝𑀺𑀤𑁂𑀲𑀦𑀻𑀬𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄, 𑀢𑀁 𑀧𑀝𑀺𑀤𑁂𑀲𑁂𑀫𑀻’’𑀢𑀺 𑀳𑀺 𑀯𑀼𑀢𑁆𑀢𑀁. 𑀅𑀫𑁆𑀳𑀸𑀓𑀁 𑀧𑀦 𑀏𑀯𑀁 𑀤𑁂𑀲𑀦𑀸𑀯𑀺𑀥𑀸𑀦𑀁 𑀦𑀢𑁆𑀣𑀺. ‘‘𑀕𑀸𑀭𑀬𑁆𑀳𑀁, 𑀆𑀯𑀼𑀲𑁄, 𑀥𑀫𑁆𑀫𑀁 𑀆𑀧𑀚𑁆𑀚𑀺𑀁 𑀅𑀲𑀧𑁆𑀧𑀸𑀬𑀁 𑀧𑀸𑀝𑀺𑀤𑁂𑀲𑀦𑀻𑀬𑀁, 𑀢𑀁 𑀧𑀝𑀺𑀤𑁂𑀲𑁂𑀫𑀻’’𑀢𑀺 (𑀧𑀸𑀘𑀺. 𑁫𑁫𑁩) 𑀯𑀼𑀢𑁆𑀢𑀁. 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀧𑀸𑀘𑀺. 𑁫𑁫𑁩) ‘‘𑀕𑀸𑀭𑀬𑁆𑀳𑀁 𑀆𑀯𑀼𑀲𑁄’𑀢𑀺𑀆𑀤𑀺 𑀧𑀝𑀺𑀤𑁂𑀲𑁂𑀢𑀩𑁆𑀩𑀸𑀓𑀸𑀭𑀤𑀲𑁆𑀲𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀫𑁆𑀧𑀺 (𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀢𑀲𑁆𑀲𑀸 𑀤𑁂𑀲𑁂𑀢𑀩𑁆𑀩𑀸𑀓𑀸𑀭𑁄 𑀕𑀸𑀭𑀬𑁆𑀳𑀁 𑀆𑀯𑀼𑀲𑁄’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀺𑀓𑁆𑀔𑀸𑀧𑀤𑁂 𑀤𑀲𑁆𑀲𑀺𑀢𑁄𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀸𑀞𑁂 𑀆𑀕𑀢𑀦𑀬𑁂𑀦𑁂𑀯 𑀤𑁂𑀲𑀦𑀸𑀯𑀺𑀥𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀘𑁂 𑀤𑁆𑀯𑁂 𑀳𑁄𑀦𑁆𑀢𑀺, ‘‘𑀕𑀸𑀭𑀬𑁆𑀳𑁂, 𑀆𑀯𑀼𑀲𑁄, 𑀤𑁆𑀯𑁂 𑀥𑀫𑁆𑀫𑁂 𑀆𑀧𑀚𑁆𑀚𑀺𑀁 𑀅𑀲𑀧𑁆𑀧𑀸𑀬𑁂 𑀧𑀸𑀝𑀺𑀤𑁂𑀲𑀦𑀻𑀬𑁂, 𑀢𑁂 𑀧𑀝𑀺𑀤𑁂𑀲𑁂𑀫𑀻’’𑀢𑀺, ‘‘𑀧𑀲𑁆𑀲𑀣, 𑀪𑀦𑁆𑀢𑁂, 𑀢𑁂 𑀥𑀫𑁆𑀫𑁂’’𑀢𑀺 𑀘 ‘‘𑀕𑀸𑀭𑀬𑁆𑀳𑁂, 𑀆𑀯𑀼𑀲𑁄, 𑀲𑀫𑁆𑀩𑀳𑀼𑀮𑁂 𑀥𑀫𑁆𑀫𑁂 𑀆𑀧𑀚𑁆𑀚𑀺𑀁 𑀅𑀲𑀧𑁆𑀧𑀸𑀬𑁂 𑀧𑀸𑀝𑀺𑀤𑁂𑀲𑀦𑀻𑀬𑁂, 𑀢𑁂 𑀧𑀝𑀺𑀤𑁂𑀲𑁂𑀫𑀻’’𑀢𑀺, ‘‘𑀧𑀲𑁆𑀲𑀣, 𑀪𑀦𑁆𑀢𑁂, 𑀢𑁂 𑀥𑀫𑁆𑀫𑁂’’𑀢𑀺 𑀘 𑀏𑀯𑀁 𑀬𑀣𑀸𑀦𑀼𑀭𑀽𑀧𑀁 𑀤𑁂𑀲𑀦𑀸𑀯𑀺𑀥𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯𑀸𑀢𑀺.

𑁩𑁯𑁮. 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀦𑁆𑀢𑀺 (𑀧𑀭𑀺. 𑁪𑁨𑁪 𑀆𑀤𑀬𑁄; 𑀧𑀭𑀺. 𑀅𑀝𑁆𑀞. 𑁪𑁨𑁫) 𑀧𑀸𑀭𑀸𑀚𑀺𑀓𑀜𑁆𑀘 𑀲𑀗𑁆𑀖𑀸𑀤𑀺𑀲𑁂𑀲𑀜𑁆𑀘 𑀦 𑀤𑁂𑀲𑀬𑁂𑀢𑀺 𑀅𑀢𑁆𑀣𑁄. 𑀅𑀦𑀸𑀧𑀢𑁆𑀢𑀺𑀜𑁆𑀘𑀸𑀢𑀺 𑀅𑀦𑀸𑀧𑀢𑁆𑀢𑀺𑀁 𑀏𑀯 ‘‘𑀆𑀧𑀢𑁆𑀢𑀺’’𑀦𑁆𑀢𑀺 𑀦 𑀤𑁂𑀲𑀬𑁂. 𑀮𑀳𑀼𑀓𑀸𑀧𑀢𑁆𑀢𑀺𑀫𑁆𑀧𑀺 𑀧𑀼𑀩𑁆𑀩𑁂 𑀤𑁂𑀲𑀺𑀢𑀁 𑀧𑀼𑀦 𑀦 𑀤𑁂𑀲𑀬𑁂𑀢𑀺 𑀲𑀫𑁆𑀩𑀦𑁆𑀥𑁄, 𑀦𑀸𑀦𑀸𑀲𑀁𑀯𑀸𑀲𑀦𑀺𑀲𑁆𑀲𑀻𑀫𑀝𑁆𑀞𑀺𑀢𑀸𑀦𑀁 𑀲𑀦𑁆𑀢𑀺𑀓𑁂 𑀦 𑀤𑁂𑀲𑀬𑁂𑀢𑀺 𑀅𑀢𑁆𑀣𑁄. 𑀘𑀢𑀼𑀧𑀜𑁆𑀘𑀳𑀻𑀢𑀺 𑀏𑀢𑁆𑀣 𑀲𑀫𑀸𑀦𑀯𑀲𑁆𑀲𑀺𑀓𑀧𑀯𑀸𑀭𑀡𑀸𑀬𑀁 𑀯𑀺𑀬 𑀘𑀢𑀽𑀳𑀺 𑀯𑀸 𑀧𑀜𑁆𑀘𑀳𑀺 𑀯𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀦 𑀤𑁂𑀲𑀬𑁂𑀢𑀺 𑀅𑀢𑁆𑀣𑁄. 𑀤𑁆𑀯𑀺𑀦𑁆𑀦𑀁 𑀯𑀸 𑀢𑀺𑀡𑁆𑀡𑀁 𑀯𑀸 𑀯𑀝𑁆𑀝𑀢𑀺. 𑀓𑀣𑀁 𑀤𑁂𑀲𑁂𑀢𑀩𑁆𑀩𑀦𑁆𑀢𑀺 𑀘𑁂? 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀢𑀻𑀳𑀺𑀧𑀺 𑀏𑀓𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁, 𑀢𑀁 𑀢𑀼𑀫𑁆𑀳𑀫𑀽𑀮𑁂 𑀧𑀝𑀺𑀤𑁂𑀲𑁂𑀫𑀻’’𑀢𑀺 𑀏𑀯𑀁 𑀅𑀢𑁆𑀢𑀦𑀸 𑀆𑀧𑀦𑁆𑀦𑀆𑀧𑀢𑁆𑀢𑀺𑀯𑀲𑁂𑀦 𑀯𑀼𑀢𑁆𑀢𑁂 𑀢𑁂𑀦 ‘‘𑀧𑀲𑁆𑀲𑀲𑀺, 𑀆𑀯𑀼𑀲𑁄, 𑀢𑀁 𑀆𑀧𑀢𑁆𑀢𑀺’’𑀦𑁆𑀢𑀺 𑀏𑀯𑀁 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑁂 ‘‘𑀆𑀫, 𑀪𑀦𑁆𑀢𑁂, 𑀧𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀆𑀫𑀸𑀯𑀼𑀲𑁄 𑀧𑀲𑁆𑀲𑀸𑀫𑀻’’𑀢𑀺 𑀯𑀸 𑀯𑀼𑀢𑁆𑀢𑁂 𑀧𑀼𑀦 𑀢𑁂𑀦 ‘‘𑀆𑀬𑀢𑀺𑀁 𑀲𑀁𑀯𑀭𑁂𑀬𑁆𑀬𑀸𑀣𑀸’’𑀢𑀺 𑀯𑀸 ‘‘𑀲𑀁𑀯𑀭𑁂𑀬𑁆𑀬𑀸𑀲𑀻’’𑀢𑀺 𑀯𑀸 𑀯𑀼𑀢𑁆𑀢𑁂 ‘‘𑀲𑀸𑀥𑀼 𑀲𑀼𑀝𑁆𑀞𑀼 𑀲𑀁𑀯𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁, 𑀏𑀯𑀁 𑀤𑁂𑀲𑁂𑀢𑀩𑁆𑀩𑀁. 𑀫𑀦𑀲𑀸𑀢𑀺 𑀯𑀘𑀻𑀪𑁂𑀤𑀁 𑀅𑀓𑀢𑁆𑀯𑀸 𑀓𑁂𑀯𑀮𑀁 𑀘𑀺𑀢𑁆𑀢𑁂𑀦𑁂𑀯 𑀦 𑀤𑁂𑀲𑀬𑁂𑀢𑀺 𑀅𑀢𑁆𑀣𑁄. 𑀅𑀧𑀓𑀢𑀢𑁆𑀢𑀸𑀦𑀦𑁆𑀢𑀺 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀲𑁆𑀲 𑀯𑀸 𑀉𑀓𑁆𑀔𑀺𑀢𑁆𑀢𑀓𑀲𑁆𑀲 𑀯𑀸 𑀉𑀧𑁄𑀲𑀣𑁄 𑀧𑀯𑀸𑀭𑀡𑀸 𑀯𑀸 𑀞𑀧𑀺𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀦 𑀤𑁂𑀲𑀬𑁂𑀢𑀺 𑀅𑀢𑁆𑀣𑁄. 𑀦𑀸𑀦𑁂𑀓𑀸𑀢𑀺 𑀦𑀸𑀦𑀸𑀧𑀢𑁆𑀢𑀺𑀬𑁄 ‘‘𑀏𑀓𑀸’’𑀢𑀺 𑀯𑀢𑁆𑀯𑀸 𑀦 𑀤𑁂𑀲𑀬𑁂𑀢𑀺 𑀅𑀢𑁆𑀣𑁄. 𑀏𑀓𑀸 𑀧𑀦 ‘‘𑀲𑀫𑁆𑀩𑀳𑀼𑀮𑀸’’𑀢𑀺 𑀤𑁂𑀲𑀺𑀢𑀸 𑀳𑁄𑀢𑀻𑀢𑀺. 𑀤𑁂𑀲𑀦𑀸𑀯𑀺𑀦𑀺𑀘𑁆𑀙𑀬𑁄.

𑀤𑁂𑀲𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.