𑁪𑁦. 𑀅𑀯𑁂𑀪𑀗𑁆𑀕𑀺𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁨𑁨-𑁪. 𑀆𑀭𑀸𑀫𑀸𑀭𑀸𑀫𑀯𑀢𑁆𑀣𑀽𑀦𑀻𑀢𑀺 𑀏𑀢𑁆𑀣 (𑀘𑀽𑀴𑀯. 𑁩𑁨𑁧; 𑀘𑀽𑀴𑀯. 𑀅𑀝𑁆𑀞. 𑁩𑁨𑁧) 𑀆𑀭𑀸𑀫𑁄 𑀦𑀸𑀫 𑀧𑀼𑀧𑁆𑀨𑀸𑀭𑀸𑀫𑁄 𑀯𑀸 𑀨𑀮𑀸𑀭𑀸𑀫𑁄 𑀯𑀸. 𑀫𑀜𑁆𑀘𑁄 𑀧𑀻𑀞𑀁 𑀪𑀺𑀲𑀺 𑀩𑀺𑀩𑁆𑀩𑁄𑀳𑀦𑀸𑀤𑀺𑀲𑀬𑀦𑀸𑀲𑀦𑀁. 𑀮𑁄𑀳𑀓𑀼𑀫𑁆𑀪𑀻𑀆𑀤𑀬𑁄 𑀓𑀸𑀴𑀮𑁄𑀳𑀢𑀫𑁆𑀩𑀮𑁄𑀳𑀸𑀤𑀺𑀫𑀬𑀸. 𑀪𑀸𑀡𑀓𑁄 𑀉𑀤𑀓𑀘𑀸𑀝𑀺. 𑀧𑀜𑁆𑀘𑁂𑀢𑁂 𑀅𑀯𑀺𑀪𑀸𑀚𑀺𑀬𑀸𑀢𑀺 𑀪𑀸𑀚𑁂𑀢𑁆𑀯𑀸 𑀦 𑀕𑀳𑁂𑀢𑀩𑁆𑀩𑀸, 𑀕𑀳𑀺𑀢𑀸𑀧𑀺 𑀲𑀗𑁆𑀖𑀲𑀦𑁆𑀢𑀓𑀸 𑀏𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀧𑀦 𑀆𑀭𑀸𑀫𑁄 𑀆𑀭𑀸𑀫𑀯𑀢𑁆𑀣𑀽𑀢𑀺 𑀧𑀞𑀫𑀁, 𑀯𑀺𑀳𑀸𑀭𑁄 𑀯𑀺𑀳𑀸𑀭𑀯𑀢𑁆𑀣𑀽𑀢𑀺 𑀤𑀼𑀢𑀺𑀬𑀁, 𑀫𑀜𑁆𑀘𑁄 𑀧𑀻𑀞𑀁 𑀪𑀺𑀲𑀺 𑀩𑀺𑀩𑁆𑀩𑁄𑀳𑀦𑀦𑁆𑀢𑀺 𑀢𑀢𑀺𑀬𑀁, 𑀮𑁄𑀳𑀓𑀼𑀫𑁆𑀪𑀻…𑀧𑁂… 𑀦𑀺𑀔𑀸𑀤𑀦𑀦𑁆𑀢𑀺 𑀘𑀢𑀼𑀢𑁆𑀣𑀁, 𑀯𑀮𑁆𑀮𑀺…𑀧𑁂… 𑀤𑀸𑀭𑀼𑀪𑀡𑁆𑀟𑀁 𑀫𑀢𑁆𑀢𑀺𑀓𑀪𑀡𑁆𑀟𑀦𑁆𑀢𑀺 𑀧𑀜𑁆𑀘𑀫𑀦𑁆𑀢𑀺 𑀏𑀯𑀁 𑀇𑀫𑀸𑀦𑀺 𑀭𑀸𑀲𑀺𑀯𑀲𑁂𑀦 𑀧𑀜𑁆𑀘 𑀳𑁄𑀦𑁆𑀢𑀺, 𑀲𑀭𑀼𑀧𑀯𑀲𑁂𑀦 𑀅𑀦𑁂𑀓𑀸𑀦𑀺 𑀳𑁄𑀦𑁆𑀢𑀺. 𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

‘‘𑀤𑁆𑀯𑀺𑀲𑀗𑁆𑀕𑀳𑀸𑀦𑀺 𑀤𑁆𑀯𑁂 𑀳𑁄𑀦𑁆𑀢𑀺, 𑀢𑀢𑀺𑀬𑀁 𑀘𑀢𑀼𑀲𑀗𑁆𑀕𑀳𑀁;

𑀘𑀢𑀼𑀢𑁆𑀣𑀁 𑀦𑀯𑀓𑁄𑀝𑁆𑀞𑀸𑀲𑀁, 𑀧𑀜𑁆𑀘𑀫𑀁 𑀅𑀝𑁆𑀞𑀪𑁂𑀤𑀦’’𑀦𑁆𑀢𑀺. (𑀘𑀽𑀴𑀯. 𑀅𑀝𑁆𑀞. 𑁩𑁨𑁧);

𑁩𑁨𑁫. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀯𑀺𑀲𑁆𑀲𑀚𑁆𑀚𑀺𑀬𑀸𑀦𑀺 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸𑀦𑀺 𑀲𑀗𑁆𑀖𑁂𑀦 𑀯𑀸 𑀕𑀡𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸, 𑀯𑀺𑀲𑁆𑀲𑀚𑁆𑀚𑀺𑀢𑀸𑀦𑀺𑀧𑀺 𑀅𑀯𑀺𑀲𑁆𑀲𑀚𑁆𑀚𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀬𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀘𑀽𑀴𑀯. 𑁩𑁨𑁧) 𑀯𑀼𑀢𑁆𑀢𑀢𑁆𑀢𑀸 ‘‘𑀪𑀸𑀚𑀺𑀢𑀸𑀧𑀺 𑀅𑀪𑀸𑀚𑀺𑀢𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑁂𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀧𑀜𑁆𑀘𑀧𑀺 ‘‘𑀕𑀭𑀼𑀪𑀡𑁆𑀟𑀸𑀦𑀻’’𑀢𑀺 𑀘 ‘‘𑀅𑀯𑀺𑀲𑁆𑀲𑀚𑁆𑀚𑀺𑀬𑀸𑀦𑀻’’𑀢𑀺 𑀘 𑀘-𑀲𑀤𑁆𑀤𑁂𑀦 ‘‘𑀅𑀯𑁂𑀪𑀗𑁆𑀕𑀺𑀬𑀸𑀦𑀻’’𑀢𑀺 𑀘 𑀯𑀼𑀘𑁆𑀘𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁩𑁨𑁬-𑁮. 𑀇𑀤𑀸𑀦𑀺 𑀧𑀼𑀭𑀺𑀫𑁂𑀲𑀼 𑀢𑀻𑀲𑀼 𑀭𑀸𑀲𑀻𑀲𑀼 𑀲𑀩𑁆𑀩𑀲𑁆𑀲 𑀕𑀭𑀼𑀪𑀡𑁆𑀟𑀢𑁆𑀢𑀸 𑀢𑁂 𑀅𑀦𑀸𑀫𑀲𑀺𑀢𑁆𑀯𑀸 𑀧𑀘𑁆𑀙𑀺𑀫𑁂𑀲𑀼 𑀤𑁆𑀯𑀻𑀲𑀼 𑀭𑀸𑀲𑀻𑀲𑀼 𑀏𑀓𑀘𑁆𑀘𑀲𑁆𑀲 𑀅𑀕𑀭𑀼𑀪𑀡𑁆𑀟𑀲𑁆𑀲𑀸𑀧𑀺 𑀅𑀢𑁆𑀣𑀺𑀢𑀸𑀬 𑀢𑀁 𑀤𑀲𑁆𑀲𑁂𑀢𑀼𑀁 𑀆𑀭𑀪𑀦𑁆𑀢𑁄𑀧𑀺 𑀢𑁂𑀲𑀼 𑀤𑁆𑀯𑀻𑀲𑀼 𑀩𑀳𑀼𑀯𑀺𑀲𑀬𑀁 𑀧𑀞𑀫𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀮𑁆𑀮𑀺𑀟𑁆𑀠𑀩𑀸𑀳𑀼𑀫𑀢𑁆𑀢𑀸𑀧𑀻’’𑀢𑀺𑀆𑀤𑀺𑀫𑀸𑀳𑀸𑀢𑀺 𑀜𑀸𑀢𑀩𑁆𑀩𑀁. 𑀢𑀲𑁆𑀲𑀸𑀬𑀁 𑀲𑀗𑁆𑀔𑁂𑀧𑁄 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) 𑁋 𑀯𑀮𑁆𑀮𑀺 𑀅𑀟𑁆𑀠𑀩𑀸𑀳𑀼𑀫𑀢𑁆𑀢𑀸𑀧𑀺 𑀯𑁂𑀴𑀼 𑀅𑀝𑁆𑀞𑀗𑁆𑀕𑀼𑀮𑀸𑀬𑀢𑁄𑀧𑀺 𑀢𑀺𑀡𑀸𑀤𑀺 𑀫𑀼𑀝𑁆𑀞𑀺𑀫𑀢𑁆𑀢𑀫𑁆𑀧𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀫𑀼𑀜𑁆𑀚𑀧𑀩𑁆𑀩𑀚𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀧𑀡𑁆𑀡𑀁 𑀏𑀓𑀫𑁆𑀧𑀺 𑀫𑀢𑁆𑀢𑀺𑀓𑀸 𑀧𑀸𑀓𑀢𑀸 𑀯𑀸 𑀧𑀜𑁆𑀘𑀯𑀡𑁆𑀡𑀸 𑀯𑀸 𑀲𑀼𑀥𑀸𑀓𑀗𑁆𑀕𑀼𑀝𑁆𑀞𑀆𑀤𑀺𑀓𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀚𑁆𑀚𑀼𑀮𑀲𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑀸𑀤𑀺 𑀯𑀸 𑀢𑀸𑀮𑀧𑀓𑁆𑀓𑀧𑁆𑀧𑀫𑀸𑀡𑀸𑀧𑀺 𑀬𑁂𑀳𑀺 𑀓𑁂𑀳𑀺𑀘𑀺 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀸 𑀯𑀸 𑀲𑀗𑁆𑀖𑀺𑀓𑁂 𑀢𑀺𑀡𑀔𑁂𑀢𑁆𑀢𑀸𑀤𑀺𑀫𑁆𑀳𑀺 𑀚𑀸𑀢𑀸 𑀯𑀸 𑀭𑀓𑁆𑀔𑀺𑀢𑀕𑁄𑀧𑀺𑀢𑀪𑀽𑀫𑀺𑀪𑀸𑀕𑁂 𑀉𑀧𑁆𑀧𑀦𑁆𑀦𑀸 𑀢𑀢𑁆𑀣𑀚𑀸𑀢𑀓𑀸 𑀯𑀸 𑀲𑀗𑁆𑀖𑀺𑀓𑀸 𑀭𑀓𑁆𑀔𑀺𑀢𑀸 𑀏𑀯 𑀅𑀪𑀸𑀚𑀺𑀬𑀸𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀬𑁂 𑀘𑁂𑀢𑁆𑀣 𑀪𑀸𑀚𑀺𑀢𑀩𑁆𑀩𑀸, 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀝𑁆𑀞𑀺𑀢𑁂’’𑀢𑀺𑀆𑀤𑀺𑀫𑀸𑀳, 𑀲𑀗𑁆𑀖𑀲𑁆𑀲 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀓𑀫𑁆𑀫𑁂 𑀦𑀺𑀝𑁆𑀞𑀺𑀢𑁂 𑀪𑀸𑀚𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣 𑀧𑀦 𑀬𑀁 𑀓𑀺𑀜𑁆𑀘𑀺 𑀯𑀮𑁆𑀮𑀺𑀯𑁂𑀴𑀼𑀢𑀺𑀡𑀧𑀡𑁆𑀡𑀫𑀢𑁆𑀢𑀺𑀓𑀸𑀤𑀺 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀯𑀸 𑀲𑀗𑁆𑀖𑀺𑀓𑁂 𑀢𑀺𑀡𑀔𑁂𑀢𑁆𑀢𑀸𑀤𑀺𑀫𑁆𑀳𑀺 𑀚𑀸𑀢𑀓𑀁 𑀯𑀸 𑀭𑀓𑁆𑀔𑀺𑀢𑀕𑁄𑀧𑀺𑀢𑀁 𑀕𑀭𑀼𑀪𑀡𑁆𑀟𑀁, 𑀢𑀁 𑀲𑀗𑁆𑀖𑀓𑀫𑁆𑀫𑁂 𑀘 𑀘𑁂𑀢𑀺𑀬𑀓𑀫𑁆𑀫𑁂 𑀘 𑀦𑀺𑀝𑁆𑀞𑀺𑀢𑁂 𑀅𑀯𑀲𑁂𑀲𑀁 𑀧𑀼𑀕𑁆𑀕𑀮𑀺𑀓𑀓𑀫𑁆𑀫𑁂𑀧𑀺 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀅𑀕𑀭𑀼𑀪𑀡𑁆𑀟𑀢𑁆𑀢𑀸 𑀪𑀸𑀚𑀺𑀢𑀼𑀫𑁆𑀧𑀺 𑀮𑀩𑁆𑀪𑀢𑀺. 𑀲𑁂𑀦𑀸𑀲𑀦𑀢𑁆𑀣𑀸𑀬 𑀭𑀓𑁆𑀔𑀺𑀢𑀕𑁄𑀧𑀺𑀢𑀫𑁂𑀯 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺, 𑀦 𑀇𑀢𑀭𑀁. 𑀲𑀻𑀳𑀴𑀤𑀻𑀧𑁂 𑀢𑀼𑀫𑀽𑀮𑀲𑁄𑀫𑀯𑀺𑀳𑀸𑀭𑁂 𑀲𑀗𑁆𑀖𑀲𑁆𑀲 𑀧𑀸𑀓𑀯𑀢𑁆𑀢𑀫𑁆𑀧𑀺 𑀢𑀸𑀮𑀧𑀡𑁆𑀡𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀓𑀭𑀻𑀬𑀢𑀺. 𑀓𑀲𑁆𑀫𑀸? 𑀦 𑀳𑀺 𑀢𑀢𑁆𑀣 𑀧𑀡𑁆𑀡𑁂𑀦 𑀅𑀢𑁆𑀣𑁄 𑀅𑀢𑁆𑀣𑀺, 𑀲𑀩𑁆𑀩𑁂𑀧𑀺 𑀇𑀝𑁆𑀞𑀓𑀘𑁆𑀙𑀦𑁆𑀦𑀸 𑀧𑀸𑀲𑀸𑀤𑀸𑀤𑀬𑁄𑀢𑀺. 𑀏𑀯𑀁 𑀅𑀜𑁆𑀜𑀢𑁆𑀣𑀸𑀧𑀺 𑀓𑀭𑀻𑀬𑀢𑀺 𑀏𑀯𑀸𑀢𑀺 𑀯𑀤𑀦𑁆𑀢𑀺.

𑁩𑁨𑁯. 𑀇𑀤𑀸𑀦𑀺 𑀮𑁄𑀳𑀪𑀡𑁆𑀟𑀸𑀤𑀻𑀲𑀼 𑀏𑀓𑀦𑁆𑀢𑀪𑀸𑀚𑁂𑀢𑀩𑁆𑀩𑀪𑀡𑁆𑀟𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀢𑁆𑀢𑀸𑀤𑀻’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 (𑀘𑀽𑀴𑀯. 𑀅𑀝𑁆𑀞. 𑁨𑁨𑁧) 𑀧𑀦 𑀆𑀤𑀺-𑀲𑀤𑁆𑀤𑁂𑀦 𑀮𑁄𑀳𑀣𑀸𑀮𑀓𑀢𑀫𑁆𑀩 𑀓𑀼𑀡𑁆𑀟𑀺𑀓𑀸 𑀓𑀝𑀘𑁆𑀙𑀼 𑀲𑀭𑀓 𑀅𑀜𑁆𑀚𑀦𑀺 𑀅𑀜𑁆𑀚𑀦𑀺𑀲𑀮𑀸𑀓𑀸𑀓𑀡𑁆𑀡𑀫𑀮𑀳𑀭𑀡𑀻𑀲𑀽𑀘𑀺𑀲𑀡𑁆𑀟𑀸𑀲𑀓𑀢𑁆𑀢𑀭𑀬𑀝𑁆𑀞𑀺𑀆𑀤𑀻𑀦𑀺 𑀕𑀳𑀺𑀢𑀸𑀦𑁂𑀯. 𑀢𑀣𑀸𑀢𑀺 𑀪𑀸𑀚𑀺𑀬𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀧𑁆𑀧𑀓𑀢𑀜𑁆𑀘 𑀅𑀯𑀺𑀧𑁆𑀧𑀓𑀢𑀜𑁆𑀘. 𑀧𑀸𑀤𑀕𑀡𑁆𑀳𑀓𑀦𑁆𑀢𑀺 𑀫𑀕𑀥𑀦𑀸𑀴𑀺𑀬𑀸 𑀧𑀜𑁆𑀘𑀦𑀸𑀴𑀺𑀬𑀸 𑀕𑀡𑁆𑀳𑀦𑀁.

𑁩𑁩𑁧-𑁨. 𑀅𑀦𑀼𑀜𑁆𑀜𑀸𑀢𑀯𑀸𑀲𑀺 𑀬𑀁 𑀲𑀓𑁆𑀓𑀸 𑀲𑀺𑀧𑀸𑀝𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀺𑀳𑀭𑀺𑀢𑀼𑀦𑁆𑀢𑀺 𑀯𑀼𑀢𑁆𑀢𑀸. 𑀢𑀘𑁆𑀙𑀺𑀢𑀸𑀦𑀺𑀝𑁆𑀞𑀺𑀢𑀦𑁆𑀢𑀺 𑀯𑀺𑀧𑁆𑀧𑀓𑀢𑀁. 𑀬𑀤𑀺 𑀢𑀘𑁆𑀙𑀺𑀢𑀁, 𑀕𑀭𑀼𑀪𑀡𑁆𑀟𑀫𑁂𑀯. 𑀤𑀦𑁆𑀢𑀁 𑀧𑀦 𑀅𑀢𑀘𑁆𑀙𑀺𑀢𑀜𑁆𑀘 𑀅𑀦𑀺𑀝𑁆𑀞𑀺𑀢𑀜𑁆𑀘 𑀪𑀸𑀚𑀺𑀬𑀫𑁂𑀯. 𑀅𑀦𑀺𑀝𑁆𑀞𑀺𑀢𑀁 𑀫𑀜𑁆𑀘𑀧𑀸𑀤𑀸𑀤𑀺𑀓𑀁 𑀕𑀭𑀼𑀪𑀡𑁆𑀟𑀁. 𑀇𑀤𑀸𑀦𑀺 𑀫𑀢𑁆𑀢𑀺𑀓𑀪𑀡𑁆𑀟𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀺𑀓𑁆𑀔𑀽𑀧𑀓𑀭𑀡𑁂’’𑀢𑀺𑀆𑀤𑀺𑀫𑀸𑀳. 𑀧𑀢𑁆𑀢𑀣𑀸𑀮𑀓𑀓𑀼𑀡𑁆𑀟𑀺𑀓𑀸𑀤𑀺𑀪𑀺𑀓𑁆𑀔𑀽𑀧𑀓𑀭𑀡𑁂 𑀘. 𑀧𑀸𑀤𑀖𑀝𑀓𑁄𑀢𑀺 𑀧𑀸𑀤𑀕𑀡𑁆𑀳𑀦𑀓𑁄 𑀖𑀝𑀓𑁄 𑀘 𑀫𑀢𑁆𑀢𑀺𑀓𑀸𑀫𑀬𑁄 𑀪𑀸𑀚𑀺𑀬𑁄 𑀪𑀸𑀚𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀲𑀗𑁆𑀔𑀣𑀸𑀮𑀓𑀫𑁆𑀧𑀺 𑀪𑀸𑀚𑀺𑀬𑀫𑁂𑀯.

𑁩𑁩𑁩-𑁪. 𑀫𑀺𑀕𑀘𑀫𑁆𑀫𑀸𑀤𑀺𑀓𑀁 𑀓𑀧𑁆𑀧𑀺𑀬𑀘𑀫𑁆𑀫𑀁 𑀪𑀸𑀚𑀺𑀬𑀁, 𑀲𑀻𑀳𑀘𑀫𑁆𑀫𑀸𑀤𑀺𑀓𑀁 𑀅𑀓𑀧𑁆𑀧𑀺𑀬𑀘𑀫𑁆𑀫𑀁 𑀕𑀭𑀼𑀪𑀡𑁆𑀟𑀁. 𑀢𑀁 𑀧𑀦 𑀪𑀽𑀫𑀢𑁆𑀣𑀭𑀡𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀏𑀴𑀘𑀫𑁆𑀫𑀁 𑀧𑀦 𑀧𑀘𑁆𑀘𑀢𑁆𑀣𑀭𑀡𑀕𑀢𑀺𑀓𑀢𑁆𑀢𑀸 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺. 𑀇𑀤𑀸𑀦𑀺 𑀇𑀫𑀸𑀦𑀺 𑀧𑀦 𑀧𑀜𑁆𑀘 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀪𑁂𑀲𑀚𑁆𑀚𑀸𑀦𑀁 𑀅𑀢𑁆𑀣𑀸𑀬 𑀧𑀭𑀺𑀯𑀢𑁆𑀢𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀕𑀭𑀼𑀪𑀡𑁆𑀟𑁂𑀦 𑀧𑀦 𑀕𑀭𑀼𑀪𑀡𑁆𑀟𑀜𑁆𑀘 𑀣𑀸𑀯𑀭𑀜𑁆𑀘 𑀣𑀸𑀯𑀭𑁂𑀦 𑀣𑀸𑀯𑀭𑀫𑁂𑀯 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀕𑀭𑀼𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) 𑀕𑀭𑀼𑀦𑀸𑀢𑀺 𑀕𑀭𑀼𑀪𑀡𑁆𑀟𑁂𑀦 𑀕𑀭𑀼𑀪𑀡𑁆𑀟𑀜𑁆𑀘 𑀣𑀸𑀯𑀭𑀜𑁆𑀘 𑀧𑀭𑀺𑀯𑀢𑁆𑀢𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀣𑀸𑀯𑀭𑁂𑀦 𑀘 𑀣𑀸𑀯𑀭𑀫𑁂𑀯 𑀧𑀭𑀺𑀯𑀢𑁆𑀢𑁂𑀬𑁆𑀬, 𑀦 𑀕𑀭𑀼𑀪𑀡𑁆𑀟𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀜𑁆𑀘𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀧𑀘𑁆𑀙𑀺𑀫𑀢𑁆𑀢𑀬𑀁 𑀕𑀭𑀼𑀪𑀡𑁆𑀟𑀁, 𑀧𑀼𑀭𑀺𑀫𑀤𑁆𑀯𑀬𑀁 𑀣𑀸𑀯𑀭𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀓𑀢𑁆𑀯𑀸 𑀘 𑀪𑀼𑀜𑁆𑀚𑀢𑀽𑀢𑀺 𑀏𑀯𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀢𑀢𑁄 𑀆𑀪𑀢𑀁 𑀓𑀧𑁆𑀧𑀺𑀬𑀪𑀡𑁆𑀟𑀁 𑀧𑀭𑀺𑀪𑀼𑀜𑁆𑀚𑀢𑀽𑀢𑀺 𑀅𑀢𑁆𑀣𑁄. 𑀓𑀣𑀁 𑀜𑀸𑀬𑀢𑀻𑀢𑀺 𑀘𑁂? 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀭𑀺𑀯𑀸𑀭𑁂-

‘‘𑀅𑀯𑀺𑀲𑁆𑀲𑀚𑁆𑀚𑀺𑀬𑀁 𑀅𑀯𑁂𑀪𑀗𑁆𑀕𑀺𑀬𑀁, 𑀧𑀜𑁆𑀘 𑀯𑀼𑀢𑁆𑀢𑀸 𑀫𑀳𑁂𑀲𑀺𑀦𑀸;

𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀲𑁆𑀲 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺,

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸’’𑀢𑀺. (𑀧𑀭𑀺. 𑁪𑁭𑁯);

𑀏𑀢𑁆𑀣 𑀧𑀦 𑀕𑀭𑀼𑀪𑀡𑁆𑀟𑁂𑀦 𑀕𑀭𑀼𑀪𑀡𑁆𑀟𑀜𑁆𑀘 𑀣𑀸𑀯𑀭𑀜𑁆𑀘 𑀣𑀸𑀯𑀭𑁂𑀦 𑀣𑀸𑀯𑀭𑀫𑁂𑀯 𑀧𑀭𑀺𑀯𑀢𑁆𑀢𑀦𑀯𑀺𑀥𑀺𑀁 𑀲𑀦𑁆𑀥𑀸𑀬 ‘‘𑀯𑀺𑀲𑁆𑀲𑀚𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀼𑀦 𑀢𑀢𑁄 𑀦𑀺𑀩𑁆𑀩𑀢𑁆𑀢𑀜𑁆𑀘 𑀘𑀢𑀼𑀧𑀘𑁆𑀘𑀬𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀮𑀩𑁆𑀪𑀢𑀻𑀢𑀺 𑀤𑀻𑀧𑁂𑀢𑀼𑀁 ‘‘𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀬𑀁 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀲𑀦𑁆𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) 𑀆𑀭𑀸𑀫𑀸𑀤𑀺 𑀅𑀪𑀸𑀚𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀅𑀯𑁂𑀪𑀗𑁆𑀕𑀺𑀬𑀯𑀺𑀦𑀺𑀘𑁆𑀙𑀬𑁄.

𑀅𑀯𑁂𑀪𑀗𑁆𑀕𑀺𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.