𑁩𑁯. 𑀯𑀲𑁆𑀲𑀽𑀧𑀦𑀸𑀬𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁦𑁯-𑁩𑁧𑁦. 𑀇𑀤𑀸𑀦𑀺 𑀯𑀲𑁆𑀲𑀽𑀧𑀕𑀫𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀭𑀺𑀫𑀺𑀓𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀼𑀭𑀺𑀫𑀺𑀓𑀸 𑀧𑀘𑁆𑀙𑀺𑀫𑀺𑀓𑀸 (𑀫𑀳𑀸𑀯. 𑁧𑁮𑁪; 𑀫𑀳𑀸𑀯. 𑀅𑀝𑁆𑀞. 𑁧𑁮𑁫) 𑀘𑁂𑀢𑀺 𑀤𑁆𑀯𑁂 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀢𑀺 𑀅𑀢𑁆𑀣𑁄. 𑀆𑀮𑀬𑀧𑀭𑀺𑀕𑁆𑀕𑀸𑀳𑁄 𑀯𑀸 𑀯𑀘𑀻𑀪𑁂𑀤𑁄 𑀯𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀢𑀺 𑀧𑀸𑀞𑀲𑁂𑀲𑁄. 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀲𑀦𑁆𑀥𑀸𑀬 ‘‘𑀏𑀤𑀺𑀲𑁄’’𑀢𑀺 𑀯𑀼𑀢𑁆𑀢𑀁. ‘‘𑀇𑀥 𑀯𑀲𑁆𑀲𑀁 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀢𑁆𑀣 𑀆𑀮𑀬𑁄 (𑀫𑀳𑀸𑀯. 𑀅𑀝𑁆𑀞. 𑁨𑁦𑁩). 𑀆𑀮𑀬𑀧𑀭𑀺𑀕𑁆𑀕𑀸𑀳𑁄 𑀧𑀦 𑀯𑀚𑁂 𑀯𑀸 𑀲𑀢𑁆𑀣𑁂 𑀯𑀸 𑀦𑀸𑀯𑀸𑀬 𑀯𑀸 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀓𑀸𑀫𑀲𑁆𑀲 𑀢𑀢𑁆𑀣 𑀲𑁂𑀦𑀸𑀲𑀦𑀁 𑀅𑀮𑀪𑀦𑁆𑀢𑀲𑁆𑀲 𑀮𑀩𑁆𑀪𑀢𑀺, 𑀲𑀢𑁆𑀣𑀸𑀤𑀻𑀲𑀼 𑀧𑀦 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀓𑀢𑁆𑀯𑀸. 𑀬𑀤𑀺 𑀲𑀢𑁆𑀣𑀸𑀤𑀻𑀲𑀼 𑀓𑀯𑀸𑀝𑀩𑀦𑁆𑀥𑀁 𑀲𑁂𑀦𑀸𑀲𑀦𑀁 𑀮𑀩𑁆𑀪𑀢𑀺, 𑀢𑀢𑁆𑀣 𑀉𑀧𑀕𑀦𑁆𑀢𑀩𑁆𑀩𑀁. 𑀉𑀧𑀕𑀘𑁆𑀙𑀦𑁆𑀢𑁂𑀦 𑀘 ‘‘𑀇𑀥 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀢𑀩𑁆𑀩𑀁. 𑀯𑀺𑀳𑀸𑀭𑁂 𑀧𑀦 𑀯𑀘𑀻𑀪𑁂𑀤𑁄 𑀯𑀸 𑀓𑀸𑀢𑀩𑁆𑀩𑁄. 𑀲𑀘𑁂 ‘‘𑀇𑀥 𑀯𑀲𑁆𑀲𑀁 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀮𑀬𑁄 𑀅𑀢𑁆𑀣𑀺, 𑀅𑀲𑀢𑀺𑀬𑀸 𑀧𑀦 𑀯𑀲𑁆𑀲𑀁 𑀦 𑀉𑀧𑁂𑀢𑀺, 𑀙𑀺𑀦𑁆𑀦𑀯𑀲𑁆𑀲𑁄 𑀦 𑀳𑁄𑀢𑀺, 𑀧𑀯𑀸𑀭𑁂𑀢𑀼𑀜𑁆𑀘 𑀮𑀪𑀢𑀺 𑀏𑀯.

𑁩𑁧𑁧. 𑀦𑁄𑀧𑁂𑀢𑀼𑀓𑀸𑀫𑁄 𑀆𑀯𑀸𑀲𑀁, 𑀢𑀤𑀳𑀽𑀢𑀺𑀓𑁆𑀓𑀫𑁂𑀬𑁆𑀬 𑀯𑀸𑀢𑀺 𑀧𑀸𑀞𑁂 (𑀫𑀳𑀸𑀯. 𑁧𑁮𑁬) 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀆𑀯𑀸𑀲𑀁 𑀢𑀤𑀳𑀼 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀢𑀺𑀧𑀺 𑀅𑀢𑁆𑀣𑁄. 𑀆𑀯𑀸𑀲𑀁 𑀅𑀢𑀺𑀓𑁆𑀓𑀫𑁂𑀬𑁆𑀬 𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀚𑀸𑀦𑀁 𑀯𑀸𑀦𑀼𑀧𑀕𑀘𑁆𑀙𑀢𑁄𑀢𑀺 𑀏𑀢𑁆𑀣 𑀯𑀺𑀳𑀸𑀭𑁂 𑀦𑀺𑀲𑀻𑀤𑀺𑀢𑁆𑀯𑀸𑀧𑀺 𑀅𑀦𑀼𑀧𑀕𑀘𑁆𑀙𑀢𑁄 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁧𑁨. 𑀙𑀺𑀦𑁆𑀦𑀯𑀲𑁆𑀲𑁄 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁨𑁦𑁮) 𑀯𑀸 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁂𑀦 𑀧𑀞𑀫𑀁 𑀅𑀦𑀼𑀧𑀕𑀢𑁄 (𑀫𑀳𑀸𑀯. 𑁧𑁮𑁫-𑁧𑁮𑁬) 𑀯𑀸 𑀤𑀼𑀢𑀺𑀬𑀁 𑀉𑀧𑀕𑀘𑁆𑀙𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀫𑀸𑀲𑀦𑁆𑀢𑀺 𑀧𑀼𑀭𑀺𑀫𑀁 𑀯𑀸 𑀢𑁂𑀫𑀸𑀲𑀁 𑀧𑀘𑁆𑀙𑀺𑀫𑀁 𑀯𑀸 𑀢𑁂𑀫𑀸𑀲𑀁. ‘‘𑀦 𑀪𑀺𑀓𑁆𑀔𑀯𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀧𑀼𑀭𑀺𑀫𑀁 𑀯𑀸 𑀧𑀘𑁆𑀙𑀺𑀫𑀁 𑀯𑀸 𑀢𑁂𑀫𑀸𑀲𑀁 𑀅𑀯𑀲𑀺𑀢𑁆𑀯𑀸 𑀘𑀸𑀭𑀺𑀓𑀸 𑀧𑀓𑁆𑀓𑀫𑀺𑀢𑀩𑁆𑀩𑀸. 𑀬𑁄 𑀧𑀓𑁆𑀓𑀫𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁧𑁮𑁫) 𑀳𑀺 𑀯𑀼𑀢𑁆𑀢𑀁.

𑁩𑁧𑁩-𑁫. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀦𑁆𑀦𑀁 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀅𑀧𑁆𑀧𑀳𑀺𑀢𑁂𑀧𑀺 𑀕𑀦𑁆𑀢𑀼𑀁, 𑀧𑀕𑁂𑀯 𑀧𑀳𑀺𑀢𑁂, ‘𑀪𑀺𑀓𑁆𑀔𑀼𑀲𑁆𑀲 𑀪𑀺𑀓𑁆𑀔𑀼𑀦𑀺𑀬𑀸 𑀲𑀺𑀓𑁆𑀔𑀫𑀸𑀦𑀸𑀬 𑀲𑀸𑀫𑀡𑁂𑀭𑀲𑁆𑀲 𑀲𑀸𑀫𑀡𑁂𑀭𑀺𑀬𑀸 𑀫𑀸𑀢𑀼𑀬𑀸 𑀘 𑀧𑀺𑀢𑀼𑀲𑁆𑀲 𑀘, 𑀕𑀺𑀮𑀸𑀦𑀪𑀢𑁆𑀢𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀕𑀺𑀮𑀸𑀦𑀪𑁂𑀲𑀚𑁆𑀚𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀯𑀸 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺 𑀯𑀸’𑀢𑀺 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁧𑁯𑁮) 𑀯𑀼𑀢𑁆𑀢𑀢𑁆𑀢𑀸 ‘‘𑀫𑀸𑀢𑀸𑀧𑀺𑀢𑀽𑀦𑀫𑀢𑁆𑀣𑀸𑀬…𑀧𑁂… 𑀉𑀧𑀝𑁆𑀞𑀺𑀲𑁆𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀬𑀁 𑀲𑀗𑁆𑀔𑁂𑀧𑁄 𑁋 ‘‘𑀫𑀸𑀢𑀸𑀤𑀻𑀦𑀁 𑀕𑀺𑀮𑀸𑀦𑀪𑀢𑁆𑀢𑀁 𑀯𑀸 𑀢𑀤𑀼𑀧𑀝𑁆𑀞𑀸𑀓𑀪𑀢𑁆𑀢𑀁 𑀯𑀸 𑀕𑀺𑀮𑀸𑀦𑀸𑀦𑀁 𑀑𑀲𑀥𑀁 𑀯𑀸 𑀏𑀲𑀺𑀲𑁆𑀲𑀁 𑀧𑀭𑀺𑀬𑁂𑀲𑀺𑀲𑁆𑀲’’𑀦𑁆𑀢𑀺 𑀯𑀸 ‘‘𑀢𑁂 𑀕𑀺𑀮𑀸𑀦𑁂 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀉𑀧𑀝𑁆𑀞𑀺𑀲𑁆𑀲’’𑀦𑁆𑀢𑀺 𑀯𑀸 𑀧𑀳𑀺𑀢𑁂𑀧𑀺 𑀅𑀧𑁆𑀧𑀳𑀺𑀢𑁂𑀧𑀺 𑀲𑀢𑁆𑀢𑀸𑀳𑀓𑀺𑀘𑁆𑀘𑁂𑀦 𑀕𑀦𑁆𑀢𑀼𑀁 𑀮𑀪𑀢𑀺.

𑀇𑀤𑀸𑀦𑀺 𑀲𑀳𑀥𑀫𑁆𑀫𑀺𑀓𑁂 𑀏𑀯 𑀲𑀦𑁆𑀥𑀸𑀬 ‘‘𑀅𑀦𑀪𑀺𑀭𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀯𑀺𑀲𑀪𑀸𑀕𑀭𑀽𑀧𑀁 𑀤𑀺𑀲𑁆𑀯𑀸 𑀅𑀦𑀪𑀺𑀭𑀢𑀺, 𑀢𑀢𑁄 𑀯𑀽𑀧𑀓𑀸𑀲𑀺𑀲𑁆𑀲𑀁, 𑀢𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀫𑀺𑀲𑁆𑀲’’𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀕𑀦𑁆𑀢𑀼𑀫𑁆𑀧𑀺 𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. 𑀓𑀼𑀓𑁆𑀓𑀼𑀘𑁆𑀘𑀁 𑀯𑀺𑀦𑁄𑀤𑀦𑀜𑁆𑀘 𑀤𑀺𑀝𑁆𑀞𑀺𑀁 𑀯𑀺𑀯𑁂𑀘𑀦𑀜𑁆𑀘 𑀅𑀳𑀁 𑀯𑀸 𑀓𑀭𑁂𑀬𑁆𑀬𑀁 𑀅𑀜𑁆𑀜𑁂𑀳𑀺 𑀯𑀸 𑀓𑀸𑀭𑁂𑀬𑁆𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀺𑀯𑀸𑀲𑀫𑀸𑀦𑀢𑁆𑀢𑀆𑀤𑀻𑀳𑀺 𑀯𑀼𑀝𑁆𑀞𑀸𑀦𑀁 𑀯𑀸 𑀕𑀭𑀼𑀓𑀸. 𑀆𑀤𑀺-𑀲𑀤𑁆𑀤𑁂𑀦 𑀲𑀘𑁂 𑀲𑀗𑁆𑀖𑁂𑀦 𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺, 𑀢𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀅𑀦𑀼𑀲𑁆𑀲𑀸𑀯𑀦𑀓𑀭𑀡𑀸𑀤𑀻𑀲𑀼 𑀉𑀲𑁆𑀲𑀼𑀓𑁆𑀓𑀁 𑀓𑀭𑁂𑀬𑁆𑀬𑀦𑁆𑀢𑀺 𑀕𑀦𑁆𑀢𑀼𑀁 𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. 𑀲𑀢𑁆𑀢𑀸𑀳𑀓𑀺𑀘𑁆𑀘𑁂𑀦𑀸𑀢𑀺 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦.

𑁩𑁧𑁬. 𑀥𑀫𑁆𑀫𑀲𑀯𑀦𑀢𑁆𑀣𑀁 𑀦𑀺𑀫𑀦𑁆𑀢𑀺𑀢𑁄 𑀏𑀯𑀁 𑀯𑀚𑁂𑀢𑀺 𑀅𑀢𑁆𑀣𑁄. 𑀕𑀭𑀽 𑀦𑀸𑀫 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸, 𑀢𑁂𑀳𑀺 𑀪𑀡𑁆𑀟𑀥𑁄𑀯𑀦𑀓𑀺𑀘𑁆𑀘𑁂𑀦 𑀧𑀳𑀺𑀢𑀲𑁆𑀲 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄.

𑁩𑁧𑁭. 𑀦 𑀪𑀡𑁆𑀟𑀥𑁄𑀯𑀦…𑀧𑁂… 𑀤𑀲𑁆𑀲𑀦𑁂𑀢𑀺 𑀏𑀢𑁆𑀣 (𑀫𑀳𑀸𑀯. 𑀅𑀝𑁆𑀞. 𑁧𑁯𑁯) 𑀏𑀢𑁂𑀲𑀼𑀧𑀺 𑀦 𑀯𑀚𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀮𑀩𑁆𑀪𑀦𑁆𑀢𑀺 𑀏𑀢𑁆𑀣 ‘‘𑀅𑀚𑁆𑀚𑁂𑀯 𑀆𑀕𑀫𑀺𑀲𑁆𑀲’’𑀦𑁆𑀢𑀺 𑀅𑀤𑀽𑀭𑀕𑁄 𑀬𑀤𑀺 𑀦 𑀧𑀸𑀧𑀼𑀡𑁂𑀬𑁆𑀬, 𑀮𑀩𑁆𑀪𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? ‘‘𑀅𑀚𑁆𑀚𑁂𑀯 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀲𑀸𑀫𑀦𑁆𑀢𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀼𑀦 𑀆𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀘𑁂 𑀅𑀭𑀼𑀡𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀯𑀲𑁆𑀲𑀘𑁆𑀙𑁂𑀤𑁄𑀧𑀺 𑀦 𑀳𑁄𑀢𑀺, 𑀭𑀢𑁆𑀢𑀺𑀘𑁆𑀙𑁂𑀤𑁂𑀦 𑀤𑀼𑀓𑁆𑀓𑀝𑀫𑁆𑀧𑀺 𑀦𑀸𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁧𑁮. 𑀲𑁂𑀲𑀜𑀸𑀢𑀺𑀳𑀻𑀢𑀺 𑀪𑀸𑀢𑀼𑀪𑀕𑀺𑀦𑀻𑀆𑀤𑀻𑀳𑀺. 𑀪𑀺𑀓𑁆𑀔𑀼𑀦𑀺𑀲𑁆𑀲𑀺𑀢𑀓𑁂𑀦 𑀘 𑀧𑀳𑀺𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀤𑁆𑀤𑀺𑀲𑀺𑀢𑁆𑀯𑀸𑀢𑀺 ‘‘𑀆𑀕𑀘𑁆𑀙𑀦𑁆𑀢𑀼 𑀪𑀤𑀦𑁆𑀢𑀸, 𑀇𑀘𑁆𑀙𑀸𑀫𑀺 𑀤𑀸𑀦𑀜𑁆𑀘 𑀤𑀸𑀢𑀼𑀁 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁 𑀪𑀺𑀓𑁆𑀔𑀼𑀜𑁆𑀘 𑀧𑀲𑁆𑀲𑀺𑀢𑀼’’𑀦𑁆𑀢𑀺𑀆𑀤𑀺𑀦𑀸 𑀬𑀁 𑀓𑀺𑀜𑁆𑀘𑀺 𑀦𑀺𑀤𑁆𑀤𑀺𑀲𑀺𑀢𑁆𑀯𑀸𑀯 𑀧𑁂𑀲𑀺𑀢𑁂 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀓𑁂𑀯𑀮𑀁 ‘‘𑀆𑀕𑀘𑁆𑀙𑀦𑁆𑀢𑀼 𑀪𑀺𑀓𑁆𑀔𑀽, 𑀇𑀘𑁆𑀙𑀸𑀫𑀺 𑀪𑀺𑀓𑁆𑀔𑀽𑀦𑀁 𑀆𑀕𑀫𑀦’’𑀦𑁆𑀢𑀺 𑀏𑀯𑀁 𑀅𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀯𑀼𑀢𑁆𑀢𑁂 𑀕𑀦𑁆𑀢𑀼𑀁 𑀦 𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄.

𑁩𑁧𑁯. 𑀅𑀘𑁆𑀙𑀭𑀸𑀬𑁂 𑀲𑀢𑀢𑁆𑀢𑀦𑁄𑀢𑀺 𑀤𑀲𑀯𑀺𑀥𑁂𑀲𑀼 𑀅𑀦𑁆𑀢𑀭𑀸𑀬𑁂𑀲𑀼 𑀏𑀓𑀲𑁆𑀫𑀺𑀫𑁆𑀧𑀺 𑀅𑀦𑁆𑀢𑀭𑀸𑀬𑁂 𑀅𑀢𑁆𑀢𑀦𑁄 𑀲𑀢𑀻𑀢𑀺 𑀅𑀢𑁆𑀣𑁄. 𑀲𑀗𑁆𑀖𑀲𑀸𑀫𑀕𑁆𑀕𑀺𑀬𑀸 𑀯𑀸 𑀯𑀲𑁆𑀲𑀘𑁆𑀙𑁂𑀤𑁂 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑁄 𑀪𑀺𑀓𑁆𑀔𑀼 𑀧𑀲𑁆𑀲𑀢𑀺 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑁆𑀢𑁂. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺, ‘𑀕𑀭𑀼𑀓𑁄 𑀔𑁄 𑀲𑀗𑁆𑀖𑀪𑁂𑀤𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸. 𑀫𑀸 𑀫𑀬𑀺 𑀲𑀫𑁆𑀫𑀼𑀔𑀻𑀪𑀽𑀢𑁂 𑀲𑀗𑁆𑀖𑁄 𑀪𑀺𑀚𑁆𑀚𑀻’𑀢𑀺 𑀧𑀓𑁆𑀓𑀫𑀺𑀢𑀩𑁆𑀩𑀁, 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲𑀸’’𑀢𑀺 (𑀫𑀳𑀸𑀯. 𑁨𑁦𑁨). 𑀏𑀯𑀁 𑀙𑀺𑀦𑁆𑀦𑀯𑀲𑁆𑀲𑁄 𑀦𑁄 𑀧𑀯𑀸𑀭𑀬𑁂𑀢𑀺 𑀅𑀢𑁆𑀣𑁄.

𑁩𑁨𑁦. 𑀭𑀼𑀓𑁆𑀔𑀲𑁆𑀲 𑀲𑀼𑀲𑀺𑀭𑁂𑀢𑀺 𑀏𑀢𑁆𑀣 (𑀫𑀳𑀸𑀯. 𑁨𑁦𑁪; 𑀫𑀳𑀸𑀯. 𑀅𑀝𑁆𑀞. 𑁨𑁦𑁩) 𑀧𑀦 𑀲𑀼𑀤𑁆𑀥𑁂 𑀭𑀼𑀓𑁆𑀔𑀲𑀼𑀲𑀺𑀭𑁂 𑀏𑀯 𑀦 𑀯𑀝𑁆𑀝𑀢𑀺, 𑀫𑀳𑀦𑁆𑀢𑀲𑁆𑀲 𑀧𑀦 𑀲𑀼𑀲𑀺𑀭𑀲𑁆𑀲 𑀅𑀦𑁆𑀢𑁄 𑀧𑀤𑀭𑀘𑁆𑀙𑀤𑀦𑀁 𑀓𑀼𑀝𑀺𑀓𑀁 𑀓𑀢𑁆𑀯𑀸 𑀧𑀯𑀺𑀲𑀦𑀤𑁆𑀯𑀸𑀭𑀁 𑀬𑁄𑀚𑁂𑀢𑁆𑀯𑀸 𑀉𑀧𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀭𑀼𑀓𑁆𑀔𑀲𑁆𑀲 𑀯𑀺𑀝𑀧𑁂𑀢𑀺 𑀏𑀢𑁆𑀣𑀸𑀧𑀺 𑀲𑀼𑀤𑁆𑀥𑀯𑀺𑀝𑀧𑀫𑀢𑁆𑀢𑁂 𑀦 𑀯𑀝𑁆𑀝𑀢𑀺, 𑀫𑀳𑀸𑀯𑀺𑀝𑀧𑁂 𑀧𑀦 𑀅𑀝𑁆𑀝𑀓𑀁 𑀩𑀦𑁆𑀥𑀺𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦 𑀓𑀼𑀝𑀺𑀓𑀁 𑀓𑀢𑁆𑀯𑀸 𑀉𑀧𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀙𑀯𑀓𑀼𑀝𑀺 𑀦𑀸𑀫 𑀧𑀸𑀲𑀸𑀡𑀓𑀼𑀝𑀺𑀓𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀻𑀲𑀼 𑀧𑀲𑁆𑀲𑁂𑀲𑀼 𑀧𑀸𑀲𑀸𑀡𑁂 𑀉𑀲𑁆𑀲𑀸𑀧𑁂𑀢𑁆𑀯𑀸 𑀉𑀧𑀭𑀺 𑀧𑀸𑀲𑀸𑀡𑁂𑀦 𑀧𑀝𑀺𑀘𑁆𑀙𑀦𑁆𑀦𑀸.

𑁩𑁨𑁧. 𑀦𑀸𑀯𑀸𑀤𑀻𑀲𑀼 𑀧𑀦 𑀉𑀧𑀕𑀢𑁄 𑀧𑀯𑀸𑀭𑁂𑀢𑀼𑀜𑁆𑀘 𑀮𑀩𑁆𑀪𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀲𑁆𑀲𑀽𑀧𑀦𑀸𑀬𑀺𑀓𑀯𑀺𑀦𑀺𑀘𑁆𑀙𑀬𑁄.

𑀯𑀲𑁆𑀲𑀽𑀧𑀦𑀸𑀬𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.