𑁩𑁮. 𑀓𑀼𑀮𑀤𑀽𑀲𑀦𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁯𑁭. ‘‘𑀓𑀼𑀮𑀸𑀦𑀺 𑀤𑀽𑀲𑁂𑀢𑀺 𑀧𑀼𑀧𑁆𑀨𑁂𑀦 𑀯𑀸 𑀨𑀮𑁂𑀦 𑀯𑀸 𑀘𑀼𑀡𑁆𑀡𑁂𑀦 𑀯𑀸 𑀫𑀢𑁆𑀢𑀺𑀓𑀸𑀬 𑀯𑀸 𑀤𑀦𑁆𑀢𑀓𑀝𑁆𑀞𑁂𑀦 𑀯𑀸 𑀯𑁂𑀴𑀼𑀬𑀸 𑀯𑀸 𑀯𑁂𑀚𑁆𑀚𑀺𑀓𑀸𑀬 𑀯𑀸 𑀚𑀗𑁆𑀖𑀧𑁂𑀲𑀦𑀺𑀬𑁂𑀦 𑀯𑀸’’𑀢𑀺 (𑀧𑀸𑀭𑀸. 𑁪𑁩𑁭) 𑀯𑀼𑀢𑁆𑀢𑀢𑁆𑀢𑀸 𑀢𑀸𑀦𑀺 𑀅𑀝𑁆𑀞 𑀯𑀢𑁆𑀣𑀽𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀧𑁆𑀨’’𑀦𑁆𑀢𑀺𑀆𑀤𑀺𑀫𑀸𑀳. 𑀇𑀫𑀸𑀬 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀬𑀸 𑀓𑀼𑀮𑀸𑀦𑀁 𑀅𑀜𑁆𑀜𑁂𑀲𑀼 𑀲𑀻𑀮𑀯𑀦𑁆𑀢𑁂𑀲𑀼 𑀧𑀲𑀸𑀤𑀁 𑀤𑀽𑀲𑁂𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀓𑀼𑀮𑀤𑀽𑀲𑀦𑀁 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀢𑀁 𑀧𑀦 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂 𑀘 𑀧𑀭𑀲𑀦𑁆𑀢𑀓𑁂 𑀘 𑀯𑁂𑀤𑀺𑀢𑀩𑁆𑀩𑀁.

𑁨𑁯𑁮. 𑀇𑀤𑀸𑀦𑀺 𑀇𑀫𑁂𑀲𑀼 𑀯𑀢𑁆𑀣𑀽𑀲𑀼 𑀦 𑀓𑁂𑀯𑀮𑀁 𑀓𑀼𑀮𑀤𑀽𑀲𑀦𑀤𑀼𑀓𑁆𑀓𑀝𑀫𑁂𑀯 𑀆𑀧𑀚𑁆𑀚𑀢𑀺, 𑀣𑀼𑀮𑁆𑀮𑀘𑁆𑀘𑀬𑀸𑀤𑀻𑀦𑀺𑀧𑀺 𑀆𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀲𑀗𑁆𑀖𑀺𑀓𑀁 𑀕𑀭𑀼𑀪𑀡𑁆𑀟𑀁 𑀇𑀲𑁆𑀲𑀭𑁂𑀦 𑀤𑁂𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀦𑀸𑀲𑀦𑀢𑁆𑀣𑀸𑀬 𑀦𑀺𑀬𑀫𑀺𑀢𑀁 𑀧𑀦 𑀧𑀼𑀧𑁆𑀨𑀸𑀤𑀺 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺. 𑀲𑀗𑁆𑀖𑀲𑁆𑀲 𑀯𑀸 𑀅𑀜𑁆𑀜𑀲𑁆𑀲 𑀯𑀸 𑀲𑀦𑁆𑀢𑀓𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀤𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀸𑀤𑀻𑀦𑀺 𑀳𑁄𑀦𑁆𑀢𑀻𑀢𑀺 𑀧𑀸𑀞𑀲𑁂𑀲𑁄, 𑀢𑀲𑁆𑀲 𑀪𑀡𑁆𑀟𑀲𑁆𑀲 𑀅𑀕𑁆𑀖𑀯𑀲𑁂𑀦 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀧𑀸𑀭𑀸𑀚𑀺𑀓𑀸𑀦𑀺 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁨𑁯𑁯-𑁩𑁦𑁦. 𑀲𑀩𑁆𑀩𑀣𑀸𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁧) 𑀓𑀧𑁆𑀧𑀺𑀬𑀯𑁄𑀳𑀸𑀭𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑀧𑀭𑀺𑀬𑀸𑀬𑀑𑀪𑀸𑀲𑀦𑀺𑀫𑀺𑀢𑁆𑀢𑀓𑀫𑁆𑀫𑀸𑀤𑀻𑀳𑀺 𑀦 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀯𑀢𑀺𑀆𑀤𑀻𑀦𑀺 𑀓𑀢𑁆𑀯𑀸 𑀚𑀕𑁆𑀕𑀺𑀢𑀼𑀜𑁆𑀘. 𑀅𑀢𑁆𑀢𑀦𑁄 𑀧𑀭𑀺𑀪𑁄𑀕𑀢𑁆𑀣𑀦𑁆𑀢𑀺 𑀨𑀮𑀧𑀭𑀺𑀪𑁄𑀕𑀢𑁆𑀣𑀁. 𑀭𑁄𑀧𑀦𑀸𑀤𑀻𑀦𑀻𑀢𑀺 𑀭𑁄𑀧𑀸𑀧𑀦𑀸𑀤𑀻𑀦𑀺. 𑀆𑀤𑀺-𑀲𑀤𑁆𑀤𑁂𑀦 𑀲𑀺𑀜𑁆𑀘𑀸𑀧𑀦𑀑𑀘𑀺𑀦𑀸𑀧𑀦𑀸𑀤𑀻𑀦𑀺 𑀕𑀳𑀺𑀢𑀸𑀦𑀺. 𑀓𑀼𑀤𑁆𑀤𑀸𑀮𑀔𑀡𑀺𑀢𑁆𑀢𑀺𑀯𑀸𑀲𑀺𑀨𑀭𑀲𑀼𑀉𑀤𑀓𑀪𑀸𑀚𑀦𑀸𑀤𑀻𑀦𑀺 𑀆𑀳𑀭𑀺𑀢𑁆𑀯𑀸 𑀲𑀫𑀻𑀧𑁂 𑀞𑀧𑀦𑀯𑀲𑁂𑀦 𑀦𑀺𑀫𑀺𑀢𑁆𑀢𑀢𑁄 𑀘 𑀓𑀼𑀤𑁆𑀤𑀸𑀮𑀔𑀡𑀺𑀢𑁆𑀢𑀸𑀤𑀻𑀦𑀺 𑀘 𑀫𑀸𑀮𑀸𑀯𑀘𑁆𑀙𑁂 𑀘 𑀕𑀳𑁂𑀢𑁆𑀯𑀸 𑀞𑀺𑀢𑁂 ‘‘𑀲𑀸𑀫𑀡𑁂𑀭𑀸𑀤𑀬𑁄 𑀤𑀺𑀲𑁆𑀯𑀸 ‘𑀣𑁂𑀭𑁄 𑀓𑀸𑀭𑀸𑀧𑁂𑀢𑀼𑀓𑀸𑀫𑁄’𑀢𑀺 𑀆𑀕𑀦𑁆𑀢𑁆𑀯𑀸 𑀓𑀭𑁄𑀦𑁆𑀢𑀻’’𑀢𑀺 𑀲𑀜𑁆𑀜𑀸𑀬 𑀑𑀪𑀸𑀲𑀢𑁄 𑀘 ‘‘𑀇𑀫𑀁 𑀭𑀼𑀓𑁆𑀔𑀁 𑀚𑀸𑀦, 𑀇𑀫𑀁 𑀆𑀯𑀸𑀝𑀁 𑀚𑀸𑀦𑀸’’𑀢𑀺𑀆𑀤𑀺𑀓𑀧𑁆𑀧𑀺𑀬𑀯𑁄𑀳𑀸𑀭𑀢𑁄 𑀘 ‘‘𑀧𑀡𑁆𑀟𑀺𑀢𑁂𑀦 𑀫𑀸𑀮𑀸𑀯𑀘𑁆𑀙𑀸𑀤𑀬𑁄 𑀭𑁄𑀧𑀸𑀧𑁂𑀢𑀩𑁆𑀩𑀸, 𑀦 𑀘𑀺𑀭𑀲𑁆𑀲𑁂𑀯 𑀉𑀧𑀓𑀸𑀭𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺𑀆𑀤𑀺𑀧𑀭𑀺𑀬𑀸𑀬𑀢𑁄 𑀘 𑀭𑁄𑀧𑀦𑀸𑀤𑀻𑀦𑀺 𑀮𑀩𑁆𑀪𑀭𑁂𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁦𑁧-𑁨. 𑀇𑀤𑀸𑀦𑀺 𑀅𑀝𑁆𑀞𑀲𑀼 𑀯𑀢𑁆𑀣𑀽𑀲𑀼 𑀅𑀯𑀲𑁂𑀲𑀸𑀦𑀺 𑀤𑁆𑀯𑁂 𑀯𑀢𑁆𑀣𑀽𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀼𑀢𑁆𑀢𑀸𑀯 𑀯𑁂𑀚𑁆𑀚𑀺𑀓𑀸 𑀚𑀗𑁆𑀖𑀧𑁂𑀲𑀦𑁂’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑁂𑀚𑁆𑀚𑀺𑀓𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀯, 𑀇𑀤𑀸𑀦𑀺 𑀚𑀗𑁆𑀖𑀧𑁂𑀲𑀦𑀸𑀤𑀺𑀯𑀺𑀦𑀺𑀘𑁆𑀙𑀬𑀁 𑀯𑀓𑁆𑀔𑀸𑀫𑀻𑀢𑀺 𑀅𑀢𑁆𑀣𑁄. 𑀧𑀺𑀢𑀭𑁄𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁬-𑁪𑁩𑁭) 𑀫𑀸𑀢𑀸𑀧𑀺𑀢𑀭𑁄. 𑀪𑀡𑁆𑀟𑀼𑀦𑁆𑀢𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀁. 𑀪𑀺𑀓𑁆𑀔𑀼𑀲𑁆𑀲 𑀲𑀓𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀜𑁆𑀘𑀸𑀢𑀺 𑀏𑀢𑁂 𑀞𑀧𑁂𑀢𑁆𑀯𑀸 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀕𑀺𑀳𑀺𑀓𑀫𑁆𑀫𑁂𑀲𑀼 𑀤𑀽𑀢𑀲𑀸𑀲𑀦𑀁 𑀳𑀭𑀡𑁂 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄. 𑀧𑀞𑀫𑀁 𑀲𑀸𑀲𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀼𑀦 𑀢𑀁 𑀤𑀺𑀲𑁆𑀯𑀸 𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀸 𑀯𑀤𑀢𑁄𑀧𑀺 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀲𑀸𑀲𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 𑀆𑀕𑀢𑀸𑀦𑀁 𑀧𑀦 ‘‘𑀪𑀦𑁆𑀢𑁂, 𑀢𑀲𑁆𑀫𑀺𑀁 𑀕𑀸𑀫𑁂 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀓𑀸 𑀧𑀯𑀢𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀬𑀫𑀸𑀦𑁂 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺. 𑀧𑀼𑀘𑁆𑀙𑀺𑀢𑀧𑀜𑁆𑀳𑁂 𑀤𑁄𑀲𑁄 𑀦𑀢𑁆𑀣𑀺.

𑁩𑁦𑁩. 𑀏𑀯𑀁 𑀓𑀼𑀮𑀤𑀽𑀲𑀦𑁂𑀦 𑀉𑀧𑁆𑀧𑀦𑁆𑀦𑀧𑀘𑁆𑀘𑀬𑀸. ‘‘𑀧𑀜𑁆𑀘𑀦𑁆𑀦𑀫𑁆𑀧𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀓𑀢𑀫𑁆𑀧𑀺 𑀏𑀤𑀺𑀲𑀁 𑀦 𑀯𑀝𑁆𑀝𑀢𑀺 𑀏𑀯 𑀫𑀺𑀘𑁆𑀙𑀸𑀚𑀻𑀯𑀢𑁆𑀢𑀸. 𑀆𑀢𑀼𑀫𑀸𑀯𑀢𑁆𑀣𑀼 (𑀫𑀳𑀸𑀯. 𑁩𑁦𑁩) 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀓𑀺𑀁 𑀯𑀺𑀬𑀸𑀢𑀺 𑀘𑁂, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀪𑀽𑀢𑀸𑀭𑁄𑀘𑀦𑀸𑀭𑀽𑀧-𑀲𑀩𑁆𑀬𑁄𑀳𑀸𑀭𑀼𑀕𑁆𑀕𑀳𑀸𑀤𑀺𑀲𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀕𑁆𑀕𑀳𑀸𑀤𑀺𑀲𑀸𑀢𑀺 𑀏𑀢𑁂𑀳𑀺 𑀉𑀧𑁆𑀧𑀦𑁆𑀦𑀧𑀘𑁆𑀘𑀬𑀲𑀤𑀺𑀲𑀸𑀢𑀺 𑀅𑀢𑁆𑀣𑁄.

𑁩𑁦𑁪. 𑀇𑀤𑀸𑀦𑀺 𑀧𑀼𑀧𑁆𑀨𑀸𑀤𑀻𑀦𑀺 𑀓𑁂𑀲𑀁 𑀤𑀸𑀢𑀼𑀁 𑀯𑀝𑁆𑀝𑀦𑁆𑀢𑀺, 𑀓𑁂𑀲𑀁 𑀤𑀸𑀢𑀼𑀁 𑀦 𑀯𑀝𑁆𑀝𑀦𑁆𑀢𑀻𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀳𑀭𑀸𑀧𑁂𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀧𑀺𑀢𑀽𑀦𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁬-𑁪𑁩𑁭) 𑀤𑀸𑀢𑀼𑀁 𑀮𑀩𑁆𑀪𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀜𑀸𑀢𑀻𑀦𑀁 𑀧𑀢𑁆𑀢𑀸𑀦𑀁 𑀏𑀯. 𑀮𑀺𑀗𑁆𑀕𑀦𑁆𑀢𑀺 𑀲𑀺𑀯𑀮𑀺𑀗𑁆𑀕𑀁.

𑁩𑁦𑁫. 𑀢𑀣𑀸 𑀨𑀮𑀦𑁆𑀢𑀺 𑀨𑀮𑀫𑁆𑀧𑀺 𑀫𑀸𑀢𑀸𑀧𑀺𑀢𑀽𑀦𑀁 𑀳𑀭𑀺𑀢𑁆𑀯𑀸𑀧𑀺 𑀳𑀭𑀸𑀧𑁂𑀢𑁆𑀯𑀸𑀧𑀺 𑀤𑀸𑀢𑀼𑀁 𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. 𑀦 𑀓𑁂𑀯𑀮𑀁 𑀫𑀸𑀢𑀸𑀧𑀺𑀢𑀽𑀦𑀁𑀬𑁂𑀯, 𑀅𑀜𑁆𑀜𑁂𑀲𑀫𑁆𑀧𑀺 𑀤𑀸𑀢𑀼𑀁 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀕𑀺𑀮𑀸𑀦𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀲𑀧𑀭𑀲𑀦𑁆𑀢𑀓𑀦𑁆𑀢𑀺 𑀏𑀢𑁆𑀣 𑀧𑀭𑁄𑀢𑀺 𑀅𑀢𑁆𑀢𑀦𑁄 𑀯𑀺𑀲𑁆𑀲𑀸𑀲𑀜𑁆𑀜𑀸𑀢𑀓𑁄 𑀏𑀯 𑀅𑀥𑀺𑀧𑁆𑀧𑁂𑀢𑁄.

𑁩𑁦𑁬. 𑀪𑀸𑀚𑁂𑀦𑁆𑀢𑁂𑀢𑀺 𑀲𑀗𑁆𑀖𑀲𑁆𑀲 𑀨𑀮𑀧𑀼𑀧𑁆𑀨𑀫𑁆𑀳𑀺 𑀪𑀸𑀚𑀺𑀬𑀫𑀸𑀦𑁂 𑀲𑀫𑁆𑀫𑀢𑁂𑀦 𑀤𑁂𑀬𑁆𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑀭𑁂𑀦 𑀅𑀲𑀫𑁆𑀫𑀢𑁂𑀦 𑀅𑀧𑀮𑁄𑀓𑁂𑀢𑁆𑀯𑀸 𑀤𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑁩𑁦𑁭. 𑀧𑀭𑀺𑀘𑁆𑀙𑀺𑀚𑁆𑀚𑀸𑀢𑀺 𑀆𑀕𑀢𑀸𑀦𑀁 𑀤𑀸𑀢𑀩𑁆𑀩𑀦𑁆𑀢𑀺 𑀨𑀮𑀯𑀲𑁂𑀦 𑀯𑀸 𑀭𑀼𑀓𑁆𑀔𑀯𑀲𑁂𑀦 𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀢𑀭𑀲𑁆𑀲𑀸𑀢𑀺 𑀇𑀲𑁆𑀲𑀭𑀸𑀤𑀺𑀓𑀲𑁆𑀲. 𑀓𑀢𑀺𑀓𑀁 𑀯𑀢𑁆𑀯𑀸𑀢𑀺 ‘‘𑀇𑀫𑀲𑁆𑀫𑀺𑀁 𑀭𑀼𑀓𑁆𑀔𑁂 𑀏𑀢𑁆𑀢𑀓𑀸𑀦𑀺 𑀨𑀮𑀸𑀦𑀺 𑀮𑀩𑁆𑀪𑀦𑁆𑀢𑀻’’𑀢𑀺 𑀏𑀯𑀁 𑀯𑀢𑁆𑀯𑀸.

𑁩𑁦𑁮. 𑀲𑁂𑀲𑁂𑀢𑀺 𑀫𑀢𑁆𑀢𑀺𑀓𑀸𑀤𑀦𑁆𑀢𑀓𑀝𑁆𑀞𑀯𑁂𑀴𑀼𑀫𑁆𑀳𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁬-𑁪𑁩𑁭). 𑀬𑀣𑀸𑀯𑀼𑀢𑁆𑀢𑀦𑀬𑁄 𑀏𑀯𑀸𑀢𑀺 𑀏𑀢𑁆𑀣 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀲𑀦𑁆𑀢𑀓𑀁 𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀤𑀤𑀢𑁄 𑀤𑀼𑀓𑁆𑀓𑀝𑀦𑁆𑀢𑀺𑀆𑀤𑀺𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀧𑀡𑁆𑀡𑀫𑁆𑀧𑀻𑀢𑀺 𑀓𑀺𑀜𑁆𑀘𑀸𑀧𑀺 𑀧𑀸𑀴𑀺𑀬𑀁 𑀧𑀡𑁆𑀡𑀤𑀸𑀦𑀁 𑀦 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀓𑀼𑀮𑀤𑀽𑀲𑀦𑁂 𑀧𑀯𑁂𑀲𑀬𑁂𑀢𑀺 𑀅𑀢𑁆𑀣𑁄. 𑀓𑀼𑀮𑀤𑀽𑀲𑀦𑀯𑀺𑀦𑀺𑀘𑁆𑀙𑀬𑁄.

𑀓𑀼𑀮𑀤𑀽𑀲𑀦𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.