𑁩𑁭. 𑀉𑀕𑁆𑀕𑀳𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁮𑁧. 𑀤𑀲𑀪𑁂𑀤𑀫𑁆𑀧𑀻𑀢𑀺 𑀲𑀘𑁂 𑀓𑁂𑀦𑀘𑀺 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑀁 𑀤𑀲𑀯𑀺𑀥𑀁 𑀭𑀢𑀦𑀁 𑀆𑀦𑁂𑀢𑁆𑀯𑀸 ‘‘𑀇𑀤𑀁 𑀲𑀗𑁆𑀖𑀲𑁆𑀲 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀦𑀯𑀓𑀫𑁆𑀫𑀲𑁆𑀲 𑀯𑀸 𑀅𑀜𑁆𑀜𑀧𑀼𑀕𑁆𑀕𑀮𑀲𑁆𑀲 𑀯𑀸 𑀲𑀼𑀢𑁆𑀢𑀦𑁆𑀢𑀺𑀓𑀕𑀡𑀲𑁆𑀲 𑀯𑀸 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁨𑁮𑁨-𑁩. 𑀢𑁂𑀲𑀼 𑀤𑀲𑀯𑀺𑀥𑁂𑀲𑀼 𑀭𑀢𑀦𑁂𑀲𑀽𑀢𑀺 𑀅𑀢𑁆𑀣𑁄. 𑀤𑁆𑀯𑀻𑀲𑀽𑀢𑀺 𑀭𑀚𑀢𑀚𑀸𑀢𑀭𑀽𑀧𑁂𑀲𑀼. 𑀕𑀡𑀲𑀗𑁆𑀖𑀧𑀼𑀕𑁆𑀕𑀮𑁂 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁩𑁮-𑁫𑁩𑁯) 𑀅𑀦𑀸𑀫𑀲𑀺𑀢𑁆𑀯𑀸 ‘‘𑀇𑀤𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀘𑁂𑀢𑀺𑀬𑀲𑁆𑀲 𑀤𑀫𑁆𑀫𑀺, 𑀦𑀯𑀓𑀫𑁆𑀫𑀲𑁆𑀲 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀦 𑀧𑀝𑀺𑀓𑁆𑀔𑀺𑀧𑁂𑀢𑀺 𑀅𑀢𑁆𑀣𑁄. 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺 𑀘𑁂? 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀤𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀇𑀫𑁂 𑀏𑀯𑀁 𑀯𑀤𑀦𑁆𑀢𑀻’’𑀢𑀺 𑀓𑀧𑁆𑀧𑀺𑀬𑀓𑀸𑀭𑀸𑀦𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑁨𑁮𑁪. 𑀦 𑀓𑁂𑀯𑀮𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺𑀓𑀫𑁂𑀯, 𑀅𑀜𑁆𑀜𑀫𑁆𑀧𑀺 𑀔𑁂𑀢𑁆𑀢𑀯𑀢𑁆𑀣𑀸𑀤𑀺𑀓𑀁 𑀅𑀓𑀧𑁆𑀧𑀺𑀬𑀁 𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀔𑁂𑀢𑁆𑀢𑀁 𑀯𑀢𑁆𑀣𑀼’’𑀦𑁆𑀢𑀺𑀆𑀤𑀺𑀫𑀸𑀳. 𑀤𑀸𑀲𑀧𑀲𑀼𑀆𑀤𑀺𑀓𑀁 𑀤𑀸𑀲𑀧𑀲𑁆𑀯𑀸𑀤𑀺𑀓𑀁. 𑀲𑀘𑁂 𑀳𑀺 𑀓𑁄𑀘𑀺 ‘‘𑀫𑀬𑁆𑀳𑀁 𑀲𑀲𑁆𑀲𑀲𑀫𑁆𑀧𑀸𑀤𑀓𑀁 𑀫𑀳𑀸𑀢𑀴𑀸𑀓𑀁 𑀅𑀢𑁆𑀣𑀺, 𑀢𑀁 𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀢𑀜𑁆𑀘𑁂 𑀲𑀗𑁆𑀖𑁄 𑀲𑀫𑁆𑀧𑀝𑀺𑀘𑁆𑀙𑀢𑀺. 𑀧𑀝𑀺𑀕𑁆𑀕𑀳𑀡𑁂𑀧𑀺 𑀧𑀭𑀺𑀪𑁄𑀕𑁂𑀧𑀺 𑀆𑀧𑀢𑁆𑀢𑀺𑀬𑁂𑀯. 𑀏𑀯𑀁 𑀲𑁂𑀲𑁂𑀲𑀼𑀧𑀺.

𑀓𑀧𑁆𑀧𑀺𑀬𑁂𑀦 𑀓𑀫𑁂𑀦 𑀕𑀡𑁆𑀳𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀔𑁂𑀢𑁆𑀢𑀁 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀦 𑀯𑀝𑁆𑀝𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀇𑀢𑁄 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀯𑀸 ‘‘𑀘𑀢𑀼𑀧𑀘𑁆𑀘𑀬𑀧𑀭𑀺𑀪𑁄𑀕𑀢𑁆𑀣𑀸𑀬 𑀤𑀫𑁆𑀫𑀻’’𑀢𑀺 𑀯𑀸 𑀯𑀤𑀢𑀺 𑀘𑁂, 𑀕𑀳𑁂𑀢𑀩𑁆𑀩𑀁. 𑀯𑀢𑁆𑀣𑀼𑀫𑁆𑀳𑀺𑀧𑀺 𑀏𑀲𑁂𑀯 𑀦𑀬𑁄. ‘‘𑀢𑀴𑀸𑀓𑀁 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀯𑀸 ‘‘𑀲𑀗𑁆𑀖𑁄 𑀉𑀤𑀓𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀢𑀺, 𑀪𑀡𑁆𑀟𑀓𑀁 𑀥𑁄𑀯𑀺𑀲𑁆𑀲𑀢𑀻’’𑀢𑀺 𑀯𑀸 𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁂 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. ‘‘𑀤𑀸𑀲𑀁 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀆𑀭𑀸𑀫𑀺𑀓𑀁, 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀁, 𑀓𑀧𑁆𑀧𑀺𑀬𑀓𑀸𑀭𑀓𑀁 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. ‘‘𑀕𑁄𑀫𑀳𑀺𑀁𑀲𑀅𑀚𑁂𑀴𑀓𑀸𑀤𑀬𑁄 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀧𑀜𑁆𑀘𑀕𑁄𑀭𑀲𑀧𑀭𑀺𑀪𑁄𑀕𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑁂 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. 𑀏𑀤𑀺𑀲𑀁 𑀕𑀳𑀡𑀁 𑀲𑀦𑁆𑀥𑀸𑀬 ‘‘𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀳𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀁.

𑁨𑁮𑁫-𑁬. 𑀦𑀯𑀫𑀸𑀢𑀺𑀓𑀓𑁂𑀤𑀸𑀭𑀢𑀴𑀸𑀓𑀓𑀺𑀭𑀺𑀬𑀸 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁩𑁮-𑁨𑁩𑁯) 𑀘 𑀅𑀦𑀯𑁂 𑀧𑀼𑀩𑁆𑀩𑁂 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀳𑀺𑀢𑀢𑀴𑀸𑀓𑁂 𑀫𑀢𑁆𑀢𑀺𑀓𑀼𑀤𑁆𑀥𑀭𑀡𑀜𑁆𑀘 𑀪𑀺𑀦𑁆𑀦𑀝𑁆𑀞𑀸𑀦𑁂 𑀧𑀸𑀴𑀺𑀩𑀦𑁆𑀥𑁄 𑀘 𑀤𑀼𑀩𑁆𑀩𑀮𑀝𑁆𑀞𑀸𑀦𑁂 𑀆𑀴𑀺𑀬𑀸 𑀣𑀺𑀭𑀓𑀸𑀭𑁄 𑀘 𑀅𑀦𑀯𑁂 𑀓𑁂𑀤𑀸𑀭𑁂 𑀧𑀼𑀭𑀸𑀡𑀪𑀸𑀕𑀢𑁄 𑀅𑀢𑀺𑀭𑁂𑀓𑀪𑀸𑀕𑀕𑁆𑀕𑀳𑀡𑀜𑁆𑀘 𑀦𑀯𑁂 𑀓𑁂𑀤𑀸𑀭𑁂 𑀅𑀧𑀭𑀺𑀘𑁆𑀙𑀺𑀦𑁆𑀦𑀪𑀸𑀕𑁂 ‘‘𑀲𑀲𑁆𑀲𑁂 𑀤𑁂𑀣 𑀏𑀢𑁆𑀢𑀓𑁂’’𑀢𑀺 𑀓𑀳𑀸𑀧𑀡𑀼𑀝𑁆𑀞𑀸𑀧𑀦𑀜𑁆𑀘𑀸𑀧𑀻𑀢𑀺 𑀇𑀤𑀁 𑀲𑀩𑁆𑀩𑀁 𑀪𑀺𑀓𑁆𑀔𑀼𑀲𑁆𑀲 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀓𑀭𑁄𑀢𑀺, 𑀏𑀯𑀫𑀸𑀤𑀺𑀓𑀁 𑀲𑀩𑁆𑀩𑁂𑀲𑀫𑁆𑀧𑀺 𑀅𑀓𑀧𑁆𑀧𑀺𑀬𑀦𑁆𑀢𑀺 𑀅𑀢𑁆𑀣𑁄.

𑁨𑁮𑁭-𑁯. 𑀇𑀤𑀸𑀦𑀺 𑀢𑀁𑀬𑁂𑀯 𑀅𑀓𑀧𑁆𑀧𑀺𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁩𑁮-𑁨𑁩𑁯) 𑁋 𑀬𑁄 𑀧𑀦 ‘‘𑀓𑀲, 𑀯𑀧𑁆𑀧’’ 𑀇𑀘𑁆𑀘𑀸𑀤𑀺𑀓𑀁 𑀅𑀯𑀢𑁆𑀯𑀸 ‘‘𑀏𑀢𑁆𑀢𑀺𑀓𑀸𑀬 𑀪𑀽𑀫𑀺𑀬𑀸 𑀏𑀢𑁆𑀢𑀓𑁄 𑀪𑀸𑀕𑁄 𑀤𑁂𑀬𑁆𑀬𑁄’’𑀢𑀺 𑀪𑀽𑀫𑀺𑀁 𑀯𑀸 𑀧𑀢𑀺𑀝𑁆𑀞𑀸𑀧𑁂𑀢𑀺, ‘‘𑀏𑀢𑁆𑀢𑀓𑁂 𑀪𑀽𑀫𑀺𑀪𑀸𑀕𑁂 𑀲𑀲𑁆𑀲𑀁 𑀓𑀢𑀁, 𑀏𑀢𑁆𑀢𑀓𑀁 𑀕𑀡𑁆𑀳𑀣𑀸’’𑀢𑀺 𑀓𑀲𑁆𑀲𑀓𑁂 𑀯𑀤𑀦𑁆𑀢𑁂 𑀧𑀫𑀸𑀡𑀕𑀡𑁆𑀳𑀦𑀢𑁆𑀣𑀁 𑀤𑀡𑁆𑀟𑀭𑀚𑁆𑀚𑀼𑀪𑀺 𑀫𑀺𑀦𑀢𑀺, 𑀔𑀮𑁂 𑀞𑀢𑁆𑀯𑀸 𑀭𑀓𑁆𑀔𑀡𑀸𑀤𑀻𑀦𑀺 𑀓𑀭𑁄𑀢𑀺, 𑀢𑀲𑁆𑀲𑁂𑀯 𑀅𑀓𑀧𑁆𑀧𑀺𑀬𑀦𑁆𑀢𑀺.

𑁨𑁯𑁦. 𑀪𑀡𑁆𑀟𑀸𑀕𑀸𑀭𑀺𑀓𑀲𑀻𑀲𑁂𑀦 𑀧𑀺𑀢𑀼𑀲𑀦𑁆𑀢𑀓𑀫𑁆𑀧𑀺 𑀲𑀘𑁂 𑀧𑀝𑀺𑀲𑀸𑀫𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄.

𑁨𑁯𑁧-𑁨. 𑀧𑀺𑀢𑀽𑀦𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀦𑀁. 𑀲𑀸𑀝𑀓𑀸𑀤𑀺𑀓𑀧𑁆𑀧𑀺𑀬𑀁 𑀯𑀢𑁆𑀣𑀼𑀁. ‘‘𑀧𑀝𑀺𑀲𑀸𑀫𑁂𑀢𑁆𑀯𑀸 𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀸𑀢𑁂𑀢𑁆𑀯𑀸𑀦 𑀕𑀢𑁂 𑀬𑀲𑁆𑀫𑀸 𑀅𑀚𑁆𑀛𑀸𑀭𑀸𑀫𑀲𑀺𑀓𑁆𑀔𑀸𑀧𑀤𑀯𑀲𑁂𑀦 (𑀧𑀸𑀘𑀺. 𑁫𑁦𑁫-𑁫𑁦𑁬) 𑀧𑀮𑀺𑀩𑁄𑀥𑁄, 𑀢𑀲𑁆𑀫𑀸 𑀕𑁄𑀧𑀺𑀢𑀼𑀁 𑀮𑀩𑁆𑀪𑀦𑁆𑀢𑀺 𑀅𑀢𑁆𑀣𑁄.

𑁨𑁯𑁩-𑁪. 𑀲𑀓𑀁 𑀯𑀸𑀲𑀺𑀆𑀤𑀺𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀁 𑀞𑀸𑀦𑀁 𑀕𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀩𑁆𑀩𑀁. ‘‘𑀏𑀢𑁆𑀣 𑀞𑀧𑁂𑀣𑀸’’𑀢𑀺 𑀧𑀦 𑀦 𑀯𑀢𑁆𑀢𑀩𑁆𑀩𑀁.

𑁨𑁯𑁫. 𑀏𑀢𑁆𑀣 ‘‘𑀅𑀜𑁆𑀜𑁄 𑀓𑁄𑀘𑀺 𑀦 𑀧𑀯𑀺𑀲𑀢𑀺, 𑀪𑀺𑀓𑁆𑀔𑀽𑀳𑀺 𑀯𑀸 𑀲𑀸𑀫𑀡𑁂𑀭𑁂𑀳𑀺 𑀯𑀸 𑀕𑀳𑀺𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀗𑁆𑀓𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀯𑀢𑁆𑀣𑀼𑀫𑁆𑀳𑀻𑀢𑀺 𑀅𑀮𑀗𑁆𑀓𑀸𑀭𑀸𑀤𑀺𑀯𑀢𑁆𑀣𑀼𑀫𑁆𑀳𑀻𑀢𑀺 𑀅𑀢𑁆𑀣𑁄. 𑀢𑀸𑀤𑀺𑀲𑁂𑀢𑀺 𑀬𑀸𑀤𑀺𑀲𑁂 𑀯𑀢𑁆𑀣𑀼𑀫𑁆𑀳𑀺 𑀦𑀝𑁆𑀞𑁂 𑀆𑀲𑀗𑁆𑀓𑀸 𑀳𑁄𑀢𑀺, 𑀢𑀸𑀤𑀺𑀲𑁂 𑀯𑀢𑁆𑀣𑀼𑀫𑁆𑀳𑀺 𑀦𑀝𑁆𑀞𑁂𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁯𑁬. 𑀇𑀤𑀸𑀦𑀺 𑀅𑀲𑀗𑁆𑀓𑀺𑀢𑀩𑁆𑀩𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀳𑀸𑀭𑀸𑀯𑀲𑀣𑀲𑁆𑀲𑀦𑁆𑀢𑁄’’𑀢𑀺𑀆𑀤𑀺𑀫𑀸𑀳. 𑀯𑀺𑀳𑀸𑀭𑀲𑁆𑀲 𑀘 𑀖𑀭𑀲𑁆𑀲 𑀘𑀸𑀢𑀺 𑀅𑀢𑁆𑀣𑁄. 𑀭𑀢𑀦𑀦𑁆𑀢𑀺 𑀤𑀲𑀯𑀺𑀥𑀁 𑀭𑀢𑀦𑀁. 𑀭𑀢𑁆𑀦𑀲𑀫𑁆𑀫𑀢𑀦𑁆𑀢𑀺 𑀲𑀸𑀝𑀓𑀯𑁂𑀞𑀦𑀸𑀤𑀺𑀓𑀁. 𑀕𑀳𑁂𑀢𑁆𑀯𑀸𑀦𑀸𑀢𑀺 𑀓𑀧𑁆𑀧𑀺𑀬𑀓𑀸𑀭𑀓𑁂 𑀅𑀲𑀢𑀺 𑀅𑀢𑁆𑀢𑀦𑀸𑀧𑀺 𑀕𑀳𑁂𑀢𑁆𑀯𑀸𑀦 𑀦𑀺𑀓𑁆𑀔𑀺𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀫𑀕𑁆𑀕𑁂𑀭𑀜𑁆𑀜𑁂𑀧𑀻𑀢𑀺 𑀫𑀕𑁆𑀕𑁂𑀧𑀺 𑀅𑀭𑀜𑁆𑀜𑁂𑀧𑀺. 𑀢𑀸𑀤𑀺𑀲𑁂𑀢𑀺 ‘‘𑀪𑀺𑀓𑁆𑀔𑀽𑀳𑀺 𑀕𑀳𑀺𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀲𑀗𑁆𑀓𑀺𑀢𑀩𑁆𑀩𑀝𑁆𑀞𑀸𑀦𑁂. 𑀧𑀢𑀺𑀭𑀽𑀧𑀁 𑀓𑀭𑀻𑀬𑀢𑀻𑀢𑀺 𑀫𑀕𑁆𑀕𑁂 𑀯𑀸 𑀅𑀭𑀜𑁆𑀜𑁂 𑀯𑀸 𑀢𑀸𑀤𑀺𑀲𑀁 𑀪𑀡𑁆𑀟𑀁 𑀧𑀲𑁆𑀲𑀺𑀢𑁆𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀲𑀸𑀫𑀺𑀓𑁂𑀲𑀼 𑀆𑀕𑀢𑁂𑀲𑀼 𑀢𑀁 𑀞𑀸𑀦𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀲𑀘𑁂 𑀲𑀸𑀫𑀺𑀓𑁂 𑀦 𑀧𑀲𑁆𑀲𑀢𑀺, 𑀭𑀢𑀦𑀲𑀫𑁆𑀫𑀢𑀁 𑀧𑀁𑀲𑀼𑀓𑀽𑀮𑀁 𑀕𑀳𑁂𑀢𑀩𑁆𑀩𑀁. 𑀭𑀢𑀦𑀜𑁆𑀘𑁂 𑀳𑁄𑀢𑀺, 𑀢𑀼𑀡𑁆𑀳𑀻𑀪𑀽𑀢𑁂𑀦 𑀕𑀦𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀅𑀬𑀁 𑀫𑀕𑁆𑀕𑀸𑀭𑀜𑁆𑀜𑀓𑁂𑀲𑀼 𑀧𑀝𑀺𑀧𑀢𑁆𑀢𑀺. 𑀯𑀺𑀳𑀸𑀭𑀸𑀯𑀲𑀣𑀸𑀦𑀁 𑀧𑀦 𑀅𑀦𑁆𑀢𑁄 𑀢𑀸𑀤𑀺𑀲𑀁 𑀤𑀺𑀲𑁆𑀯𑀸 𑀪𑀡𑁆𑀟𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 ‘‘𑀏𑀢𑁆𑀣 𑀏𑀢𑁆𑀢𑀓𑀸 𑀓𑀳𑀸𑀧𑀡𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀭𑀽𑀧𑁂𑀦 𑀯𑀸 𑀮𑀜𑁆𑀙𑀦𑀸𑀬 𑀯𑀸 𑀧𑀺𑀮𑁄𑀢𑀺𑀓𑀸𑀬 𑀯𑀸 𑀲𑀜𑁆𑀜𑀸𑀡𑀁 𑀓𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀢𑀢𑁄 𑀧𑀓𑁆𑀓𑀫𑀦𑁆𑀢𑁂𑀦 𑀧𑀢𑀺𑀭𑀽𑀧𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀉𑀕𑁆𑀕𑀳𑀯𑀺𑀦𑀺𑀘𑁆𑀙𑀬𑁄.

𑀉𑀕𑁆𑀕𑀳𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.