𑁨𑁪. 𑀅𑀜𑁆𑀚𑀦𑀻𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁮𑁨. 𑀯𑀝𑁆𑀝𑀸 𑀯𑀸 𑀅𑀝𑁆𑀞𑀲𑁄𑀴𑀲𑀁𑀲𑀸 𑀯𑀸 𑀫𑀝𑁆𑀞𑀸 𑀧𑀼𑀧𑁆𑀨𑀮𑀢𑀸𑀤𑀻𑀳𑀺 𑀅𑀘𑀺𑀢𑁆𑀢𑀓𑀸 𑀅𑀜𑁆𑀚𑀦𑀻 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀢𑀺𑀲𑁆𑀲𑁄𑀧𑀺 𑀯𑀝𑁆𑀝𑀦𑁆𑀢𑀺, 𑀏𑀓𑀸𑀬 𑀯𑀸 𑀤𑁆𑀯𑀻𑀲𑀼 𑀯𑀸 𑀓𑀣𑀸 𑀏𑀯 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀮𑁂𑀔𑀸𑀢𑀺 𑀯𑀝𑁆𑀝𑀮𑁂𑀔𑀸. 𑀩𑀦𑁆𑀥𑀺𑀢𑀼𑀦𑁆𑀢𑀺 𑀧𑀺𑀥𑀸𑀦𑀓𑀩𑀦𑁆𑀥𑀦𑀢𑁆𑀣𑀁.

𑁧𑁮𑁩. 𑀭𑀽𑀧𑀦𑁆𑀢𑀺 𑀲𑀓𑀼𑀡𑀭𑀽𑀧𑀸𑀤𑀺. 𑀬𑀤𑀺 𑀘 𑀏𑀤𑀺𑀲𑀁 𑀅𑀜𑁆𑀜𑁂𑀳𑀺 𑀓𑀢𑀁 𑀮𑀪𑀢𑀺, 𑀖𑀁𑀲𑀺𑀢𑁆𑀯𑀸 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀬𑀣𑀸 𑀯𑀸 𑀦 𑀧𑀜𑁆𑀜𑀸𑀬𑀢𑀺, 𑀢𑀣𑀸 𑀲𑀼𑀢𑁆𑀢𑁂𑀦 𑀯𑁂𑀞𑁂𑀢𑁆𑀯𑀸 𑀯𑀴𑀜𑁆𑀚𑁂𑀢𑀩𑁆𑀩𑀁.

𑁧𑁮𑁪. 𑀣𑀯𑀺𑀓𑀸𑀢𑀺 𑀅𑀜𑁆𑀚𑀦𑀺𑀣𑀯𑀺𑀓𑀸. 𑀅𑀜𑁆𑀚𑀦𑀺𑀲𑀮𑀸𑀓𑀸𑀧𑀺 𑀮𑀩𑁆𑀪𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁮𑁫-𑁬. 𑀅𑀝𑁆𑀞𑀻𑀢𑀺 (𑀫𑀳𑀸𑀯. 𑁨𑁬𑁬; 𑀫𑀳𑀸𑀯. 𑀅𑀝𑁆𑀞. 𑁨𑁬𑁪) 𑀫𑀦𑀼𑀲𑁆𑀲𑀝𑁆𑀞𑀺𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀝𑁆𑀞𑀺. 𑀯𑀺𑀲𑀸𑀡𑀤𑀦𑁆𑀢𑁂𑀲𑀼 𑀅𑀓𑀧𑁆𑀧𑀺𑀬𑀁 𑀦𑀸𑀫 𑀦𑀢𑁆𑀣𑀺. 𑀆𑀫𑀮𑀓𑀓𑀓𑁆𑀓𑀸𑀤𑀻𑀳𑀺 𑀓𑀢𑀸 𑀨𑀮𑀫𑀬𑀸. 𑀢𑀫𑁆𑀫𑀬𑀸𑀢𑀺 𑀇𑀥 𑀯𑀼𑀢𑁆𑀢𑁂𑀳𑁂𑀯 𑀦𑀺𑀩𑁆𑀩𑀢𑁆𑀢𑀸. 𑀅𑀜𑁆𑀚𑀦𑀻𑀯𑀺𑀦𑀺𑀘𑁆𑀙𑀬𑁄.

𑀅𑀜𑁆𑀚𑀦𑀻𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.