𑁨𑁫. 𑀅𑀓𑀧𑁆𑀧𑀺𑀬𑀲𑀬𑀦𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁮𑁭-𑁯. ‘‘𑀉𑀘𑁆𑀘𑀓𑁄 𑀆𑀲𑀦𑁆𑀤𑀺𑀓𑁄 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺, 𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀉𑀘𑁆𑀘𑀓𑀫𑁆𑀧𑀺 𑀆𑀲𑀦𑁆𑀤𑀺𑀓’’𑀦𑁆𑀢𑀺 (𑀘𑀽𑀴𑀯. 𑁨𑁯𑁭) 𑀯𑀘𑀦𑀢𑁄 𑀫𑀜𑁆𑀘𑀲𑁆𑀲 𑀉𑀧𑀟𑁆𑀠𑀪𑀸𑀕𑀧𑁆𑀧𑀫𑀸𑀡𑁂𑀦 𑀏𑀓𑀢𑁄𑀪𑀸𑀕𑁂𑀦 𑀤𑀻𑀖𑀫𑁆𑀧𑀺 𑀲𑀼𑀕𑀢𑀗𑁆𑀕𑀼𑀮𑁂𑀦 𑀅𑀢𑀺𑀭𑁂𑀓𑀝𑁆𑀞𑀗𑁆𑀕𑀼𑀮𑀧𑀸𑀤𑀓𑀁 𑀇𑀥 𑀆𑀲𑀦𑁆𑀤𑀻𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀘𑀢𑀼𑀭𑀁𑀲𑀸𑀲𑀦𑁆𑀤𑀺𑀓𑁄 𑀧𑀦 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀓𑁄𑀧𑀺 𑀯𑀝𑁆𑀝𑀢𑀺. 𑀢𑀽𑀮𑀻𑀢𑀺 𑀧𑀓𑀢𑀺𑀢𑀽𑀮𑀺𑀓𑀸. 𑀧𑀮𑁆𑀮𑀗𑁆𑀓𑁄𑀦𑀸𑀫 𑀆𑀳𑀭𑀺𑀫𑁂𑀳𑀺 𑀯𑀸𑀴𑁂𑀳𑀺 𑀓𑀢𑁄𑀢𑀺 𑀯𑀼𑀢𑁆𑀢𑁄. 𑀢𑀢𑁆𑀣𑁂𑀯 ‘‘𑀲𑀻𑀳𑀭𑀽𑀧𑀸𑀤𑀺𑀁 𑀤𑀲𑁆𑀲𑁂𑀢𑁆𑀯𑀸 𑀓𑀢𑁄 𑀧𑀦 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀧𑀝𑀺𑀓𑀦𑁆𑀢𑀺 𑀲𑁂𑀢𑀢𑁆𑀣𑀭𑀡𑀁. 𑀕𑁄𑀦𑀘𑀺𑀢𑁆𑀢𑀓𑀦𑁆𑀢𑀺 𑀏𑀢𑁆𑀣 𑀘𑀢𑀼𑀭𑀗𑁆𑀕𑀼𑀮𑀸𑀥𑀺𑀓𑀮𑁄𑀫𑁄 𑀓𑁄𑀚𑀯𑁄 ‘‘𑀕𑁄𑀦𑀓𑁄’’𑀢𑀺 𑀯𑀼𑀘𑁆𑀘𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑁄𑀚𑀯’’𑀦𑁆𑀢𑀺 (𑀫𑀳𑀸𑀯. 𑁩𑁩𑁭) 𑀘𑀻𑀯𑀭𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀢𑁆𑀢𑀸 𑀘𑀢𑀼𑀭𑀗𑁆𑀕𑀼𑀮𑀮𑁄𑀫𑀓𑀁 𑀧𑀓𑀢𑀺𑀓𑁄𑀚𑀯𑀁 𑀯𑀝𑁆𑀝𑀢𑀺. 𑀭𑀢𑀦𑀘𑀺𑀢𑁆𑀢𑀁 𑀘𑀺𑀢𑁆𑀢𑀓𑀁 𑀦 𑀯𑀝𑁆𑀝𑀢𑀺. 𑀧𑀝𑀮𑀻𑀢𑀺 𑀖𑀦𑀧𑀼𑀧𑁆𑀨𑀭𑀢𑁆𑀢𑀅𑀢𑁆𑀣𑀭𑀡𑀁. 𑀯𑀺𑀓𑀢𑀻𑀢𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀭𑀽𑀧𑀯𑀺𑀘𑀺𑀢𑁆𑀢𑁄 𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑀓𑁄. 𑀉𑀤𑁆𑀤𑀮𑁄𑀫𑀻𑀢𑀺 𑀏𑀓𑀢𑁄𑀉𑀕𑁆𑀕𑀢𑀧𑀼𑀧𑁆𑀨𑀁. 𑀏𑀓𑀦𑁆𑀢𑀮𑁄𑀫𑀺𑀓𑀸𑀢𑀺 𑀉𑀪𑀢𑁄𑀉𑀕𑁆𑀕𑀢𑀧𑀼𑀧𑁆𑀨𑀁.

𑀓𑀼𑀢𑁆𑀢𑀦𑁆𑀢𑀺 𑀲𑁄𑀴𑀲𑀦𑁆𑀦𑀁 𑀦𑀸𑀝𑀓𑀺𑀢𑁆𑀣𑀻𑀦𑀁 𑀞𑀢𑁆𑀯𑀸 𑀦𑀘𑁆𑀘𑀦𑀬𑁄𑀕𑁆𑀕𑀁 𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑀁. 𑀓𑁄𑀲𑁂𑀬𑁆𑀬𑀦𑁆𑀢𑀺 𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀁 𑀓𑁄𑀲𑁂𑀬𑁆𑀬𑀲𑀼𑀢𑁆𑀢𑀫𑀬𑀁 𑀧𑀘𑁆𑀘𑀢𑁆𑀣𑀭𑀡𑀁. 𑀓𑀝𑁆𑀝𑀺𑀲𑁆𑀲𑀦𑁆𑀢𑀺 𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀁 𑀓𑁄𑀲𑁂𑀬𑁆𑀬𑀓𑀝𑁆𑀝𑀺𑀲𑁆𑀲𑀫𑀬𑀁 𑀧𑀘𑁆𑀘𑀢𑁆𑀣𑀭𑀡𑀁. 𑀓𑁄𑀲𑁂𑀬𑁆𑀬𑀜𑁆𑀘 𑀓𑀝𑁆𑀝𑀺𑀲𑁆𑀲𑀜𑁆𑀘 𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀸𑀦𑁂𑀯 𑀦 𑀯𑀝𑁆𑀝𑀦𑁆𑀢𑀺, 𑀲𑀼𑀤𑁆𑀥𑀸𑀦𑀺 𑀯𑀝𑁆𑀝𑀦𑁆𑀢𑀺. 𑀳𑀢𑁆𑀣𑀺𑀅𑀲𑁆𑀲𑀭𑀣𑀢𑁆𑀣𑀭𑀸 𑀢𑁂𑀲𑀁 𑀉𑀧𑀭𑀺 𑀅𑀢𑁆𑀣𑀭𑀡𑀓𑀅𑀢𑁆𑀣𑀭𑀡𑀸𑀯. 𑀅𑀚𑀺𑀦𑀧𑁆𑀧𑀯𑁂𑀡𑀻𑀢𑀺 𑀅𑀚𑀺𑀦𑀘𑀫𑁆𑀫𑁂𑀳𑀺 𑀫𑀜𑁆𑀘𑀧𑁆𑀧𑀫𑀸𑀡𑁂𑀦 𑀲𑀺𑀩𑁆𑀩𑀺𑀢𑁆𑀯𑀸 𑀓𑀢𑀸 𑀧𑀯𑁂𑀡𑀻, 𑀢𑁂𑀦 𑀘 𑀓𑀤𑀮𑀻𑀫𑀺𑀕𑀘𑀫𑁆𑀫𑀁 𑀲𑁂𑀢𑀯𑀢𑁆𑀣𑀲𑁆𑀲 𑀉𑀧𑀭𑀺 𑀧𑀢𑁆𑀣𑀭𑀺𑀢𑁆𑀯𑀸 𑀲𑀺𑀩𑁆𑀩𑀺𑀢𑁆𑀯𑀸 𑀓𑀢𑀁 𑀧𑀯𑀭𑀧𑁆𑀧𑀘𑁆𑀘𑀢𑁆𑀣𑀭𑀡𑀁 𑀓𑀤𑀮𑀻𑀫𑀺𑀕𑀧𑁆𑀧𑀯𑀭𑀧𑁆𑀧𑀘𑁆𑀘𑀢𑁆𑀣𑀭𑀡𑀁, 𑀢𑁂𑀦 𑀘 𑀅𑀢𑁆𑀣𑀢𑀁 𑀅𑀚𑀺𑀦𑀧𑁆𑀧𑀯𑁂𑀡𑀻𑀓𑀤𑀮𑀻𑀫𑀺𑀕𑀧𑁆𑀧𑀯𑀭𑀧𑁆𑀧𑀘𑁆𑀘𑀢𑁆𑀣𑀭𑀡𑀢𑁆𑀣𑀢𑀁.

𑀲𑁂𑀢𑀯𑀺𑀢𑀸𑀦𑀫𑁆𑀧𑀺 𑀳𑁂𑀝𑁆𑀞𑀸 𑀅𑀓𑀧𑁆𑀧𑀺𑀬𑀧𑁆𑀧𑀘𑁆𑀘𑀢𑁆𑀣𑀭𑀡𑁂 𑀲𑀢𑀺 𑀦 𑀯𑀝𑁆𑀝𑀢𑀺, 𑀓𑀧𑁆𑀧𑀺𑀬𑀧𑁆𑀧𑀘𑁆𑀘𑀢𑁆𑀣𑀭𑀡𑁂 𑀲𑀢𑀺 𑀯𑀝𑁆𑀝𑀢𑀺, 𑀭𑀢𑁆𑀢𑀯𑀺𑀢𑀸𑀦𑀲𑁆𑀲 𑀳𑁂𑀝𑁆𑀞𑀸 𑀓𑀧𑁆𑀧𑀺𑀬𑀧𑁆𑀧𑀘𑁆𑀘𑀢𑁆𑀣𑀭𑀡𑁂 𑀲𑀢𑀺𑀧𑀺 𑀦 𑀯𑀝𑁆𑀝𑀢𑀺 𑀏𑀯. 𑀲𑀻𑀲𑀽𑀧𑀥𑀸𑀦𑀁 𑀧𑀸𑀤𑀽𑀧𑀥𑀸𑀦𑀦𑁆𑀢𑀺 𑀫𑀜𑁆𑀘𑀲𑁆𑀲 𑀉𑀪𑀢𑁄𑀮𑁄𑀳𑀺𑀢𑀓𑀁 𑀉𑀧𑀥𑀸𑀦𑀁 𑀦 𑀯𑀝𑁆𑀝𑀢𑀺. 𑀬𑀁 𑀧𑀦 𑀏𑀓𑀫𑁂𑀯 𑀉𑀧𑀥𑀸𑀦𑀁 𑀳𑁄𑀢𑀺, 𑀉𑀪𑁄𑀲𑀼 𑀅𑀦𑁆𑀢𑁂𑀲𑀼 𑀭𑀢𑁆𑀢𑀁 𑀯𑀸 𑀧𑀤𑀼𑀫𑀯𑀡𑁆𑀡𑀁 𑀯𑀸 𑀘𑀺𑀢𑁆𑀢𑀁 𑀯𑀸, 𑀲𑀘𑁂 𑀧𑀫𑀸𑀡𑀬𑀼𑀢𑁆𑀢𑀁, 𑀯𑀝𑁆𑀝𑀢𑀺, 𑀫𑀳𑀸𑀉𑀧𑀥𑀸𑀦𑀁 𑀧𑀦 𑀧𑀝𑀺𑀓𑁆𑀔𑀺𑀢𑁆𑀢𑀁.

𑁧𑁯𑁦. 𑀆𑀲𑀦𑁆𑀤𑀸𑀤𑀺𑀢𑁆𑀢𑀬𑀸𑀢𑀺 𑀆𑀲𑀦𑁆𑀤𑀻 𑀢𑀽𑀮𑀻 𑀧𑀮𑁆𑀮𑀗𑁆𑀓𑁄𑀢𑀺 𑀇𑀤𑀁 𑀢𑀬𑀁 𑀦𑀸𑀫𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀞𑀧𑁂𑀢𑁆𑀯𑀸 𑀢𑀻𑀡𑀺 𑀆𑀲𑀦𑁆𑀤𑀺𑀁 𑀧𑀮𑁆𑀮𑀗𑁆𑀓𑀁 𑀢𑀽𑀮𑀺𑀓𑀁 𑀲𑁂𑀲𑀓𑀁 𑀕𑀺𑀳𑀺𑀯𑀺𑀓𑀝𑀁 𑀅𑀪𑀺𑀦𑀺𑀲𑀻𑀤𑀺𑀢𑀼𑀁, 𑀦 𑀢𑁆𑀯𑁂𑀯 𑀅𑀪𑀺𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁩𑁧𑁪) 𑀳𑀺 𑀯𑀼𑀢𑁆𑀢𑀁. 𑀲𑁂𑀲𑁂 𑀕𑀺𑀳𑀺𑀲𑀦𑁆𑀢𑀓𑁂 𑀦𑀺𑀲𑀻𑀤𑀺𑀢𑀼𑀁 𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. 𑀬𑀤𑀺 𑀥𑀫𑁆𑀫𑀸𑀲𑀦𑁂 𑀲𑀗𑁆𑀖𑀺𑀓𑀫𑁆𑀧𑀺 𑀕𑁄𑀦𑀓𑀸𑀤𑀺𑀁 𑀪𑀺𑀓𑁆𑀔𑀽𑀳𑀺 𑀅𑀦𑀸𑀡𑀢𑁆𑀢𑀸 𑀆𑀭𑀸𑀫𑀺𑀓𑀸𑀤𑀬𑁄 𑀲𑀬𑀫𑁂𑀯 𑀧𑀜𑁆𑀜𑀧𑁂𑀦𑁆𑀢𑀺 𑀘𑁂𑀯 𑀦𑀻𑀳𑀭𑀦𑁆𑀢𑀺 𑀘, 𑀏𑀢𑀁 𑀕𑀺𑀳𑀺𑀯𑀺𑀓𑀝𑀦𑀻𑀳𑀸𑀭𑀁 𑀦𑀸𑀫, 𑀇𑀫𑀺𑀦𑀸 𑀕𑀺𑀳𑀺𑀯𑀺𑀓𑀝𑀦𑀻𑀳𑀸𑀭𑁂𑀦 𑀯𑀝𑁆𑀝𑀢𑀺. 𑀪𑀢𑁆𑀢𑀕𑁆𑀕𑀁 𑀦𑀸𑀫 𑀯𑀺𑀳𑀸𑀭𑁂 𑀏𑀯 𑀤𑀸𑀦𑀝𑁆𑀞𑀸𑀦𑀁.

𑁧𑁯𑁧. 𑀘𑀢𑀼𑀦𑁆𑀦𑀁 𑀧𑀸𑀤𑀸𑀦𑀁, 𑀢𑀻𑀲𑀼 𑀧𑀲𑁆𑀲𑁂𑀲𑀼 𑀅𑀧𑀲𑁆𑀲𑀬𑀸𑀦𑀜𑁆𑀘 𑀯𑀲𑁂𑀦 𑀲𑀢𑁆𑀢𑀗𑁆𑀕𑁄. 𑀏𑀓𑀧𑀲𑁆𑀲𑁂𑀦 𑀬𑀼𑀢𑁆𑀢𑁄 𑀧𑀜𑁆𑀘𑀗𑁆𑀕𑁄. 𑀇𑀫𑁂 𑀧𑀦 𑀲𑀢𑁆𑀢𑀗𑁆𑀕𑀧𑀜𑁆𑀘𑀗𑁆𑀕𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀘𑁆𑀘𑀓𑀫𑁆𑀧𑀺 𑀲𑀢𑁆𑀢𑀗𑁆𑀕’’𑀦𑁆𑀢𑀺 (𑀘𑀽𑀴𑀯. 𑁨𑁯𑁪) 𑀯𑀼𑀢𑁆𑀢𑀢𑁆𑀢𑀸 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀸𑀧𑀺 𑀯𑀝𑁆𑀝𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀘𑁆𑀘𑀧𑀸𑀤𑀓𑀸’’𑀢𑀺. 𑀢𑀽𑀮𑁄𑀦𑀤𑁆𑀥𑀸 𑀫𑀜𑁆𑀘𑀧𑀻𑀞𑀸 𑀖𑀭𑁂𑀬𑁂𑀯 𑀦𑀺𑀲𑀻𑀤𑀺𑀢𑀼𑀁 𑀓𑀧𑁆𑀧𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁯𑁨. 𑀘𑀻𑀯𑀭𑀘𑁆𑀙𑀯𑀺𑀬𑁄𑀢𑀺 𑀙𑀦𑁆𑀦𑀁 𑀘𑀻𑀯𑀭𑀸𑀦𑀁, 𑀙𑀦𑁆𑀦𑀁 𑀅𑀦𑀼𑀮𑁄𑀫𑀘𑀻𑀯𑀭𑀸𑀦𑀜𑁆𑀘 𑀅𑀜𑁆𑀜𑀢𑀭𑀘𑀻𑀯𑀭𑀘𑁆𑀙𑀯𑀺𑀬𑁄𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀫𑀜𑁆𑀘𑁂𑀧𑀺 𑀧𑀻𑀞𑁂𑀧𑀺 𑀪𑀢𑁆𑀢𑀕𑁆𑀕𑁂𑀧𑀺 𑀅𑀦𑁆𑀢𑀭𑀖𑀭𑁂𑀧𑀻𑀢𑀺 𑀅𑀢𑁆𑀣𑁄. 𑀇𑀫𑀸𑀲𑀁 𑀧𑀦 𑀪𑀺𑀲𑀻𑀦𑀁 𑀧𑀫𑀸𑀡𑀧𑀭𑀺𑀘𑁆𑀙𑁂𑀤𑁄𑀧𑀺 𑀦𑀢𑁆𑀣𑀺, 𑀫𑀜𑁆𑀘𑀧𑀻𑀞𑀸𑀤𑀻𑀦𑀁 𑀯𑀲𑁂𑀦 𑀅𑀦𑀼𑀭𑀽𑀧𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀫𑀸𑀡𑀁 𑀓𑀸𑀢𑀩𑁆𑀩𑀁.

𑁧𑁯𑁩. ‘‘𑀢𑀽𑀮𑀺𑀓𑀸 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀺𑀚𑀝𑁂𑀢𑁆𑀯𑀸 𑀩𑀺𑀫𑁆𑀩𑁄𑀳𑀦𑀁 𑀓𑀸𑀢𑀼𑀁, 𑀢𑀻𑀡𑀺 𑀢𑀽𑀮𑀸𑀦𑀺 𑀭𑀼𑀓𑁆𑀔𑀢𑀽𑀮𑀁 𑀮𑀢𑀸𑀢𑀽𑀮𑀁 𑀧𑁄𑀝𑀓𑀺𑀢𑀽𑀮’’𑀦𑁆𑀢𑀺 (𑀘𑀽𑀴𑀯. 𑁨𑁯𑁭) 𑀯𑀼𑀢𑁆𑀢𑀢𑁆𑀢𑀸 𑀢𑀽𑀮𑀢𑁆𑀢𑀬𑀜𑁆𑀘 (𑀘𑀽𑀴𑀯. 𑀅𑀝𑁆𑀞. 𑁨𑁯𑁭; 𑀓𑀗𑁆𑀔𑀸. 𑀅𑀝𑁆𑀞. 𑀢𑀽𑀮𑁄𑀦𑀦𑁆𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀩𑀺𑀫𑁆𑀩𑁄𑀳𑀦𑁂 𑀯𑀝𑁆𑀝𑀢𑀺. 𑀇𑀫𑁂𑀳𑀺 𑀢𑀻𑀳𑀺 𑀢𑀽𑀮𑁂𑀳𑀺 𑀲𑀩𑁆𑀩𑁂𑀲𑀁 𑀭𑀼𑀓𑁆𑀔𑀮𑀢𑀸𑀢𑀺𑀡𑀸𑀦𑀁 𑀢𑀽𑀮𑀁 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀪𑀺𑀲𑀺𑀬𑀁 𑀧𑀦 𑀓𑀺𑀜𑁆𑀘𑀺 𑀢𑀽𑀮𑀁 𑀦 𑀯𑀝𑁆𑀝𑀢𑀺𑀬𑁂𑀯. 𑀪𑀺𑀲𑀺𑀕𑀩𑁆𑀪𑁄𑀢𑀺 𑀪𑀺𑀲𑀺𑀬𑀸 𑀯𑀼𑀢𑁆𑀢𑀁 𑀘𑁄𑀴𑀸𑀤𑀺𑀧𑀜𑁆𑀘𑀓𑀁 𑀩𑀺𑀫𑁆𑀩𑁄𑀳𑀦𑁂 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀺𑀕𑀧𑀓𑁆𑀔𑀺𑀦𑀦𑁆𑀢𑀺 𑀲𑀻𑀳𑀸𑀤𑀻𑀦𑀁 𑀲𑀩𑁆𑀩𑀘𑀢𑀼𑀧𑁆𑀧𑀤𑀸𑀦𑀁 𑀳𑀁𑀲𑀫𑁄𑀭𑀸𑀤𑀻𑀦𑀁 𑀲𑀩𑁆𑀩𑀧𑀓𑁆𑀔𑀻𑀦𑀁 𑀮𑁄𑀫𑀸𑀦𑀺 𑀓𑀧𑁆𑀧𑀦𑁆𑀢𑀺. 𑀫𑀲𑀽𑀭𑀓𑁂 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁯𑁪. 𑀇𑀤𑀸𑀦𑀺 𑀪𑀺𑀲𑀺𑀬𑀁 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀦𑀼𑀲𑁆𑀲𑀮𑁄𑀫’’𑀦𑁆𑀢𑀺𑀆𑀤𑀺𑀫𑀸𑀳. 𑀉𑀡𑁆𑀡𑀸𑀬𑀦𑁆𑀢𑀺 (𑀘𑀽𑀴𑀯. 𑁨𑁯𑁭; 𑀘𑀽𑀴𑀯. 𑀅𑀝𑁆𑀞. 𑁨𑁯𑁭) 𑀉𑀡𑁆𑀡𑀸𑀪𑀺𑀲𑀺𑀬𑀁 𑀫𑀦𑀼𑀲𑁆𑀲𑀮𑁄𑀫𑀁 𑀦 𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. 𑀉𑀡𑁆𑀡𑀸𑀪𑀺𑀲𑀺𑀬𑀫𑁆𑀧𑀺 𑀫𑀦𑀼𑀲𑁆𑀲𑀮𑁄𑀫𑀁 𑀞𑀧𑁂𑀢𑁆𑀯𑀸 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀧𑀓𑁆𑀔𑀺𑀘𑀢𑀼𑀧𑁆𑀧𑀤𑀸𑀦𑀁 𑀮𑁄𑀫𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀧𑀡𑁆𑀡𑁂𑀢𑀺 𑀧𑀡𑁆𑀡𑀪𑀺𑀲𑀺𑀬𑀜𑁆𑀘 𑀧𑀼𑀧𑁆𑀨𑀜𑁆𑀘 𑀲𑀼𑀤𑁆𑀥𑀁 𑀢𑀫𑀸𑀮𑀧𑀢𑁆𑀢𑀜𑁆𑀘 𑀦 𑀮𑀩𑁆𑀪𑀁, 𑀅𑀯𑀲𑁂𑀲𑀁 𑀬𑀁 𑀓𑀺𑀜𑁆𑀘𑀺 𑀧𑀡𑁆𑀡𑀁 𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. 𑀢𑀫𑀸𑀮𑀧𑀢𑁆𑀢𑀓𑀫𑁆𑀧𑀺 𑀅𑀜𑁆𑀜𑁂𑀳𑀺 𑀫𑀺𑀲𑁆𑀲𑀁 𑀯𑀝𑁆𑀝𑀢𑀻𑀢𑀺. 𑀘𑁄𑀴𑀯𑀸𑀓𑀢𑀺𑀡𑁂𑀲𑀼 𑀅𑀓𑀧𑁆𑀧𑀺𑀬𑀁 𑀦𑀸𑀫 𑀦𑀢𑁆𑀣𑀺. 𑀆𑀲𑀦𑀜𑁆𑀘𑁂𑀯 𑀅𑀧𑁆𑀧𑀝𑀺𑀯𑁂𑀓𑁆𑀔𑀺𑀢𑀁 𑀦 𑀮𑀩𑁆𑀪𑀦𑁆𑀢𑀺 𑀆𑀲𑀦𑀲𑀸𑀫𑀜𑁆𑀜𑀢𑁄 𑀧𑀲𑀗𑁆𑀕𑁂𑀦 𑀯𑀼𑀢𑁆𑀢𑀁. 𑀅𑀓𑀧𑁆𑀧𑀺𑀬𑀲𑀬𑀦𑀯𑀺𑀦𑀺𑀘𑁆𑀙𑀬𑁄.

𑀅𑀓𑀧𑁆𑀧𑀺𑀬𑀲𑀬𑀦𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.