𑁧𑁪. 𑀪𑀽𑀫𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁩𑁬. 𑀇𑀤𑀸𑀦𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀢𑀲𑁆𑀲𑁄 𑀓𑀧𑁆𑀧𑀺𑀬𑀪𑀽𑀫𑀺𑀬𑁄 𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀁 𑀕𑁄𑀦𑀺𑀲𑀸𑀤𑀺𑀓𑀁 𑀕𑀳𑀧𑀢𑀺𑀁 𑀲𑀫𑁆𑀫𑀼𑀢𑀺’’𑀦𑁆𑀢𑀺 (𑀫𑀳𑀸𑀯. 𑁨𑁯𑁫) 𑀏𑀯𑀁 𑀯𑀼𑀢𑁆𑀢𑀸 𑀘𑀢𑀲𑁆𑀲𑁄 𑀓𑀧𑁆𑀧𑀺𑀬𑀪𑀽𑀫𑀺𑀬𑁄 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀫𑀼𑀢𑀼𑀲𑁆𑀲𑀸𑀯𑀦𑀦𑁆𑀢𑀸 𑀘𑀸’’𑀢𑀺𑀆𑀤𑀺𑀫𑀸𑀳. 𑀬𑀸𑀲𑀽𑀢𑀺 𑀓𑀧𑁆𑀧𑀺𑀬𑀪𑀽𑀫𑀻𑀲𑀼 (𑀓𑀗𑁆𑀔𑀸. 𑀅𑀝𑁆𑀞. 𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸).

𑁧𑁩𑁭. 𑀇𑀤𑀸𑀦𑀺 𑀬𑀢𑁆𑀣 𑀓𑀧𑁆𑀧𑀺𑀬𑀓𑀼𑀝𑀺 𑀇𑀘𑁆𑀙𑀺𑀢𑀩𑁆𑀩𑀸, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀸𑀲𑀢𑁆𑀣𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀯𑀸𑀲𑀢𑁆𑀣𑀸𑀬𑀸𑀢𑀺 𑀇𑀫𑀺𑀦𑀸 𑀓𑁄𑀝𑁆𑀞𑀸𑀕𑀸𑀭𑀪𑀢𑁆𑀢𑀲𑀸𑀮𑀸𑀘𑁂𑀢𑀺𑀬𑀖𑀭𑀲𑀫𑁆𑀫𑀼𑀜𑁆𑀚𑀦𑀻𑀫𑀸𑀴𑀓𑀸𑀤𑀺 𑀬𑀁 𑀬𑀁 𑀅𑀜𑁆𑀜𑀫𑁆𑀧𑀺 𑀯𑀸𑀲𑀢𑁆𑀣𑀸𑀬 𑀓𑀭𑀻𑀬𑀢𑀺, 𑀢𑀢𑁆𑀣 𑀢𑀢𑁆𑀣 𑀓𑀧𑁆𑀧𑀺𑀬𑀓𑀼𑀝𑀺𑀓𑀭𑀡𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀪𑁄𑀚𑀦𑀲𑀸𑀮𑀸 𑀧𑀦 𑀲𑁂𑀦𑀸𑀲𑀦𑀫𑁂𑀯, 𑀢𑀲𑁆𑀫𑀸 𑀢𑀢𑁆𑀣 𑀓𑀸𑀢𑀩𑁆𑀩𑀸 𑀏𑀯𑀸𑀢𑀺 𑀯𑀤𑀦𑁆𑀢𑀺. 𑀲𑀗𑁆𑀖𑀺𑀓𑁂𑀯𑁂𑀓𑀲𑀦𑁆𑀢𑀓𑁂𑀢𑀺 𑀏𑀢𑁆𑀣 𑀏𑀓𑀲𑀦𑁆𑀢𑀓𑁄 𑀉𑀧𑀲𑀫𑁆𑀧𑀦𑁆𑀦𑀲𑀦𑁆𑀢𑀓𑁄𑀯 𑀯𑁂𑀤𑀺𑀢𑀩𑁆𑀩𑁄.

𑁧𑁩𑁮. 𑀇𑀤𑀸𑀦𑀺 𑀓𑀢𑁆𑀢𑀩𑁆𑀩𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀕𑁂𑀳𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀗𑁆𑀖𑀲𑁆𑀲 𑀯𑀸 𑀏𑀓𑀲𑁆𑀲 𑀯𑀸 𑀕𑁂𑀳𑁂 𑀯𑀺𑀳𑀸𑀭𑁂 𑀓𑀭𑀺𑀬𑀫𑀸𑀦𑁂 𑀏𑀯𑀁 𑀈𑀭𑀬𑀁 ‘‘𑀓𑀧𑁆𑀧𑀺𑀬𑀓𑀼𑀝𑀺𑀁 𑀓𑀭𑁄𑀫, 𑀓𑀧𑁆𑀧𑀺𑀬𑀓𑀼𑀝𑀺𑀁 𑀓𑀭𑁄𑀫𑀸’’𑀢𑀺 𑀯𑀸 ‘‘𑀓𑀧𑁆𑀧𑀺𑀬𑀓𑀼𑀝𑀺 𑀓𑀧𑁆𑀧𑀺𑀬𑀓𑀼𑀝𑀻’’𑀢𑀺 𑀯𑀸 𑀯𑀤𑀦𑁆𑀢𑁄 𑀧𑀞𑀫𑀺𑀝𑁆𑀞𑀓𑀢𑁆𑀣𑀫𑁆𑀪𑀸𑀤𑀺𑀁 𑀞𑀧𑁂𑀬𑁆𑀬, 𑀏𑀯𑀁 𑀓𑀢𑀸 𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀸 𑀦𑀸𑀫, 𑀏𑀯𑀁 𑀉𑀤𑀸𑀳𑀭𑀺𑀢𑀯𑀘𑀦𑀦𑁆𑀢𑀺𑀓𑀸𑀢𑀺 𑀅𑀢𑁆𑀣𑁄.

𑁧𑁩𑁯. 𑀬𑁂𑀪𑀼𑀬𑁆𑀬𑁂𑀦 𑀯𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑁄, 𑀲𑀓𑀮𑁄𑀧𑀺 𑀯𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀆𑀭𑀸𑀫𑁄 ‘‘𑀕𑁄𑀦𑀺𑀲𑀸𑀤𑀻’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀧𑀦 𑀲𑁂𑀦𑀸𑀲𑀦𑁂𑀲𑀼 𑀧𑀭𑀺𑀓𑁆𑀔𑀺𑀢𑁆𑀢𑁂𑀲𑀼𑀧𑀺 𑀆𑀭𑀸𑀫𑁂 𑀅𑀧𑀭𑀺𑀓𑁆𑀔𑀺𑀢𑁆𑀢𑁂 𑀓𑀧𑁆𑀧𑀺𑀬𑀓𑀼𑀝𑀺𑀓𑀭𑀡𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀲𑀫𑁆𑀫𑀼𑀢𑀺𑀁 𑀓𑀭𑁄𑀦𑁆𑀢𑁂𑀳𑀺 𑀓𑀢𑀁 𑀧𑀭𑀺𑀬𑁄𑀲𑀺𑀢𑀁 ‘‘𑀇𑀫𑀁 𑀯𑀺𑀳𑀸𑀭𑀁 𑀅𑀟𑁆𑀠𑀬𑁄𑀕𑀁 𑀧𑀸𑀲𑀸𑀤𑀁 𑀳𑀫𑁆𑀫𑀺𑀬𑀁 𑀕𑀼𑀳𑀁 𑀢𑀺𑀡𑀓𑀼𑀝𑀺𑀓𑀁 𑀫𑀡𑁆𑀟𑀧’’𑀦𑁆𑀢𑀺 𑀢𑁂𑀲𑀁 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲𑀸 𑀓𑀼𑀝𑀺𑀬𑀸 𑀳𑀢𑁆𑀣𑀧𑀸𑀲𑁂 𑀯𑀸 𑀞𑀢𑁆𑀯𑀸, 𑀢𑀲𑁆𑀲𑀸 𑀅𑀦𑁆𑀢𑁄 𑀯𑀸 𑀧𑀯𑀺𑀲𑀺𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀁.

𑁧𑁪𑁦. ‘‘𑀪𑀺𑀓𑁆𑀔𑀼𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂𑀳𑀻’’𑀢𑀺 𑀯𑀘𑀦𑀢𑁄 𑀲𑁂𑀲𑀲𑀳𑀥𑀫𑁆𑀫𑀺𑀓𑁂𑀳𑀺𑀧𑀺 𑀤𑁂𑀯𑀫𑀦𑀼𑀲𑁆𑀲𑁂𑀳𑀺𑀧𑀺 𑀅𑀜𑁆𑀜𑁂𑀳𑀺 𑀓𑀧𑁆𑀧𑀺𑀬𑀓𑀼𑀝𑀺𑀬𑀸 𑀅𑀢𑁆𑀣𑀸𑀬 𑀤𑀺𑀦𑁆𑀦𑁄 𑀯𑀸 𑀢𑁂𑀲𑀁 𑀲𑀦𑁆𑀢𑀓𑁄 𑀯𑀸 𑀕𑁂𑀳𑁄 ‘‘𑀕𑀳𑀧𑀢𑀻’’𑀢𑀺 𑀫𑀢𑁄 𑀜𑀸𑀢𑁄𑀢𑀺 𑀅𑀢𑁆𑀣𑁄, 𑀲𑀗𑁆𑀖𑀲𑀦𑁆𑀢𑀓𑀜𑁆𑀘 𑀪𑀺𑀓𑁆𑀔𑀼𑀲𑀦𑁆𑀢𑀓𑀜𑁆𑀘 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂𑀲𑀁 𑀕𑁂𑀳𑁄 𑀕𑀳𑀧𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁪𑁧. 𑀲𑀧𑁆𑀧𑀺𑀆𑀤𑀻𑀳𑀺 𑀫𑀺𑀲𑁆𑀲𑀺𑀢𑀦𑁆𑀢𑀺 𑀲𑀧𑁆𑀧𑀺𑀆𑀤𑀻𑀳𑀺 𑀧𑀜𑁆𑀘𑀳𑀺 𑀘 𑀳𑀮𑀺𑀤𑁆𑀤𑀺𑀲𑀺𑀗𑁆𑀕𑀺𑀯𑁂𑀭𑀸𑀤𑀺𑀬𑀸𑀯𑀚𑀻𑀯𑀺𑀓𑁂𑀦 𑀘𑀸𑀢𑀺 𑀅𑀢𑁆𑀣𑁄. 𑀯𑀚𑁂𑀬𑁆𑀬 𑀅𑀦𑁆𑀢𑁄𑀯𑀼𑀢𑁆𑀣𑀢𑁆𑀢𑀦𑁆𑀢𑀺 𑀏𑀢𑁆𑀣 𑀬𑀸𑀯𑀓𑀸𑀮𑀺𑀓𑀬𑀸𑀫𑀓𑀸𑀮𑀺𑀓𑀲𑀗𑁆𑀔𑀸𑀢𑀁 𑀧𑀼𑀭𑀺𑀫𑀓𑀸𑀮𑀺𑀓𑀤𑁆𑀯𑀬𑀁 𑀲𑀗𑁆𑀖𑀺𑀓𑀁 𑀯𑀸 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀲𑀦𑁆𑀢𑀓𑀁 𑀲𑀬𑀁 𑀓𑀧𑁆𑀧𑀺𑀬𑀓𑀼𑀝𑀺𑀬𑀸 𑀯𑀼𑀢𑁆𑀣𑀫𑁆𑀧𑀺 𑀇𑀢𑀭𑁂𑀳𑀺 𑀅𑀓𑀧𑁆𑀧𑀺𑀬𑀓𑀼𑀝𑀺𑀬𑀸 𑀯𑀼𑀢𑁆𑀣𑁂𑀳𑀺 𑀫𑀺𑀲𑁆𑀲𑀺𑀢𑀁 𑀅𑀦𑁆𑀢𑁄𑀯𑀼𑀢𑁆𑀣𑀪𑀸𑀯𑀁 𑀆𑀕𑀘𑁆𑀙𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁧𑁪𑁨. 𑀢𑁂𑀳𑁂𑀯𑀸𑀢𑀺 𑀅𑀓𑀧𑁆𑀧𑀺𑀬𑀓𑀼𑀝𑀺𑀬𑀁 𑀯𑀼𑀢𑁆𑀣𑀲𑀧𑁆𑀧𑀺𑀢𑁂𑀮𑀸𑀤𑀻𑀳𑀺. 𑀲𑀸𑀫𑀧𑀸𑀓𑀢𑀦𑁆𑀢𑀺 𑀲𑀸𑀫𑀁𑀧𑀓𑁆𑀓𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

𑁧𑁪𑁩-𑁪. 𑀇𑀫𑀸 𑀧𑀦 𑀓𑀧𑁆𑀧𑀺𑀬𑀓𑀼𑀝𑀺𑀬𑁄 𑀬𑀤𑀸 𑀚𑀳𑀺𑀢𑀯𑀢𑁆𑀣𑀼𑀓𑀸 𑀳𑁄𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀸’’𑀢𑀺𑀆𑀤𑀺𑀫𑀸𑀳. 𑀲𑀘𑁂 𑀣𑀫𑁆𑀪𑁂 𑀯𑀸 𑀪𑀺𑀢𑁆𑀢𑀺𑀧𑀸𑀤𑁂 𑀯𑀸 𑀧𑀭𑀺𑀯𑀢𑁆𑀢𑁂𑀦𑁆𑀢𑀺, 𑀬𑁄 𑀬𑁄 𑀞𑀺𑀢𑁄, 𑀢𑀢𑁆𑀣 𑀢𑀢𑁆𑀣 𑀧𑀢𑀺𑀝𑁆𑀞𑀸𑀢𑀺, 𑀏𑀢𑁂𑀦𑀼𑀧𑀸𑀬𑁂𑀦 𑀲𑀩𑁆𑀩𑁂𑀲𑀼 𑀧𑀭𑀺𑀯𑀢𑁆𑀢𑁂𑀲𑀼𑀧𑀺 𑀦 𑀯𑀺𑀚𑀳𑀺𑀢𑀯𑀢𑁆𑀣𑀼𑀓𑀸𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀓𑁆𑀔𑀺𑀢𑁆𑀢𑁂 𑀕𑁄𑀦𑀺𑀲𑀸𑀤𑀺 𑀯𑀺𑀚𑀳𑀺𑀢𑀯𑀢𑁆𑀣𑀼𑀓𑀸. 𑀲𑁂𑀲𑀸 𑀙𑀤𑀦𑀯𑀺𑀩𑁆𑀪𑀫𑀸𑀢𑀺 𑀙𑀤𑀦𑀯𑀺𑀦𑀸𑀲𑀸 𑀚𑀳𑀺𑀢𑀯𑀢𑁆𑀣𑀼𑀓𑀸 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀽𑀫𑀺𑀯𑀺𑀦𑀺𑀘𑁆𑀙𑀬𑁄.

𑀪𑀽𑀫𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.