𑁧𑁫. 𑀉𑀧𑀚𑁆𑀛𑀸𑀘𑀭𑀺𑀬𑀯𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁪𑁫. 𑀉𑀧𑀚𑁆𑀛𑀸𑀘𑀭𑀺𑀬𑁂𑀢𑀺 𑀏𑀢𑁆𑀣 (𑀫𑀳𑀸𑀯. 𑁬𑁪, 𑁬𑁭, 𑁭𑁪, 𑁭𑁮-𑁭𑁯; 𑀘𑀽𑀴𑀯. 𑁩𑁭𑁫, 𑁩𑁭𑁭; 𑁩𑁭𑁯-𑁩𑁮𑁨; 𑀫𑀳𑀸𑀯. 𑀅𑀝𑁆𑀞. 𑁬𑁪, 𑁬𑁭, 𑁭𑁫, 𑁭𑁬, 𑁭𑁭) 𑀆𑀘𑀭𑀺𑀬𑁄 𑀦𑀸𑀫 𑀦𑀺𑀲𑁆𑀲𑀬𑀸𑀘𑀭𑀺𑀬𑁄 𑀧𑀩𑁆𑀩𑀚𑁆𑀚𑀸𑀘𑀭𑀺𑀬𑁄 𑀉𑀧𑀲𑀫𑁆𑀧𑀤𑀸𑀘𑀭𑀺𑀬𑁄 𑀥𑀫𑁆𑀫𑀸𑀘𑀭𑀺𑀬𑁄𑀢𑀺 𑀘𑀢𑀼𑀩𑁆𑀩𑀺𑀥𑁄. 𑀏𑀢𑁂𑀲𑀼 𑀳𑀺 𑀦𑀺𑀲𑁆𑀲𑀬𑀦𑁆𑀢𑁂𑀯𑀸𑀲𑀺𑀓𑁂𑀦 𑀬𑀸𑀯 𑀆𑀘𑀭𑀺𑀬𑀁 𑀦𑀺𑀲𑁆𑀲𑀸𑀬 𑀯𑀲𑀢𑀺, 𑀢𑀸𑀯 𑀲𑀩𑁆𑀩𑀫𑀸𑀘𑀭𑀺𑀬𑀯𑀢𑁆𑀢𑀁 𑀓𑀸𑀢𑀩𑁆𑀩𑀁. 𑀧𑀩𑁆𑀩𑀚𑁆𑀚𑀸𑀉𑀧𑀲𑀫𑁆𑀧𑀤𑀸𑀥𑀫𑁆𑀫𑀦𑁆𑀢𑁂𑀯𑀸𑀲𑀺𑀓𑁂𑀳𑀺 𑀧𑀦 𑀦𑀺𑀲𑁆𑀲𑀬𑀫𑀼𑀢𑁆𑀢𑀓𑁂𑀳𑀺𑀧𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀘𑀻𑀯𑀭𑀭𑀚𑀦𑀁, 𑀢𑀸𑀯 𑀯𑀢𑁆𑀢𑀁 𑀓𑀸𑀢𑀩𑁆𑀩𑀁. 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀧𑀢𑁆𑀢𑀤𑀸𑀦𑀸𑀤𑀺𑀫𑁆𑀳𑀺 𑀧𑀦 𑀏𑀢𑁂𑀲𑀁 𑀅𑀦𑀸𑀧𑀢𑁆𑀢𑀺. 𑀏𑀢𑁂𑀲𑀼 𑀘 𑀧𑀩𑁆𑀩𑀚𑁆𑀚𑀦𑁆𑀢𑁂𑀯𑀸𑀲𑀺𑀓𑁄 𑀘 𑀉𑀧𑀲𑀫𑁆𑀧𑀤𑀦𑁆𑀢𑁂𑀯𑀸𑀲𑀺𑀓𑁄 𑀘 𑀆𑀘𑀭𑀺𑀬𑀲𑁆𑀲 𑀬𑀸𑀯𑀚𑀻𑀯𑀁 𑀪𑀸𑀭𑁄, 𑀦𑀺𑀲𑁆𑀲𑀬𑀦𑁆𑀢𑁂𑀯𑀸𑀲𑀺𑀓𑁄 𑀘 𑀥𑀫𑁆𑀫𑀦𑁆𑀢𑁂𑀯𑀸𑀲𑀺𑀓𑁄 𑀘 𑀬𑀸𑀯 𑀲𑀫𑀻𑀧𑁂 𑀯𑀲𑀢𑀺, 𑀢𑀸𑀯𑀤𑁂𑀯. 𑀲𑀼𑀝𑁆𑀞𑀼 𑀧𑀺𑀬𑀲𑀻𑀮𑁄 𑀲𑀼𑀧𑁂𑀲𑀮𑁄, 𑀲𑀺𑀓𑁆𑀔𑀸𑀓𑀸𑀫𑁄𑀢𑀺 𑀅𑀢𑁆𑀣𑁄. 𑀤𑀦𑁆𑀢𑀓𑀝𑁆𑀞𑀁 𑀤𑁂𑀦𑁆𑀢𑁂𑀦 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀫𑀳𑀦𑁆𑀢𑀁 𑀫𑀚𑁆𑀛𑀺𑀫𑀁 𑀔𑀼𑀤𑁆𑀤𑀓𑀦𑁆𑀢𑀺 𑀢𑀻𑀡𑀺 𑀤𑀦𑁆𑀢𑀓𑀝𑁆𑀞𑀸𑀦𑀺 𑀉𑀧𑀦𑁂𑀢𑀩𑁆𑀩𑀸𑀦𑀺. 𑀢𑁂𑀲𑀼 𑀬𑀁 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀕𑀡𑁆𑀳𑀸𑀢𑀺, 𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀘𑀢𑀼𑀢𑁆𑀣𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀢𑀸𑀤𑀺𑀲𑀁𑀬𑁂𑀯 𑀲𑀫𑁆𑀫𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀤𑀸𑀢𑀩𑁆𑀩𑀁. 𑀲𑀘𑁂 𑀬𑀁 𑀯𑀸 𑀢𑀁 𑀯𑀸 𑀕𑀡𑁆𑀳𑀸𑀢𑀺, 𑀬𑀣𑀸𑀮𑀤𑁆𑀥𑀁 𑀉𑀧𑀦𑁂𑀢𑀩𑁆𑀩𑀁. 𑀢𑁄𑀬𑀦𑁆𑀢𑀺 𑀲𑀻𑀢𑀜𑁆𑀘 𑀉𑀡𑁆𑀳𑀜𑁆𑀘 𑀉𑀤𑀓𑀁 𑀉𑀧𑀦𑁂𑀢𑁆𑀯𑀸 𑀬𑀁 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀯𑀴𑀜𑁆𑀚𑁂𑀢𑀺, 𑀘𑀢𑀼𑀢𑁆𑀣𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀢𑀸𑀤𑀺𑀲𑀁 𑀉𑀧𑀦𑁂𑀢𑀩𑁆𑀩𑀁. 𑀲𑀘𑁂 𑀤𑁆𑀯𑁂𑀧𑀺 𑀯𑀴𑀜𑁆𑀚𑁂𑀢𑀺, 𑀤𑀼𑀯𑀺𑀥𑀫𑁆𑀧𑀺 𑀉𑀧𑀦𑁂𑀢𑀩𑁆𑀩𑀁. 𑀲𑀘𑁂 𑀬𑀸𑀕𑀼 𑀳𑁄𑀢𑀺, 𑀪𑀸𑀚𑀦𑀁 𑀥𑁄𑀯𑀺𑀢𑁆𑀯𑀸 𑀉𑀧𑀦𑁂𑀢𑀩𑁆𑀩𑀁.

𑁧𑁪𑁬. 𑀧𑀢𑁆𑀢𑁂 𑀯𑀢𑁆𑀢𑀁 𑀘𑀭𑁂𑀢𑀺 ‘‘𑀬𑀸𑀕𑀼𑀁 𑀧𑀻𑀢𑀲𑁆𑀲 𑀉𑀤𑀓𑀁 𑀤𑀢𑁆𑀯𑀸 𑀪𑀸𑀚𑀦𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑀭𑀺𑀖𑀁𑀲𑀦𑁆𑀢𑁂𑀦 𑀥𑁄𑀯𑀺𑀢𑁆𑀯𑀸 𑀧𑀝𑀺𑀲𑀸𑀫𑁂𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁬𑁬, 𑁭𑁮; 𑀘𑀽𑀴𑀯. 𑁩𑁭𑁬, 𑁩𑁮𑁦) 𑀯𑀼𑀢𑁆𑀢𑀁 𑀧𑀢𑁆𑀢𑁂 𑀯𑀢𑁆𑀢𑀁 𑀘𑀭𑁂𑀢𑀺 𑀅𑀢𑁆𑀣𑁄. 𑀕𑀸𑀫𑀧𑁆𑀧𑀯𑁂𑀲𑁂 𑀯𑀢𑁆𑀢𑀁 𑀘𑀭𑁂𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣. ‘‘𑀲𑀘𑁂 𑀉𑀧𑀚𑁆𑀛𑀸𑀬𑁄 𑀯𑀸 𑀆𑀘𑀭𑀺𑀬𑁄 𑀯𑀸 𑀕𑀸𑀫𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀧𑀝𑀺𑀦𑀺𑀯𑀸𑀲𑀦𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀓𑀸𑀬𑀩𑀦𑁆𑀥𑀦𑀁 𑀤𑀸𑀢𑀩𑁆𑀩𑀁, 𑀲𑀕𑀼𑀡𑀁 𑀓𑀢𑁆𑀯𑀸 𑀲𑀗𑁆𑀖𑀸𑀝𑀺𑀬𑁄 𑀤𑀸𑀢𑀩𑁆𑀩𑀸, 𑀥𑁄𑀯𑀺𑀢𑁆𑀯𑀸 𑀧𑀢𑁆𑀢𑁄 𑀲𑁄𑀤𑀓𑁄 𑀤𑀸𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁬𑁬, 𑁭𑁮; 𑀘𑀽𑀴𑀯. 𑁩𑁭𑁬, 𑁩𑁮𑁦) 𑀇𑀤𑀁 𑀕𑀸𑀫𑀧𑁆𑀧𑀯𑁂𑀲𑀦𑁂 𑀯𑀢𑁆𑀢𑀁 𑀦𑀸𑀫. ‘‘𑀲𑀘𑁂 𑀉𑀧𑀚𑁆𑀛𑀸𑀬𑁄 𑀯𑀸 𑀆𑀘𑀭𑀺𑀬𑁄 𑀯𑀸 𑀧𑀘𑁆𑀙𑀸𑀲𑀫𑀡𑀁 𑀆𑀓𑀗𑁆𑀔𑀢𑀺, 𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁂𑀦 𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀲𑀕𑀼𑀡𑀁 𑀓𑀢𑁆𑀯𑀸 𑀲𑀗𑁆𑀖𑀸𑀝𑀺𑀬𑁄 𑀧𑀸𑀭𑀼𑀧𑀺𑀢𑁆𑀯𑀸 𑀕𑀡𑁆𑀞𑀺𑀓𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀥𑁄𑀯𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀉𑀧𑀚𑁆𑀛𑀸𑀬𑀲𑁆𑀲 𑀯𑀸 𑀆𑀘𑀭𑀺𑀬𑀲𑁆𑀲 𑀯𑀸 𑀧𑀘𑁆𑀙𑀸𑀲𑀫𑀡𑁂𑀦 𑀳𑁄𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁬𑁬, 𑁭𑁮; 𑀘𑀽𑀴𑀯. 𑁩𑁭𑁬, 𑁩𑁮𑁦) 𑀦𑀬𑁂𑀦 𑀯𑀼𑀢𑁆𑀢𑀁 𑀕𑀫𑀦𑁂 𑀯𑀢𑁆𑀢𑀁 𑀦𑀸𑀫. ‘‘𑀦𑀺𑀯𑀢𑁆𑀢𑀦𑁆𑀢𑁂𑀦 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁬𑁬, 𑁭𑁮; 𑀘𑀽𑀴𑀯. 𑁩𑁭𑁬, 𑁩𑁮𑁦) 𑀦𑀬𑁂𑀦 𑀯𑀼𑀢𑁆𑀢𑀁 𑀆𑀕𑀫𑁂 𑀯𑀢𑁆𑀢𑀁 𑀦𑀸𑀫. ‘‘𑀉𑀧𑀚𑁆𑀛𑀸𑀬𑀫𑁆𑀳𑀺 𑀯𑀼𑀝𑁆𑀞𑀺𑀢𑁂 𑀆𑀲𑀦𑀁 𑀉𑀤𑁆𑀥𑀭𑀺𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀧𑀝𑀺𑀲𑀸𑀫𑁂𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁬𑁬, 𑁭𑁮; 𑀘𑀽𑀴𑀯. 𑁩𑁭𑁬, 𑁩𑁮𑁦) 𑀏𑀯𑀁 𑀯𑀼𑀢𑁆𑀢𑀁 𑀆𑀲𑀦𑀸𑀤𑀻𑀲𑀼 𑀯𑀢𑁆𑀢𑀁 𑀦𑀸𑀫. 𑀉𑀧𑀸𑀳𑀦𑀸𑀬 𑀯𑀢𑁆𑀢𑀁 𑀦𑀸𑀫 ‘‘𑀉𑀧𑀸𑀳𑀦𑀸 𑀧𑀼𑀜𑁆𑀙𑀺𑀢𑀩𑁆𑀩𑀸, 𑀉𑀧𑀸𑀳𑀦𑀸 𑀧𑀼𑀜𑁆𑀙𑀦𑁆𑀢𑁂𑀦 𑀧𑀞𑀫𑀁 𑀲𑀼𑀓𑁆𑀔𑁂𑀦 𑀘𑁄𑀴𑀓𑁂𑀦 𑀧𑀼𑀜𑁆𑀙𑀺𑀢𑀩𑁆𑀩𑀸, 𑀧𑀘𑁆𑀙𑀸 𑀅𑀮𑁆𑀮𑁂𑀦𑀸’’𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁩𑁫𑁭, 𑁩𑁫𑁯) 𑀯𑀼𑀢𑁆𑀢𑀁. 𑀘𑀻𑀯𑀭𑁂 𑀯𑀢𑁆𑀢𑀁 𑀦𑀸𑀫 ‘‘𑀲𑀘𑁂 𑀘𑀻𑀯𑀭𑀁 𑀲𑀺𑀦𑁆𑀦𑀁 𑀳𑁄𑀢𑀺, 𑀫𑀼𑀳𑀼𑀢𑁆𑀢𑀁 𑀉𑀡𑁆𑀳𑁂 𑀑𑀢𑀸𑀧𑁂𑀢𑀩𑁆𑀩𑀁, 𑀦 𑀘 𑀉𑀡𑁆𑀳𑁂 𑀘𑀻𑀯𑀭𑀁 𑀦𑀺𑀤𑀳𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁬𑁬, 𑁭𑁮; 𑀘𑀽𑀴𑀯. 𑁩𑁭𑁬, 𑁩𑁮𑁦) 𑀯𑀼𑀢𑁆𑀢𑀁.

𑁧𑁪𑁭. 𑀧𑀭𑀺𑀪𑁄𑀚𑀦𑀻𑀬𑀧𑀸𑀦𑀻𑀬-𑀯𑀘𑁆𑀘𑀧𑁆𑀧𑀲𑁆𑀲𑀸𑀯𑀞𑀸𑀦𑀺𑀲𑀽𑀢𑀺 𑀏𑀢𑁆𑀣 𑀲𑀘𑁂 𑀧𑀸𑀦𑀻𑀬𑀁 𑀦 𑀳𑁄𑀢𑀺, 𑀧𑀸𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀧𑀭𑀺𑀪𑁄𑀚𑀦𑀻𑀬𑀁 𑀦 𑀳𑁄𑀢𑀺, 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀯𑀘𑁆𑀘𑀓𑀼𑀝𑀺 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀯𑀘𑁆𑀘𑀓𑀼𑀝𑀺 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸. 𑀢𑀣𑀸 𑀧𑀲𑁆𑀲𑀸𑀯𑀝𑁆𑀞𑀸𑀦𑁂 𑀏𑀯𑀁 𑀯𑀢𑁆𑀢𑀁 𑀘𑀭𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. ‘‘𑀯𑀺𑀳𑀸𑀭𑀁 𑀲𑁄𑀥𑁂𑀦𑁆𑀢𑁂𑀦 𑀧𑀞𑀫𑀁 𑀧𑀢𑁆𑀢𑀘𑀻𑀯𑀭𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀁 𑀯𑀺𑀳𑀸𑀭𑀲𑁄𑀥𑀦𑁂 𑀯𑀢𑁆𑀢𑀁 𑀦𑀸𑀫. ‘‘𑀪𑀽𑀫𑀢𑁆𑀣𑀭𑀡𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀸𑀧𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁬𑁬, 𑁭𑁮; 𑀘𑀽𑀴𑀯. 𑁩𑁭𑁬, 𑁩𑁮𑁦) 𑀯𑀼𑀢𑁆𑀢𑀁 𑀧𑀼𑀦 𑀧𑀜𑁆𑀜𑀸𑀧𑀦𑁂 𑀯𑀢𑁆𑀢𑀁 𑀦𑀸𑀫.

𑁧𑁪𑁮. 𑀇𑀤𑀸𑀦𑀺 𑀯𑀺𑀳𑀸𑀭𑀁 𑀲𑁄𑀥𑁂𑀦𑁆𑀢𑁂𑀦 𑀏𑀯𑀁 𑀲𑁄𑀥𑁂𑀢𑀩𑁆𑀩𑀦𑁆𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦 𑀧𑀧𑁆𑀨𑁄𑀝𑁂𑀬𑁆𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀯𑀺𑀳𑀸𑀭𑀁 𑀲𑁄𑀥𑁂𑀦𑁆𑀢𑁄 𑀪𑀺𑀓𑁆𑀔𑀼 𑀪𑀽𑀫𑀢𑁆𑀣𑀭𑀡𑀸𑀤𑀺𑀲𑀬𑀦𑀸𑀲𑀦𑀁 𑀧𑀝𑀺𑀯𑀸𑀢𑁂 𑀯𑀸 𑀧𑀗𑁆𑀕𑀡𑁂 𑀯𑀸 𑀧𑀸𑀦𑀻𑀬𑀲𑀸𑀫𑀦𑁆𑀢𑀸 𑀯𑀸 𑀦 𑀧𑀧𑁆𑀨𑁄𑀝𑁂𑀬𑁆𑀬𑀸𑀢𑀺. 𑀧𑀗𑁆𑀕𑀡𑁂𑀢𑀺 𑀩𑀳𑀽𑀦𑀁 𑀲𑀦𑁆𑀦𑀺𑀧𑀸𑀢𑁂 𑀞𑀸𑀦𑁂.

𑁧𑁪𑁯. 𑀦𑁆𑀳𑀸𑀦𑁂𑀢𑀺 ‘‘𑀲𑀘𑁂 𑀉𑀧𑀚𑁆𑀛𑀸𑀬𑁄 𑀦𑀳𑀸𑀬𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀦𑀳𑀸𑀦𑀁 𑀧𑀝𑀺𑀬𑀸𑀤𑁂𑀢𑀩𑁆𑀩𑀁. 𑀲𑀘𑁂 𑀲𑀻𑀢𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀲𑀻𑀢𑀁 𑀧𑀝𑀺𑀬𑀸𑀤𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁬𑁬; 𑀘𑀽𑀴𑀯. 𑁩𑁭𑁬) 𑀯𑀼𑀢𑁆𑀢𑀁 𑀦𑀳𑀸𑀦𑁂 𑀯𑀢𑁆𑀢𑀁 𑀦𑀸𑀫, ‘‘𑀉𑀧𑀚𑁆𑀛𑀸𑀬𑀲𑁆𑀲 𑀕𑀢𑁆𑀢𑀢𑁄 𑀉𑀤𑀓𑀁 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁, 𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁬𑁬; 𑀘𑀽𑀴𑀯. 𑁩𑁭𑁬) 𑀯𑀼𑀢𑁆𑀢𑀁 𑀦𑀳𑀸𑀢𑀲𑁆𑀲 𑀓𑀸𑀢𑀩𑁆𑀩𑀁 𑀦𑀸𑀫. 𑀭𑀗𑁆𑀕𑀧𑀸𑀓𑁂𑀢𑀺 ‘‘𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀆𑀘𑀭𑀺𑀬𑀲𑁆𑀲 𑀭𑀚𑀦𑀁 𑀧𑀘𑀺𑀢𑀩𑁆𑀩𑀁 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀧𑀘𑀺𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁬𑁬, 𑁭𑁮; 𑀘𑀽𑀴𑀯. 𑁩𑁭𑁬, 𑁩𑁮𑁦) 𑀯𑀼𑀢𑁆𑀢𑀁. 𑀥𑁄𑀯𑀦𑁂𑀢𑀺 ‘‘𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀆𑀘𑀭𑀺𑀬𑀲𑁆𑀲 𑀘𑀻𑀯𑀭𑀁 𑀥𑁄𑀯𑀺𑀢𑀩𑁆𑀩𑀁 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀥𑁄𑀯𑀺𑀢𑀩𑁆𑀩𑀁, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁬𑁬, 𑁭𑁮; 𑀘𑀽𑀴𑀯. 𑁩𑁭𑁬, 𑁩𑁮𑁦) 𑀯𑀼𑀢𑁆𑀢𑀁. 𑀲𑀺𑀩𑁆𑀩𑀦𑁂𑀢𑀺 ‘‘𑀲𑀘𑁂 𑀉𑀧𑀚𑁆𑀛𑀸𑀬𑁂𑀦 𑀆𑀘𑀭𑀺𑀬𑁂𑀦 𑀘𑀻𑀯𑀭𑀁 𑀓𑀸𑀢𑀩𑁆𑀩𑀁 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀓𑀸𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁬𑁬, 𑁭𑁮; 𑀘𑀽𑀴𑀯. 𑁩𑁭𑁬, 𑁩𑁮𑁦) 𑀯𑀼𑀢𑁆𑀢𑀁. 𑀘𑀻𑀯𑀭𑁂 𑀣𑁂𑀯𑁂 𑀞𑀺𑀢𑁂 𑀭𑀚𑀦𑁆𑀢𑁄 𑀦 𑀯𑀚𑁂 𑀦 𑀧𑀓𑁆𑀓𑀫𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. ‘‘𑀘𑀻𑀯𑀭𑀁 𑀭𑀚𑀦𑁆𑀢𑁂𑀦 𑀲𑀸𑀥𑀼𑀓𑀁 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀭𑀚𑀺𑀢𑀩𑁆𑀩𑀁, 𑀦 𑀘 𑀅𑀘𑁆𑀙𑀺𑀦𑁆𑀦𑁂 𑀣𑁂𑀯𑁂 𑀧𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁬𑁬, 𑁭𑁮; 𑀘𑀽𑀴𑀯. 𑁩𑁭𑁬, 𑁩𑁮𑁦) 𑀳𑀺 𑀯𑀼𑀢𑁆𑀢𑀁.

𑁧𑁫𑁦. 𑀏𑀓𑀘𑁆𑀘𑀲𑁆𑀲𑀸𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀯𑀺𑀲𑀪𑀸𑀕𑀲𑁆𑀲 𑀅𑀦𑀢𑁆𑀣𑀓𑀸𑀫𑀲𑁆𑀲 𑀯𑁂𑀭𑀺𑀧𑀼𑀕𑁆𑀕𑀮𑀲𑁆𑀲. 𑀅𑀦𑀸𑀧𑀼𑀘𑁆𑀙𑀸𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀅𑀦𑀸𑀭𑁄𑀘𑁂𑀢𑁆𑀯𑀸. 𑀓𑀺𑀜𑁆𑀘𑀦𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺.

𑁧𑁫𑁧-𑁨. 𑀢𑀲𑁆𑀲𑀸𑀢𑀺 𑀏𑀓𑀘𑁆𑀘𑀲𑁆𑀲. 𑀦𑀺𑀦𑁆𑀦𑁂𑀢𑀼𑀦𑁆𑀢𑀺 𑀦𑀻𑀳𑀭𑀺𑀢𑀼𑀁. 𑀓𑀺𑀘𑁆𑀘𑀬𑀁 𑀧𑀭𑀺𑀓𑀫𑁆𑀫𑀁 𑀯𑀸𑀢𑀺 𑀯𑁂𑀬𑁆𑀬𑀸𑀯𑀘𑁆𑀘𑀁 𑀯𑀸 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀸𑀤𑀺𑀧𑀭𑀺𑀓𑀫𑁆𑀫𑀁 𑀯𑀸 𑀅𑀢𑁆𑀢𑀦𑀸 𑀢𑀲𑁆𑀲 𑀓𑀸𑀢𑀼𑀁 𑀯𑀸 𑀢𑁂𑀦 𑀅𑀢𑁆𑀢𑀦𑁄 𑀓𑀸𑀭𑀸𑀧𑁂𑀢𑀼𑀁 𑀯𑀸𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁫𑁩. 𑀲𑀘𑁂 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀅𑀜𑁆𑀜𑀢𑁆𑀣 𑀕𑀢𑀸 𑀳𑁄𑀦𑁆𑀢𑀺, 𑀧𑀭𑀺𑀯𑁂𑀡𑀁 𑀕𑀦𑁆𑀢𑁆𑀯𑀸 𑀅𑀧𑀲𑁆𑀲𑀦𑁆𑀢𑁂𑀳𑀺 𑀕𑀸𑀫𑀁 𑀧𑀯𑀺𑀲𑀺𑀢𑀼𑀁 𑀯𑀝𑁆𑀝𑀢𑀺. 𑀕𑀸𑀫𑀁 𑀧𑀯𑀺𑀲𑀦𑁆𑀢𑁄 𑀲𑀘𑁂 𑀧𑀲𑁆𑀲𑀢𑀺, 𑀆𑀧𑀼𑀘𑁆𑀙𑀺𑀢𑀩𑁆𑀩𑀫𑁂𑀯𑀸𑀢𑀺 𑀯𑀤𑀦𑁆𑀢𑀺. ‘‘𑀉𑀧𑀚𑁆𑀛𑀸𑀬𑀁 𑀅𑀦𑀸𑀧𑀼𑀘𑁆𑀙𑀸 𑀦 𑀤𑀺𑀲𑀸 𑀧𑀓𑁆𑀓𑀫𑀺𑀢𑀩𑁆𑀩𑀸’’𑀢𑀺 (𑀫𑀳𑀸𑀯. 𑁬𑁬, 𑀘𑀽𑀴𑀯. 𑁩𑁭𑁬) 𑀳𑀺 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄 𑀓𑀺𑀘𑁆𑀘𑀬𑀁 𑀦𑀸𑀫 𑀅𑀦𑁆𑀢𑁄𑀯𑀺𑀳𑀸𑀭𑁂𑀧𑀺 𑀅𑀢𑁆𑀢𑀦𑁄 𑀧𑀢𑁆𑀢𑀧𑀘𑀦𑀘𑀻𑀯𑀭𑀓𑀫𑁆𑀫𑀓𑁂𑀲𑀘𑁆𑀙𑁂𑀤𑀦𑀸𑀤𑀺.

𑁧𑁫𑁪. 𑀲𑀗𑁆𑀖𑀸𑀬𑀢𑁆𑀢𑀓𑀫𑁆𑀫𑀸𑀦𑀺 𑀦𑀸𑀫 𑀧𑀭𑀺𑀯𑀸𑀲𑀫𑀸𑀦𑀢𑁆𑀢𑀅𑀩𑁆𑀪𑀸𑀦𑀢𑀚𑁆𑀚𑀦𑀻𑀬𑀦𑀺𑀬𑀲𑁆𑀲𑀧𑀩𑁆𑀩𑀸𑀚𑀦𑀻𑀬𑀧𑀝𑀺𑀲𑀸𑀭𑀡𑀻𑀬𑀉𑀓𑁆𑀔𑁂𑀧𑀦𑀸𑀤𑀬𑁄.

𑁧𑁫𑁫. 𑀯𑀼𑀝𑁆𑀞𑀸𑀦𑀁 𑀦𑁂𑀲𑀫𑀸𑀕𑀫𑁂𑀢𑀺 ‘‘𑀲𑀘𑁂 𑀉𑀧𑀚𑁆𑀛𑀸𑀬𑁄 𑀯𑀸 𑀆𑀘𑀭𑀺𑀬𑁄 𑀯𑀸 𑀕𑀺𑀮𑀸𑀦𑁄 𑀳𑁄𑀢𑀺, 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄, 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁬𑁬; 𑀘𑀽𑀴𑀯. 𑁩𑁭𑁬) 𑀳𑀺 𑀯𑀼𑀢𑁆𑀢𑀁. 𑀉𑀧𑀚𑁆𑀛𑀸𑀘𑀭𑀺𑀬𑀯𑀢𑁆𑀢𑀯𑀺𑀦𑀺𑀘𑁆𑀙𑀬𑁄.

𑀉𑀧𑀚𑁆𑀛𑀸𑀘𑀭𑀺𑀬𑀯𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.