𑁧𑁩. 𑀲𑀫𑀡𑀓𑀧𑁆𑀧𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁨𑁫. 𑀪𑀽𑀢𑀸𑀦𑀁 𑀚𑀸𑀢𑀸𑀦𑀁 𑀦𑀺𑀩𑁆𑀩𑀢𑁆𑀢𑀸𑀦𑀁 𑀕𑀸𑀫𑁄 𑀪𑀽𑀢𑀕𑀸𑀫𑁄 (𑀧𑀸𑀘𑀺. 𑁯𑁧; 𑀧𑀸𑀘𑀺. 𑀅𑀝𑁆𑀞. 𑁯𑁧; 𑀓𑀗𑁆𑀔𑀸. 𑀅𑀝𑁆𑀞. 𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸). 𑀲𑀫𑀸𑀭𑀫𑁆𑀪𑁄𑀢𑀺 𑀙𑁂𑀤𑀦𑀨𑀸𑀮𑀦𑀧𑀘𑀦𑀸𑀤𑀺, 𑀢𑀲𑁆𑀫𑀺𑀁 𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑁂 𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀳𑁂𑀢𑀼 𑀧𑀸𑀘𑀺𑀢𑁆𑀢𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀢𑀓𑀧𑁆𑀧𑀺𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀧𑀦 𑀲𑀫𑀡𑀓𑀧𑁆𑀧𑀺𑀬𑀁 𑀪𑀯𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑀡𑀸𑀦𑀁 𑀓𑀧𑁆𑀧𑀺𑀬𑀁 𑀲𑀫𑀡𑀓𑀧𑁆𑀧𑀺𑀬𑀁. 𑀇𑀤𑀸𑀦𑀺 𑀬𑁂𑀦 𑀓𑀢𑀁 𑀓𑀧𑁆𑀧𑀺𑀬𑀁 𑀲𑀫𑀡𑀓𑀧𑁆𑀧𑀺𑀬𑀁 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀔𑁂𑀦 𑀯𑀸’’𑀢𑀺𑀆𑀤𑀺𑀫𑀸𑀳. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀲𑀫𑀡𑀓𑀧𑁆𑀧𑁂𑀳𑀺 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁, 𑀅𑀕𑁆𑀕𑀺𑀧𑀭𑀺𑀚𑀺𑀢𑀁 𑀲𑀢𑁆𑀣𑀧𑀭𑀺𑀚𑀺𑀢𑀁 𑀦𑀔𑀧𑀭𑀺𑀚𑀺𑀢𑀁 𑀅𑀩𑀻𑀚𑀁 𑀦𑀺𑀩𑁆𑀩𑀝𑁆𑀝𑀩𑀻𑀚𑀜𑁆𑀜𑁂𑀯 𑀧𑀜𑁆𑀘𑀫’’𑀦𑁆𑀢𑀺 (𑀘𑀽𑀴𑀯. 𑁨𑁫𑁦) 𑀳𑀺 𑀯𑀼𑀢𑁆𑀢𑀁.

𑁧𑁨𑁬. 𑀇𑀤𑀸𑀦𑀺 𑀢𑀁 𑀪𑀽𑀢𑀕𑀸𑀫𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑀽𑀮𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 (𑀧𑀸𑀘𑀺. 𑁯𑁧; 𑀧𑀸𑀘𑀺. 𑀅𑀝𑁆𑀞. 𑁯𑁧) 𑀲-𑀇𑀢𑀺 𑀲𑁄 𑀪𑀽𑀢𑀕𑀸𑀫𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄, 𑀫𑀽𑀮𑀩𑀻𑀚𑀸𑀤𑀻𑀳𑀺 𑀧𑀜𑁆𑀘𑀳𑀺 𑀩𑀻𑀚𑁂𑀳𑀺 𑀧𑀪𑀸𑀯𑀺𑀢𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀫𑀽𑀮𑀩𑀻𑀚𑀁 𑀦𑀸𑀫 𑀳𑀮𑀺𑀤𑁆𑀤𑀺𑀲𑀺𑀗𑁆𑀕𑀺𑀯𑁂𑀭𑀸𑀤𑀺. 𑀔𑀦𑁆𑀥𑀩𑀻𑀚𑀁 𑀦𑀸𑀫 𑀅𑀲𑁆𑀲𑀢𑁆𑀣𑁄 𑀦𑀺𑀕𑁆𑀭𑁄𑀥𑁄𑀢𑀺 𑀏𑀯𑀫𑀸𑀤𑀺. 𑀅𑀕𑁆𑀕𑀩𑀻𑀚𑀁 𑀦𑀸𑀫 𑀅𑀚𑁆𑀚𑀼𑀓𑀨𑀡𑀺𑀚𑁆𑀚𑀓𑀸𑀤𑀺. 𑀨𑀴𑀼𑀩𑀻𑀚𑀁 𑀦𑀸𑀫 𑀉𑀘𑁆𑀙𑀼𑀯𑁂𑀴𑀼𑀦𑀴𑀸𑀤𑀺. ‘‘𑀩𑀻𑀚𑀩𑀻𑀚𑀁 𑀦𑀸𑀫 𑀧𑀼𑀩𑁆𑀩𑀡𑁆𑀡𑀁 𑀅𑀧𑀭𑀡𑁆𑀡𑀁, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀩𑀻𑀚𑁂 𑀚𑀸𑀬𑀦𑁆𑀢𑀺 𑀩𑀻𑀚𑁂 𑀲𑀜𑁆𑀚𑀸𑀬𑀦𑁆𑀢𑀺, 𑀏𑀢𑀁 𑀩𑀻𑀚𑀩𑀻𑀚𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 ‘‘𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺 (𑀤𑀻. 𑀦𑀺. 𑁧.𑁧𑁦, 𑁧𑁯𑁫; 𑀫. 𑀦𑀺. 𑁧.𑁨𑁯𑁩, 𑁪𑁧𑁧; 𑁨.𑁧𑁧; 𑀅. 𑀦𑀺. 𑁧𑁦.𑁯𑁯; 𑀧𑀼. 𑀧. 𑁧𑁭𑁯) 𑀯𑀼𑀢𑁆𑀢𑀢𑁆𑀢𑀸 𑀥𑀫𑁆𑀫𑀸𑀦𑀼𑀮𑁄𑀫𑁂𑀦 𑀆𑀕𑀢𑀁 𑀩𑀻𑀚𑀕𑀸𑀫𑀲𑀫𑀸𑀭𑀫𑁆𑀪𑀁 𑀤𑀲𑁆𑀲𑁂𑀢𑀼𑀁 ‘‘𑀆𑀭𑀫𑁆𑀪𑁂 𑀤𑀼𑀓𑁆𑀓𑀝’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀲𑁆𑀫𑀸 𑀏𑀢𑀁 𑀧𑀞𑀫𑀁 ‘‘𑀓𑀧𑁆𑀧𑀺𑀬𑀁 𑀓𑀭𑁄𑀳𑀻’’𑀢𑀺 𑀪𑀽𑀢𑀕𑀸𑀫𑀧𑀭𑀺𑀫𑁄𑀘𑀦𑀁 𑀓𑀸𑀭𑁂𑀢𑁆𑀯𑀸 𑀩𑀻𑀚𑀕𑀸𑀫𑀧𑀭𑀺𑀫𑁄𑀘𑀦𑀢𑁆𑀣𑀁 𑀧𑀼𑀦 𑀓𑀧𑁆𑀧𑀺𑀬𑀁 𑀓𑀸𑀭𑁂𑀢𑀩𑁆𑀩𑀁.

𑁧𑁨𑁭. 𑀦𑀺𑀩𑁆𑀩𑀝𑁆𑀝𑀩𑀻𑀚𑀁 (𑀧𑀸𑀘𑀺. 𑀅𑀝𑁆𑀞. 𑁯𑁨; 𑀓𑀗𑁆𑀔𑀸. 𑀅𑀝𑁆𑀞. 𑀪𑀼𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀦𑀸𑀫 𑀅𑀫𑁆𑀩𑀧𑀦𑀲𑀸𑀤𑀺. 𑀦𑁄𑀩𑀻𑀚𑀁 𑀦𑀸𑀫 𑀢𑀭𑀼𑀡𑀫𑁆𑀩𑀨𑀮𑀸𑀤𑀺, 𑀏𑀢𑀁 𑀧𑀦 𑀲𑀩𑁆𑀩𑀁 𑀅𑀓𑀧𑁆𑀧𑀺𑀬𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀓𑀝𑀸𑀳𑀩𑀤𑁆𑀥𑀩𑀻𑀚𑀸𑀦𑀺 𑀓𑀧𑀺𑀢𑁆𑀣𑀨𑀮𑀸𑀤𑀻𑀦𑀺. 𑀩𑀳𑀺𑀤𑁆𑀥𑀸 𑀯𑀸𑀧𑀺 𑀓𑀸𑀭𑀬𑁂𑀢𑀺 𑀓𑀧𑀸𑀮𑁂𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀲𑀘𑁂 𑀏𑀓𑀸𑀩𑀤𑁆𑀥𑀸𑀦𑀻𑀢𑀺 𑀅𑀢𑁆𑀣𑁄. 𑀓𑀝𑀸𑀳𑀫𑀼𑀢𑁆𑀢𑀁 𑀧𑀦 𑀪𑀺𑀦𑁆𑀤𑀺𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑀁.

𑁧𑁨𑁮. 𑀪𑀸𑀚𑀦𑁂 𑀯𑀸 𑀪𑀽𑀫𑀺𑀬𑀁 𑀯𑀸 𑀏𑀓𑀸𑀩𑀤𑁆𑀥𑁂𑀲𑀼 𑀩𑀻𑀚𑁂𑀲𑀼 𑀏𑀓𑀲𑁆𑀫𑀺𑀁 𑀩𑀻𑀚𑁂 𑀓𑀧𑁆𑀧𑀺𑀬𑁂 𑀓𑀢𑁂 𑀲𑀩𑁆𑀩𑁂𑀲𑁆𑀯𑁂𑀯 𑀓𑀢𑀁 𑀪𑀯𑁂𑀢𑀺 𑀅𑀢𑁆𑀣𑁄. 𑀬𑀣𑀸 𑀘 𑀩𑀻𑀚𑁂, 𑀏𑀯𑀁 𑀭𑀼𑀓𑁆𑀔𑀲𑀳𑀲𑁆𑀲𑀁 𑀯𑀸 𑀉𑀘𑁆𑀙𑀼𑀲𑀳𑀲𑁆𑀲𑀁 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀏𑀓𑀸𑀩𑀤𑁆𑀥𑁂 𑀓𑀢𑁂𑀧𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁨𑁯. 𑀓𑀧𑁆𑀧𑀺𑀬𑀁 𑀓𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑁂 𑀩𑀻𑀚𑀕𑀸𑀫𑁂 𑀧𑀼𑀦 𑀫𑀽𑀮𑀧𑀡𑁆𑀡𑀸𑀦𑀺 𑀲𑀘𑁂 𑀚𑀸𑀬𑀭𑀼𑀁, 𑀧𑀼𑀦 𑀓𑀧𑁆𑀧𑀺𑀬𑀁 𑀓𑀸𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑀤𑀸𑀢𑀺 𑀫𑀽𑀮𑁂 𑀘 𑀅𑀗𑁆𑀓𑀼𑀭𑁂 𑀘 𑀚𑀸𑀢𑁂𑀢𑀺 𑀅𑀢𑁆𑀣𑁄.

𑁧𑁩𑁦. 𑀉𑀤𑀓𑀲𑀫𑁆𑀪𑀯𑁄𑀢𑀺 𑀉𑀤𑀓𑀚𑀸𑀢𑁄. 𑀘𑁂𑀢𑀺𑀬𑀸𑀤𑀻𑀲𑀽𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀕𑁂𑀳𑀧𑁆𑀧𑀫𑀼𑀔𑀧𑀸𑀓𑀸𑀭𑀯𑁂𑀤𑀺𑀓𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀸 𑀕𑀳𑀺𑀢𑀸. 𑀦𑀺𑀩𑁆𑀩𑀢𑁆𑀢𑀤𑁆𑀯𑀢𑁆𑀢𑀺𑀧𑀢𑁆𑀢𑀓𑁄 𑀪𑀽𑀢𑀕𑀸𑀫𑁄𑀯, 𑀅𑀦𑀺𑀩𑁆𑀩𑀢𑁆𑀢𑀓𑁄 𑀅𑀕𑁆𑀕𑀩𑀻𑀚𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀩𑀻𑀚𑀫𑁆𑀧𑀺 𑀬𑀸𑀯 𑀫𑀽𑀮𑀁 𑀯𑀸 𑀧𑀡𑁆𑀡𑀁 𑀯𑀸 𑀦 𑀦𑀺𑀓𑁆𑀔𑀫𑀢𑀺, 𑀢𑀸𑀯 𑀩𑀻𑀚𑀕𑀸𑀫𑁄𑀯, 𑀫𑀽𑀮𑁂 𑀘 𑀦𑀺𑀓𑁆𑀔𑀦𑁆𑀢𑁂 𑀧𑀡𑁆𑀡𑁂 𑀘 𑀳𑀭𑀺𑀢𑁂 𑀚𑀸𑀢𑁂 𑀪𑀽𑀢𑀕𑀸𑀫𑁄𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁧𑁩𑁧. 𑀫𑀓𑀼𑀴𑀦𑁆𑀢𑀺 𑀅𑀨𑀼𑀮𑁆𑀮𑀁. 𑀅𑀳𑀺𑀙𑀢𑁆𑀢𑀓𑀁 𑀦𑀸𑀫 𑀭𑀼𑀓𑁆𑀔𑁂 𑀚𑀸𑀢𑀁 𑀅𑀳𑀺𑀙𑀢𑁆𑀢𑀓𑀁.

𑁧𑁩𑁨. 𑀅𑀮𑁆𑀮𑀭𑀼𑀓𑁆𑀔𑁂 𑀕𑀡𑁆𑀳𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀅𑀮𑁆𑀮𑀭𑀼𑀓𑁆𑀔𑁂 𑀙𑀺𑀦𑁆𑀤𑀢𑁄 𑀯𑀸𑀧𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁩𑁪. ‘‘𑀇𑀫𑀁 𑀭𑀼𑀓𑁆𑀔𑀁, 𑀇𑀫𑀁 𑀮𑀢𑀁, 𑀇𑀫𑀁 𑀓𑀦𑁆𑀤𑀁 𑀙𑀺𑀦𑁆𑀤, 𑀪𑀺𑀦𑁆𑀤𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀺𑀬𑀫𑁂𑀢𑁆𑀯𑀸 𑀪𑀸𑀲𑀺𑀢𑀼𑀁 𑀦 𑀯𑀝𑁆𑀝𑀢𑀺. ‘‘𑀇𑀤𑀁, 𑀏𑀢’’𑀦𑁆𑀢𑀺 𑀅𑀯𑀢𑁆𑀯𑀸 𑀓𑁂𑀯𑀮𑀁 ‘‘𑀭𑀼𑀓𑁆𑀔𑀁 𑀙𑀺𑀦𑁆𑀤𑀸’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑀅𑀝𑁆𑀞. 𑁯𑁨; 𑀓𑀗𑁆𑀔𑀸. 𑀅𑀝𑁆𑀞. 𑀪𑀽𑀢𑀕𑀸𑀫𑀳𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀦𑀬𑁂𑀦 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀲𑀫𑀡𑀓𑀧𑁆𑀧𑀯𑀺𑀦𑀺𑀘𑁆𑀙𑀬𑁄.

𑀲𑀫𑀡𑀓𑀧𑁆𑀧𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.