𑁧𑁨. 𑀧𑀸𑀘𑀺𑀢𑁆𑀢𑀺𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁨𑁧. 𑀇𑀤𑀸𑀦𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀘𑀺𑀢𑁆𑀢𑀻’’𑀢𑀺 𑀫𑀸𑀢𑀺𑀓𑀸𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀫𑀼𑀲𑀸𑀯𑀸𑀤𑁄𑀫𑀲𑀸𑀯𑀸𑀤𑁂, 𑀧𑁂𑀲𑀼𑀜𑁆𑀜𑀳𑀭𑀡𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀼𑀲𑀸𑀯𑀸𑀤𑁂 𑀘 𑀑𑀫𑀲𑀯𑀸𑀤𑁂 𑀘 𑀧𑁂𑀲𑀼𑀜𑁆𑀜𑀳𑀭𑀡𑁂 𑀘 𑀧𑀸𑀘𑀺𑀢𑁆𑀢𑀺 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀏𑀢𑁆𑀣 𑀧𑀦 ‘‘𑀅𑀤𑀺𑀝𑁆𑀞𑀁, 𑀅𑀲𑀼𑀢𑀁, 𑀅𑀫𑀼𑀢𑀁, 𑀅𑀯𑀺𑀜𑁆𑀜𑀸𑀢𑀁, 𑀤𑀺𑀝𑁆𑀞𑀁, 𑀲𑀼𑀢𑀁, 𑀫𑀼𑀢𑀁, 𑀯𑀺𑀜𑁆𑀜𑀸𑀢’’𑀦𑁆𑀢𑀺 (𑀧𑀸𑀘𑀺. 𑁩; 𑀧𑀸𑀘𑀺. 𑀅𑀝𑁆𑀞. 𑁩) 𑀧𑀼𑀩𑁆𑀩𑁂𑀧𑀺 ‘‘𑀫𑀼𑀲𑀸 𑀪𑀡𑀺𑀲𑁆𑀲𑀸𑀫𑀻’’𑀢𑀺 𑀘𑁂𑀢𑁂𑀢𑁆𑀯𑀸 𑀯𑀘𑀦𑀓𑁆𑀔𑀡𑁂𑀯 ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺 𑀚𑀸𑀦𑀺𑀢𑁆𑀯𑀸 𑀚𑀸𑀦𑀦𑁆𑀢𑀲𑁆𑀲𑁂𑀯 𑀫𑀼𑀲𑀸𑀪𑀡𑀦𑁂 𑀧𑀸𑀘𑀺𑀢𑁆𑀢𑀺 𑀦𑀸𑀫 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀬𑀲𑁆𑀲 𑀪𑀡𑀢𑀺, 𑀲𑁄 𑀢𑀁 𑀦 𑀲𑀼𑀡𑀸𑀢𑀺, 𑀆𑀧𑀢𑁆𑀢𑀺 𑀦 𑀳𑁄𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀫𑀼𑀲𑀸𑀯𑀸𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸).

‘‘𑀑𑀫𑀲𑀯𑀸𑀤𑁄 𑀦𑀸𑀫 𑀤𑀲𑀳𑀺 𑀆𑀓𑀸𑀭𑁂𑀳𑀺 𑀑𑀫𑀲𑀢𑀺 𑀚𑀸𑀢𑀺𑀬𑀸𑀧𑀺 𑀦𑀸𑀫𑁂𑀦𑀧𑀺 𑀕𑁄𑀢𑁆𑀢𑁂𑀦𑀧𑀺 𑀓𑀫𑁆𑀫𑁂𑀦𑀧𑀺 𑀲𑀺𑀧𑁆𑀧𑁂𑀦𑀧𑀺 𑀆𑀩𑀸𑀥𑁂𑀦𑀧𑀺 𑀮𑀺𑀗𑁆𑀕𑁂𑀦𑀧𑀺 𑀓𑀺𑀮𑁂𑀲𑁂𑀦𑀧𑀺 𑀆𑀧𑀢𑁆𑀢𑀺𑀬𑀸𑀧𑀺 𑀅𑀓𑁆𑀓𑁄𑀲𑁂𑀦𑀧𑀻’’𑀢𑀺 (𑀧𑀸𑀘𑀺. 𑁧𑁫) 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀤𑀲𑀳𑀺 𑀆𑀓𑀸𑀭𑁂𑀳𑀺 𑀉𑀧𑀲𑀫𑁆𑀧𑀦𑁆𑀦𑀁 𑀬𑁄 𑀔𑀼𑀁𑀲𑁂𑀢𑀺 𑀯𑀫𑁆𑀪𑁂𑀢𑀺, 𑀅𑀬𑀁 𑀑𑀫𑀲𑀢𑀺 𑀦𑀸𑀫, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀫𑁆𑀫𑀼𑀔𑀸 𑀪𑀡𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀢𑀣𑀸 𑀧𑀸𑀴𑀺𑀬𑀁 𑀅𑀦𑀸𑀕𑀢𑁂𑀳𑀺 ‘‘𑀘𑁄𑀭𑁄’’𑀢𑀺 𑀯𑀸 ‘‘𑀕𑀡𑁆𑀞𑀺𑀪𑁂𑀤𑀓𑁄’’𑀢𑀺 𑀯𑀸 𑀆𑀤𑀻𑀳𑀺 𑀪𑀡𑀦𑁆𑀢𑀲𑁆𑀲. ‘‘𑀲𑀦𑁆𑀢𑀺 𑀇𑀥𑁂𑀓𑀘𑁆𑀘𑁂 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀘𑀡𑁆𑀟𑀸𑀮𑀸’’𑀢𑀺𑀆𑀤𑀺𑀦𑀸 𑀧𑀭𑀺𑀬𑀸𑀬𑁂𑀦 𑀪𑀡𑀦𑁆𑀢𑀲𑁆𑀲 𑀘 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀪𑀡𑀦𑁆𑀢𑀲𑁆𑀲 𑀘 𑀲𑀩𑁆𑀩𑀢𑁆𑀣𑀧𑀺 𑀤𑀼𑀓𑁆𑀓𑀝𑀫𑁂𑀯.

𑀧𑀺𑀬𑀓𑀫𑁆𑀬𑀢𑀸𑀬 𑀯𑀸 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦 𑀯𑀸 𑀉𑀧𑀲𑀫𑁆𑀧𑀦𑁆𑀦𑀁 𑀚𑀸𑀢𑀺𑀆𑀤𑀻𑀳𑀺 𑀑𑀫𑀲𑀦𑁆𑀢𑀲𑁆𑀲 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀉𑀧𑀲𑀁𑀳𑀭𑀡𑀁 𑀧𑁂𑀲𑀼𑀜𑁆𑀜𑀳𑀭𑀡𑀁 𑀦𑀸𑀫. 𑀏𑀢𑁆𑀣𑀸𑀧𑀺 𑀧𑀭𑀺𑀬𑀸𑀬𑀯𑀘𑀦𑁂𑀦 𑀘 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀲𑀁𑀳𑀭𑀡𑁂𑀦 𑀘 𑀤𑀼𑀓𑁆𑀓𑀝𑀫𑁂𑀯.

𑀧𑀤𑀲𑁄𑀥𑀫𑁆𑀫𑁄𑀢𑀺 𑀏𑀢𑁆𑀣 ‘‘𑀥𑀫𑁆𑀫𑁄 𑀦𑀸𑀫 𑀩𑀼𑀤𑁆𑀥𑀪𑀸𑀲𑀺𑀢𑁄 𑀲𑀸𑀯𑀓𑀪𑀸𑀲𑀺𑀢𑁄 𑀇𑀲𑀺𑀪𑀸𑀲𑀺𑀢𑁄 𑀤𑁂𑀯𑀢𑀸𑀪𑀸𑀲𑀺𑀢𑁄 𑀅𑀢𑁆𑀣𑀽𑀧𑀲𑀁𑀳𑀺𑀢𑁄 𑀥𑀫𑁆𑀫𑀽𑀧𑀲𑀁𑀳𑀺𑀢𑁄’’𑀢𑀺 (𑀧𑀸𑀘𑀺. 𑁪𑁬) 𑀏𑀯𑀁 𑀯𑀼𑀢𑁆𑀢𑀁 𑀲𑀗𑁆𑀕𑀻𑀢𑀺𑀢𑁆𑀢𑀬𑀫𑀸𑀭𑀼𑀴𑁆𑀳𑀁 𑀢𑀺𑀧𑀺𑀝𑀓𑀥𑀫𑁆𑀫𑀁 𑀧𑀤𑀅𑀦𑀼𑀧𑀤𑀅𑀦𑁆𑀯𑀓𑁆𑀔𑀭𑀅𑀦𑀼𑀩𑁆𑀬𑀜𑁆𑀚𑀦𑀯𑀲𑁂𑀦 𑀪𑀺𑀓𑁆𑀔𑀼𑀜𑁆𑀘 𑀪𑀺𑀓𑁆𑀔𑀼𑀦𑀺𑀜𑁆𑀘 𑀞𑀧𑁂𑀢𑁆𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀏𑀓𑀢𑁄 𑀯𑀸𑀘𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀲𑀸𑀕𑀸𑀭𑁂𑀢𑀺 𑀬𑀁 𑀧𑀦 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀬𑀸𑀬𑁂𑀦 𑀤𑀺𑀬𑀟𑁆𑀠𑀳𑀢𑁆𑀣𑀼𑀩𑁆𑀩𑁂𑀥𑁂𑀦 𑀧𑀸𑀓𑀸𑀭𑀸𑀤𑀺𑀦𑀸 𑀧𑀭𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀲𑀩𑁆𑀩𑀧𑀭𑀺𑀘𑁆𑀙𑀺𑀦𑁆𑀦𑀜𑁆𑀘 𑀬𑁂𑀦 𑀓𑁂𑀦𑀘𑀺 𑀯𑀺𑀢𑀸𑀦𑀸𑀤𑀺𑀦𑀸 𑀅𑀦𑁆𑀢𑀫𑀲𑁄 𑀯𑀢𑁆𑀣𑁂𑀦𑀧𑀺 𑀙𑀦𑁆𑀦𑀢𑁆𑀢𑀸 𑀲𑀩𑁆𑀩𑀘𑁆𑀙𑀦𑁆𑀦𑀜𑁆𑀘 𑀲𑁂𑀦𑀸𑀲𑀦𑀁, 𑀢𑀣𑀸𑀭𑀽𑀧𑁂 𑀲𑁂𑀦𑀸𑀲𑀦𑁂 𑀏𑀓𑀽𑀧𑀘𑀸𑀭𑀝𑁆𑀞𑀸𑀦𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀳 𑀯𑀲𑀦𑁆𑀢𑀲𑁆𑀲 𑀘𑀢𑀼𑀢𑁆𑀣𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀦𑀺𑀧𑀚𑁆𑀚𑀦𑀕𑀡𑀦𑀸𑀬 𑀘 𑀅𑀦𑀼𑀧𑀲𑀫𑁆𑀧𑀦𑁆𑀦𑀕𑀡𑀦𑀸𑀬 𑀘 𑀤𑁂𑀯𑀲𑀺𑀓𑀁 𑀧𑀸𑀘𑀺𑀢𑁆𑀢𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀉𑀚𑁆𑀛𑀸𑀧𑀦𑀓𑀔𑀺𑀬𑁆𑀬𑀦𑁂𑀢𑀺 𑀏𑀢𑁆𑀣 𑀬𑁄 𑀉𑀧𑀲𑀫𑁆𑀧𑀦𑁆𑀦𑀁 𑀲𑀗𑁆𑀖𑁂𑀦 𑀲𑀫𑁆𑀫𑀢𑀁 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑀁 𑀯𑀸 𑀪𑀢𑁆𑀢𑀼𑀤𑁆𑀤𑁂𑀲𑀓𑀁 𑀯𑀸 𑀬𑀸𑀕𑀼𑀪𑀸𑀚𑀓𑀁 𑀯𑀸 𑀨𑀮𑀪𑀸𑀚𑀓𑀁 𑀯𑀸 𑀔𑀚𑁆𑀚𑀪𑀸𑀚𑀓𑀁 𑀯𑀸 𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓𑀁 𑀯𑀸 𑀫𑀗𑁆𑀓𑀼𑀓𑀢𑁆𑀢𑀼𑀓𑀸𑀫𑁄 𑀙𑀦𑁆𑀤𑁂𑀦 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀲𑁂𑀦𑀸𑀲𑀦𑀁 𑀧𑀜𑁆𑀜𑀸𑀧𑁂𑀢𑀺, 𑀪𑀢𑁆𑀢𑀸𑀦𑀺 𑀘 𑀉𑀤𑁆𑀤𑀺𑀲𑀢𑀻’’𑀢𑀺 𑀯𑀸 𑀯𑀤𑀦𑁆𑀢𑁄 𑀅𑀜𑁆𑀜𑀁 𑀉𑀧𑀲𑀫𑁆𑀧𑀦𑁆𑀦𑀁 𑀉𑀚𑁆𑀛𑀸𑀧𑁂𑀢𑀺 𑀢𑁂𑀦 𑀅𑀯𑀚𑀸𑀦𑀸𑀧𑁂𑀢𑀺, 𑀬𑁄 𑀧𑀦 𑀢𑀣𑁂𑀯 𑀯𑀤𑀦𑁆𑀢𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀦𑁆𑀢𑀺𑀓𑁂 𑀢𑀲𑁆𑀲 𑀅𑀬𑀲𑀁 𑀧𑀓𑀸𑀲𑁂𑀦𑁆𑀢𑁄 𑀔𑀻𑀬𑀢𑀺, 𑀢𑀲𑁆𑀫𑀺𑀁 𑀉𑀚𑁆𑀛𑀸𑀧𑀦𑀓𑁂 𑀘 𑀔𑀻𑀬𑀦𑀓𑁂 𑀘 𑀧𑀸𑀘𑀺𑀢𑁆𑀢𑀺𑀤𑁆𑀯𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁨𑁨. 𑀢𑀮𑀲𑀢𑁆𑀢𑀺𑀅𑀦𑀸𑀤𑀭-𑀓𑀼𑀓𑁆𑀓𑀼𑀘𑁆𑀘𑀼𑀧𑁆𑀧𑀸𑀤𑀦𑁂𑀲𑀼 𑀘𑀸𑀢𑀺 𑀏𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑀳𑀭𑀡𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀓𑀸𑀬𑀁 𑀯𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁 𑀯𑀸 𑀉𑀘𑁆𑀘𑀸𑀭𑁂𑀢𑀺, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀘𑁂 𑀯𑀺𑀭𑀤𑁆𑀥𑁄 𑀧𑀳𑀸𑀭𑀁 𑀤𑁂𑀢𑀺, 𑀅𑀧𑁆𑀧𑀳𑀭𑀺𑀢𑀼𑀓𑀸𑀫𑀢𑀸𑀬 𑀤𑀼𑀓𑁆𑀓𑀝𑀁, 𑀢𑀣𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀲𑀼𑀧𑀺 𑀤𑀼𑀓𑁆𑀓𑀝𑀫𑁂𑀯.

𑀉𑀧𑀲𑀫𑁆𑀧𑀦𑁆𑀦𑁂𑀦 𑀧𑀜𑁆𑀜𑀢𑁆𑀢𑁂𑀦 𑀯𑀼𑀘𑁆𑀘𑀫𑀸𑀦𑁄 𑀢𑀁 𑀅𑀲𑀺𑀓𑁆𑀔𑀺𑀢𑀼𑀓𑀸𑀫𑀢𑀸𑀬 𑀯𑀸 𑀢𑀲𑁆𑀲 𑀯𑀘𑀦𑀁 𑀅𑀲𑁄𑀢𑀼𑀓𑀸𑀫𑀢𑀸𑀬 𑀯𑀸 𑀬𑁄 𑀅𑀦𑀸𑀤𑀭𑀺𑀬𑀁 𑀓𑀭𑁄𑀢𑀺, 𑀢𑀲𑁆𑀲 𑀅𑀦𑀸𑀤𑀭𑀓𑀭𑀡𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀅𑀧𑀜𑁆𑀜𑀢𑁆𑀢𑁂𑀦 𑀯𑀼𑀘𑁆𑀘𑀫𑀸𑀦𑀲𑁆𑀲 𑀘 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀧𑀜𑁆𑀜𑀢𑁆𑀢𑁂𑀦 𑀯𑀸 𑀅𑀧𑀜𑁆𑀜𑀢𑁆𑀢𑁂𑀦 𑀯𑀸 𑀯𑀼𑀘𑁆𑀘𑀫𑀸𑀦𑀲𑁆𑀲 𑀤𑀼𑀓𑁆𑀓𑀝𑀁.

𑀉𑀧𑀲𑀫𑁆𑀧𑀦𑁆𑀦𑀲𑁆𑀲 ‘‘𑀊𑀦𑀯𑀻𑀲𑀢𑀺𑀯𑀲𑁆𑀲𑁄 𑀫𑀜𑁆𑀜𑁂 𑀢𑁆𑀯𑀁 𑀉𑀧𑀲𑀫𑁆𑀧𑀦𑁆𑀦𑁄, 𑀯𑀺𑀓𑀸𑀮𑁂 𑀫𑀜𑁆𑀜𑁂 𑀢𑀬𑀸 𑀪𑀼𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀜𑁆𑀘𑀺𑀘𑁆𑀘 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑁆𑀧𑀸𑀤𑀦𑁂 𑀤𑀼𑀓𑁆𑀓𑀝𑀁.

𑀕𑀸𑀫𑀧𑁆𑀧𑀯𑁂𑀲𑀦𑀸𑀧𑀼𑀘𑁆𑀙𑀸𑀢𑀺 𑀏𑀢𑁆𑀣 𑀧𑀦 𑀫𑀚𑁆𑀛𑀦𑁆𑀳𑀺𑀓𑀸𑀢𑀺𑀓𑁆𑀓𑀫𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀯𑀺𑀓𑀸𑀮𑁄 𑀦𑀸𑀫, 𑀏𑀢𑁆𑀣𑀦𑁆𑀢𑀭𑁂 𑀲𑀘𑁂 𑀲𑀫𑁆𑀩𑀳𑀼𑀮𑀸 𑀓𑁂𑀦𑀘𑀺 𑀓𑀫𑁆𑀫𑁂𑀦 𑀕𑀸𑀫𑀁 𑀧𑀯𑀺𑀲𑀦𑁆𑀢𑀺, ‘‘𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑀁 𑀆𑀧𑀼𑀘𑁆𑀙𑀸𑀫𑀸’’𑀢𑀺 𑀲𑀩𑁆𑀩𑁂𑀳𑀺𑀧𑀺 𑀅𑀜𑁆𑀜𑀫𑀜𑁆𑀜𑀁 𑀆𑀧𑀼𑀘𑁆𑀙𑀺𑀢𑀩𑁆𑀩𑀁. 𑀲𑀘𑁂 𑀅𑀦𑀸𑀧𑀼𑀘𑁆𑀙𑀸 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑀁, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀉𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑀦𑁆𑀢𑀺, 𑀧𑀞𑀫𑀧𑀸𑀤𑁂 𑀤𑀼𑀓𑁆𑀓𑀝𑀁, 𑀤𑀼𑀢𑀺𑀬𑀧𑀸𑀤𑀼𑀤𑁆𑀥𑀸𑀭𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀆𑀧𑀤𑀸𑀲𑀼 𑀅𑀦𑀸𑀧𑀢𑁆𑀢𑀺.

𑀪𑁄𑀚𑀦𑁂 𑀘 𑀧𑀭𑀫𑁆𑀧𑀭𑀸𑀢𑀺 𑀧𑀭𑀫𑁆𑀧𑀭𑀪𑁄𑀚𑀦𑁂 𑀘 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀧𑀦 𑀧𑀜𑁆𑀘𑀲𑀼 𑀪𑁄𑀚𑀦𑁂𑀲𑀼 𑀅𑀜𑁆𑀜𑀢𑀭𑀁 𑀦𑀸𑀫𑀁 𑀕𑀳𑁂𑀢𑁆𑀯𑀸 ‘‘𑀑𑀤𑀦𑁂𑀦 𑀯𑀸 𑀲𑀢𑁆𑀢𑀼𑀦𑀸 𑀯𑀸 𑀓𑀼𑀫𑁆𑀫𑀸𑀲𑁂𑀦 𑀯𑀸 𑀫𑀁𑀲𑁂𑀦 𑀯𑀸 𑀫𑀘𑁆𑀙𑁂𑀦 𑀯𑀸 𑀦𑀺𑀫𑀦𑁆𑀢𑁂𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦, 𑀬𑁂𑀦 𑀓𑁂𑀦𑀘𑀺 𑀯𑁂𑀯𑀘𑀦𑁂𑀦 𑀯𑀸 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑀸𑀬 𑀦𑀺𑀫𑀦𑁆𑀢𑀺𑀢𑀲𑁆𑀲 𑀬𑁂𑀦 𑀬𑁂𑀦 𑀧𑀞𑀫𑀁 𑀦𑀺𑀫𑀦𑁆𑀢𑀺𑀢𑁄, 𑀢𑀲𑁆𑀲 𑀢𑀲𑁆𑀲 𑀪𑁄𑀚𑀦𑀁 𑀞𑀧𑁂𑀢𑁆𑀯𑀸 𑀉𑀧𑁆𑀧𑀝𑀺𑀧𑀸𑀝𑀺𑀬𑀸, 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀸 𑀧𑀞𑀫𑀦𑀺𑀫𑀦𑁆𑀢𑀦𑀁 𑀧𑀭𑀲𑁆𑀲 𑀧𑀭𑀲𑁆𑀲 𑀓𑀼𑀮𑀲𑁆𑀲 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀭𑀫𑁆𑀧𑀭𑀪𑁄𑀚𑀦𑁂 𑀧𑀸𑀘𑀺𑀢𑁆𑀢𑀺 𑀳𑁄𑀢𑀺. 𑀕𑀺𑀮𑀸𑀦𑀘𑀻𑀯𑀭𑀤𑀸𑀦𑀘𑀻𑀯𑀭𑀓𑀸𑀮𑀲𑀫𑀬𑁂𑀲𑀼 𑀅𑀦𑀸𑀧𑀢𑁆𑀢𑀺, 𑀢𑀣𑀸 𑀧𑀜𑁆𑀘 𑀪𑁄𑀚𑀦𑀸𑀦𑀺 𑀞𑀧𑁂𑀢𑁆𑀯𑀸 𑀲𑀩𑁆𑀩𑀢𑁆𑀣.

𑁧𑁨𑁩. 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀕𑀫𑀦𑁂 𑀲𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀤𑀲𑀯𑀺𑀥𑀸 𑀲𑁂𑀬𑁆𑀬𑀸 𑀪𑀺𑀲𑀺 𑀘𑀺𑀫𑀺𑀮𑀺𑀓𑀸 𑀉𑀢𑁆𑀢𑀭𑀢𑁆𑀣𑀭𑀡𑀁 𑀪𑀽𑀫𑀢𑁆𑀣𑀭𑀡𑀁 𑀢𑀝𑁆𑀝𑀺𑀓𑀸 𑀘𑀫𑁆𑀫𑀔𑀡𑁆𑀟𑁄 𑀦𑀺𑀲𑀻𑀤𑀦𑀁 𑀧𑀘𑁆𑀘𑀢𑁆𑀣𑀭𑀡𑀁 𑀢𑀺𑀡𑀲𑀦𑁆𑀣𑀸𑀭𑁄 𑀧𑀡𑁆𑀡𑀲𑀦𑁆𑀣𑀸𑀭𑁄𑀢𑀺. 𑀏𑀢𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀲𑀗𑁆𑀖𑀺𑀓𑁂 𑀯𑀺𑀳𑀸𑀭𑁂 𑀕𑀼𑀢𑁆𑀢𑀲𑁂𑀦𑀸𑀲𑀦𑁂 𑀅𑀢𑁆𑀢𑀦𑁄 𑀯𑀲𑁆𑀲𑀕𑁆𑀕𑁂𑀦 𑀕𑀳𑀺𑀢𑀁 𑀅𑀢𑁆𑀢𑀦𑀸 𑀯𑀸 𑀲𑀦𑁆𑀣𑀭𑀺𑀢𑁆𑀯𑀸, 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀯𑀸 𑀲𑀦𑁆𑀣𑀭𑀸𑀧𑁂𑀢𑁆𑀯𑀸 𑀢𑀁 𑀤𑀺𑀯𑀲𑀁 𑀕𑀫𑀺𑀓𑀯𑀲𑁂𑀦 𑀧𑀓𑁆𑀓𑀫𑀦𑁆𑀢𑁄 𑀦𑁂𑀯 𑀲𑀬𑀁 𑀉𑀤𑁆𑀥𑀭𑁂𑀬𑁆𑀬 𑀦 𑀅𑀜𑁆𑀜𑀁 𑀉𑀤𑁆𑀥𑀭𑀸𑀧𑁂𑀬𑁆𑀬, 𑀬𑀣𑀸 𑀉𑀧𑀘𑀺𑀓𑀸𑀤𑀻𑀳𑀺 𑀦 𑀔𑀚𑁆𑀚𑁂𑀬𑁆𑀬, 𑀏𑀯𑀁 𑀦 𑀞𑀧𑁂𑀬𑁆𑀬, 𑀅𑀜𑁆𑀜𑁂𑀦 𑀯𑀸 𑀦 𑀉𑀤𑁆𑀥𑀭𑀸𑀧𑁂𑀬𑁆𑀬, 𑀧𑀢𑀺𑀭𑀽𑀧𑀁 𑀪𑀺𑀓𑁆𑀔𑀼𑀁 𑀯𑀸 𑀲𑀸𑀫𑀡𑁂𑀭𑀁 𑀯𑀸 𑀆𑀭𑀸𑀫𑀺𑀓𑀫𑁂𑀯 𑀯𑀸 𑀅𑀦𑀸𑀧𑀼𑀘𑁆𑀙𑀸 𑀯𑀸 𑀕𑀘𑁆𑀙𑁂𑀬𑁆𑀬, 𑀢𑀲𑁆𑀲 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀭𑀺𑀓𑁆𑀔𑁂𑀧𑀁, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀫𑀡𑁆𑀟𑀧𑀭𑀼𑀓𑁆𑀔𑀫𑀽𑀮𑀸𑀤𑀺𑀅𑀕𑀼𑀢𑁆𑀢𑀲𑁂𑀦𑀸𑀲𑀦𑁂 𑀲𑀦𑁆𑀣𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀢𑀣𑀸 𑀫𑀜𑁆𑀘𑀧𑀻𑀞𑀪𑀺𑀲𑀺𑀓𑁄𑀘𑁆𑀙𑀓𑁂𑀲𑀼, 𑀕𑀼𑀢𑁆𑀢𑀲𑁂𑀦𑀸𑀲𑀦𑁂𑀧𑀺 𑀤𑀼𑀓𑁆𑀓𑀝𑀫𑁂𑀯.

𑀲𑁂𑀦𑀸𑀲𑀦𑀸𑀦𑀺 𑀯𑀸𑀢𑀺 𑀏𑀢𑁆𑀣 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀕𑀫𑀦𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀧𑀦 𑀫𑀜𑁆𑀘𑁄 𑀧𑀻𑀞𑀁 𑀪𑀺𑀲𑀺 𑀓𑁄𑀘𑁆𑀙𑀓𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀲𑁂𑀦𑀸𑀲𑀦𑀁 𑀯𑀲𑁆𑀲𑀸𑀦𑀳𑁂𑀫𑀦𑁆𑀢𑀸𑀦𑀁 𑀅𑀝𑁆𑀞𑀲𑀼 𑀫𑀸𑀲𑁂𑀲𑀼 𑀅𑀚𑁆𑀛𑁄𑀓𑀸𑀲𑁂 𑀯𑀸 𑀑𑀯𑀲𑁆𑀲𑀓𑀫𑀡𑁆𑀟𑀧𑁂 𑀯𑀸 𑀭𑀼𑀓𑁆𑀔𑀫𑀽𑀮𑁂 𑀯𑀸 𑀲𑀬𑀁 𑀲𑀦𑁆𑀣𑀭𑀺𑀢𑁆𑀯𑀸 𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀦𑁆𑀣𑀭𑀸𑀧𑁂𑀢𑁆𑀯𑀸 𑀯𑀸 𑀢𑀁 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀯𑀸 𑀅𑀦𑀼𑀤𑁆𑀥𑀭𑀸𑀧𑁂𑀢𑁆𑀯𑀸 𑀯𑀸 𑀢𑀲𑁆𑀲 𑀲𑁂𑀦𑀸𑀲𑀦𑀲𑁆𑀲 𑀤𑁆𑀯𑀺𑀦𑁆𑀦𑀁 𑀮𑁂𑀟𑁆𑀟𑀼𑀧𑀸𑀢𑀸𑀦𑀁 𑀅𑀢𑀺𑀓𑁆𑀓𑀫𑀦𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀫𑁆𑀫𑀼𑀜𑁆𑀚𑀦𑀻𑀬𑀸𑀤𑀺 𑀲𑁂𑀲𑀧𑀭𑀺𑀓𑁆𑀔𑀸𑀭𑁂𑀲𑀼 𑀤𑀼𑀓𑁆𑀓𑀝𑀁.

𑀇𑀢𑁆𑀣𑀺𑀬𑀸𑀤𑁆𑀥𑀸𑀦𑀕𑀫𑀦𑁂𑀢𑀺 𑀏𑀢𑁆𑀣 𑀫𑀸𑀢𑀼𑀕𑀸𑀫𑁂𑀦 ‘‘𑀕𑀘𑁆𑀙𑀸𑀫 𑀪𑀕𑀺𑀦𑀺, 𑀕𑀘𑁆𑀙𑀸𑀫 𑀅𑀬𑁆𑀬𑀸’’𑀢𑀺 𑀏𑀯𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 ‘‘𑀅𑀚𑁆𑀚 𑀯𑀸 𑀲𑁆𑀯𑁂 𑀯𑀸 𑀧𑀭𑀲𑀼𑀯𑁂 𑀯𑀸’’𑀢𑀺 𑀦𑀺𑀬𑀫𑀺𑀢𑀓𑀸𑀮𑀁 𑀯𑀺𑀲𑀗𑁆𑀓𑁂𑀢𑀁 𑀅𑀓𑀢𑁆𑀯𑀸 𑀤𑁆𑀯𑀸𑀭𑀯𑀺𑀲𑀗𑁆𑀓𑁂𑀢𑀁 𑀫𑀕𑁆𑀕𑀯𑀺𑀲𑀗𑁆𑀓𑁂𑀢𑀁 𑀓𑀢𑁆𑀯𑀸𑀧𑀺 𑀕𑀘𑁆𑀙𑀢𑁄 𑀕𑀸𑀫𑀦𑁆𑀢𑀭𑁂 𑀕𑀸𑀫𑀦𑁆𑀢𑀭𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀕𑀸𑀫𑀓𑁂 𑀅𑀭𑀜𑁆𑀜𑁂 𑀅𑀤𑁆𑀥𑀬𑁄𑀚𑀦𑁂 𑀅𑀤𑁆𑀥𑀬𑁄𑀚𑀦𑁂 𑀆𑀧𑀢𑁆𑀢𑀺.

𑀏𑀓𑁂𑀓𑀸𑀬 𑀦𑀺𑀲𑀻𑀤𑀦𑁂𑀢𑀺 𑀏𑀢𑁆𑀣 𑀏𑀓𑁄 𑀏𑀓𑀸𑀬 𑀇𑀢𑁆𑀣𑀺𑀬𑀸 𑀦𑀺𑀲𑀻𑀤𑀦𑁂𑀢𑀺 𑀅𑀢𑁆𑀣𑁄.

𑁧𑁨𑁪. 𑀪𑀺𑀁𑀲𑀸𑀧𑀦𑁂𑀢𑀺 𑀏𑀢𑁆𑀣 𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀁 𑀪𑀺𑀁𑀲𑀸𑀧𑁂𑀢𑀼𑀓𑀸𑀫𑁄 𑀘𑁄𑀭𑀓𑀦𑁆𑀢𑀸𑀭𑀯𑀸𑀴𑀓𑀦𑁆𑀢𑀸𑀭𑀸𑀤𑀻𑀦𑀺 𑀆𑀘𑀺𑀓𑁆𑀔𑀢𑀺, 𑀪𑀬𑀸𑀦𑀓𑀁 𑀯𑀸 𑀭𑀽𑀧𑀲𑀤𑁆𑀤𑀸𑀤𑀺𑀁 𑀤𑀲𑁆𑀲𑁂𑀢𑀺, 𑀲𑁄 𑀪𑀸𑀬𑀢𑀼 𑀯𑀸 𑀫𑀸 𑀯𑀸, 𑀢𑀲𑁆𑀲 𑀧𑀬𑁄𑀕𑁂 𑀧𑀬𑁄𑀕𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀤𑀼𑀓𑁆𑀓𑀝𑀁.

𑀆𑀓𑁄𑀝𑀦𑁂𑀢𑀺 𑀧𑀳𑀸𑀭𑀤𑀸𑀦𑁂. 𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀅𑀦𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 𑀲𑀘𑁂 𑀉𑀧𑁆𑀧𑀮𑀧𑀢𑁆𑀢𑁂𑀦𑀧𑀺 𑀧𑀳𑀸𑀭𑀁 𑀤𑁂𑀢𑀺, 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀕𑀳𑀝𑁆𑀞𑀲𑁆𑀲 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀲𑁆𑀲 𑀯𑀸 𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲𑀸𑀧𑀺 𑀧𑀳𑀸𑀭𑀁 𑀤𑁂𑀢𑀺, 𑀤𑀼𑀓𑁆𑀓𑀝𑀫𑁂𑀯.

𑀅𑀦𑀸𑀘𑀸𑀭𑀁 𑀆𑀘𑀭𑀺𑀢𑁆𑀯𑀸 𑀲𑀗𑁆𑀖𑀫𑀚𑁆𑀛𑁂 𑀆𑀧𑀢𑁆𑀢𑀺𑀬𑀸 𑀯𑀸 𑀯𑀢𑁆𑀣𑀼𑀦𑀸 𑀯𑀸 𑀅𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 𑀢𑀁 𑀅𑀓𑀣𑁂𑀢𑀼𑀓𑀸𑀫𑁄 ‘‘𑀓𑁄 𑀆𑀧𑀦𑁆𑀦𑁄, 𑀓𑀺𑀁 𑀆𑀧𑀦𑁆𑀦𑁄, 𑀓𑀺𑀲𑁆𑀫𑀺𑀁 𑀆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀜𑁆𑀜𑁂𑀳𑀺 𑀯𑀘𑀦𑁂𑀳𑀺 𑀢𑀁 𑀯𑀘𑀦𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁄 𑀲𑁄 𑀅𑀜𑁆𑀜𑀁 𑀯𑀤𑀢𑀺, 𑀅𑀬𑀁 𑀅𑀜𑁆𑀜𑀯𑀸𑀤𑀓𑁄, 𑀢𑀲𑁆𑀫𑀺𑀁 𑀅𑀜𑁆𑀜𑀯𑀸𑀤𑀓𑁂 𑀘 𑀓𑀜𑁆𑀘𑀺 𑀯𑀻𑀢𑀺𑀓𑁆𑀓𑀫𑀁 𑀤𑀺𑀲𑁆𑀯𑀸 ‘‘𑀆𑀯𑀼𑀲𑁄, 𑀇𑀤𑀁 𑀦𑀸𑀫 𑀢𑀬𑀸 𑀓𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀢𑀁 𑀦 𑀓𑀣𑁂𑀢𑀼𑀓𑀸𑀫𑁄 𑀢𑀼𑀡𑁆𑀳𑀻𑀪𑀽𑀢𑁄𑀯 𑀲𑀗𑁆𑀖𑀁 𑀯𑀺𑀳𑁂𑀲𑀢𑀻𑀢𑀺 𑀲𑀗𑁆𑀖𑀯𑀺𑀳𑁂𑀲𑀓𑁄, 𑀢𑀲𑁆𑀫𑀺𑀁 𑀯𑀺𑀳𑁂𑀲𑀓𑁂 𑀘 𑀧𑀸𑀘𑀺𑀢𑁆𑀢𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀇𑀥 𑀧𑀦 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦 𑀅𑀜𑁆𑀜𑀯𑀸𑀤𑀓𑁂 𑀘 𑀯𑀺𑀳𑁂𑀲𑀓𑁂 𑀘 𑀆𑀭𑁄𑀧𑀺𑀢𑁂 𑀧𑀼𑀦 𑀅𑀜𑁆𑀜𑀁 𑀪𑀡𑀦𑁆𑀢𑀲𑁆𑀲, 𑀯𑀺𑀳𑁂𑀲𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺. 𑀅𑀦𑀸𑀭𑁄𑀧𑀺𑀢𑁂 𑀤𑀼𑀓𑁆𑀓𑀝𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀤𑀼𑀝𑁆𑀞𑀼𑀮𑁆𑀮𑀧𑀓𑀸𑀲𑀙𑀸𑀤𑁂𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 ‘‘𑀤𑀼𑀝𑁆𑀞𑀼𑀮𑁆𑀮𑀸 𑀦𑀸𑀫 𑀆𑀧𑀢𑁆𑀢𑀺 𑀘𑀢𑁆𑀢𑀸𑀭𑀺 𑀘 𑀧𑀸𑀭𑀸𑀚𑀺𑀓𑀸𑀦𑀺 𑀢𑁂𑀭𑀲 𑀘 𑀲𑀗𑁆𑀖𑀸𑀤𑀺𑀲𑁂𑀲𑀸’’𑀢𑀺 (𑀧𑀸𑀘𑀺. 𑁩𑁯𑁯) 𑀯𑀼𑀢𑁆𑀢𑀸, 𑀢𑀣𑀸𑀧𑀺 𑀇𑀥 𑀲𑀗𑁆𑀖𑀸𑀤𑀺𑀲𑁂𑀲𑀸𑀯 𑀅𑀥𑀺𑀧𑁆𑀧𑁂𑀢𑀸. 𑀢𑀲𑁆𑀫𑀸 𑀲𑀗𑁆𑀖𑀲𑀫𑁆𑀫𑀼𑀢𑀺𑀁 𑀯𑀺𑀦𑀸 𑀪𑀺𑀓𑁆𑀔𑀼𑀲𑁆𑀲 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 ‘‘𑀅𑀬𑀁 𑀅𑀲𑀼𑀘𑀺𑀁 𑀫𑁄𑀘𑁂𑀢𑁆𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀢𑁆𑀣𑀼𑀦𑀸 𑀲𑀤𑁆𑀥𑀺𑀁 𑀆𑀧𑀢𑁆𑀢𑀺𑀁 𑀖𑀝𑁂𑀢𑁆𑀯𑀸 𑀪𑀺𑀓𑁆𑀔𑀼𑀜𑁆𑀘 𑀪𑀺𑀓𑁆𑀔𑀼𑀦𑀺𑀜𑁆𑀘 𑀞𑀧𑁂𑀢𑁆𑀯𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀆𑀭𑁄𑀘𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀣𑀼𑀮𑁆𑀮𑀘𑁆𑀘𑀬𑀸𑀤𑀺𑀅𑀤𑀼𑀝𑁆𑀞𑀼𑀮𑁆𑀮𑀸𑀭𑁄𑀘𑀦𑁂 𑀤𑀼𑀓𑁆𑀓𑀝𑀁. 𑀤𑀼𑀝𑁆𑀞𑀼𑀮𑁆𑀮𑀘𑁆𑀙𑀸𑀤𑀦𑁂𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑁄𑀯 𑀅𑀥𑀺𑀧𑁆𑀧𑁂𑀢𑁄. 𑀬𑁄 𑀧𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀲𑀬𑀁 𑀯𑀸 𑀚𑀸𑀦𑀺𑀢𑁆𑀯𑀸 𑀅𑀜𑁆𑀜𑁂𑀲𑀁 𑀯𑀸 𑀲𑀼𑀢𑁆𑀯𑀸 ‘‘𑀇𑀫𑀁 𑀚𑀸𑀦𑀺𑀢𑁆𑀯𑀸 𑀘𑁄𑀤𑁂𑀲𑁆𑀲𑀦𑁆𑀢𑀺 𑀲𑀸𑀭𑁂𑀲𑁆𑀲𑀦𑁆𑀢𑀺 𑀫𑀗𑁆𑀓𑀼𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀦𑀸𑀭𑁄𑀘𑀺𑀲𑁆𑀲𑀸𑀫𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀙𑀸 𑀆𑀭𑁄𑀘𑀺𑀢𑁂𑀧𑀺 𑀦 𑀭𑀓𑁆𑀔𑀢𑀺 𑀏𑀯.

𑀳𑀸𑀲𑁄𑀤𑀓𑁂𑀢𑀺 𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑁂𑀦 𑀳𑀸𑀲𑁄 𑀘 𑀉𑀤𑀓𑁂 𑀳𑀸𑀲𑁄 𑀘𑀸𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀁 𑀳𑀲𑀸𑀥𑀺𑀧𑁆𑀧𑀸𑀬𑁄 𑀓𑀸𑀬𑁂𑀦 𑀓𑀸𑀬𑀁 𑀆𑀫𑀲𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲, 𑀓𑁄 𑀧𑀦 𑀯𑀸𑀤𑁄 𑀉𑀧𑀓𑀘𑁆𑀙𑀓𑀸𑀤𑀻𑀲𑀼 𑀖𑀝𑁆𑀝𑀦𑁂. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀤𑀼𑀓𑁆𑀓𑀝𑀁, 𑀢𑀣𑀸 𑀪𑀺𑀓𑁆𑀔𑀼𑀲𑁆𑀲 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀸𑀫𑀲𑀦𑁂 𑀘 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀸𑀫𑀲𑀦𑁂 𑀘. 𑀏𑀢𑁆𑀣 𑀪𑀺𑀓𑁆𑀔𑀼𑀦𑀻𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀝𑁆𑀞𑀸𑀦𑁂 𑀞𑀺𑀢𑀸. 𑀉𑀤𑀓𑁂 𑀳𑀲𑀦𑀥𑀫𑁆𑀫𑁄 𑀦𑀸𑀫 𑀉𑀧𑀭𑀺𑀕𑁄𑀧𑁆𑀨𑀓𑁂 𑀉𑀤𑀓𑁂 𑀓𑀻𑀴𑀸𑀥𑀺𑀧𑁆𑀧𑀸𑀬𑀲𑁆𑀲 𑀦𑀺𑀫𑁆𑀫𑀼𑀚𑁆𑀚𑀦𑀉𑀫𑁆𑀫𑀼𑀚𑁆𑀚𑀦𑀧𑁆𑀮𑀯𑀦𑀸𑀤𑀺𑀓𑀁. 𑀇𑀥 𑀳𑀸𑀲𑁄 𑀦𑀸𑀫 𑀓𑀻𑀴𑀸 𑀯𑀼𑀘𑁆𑀘𑀢𑀺.

𑀦𑀺𑀘𑁆𑀙𑀼𑀪𑀦𑁂 𑀯𑀺𑀳𑀸𑀭𑀸𑀢𑀺 𑀲𑀗𑁆𑀖𑀺𑀓𑀸 𑀯𑀺𑀳𑀸𑀭𑀸 𑀦𑀺𑀓𑁆𑀓𑀟𑁆𑀠𑀦𑁂𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀧𑀦 𑀬𑁄 𑀓𑀼𑀤𑁆𑀥𑁄 𑀳𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀁 𑀳𑀢𑁆𑀣𑀸𑀤𑀻𑀲𑀼 𑀕𑀳𑁂𑀢𑁆𑀯𑀸 𑀯𑀸 ‘‘𑀦𑀺𑀓𑁆𑀔𑀫𑀸’’𑀢𑀺 𑀯𑀢𑁆𑀯𑀸 𑀯𑀸 𑀬𑀢𑁆𑀢𑀓𑀸𑀦𑀺 𑀤𑁆𑀯𑀸𑀭𑀸𑀦𑀺 𑀏𑀓𑁂𑀦 𑀧𑀬𑁄𑀕𑁂𑀦 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀢𑀢𑁆𑀣 𑀤𑁆𑀯𑀸𑀭𑀕𑀡𑀦𑀸𑀬 𑀆𑀧𑀢𑁆𑀢𑀺𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀬𑁄𑀕𑀲𑁆𑀲 𑀏𑀓𑀢𑁆𑀢𑀸 𑀏𑀓𑀸 𑀏𑀯 𑀕𑀳𑁂𑀢𑀩𑁆𑀩𑀸. 𑀲𑀘𑁂 𑀦𑀸𑀦𑀸𑀧𑀬𑁄𑀕𑁂𑀳𑀺 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀢𑀢𑁆𑀣 𑀤𑁆𑀯𑀸𑀭𑀕𑀡𑀦𑀸𑀬 𑀕𑀳𑁂𑀢𑀩𑁆𑀩𑀁. 𑀢𑀲𑁆𑀲 𑀧𑀭𑀺𑀓𑁆𑀔𑀸𑀭𑀦𑀺𑀓𑁆𑀓𑀟𑁆𑀠𑀦𑁂 𑀤𑀼𑀓𑁆𑀓𑀝𑀁, 𑀢𑀣𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑁂, 𑀢𑀲𑁆𑀲 𑀧𑀭𑀺𑀓𑁆𑀔𑀸𑀭𑀦𑀺𑀓𑁆𑀓𑀟𑁆𑀠𑀦𑁂 𑀘. 𑀅𑀮𑀚𑁆𑀚𑀺𑀆𑀤𑀻𑀲𑀼 𑀧𑀦 𑀅𑀦𑀸𑀧𑀢𑁆𑀢𑀺.

𑀅𑀦𑀼𑀧𑀔𑀚𑁆𑀚 𑀲𑀬𑀦𑁂𑀢𑀺 𑀲𑀗𑁆𑀖𑀺𑀓𑁂 𑀯𑀺𑀳𑀸𑀭𑁂 ‘‘𑀯𑀼𑀟𑁆𑀠𑁄’’𑀢𑀺 𑀯𑀸 ‘‘𑀕𑀺𑀮𑀸𑀦𑁄’’𑀢𑀺 𑀯𑀸 ‘‘𑀲𑀗𑁆𑀖𑁂𑀦 𑀤𑀺𑀦𑁆𑀦𑁄’’𑀢𑀺 𑀯𑀸 𑀚𑀸𑀦𑀺𑀢𑁆𑀯𑀸 𑀫𑀜𑁆𑀘𑀲𑁆𑀲 𑀯𑀸 𑀧𑀻𑀞𑀲𑁆𑀲 𑀯𑀸 𑀧𑀯𑀺𑀲𑀦𑁆𑀢𑀲𑁆𑀲 𑀯𑀸 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀯𑀸 𑀉𑀧𑀘𑀸𑀭𑁂 𑀲𑁂𑀬𑁆𑀬𑀁 𑀲𑀦𑁆𑀣𑀭𑀺𑀢𑁆𑀯𑀸 𑀯𑀸 𑀲𑀦𑁆𑀣𑀭𑀸𑀧𑁂𑀢𑁆𑀯𑀸 𑀯𑀸 ‘‘𑀬𑀲𑁆𑀲 𑀲𑀫𑁆𑀩𑀸𑀥𑁄 𑀪𑀯𑀺𑀲𑁆𑀲𑀢𑀺, 𑀲𑁄 𑀧𑀓𑁆𑀓𑀫𑀺𑀲𑁆𑀲𑀢𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀅𑀪𑀺𑀦𑀺𑀲𑀻𑀤𑀦𑁆𑀢𑀲𑁆𑀲 𑀘 𑀅𑀪𑀺𑀦𑀺𑀧𑀚𑁆𑀚𑀦𑁆𑀢𑀲𑁆𑀲 𑀘 𑀧𑀬𑁄𑀕𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀘𑀺𑀢𑁆𑀢𑀺𑀬𑀯𑀺𑀦𑀺𑀘𑁆𑀙𑀬𑁄.

𑀧𑀸𑀘𑀺𑀢𑁆𑀢𑀺𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.