𑁧𑁧. 𑀦𑀺𑀲𑁆𑀲𑀕𑁆𑀕𑀺𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁧𑁬-𑁭. 𑀇𑀤𑀸𑀦𑀺 𑀅𑀘𑁆𑀘𑁄𑀴𑀸𑀭𑀺𑀓𑀸𑀦𑀁 𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀭𑀽𑀧𑀺𑀬’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀅𑀜𑁆𑀜𑀣𑀸𑀧𑀺 𑀬𑀼𑀢𑁆𑀢𑀺 𑀧𑀭𑀺𑀬𑁂𑀲𑀺𑀢𑀩𑁆𑀩𑀸. 𑀢𑀢𑁆𑀣𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 (𑀧𑀸𑀭𑀸. 𑁫𑁯𑁧; 𑀧𑀸𑀭𑀸. 𑀅𑀝𑁆𑀞. 𑁨.𑁫𑁮𑁯; 𑀓𑀗𑁆𑀔𑀸. 𑀅𑀝𑁆𑀞. 𑀚𑀸𑀢𑀭𑀼𑀧𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑁋 𑀬𑁄 𑀭𑀽𑀧𑀺𑀬𑁂𑀦 𑀅𑀭𑀽𑀧𑀺𑀬𑀜𑁆𑀘 𑀧𑀭𑀺𑀯𑀢𑁆𑀢𑁂𑀬𑁆𑀬, 𑀬𑁄 𑀘 𑀇𑀢𑀭𑁂𑀦 𑀘 𑀅𑀭𑀽𑀧𑀺𑀬𑁂𑀦 𑀭𑀽𑀧𑀺𑀬𑀁 𑀧𑀭𑀺𑀯𑀢𑁆𑀢𑁂𑀬𑁆𑀬, 𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀻𑀢𑀺.

𑀇𑀤𑀸𑀦𑀺 𑀭𑀽𑀧𑀺𑀬𑀜𑁆𑀘 𑀅𑀭𑀽𑀧𑀺𑀬𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀇𑀥 𑀭𑀽𑀧𑀺𑀬’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀏𑀢𑁆𑀣 (𑀧𑀸𑀭𑀸. 𑁫𑁮𑁯; 𑀓𑀗𑁆𑀔𑀸. 𑀅𑀝𑁆𑀞. 𑀚𑀸𑀢𑀭𑀼𑀧𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀲𑀚𑁆𑀛𑀼 𑀲𑀺𑀗𑁆𑀕𑀻𑀢𑀺 𑀲𑀚𑁆𑀛𑀽𑀢𑀺 𑀭𑀚𑀢𑀁. 𑀲𑀺𑀗𑁆𑀕𑀻𑀢𑀺 𑀲𑀼𑀯𑀡𑁆𑀡𑀁. 𑀢𑀫𑁆𑀩𑀮𑁄𑀳𑀸𑀤𑀻𑀳𑀺 𑀯𑀸 𑀤𑀸𑀭𑀽𑀳𑀺 𑀯𑀸 𑀧𑀡𑁆𑀡𑁂𑀳𑀺 𑀯𑀸 𑀮𑀸𑀔𑀸𑀬 𑀯𑀸 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀯𑀸 𑀅𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀯𑀸 𑀓𑀢𑀁 𑀘𑀫𑁆𑀫𑀩𑀻𑀚𑀫𑀬𑀫𑁆𑀧𑀺𑀬𑀁 𑀬𑀁 𑀤𑁂𑀲𑁂 𑀯𑁄𑀳𑀸𑀭𑀁 𑀕𑀘𑁆𑀙𑀢𑀺, 𑀇𑀤𑀁 𑀯𑁄𑀳𑀸𑀭𑀽𑀧𑀕𑀫𑀸𑀲𑀓𑀁 𑀦𑀸𑀫. 𑀇𑀤𑀫𑀺𑀥 𑀭𑀽𑀧𑀺𑀬𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀯𑀢𑁆𑀣𑀸𑀤𑀺 𑀘 𑀫𑀼𑀢𑁆𑀢𑀸𑀤𑀺 𑀘 𑀯𑀢𑁆𑀣𑀫𑀼𑀢𑁆𑀢𑀸𑀤𑀺. 𑀇𑀢𑀭𑀦𑁆𑀢𑀺 𑀅𑀭𑀽𑀧𑀺𑀬𑀁 𑀓𑀧𑁆𑀧𑀺𑀬𑀯𑀢𑁆𑀣𑀼𑀜𑁆𑀘 𑀤𑀼𑀓𑁆𑀓𑀝𑀯𑀢𑁆𑀣𑀼𑀜𑁆𑀘. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀯𑀢𑁆𑀣𑀁 𑀲𑀼𑀢𑁆𑀢𑀁 𑀨𑀸𑀮𑁄 𑀧𑀝𑀓𑁄 𑀓𑀧𑁆𑀧𑀸𑀲𑁄 𑀅𑀦𑁂𑀓𑀧𑁆𑀧𑀓𑀸𑀭𑀁 𑀅𑀧𑀭𑀡𑁆𑀡𑀁 𑀲𑀧𑁆𑀧𑀺 𑀦𑀯𑀦𑀻𑀢𑀁 𑀢𑁂𑀮𑀁 𑀫𑀥𑀼 𑀨𑀸𑀡𑀺𑀢𑀸𑀤𑀺𑀪𑁂𑀲𑀚𑁆𑀚𑀜𑁆𑀘𑀸𑀢𑀺 𑀇𑀤𑀁 𑀓𑀧𑁆𑀧𑀺𑀬𑀯𑀢𑁆𑀣𑀼 𑀦𑀸𑀫. 𑀫𑀼𑀢𑁆𑀢𑀸 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀗𑁆𑀔𑁄𑀲𑀺𑀮𑀸 𑀧𑀯𑀸𑀴𑀁 𑀮𑁄𑀳𑀺𑀢𑀗𑁆𑀕𑁄 𑀫𑀲𑀸𑀭𑀕𑀮𑁆𑀮𑀁 𑀲𑀢𑁆𑀢 𑀥𑀜𑁆𑀜𑀸𑀦𑀺 𑀤𑀸𑀲𑀻 𑀤𑀸𑀲𑁄 𑀔𑁂𑀢𑁆𑀢𑀁 𑀯𑀢𑁆𑀣𑀼 𑀧𑀼𑀧𑁆𑀨𑀸𑀭𑀸𑀫𑀨𑀮𑀸𑀭𑀸𑀫𑀸𑀤𑀬𑁄𑀢𑀺 𑀇𑀤𑀁 𑀤𑀼𑀓𑁆𑀓𑀝𑀯𑀢𑁆𑀣𑀼 𑀦𑀸𑀫, 𑀢𑀤𑀼𑀪𑀬𑀁 𑀅𑀭𑀽𑀧𑀺𑀬𑀁 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁧𑁮. 𑀏𑀢𑁆𑀢𑀸𑀯𑀢𑀸 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀬𑀯𑀺𑀓𑁆𑀓𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑀁 𑀕𑀳𑁂𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀫𑀦𑁆𑀢𑀺 𑀢𑀡𑁆𑀟𑀼𑀮𑀸𑀤𑀺𑀓𑀁 𑀓𑀧𑁆𑀧𑀺𑀬𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀯𑀸 𑀑𑀤𑀦𑀸𑀤𑀺𑀁 𑀪𑀼𑀢𑁆𑀯𑀸 𑀯𑀸 ‘‘𑀇𑀫𑀁 𑀯𑀢𑁆𑀣𑀸𑀤𑀺𑀓𑀁 𑀓𑀧𑁆𑀧𑀺𑀬𑀪𑀡𑁆𑀟𑀁 𑀤𑁂𑀳𑀺, 𑀇𑀫𑀁 𑀭𑀚𑀦𑀧𑀘𑀦𑀸𑀤𑀺𑀓𑀁 𑀓𑀭, 𑀭𑀚𑀦𑀓𑀝𑁆𑀞𑀸𑀤𑀺𑀫𑀸 𑀦𑀬, 𑀇𑀫𑀁 𑀯𑀸 𑀢𑀯 𑀤𑁂𑀫𑀺, 𑀢𑁆𑀯𑀁 𑀧𑀦 𑀇𑀫𑀜𑁆𑀘 𑀇𑀫𑀜𑁆𑀘 𑀆𑀳𑀭, 𑀓𑀭, 𑀤𑁂𑀳𑀻’’𑀢𑀺 𑀏𑀯𑀁 𑀓𑀬𑀯𑀺𑀓𑁆𑀓𑀬𑁂 𑀲𑀫𑀸𑀧𑀦𑁆𑀦𑁂 𑀦𑀺𑀲𑁆𑀲𑀕𑁆𑀕𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁧𑁯. 𑀇𑀤𑀸𑀦𑀺 𑀧𑀭𑀺𑀡𑀸𑀫𑀯𑀲𑁂𑀦 𑀆𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀢𑀦𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀭𑀸𑀬𑀁 𑀧𑀺𑀡𑁆𑀟𑀢𑁆𑀣𑁄 (𑀧𑀸𑀭𑀸. 𑁬𑁫𑁯; 𑀧𑀸𑀭𑀸. 𑀅𑀝𑁆𑀞. 𑁨.𑁬𑁫𑁮; 𑀓𑀗𑁆𑀔𑀸. 𑀅𑀝𑁆𑀞. 𑀧𑀭𑀺𑀡𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑁋 𑀲𑀗𑁆𑀖𑀲𑁆𑀲 𑀯𑀸 𑀅𑀜𑁆𑀜𑀲𑁆𑀲 𑀯𑀸 𑀦𑀢𑀁 𑀧𑀭𑀺𑀡𑀢𑀁 𑀮𑀸𑀪𑀁 𑀮𑀪𑀺𑀢𑀩𑁆𑀩𑀁 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀁 𑀅𑀢𑁆𑀢𑀦𑁄 𑀯𑀸 𑀅𑀜𑁆𑀜𑀲𑁆𑀲 𑀯𑀸 𑀧𑀭𑀺𑀡𑀸𑀫𑁂𑀬𑁆𑀬, 𑀦𑀺𑀲𑁆𑀲𑀕𑁆𑀕𑀺𑀬𑀆𑀤𑀻𑀦𑀺 𑀳𑁄𑀦𑁆𑀢𑀻𑀢𑀺. 𑀓𑀣𑀁? 𑀬𑁄 𑀧𑀦 𑀫𑀸𑀢𑀼𑀲𑀦𑁆𑀢𑀓𑀫𑁆𑀧𑀺 𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀁 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀅𑀜𑁆𑀜𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀡𑀸𑀫𑁂𑀢𑀺, 𑀲𑀼𑀤𑁆𑀥𑀺𑀓𑀧𑀸𑀘𑀺𑀢𑁆𑀢𑀺𑀬𑀁. 𑀅𑀜𑁆𑀜𑀲𑁆𑀲 𑀲𑀗𑁆𑀖𑀲𑁆𑀲 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀧𑀭𑀺𑀡𑀸𑀫𑁂𑀢𑀺, 𑀤𑀼𑀓𑁆𑀓𑀝𑀁. 𑀬𑁄 𑀧𑀦 𑀅𑀜𑁆𑀜𑀧𑀼𑀕𑁆𑀕𑀮𑀲𑁆𑀲 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀧𑀭𑀺𑀡𑀢𑀁 𑀅𑀢𑁆𑀢𑀦𑁄 𑀯𑀸 𑀅𑀜𑁆𑀜𑀧𑀼𑀕𑁆𑀕𑀮𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀅𑀜𑁆𑀜𑀘𑁂𑀢𑀺𑀬𑀲𑁆𑀲 𑀯𑀸 𑀧𑀭𑀺𑀡𑀸𑀫𑁂𑀢𑀺, 𑀢𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀫𑁂𑀯𑀸𑀢𑀺.

𑁧𑁨𑁦. 𑀬𑁄 𑀧𑀦 𑀦𑀺𑀲𑁆𑀲𑀕𑁆𑀕𑀺𑀁 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀯𑀺𑀦𑀬𑀓𑀫𑁆𑀫𑀁 𑀅𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀬𑁄 𑀯𑀸 𑀧𑀭𑁂𑀦 𑀯𑀺𑀦𑀬𑀓𑀫𑁆𑀫𑀢𑁆𑀣𑀸𑀬 𑀦𑀺𑀲𑁆𑀲𑀝𑁆𑀞𑀁 𑀲𑀓𑀲𑀜𑁆𑀜𑀸𑀬 𑀦 𑀤𑀤𑁂𑀬𑁆𑀬, 𑀢𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀁. 𑀅𑀜𑁆𑀜𑀣𑁂𑀢𑀭𑀦𑁆𑀢𑀺 𑀏𑀢𑁆𑀣 𑀅𑀜𑁆𑀜𑀣𑀸𑀢𑀺 𑀣𑁂𑀬𑁆𑀬𑀲𑀜𑁆𑀜𑀸𑀬 𑀲𑀘𑁂 𑀦 𑀤𑀤𑁂𑀬𑁆𑀬, 𑀇𑀢𑀭𑀁 𑀢𑀲𑁆𑀲 𑀅𑀕𑁆𑀖𑀯𑀲𑁂𑀦 𑀧𑀸𑀭𑀸𑀚𑀺𑀓𑀜𑁆𑀘 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀤𑀼𑀓𑁆𑀓𑀝𑀜𑁆𑀘 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀲𑁆𑀲𑀕𑁆𑀕𑀺𑀬𑀯𑀺𑀦𑀺𑀘𑁆𑀙𑀬𑁄.

𑀦𑀺𑀲𑁆𑀲𑀕𑁆𑀕𑀺𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.